အသေ ရိုက်သတ်ခြင်း
Vol. 3 Ch. 29
" နတ်ဆိုးဘုရင်ကြီးကို ကြိုဆိုပါတယ် "
ဟူသော စကားကြောင့် လောမိသားစု စိတ်ဓာတ်ကျသွားကြသည်။
" ဒီကောင်က ရှန်းဝူနန်းတော်ကဆိုတာ သေချာသလောက်နီးပါး ဖြစ်သွားပြီ "
လောဖုန်း၏မျက်နှာ ဖြူဖျော့သွားသည်။
" ဘုရင်ရှန်းဝူ က အမှန်တကယ်ကို အစွမ်းထက်တာပဲ ။လောမိသားစုအတွက် မျှော်လင့်ချက် ရှိပါဦးမလား "
တတိယ အကြီးကဲမှာလည်း ထိတ်လန့်တုန်လှုပ်နေ၏ ။
ပထမအကြီးအကဲက လက်သီးဆုပ်ကာ ပြောလိုက်သည်။
" စိတ်မပူပါနဲ့ ... လောထျန်းရဲ့ အရည်အချင်းနဲ့ဆိုရင် နောက်အနှစ် နှစ်ဆယ် ၊ သုံးဆယ်အတွင်းမှာ လောမိသားစုက ပြန်ပြီး တောက်ပလာပါလိမ့်မယ်။ ကျုပ်တို့တွေရဲ့ စတေးမှုက အချည်းနှီးဖြစ်မှာ မဟုတ်ပါဘူး "
" ဒါ အမှန်ပဲ ။ ကျုပ်တို့ရဲ့ သေဆုံးမှုက လောထျန်းအတွက် အားဆေး ဖြစ်နိုင်မှာပါ ။ လောရုံ .. မင်း ထွက်မသွားလိုက်နိုင်တာတော့ စိတ်မကောင်းပါဘူးကွာ "
ဒုတိယအကြီးကဲက လောရုံအား လှည့်ကြည့်လိုက်သည်။
လောရုံသည် ဆဋ္ဌမ အကြီးကဲနှင့်အတူ ထွက်သွား၍ရသော်လည်း မသွားဘဲ အကြီးကဲများနှင့် အတူတူ ပြဿနာကို ရင်ဆိုင်ရန် တမင်နေခဲ့ခြင်းဖြစ်သည်။
" သခင်ကြီး နဲ့ အကြီးအကဲတို့ စိတ်မကောင်း မဖြစ်ကြပါနဲ့ဗျာ ။ ဒါ ကျုပ်ကိုယ်တိုင် ရွေးချယ်ခဲ့တာပါ ။ သခင်လေးက ကျုပ်ရဲ့ အကိုကြီးတစ်ယောက်လိုပါပဲ ။ သခင်လေးရဲ့အဖေက ကျုပ်တို့အတွက် အသက်ကိုစတေးနေတာကို ကျုပ် ဘာမှမလုပ်ဘဲ ကြည့်မနေနိုင်ဘူးဗျ ။ ပြီးတော့ ကျုပ်ကလဲ လောမိသားစုဝင်တစ်ယောက်ပဲလေ ။ သေရမှာ မကြောက်ပါဘူး "
လောရုံက ဂုဏ်ယူစွာ ပြောလိုက်သည်။
" လောရုံ မင်းက လူတော်လေးပဲ "
အကြီးအကဲများ ခေါင်းညိတ်ကာ ချီးမွှမ်းလိုက်ကြသည်။
ထိုစဥ် လေထဲတွင်ပင် ရှိနေသေးသည့် နျိုဝူဖုန်း၏အကြည့်က အဘိုးအိုထံသို့ ရောက်သွား၏။
အဘိုးအိုက သူ့အား ဝမ်းသာအားရ ကြည့်နေသည်ကို သူ တွေ့လိုက်ရသည်။
" မင်းက ငါ့ကို သိလို့လား "
နျိုဝူဖုန်းက မေးလိုက်သည်။
" သိပါတယ် ။ ကျုပ်က ရှန်းဝူနန်းတော်က အရာရှိတစ်ယောက်ပါ ။ နတ်ဆိုးဘုရင်ဆိုတဲ့နာမည်ကို ကျုပ်ကြားဖူးနေတာ ကြာပြီ။ ခုမှပဲ လူကိုယ်တိုင် တွေ့ခွင့်ရတော့တယ်ဗျာ ။ နတ်ဆိုးဘုရင်က အများပြောကြသလို တကယ်အစွမ်းထက်တဲ့ သူပါပဲ "
အဘိုးအိုက မြှောက်ပင့်၍ ချီးကျူးစကား ဆိုလိုက်သည်။
သို့သော် သူ နျိုဝူဖုန်းက အေးစက်စက်သာ ပြန်ပြော၏ ။
" ရှန်းဝူ နန်းတော် ဟုတ်လား .. ငါလဲ ကြားဖူးတယ် ။ တစ်ခု မေးပါဦးမယ် .. ဒါ ပျောင်ပိုင်မြို့လား "
အဘိုးအိုက ဦးညွှတ်၍
" ဟုတ်ပါတယ် ၊ ဒါ ပျောင်ပိုင်မြို့ပါ "
ဟု ပြန်ဖြေလိုက်သည်။
နျိုဝူဖုန်းက ဆက်၍
" ဒါဆို ဒီမြို့မြောက်ပိုင်းမှာ လောမိသားစုဆိုတာ ရှိမှာပေါ့ ။ မင်း သူတို့ကို သိလား "
ဟု မေးလိုက်သည်။
အဘိုးအို အလွန်ဝမ်းသာ သွား၏။
နတ်ဆိုးဘုရင်က လောမိသားစုအကြောင်းကို မေးလိုက်သည်လား .. ။ သူသည် လောမိသားစုကို ဖျက်ဆီးရန်အတွက် လာခဲ့ခြင်းသာ ဖြစ်ရပေသည်။
" နတ်ဆိုးဘုရင်ကို သတင်းပို့ပါတယ် ။ ဒီနေရာက လောမိသားစုအိမ်တော်ပါ ။အောက်မှာ ရှိနေကြတဲ့ လူတွေအားလုံးက လောမိသားစုဝင်တွေပဲ "
အဘိုးအိုက ပြောလိုက်သည်။
" ဟင် "
နျိုဝူဖုန်း ၏ မျက်လုံးများ အရောင်လက်သွားကာ မြေပေါ်သို့ ချက်ချင်း ဆင်းသက်လိုက်သည်။
ကျင့်ကြံသူ သုံးဦးကလဲ သူနှင့် မရှေးမနှောင်းပင် ဆင်းသက်လိုက်ကြသည်။
နတ်ဆိုးဘုရင် ဆင်းလာသည်ကို မြင်သောအခါ လောမိသားစုဝင်များ ကြောက်လန့်တကြား လက်သီးဆုပ်လိုက်ကြသည်။ သို့သော် သူ့တို့၏ မျက်နှာများကမူ ဟန်မပျက်ဘဲ တည်ငြိမ်စွာ ရှိနေကြ၏ ။
သေရမည်ဆိုလျှင်ပင် ဂုဏ်သိက္ခာဖြင့် သေရခြင်းက ပိုကာင်းသည် မဟုတ်ပါလား ။
နျိုဝူဖုန်းက အားလုံးကို ဝေ့ဝဲကြည့်လိုက်ပြီးနောက် ဦးညွှတ်၍ ပြောလိုက်သည်။
" လောမိသားစုရဲ့ ခေါင်းဆောင်က ဘယ်သူလဲဆိုတာ ကျုပ် သိခွင့်ရှိမလားခင်ဗျာ "
ဟင် ...
ထိုလူက မည်သည့်အတွက်ကြောင့် ဤမျှ ယဥ်ကျေးနေရပါသနည်း ။
အားလုံး အံ့သြမှင်သက်သွားကြသည်။
" ကျုပ်က လောမိသားစုရဲ့ခေါင်းဆောင် ၊ လောဖုန်းပါ "
လောဖုန်းက ခေါင်းမော့ကာ ဖြေလိုက်သည်။
သူ့ရင်ထဲတွင် ကြောက်စိတ်များ ကြီးစိုးနေသည့်တိုင် မျက်နှာပေါ်သို့ ထုတ်ပြ၍ မဖြစ်ပါချေ။
" ဒါဆို လောထျန်းက သခင်ကြီးနဲ့ ဘယ်လိုများ ပတ်သက်လဲဗျာ "
နျိုဝူဖုန်းက သူ့ကိုကြည့်ကာ ဂရုတစိုက် ထပ်မေးလိုက်သည်။
" လောထျန်းက ကျုပ်ရဲ့ သားပဲ "
လောဖုန်းက ဂုဏ်ယူစွာ ပြော၏ ။
သူ့သားအကြောင်း ပြောနေရလျှင် သူ အမြဲတမ်း ဂုဏ်ယူနေမည်ဖြစ်သည်။
" ဟား ဟား .. ဒီအရူးက အခုထိတောင် မာန်မလျှော့သေးဘူး ။ သူက လောထျန်းရဲ့ အဖေမှန်းသာ နတ်ဆိုးဘုရင်ကြီး သိသွားရင် သူ့ကို ချက်ချင်းရိုက်သတ်ပစ်မှာ မကြောက်ဘူးနဲ့တူတယ် "
အဘိုးအိုက စိတ်ထဲမှ ကြိတ်ကာ လှောင်ရယ်လိုက်သည်။
သို့သော် ထိုအချိန်တွင် နျိုဝူဖုန်းက လောဖုန်းရှေ့၌ ဒူးထောက်ချကာ ဦးညွှတ်အရိုအသေပေးလိုက်သည်။
" အဘိုး .. ကျုပ်က အဘိုးရဲ့ မြေး ၊ နျိုဝူဖုန်းပါ ။ ကျုပ် ဂါရဝပြုပါတယ် "
နှိုဝူဖုန်းက အရိုအသေပြုလျက် ပြောလိုက်သည်။
သူ ဒူးထောက်လိုက်သည်နှင့် လောမိသားစု အိမ်တော်တစ်ခုလုံးပင် တုန်ခါသွား၏ ။
အဖိုး ...
မြေး ...
နတ်ဆိုးဘုရင်က လောဖုန်း၏ မြေးတဲ့လား ..
သို့သော် ထိုလူမှာ နတ်နွားတစ်ကောင်ဖြစ်ပြီး လောဖုန်းက လူသားတစ်ယောက်ပင် .. ။
" သခင်ကြီး .. ဒါ ဘယ်တုန်းက ဖြစ်သွားခဲ့တာလဲ "
ပထမအကြီးအကဲက လောဖုန်းအား ဘေးသို့ဆွဲခေါ်ကာ မေးလိုက်သည်။
" ဗျာ .. ဘယ်ဟာက ဘယ်အချိန် ဖြစ်ရမှာလဲဗျ "
လောဖုန်း အလွန်စိတ်ရှုပ်သွားသည်။
" မိသားစုခေါင်းဆောင်က တကယ်အစွမ်းထက်တာပဲ ၊ ကျုပ် လေးစားပါတယ်ဗျာ "
ဒုတိယအကြီးကဲက နျိုဝူဖုန်းကိုကြည့်ကာ လောဖုန်းအား လက်မထောင်ပြလိုက်သည်။ သို့သော် သူ့မျက်နှာထက်မှ အပြုံးကမူ အနည်းငယ် ထူးဆန်းနေ၏ ။
" ဒုတိအကြီးကဲ .. ဘာကို ဆိုလိုတာလဲဗျ "
လောဖုန်းက ဒုတိယအကြီးကဲကို ကြည့်လိုက်သည်။
" သခင်ကြီး .. လူတစ်ယောက်ကို အပေါ်ယံရုပ်ရည်ပဲကြည့်ပြီး ဆုံးဖြတ်လို့ မရဘူးလေ ။ ကျုပ်တို့က သခင်ကြီးကို .. ဟို .. အစားအသောက်နဲ့ ပတ်သက်ပြီး အရမ်းချေးများမယ်လို့လဲ မမျှော်လင့်ထားပါဘူး "
တတိယအကြီးကဲကလည်း အံ့အားသင့်နေရာမှ ကမန်းကတန်း ဝင်ရှင်းလိုက်သည်။
ထိုအချိန်မှသာ သူတို့ ဆိုလိုသည့်အဓိပ္ပါယ်ကို လောဖုန်း သဘောပေါက်သွား၏။
" အကြီးကဲတို့ .. အထင်လွဲနေပါပြီဗျာ ။ မင်းက ဘယ်သူလဲ ။ ဘာဖြစ်လို့ ကျုပ်ကို အဖိုးလို့ ခေါ်နေတာလဲ "
လောဖုန်းမှာ နျိုဝူဖုန်းအား မည်သို့ ခေါ်ရမည်ကိုပင် မသိတော့ချေ။
နျိုဝူဖုန်း ခေါင်းမော့လာကာ မေးသည်။
" လောထျန်းက အဖိုးရဲ့ သားမဟုတ်လား "
လောဖုန်း ခေါင်းညိတ်လိုက်၏ ။
" ဟုတ်တယ်လေ "
နျိုဝူဖုန်း စကားဆက်လိုက်သည်။
" လောထျန်းက ကျုပ်အမေရဲ့ အကိုကြီး ၊ ကျုပ် ဦးလေးပဲဗျ ။ ဆိုတော့ သခင်ကြီးက ကျုပ်အဖိုးပေါ့ဗျာ "
" ဘာတွေဖြစ်နေလဲဆိုတာ ကျုပ် .. သေချာနားမလည်သေးဘူး ။ အရင်ဆုံး ထပြီး ဖြည်းဖြည်းချင်း ပြောပါ "
လောဖုန်းမှာ အလွန်စိတ်ရှုပ်နေသည်။
နျိုဝူဖုန်းက ဖြည်းဖြည်းချင်း ထရပ်ကာ သူနှင့် လောထျန်းတို့အကြောင်း အားလုံးကို ပြောပြလိုက်သည်။
ထို့နောက်မှသာ အဖြစ်ပျက် အလုံးစုံကို လောမိသားစုဝင်များ ဇာတ်ရည်လည်သွားကြ၏ ။
တစ်ချိန်တည်းမှာပင် သူတို့ ပို၍လည်း အံ့သြတုန်လှုပ်သွားကြရသည်။
လောထျန်းက ထုံရွှယ်အဆင့်ရှိ နတ်သားရဲတစ်ကောင်ကိုပင် ဖိနှိပ်နိုင်နေသည်လား ။
ထိုမျှမက နှစ်ပေါင်းငါးရာကျော် အသက်ရှင်နေခဲ့သည့် နတ်သားရဲတစ်ကောင်ကပင် သူ့အား အကိုကြီးအဖြစ် သတ်မှတ်လာအောင် လုပ်နိုင်ခဲ့၏ ။
လောထျန်းက သူတို့ထင်ထားသည်ထက် များစွာပိုအစွမ်းထက်နေဟန်ပင် ။
" အဖိုး .. ဒါနဲ့ .. ဒီလူတွေကရော လောမိသားစုကပဲလား ။ ဒိလူတွေက ရန်လိုနေတယ်လို့ ကျုပ် ဘာလို့ ခံစားနေရတာလဲ မသိဘူး "
နျိုဝူဖုန်းက ကောင်းကင်ထိန်းချုပ်အဆင့်မှ ကျင့်ကြံသူသုံးယောက်ကို လှည့်ကြည့်ကာ မေးလိုက်သည်။
လောဖုန်းက မြန်မြန်ပြန်ဖြေ၏။
" မဟုတ်ဘူးကွ ၊ သူတို့က လောမိသားစုကို ဖျက်ဆီးဖို့ ရောက်နေကြတာ "
" ဘာ .. "
ထိုစကားကို ကြားသည်နှင့် နျိုဝူဖုန်း၏ မျက်လုံးများ ပြူးကျယ်သွားပြီး သူ့တစ်ကိုယ်လုံး စွမ်းအင်များဖြင့် ပြည့်လာသည်။
" ငါ့အဖိုးရဲ့ မိသားစုကို ဖျက်ဆီးချင်တယ်ပေါ့လေ ။ မင်းတို့ သုံးယောက်က တော်တော်အတင့်ရဲနေတာပဲ "
နျိုဝူဖုန်းက ထိုသုံးယောက်ရှေ့တွင် မတ်တပ်ရပ်ကာ သူတို့ကို ငုံ့ကြည့်လိုက်သည်။
ထိုအချိန်တွင် သူတို့သုံးယောက်မှာ အံ့သြမှင်သက်နေကြ၏ ။
ထျန်းတန့်တောင်မှ နတ်ဆိုးဘုရင်က လောမိသားစုသို့လာကာ ကာကွယ်ပေးလိမ့်မည်ဟု သူတို့ လုံးဝ ထင်မထားခဲ့ပါချေ။
ပို၍ ဒေါသထွက်စရာ ကောင်းသည်မှာ နတ်ဆိုးဘုရင်က လောဖုန်းအား အဖိုးဟု ခေါ်နေခြင်းဖြစ်သည် ။
ထိုနတ်ဆိုးဘုရင်မှာ လောဖုန်းထက်ပင် အသက်ပိုကြီးမည့်ပုံပင်။
" သွားကြစို့ "
သူတို့သုံးယောက်ထဲမှ အကြီးဆုံး အဘိုးကြီးက အရင်ဆုံး လှုပ်ရှားသွားကာ နောက်လှည့်၍ ထွက်ပြေးရန် ပြင်လိုက်သည်။
သို့သော် ..
ဝုန်း ...
နျိုဝူဖုန်းက လက်ကိုဆန့်ထုတ်ကာ အဘိုးကြီးအား ချက်ချင်း ဖမ်းဆုပ်လိုက်သည်။
" သခင်ကြီး နတ်ဆိုးဘုရင် ၊ ကျေးဇူးပြုပြီး သနားညှာတာပေးပါနော် ။ကျုပ်က ရှန်းဝူနန်းတော်က ခိုင်းလို့သာ လုပ်ရတာပါ "
အဘိုးအိုက သနားငဲ့ညှာရန် တောင်းပန်လိုက်သည်။
" ရှန်းဝူနန်းတော် ဟုတ်လား ။ မင်းက ကျုပ်အဖိုးကို လာပြီး ရှုပ်ရဲနေသေးတယ်။ ဘုရင်ရှန်းဝူ ကိုယ်တိုင် လာမယ်ဆိုရင်တောင် ကျုပ်က သူ့ကို အသေသတ်ပစ်ရမှာပဲ "
နျိုဝူဖုန်းက ပြောပြောဆိုဆိုပင် လက်ကို အားထည့်၍ ညှစ်လိုက်သည်။
ဝုန်း ..
အဘိုးအို၏ ခန္ဓာကိုယ်က ချက်ချင်းပင် သွေးမှုန်များအဖြစ်သို့ ပြောင်းလဲသွားပြီး နေရာတွင်ပင် သေဆုံးသွားတော့သည်။
" ဟင် .. "
ထိုအခြင်းအရာကို မြင်လိုက်ရသည့် ကျန်နှစ်ယောက်မှာ အလွန်ကြောက်ရွံ့ တုန်လှုပ်သွားကြသည်။
ကောင်းကင်ထိန်းချုပ်အဆင့် အစွမ်းထက် ကျင့်ကြံသူတစ်ယောက်က ဤမျှ အလွယ်တကူ အသတ်ခံလိုက်ရသည်လား .. ။
" ယား .. "
ထိုစဥ် တစ်ဖက်တွင် ရှိနေသည့် ဆံနီဝိဥာဥ်မှာ ရှောင်တိမ်း၍ မရတော့သည်ကို သိသွားကာ နျိုဝူဖုန်းထံသို့ ဓားတစ်လက်ဖြင့် တိုးဝင်သွားသည်။
" သတိထား "
လောဖုန်းနှင့် အခြားသူများ သံပြိုင်အော်ကာ သတိပေးလိုက်ကြ၏။
သို့သော် ...
ဆံနီဝိဥာဥ်၏ ဓားက နျိုဝူဖုန်း၏ ခေါင်းကို ရိုက်မိသွားသော်လည်း ၎င်းက သူ့အကာအကွယ် အလင်းတန်းကိုပင် မချိုးဖျက်လိုက်နိုင်ပါချေ။
ထိုအစား ဆံနီဝိဥာဥ်၏ လက်ကောက်ဝတ်သာ ကျိုးကြေသွားပြီး သွေးများ စီးကျလာ၏။
" ဟင် ... မင်း .. "
သူက နျိုဝူဖုန်းအား ထိတ်လန့်တကြား ကြည့်လိုက်သည်။
" မင်းက ငါ့ကို ဓားနဲ့ ထိုးခဲ့တာဆိုတော့ အခု ငါ့အလှည့်ပေါ့ကွာ "
နျိုဝူဖုန်းက သူ့အား အေးစက်စက်ကြည့်ကာ လက်ထဲမှ တင်းပုတ်ကို မြှာက်လိုက်သည်။
ဘုန်း ..
တစ်ချက်တည်းဖြင့်ပင် ဆံနီဝိဥာဥ် အရိုးနှင့် အသားများ ညက်ညက်ကြေသွားတော့သည်။