ကိုယ်တိုင် ငါးစာလုပ်ခြင်း

ဖုန်းလင်းတောင်ကို လူသားမျိုးနွယ်က ကောင်းကင်ဘုရင်ဘွဲ့ ချီးမြှောက်ခဲ့သည်။

ထိုကိစ္စက ဆူပူအုံကြွမှုတစ်ခုကို ဖြစ်စေသည်။ ဤအတောအတွင်းမှာ လူသားမျိုးနွယ်သည် မိစ္ဆာငှက်မွှေးသူတော်စင်ကုန်းမြေကို ဆန့်ကျင်သော စစ်ပွဲများတွင် နိုင်ပွဲပိုများလာသည်။

တချို့နိုင်ပွဲများသည် သတင်းအချက်အလက်များ ပေါက်ကြားမှုမှ ဖြစ်ပေါ်လာဟန် ရသည်။

ထို့ပြင် လူသားမျိုးနွယ်သည် မိစ္ဆာငှက်မွှေးသူတော်စင်ကုန်းမြေဘက်မှ စစ်ရေးဗျူဟာများကို ကောင်းမွန်စွာ နားလည်ထားပုံပေါ်သည်။ သူတို့က မိစ္ဆာငှက်မွှေးသူတော်စင်ကုန်းမြေ၏ အတွင်းရေးဆက်သွယ်မှုများကို ကောင်းမွန်စွာ ထိန်းချုပ်ထားနိုင်ဟန် ရ၏။

ယင်းက မိစ္ဆာငှက်မွှေးသူတော်စင်ကုန်းမြေကို ဖိအားခံစားရစေသည်။

စစ်ရေးဗျူဟာတွင် လူသားမျိုးနွယ်က ကြိုတင်လက်ဦးမှု ရယူထားနိုင်ပုံပေါ်သည်။

မိစ္ဆာငှက်မွှေးသူတော်စင်ကုန်းမြေကို ပိုပြီးခေါင်းကိုက်စေသည်မှာ သူတို့စေလွှတ်ထားသော သူလျှိုများက အမြစ်ဖြတ်သုတ်သင်ခံလိုက်ရခြင်း ဖြစ်သည်။

အင်အားစုနှစ်ခု စတင်စစ်ပွဲဆင်နွှဲကတည်းက မိစ္ဆာငှက်မွှေးသူတော်စင်ကုန်းမြေသည် သတင်းအချက်အလက်များ စုဆောင်းရန် လူသားမျိုးနွယ်ဆီသို့ သူတို့၏ သူလျှိုများကို စေလွှတ်ထားခဲ့သည်။ တချို့သည် အသေခံစစ်သည်တော်များဖြစ်ပြီး အရေးကြီးသော နေရာများတွင် ကိုယ့်ကိုယ်ကိုယ် ဖောက်ခွဲပစ်ကြလိမ့်မည်။

တချို့သည်တော့ ပုန်းအောင်းနေကြသည်။

သူလျှိုများ၏ တာဝန်သည် သတင်းအချက်အလက်စုဆောင်းရန်နှင့် စည်းချအစီအရင်ကို ဖျက်ဆီးပစ်ရန် ဖြစ်သည်။

ယင်းက သူတော်စင်ကုန်းမြေအတွက် အရေးကြီးသော ကိစ္စဖြစ်သည်။ ထို့ကြောင့် သူတို့က ဤကိစ္စအတွက် အတော်လေး အားစိုက်ထုတ်ခဲ့ကြသည်။

သို့သော်လည်း ဤအတောအတွင်းမှာ ထိုသူလျှိုများက ဖော်ထုတ်ခံလိုက်ရကြသည်။

တစ်ချိန်တည်းမှာ ဖုန်းလင်းတောင်က ကောင်းကင်ဘုံအမတ်ဘွဲ့ကို ချီးမြှောက်ခံခဲ့ရသည်။ ထိုမျှသာ မကသေးပေ။ သူ၏ ဂုဏ်သတင်းက တဖြည်းဖြည်း ကြီးမားလာပြီး အထွတ်အထိပ်သို့ ရောက်ရှိသွားသည်။ ယခု သူက ကောင်းကင်ဘုရင်ဘွဲ့ကိုပင် ချီးမြှောက်ခံလိုက်ရသည်။

သို့သော်လည်း ယင်းက ဖုန်းလင်းတောင်၏ လက်ချက်ဟု သေချာပေါက် မပြောနိုင်ပေ။ မည်သို့ဖြစ်ပါစေ မိစ္ဆာငှက်မွှေးသူတော်စင်ကုန်းမြေက ကိစ္စတချို့ကို ကောင်းမွန်စွာ နားလည်ထားသည်။ ဖုန်းလင်းတောင်၏ ယခင်သရုပ်အရ တစ်ဖက်လူသည် သူတို့၏ စစ်ရေးဗျူဟာများကို သိထားရန် မည်သို့မှမဖြစ်နိုင်ပေ။

မည်သို့ဖြစ်ပါစေ ကောင်းကင်ဘုရင်ဘွဲ့ကို ချီးမြှောက်နေစဉ်အတွင်း မိစ္ဆာငှက်မွှေးသူတော်စင်ကုန်းမြေ၏ စစ်သုံးပန်းတစ်ထောင်ကျော်ကို သွေးယဇ်ပူဇော်ခြင်းက ကြီးမားသော ကိစ္စတစ်ခု မဟုတ်ပါလော။

ထိုစစ်သုံးပန်းတစ်ထောင်ထဲမှာ သူတို့၏ ဆွေးမျိုးသားချင်းများ၊ တာအိုလက်တွဲဖော်များနှင့် မိတ်ဆွေရောင်းရင်းများ ပါဝင်ကြသည်။ သို့ဖြစ်၍ ဤကိစ္စ၏ သက်ရောက်မှုက အလွန်အမင်း ကြီးမားသည်။

အကယ်၍ သူတို့က စစ်မြေပြင်မှာ သေဆုံးသွားမည်ဆိုလျှင် ကိစ္စမရှိပေ။ မိစ္ဆာငှက်မွှေးသူတော်စင်ကုန်းမြေက ဝမ်းနည်းလိမ့်မည်ဖြစ်သော်လည်း ထိုမျှအပြင်းအထန် ဒေါသထွက်လိမ့်မည် မဟုတ်ချေ။ သို့သော်လည်း အကယ်၍ သူတို့က လူမြင်ကွင်းမှာ ရက်ရက်စက်စက် အသတ်ခံလိုက်ရမည်ဆိုလျှင်…

ယင်းက မိစ္ဆာငှက်မွှေးသူတော်စင်ကုန်းမြေမှ မျိုးနွယ်ဝင်အားလုံး၏ အမျက်ဒေါသကို နှိုးဆွလိမ့်မည်။

ထို့ပြင် စည်းချအစီအရင်၏ ကာဆီးထားမှုကြောင့် မိစ္ဆာငှက်မွှေးသူတော်စင်ကုန်းမြေသည် စစ်ပွဲအတွင်းမှာ လူသားစစ်သုံးပန်းအနည်းငယ်ကိုသာ ဖမ်းဆီးမိထားကြသည်။ အကယ်၍ သူတို့က တူညီသော နည်းလမ်းဖြင့် လက်တုံ့ပြန်မည်ဆိုလျှင် ပိုပြီးအရှက်ရရုံသာ ရှိလိမ့်မည်။ ယင်းက အကျိုးသက်ရောက်မှု သိပ်မရှိပေ။

ယင်းအစား မိစ္ဆာငှက်မွှေးသူတော်စင်ကုန်းမြေ၏ ဒေါသကိုသာ ပိုပြီးတိုးပွားစေလိမ့်မည်။

ထို့ပြင် ကွပ်မျက်ရန် တာဝန်ပေးခြင်းခံရပြီး ကောင်းကင်ဘုရင်အဖြစ် ရာထူးတိုးမြှင့်သွားသော ဖုန်းလင်းတောင်က မိစ္ဆာငှက်မွှေးသူတော်စင်ကုန်းမြေမှ မျိုးနွယ်ဝင်အားလုံး၏ မုန်းတီးခြင်းခံလိုက်ရသည်။

သို့ဖြစ်၍ လူသားဧကရီ၏ စကားက အဆုံးသတ်သွားပြီး ဖုန်းလင်းတောင်က ဧကရီကို စိတ်လှုပ်ရှားစွာ ကျေးဇူးတင်လိုက်စဉ် စည်းချအစီအရင်၏ အပြင်ဘက်မှ သူတော်စင်ကုန်းမြေများက တုန်ယင်သွားကြသည်။

မရေမတွက်နိုင်သော နတ်ဘုရားစိတ်အာရုံများက ထွက်ပေါ်လာကြပြီး စည်းချအစီအရင်ပေါ်သို့ ပစ်မှတ်ထားလိုက်ကြသည်။

ထိုနတ်ဘုရားစိတ်အာရုံများထဲမှာ ကြောက်မက်ဖွယ်ကောင်းသော ဒေါသနှင့် ဖော်မပြနိုင်သော သတ်ဖြတ်ခြင်းစိတ်ဆန္ဒဖြင့် ပြည့်နှက်နေကြသည်။

တစ်စုံတစ်ယောက်က မည်မျှဉာဏ်ကောင်းပါစေ သို့မဟုတ် မည်သည့်ရွေးချယ်မှုကို ပြုလုပ်ခဲ့ပါစေ ဤကိစ္စက လုံးဝခွင့်မလွှတ်နိုင်သောအရာ ဖြစ်၏။

အဘယ့်ကြောင့်ဆိုသော် ယင်းကို အမြင်သက်သက်ဖြင့် ဆုံးဖြတ်သောကြောင့် ဖြစ်သည်။ ယင်းက ပွင့်လင်းသော ဗျူဟာတစ်ခု ဖြစ်သည်။

ယင်းက လောကတစ်ခွင် ရိုက်ခတ်သွားမည့် မီးမုန်တိုင်းဖြစ်သည်။

ယင်းက ဖုန်းလင်းတောင်၏ အတွေးများကိုလည်း ပရမ်းပတာဖြစ်စေသည်။

သူက ဉာဏ်ကောင်းပြီး ကောက်ကျစ်သည်။ ဤတစ်လအတွင်းမှာ ဖြစ်ပျက်ခဲ့သော ကိစ္စများက သူ့ကို စိုးရိမ်ကြောင့်ကြစေပြီး စိတ်မသက်မသာ ခံစားရစေသည်။ ယခု သူက အပြင်ပန်းတွင် စိတ်လှုပ်ရှားနေသော်လည်း စိတ်ထဲမှာတော့ ဒေါသထွက်နေသည်။

ယင်းက သူ၏ အစီအစဉ်မဟုတ်ပေ။ သို့ဖြစ်၍ ဤကိစ္စ၏ အဓိပ္ပာယ်ကို သူနားလည်သည်။

‘ အဲ့ဒါက ငါ့ကို ပြန်လမ်းမရှိအောင် လုပ်နေတာပဲ ’

‘ သူတို့က ငါ့ကို လူသားမျိုးနွယ်နဲ့ တစ်ပေါင်းတစ်စည်းတည်းဖြစ်အောင် ချုပ်နှောင်နေတာပဲ… ’

‘ ပြီးတော့ ဒီဟာက ပထမလှုပ်ရှားမှုပဲ ရှိသေးတယ်… ဧကရီဆီမှာ ဒုတိယလှုပ်ရှားမှု ထပ်ရှိနိုင်တယ်… ’

‘ သူက ငါ့ရဲ့ တန်ဖိုးကို မြှင့်တင်ပေးချင်ပြီး ငါ့ကို ဆူဖြိုးတဲ့ သိုးတစ်ကောင်ဖြစ်လာအောင် လုပ်ချင်တယ်… အနည်းဆုံးတော့ မိစ္ဆာငှက်မွှေးမျိုးနွယ်က လူတွေ ငါ့ကို သေလောက်အောင် မုန်းတီးသွားမှာကို သူက လုပ်ချင်တယ် ’

‘ ဒီအတိုင်းဆိုရင် တကယ်လို့ မိစ္ဆာငှက်မွှေးမျိုးနွယ်ရဲ့ အကြီးအကဲတွေက ငါချောက်ချခံရတယ်ဆိုတာကို နားလည်သွားရင်တောင် ငါ့မှာ ပြန်လမ်းမရှိတော့ဘူး… မိစ္ဆာငှက်မွှေးသူတော်စင်ကုန်းမြေက လူတွေက ငါ့ကို သေလောက်အောင် မုန်းတီးနေမယ်ဆိုရင် ငါမှားတာ မှန်တာက အရေးမကြီးတော့ဘူး ’

‘ ငါက လူတိုင်းရဲ့ ပစ်မှတ်ဖြစ်လာပြီ… သူတော်စင်ကုန်းမြေက သူတို့ရဲ့ စစ်ရှုံးမှုအတွက် ငါ့ကို အပြစ်ပုံချပြီးတော့ သူတို့လူတွေရဲ့ ရူးသွပ်မှုနဲ့ တိုက်ပွဲစိတ်ဓာတ်ကို မြှင့်တင်ပေးလိမ့်မယ်… အဲ့ဒါက စစ်ပွဲမှာ သူတို့ရဲ့ အားထုတ်မှုကို ပိုပြီးတိုးပွားစေလိမ့်မယ် ’

‘ လူသားမျိုးနွယ်အတွက်တော့ တကယ်လို့ ငါက သူတော်စင်ကုန်းမြေရဲ့ ကြီးမားတဲ့ အမုန်းတရားကို ဆွဲဆောင်လိုက်မယ်ဆိုရင် ငါက သူတို့အတွက် ငါးစာဖြစ်လာလိမ့်မယ် ”

‘ တကယ်လို့ လူသားမျိုးနွယ်က စစ်ပွဲမှာ ရှုံးနိမ့်သွားမယ်ဆိုရင် စစ်ပွဲရဲ့ တခြားအကျိုးအမြတ်တွေအတွက် သူတို့က ငါ့ကို သူတော်စင်ကုန်းမြေဆီ လက်လွှဲပေးနိုင်လောက်တယ် ’

‘ ဘာပဲဖြစ်ဖြစ် လူသားမျိုးနွယ်က ငါ့ကို ဒီအခြေအနေထိ တွန်းပို့လိုက်မှတော့ သူတော်စင်ကုန်းမြေရဲ့ ငါ့အပေါ် သတ်ဖြတ်ချင်စိတ်က အရာအားလုံးထက် သာလွန်သွားလိမ့်မယ် ’

‘ မိစ္ဆာငှက်မွှေးသူတော်စင်ကုန်းမြေက အကြီးအကဲတွေက အမှန်တရားကို သိထားရင်တောင် သူတို့မျိုးနွယ်ဝင်တွေရဲ့ အမြင်ကိုပဲ အဓိကဦးစားပေးကြလိမ့်မယ် ’

‘ ဘယ်လောက် ရက်စက်လိုက်လဲ ’

‘ လူသားမျိုးနွယ်ပဲဖြစ်ဖြစ် သူတော်စင်ကုန်းမြေပဲဖြစ်ဖြစ် သူတို့အားလုံးက ဉာဏ်များတဲ့လူတွေချည်းပဲ ’

သူ၏ အတွေးများက ပရမ်းပတာ လှုပ်ခတ်သွားသော်လည်း ဖုန်းလင်းတောင်က စိတ်လှုပ်ရှားသော အမူအရာကို သူ၏ မျက်နှာပေါ်မှာ ဆက်လက် ထိန်းသိမ်းထားဆဲပင်။ သူက စည်းချအစီအရင်၏ အပြင်ဘက်မှ သူတော်စင်ကုန်းမြေကို ကြည့်လိုက်သည်။ ထို့နောက် သူက လူသားမျိုးနွယ်၏ နန်းတော်ကို ကြည့်လိုက်သည်။

နောက်ဆုံးမှာတော့ သူက စိတ်ဆုံးဖြတ်လိုက်ပြီး ညာလက်ကို မြှောက်လိုက်သည်။ သူ၏ ကျင့်ကြံခြင်းစွမ်းအားက ထွက်ပေါ်လာသည့်အခါ သူက အောက်ဘက်မှ မိစ္ဆာငှက်မွှေးကျင့်ကြံသူများပေါ်သို့ ဖိချလိုက်သည်။

လောကက တုန်လှုပ်သွားသည်။ မိစ္ဆာငှက်မွှေးသူတော်စင်ကုန်းမြေမှ စစ်သုံးပန်းဆယ်ပုံတစ်ပုံသည် ချက်ချင်း ခန္ဓာကိုယ်ပြိုကွဲသွားကြသည်။ သူတို့၏ ဝိညာဉ်သည်ပင် ဖျက်ဆီးခံလိုက်ရသည်။

စည်းချအစီအရင်၏ အပြင်ဘက်ရှိ မိစ္ဆာငှက်မွှေးသူတော်စင်ကုန်းမြေမှ လူများက ထိုမြင်ကွင်းကို မြင်သွားသောအခါ အလွန်ဒေါသထွက်သွားကြသည်။

ဖုန်းလင်းတောင်က သွေးဆာသော အမူအရာကို ထုတ်ဖော်လိုက်လေရာ သူ၏ မျက်လုံးက သွေးရောင်လွှမ်းသွားသည်။ လူသားမျိုးနွယ်၏ စောင့်ကြည့်မှုအောက်မှာ သူက အရှေ့သို့ လျှောက်သွားပြီး ကျန်ရှိသော စစ်သုံးပန်းများကို ဆက်လက် သတ်ဖြတ်လိုက်သည်။

သတ်ဖြတ်မှုက ဆက်လက် ဖြစ်ပွားနေပြီး သွေးက နေရာအနှံ့သို့ ပြန့်ကျဲသွားသည်။ ဖုန်းလင်းတောင်က ဤသတ်ဖြတ်မှုတွင် အမှန်တကယ် စိတ်နစ်မြှုပ်ထားပြီး နှစ်သက်အားရနေဟန် ရသည်။ ယင်းက စည်းချအစီအရင်၏ အပြင်ဘက်ရှိ သူတော်စင်ကုန်းမြေမှ ကျင့်ကြံသူများကို အလွန်ဒေါသထွက်စေသည်။

သူတို့၏ မျိုးနွယ်ဝင်များက ရက်ရက်စက်စက် သတ်ဖြတ်ခံနေရသည်ကို သူတို့က အကူအညီမဲ့စွာ ကြည့်နေရသည်။ အသတ်ခံလိုက်ရသော လူများထဲတွင် သူတို့၏ အကြီးအကဲများ၊ တပည့်များနှင့် နောင်မျိုးဆက်များ ပါဝင်ကြသည်။ ထိုသို့သတ်ဖြတ်မှုက အလွန်ရက်စက်ပြီး အကြင်နာမဲ့ဟန် ရသည်။

သို့သော်လည်း ယင်းက စစ်ပွဲဖြစ်သည်။ စစ်ပွဲမှာ မှားသည် မှန်သည် မရှိပေ။

သူတော်စင်ကုန်းမြေများက ဝမ်ကူးကုန်းမြေဆီသို့ ဆင်းသက်လာကြပြီး စစ်ပွဲကို စတင်ခဲ့သည့်အခိုက် ယင်းက နှစ်ဖက်စလုံး၏ ရပ်တည်မှုကို အဆုံးအဖြတ်ပေးခဲ့သည်။

ယင်းက မင်းသေမလား ငါသေမလား ဖြစ်သည်။

သို့ဖြစ်၍ လူသားမျိုးနွယ်က အေးစက်စွာ စိုက်ကြည့်နေသည်။ မျိုးနွယ်စုအသီးသီးသည်လည်း ထို့အတူပင်။ ရွှီချင်းက မတားဆီးသလို အားညိုက နှုတ်ခမ်းသပ်လိုက်သည်။

ဖုန်းလင်းတောင်က ပိုပြီးရူးသွပ်စွာ သတ်ဖြတ်လာသည်။

သူက ကိုယ့်ကျိုးကိုသာ အဓိကစဉ်းစားသူ ဖြစ်သည်။ သူဂရုစိုက်သည်မှာ စစ်သုံးပန်းများကို သတ်ဖြတ်ပြီးနောက် ဖြစ်ပေါ်လာမည့် အကျိုးဆက်သာ ဖြစ်သည်။ ဖြစ်စဉ်မဟုတ်ပေ။

နောက်ဆုံးမှာတော့ ဆယ့်ငါးမိနစ်ကြာပြီးနောက် ဖုန်းလင်းတောင်က နောက်ဆုံးစစ်သုံးပန်းကို သတ်ဖြတ်လိုက်သည်။ ယခု သူ၏ တစ်ကိုယ်လုံးမှာ သွေးဖြင့် ရွှဲစိုသွားပြီး သူ၏ အမူအရာမှာ ရက်စက်ကြမ်းကြုတ်မှုဖြင့် ပြည့်နှက်နေသည်။ သူက သူတော်စင်ကုန်းမြေကို ကြည့်လိုက်ပြီး နှာခေါင်းရှုံ့လိုက်သည်။

ထို့နောက် သူက နန်းတော်၏ ဦးတည်ရာဆီသို့ ကြည့်လိုက်ပြီး အရိုအသေပေးလိုက်သည်။

“ ကျေးဇူးတင်ပါတယ် အရှင်မ ”

ဖုန်းလင်းတောင်၏ ရက်စက်ကြမ်းကြုတ်သော တိုက်ခိုက်မှုများ၊ သူ၏ လုပ်ဆောင်မှု၊ သဘောထားနှင့် စကားများတွင် မည်သည့်အမှားအယွင်းမှ မရှိပေ။ သူက လူသားမျိုးနွယ်နှင့် အပြည့်အဝ ပူးပေါင်းဆောင်ရွက်လိုက်ပြီး သူ့ကိုယ်သူ မိစ္ဆာငှက်မွှေးသူတော်စင်ကုန်းမြေ၏ အမုန်းခံပစ်မှတ်ဖြစ်လာစေသည်။

ရွှီချင်းက ထိုမြင်ကွင်းကို အဝေးမှ လှမ်းကြည့်နေသည်။ သူ၏ မျက်လုံးထဲတွင် အနက်ရောင်အလင်း ထွက်ပေါ်လာသည်။

သူ၏ ဘေးမှ အားညိုသည်တော့ ပြုံးလိုက်သည်။

“ ဒီဖုန်းလေးမှာ ရည်မှန်းချက်တချို့ရှိတယ်… သူ့ကို တွန်းအားပေးဖို့ မလိုပါဘူး… သူက လူသားမျိုးနွယ်ဆီမလာခင် သူ့ဘာသာ အစီအစဉ်တစ်ခု ဆွဲထားလောက်တယ်… ”

“ ဒီတော့ ငါးမျှားတာ အောင်မြင်ဖို့အတွက် ချင်းလေး… နောက်ရက်အတွင်းမှာ ငါတို့တွေ အကြင်နာမဲ့နွားသိုးငါးကောင် ခြေရာခံခြင်းအတတ်ကို အသုံးပြုနိုင်ဖို့အတွက် သူ့ဆီက အသွေးအသားငါးတုံးကို ရရှိဖို့ အခွင့်အရေးတစ်ခု ရှာဖွေရလိမ့်မယ် ”

ရွှီချင်းသည်လည်း ထိုကိစ္စနှင့်ပတ်သက်ပြီး တွေးတောနေသည်။ အားညို၏ စကားကို ကြားသောအခါ သူက ခေါင်းညိတ်လိုက်သည်။

ထို့နောက် သူတို့နှစ်ယောက်က လူအုပ်ကြားထဲမှာ ပျောက်ကွယ်သွားကြသည်။

လဝက်ကုန်ဆုံးသွားသည်။

ဤလဝက်အတွင်းမှာ လူသားမျိုးနွယ်နှင့် မိစ္ဆာငှက်မွှေးသူတော်စင်ကုန်းမြေကြားမှ စစ်ပွဲများသည် ခပ်စိပ်စိပ် ဖြစ်ပွားလာကြသည်။ သူတော်စင်ကုန်းမြေသည် ပိုမိုများပြားသော သူလျှိုများကို စေလွှတ်ခဲ့သည်။

ထို့ပြင် သူလျှိုအားလုံးဆီမှာ စည်းချအစီအရင်ကို ဖျက်ဆီးရန်တာဝန်အပြင် နောက်ထပ်တာဝန်အသစ်တစ်ခု ထပ်တိုးလာသည်။

ယင်းက ဖုန်းလင်းတောင်ကို သတ်ဖြတ်ရန် ဖြစ်သည်။

ဤလဝက်အတွင်းမှာ သူတော်စင်ကုန်းမြေမှ စစ်သုံးပန်းများကို လူမြင်ကွင်းမှာ ကွပ်မျက်ခြင်းက နောက်တစ်ကြိမ် ဖြစ်ပျက်ခဲ့သည်။ ထို့ပြင် ဖုန်းလင်းတောင်သည် လူသားမျိုးနွယ်အတွက် စစ်မြေပြင်မှာ ကြီးမားသော အကျိုးဆောင်မှုများကို ဆောင်ရွက်ပေးခဲ့သည်။

ယင်းက ဖုန်းလင်းတောင်၏ နာမည်ကို အရှေ့ပိုင်းဝမ်ကူးကုန်းမြေထဲမှာ တစ်ဟုန်ထိုး ကျော်ကြားသွားစေသည်။ သူက မိစ္ဆာငှက်မွှေးသူတော်စင်ကုန်းမြေ၏ နံပါတ်တစ် လူမုန်းခံအဖြစ် တရားဝင် အသိအမှတ်ပြုခံလိုက်ရသည်။

မိစ္ဆာငှက်မွှေးသူတော်စင်ကုန်းမြေမှ ကျင့်ကြံသူအများအပြားသည် သူ့ကို အရှင်လတ်လတ် ဝါးမျိုချင်နေကြသည်။

သို့ဖြစ်၍ ထုံးစံအားဖြင့် လုပ်ကြံသတ်ဖြတ်ခြင်းက ဖြစ်ပျက်လာသည်။

လူသားမျိုးနွယ်သည်တော့ ဤသူရဲကောင်းကို ကာကွယ်ရန် အစောင့်အကြပ်များကို ထပ်မံ တိုးမြှင့်လိုက်သည်။

ဖုန်းလင်းတောင်သည် လူသားမျိုးနွယ်ကို သူ၏ နှလုံးသားထဲမှ အပြည့်အဝ အသိအမှတ်ပြုလိုက်ဟန် ရသည်။ သူက ရံဖန်ရံခါ အပြင်သို့ ကိုယ်တိုင်ထွက်သွားပြီး ရန်သူများကို သတ်ဖြတ်ပစ်လေ့ရှိသည်။ ဤသည်မှာ သူက မိစ္ဆာငှက်မွှေးသူတော်စင်ကုန်းမြေကို လူသားမျိုးနွယ်ထက် ပိုပြီးမုန်းတီးနေသည့်အလားပင်။

သို့သော်လည်း ဧကရီက မွန်မြတ်သော စေတနာဖြင့် သူ့ကို စည်းချအစီအရင်၏ အပြင်ဘက်သို့ ထွက်သွားခွင့်မပြုချေ။ ယင်းအစား သူ့ကို လူသားနန်းမြို့တော်အတွင်းမှ သူလျှိုများကိုသာ လိုက်လံသုတ်သင်ခိုင်းခဲ့သည်။

ယင်းက ဖုန်းလင်းတောင်ကို အလွန်နောင်တရစေသည်။ သို့သော်လည်း သူက ဧကရီ၏ အမိန့်တော်ကို မလိုက်နာဝံ့ချေ။ ထို့ကြောင့် သူက သူလျှိုများကို ရက်စက်ကြမ်းကြုတ်စွာ သတ်ဖြတ်ခဲ့သည်။ ရံဖန်ရံခါ သူက ဒဏ်ရာရရှိခဲ့သော်လည်း ယင်းတို့က အသေးအမွှားဒဏ်ရာများသာ ဖြစ်ကြသည်။

ယင်းက နောက်ထပ် ခုနစ်ရက်အထိ ကြာမြင့်ခဲ့သည်။

ခုနစ်ရက်မြောက်နေ့တွင် မိစ္ဆာငှက်မွှေးမျိုးနွယ်မှ မဟာဧကရာဇ်က ထွက်ပေါ်လာသည်။ လူသားမျိုးနွယ်နှင့် မိစ္ဆာငှက်မွှေးသူတော်စင်ကုန်းမြေကြားမှ စစ်ပွဲငယ်များက စစ်ပွဲကြီးအဖြစ်သို့ ပြောင်းလဲသွားသည်။

အုပ်ချုပ်သူအများအပြားနှင့် ဝိညာဉ်စုစည်းခြင်းအဆင့် ကျင့်ကြံသူများက စစ်ပွဲမှာ ဝင်ရောက်လာကြသည်။

လူသားမျိုးနွယ်ဘက်တွင် ဧကရီကိုယ်တိုင် စစ်မြေပြင်ဆီသို့ ဝင်ရောက်လာပြီး အလောင်းနတ်ဘုရားများသည်လည်း စစ်မြေပြင်ဆီသို့ ဆင်းသက်လာကြသည်။

မျိုးနွယ်စုအသီးသီးမှ ကောင်းကင်ဘုရင်များသည်လည်း ထွက်ပေါ်လာကြသည်။ ကြီးမားသော စစ်ပွဲက အံ့ဖွယ်ကောင်းစွာ ဖြစ်ပွားလာသည်။

စစ်ပွဲက အရေးကြီးအခိုက်အတန့်သို့ ရောက်ရှိနေပြီး အဆင့်မြင့်တိုက်ပွဲစွမ်းအားကို ပိုင်ဆိုင်ထားကြသော ပုဂ္ဂိုလ်များက နန်းမြို့တော်ထဲမှာ မရှိနေကြစဉ် လုပ်ကြံသတ်ဖြတ်မှုတစ်ခုက လူသားနန်းမြို့တော်၏ အစွန်အဖျားမှာ ဖြစ်ပေါ်လာသည်။

လုပ်ကြံသတ်ဖြတ်ခြင်းတာဝန်ကို ထမ်းဆောင်သူများမှာ မိစ္ဆာငှက်မွှေးသူတော်စင်ကုန်းမြေမှ မဟာလောကခုနစ်ခု ဝိညာဉ်စုစည်းခြင်းအဆင့် ကျင့်ကြံသူနှစ်ယောက် ဖြစ်သည်။

သူတို့က အချိန်အတော်ကြာ ပုန်းအောင်းနေကြပြီး ကိုယ့်ကိုယ်ကိုယ် မထုတ်ဖော်ခဲ့ကြပေ။ ယခု စစ်ပွဲက အရေးကြီးအခိုက်အတန့်သို့ ကျရောက်နေသည့်အချိန်မှ သူတို့က အလစ်ဝင်ရောက် တိုက်ခိုက်လိုက်ကြသည်။

သူတို့၏ လုပ်ကြံသတ်ဖြတ်မည့် ပစ်မှတ်သည် ကိုယ်ရံတော်များနှင့်အတူ နန်းမြို့တော်ဆီသို့ ပြန်လာနေသော ဖုန်းလင်းတောင်မှလွဲ၍ တခြားမဟုတ်ပေ။

လုပ်ကြံသတ်ဖြတ်သည့် အချိန်သည် အလွန်တိကျပြီး ဖြစ်စဉ်သည် အလွန်ဆိုးဝါးပြင်းထန်သည်။

ဖုန်းလင်းတောင်၏ ကိုယ်ရံတော်အားလုံးက တိုက်ပွဲမှာ သေဆုံးသွားကြသည်။ သူသည်လည်း ကံကြမ္မာဆိုးမှ မလွတ်မြောက်ခဲ့ပေ။ သူ၏ ခန္ဓာကိုယ်က ပြိုကွဲသွားပြီး ဝိညာဉ်က ဖျက်ဆီးခံလိုက်ရသည်။ သူ၏ ဦးခေါင်းသည်တော့ လုပ်ကြံသတ်ဖြတ်သမားများ၏ ယူဆောင်သွားခြင်းခံလိုက်ရသည်။

ဘုရင်ကျန်းယန်က မြန်နိုင်သမျှမြန်မြန် ပြေးလာခဲ့သော်လည်း အလွန်နောက်ကျသွားဆဲပင်။ သူက မိစ္ဆာငှက်မွှေးသူတော်စင်ကုန်းမြေမှ လုပ်ကြံသမားတစ်ယောက်ကိုသာ တားဆီးနိုင်ခဲ့သည်။ ကျန်လုပ်ကြံသမားသည်တော့ ဖုန်းလင်းတောင်၏ ဦးခေါင်းနှင့်အတူ ထွက်ပြေးသွားခဲ့သည်။

သူက ဖုန်းလင်းတောင်ကို အသက်စတေးပြီး ကာကွယ်ပေးမည်ဟု သစ္စာဆိုခဲ့ကြသော ကိုယ်ရံတော်များ၏ အလောင်းများကို နန်းမြို့တော်ဆီသို့ ပြန်လည်သယ်ဆောင်သွားရုံသာ တတ်စွမ်းတော့သည်။

ဤကိစ္စက ပျံ့နှံ့သွားသည့်အခါ စည်းချအစီအရင်၏ အပြင်ဘက်ရှိ မိစ္ဆာငှက်မွှေးသူတော်စင်ကုန်းမြေဘက်တွင် အော်ဟစ်ချီးမြှောက်သံများ မြည်ဟိန်းထွက်လာသည်။ ဧကရီ၏ အမူအရာက မည်းမှောင်သွားသည်။ သို့သော်လည်း လောလာဆယ်တွင် ဤကိစ္စကို အာရုံထားရန် သူ့မှာ အချိန်မရှိပေ။ စစ်ပွဲက ဆက်လက် ဖြစ်ပွားနေသည်။

သို့သော်လည်း မည်သူမှ မသိသည်မှာ ဘုရင်ကျန်းယန်က လူသားနန်းမြို့တော်၏ စံအိမ်ဆီသို့ ဖုန်းလင်းတောင်၏ ကိုယ်ရံတော်အလောင်းများဖြင့် ပြန်ရောက်သွားသည့်အခါ အလောင်းများက ဝေဝါးလာပြီး သလင်းကျောက်အလင်းစက်များအဖြစ်သို့ ပြောင်းလဲသွားကြသည်။ ထို့နောက် အလင်းစက်များက အတူတကွ စုဝေးသွားကြပြီး လူသားဧကရာဇ်ဒုန်းရှန့်အဖြစ်သို့ ပြောင်းလဲသွားသည်။

အမှန်မှာ ထိုကိုယ်ရံတော်များသည် အတုအယောင်သာ ဖြစ်ကြသည်။

ဘုရင်ကျန်းယန်သည် ယင်းကို မအံ့ဩပေ။ သူက ခေါင်းငုံ့လိုက်ပြီး လူသားဧကရာဇ်ဒုန်းရှန့်ကို အရိုအသေပေးလိုက်သည်။ ထို့နောက် သူက အဝေးသို့ လှမ်းကြည့်လိုက်သည့်အခါ သူ၏ မျက်နှာပေါ်တွင် အပြုံးတစ်ခု ထွက်ပေါ်လာသည်။

တစ်ချိန်တည်းမှာ မဟာနန်းမြို့တော်ဒေသကြီး၏ အပြင်ဘက်နှင့် မီးခိုးပင်လယ်ဒေသကြီး၏ နယ်စပ်တွင် စွန့်ပစ်တောင်တစ်လုံး ရှိသည်။ စွန့်ပစ်တောင်ပေါ်တွင် အလွန်လျှို့ဝှက်သော လှိုဏ်ဂူတစ်ဂူ ရှိသည်။

ထိုလှိုဏ်ဂူက အလွန်လျှို့ဝှက်ပြီး နေရာက ချောင်ကျသည်။ သို့ဖြစ်၍ ယင်းကို ရှာဖွေရန် အလွန်ခက်ခဲပေသည်။

ဤအခိုက်အတန့်မှာ လှိုဏ်ဂူထဲတွင် ပုံရိပ်တစ်ခုက တင်ပျဉ်ခွေထိုင်နေသည်။ သူ၏ ခန္ဓာကိုယ်က အမှောင်ထုနှင့် ပေါင်းစပ်နေပြီး အနည်းငယ် ဝေဝါးနေဟန် ရသည်။

တစ်ခဏကြာပြီးနောက် ထိုပုံရိပ်က ရုတ်တရက် မျက်လုံးဖွင့်လိုက်လေရာ စူးရှသော အလင်းရောင်က သူ၏ မျက်လုံးထဲမှာ ထွက်ပေါ်လာသည်။ သူ၏ တစ်ကိုယ်လုံးက ထွန်းလင်းတောက်ပလာပြီး မည်းမှောင်သော လှိုဏ်ဂူကို လင်းထိန်သွားစေသည်။

အလင်းရောင်၏ ထွန်းလင်းမှုအောက်မှာ ထိုပုံရိပ်က လူငယ်တစ်ယောက်ဖြစ်ကြောင်း ထင်ရှားစွာ မြင်နိုင်ပေသည်။ သူ၏ အသွင်အပြင်က လူသားတစ်ယောက်နှင့် အနည်းငယ် ဆင်တူသည်။ သို့သော်လည်း သူ၏ နဖူးပေါ်မှာ မရေမတွက်နိုင်သော မှော်သင်္ကေတများဖြင့် ဖွဲ့စည်းထားသည့် အနီရောင်မျဉ်းကြောင်းတစ်ခု ရှိသည်။

ယင်းက လျောင်ရွှမ်းမျိုးနွယ်၏ အမှတ်သင်္ကေတဖြစ်ပြီး မြန်ဆန်စွာ ပျောက်ကွယ်သွားသည်။

“ လူသားဧကရီပဲဖြစ်ဖြစ် မိစ္ဆာငှက်မွှေးသူတော်စင်ကုန်းမြေပဲဖြစ်ဖြစ် သူတို့က ငါ့ကို ဘာလုပ်နိုင်မှာလဲ ”

လူငယ်က တီးတိုးရေရွတ်လိုက်သည်။

“ လူသားမျိုးနွယ်ဆီကို ငါသွားတာ တစ်သက်လုံး အညံ့ခံဖို့မဟုတ်ဘူး… ဧကရီရဲ့ အစီအစဉ်က ငါ့ကို အခက်တွေ့စေပေမဲ့ အလုံးစုံခြုံကြည့်မယ်ဆိုရင် အဲ့ဒါက ငါ့အစီအစဉ်ပေါ် သက်ရောက်မှုမရှိဘူး… ”

“ နောက်ဆုံးမှာတော့ ငါ့ရဲ့ ဟန်ဆောင်သေဆုံးမှုက အောင်မြင်သွားပြီ ”

“ အပြင်လူတွေက ငါသေဆုံးသွားပြီလို့ ယုံကြည်သွားတဲ့အခါကျရင် ငါ့ရဲ့ လျောင်ရွှမ်းခန္ဓာကိုယ်က ကမ္မဆက်သွယ်မှုတွေကနေ တကယ် လွတ်မြောက်သွားလိမ့်မယ် ”

ထိုလူငယ်သည် ဖုန်းလင်းတောင်မှလွဲ၍ တခြားလူမဟုတ်ပေ။