နတ်ဆိုးဘုရင်အား ကြိုဆိုခြင်း
Vol. 2 Ch. 28
လောဖုန်း ဖြစ်ပျက်နေသည့် မျက်နှာအမူအရာကိုကြည့်ကာ အဘိုးအို ပိုပို၍ ဝမ်းသာအားရ ဖြစ်သွားသည်။
" လူငယ်လေး ..ငါတို့လို အဘိုးကြီးတွေက ဘာမှမဆိုင်တဲ့သူတွေကို အချည်းနှီး သတ်ပစ်ချင်တာ မဟုတ်ဘူးကွ ။ ရှန်းဝူနန်းတော်ကို စော်ကားခဲ့တဲ့ တကယ့်တရားခံက လောထျန်းဆိုတဲ့ မျိုးမစစ်လေးဆိုတာလဲ ငါတို့က သိထားပြီးသား "
" ဒီတော့ မင်းတို့သာ လောထျန်းရဲ့ခေါင်းနဲ့ မင်းတို့ရဲ့ ပိုင်ဆိုင်မှုတွေအားလုံး ငါတို့သုံးယောက်ကို ပေးမယ်ဆိုရင် မင်းတို့ လောမိသားစုက ကျန်တဲ့သူတွေကို သွားခွင့်ပေးမယ် "
အဘိုးကြီးက ထိုသို့ပြောပြီးသည်နှင့် နောက်လှည့်လိုက်သည်။
ချက်ချင်းပင် တင်းချန်နှင့် ဆံနီဝိဥာဥ် ထံမှလည်း အစွမ်းထက်သော ကိုယ်အရောင်ဝါတစ်ခု ထွက်လာသည့်အတွက် လောမိသားစုဝင်များ နောက်ဆုတ်လိုက်ကြရသည်။
" အခု မင်းတို့ကို စဥ်းစားဖို့အချိန် ၁၅ မိနစ်ပေးမယ် ။ သေမလား အသက်ဆက်ရှင်မယ့်လမ်းကို ရွေးမလားဆိုတာကတော့ မင်းတို့သဘောပေါ့ကွာ "
အဘိုးအိုက လှောင်ပြုံးဖြင့် ပြောလိုက်သည်။
သူ့စိတ်ထဲ၌မူ လောမိသားစုက အသက်ရှင်မည့် လမ်းကိုသာ ရွေးချယ်ကြလိမ့်မည်ဟု ထင်နေ၏ ။
လောထျန်းတစ်ယောက်တည်းကို စတေးလိုက်ရုံဖြင့် သူတို့အားလုံး အသက်ဆက်ရှင်နိုင်ကြလိမ့်မည် မဟုတ်ပါလား ။
သို့သော် ....
" အဘိုးကြီး .. ကျုပ်တို့လောမိသားစုကို ဘယ်လိုလူတွေလို့ ခင်ဗျား ထင်နေတာလဲ ။ လောထျန်းဆိုတာ ကျုပ်တို့ လောမိသားစုရဲ့ သခင်လေးပဲ ။ ဒီလိုမဟုတ်ဘဲ သူက အသက်ရှစ်ဆယ်အရွယ် အဘွားကြီးတစ်ယောက် ဒါမှမဟုတ် ၊ တံခါးစောင့်တစ်ယောက်ပဲ ဖြစ်နေရင်တောင် ကျုပ်တို့က ဘယ် လောမိသားစုဝင်ရဲ့ အသက်ကိုမှ စတေးမှာ မဟုတ်ဘူး "
အကြီးအကဲက ဒေါသတကြီး ပြောလိုက်သည်။
" အမှန်ပဲ ။ လောမိသားစုဆိုတာ သံမဏိလို ခိုင်မာတဲ့ မိသားစုတစ်ခုပဲ ။ မိသားစုရဲ့ သစ္စာဖောက်တွေကပဲ အသက်ဆုံးရမှာ "
" အဘိုးကြီး ခင်များအကြံကို လက်လျှော့လိုက်စမ်းပါ ။ ကျုပ်တို့ ဘယ်တော့မှ လက်နက်ချ အညံ့ခံမှာမဟုတ်ဘူး "
" မျိုးမစစ်တဲ့ အဘိုးကြီး .. #$? &# "
လောမိသားစုက မျိုးစုံသော စကားလုံးများဖြင့် အဘိုးကြီးကို ဆဲဆိုနေကြသည်မှာ အချိန်ပင် အတန်ငယ်ကြာသွားသည်။
အဘိုးကြီးမှာ ထိုအခြင်းအရာကိုကြည့်ကာ အံ့သြမှင်သက်နေ၏။
ယခုကဲ့သို့ အခြေအနေမျိုးဖြင့် သူ လုံးဝ မကြုံခဲ့ဖူးပါချေ။
လောမိသားစုအား သူ နားမလည်နိုင် ဖြစ်သွားရသည်။
မိမိတို့၏ အသက်ကို ရွေးချယ်ရန် အခြေအနေ ရှိနေပါလျက် ထိုသူများက အဘယ့်ကြောင့် အသက်ချမ်းသာပေးရန် မတောင်းဆိုဘဲ ဆဲရေးတိုင်းထွာနေရသနည်း ။
ထို့အပြင် ဆဲရေးနေသည့် စကားလုံးများကလည်း စုံလင်လှ၏။
စစ်စစ်ပေါက်ပေါက် ဆဲရေးနိုင်ကြသည့် ထိုလောမိသားစုကို သူအံ့ဩမိပါသည်။
လောမိသားစုသည် ဦးနှောက်မပါသည့် ညီအကိုများဟုပင် ပြော၍ ရပေသည်။
" ဟေ့ အဘိုးကြီး ... ခင်ဗျားပြောခဲ့တဲ့ ခင်ဗျားပဲ ကြည့်စီစဥ်မယ် ဆိုတာ ဒါလား ။ ကျုပ် သဘောအရတော့ ဒီကောင်တွေကို ချက်ချင်းပဲ သတ်ပစ်လိုက်ချင်တယ်။ ကျုပ်တို့ တစ်ခုခုလိုရင်တောင် ဒီလူတွေ သေသွားမှ ကျုပ်တို့ဘာသာ ဝင်ရှာလို့ ရတာပဲ "
တင်းချန်က အဘိုးအိုအား မျက်လုံးပင့်ကြည့်ကာ ပြောလိုက်သည်။
အဘိုးအိုမှာလည်း မျက်နှာအလွန်ပျက်နေပြီး အေးစက်စက်ပြောလိုက်၏ ။
" ကောင်းပြီလေ ၊ မင်းပြောတဲ့အတိုင်း လုပ်ကြတာပေါ့ "
ဘုန်း
သူက စကားဆုံးသည်နှင့် အေးစက်စက်မျက်နှာဖြင့် ရှေ့သို့ ခြေတစ်လှမ်းတိုးလိုက်သည်။
" လောမိသားစု .. မင်းတို့က သေချင်နေမှတော့လဲ ငါက မင်းတို့ရဲ့ ဆန္ဒကို ဖြည့်ဆည်းပေးရမှာပေါ့ ။ ပုရွက်ဆိတ်လောက်ပဲ အဆင့်ရှိတဲ့ မင်းတို့လို ကောင်တွေကများ ရှန်းဝူနန်းတော်ကို စော်ကားရဲနေသေးတယ် ။ မင်းတို့ကောင်တွေက တော်တော်လေး တုံးအကြတာပဲ "
သူတို့ရှေ့တွင် ရှိနေကြသည့် ကျင့်ကြံသူ သုံးယောက်၏ အစွမ်းထက်သော ကိုယ်အရောင်ဝါကိုကြည့်ကာ ပထမအကြီးအကဲ ၏ မျက်နှာ ဖြူရော်သွားသည်။
" လောဖုန်း .. မိသားစုထဲက လူငယ်လေးတွေအားလုံး ထွက်သွားကြပြီလား "
သူက လေသံတိုးတိုးဖြင့် မေးလိုက်သည်။
" သူတို့အားလုံးကို ဆဋ္ဌမအကြီးအကဲ ဦးဆောင်ပြီး လှို့ဝှက်လမ်းကနေ ခေါ်ထုတ်သွားပြီ။ သူတို့အပြင်ရောက်သွားပြီဆိုရင် ကျုပ်တို့ လောမိသားအတွက် မျှော်လင့်ချက် ရှိပါသေးတယ်။ ပြီးတော့ ထျန်းလေးလဲ ရှိသေးတယ်လေ "
" ဟုတ်တယ် .. လောထျန်းလဲ ရှိသေးတာပဲ "
အကြီးအကဲများမှာ သေမင်းနှင့် ရင်ဆိုင်ရန် အသင့်ဖြစ်နေကြ၏ ။
ဘုန်း ...
ကောင်းကင်ဘုံ ကိုးထပ်အပေါ်မှ တိမ်တိုက်မဲကြီးများက ပျောင်ပိုင်မြို့ပေါ်သို့ ဖိနှိပ်လာပြီး မြို့တစ်ခုလုံးကို ဖျက်ဆီးပစ်တော့မည့်အသွင် ရှိနေသည်။ လေထဲတွင် ကျယ်လောင်သော မိုးကြိုးသံများလည်း ထွက်ပေါ်လာ၏ ။
" အိုး .. သနားစရာ ပါလားကွာ ။ ကြည့်ရတာ နတ်မင်းကြီးက မင်းတို့အားလုံးကို သေခိုင်းနေပြီနဲ့တူတယ်။ မင်းတို့ထဲက ကောင်းကင်ဘုံကို ဆန့်ကျင်နိုင်တဲ့သူက အသက်ဆက်ရှင်နိုင်လိမ့်မယ် ၊ စစ်နတ်ဘုရားကို ဆန့်ကျင်တဲ့သူကတော့ သေပေါ့ကွာ "
အဘိုးအိုက စကားဆုံးသည်နှင့် သူ့လက်ထဲမှ တောင်ဝှေးကို ကိုင်မြှောက်လိုက်သည်။
ဝှီ
တောင်ဝှေးအပေါ်တွင် ကြောက်မက်ဖွယ် စွမ်းအင်တစ်ခု စုစည်းလာပြီး အချိန်မရွေး တိုက်ခိုက်တော့မည့်အလား ဖြစ်နေသည်။
သို့သော် ......
ထိုအချိန်တွင် လောရုံက အပေါ်သို့ မော့ကြည့်လိုက်ရာ မြင်လိုက်ရသည့်မြင်ကွင်းကြောင့် အံ့သြတကြီး ဖြစ်သွားပြီး ပြောလိုက်သည်။
" ကြည့်ပါဦး .. အဲ့ဒါ ဘာကြီးလဲ "
" ဟင် "
အားလုံးလည်း မော့ကြည့်လိုက်ကြသည်။
ထိုအချိန်တွင် အားလုံး၏ ခေါင်းပေါ်မှ အမဲရောင် တိမ်တိုက်များက နှစ်ခြမ်းကွဲသွားပြီး ထိုတိမ်တိုက်မဲများကြားမှ လူရိပ်တစ်ခု ဖြည်းညင်းစွာ ဆင်းသက်လာသည်။
ထိုလူရိပ် ပျံသန်းလာသည့် နေရာရှိ တိမ်တိုက်များနှင့် မြူမှုန်များက ရုတ်ချည်း လွင့်ပါးပျောက်ကွယ်သွား၏။
ထိုလူရိပ်က သူတို့နှင့် ပေပေါင်းရာချီ ဝေးကွာနေသေးသည့်တိုင် ဖိနှိပ်စွမ်းအင်တစ်ခုကို အားလုံး ရင်ထဲမှ ခံစားမိလိုက်ကြသည်။
ပျောင်ပိုင်မြို့မြောက်ပိုင်း လမ်းမတစ်ခုပေါ်ရှိ လောမိသားစု ပိုင်ဆိုင်သော ဆိုင်တစ်ခုရှေ့တွင် ရှိနေသည့် လီမိသားစုခေါင်းဆောင် ၊ လီချန်စစ် ကလည်း ခေါင်းမော့ကြည့်လိုက်ရာ ထိုလူရိပ်ကို တွေ့သွားသည်။ သူ့လည်ချောင်း ရုတ်တရက်ခြောက်သွားပြီး တစ်ကိုယ်လုံး တုန်ယင်သွား၏။
" ဒါ .. ကောင်းကင်ထိနိးချုပ်အဆင့်က နောက်ထပ် ကျင့်ကြံသူတစ်ယောက်လား ။ ကြောက်စရာ ကောင်းလိုက်တဲ့ ကိုယ်အရောင်ဝါပဲကွာ "
" မဟုတ်ဘူး သခင်ကြီးရဲ့ ၊ ကောင်းကင်ထိန်းချုပ်အဆင့်ရဲ့ ကိုယ်အရောင်ဝါက ဒီလောက်အစွမ်းမထက်ဘူး ။ ဒီလူက .. ထုံရွှယ်အဆင့်မှာပဲ ဖြစ်ရမယ် "
" ထုံရွှယ်အဆင့် .. ဟုတ်လား .. ကြည့်ရတာ လောမိသားစုက တကယ့်ကြောက်စရာလူကိုမှ သွားရန်စမိတယ်နဲ့တူတယ်။ ဒီတစ်ခါတော့ လောမိသားစု သေရတော့မှာပေါ့ကွာ "
လီချန်စစ်မှာ အစောကထက် ပို၍ ဝမ်းသာပျော်ရွှင်သွားသည်။
တစ်ဖက်ရှိ လောမိသားစု အိမ်တော်တွင်မူ ...
လောဖုန်းနှင့် အခြားသူများက လူရိပ်ကိုကြည့်ကာ ကြောက်ရွံ့တုန်လှုပ်သွားကြသည်။
ကောင်းကင်ထိန်းချုပ်အဆင့် ကျင့်ကြံသူ သုံးယောက်နှင့် ရင်ဆိုင်နေရစဥ်တွင်ပင် သူတို့အတွက် မျှော်လင့်အနည်းငယ် ရှိသေးသည်ဟု ယူဆထားခဲ့ကြသော်လည်း ယခုတွင်မူ ထိုကောင်းကင်ထိန်းချုပ်အဆင့်က ဘာမှ မဟုတ်တော့ချေ။
ထိုလူရိပ်ကို သူတို့ မည်သို့ တိုက်ခိုက်ရပါမည်နည်း ။
တစ်ဖက်မှ ကျင့်ကြံသူ သုံးယောက်မှာလည်း လေထဲမှ လူရိပ်ကို ကြည့်ကာ ထိတ်လန့်တုန်လှုပ်သွားကြသည်။
" တော်တော်ကြောက်စရာကောင်းတဲ့ ကိုယ်အရောင်အဝါပဲ .. ဒီလူက သာမာန် ထုံရွှယ်အဆင့်တော့ မဟုတ်နိုင်ဘူး "
အဘိုးအိုက ပြောကာ သက်ပြင်းချလိုက်သည်။
" ဟုတ်တယ် ၊ ကျုပ် တွေ့ခဲ့ဖူးတဲ့ ထုံရွှယ်အဆင့် သခင်ကြီးအများစုကတောင် ဒီလိုအစွမ်းထက်တဲ့ ကိုယ်အရောင်ဝါ မရှိကြဘူး ။ ဒီလူက ရှန်းဝူနန်းတော်ကလား နတ်ဆိုးဝိဥာဥ်နန်းတော်ကလား "
တင်းချန်က မေးလိုက်သည်။
" နတ်ဆိုးဝိဥာဥ်နန်းတော်က မဟုတ်ဘူး "
ဆံနီဝိဥာဥ်က လေးနက်သည့်အမူအရာဖြင့် ပြန်ဖြေသည်။
" ဒီလူက ရှန်းဝူနန်းတော်ကလဲ မဟုတ်ဘူး။ ရှန်းဝူနန်းတော်နဲ့ ပတ်သက်နေတဲ့ ထုံရွှယ်အဆင့် ကျင့်ကြံသူတွေအားလုံးကို ကျုပ် သိတယ်။ ဟင် .. ခန .. အဲ့လူကို ထပ်ကြည့်စမ်းပါဦး။ ဒါ လူမဟုတ်ဘူး သားရဲတစ်ကောင်ပဲကွ "
အဘိုးအိုက လေထဲမှ အရိပ်ကိုစိုက်ကြည့်နေရင်း ရုတ်တရက် ထပြောလိုက်သည်။
အခြားသူများလည်း အရိပ်ကို စိုက်ကြည့်လိုက်ကြပြီး အဘိုးအိုပြောသောစကားက အမှန်ဆိုသည်ကို သတိထားမိသွားကြသည်။
လေထဲမှ လူရိပ်မှာ အရပ် ၁၀ ပေကျော် ရှည်လျားပြီး လူခန္ဓာကိုယ် ၊ နွားခေါင်းနှင့် အလွန်အစွမ်းထက်ဟန် ရှိနေသည် ။ သူ့လက်ထဲတွင်လည်း တင်းပုတ်တစ်ခုကို ကိုင်ဆောင်ထားသေး၏။
" ဒီအရောင်ဝါက .. ကျုပ် မှတ်မိပြီ ။ ဒီကောင်က ထျန်းတန့်တောင်က နတ်ဆိုးဘုရင်ပဲ "
တင်းချန် အံ့သြတကြီး ရေရွတ်လိုက်သည်။
" ထျန်းတန့်တောင် .. ဟုတ်သားပဲကွ ၊ ဒီကောင်က ထျန်းတန့်တောင်က ငါးရောင်ခြယ်နတ်နွားပဲ ။ ဒီကောင်က ဘာဖြစ်လို့ ဒီကို ရောက်နေတာလဲ "
အဘိုးအိုက အံ့အားသင့်စွာ မေးလိုက်သည်။
ထျန်းတန့်တောင်မှ ငါးရောင်ခြယ် နတ်နွားကြီးသည် အလွန်တရာ အစွမ်းထက်ပြီး လူသားများကို စက်ဆုပ်ရွံရှာတတ်သူ တစ်ယောက် ဖြစ်သည်။
ယဲ့ဖုန်းနိုင်ငံတွင် ထိုသားရဲအား ပစ်မှတ်ထားသည့် ထုံရွှယ်အဆင့် အစွမ်းထက်ကျင့်ကြံသူ များစွာ ရှိခဲ့သော်လည်း နောက်ဆုံးတွင် ထိုလူများက အသက်ဆုံးသူဆုံး ၊ ဒဏ်ရာရသူရ ဖြစ်သွားကြသည်ချည်းပင် ။
ထို့ကြောင့်လည်း ယဲ့ဖုန်းနိုင်ငံတွင် ထျန်းတန့်တောင် အလယ်ပိုင်းဒေသမှာ လူများအတွက် တားမြစ်ထားသည့် ဒေသတစ်ခုဟုပင် ဆို၍ရသည်။
ယခု ငါးရောင်ခြယ်နတ်နွားကြီးကမူ ထိုတားမြစ်ဒေသ၏ ဘုရင်ကြီးတစ်ပါးဖြစ်သည်။
ထိုမျှ အစွမ်းထက်သူတစ်ယောက်က ပျောင်ပိုင်မြို့သို့ မည်သည့်အတွက်ကြောင့် ရုတ်တရက် ရောက်လာရသနည်း။
" သူက ဘာလို့ ဒီကို ရောက်နေတာလဲ ။အကို ထျန် ၊ ခင်ဗျားတို့ နတ်ဆိုးဝိဥာဥ်နန်းတော်နဲ့ ထျန်းတန့်တောင်ကြားမှာ အဆက်အစပ် တစ်ခုခုများ ရှိနေလို့လား "
တင်းချန်က မေးလိုက်သည်။
ဆံနီဝိဥာဥ် ထျန်ကျင်း ခေါင်းယမ်းပြလိုက်၏ ။
" အမုန်းကလွဲပြီး ဘယ်လို ပတ်သက်မှုမျိုးမှ မရှိဘူး ။ ကျုပ်တို့ဆီက ထုံရွှယ်အဆင့် လူသတ်သမားနှစ်ယောက်က ထျန်းတန့်တောင်မှာ သေသွားခဲ့ရတာ "
တင်းချန် မျက်မှောင်ကြုတ်သွားကာ အဘိုးအိုကို ကြည့်၍ ထပ်မေးလိုက်သည်။
" ရှန်းဝူ နန်းတော်ကရော "
အဘိုးအိုက မုတ်ဆိတ်ကိုသပ်ကာ ပြန်ဖြေသည်။
" ကျုပ် မသိဘူးကွ ။ ဒါပေမယ့် ဘုရင် ရှန်းဝူက ယဲ့ဖုန်းနိုင်ငံထဲမှာ ရှိတဲ့ အစွမ်းထက်သားရဲတွေနဲ့ မိတ်ဆွေဖွဲ့ဖို့ ကြိုးစားနေတယ်လို့တော့ ကြားထားတယ် "
ထိုစကားကို ကြားသောအခါ တင်းချန်၏ ကြုံ့ထားသော မျက်ခုံးများ ပြေလျော့သွားပြီး အပြုံးဖြင့် ပြောလိုက်သည်။
" ဒါဆို မမှားနိုင်တော့ဘူး ။ ဘုရင် ရှန်းဝူက နတ်ဆိုးဘုရင်ကို နားချပြီး ကျုပ်တို့ကို လာကူညီဖို့ လွှတ်လိုက်တာပဲ ဖြစ်ရမယ် "
အဘိုးအိုက သူ့စကားကို သိပ်ယုံဟန် မတူချေ။
" ဟုတ်ပါ့မလားကွာ "
တင်းချန်က ပြုံးကာ ပြောလိုက်၏။
" တခြား ဘာများ ဖြစ်နိုင်လို့လဲဗျာ ။ ဒီနတ်ဆိုးဘုရင်က လောမိသားစုကို ကူညီဖို့ လာခဲ့တယ်ထင်လို့လား "
ထိုစကားကို ကြားသောအခါ အဘိုးအိုက ကျယ်လောင်စွာ အော်ရယ်လိုက်သည်။
ထျန်းတန့်တောင်၏ နတ်ဆိုးဘုရင်က လောမိသားစုသို့ လာမည်တဲ့လား .. ။
ထိုစကားမှာ လုံးဝပင် အဆက်အစပ် ရှိမနေသဖြင့် သူ ရယ်မောလိုက်ခြင်းဖြစ်သည်။
နတ်ဆိုးဘုရင်က ဘုရင် ရှန်းဝူ စိတ်ကျေနပ်စေရန် ပျောင်ပိုင်မြို့သို့ လာခဲ့ခြင်းပင် ဖြစ်ရပေမည်။
ဘုရင်ရှန်းဝူ မှလွဲ၍ ယဲ့ဖုန်းနိုင်ငံမှ အခြားမည်သူက သူလာလည်ရန် ထိုက်တန်ပါမည်နည်း။
ထိုအကြောင်းကို တွေးမိသွားသော အဘိုးကြီး၏ မျက်နှာတွင် အပြုံးများ ထပ်ပေါ်လာပြန်သည်။
" နတ်ဆိုးဘုရင်ကြီးကို ကြိုဆိုပါတယ်ဗျာ "
အဘိုးအိုက ဦးညွှတ်အရိုအသေပေးကာ ပြောလိုက်သည်။
စာစဉ်ပြီး၏