လျှို့ဝှက်ဆန်းကြယ်သော အဖြူရောင်ဖုန်(ခ)

တစ်နည်းဆိုရသော် အကယ်၍ သူက ကိုယ်ပွားတစ်ခုကို ဖန်တီးလျှင်ပင် ထိုကမ္မများကြောင့် ပြဿနာကြီးတစ်ခု ရှိလာလိမ့်မည်။

မဟာဧကရာဇ်၏ ကတ်ကြေးက ထူးခြားသော်လည်း ၎င်းက ထိုကမ္မများကို မဖြတ်တောက်နိုင်ပေ။

ထို့ကြောင့် ရွှီချင်းက ကိုယ်ပွားတစ်ခုဖန်တီးမည့် သူ၏ အစီအစဉ်ကို လက်လျော့ခဲ့ရသည်။

ယင်းက ရွှယ်ချန်းဇီနှင့် သူမတွေ့ဆုံခင်အထိ ဖြစ်သည်။

အစောနက ရွှယ်ချန်းဇီနှင့် သွေးမြူခိုးထဲမှာ သူတိုက်ခိုက်နေခဲ့စဉ် ရွှီချင်းက တစ်ဖက်လူ၏ ထူးခြားမှုကို သတိထားမိခဲ့သည်။

ရွှယ်ချန်းဇီ၏ ခန္ဓာကိုယ်ပေါ်မှ ကမ္မချည်မျှင်များသည် သာမန်လူများနှင့် ကွဲပြားခြားနားသည်။

ရွှီချင်း၏ ပယ်ဖျက်ခြင်းအခွင့်အာဏာအောက်မှာ သူက ရွှယ်ချန်းဇီ၏ ကမ္မချည်မျှင်များပေါ်တွင် အဖြူရောင်ဖုန်တချို့ရှိကြောင်း မြင်တွေ့သွားသည်။

ယင်းက အလွန်သိမ်မွေ့နူးညံ့သည်။

ဤသည်မှာ ရွှီချင်းက တစ်စုံတစ်ယောက်၏ ကမ္မချည်မျှင်များပေါ်တွင် ဖုန်ကပ်နေခြင်းကို ပထမဆုံးအကြိမ် မြင်ဖူးခြင်း ဖြစ်သည်။

ထိုအချိန်တုန်းက သူနှင့် အားညိုသည် သူခိုးခြောက်ယောက်လှည့်စားခြင်း အင်မော်တယ်အတတ်ပညာကို ရွှယ်ချန်းဇီပေါ်မှာ အသုံးပြုခဲ့ကြသည်။ သို့သော်လည်း ခမ်းနားထည်ဝါသော ဝတ်စုံနှင့် လူငယ်၏ အမှတ်မထင် ရောက်ရှိလာမှုက အင်မော်တယ်အတတ်ပညာကို ကြားဖြတ်နှောင့်ယှက်ခဲ့သည်။

သို့သော်လည်း အင်မော်တယ်အတတ်ပညာကို အသုံးပြုနေစဉ်အတွင်း အဖြူရောင်ဖုန်က အင်မော်တယ်အတတ်ပညာ၏ တည်ရှိမှုကို ခုခံတားဆီးနေကြောင်း ရွှီချင်း အာရုံခံမိခဲ့သည်။

၎င်းက စိတ်ခံစားချက်ခုနစ်မျိုးနှင့် လိုအင်ဆန္ဒခြောက်မျိုးကို တံဆိပ်ရိုက်ခတ်ရန် ခက်ခဲစေသည်။

ထိုထူးခြားမှုက ရွှီချင်း၏ စိတ်အာရုံကို ဆွဲဆောင်သွားသည်။ ခမ်းနားထည်ဝါသော ဝတ်စုံနှင့် လူငယ်က ရောက်ရှိလာသည့်အခါ ရွှီချင်းက ရွှယ်ချန်းဇီကို လွှတ်ပေးလိုက်သည်။ တစ်ချိန်တည်းမှာ သူက ထိုကိစ္စကို စိတ်ထဲမှာ မြှုပ်နှံထားခဲ့သည်။

ထို့နောက် သူက သူတို့နောက်မှ အသက်မဲ့စွာ လိုက်ပါခဲ့သည်။ သို့သော်လည်း သူက ခမ်းနားထည်ဝါစွာ ဝတ်ဆင်ထားသော လူငယ်နှင့် အားညိုကြားမှ စကားဝိုင်းကို နားထောင်နေရင်း ရွှယ်ချန်းဇီ၏ ထူးခြားမှုကိုလည်း တွေးတောခဲ့သည်။

နောက်ဆုံးမှာတော့ သူက ခန့်မှန်းမှုတစ်ခုကို ပြုလုပ်နိုင်သွားသည်။

“ သူက ကမ္မနဲ့ သက်ရောက်မခံရတဲ့ပုံပဲ ”

ထူးဆန်းသော အလင်းက ရွှီချင်း၏ မျက်လုံးထဲမှာ ထွက်ပေါ်လာသည်။ ယခုသည် နေဝင်ရီတရောအချိန် ဖြစ်သည်။ နောက်ဆုံးနေရောင်ခြည်က ပြန့်ကျဲသွားသည့်အခါ သူက မနီးမဝေးမှ တောင်တစ်လုံးကို ကြည့်လိုက်သည်။ သူက အရှိန်မြှင့်တင်လိုက်ပြီး ထိုတောင်ဆီသို့ ဦးတည်သွားသည်။

ဤအခိုက်အတန့်မှာ တောင်ပေါ်တွင် ပုန်းကွယ်နေသော လှိုဏ်ဂူတစ်ခု ရှိသည်။

လှိုဏ်ဂူ၏ အပြင်ဘက်တွင် စည်းချအစီအရင်များကို ခင်းကျင်းထားသည်။ ထိုထဲမှာ ဖုံးကွယ်ခြင်းအစီအရင်အပြင် ခုခံကာကွယ်ခြင်းအစီအရင်များလည်း ရှိကြသည်။

လှိုဏ်ဂူထဲတွင် ရွှယ်ချန်းဇီက တင်ပျဉ်ခွေလျက် တရားထိုင်နေသည်။

သူက ရွှီချင်းနှင့် အားညိုထံမှ လွတ်မြောက်သွားပြီးနောက် သူ၏ မူလလှိုဏ်ဂူဆီသို့ ပြန်မသွားခဲ့ပေ။ ယင်းအစား သူက သူ၏ ခန္ဓာကိုယ်ပေါ်မှာ အမှတ်အသားရှိမရှိ စစ်ဆေးလိုက်ပြီး မည်သည့်သဲလွန်စမှမကျန်စေရန် လှိုဏ်ဂူတစ်ခုပြီးတစ်ခုကို ပြောင်းလဲပစ်ခဲ့သည်။

နောက်ဆုံးမှာတော့ သူက ဤနေရာဆီသို့ ရောက်လာခဲ့သည်။

ယခု သူက မျက်နှာဖြူဖျော့နေလေရာ ဒဏ်ရာပြင်းထန်စွာ ရရှိထားပုံပေါ်သည်။ သူ၏ မျက်နှာပေါ်မှ သွေးကြောများက ဖောင်းကားနေပြီး သူ၏ ခန္ဓာကိုယ်ပေါ်မှ အားလှိုင်းအတတ်အကျများက မတည်မငြိမ်ဖြစ်နေသည်။

အထူးသဖြင့် သူ၏ ခန္ဓာကိုယ်ပေါ်မှ မဟာလောကများ ဖြစ်ကြသည်။ အစက သူ့မှာ မဟာလောကခုနစ်ခု ရှိသော်လည်း ယခု မဟာလောကငါးခုသာ ကျန်ရှိတော့သည်။ ထို့ပြင် မဟာလောကအားလုံးက အရောင်မှေးမှိန်နေပြီး အသက်ဓာတ်ကင်းမဲ့နေကြသည်။

ရွှီချင်းနှင့် အားညိုဖြင့် တိုက်ပွဲအတွင်းမှာ သူက ထွက်ပြေးရန် အခွင့်အရေးအတွက် သူ၏ မဟာလောကနှစ်ခုကို ဖောက်ခွဲပစ်ခဲ့သည်။

“ ယွဲ့တုန်က တစ်ခုခု လွဲမှားနေတယ် ”

“ အဲ့ဒီခွေးမရဲ့ တိုက်ခိုက်မှုတွေက ပိုပြီးရက်စက်ကြမ်းကြုတ်လာတဲ့အပြင် သူ့ရဲ့ တိုက်ပွဲစွမ်းအားက အရင်ကထက် ပိုပြီးသန်မာလာတယ်… ပြီးတော့ သူ့ရဲ့ အလောင်းရုပ်သေးရုပ်က… အဲ့ဒါက ငါ့ကို အကြောက်တရား ခံစားမိစေတယ် ”

“ ဒါ့အပြင် အဲ့ဒီရုပ်သေးရုပ်က ယွဲ့တုန်နဲ့ အတူတူ ပူးပေါင်းပြီး သူခိုးခြောက်ယောက် လှည့်စားခြင်းကို အသုံးပြုနိုင်တယ်… ”

“ သေစမ်း ”

ရွှယ်ချန်းဇီက နှလုံးတုန်သွားပြီး ပြင်းထန်သော မကျေမချမ်းစိတ်နှင့် ဆန္ဒမရှိမှုကို ခံစားမိသွားသည်။ သို့သော်လည်း သူက ယွဲ့တုန်၏ သရုပ်ကို သံသယဝင်ခြင်းမရှိပေ။ အဘယ့်ကြောင့်ဆိုသော် သူခိုးခြောက်ယောက်လှည့်စားခြင်း အင်မော်တယ်အတတ်ပညာသည် အရှေ့ပိုင်း အင်မော်တယ်အတတ်ပညာခန်းမနှင့် ယွဲ့တုန်၏ အမှတ်လက္ခဏာ ဖြစ်သည်။

“ အဲ့ဒီခွေးမက ဝမ်ကူးကုန်းမြေဆီ ဆင်းသက်သွားပြီးနောက် ကြီးမားတဲ့ ကံကြမ္မာကောင်းတစ်ခုနဲ့ တွေ့ဆုံခဲ့တာ ဖြစ်ရမယ် ”

“ တကယ်လို့ သူ့ကို ငါသတ်ချင်တယ်ဆိုရင် အစီအစဉ်တစ်ခု ဆွဲရလိမ့်မယ် ”

ရွှယ်ချန်းဇီက အကူအညီမဲ့သွားသည်။ သူက ဒဏ်ရာများကို ပြန်လည်ကုသနေစဉ် ကျောက်စိမ်းပြားတစ်ခုကို ထုတ်လိုက်သည်။

ယင်းထဲမှာ မိစ္ဆာငှက်မွှေးသူတော်စင်ကုန်းမြေက ၎င်း၏ မျိုးနွယ်ဝင်အားလုံးအတွက် ထုတ်ပြန်ထားသော တာဝန်အားလုံး ပါရှိသည်။ တာဝန်ချည်းသာ မဟုတ်ပေ။ တာဝန်ပြီးဆုံးသွားလျှင် ရရှိမည့် အကျိုးဆောင်မှုအမှတ်များလည်း ပါရှိသည်။

“ ပိုမိုများပြားတဲ့ အရင်းအမြစ်တွေကို လဲလှယ်ဖို့နဲ့ လျှို့ဝှက်နယ်မြေတွေဆီ ဝင်ရောက်ဖို့ အခွင့်အရေးအတွက် အကျိုးဆောင်မှုအမှတ်တွေကို ငါစုဆောင်းရလိမ့်မယ် ”

“ ကံကောင်းစွာပဲ လူသားမျိုးနွယ်ထဲမှာ အားနည်းတဲ့လူတွေ အများကြီးပဲ ရှိတယ်… သူတို့ကို ငါသတ်လိုက်မယ်ဆိုရင် အကျိုးဆောင်မှုအမှတ် အများကြီးကို စုဆောင်းနိုင်လိမ့်မယ် ”

ရွှယ်ချန်းဇီသည် ယွဲ့တုန်ကို သတ်ချင်နေသော သူ၏ ဆန္ဒကို ဖိနှိပ်လိုက်သည်။ သူက အလွန်စိတ်ရှည်သူ ဖြစ်သည်။ သို့မဟုတ်လျှင် သူက ကိုယ့်ကိုယ်ကိုယ် ယုံကြည်မှုမရှိဘဲ ယွဲ့တုန်ကို သွားရောက် တိုက်ခိုက်ခဲ့လိမ့်မည် မဟုတ်ချေ။

ယခု သူ၏ ခွန်အားက မလုံလောက်သေးကြောင်း နားလည်သွားသည့်အခါ သူက ဆက်ပြီး အစွမ်းမြှင့်တင်ရန် ပြင်ဆင်လိုက်သည်။ သူက ပိုပြီးသန်မာလာမှသာ လက်စားချေနိုင်လိမ့်မည်။

သို့သော်လည်း သူက နတ်ဘုရားစိတ်အာရုံကို ပို့လွှတ်လိုက်ပြီး ကျောက်စိမ်းပြားထဲမှ သူနှင့်သင့်တော်သော တာဝန်တစ်ခုကို ရှာဖွေတော့မည့်အချိန် လှိုဏ်ဂူအပြင်ဘက်တွင် အားလှိုင်းအတတ်အကျတစ်ခု ရုတ်တရက် ထွက်ပေါ်လာသည်။

ထိုအားလှိုင်းအတတ်အကျက အလွန်သေးငယ်သည်။ သို့သော်လည်း နောက်အခိုက်အတန့်မှာ ယင်းက ပြင်းထန်လာပြီး တောင်တစ်ခုလုံးကို တုန်လှုပ်သွားစေသည်။ ကျယ်လောင်သော ပေါက်ကွဲသံက ပဲ့တင်ထပ်သွားသည်။

စည်းချအစီအရင်က တုန်လှုပ်သွားသည်။

အက်ကွဲရာများက လှိုဏ်ဂူ၏ အဝင်ဝမှာ ထွက်ပေါ်လာကြသည်။

ရုတ်တရက် အပြောင်းအလဲက ရွှယ်ချန်းဇီ၏ အမူအရာကို ပြောင်းလဲသွားစေသည်။ သူက ညာလက်ကို မြှောက်လိုက်ပြီး မြေပြင်ပေါ်သို့ ဖိချလိုက်သည်။

သူ့အောက်မှ မြေပြင်ပေါ်တွင် တည်နေရာပြောင်းရွှေ့ခြင်းမှော်သင်္ကေတများဖြင့် ပြည့်နှက်နေသည်။

သူက မြေပြင်ကို ဖိလိုက်နိုင်သည်နှင့် တည်နေရာပြောင်းရွှေ့နိုင်လိမ့်မည်။

သို့သော်လည်း သူ၏ လက်က မြေပြင်နှင့် သုံးလက်မအကွာမှာ ရုတ်တရက် ရပ်တန့်သွားသည်။ သူ၏ အရိပ်ထဲတွင် မျက်လုံးတစ်လုံး ထွက်ပေါ်လာသည်။

၎င်းက အရိပ်လေးဖြစ်သည်။

၎င်းက အရေးကြီးအခိုက်အတန့်မှာ လှုပ်ရှားခဲ့သည်။

၎င်းက ရွှယ်ချန်းဇီကို အပြည့်အဝ မသိမ်းပိုက်နိုင်သော်လည်း သူ့ကို အတိုင်းအတာတစ်ခုထိ ထိန်းချုပ်နိုင်ပေသည်။

ရွှယ်ချန်းဇီက အပြင်းအထန် နှလုံးတုန်သွားပြီး အလန့်တကြား အော်ဟစ်လိုက်သည်။ သူက ရုန်းကန်နေရင်း ဘယ်လက်ကို မြေပြင်ပေါ်သို့ ဖိချရန် ကြိုးစားလိုက်သည်။

သို့သော်လည်း ထိုအခိုက်အတန့်မှာ အေးစက်စက်အသံက ပဲ့တင်ထပ်လာသည်။

“ မင်းကို ရှာတွေ့ပြီ ”

နောက်အခိုက်အတန့်မှာ ရွှယ်ချန်းဇီ၏ အသိစိတ်က တုန်ယင်သွားစဉ် ရွှီချင်း၏ အစစ်အမှန် ခန္ဓာကိုယ်က အသံလှိုင်းများမှတဆင့် သူ့အရှေ့မှာ ထွက်ပေါ်လာသည်။

မျက်စိတစ်မှိတ်အတွင်းမှာ သူက ဖော်မပြနိုင်အောင် ကြည်လင်လာပြီး ရွှယ်ချန်းဇီ၏ လည်ပင်းကို ဖမ်းဆုပ်လိုက်သည်။

သူက ရွှယ်ချန်းဇီကို တည်နေရာပြောင်းရွှေ့ခြင်းအစီအရင်ဖြင့် ဝေးရာသို့ တရွတ်တိုက် ဆွဲခေါ်သွားသည်။ ထို့နောက် သူက ရွှယ်ချန်းဇီကို လှိုဏ်ဂူ၏ နံရံပေါ်တွင် အကြမ်းပတမ်း ဖိချလိုက်သည်။

ဗုန်း…

လှိုဏ်ဂူက အပြင်းအထန် တုန်ယင်သွားသည်။

ရွှယ်ချန်းဇီက ကြောက်လန့်မှုကြောင့် မျက်လုံးပြူးကျယ်သွားပြီး တန်ပြန်တိုက်ခိုက်ရန် ကြိုးစားလိုက်သည်။ သို့သော်လည်း တစ်ဖက်လူက သူ၏ လည်ပင်းကို ဖမ်းဆုပ်ထားရင်း အင်အားတချို့ကို ထုတ်လွှတ်ထားသည်။ ယင်းက သူ၏ တစ်ကိုယ်လုံးကို တုန်ယင်သွားစေသည်။ ဒြပ်နှောများက သူ၏ ခန္ဓာကိုယ်ထဲသို့ အရူးအမူး တိုးဝင်လာနေကြသည်။

ထိုအဖြစ်အပျက်က သူ့ကို လုံးဝကြောက်ရွံ့သွားစေသည်။ သူက ဝှက်ဖဲကတ်တချို့ကို ထုတ်သုံးရန် ကြိုးစားလိုက်သည်။ သို့သော်လည်း နောက်အခိုက်အတန့်မှာ သူက လုံးဝမလှုပ်ရှားနိုင်တော့ကြောင်း အံ့အားသင့်ဖွယ်ကောင်းစွာ ရှာတွေ့သွားသည်။