အဲ့ဒါက ငါ့အရိုး(က)

ဤအခိုက်အတန့်မှာ အရှေ့မိစ္ဆာငှက်မွှေး၏ အင်မော်တယ်အတတ်ပညာခန်းမထဲမှ အရိုးဆေးမီးဖိုကို အရောင်ကိုးရောင်မီးတောက်များက ဝန်းရံထားကြသည်။ ထိုမီးတောက်များ၏ လွှမ်းခြုံမှုအောက်မှာ အရိုးဆေးမီးဖိုက ဝုန်းခနဲ မြည်သွားပြီး အပြင်းအထန် လောင်ကျွမ်းသွားသည်။

အရိုးဆေးမီးဖို၏ မျက်နှာပြင်ပေါ်မှ မှော်သင်္ကေတများက မြန်ဆန်စွာ လင်းလက်တောက်ပလာကြသည်။ ယင်းက အရောင်ကိုးရောင်မီးတောက်များကို ပိုပြီးအားကောင်းလာစေသည်။ တစ်ချိန်တည်းမှာ အင်မော်တယ်သန့်စင်ခြင်းက တရားဝင် စတင်လာသည်။

အုပ်ချုပ်တောင်များ၏ ကိုယ်စားလှယ်များထဲတွင် သုံးယောက်က မည်းမှောင်သော အမူအရာဖြင့် မတ်တတ်ရပ်လိုက်ကြသည်။

တခြားလူများသည်တော့ ထူးဆန်းသော အမူအရာကို ထုတ်ဖော်ထားကြသည်။

ဤအပြောင်းအလဲက သူတို့မမျှော်လင့်ထားသော အရာဖြစ်သည်။ ထို့ပြင် ယင်းက ရုတ်တရက်ဆန်စွာ ဖြစ်ပွားခဲ့ခြင်း ဖြစ်သည်။

ရိုးရာဓလေ့ကို ဦးဆောင်ကျင်းပခဲ့သော အင်မော်တယ်အတတ်ပညာခန်းမ၏ မဟာအကြီးအကဲက အသာစီးရရှိမည့်အစား ထိုသို့ဆိုးဝါးသော အခြေအနေသို့ ကျရောက်သွားလိမ့်မည်ဟု သူတို့မမျှော်လင့်ထားကြပေ။

မည်သို့ဖြစ်ပါစေ အကယ်၍ မဟာအကြီးအကဲက သူ့ကိုယ်သူ ယုံကြည်မှုမရှိလျှင် အုပ်ချုပ်သူတောင်များကို သက်သေပြုပေးရန် ဖိတ်ကြားခဲ့လိမ့်မည် မဟုတ်ချေ။

အင်မော်တယ်လုယက်ခြင်း ပွဲအခမ်းအနားကို ဆောင်ရွက်ရန် မဟာအကြီးအကဲက အုပ်ချုပ်သူတောင်များကို မဖြစ်မနေ ဖိတ်ကြားရလိမ့်မည်။ သို့သော်လည်း မည်သို့ဖြစ်ပါစေ သူက မတော်တဆမှုများကို ကာကွယ်တားဆီးရန် အစီအစဉ်တချို့ကို သေချာပေါက် ကြိုပြင်ဆင်ထားရမည်။

သို့သော်လည်း နောက်ဆုံးမှာတော့ မတော်တဆမှုတစ်ခုက ထွက်ပေါ်လာဆဲပင်။

ယွဲ့တုန်က မဟာအကြီးအကဲ၏ အကြံအစည်အောက်မှာ မည်သို့ပုန်းအောင်းနိုင်ခဲ့ကြောင်း မည်သူမှ မသိကြပေ။ သို့သော်လည်း သူက အရေးကြီးအချိန်မှာ အခြေအနေကို ပြောင်းပြန်လှန်ပစ်နိုင်ခဲ့သည်။ သို့ဖြစ်၍ ယခု ကြီးမြတ်သော အင်မော်တယ်သခင်ရာထူးက မည်သူ့လက်ထဲသို့ ကျရောက်သွားကြောင်း သံသယဖြစ်စရာ မလိုတော့ပေ။

အင်အားစုသီးသီး၏ အကျိုးအမြတ်များသည် ကြီးမားသော အင်မော်တယ်သခင်ဖြစ်လာမည့် လူပေါ်မူတည်ပြီး ပြောင်းလဲသွားလိမ့်မည်။

တချို့က မဟာအကြီးအကဲကို ထောက်ပံ့ကြပြီး တချို့က ယွဲ့တုန်ကို ထောက်ပံ့ကြသည်။ တချို့သည်တော့ ကြားနေဝါဒကို ကျင့်သုံးကြသည်။

သို့ဖြစ်၍ ဤအပြောင်းအလဲကို မြင်သွားပြီးနောက် တတိယအုပ်ချုပ်သူတောင်နှင့် သတ္တမအုပ်ချုပ်သူတောင်မှ ကိုယ်စားလှယ်များက အကူအညီပေးရန် အရှေ့ထွက်လာကြသည်။ သူတို့က မဟာအကြီးအကဲကို ထောက်ခံသူများဖြစ်ကြောင်း ထင်ရှားသည်။

သို့သော်လည်း သူတို့နှစ်ယောက်က မတ်တတ်ရပ်လိုက်သည်နှင့်ချက်ချင်း စတုတ္ထအုပ်ချုပ်သူတောင်နှင့် ဆဌမအုပ်ချုပ်သူတောင်မှ ကိုယ်စားလှယ်များက သူတို့ကို တားဆီးပိတ်ဆို့လိုက်ကြသည်။

သူတို့က အချင်းချင်း စိုက်ကြည့်လိုက်ကြပြီး မည်သည့်စကားမှ မပြောကြချေ။ အဘယ့်ကြောင့်ဆိုသော် သူတို့၏ လုပ်ဆောင်မှုများက သူတို့၏ ရပ်တည်မှုကို ဖော်ပြပြီးပြီ ဖြစ်သည်။ သို့ဖြစ်၍ ပဋိပက္ခက သူတို့ကြားထဲမှာ ချက်ချင်း ထွက်ပေါ်လာသည်။

သူတို့လေးယောက်က မျက်နှာချင်းဆိုင်လိုက်သည့်အခါ အင်မော်တယ်အတတ်ပညာခန်းမ၏ အပြင်ဘက်တွင် လေခွင်းသံများ ပဲ့တင်ထပ်လာသည်။

ဝတ်ရုံနက်ကျင့်ကြံသူအုပ်စုတစ်စုသည် အင်မော်တယ်သခင်တချို့နှင့်အတူ အပြင်ဘက်မှ တစ်ဟုန်ထိုး ပျံသန်းလာကြသည်။ အရှေ့ဆုံးမှ ဦးဆောင်လာသူသည် ခမ်းနားထည်ဝါသော ဝတ်စုံနှင့် လူငယ်ဖြစ်သည်။

သူ၏ သတ်ဖြတ်ခြင်းစိတ်ဆန္ဒက အလွန်ပြင်းထန်သည်။ သူက ဝတ်ရုံနက်ကျင့်ကြံသူအုပ်စုကို ဦးဆောင်ပြီး မဟာအကြီးအကဲ၏ လက်အောက်မှ အင်မော်တယ်သခင်များဖြင့် ဆန့်ကျင်တိုက်ခိုက်လိုက်သည်။

သူ၏ အလျင်က အံ့ဖွယ်ကောင်းသည်။ သူက အရိုးဆေးမီးဖို၏ အပေါ်သို့ မြန်ဆန်စွာ ရောက်ရှိသွားသည်။

သူက ဆေးမီးဖိုပေါ်သို့ ရောက်ရှိသွားသည့်အခိုက် သူ၏ ဘေးပတ်ပတ်လည်မှ ဟင်းလင်းပြင်က ပုံပျက်တွန့်လိမ်သွားပြီး မဟာအကြီးအကဲ၏ သစ္စာခံအင်မော်တယ်သခင်သုံးပါးက ထွက်ပေါ်လာကြသည်။ ထိုအင်မော်တယ်သခင်သုံးပါးက ထွက်ပေါ်လာသည်နှင့်ချက်ချင်း လူငယ်ဆီသို့ ဦးတည်သွားကြသည်။ သူတို့သုံးယောက်က အလွန်အစွမ်းထက်ကြသည်။

သူတို့က တိုက်ခိုက်လိုက်သည့်အခါ အင်မော်တယ်အတတ်ပညာများမှ ဖြစ်ပေါ်လာသော အနက်ရောင်အစွယ်သုံးချောင်းက ခမ်းနားထည်ဝါစွာ ဝတ်ဆင်ထားသော လူငယ်ဆီသို့ တန်းမတ်စွာ ပျံသန်းသွားကြသည်။

သို့သော်လည်း လူငယ်က မရှောင်တိမ်းပေ။ သူက အနက်ရောင်အစွယ်များကို ရုပ်ခန္ဓာကိုယ်သက်သက်ဖြင့် ခုခံလိုက်ပြီး ခေါင်းလောင်းတစ်ခုကို ထုတ်လိုက်သည်။ သူက ခေါင်းလောင်းကို သူ့အောက်မှ အရိုးဆေးမီးဖိုပေါ်သို့ အကြင်နာမဲ့စွာ ဖိချလိုက်သည်။

ခေါင်းလောင်းမြည်သံက ချက်ချင်း ပဲ့တင်ထပ်သွားသည်။

နောက်အခိုက်အတန့်မှာ ခေါင်းလောင်းက ပေတစ်ထောင်အရွယ်အစားသို့ ကြီးမားသွားပြီး ဆေးမီးဖိုကို အပြည့်အဝ လွှမ်းခြုံသွားသည်။

၎င်းထံမှ အရှိန်အဝါက အရပ်မျက်နှာအဘက်ဘက်ဆီသို့ ပျံ့လွင့်သွားသည်။

ထိုအဖြစ်အပျက်အားလုံးကို ဖော်ပြရန် အချိန်အတော်ကြာသော်လည်း အမှန်မှာ ယင်းက မျက်တောင်တစ်ခတ်အတွင်း ဖြစ်ပျက်သွားခဲ့ခြင်း ဖြစ်သည်။

ခေါင်းလောင်းမြည်သံ ပဲ့တင်ထပ်သွားပြီးနောက် အင်မော်တယ်သခင်သုံးပါး၏ တိုက်ခိုက်မှုများက လူငယ်ပေါ်သို့ တရစပ် ကျရောက်လာကြသည်။ ချက်ချင်းဆိုသလို သူ၏ ခန္ဓာကိုယ်က အနောက်သို့ လွင့်စင်သွားပြီး သူက ပါးစပ်အပြည့် သွေးအန်လိုက်ရသည်။

“ ဒီခေါင်းလောင်းက ငါ့ယွင်မိသားစုရဲ့ ရပ်တည်မှုပဲ ”

“ ငါ့ယွင်မိသားစုက ယွဲ့တုန်ကို ကြီးမြတ်တဲ့ အင်မော်တယ်သခင်ဖြစ်လာဖို့ လုံးဝ ထောက်ခံတယ် ”

ဘေးပတ်ဝန်းကျင်ရှိ မဟာအကြီးအကဲ၏ လက်အောက်မှ အင်မော်တယ်သခင်များသည် ခမ်းနားထည်ဝါစွာ ဝတ်ဆင်ထားသော လူငယ်နှင့် ဝတ်ရုံနက်ကျင့်ကြံသူများကို စူးစိုက်ကြည့်လိုက်ကြသည်။ သူတို့၏ အမူအရာက မည်းမှောင်သွားကြသည်။ အုပ်ချုပ်သူတောင်များမှ ကိုယ်စားလှယ်များသည်လည်း အမူအရာပြောင်းလဲသွားကြသည်။

“ ယွင်ထျန်းခေါင်းလောင်း ”

ထိုခေါင်းလောင်းသည် အရှေ့မိစ္ဆာငှက်မွှေးတွင် နာမည်ကျော်ကြားသည်။ ယင်းက လန်မိသားစုကဲ့သို့ အင်အားကြီးမားသော ယွင်မိသားစုထံမှ အထွတ်အမြတ်ရတနာတစ်ခု ဖြစ်သည်။

ခမ်းနားထည်ဝါစွာ ဝတ်ဆင်ထားသော လူငယ်၏ ဂုဏ်သတင်းသည်လည်း မသေးငယ်ပေ။ သူက လက်ရှိယွင်မိသားစု၏ သခင်လေး ဖြစ်သည်။

ဤအခိုက်အတန့်မှာ လူငယ်၏ သရုပ်ကို သူတို့မှတ်မိသွားကြသောအခါ ကိုယ်စားလှယ်များ၏ အမူအရာက ထူးဆန်းသွားသည်။

ရှင်းလင်းစွာပင် ယွင်မိသားစု၏ သခင်လေးက ယွဲ့တုန်ကို လိုက်ပိုးပန်းနေသော ကိစ္စက အရှေ့မိစ္ဆာငှက်မွှေးတွင် လျှို့ဝှက်ချက်တစ်ခု မဟုတ်ပေ။ အတိတ်မှာ ယွင်သခင်လေးက ယွဲ့တုန်ကို အင်မော်တယ်အတတ်ပညာခန်းမထဲ၌ အကူအညီပေးခဲ့သည်။

သို့သော်လည်း မည်သို့ဖြစ်ပါစေ ယင်းက သူတစ်ယောက်တည်း၏ ဆုံးဖြတ်ချက်ဖြစ်သည်။

ယွဲ့တုန်ဖမ်းဆီးခံလိုက်ရပြီးနောက် တစ်ဖက်လူက အင်မော်တယ်အတတ်ပညာခန်းမထဲမှ မောင်းထုတ်ခံလိုက်ရသည်။ သို့သော်လည်း ယခု သူက အရေးကြီးအချိန်မှာ ရောက်လာပြီး ယွင်မိသားစု၏ အထွတ်အမြတ်ရတနာကို ထုတ်ဖော်လိုက်သည်။

ထိုအဓိပ္ပာယ်က ကွဲပြားခြားနားသည်။

ယခင်က သူသည် သူ့တစ်ယောက်တည်းကိုသာ ကိုယ်စားပြုခဲ့သည်။

ယခု သူက ယွင်မိသားစုတစ်ခုလုံးကို ကိုယ်စားပြုသွားသည်။

ယင်းက ကြီးမြတ်သော အင်မော်တယ်သခင်ရာထူးအတွက် တိုက်ပွဲကို တစ်ခဏ ရပ်တန့်သွားစေသည်။

ဤတိုက်ပွဲကို အမှန်တကယ် ထိန်းချုပ်ထားသည်မှာ ယွင်မိသားစုမဟုတ်သလို ဤနေရာမှ အင်မော်တယ်သခင်များ မဟုတ်ကြချေ။ ယင်းအစား အုပ်ချုပ်သူတောင်ဆယ်လုံး ဖြစ်သည်။

သူတို့ဆီမှာ ထိုသို့လုပ်ဆောင်နိုင်သော အခွင့်အာဏာ ရှိကြသည်။

သို့ဖြစ်၍ သက်လတ်ပိုင်းအင်မော်တယ်သခင်က အရှေ့သို့ ထွက်လျှောက်လာပြီး လက်သီးဆုပ်လိုက်ကာ အုပ်ချုပ်သူတောင်များ၏ ကိုယ်စားလှယ်အသီးသီးထံသို့ အရိုအသေပေးလိုက်သည်။

“ ယွဲ့တုန်က ငါ့အင်မော်တယ်အတတ်ပညာခန်းမရဲ့ သစ္စာဖောက်တစ်ယောက်ပါ… ယွင်မိသားစုရဲ့ သခင်လေးက ယွဲ့တုန်ရဲ့ လှည့်စားခံထားရပါတယ်… ယွင်မိသားစုရဲ့ ထောက်ပံ့မှုကတော့… ယွင်မိသားစုရဲ့ ဘိုးဘေးကိုယ်တိုင် ရောက်မလာသရွေ့ ငါ့အင်မော်တယ်အတတ်ပညာခန်းမက အဲ့ဒါကို ယုံကြည်မှာ မဟုတ်ပါဘူး ”

“ ဒီက ကိုယ်စားလှယ်တွေက ဒီပရမ်းပတာအခြေအနေကို ဖြေရှင်းဖို့ ငါ့ကို ကူညီပေးမယ်လို့ မျှော်လင့်ပါတယ်… အနာဂတ်မှာ ငါ့အင်မော်တယ်အတတ်ပညာခန်းမက မင်းတို့ကို သေချာပေါက် ကျေးဇူးတုံ့ပြန်ပါမယ် ”

ယင်းကို ကြားသောအခါ ယွင်မိသားစု၏ သခင်လေးက မျက်နှာမည်းမှောင်သွားသည်။ သူက အုပ်ချုပ်သူတောင်များမှ ကိုယ်စားလှယ်အသီးသီးကို ကြည့်လိုက်ပြီး လက်သီးဆုပ်လိုက်သည်။

“ အားလုံးပဲ… ဒီဟာက အင်မော်တယ်အတတ်ပညာခန်းမရဲ့ အတွင်းရေးကိစ္စပါ… သခင်မယွဲ့တုန်က အင်မော်တယ်အတတ်ပညာခန်းမရဲ့ သစ္စာဖောက်မဟုတ်ပါဘူး… သူက အရင်မျိုးဆက်ရဲ့ ကြီးမြတ်တဲ့ အင်မော်တယ်သခင်ရဲ့ တပည့်တစ်ယောက်ဖြစ်ပြီး သူခိုးခြောက်ယောက်လှည့်စားခြင်း အင်မော်တယ်အတတ်ပညာကို တတ်ကျွမ်းထားပါတယ်… သူက ကြီးမြတ်တဲ့ အင်မော်တယ်သခင်ရာထူးအတွက် စစ်မှန်တဲ့ အမွေဆက်ခံသူပါ ”

“ အင်မော်တယ်အတတ်ပညာခန်းမရဲ့ မဟာအကြီးအကဲမှာ မကောင်းတဲ့အကြံအစည်တွေ ရှိပါတယ်… သူက အင်မော်တယ်အတတ်ပညာခန်းမရဲ့ ထုံးတမ်းအစဉ်အလာတွေကို လျစ်လျူရှုထားပြီး ကြီးမြတ်တဲ့ အင်မော်တယ်သခင်ဖြစ်ချင်နေပါတယ်… သူက အရမ်းကောက်ကျစ်စဉ်းလဲတဲ့သူပါ ”

“ အားလုံးပဲ… ကျေးဇူးပြုပြီးတော့ မင်းတို့ရဲ့ အရင်ရပ်တည်မှုအတိုင်း ဆက်နေပေးကြပါ… ကျေးဇူးပြုပြီး အင်မော်တယ်အတတ်ပညာခန်းမရဲ့ အတွင်းရေးကိစ္စကို ဝင်မပါကြပါနဲ့ ”

ယွင်သခင်လေးက အရိုအသေပေးလိုက်ပြီးနောက် စိုးရိမ်ကြောင့်ကြခြင်းနှင့် မျှော်လင့်ခြင်းကို ပြိုင်တူခံစားမိသွားသည်။ သူ၏ မိသားစုအကြောင်းကို ကောင်းကောင်း သူသိသည်။

ယွင်မိသားစု၏ အထွတ်အမြတ်ရတနာကို ချောချောမွေ့မွေ့ သူရယူနိုင်ခဲ့ခြင်းက ဘိုးဘေး၏ ရပ်တည်မှုကို ညွှန်ပြနေသည်။

အကယ်၍ သူအောင်မြင်သွားလျှင် ယွင်မိသားစု၏ ထောက်ပံ့မှုက အမှန်တကယ် ဖြစ်လာလိမ့်မည်။