ထူးဆန်းသော အင်မော်တယ်အတတ်ပညာ

အနက်ရောင်ရေကန်ပေါ်တွင် ဝတ်ရုံဖြူဝတ်ဆင်ထားကြသော အင်မော်တယ်သခင်များက မလှုပ်မယှက် တရားထိုင်နေကြသည်။ သူတို့က ရွှီချင်း၏ ရောက်ရှိလာမှုနှင့် သူ့စကားများကို မကြားချင်ဟန် ဆောင်ထားကြသည်။

အဖြူရောင်အင်မော်တယ်အတတ်ပညာခန်းမသည် လုံးဝတိတ်ဆိတ်နေပြီး မည်သည့်တုံ့ပြန်မှုမှ မပြချေ။

ရွှီချင်းသည် အုပ်ချုပ်သူ၏ တုံကင်ကို ကိုင်ထားလျက် လေထဲမှာ မတ်တတ်ရပ်နေသည်။ သူက စက္ကန့်သုံးဆယ်ကြာအောင် စောင့်ဆိုင်းပြီးနောက် နောက်တစ်ကြိမ် ထပ်ပြောသည်။

“ အုပ်ချုပ်သူက မဟာဧကရာဇ်မိစ္ဆာငှက်မွှေးရဲ့ ဆင့်ခေါ်မခံရခင် အင်မော်တယ်အတတ်ပညာခန်းမဆီ သူကိုယ်တိုင် မလာနိုင်တော့တဲ့အတွက် ဝမ်းနည်းကြောင်း ငါ့ကို ပြောခဲ့တယ်… ဒါကြောင့် သူက ငါ့ကို အင်မော်တယ်အတတ်ပညာခန်းမဆီ စေလွှတ်လိုက်ပြီး ဒီက အင်မော်တယ်အတတ်ပညာကို လေ့လာစေတယ်… နောက်ကျရင် သူက ငါ့ရဲ့ မှတ်ဉာဏ်တွေကနေတဆင့် အဲ့ဒါကို လေ့လာလိမ့်မယ် ”

“ တကယ်လို့ အင်မော်တယ်အတတ်ပညာခန်းမက အဲ့ဒါကို မငှားချင်ဘူးဆိုရင်တော့ အုပ်ချုပ်သူကို ငါပြန်ပြောရလိမ့်မယ်… အဲ့ဒီအချိန်ကျရင် အုပ်ချုပ်သူကိုယ်တိုင် ဒီနေရာကို ရောက်လာလိမ့်မယ် ”

ရွှီချင်း၏ အသံက လေးနက်သည်။ သူက စကားဆုံးအောင်ပြောပြီးနောက် သူ့အရှေ့မှ အဖြူရောင်အင်မော်တယ်အတတ်ပညာခန်းမကို ကြည့်လိုက်သည်။

ဤနေရာက လက်လွတ်စပယ် ဝင်ရောက်နိုင်သော နေရာမဟုတ်ကြောင်း သူသိသည်။ အကယ်၍ လုလင်းဇီ၏ နာမည်က အလုပ်မဖြစ်လျှင် သူက တခြားနည်းလမ်းများကို စဉ်းစားရလိမ့်မည်။

မည်သို့ဖြစ်ပါစေ သူက ဤတစ်ကြိမ်တွင် ကျားသားရေကို ငှားခြုံထားခြင်းသာ ဖြစ်သည်။

လုလင်းဇီ၏ သဘောထားကို အမှတ်ခုနစ် အုပ်ချုပ်သူတောင်ပေါ်မှာ ရှင်းလင်းစွာ ဖော်ပြခဲ့ပြီးပြီ ဖြစ်သည်။ သူက အခြေအနေကို လက်ဦးမှုရယူနိုင်ခဲ့ပြီး နောက်ဆုံးမှာတော့ မဟာဧကရာဇ်၏ ဆင့်ခေါ်ခြင်းခံခဲ့ရသည်။

ဤအဖြစ်အပျက်နှင့်ပတ်သက်ပြီး အနောက်ပိုင်းမိစ္ဆာငှက်မွှေးမှ ပညာရှင်ကျင့်ကြံသူများသည် အသစ်ထွက်ပေါ်လာသော ဤအုပ်ချုပ်သူကို ကောင်းမွန်စွာ နားလည်သဘောပေါက်သွားကြသည်။

အချိန်တစ်ခဏကြာပြီးနောက် အင်မော်တယ်အတတ်ပညာခန်းမ၏ ဂိတ်တံခါးက ဖြည်းညင်းစွာ ပွင့်သွားသည်။ တစ်ချိန်တည်းမှာ အဖြူရောင်ဝတ်စုံကို ဝတ်ဆင်ထားသော အမျိုးသားတစ်ယောက်နှင့် အမျိုးသမီးတစ်ယောက်က ဂိတ်တံခါးထဲမှ ထွက်လျှောက်လာကြသည်။

အနောက်မှ အမျိုးသမီးက ကြော့ရှင်းတင့်တယ်ပြီး ချောမောလှပသည်။ သူ့အရှေ့မှ အမျိုးသားသည်တော့ တည်ကြည်ဖြောင့်မတ်ပြီး ခန့်ညားသည်။

သူတို့နှစ်ယောက် ထွက်ပေါ်လာသည့်အခိုက် ဆင်ခြင်နားလည်နေကြသော အင်မော်တယ်သခင်အားလုံးက မျက်လုံးပြန်ဖွင့်လိုက်ကြသည်။ သူတို့က ခေါင်းငုံ့လိုက်ကြပြီး ရိုသေလေးစားမှုကို ဖော်ပြလိုက်ကြသည်။

ရွှီချင်းသည်လည်း သူတို့ကို လှမ်းကြည့်လိုက်သည်။

သူ၏ အကြည့်အောက်မှာ အင်မော်တယ်အတတ်ပညာခန်းမထဲမှ ထွက်လျှောက်လာသော လူငယ်က ခေါင်းမော့လိုက်ပြီး ရွှီချင်းကို ကြည့်လိုက်သည်။ သူက တည်ငြိမ်စွာ ပြောသည်။

“ အင်မော်တယ်အတတ်ပညာတွေကို အင်မော်တယ်သခင်ပဲ ဆင်ခြင်နားလည်နိုင်တယ်… ဒါပေမဲ့ မင်းက အုပ်ချုပ်သူရဲ့ အမိန့်ကြောင့် ရောက်လာတယ်ဆိုမှတော့ ငါ့ရဲ့ အနောက်ပိုင်းမိစ္ဆာငှက်မွှေး အင်မော်တယ်အတတ်ပညာခန်းမက မင်းကို ချွင်းချက်ထားပေးလိုက်မယ် ”

“ ဒါပေမဲ့ အင်မော်တယ်အတတ်ပညာတွေကို လေ့လာတဲ့ လူတွေက သေခြင်းရှင်ခြင်းကပ်ဘေးဒုက္ခငါးခုကို ဖြတ်ကျော်ရလိမ့်မယ်… အဲ့ဒီအတောအတွင်း မင်းက သေဆုံးသွားနိုင်တယ် ”

“ ဒီအင်မော်တယ်အရိပ်ရေကန်ထဲမှာ နေရာလွတ်တစ်ခုကို မင်းရှာဖွေလိုက်ပါ… ပြီးသွားရင် ရေအောက်ထဲကို နစ်မြုပ်သွားပြီး ကပ်ဘေးဒုက္ခငါးခုကို စောင့်ဆိုင်းပါ… အဲ့ဒါက အင်မော်တယ်အတတ်ပညာကို စူးစမ်းလေ့လာဖို့ မင်းအတွက် အခွင့်အရေးပဲ ”

ထိုသို့ပြောပြီးနောက် လူငယ်က ရွှီချင်းကို အေးစက်စွာ ကြည့်လိုက်သည်။

ရွှီချင်းက သူ့အောက်မှ အင်မော်တယ်အရိပ်ရေကန်ကို ကြည့်လိုက်ပြီး တွေးတောစဉ်းစားလိုက်သည်။

“ ဘာလဲ… မင်းမလုပ်ရဲဘူးလား ”

အင်မော်တယ်အတတ်ပညာခန်းမ၏ အပြင်ဘက်တွင် လူငယ်က တည်ငြိမ်စွာ ပြောသည်။

ရွှီချင်းက မလှုပ်မယှက်ဘဲ ဆက်ပြီး စစ်ဆေးကြည့်လိုက်သည်။ အချိန်တစ်ခဏကြာပြီးနောက် သူက အောက်သို့ တန်းမတ်စွာ ဆင်းသွားသည်။ သူက ရေကန်၏ မျက်နှာပြင်ပေါ်သို့ ဆင်းသက်သွားပြီး ရေကန်အောက်သို့ တိုက်ရိုက် နစ်မြုပ်သွားသည်။ မကြာမီ သူက ပျောက်ကွယ်သွားသည်။

သူပျောက်ကွယ်သွားသည်နှင့် ရေကန်၏ မျက်နှာပြင်ပေါ်မှာ ဆင်ခြင်နားလည်နေကြသော အင်မော်တယ်သခင်များက မျက်တောင်တဖျပ်ဖျပ် ခတ်လိုက်ကြသည်။ သူတို့က ရွှီချင်းနစ်မြုပ်သွားသော နေရာကို ကြည့်လိုက်ကြသည်။ တချို့က နှာခေါင်းရှုံ့လိုက်ကြပြီး တချို့က ခေါင်းခါလိုက်ကြသည်။

“ ဒီရွှယ်ချန်းဇီက သေလမ်းရှာနေတာပဲ ”

“ ဒီရေကန်အောက်မှာ ကပ်ဘေးဒုက္ခငါးခုကြောင့် အသက်ဆုံးရှုံးသွားကြတဲ့ အလောင်းတွေက မရေတွက်နိုင်အောင် အများကြီးပဲ… သူက အသက်ရှင်ဖို့တောင် အတော်လေး ကံကောင်းမှ ရမယ်… အောင်မြင်ဖို့ဆိုတာကတော့ လုံးဝမဖြစ်နိုင်တဲ့ကိစ္စပဲ ”

လူတိုင်းက ယင်းကို တစ်ခဏစိုက်ကြည့်ပြီးနောက် အကြည့်ပြန်ရုပ်လိုက်ကြသည်။ သူတို့က ရွှီချင်းကို လျစ်လျူရှုထားကြသည်။

ရွှီချင်းက ဤအတောအတွင်းမှာ နာမည်ကျော်ကြားလာခဲ့သော်လည်း ယင်းက အင်မော်တယ်သခင်များဖြစ်သော သူတို့အတွက် အင်မော်တယ်အတတ်ပညာများကို ဆင်ခြင်နားလည်ခြင်းလောက် အရေးမကြီးပေ။

အင်မော်တယ်အတတ်ပညာခန်းမ၏ အပြင်ဘက်တွင် မတ်တတ်ရပ်နေသော လူငယ်က အေးစက်စွာ ပြုံးလိုက်သည်။ သို့သော်လည်း သူ့အနောက်မှ အမျိုးသမီးသည်တော့ စိုးရိမ်ကြောင့်ကြသော အမူအရာကို ထုတ်ဖော်ထားသည်။

“ စီနီယာအကိုကြီး… ဆရာက ခရီးထွက်သွားတာကနေ ပြန်မရောက်လာသေးဘူး… အခု အရှေ့ပိုင်းမိစ္ဆာငှက်မွှေးရဲ့ အုပ်ချုပ်သူအသစ်က ဂုဏ်သတင်းကျော်ကြားနေတယ်… ပြီးတော့ ရွှယ်ချန်းဇီက သာမန်လူမဟုတ်ဘူး… ဒီလဝက်အတွင်းမှာ သူက အတော်လေး နာမည်ကျော်ကြားလာတယ် ”

“ နင် သူ့ကို စည်းမျဉ်းတွေပြောပြီး ငြင်းလိုက်သင့်တယ်… ဘာလို့ သူ့ကို အန္တရာယ်များတဲ့ အခြေအနေဆီ သွေးဆောင်ရတာလဲ ”

“ ခွေးငါးကောင်ထျန်းကမ္ဘာက အင်မော်တယ်အရိပ်ရေကန်အောက်ထဲမှာ ပုန်းအောင်းနေတယ်… ကျူးကျော်ဝင်ရောက်လာတဲ့ လူတွေထဲမှာ အသက်ရှင်သွားတဲ့လူက အရမ်းရှားတယ်… ပြီးတော့ တကယ်လို့ သူတို့က အသက်ရှင်နိုင်ခဲ့ရင်တောင် အင်မော်တယ်အတတ်ပညာကို နားမလည်နိုင်ဘူး… ဘာလို့လဲဆိုတော့ ခွေးငါးကောင် အင်မော်တယ်ကာကွယ်ခြင်းကို ဆင်ခြင်နားလည်ဖို့အတွက် အထူးရိုးရာဓလေ့တစ်ခုကို လိုအပ်တယ် ”

အမျိုးသမီးက နူးညံ့စွာ သက်ပြင်းချလိုက်သည်။

ယင်းကို လူငယ်ကြားသောအခါ သူ၏ အကြည့်က အေးစက်နေဆဲပင်။

“ ရေကန်အောက်ကို သူမဝင်သွားခင် အထဲမှာ အသက်အန္တရာယ်ရှိနိုင်တယ်လို့ လူအများရှေ့မှာ သူ့ကို ငါပြောပြခဲ့တယ်… အဲ့ဒါတောင် ရေကန်အောက်ကို ဝင်သွားတာက သူ့ဆန္ဒပဲ… ငါသူ့ကို တွန်းအားမပေးခဲ့ဘူး ”

“ သူ့ဘာသာ သေလမ်းရှာနေတာပဲ… အဲ့ဒါက ငါနဲ့ဘာမှမဆိုင်ဘူး ”

ထိုသို့ပြောပြီးနောက် လူငယ်က သူ၏ အင်္ကျီလက်ကို လှုပ်ခါလိုက်ပြီး အနောက်လှည့်ကာ အင်မော်တယ်အတတ်ပညာခန်းမထဲသို့ ပြန်ဝင်သွားသည်။

အမျိုးသမီးက ရေကန်ကို ကြည့်လိုက်ပြီး ခေါင်းခါလိုက်သည်။ စကားဆက်ပြောနေခြင်းက အကျိုးမရှိကြောင်း သူသိသည်။ ထို့ကြောင့် သူက နောက်ထပ် မပြောတော့ဘဲ အင်မော်တယ်အတတ်ပညာခန်းမဆီသို့ ပြန်ဝင်သွားသည်။

ဤအခိုက်အတန့်မှာ ရွှီချင်းက အင်မော်တယ်အရိပ်ရေကန်အောက်သို့ ဝင်ရောက်သွားပြီးနောက် မည်သည့်မူမမှန်မှုကိုမှ မခံစားမိသေးပေ။

ရေက အနက်ရောင်ဖြစ်သော်လည်း ဤနေရာမှာ ဒြပ်နှောများမရှိပေ။ ယင်းအစား ပေါ့ပါးသော ခံစားမှုကို ပေးသည်။ သို့သော်လည်း ဤနေရာတွင် သူ၏ နတ်ဘုရားစိတ်အာရုံကို တားဆီးထားသော အဟန့်အတားတစ်ခု ရှိသည်။ သို့ဖြစ်၍ သူက နတ်ဘုရားစိတ်အာရုံဖြင့် ရေကန်တစ်ခုလုံးကို မစူးစမ်းနိုင်ပေ။

ထို့ကြောင့် ရွှီချင်းက သူ၏ နတ်ဘုရားစိတ်အာရုံကို ဖြန့်ကြက်ထားပြီး ဘေးပတ်ဝန်းကျင်ကို နည်းနည်းချင်းစီသာ စူးစမ်းရှာဖွေနိုင်သည်။

ဆယ့်ငါးမိနစ်ကြာပြီးနောက် ရွှီချင်းက မျက်လုံးမှေးကျဉ်းလိုက်သည်။

ဤအခိုက်အတန့်မှာ သူ၏ နတ်ဘုရားစိတ်အာရုံက ရေကန်၏ ကြမ်းပြင်ကို ရှာဖွေနေစဉ် အရိုးများကို သူမြင်တွေ့သွားသည်။

သူက ဆက်ပြီး ရှာဖွေလေ အရိုးများကို ပိုပြီးမြင်တွေ့လာလေ ဖြစ်သည်။

နောက်ဆုံးမှာတော့ ရွှီချင်းက ရေကန်၏ ကြမ်းပြင်တစ်ခုလုံးကို ရှာဖွေလိုက်သည့်အခါ အရေအတွက်များပြားသော အရိုးစုများကို မြင်တွေ့သွားသည်။ ယင်းတို့က အနည်းဆုံး ထောင်ဂဏန်း ရှိသည်။

သူတို့က ယောင်္ကျားမိန်းမများ၊ လူငယ်လူရွယ်များနှင့် သက်ကြီးရွယ်အိုများ ဖြစ်ကြသည်။

သူတို့၏ မျက်လုံးက ပွင့်နေပြီး သူတို့၏ အရေပြားက ဖြူဖျော့နေသည်။ သူတို့၏ ဆံပင်နှင့် မျက်လုံးများသည်လည်း အဖြူရောင်သို့ ပြောင်းလဲနေကြသည်။

သူတို့၏ မျက်နှာအမူအရာက ထူးခြားသည်။ ယင်းက ငိုနေခြင်းမဟုတ်သလို ရယ်နေခြင်းလည်း မဟုတ်ပေ။

ရေကန်၏ ကြမ်းပြင်အောက်တွင် တံဆိပ်ရိုက်ခတ်ထားသော ဧရာမမှော်သင်္ကေတတစ်ခုကိုလည်း ရွှီချင်း မြင်တွေ့သွားသည်။

ထိုမှော်သင်္ကေတသည် အဖြူရောင်ဖြစ်ပြီး ၎င်း၏ အကျယ်အဝန်းက ရေကန်၏ တစ်ဝက်နီးပါးကို သိမ်းပိုက်ထားသည်။ ရှေးဟောင်းအရှိန်အဝါတစ်ခုသည်လည်း ၎င်းထံမှ ထွက်ပေါ်နေသည်။ ရွှီချင်းကို ပိုပြီးအာရုံစိုက်မိစေသည်မှာ အလောင်းအားလုံးက အဖြူရောင်မှော်သင်္ကေတပေါ်မှာ တည်ရှိနေခြင်း ဖြစ်သည်။

ရွှီချင်းက စစ်ဆေးရှာဖွေလိုက်သည်။

အချိန်အတော်ကြာပြီးနောက် သူက မှော်သင်္ကေတဆီသို့ ဂရုတစိုက် ချဉ်းကပ်သွားသည်။

သူက ချဉ်းကပ်သွားနေရင်း နတ်ဘုရားစိတ်အာရုံဖြင့် ကြိမ်ဖန်များစွာ စူးစမ်းလေ့လာခဲ့သည်။ မည်သည့်အမှားအယွင်းမှမရှိကြောင်း ရှာတွေ့ပြီးနောက် ရွှီချင်းက တွေးတောလိုက်သည်။ အသက်ဆယ်ခါရှူချိန်ကြာပြီးနောက် ဆုံးဖြတ်ချက်ပြတ်သားမှုက သူ၏ မျက်လုံးထဲမှာ ထွက်ပေါ်လာသည်။

သူက ဧရာမမှော်သင်္ကေတပေါ်သို့ တိုက်ရိုက် ခြေချလိုက်သည်။

သူက ခြေချလိုက်သည်နှင့်ချက်ချင်း ရွှီချင်း၏ အသိစိတ်က တုန်ယင်သွားသည်။ သူ၏ စိတ်က ဆက်လက် နစ်မြုပ်သွားနေသည်ဟု သူခံစားမိသွားသည်။ ထို့နောက် သူ၏ အမြင်အာရုံက ဝေဝါးသွားသည်။ အရာအားလုံးက ပြန်ကြည်လင်သွားသည့်အခါ သူက ရေကန်ကို ကြည့်နေခြင်း မဟုတ်တော့ပေ။

သူက ကောင်းကင်ကို မော့ကြည့်နေသည်။

အပြာရောင်ကောင်းကင်ထဲတွင် အဖြူရောင်တိမ်တိုက်များက လေထဲမှာ ပြည့်နှက်နေကြသည်။ သူ၏ ခြေဖဝါးအောက်တွင် မြေပြင်ကို မမြင်တွေ့နိုင်ပေ။ ပေတစ်ထောင်ထူထဲသော အဖြူရောင်မျဉ်းကြောင်းတစ်ခုသည်သာ အဝေးသို့ ဆန့်တန်းနေသည်။

ယင်းက အရွယ်အစား အလွန်ကြီးမားသော အဖြူရောင်ဆံခြည်မျှင်တစ်မျှင် ဖြစ်ဟန်ရ၏။

ရွှီချင်းက မဆင်မခြင် မဆောင်ရွက်ပေ။ သူက နတ်ဘုရားစိတ်အာရုံကို ဖြန့်ကြက်လိုက်ပြီး သူ၏ ခြေဖဝါးအောက်မှ အဖြူရောင်မျဉ်းကြောင်းကို စစ်ဆေးကြည့်လိုက်သည်။

သူက စစ်ဆေးကြည့်လိုက်သည့်အခါ ထိုအဖြူရောင်မျဉ်းကြောင်းက မှော်သင်္ကေတတစ်ခုပမာ ဖွဲ့စည်းနေကြောင်း ရှာတွေ့သွားသည်။

ထိုမှော်သင်္ကေတသည် ရေကန်၏ ကြမ်းပြင်အောက်တွင် သူမြင်တွေ့ခဲ့သော မှော်သင်္ကေတနှင့် တစ်ပုံစံတည်း တူညီသည်။

“ ဒီဟာက အဲ့ဒီလူငယ်ပြောတဲ့ ကပ်ဘေးဒုက္ခငါးခု ဖြစ်ရမယ်… သူက ငါ့ကို မကောင်းစိတ်နဲ့ ပြောခဲ့တယ်ဆိုတာ ထင်ရှားတယ်… ဒါပေမဲ့ ဒီကို ရောက်လာဖို့ ငါစိတ်ဆုံးဖြတ်ထားမှတော့ ဘယ်အရာကိုမှ ငါကြောက်နေမှာ မဟုတ်ဘူး ”

ရွှီချင်းက စိတ်ထဲမှာ တီးတိုးရေရွတ်လိုက်သည်။ သူက အဖြူရောင်မျဉ်းကြောင်းဆီသို့ ချက်ချင်း မရွေ့လျားသွားပေ။ ယင်းအစား သူ၏ မျက်လုံးထဲမှ သူခိုးခြောက်ယောက် လှည့်စားခြင်း အခွင့်အာဏာက ထွန်းလင်းတောက်ပလာသည်။

“ လူတွေက သူခိုးခြောက်ယောက်ရဲ့ လှည့်စားမှုကြောင့် အသက်မရှည်ကြဘူး… မျက်လုံးက မြင်တာ မှားတယ်… နားက ကြားတာ မှားတယ်… နှာခေါင်းက အနံ့ရတာ မှားတယ်… ပါးစပ်ရဲ့ အရသာက မှားတယ်… ခန္ဓာကိုယ်ရဲ့ အထိအတွေ့က မှားတယ်… စိတ်က တွေးတာ မှားတယ်… အမှားတွေအမျိုးမျိုးကြောင့် အမှန်တရားရဲ့ အနှစ်သာရဆီ ပြန်မသွားနိုင်တော့ဘူး ”

သူခိုးခြောက်ယောက် လှည့်စားခြင်း အင်မော်တယ်အတတ်ပညာ၏ တာအိုအမှတ်အသားက ရွှီချင်း၏ ခန္ဓာကိုယ်ပေါ်မှာ ရုတ်တရက် ထွက်ပေါ်လာသည်။

စိတ်ခံစားချက်ခုနစ်မျိုးနှင့် လိုအင်ဆန္ဒခြောက်မျိုး၏ သဏ္ဍာန်မဲ့ချည်မျှင်များက ရွှီချင်း၏ ခန္ဓာကိုယ်ကို ရစ်ပတ်သွားကြသည်။

“ သူခိုးခြောက်ယောက်နဲ့ ခွေးငါးကောင်က ဇစ်မြစ်တစ်ခုတည်းကနေ ဆင်းသက်လာကြတာ… ”

ရွှီချင်းက မျက်လုံးမှေးကျဉ်းလိုက်ပြီး အဖြူရောင်မျဉ်းကြောင်းဆီသို့ လျှောက်သွားသည်။ သူက သူခိုးခြောက်ယောက် အခွင့်အာဏာမှတဆင့် အရာအားလုံးကို အာရုံခံလိုက်သည်။

တစ်ချိန်တည်းမှာ အတိတ်၌ စီနီယာအကိုကြီး သူ့အား ပြောခဲ့သော ခွေးငါးကောင် အင်မော်တယ်ကာကွယ်ခြင်း၏ သတင်းအချက်လက်များက သူ၏ စိတ်ထဲမှာ ပြန်ပေါ်လာသည်။

“ ခွေးငါးကောင်က ကပ်စေးနှဲခြင်း၊ လောဘကြီးခြင်း၊ လိမ်ညာခြင်း၊ နတ်ဆိုးနဲ့ မဆင်မခြင်လုပ်ဆောင်ခြင်းတို့ ဖြစ်ကြတယ် ”

“ ကိုယ့်ပစ္စည်းတွေကို နှမြောတွန့်တိုတာက ကပ်စေးနှဲခြင်း… ရနိုင်တာထက် အများကြီး ပိုလိုချင်တာက လောဘကြီးခြင်း… အမှန်တရားကို လှည့်စားတာက လိမ်ညာခြင်း… မတရားနည်းနဲ့ အနိုင်လိုချင်တာက နတ်ဆိုးဖြစ်တယ်… စဉ်းစားဆင်ခြင်ဉာဏ်မရှိဘဲ တဇွတ်ထိုးလုပ်တာက မဆင်မခြင်လုပ်ဆောင်တာပဲ ”

“ လူသတ်မှုခုနစ်ခုနဲ့ အပြစ်တော်ရှစ်ပါးကိုတော့ ယွဲ့တုန်နဲ့ သူ့ရဲ့ ဂျူနီယာညီမလည်းပဲ မသိထားဘူး… ”

“ ရိုးရှင်းစွာပြောရရင် အဲ့ဒီအင်မော်တယ်အတတ်ပညာက… ကပ်စေးနှဲခြင်းခွေးက ဝင်လာတဲ့အခါ ရတနာတွေ ပျောက်ဆုံးမယ်… လောဘခွေးက ဝင်လာတဲ့အခါ ချုပ်နှောင်ခံရလိမ့်မယ်… လိမ်ညာတဲ့ ခွေးက ဝင်လာတဲ့အခါ သေခြင်းရှင်ခြင်း သံသရာစက်ဝန်းထဲ ကျရောက်သွားလိမ့်မယ်… နတ်ဆိုးခွေးက ဝင်လာတဲ့အခါ ငရဲကျသွားလိမ့်မယ်… မဆင်မခြင်ခွေးက ဝင်လာတဲ့အခါ လူသားအသွင်ကို ထာဝရ ဆုံးရှုံးသွားလိမ့်မယ် ”

ရွှီချင်းက စီနီယာအကိုကြီး၏ စကားကို ပြန်တွေးတောနေရင်း သူ၏ နတ်ဘုရားစိတ်အာရုံကို ဖြန့်ကြက်ထားလျက် အရှေ့သို့ ဆက်လက် ရွေ့လျားသွားသည်။

သို့သော်လည်း သူက လမ်းလျှောက်သွားနေစဉ် ရုတ်တရက် ရပ်လိုက်သည်။ သူ၏ ဘေးပတ်ဝန်းကျင်မှ စိတ်ခံစားချက်ခုနစ်မျိုးနှင့် လိုအင်ဆန္ဒခြောက်မျိုး၏ ချည်မျှင်များက ပြင်းထန်စွာ လှုပ်ခါလာကြသည်။ ဤသည်မှာ တစ်စုံတစ်ခုက ယင်းတို့ကို တားဆီးနေသည့်အလားပင်။ အမှန်မှာ ယင်းတို့က အတွင်းဘက်ဆီသို့ ကွေးညွတ်သွားကြသည်။

သို့သော်လည်း သူ၏ အရှေ့တွင် မည်သည့်အရာမှ မရှိပေ။

နောက်အခိုက်အတန့်မှာ စိတ်ခံစားချက်ခုနစ်မျိုးနှင့် လိုအင်ဆန္ဒခြောက်မျိုးက ပုံမှန်ပြန်ဖြစ်သွားကြသည်။

ရွှီချင်းက သတိကြီးစွာ ထားလိုက်ပြီး ဂရုတစိုက် စစ်ဆေးကြည့်လိုက်သည်။ သို့သော်လည်း မည်သို့သူစစ်ဆေးပါစေ မည်သည့်မူမမှန်မှုကိုမှ သူအာရုံမခံမိပေ။

မည်သည့်အမှားအယွင်းမှမရှိကြောင်း သူအတည်ပြုပြီးနောက် ရွှီချင်းက မျက်မှောင်ကြုတ်လိုက်ပြီး အရှေ့သို့ ဆက်လျှောက်သွားသည်။

သို့သော်လည်း ခြေသုံးလှမ်း လှမ်းပြီးနောက် ရွှီချင်း၏ အမူအရာက မည်းမှောင်သွားသည်။

“ မဟုတ်သေးဘူး ”

“ စိတ်ခံစားချက်ခုနစ်မျိုးနဲ့ လိုအင်ဆန္ဒခြောက်မျိုးရဲ့ ချည်မျှင်တွေက ဘာအကြောင်းအရင်းမှမရှိဘဲ အဲ့လိုတုံ့ပြန်မှာ မဟုတ်ဘူး… ဒါဆိုရင် ပြဿနာက ဘယ်မှာလဲ… ”

ရွှီချင်းက ပိုပြီးမျက်မှောင်ကြုတ်သွားသည်။ သို့သော်လည်း သူက တစ်ခဏကြာအောင် စဉ်းစားလိုက်သည့်တိုင် မည်သည့်အရာမှ ရှာမတွေ့ပေ။

သို့သော်လည်း စိတ်မသက်မသာဖြစ်သော ခံစားမှုက ဆက်လက် အားကောင်းလာသည်။

သို့ဖြစ်၍ ရွှီချင်းက အရှေ့သို့ ဆက်ပြီး မသွားတော့ပေ။ သူက နေရာမှာ ဆက်နေလိုက်ပြီး အစောနက သူ၏ လုပ်ဆောင်မှုများကို ပြန်စဉ်းစားလိုက်သည်။

နောက်ဆုံးမှာတော့ စိတ်ခံစားချက်ခုနစ်မျိုးနှင့် လိုအင်ဆန္ဒခြောက်မျိုး၏ ချည်မျှင်များက စီနီယာအကိုကြီး သူ့ကို ပြောခဲ့သော သတင်းအချက်အလက်များက သူ၏ စိတ်ထဲမှာ ထွက်ပေါ်လာပြီးနောက်မှသာ မူမမှန်ဖြစ်လာခြင်းဖြစ်ကြောင်း သူရှာတွေ့သွားသည်။

သို့ဖြစ်၍ သူက ထိုမှတ်ဉာဏ်များကို ချက်ချင်း ပြန်စဉ်းစားလိုက်သည်။

ရွှီချင်းက မျက်မှောင်ကြုတ်လိုက်သည်။

“ အဲ့ဒီမှတ်ဉာဏ်က တစ်ခုခုမှားယွင်းနေတဲ့ပုံပဲ… ”

အစောနက သူ၏ မှတ်ဉာဏ်များက အနည်းငယ် ပုံမှန်မဟုတ်ကြောင်း မသဲမကွဲ သူခံစားမိသည်။ သို့သော်လည်း မည်သို့သူစဉ်းစားပါစေ အကြောင်းအရင်းကို မရှာဖွေနိုင်ပေ။ သို့ဖြစ်၍ ရွှီချင်းက လုံးဝတုံ့ဆိုင်းမနေဘဲ တားမြစ်အဆိပ်ကို အသက်သွင်းလိုက်သည်။ သူ၏ ခန္ဓာကိုယ်ထဲမှ မင်ဖေး၏ မျက်လုံးက ရုတ်တရက် ပွင့်သွားသည်။

ထိုမျက်လုံးသည် ဟင်းလင်းပြင်အကာအကွယ်ကို ချိုးဖောက်နိုင်သည်။

မျက်လုံးပွင့်သွားသည်နှင့်ချက်ချင်း ရွှီချင်းက အရင်းအမြစ်ကို ရှာတွေ့သွားသည်။

သူ၏ မှတ်ဉာဏ်ထဲတွင် ယွဲ့တုန်ဆီမှာ ဂျူနီယာညီမတစ်ယောက်ရှိနေသည်။

သို့သော်လည်း လက်တွေ့တွင် ယွဲ့တုန်ဆီမှာ ဂျူနီယာညီမ မရှိပေ။

လန်ယောင်က ယွဲ့တုန်၏ ဂျူနီယာညီမ မဟုတ်ပေ။

သို့သော်လည်း ရွှီချင်း၏ အသိအမြင်ထဲတွင် ထိုဂျူနီယာညီမ၏ ပုံရိပ်က ပုန်းအောင်းနေသည်။ ဤသည်မှာ ထိုသူက သူ၏ မှတ်ဉာဏ်များထဲသို့ ပေါင်းစပ်သွားသည့်အလားပင်။

ထိုသူက သူ၏ မှတ်ဉာဏ်များထဲမှ ယွဲ့တုန်နှင့်ပတ်သက်သော မြင်ကွင်းများထဲသို့လည်း ထိုးဖောက်သွားသည်။

ဥပမာ ဖုန်းလင်းတောင်၊ လန်ယောင်နှင့် ယွဲ့တုန်ကို ပထမဆုံးအကြိမ် ရွှီချင်းမြင်တွေ့ခဲ့သော မြင်ကွင်းထဲမှာ ယွဲ့တုန်၏ ဂျူနီယာညီမက ထိုသုံးယောက်၏ ဘေးမှာ ရှိနေသည်။

ထို့နောက် သူနှင့် စီနီယာအကိုကြီးက ယွဲ့တုန်ကို အသက်ရှင်လျက် ဖမ်းဆီးခဲ့စဉ် ယွဲ့တုန်၏ ဂျူနီယာညီမကိုလည်း ဖမ်းဆီးခဲ့သည်။

သို့သော်လည်း သူ၏ ဝိညာဉ်ရှာဖွေမှုကြောင့် ယွဲ့တုန်၏ ဂျူနီယာညီမက ဝိညာဉ်ဖျက်ဆီးခံလိုက်ရသည်။

ထိုမှတ်ဉာဏ်က ရွှီချင်းကို မျက်မှောင်ကြုတ်သွားစေသည်။

ယင်းက သူ၏ မှတ်ဉာဏ်ဖြစ်သည်ဟု သူခံစားမိသည်။ ဤသည်မှာ ယင်းက အမှန်တကယ် ဖြစ်ပျက်ခဲ့သည့်အလားပင်။

သို့သော်လည်း မင်ဖေး၏ မျက်လုံးထဲတွင် ထိုမှတ်ဉာဏ်က အပိုဖြစ်သည်။

“ ဒါဆိုရင် ငါ့မှတ်ဉာဏ်ထဲမှာ ထွက်ပေါ်လာတဲ့ အဲ့ဒီအမျိုးသမီးက ဘယ်သူလဲ ”

ရွှီချင်း၏ အမူအရာက ချက်ချင်း မည်းမှောင်သွားသည်။ အထူးသဖြင့် ထိုမှတ်ဉာဏ်က တစ်စုံတစ်ခု မှားယွင်းနေကြောင်း သူရှာတွေ့သွားသော်လည်း ယင်းကို မဖျက်ဆီးပစ်နိုင်ပေ။ အေးစက်စက် အလင်းက သူ၏ မျက်လုံးထဲမှာ ထွက်ပေါ်လာသည်။ သူ၏ ခန္ဓာကိုယ်ထဲမှ ကံကြမ္မာနတ်ဘုရားအခွင့်အာဏာက ထွန်းလင်းတောက်ပလာသည်။

ဓားမြှောင်က ကံကြမ္မာကို ဖောက်ထွင်းသွားပြီး ထိုမှတ်ဉာဏ်ထဲမှ ယွဲ့တုန်၏ ဂျူနီယာညီမကို အကြင်နာမဲ့စွာ ပိုင်းဖြတ်လိုက်သည်။

အက်ကွဲသံက ထွက်ပေါ်လာသည်။

ယွဲ့တုန်၏ ဂျူနီယာညီမက ချက်ချင်း အပိုင်းပိုင်းအစစ အက်ကွဲသွားသည်။

သို့သော်လည်း ရွှီချင်းက နှလုံးတုန်လှုပ်နေဆဲပင်။

အဘယ့်ကြောင့်ဆိုသော် ယွဲ့တုန်၏ ဂျူနီယာညီမပုံရိပ်က ဖျက်ဆီးခံလိုက်ရသည့်အခိုက် ထိုမှတ်ဉာဏ်က ခြောက်သွေ့နေသော အဖြူရောင်ဆံချည်မျှင်တစ်မျှင်အဖြစ် ပြောင်းလဲသွားပြီး သူ၏ မှတ်ဉာဏ်တစ်ဝက်ကို ဆက်လက် ဖောက်ထွင်းသွားသည်။

ထိုးဖောက်ခံလိုက်ရသော မှတ်ဉာဏ်များထဲတွင် အဖြူရောင်ဆံချည်မျှင်က ပေါင်းစပ်သွားပြီး အရေအတွက်က ဆက်လက် တိုးပွားလာသည်။

ထိုခံစားမှုက အလွန်ထူးခြားပြီး ဖော်ပြရန် ခက်ခဲသည်။

ဤသည်မှာ ပြီးပြည့်စုံသော ပန်းချီကားတစ်ချပ်က မရေမတွက်နိုင်သော အဖြူရောင်ဆံချည်မျှင်များအဖြစ် ပြောင်းလဲသွားသည့်အလားပင်။

ခွေးငါးကောင် အင်မော်တယ်ကာကွယ်ခြင်းနှင့် ပတ်သက်ပြီး စာကြောင်းတစ်ကြောင်းက ရွှီချင်း၏ စိတ်ထဲမှာ ထွက်ပေါ်လာသည်။

“ ပိုင်ဆိုင်မှုတွေကို မစွန့်လွှတ်နိုင်တာက ကပ်စေးနှဲခြင်းပဲ… ကပ်စေးနှဲခြင်းခွေးက ဝင်လာတဲ့အခါ ရတနာတွေ ပျောက်ဆုံးသွားလိမ့်မယ် ”

အဖြူရောင်ဆံချည်မျှင်များသည် လျှို့ဝှက်အခန်းကို ချိပ်ပိတ်ထားသော တံခါးတစ်ချပ်နှင့် ဆင်တူသည်။

တံခါးက စက်ဝိုင်းပုံသဏ္ဍာန် ရှိသည်။

ဤအခိုက်အတန့်မှာ တံခါးက ရုတ်တရက် ပွင့်သွားပြီး အဖြူရောင်အလင်းကို ထုတ်လွှတ်လိုက်သည်။

ယင်းက အဖြူရောင်မျက်လုံးနှင့် ဆင်တူသည်။

ကပ်စေးနှဲခြင်းခွေးက ဝင်ရောက်လာသည်။