ကံတရားနှင့် ကံကောင်းခြင်း

ထူးဆန်းသော အလင်းက ရွှီချင်း၏ မျက်လုံးထဲမှာ ထွက်ပေါ်လာသည်။ သူ၏ စိတ်ထဲမှာလည်း ကြီးမားသော လှိုင်းလုံးများက ထွက်ပေါ်လာကြသည်။

သူ၏ အသိစိတ်က ပရမ်းပတာ လှုပ်ခတ်သွားသည်။

ဤနတ်ဘုရားအခွင့်အာဏာ၏ အဆင့်ကို သူမသိသော်လည်း ယင်းက နတ်ဘုရားအခွင့်အာဏာသုံးမျိုး၏ အတူတကွ ပေါင်းစပ်မှုမှ ဖြစ်ပေါ်လာခြင်းဖြစ်လေရာ အလွန်အဆင့်မြင့်ကြောင်း စိတ်ကူးကြည့်နိုင်သည်။

“ အဲ့ဒါက ကံကြမ္မာဟုတ်တာလား မဟုတ်ဘူးလား ”

ရွှီချင်းက တီးတိုးရေရွတ်လိုက်ပြီး သူ၏ ညာလက်ကို ရုတ်တရက် မြှောက်လိုက်သည်။ နောက်အခိုက်အတန့်မှာ ကံကြမ္မာဖြစ်ဟန်ရသော နတ်ဘုရားအခွင့်အာဏာအသစ်က ထွန်းလင်းတောက်ပလာပြီး သူ၏ ခန္ဓာကိုယ်ထဲမှ ပျောက်ကွယ်သွားသည်။

ယင်းက သူ၏ လက်ဖဝါးပေါ်မှာ ပြန်ပေါ်လာသည်။

ထို့ပြင် ယင်းက ဓားမြှောင်တစ်လက်အဖြစ် အသွင်ပြောင်းလဲသွားသည်။

ဓားမြှောင်သည် ဒြပ်ထည်ရှိဟန် ထင်ရသော်လည်း ပုံရိပ်ယောင်ခံစားမှုကို ပေးသည်။ ယင်းက အလွန်ထူးခြားဆန်းကြယ်သည်။

အမှန်မှာ ဓားမြှောင်ထွက်ပေါ်လာသည့်အခိုက် သူ၏ ဘေးပတ်ဝန်းကျင်မှ ဟင်းလင်းပြင်က အနည်းငယ် စေးကပ်လာသည်။ ဤသည်မှာ ဟင်းလင်းပြင်က ဓားမြှောင်၏ သက်ရောက်ခံလိုက်ရကြောင်း ထင်ရှားသည်။

ဤအခိုက်အတန့်မှာ ရွှီချင်းက မြေကြီး၊ ကောင်းကင်၊ ဘေးပတ်ဝန်းကျင်မှ မရေမတွက်နိုင်သော အပင်များနှင့် တောင်ကုန်းများကို ဤဓားမြှောင်ဖြင့် လှီးဖြတ်ပစ်နိုင်သည်ဟု ခံစားမိသွားသည်။

သူက ဓားမြှောင်ကို အသုံးပြုပြီး လမ်းကြောင်းတချို့ကို ပြောင်းလဲပစ်နိုင်ဟန် ရ၏။

ထို့ပြင် ပြောင်းလဲခံလိုက်ရမည့် လမ်းကြောင်းက မူလနယ်ပယ်ထဲမှာ ဆက်ပြီး မရှိနိုင်တော့ပေ။

ဤခံစားမှုက ဝေဝါးပြီး မရှင်းလင်းပေ။ ရွှီချင်း၏ စိတ်ထဲမှာ မရေမတွက်နိုင်သော အတွေးများဖြင့် ပြည့်နှက်နေသည်။ သို့သော်လည်း သူက ထိုအတွေးများကို ပေါင်းစပ်ပြီး အမှန်တရားကို ဘယ်သောအခါမှ မရှာဖွေနိုင်ဟန် ရ၏။ ဤသည်မှာ ထိုနတ်ဘုရားအခွင့်အာဏာ၏ အနှစ်သာရကို သူမဖမ်းဆုပ်နိုင်အောင် အလွှာတစ်ခုက ကာဆီးထားသည့်အလားပင်။

သို့သော်လည်း သူသေချာသော တစ်စုံတစ်ခု ရှိသည်။

“ ဒီဟာက ကံကြမ္မာနတ်ဘုရားအခွင့်အာဏာဖြစ်ဖို့ ရာခိုင်နှုန်းများတယ်… ဒါပေမဲ့ အဲ့ဒါက ငါသိတဲ့ဟာနဲ့ နည်းနည်း ကွဲပြားခြားနားတယ်… ”

ရွှီချင်းက တီးတိုးရေရွတ်လိုက်သည်။ လှိုင်းလုံးများက သူ၏ စိတ်ထဲမှာ ထွက်ပေါ်လာနေသဖြင့် သူက စိတ်တည်ငြိမ်အောင် မထိန်းထားနိုင်ပေ။

အဘယ့်ကြောင့်ဆိုသော် ကံကြမ္မာနှင့်ဆင်တူသော နတ်ဘုရားအခွင့်အာဏာအား အသုံးပြုနိုင်သည့် လူတစ်ယောက်ကို သူမြင်ဖူးသောကြောင့် ဖြစ်သည်။

ထိုလူသည် ကျစ်လွီဆဲ့အိမ်ရှေ့စံမင်းသားမှလွဲ၍ တခြားလူမဟုတ်ပေ။

ကျစ်လွီဆဲ့အိမ်ရှေ့စံမင်းသားသည် ကံကြမ္မာကို ထိန်းချုပ်နိုင်သည်။

ရွှီချင်းက အသက်ပြင်းပြင်းရှူသွင်းလိုက်သည်။ အတိတ်မှာ ကျစ်လွီဆဲ့အိမ်ရှေ့စံမင်းသား၏ တိုက်ခိုက်ပုံများက သူ၏ စိတ်ထဲမှာ ပုံရိပ်ပြန်ပေါ်လာသည်။ သူက သေချာစဉ်းစားလိုက်သည်။

“ ကျစ်လွီဆဲ့အိမ်ရှေ့စံမင်းသားက နတ်ဘုရားမျက်နှာပျက်ကြီးရဲ့ အကူအညီနဲ့ ပြန်လည်မွေးဖွားလာခဲ့တယ်… ဒီလိုဆိုရင် သူ့ရဲ့ နတ်ဘုရားအခွင့်အာဏာက နတ်ဘုရားမျက်နှာပျက်ကြီးနဲ့ ဆက်စပ်နေလိမ့်မယ် ”

“ ငါကျတော့… ငါ့ရဲ့ ရုပ်ခန္ဓာကိုယ်က ရှေးဦးအပျက်အစီးရဲ့ အသွေးအသားတွေကနေ ဆင်းသက်လာတာပဲ… အခု ထူးခြားဆန်းကြယ်တဲ့ အခြေအနေတစ်ရပ်ကြောင့် ကံကြမ္မာလို့ထင်ရတဲ့ ဒီနတ်ဘုရားအခွင့်အာဏာကို ငါရရှိသွားခဲ့တယ် ”

“ အဲ့ဒီထဲမှာ ကမ္မဆက်စပ်မှုတချို့ ရှိနေမလား ”

“ ကျစ်လွီဆဲ့အိမ်ရှေ့စံမင်းသားရဲ့ ကံကြမ္မာအခွင့်အာဏာက အချိန်နဲ့ ဆက်စပ်နေတယ် ”

“ ဒါဆို… ငါ့ရဲ့ နတ်ဘုရားအခွင့်အာဏာက ဘာလဲ ”

ရွှီချင်းက တွေးတောစဉ်းစားလိုက်သည်။

အချိန်အတော်ကြာပြီးနောက် သူက ထိုအတွေးများကို ပြန်ရုပ်သိမ်းလိုက်သည်။

ဤနတ်ဘုရားအခွင့်အာဏာနှင့်ပတ်သက်ပြီး သူ၏ နားလည်ထားမှုက အတော်လေး နည်းပါးကြောင်း ရွှီချင်း သိသည်။ အကယ်၍ သူက အသေးစိတ် သိချင်သည်ဆိုလျှင် ထိုနတ်ဘုရားအခွင့်အာဏာအကြောင်းကို ပိုပြီးကောင်းမွန်စွာ နားလည်ထားရမည်။

ထိုသို့ဆိုမှတော့ ဦးတည်ရာမရှိဘဲ ကိုယ့်ဘာသာ စူးစမ်းလေ့လာမည့်အစား မေးမြန်းခြင်းက အကောင်းဆုံး ရွေးချယ်မှုဖြစ်လိမ့်မည်။

သူ့ဆရာက ဤနေရာမှာ မရှိသော်လည်း ဧကရီက ရှိသည်။

နတ်ဘုရားယဇ်ပလ္လင်အဆင့် နတ်ဘုရားတစ်ပါးအနေနှင့် ဧကရီက နတ်ဘုရားအခွင့်အာဏာများအကြောင်းကို သူ၏ ဆရာထက်ပင် ပိုပြီးသိနိုင်လောက်သည်။

ထိုသို့တွေးမိသောအခါ ရွှီချင်းက ဒသမအုပ်ချုပ်သူတောင်ဆီသို့ မြန်ဆန်စွာ ဦးတည်သွားသည်။

လမ်းတစ်လျှောက်တွင် သူက ကံကြမ္မာဖြစ်ဟန်ရသော ထိုနတ်ဘုရားအခွင့်အာဏာကို ဆက်ပြီး မစူးစမ်းတော့ပေ။ ယင်းအစား သူက သူ၏ ဝိညာဉ်ကို ပြန်လည်အားဖြည့်လိုက်ပြီး တခြားနတ်ဘုရားအခွင့်အာဏာများကို စစ်ဆေးကြည့်လိုက်သည်။

“ အသံ… တားမြစ်အဆိပ်… ”

ယင်းတို့ကို ရွှီချင်းက နှိုင်းယှဉ်ကြည့်လိုက်သည့်အခါ ကံကြမ္မာဖြစ်ဟန်ရသော ထိုနတ်ဘုရားအခွင့်အာဏာက သူ၏ တခြားနတ်ဘုရားအခွင့်အာဏာများထက် အများကြီး ပိုအားကောင်းကြောင်း သေချာသွားသည်။

ထို့နောက် သူက သူ၏ ကျောပေါ်မှ ဖယောင်းတိုင်ဆေးမင်ကြောင်နှင့် ဆန်းကြယ်သော မျက်နှာဖုံးကို အာရုံစိုက်လိုက်သည်။

ထိုသို့ဖြင့် အချိန်သည် တရွေ့ရွေ့ စီးဆင်းသွားသည်။ မကြာမီ နှစ်ရက်ကုန်ဆုံးသွားသည်။

လက်ရှိအလျင်ဖြင့်ဆိုလျှင် သူက နောက်တစ်နာရီအတွင်းမှာ ဒသမအုပ်ချုပ်သူတောင်ဆီသို့ ရောက်ရှိသွားလိမ့်မည်။ ရွှီချင်းသည် ဤနှစ်ရက်အတွင်းမှာ ဖယောင်းတိုင်နှင့်ပတ်သက်ပြီး သုံးသပ်မှုတချို့ကို ပြုလုပ်နိုင်ခဲ့သည်။

“ ဖယောင်းတိုင်က ငါ့ခန္ဓာကိုယ်နဲ့ အပြည့်အဝ ပေါင်းစပ်သွားတာပဲ ”

“ ကြည့်ရတာ အဲ့ဒါက မှတ်တမ်းတင်ကျောက်စိမ်းပြားဆီကနေ ငါ့ခန္ဓာကိုယ်ဆီ ရွှေ့ပြောင်းသွားပုံပဲ ”

“ အဲ့ဒါကို ဖယ်ရှားပစ်ဖို့ နည်းလမ်းက ဖယောင်းတိုင်ကို မီးပြန်ထွန်းပေးရတာ ဖြစ်လောက်မယ်… ”

“ အခု အဲ့ဒါက မီးငြိမ်းနေတယ်ဆိုပေမဲ့ နောက်တစ်ကြိမ် မီးပြန်တောက်လာနိုင်သေးတယ်လို့ ငါခံစားမိတယ်… ဒါပေမဲ့ အဲ့လိုဖြစ်ဖို့ဆိုရင် အထူးအခြေအနေတချို့ကို လိုအပ်တယ် ”

“ အသေးစိတ်ကိုတော့ အချိန်ပေးပြီး ငါစူးစမ်းလေ့လာရလိမ့်မယ် ”

ရွှီချင်းက သူ၏ စိတ်ထဲမှာ သုံးသပ်လိုက်သည်။ ထိုဆေးမင်ကြောင်က လောလောဆယ် သူ့အတွက် မည်သည့်ပြဿနာမှ မရှိကြောင်းကိုလည်း သူကောက်ချက်ချနိုင်ခဲ့သည်။

“ မျက်နှာဖုံးကတော့… ”

ရွှီချင်းက ခေါင်းငုံ့လိုက်သည်။ သူက လက်ဝှေ့ယမ်းလိုက်သည့်အခါ မျက်နှာဖုံးက သူ၏ လက်ဖဝါးပေါ်မှာ ထွက်ပေါ်လာသည်။ ၎င်းက ရွှီချင်းကို စိုက်ကြည့်နေဆဲပင်။ ဤသည်မှာ ၎င်းက ရွှီချင်း၏ ဆန္ဒပြုမှုကို စောင့်ဆိုင်းနေသည့်အလားပင်။

ယနေ့ သူက သူ၏ ကျောပေါ်မှ ဆေးမင်ကြောင်အပြင် ဤမျက်နှာဖုံးကိုလည်း စူးစမ်းလေ့လာခဲ့သည်။

“ ဒါက အမည်မသိပစ္စည်းတစ်ခုပဲ ”

“ သူ့မှာ အသိစိတ်ရှိတယ်ဆိုပေမဲ့ အဲ့ဒါက အသေးအမွှား‌လေးပဲ ”

“ တကယ်လို့ ငါက ဆန္ဒမပြုဘူးဆိုရင် အဲ့ဒါက ငါ့နောက်ကို ဆက်ပြီး လိုက်နေလိမ့်မယ် ”

“ ဆန္ဒပြုဖို့အတွက် တန်ကြေးကိုတော့ အသေးစိတ် ငါမသိသေးဘူး… ဒါပေမဲ့ သူက ဒီလောက်ဇွဲကောင်းနေမှတော့ တန်ကြေးက အရမ်းကြီးမားရလိမ့်မယ် ”

ရွှီချင်းက မျက်လုံးမှေးကျဉ်းလိုက်သည်။ သူ၏ နှလုံးက တည်ငြိမ်နေသည်။

ဆန္ဒပြုခြင်းက မျက်နှာဖုံးကို ဆွဲဆောင်သော သူ၏ နည်းလမ်းတစ်ခုမျှသာ ဖြစ်သည်။ ယင်းက သူ၏ မူလရည်ရွယ်ချက် မဟုတ်ပေ။

အစမှအဆုံးထိ သူ့မှာ ရည်ရွယ်ချက်တစ်ခုတည်းသာ ရှိသည်။ ယင်းက ကမ္မများ၏ သက်ရောက်မှုမှ ကင်းလွတ်နိုင်မည့် နည်းလမ်းတစ်ခုကို ရှာဖွေရန် ဖြစ်သည်။

သို့ဖြစ်၍ အဖြူရောင်ဖုန်ကသာ အဓိကဖြစ်သည်။

ထို့ကြောင့် ရွှီချင်းက ခေါင်းမော့လိုက်သည်။ သူက သူ့ကိုယ်ပိုင် ကမ္မချည်မျှင်များကို ကြည့်ရှုလိုက်သည့်အခါ တာအိုအမှတ်အသားက သူ၏ မျက်လုံးထဲမှာ လင်းလက်သွားသည်။

သူ၏ ကမ္မချည်မျှင်များက ဘေးပတ်ဝန်းကျင်နှင့် ဆက်သွယ်နေပြီး လွန်စွာ ထွန်းလင်းတောက်ပသည်။ ယင်းတို့ထဲမှ တချို့က ကြောက်မက်ဖွယ်ကောင်းသော စိတ်ဆန္ဒကို ထုတ်လွှတ်နေကြသည်။

သို့သော်လည်း ဤအခိုက်အတန့်မှာ အဖြူရောင်ဖုန်က ထိုကမ္မချည်မျှင်များထဲမှာ ထွက်ပေါ်လာကြောင်း ရွှီချင်းက ရှင်းလင်းစွာ မြင်တွေ့သွားသည်။

အဖြူရောင်ဖုန်က ရှင်သန်ကြီးထွားနေဟန်ရပြီး ယင်းတို့က ရွှီချင်း၏ ကမ္မချည်မျှင်များပေါ်မှာ တိတ်တဆိတ် ဖွဲ့စည်းသွားကြသည်။

“ မျက်နှာဖုံးကို ထိတွေ့လိုက်တာက အဖြူရောင်ဖုန်ကို ကမ္မချည်မျှင်တွေထဲမှာ ထွက်ပေါ်လာစေနိုင်တာလား ”

ရွှီချင်းက နှုတ်ဆိတ်သွားပြီး နက်နဲစွာ တွေးတောလိုက်သည်။ သူက အကြည့်ပြန်ရုပ်တော့မည့်အချိန် အတွေးတစ်ခုက သူ၏ စိတ်ထဲမှာ ရုတ်တရက် ထွက်ပေါ်လာသည်။ သူက ကံကြမ္မာဖြစ်ဟန်ရသော နတ်ဘုရားအခွင့်အာဏာကို စဉ်းစားမိသွားသည်။

“ တကယ်လို့ အဲ့ဒီနတ်ဘုရားအခွင့်အာဏာကို ငါ့ရဲ့ ကမ္မချည်မျှင်တွေထဲ ပို့လွှတ်လိုက်မယ်ဆိုရင်ရော ဘာဖြစ်လာမလဲ ”

ထိုသို့တွေးမိသွားသည်နှင့်ချက်ချင်း ရွှီချင်း၏ အသက်ရှူသံက မြန်ဆန်လာသည်။ နောက်ဆုံးမှာတော့ သူက အကျိုးအကြောင်းကို ချင့်ချိန်စဉ်းစားပြီးနောက် ဆုံးဖြတ်ချက်ချလိုက်သည်။

“ ကြိုးစားကြည့်ရအောင် ”

ရွှီချင်းက တုံ့ဆိုင်းမနေပေ။ သူက ညာလက်ကို ဝှေ့ယမ်းလိုက်သည်။ ချက်ချင်းဆိုသလို ကံကြမ္မာဖြစ်ဟန်ရသော နတ်ဘုရားအခွင့်အာဏာက သူ၏ ခန္ဓာကိုယ်ထဲမှ ပျံသန်းထွက်လာပြီး ရွှီချင်း၏ အရှေ့မှာ ဓားမြှောင်တစ်လက်ကို ဖွဲ့စည်းသွားသည်။

ဓားမြှောင်သည် ထွက်ပေါ်လာပြီးသည်နှင့်ချက်ချင်း သူ၏ ဦးခေါင်းပေါ်မှ ကမ္မချည်မျှင်များဆီသို့ တန်းမတ်စွာ ပျံသန်းသွားသည်။

၎င်းက ကမ္မချည်မျှင်များထဲသို့ ဝင်ရောက်သွားသည့်အခါ ရွှီချင်းက ဖြတ်တောက်ချင်သော သူ၏ အတွေးကို မနည်းချုပ်ထိန်းထားလိုက်သည်။ ဓားမြှောင်က သူ၏ ကမ္မချည်မျှင်များထဲသို့ ဝင်ရောက်သွားလျှင် မည်သို့ဖြစ်လာမည်ကိုသာ သူက သိချင်ရုံ ဖြစ်သည်။

ဤအခိုက်အတန့်မှာ ဓားမြှောင်က သူ၏ ကမ္မထဲသို့ ဝင်ရောက်သွားပြီး ရပ်တန့်သွားသည်နှင့်…

ထူးဆန်းသော မြင်ကွင်းတစ်ခု ထွက်ပေါ်လာသည်။

အနက်ရောင်အလင်းသည် ဓားမြှောင်ထဲမှ ထွက်ပေါ်လာပြီး ရွှီချင်း၏ ကမ္မချည်မျှင်အားလုံးကို လွှမ်းခြုံသွားသည်။ ဤသည်မှာ ၎င်းက သူ၏ ကံကြမ္မာကို ဖုံးကွယ်ပေးလိုက်သည့်အလားပင်။

တစ်ချိန်တည်းမှာ အဖြူရောင်ဖုန်က တုန်ယင်သွားပြီး အပေါ်သို့ မြှောက်တတ်သွားသည်။ ၎င်းတို့က ရွှီချင်း၏ ကမ္မချည်မျှင်များထဲမှ အဝေးသို့ မောင်းထုတ်ခံလိုက်ရပြီး အပြင်လောကမှာ လွင့်မျောသွားကြသည်။ ၎င်းတို့က နောက်ထပ် မကျူးကျော်လာနိုင်ကြတော့ပေ။

နောက်အခိုက်အတန့်မှာ ရွှီချင်း၏ နှလုံးကို အပြင်းအထန် တုန်ယင်သွားစေမည့် စိတ်ခံစားမှုတစ်မျိုးက သူ၏ ခန္ဓာကိုယ်ပေါ်မှာ ထွက်ပေါ်လာသည်။ ဤသည်မှာ လေပြင်းမုန်တိုင်းတစ်ခုက သူ့ကို ရိုက်ခတ်သွားသည့်အလားပင်။

သူ၏ မျက်နှာပေါ်တွင် ရှားပါးသော အမူအရာက ထွက်ပေါ်လာသည်။ အမှန်မှာ သူက အံ့ဩသွားခြင်း ဖြစ်သည်။

အဘယ့်ကြောင့်ဆိုသော် သူ၏ စိတ်အာရုံထဲ၌ ဓားမြှောင်မှ အလင်းရောင်က သူ၏ ကမ္မချည်မျှင်များကို ဖုံးလွှမ်းသွားသည့်အခိုက် သူက ရေအောက်ထဲမှ ရုန်းထွက်နိုင်သွားပြီး ရေမျက်နှာပြင်ပေါ်သို့ ရောက်ရှိသွားသည့်အလား ရုတ်တရက် ခံစားမိသွားသောကြောင့် ဖြစ်သည်။ သူက ဤအခိုက်အတန့်မှာ လွတ်လပ်စွာ အသက်ရှူနိုင်သွားသည်။

သူ၏ ဝိညာဉ်က လုံးဝငြိမ်းအေးသွားသည်။

သူ၏ ခန္ဓာကိုယ်က ယခင်လွတ်လပ်မှုထက် ကျော်လွန်သွားသည်။

အမှန်မှာ ရွှီချင်းက ထိုစိတ်ခံစားမှုကို ကောင်းမွန်စွာ နားလည်သဘောပေါက်သည်။ ဤခံစားမှုနှင့် နှိုင်းယှဉ်လျှင် အတိတ်မှာ သူက ရွှံ့ဗွက်အိုင်ထဲမှာ နေထိုင်ခဲ့ရသည့်အလား ပြင်းထန်သော မွန်းကြပ်မှုကို ခံစားခဲ့ရသည်။ ဤသည်မှာ သူ၏ ဘဝတွင် ကြီးမားသော အချုပ်အနှောင်များဖြင့် ပြည့်နှက်နေသည့်အလားပင်။

သို့သော်လည်း ဤမတိုင်ခင်အထိ အတိတ်မှာ သူက ထိုသို့မွန်းကြပ်မှုနှင့် အချုပ်အနှောင်များကို ခံစားခဲ့ရကြောင်း လုံးဝသတိမထားမိပေ။

ယခုအခြေအနေနှင့် နှိုင်းယှဉ်လိုက်သည့်အခါမှသာလျှင် ကွာခြားမှုက အလွန်ကြီးမားကြောင်း သူသိသွားသည်။

ဤသည်မှာ သူ၏ ကံကြမ္မာက နောက်ဆုံးမှာတော့ သူ၏ ထိန်းချုပ်မှုအောက်သို့ ပြန်ရောက်ရှိသွားသည့်အလားပင်။

ရွှီချင်း၏ အသက်ရှူသံက အနည်းငယ် မြန်ဆန်လာသည်။ ထိုနှိုင်းယှဉ်မှုက သူ့ကို အမှန်တကယ် အံ့ဩသွားစေသည်။ တစ်ချိန်တည်းမှာ နားလည်သဘောပေါက်မှုက သူ၏ စိတ်ထဲမှာ ဖြစ်ပေါ်လာသည်။

“ ဒီဟာက ကံကြမ္မာကို ထိန်းချုပ်တဲ့ ခံစားမှုလား ”

ရွှီချင်းက တီးတိုးရေရွတ်လိုက်သည်။

တစ်ချိန်တည်းမှာ ရွှီချင်းက သူ၏ ကံကြမ္မာကို ထိန်းချုပ်နိုင်သွားသည်နှင့်ချက်ချင်း ဝမ်ကူးကုန်းမြေထဲမှ မတူညီသော တည်ရှိမှုအမျိုးမျိုးက ယင်းကို အာရုံခံမိသွားကြသည်။

ဝမ်ကူးကုန်းမြေတွင် တစ်နှစ်ပတ်လုံး မြူခိုးဖုံးလွှမ်းနေသော ဒေသကြီးတစ်ခု ရှိသည်။

ထိုဒေသကြီးထဲမှ ဒြပ်နှောများ၏ သိပ်သည်းမှုသည် ဝမ်ကူးကုန်းမြေထဲမှ တခြားဧရိယာများထက် အများကြီး သာလွန်သည်။

ကြောက်မက်ဖွယ်ကောင်းသော ဟိန်းဟောက်သံများက ထိုဒေသကြီး၏ ကောင်းကင်နှင့် မြေပြင်ကြားမှာ အဆက်မပြတ် ပဲ့တင်ထပ်နေသည်။

အဆုံးမဲ့သော အနက်ရောင်မြူခိုးထု၏ အလယ်ဗဟိုတွင် ဧရာမမြို့တော်တစ်ခု တည်ရှိသည်။ ယင်းက အင်ပါယာနန်းတော်ဖြစ်သည်။

အင်ပါယာနန်းတော်သည် သင်္ချိုင်းမြေကဲ့သို့ တိတ်ဆိတ်ငြိမ်သက်နေသည်။

ယင်းက ဟာလာဟင်းလင်းဖြစ်နေသည်။

နန်းတော်ထဲ၌ ရာဇပလ္လင်ပေါ်မှာ ထိုင်နေသော လူတစ်ယောက်သာလျှင် ရှိသည်။

ထိုလူက ပြိုင်ဘက်ကင်းအောင် ချောမောခန့်ညားပြီး ဧကရာဇ်ဝတ်စုံကို ဝတ်ဆင်ထားသည်။ ယခုအချိန်မှာ သူက မျက်လုံးမှိတ်ထားပြီး သူ၏ လက်တစ်ဖက်ကို နဖူးပေါ်တင်ထားလျက် လှုပ်ရှားမှုကင်းမဲ့နေသည်။ နောက်အခိုက်အတန့်မှာ သူက ရုတ်တရက် မျက်လုံးဖွင့်လိုက်ပြီး ကောင်းကင်ကို မော့ကြည့်လိုက်သည်။ သူက တဖြည်းဖြည်း မျက်မှောင်ကြုတ်သွားသည်။

“ အချုပ်အနှောင်ကနေ လွတ်သွားပြီလား ”

ထိုလူက နူးညံ့စွာ တီးတိုးရေရွတ်လိုက်သည်။ တစ်ခဏကြာပြီးနောက် သူ၏ မျက်ခုံးက ပြန်ပြေလျော့သွားပြီး နူညံ့သော အပြုံးက သူ၏ မျက်နှာပေါ်မှာ ထွက်ပေါ်လာသည်။

“ ညီလေး… အဲ့ဒါက ပိုပြီးတော့ စိတ်ဝင်စားဖို့ကောင်းလာပြီ ”

အပြင်ပိုင်းပင်လယ်ထဲတွင် လှိုင်းလုံးများက နိမ့်ချည်မြင့်ချည် ရွေ့လျားနေကြသည်။ ပင်လယ်အနက်ပိုင်းထဲတွင် အနက်ရောင်မျဉ်းကြောင်းများက ပင်လယ်မျက်နှာပြင်ပေါ်မှ မြှောက်တတ်လာကြသည်။ ယင်းတို့က လေထဲမှာ ယှက်ထွေသွားကြပြီး နောက်ဆုံးမှာတော့ ယုလျှိုချန်း၏ တင်ပျဉ်ခွေထိုင်နေသော ပုံရိပ်ကို ဖွဲ့စည်းသွားကြသည်။

ယခု သူက အစစ်အမှန်နတ်ဘုရားကို ဝါးမျိုနေခြင်း ဖြစ်သည်။

အစက သူသည် ၎င်းကို အပြည့်အဝ မဝါးမျိုနိုင်ခင်အထိ ပြန်မနိုးလာရန် ဆုံးဖြတ်ထားခဲ့သည်။

သို့သော်လည်း ဤအခိုက်အတန့်မှာ ယခင်က တစ်ခါမှ သူမခံစားခဲ့ဖူးသော ထူးဆန်းသည့် စိတ်ခံစားမှုတစ်မျိုးက သူ့အား အတင်းအဓမ္မ ပြန်နိုးလာစေခဲ့သည်။ သူက ပင်လယ်ပြင်ပေါ်မှာ ထွက်ပေါ်လာပြီးနောက် ကောင်းကင်ကို မော့ကြည့်လိုက်သည်။

“ အတိတ်တုန်းက ငါ့ပုံပြင်ထဲက ဇာတ်ကောင်တစ်ခုက အခု ပုံပြင်ထဲမှာ မရှိတော့ဘူး… ”

မိစ္ဆာငှက်မွှေးသူတော်စင်ကုန်းမြေမှ ဒသမအုပ်ချုပ်သူတောင်ပေါ်တွင် လုလင်းဇီအသွင် ရုပ်ဖျက်ထားသော ဧကရီက ရုတ်တရက် မျက်လုံးဖွင့်လိုက်သည်။

သူက တောင်ခြေကို စိုက်ကြည့်လိုက်သည့်အခါ ထူးဆန်းသော အမူအရာက သူ၏ မျက်နှာပေါ်မှာ ထွက်ပေါ်လာသည်။

တစ်နာရီကြာပြီးနောက် အသံတစ်သံက တောင်ခြေမှ ထွက်ပေါ်လာသည်။

“ ရွှယ်ချန်းဇီက အုပ်ချုပ်သူကို မြင်တွေ့ရဖို့ ခွင့်တောင်းပါတယ် ”

ဧကရီက လေးနက်စွာ တွေးတောလိုက်သည်။ ထို့နောက် သူက ဖမ်းဆုပ်သော လက်ဟန်ကို ပြုလုပ်လိုက်သည်။

နောက်အခိုက်အတန့်မှာ ရွှီချင်း၏ ပုံရိပ်က သူ့အရှေ့မှ ခန်းမဆောင်ထဲမှာ တိုက်ရိုက် ထွက်ပေါ်လာသည်။

ရွှီချင်းက ထွက်ပေါ်လာသည်နှင့်ချက်ချင်း အမြန်အရိုအသေပေးလိုက်သည်။ ထို့နောက် သူက စကားပြောရန် ပြင်လိုက်သည်။

သို့သော်လည်း ဧကရီ၏ အသံက အရင်ဦးစွာ ပဲ့တင်ထပ်သွားသည်။

“ လောကဇစ်မြစ်လျှို့ဝှက်နယ်မြေထဲမှာ ငါ့ရဲ့ ကိုယ်ပွားရှိနေခဲ့တုန်းက ဘာမူမမှန်မှုကိုမှ ငါသတိမထားမိခဲ့ဘူး… အစောနက အဲ့ဒီနတ်ဘုရားအခွင့်အာဏာ အသက်ဝင်လာတဲ့အခါမှပဲ အဲ့ဒါကို ငါအာရုံခံမိခဲ့တယ်… ရွှီချင်း… နင်က နောက်ထပ် နတ်ဘုရားအခွင့်အာဏာတစ်ခုကို ပိုင်ဆိုင်သွားပြီ ”

“ အဲ့ဒါရဲ့ နာမည်ကို... ကံကြမ္မာလို့ ခေါ်တယ် ”

ရွှီချင်းက ချက်ချင်း ခေါင်းမော့လိုက်ပြီး ဧကရီကို ကြည့်လိုက်သည်။

ယင်းက သူမေးမြန်းချင်သော ကိစ္စဖြစ်သည်။ ယခု ဧကရီက ယင်းကို အကြည့်တစ်ချက်ဖြင့် ထွင်းဖောက်မြင်နိုင်သွားလေရာ ထိုနတ်ဘုရားအခွင့်အာဏာနှင့်ပတ်သက်ပြီး သူ၏ သိချင်စိတ်က အလွန်ပြင်းပြလာသည်။ ထို့ကြောင့် သူက အသက်ပြင်းပြင်းရှူသွင်းလိုက်ပြီး ရိုသေလေးစားစွာ ပြောသည်။

“ အရှင်မ… ကျွန်တော့်ရဲ့ သံသယတွေကို ရှင်းလင်းပေးပါ ”

ဧကရီ၏ အကြည့်က ရွှီချင်း၏ ဦးခေါင်းပေါ်သို့ ကျရောက်သွားသည်။ အချိန်အတော်ကြာပြီးနောက် သူက ဖြည်းညင်းစွာ ပြောသည်။

“ ကံကြမ္မာဆိုတာ ကံတရားနဲ့ ကံကောင်းခြင်းကို ပေါင်းစည်းထားတဲ့အရာပဲ… အဲ့ဒါက ဒြပ်စင်အမျိုးမျိုးနဲ့ ဖွဲ့စည်းထားတဲ့ လောကထဲက အရာအားလုံးရဲ့ လမ်းကြောင်းကို ကိုယ်စားပြုတယ်… အဲ့ဒါက နတ်ဘုရားလမ်းစဉ်မှာ အထွတ်အမြတ်နတ်ဘုရားအခွင့်အာဏာတွေထဲက တစ်ခုလည်း ဖြစ်တယ် ”

“ ကံတရားနဲ့ ကံကောင်းခြင်းက လုံးဝကွဲပြားခြားနားတဲ့ အယူအဆတွေပဲ ”

“ ကံတရားက ကိန်းသေဖြစ်ပြီး သတ်မှတ်ထားတဲ့ လမ်းကြောင်းတွေကို ရည်ညွှန်းတယ်… ဥပမာပြောရရင် အဲ့ဒါက ကြိုတင်သတ်မှတ်ထားပြီးသား လမ်းကြောင်းတွေနဲ့ ဆင်တူတယ် ”

“ အတိတ်တုန်းက ငါနတ်ဘုရားဖြစ်လာခဲ့တဲ့ တိုက်ပွဲအတွင်းမှာ ကျစ်လွီဆဲ့အိမ်ရှေ့စံမင်းသားက တခြားလူတွေရဲ့ ကံကြမ္မာကို ဘယ်လိုမျိုး ထိန်းချုပ်ခဲ့လဲဆိုတာ နင်မြင်ခဲ့မှာပါ ”

“ တခြားလူတွေရဲ့ ကံကြမ္မာက ကျစ်လွီဆဲ့အိမ်ရှေ့စံမင်းသားရဲ့ လက်ထဲမှာ စာအုပ်တစ်အုပ် ဖြစ်လာတယ် ”

“ ကံကြမ္မာကနေတဆင့် သူက တခြားလူတွေရဲ့ အတိတ်ကို မြင်နိုင်ပြီး အနာဂတ်ကို နိမိတ်ဖတ်နိုင်တယ် ”

“ သူက မရေမတွက်နိုင်တဲ့ အနာဂတ်တွေကို နိမိတ်ဖတ်နိုင်တယ်… ဒါပေမဲ့ အဲ့ဒါတွေအားလုံးက အစကတည်းက တည်ရှိနေပြီးသားအရာတွေ ဖြစ်တယ်… အနာဂတ်ဆိုတာ အဆုံးမဲ့တဲ့ ဖြစ်နိုင်ခြေတွေနဲ့ ပြည့်နှက်နေတယ် ”

“ အတိတ်မှာ သူလုပ်ဆောင်ခဲ့တာက သူ့ရန်သူရဲ့ ဆိုးဝါးတဲ့ အနာဂတ်တစ်ခုကို ဆွဲထုတ်လိုက်ပြီး အဲ့ဒါကို တခြားဖြစ်နိုင်ခြေတွေဆီမှာ အစားထိုးပစ်လိုက်တာပဲ… အဲ့ဒီနည်းနဲ့ သူက တခြားလူတွေရဲ့ ကံကြမ္မာကို ပြောင်းလဲပစ်နိုင်တယ် ”

ယင်းကို ရွှီချင်းကြားသောအခါ သူက အများစုကို ချက်ချင်း နားလည်သဘောပေါက်သွားသည်။ ဤသည်မှာ သူက ဉာဏ်အလင်းပွင့်သွားသည့်အလားပင်။ တစ်ချိန်တည်းမှာ သူ၏ စိတ်ထဲ၌ ကြီးမားသော လှိုင်းအတတ်အကျများ ထွက်ပေါ်လာကြသည်။

အတိတ်တွင် ကျစ်လွီဆဲ့အိမ်ရှေ့စံမင်းသား၏ တိုက်ခိုက်ပုံများက သူ၏ စိတ်ထဲမှာ ပြန်ထွက်ပေါ်လာသည်။ ထိုသို့နတ်ဘုရားအခွင့်အာဏာသည် အလွန်အမင်း အစွမ်းထက်သည်။

“ အဲ့ဒါကြောင့် ကျစ်လွီဆဲ့အိမ်ရှေ့စံမင်းသားက ဒီနတ်ဘုရားအခွင့်အာဏာကို အသုံးပြုပြီးတော့ သူ့ရန်သူရဲ့ မရေမတွက်နိုင်တဲ့ အနာဂတ်တွေကို နိမိတ်ဖတ်နိုင်တာပေါ့… အဲ့ဒါတွေအားလုံးက တကယ်တည်ရှိကြပြီး ကိန်းသေတွေ ဖြစ်တယ် ”

“ အဲ့ဒါက ကံကြမ္မာနတ်ဘုရားအခွင့်အာဏာထဲက ကံတရားကဏ္ဍလည်း ဟုတ်တယ် ”

ရွှီချင်းက တီးတိုးရေရွတ်လိုက်သည်။

ဧကရီက ခေါင်းညိတ်လိုက်ပြီး ဆက်လက် ပြောသည်။

“ ကံကောင်းခြင်းကတော့ အမျိုးမျိုးရှိပြီး ကိန်းသေမဟုတ်တဲ့ လမ်းကြောင်းတွေကို ရည်ညွှန်းတယ်… ပိုပြီးအတိအကျပြောရရင် အဲ့ဒါက အသစ်ထွက်ပေါ်လာနိုင်တဲ့ လမ်းကြောင်းတွေကို ဆိုလိုတာပဲ ”

“ ကံကောင်းခြင်းနဲ့ ကံကြမ္မာဆိုးရဲ့ ပေါင်းစပ်မှုကနေ ဖြစ်ပေါ်လာတဲ့ အနာဂတ်လမ်းကြောင်းက အစကတည်းက တည်ရှိနေပြီးသား မဟုတ်တဲ့ လမ်းကြောင်းအသစ်တစ်ခုပဲ ”

“ အဲ့ဒါက ကိန်းရှင်ပဲ ”

“ နင့်ရဲ့ နတ်ဘုရားအခွင့်အာဏာက ကံကြမ္မာရဲ့ ကံကောင်းခြင်းကဏ္ဍပဲ… အဲ့ဒါက ဖြစ်နိုင်ခြေအမျိုးမျိုးကို ပေးတယ် ”

ရွှီချင်းက အသက်ပြင်းပြင်းရှူသွင်းလိုက်သည်။ ဤအခိုက်အတန့်မှာ သူ၏ အတွေးများက လုံးဝရှင်းလင်းသွားသည်။

“ အရှင်မဆိုလိုချင်တာက ငါ့ရဲ့ ကံကြမ္မာနတ်ဘုရားအခွင့်အာဏာက ကံကောင်းခြင်းနဲ့ ကံကြမ္မာဆိုးကို လက်တစ်စုံအဖြစ် အသုံးပြုပြီး တစ်စုံတစ်ယောက်ရဲ့ ကံကြမ္မာကို ပြောင်းလဲပစ်နိုင်တယ်လို့ ပြောချင်တာလား… အဲ့ဒါက ကြိုတင်သတ်မှတ်ထားပြီးသား မဟုတ်တဲ့ ကံကြမ္မာအသစ်တစ်ခုကို မွေးဖွားစေနိုင်တယ် ”

ဧကရီက ခေါင်းညိတ်လိုက်သည်။

“ နင်နားလည်ထားတာ မှန်တယ် ”

“ နင်နဲ့ ကျစ်လွီဆဲ့အိမ်ရှေ့စံမင်းသားရဲ့ ကံကြမ္မာနတ်ဘုရားအခွင့်အာဏာက ဇစ်မြစ်တစ်ခုတည်းကနေ ဆင်းသက်လာတာဆိုပေမဲ့ ဦးတည်ရာကတော့ ကွဲပြားခြားနားတယ်… ဒါပေမဲ့ အဲ့ဒါကို စကားတစ်ခွန်းတည်းနဲ့ ဖော်ပြနိုင်တယ် ”

“ ဘယ်အရာမဆို ဖြစ်နိုင်တယ် ”

“ ကိန်းသေအတွက်တော့… မရေမတွက်နိုင်အောင် ကြိုတင်တည်ရှိနေပြီးသားဖြစ်တဲ့ လမ်းကြောင်းတွေက တကယ့်လက်တွေ့ ဖြစ်လာနိုင်တယ် ”

“ ကိန်းရှင်အတွက်ကျတော့… လမ်းကြောင်းအသစ်ကို ဖန်တီးပြီး မူလနေရာမှာ အစားထိုးပစ်နိုင်တယ် ”

ရွှီချင်းက မျက်လုံးမှိတ်လိုက်ပြီး သေချာစဉ်းစားလိုက်သည်။ သူက ဧကရီ၏ စကားကို အပြည့်အဝ ဆင်ခြင်နားလည်ပြီးနောက် မျက်လုံးပြန်ဖွင့်လိုက်သည်။

သူက စကားပြောလိုက်သည်နှင့် သူ၏ မျက်လုံးက ဝင်းလက်သွားသည်။

“ အဲ့ဒါကြောင့် ကျစ်လွီဆဲ့အိမ်ရှေ့စံမင်းသားရဲ့ ကံကြမ္မာနတ်ဘုရားအခွင့်အာဏာက စာအုပ်တစ်အုပ်နဲ့ ဆင်တူတာပဲ… ဘာကြောင့်လဲဆိုတော့ ကံကြမ္မာက ရေးထားပြီးသားဖြစ်လို့ပဲ… ကျစ်လွီဆဲ့အိမ်ရှေ့စံမင်းသားက စာအုပ်ကို လှန်လှောပြီး အသင့်တော်ဆုံး စာမျက်နှာကို ရှာဖွေလိမ့်မယ် ”

“ ငါ့ရဲ့ ကံကြမ္မာနတ်ဘုရားအခွင့်အာဏာက ဘာဖြစ်လို့ ဓားမြှောင်ဖြစ်တာလဲဆိုတော့ အဲ့ဒါက စာဖတ်ဖို့မဟုတ်ဘဲ မရှိသေးတဲ့ လမ်းကြောင်းအသစ်ကို စာအုပ်ပေါ်မှာ ရေးသားပြီး စာမျက်နှာအသစ်တစ်ခုကို ဖန်တီးဖို့ပဲ… ”