ဝိညာဉ်ဆင့်ခေါ် အောင်လံတံခွန်

အသူရာချောက်နက်ထဲတွင်..

ဆူဇီမိုသည် နေရာမှာပင် မတ်တတ်ရပ်၍ အတန်ကြာ စဉ်းစားတွေးတောပြီးနောက် ရှေ့သို့ ဆက်တက်ဖို့ ဆုံးဖြတ်လိုက်၏။

ဤတစ်ခေါက် သူရောက်လာသည့် အဓိက အကြောင်းရင်းမှာ အခွင့်အလမ်းတချို့ကို ရှာဖွေဖို့ဖြစ်၏။ သို့သော်လည်း အသူရာချောက်နက်ထဲမှာ ဘယ်လိုလျှို့ဝှက်ချက်တွေ ရှိနေမလဲ သူက တွေ့မြင်ချင်သေးသည်။

အသူရာချောက်နက်ထဲရှိ စိတ်ဝိညာဉ်ရတနာအပိုင်းအစတချို့အတွက်နှင့် စတုရန်းကြေးမီးဖိုပေါ်ရှိ နတ်နဂါးက သူ့ကို ဤကြယ်ပေါ်သို့ ပို့ဆောင်ပေးခဲ့တာ ဟုတ်နိုင်ပါ့မလား။

ထိုအခိုက်အတန့်မှာ စတုရန်းကြေးမီးဖိုသည် သူ၏ အသိစိတ်ထဲမှာ ပူနွေးလာပြီး စိတ်လှုပ်ရှားသည့် ခံစားချက်တစ်ခုကို ထုတ်ဖော်လိုက်၏။

ဆူဇီမိုက ချောက်နက်ထဲသို့ သတိထား၍ ဆက်လျှောက်လာခဲ့၏။

သူ၏ စိတ်က တင်းကျပ်နေပြီး အခြေအနေမကောင်းပါက ချက်ချင်း ထွက်ပြေးဖို့ ပြင်ဆင်ထားလေသည်။

ချောက်နက်၏ အဆုံးသတ်မှာ တိုက်ပွဲတစ်ခု အကြိတ်အနယ် ဖြစ်ပွားနေသည့်အလား ကောင်းကင်နှင့်မြေကြီး အမြုတေချီများက အတက်အကျ ပြင်းထန်နေ၏။ ဘေးပတ်ဝန်းကျင်မှာ ရှိသော အနက်ရောင်မြူခိုးများကလည်း တိုက်ပွဲ၏ တုန်ခါလှိုင်းများကြားမှာ အလွန်တရာ ပါးလွှာလာခဲ့၏။

“ဒီအသိစိတ်ရှိတဲ့ ဓမ္မရတနာက ငါ့အပိုင်ပဲ.. အဲဒါကို ထိရဲတဲ့ ဘယ်သူမဆို ငါ့ကို ဆန့်ကျင်တာပဲ.. အဲဒီလူတွေက သနားညှာတာမှု မရှိ ငါ..လောယန်ရဲ့ သတ်ဖြတ်တာကို ခံရလိမ့်မယ်”

ချောက်နက်၏ အဆုံးနားကနေ ကြမ်းကြုတ်ခက်ထန်သော ဟိန်းဟောက်သံတစ်သံက ထွက်ပေါ်လာ၏။

ထိုအသံကို ကြားသောအခါ မြွေနဂါး စစ်ရထားပေါ်မှာ စီးနင်းလာသည့် မောက်မာခက်ထန်သော ကောင်းကင်အင်မော်တယ် ပညာရှင်တစ်ယောက်၏ ပုံရိပ်က ဆူဇီမို၏ စိတ်ထဲသို့ ဖျတ်ခနဲ ဝင်ရောက်လာ၏။

ထိုအချိန်တုန်းက သူ၏ စိတ်ဝိညာဉ်အသိစိတ်ဖြင့် ထိုသူကို ​ထောက်လှမ်း အကဲခတ်ခဲ့သော ကမ္ဘာမြေအင်မော်တယ်တစ်ယောက်က သတ်ဖြတ်ခံခဲ့ရ၏။

“ဟီးဟီး”

ထိုစဉ်မှာပင် ရယ်မောသံတစ်သံက ထွက်ပေါ်လာ၏။

ညှို့ငင်ဓာတ်ပြည့်ဝ၍ နူးညံ့သိမ်မွေ့သော မိန်းမတစ်ယောက်၏ အသံက ထွက်ပေါ်လာ၏။

“ကောင်းကင်အင်မော်တယ် လောယန်.. နင်က စောစောကတင် ကပ်ဘေးခုနှစ်ခု စိတ်ဝိညာဉ်ရတနာတစ်ခုကို လုယူထားခဲ့တယ်.. နင်က ဒီဝိညာဉ်ဆင့်ခေါ် အောင်လံတံခွန်ကို ကောင်းကောင်းထိန်းထားနိုင်မှာ မဟုတ်တော့ဘူး.. နင် အဲဒါကို ထုတ်ပေးမယ်ဆိုရင် ပိုကောင်းလိမ့်မယ်”

ကပ်ဘေးခုနှစ်ခု စိတ်ဝိညာဉ်ရတနာလား..။

ဆူဇီမိုက ထိုစကားကို ကြားသောအခါ သူ၏ စိတ်ထဲမှာ သံသယတစ်ခု ဝင်ရောက်လာ၏။

စိတ်ဝိညာဉ်ရတနာသည် အသိစိတ်ရှိသော ဓမ္မရတနာတစ်ခု ဖြစ်လေသည်။

သို့သော်လည်း ကပ်ဘေးခုနှစ်ခုဆိုတာက ဘာအဓိပ္ပာယ်လဲ။

အသိစိတ်ရှိသော ဓမ္မရတနာများ၏ အဆင့်ကို နိမ့်ကျ၊ အလယ်အလတ်၊ သာလွန်နှင့် ထိပ်တန်းအဆင့်များဟူ၍ ခွဲခြားထားသည် မဟုတ်ဘူးလား။

အဲဒါက မဖြစ်နိုင်တာတော့ မဟုတ်ပေ။

ဘာပဲပြောပြော အသိစိတ်ရှိသော ဓမ္မရတနာများသည် အသိဉာဏ်တစ်ခုကို ရရှိလာခဲ့ပြီး အဲဒါက အခြားသော လက်နက်များနှင့် လုံးဝ ကွဲပြားခြားနားသွားလေသည်။

မည်သို့ပင်ဆိုစေ.. အချက်တစ်ချက်ကတော့ သေချာသည်။ ဝိညာဉ်ဆင့်ခေါ် အောင်လံတံခွန်ဟု ခေါ်သော ထိုအရာက ကပ်ဘေးခုနှစ်ခု စိတ်ဝိညာဉ်ရတနာထက် သေချာပေါက် အားနည်းလိမ့်မည် မဟုတ်ပေ။

မဟုတ်ပါက ကောင်းကင်အင်မော်တယ် လောယန်နှင့် မိန်ကျိအကြား ယှဉ်ပြိုင်တိုက်ခိုက်မှုတစ်ခုက ပေါ်ထွက်လာလိမ့်မည် မဟုတ်ပေ။

“တာအိုရောင်းရင်းတို့…”

နောက်ထပ် အသံတစ်သံက ထွက်ပေါ်လာ၏။

“ဒီရှေးဟောင်းတိုက်ပွဲမြေထဲမှာ အစကတည်းက အကောင်းအတိုင်း ကျန်ရစ်တဲ့ စိတ်ဝိညာဉ်ရတနာတွေက များများစားစား ရှိတာ မဟုတ်ဘူး.. အဲဒါတွေ အကုန်လုံးနီးပါးကိုလည်း ခင်ဗျားတို့နှစ်ယောက်က ယူပြီးသွားပြီ.. ခင်ဗျားတို့တွေက အရမ်းကို လောဘကြီးလွန်းမနေဘူးလား”

“အဲဒါ အမှန်ပဲ”

“ကျုပ်တို့ကလည်း လက်ဗလာနဲ့တော့ ပြန်မသွားနိုင်ဘူး”

မကျေမနပ် ပြောဆိုသံများက ထွက်ပေါ်လာ၏။

“ဘာလို့လဲ.. မင်းတို့တွေက လက်မခံနိုင်ကြဘူးလား”

ကောင်းကင်အင်မော်တယ် လောယန်က ပြန်မေးလိုက်၏။

မိန်ကျိက ရယ်မောလိုက်သည်။

“အလွန်ဆုံး ငါတို့က နောက်ဆုံးမှာ ဒီဝိညာဉ်ဆင့်ခေါ် အောင်လံတံခွန်ကို ဘယ်သူရနိုင်မလဲ ဆက်ပြီး တိုက်ခိုက်ကြရုံပေါ့”

အချိန်တိုအတွင်းမှာပင် ဆူဇီမိုသည် အသူရာချောက်နက်၏ အဆုံးသို့​ ရောက်ရှိလာခဲ့ပြီဖြစ်၏။

သူ၏ မျက်လုံးကို မှေးကျဉ်းပြီး အနက်ရောင်မြူခိုး ခပ်ဖျော့ဖျော့ကြားကနေ ကြည့်လိုက်သည်။

ရှေ့တည့်တည့် လေထဲမှာ ပုံရိပ်များစွာက မတ်တတ်ရပ်နေကြ၏။ သူတို့တစ်ယောက်ချင်းစီက အလွန်တရာ ကြောက်စရာကောင်းသော အော်ရာများကို ဖြာထုတ်ပေးနေပြီး ဘေးပတ်လည်မှာ ရှိသော အမြုတေချီများက တလိပ်လိပ်ထိုးတက်နေ၏။

ထိုပုံရိပ်များစွာ၏ ခွန်အားက အမျိုးမျိုး ကွဲပြားသော်လည်း သူတို့ အားလုံးက ကောင်းကင်အင်မော်တယ် ပညာရှင်များ ဖြစ်ကြ၏။ ကောင်းကင်အင်မော်တယ် လောယန်နှင့် မိန်ကျိကလည်း သူတို့ကြားထဲမှာ ပါဝင်လေသည်။

ထိုအခိုက်အတန့်မှာ ကောင်းကင်အင်မော်တယ် လောယန်သည် သုံးပေခန့် ရှည်လျားသော အနက်ရောင်အောင်လံတံခွန်တစ်ခုကို ဆုပ်ကိုင်ထားသည်။ အဲဒါက ဘယ်လိုပစ္စည်းဖြင့် ပြုလုပ်ထားသလဲ မသိရဘဲ ၎င်းပေါ်တွင် ရှင်းရှင်းလင်းလင်း မမြင်ရသည့် အင်းကွက်တစ်ခု ရှိနေပုံရ၏။

နက်မှောင်နေသော ထိုသစ်သားအောင်လံတံခွန်သည် စောစောက ကောင်းကင်အင်မော်တယ် လောယန် ပြောခဲ့သော ဝိညာဉ်ဆင့်ခေါ် အောင်လံတံခွန် ဖြစ်ရပေမည်။

ထိုအခိုက်အတန့်မှာ ကောင်းကင်အင်မော်တယ် လောယန်သည် ကောင်းကင်အင်မော်တယ် ပညာရှင်များစွာ၏ ဝန်းရံပိတ်ဆို့ခြင်း ခံထားရ၏။

မိန်ကျိက မလှမ်းမကမ်းမှာ မတ်တတ်ရပ်နေပြီး တိုက်ခိုက်ဖို့ အခွင့်အလမ်းတစ်ခုကို စောင့်ဆိုင်းရင်း သူ့ကို ပြုံးစစဖြင့် ကြည့်နေ၏။

တိုက်ပွဲက ဖြစ်ပွားလာတော့မည့်ဆဲဆဲပင်။

မြေပြင်ပေါ်မှာလည်း လူစုခွဲရပ်နေကြသော ကျင့်ကြံသူတစ်ထောင်ကျော် ရှိလေသည်။

ထိုကျင့်ကြံသူများသည် မဟူရာအင်မော်တယ်များ မဟုတ်ဘဲ ကမ္ဘာမြေအင်မော်တယ်များ ဖြစ်ကြ၏။

လေထဲရှိ တိုက်ပွဲနယ်မြေမှာ ကောင်းကင်အင်မော်တယ်များစွာ ပါဝင်နေပြီဖြစ်လေသည်။

သက်ရောက်ခံရမည့်ဘေးကို ရှောင်လွှဲရန်အတွက် ကမ္ဘာမြေအင်မော်တယ်တစ်ထောင်က မြေပြင်ပေါ်ကို ဆင်းသက်နေကြရ၏။

ကမ္ဘာမြေအင်မော်တယ်ပညာရှင် အများစုမှာ တူညီသော အတွေးများ ရှိနေကြ၏။

သူတို့သည် အသူရာချောက်နက်၏ အဆုံးမှာ နောက်ထပ် အခွင့်အလမ်းများနှင့် ရတနာများကို ရရှိနိုင်မလား သိချင်နေကြ၏။

ဤနေရာသို့​ ရောက်ရှိထားနိုင်သော မည်သည့်ကျင့်ကြံသူမဆို အကျိုးအမြတ်များကို အနည်းနှင့် အများဆိုသလို ရရှိထားခဲ့ကြလေပြီ။

မြေပြင်ပေါ်မှာ ပုံထပ်နေသော အလောင်းများကနေ သွေးများက စီးကျနေ၏။

မကြာသေးခင်က တိုက်ပွဲတစ်ပွဲ ဖြစ်ပွားခဲ့သည်မှာ သိသာလေသည်။

ဆူဇီမိုက အကြမ်းဖျင်း တစ်ချက်ကြည့်လိုက်၏။

ကမ္ဘာမြေအင်မော်တယ်ပညာရှင်များကြားမှာ သူသည် ရင်းနှီးနေကျ မျက်နှာတစ်ခုကို တွေ့မြင်လိုက်ရ၏။ အဲဒါသည် သူ၏ ကျောက်စိမ်းဓားမြှောင်ကို လုယူသွားခဲ့သော ပိန်ပိန်ပါးပါး ကမ္ဘာမြေအင်မော်တယ်ဖြစ်လေသည်။

သို့သော်လည်း သူက သူ့ကိုကယ်ခဲ့သည့် အင်မော်တယ်စုံတွဲကိုတော့ မတွေ့မြင်ရပေ။ သူတို့က ဤနေရာကနေ ထွက်ခွာသွားပြီလား သို့မဟုတ် သေဆုံးသွားပြီလား သူ မသိပေ။

ထိုအခိုက်အတန့်မှာ ကမ္ဘာမြေအင်မော်တယ်များစွာက လေထဲရှိ ကောင်းကင်အင်မော်တယ်များထံ အာရုံရောက်နေပြီး မည်သူကမှ ဆူဇီမို၏ တည်ရှိမှုကို သတိမထားမိပေ။

အဲဒါထက် သူတို့က ဆူဇီမိုကို တွေ့မြင်မည်ဆိုလျှင်တောင် သူ့ကို အရေးလုပ်လိမ့်မည် မဟုတ်ပေ။

“သတ်”

ရုတ်တရက် ကျယ်လောင်သော အော်သံတစ်သံက လေထဲကနေ ထွက်ပေါ်လာ၏။

ကောင်းကင်အင်မော်တယ်များအကြား တိုက်ပွဲတစ်ပွဲက နောက်တစ်ဖန် ဖြစ်ပွားလာခဲ့လေပြီ။

“လောင်ကျွမ်းကောင်းကင်ဆူပွက်ပင်လယ်”

“ကြယ်ကြွေခြင်း​”

“ကောင်းကင်ဘုံခုတ်ချက်”

“. . . . .”

အန္တိမ နတ်ဘုရားစွမ်းအားများက တစ်ခုပြီးတစ်ခု ပစ်လွင့်ထွက်ပေါ်လာ၏။

ချက်ချင်းပင် လောကက ပြောင်းလဲသွားပြီး သဲများနှင့် ကျောက်ခဲများက လွင့်ပျံကာ အသူရာချောက်နက်တစ်ခုလုံးက ပြင်းထန်စွာ လှုပ်ခါသွား၏။

ကောင်းကင်အမြုတေအဆင့်မှာ သူတို့သည် အန္တိမ နတ်ဘုရားစွမ်းအားများကို ကောင်းကင်နှင့်မြေကြီး အမြုတေချီများဖြင့် ပေါင်းစည်းလာနိုင်ပြီး အဲဒါကို စိတ်ရှိသလို ထုတ်ဖော်နိုင်ကြ၏။

ကောင်းကင်နှင့်မြေကြီး အမြုတေချီနှင့် ပေါင်းစည်းပြီးမှသာ နတ်ဘုရားစွမ်းအားတစ်ခု၏ အစစ်အမှန်စွမ်းအားကို ထုတ်ဖော်နိုင်လေသည်။

ဒေါသူပုန်ထနေသော မီးတောက်များက လေထဲမှာ တလိပ်လိပ်ထိုးတက်လာပြီး မိုးကောင်းကင်တစ်ခုလုံးက လောင်ကျွမ်းနီရဲလာ၏။

ဆူနာမီလှိုင်းတစ်ခုက တလိပ်လိပ်ထိုးတက်လာပြီး လုံးဝကို ဆူပွက်လာခဲ့၏။

ရှေးဟောင်းကြယ်များက ကောင်းကင်ထက်ကနေ တစ်စင်းပြီးတစ်စင်း ဆင်းသက်ကျဆင်းလာလေသည်။

အဲဒါသည် နတ်ဘုရားစွမ်းအားကနေ စုဖွဲ့ထားသော ပုံရိပ်ယောင်တစ်ခု လုံးဝ မဟုတ်တော့ပေ။ ကြယ်များသည် သိပ်သည်းစုဖွဲ့၍ ရပ်တန့်မရနိုင်သော အော်ရာတစ်ခုနှင့်အတူ ဆင်းသက်လာခဲ့ပြီဖြစ်၏။

ကောင်းကင်အင်မော်တယ်တစ်ယောက်သည် ရှေးဟောင်းကြယ်နှင့် ထိခတ်မိသွားပြီး အထဲမှာ ပါဝင်သည့် ကြောက်စရာကောင်းသော စွမ်းအားကို ခံနိုင်ရည်မရှိပေ။ သူ၏ ခန္ဓာကိုယ်က ချက်ချင်းပေါက်ကွဲထွက်သွားပြီး လတ်ဆတ်သော သွေးများက ပြန့်ကျဲသွား၏။

သို့သော်လည်း သိပ်မကြာခင် ထိုကောင်းကင်အင်မော်တယ်က သူ၏ ခန္ဓာကိုယ်ကို ပြန်လည်တည်ဆောက်ဖို့အတွက် သွေးကနေ ပြန်လည်မွေးဖွားခြင်းကို ထုတ်ဖော်လိုက်၏။

ကမ္ဘာမြေအင်မော်တယ်များမှာ ထိုကဲ့သို့သော နည်းလမ်းများ မရှိပေ။ သူတို့ထဲမှ အချို့က အချိန်မီ မရှောင်တိမ်းနိုင်ဘဲ ကြယ်များ၏ ထိခိုက်ခြင်း ခံရကာ နေရာမှာတင် သေဆုံးသွား၏။

ထိုကြယ်များက မြေပြင်ပေါ်သို့ ကျဆင်းလာသောအခါ ကြီးမားသော တွင်းချိုင့်များကို ဖြစ်ပေါ်လာစေ၏။

တစ်ခဏချင်းမှာပင် အသူရာချောက်နက်က အပေါက်များဖြင့် ပြည့်နှက်လာခဲ့၏။

အောက်ဘက်မှာရှိသော ကမ္ဘာမြေအင်မော်တယ်တစ်ထောင်က လူစုခွဲ၍ နောက်သို့ဆုတ်ကာ ပုန်းကွယ်လိုက်ကြ၏။

ဆူဇီမို၏ မျက်နှာကလည်း အနည်းငယ် ဖြူဖျော့သွားပြီး​ နောက်သို့ အလောတကြီး ဆုတ်လိုက်၏။

လေထဲရှိ တိုက်ပွဲနယ်မြေမှာ ကောင်းကင်အင်မော်တယ် လောယန်သည် အမှန်တကယ်ပင် မောက်မာဝင့်ကြွားခွင့် ရှိလေသည်။ ကောင်းကင်အင်မော်တယ် ပညာရှင်များ၏ ဝန်းရံပိတ်ဆို့ခြင်း ခံထားရစဉ်မှာတောင် သူက အရေးနိမ့်ခြင်း မရှိဘဲ အဘက်ဘက်ကို လှည့်ကာ တိုက်ခိုက်နိုင်နေဆဲဖြစ်၏။

ကောင်းကင်အင်မော်တယ် လောယန်သည် တိုက်ပွဲနယ်မြေ၏ အစပ်မှာ ချောင်းမြောင်းနေသော မိန်ကျိကိုသာ သတိထားနေရ၏။

မိန်ကျိက အရမ်းကို ပါးနပ်သည်။

သူမက ကောင်းကင်အင်မော်တယ် လောယန်နှင့် ထိပ်တိုက်ရင်ဆိုင်တိုက်ခိုက်ခြင်း မရှိဘဲ ဘေးနားအစပ်မှာသာ ရစ်ဝဲနေ၏။ သူမက ရံဖန်ရံခါ တိုက်ခိုက်တတ်ပြီး ထိုအခါ လောယန်သည် ထိတ်ထိတ်ပျာပျာပုံစံဖြင့် အသည်းအသန် ခုခံရသည်။

ဤအတိုင်းသာ ဆက်သွားပါက ကောင်းကင်အင်မော်တယ် လောယန်သည် သူ့လက်ထဲရှိ ဝိညာဉ်ဆင့်ခေါ်အောင်လံတံခွန်ကို ကာကွယ်နိုင်ဖို့ ခက်ခဲလာပေတော့မည်။

ထိုစဉ်မှာပင် ဆူဇီမိုသည် ရင်တလှပ်လှပ် ခံစားချက်တစ်ခုကို ရုတ်တရက် ရရှိလိုက်၏။

အပြောင်းအလဲတစ်ရပ်က တိုက်ပွဲနယ်မြေမှာ ပေါ်ထွက်လာခဲ့၏။

ကောင်းကင်အင်မော်တယ် လောယန်၏ လက်ထဲရှိ နက်မှောင်နေသော သစ်သားအောင်လံတံခွန်က ရုတ်တရက် တုန်ခါ၍ နက်မှောင်နေသော အလင်းများကို ထုတ်လွှတ်ကာ ထိုအလင်းများက တိမ်စိုင်များကြားထဲထိ ထိုးတက်သွား၏။

ကောင်းကင်အင်မော်တယ် လောယန်က အငိုက်မိ၍ အဲဒါနှင့် အရင်ဆုံး ထိခတ်မိသွား၏။ သူက ခပ်သဲ့သဲ့ ညည်းတွားလိုက်ရပြီး အနက်ရောင်အလင်းများနှင့် ထိခတ်မိကာ သူ၏ လက်ဖဝါးက သွေးမြူတစ်ခုအဖြစ် ပေါက်ကွဲထွက်သွား၏။