အစစ်အမှန် နတ်ဘုရားတစ်ပါးထံမှ အခွင့်အာဏာကို လုယက်ခြင်း

သူ၏ တာအိုနှလုံးသားက မတည်မငြိမ်ဖြစ်လာလိမ့်မည်ဟု အားညိုက ပြောလေရာ သူက မိစ္ဆာငှက်မွှေးသူတော်စင်ကုန်းမြေဆီသို့ မဖြစ်မနေသွားမည်ဟု စိတ်ဆုံးဖြတ်ထားကြောင်း ထင်ရှားသည်။

မည်သို့ဖြစ်ပါစေ သူ့စီနီယာအကိုကြီး၏ တာအိုနှလုံးသားက ရတနာများနှင့် ကံကြမ္မာကောင်းကို ရှာဖွေချင်သော အလိုရမ္မက်ဖြစ်ကြောင်း ရွှီချင်း သိသည်။

ထို့ပြင် စီနီယာအကိုကြီး၏ ပြောစကားထဲမှာ အမှန်တရားတစ်ခု ပါဝင်သည်။ သူတို့နှစ်ယောက်က ကိစ္စကြီးကို အတူတကွ မလုပ်ဆောင်ရသည်မှာ နှစ်အတော်လေး ကြာမြင့်ခဲ့သည်။

အရေးကြီးဆုံးမှာ မဟာဧကရာဇ်၏ တံခါးပိတ်ကျင့်ကြံသော နေရာမှ အခွင့်အလမ်းများက ရွှီချင်းကိုလည်း အတော်လေး သွေးဆောင်ထားနိုင်သည်။

ရွှီချင်းသည် သူ၏ လက်ရှိ ကျင့်ကြံခြင်းအခြေအနေကို ကောင်းမွန်စွာ နားလည်သည်။ အကယ်၍ သူက ပုံမှန်လမ်းစဉ်အတိုင်း လျှောက်လှမ်းမည်ဆိုလျှင် ဗလာနတ္ထိအဆင့်မှ ဝိညာဉ်စုစည်းခြင်းအဆင့်သို့ ချိုးဖြတ်ရန် အချိန်အကြာကြီး ကြာမြင့်လိမ့်မည်။

သူ့မှာရှိသော နတ်ဘုရားအခွင့်အာဏာက အလွန်များပြားသည်။ သူက အဆင့်တတ်ရန် နတ်ဘုရားအခွင့်အာဏာတစ်‌ထောင်ကို ဒြပ်ထည်ဖွဲ့စည်းရလိမ့်မည်။

ယင်းက သူ့ကို အလွန်အားကောင်းသော တိုက်ပွဲစွမ်းရည်အား ပေးအပ်ထားသော်လည်း တစ်ချိန်တည်းမှာ ယင်းက သူ့အတွက် ကြီးမားသော အတားအဆီးတစ်ခု ဖြစ်လာသည်။

နတ်ဘုရားအခွင့်အာဏာအားလုံးကို ဆင်ခြင်နားလည်ပြီးမှသာလျှင် သူက ဗလာနတ္ထိအဆင့်မှ ဝိညာဉ်စုစည်းခြင်းအဆင့်သို့ တတ်လှမ်းနိုင်လိမ့်မည်။

ထိုဝိညာဉ်စုစည်းခြင်းအဆင့်က အလွန်အံ့ဖွယ်ကောင်းပြီး အဆင့်တူမှာ ပြိုင်ဘက်ကင်းကာ နတ်ဘုရားတစ်ပါးနှင့် နှိုင်းယှဉ်နိုင်သော်လည်း ထိုအတွက် ပေးဆပ်ရမည့် အချိန်က အလွန်အမင်း ရှည်လျားသည်။

အကယ်၍ လက်ရှိအချိန်က အေးချမ်းနေသည်ဆိုလျှင် ယင်းက ပြဿနာမရှိပေ။

သို့သော်လည်း သူတော်စင်ကုန်းမြေများက မကြာခဏ ဆင်းသက်လာနေကြပြီး ဝမ်ကူးကုန်းမြေနှင့် စစ်ပွဲစတင်နေလေရာ အနာဂတ်ကံကြမ္မာက မသေချာမရေရာပေ။

ဤအခိုက်အတန့်မှာ ရွှီချင်း၏ အဓိကဦးစားပေးက သူ၏ ကျင့်ကြံခြင်းကို မြန်နိုင်သမျှမြန်မြန် တိုးမြှင့်ပြီး ပိုပြီးသန်မာလာရန် ဖြစ်သည်။

ရွှီချင်းက နှုတ်ဆိတ်သွားပြီး ဖုန်းလင်းတောင်နှင့် ယွဲ့တုန်ကို ကြည့်လိုက်သည်။

ဖုန်းလင်းတောင်က ထိတ်လန့်သွားပြီး မျက်နှာချိုသွေးသော အမူအရာကို အမြန်ထုတ်ဖော်လိုက်သည်။

အရိပ်လေး၏ ထိန်းချုပ်မှုအောက်တွင် ယွဲ့တုန်က ရိုသေလေးစားစွာ ခေါင်းငုံ့လိုက်သည်။

တစ်ခဏတွေးတောပြီးနောက် ရွှီချင်းနှင့် အားညိုက တစ်ယောက်ကိုတစ်ယောက် ကြည့်လိုက်ကြပြီး ရွှီချင်းက တိုးညင်းစွာ ပြောသည်။

“ စီနီယာအကိုကြီး… တကယ်လို့ မင်းက မိစ္ဆာငှက်မွှေးသူတော်စင်ကုန်းမြေဆီ သွားပြီး အဲ့ဒီကံကြမ္မာကောင်းကို ရယူချင်တယ်ဆိုရင် ငါတို့တွေ သရုပ်တစ်ခုကို လိုအပ်လိမ့်မယ် ”

ရွှီချင်း၏ သဘောတူညီမှုကို မြင်သောအခါ အားညိုက ပိုပြီးစိတ်လှုပ်ရှားလာသည်။ ထို့နောက် သူက ယွဲ့တုန်နှင့် ဖုန်းလင်းတောင်ကို အမြန်လှည့်ကြည့်လိုက်ပြီး ရယ်မောလိုက်သည်။

“ သရုပ်က အဆင်သင့်ရှိနေပြီးသား မဟုတ်ဘူးလား ”

ဖုန်းလင်းတောင်၏ နှလုံးသားထဲမှ စိုးရိမ်ကြောင့်ကြမှုက ပိုပြီးပြင်းထန်လာသည်။ ယွဲ့တုန်၏ မျက်လုံးထဲမှာလည်း စိတ်ပျက်အားလျော့မှုနှင့် ပြင်းထန်သော မကျေမချမ်းစိတ်က ထွက်ပေါ်လာသည်။

ယွဲ့တုန်၏ ခန္ဓာကိုယ်က အရိပ်လေး၏ ထိန်းချုပ်ခံထားရသော်လည်း သူက မြင်နိုင် ကြားနိုင်နေဆဲပင်။ ဤအခိုက်အတန့်မှာ ထိုနှစ်ကောင်က သူ၏ အစီအစဉ်ကို လုယက်ချင်သည့်အပြင် သူ၏ သရုပ်ကိုလည်း လိုချင်နေသေးကြောင်း အကူအညီမဲ့စွာ သူကြည့်နေရသည်။

ဤသည်မှာ သူ၏ နှလုံးက အရှင်လတ်လတ် ဆုတ်ဖြဲခံနေရသည့်အလားပင်။

သို့သော်လည်း ရွှီချင်းနှင့် အားညိုသည် ထုံးစံအားဖြင့် ယွဲ့တုန်၏ စိတ်ခံစားချက်များကို ဂရုမစိုက်ကြပေ။ ဤအခိုက်အတန့်မှာ အားညိုက နှုတ်ခမ်းသပ်လိုက်ပြီး ဆက်လက် ပြောသည်။

“ ချင်းလေး… ကောင်းကင်နက်မျိုးနွယ်ဆီ ငါတို့သွားခဲ့တဲ့ အချိန်ကို မင်းမှတ်မိသေးလား… အဲ့ဒီတုန်းက ငါတို့‌တွေ ကောင်းကင်နက်မျိုးနွယ်ဝင်တွေအဖြစ် ရုပ်ဖျက်ပြီး ဝတ်ရုံမျိုးနွယ်စုရဲ့ အထူးဆေးလုံးဖြစ်တဲ့ ရွှမ်ထျန်းလမိစ္ဆာဆေးလုံးကို သောက်သုံးခဲ့ကြတယ်လေ ”

“ ငါက ဝတ်ရုံမျိုးနွယ်စုနဲ့ ဆက်ဆံရေးကောင်းတယ်… အဲ့ဒီကို ငါသွားလည်တုန်းက သူတို့က ငါ့ကို ပစ္စည်းကောင်းတွေ အများကြီး ပေးခဲ့ကြတယ်… အဲ့ဒီထဲမှာ ရွှမ်ထျန်းလမိစ္ဆာဆေးလုံးလည်း ပါဝင်တယ်… ဒါ့အပြင် အဲ့ဒီဆေးလုံးက ဗလာဖြစ်နေပြီး တံဆိပ်မခတ်ရသေးဘူး ”

“ ဒီတော့… မင်းက ယွဲ့တုန်ဖြစ်လာပြီး ငါက ဖုန်းလေးဖြစ်လာမယ်… ဒီသရုပ်နဲ့ဆိုရင် ငါတို့က မိစ္ဆာငှက်မွှေးသူတော်စင်ကုန်းမြေဆီ ချောချောမွေ့မွေ့ သွားနိုင်လိမ့်မယ် ”

အားညို၏ မျက်လုံးထဲမှ အလင်းက ပိုပြီးတောက်ပလာသည်။ ရွှီချင်းက ယွဲ့တုန်အသွင် ပြောင်းလဲသွားမည်ဟု သူစဉ်းစားလိုက်သည့်အခါ သူ၏ နှလုံးသားထဲတွင် မျှော်လင့်မှုဖြင့် ပြည့်နှက်သွားသည်။

ထိုစကားက ရွှီချင်း၏ နားထဲသို့ ဝင်ရောက်သွားသည့်အခါ သူက စီနီယာအကိုကြီး၏ အကြံဆိုးကို ချက်ချင်း နားလည်သွားသည်။ ထို့ကြောင့် သူက တစ်ဖက်လူကို ကြည့်လိုက်ပြီး ခေါင်းခါလိုက်သည်။

“ စီနီယာအကိုကြီး… ယွဲ့တုန်ကို သဘောကျတယ်လို့ မင်းမပြောခဲ့ဘူးလား… သူ့ရဲ့ အစီအစဉ်က ရူးမိုက်ဖွယ်‌ကောင်းပြီး သူက အရမ်းရဲတင်းတယ်… အဲ့ဒါက မင်းနဲ့ အတော်လေး လိုက်လျောညီထွေတယ်… မင်းက ယွဲ့တုန်အဖြစ် ပြောင်းလဲဖို့ အသင့်တော်ဆုံး လူပဲ ”

“ ဒါ့အပြင် မင်းက အမျိုးသမီးကျင့်ကြံသူအဖြစ် အသွင်ပြောင်းလဲတာကို အတွေ့အကြုံရှိတယ်… အတိတ်မှာ မင်းက ပင်လယ်အလောင်းကောင်မျိုးနွယ်ရဲ့ မင်းသမီးအဖြစ် ရုပ်ဖျက်ခဲ့တာ ဘာပြစ်ချက်မှမရှိဘူးလေ ”

ယင်းကို အားညိုကြားသောအခါ သူက မျက်လုံးပြူးကျယ်သွားသည်။

“ ငါက မင်းရဲ့ စီနီယာအကိုကြီးနော် ချင်းလေး… မင်းရဲ့ စကားက ငါ့ကို နာကျင်စေတယ်… ငါအရမ်းဝမ်းနည်းတာပဲ ”

ရွှီချင်းက လုံးဝ မယိမ်းယိုင်ပေ။ သူက အားညိုကို ကြည့်လိုက်ပြီး ဆုံးဖြတ်ချက်တစ်ခုကို ချလိုက်သည်။

“ ဒါမှမဟုတ် စည်းမျဉ်းဟောင်းအတိုင်း ဆုံးဖြတ်ကျမလား ”

အားညိုက အံကြိတ်လိုက်သည်။ စိတ်ပျက်အားလျော့မှုက သူ၏ နှလုံးသားထဲမှာ ထွက်ပေါ်လာသည်။ ရွှီချင်းပြောသော စည်းမျဉ်းဟောင်းက အပြန်အလှန် တိုက်ခိုက်ရန်ဖြစ်ကြောင်း သူသိသည်။

အကယ်၍ အတိတ်တုန်းကသာဆိုလျှင် သူက ကိုယ့်ကိုယ်ကိုယ် အနည်းငယ် ယုံကြည်မှုရှိလိမ့်မည်။ သို့သော်လည်း ယခု ရွှီချင်း၏ ရုပ်ခန္ဓာကိုယ်က လွန်စွာ ယုတ္တိမရှိပေ။ အကယ်၍ သူတို့နှစ်ယောက်သာ အပြန်အလှန် တိုက်ခိုက်ကြမည်ဆိုလျှင် သူက မောပန်းပြီး သေဆုံးသွားမည်ဆိုလျှင်ပင် ရွှီချင်းက ဒဏ်ရာရသွားလိမ့်မည် မဟုတ်ချေ။

အကယ်၍ သူက ရွှီချင်းကို အနိုင်လိုချင်သည်ဆိုလျှင် ပိုမိုများပြားသော ချိပ်တံဆိပ်များကို ဖြေလျော့ရလိမ့်မည်။

သို့သော်လည်း ယင်းက သေခြင်းရှင်ခြင်းအခြေအနေမျိုးမှသာ အသုံးပြုနိုင်သော နည်းလမ်းဖြစ်သည်။ ထို့ပြင် ချိပ်တံဆိပ်များကို အတင်းအဓမ္မ ဖြေလျော့သည့်အခါ နောက်ဆက်တွဲ အကျိုးဆက်က အလွန်ပြင်းထန်လိမ့်မည်။

သို့သော်လည်း အကယ်၍ သူသာ ယွဲ့တုန်အသွင် ပြောင်းလဲမည်ဆိုလျှင် ရွှီချင်းကို အမျိုးသမီးအဝတ်အစားနှင့် မြင်တွေ့ချင်သော သူ၏ ဆန္ဒက ပြည့်မြောက်တော့မည် မဟုတ်ချေ။ ယင်းက သူ့အား လက်ခံရန် ခက်ခဲစေသည်။

စီနီယာအကိုကြီးက ဆန္ဒမရှိသေးကြောင်း မြင်သောအခါ ရွှီချင်းက နူးညံ့စွာ ပြောသည်။

“ ဒါ့အပြင် စီနီယာအကိုကြီး… လူသားသဘာဝကို ကောင်းကောင်း နားလည်ပြီး အရမ်းဉာဏ်များတဲ့ မင်းတစ်ယောက်တည်းကပဲ ယွဲ့တုန်နေရာမှာ ကောင်းကောင်း သရုပ်ဆောင်နိုင်လိမ့်မယ်… အပြင်လူတွေ သတိမထားမိအောင်လို့ မင်းက ပြစ်ချက်မဲ့စွာ စကားပြောနိုင်တယ်မလား ”

“ အဲ့ဒါက သာမန်လူတစ်ယောက် လုပ်ဆောင်နိုင်တဲ့အရာ မဟုတ်ဘူး… ဒီအပိုင်းမှာ ငါက မင်းထက် နိမ့်ကျတယ်ဆိုတာ ဝန်ခံရလိမ့်မယ်… စီနီယာအကိုကြီး ဒီတစ်ကြိမ်တော့ မင်းဆီကနေ ကောင်းကောင်း ငါပညာသင်ယူရမယ် ”

ရွှီချင်း၏ စကားကို ကြားသောအခါ အားညိုက အများကြီး စိတ်ခံစားချက်ကောင်းလာသည်။ သူက ခေါင်းမော့လိုက်ပြီး ဘဝင်မြင့်စွာ ပြောသည်။

“ မင်းပြောတာ မှန်တယ် ”

ထိုသို့ပြောပြီးနောက် သူက မိစ္ဆာငှက်မွှေးသူတော်စင်ကုန်းမြေမှ ကံကြမ္မာကောင်းကို စဉ်းစားမိသွားသည်။ ထို့ကြောင့် အားညိုက ချောင်းဟန့်လိုက်သည်။

“ ကောင်းပြီ ကောင်းပြီ… မင်းက ငါ့ရဲ့ ဂျူနီယာညီလေးပါ… စီနီယာအကိုကြီးအနေနဲ့ မင်းအပေါ် ငါညှာတာပေးလိုက်ပါ့မယ် ”

“ ငါက ယွဲ့တုန်ဖြစ်လာမယ်… ဘာပဲဖြစ်ဖြစ် အမျိုးသမီးအဝတ်အစားကို ငါဝတ်ဖူးတာ ဒါပထမဆုံးအကြိမ် မဟုတ်ဘူး ”

“ ချင်းလေး… မင်းကတော့ ငါ့ရဲ့ ရုပ်သေးရုပ်ဖြစ်လာမယ်… ငါ့ဆီကနေ ပညာကောင်းကောင်း သင်ယူပါ ”

အားညိုက ရွှီချင်းကို စိုက်ကြည့်လိုက်သည်။

ရွှီချင်းသည် မည်သည့်အချိန်မှာ ရပ်ရမည်ဖြစ်ကြောင်း ကောင်းကောင်း နားလည်သည်။ ထို့ကြောင့် သူက အမြန်ခေါင်းညိတ်လိုက်သည်။ တစ်ချိန်တည်းမှာ သူက ရင်ထဲထိသွားသော အမူအရာကို ထုတ်ဖော်လိုက်ပြီး အားညိုကို တလေးတစား အရိုအသေပေးလိုက်သည်။

“ ကျေးဇူးတင်ပါတယ် စီနီယာအကိုကြီး… ဒီကိစ္စကို ငါ့တစ်ဘဝလုံး မှတ်သားထားပြီးတော့ မင်းဆီကနေ ပညာကို ကြိုးစားသင်ယူပါမယ် ”

ရွှီချင်း၏ ထိုပုံစံကို မြင်သွားသောအခါ အားညို၏ နှလုံးသားထဲတွင် သံသယတချို့ ရှိနေသေးသော်လည်း အများစုက ပျောက်ကွယ်သွားသည်။ ထို့ကြောင့် သူက လက်ဝှေ့ယမ်းလိုက်သည်။

“ ဘေးက စောင့်ကြည့်နေပါ… ဝတ်ရုံမျိုးနွယ်စုရဲ့ ရွှမ်ထျန်းလမိစ္ဆာဆေးလုံးက အပြည့်အဝ အာနိသင်ထွက်ပေါ်ဖို့ဆိုရင် အဲ့ဒါကို ပစ်မှတ်နဲ့ အရင်ပေါင်းစပ်စေပြီး သူတို့ကို ဝတ်စုံတွေအဖြစ် ပြောင်းလဲရမယ် ”

“ အဲ့ဒါကို ငါတို့ဝတ်ဆင်လိုက်တဲ့အခါ မဟာဧကရာဇ်တစ်ပါးနဲ့ မတွေ့ဆုံသရွေ့ ဘာအမှားအယွင်းမှ မဖြစ်လာနိုင်ဘူး ”

“ ဒါပေမဲ့ အဲ့ဒါက အချိန်နည်းနည်းတော့ ကြာလိမ့်မယ်… ငါ့အထင် တစ်လလောက် ကြာလိမ့်မယ် ”

ရွှီချင်းက ခေါင်းညိတ်လိုက်သည်။ အစောနက သူတွေ့ဆုံခဲ့သော လုံကြွယ်ကို စဉ်းစားမိသွားသောအခါ သူက တိုးညင်းစွာ ပြောသည်။

“ စီနီယာအကိုကြီး… ဒီဟာက တစ်လလောက် ကြာမြင့်လိမ့်မယ်ဆိုတော့ အပြင်ခဏ ငါသွားလိုက်ဦးမယ်… တစ်လပြည့်တဲ့အခါ ဒီမှာ ငါမင်းကို လာတွေ့မယ် ”

အားညိုသည် ကိစ္စကြီးကို ဆောင်ရွက်သည့်အခါတိုင်း အမြဲတမ်း စိတ်ရောကိုယ်ပါ နစ်မြှုပ်ထားလေ့ ရှိသည်။ ရွှီချင်း၏ စကားကို ကြားသောအခါ သူက လက်ဝှေ့ယမ်းလိုက်သည်။

“ သွား သွား ”

ထိုသို့ပြောပြီးနောက် သူက ယွဲ့တုန်နှင့် ဖုန်းလင်းတောင်ဆီသို့ လျှောက်သွားသည်။ သူက သူတို့နှစ်ယောက်ကို ဖမ်းဆုပ်ပြီးနောက် အပေါ်သို့ အနည်းငယ် မြှောက်တတ်သွားကာ အစီအစဉ်အတွက် စတင်ပြင်ဆင်လိုက်သည်။

ရွှီချင်းက အပြင်လောကဆီသို့ တန်းမတ်စွာ ဦးတည်သွားသည်။ မကြာမီ သူက ရေခဲပြင်ကို ချိုးဖောက်သွားပြီး အပြင်လောကမှာ ပြန်ပေါ်လာသည်။

အေးစက်စက်လေက တအင့်အင့်ညည်းသံနှင့်အတူ တိုက်ခတ်နေပြီး နှင်းက အရပ်ရှစ်မျက်နှာဆီသို့ ပြန့်ကျဲသွားသည်။

လေနှင့် နှင်းကြားထဲတွင် ရွှီချင်းက မျက်လုံးမှိတ်လိုက်ပြီး အာရုံခံလိုက်သည်။

အတိတ်တွင် လုံကြွယ်ထွက်သွားခဲ့သည့်အချိန်မှာ ရွှီချင်းက သူ၏ ခန္ဓာကိုယ်ပေါ်မှာ အမှတ်အသားတစ်ခုကို တိတ်တဆိတ် ချန်ထားခဲ့သည်။ ဤအခိုက်အတန့်မှာ သူက အမှတ်အသားကို အာရုံခံလိုက်ပြီး ဦးတည်ရာတစ်ခုကို ပစ်မှတ်ထားလိုက်သည်။ ထို့နောက် သူက ထိုဦးတည်ရာဆီသို့ မြန်ဆန်စွာ ပျံသန်းသွားသည်။

သူက အသံကို အသုံးပြု၍ ရွေ့လျားသွားသည်။

ခုနစ်ရက်ကြာပြီးနောက်…

ရေခဲလွင်ပြင်ပေါ်တွင် လုံကြွယ်က အပျက်အစီးနေရာတစ်နေရာမှာ ရပ်နေသည်။ သူ၏ မျက်နှာက ဖြူဖျော့နေသော်လည်း သူ၏ အမူအရာက မနှိမ့်ချလွန်း မမောက်မာလွန်းပေ။ သူက လက်သီးဆုပ်လိုက်ပြီး သူ၏ အရှေ့မှ ဝိညာဉ်စုစည်းခြင်းအဆင့် အဖိုးအိုကို အရိုအသေပေးလိုက်သည်။

“ ငါက လုံကြွယ်ပါ… မြောက်ပိုင်းကံကြမ္မာတောင်ဝင်မိသားစုရဲ့ တပည့်တစ်ယောက်ပါ… ငါ့အသက်ကို ကယ်တင်ပေးတဲ့အတွက် စီနီယာကို ကျေးဇူးတင်ပါတယ် ”

“ ဂျူနီယာက ဒီကြင်နာမှုကို နှလုံးသားထဲမှာ မှတ်ထားပါမယ်… အနာဂတ်မှာ တကယ်လို့ ကျေးဇူးရှင်က ငါ့ရဲ့ တော်ဝင်မိသားစုဆီ အလည်ရောက်လာမယ်ဆိုရင် ဒီတုံကင်နဲ့အတူ ငါ့ကို လာရှာနိုင်ပါတယ်… တကယ်လို့ မင်းမှာ ညွှန်ကြားစရာ တစ်စုံတစ်ရာရှိမယ်ဆိုရင် လုံကြွယ်က အကောင်းဆုံး ဆောင်ရွက်ပေးပါမယ် ”

ထိုသို့ပြောပြီးနောက် သူက တုံကင်တစ်ခုကို ချန်ထားခဲ့ပြီး အနောက်သို့ ဆုတ်သွားသည်။ သူက တည်ငြိမ်စွာ မထွက်သွားခင် အဖိုးအိုကို နောက်တစ်ကြိမ် အရိုအသေပေးလိုက်သည်။

ဝိညာဉ်စုစည်းခြင်းအဆင့် အဖိုးအိုသည် တုံကင်ကို တစ်ချက်ကြည့်လိုက်ပြီး အတိတ်တွင် အားညိုဖြစ်ခဲ့သော အမူအရာအတိုင်း တစ်ပုံစံတည်း ထုတ်ဖော်လိုက်သည်။

ကောင်းကင်ပေါ်တွင် ရွှီချင်းက သူ၏ အရှိန်အဝါကို ဖုံးကွယ်ထားပြီး ထိုမြင်ကွင်းကို ကြည့်နေသည်။

သူက လုံကြွယ်ကို ပထမရက်မှာကတည်းက ရှာတွေ့ခဲ့သည်။ နောက်ရက်များတွင် ရွှီချင်းက တစ်ဖက်လူ၏ အနောက်သို့ တိတ်တဆိတ် လိုက်သွားခဲ့ပြီး လုံကြွယ်၏ ထူးဆန်းသော အဖြစ်အပျက်ကို ကိုယ်တိုင်မျက်မြင်တွေ့ခဲ့သည်။

တစ်ဖက်လူသည် အန္တရာယ်ဖြင့် သုံးကြိမ် တွေ့ဆုံခဲ့သည်။ ယင်းတို့အားလုံးက သေခြင်းရှင်ခြင်းကပ်ဘေးများ ဖြစ်ကြသည်။ အကယ်၍ သူသာ နည်းနည်းမျှ သတိပေါ့ဆလိုက်မည်ဆိုလျှင် အသက်ဆုံးရှုံးသွားလိမ့်မည်။

သို့သော်လည်း အန္တရာယ်ဖြင့် သူတွေ့ကြုံသည့်အခါတိုင်း ကယ်တင်မည့်လူများက ထွက်ပေါ်လာကြလိမ့်မည်။

ထို့ပြင် ဖြစ်စဉ်တစ်ခုလုံးမှာ ကြိုတင်စီစဉ်ထားသော မည်သည့်အရိပ်အမြွက်မှ သူရှာမတွေ့ပေ။ ဤသည်မှာ အရာအားလုံးက တိုက်ဆိုင်မှုတစ်ခုဖြစ်ဟန် ရသည်။

ကယ်တင်ခံရသည့်အခါတိုင်း လုံကြွယ်က တုံကင်တစ်ခုကို ထုတ်ပေးလိမ့်မည်။

“ တုံကင်တွေကို ထုတ်ပေးလိုက်တာနဲ့ ဒီလူရဲ့ ခန္ဓာကိုယ်ပေါ်က နတ်ဘုရားအခွင့်အာဏာအားလှိုင်းက ပိုပြီးအားကောင်းလာတယ်… ”

“ အဲ့ဒါက မကြာခင် ကြီးထွားလာတော့မယ်… ”

ရွှီချင်းက လုံကြွယ်၏ အနောက်သို့ အဝေးမှ လိုက်သွားသည်။

ရက်အနည်းငယ်ကြာ သူစုံစမ်းစစ်ဆေးပြီးနောက် ပိုပြီးအသေးစိတ်ကျသော သတင်းအချက်အလက်များကို ရှာတွေ့လာသည်။

“ ကံကောင်းခြင်းနဲ့ ဆက်စပ်တဲ့ ဒီနတ်ဘုရားအခွင့်အာဏာက နတ်ဘုရားစွမ်းအင်လုံးဝမရှိတဲ့ ကျင့်ကြံသူတစ်ယောက်ဆီမှာ ဘယ်လိုလုပ် ထွက်ပေါ်လာတာလဲ ”

“ ဒါ့အပြင် အဲ့ဒီနတ်ဘုရားအခွင့်အာဏာက မပြည့်စုံဘူးဆိုတာ ထင်ရှားတယ် ”

“ ကြည့်ရတာ အစွမ်းထက် တည်ရှိမှုတစ်ခုက ကံကောင်းခြင်းနတ်ဘုရားအခွင့်အာဏာကို အပိုင်းတွေအများကြီး ခွဲထုတ်ပစ်လိုက်တဲ့ပုံပဲ… အဲ့ဒီထဲက အပိုင်းတစ်ခုကို လုံကြွယ်ရဲ့ ခန္ဓာကိုယ်ထဲမှာ ထည့်သွင်းခဲ့တယ် ”

အနက်ရောင်အလင်းက ရွှီချင်း၏ မျက်လုံးထဲမှာ ထွက်ပေါ်လာသည်။

“ သူ့ရဲ့ ခန္ဓာကိုယ်ထဲက နတ်ဘုရားအခွင့်အာဏာ ကြီးထွားလာတဲ့အခါကျရင် အမှန်တရားက ထွက်ပေါ်လာလိမ့်မယ် ”

ရွှီချင်းက ခြေတစ်လှမ်းနှင့်အတူ မည်သည့်သဲလွန်စမှမကျန်ဘဲ ပျောက်ကွယ်သွားသည်။

ထိုသို့ဖြင့် သူက ဆက်လက် ပုန်းအောင်းနေစဉ် နောက်ထပ်လဝက် ကုန်ဆုံးသွားသည်။

လုံကြွယ်၏ စွန့်စားခန်းများက အကြိမ်ပေါင်းများစွာ ဆက်လက် ဖြစ်ပွားခဲ့ပြီး ယခု သူ့ဆီမှာ တုံကင်တစ်ခုသာလျှင် ကျန်ရှိတော့သည်။ ထို့ပြင် ရွှီချင်း၏ အကြည့်အောက်မှာ သူက နောက်ထပ် ကျေးဇူးရှင်တစ်ယောက်နှင့် တွေ့ဆုံသွားသည်။

သူက ကျေးဇူးတင်လိုက်ပြီး တုံကင်ကို ပေးအပ်လိုက်သည့်အခါ လုံကြွယ်၏ ခန္ဓာကိုယ်ပေါ်မှ နတ်ဘုရားအခွင့်အာဏာအားလှိုင်းက ရုတ်တရက် ဆူပွက်လာပြီး ပေါက်ကွဲထွက်လာသည်။

ထိုပေါက်ကွဲမှုက ကြီးမားသော ဧရိယာအပေါ် သက်ရောက်မှုမရှိသော်လည်း ယင်းက ကောင်းကင်ပေါ်မှာ လှိုင်းအတွန့်များ ထွက်ပေါ်လာစေသည်။

ပြန်ရောက်လာသော အရှိန်အဝါတစ်ခုက လုံကြွယ်၏ ခန္ဓာကိုယ်ထဲမှ ရုတ်တရက် မြှောက်တတ်လာပြီး ကောင်းကင်အလွန်ဆီသို့ ဦးတည်သွားသည်။

လုံကြွယ်သည်တော့ ယင်းကို သတိမထားမိဘဲ အရှေ့သို့ ဆက်လက် ရွေ့လျားသွားသည်။ သို့သော်လည်း သူ၏ ခန္ဓာကိုယ်က တဖြည်းဖြည်း ပိန်ချုံးလာသည်။ သူ၏ အနှစ်သာရ၊ ချီနှင့် ဝိညာဉ်က ချက်ချင်း မှေးမှိန်သွားကြသည်။

ဤသည်မှာ သူ၏ ဝိညာဉ်၊ ခန္ဓာကိုယ်နှင့် အရာအားလုံးက ဤအခိုက်အတန့်မှာ အာဟာရဓာတ်များ ဖြစ်လာသည့်အလားပင်။

ယင်းတို့က ချည်မျှင်တစ်ခုအဖြစ်သို့ ပြောင်းလဲသွားပြီး ကြယ်တာရာကောင်းကင်နှင့် ဆက်သွယ်သွားသည်။

သို့သော်လည်း သူက မည်သည့်အရာကိုမှ အာရုံမခံမိသေးပေ။

ဤသည်မှာ သူ၏ အသိအမြင်က လှည့်စားခံထားရသည့်အလားပင်။

နောက်ဆုံးမှာတော့ သူက အရှေ့သို့ ဆက်သွားရန် ခွန်အားမရှိတော့ဘဲ သတိမေ့လဲသွားသည်။ သို့သော်လည်း သူ၏ အမူအရာမှာ စိတ်ကျေနပ်မှုဖြင့် ပြည့်နှက်နေသည်။

ထူးဆန်းသော ထိုအဖြစ်အပျက်က ရွှီချင်းကို တည်ကြည်လေးနက်သွားစေသည်။ သူက အရှေ့သို့ ခြေတစ်လှမ်း လှမ်းလိုက်ပြီး လုံကြွယ်၏ ဘေးမှာ ထွက်ပေါ်လာသည်။ ထို့နောက် သူက လုံကြွယ်၏ နဖူးကို ထိတွေ့လိုက်သည်။

နောက်အခိုက်အတန့်မှာ အဝေးမှ ကြယ်တာရာကောင်းကင်ထဲတွင် ဧရာမအလင်းဘောလုံးတစ်လုံး တည်ရှိနေကြောင်း ရွှီချင်း အာရုံခံမိသွားသည်။ ထိုအလင်းဘောလုံးက ဆက်လက် ကြီးမားလာပြီး ပြိုကွဲသွားနေသည်။

ထိုအလင်းဘောလုံးထံမှ ထုတ်လွှတ်နေသော အရှိန်အဝါသည် ရွှီချင်းကို ကြောက်ရွံ့မှုအား ခံစားမိစေသည်။ ၎င်းက အစစ်အမှန် နတ်ဘုရားတစ်ပါး ဖြစ်သည်။

အလျားမတူညီသော ချည်မျှင်ရာထောင်ချီသည် ဝမ်ကူးကုန်းမြေထံမှ မြှောက်တတ်နေကြသည်။

ချည်မျှင်တစ်ခုစီက ကံကောင်းခြင်းနတ်ဘုရားအခွင့်အာဏာကို ကိုယ်စားပြုသည်။

၎င်းတို့ထဲမှ သုံးပုံတစ်ပုံသည် ကြယ်တာရာကောင်းကင်ဆီသို့ ဆန့်တန်းသွားကြပြီး အလင်းဘောလုံးနှင့် ဆက်သွယ်သွားကြသည်။

ရွှီချင်း၏ ခန္ဓာကိုယ်က တုန်ယင်သွားသည်။ အကယ်၍ တစ်ဖက်လူက သတိမေ့နေပြီး သူတို့ကြားမှ အကွာအဝေးက အလွန်အလှမ်းဝေးနေခြင်းမဟုတ်လျှင် သူ၏ ရုပ်ခန္ဓာကိုယ်က ယင်းကို တောင့်ခံနိုင်လိမ့်မည် မဟုတ်ချေ။

သူက လုံကြွယ်၏ နဖူးပေါ်မှ သူ၏ လက်ကို ဖယ်ရှားလိုက်သည်။ သူက ကောင်းကင်ကို မော့ကြည့်လိုက်သည့်အခါ အနက်ရောင်အလင်းတန်းက သူ၏ မျက်လုံးထဲမှာ ထွက်ပေါ်လာသည်။

“ အစစ်အမှန် နတ်ဘုရားတွေက မသေဆုံးနိုင်ဘူးလို့ စီနီယာယုလျှိုချန်းက တစ်ခါပြောဖူးတယ်… သူတို့ရဲ့ အစစ်အမှန်နာမည်က ဆက်ပြီး တည်ရှိနေဦးမယ်ဆိုရင် တကယ်လို့ သူတို့က သေဆုံးသွားရင်တောင် ဗလာနတ္ထိကနေ ပြန်ရောက်လာနိုင်ကြတယ် ”

“ အဲ့ဒါက ပြန်လာနေတဲ့ အစစ်အမှန် နတ်ဘုရားတစ်ပါးပဲ ”

“ သူက ပြန်လာဖို့အတွက် သူ့ရဲ့ ကံကောင်းခြင်းနတ်ဘုရားအခွင့်အာဏာကို အပိုင်းအစရာထောင်ချီအဖြစ် ခွဲထုတ်ပစ်လိုက်ပြီး အဲ့ဒါတွေကို သက်ရှိတွေရဲ့ ခန္ဓာကိုယ်ပေါ်မှာ ကပ်ပါးကောင်တွေအဖြစ် ကပ်တွယ်စေတယ် ”

“ ဒါပေမဲ့ သူက အပြည့်အဝ ပြန်ရောက်လာဖို့ စောလွန်းနေသေးတယ်… အဲ့ဒါက မပြည့်စုံတဲ့ ကံကောင်းခြင်းနတ်ဘုရားအခွင့်အာဏာ အပိုင်းအစရာထောင်ချီရဲ့ လမ်းပြပေးမှုကို လိုအပ်တယ်… မပြည့်စုံတဲ့ နတ်ဘုရားအခွင့်အာဏာအပိုင်းအစတစ်ခုက ကြီးထွားလာတဲ့အခါ ချည်မျှင်အဖြစ် ပြောင်းလဲသွားပြီး သူ့ကို လမ်းပြပေးလိမ့်မယ်… သူက ပြန်ရောက်လာဖို့အတွက် ချည်မျှင်အများကြီးကို လိုအပ်တယ် ”

“ နတ်ဘုရားအခွင့်အာဏာအပိုင်းအစတစ်ခုက ကြီးထွားလာပြီး ချည်မျှင်အဖြစ် ပြောင်းလဲသွားတဲ့အခါကျရင် သူ့ရဲ့ ကပ်တွယ်ခံထားရတဲ့ သက်ရှိက ယဇ်ပူဇော်ခံရလိမ့်မယ်… ဥပမာ အခု သေဆုံးတော့မယ့် လုံကြွယ်လို ဖြစ်လာလိမ့်မယ် ”

ရွှီချင်းက မျက်မှောင်ကြုတ်လိုက်ပြီး ခြောက်သွေ့နေသော လုံကြွယ်ကို ကြည့်လိုက်သည်။ တစ်ဖက်လူ၏ ခန္ဓာကိုယ်ထဲမှ ကံကောင်းခြင်းနတ်ဘုရားအခွင့်အာဏာကို အာရုံခံမိသောအခါ ဆုံးဖြတ်ချက်ပြတ်သားမှုနှင့် ရူးသွပ်မှုက သူ၏ မျက်လုံးထဲမှာ ထွက်ပေါ်လာသည်။

“ ဒီလိုဆိုမှတော့ အဲ့ဒါကို ငါလုယက်လိုက်ရင်ရော… အဲ့ဒါက ဒီလူရဲ့ အသက်ကို ကယ်တင်လိုက်တာနဲ့ အတူတူပဲ မဟုတ်ဘူးလား… ”