ကီလိုမီတာငါးရာကျယ်ဝန်းသော မြေအောက်လောကနယ်ပယ်(ခ)

တာအိုအစောင့်အရှောက်တစ်ပါးအနေဖြင့် ရွှင်းထိုင်နတ်ဆိုး၏ သားကို ကာကွယ်စောင့်ရှောက်ပေးရန်မှာ သူတို့ဘဝ၏ တာဝန်တစ်စိတ်တစ်ပိုင်းမျှသာ ဖြစ်သည်။ အဓိကအရေးကြီးဆုံး တာဝန်သည် သူနှင့်အတူတူ ပိုပြီးသန်မာလာရန် ဖြစ်သည်။

မျိုးနွယ်စု၏ ရှေးထုံးအစဉ်အလာအရ ရွှင်းထိုင်နတ်ဆိုးက အုပ်ချုပ်သူတစ်ပါးဖြစ်လာသည့်အခါ သူ၏ သားက သေချာပေါက် ခေါင်းဆောင်ငယ် ဖြစ်လာလိမ့်မည်။

သူတို့က တာအိုအစောင့်အရှောက်များအနေဖြင့် ရွှင်းထိုင်နတ်ဆိုး၏ သားနှင့်အတူ ပိုမိုသန်မာလာပြီး အနာဂတ်မှာ မျိုးနွယ်စု၏ ထောက်တိုင်များ ဖြစ်လာကြလိမ့်မည်။

ဥပမာ အစောနက ရွှီချင်းသတ်ဖြတ်ခဲ့သော တာအိုအစောင့်အရှောက်ဆီမှာ မဟာလောကသုံးခုသာရှိသော်လည်း သူ့ထံမှ ထုတ်လွှတ်နေသော အရှိန်အဝါသည် မဟာလောကလေးခု၏ အထွတ်အထိပ်အဆင့်နှင့် နှိုင်းယှဉ်နိုင်သည်။

အတိုင်းအတာတစ်ခုထိဆိုရလျှင် သူတို့၏ သရုပ်နှင့် အဆင့်အတန်းက အတိတ်မှာ ရွှီချင်းသတ်ဖြတ်ခဲ့သော ကင်းထောက်နှစ်ယောက်ထက် အများကြီး ပိုအဆင့်မြင့်ကြသည်။

သူတော်စင်ကုန်းမြေ၏ အဆင့်ပေါ်မူတည်၍ ကင်းထောက်များ၏ စွမ်းအားသည်လည်း ခြားနားလိမ့်မည်။

ရွှီချင်း၏ အရှေ့မှ မကောင်းဆိုးဝါးကျင့်ကြံသူသည်တော့ အစောနက တစ်ယောက်ထက်ပင် ပိုပြီးထူးခြားသည်။

လှံက ချဉ်းကပ်လာသည့်အခါ တာအိုအစောင့်အရှောက်၏ မျက်လုံးထဲတွင် ဆုံးဖြတ်ချက်ပြတ်သားမှုဖြင့် ပြည့်နှက်သွားသည်။ အသံနတ်ဘုရားအခွင့်အာဏာ၏ အဖျက်စွမ်းအားက ကြီးမားသော်လည်း သူက အနောက်ဆုတ်မည့်အစား တန်ပြန်တိုက်ခိုက်ရန် ရွေးချယ်လိုက်သည်။ ထို့ကြောင့် သူက လက်နှစ်ဖက်စလုံးဖြင့် ချိပ်တံဆိပ်လက်ဟန်တစ်ခုကို ဖွဲ့စည်းလိုက်သည်။

မျက်စိတစ်မှိတ်အတွင်းမှာ သူက နေရာမှ ရုတ်ချည်း ပျောက်ကွယ်သွားသည်။

သူက ဘေးပတ်ဝန်းကျင်မှ ပင်လယ်ရေဖြင့် အမှန်တကယ် ပေါင်းစပ်သွားသည်။

သူ၏ ခန္ဓာကိုယ်က ကြယ်တာရာကောင်းကင်ထဲမှ ပင်လယ်မျိုးနွယ်စုတစ်ခုထံမှ ဆင်းသက်လာခြင်း ဖြစ်သည်။ အစောနက သူက ပင်လယ်ရေနှင့် မပေါင်းစပ်ခဲ့ခြင်းမှာ ယင်းကို အရေးကြီးအခိုက်အတန့်တွင် သူ၏ ဝှက်ဖဲကတ်တစ်ခုအနေဖြင့် အသုံးပြုချင်သောကြောင့် ဖြစ်သည်။

ရွှီချင်းက ချဉ်းကပ်လာနေသည်ကို မြင်သောအခါ သူက ပင်လယ်ရေအဖြစ် အသွင်ပြောင်းလဲရန် လုံးဝတုံ့ဆိုင်းမနေခဲ့ပေ။ ထို့နောက် ဘေးပတ်ဝန်းကျင်မှ ပင်လယ်ရေသည် ပရမ်းပတာ လှုပ်ခတ်သွားပြီး ဒီရေစွမ်းအားကို ထုတ်ဖော်လိုက်သည်။ ယင်းက မြန်ဆန်စွာ ပျံသန်းလာနေသော အနက်ရောင်လှံဆီသို့ ဒလဟော ဝင်ဆောင့်သွားသည်။

ထို့ပြင် ပင်လယ်ရေထဲမှာ အချုပ်အနှောင်စွမ်းအင်တစ်မျိုးဖြစ်ပေါ်လာပြီး အနက်ရောင်လှံကို ကန့်သတ်လိုက်သည်။

သူက နတ်ဘုရားစိတ်အာရုံကို ထုတ်လွှတ်လိုက်ပြီး ပင်လယ်ရေမှတဆင့် တခြားတာအိုအစောင့်အရှောက်များဆီသို့ အကြောင်းကြားလိုက်သည်။

“ သူက ဒေသအရှင်သခင်ဖြစ်တော့ရော ဘာဖြစ်လဲ ”

နတ်ဘုရားစိတ်အာရုံသည် ပင်လယ်ရေထဲမှ ထွက်ပေါ်လာပြီး အရပ်ရှစ်မျက်နှာဆီသို့ ပျံ့လွင့်သွားသည်။

တစ်ချိန်တည်းမှာ တခြားမကောင်းဆိုးဝါးကျင့်ကြံသူများသည်လည်း သူတို့၏ ကိုယ်ပိုင်နည်းလမ်းများကို အသီးသီးထုတ်သုံး၍ အသံနတ်ဘုရားအခွင့်အာဏာကို တွန်းလှန်နေကြပြီး ဤအသံဘောလုံးထဲမှ ရုန်းထွက်ရန် ကြိုးစားနေကြသည်။

သို့သော်လည်း သူတို့၏ ကြိုးစားမှုက အသုံးမဝင်ဟန် ရသည်။ တချို့ဆိုလျှင် အပြင်းအထန် ဒဏ်ရာရသွားကြသည်။

ခြေလှမ်းဝက်အုပ်ချုပ်သူတစ်ပါးဖြစ်သော ရွှင်းထိုင်နတ်ဆိုး၏ တစ်ဦးတည်းသော မျိုးဆက်အနေဖြင့် သူ၏ နည်းလမ်းများသည် ထူးခြားဆန်းကြယ်သည်။

ထိုသို့အရေးကြီးအခိုက်အတန့်မှာ ကမ္မကို ပြန်ချုပ်နိုင်သော မဟာဧကရာဇ်၏ ရတနာက သူ၏ ညာလက်ဖဝါးထဲမှ ရုတ်တရက် ပျံသန်းထွက်လာသည်။ ယင်းက သွေးချည်မျှင်များနှင့်အတူ သူ၏ အရှေ့မှာ လွင့်မျောသွားသည်။ ယင်းက အနီရောင်အလင်းကို ထုတ်လွှတ်လိုက်ပြီး အရပ်မျက်နှာအဘက်ဘက်တွင် ရွေ့လျားကူးခတ်သွားသည်။

အပ်သည် ဤနေရာမှ အကြောင်းတရားနှင့် အကျိုးတရားကို ပြန်ချုပ်ပေးလိုက်ပြီး ဤနေရာမှ ကံကြမ္မာကို အမှန်ပြင်ပေးလိုက်ကာ လုယက်ခံလိုက်ရသော အသံများ၏ လမ်းကြောင်းများကို တည့်မတ်ပေးလိုက်သည်။

ဤနေရာတွင် ဥပဒေသများက ပြန်လည်ထွက်ပေါ်လာကြသည်။

တစ်ချိန်တည်းမှာ ထိုတာအိုအစောင့်အရှောက်၏ လမ်းညွှန်ပေးမှုကြောင့် ဤနေရာမှ ပင်လယ်ရေသည် ရွှီချင်းရှိနေသော နေရာဆီသို့ ချက်ချင်း ဦးတည်သွားသည်။

အကယ်၍ အသံနတ်ဘုရားအခွင့်အာဏာက ရေခဲဖြစ်သည်ဆိုလျှင် ထိုအပ်မှ ထုတ်လွှတ်နေသော ဖိအားက မီးတောက်ချော်ရည်ဖြစ်သည်။ အပ်ဖြတ်သန်းသွားသည့်နေရာတိုင်း အသံနတ်ဘုရားအခွင့်အာဏာက အနောက်သို့ တွန်းထုတ်ခံလိုက်ရသည်။

“ အပ်ရဲ့ လမ်းပြမှုနောက်ကို လိုက်ပြီး ရွှီချင်းကို ရှာပါ… ပြီးရင် သူ့ကို သတ်ပစ် ”

ရွှင်းထိုင်နတ်ဆိုး၏ သား၏ စကားသံက ပဲ့တင်ထပ်သွားသည်နှင့်ချက်ချင်း အပ်မှ ထုတ်လွှတ်လိုက်သော အနီရောင်အလင်းက ချည်မျှင်များသဖွယ် ရွှီချင်းတည်ရှိနေသော နေရာဆီသို့ ဦးတည်သွားသည်။ တခြားနေရာများမှာ ပြန့်ကျဲနေကြသော မကောင်းဆိုးဝါးကျင့်ကြံသူများသည် ယင်းကို ချက်ချင်း အာရုံခံမိသွားကြသည်။ အပ်၏ လမ်းပြပေးမှုအောက်မှာ သူတို့က ရွှီချင်းဆီသို့ မြန်ဆန်စွာ ဦးတည်သွားကြသည်။

သို့သော်လည်း သူတို့က အပ်၏ လမ်းပြမှုနောက်သို့ လိုက်သွားသည်နှင့်ချက်ချင်း ပင်လယ်ရေနှင့် ပေါင်းစပ်ထားသော မကောင်းဆိုးဝါးကျင့်ကြံသူက တုန်လှုပ်ချောက်ချားသွားသည်။ သူ၏ ဒီရေစွမ်းအားနှင့် အချုပ်အနှောင်စွမ်းအားက အနက်ရောင်လှံကို ကန့်သတ်ထားသော်လည်း ဤအခိုက်အတန့်မှာ လှံက ရုတ်တရက် ပျောက်ကွယ်သွားသည်။ ရွှီချင်း၏ ပုံရိပ်က လှံ၏ နေရာမှာ ထွက်ပေါ်လာသည်။ သူက တစ်ဖက်လူ၏ စွမ်းအင်အားလုံးကို လျစ်လျူရှုထားလျက် အရှေ့သို့ လျှောက်သွားသည်။

ဤသည်မှာ ဒီရေစွမ်းအားနှင့် အချုပ်အနှောင်စွမ်းအားက သူ့အတွက်တော့ သိမ်မွေ့ညင်သာသော လေပြေတိုက်ခတ်မှုထက် မပိုသည့်အလားပင်။ ရွှီချင်း၏ ဆံခြည်မျှင်တချို့သည်သာ လှုပ်ခတ်သွားသည်။

သူက ခြေထောက်အောက်ချလိုက်သည့်အခါ တာအိုအစောင့်အရှောက်ဖြင့် ပေါင်းစပ်ထားသော ပင်လယ်ရေဆီသို့ ရောက်ရှိသွားသည်။ စက္ကန့်ပိုင်းအတွင်းမှာ တာအိုအစောင့်အရှောက်က တုန်လှုပ်ချောက်ချားသွားသည်။ ဤအခိုက်အတန့်မှာ ရွှီချင်း၏ အသံနတ်ဘုရားအခွင့်အာဏာက ထွက်ပေါ်လာသည်။

ဗုန်းဟူသော မြည်သံနှင့်အတူ ပင်လယ်ရေ၏ တစ်စိတ်တစ်ပိုင်းက တိုက်ရိုက် ပေါက်ကွဲသွားသည်။

‘ မင်းက ပင်လယ်ရေနဲ့ ပေါင်းစပ်သွားမှတော့ နောက်တစ်ခါ ပြန်ထွက်ပေါ်လာဖို့ မလိုတော့ဘူး… ပင်လယ်ထဲမှာပဲ ထာဝရ အိပ်စက်လိုက်တော့ ’

ကျယ်လောင်သော မြည်သံက ပဲ့တင်ထပ်သွားသည့်အခါ ရွှီချင်းက နေရာမှ ထွက်ခွာသွားသည်။

တစ်ချိန်တည်းမှာ ကံကြမ္မာဆိုးသည် ကီလိုမီတာငါးရာဧရိယာအတွင်းမှာ ပျံ့နှံ့သွားပြီး အသံနတ်ဘုရားအခွင့်အာဏာဖြင့် ပေါင်းစပ်သွားသည်။ ယင်းက ဤဧရိယာအတွင်းမှာ ထူးဆန်းမှုများကို ဖြစ်ပေါ်လာစေသည်။

ထိုမြင်ကွင်းက ဤနေရာဆီသို့ အမြန်ပြေးလာနေကြသော တခြားတာအိုအစောင့်အရှောက်များ၏ နတ်ဘုရားစိတ်အာရုံထဲသို့ ဝင်ရောက်သွားသည့်အခါ သူတို့အားလုံး ကြောက်လန့်တုန်လှုပ်သွားကြသည်။

သတ်ဖြတ်မှုသည် ဆက်လက် ဖြစ်ပွားနေသည်။

ဒုတိယတာအိုအစောင့်အရှောက်ကို သေဆုံးစေခဲ့သော ပေါက်ကွဲသံက ကီလိုမီတာဒါဇင်ခန့်ထိ ပျံ့လွင့်သွားပြီး အသံနတ်ဘုရားအခွင့်အာဏာကို အစွမ်းတိုးမြှင့်ပေးလိုက်သည်။ ထိုအသံကို တတိယတာအိုအစောင့်အရှောက်က ကြားသွားသောအခါ အဆုံးမဲ့သော ဝိညာဉ်ချည်မျှင်များက သူ၏ မျက်စိရှေ့မှာ ထွက်ပေါ်လာကြသည်။

ဝိညာဉ်ချည်မျှင်များမှ ဖွဲ့စည်းသွားသော မဟာလောကက ထိုတာအိုအစောင့်အရှောက်ကို ဖိနှိပ်လိုက်သည်။

ထိုကျင့်ကြံသူသည် တုန်ယင်သွားသည်။ မရေမတွက်နိုင်သော အသားအဖုအပိမ့်များက သူ၏ ခန္ဓာကိုယ်ပေါ်မှာ ထွက်ပေါ်လာကြသည်။ နောက်အခိုက်အတန့်မှာ သူ၏ ခန္ဓာကိုယ်က ပေါက်ကွဲထွက်သွားသည်။ ထို့နောက် အနက်ရောင်အင်းဆက်များက သူ၏ ခန္ဓာကိုယ်ထဲမှ အစုလိုက်အပြုံလိုက် ပျံသန်းထွက်လာကြသည်။

သူ၏ ခန္ဓာကိုယ်ကို သေးငယ်သော အင်းဆက်များဖြင့် ဖွဲ့စည်းထားခြင်း ဖြစ်သည်။

ဤအခိုက်အတန့်မှာ ထိုအင်းဆက်များက အရပ်ရှစ်မျက်နှာဆီသို့ ပျံ့နှံ့သွားကြပြီး ဦးတည်ရာအမျိုးမျိုးဆီသို့ ထွက်ပြေးသွားကြသည်။

ထူးဆန်းသော အလင်းရောင်က ရွှီချင်း၏ မျက်လုံးထဲမှာ ထွက်ပေါ်လာသည်။ ယခု သူက မကောင်းဆိုးဝါးကျင့်ကြံသူများကို ပိုပြီးကောင်းမွန်စွာ နားလည်သွားသည်။

သူတို့တစ်ယောက်စီမှာ ထူးဆန်းသော စွမ်းရည်များ ရှိကြသည်။

ရွှီချင်းက နက်နဲစွာ တွေးလိုက်သည်။ ထို့နောက် မဟာလောကသည် တုန်ယင်သွားပြီး အစိတ်စိတ်အမွှာမွှာ ပြန့်ကျဲသွားသည်။ မဟာလောကကို ဖွဲ့စည်းခဲ့သော ဝိညာဉ်ချည်မျှင်သန်းငါးဆယ်သည် ရုတ်တရက် အရပ်မျက်နှာအသီးသီးဆီသို့ ပျံသန်းသွားကြသည်။

အသံနတ်ဘုရားအခွင့်အာဏာနှင့် ကံကြမ္မာဆိုး၏ လမ်းပြမှုအောက်မှာ ဝိညာဉ်ချည်မျှင်များသည် အင်းဆက်အားလုံး၏ အနောက်သို့ အကြင်နာမဲ့စွာ လိုက်ဖမ်းဆီးကြသည်။

ဝိညာဉ်ချည်မျှင်သန်းငါးဆယ်၏ လိုက်ဖမ်းမှုကြောင့် ရလဒ်က ပေါ်ထွက်လာပြီးသား ဖြစ်သည်။ ထို့နောက် ရွှီချင်းက တခြားဦးတည်ရာဆီသို့ ကြည့်လိုက်သည်။

ဤအခိုက်အတန့်မှာ ကီလိုမီတာငါးရာအတွင်းတွင် အသက်ရှင်ကျန်ရှိသော တာအိုအစောင့်အရှောက်အများစုသည် သူတို့၏ သခင်လေးဖြင့် ပြန်ပေါင်းစည်းသွားကြသည်။

ယခု ရွှီချင်းကြည့်နေသော ဦးတည်ရာဆီမှာသာ တာအိုအစောင့်အရှောက် တစ်ယောက်တည်းရှိသည်။

ဤသည်မှာ ယင်းကို ရည်ရွယ်ချက်ရှိစွာ လုပ်ဆောင်ထားသည့်အလားပင်။

ရွှီချင်းက မျက်မှောင်ကြုတ်လိုက်ပြီး အရှေ့သို့ လျှောက်သွားသည်။

သူက ထိုနေရာမှာ ထွက်ပေါ်လာသည့်အခိုက် တစ်ယောက်တည်းရှိနေသော တာအိုအစောင့်အရှောက်ကို မြင်သွားသည်။

ရွှီချင်းကို မြင်လိုက်သည်နှင့်ချက်ချင်း ထိုတာအိုအစောင့်အရှောက်က ရုတ်တရက် အနောက်သို့ လှည့်လိုက်သည်။ မျက်တောင်တစ်ခတ်အတွင်းမှာ သူ၏ ရုပ်အသွင်သဏ္ဍာန်က အံ့အားသင့်ဖွယ်ကောင်းစွာ ရွှီချင်းနှင့် တစ်ပုံစံတည်း တူညီသွားသည်။

ရုပ်အသွင်သဏ္ဍာန်တစ်ခုတည်း မဟုတ်ပေ။ သူ၏ အရှိန်အဝါ၊ ကမ္မနှင့် ကံတရားသည်ပင် ဆက်သွယ်သွားဟန် ရ၏။

“ ငါက မင်းကို အချိန်အကြာကြီး စောင့်နေခဲ့တာ… အခု မင်းရဲ့ ကမ္မနဲ့ ကံတရားက ငါနဲ့ ဆက်သွယ်သွားပြီ… အခုကစပြီး ငါ့ရဲ့ ဒဏ်ရာတွေက မင်းရဲ့ ဒဏ်ရာတွေဖြစ်လာမယ်… ငါ့ရဲ့ သေဆုံးမှုက မင်းရဲ့ သေဆုံးမှုဖြစ်လာမယ် ”

ရွှီချင်းနှင့် ရုပ်ချင်းဆင်တူသော ထိုတာအိုအစောင့်အရှောက်က အေးစက်စွာ ပြောသည်။

ရွှီချင်းက သူ့ကို ကြည့်လိုက်သည်။ သူက မည်သည့်စကားမှ မပြောဘဲ ခေါင်းသာ ယမ်းလိုက်သည်။

ထို့နောက် သူက အရှေ့သို့ ခြေတစ်လှမ်း လှမ်းလိုက်ပြီး ညာလက်ကို အပေါ်သို့ မြှောက်လိုက်သည်။ စမ်းချောင်းကိုးခုပညာရပ်ဖြင့် ပေါင်းစပ်ထားသည့် သူ၏ မဖျက်ဆီးနိုင်သော အင်ပါယာလက်သီးက ကောင်းကင်ဘုံတုန်လှုပ်စေနိုင်သော စွမ်းအားကို ထုတ်ဖော်လိုက်သည်။

အလွန်ကြမ်းကြုတ်သော စွမ်းအားက ထိုလူ၏ ခန္ဓာကိုယ်ပေါ်သို့ ကျရောက်သွားသည်။

ထိုတာအိုအစောင့်အရှောက်သည် လုံးဝမခုခံပေ။ သူက ရွှီချင်း၏ လက်သီးကို သူ့အပေါ်သို့ ကျရောက်လာစေရန် ခွင့်ပြုထားသည်။ ထို့နောက် သူက အပြင်းအထန် တုန်ယင်သွားပြီး အဝေးသို့ လွင့်စင်သွားကာ သွေးတစ်ပွက် အန်လိုက်ရသည်။

သူက ရွှီချင်းကို ကြည့်လိုက်လေရာ သူ၏ အမူအရာက အေးစက်သွားသည်။ သူ၏ ဤဝှက်ဖဲကတ်က အမြဲတမ်း အောင်မြင်ခဲ့သည်။

သို့သော်လည်း ရွှီချင်းက ဒုတိယလက်သီးကို တည်ငြိမ်စွာ ထိုးလွှတ်လိုက်သည်။

ပင်လယ်ရေသည် ပရမ်းပတာ လှုပ်ခတ်သွားသည်။

တာအိုအစောင့်အရှောက်သည် သွေးတစ်ပွက် ထပ်အန်လိုက်ရပြီး သူ၏ ခန္ဓာကိုယ်သည် အနောက်သို့ လွင့်စင်သွားသည်။ ရွှီချင်းက စစ်နတ်ဘုရားတစ်ပါးသဖွယ် ဆက်ပြီး လျှောက်လှမ်းလာသည်။

တာအိုအစောင့်အရှောက်သည် နောက်ဆုံးမှာတော့ အမူအရာပျက်ယွင်းသွားသည်။ တစ်ဖက်လူ၏ ကြောက်စရာကောင်းသော လက်သီးက သူ့အပေါ်သို့ ကျရောက်လာသည့်အခိုက် တစ်ဖက်လူက တန်ပြန်ဆိုးကျိုးကို ခံစားလိုက်ရကြောင်း သူအာရုံခံမိခဲ့သည်။

သို့သော်လည်း သူ၏ ကိုယ်တွင်းအင်္ဂါများက ဗြောင်းဆန်နေပြီး သူက ပြင်းထန်စွာ ဒဏ်ရာရရှိသွားစဉ် တစ်ဖက်လူက အကောင်းတိုင်း ဆက်ရှိနေဆဲပင်။

“ မင်း… ”

သူက ထိုသို့အခြေအနေကို ယခင်က တစ်ခါမှ မကြုံဖူးပေ။ သို့ဖြစ်၍ အစက ယုံကြည်မှုပြည့်ဝနေသော သူက ယခု အံ့ဩထိတ်လန့်သွားပြီး ထွက်ပြေးရန် ကြိုးစားလိုက်သည်။ သို့သော်လည်း ယင်းက အလွန်နောက်ကျသွားချေ၏။

ရွှီချင်းက တာအိုအစောင့်အရှောက်၏ အရှေ့မှာ ချက်ချင်း ထွက်ပေါ်လာပြီး သူ့ကို ထပ်ခါထပ်ခါ ထိုးလိုက်သည်။

အသက်ရှူချိန်အနည်းငယ်အတွင်းမှာ သူက ကိုးကြိမ်တိုင်အောင် လက်သီးထိုးလွှတ်ခဲ့သည်။

ကိုးကြိမ်မြောက် လက်သီးက တာအိုအစောင့်အရှောက်ပေါ်သို့ ကျရောက်သွားသည့်အခါ သူ၏ ခန္ဓာကိုယ်က အပိုင်းပိုင်းအစစ ပေါက်ကွဲသွားသည်။

သူ၏ ခန္ဓာကိုယ်နှင့် ဝိညာဉ်က ဖျက်ဆီးခံလိုက်ရသည်။

သို့သော်လည်း နောက်အခိုက်အတန့်မှာ တစ်ဖက်လူ၏ ခန္ဓာကိုယ်က နောက်တစ်ကြိမ် ပြန်လည်ဖွဲ့စည်းသွားသည်။ ဤသည်မှာ သူက ထာဝရရှင်သန်နိုင်သည့်အလားပင်။ ထိုအကြောင်းအရင်းကြောင့် သူက ကမ္မဆက်သွယ်မှုအတတ်ကို နှစ်ပေါင်းများစွာကြာအောင် အသုံးပြုဝံ့ခြင်း ဖြစ်သည်။

သို့သော်လည်း ထိုအခိုက်အတန့်မှာ ရွှေကျီးကန်းက ဒြပ်ထည်ဖြစ်ပေါ်လာပြီး သူ့ကို တိုက်ရိုက် ဝါးမျိုလိုက်သည်။

မည်သည့်အစအနမှ မကျန်ရစ်ခဲ့ပေ။

ရွှီချင်းသည် နေရာမှာ ရပ်နေပြီး ဤတိုက်ပွဲမှာ ပထမဆုံးအကြိမ် တည်ငြိမ်စွာ စကားပြောလိုက်သည်။

“ ငါ့ရဲ့ ကမ္မက မင်းတောင့်ခံနိုင်တဲ့အရာ မဟုတ်ဘူး ”

တစ်ချိန်တည်းမှာ အော်ဟစ်ညည်းညူသံများသည် ကီလိုမီတာငါးရာကျယ်ဝန်းသော အသံဘောလုံးထဲရှိ နေရာတိုင်းမှ ပဲ့တင်ထပ်လာသည်။

ထိုအော်ဟစ်ညည်းညူသံများသည် တတိယတာအိုအစောင့်အရှောက်က အသွင်ပြောင်းလဲခဲ့သော အင်းဆက်များထံမှ ဖြစ်သည်။

ဝိညာဉ်ချည်မျှင်များ၏ လျှင်မြန်စွာ လိုက်ဖမ်းမှုအောက်မှာ အင်းဆက်များသည် တစ်ကောင်မှ မလွတ်မြောက်နိုင်ခဲ့ပေ။

၎င်းတို့က မြန်ဆန်စွာ ဖမ်းဆီးခံလိုက်ရပြီး ဝါးမျိုခံလိုက်ရကြသည်။

“ ဒါဆိုရင် နောက်ဆုံးကျန်နေခဲ့တဲ့ လူတွေကို ဖြေရှင်းဖို့ အချိန်ကျပြီ ”

ရွှီချင်းက အရှေ့သို့ ခြေတစ်လှမ်း လှမ်းလိုက်သည့်အခါ သူ၏ အကြည့်က အေးစက်သွားသည်။

အသံဘောလုံးထဲတွင် ခရမ်းလက အပေါ်သို့ မြှောက်တတ်သွားသည်။ ခရမ်းရောင်လရောင်ခြည်သည် ပြင်းထန်သော သတ်ဖြတ်ခြင်းစိတ်ဆန္ဒကို သယ်ဆောင်လျက် အရပ်မျက်နှာအသီးသီးဆီသို့ ပျံ့နှံ့သွားသည်။ ယင်းက ပင်လယ်ရေကိုပင် ပိုပြီးအေးစက်သွားစေသည်။

ဤအခိုက်အတန့်မှာ တားမြစ်အဆိပ်သည်လည်း ပင်လယ်ရေထဲမှာ ပေါ်လျှိုးလာသည်။ အဆိပ်က ဆက်လက် ပျံ့ပွားသွားနေစဉ် ဧရာမမျက်လုံးတစ်လုံးက ဖွင့်လှစ်သွားသည်။

ယင်းက မြေအောက်လောကအဖြစ်သို့ တဖြည်းဖြည်း ပြောင်းလဲသွားနေသော ပင်လယ်ရေအောက်ကို စူးစိုက်ကြည့်နေသည့် မင်ဖေး၏ မျက်လုံးသာ ဖြစ်သည်။