ယနေ့ သက်ရှိအားလုံးက သူ့အတွက် ရပ်တည်ပေးတယ်(ခ)

မတူညီသော ဘွဲ့နာမည်များက အင်အားစုအသီးသီး၏ စစ်တပ်များထံမှ ပဲ့တင်ထပ်လာသည်။ ထိုစကားလုံးများက တစ်ခုနှင့်တစ်ခု မတူကွဲပြားသော်လည်း ယင်းထဲမှာ ပါဝင်နေသော ရိုသေလေးစားမှုနှင့် စိတ်အားထက်သန်မှုက အမှားအယွင်းမရှိ လုံးဝတစ်ထပ်တည်းကျသည်။

သူက သန့်စင်ရေလှိုင်းဒေသကြီးနှင့် ဝိညာဉ်နက်ဒေသကြီး၏ ဒေသအရှင်သခင်ဖြစ်သည်။

သူက လူသားမျိုးနွယ်၏ အတိုင်ပင်ခံအမတ်ဖြစ်သည်။

သူက ချီယွဲ့ထုံဂိုဏ်း၏ တာအိုကလေးဖြစ်သည်။

သူက လပုန်ကန်ခန်းမ၏ အရှင်သခင်ဖြစ်သည်။

ယင်းတို့အားလုံးက သူ့ကိုယ်ပိုင်ခွန်အားကို တစ်ဆင့်ပြီးတစ်ဆင့် စုဆောင်းပြီးနောက် သူရရှိလာခဲ့သော အောင်မြင်မှုများ ဖြစ်ကြသည်။

အစတွင် ရွှီချင်းက လေ့ကျင့်နေစဉ် သူ၏ သရုပ်အားလုံးကို မဖော်ထုတ်ခဲ့ပေ။ သူက သူ့ဆရာ၏ တောင်းဆိုမှုအတိုင်း လိုက်နာပြီး သူ့ကိုယ်သူ ထုဆစ်ပုံဖော်ချင်သည်။

သို့သော်လည်း သူလေ့ကျင့်နေစဉ်အတွင်း ရွှင်းထိုင်နတ်ဆိုးက သူ့ကို သေဆုံးလုနီးပါးဖြစ်စေခဲ့သောကြောင့် ယနေ့ သူရောက်လာရခြင်း ဖြစ်သည်။

သူက သူ၏ အင်အားစုအားလုံးကို အသုံးပြုတော့ပေမည်။

သူက လမ်းလျှောက်လာနေစဉ် မိုးခြိမ်းသံက နားကွဲလုမတတ် ပဲ့တင်ထပ်သွားသည်။

သူက မကောင်းဆိုးဝါးသူတော်စင်ကုန်းမြေဆီသို့ ရောက်ရန် ကီလိုမီတာငါးဆယ်သာ ကွာဝေးတော့သည်။

မကောင်းဆိုးဝါးသူတော်စင်ကုန်းမြေသည်တော့ သူတို့၏ အကာအကွယ်စည်းချအစီအရင်က ပြိုကွဲသွားပြီ ဖြစ်သည်။ သူတော်စင်ကုန်းမြေထဲမှ မျိုးနွယ်ဝင်အားလုံးက တုန်ယင်နေကြပြီး စိတ်ပျက်အားလျော့နေကြသည်။

အဘက်ဘက်မှ ဖိအားအောက်မှာ သူတို့၏ ခန္ဓာကိုယ်နှင့် ဝိညာဉ်က ညှဉ်းပန်းနှိပ်စက်ခံနေရသည်။ သူတို့က လှုပ်ရှားလိုက်သည်နှင့် သွေးသည် သူတို့၏ ပါးစပ်ထောင့်မှ စီးကျလာသည်။

မကောင်းဆိုးဝါးဘိုးဘေး၏ အမူအရာသည် ပိုပြီးမည်းမှောင်သွားသည်။ ဤရက်များတွင် သူက ပြင်ဆင်မှုများကို ပြုလုပ်ထားခဲ့သည်။ သို့သော်လည်း ရွှီချင်း၏ လမ်းလျှောက်လာနေသော ပုံရိပ်ကို သူမြင်လိုက်သောအခါ နှလုံးခုန်မြန်လာသည်။

အဆိုးဝါးဆုံး ရလဒ်က ဖြစ်ပေါ်လာသည်။

“ ရွှင်းထိုင်နတ်ဆိုးက… ကျရှုံးသွားပြီ… ”

မကောင်းဆိုးဝါးဘိုးဘေးသည် ခါးသီးမှုကို ခံစားမိသွားသည်။ သူက လမ်းလျှောက်လာနေသော ရွှီချင်းကို ကြည့်လိုက်ပြီး လုံးဝ တုံ့ဆိုင်းမနေတော့ပေ။ သူက ရွှီချင်းထံမှ အကြည့်ရွှေ့ပြောင်းလိုက်ပြီး ကောင်းကင်ပေါ်မှ ဘုရင်ကျန်းယန်ကို ကြည့်လိုက်သည်။

“ လူသားမျိုးနွယ်က ဘုရင်ကျန်းယန်… ကျေးဇူးပြုပြီး နွေဦးထွက်ခွာဧကရီကို အကြောင်းကြားပေးပါ… ငါ့ရဲ့ မကောင်းဆိုးဝါးသူတော်စင်ကုန်းမြေက လူသားမျိုးနွယ်ဆီမှာ အညံ့ခံပြီး လက်အောက်ခံမျိုးနွယ်ဖြစ်လာဖို့ ဆန္ဒရှိပါတယ် ”

“ အဲ့ဒါကို ငါ့မျိုးနွယ်ရဲ့ နာမည်နဲ့ ကမ္မပေါ်မှာ ကျိန်ဆိုပါတယ်… တကယ်လို့ လူသားမျိုးနွယ်က သဘောတူမယ်ဆိုရင် ဒီကတိကို မျိုးဆက်အစဉ်အဆက် စောင့်ထိန်းသွားပါမယ် ”

မကောင်းဆိုးဝါးသူတော်စင်ကုန်းမြေ၏ ဘိုးဘေးအနေဖြင့် သူ့မှာ ကိုယ်ပိုင်အကြံအစည်များ ရှိသည်။ ရွှင်းထိုင်နတ်ဆိုးကို ကာကွယ်ရန် သူဆုံးဖြတ်လိုက်ကတည်းက အရာအားလုံးကို ကြိုတင်သုံးသပ်ခဲ့သည်။

ယခု အဆိုးဝါးဆုံး ရလဒ်က ထွက်ပေါ်လာလေရာ သူ့အတွက် ရွေးချယ်စရာက အနည်းငယ်သာ ကျန်ရှိတော့သည်။

ဟင်းလင်းပြင်ကြယ်သူတော်စင်ကုန်းမြေ၏ အရှင်သခင်မှာ ကြောက်စရာကောင်းသော ကျင့်ကြံခြင်းအခြေခံရှိပြီး သူ့ကို သစ္စာဖောက်လျှင် နောက်ဆက်တွဲအကျိုးဆက်က အလွန်ကြီးမားလိမ့်မည်။ သို့သော်လည်း ယခုအခြေအနေတွင် သူ့မှာ တခြားရွေးချယ်စရာမရှိပေ။

သို့ဖြစ်၍ သူက ဆက်ပြောသည်။

“ ဒီအဖိုးကြီးက ဧကရီရဲ့ ချိပ်တံဆိပ်ကို လက်ခံဖို့ ဆန္ဒရှိပါတယ်… ဒါ့အပြင် ငါက ကျင့်ကြံခြင်းလမ်းစဉ်ကို ပြောင်းလဲပြီး နတ်ဘုရားမီးတောက်ကို ထွန်းညှိချင်ပါတယ် ”

“ ဒီနည်းနဲ့ ငါက သူတော်စင်ကုန်းမြေတွေနဲ့ အဆက်အသွယ်အားလုံးကို လုံးဝဖြတ်တောက်နိုင်လိမ့်မယ် ”

သူက ထိုသို့ပြောလိုက်သည့်အခါ သူတော်စင်ကုန်းမြေ၏ အပြင်ဘက်မှ လူတိုင်း၏ အကြည့်က ဘုရင်ကျန်းယန်ပေါ်သို့ ကျရောက်သွားသည်။

ဘုရင်ကျန်းယန်က နှုတ်ဆိတ်နေသည်။

ရွှီချင်းက လုံးဝမရပ်တန့်ခဲ့ပေ။ ဤအခိုက်အတန့်မှာ သူက မကောင်းဆိုးဝါးသူတော်စင်ကုန်းမြေနှင့် ဆယ့်ငါးကီလိုမီတာသာ ကွာဝေးတော့သည်။

ယင်းကို မြင်သောအခါ မကောင်းဆိုးဝါးဘိုးဘေးက ထပ်မံ ပြောသည်။

“ ငါနတ်ဘုရားဖြစ်လာတဲ့အခါကျရင် နတ်ဘုရားယဇ်ပလ္လင်အဆင့်ကို တတ်လှမ်းနိုင်ဖို့ အခွင့်အရေးများလိမ့်မယ်… အဲ့ဒီအချိန်ကျရင် ငါက လူသားမျိုးနွယ်အတွက်ရော မီးလျှံလအတွက်ရော ကြီးမားတဲ့ အကူအညီဖြစ်လာလိမ့်မယ်… ပိုပြီးအစွမ်းထက်တဲ့ သူတော်စင်ကုန်းမြေတွေ ဆင်းသက်လာတဲ့အခါကျရင် မင်းတို့ဘက်ကနေ ငါဝင်တိုက်ခိုက်ပေးနိုင်တယ် ”

သူက ဟင်းလင်းပြင်ကြယ်သူတော်စင်ကုန်းမြေ၏ အရှင်သခင်ကို ကြောက်ရွံ့သော်လည်း အကယ်၍ သူသာ နတ်ဘုရားမီးတောက်ကို ထွန်းညှိနိုင်မည်ဆိုလျှင် သူက ကျင့်ကြံသူတစ်ယောက်မဟုတ်တော့ဘဲ နတ်ဘုရားတစ်ပါး ဖြစ်လာလိမ့်မည်။

ထိုအရှင်သခင်၏ အစီအစဉ်သည် နတ်ဘုရားများနှင့် တတ်နိုင်သမျှ မပတ်သက်ရန် လိုအပ်ကြောင်း သူသိထားသည်။

ယင်းက လုံးဝ ဘေးကင်းလုံခြုံသော အစီအစဉ်မဟုတ်သော်လည်း ယခုကဲ့သို့ အခြေအနေမျိုးမှာ ယင်းက သူစဉ်းစားမိသော တစ်ခုတည်းသောနည်းလမ်း ဖြစ်သည်။

ထို့ကြောင့် သူက ဘုရင်ကျန်းယန်ကို တိုက်ရိုက်ပြောနေခြင်း ဖြစ်သည်။ အဘယ့်ကြောင့်ဆိုသော် ယခုအချိန်မှာ သူ့ကို ကယ်တင်နိုင်မည့် တစ်ဦးတည်းသောလူက ဧကရီဖြစ်သည်။

ဧကရီသည် နတ်ဘုရားတစ်ပါးဖြစ်သလို လူသားတစ်ယောက်လည်း ဖြစ်သည်။ သူ၏ လုပ်ဆောင်မှုတိုင်းတွင် မျိုးနွယ်စုကိုသာ အဓိကဦးစားပေးသည်။

“ တကယ်ဆို ဧကရီက ရွှင်းထိုင်နတ်ဆိုးကို ရှာဖွေနိုင်တယ်… ဒါပေမဲ့ သူက ဒီအခွင့်အရေးကို အသုံးချပြီး သူ့ရဲ့ အခွင့်အာဏာကို ထုတ်ဖော်ပြခဲ့တယ်… ဒါကိုကြည့်ရင် ငါ့ရဲ့ ခန့်မှန်းချက်က မမှားယွင်းနိုင်ဘူး… သူက ငါ့မျိုးနွယ်ကို လက်ခံလိုက်မယ်ဆိုရင် လူသားမျိုးနွယ်က ပိုပြီးအင်အားကြီးမားလာလိမ့်မယ်… အဲ့ဒါဆိုရင် ရွှီချင်းက ဘယ်လိုပဲတွေးပါစေ အသုံးမဝင်တော့ဘူး ”

သို့သော်လည်း ထိုအတွေးများက မည်မျှကောင်းမွန်ပါစေ ဘုရင်ကျန်းယန်က နှုတ်ဆိတ်နေဆဲပင်။

ရွှီချင်းက အနားရောက်လာသည့်အခါ သူ့အရှေ့မှ လူအုပ်ကြီးက သူ့ကို ရိုသေလေးစားစွာ လမ်းဖယ်ပေးလိုက်ကြသည်။ ထိုသို့ဖြင့် ရွှီချင်းက မကောင်းဆိုးဝါးသူတော်စင်ကုန်းမြေဆီသို့ တစ်လှမ်းချင်း ဆက်လျှောက်သွားသည်။

မကောင်းဆိုးဝါးဘိုးဘေးက ရွှီချင်းကို လျစ်လျူရှုထားပြီး ဆက်လက် ပြောသည်။

“ နွေဦးထွက်ခွာဧကရီ… တခြားသူတော်စင်ကုန်းမြေတွေရဲ့ လျှို့ဝှက်ချက်တွေကို ငါသိထားတယ်… ဘာလို့ သူတော်စင်ကုန်းမြေတွေက ဝမ်ကူးကုန်းမြေပေါ် ဆင်းသက်လာတာလဲ ငါပြောပြနိုင်တယ်… နောက်ထပ် ဆင်းသက်လာမယ့် သူတော်စင်ကုန်းမြေတွေရဲ့ တည်နေရာကိုလည်း ငါသိတယ် ”

“ ဝမ်ကူးကုန်းမြေက မကြာခင် စစ်ပွဲဖြစ်တော့မယ် ”

“ အဲ့ဒါကို ရှောင်လွှဲဖို့ဆိုတာ မဖြစ်နိုင်ဘူး… ဒါပေမဲ့ ငါပေးမယ့် သတင်းအချက်အလက်တွေက ဒီစစ်ပွဲမှာ လူသားမျိုးနွယ်ကို အကျိုးရှိစေလိမ့်မယ် ”

“ ဒါ့အပြင် ရွှီချင်းက ဘာမှမဖြစ်သွားခဲ့ဘူး… ရွှင်းထိုင်နတ်ဆိုးကလည်း ကြီးမားတဲ့ တန်ကြေးကို ပေးဆပ်ခဲ့ရတယ်… ဒါကြောင့် ဒီကိစ္စကို ဒီမှာတင်ပြီးဆုံးစေဖို့ ဧကရီကို ငါတောင်းဆိုချင်ပါတယ်… ရွှင်းထိုင်နတ်ဆိုးကို အပြစ်ကြွေးပြန်ဆပ်ခိုင်းတဲ့အနေနဲ့ လူသားမျိုးနွယ်အပေါ် အလုပ်အကြွေးပြုခွင့်ပေးနိုင်မလား ”

မကောင်းဆိုးဝါးဘိုးဘေးက ကောင်းကင်၏ အဆုံးကို ကြည့်လိုက်သည်။

ထိုနေရာမှာ ဧကရီရှိနေကြောင်း သူအာရုံခံနိုင်သည်။

သူက ရွှီချင်းကို လုံးဝမကြည့်ချေ။ သူက ဧကရီ၏ အဖြေကိုသာ စောင့်ဆိုင်းသည်။

သူကိုယ်တိုင်အပါအဝင် သူ၏ မျိုးနွယ်နှင့် သူသိထားသော သတင်းအချက်အလက်များက ရွှင်းထိုင်နတ်ဆိုး၏ အပြစ်ကြွေးနှင့် သူ့မျိုးနွယ်၏ ရှင်သန်မှုကို လဲလှယ်နိုင်လိမ့်မည်ဟု သူယုံကြည်သည်။

ထို့ကြောင့် သူက ကောင်းကင်ကို အရိုအသေပေးလိုက်သည်။

ဤအခိုက်အတန့်မှာ ဘုရင်ကျန်းယန်က နောက်ဆုံးမှာတော့ မျက်မှောင်ကြုတ်သွားသည်။

ဘေးပတ်ဝန်းကျင်မှ လပူဇော်ဒေသကြီး၊ ချီယွဲ့ထုံဂိုဏ်း၊ နန်းဟွမ်ကုန်းမြေ၊ သန့်စင်ရေလှိုင်းဒေသကြီးနှင့် ဝိညာဉ်နက်ဒေသကြီးထဲမှ စစ်တပ်များသည်တော့ မလှုပ်ရှားသွားကြချေ။ ဤနေရာတွင် သူတို့ကို အမိန့်ပေးနိုင်သူသည် ရွှီချင်းဖြစ်သည်။ ဧကရီမဟုတ်ပေ။

ထိုအခိုက်အတန့်မှာ ရွှီချင်းက သူတော်စင်ကုန်းမြေ၏ အပေါ်သို့ ရောက်ရှိသွားသည်။ သူက လက်ရှိအခြေအနေကို တည်ငြိမ်သော အမူအရာဖြင့် ကြည့်လိုက်ပြီး ကောင်းကင်ပေါ်သို့ ခေါင်းမော့လိုက်သည်။

သူသည်လည်း ဧကရီ၏ အဖြေကို သိချင်သည်။

သူ့ဘေးမှ အားညိုသည် မျက်မှောင်ကြုတ်လိုက်ပြီး မိစ္ဆာအလင်းကို ထုတ်လွှတ်လိုက်သည်။

ဧကရီ၏ အေးစက်စက်အသံသည် ကောင်းကင်ပေါ်မှ ပဲ့တင်ထပ်လာသည်။

“ လူတစ်ယောက်ရဲ့ ရန်ငြိုးကို မျိုးနွယ်စုရဲ့ အကျိုးအမြတ်အတွက် လဲလှယ်တာက မှန်ကန်တယ်လို့ ထင်ရတယ်… ”

“ ဒါပေမဲ့ အတိတ်မှာ ဖုန်းဟိုင်ဒေသငယ်က သေခြင်းရှင်ခြင်းကပ်ဘေးနဲ့ ရင်ဆိုင်နေရတဲ့အချိန် ရွှေအမြူတေအဆင့်မှာပဲ ရှိသေးတဲ့ အဲ့ဒီလူက ဖုန်းဟိုင်ဒေသငယ်က လူတိုင်းအတွက် ရူးမိုက်စွာ ရပ်တည်ပေးခဲ့တယ်… အဲ့ဒါက မဖြစ်နိုင်ဘူးဆိုတာကို သူသိထားတာတောင် လုပ်ဆောင်ခဲ့ဖို့ ရွေးချယ်ခဲ့တယ်… ”