သတ္တဝါတစ်ကောင် ပေါ်ထွက်လာခြင်း

သတ္တုတွင်းထဲရှိ ဤကဲ့သို့သော ကြီးမားသည့် ပြဿနာတစ်ရပ်သည် ဖန်သားမြို့တော်၏ ပညာရှင်များကို သေချာပေါက် ဆွဲဆောင်မိပေလိမ့်မည်။

အဲဒါသည် သူ ဆက်နေသင့်သော နေရာတစ်ခု မဟုတ်တော့ပေ။

အပြင်ဘက်မှာ တစ်မူထူးခြားသည့် မည်သည့် လှုပ်ရှားမှုမှ မရှိတော့သည်ကို သေချာစေပြီးမှ ဆူဇီမိုက ထွက်လာခဲ့၏။

သူက ထူးဆန်းသော ကျောက်သားနံရံကို ဖြတ်ကျော်လာစဉ် သူက ခဏမျှ ရပ်တန့်လိုက်သော်လည်း မဆင်မခြင် ပြုမူရဲခြင်း မရှိဘဲ ရှေ့သို့ ဆက်တက်လာခဲ့၏။

သိပ်မကြာခင် သတ္တုတွင်း ဝင်ပေါက်က နက်ရှိုင်းသော မြေအောက်ထဲမှာ ပေါ်ထွက်လာ၏။

ဆူဇီမိုက ဝင်ပေါက်ဝမှာ မတ်တတ်ရပ်ပြီး ဘေးပတ်လည်ကို ကြည့်ရှုလိုက်၏။

အပြင်ဘက်ရှိ မြင်ကွင်းက အလွန်တရာ ကြောက်စရာကောင်းနေ၏။ အလောင်းများစွာ မြေပြင်ပေါ်မှာ ပြန့်ကျဲနေပြီး လတ်ဆတ်သော သွေးများက စီးကျနေ၏။

ကျင့်ကြံသူ အချို့သည် သူတို့၏ ခန္ဓာကိုယ်တစ်ပိုင်းကို​ ဆုံးရှုံးထားရပြီး အခြားသူများက သူတို့၏ ရင်ဘတ်မှာ ဧရာမ လက်နက်တချို့ဖြင့် ထိုးဖောက်ခြင်း ခံထားရကာ နှစ်ပိုင်းပြတ်ကျလုနီးပါး ဖြစ်နေ၏။

ကျင့်ကြံသူ အချို့က ပုပ်သိုးဆွေးရိနေပြီး ပုံပျက်ပန်းပျက်နှင့် ကြောက်မက်ဖွယ်ရာကောင်းစွာ သေဆုံးနေ၏။

ဆူဇီမို၏ အကြည့်က မလှမ်းမကမ်းတွင် ရှိသော ဦးခေါင်းတစ်လုံးထံ ရောက်ရှိသွား၏။

ထိုဦးခေါင်းသည် ဆွေးရိနေသော အသားများဖြင့် ပြည့်နှက်နေပြီး နှာခေါင်း မပါရှိပေ။ အဲဒါသည် အရင်တုန်းက ဆူဇီမိုနှင့်အတူ သတ္တုတွင်းထဲသို့ ဝင်ရောက်လာခဲ့သော နှာခေါင်းမဲ့ကျင့်ကြံသူ ဖြစ်သည်။

ထိုလူ၏ ဦးခေါင်းက ဖြတ်တောက်ခံထားရပြီး သူ၏ မျက်လုံးများက ကြောက်ရွံ့မှုဖြင့် ပြူးကျယ်နေ၏။

သူသည် ဤကဲ့သို့သော သတ္တုတွင်း ကပ်ဘေးနှစ်ခုနှင့် ဆက်တိုက်ကြုံတွေ့ခဲ့ရသောကြောင့် သူ၏ ကံက အတော်လေး ဆိုးသည်ဟု ဆိုရပေမည်။ သူသည် ယခင် တစ်ခေါက်တုန်းက အသက်ရှင်နိုင်ခဲ့သော်လည်း ဤတစ်ခါက်မှာတော့ ချမ်းသာရာ မရခဲ့ပေ။

ဆူဇီမိုက ညင်သာစွာ သက်ပြင်းချ၍ ထွက်ခွာဖို့ ပြင်ဆင်လိုက်၏။

သူက သတ္တုတွင်း အပြင်ဘက်သို့ ထွက်ခွာတော့မည့်ဆဲဆဲမှာပင် သူ၏ အမူအရာက ပြောင်းလဲသွားပြီး အလောတကြီး နောက်သို့ ဆုတ်ကာ ငုံ့ကြည့်လိုက်၏။

“ဟမ်”

ဆူဇီမို၏ သူငယ်အိမ်နှစ်ဖက်က တုန်လှုပ်စွာဖြင့် တင်းကျပ်သွား၏။ သူ၏ ခြေသလုံးပေါ်မှာ ပါးလျသော ဒဏ်ရာတစ်ခု ပေါ်ထွက်လာပြီး သိသာထင်ရှားမှု မရှိသလောက်နီးပါးပင်။ သို့သော်လည်း ၎င်းက သူ၏ ခြေသလုံးကို ပြတ်ကျလုနီးပါး ဖြစ်စေ၏။

လတ်ဆတ်သော သွေးများက ဒဏ်ရာကနေ ဖြည်းဖြည်းချင်း စီးကျလာသည်။

ယခုအခါမှသာ ဆူဇီမိုသည် ပြင်းထန်သော နာကျင်မှုကို ခံစားလိုက်ရ၏။

ဒဏ်ရာက ပါးလျသော်လည်း ၎င်းက အလွန်တရာ နက်ရှိုင်းပြီး သူ၏ အရိုးများကိုပင် ဖြတ်တောက်ပစ်လိုက်၏။

ဆူဇီမို၏ အမူအရာက​ တည်ကြည်လေးနက်သွား၏။

ဤကဲ့သို့ ပါးလျသော ဒဏ်ရာတစ်ခုကို ဖြစ်ပေါ်နိုင်စေရန် ထိုလက်နက်က ဘယ်လောက်တောင် ထက်ရှနေသလဲ သူ မပြောနိုင်ပေ။

ပုစဉ်းတောင်ပံများကဲ့သို့ ပါးလွှာသော အထက်ရှဆုံး ဓားတစ်လက်ပင်လျှင် ဤကဲ့သို့သော ဒဏ်ရာတစ်ခုကို ဖြစ်စေလိမ့်မည် မဟုတ်ပေ။

သူသည် ချည်မျှင်တစ်ခုဖြင့် ဖြတ်တောက်ခံထားရခြင်းနှင့် ပိုတူနေ၏။

ဆူဇီမိုသည် ရင်တစ်ချက်ထိတ်သွားပြီး သတ္တုတွင်း၏ ဝင်ပေါက်ဝကို ရုတ်တရက် လှမ်းကြည့်ကာ သူ၏ မျက်လုံးကို မှေးကျဉ်းလိုက်၏။

သတ္တုတွင်း ဝင်ပေါက်၏ အောက်မှာ သွေးစတချို့ ပေစွန်းနေသည့် ချည်မျှင်တစ်ခုက မကောင်းဆိုးဝါးဆန်ဆန် ပုံစံဖြင့်​ လေထဲမှာ ရစ်ဝဲနေ၏။

အဲဒါသည် စောစောက ဆူဇီမို သူ၏ ခြေထောက်ကို မြှောက်ခဲ့သည့်နေရာဖြစ်၏။

ဆူဇီမိုသည် တမလွန်မီးရောင်မျက်လုံးနှင့် မီးပဒေသာမျက်လုံးကို လှည့်ပတ်ပြီး ကြည့်ရှုလိုက်၏။

အို…

ထိုအကြည့်တစ်ချက်က သူ့ကို တုန်လှုပ်သွားစေ၏။

ကြည်လင်နေသော ချည်မျှင် ဆယ်ခုကျော်က သတ္တုတွင်း၏ ဝင်ပေါက်ဝမှာ ပေါ်ထွက်လာပြီး လုံးဝကို ပိတ်ဆို့ထားလုနီးပါးပင်။

သွေးစတချို့ စွန်းထင်းနေသည့် ချည်မျှင်သည် လေထဲမှာ ရစ်ဝဲနေသော ထိုချည်မျှင်များထဲမှ တစ်ခုဖြစ်၏။

ထိုပါးလွှာ၍ ကြည်လင်နေသော ချည်မျှင်က သူ၏ ခြေထောက်ကို နှစ်ပိုင်းပြတ်ကျစေလုနီးပါးပင်။

“အဲဒါ ဘာပါလိမ့်”

ဆူဇီမိုက အိုးတိုးအမ်းတမ်း အမူအရာတစ်ခုနှင့်အတူ မျက်မှောင်ကြုတ်လိုက်၏။

သူ့ကျင့်ကြံမှု၏ ဤအဆင့်တွင် အစိမ်းရောင်ကြာပန်း အစစ်အမှန်ခန္ဓာကို မူလ မဟူရာအဆင့် ဓမ္မရတနာများပင်လျှင် ထိခိုက်စေနိုင်လိမ့်မည် မဟုတ်ပေ။

သို့သော်လည်း အလွန်တရာ သေးငယ်သော ချည်မျှင်များက သူ၏ ခြေသလုံးကို ပြတ်ကျလုနီးပါး ဖြစ်စေခဲ့၏။

ထိုချည်မျှင်များက မည်သည့် နတ်ဘုရားလက်နက်ထက်မဆို ပိုမိုထက်ရှနေ၏။

ဒါ့အပြင် ဆူဇီမိုသည် မည်သည့် ခွန်အားကိုမှ အသုံးပြုခဲ့ခြင်း မရှိဘဲ သာမန် ပုံစံအတိုင်း ရှေ့သို့ လျှောက်လှမ်းခဲ့ရုံသာ ဖြစ်၏။

သူက ထိုချည်မျှင်နှင့် အမှတ်တမဲ့ ဝင်တိုးမိသည့်အခါ သူ၏ ခြေသလုံးက ပြတ်ကျလုနီးပါး ဖြစ်ခဲ့၏။

တကယ်ဆို ထိုချည်မျှင်က သူ၏ အသားကို လှီးဖြတ်လိုက်သည့် အချိန်မှာ သူက မည်သည့် နာကျင်မှုကိုမှ မခံစားခဲ့ရပေ။ အဲဒါက ဘယ်လောက်တောင် ထက်ရှသလဲ သိသာနေ၏။

ဆူဇီမို၏ အမူအရာက ပျက်ယွင်းသွားပြီး အထိတ်တလန့် ခံစားချက်တစ်ခုကို ရရှိလာ၏။

သူ၏ ထက်ရှသော အာရုံခံသတိစိတ်က တစ်စုံတစ်ရာ လွဲမှားနေသည်ကို အာရုံခံမိခဲ့ပြီး အချိန်မီ​ နောက်ဆုတ်နိုင်ခဲ့ခြင်းကြောင့်သာ မဟုတ်လျှင် သူသည် ယခုအချိန်မှာ သတ္တုတွင်း၏ အပြင်ဘက်တွင် ချည်မျှင်များစွာဖြင့် အပိုင်းပိုင်း အတစ်တစ် လှီးဖြတ်ခံထားရသည့် အလောင်းတစ်လောင်း ဖြစ်နေပေလိမ့်မည်။

“အဲဒီချည်မျှင်တွေကို ဟိုရှေးဟောင်းသတ္တဝါက ချန်ထားခဲ့တာလား”

ဆူဇီမိုက ရင်တစ်ချက်ထိတ်သွားပြီး တစ်စုံတစ်ရာကို ဝိုးတဝါး ခန့်မှန်းမိသွား၏။

သို့သော်လည်း ထိုစဉ်မှာ သူသည် ကုတ်ချင် ဖဲ့ချင်လောက်အောင် သူ၏ ခြေသလုံးပေါ်ရှိ ဒဏ်ရာမှ ယားယံသော ခံစားချက်တစ်ခုကို ရုတ်တရက် ရရှိလိုက်၏။

ဆူဇီမိုက သူ၏ အတွေးကို အလျင်အမြန် ရုတ်သိမ်းပြီး ငုံ့ကြည့်လိုက်သည်။

သူ၏ ခြေသလုံးပေါ်မှာ ဒဏ်ရာသည် ညိုမည်း၍ ပြာနှမ်းနေခဲ့ပြီဖြစ်၏။

ဒဏ်ရာကနေ သွေးပြည်များက စီးကျနေပြီး သူ၏ ခြေသလုံးတစ်ဖက်စလုံးက တဖြည်းဖြည်း ရောင်ကိုင်းလာနေ၏။

ကြည်လင်နေသော ချည်မျှင်များမှာ အဆိပ်ရှိနေ၏။

ဆူဇီမိုက တုန်လှုပ်သွားရသည်။

အစိမ်းရောင်ကြာပန်း မျိုးဆက်သွေးသည် အဆိပ်ဓာတ် အတော်များများကို ခံနိုင်ရည်ရှိလေသည်။

သို့သော် ယခု အစိမ်းရောင်ကြာပန်း အစစ်အမှန်ခန္ဓာ၏ မျိုးဆက်သွေးပင်လျှင် အဆိပ်ဓာတ်၏ ပျံ့နှံ့လာမှုကို မတားဆီးနိုင်ပေ။

ဒဏ်ရာပေါ်မှ ပြာနှမ်းနေသော အရောင်က တဖြည်းဖြည်း ဖြန့်ကြက်လာပြီး ဆူဇီမို၏ ခြေသလုံးတစ်ဖက်လုံးက ယားယံထုံကျင်လာကာ ခံစားမှုကို တဖြည်းဖြည်း ဆုံးရှုံးလာနေ၏။

ဆူဇီမိုသည် အစွယ်ခြောက်ချောင်း နတ်ဆင်ခွန်အား၏ ပင်ကိုနတ်ဘုရားစွမ်းအားကို အလောတကြီး ထုတ်ဖော်ပြီး သူ၏ အမြုတေစိတ်ဝိညာဉ်နှင့် မျိုးဆက်သွေးစွမ်းအားကို တလိပ်လိပ် ထိုးတက်လာစေ၏။

ထိုသို့ ဆိုလျှင်တောင် အစိမ်းရောင်ကြာပန်း မျိုးဆက်သွေးသည် ဒဏ်ရာထဲရှိ အဆိပ်ကို လုံးဝ မဖိနှိမ်နိုင်ပေ။

ဆူဇီမို၏ အမြုတေစိတ်ဝိညာဉ်က ကမ္ဘာမြေအမြုတေအဆင့်သို့ ရောက်ရှိနေခဲ့ပြီဖြစ်ပြီး သူ၏ အသိစိတ်ထဲရှိ ချိပ်စည်းကို အတင်းအကျပ် ချိုးဖျက်လိုက်၏။ သူက သူ၏ သိုလှောင်အိတ်ပေါ်မှ ချိပ်စည်းကိုလည်း အလျင်အမြန်​ ချေဖျက်ပြီး ဆေးလုံးများစွာကို ထုတ်ယူကာ စားသုံးလိုက်၏။

ဆေးလုံးများက သူ၏ အစာအိမ်ထဲသို့ ဝင်ရောက်လာသောအခါ သူတို့သည် ကြွယ်ဝသော ဆေးအာနိသင်တစ်ခုအဖြစ် ပြောင်းလဲသွားပြီး သူ၏ ဒဏ်ရာများဆီသို့ တလိပ်လိပ် တိုးဝင်လာ၏။

သို့သော်လည်း ဤကဲ့သို့သော ဆေးလုံးများစွာနှင့် သန့်စင်အားကောင်းသော အစိမ်းရောင်ကြာပန်း မျိုးဆက်သွေးသည် အဆိပ်ဓာတ်၏ ဖြန့်ကြက်မှုကို အနည်းငယ် တားဆီးနိုင်ရုံမျှသာ ရှိသည်။

ထိုစဉ်မှာပင် ဆူဇီမို၏ စိတ်ထဲသို့ သတိပေးချက်တစ်ခု ဝင်ရောက်လာပြီး သူက အလိုလိုမော့ကြည့်လိုက်၏။

သတ္တုတွင်း၏ အပြင်ဘက်မှာ ကြီးမားသော အရိပ်တစ်ခုက တုန်လှုပ်စရာကောင်းသော အမြန်နှုန်းဖြင့် ပြေးလွှားလာနေ၏။

မီးပဒေသာနှင့် တမလွန်မီးရောင်မျက်လုံးအောက်မှာ ဆူဇီမိုက အရာရာတိုင်းကို ရှင်းလင်းစွာ တွေ့မြင်လိုက်ရ၏။

သွေးရောင်အရိပ်သည် နီရဲနေသော ဧရာမ ပင့်ကူတစ်ကောင် ဖြစ်၏။

၎င်း၏ ခြေရှစ်ချောင်းက လှံရှည်များကဲ့သို့ ထက်ရှပြီး ပေါ့ပါးနေ၏။ ချည်မျှင်များစွာပေါ်မှာ တက်လှမ်းလာရင်း ၎င်းက အလွန်တရာ ပေါ့ပါးဖျတ်လတ်၍ အသံတိတ်နေ၏။

သွေးနီရောင် ပင့်ကူမှာ ကြောက်စရာကောင်းသော အမူအရာတစ်ခု ရှိနေပြီး ၎င်း၏ ကြမ်းကြုတ်ခက်ထန်သော သွေးနီရောင် မျက်လုံးများကို ထုတ်ဖော်ကာ စိတ်ဝင်စားစရာကောင်းသော ရသာမွန်တစ်ခုကို တွေ့ရှိသွားသည့်အလား သတ္တုတွင်းထဲရှိ ဆူဇီမိုကို​ စိုက်ကြည့်နေ၏။

ဆူဇီမိုသည် ထိုဖြစ်နိုင်ခြေကို စောစောက ခန့်မှန်းမိခဲ့ပြီးသား ဖြစ်၏။

သတ္တုတွင်း၏ ဝင်ပေါက်ဝမှာ ဤကဲ့သို့သော ချည်မျှင်များ ပေါ်ထွက်လာသည်ကို ကြည့်ခြင်းဖြင့် တစ်ခုတည်းသော ဖြစ်နိုင်ခြေမှာ အဲဒါသည် ပင့်ကူမျိုးနွယ်မှ သက်ရှိတစ်ကောင် ဖြစ်ရပေမည်။

သွေးနီရောင် ပင့်ကူ ထုတ်ဖော်လိုက်သည့် အော်ရာက အလွန်တရာ ကြောက်စရာကောင်းပြီး ဆူဇီမိုသည် ၎င်း၏ ကျင့်ကြံမှုကိုပင် အာရုံမခံနိုင်ပေ။

သို့သော်လည်း သွေးနီရောင် ပင့်ကူသည် အမြုတေစိတ်ဝိညာဉ် သတ္တုတွင်းထဲကနေ ယခုမှ နိုးထလာခဲ့သော ရှေးဟောင်းသတ္တဝါတစ်ကောင် ဖြစ်သည်ကို သူက နားလည်သဘောပေါက်လိုက်၏။

သူသည် သတ္တုတွင်း ဝင်ပေါက်ဝရှိ ပင့်ကူချည်မျှင်နှင့် ထိတွေ့မိသည့် အချိန်မှာပင် သွေးနီရောင် ပင့်ကူသည် ကီလိုမီတာ ငါးရာ အကွာအဝေးကပင် အဲဒါကို အာရုံခံမိလိုက်ပြီဖြစ်၏။

ပင့်ကူချည်မျှင်များက ထက်ရှ၍ အဆိပ်ရှိသော်လည်း သွေးနီရောင် ပင့်ကူ၏ ကြီးမားသော ခန္ဓာကိုယ်က တုန်လှုပ်စရာကောင်းသော အမြန်နှုန်းနှင့်အတူ ထိုချည်မျှင်များပေါ်ကနေ လျှောက်လှမ်းလာနေ၏။

ပင့်ကူချည်မျှင်များက အနည်းငယ် တုန်ခါသွားပြီး သွေးနီရောင် ပင့်ကူက သတ္တုတွင်း၏ ဝင်ပေါက်ဝသို့ ရောက်ရှိလာခဲ့ပြီဖြစ်၏။

သူက သွေးနီရောင် ပင့်ကူကို တွေ့မြင်လိုက်သည့် ခဏမှာပင် ဆူဇီမိုက ချွေးစေးများ ထွက်လာခဲ့၏။

ဤတောကောင်သည် မည်သည့် စာနာမှုကိုမှ သိရှိသည့်ပုံ မရပေ။ ၎င်းသည် နိုးထလာသည့် ခဏမှာပင် အစုလိုက် အပြုံလိုက် သတ်ဖြတ်မှုတစ်ခုကို စတင်ခဲ့သောကြောင့် ၎င်းသည် သူ့ကို လုံးဝ အလွတ်ပေးလိမ့်မည် မဟုတ်ပေ။

ဆူဇီမိုသည် သူ၏ ခြေထောက်က ထုံထိုင်းလာခြင်းနှင့်အတူ လုံးဝ မပြေးနိုင်တော့ပေ။

ဝှစ်..

သူ၏ နောက်ဘက်မှာ ဧရာမ ရွှေရောင်တောင်ပံတစ်စုံက ပေါ်ထွက်လာပြီး ဘေးပတ်ဝန်းကျင်ရှိ ကျောက်သားနံရံများကို ပစ်ရိုက်လိုက်၏။ ကျောက်ခဲနှင့် သဲများက လွင့်စင်ထွက်သွားပြီး သတ္တုတွင်း ဥမင်က ပြိုကျတော့မည့်ပုံစံဖြင့် ယိမ်းထိုးလာခဲ့၏။

ဆူဇီမိုသည် သူ၏ အဆုံးစွန် အလျင်အဟုန် နတ်ဘုရားစွမ်းအားကို အသုံးချကာ ဤနေရာကနေ ထွက်ပြေးလွတ်မြောက်ချင်၏။

သို့သော်လည်း ရှေ့မှာ ရှိသော သွေးနီရောင် ပင့်ကူ၏ ဝမ်းဗိုက်က လူးလွန့်သွားပြီး ချက်ချင်းပင် မမြင်နိုင်သော ပင့်ကူချည်မျှင်တစ်ခုကို ပစ်ထုတ်လိုက်၏။

၎င်းက တစ်မူထူးခြားစွာ အားနည်းသည့်ပုံပေါ်နေသော်လည်း ၎င်းသည် လေထဲမှာ လွင့်မျော၍ ဆူဇီမို၏ ထွက်လမ်းကို လုံးဝ ပိတ်ဆို့လိုက်၏။

ဧရာမ ရွှေငှက်၏ တောင်ပံများက ပင့်ကူချည်မျှင်နှင့် ထိတွေ့မိသည့် အချိန်မှာပင် သူတို့က ချက်ချင်းပင် ပျက်ပြယ်သွားပြီး အဲဒါကို လုံးဝ မခုခံနိုင်ပေ။