ဒဏ္ဍာရီကို ပြန်လည်ထုတ်ဖော်ခြင်း

ယင်းက စကားတစ်ခွန်းမျှသာ ဖြစ်၏။ သို့သော်လည်း မျက်စိတစ်မှိတ်အတွင်းမှာ ဥပဒေသများသည် ထိုစကားနှင့်အတူ တွန်းအားပေးခြင်းခံလိုက်ရသည်။ တဝုန်းဝုန်း လှုပ်ခတ်နေသော ပင်လယ်သည် ချက်ချင်း ငြိမ်သက်သွားသည်။ ပင်လယ်လှိုင်းများမှ ဖြစ်ပေါ်လာသော ဆူနာမီလှိုင်းလုံးများသည်လည်း ငြိမ်သက်သွားကြသည်။

ဝဲကတော့များသည် ချက်ချင်း ပျောက်ကွယ်သွားကြပြီး လျှို့ဝှက်ဆန်းကြယ်သော စွမ်းအားဖြင့် ဖိနှိပ်ခံလိုက်ရကြသည်။

‘ ငြိမ်သက်စမ်း ’ဟူသော စကားက ပင်လယ်ကို ငြိမ်သက်သွားစေသည်။

ဤအခိုက်အတန့်မှာ လေနှင့် လှိုင်းများက ရပ်တန့်သွားပြီး ငြိမ်ချမ်းမှုက အရပ်မျက်နှာပေါင်းစုံသို့ ပျံ့နှံ့သွားသည်။

ဓမ္မစစ်သင်္ဘောပေါ်တွင် သတ္တမတောင်ထွတ်၏ လူဆိုးထိန်းဌာနမှ တပည့်နှစ်ယောက်သည် တုန်တုန်ယင်ယင် ခေါင်းမော့လိုက်ကြသည်။ ကောင်းကင်ပေါ်တွင် လမ်းလျှောက်လာနေသော ပုံရိပ်သုံးခုကို သူတို့မြင်လိုက်ရသည်။

ဟွမ်ယန်ကို ယခင်က သူတို့မြင်ဖူးကြသည်။

ဟွမ်ယန်၏ ဘေးမှ သာမန်မျက်နှာနှင့် လူသည်တော့ သူတို့နှင့် အနည်းငယ် မရင်းနှီးပေ။ သူတို့က ထိုလူ၏ ပုံတူပန်းချီကို ယခင်က မြင်ဖူးဟန်ရသော်လည်း သူတို့ဆီမှာ လေးနက်သော အမြင်မရှိပေ။

သို့သော်လည်း အရှေ့ဆုံးမှ ခရမ်းရောင်ပုံရိပ်ကို ရှင်းလင်းစွာ မြင်လိုက်ရသည့်အခိုက် သူတို့က ချက်ချင်း စိတ်လှုပ်ရှားသွားကြသည်။

“ အမှတ်လေးအရှင်သခင် ”

အမှတ်လေးအရှင်သခင်သည် သတ္တမတောင်ထွတ်တွင် ရွှီချင်း၏ အထူးဘွဲ့နာမည်ဖြစ်သည်။

သူတို့နှစ်ယောက်က စိတ်လှုပ်ရှားစွာ ပြောလိုက်သည့်အခိုက် အနက်ရောင်ဆံပင်ရှည်နှင့် လူငယ်၏ အေးတိအေးစက် မျက်လုံးက လှိုင်းထသွားသည်။ သူက ချက်ချင်း ဒူးထောက်ချလိုက်သည်။

“ အအလေးလား ”

ရွှီချင်း၏ အကြည့်က အနက်ရောင်ဆံပင်ရှည်နှင့် လူငယ်ပေါ်သို့ ကျရောက်သွားပြီး သူက နူးညံ့စွာ ပြောသည်။

ထိုစကားက အနက်ရောင်ဆံပင်ရှည်နှင့် လူငယ်၏ စိတ်ခံစားချက်များကို ပိုပြီးလှိုင်းထသွားစေသည်။ သူက ခေါင်းမော့လိုက်ပြီး ပြောသည်။

“ ဆ… ဆရာ… ”

ကောလဟာလများသည် မမှားပေ။ ချီယွဲ့ထုံဂိုဏ်းသို့ သူရောက်လာကတည်းက ဂိုဏ်းအပေါ် မည်သည့်စိတ်ခံစားချက်မှ သူ့ဆီမှာ မရှိခဲ့ပေ။ ရွှီချင်းနှင့်ပတ်သက်ပြီး သူ့မှာ မတူကွဲပြားသော စိတ်အာရုံသာ ရှိသည်။

အစတွင် သူက ရွှီချင်းကို ကြောက်သည်။ ထို့နောက် ရွှီချင်းက သူ့ကို ကယ်တင်ခဲ့ပြီး လမ်းပြပေးခဲ့သည်။ နောက်ပိုင်းတွင် အခြေတည်အဆင့်မှာ သူက အန္တရာယ်ကပ်ဘေးနှင့် တွေ့ကြုံခဲ့စဉ် ရွှီချင်းက ကူညီပေးခဲ့သည်။

ရွှီချင်းက အမြဲတမ်း သူ့အရှေ့မှာ ရှိနေပြီး သူ့အတွက် လမ်းပြမီးအိမ်ဖြစ်လာသည်။

သူက ရွှီချင်း၏ ခြေလှမ်းများအတိုင်း အနောက်မှ လိုက်သွားချင်ပြီး သူ၏ သစ္စာရှိမှုကို ပေးအပ်ချင်သည်။

အဘယ့်ကြောင့်ဆိုသော် သူငယ်ငယ်တုန်းက တောရိုင်းခွေးများကြားတွင် ကြီးပြင်းလာခဲ့သောကြောင့် သူ၏ အကျင့်စရိုက်က ၎င်းတို့နှင့် အနည်းငယ် တူညီသည်။

“ မင်းရဲ့ ကျင့်ကြံခြင်းက မဆိုးဘူး… ကြည့်ရတာ မင်းက အရမ်းကြိုးစားနေတဲ့ပုံပဲ ”

အအလေးကို ကြည့်နေရင်း ရွှီချင်း၏ အကြည့်က သိမ်မွေ့နူးညံ့သွားသည်။

အအလေးအတွက်တော့ ထိုစကားများက အထွတ်အမြတ် ချီးမွမ်းမှုဖြစ်သည်။ စိတ်လှုပ်ရှားသော ခံစားမှုက သူ၏ နှလုံးသားထဲမှ ထွက်ပေါ်လာပြီး သူ၏ တစ်ကိုယ်လုံးသို့ ပျံ့နှံ့သွားသည်။

“ ကြေးရထားလုံးကို ရှာဖွေဖို့ ငါ့ကို ကူညီပေးတဲ့အတွက် ကျေးဇူးတင်ပါတယ်… ဒီမှာ ငါ့ကို စောင့်နေပါ ”

ရွှီချင်းက အကြည့်ပြန်ရုပ်လိုက်ပြီး ပင်လယ်ကို ကြည့်လိုက်သည်။ ထို့နောက် သူက အရှေ့သို့ ခြေတစ်လှမ်း လှမ်းလိုက်ပြီး နေရာမှ ပျောက်ကွယ်သွားကာ အသံထဲသို့ ပေါင်းစပ်သွားသည်။

သူက ပြန်ပေါ်လာသည့်အခါ ပင်လယ်ရေအောက်ထဲသို့ ရောက်ရှိသွားသည်။

သူ၏ အရှေ့တွင် အလွန်ကြီးမားသော ကြေးရထားလုံးနှင့် ဘီလူးရှိသည်။

ဘီလူးသည် အရှေ့သို့ ဆက်လျှောက်သွားနေပြီး ၎င်း၏ ပခုံးပေါ်မှ သံကြိုးသည် တင်းမာစွာ ဆန့်တန်းနေသည်။ သံကြိုး၏ အဆုံးသည် ကြေးနဂါးရထားလုံးနှင့် ဆက်သွယ်နေပြီး ရထားလုံးသည် ပင်လယ်ကြမ်းပြင်ပေါ်မှာ တရွတ်တိုက်ဆွဲခံနေရသည်။ နက်ရှိုင်းသော လှည်းဘီးစွတ်ကြောင်းသည် ပင်လယ်ကြမ်းပြင်ပေါ်မှာ အမှတ်အသားတစ်ခုပမာ ဖြစ်ပေါ်နေသည်။

“ ငါတို့ ထပ်တွေ့ပြန်ပြီ ”

ရွှီချင်းက စိတ်ထဲမှာ တီးတိုးရေရွတ်လိုက်သည်နှင့် သူ၏ မျက်လုံးထဲမှာ မျှော်လင့်သောအရိပ်အယောင် ထွက်ပေါ်လာသည်။ သို့သော်လည်း သူက ချက်ချင်း မလုပ်ဆောင်ပေ။

ယင်းအစား သူက ၎င်းနောက်သို့ လိုက်သွားပြီး စိတ်ရှည်စွာ စောင့်ဆိုင်းသည်။

ယင်းက နေ့အချိန်ကုန်ဆုံးသွားပြီး ညရောက်လာသည်အထိ ကြာမြင့်ခဲ့သည်။ ထို့နောက် အမှောင်ညက လေထဲမှာ ပြည့်နှက်သွားပြီး ညက ကုန်လွန်သွားသည်။

တဖြည်းဖြည်း အာရုဏ်တတ်ချိန်သို့ ရောက်ရှိလာသည်။

“ အချိန်ကျပြီ ”

ရွှီချင်းက ညာလက်ကို မြှောက်လိုက်သည်။ ချက်ချင်းဆိုသလို တေးသံပညာရှင်၏ လက်ပြတ်က သူ့အရှေ့မှာ ထွက်ပေါ်လာသည်။ ၎င်းက လက်ချောင်းများကို လှုပ်ရှားလိုက်သည့်အခါ လကြိုဆိုကောင်းကင်ဘုံတေးသံက ပဲ့တင်ထပ်လာသည်။

ဘီလူး၏ ခြေလှမ်းသည် ရုတ်တရက် ရပ်တန့်သွားသည်။ ၎င်းက ခေါင်းလှည့်လိုက်လေရာ ၎င်း၏ ဟောင်းလောင်းပေါက်ဖြစ်နေသော မျက်လုံးက ပိုပြီးနက်ရှိုင်းလာဟန် ရသည်။ ဤသည်မှာ ၎င်းက တစ်စုံတစ်ခုကို နားထောင်နေသည့်အလားပင်။

ရွှီချင်းသည် တုံ့ဆိုင်းမနေဘဲ အရှေ့သို့ ချက်ချင်း ပျံသန်းသွားသည်။

သူ၏ ယခင်အတွေ့အကြုံများနှင့် သုံးသပ်မှုကြောင့် ဤတစ်ကြိမ် သူ၏ အစီအစဉ်ပေါ်မှာ ယုံကြည်မှုအများကြီး ရှိသည်။

ဤအခိုက်အတန့်မှာ သူက ဘီလူးကို အလျင်ကုန်သုံး၍ ဖြတ်ကျော်သွားသည်။

သူက လုံးဝမရပ်တန့်ခဲ့ပေ။

ဘီလူးသည် ရွှီချင်းကို ၎င်းအား ဖြတ်ကျော်သွားရန် ခွင့်ပြုထားသည်။ ၎င်း၏ စိတ်အာရုံက လကြိုဆိုကောင်းကင်ဘုံတေးသွားထဲမှာ အပြည့်အဝ နစ်မြုပ်နေသည်။

သို့ဖြစ်၍ ရွှီချင်းက ကြေးနဂါးရထားလုံးဆီသို့ မြန်ဆန်စွာ ပျံသန်းသွားသည်။

အတိတ်တွင် သူက တဒင်္ဂမျှသာ နေနိုင်ခဲ့သည်။

ယခု သူက နောက်တစ်ကြိမ် ပြန်ရောက်လာသည်။ လျှပ်တစ်ပြက်အတွင်းမှာ သူက ယိုယွင်းပျက်စီးနေသော နဂါးရထားလုံးထဲသို့ ဝင်ရောက်သွားပြီး အထဲမှ ထိုင်ခုံပေါ်မှာ ထိုင်ချလိုက်သည်။

သူက ထိုင်ချလိုက်သည်နှင့်ချက်ချင်း နဂါးရထားလုံးက လှုပ်ယမ်းသွားသည်။ ရထားလုံး၏ အရှေ့မှ ဘီလူးသည်လည်း တုန်ယင်သွားသည်။ ၎င်းက ခေါင်းလှည့်ရန် ပြင်လိုက်သည်။

သို့သော်လည်း နောက်အခိုက်အတန့်မှာ ရွှေကျီးကန်းသည် ရွှီချင်း၏ ခန္ဓာကိုယ်ပေါ်မှာ ဒြပ်ထည်ဖြစ်ပေါ်လာပြီး စူးရှသော အော်မြည်သံကို ထုတ်ဖော်လိုက်သည်။ မီးတောက်ပင်လယ်သည် ရွှီချင်းကို ဗဟိုပြု၍ ပျံ့နှံ့ထွက်လာပြီး နဂါးရထားလုံးကို ဖုံးလွှမ်းလိုက်သည်။ တစ်ချိန်တည်းမှာ ရွှီချင်းက ရွှမ်သူရိန်အင်မော်တယ်အလင်းကျင့်စဉ်ကို အသက်သွင်းလိုက်ပြီး ရွှေကျီးကန်းကို အားဖြည့်ပေးလိုက်သည်။

သို့ဖြစ်၍ ရွှေကျီးကန်းမှ ထုတ်လွှတ်လိုက်သော အလင်းရောင်သည် ပိုပြီးထွန်းလင်းတောက်ပလာသည်။

အဝေးမှကြည့်လျှင် နဂါးရထားလုံးထဲမှာ ထိုင်နေသည့် ပုဂ္ဂိုလ်က ကျင့်ကြံသူတစ်ယောက်မဟုတ်တော့ဘဲ နေတစ်စင်းဖြစ်လာဟန် ရသည်။

တစ်ချိန်တည်းမှာ နတ်ဘုရားစိတ်အာရုံနှင့် နတ်ဘုရားအရင်းအမြစ်က သူ၏ ခန္ဓာကိုယ်ထဲမှ ပျံ့နှံ့ထွက်လာသည်။ သူက တေးသံပညာရှင်၏ လက်ပြတ်ကို ကိုယ်တိုင်ထိန်းချုပ်လိုက်လေရာ တေးသံက ပိုပြီးဆွဲမက်ဖွယ်ကောင်းလာသည်။

ဘီလူး၏ တစ်ကိုယ်လုံးသည် အပြင်းအထန် တုန်ခါသွားသည်။ ၎င်းက လကြိုဆိုကောင်းကင်ဘုံတေးသွားဖြင့် ဆွဲဆောင်ခံလိုက်ရပြီး စိတ်ဝင်တစား နားထောင်လိုက်သည်။ သို့သော်လည်း နဂါးရထားလုံးထဲမှ ရွှေကျီးကန်း၏ အရှိန်အဝါက နှစ်ပေါင်းမြောက်များစွာကြာအောင် ၎င်း၏ ခန္ဓာကိုယ်ထဲမှာ ပျိုးထောင်ထားခဲ့သော တခြားပင်ကိုယ်ဗီဇတစ်ခုကို ထွက်ပေါ်လာစေသည်။

ပင်ကိုယ်ဗီဇနှစ်ခုသည် ၎င်း၏ ခန္ဓာကိုယ်ထဲမှာ ထွက်ပေါ်လာသည်။

ရွှီချင်းက အပြည့်အဝ စိတ်နှစ်ထားသည်။ သူက ထိုမြင်ကွင်းကို မြင်လိုက်ရသည့်အခိုက် မီးတောက်သည် သူ၏ မျက်လုံးထဲမှာ ထွက်ပေါ်လာသည်။ သူက ဤအခိုက်အတန့်ကို စောင့်ဆိုင်းနေခြင်း ဖြစ်သည်။

ဒဏ္ဍာရီထဲတွင် ရွှေကျီးကန်းက နန်းတော်ကို ပြန်ရောက်သွားသည့်အခါ တေးသံပညာရှင်က လကြိုဆိုကောင်းကင်ဘုံတေးသွားကို တီးခတ်ပေးလိမ့်မည်။ ထို့နောက် လထွက်ပေါ်လာလိမ့်မည်။ တေးသွားကို တစ်ညလုံး တီးခတ်လိမ့်မည်။ တေးသံအဆုံးသတ်သွားသည့်အခါ လက နန်းတော်ဆီသို့ ပြန်သွားပြီး ရွှေကျီးကန်းက နဂါးရထားလုံးကို စီးနင်း၍ ဝမ်ကူးကုန်းမြေ၏ ကောင်းကင်ပေါ်သို့ ပျံတတ်သွားလိမ့်မည်။

ဤအခိုက်အတန့်မှာ ပင်ကိုယ်ဗီဇနှစ်ခုက ဘီလူး၏ ခန္ဓာကိုယ်ထဲမှာ ထွက်ပေါ်လာနေပြီး အပြင်လောကတွင် အာရုဏ်ဦးက ချဉ်းကပ်လာနေသည်။ တစ်ချိန်တည်းမှာ လက်ပြတ်မှ တီးခတ်နေသော လကြိုဆိုကောင်းကင်ဘုံတေးသွားသည် နေ့အချိန်သို့ မရောက်မီ တဖြည်းဖြည်း တိုးညင်းသွားပြီး အဆုံးသတ်သွားသည်။

…..

ပင်လယ်ပြင်ပေါ်တွင် အားညိုသည် အအလေး၏ သင်္ဘောကုန်းပတ်ပေါ်မှာ လဲလျောင်းနေပြီး သံစဉ်နှင့်အတူ လေချွန်နေသည်။

ဟွမ်ယန်သည် လှေဦးပိုင်းတွင် ထိုင်နေပြီး သမ်းဝေလိုက်သည်။

ချီယွဲ့ထုံဂိုဏ်း၏ လူဆိုးထိန်းဌာနမှ ညွှန်ကြားရေးမှူးနှစ်ယောက်သည် စိတ်လှုပ်ရှားနေကြပြီး ရံဖန်ရံခါ သူတို့နှစ်ယောက်ကို လှမ်းကြည့်လေ့ရှိသည်။

အအလေးသည်သာ တင်းမာသော မျက်နှာထားဖြင့် သင်္ဘောပေါ်မှာ မတ်တတ်ရပ်နေပြီး ပင်လယ်ပြင်ပေါ်သို့ ကြည့်နေသည်။

ကောင်းကင်သည် မည်းမှောင်နေသည်။

အာရုဏ်တတ်ချိန်ရောက်လာတော့မည့်အချိန် ကောင်းကင်က ထွန်းလင်းတောက်ပလာတော့မည့်အချိန် အလင်းရောင်သည် ပင်လယ်ရေအောက်ထဲမှာ ပထမဆုံးအကြိမ် ထွက်ပေါ်လာသည်။ ဤသည်မှာ မရေမတွက်နိုင်သော အလင်းဓားများက ပင်လယ်ရေမျက်နှာပြင်ကို ချိုးဖောက်သွားပြီး ကောင်းကင်ကို ထွန်းလင်းသွားစေသည့်အလားပင်။

ချက်ချင်းဆိုသလို အားညို၏ လေချွန်သံက ရပ်တန့်သွားသည်။ ဟွမ်ယန်က ပင်လယ်ပြင်ကို လှမ်းကြည့်လိုက်သည့်အခိုက် ထူးဆန်းသော အလင်းက သူ၏ မျက်လုံးထဲမှာ ထွက်ပေါ်လာသည်။ တစ်ချိန်တည်းမှာ ဧရာမဘီလူးသည် ပင်လယ်ရေမျက်နှာပြင်ကို ထိုးဖောက်သွားပြီး ကြီးမားသော လှိုင်းလုံးများကို ဖြစ်ပေါ်လာစေသည်။ ပင်လယ်က ဝုန်းခနဲ မြည်သွားသည်နှင့် ဘီလူး၏ ဧရာမပုံရိပ်သည် ကောင်းကင်ပေါ်သို့ မြှောက်တတ်သွားသည်။

၎င်းက ခြေလှမ်းကျဲကြီးများနှင့်အတူ ကောင်းကင်ပေါ်သို့ လျှောက်သွားသည်။

၎င်း၏ အနောက်တွင် သံကြိုးရှိသည်။

နောက်အခိုက်အတန့်မှာ ပိုပြီးကြီးမားသော လှိုင်းလုံးများက ပင်လယ်ရေမျက်နှာပြင်ပေါ်မှာ မြှောက်တတ်လာကြသည်။ ဘီလူး၏ ဆွဲမှုကြောင့် ရှေးဟောင်းကြေးရထားလုံးသည် နှစ်ပေါင်းမြောက်များစွာကြာပြီးနောက် တားမြစ်ပင်လယ်ထဲမှ တဖန် ပြန်ထွက်ပေါ်လာပြီး ကောင်းကင်ပေါ်သို့ ပျံတတ်သွားသည်။

ကြေးရထားလုံးထဲတွင် ရွှီချင်းက မတ်မတ်ထိုင်နေသည်။ သူ၏ ခန္ဓာကိုယ်အပြင်ဘက်တွင် ရွှေးကျီးကန်းက စူးရှသော အော်မြည်သံကို ထုတ်ဖော်လိုက်သည်။ အဆုံးမဲ့သော မီးတောက်များက သူ၏ ခန္ဓာကိုယ်ထဲမှ ပေါ်လျှိုးလာကြပြီး ဘေးပတ်ဝန်းကျင်ကို လွှမ်းခြုံသွားသည်။ ထို့ပြင် အင်မော်တယ်အလင်းလည်း ထွက်ပေါ်လာလေရာ ကြေးရထားလုံးက ပိုပြီးခမ်းနားထည်ဝါသွားသည်။

“ သေစမ်း ”

အားညိုက တုန်ယင်သွားပြီး မျက်လုံးပြူးကျယ်သွားသည်။

ရွှီချင်း၏ ဤတစ်ကြိမ် ရည်ရွယ်ချက်ကို သူမသိသလို ရွှီချင်းကလည်း သူ့ကို ပြောမပြခဲ့ပေ။ သို့ဖြစ်၍ သူတွေးထင်ခဲ့သည်မှာ ရွှီချင်းက နဂါးရထားလုံးကို ကျင့်ကြံရန်သက်သက်သာ အသုံးပြုလိမ့်မည်။ သို့သော်လည်း ကြေးရထားလုံးကို ကောင်းကင်ပေါ်သို့ မြှောက်တတ်သွားအောင် ပြုလုပ်လိမ့်မည်ဟု လုံးဝ သူမမျှော်လင့်ထားပေ။

“ ဒဏ္ဍာရီကို ပြန်လည်ဖော်ထုတ်တာလား ”

အားညိုက အသက်ပြင်းပြင်းရှူသွင်းလိုက်သည်။

သူ၏ ဘေးမှ ဟွမ်ယန်သည်တော့ အားညိုနှင့် ခြားနားသည်။ ရွှီချင်း၏ ရည်ရွယ်ချက်ကို သူသိထားသည်။ ဤအခိုက်အတန့်မှာ သူ၏ အမူအရာက တည်ကြည်သွားသည်။ အဘယ့်ကြောင့်ဆိုသော် သူက ကြေးရထားလုံးထဲမှာ ရွှီချင်းတစ်ယောက်တည်းကိုသာ မြင်နေရခြင်း မဟုတ်ပေ။

ရွှီချင်း၏ အရှေ့မှာ ဝေဝေဝါးဝါး ပုံရိပ်တစ်ခုရှိကြောင်း သူမြင်နေရသည်။ ထိုပုံရိပ်သည် လောကကို ကြည့်ရှုနေသည်။

ယင်းက နတ်ဘုရားတစ်ပါး သို့မဟုတ် ဧကရာဇ်တစ်ပါးနှင့်ဆင်တူသော လူငယ်တစ်ယောက် ဖြစ်သည်။

“ ဟွမ်ကောင်းကင်ဘုံနတ်ဘုရားမျိုးနွယ်ရဲ့ အိမ်ရှေ့စံမင်းသားရွှေကျီးကန်း ”

ဝမ်ကူးကုန်းမြေ၌ ဤအခိုက်အတန့်မှာ ကောင်းကင်က လင်းထိန်သွားသည်။