ချင်းလေး… ငါလှလား

စူးရှသော အလင်းရောင်က ရွှီချင်း၏ မျက်လုံးထဲမှာ ထွက်ပေါ်လာသည်။ သူက ညာလက်ညှိုးကို မြှောက်လိုက်ပြီး လုံကြွယ်၏ နဖူးပေါ်သို့ နောက်တစ်ကြိမ် ဖိချလိုက်သည်။

လက်ချောင်း ကျဆင်းလာသည့်အခိုက် ရွှီချင်း၏ ခန္ဓာကိုယ်ထဲမှ နတ်ဘုရားအရင်းအမြစ်က ပေါ်လျှိုးထွက်လာပြီး လုံကြွယ်၏ ခန္ဓာကိုယ်ထဲသို့ ဒလဟော တိုးဝင်သွားကာ ဝဲကတော့တစ်ခုအဖြစ် ပြောင်းလဲသွားသည်။

ဝဲကတော့က အပြင်းအထန် လှည့်ပတ်သွားသည့်အခါ စုပ်ယူအားက ထွက်ပေါ်လာပြီး လုံကြွယ်၏ ခန္ဓာကိုယ်ထဲမှ နတ်ဘုရားအခွင့်အာဏာကို ဆက်တိုက် ဝါးမျိုလိုက်သည်။

ထိုနတ်ဘုရားအခွင့်အာဏာသည် လုံကြွယ်၏ ခန္ဓာကိုယ်ထဲမှာ နက်နက်ရှိုင်းရှိုင်း အမြစ်တွယ်နေပြီး သူ့ကို တွယ်ကပ်ထားသည်။ ၎င်းက သူ၏ အသွေးအသားနှင့် ဝိညာဉ်ကို စားသောက်နေသော ဂူကောင်နှင့် ဆင်တူသည်။

ထို့ကြောင့် ယင်းကို ဆွဲထုတ်ပစ်ရန် အလွန်ခက်ခဲသည်။

ထို့ပြင် လုံကြွယ်က ဆက်တိုက် အားနည်းလာနေသည်။ သူက ဆယ်မိနစ်အတောအတွင်းမှာ သေဆုံးသွားလိမ့်မည်။

သို့ဖြစ်၍ ရွှီချင်းက ပထမဆုံး လုပ်ဆောင်ရမည်မှာ လုံကြွယ်၏ အသက်ဓာတ်ကို ဆက်လက် ထိန်းသိမ်းပေးရန် ဖြစ်သည်။

သို့ဖြစ်၍ သူက ချိပ်တံဆိပ်လက်ဟန်များကို ဘယ်လက်ဖြင့် ဖွဲ့စည်းလိုက်ပြီး ဆေးလုံးအများအပြားကို ထုတ်ယူလိုက်သည်။ ထို့နောက် သူက ဆေးလုံးများကို အမှုန့်ဖြစ်အောင် ချေမွလိုက်ပြီး လုံကြွယ်၏ ခန္ဓာကိုယ်ပေါ်မှာ ဖြန့်ကြဲလိုက်သည်။

မကြာမီ ဆေးမှုန်များက သူ၏ ခန္ဓာကိုယ်ထဲသို့ စိမ့်ဝင်သွားပြီး သူ၏ အသက်ဓာတ်ကို အားဖြည့်ပေးလိုက်သည်။

တစ်ချိန်တည်းမှာ ရွှီချင်းက သူ့ကိုယ်ပိုင် အသက်ဓာတ်မီးတောက်ကို ထုတ်လွှတ်လိုက်ပြီး ဘေးပတ်ဝန်းကျင်ကို လွှမ်းခြုံလိုက်သည်။ ယင်းက လုံကြွယ်၏ သက်စောင့်စွမ်းအင်ဆီသို့ ရွေ့လျားသွားသည့်အခိုက် ငြိမ်းသတ်ခါနီးနေသော သူ၏ ဝိညာဉ်မီးတောက်က ပြန်လည်နိုးကြားလာပြီး ဆက်လက် တောက်လောင်သွားသည်။

ထို့ပြင် ယင်းက လုံကြွယ်၏ သက်စောင့်စွမ်းအင်ကို ယာယီ ထိန်းသိမ်းပေးနိုင်ရုံမျှသာ ဖြစ်သည်။

နတ်ဘုရားအခွင့်အာဏာကို ဝါးမျိုခြင်းသည် အလွန်လွှမ်းမိုးဖိနှိပ်သည်။ ဤသည်မှာ ယင်းက လုံကြွယ်၏ အသက်ဓာတ်အားလုံးကို ငြိမ်းသတ်ပစ်ချင်နေသည့်အလားပင်။

နောက်ဆုံးမှာတော့ လုံကြွယ်၏ အသက်ဓာတ်ကို ဆက်လက် ထိန်းသိမ်းပေးနိုင်မည့် အဓိကသော့ချက်မှာ အတိတ်၌ လပူဇော်ဒေသကြီးထဲမှာ ရွှီချင်းက အဖြူရောင်လေကို ဓတ်ကူပစ္စည်းအဖြစ် အသုံးပြုပြီး သန့်စင်ခဲ့သော ဆေးလုံးများသာ ဖြစ်ကြသည်။

ထိုဆေးလုံးများသည် အသက်ဓာတ်အပေါ် ကြီးမားသော သက်ရောက်မှုရှိပြီး တစ်စုံတစ်ယောက်၏ သက်စောင့်စွမ်းအင်ကို တစ်ဟုန်ထိုး တိုးမြှင့်ပေးနိုင်သည်။

ယင်း၏ အကျိုးသက်ရောက်မှုက ရှုပ်ထွေးသော်လည်း အတိုင်းအတာတစ်ခုထိဆိုရလျှင် ယင်းက သက်စောင့်စွမ်းအင်ကို အာဟာရဖြည့်တင်းပေးနိုင်သည်။

အကယ်၍ တခြားအချိန်မှာသာဆိုလျှင် ထိုဆေးလုံး၏ သက်ရောက်မှုက မည်သည့်အကျိုးကျေးဇူးမှမရှိဘဲ အန္တရာယ်ကိုသာ ဖြစ်စေလိမ့်မည်။ သို့သော်လည်း ယခုတော့ အရာအားလုံးက ပြောင်းပြန်ဖြစ်သွားသည်။

ထိုသို့ဖြင့် ရွှီချင်း၏ ကြိုးစားအားထုတ်မှုအောက်မှာ အချိန်က တရွေ့ရွေ့ စီးဆင်းသွားသည်။

မျက်စိတစ်မှိတ်အတွင်းမှာ ငါးရက် ကုန်ဆုံးသွားသည်။

ရွှီချင်းက လုံကြွယ်၏ အသက်ဓာတ်ကို ဆွဲဆန့်ရန် အတော်လေး အလုပ်ကြိုးစားခဲ့သည်။

ဤအတောအတွင်းမှာ လုံကြွယ်က သေအံ့ဆဲဆဲအခြေအနေသို့ မကြာခဏ ကျရောက်ခဲ့သော်လည်း နောက်ဆုံးမှာတော့ သူက အသက်ဆက်ရှင်နိုင်ခဲ့သည်။

ထို့ကြောင့် ရွှီချင်းက ကံကောင်းခြင်းနတ်ဘုရားအခွင့်အာဏာကို သူ၏ နတ်ဘုရားအရင်းအမြစ်ဝဲကတော့ထဲသို့ လမ်းညွှန်ပေးရန် အလုံအလောက် အချိန်ရသွားခဲ့သည်။

နောက်ဆုံးအခိုက်အတန့်မှာ မဟာဧကရာဇ်၏ ကတ်ကြေးက ရွှီချင်း၏ ဦးခေါင်းပေါ်မှာ ထွက်ပေါ်လာသည်။

ထိုကတ်ကြေးထွက်ပေါ်လာသည်နှင့်ချက်ချင်း ရာသီဥတုက ပြောင်းလဲသွားသည်။ ၎င်းက တစ်စုံတစ်ခုကို အကြင်နာမဲ့စွာ ညှပ်လိုက်သည့်အလား သတ္ထုမြည်သံက အရပ်မျက်နှာအဘက်ဘက်ဆီသို့ ပဲ့တင်ထပ်သွားသည်။

ကတ်ကြေးက တုံယင်သွားပြီး ၎င်း၏ မျက်နှာပြင်ပေါ်မှ သံချေးက ပိုပြီးများပြားလာသည်။ ၎င်းက ချည်မျှင်ကို မညှပ်နိုင်ခဲ့ပေ။

မည်သို့ဖြစ်ပါစေ ယင်းက အစစ်အမှန် နတ်ဘုရားတစ်ပါး၏ နတ်ဘုရားအခွင့်အာဏာ ဖြစ်သည်။ အကယ်၍ နတ်ဘုရားအခွင့်အာဏာသာ ပြီးပြည့်စုံမည်ဆိုလျှင် မဟာဧကရာဇ်၏ ကတ်ကြေးက ယင်းကို တုန်လှုပ်စေရန်ပင် စွမ်းဆောင်နိုင်လိမ့်မည် မဟုတ်ချေ။

ကံကောင်းစွာပင် ယင်းက ပြီးပြည့်စုံသော ကံကောင်းခြင်းနတ်ဘုရားအခွင့်အာဏာ၏ အမျှင်တန်းတစ်ခုမျှသာ ဖြစ်သည်။

ထို့ကြောင့် ရွှီချင်းက အံတင်းတင်းကြိတ်လိုက်သည်။ သူက ကတ်ကြေး၏ ပိုပြီးသံချေးတတ်လာမည့် ဘေးထွက်ဆိုးကျိုးကို လျစ်လျူရှုထားလိုက်ပြီး ကြယ်တာရာကောင်းကင်နှင့် ဆက်သွယ်နေသော ချည်မျှင်ကို ထပ်ခါတလဲလဲ ညှပ်လိုက်သည်။ ထိုအခါ အက်ကွဲသံက ဆက်တိုက် ပဲ့တင်ထပ်သွားသည်။

ကိုးကြိမ်ညှပ်ပြီးသည့်နောက် ကတ်ကြေး၏ စွမ်းအားအောက်မှာ နတ်ဘုရားအခွင့်အာဏာ၏ ချည်မျှင်က နောက်ဆုံးမှာတော့ လုံးဝပြတ်တောက်သွားသည်။

ချည်မျှင် ပြတ်တောက်သွားသည့်အခိုက် ရွှီချင်း၏ နတ်ဘုရားအရင်းအမြစ်ဝဲကတော့က ကံကောင်းခြင်းနတ်ဘုရားအခွင့်အာဏာ၏ ထိုအမျှင်တန်းကို အပြည့်အဝ လွှမ်းခြုံနိုင်သွားသည်။ ထို့နောက် သူက ယင်းကို အတင်းအဓမ္မ ဆွဲထုတ်လိုက်ပြီး သူ၏ ခန္ဓာကိုယ်ထဲသို့ ထည့်သွင်းလိုက်သည်။

နောက်အခိုက်အတန့်မှာ တင်ပျဉ်ခွေထိုင်နေသော ရွှီချင်းက မျက်လုံးမှိတ်လိုက်ပြီး လှုပ်ရှားမှုကင်းမဲ့သွားသည်။

သူ၏ ခန္ဓာကိုယ်က ထိုနတ်ဘုရားအခွင့်အာဏာကို အစွမ်းကုန်သုံး၍ ဖိနှိပ်လိုက်သည်။

ဤအခိုက်အတန့်တွင် သူ့ဘေးမှာ လဲလျောင်းနေသော လုံကြွယ်က တုန်ယင်သွားသည်။ သူက သတိမေ့နေသော်လည်း သွေးအများအပြားက သူ၏ ပါးစပ်ထောင့်မှ စီးကျလာသည်။ သို့သော်လည်း အသက်ဓာတ်ဝါးမျိုခံနေရခြင်းက ဤအခိုက်အတန့်မှာ ရပ်တန့်သွားသည်။

ယခု သူ၏ အရှိန်အဝါက အားနည်းနေသော်လည်း ယခင်ကထက် အများကြီး ပိုတည်ငြိမ်သွားသည်။

တစ်ရက်ကြာပြီးနောက်…

ရွှီချင်းက မျက်လုံးပြန်ဖွင့်လိုက်သည်။

သူ၏ မျက်လုံးက သွေးရောင်လွှမ်းသွားပြီး သူ၏ ဝိညာဉ်က အားအင်ကုန်ခမ်းသွားသည်။ သို့သော်လည်း သူက စိတ်ဓာတ်တတ်ကြွနေသည်။

နောက်ဆုံးမှာတော့ ကံကောင်းခြင်းနတ်ဘုရားအခွင့်အာဏာ၏ အမျှင်တန်းသည် သူ၏ ဗလာနတ္ထိကုန်းမြေထဲမှာ နတ်ဘုရားအခွင့်အာဏာမျိုးစေ့အဖြစ် သန့်စင်ခံလိုက်ရသည်။

“ အဲ့ဒါက ငါနဲ့ ပြန်ရောက်လာနေတဲ့ အစစ်အမှန်နတ်ဘုရားကြားမှာ ကမ္မတစ်ခုကို ဖန်တီးလိုက်တယ်… ”

“ ဒါပေမဲ့… နတ်ဘုရားမျက်နှာပျက်ကြီးနဲ့ ငါ့ကြားက ကမ္မကြောင့် တခြားဘယ်ကမ္မဆက်နွယ်မှုကိုမှ ငါကြောက်စရာမလိုဘူး ”

“ ဒါ့အပြင် အဲ့ဒီနတ်ဘုရားရဲ့ ပြန်ရောက်လာတဲ့ နည်းလမ်းအရဆိုရင် သူက အပြည့်အဝ ပြန်ရောက်လာဖို့ နှစ်တစ်ထောင်လောက် ကြာမြင့်လိမ့်မယ် ”

“ တကယ်လို့ ငါသာ နှစ်တစ်ထောင်ကြာအောင် အသက်ဆက်ရှင်နေဦးမယ်ဆိုရင် အဲ့ဒီနတ်ဘုရားကို လုံးဝကြောက်စရာမလိုတော့ဘူး ”

ရွှီချင်းက လုံကြွယ်ကို ကြည့်လိုက်သည့်အခါ မျက်လုံးဝင်းလက်သွားသည်။

လုံကြွယ်က သတိမေ့နေသေးသော်လည်း သူ၏ အသက်ရှူသံက ပိုပြီးတည်ငြိမ်လာပြီး သူ၏ အမူအရာက အများကြီး ပိုကောင်းမွန်လာသည်။

ဤမတိုင်ခင် ရွှီချင်းနှင့် လုံကြွယ်သည် မည်သည့်အဆက်အသွယ်မှ မရှိခဲ့ကြပေ။

သူတို့က သူစိမ်းများဖြစ်ကြသည်။

အစောနက လုံကြွယ်သည် ဤနတ်ဘုရားအခွင့်အာဏာ၏ လွှမ်းမိုးမှုအောက်မှာ သေအံ့ဆဲဆဲဖြစ်ခဲ့သည်။ အကယ်၍ ရွှီချင်းသာ ဝင်မကူညီခဲ့လျှင် သူ၏ ခန္ဓာကိုယ်နှင့် ဝိညာဉ်က ပြန်ရောက်လာနေသော အမည်မသိ အစစ်အမှန် နတ်ဘုရားအတွက် အာဟာရဓာတ်စာဖြစ်လာပြီး သူက အမြစ်ဖြတ်သုတ်သင်ခံရလိမ့်မည်။

ရွှီချင်း၏ မူလရည်ရွယ်ချက်က နတ်ဘုရားအခွင့်အာဏာ၏ အမျှင်တန်းကို လုယက်ရန် ဖြစ်သည်။ ယင်းက လုံကြွယ်၏ ကံကောင်းမှုဖြစ်သည်ဟု ဆိုရလိမ့်မည်။ သို့မဟုတ်လျှင် သူက ယဇ်ပူဇော်ခံရပြီး လုံးဝပျောက်ကွယ်သွားလိမ့်မည်။

နတ်ဘုရားအခွင့်အာဏာကို ရွှီချင်းက ယူဆောင်သွားသောကြောင့်သာ လုံကြွယ်က အသက်ရှင်နိုင်သွားသည်။

“ ဒီနတ်ဘုရားအခွင့်အာဏာက တကယ်ထူးဆန်းတာပဲ… အတိုင်းအတာတစ်ခုထိဆိုရရင် ငါ့ရဲ့ ထွက်ပေါ်လာမှုနဲ့ နောက်ဆုံးအချိန်မှာ သူ့အသက်ကို ကယ်တင်ပေးလိုက်တာက ဒီနတ်ဘုရားအခွင့်အာဏာရဲ့ သက်ရောက်မှုကြောင့်ပဲ ”

“ သူအန္တရာယ်ကျရောက်တဲ့အခါတိုင်း ကယ်တင်ရှင်တစ်ယောက်နဲ့ သေချာပေါက် တွေ့ဆုံရလိမ့်မယ် ”

ရွှီချင်းက နက်နဲစွာ တွေးတောလိုက်သည်။ ယခု သူက နတ်ဘုရားအခွင့်အာဏာအကြောင်းကို ပိုပြီးကောင်းမွန်စွာ နားလည်သွားသည်။

“ အဲ့ဒါက ကျင့်ကြံသူတွေရဲ့ မူလဇစ်မြစ်နဲ့ လုံးဝကွာခြားတယ် ”

“ နတ်ဘုရားအခွင့်အာဏာက ပိုပြီးရှေးကျတဲ့ စွမ်းအင်တစ်မျိုးပဲ ”

ရွှီချင်းသည် သူ၏ ခန္ဓာကိုယ်ထဲမှ နတ်ဘုရားအခွင့်အာဏာမျိုးစေ့ကို အာရုံခံလိုက်သည်။ အချိန်တစ်ခဏကြာပြီးနောက် သူက အသက်ပြင်းပြင်းရှူသွင်းလိုက်ပြီး မတ်တတ်ထရပ်လိုက်သည်။

သူက ဤနေရာမှ ထွက်သွားတော့မည်။

သို့သော်လည်း သူက မထွက်သွားခင် သတိမေ့နေသော လုံကြွယ်ကို နောက်ဆုံးအကြိမ် ကြည့်လိုက်သည်။

“ ငါက ဒီနတ်ဘုရားအခွင့်အာဏာကို မင်းဆီကနေ ရခဲ့ပြီး မင်းရဲ့ အသက်ကို ကယ်တင်ပေးခဲ့တယ်… အခုကစပြီး ငါတို့ကြားက ကမ္မဆက်နွယ်မှုက ပြတ်တောက်သွားပြီ ”

ရွှီချင်းက လက်မြှောက်လိုက်ပြီး ဝှေ့ယမ်းလိုက်သည်။ ထိုအခါ အသက်ဓာတ်အမျှင်တန်းတစ်ခုက ပျံသန်းထွက်လာသည်။ ယင်းက လုံကြွယ်၏ ခန္ဓာကိုယ်နှင့် ပေါင်းစပ်သွားပြီးနောက် သူက ကောင်းကင်ပေါ်သို့ ပျံတတ်သွားပြီး ပျောက်ကွယ်သွားသည်။

တစ်ခဏကြာပြီးနောက် အေးစက်စက်လေက တအင့်အင့်ညည်းသံနှင့်အတူ ဤနေရာမှာ တိုက်ခတ်လာသည့်အခါ လုံကြွယ်၏ ခန္ဓာကိုယ်က တုန်ယင်သွားသည်။ သူက ဖြည်းညင်းစွာ မျက်လုံးပြန်ဖွင့်လိုက်သည်။

အစတွင် သူ၏ မျက်လုံးထဲမှာ မိန်းမောတွေဝေသော အရိပ်အယောင် ထွက်ပေါ်လာသည်။ သို့သော်လည်း မကြာမီ သူ၏ မျက်လုံးက ပြူးကျယ်သွားပြီး သူက မြန်ဆန်စွာ မတ်တတ်ထရပ်လိုက်သည်။ သူက ဘေးပတ်ဝန်းကျင်ကို စစ်ဆေးကြည့်ပြီးနောက် သူ၏ ခန္ဓာကိုယ်ကိုလည်း စစ်ဆေးကြည့်လိုက်သည်။

အရာအားလုံးက ပုံမှန်ဖြစ်ကြောင်း သူရှာတွေ့သွားသောအခါ ဇဝေဇဝါဖြစ်သော အရိပ်အမြွက်က သူ၏ မျက်လုံးထဲမှာ ထွက်ပေါ်လာသည်။

“ ငါသတိမမေ့ခင်မှာ ငါ့ခန္ဓာကိုယ်ထဲက တစ်စုံတစ်ခုက နိုးထလာပြီး ငါ့ဆီက အရာအားလုံးကို ဝါးမျိုပစ်တော့မယ်လို့ ငါခံစားမိခဲ့တယ်… ”

“ ဒါပေမဲ့ အခုတော့ မူမမှန်တာ ဘာမှမရှိသလိုပဲ… အဲ့ဒီအစား ငါ့ခန္ဓာကိုယ်က ပြောမပြနိုင်အောင် ပေါ့ပါးလန်းဆန်းလာတယ်… မသိရင် ငါက သန့်စင်ခံလိုက်ရသလိုပဲ ”

လုံကြွယ်က ဆွံ့အသွားသည်။ သို့သော်လည်း အတိတ်တုန်းက သူ၏ အတွေ့အကြုံများကြောင့် သူက လက်ရှိအခြေအနေကို မြန်ဆန်စွာ လိုက်လျောညီထွေလုပ်နိုင်သွားသည်။

“ ငါသတိမမေ့ခင် နောက်ထပ် ကျေးဇူးရှင်တစ်ယောက်နဲ့ တွေ့ဆုံခဲ့တာဖြစ်ရမယ် ”

ထိုသို့တွေးမိသောအခါ စိတ်လှုပ်ရှားမှုက လုံကြွယ်၏ နှလုံးသားထဲမှာ ထွက်ပေါ်လာသည်။ ယခု သူက တုံကင်အားလုံးကို ပေးပြီးသွားပြီ ဖြစ်သည်။ ထို့ကြောင့် သူ၏ အစီအစဉ်အရဆိုလျှင် ထိုကျေးဇူးရှင်များက သူ့ကို ရှာဖွေရန် မြောက်ပိုင်းကံကြမ္မာတော်ဝင်မိသားစုဆီသို့ သွားရောက်မည်ကို သူက စောင့်ဆိုင်းနေရုံသာ လုပ်ဆောင်ရလိမ့်မည်။

“ အဲ့ဒီအချိန်ကျရင် ငါက မြောက်ပိုင်းကံကြမ္မာတော်ဝင်မိသားစုထဲမှာ သေချာပေါက် နာမည်ကျော်ကြားလာလိမ့်မယ် ”

လုံကြွယ်က အသက်ပြင်းပြင်းရှူသွင်းလိုက်ပြီး ထွက်သွားရန် ပြင်လိုက်သည်။ သို့သော်လည်း သူက အရှေ့သို့ ခြေတစ်လှမ်း လှမ်းပြီးနောက် နောက်ပြန်ဆုတ်လိုက်ပြီး ဘေးပတ်ဝန်းကျင်ကို ရိုသေလေးစားစွာ ဦးညွတ်လိုက်သည်။ ထို့နောက် သူက ကျယ်လောင်စွာ အော်ပြောသည်။

“ ကျေးဇူးတင်ပါတယ် ကျေးဇူးရှင်… ငါက လုံကြွယ်ပါ… မြောက်ပိုင်းကံကြမ္မာတော်ဝင်မိသားစုရဲ့ တပည့်တစ်ယောက်ပါ ”

“ ကျေးဇူးရှင်… ငါ့မှာ လောလောဆယ် မင်းကို ကျေးဇူးပြန်ဆပ်ဖို့ ဘာမှမရှိပါဘူး… တကယ်လို့ မင်းက အနာဂတ်မှာ မြောက်ပိုင်းကံကြမ္မာတော်ဝင်မိသားစုဆီ ရောက်လာမယ်ဆိုရင် ငါ့ကို မင်းဆန္ဒရှိတဲ့အရာ စေခိုင်းနိုင်ပါတယ်… လုံကြွယ်က မင်းရဲ့ ကျေးဇူးကို ပြန်ဆပ်ဖို့ အကောင်းဆုံး ကြိုးစားပါ့မယ် ”

ထိုသို့ပြောပြီးနောက် လုံကြွယ်က လေထဲသို့ ပျံတတ်မသွားခင် နောက်တစ်ကြိမ် ထပ်မံအရိုအသေပေးလိုက်သည်။ အေးစက်စက်လေထဲတွင် သူက အဝေးသို့ ဦးတည်သွားသည်။

လေက အကြမ်းပတမ်း တိုက်ခတ်နေပြီး နှင်းမှုန်များက မြေပြင်ပေါ်သို့ တဖွဲဖွဲ ကျဆင်းနေသောကြောင့် ကောင်းကင်က အနည်းငယ် မှေးမှိန်နေသည်။ ယင်းက ဝမ်ကူးကုန်းမြေ၏ အပြင်ဘက်မှ ကြယ်တာရာကောင်းကင်နှင့် ဆင်တူသည်။

တိမ်တိုက်များက တရွေ့ရွေ့ ရွေ့လျားနေကြစဉ် ယင်းတို့က ကြယ်စင်စုများနှင့် ဆင်တူကြသည်။

ယင်းက တစ်ခါတစ်ရံ ကြည်လင်ပြီး တစ်ခါတစ်ရံ ဝေဝါးသည်။

ကြယ်စင်စုများက ရွေ့လျားနေကြသည်။

ဝမ်ကူးကုန်းမြေ၏ အပြင်ဘက်ရှိ ကြယ်တာရာကောင်းကင်ထဲတွင် အဝေးမှ အာကာသဟင်းလင်းပြင်က မည်းမှောင်နေသည်။

မကြာမီ အဖြူရောင်အလင်းစက်တစ်ခုက မည်းမှောင်နေသော အာကာသဟင်းလင်းပြင်ထဲမှာ ထွက်ပေါ်လာသည်။

ထိုအလင်းစက်က တဖြည်းဖြည်း ကြီးမားလာပြီး နောက်ဆုံးမှာတော့ ဧရာမအလင်းဘောလုံးအဖြစ် ပြောင်းလဲသွားသည်။

အလင်းဘောလုံးက ဆက်လက် ကြီးမားလာပြီး ပြိုကွဲသွားသည်။ တစ်ချိန်တည်းမှာ တိုးညင်းသော ရေရွတ်သံက အာကာသဟင်းလင်းပြင်ထဲမှာ ပဲ့တင်ထပ်သွားသည်။

“ အဆုံးမဲ့ကြယ်တာရာစက်ဝန်း… နယ်မြေအားလုံးက သက်ရှိတွေ… ”

“ ငါ့နာမည်က မဟာကြယ်ဖြစ်ပြီး ရှေးခေတ်ကာလကတည်းက အခွင့်အာဏာကို ဖမ်းဆုပ်ထားခဲ့တယ်… ”

“ ငါ့နာမည်ကို ရွတ်ဆိုပါ… မင်းတို့ဆီကို ကံကောင်းခြင်းတွေ ငါယူဆောင်လာပေးမယ် ”

“ ငါ့ကို ကိုးကွယ်ပူဇော်ပါ… ထာဝရအသက်ကို မင်းတို့ရရှိလိမ့်မယ် ”

တီးတိုးရေရွတ်သံများသည် အလင်းဘောလုံးထံမှ ပျံ့နှံ့ထွက်လာပြီး ကြယ်တာရာစက်ဝန်းတစ်လျှောက် ပဲ့တင်ထပ်သွားသည်။ ယင်းတို့က အာကာသဟင်းလင်းပြင်ထဲတွင် မျိုးစေ့များသဖွယ် ပြန့်ကျဲသွားကြသည်။ ထိုထဲမှ မျိုးစေ့အများစုသည် ဝမ်ကူးကုန်းမြေ၏ ဦးတည်ရာဆီသို့ လွင့်မျောသွားကြသည်။

၎င်းနှင့် ဆက်သွယ်ထားသော ချည်မျှင်များက ၎င်းကို အရှေ့သို့ ဆက်သွားနိုင်ရန် လမ်းပြပေးနေကြသည်။

ဤအခိုက်အတန့်မှာ ၎င်းနှင့် ဆက်သွယ်ထားသော ချည်မျှင်တစ်ခုက မှိတ်တုတ်မှိတ်တုတ် လင်းလက်လာပြီး မြန်ဆန်စွာ အရောင်မှေးမှိန်သွားသည်။ နောက်ဆုံးမှာတော့ အက်ကွဲသံနှင့်အတူ ချည်မျှင်က ပြတ်တောက်သွားသည်။

အလင်းဘောလုံးက တုန်ယင်သွားပြီး အထဲမှ အလင်းက ရုတ်တရက် အပြင်ဘက်သို့ ပျံ့နှံ့သွားသည်။

သို့သော်လည်း ထိုမျှသာ ဖြစ်သည်။ ထိုရေရွတ်သံက အလင်းဘောလုံးထံမှ ပင်ကိုယ်ဗီဇတုံ့ပြန်မှုမျှသာ ဖြစ်သည်။ ၎င်းဆီမှာ အသိစိတ်မရှိသေးပေ။

ရွှီချင်းက ခေါင်းမော့လိုက်ပြီး မဟာဧကရာဇ်၏ ကတ်ကြေးကို နောက်တစ်ကြိမ် အသုံးပြုလိုက်ကာ ထိုတီးတိုးရေရွတ်သံကို ညှပ်ပစ်လိုက်သည်။ ထိုအခါ သူ၏ နားထဲမှ တီးတိုးရေရွတ်သံက ပျောက်ကွယ်သွားသည်။

အားညိုဆီသို့ အပြန်လမ်းခရီးတွင် ထိုအသံက သူ၏ နားထဲသို့ ပျံ့လွင့်လာသည်မှာ ခုနစ်ကြိမ်တိုင်တိုင် ရှိသွားပြီ ဖြစ်သည်။

ရွှီချင်းက မအံ့ဩပေ။

ထိုအသံထွက်ပေါ်လာသည့်အခါတိုင်း သူက ယင်းကို ညှပ်ပစ်လိမ့်မည်။ ထို့ပြင် သူက ယင်းကို ထပ်ခါထပ်ခါ ညှပ်ပစ်သည့်အခါတိုင်း အသံက ပိုပြီးတိုးညင်းသွားလိမ့်မည်။ ယခင်တစ်ခေါက်ကဆိုလျှင် ထိုအသံက မကြားရလုနီးပါး တိုးညင်းသွားခဲ့သည်။

“ ဘာပဲပြောပြော အဲ့ဒါက သေဆုံးသွားပြီး အစစ်အမှန်နာမည်ပဲ ကျန်တော့တဲ့ နတ်ဘုရားပဲ ”

ရွှီချင်းက ကောင်းကင်ကို ကြည့်လိုက်သည်။ ထို့နောက် သူက အကြည့်ပြန်ရုပ်လိုက်ပြီး သူ၏ ခန္ဓာကိုယ်က လေနှင့် နှင်းထဲမှာ ပျောက်ကွယ်သွားသည်။ သူက လေသံနှင့် တခြားအသံများနောက်သို့ လိုက်သွားပြီး ဟင်းလင်းပြင်ထဲမှာ ပျောက်ကွယ်သွားသည်။

နောက်ဆုံးမှာတော့ သူက အားညိုဖြင့် တွေ့ဆုံရန် ချိန်းဆိုထားသော နေရာဆီသို့ ရောက်ရှိသွားသည်။

အားညိုက မပြီး‌ဆုံးသေးပေ။

ရက်အနည်းငယ်ကြာပြီးနောက် ရေခဲပြင်ပေါ်မှာ တင်ပျဉ်‌ခွေထိုင်နေသော ရွှီချင်းက မျက်လုံးပြန်ဖွင့်လိုက်သည်။

သူ့အောက်မှ ရေခဲပြင်က ပြိုကွဲသွားသည်။ အရိပ်လေးက မြန်ဆန်စွာ ပြန်ရောက်လာသည်နှင့်တစ်ပြိုင်နက် ကြော့ရှင်းတင့်တယ်သော ပုံရိပ်တစ်ခုက ရေခဲမြစ်ထဲမှ ထွက်ပေါ်လာပြီး ရွှီချင်း၏ အရှေ့မှာ ရပ်လိုက်သည်။

ထိုသူက အမျိုးသမီးတစ်ယောက် ဖြစ်သည်။

သူ၏ ထွက်ပေါ်လာမှုက ရေခဲကမ္ဘာထဲမှာ နွေဦးလေပြေ တိုက်ခတ်သွားသည့်အလား မည်းမှောင်နေသော ဤကုန်းမြေဆီသို့ တမူထူးခြားသော အရောင်ကို သယ်ဆောင်လာသည်။

သူ၏ ပြိုင်ဘက်ကင်းသော မျက်နှာက ပန်းချီရေးဆွဲထားသည့်အလား အောက်မေ့ရသည်။

သူ၏ မျက်ခုံးမွှေးများက အသစ်ထွက်ပေါ်လာသော လစန္ဒာများသဖွယ် ထင်မှတ်ရသည်။ သူ၏ အသားအရေက တောင်တန်းများပေါ်တွင် ကြည်လင်စွာ စီးဆင်းနေသော နွေဦးစမ်းရေနှင့် ဆင်တူသည်။

သူ၏ မျက်လုံးများက ကန်ရေပြင်ပမာ နက်ရှိုင်းပြီး အသိပညာအလင်းဖြင့် ထွန်းလင်းတောက်ပနေသည်။ ယင်းတို့က ဤလောကထဲမှ အရာအားလုံးကို ထွင်းဖောက်မြင်နိုင်သည့်အလားပင်။ သူ၏ နှုတ်ခမ်းက အပေါ်သို့ တွန့်ကွေးနေပြီး ကိုယ့်ကိုယ်ကိုယ် ယုံကြည်မှုရှိကြောင်း ထင်ရှားစွာ ဖော်ပြနေသည်။ ဤသည်မှာ သူက မည်သည့်အခက်အခဲကိုမဆို ရင်ဆိုင်ဖြေရှင်းနိုင်သည့်အလားပင်။

အထူးသဖြင့် သူ၏ ကြော့ရှင်းလှပသော ဝတ်စုံဖြစ်သည်။ ယင်းက သူ၏ ခန္ဓာကိုယ်အချိုးအစားဖြင့် ပြီးပြည့်စုံစွာ လိုက်ဖက်ညီသည်။ သူက ခြေလှမ်း လှမ်းလိုက်သည့်အခါတိုင်း သူ၏ ဝတ်စုံအောက်မှ အနားစက သိမ်မွေ့ညင်သာစွာ လှုပ်ယမ်းသွားသည်။ ဤသည်မှာ လိပ်ပြာက ပန်းပွင့်များကြားထဲမှာ ကခုန်နေသည့်အလားပင်။

သူ၏ အမူအကျင့်က တမူထူးခြားပြီး ဆွဲဆောင်မှုဖြင့် ပြည့်နှက်နေသည်။ သူ့မှာ အမျိုးသမီးတစ်ယောက်၏ ကြော့ရှင်းတင့်တယ်မှုသာမက သိမ်မွေ့ညင်သာမှုလည်း ရှိသည်။ ထို့ပြင် လွတ်လပ်သော အငွေ့အသက်က သူ၏ လှုပ်ရှားမှုတိုင်းမှာ ကိန်းဝပ်နေသည်။

သူက အနားသို့ ချဉ်းကပ်လာပြီးနောက် လှပစွာ ပြုံးလိုက်သည်။

“ အကိုရွှီချင်း… ငါလှလား ”

ရွှီချင်းက နှုတ်ဆိတ်သွားသည်။

ထိုအမျိုးသမီးက မရပ်တန့်ခဲ့ပေ။ သူက ကျောက်စိမ်းသဖွယ် ဖြူဖွေးသော လက်ကို မြှောက်လိုက်ပြီး သူ၏ နားအနောက်မှ ဆံပင်ကို သပ်လိုက်သည်။ သိမ်မွေ့ညင်သာသော အမူအရာက သူ၏ မျက်နှာပေါ်မှာ ထွက်ပေါ်လာသည်။ သူက တခစ်ခစ် ရယ်မောလိုက်ပြီး ပြောသည်။

“ လင်းအာနဲ့ ငါ… ဘယ်သူပိုလှလဲ ”

ရွှီချင်း၏ နဖူးပေါ်မှ အနီရောင်သွေးကြောများက ဖောင်းကားလာကြသည်။

“ ဟိုပျံတံတံမြေခွေးမနဲ့ ငါ… ဘယ်သူပိုလှလဲ ”

ရွှီချင်း၏ ညာဘက်မျက်လုံးထဲမှ ပယ်ဖျက်ခြင်းအခွင့်အာဏာက တလက်လက် တောက်ပသွားသည်။

“ ကျစ်ရွှမ်းနဲ့ ငါ… ဘယ်သူပိုလှလဲ ”

ထိုအမျိုးသမီးက ဉာဏ်များစွာ ပြုံးလိုက်သည်။

ရွှီချင်း၏ ခန္ဓာကိုယ်ထဲမှ နတ်ဘုရားအခွင့်အာဏာများက အပြင်းအထန် တုန်လှုပ်သွားကြသည်။ သူက အသက်ပြင်းပြင်းရှူသွင်းလိုက်ပြီး သူ၏ အရှေ့မှ အမျိုးသမီးကို ကြည့်လိုက်သည်။ ထို့နောက် သူက အသံဖမ်းကျောက်စိမ်းပြားကို ထုတ်လိုက်ပြီး တည်ငြိမ်စွာ ပြောသည်။

“ စီနီယာအကိုကြီး… စောစောက မင်းဘာပြောလိုက်တာလဲ… သေချာ ငါမကြားလိုက်ရဘူး… နောက်တစ်ကြိမ် ထပ်ပြောပေးပါ ”

အမျိုးသမီး၏ မျက်နှာက တည်ကြည်လေးနက်သွားသည်။ သူက ချောင်းဟန့်လိုက်ပြီး တည်ငြိမ်စွာ ပြောသည်။

“ ချင်းလေး… ကစားနေတာ တော်လိုက်တော့… အလုပ်ကိစ္စကိုပဲ ပြော‌ရအောင် ”