တားမြစ်ဒေသကြီးကို သန့်စင်ခြင်း

အတိတ်မှ အရာအားလုံးက ရွှီချင်း၏ မျက်လုံးထဲမှာ ပုံရိပ်ပြန်လာသည်။ နောက်ဆုံးမှာတော့ သူ၏ မှတ်ဉာဏ်များထဲမှ ပုံရိပ်များက မင်ရည်ကဲ့သို့ တဖြည်းဖြည်း ဝေဝါးလာသည်။

ယင်းက အရာအားလုံးကို အမည်းရောင်ဆိုးလိုက်ပြီး သစ်ပင်ထဲမှ လီဇီမေ၏ မျက်နှာပေါ်မှာ စုဝေးသွားသည်။

ထို့နောက် ပုံပျက်တွန့်လိမ်နေသော မျက်နှာက ကြည်လင်လာသည်။

မိစ္ဆာအရှိန်အဝါသည် ပိုပြီးအားကောင်းလာသည်။

ရွှီချင်းက ထိုက်စီရှန်းမုန့်ဂိုဏ်း၏ ဦးတည်ရာဆီသို့ ကြည့်လိုက်သည့်အခါ သူ၏ မျက်လုံးထဲမှာ အေးစက်မှု ထွက်ပေါ်လာသည်။

သူက အကြောင်းအရင်းကို မြင်တွေ့သွားသည်။

လီဇီမေက သူ၏ ဝိညာဉ်အပေါ် သက်ရောက်မှုရှိသော အထူးကျင့်စဉ်တစ်ခုကို ကျင့်ကြံခဲ့ကြောင်း ထင်ရှားသည်။ ထို့ကြောင့် သူ၏ ဝိညာဉ်က မိစ္ဆာအရှိန်အဝါဖြင့် အဆက်မပြတ် တိုက်စားခံနေရပြီး သူ၏ ဝိညာဉ်မှာ အပေါက်များ ဖြစ်ပေါ်လာကြသည်။

ထိုတိုက်စားမှုက တစ်ရက်ကျော် ကြာမြင့်ခဲ့ကြောင်း ထင်ရှားသည်။

ယင်းက စာထဲမှာ လီဇီမေရေးခဲ့သော အမွေအနှစ်ဆက်ခံခြင်း ပွဲအခမ်းအနားဖြစ်ရမည်။

မိစ္ဆာအရှိန်အဝါ၏ တိုက်စားမှုကြောင့် ဖြစ်ပေါ်လာသော နာကျင်မှုက လီဇီမေ၏ အကျင့်စရိုက်ကို ဖရိုဖရဲဖြစ်စေသည်။ ယင်းက သူ၏ စိတ်အခြေအနေအပေါ် သက်ရောက်မှုရှိသည်။

နှစ်ပေါင်းများစွာ ကြာမြင့်ပြီးနောက် ရူးသွပ်မှုနှင့် သတ်ဖြတ်ခြင်းစိတ်ဆန္ဒက သူ၏ ဝိညာဉ်ထဲမှာ ဖြည်းညင်းစွာ တိုးပွားလာသည်။

အကယ်၍ အဆုံးမှာ လီဇီမေ၏ ဝိညာဉ်က လုံးဝပြိုကွဲသွားပြီး ဆက်ပြီးမတည်ရှိတော့လျှင် ထိုရိုးရာဓလေ့က အောင်မြင်သွားလိမ့်မည်။

ထိုအချိန်ကျလျှင် ပြန်ရောက်လာမည့်လူက လီဇီမေမဟုတ်တော့ဘဲ အစွန်းရောက် သတ်ဖြတ်ခြင်းကိုသာ နှစ်သက်သော မိစ္ဆာတစ်ကောင် ဖြစ်လိမ့်မည်။

သို့သော်လည်း မမျှော်လင့်ထားသည့် မတော်တဆမှုတစ်ခုက လီဇီမေကို လွတ်မြောက်သွားစေခဲ့သည်။ ယင်းက ထိုက်စီရှန်းမုန့်ဂိုဏ်းကို အခက်တွေ့စေခဲ့သည်။

“ လျှို့ဝှက်မှတ်တမ်းထဲမှာ ဖော်ပြထားတဲ့ မိစ္ဆာစိတ်လွှမ်းမိုးခံရတယ်ဆိုတာ ဒါကို ပြောတာဖြစ်မယ် ”

ရွှီချင်း၏ မျက်လုံးထဲမှ အေးစက်မှုက ပိုပြီးသိပ်သည်းလာသည်။

ထိုမိစ္ဆာအရှိန်အဝါက အမှန်တကယ်တော့ ဝိညာဉ်တစ်ခုသာဖြစ်ကြောင်း သူပြောနိုင်သည်။

၎င်းက ရှေးကျပြီး ရက်စက်ကြမ်းကြုတ်သော ဝိညာဉ်တစ်ခု ဖြစ်သည်။

မိစ္ဆာအရှိန်အဝါ၏ တိုက်စားခြင်းက ဝင်ရောက်ပူးကပ်ခြင်းနှင့် ခန္ဓာကိုယ်သိမ်းပိုက်ခြင်းကို ဆိုလိုသည်။

လီဇီမေသည် ထိုရှေးဟောင်းဝိညာဉ်အတွက် အထူးသင့်တော်သော သန္ဓေသားလောင်း ဖြစ်သည်။

ထို့ကြောင့် လီဇီမေက ဝိညာဉ်အသံတားမြစ်ဒေသကြီး၏ အလယ်၌ သစ်ပင်ကြီးတစ်ပင်၏ ချုပ်နှောင်ခံထားရခြင်း ဖြစ်သည်။ အဘယ့်ကြောင့်ဆိုသော် အဆင့်မြှင့်ခံထားရသော ဤသန္ဓေသားလောင်းက ဝိညာဉ်အသံအရှင်သခင်အတွက်လည်း အလွန်အသုံးဝင်သည်။

“ သင့်တော်တယ်တဲ့ ခန္ဓာကိုယ်တစ်ခုမှာ ကပ်တွယ်ပြီး ဒီတားမြစ်ဒေသကြီးကနေ ထွက်သွားမယ်… ”

ရွှီချင်းက စိတ်ထဲမှာ တီးတိုးရေရွတ်လိုက်သည်။

ယင်းက တိုက်ဆိုင်မှုတစ်ခုလော သို့မဟုတ် တမင်စီစဉ်ထားခြင်းလော သူမသိပေ။ မည်သို့ဖြစ်ပါစေ အနာဂတ်မှာ သူက ယင်ဟွမ်ပြည်နယ်၏ ဓားကိုင်ရုံးတော်ကို ဤကိစ္စအား စုံစမ်းစစ်ဆေးခိုင်းလိမ့်မည်။

ချင်းချိုးသည်တော့ သစ်ပင်များထဲမှာ ရှိသည်။

သူက သစ်ပင်များ၏ ဝန်းရံခံထားရသည်။ သူ၏ ခန္ဓာကိုယ်ထဲမှ ထုတ်လွှတ်နေသော သွေးနီရောင်အလင်းက ဝိညာဉ်အသံအရှင်သခင်အတွက် ကပ်ပါးကောင်အာဟာရဓာတ်များ ဖြစ်သည်။

ယင်းက ကျင့်ကြံသူအားလုံးအတွက် စည်းမျဉ်းတစ်ခု ဖြစ်သည်။

အားနည်းသူသည် အားကြီးသူအတွက် သားကောင်ဖြစ်သည်။

ယင်းက ရွှင်းထိုင်နတ်ဆိုးအတွက်၊ ထိုက်စီရှန်းမုန့်ဂိုဏ်းနှင့် ဤတားမြစ်ဒေသကြီး၏ အရှင်သခင်အတွက် အတူတူပင်။

အားနည်းသူများသည် တူညီသော အခြေအနေများကို မတူညီသော ကံတရားများဖြင့် တွေ့ကြုံခံစားရလိမ့်မည်။

ရွှီချင်းက နှုတ်ဆိတ်သွားသည်။

သူ၏ လက်ရှိအစွမ်းအရ သက်ရှိအားလုံးအတွက် ထိုစည်းမျဉ်းကို သူမပြောင်းလဲပစ်နိုင်ပေ။ သို့သော်လည်း ယင်းကို သူရပ်တန့်ပစ်နိုင်သည်။ သူနှင့်ရင်းနှီးကျွမ်းဝင်သော လူများထံမှာ ထိုသို့ကိစ္စမျိုး မဖြစ်ပျက်ရအောင် သူတားဆီးနိုင်သည်။

သို့ဖြစ်၍ ရွှီချင်းက ဝိညာဉ်အသံတားမြစ်ဒေသကြီး၏ အနက်ပိုင်းထဲသို့ လျှောက်သွားသည်။

သူက ခြေတစ်လှမ်း လှမ်းလိုက်တိုင်း တားမြစ်ဒေသကြီးက တုန်ယင်သွားလိမ့်မည်။ ဒြပ်နှောများက အရာအားလုံးအပေါ် ကျူးကျော်ဝင်ရောက်နိုင်သော်လည်း ရွှီချင်းအပေါ်မှာတော့ သက်ရောက်မှုမရှိပေ။

အဘယ့်ကြောင့်ဆိုသော် ဤအခိုက်အတန့်မှာ ရွှီချင်း၏ ခန္ဓာကိုယ်က နတ်ဘုရားတစ်ပါး၏ အရှိန်အဝါကို ထုတ်လွှတ်နေသောကြောင့် ဖြစ်သည်။ သူ့ကိုယ်ပိုင် ဒြပ်နှောများက အရပ်မျက်နှာအသီးသီးဆီသို့ မြန်ဆန်စွာ ပျံ့နှံ့သွားကြသည်။

အမျိုးအစား မတူညီသော ဒြပ်နှောနှစ်မျိုးက မမြင်နိုင်သော နည်းလမ်းဖြင့် အချင်းချင်း တွေ့ဆုံသွားကြသည်။ ယင်းက တားမြစ်ဒေသကြီးတစ်ခုလုံးကို အပြင်းအထန် တုန်ယင်သွားစေသည်။ မရေမတွက်နိုင်သော သစ်ပင်များက လှုပ်ယမ်းသွားကြပြီး တောင်များက လှုပ်ခါသွားကြသည်။

အသံက ပိုပြီးကျယ်လောင်လာသည်။

ဤအခိုက်အတန့်မှာ မြည်ဟိန်းထွက်လာသော ထိုအသံများက ရွှီချင်း၏ ထိန်းချုပ်မှုအောက်သို့ ချက်ချင်း ကျရောက်သွားကြသည်။ အသံများက သူ၏ နတ်ဘုရားအသိစိတ်များ ဖြစ်လာကြပြီး သူ့အတွက် လက်နက်များ ဖြစ်လာကြသည်။ ယင်းတို့က တားမြစ်ဒေသကြီးထဲရှိ ဧရိယာအားလုံးထံမှ ပေါ်ထွက်လာပြီး အလယ်မှ သစ်ပင်ကြီးဆီသို့ ဦးတည်သွားကြသည်။

ဤသည်မှာ မုန်တိုင်းတစ်ခု ထွက်ပေါ်လာသည့်အလားပင်။

ဒြပ်မဲ့ဖြစ်သော အသံလှိုင်းသည် ဤအခိုက်အတန့်မှာ တားမြစ်ဒေသကြီး၏ အလယ်မှ သစ်ပင်ကြီးဆီသို့ မြန်ဆန်စွာ ချဉ်းကပ်သွားသည်။ ဤသည်မှာ ယင်းက သစ်ပင်ကြီးကို ဝါးမျိုပစ်တော့မည့်အလားပင်။

သို့သော်လည်း ထိုအခိုက်အတန့်မှာ လီဇီမေက ရုတ်တရက် ခေါင်းမော့လိုက်သည်။ သူ၏ အမူအရာက ပုံပျက်တွန့်လိမ်သွားသည်နှင့် သူက ပါးစပ်ဟလိုက်ပြီး နှလုံးကွဲကြေသော စူးရှရှ အော်သံကို ထုတ်ဖော်လိုက်သည်။

ထိုအော်သံက အလွန်စူးရှပြီး အရာအားလုံးကို ဖောက်ထွင်းပစ်နိုင်ဟန် ရ၏။

လောကက တုန်လှုပ်သွားပြီး ဘေးပတ်ဝန်းကျင်က ပရမ်းပတာဖြစ်သွားသည်။

ရွှီချင်း၏ ထိန်းချုပ်ခံထားရသော တားမြစ်ဒေသကြီးထဲမှ အသံများက ရုန်းထွက်တော့မည့် လက္ခဏာများ ပြလာသည်။

ဤနေရာက ဝိညာဉ်အသံတားမြစ်ဒေသကြီး ဖြစ်သည်။ အတိုင်းအတာတစ်ခုထိဆိုရလျှင် ဝိညာဉ်အသံက ဤတားမြစ်ဒေသကြီးထဲမှ အရှင်သခင်၏ စွမ်းရည်ကို ကိုယ်စားပြုသည်။ ၎င်းက နတ်ဘုရားတစ်ပါးမဟုတ်သော်လည်း တားမြစ်ဒေသကြီး၏ အရှင်သခင်အနေဖြင့် ၎င်းဆီမှာ သရုပ်အဆင့်အတန်း၏ အားသာချက်ရှိသည်။ ထို့ကြောင့် ၎င်း၏ တန်ပြန်တိုက်ခိုက်မှုက မြန်ဆန်ပြီး ရက်စက်ကြမ်းကြုတ်ဆဲပင်။

ဤအခိုက်အတန့်မှာ စူးရှသော အော်သံက ပဲ့တင်ထပ်လာသည့်အခါ ရွှီချင်း၏ ထိန်းချုပ်မှုက စတင်ပြိုကွဲလာသည်။ ထို့နောက် အသံများက ရွှီချင်းဆီသို့ ဦးတည်သွားကြသည်။

ရွှီချင်းက ယခင်အတိုင်း တည်ငြိမ်နေဆဲပင်။ သူက ညာလက်ကို မြှောက်လိုက်ပြီး သူ့အရှေ့မှ လေကို ဖမ်းဆုပ်လိုက်သည်။ ထို့နောက် သူက လက်သီးဆုပ်လိုက်သည်။

ဤသည်မှာ သူက ဟင်းလင်းပြင်ကို ချေမွဖျက်ဆီးပစ်လိုက်ပြီး အရာအားလုံးကို အဝေးသို့ မောင်းထုတ်ပစ်လိုက်သည့်အလားပင်။

ချက်ချင်းဆိုသလို အသံနတ်ဘုရားအခွင့်အာဏာက တောင်ကြီးတစ်တောင်ကဲ့သို့ မြဲမြံသွားသည်။ ကောင်းကင်ဘုံလေသည်ပင် ယင်းကို လုံးဝမလှုပ်ခါပစ်နိုင်ပေ။

ထိုမျှသာ မဟုတ်သေးပေ။ လီဇီမေ၏ ပါးစပ်မှ မြည်ဟိန်းထွက်လာသော စူးရှရှ အော်မြည်သံသည်ပင် ဤအခိုက်အတန့်မှာ ရွှီချင်းကြောင့် ချိုးဖြတ်ခံလိုက်ရသည်။

သူက ဤနေရာမှ အသံကို လုယက်လိုက်သည်။

လောကက တိတ်ဆိတ်ငြိမ်သက်သွားသည်။

ရွှီချင်းက လက်ဝါးကို ဆန့်ထုတ်လိုက်ပြီး တားမြစ်ဒေသကြီးဆီသို့ ဝှေ့ယမ်းလိုက်သည်။

နောက်အခိုက်အတန့်မှာ အသံ၏ စွမ်းအားက အပြည့်အဝ ပေါက်ကွဲထွက်လာသည်။

လောကက တဒင်္ဂ တိတ်ဆိတ်သွားပြီးနောက် မရေမတွက်နိုင်သော အသံများက စုပြုံထွက်ပေါ်လာကြသည်။ ဤသည်မှာ မြင့်တတ်လာသော နေက အမှောင်ညကို ဆုတ်ဖြဲလိုက်သည့်အလားပင်။ အသံများက ဝိညာဉ်အသံတားမြစ်ဒေသကြီးထဲမှာ အပြည့်အဝ ပေါက်ကွဲထွက်လာကြသည်။

ရေစီးဆင်းသော အသံက မြစ်ရေ၏ လမ်းကြောင်းကို အက်ကွဲသွားစေပြီး သစ်ရွက်လှုပ်ခတ်သံများက ၎င်းတို့ဘာသာ ပြိုကွဲသွားကြသည်။ သန္ဓေပြောင်းသားရဲများ၏ ဟိန်းဟောက်သံများနှင့် တားမြစ်ဒေသကြီးထဲမှ အသံအားလုံးက ဤအခိုက်အတန့်မှာ သတ်ဖြတ်ခြင်းစွမ်းအားတစ်ခုအဖြစ် ပြောင်းလဲသွားသည်။

အသံပေါက်ကွဲမှုက ကောင်းကင်ပေါ်မှာ တရစပ် ပြည့်နှက်သွားသည်။

မရေမတွက်နိုင်သော သစ်ပင်များက ပြိုကွဲသွားကြပြီး ပေါက်ကွဲသွားကြသည်။ သန္ဓေပြောင်းသားရဲများသည် နှလုံးကြေကွဲစွာ အော်ဟစ်လိုက်ကြပြီး သေဆုံးသွားကြသည်။

အကယ်၍ တစ်စုံတစ်ယောက်က ကောင်းကင်ပေါ်မှ ငုံ့ကြည့်မည်ဆိုလျှင် ကြီးမားသော အဖျက်စွမ်းအားက တားမြစ်ဒေသကြီး၏ အစွန်းဖျားမှ မြှောက်တတ်လာနေကြောင်း မြင်နိုင်လိမ့်မည်။ ယင်းက ဧရာမလက်ဝါးတစ်ခုနှယ် ပျံ့ပွားသွားပြီး တားမြစ်ဒေသကြီးတစ်ခုလုံးကို ဖုံးလွှမ်းသွားသည်။

ဤအခိုက်အတန့်မှာ ထိုအဖျက်စွမ်းအားသည် တားမြစ်ဒေသကြီ၏ အလယ်မှ သစ်ပင်ကြီးဆီသို့ မရပ်တန့်နိုင်သော အရှိန်အဟုန်နှင့်အတူ ဦးတည်သွားသည်။

ထို့နောက် တိုက်ရိုက် တွေ့ဆုံသွားသည်။

သစ်ပင်ကြီးသည် တုန်ယင်သွားသည်။ ၎င်းက အဖျက်စွမ်းအားကို မတောင့်ခံနိုင်သောကြောင့် အပိုင်းပိုင်းအစစ အက်ကွဲသွားသည်။

ဖုန်မှုန့်များကြားတွင် လီဇီမေနှင့် ချင်းချိုး၏ ပုံရိပ်က ထွက်ပေါ်လာကြသည်။ သို့သော်လည်း သူတို့က ပြိုကွဲသွားသော ဧရာမသစ်ပင်ကြီးနှင့်အတူ အောက်သို့ မပြုတ်ကျသွားကြချေ။ ယင်းအစား သူတို့က ထူးခြားဆန်းကြယ်စွာ လေထဲမှာ မျောလွင့်နေကြသည်။

သူတို့ကို ထူးဆန်းသော စွမ်းအင်တစ်ခုက ထိန်းချုပ်ထားဟန် ရသည်။

အမျိုးသမီးနှစ်ယောက်၏ အနောက်တွင် သုံးပေခန့်ရှည်လျားသော ရုပ်သေးရုပ်တစ်ခုက ဖုန်မှုန့်များကြားထဲမှ ဒယိမ်းဒယိုင် ထွက်လျှောက်လာသည်။

ထိုရုပ်သေးရုပ်၏ တစ်ကိုယ်လုံးက ယိုယွင်းပျက်စီးနေပြီး ၎င်း၏ လည်ပင်းပေါ်မှာ တန်းလန်းချိတ်ဆွဲထားသော ပုလွေအကျိုးတစ်ချောင်း ရှိသည်။

၎င်း၏ မျက်လုံးတစ်လုံးက ပျောက်ဆုံးနေပြီး ကျန်မျက်လုံးတစ်လုံးက ပြူးထွက်နေသည်။ စိတ်ရှုပ်ထွေးသော အရိပ်အယောင်က ထိုမျက်လုံးထဲမှာ ထွက်ပေါ်နေသည်။ သို့သော်လည်း အလွန်သိပ်သည်းသော နတ်ဘုရားအရှိန်အဝါကို ၎င်းထံမှ ထုတ်လွှတ်နေသည်။

ရုပ်သေးရုပ်ထွက်ပေါ်လာသည့်အခိုက် ပျက်စီးပြိုကွဲနေသော ဤတားမြစ်ဒေသကြီးက အသက်ပြန်ဝင်လာဟန် ရသည်။ အသက်ရှင်ကျန်ရစ်သော သန္ဓေပြောင်းသားရဲများနှင့် ထူးဆန်းသော သက်ရှိများက ရုပ်သေးရုပ်၏ ဦးတည်ရာဆီသို့ အရိုအသေပေးလိုက်ကြသည်။

သို့သော်လည်း ရုပ်သေးရုပ်၏ စိတ်အာရုံက တားမြစ်ဒေသကြီးပေါ်မှာ မရှိပေ။ ယခုအချိန်မှာ ၎င်းက ရွှီချင်းပေါ်မှာ အပြည့်အဝ အာရုံစိုက်ထားသည်။ ၎င်း၏ တစ်ခုတည်းသော မျက်လုံးထဲမှာ ဖရိုဖရဲစွမ်းအင်လှိုင်းများနှင့် ညစ်ထေးမှုက ထွက်ပေါ်လာသည်။ ဤသည်မှာ ၎င်းက အသိစိတ်အမျှင်တန်းတစ်ခုကို ထုတ်ဖော်ရန် အတင်းအကျပ် ကြိုးစားနေသည့်အလားပင်။ ၎င်းက တိုးညင်းသော ဟိန်းသံကို ထုတ်ဖော်လိုက်သည်။

“ ထွက်သွားစမ်း ”

ရွှီချင်းက ရုပ်သေးရုပ်ကို လျစ်လျူရှုထားပြီး အရှေ့သို့ ဆက်လျှောက်သွားသည်။

ယင်းကိုမြင်သောအခါ ရုပ်သေးရုပ်၏ မျက်လုံးထဲမှ ဖရိုဖရဲစွမ်းအားနှင့် ရူးသွပ်မှုက ပိုပြီးအားကောင်းလာသည်။ ထို့နောက် ၎င်း၏ ထိန်းချုပ်ခံထားရသော လီဇီမေက ရုတ်တရက် လှုပ်ရှားလာပြီး ရွှီချင်းထံသို့ တန်းမတ်စွာ ပျံသန်းသွားသည်။

ပြင်းထန်သော သတ်ဖြတ်ခြင်းစိတ်ဆန္ဒက လီဇီမေ၏ ခန္ဓာကိုယ်ထဲမှ ပေါ်လျှိုးထွက်လာသည်။ ယင်းက ရာသီဥတုကို ပြောင်းလဲသွားစေပြီး အေးစက်သော လေကို နေရာအနှံ့သို့ ပျံ့နှံ့သွားစေသည်။ သူဖြတ်သန်းသွားသည့်နေရာတိုင်း တစ်စုံတစ်ယောက်၏ အမြင်အာရုံနှင့် နားလည်မှုက ဖရိုဖရဲဖြစ်သွားလိမ့်မည်။

ယင်းက သတ်ဖြတ်ခြင်းနယ်ပယ်ဖြစ်သည်။

ချင်းချိုးသည်လည်း ချက်ချင်း မျက်လုံးဖွင့်လိုက်သည်။ အစတွင် သူက ဇဝေဇဝါဖြစ်နေသည်။ ဤသည်မှာ သူက နက်ရှိုင်းစွာ အိပ်မောကျနေခြင်းမှ ပြန်နိုးထလာသည့်အလားပင်။

ထို့နောက် သွေးနီရောင်အလင်းက သူ၏ ခန္ဓာကိုယ်ထဲမှ ပေါ်လျှိုးလာပြီး ဘေးပတ်ဝန်းကျင်ကို အနီရောင်သို့ ပြောင်းလဲသွားစေသည်။

ချောက်ချားဖွယ်ကောင်းသော ရယ်မောသံက ချင်းချိုး၏ ပါးစပ်ထဲမှ မြည်ထွက်လာသည်။

“ ဟီး ဟီး ဟီး ဟီး ”

ထိုရယ်မောသံ ထွက်ပေါ်လာသည့်အခိုက် ချင်းချိုးက ရွှီချင်းကို မြင်တွေ့သွားသည့်အခါ သူ၏ မျက်နှာက မိန်းမောတွေဝေသွားသည်။

“ နင်… ရင်းနှီးတယ်လို့ ခံစားရတယ်… ”

သူက စကားပြောလိုက်သည်နှင့် သွေးအမျှင်တန်းများက တားမြစ်ဒေသကြီးထဲမှာ အစောနက သေဆုံးသွားခဲ့ကြသော သန္ဓေပြောင်းသားရဲများထံမှ ထွက်ပေါ်လာကြပြီး အတူတကွ စုဝေးသွားကြသည်။

ရွှီချင်းက ချင်းချိုးကို စိုက်ကြည့်လိုက်သည်။

လီဇီမေနှင့် ချင်းချိုး၏ ထူးခြားမှုကို နယ်ပယ်ဟုခေါ်ဆိုကြောင်း သူသိသည်။

လီဇီမေ၏ နယ်ပယ်က သတ်ဖြတ်ခြင်းကို အဓိကအာရုံစိုက်သည်။

ချင်းချိုးသည်တော့ သူ့ဆီမှာ ထိုက်စီရှန်းမုန့်ဂိုဏ်း၏ သွေးနယ်ပယ်ရှိသည်။

အတိတ်တွင် စီနီယာအကိုကြီးက ပြောခဲ့သည်မှာ ယင်းက ထိုက်စီရှန်းမုန့်ဂိုဏ်း၏ တားမြစ်လျှို့ဝှက်အတတ်ပညာတစ်ခု ဖြစ်သည်။ ကျင့်ကြံသူတစ်ယောက်က ယင်းကို အခြေခံမျှသာ တတ်ကျွမ်းထားမည်ဆိုလျှင်ပင် ယင်းက အလွန်အားကောင်းလိမ့်မည်။

ဤသွေးနယ်ပယ်ကို ဆင်ခြင်နားလည်နိုင်သူများမှာ အကျင့်စရိုက်နှစ်ခုထက် ပိုရှိသည်ဟု ဆိုကြသည်။

“ အကျင့်စရိုက်တစ်ခု တိုးပွားလာတဲ့အခါတိုင်း သူတို့ရဲ့ မျက်လုံးထဲက လောကက အရောင်တစ်ရောင် ဆုံးရှုံးသွားလိမ့်မယ်… အကျင့်စရိုက်(၁၁)ခု ရှိလာတဲ့အခါကျရင် သူတို့ရဲ့ မျက်လုံးထဲမှာ သွေးနီရောင်တစ်ရောင်ပဲ ကျန်ရစ်တော့လိမ့်မယ်… အဲ့ဒါက ကျွမ်းကျင်ပညာရှင်အဆင့်ပဲ ”

သို့သော်လည်း ထိုက်စီရှန်းမုန့်ဂိုဏ်း၏ သမိုင်းတွင် အကျင့်စရိုက်(၁၁)ခုထိ ပိုင်ဆိုင်နိုင်ခဲ့သည့်လူ မရှိခဲ့ပေ။ သူတို့အားလုံးက လမ်းတစ်ဝက်မှာ ရူးသွပ်သွားကြပြီး သေဆုံးသွားကြသည်။

“ နယ်ပယ်ဆိုတာ ရှေးဘုရင်ရွှမ်ယုံခေတ်အတွင်းမှာ ဓားကိုင်နန်းတော်က စူးစမ်းရှာဖွေခဲ့တဲ့ လမ်းစဉ်တစ်ခုပဲ… အဲ့ဒါက နတ်ဘုရားတွေကို ဦးညွတ်လာအောင် ဆောင်ရွက်နိုင်စေမယ့် စွမ်းအားတစ်မျိုးပဲ… ဒါပေမဲ့ နောက်ဆုံးမှာ အဲ့ဒါက ကျရှုံးသွားခဲ့တယ် ”

လပူဇော်ဒေသကြီးထဲတွင် အိမ်ရှေ့စံမင်းသားက သူ့အား သင်ကြားပေးခဲ့စဉ် ပြောကြားခဲ့သော စကားကို ရွှီချင်းက ပြန်အမှတ်ရသွားသည်။

ရွှီချင်းက တွေးတောနေသော်လည်း သူ၏ ခြေလှမ်းကို မရပ်တန့်ခဲ့ပေ။ လီဇီမေနှင့် ချင်းချိုးက သူ့ဆီသို့ တစ်ဟုန်ထိုး ပြေးလာနေကြသည်။ ထိုအခိုက်အတန့်မှာ သူ၏ ညာဘက်မျက်လုံးက မူလစွမ်းအင်ဖြင့် တောက်ပသွားပြီး တာအိုအမှတ်အသားတစ်ခုကို ထုတ်ဖော်လိုက်သည်။

ထိုအမှတ်အသား ထွက်ပေါ်လာသည်နှင့်ချက်ချင်း လောကက တုန်ယင်သွားသည်။

ယင်းက ပယ်ဖျက်ခြင်းအခွင့်အာဏာ ဖြစ်သည်။

ရွှီချင်းက ထိုအခွင့်အာဏာဖြင့် လီဇီမေနှင့် ချင်းချိုးကို နောက်တစ်ကြိမ် ကြည့်လိုက်သည်။ ထိုအခါ ရုပ်သေးရုပ်ထံမှ မရေမတွက်နိုင်သော ချည်မျှင်များက အမျိုးသမီးနှစ်ယောက်ကို ရစ်ပတ်ချုပ်နှောင်ထားကြောင်း သူမြင်တွေ့သွားသည်။

ယင်းတို့ကို သူက မြင်နိုင်မှတော့ ထုံးစံအားဖြင့် ပယ်ဖျက်နိုင်သည်။

ရွှီချင်းက သူ၏ ညာဘက်မျက်လုံးကို မျက်တောင်တစ်ချက်ခတ်လိုက်ပြီး ဖြတ်တောက်သော အပြုအမူကို ဆောင်ရွက်လိုက်သည်။

နောက်အခိုက်အတန့်မှာ လီဇီမေနှင့် ချင်းချိုး၏ ခြေလှမ်းက ရပ်တန့်သွားကြပြီး သူတို့၏ ခန္ဓာကိုယ်က တုန်ယင်သွားကြသည်။

သူတို့၏ ခန္ဓာကိုယ်ပေါ်မှ သဏ္ဍာန်မဲ့ချည်မျှင်များက ရွှီချင်း၏ မျက်တောင်ခတ်မှုအောက်မှာ ထူးခြားဆန်းကြယ်သော နည်းလမ်းနှင့်အတူ ပြတ်တောက်သွားကြသည်။

ထိုချည်မျှင်များက ပြတ်တောက်သွားသည်နှင့်ချက်ချင်း အမျိုးသမီးနှစ်ယောက်က မျက်လုံးပြန်မှိတ်သွားကြသည်။ သူတို့၏ ခန္ဓာကိုယ်က အရုပ်ကြိုးပြတ်သကဲ့သို့ မြေပြင်ပေါ်သို့ ပြုတ်ကျသွားကြပြီး လှုပ်ရှားမှုကင်းမဲ့သွားကြသည်။

သူတို့၏ ခန္ဓာကိုယ်မှ ထုတ်လွှတ်နေသော နယ်ပယ်သည်လည်း မြန်ဆန်စွာ လွင့်ပြယ်သွားသည်။

အော်ဟစ်ညည်းညူသံသည် ချည်မျှင်များ ဖြတ်တောက်ခံလိုက်ရသော ရုပ်သေးရုပ်၏ ပါးစပ်ထဲမှ မြည်ထွက်လာသည်။ ဤအခိုက်အတန့်မှာ ၎င်း၏ ခန္ဓာကိုယ်က လေထဲသို့ ရုတ်တရက် မြှောက်တတ်သွားသည်။ ၎င်းက ပြင်းထန်သော ဒေါသစိတ်နှင့်အတူ ရွှီချင်းဆီသို့ တန်းမတ်စွာ ဦးတည်သွားသည်။

နှလုံးကွဲကြေသော အော်သံသည် အသံလှိုင်းလှံအဖြစ်သို့ အသွင်ပြောင်းလဲသွားပြီး ရွှီချင်း၏ နှလုံးဆီသို့ အကြင်နာမဲ့စွာ ပျံသန်းသွားသည်။

ရွှီချင်းက လှံကို မတိမ်းရှောင်ဘဲ သူ၏ ရင်ဘက်ပေါ်သို့ ကျဆင်းသွားရန် ခွင့်ပြုထားသည်။

လှံက သူ၏ ခန္ဓာကိုယ်နှင့် ထိတွေ့သွားသည့်အခိုက် ၎င်းက မဖျက်ဆီးနိုင်သော တောင်ကြီးတစ်တောင်ကို ဝင်ဆောင့်သွားဟန် ရ၏။ လှံက သာမန်မျက်စိဖြင့် မြင်နိုင်သော အလျင်နှင့်အတူ ပြိုကွဲပျက်စီးသွားသည်။

လှံက လုံးဝပျောက်ကွယ်သွားသည်နှင့်ချက်ချင်း ရုပ်သေးရုပ်က တန်ပြန်သက်ရောက်မှုကို ခံစားရလိုက်သည်။ ယင်းက ဝိညာဉ်အသံအရှင်သခင်၏ ခန္ဓာကိုယ်ကို ချက်ချင်း အနောက်ဆုတ်သွားစေပြီး ၎င်း၏ ရုပ်သေးခန္ဓာကိုယ်ပေါ်မှာ အက်ကွဲရာများကို ထွက်ပေါ်လာစေသည်။

ကြီးမားသော အကြောက်တရားက ၎င်း၏ ဖရိုဖရဲအသိစိတ်ထဲမှာ စတင်ပေါ်ထွက်လာသည်။ ဤအခိုက်အတန့်မှာ ၎င်းက အမြန်အနောက်ဆုတ်သွားပြီး ဤနေရာမှ ထွက်ပြေးရန် ကြိုးစားလိုက်သည်။

သို့သော်လည်း အလွန်နောက်ကျသွားချေ၏။

ရွှီချင်းက အရှေ့သို့ ခြေတစ်လှမ်း လှမ်းလိုက်သည်။ နေလုံးက သူ၏ အသိစိတ်ပင်လယ်ထဲမှာ ဒြပ်ထည်ဖြစ်ပေါ်လာသည့်အခါ သူ၏ တစ်ကိုယ်လုံးမှ အလင်းရောင်က ချက်ချင်း ထွန်းလင်းတောက်ပလာပြီး အဆုံးမဲ့သော အလင်းရောင်နှင့် အပူဓာတ်ကို ထုတ်လွှတ်လိုက်သည်။ ဤအခိုက်အတန့်မှာ သူ၏ ခန္ဓာကိုယ်က ကြီးမားသော နေတစ်စင်းအဖြစ်သို့ အသွင်ပြောင်းလဲသွားသည်။

နေလုံးက ဝိညာဉ်အသံတားမြစ်ဒေသကြီးထဲမှာ မြှောက်တတ်လာသည်။

ဤအခိုက်အတန့်မှာ နေဝင်ရီတရောအချိန်က ကုန်ဆုံးသွားပြီး ညအချိန်က ချဉ်းကပ်လာသည်။ သို့သော်လည်း ချက်ချင်းဆိုသလို အမှောင်ညက မြင့်တတ်လာနေသော နေလုံးကြောင့် ဖယ်ရှားခံလိုက်ရသည်။ ကောင်းကင်က နောက်တဖန် လင်းထိန်သွားသည်။

မည်းမှောင်နေသော ဤတားမြစ်ဒေသကြီးက အလင်းရောင်ဖြင့် ဖုံးလွှမ်းခံလိုက်ရသည်။ ဒြပ်နှောများဖြင့် ပြည့်နှက်နေသော မြစ်ရေက ဖြည်းညင်းစွာ သန့်စင်လာသည်။

ဤသည်မှာ အရာအားလုံးက သန့်စင်ခံနေရသည့်အလားပင်။