သူ ပြန်ရောက်နေပြီ

" ဘယ်လို .. "

ဘုရင်ကျင်းဖန်၏ နဖူးမှ ချွေးများပင် ထွက်လာသည်။

သူသည် ဒုတိယသိုင်းကွက်ကို အလေးနက်ထားကာ တိုက်ခိုက်ခဲ့သော်လည်း လောထျန်းက ဂရုမစိုက်ဟန်ဖြင့် လစ်လျူရှုခဲ့၏ ။ ထိုလူ၏ အစွမ်းက သူ ထင်ထားသည်ထက်ပင် ပို၍ ကြောက်စရာ ကောင်းနေပေသည်။

သူ ထိုလူ၏ စီးတော်ယာဥ် ဖြစ်လာရတော့မည်လား .. ။

သူသည် အခြားသူတစ်ယောက်၏ လက်အောက်ခံ စီးတော်ယာဥ် ဖြစ်ချင်ပါရဲ့လား .. ။

ထိုအကြောင်းကို တွေးမိသည်နှင့် သူ့ရင်ထဲမှ မနှစ်မြို့မှုကို ဘုရင်ကျင်းဖန် ခံစားလိုက်ရသည်။

သူသည် ထုံရွှယ်အဆင့် နတ်ဆိုးသားရဲတစ်ကောင်ဖြစ်ပြီး ဘုရင်ကျင်းဖန်ဟူသော အမည်ကို ရထားသူဖြစ်သည် ။

အကယ်၍ လူသားတစ်ယောက်ကသာ သူ့အား စီးတော်ယာဥ်အဖြစ် အသုံးချလိုက်ပါက ...

ထိုအကြောင်းကို စဥ်းစားမိသည်နှင့် သူ့ရင်ဘတ်ထဲတွင် တင်းကျပ်သွားသည်။

" ကောင်လေး .. ငါ ကြိုပြောထားမယ်နော် ။ ငါ့ရဲ့ နောက်သိုင်းကွက်က မျှော်လင့်မထားလောက်အောင် အစွမ်းထက်လိမ့်မယ် ။ မင်းတို့ လူသားမျိုးနွယ်က နတ်သိုင်းဘုရင် လို့ တင်စားပြီး ခေါ်ကြတဲ့ ဘုရင်ရှန်းဝူကတောင် ဒီသိုင်းကွက်ကို မခံနိုင်ဘူး ။ ပြီးတော့ ငါ စပြီး ရွှေ့လိုက်တာနဲ့ ပြန်နောက်ဆုတ်လို့လဲ မရတော့ဘူး ။ ဆိုတော့ မင်း ရှေ့ဆက်တိုးချင်တာ သေချာရဲ့လား "

ဘုရင်ကျင်းဖန်က ခပ်ပြတ်ပြတ် မေးလိုက်သည်။

လောထျန်းက စိတ်မရှည်ဟန်ဖြင့်

" အပိုစကားတွေ ပြောမနေပါနဲ့ဗျာ ၊ လုပ်မှာသာ လုပ်စမ်းပါ "

ဟု ပြန်ပြောလိုက်သည်။

ဘုရင်ကျင်းဖန်က စိတ်ဆုံးဖြတ် ပြီးသွားဟန်ဖြင့် တစ်ကိုယ်တည်း ပြောလိုက်သည်။

" မတတ်နိုင်ဘူး ၊ ငါပြောတတ်သလောက်တော့ ကောင်းကောင်းရှင်းပြပြီးပြီ။ တကယ်လို့ မင်း သေသွားခဲ့ရင်တောင် မင်းရဲ့ မကောင်းတဲ့ကံကိုပဲ အပြစ်တင်လိုက်တော့ကွာ "

သူက ထိုသို့ ပြောပြီးသည်နှင့် တောင်ပံ တဖျတ်ဖျတ်ခတ်ကာ ကောင်းကင်ယံသို့ ပျံတက်သွားလိုက်သည်။

" မင်းသာ ဒီသိုင်းကွက်ကို ခံနိုင်ရည်ရှိမယ်ဆိုရင် ငါ မင်းရဲ့ စီးတော်ယာဥ်အဖြစ် လုပ်ပေးမယ် ။ နတ်ဘုရားအသက်ရှူကျင့်စဥ် ၊ ကောင်းကင်ဘုံအစွမ်း "

ဘုန်း ...

ဘုရင်ကျင်းဖန်က နောက်တစ်ကြိမ် ပါးစပ်ဟလိုက်ရာ ကြောက်မက်ဖွယ် အလင်းတန်းတစ်ခု ထွက်လာသည်။

ထိုအလင်းတန်း ထွက်ပေါ်လာသည်နှင့် ကောင်းကင်ကြီးတစ်ခုလုံး ပရမ်းပတာ ဖြစ်သွား၏။ ယခုလေးတင် ကြည်လင်နေခဲ့သည့် ကောင်းကင်ကြီးက တိမ်တိုက်မဲများဖြင့် တမဟုတ်ချင်း ဖုံးအုပ်သွားသည် ။

မိုးကြိုးလျှပ်စီးများက ကောင်းကင်ယံမှ ကျလာသည့်အလား လောထျန်းဆီသို့ တိုးဝင်သွားကြသည်။

လောထျန်းက ခေါင်းမော့၍ သိုင်းကွက်ကို ကြည့်ကာ အနည်းငယ် မျက်မှောင်ကြုံ့သွားသည်။

" ဒီသိုင်းကွက်က ခုနလေးတင် ဖုန်တွေအများကြီး ထအောင် လုပ်သွားတာ ။ မြေကြီးပေါ်သာ ပြန်ကျလာမယ်ဆို ငါတော့ ဖုန်တွေကြားထဲ အသက်ရှုကြပ်ပြီး သေမှာပဲ ။ အဲ့တော့ မြေကြီးပေါ် အကျခံလို့ မဖြစ်ဘူး ၊ ငါ့ဘက်က အရင်ဦးအောင် လုပ်ရမယ် "

လောထျန်းက စိတ်ဆုံးဖြတ်ပြီးသွားဟန်ဖြင့် ထိုင်ချလိုက်သည်။

" ကောင်းကင်ဘုံလက်သီး .. နဂါးကိုးလွှာ စတုတ္ထအကွက် "

လောထျန်းက လက်သီးဖြင့် ထိုးလိုက်သည်နှင့် သူ့လက်သီးထဲမှ စွမ်းအင်များက နဂါးအရိပ်တစ်ခုအဖြစ် စုစည်းသွားပြီး ဘုရင်ကျင်းဖန်၏ ရွှေရောင်အလင်းတန်းဆီသို့ တိုးဝင်သွားသည်။

ဘုန်း ..

စွမ်းအင်နှစ်ခု လေထဲတွင် ရင်ဆိုင်တွေ့သွား၏ ။ ၎င်းစွမ်းအင်နှစ်ခုမှာ ခဏတာမျှ သူမသာ ကိုယ်မသာ ဖြစ်နေပြီးနောက် နဂါးပုံရိပ်လက်သီးက အလင်းတန်းအား ကျိုးကြေသွားအောင် လုပ်လိုက်တော့သည်။

ထို့နောက် ၎င်းက ကျယ်လောင်စွာ အော်မြည်ကာ ဘုရင်ကျင်းဖန်ဆီသို့ တဟုန်ထိုး တိုးဝင်သွားလိုက်ပြန်သည်။

" ဘာ .. "

ထိုအခြင်းရာကို မြင်သည်နှင့် လေထဲတွင်ရှိနေသော ဘုရင်ကျင်းဖန်၏ မျက်နှာ ရုတ်ချည်း ပြောင်းလဲသွားသည်။

သူသည် အစွမ်းကုန်သုံးကာ တိုက်ခိုက်ခဲ့သော်လည်း တစ်ဖက်လူက သူ့အား အေးအေးဆေးဆေးပင် အနိုင်ယူသွားခဲ့၏ ။

သူ့ဆီသို့ ဦးတည်လာနေသည့် နဂါးပုံရိပ်လက်သီး၏ အစွမ်းကို မြင်ထားရသည့်အတွက် ဘုရင်ကျင်းဖန်မှာ လျစ်လျူမရှူရဲဘဲ ချက်ချင်း တိမ်းရှောင်လိုက်သည်။

နဂါးပုံရိပ်လက်သီးက သူ့ခေါင်းဘေးမှ ဖြတ်၍ ပျံသွား၏။

ထိုလက်သီးချက်ကို တိုက်ရိုက် မခံခဲ့ရသည့်တိုင် နံဘေးမှ ဖြတ်ပျံသွားစဥ် ခံစားလိုက်ရသောအစွမ်းထက်လှသည့် ဖိနှိပ်စွမ်းအင်ကြောင့် ဘုရင်ကျင်းဖန် သတိမေ့လဲကျလုမတတ်ပင် ဖြစ်သွားသည်။

ဘုန်း ....

နဂါးပုံရိပ်လက်သီးက လေထဲသို့

ဆက်ထိုးတက်သွားကာ ​ကောင်းကင်ယံတစ်ခွင်လုံး ဖုံးနေသော တိမ်တိုက်မဲများကို ထိုးခွင်းပစ်လိုက်တော့သည်။

စူးရှသော နေအလင်းရောင် ပြန်ကျလာ၏ ။

ဘုရင်ကျင်းဖန်မှာ အဖြစ်အပျက်များကို ကြည့်ကာ စကားမပြောနိုင်ဘဲ ဖြစ်နေသည်။

" နောက်နေတာ များလားဟ .. ဒီလက်သီးရဲ့အစွမ်းက ... သူက ကွေ့ရှအဆင့်က သူများ ဖြစ်နေမလား "

အကယ်၍ သူသာ ထိုလက်သီးနှင့် ထိပ်တိုက်ရင်ဆိုင်လိုက်ရပါက အသက်မသေလျှင်ပင် ဒဏ်ရာဆိုးဆိုးရွားရွား ရသွားခဲ့မည်ကို ဘုရင်ကျင်းဖန် နားလည်လိုက်သည်။

လက်သီးချက် တစ်ချက်တည်းဖြင့်ပင် ....

ထို့နောက် သူက လောထျန်းအား အလွန်အံ့သြနေသည့် အကြည့်ဖြင့် လှည့်ကြည့်လိုက်သည်။

" အခုက သိုင်းကွက် သုံးကွက်လဲ ပြီးသွားပြီဆိုတော့ ၊ ဘယ်လိုလဲ "

လောထျန်း မေးလိုက်သည်။

ဘုရင်ကျင်းဖန်က မျက်တောင်ပုတ်ခတ်ပုတ်ခတ် လုပ်ကာ ပြုံး၍ ပြောလိုက်သည်။

" ထားလိုက်ပါတော့ဗျာ ၊ ကျုပ် အရှုံးပေးပါတယ် ။ ကျုပ် စီးတော်ယာဥ်တစ်ကောင်အဖြစ် နေပါ့မယ်။ ကွေ့ရှအဆင့် ကျင့်ကြံသူတစ်ယောက်ရဲ့ လက်အောက်မှာ ခစားရတာ အရှုံးမရှိပါဘူး "

သူက ပြောပြောဆိုဆိုပင် လောထျန်းရှေ့သို့ ဆင်းသက်ကာ ဦးညွှတ် အရိုအသေ ပေးလိုက်သည်။

" ကျုပ်နာမည်က ဘုရင်ကျင်းဖန်ပါ ။ ကျုပ် သခင်လေးရဲ့ စီးတော်ယာဥ်အဖြစ် အလိုတူစွာ လက်ခံပါတယ်။ သခင်လေးရဲ့ နာမည်ကိုရော သိခွင့် ရှိမလားဗျာ "

" ကျုပ်က ပျောင်ပိုင်မြို့က လောထျန်းပါ "

လောထျန်းက သူ့ကိုယ်သူ မိတ်ဆက်လိုက်သည်။

" လောထျန်း တဲ့လား .. ကျုပ် သေချာ မှတ်ထားပါမယ် "

ဘုရင်ကျင်းဖန် ခေါင်းညိတ်လိုက်သည်။

" ကောင်းပြီ ၊ ကျုပ် အခု အလျင်လိုနေလို့ ကျုပ်ကို ပျောင်ပိုင်မြို့ကို လိုက်ပို့ပေးပါ "

လောထျန်းက ဘုရင်ကျင်းဖန်၏ ကျောပေါ်သို့တက်ကာ ပြောလိုက်သည်။

သူ၏ နဂါးကို ဆုံးရှုံးခဲ့ရသည့်တိုင် ထုံရွှယ်အဆင့် ငှက်ကြီးတစ်ကောင်ကို စီးတော်ယာဥ်အဖြစ် ရလိုက်သည်ဖြစ်ရာ သူ့အတွက် အရှုံးမရှိဟု ဆိုနိုင်ပေသည်။

ရွှေရောင်ငှက်ကြီးက ချက်ချင်းပင် တောင်ပံများကို ဖြန့်၍ ကောင်းကင်ယံသို့ ပျံတက်သွားလိုက်သည်။

ထိုငှက်ကြီး၏ အမြန်နှုန်းက သူ့နဂါးထက်ပင် ပိုသာနေသေး၏ ။

" သခင်လေး .. ကျုပ် တစ်ခုလောက်မေးချင်လို့ ။ သခင်လေးက အခု ဘယ်ကျင့်ကြံခြင်းအဆင့်မှာလဲ "

သူတို့ ပျံသန်းလာစဥ်အတွင်း ဘုရင်ကျင်းဖန်က လောထျန်းအား မေးလိုက်သည်။

" ကျုပ်လား .. ခင်ဗျား မမြင်လိုက်ဘူးလားဗျ ။ ကျုပ်က ကိုယ်ခန္ဓာသန့်စင်ခြင်းအဆင့်မှာလေ "

လောထျန်းက လဲလျောင်းကာ ဖြေလိုက်သည်။

" ဟင် ..ကိုယ်ခန္ဓာသန့်စင်ခြင်း အဆင့် .. နောက်နေတာလား "

ဘုရင်ကျင်းဖန် မယုံကြည်နိုင် ဖြစ်သွားသည်။

လောထျန်းသည် သူ့ထက် ကျင့်ကြံခြင်းအဆင့် များစွာပိုမြင့်သောကြောင့် သူ့အဆင့်အစစ်အမှန်ကို ဖုံးထားနိုင်ခြင်း ဖြစ်မည်ဟုသာ သူ ထင်ခဲ့မိ၏ ။

သို့သော် လောထျန်း ပြောသည့်အတိုင်း ဆိုပါက ...

" ကျုပ်က နောက်ပြောင်ချင်စိတ် ရှိနေတယ်လို့များ ထင်လို့လားဗျ ။ ကျုပ် စီးတော်ယာဥ် ဘာဖြစ်လို့ ရှာနေရတယ်လို့ ထင်လို့လဲ ။ ကျုပ်အဆင့်က နိမ့်လွန်းနေသေးတော့ မပျံနိုင်သေးလို့ ရှာနေရတာပဲ "

လောထျန်း အထွန့်တက်လိုက်သည်။

အမှန်တွင်လည်း သူသည် ကိုယ်ခန္ဓာသန့်စင်ခြင်း အဆင့်၌ဿာ ရှိသေးသည့်တိုင် ကောင်းကင်ဘုံ ကိုယ်ခန္ဓာရွှေ့ကွက်ကိုပါ တတ်မြောက်ထားသည့်အတွက် တိုက်ခိုက်ရာတွင် လုံလောက်သည်ထက်ပင် ပိုနေခြင်းဖြစ်သည် ။

သို့သော် အလျင်လိုနေသည့်အချိန်တွင်မူ ၎င်းပညာရပ်တစ်ခုတည်းဖြင့် ဆိုပါက ဒုက္ခရောက်နိုင်ပေသည်။

ထို ကိုယ်ခန္ဓာရွှေ့ကွက်ကို အသုံးချရန်ဆိုလျှင် စိတ်စွမ်းအင်များ အဆက်မပြတ် သုံးနေရန် လိုအပ်ရုံမက မတော်တဆမှုများလည်း ဖြစ်နိုင်သေး၏ ။

ပြီးခဲ့သည့် တစ်ခေါက်က သွေးနီကင်းမြီးကောက် နတ်ဆိုးကို သူ မတော်တဆ သတ်မိသွားခဲ့သည် မဟုတ်ပါလား ။

ထိုလူက နတ်ဆိုးမိစ္ဆာတစ်ကာင် ဖြစ်နေ၍ ပြဿနာမရှိသော်လည်း နောက်တစ်ကြိမ် အပြစ်ကင်းသည့် အဘွားအိုတစ်ယောက် ကို သတ်မိသွားလျှင် ပြဿနာ ရှိသွားနိုင်ပေသည်။

ဘုရင်ကျင်းဖန်ကမူ လောထျန်း၏ စကားကို ကြားပြီးသည်နှင့် အလွန်အံ့သြတုန်လှုပ်နေ၏ ။

" နောက် .. နောက်နေတာများလားဗျာ ။ ကိုယ်ခန္ဓာသန့်စင်ခြင်းအဆင့်က ဒီလို ကြောက်စရာ အစွမ်းမျိုးကို ပိုင်ဆိုင်ထားတယ် .. "

သူက လောထျန်းအား ခေါင်းလှည့်၍ ကြည့်လိုက်သည်။ သူ့ရင်ထဲမှ အံ့သြမှုကို စကားလုံးများဖြင့်ပင် မဖော်ပြနိုင်တော့ချေ။

" သခင်လေးက ရှေးခေတ်က အစွမ်းထက်တဲ့ သူတွေရဲ့ လမ်းစဥ်အတိုင်း ခန္ဓာကိုယ်အစွမ်းကိုပဲ အဓိကထားပြီး ကျင့်ကြံနေတာလား "

ဘုရင် ကျင်းဖန် ထပ်မေးလိုက်သည်။

လောထျန်း အံ့အားသင့်သွားပြီး ပြန်ဖြေ၏။

" မဟုတ်ပါဘူးဗျာ ၊ ကျုပ်က နောက်လထဲမှာ စိတ်စွမ်းအားတွေကို ချီပင်လယ်အဖြစ် စုစည်းနိုင်ဖို့ မျှော်လင့်နေတာ "

ဘုရင်ကျင်းဖန် ခေါင်းညိတ်ကာ သေချာမှတ်ထားလိုက်သည်။

လောထျန်းသည် ခန္ဓာကိုယ်အစွမ်းကို အဓိကထား မလေ့ကျင့်နေသည့်တိုင် ကြောက်စရာအစွမ်းကို ပိုင်ဆိုင်ထား၏ ။

သူ စိတ်စွမ်းအင် စုဆောင်းခြင်းအဆင့်သို့ ရောက်သွားပါက မည်သို့ ဖြစ်သွားမည်နည်း။

ယခုထက်ပင် ပို၍ အစွမ်းထက်လာမည် မဟုတ်ပါလား ။

လောထျန်းသည် လူသားတစ်ယောက် မဟုတ်ဘဲ သားရဲတစ်ကောင်နှင့်ပင် ပိုတူပေသည်။

ဘုရင်ကျင်းဖန်သည် အစောပိုင်းက လောထျန်း၏ စီးတော်ယာဥ်လုပ်ရန် တုန့်ဆိုင်းနေခဲ့သော်လည်း ယခုတွင်မူ လောထျန်းက အစွမ်းထက်သူ တစ်ယောက်မှန်း သံသယကင်းသွားပြီဖြစ်သည့်အတွက် စိတ်မရှိလှတော့ပေ ။

ထိုမျှအစွမ်းထက်သော သားရဲတစ်ကောင်၏ စီးတော်ယာဥ် ဖြစ်ရခြင်းမှာ ဒုက္ခမဟုတ်ဘဲ အခွင့်အရေးကောင်းတစ်ခု ရလိုက်ခြင်းပင် ။

သူတို့နှစ်ဦး စကားပြောနေစဥ်မှာပင် ပျောင်ပိုင်မြို့က မြင်ကွင်းထဲသို့ ပေါ်လာခဲ့ပြီဖြစ်သည်။

ပျောင်ပိုင်မြို့ရှိ အစောင့်တပ်များကလည်း ဘုရင်ကျင်းဖန်၏ ဧရာမ ခန္ဓာကိုယ်ကြီးအား အဝေးကြီးကပင် သတိထားမိသွားကြသည်။

" ဘုရားရေ .. ဟိုမှာ သားရဲကြီး .. သားရဲကြီး .. "

" ဧရာမ သားရဲကြီးပဲ ၊ ကိုယ်အရောင်ဝါကလဲ ကြောက်စရာ ကောင်းလိုက်တာ ။ ဒီကောင်ကြီးက ကောင်းကင်ထိန်းချုပ်အဆင့်ရဲ့ အထက်မှာပဲ ရှိရမယ် "

" ပျောင်ပိုင်မြို့မှာ ဒီနေ့ ဘာတွေဖြစ်နေတာလဲ ။ အရင်ဆုံး ကောင်းကင်ထိန်းချုပ်အဆင့် ကျင့်ကြံသူ သုံးယောက်က လောမိသားစုကို ဒုက္ခပေးဖို့ ရောက်လာကြတယ်။ ဒါပေမယ့် လောမိသားစုက သူတို့အားလုံးကို သတ်ပစ်လိုက်တယ် ။ အခု ဒီသားရဲကရော ဘာဖြစ်လို့ လာတာပါလိမ့် "

" ပျောင်ပိုင်မြို့က ဒီနေ့ ဖျက်ဆီးခံရတော့မှာ များလား။ ငါ မသေချင်သေးဘူး "

ပျောင်ပိုင်မြို့တစ်မြို့လုံး အချိန်အတန်ငယ်ကြာ အထိတ်တလန့် ဖြစ်သွားကြသည်။

" နေပါဦး .. ကြည့်ဦးကွ .. သားရဲပေါ်မှာ လူတစ်ယောက် ရှိနေတယ် "

" လူရှိနေတယ် ..ဒါဆိုရင် ဒီသားရဲက အဲ့လူရဲ့ စီးတော်ယာဥ်များလား "

" စီးတော်ယာဥ်ရဲ့ ကိုယ်အရောင်ဝါကတောင် ဒီလောက်ကြောက်စရာ ကောင်းနေတာ ၊ သူ့သခင် လူဆိုရင် ဘယ်လောက် အစွမ်းထက်လိုက်မလဲ မသိဘူး "

" ဒီသားရဲက .. လောမိသားစုဆီကို ဦးတည်ပြီး သွားနေတာကွ "

" ဟင် ... ဒီတစ်ခါလဲ လောမိသားစုပဲလား ။ လောမိသားစုမှာ ဘာတွေ ဖြစ်နေတာလဲ မသိဘူး "

အားလုံး တစ်ယောက်တစ်ပေါက် ခန့်မှန်းနေကြသော်လည်း ဖြစ်ပျက်နေသည့် ကိစ္စအတိကျကိုမူ မည်သူမှ မသိကြချေ။

ထိုအချိန်တွင် လောမိသားစုသို့ ချဥ်းကပ်လာသော ဘုရင်ကျင်းဖန်မှာ အေးစက်စက် အငွေ့သက်တစ်ခုကို ရုတ်တရက် ခံစားလိုက်ရသည်။

" ဟင် .. ဒီ အသက်ရှူသံက .. "