စဦးလက္ခဏာများ

အတိတ်တုန်းက အမှတ်ငါးကြယ်တာရာစက်ဝန်းမှ အဖိုးအို၏ ရွှေကြွက်သည် အတော်လေး အံ့ဖွယ်ကောင်းသည်။ ၎င်း၏ အလျင်က အချိန်စီးဆင်းမှုထက် ပိုပြီးမြန်ဆန်သည်။ ၎င်းက အချိန်နှင့်လေဟာနယ်ထဲမှာ မည်သည့်သဲလွန်စမှမကျန်အောင် ရွေ့လျားနိုင်သည်။ တစ်စုံတစ်ယောက်က အထွတ်အမြတ်အဆင့် ကျင့်ကြံခြင်းစွမ်းအားကို မပိုင်ဆိုင်ထားလျှင် ၎င်းကို မရှာဖွေနိုင်ပေ။

ယင်းကို ကြည့်ခြင်းအားဖြင့် ဤသားရဲက မည်မျှကြောက်စရာကောင်းကြောင်း စိတ်ကူးကြည့်နိုင်သည်။

သို့သော်လည်း ရွှေကြွက်ပေါက်စတစ်ကောင်က အရွယ်ရောက်ချင်ပြီး အမှတ်ငါးကြယ်တာရာစက်ဝန်းမှ အဖိုးအို၏ ရွှေကြွက်ကဲ့သို့ အစွမ်းထက်ချင်သည်ဆိုလျှင် ကပ်ဘေးဒုက္ခများစွာကို ကျော်ဖြတ်ရလိမ့်မည်။ ယေဘုယျအားဖြင့် ရွှေကြွက်တစ်ရာမှာ တစ်ကောင်သာလျှင် အရွယ်ရောက်နိုင်သည်။ ခက်ခဲမှုက ဖော်မပြနိုင်အောင် အလွန်မြင့်မားသည်။

သို့သော်လည်း ၎င်း၏ တန်ဖိုးက မသေးငယ်ပေ။

ရွှေကြွက်မွေးဖွားလာသည့်အခိုက် ၎င်းကို လျှို့ဝှက်ဆန်းကြယ်သော သက်လတ်ပိုင်းအရွယ် ကျင့်ကြံသူတစ်ဦးတည်းသာ အာရုံခံမိခြင်းမဟုတ်ပေ။

မိစ္ဆာငှက်မွှေးသူတော်စင်ကုန်းမြေ၏ အပြင်ဘက်၊ လူသားမျိုးနွယ်၏ ပိုင်နက်အတွင်းမှ လျောင်ရွှမ်းလှိုင်ဂူထဲတွင် အိပ်ပျော်နေသော ဝမ်မိုက ရုတ်တရက် မျက်လုံးဖွင့်လိုက်သည်။

၎င်းက ခေါင်းမော့လိုက်ပြီး မိစ္ဆာငှက်မွှေးသူတော်စင်ကုန်းမြေ၏ ဦးတည်ရာသို့ စိုက်ကြည့်လိုက်သည့်အခါ သိပ်သည်းသော ရွှေရောင်အလင်းက ၎င်း၏ မျက်လုံးထဲမှာ ထွက်ပေါ်လာသည်။

သွေးမျိုးဆက် ဆက်နွယ်မှုမှတဆင့် ၎င်း၏ မျိုးဆက်တစ်ဦး မွေးဖွားလာပြီဖြစ်ကြောင်း ၎င်းက အာရုံခံမိသွားသည်။

စိတ်ရှုပ်ထွေးမှုနှင့် စိတ်သက်သာရာရသွားသော အရိပ်အယောင်က ၎င်း၏ မျက်လုံးထဲမှာ ထွက်ပေါ်လာသည်။

အတိတ်မှာ တာအောင့်က ၎င်း၏ နတ်ဘုရားမီးတောက်ကို ငြိမ်းသတ်ခဲ့ပြီး ၎င်းကို ဖမ်းဆီးချုပ်နှောင်ခဲ့စဉ် ၎င်းဆီမှာ မျိုးဆက်မရှိခဲ့ပေ။

အမှန်မှာ ထိုဥနှစ်လုံးက ကိုယ့်ကိုယ်ကိုယ် ကယ်တင်ရန် ၎င်း၏ နောက်ဆုံးကြိုးစားမှု ဖြစ်သည်။

ဝမ်မိုက ၎င်း၏ မွေးရာပါစွမ်းရည်ကို အသုံးပြု၍ သွေးမျိုးဆက်ကို အတင်းအဓမ္မ ဆွဲထုတ်လိုက်ပြီး ဥနှစ်လုံးကို အချိန်ထဲမှာ ဖုံးကွယ်ထားခဲ့သည်။ သို့မှသာလျှင် ကမ္မဆက်နွယ်မှုနှင့် တာအောင့်၏ နတ်ဘုရားစိတ်အာရုံကို တားဆီးနိုင်လိမ့်မည်။ နောက်ဆုံးမှာတော့ ထိုဥနှစ်လုံးက ရွှီချင်းနှင့် အားညို၏ ယူဆောင်သွားခြင်းခံလိုက်ရသည်။

အတိတ်မှာ ဖြစ်ပျက်ခဲ့သည့် အရာက တိုက်ဆိုင်မှုတစ်ခုဟု ထင်မှတ်ရသော်လည်း အမှန်မှာ ယင်းက ၎င်း၏ အစီအစဉ်ဖြစ်ကြောင်း ဝမ်မိုတစ်ယောက်တည်းသာ သိသည်။

အချိန်အတော်ကြာပြီးနောက် ဝမ်မိုက မျက်လုံးမှိတ်လိုက်သည်။ ဤအခိုက်အတန့်မှာ ၎င်း၏ အသက်ဓာတ်က စတင်လွင့်ပြယ်သွားသည်။

တိုးညင်းသော ရေရွတ်သံသည်သာ ၎င်း၏ ပါးစပ်ထဲမှ ပဲ့တင်ထပ်သွားသည်။

“ ပစ္စုပ္ပန်ခွဲခွာ… ပစ္စုပ္ပန်ခွဲခွာ… ဒီနေ့ကစပြီး အချိန်ကာလကို ဖောက်ထွင်းသွားပါ… အဆုံးမဲ့လေဟာနယ်ကို ဖောက်ထွင်းသွားပါ… ဘာသဲလွန်စတစ်ခုမှမကျန်ဘဲ ထွက်ပြေးပါ… ”

မိစ္ဆာငှက်မွှေးသူတော်စင်ကုန်းမြေ၏ မဟာဧကရာဇ်ငရဲမီးတောက် တံခါးပိတ်ကျင့်ကြံသော သီးသန့်နေရာတွင် မိန်းမတိုင်းပြည်တည်ရှိသည့် မှတ်ဉာဏ်လောကထဲ၌ ရွှီချင်း၏ စိတ်က ပရမ်းပတာ လှုပ်ခတ်သွားသည်။

သူက သူ၏ လက်ထဲမှ ရွှေကြွက်လေးကို တစ်လှည့် ဧရာမပျော်ရွှင်ခြင်းပန်းပွင့်ကို တစ်လှည့် ကြည့်လိုက်သည်။

ရွှေကြွက်လေး မွေးဖွားလာသည့်အခိုက် ဧရာမပျော်ရွှင်ခြင်းပန်းပွင့်က အချိန်ရပ်တန့်သွားသည်။

ပန်းပွင့်တစ်ခုတည်း မဟုတ်ပေ။ လေဟာနယ်သည်လည်း အေးခဲသွားသည်။

အရာအားလုံး၏ လှုပ်ရှားမှုက ဤအခိုက်အတန့်မှာ ရပ်တန့်သွားသည်။

ရွှီချင်းနှင့် ရွှေကြွက်လေးသည်သာ ပုံမှန်အတိုင်း လှုပ်ရှားနိုင်ကြသည်။

ရွှေကြွက်လေးသည်တော့ တကျွီကျွီမြည်သံကို ထုတ်ဖော်လိုက်ပြီး ရွှီချင်း၏ လက်ချောင်းများကို ပွတ်သပ်လိုက်ကာ ဆာလောင်သော စိတ်ဆန္ဒကို ထုတ်လွှတ်လိုက်သည်။ ထို့နောက် ရွှေရောင်အလင်းက ဝင်းခနဲ လင်းလက်သွားပြီး ၎င်းက ရွှီချင်း၏ လက်ဖဝါးပေါ်မှ ပျံသန်းသွားသည်။ ၎င်းက လေထဲမှာ ပါးစပ်ဟလိုက်ပြီး လေဟာနယ်ကို ဆတ်ခနဲ ကိုက်လိုက်သည်။

ထိုအခါ ဟင်းလင်းပြင်ပေါ်မှာ အက်ကွဲရာတစ်ခု ထွက်ပေါ်လာသည်။ ၎င်းက ဤနေရာမှ လေဟာနယ်အပိုင်းအစတစ်ခုကို တကယ်ကြီး ကိုက်စားလိုက်ပြီး မျိုချလိုက်သည်။

သို့သော်လည်း ထိုသို့လုပ်ဆောင်ရန် ၎င်းအတွက် အနည်းငယ် ခက်ခဲနေကြောင်း ထင်ရှားသည်။ သို့ဖြစ်၍ လေဟာနယ်ကို တစ်ကိုက်ကိုက်ပြီးနောက် ၎င်းက အများကြီး အားနည်းသွားသည်။ သို့သော်လည်း ဆာလောင်သော စိတ်ခံစားမှုကြောင့် ၎င်းက မနေနိုင်သည့်အဆုံး အတင်းအဓမ္မ နောက်တစ်ကိုက် ထပ်ကိုက်စားလိုက်သည်။

တစ်ချိန်တည်းမှာ ဤနေရာမှ လေဟာနယ်က အချိန်ရပ်တန့်ခြင်းမှ ရုန်းထွက်နိုင်သွားသည်။ သို့ဖြစ်၍ နောက်အခိုက်အတန့်မှာ ဤနေရာက ပုံမှန်ပြန်ဖြစ်သွားပြီး ဧရာမပျော်ရွှင်ခြင်းပန်းပွင့်က အပြင်းအထန် လှုပ်ယမ်းသွားသည်။

ရွှီချင်း၏ နှလုံးကို ပိုပြီးတုန်ယင်သွားစေသည်မှာ ဤနေရာမှ လေဟာနယ်က ပြန်ကောင်းမွန်သွားသည့်အခါ ကမ္ဘာတုန်ဟီးစေနိုင်သော ကြောက်မက်ဖွယ်ရာစိတ်ဆန္ဒတစ်ခုက ဗလာနတ္ထိထဲမှ ထွက်ပေါ်လာပြီး ပျော်ရွှင်ခြင်းပန်းပွင့်ပေါ်သို့ ကျဆင်းလာသည်။

ရွှီချင်းက ထိုစိတ်ဆန္ဒကို အာရုံခံမိသွားသည့်အခါ နှလုံးခုန်မြန်သွားသည်။ ဤသည်မှာ သူက သေခြင်းပင်လယ်ထဲသို့ နစ်မြုပ်သွားသည့်အလား ခံစားမိသွားသည်။

သို့ဖြစ်၍ သူ့မှာ စဉ်းစားနေရန် အချိန်အများကြီး မရှိပေ။ သူက လုံးဝတုံ့ဆိုင်းမနေဘဲ လေဟာနယ်ကို တတိယအကြိမ် ကိုက်စားရန် ကြိုးစားနေသော ရွှေကြွက်လေးကို ဖမ်းဆုပ်လိုက်သည်။ ထို့နောက် သူက အလင်းတန်းတစ်ခုသို့ ပြောင်းလဲသွားပြီး ရွှေကြွက်လေး၏ ကိုက်ရာကြောင့် ဖြစ်ပေါ်လာသော လေဟာနယ်အက်ကွဲကြောင်းထဲသို့ တန်းမတ်စွာ ဝင်ရောက်သွားသည်။

တစ်ချိန်တည်းမှာ ရွှီချင်းက အက်ကွဲကြောင်းထဲသို့ ဝင်ရောက်သွားသည်နှင့်ချက်ချင်း ကမ္ဘာတုန်ဟီးစေနိုင်သော ကြောက်မက်ဖွယ်ရာစိတ်ဆန္ဒက သူ့အနောက်မှ ထွက်ပေါ်လာသည်။

သူက အပြင်သို့ ရောက်သွားသည့်အခါ အလွန်ကျယ်ပြောပြီး ထွန်းလင်းတောက်ပသော ကြယ်တာရာကောင်းကင်က ရွှီချင်း၏ မျက်လုံးထဲမှာ ပုံရိပ်ပြန်လာသည်။

အဘယ့်ကြောင့် မှတ်ဉာဏ်လောက၏ အပြင်ဘက်မှာ ကြယ်တာရာကောင်းကင်က တည်ရှိနေရကြောင်း ရွှီချင်းမသိပေ။ သို့သော်လည်း သူက အန္တရာယ်ထဲသို့ ကျရောက်နေကြောင်း သိထားသည်။ ထို့ကြောင့် သူက အရှိန်မလျော့ဘဲ အဝေးသို့ မြန်ဆန်စွာ ရွေ့လျားသွားသည်။

အချိန်အတော်ကြာပြီးနောက် ကြောက်မက်ဖွယ်ရာစိတ်ဆန္ဒမှ အန္တရာယ်က ပျောက်ကွယ်သွားသည်။

သို့သော်လည်း ရွှီချင်း၏ စိုးရိမ်ကြောင့်ကြမှုက နည်းနည်းမှ မလျော့သွားပေ။

အဘယ့်ကြောင့်ဆိုသော် ဤကျယ်ပြောလှသော ကြယ်တာရာကောင်းကင်ထဲမှာ ဖော်မပြနိုင်သော အလှတရားက ကိန်းအောင်းနေသလို အမည်မသိ အန္တရာယ်များကလည်း ပေါများလှသည်။

ဤအခိုက်အတန့်မှာ ကြယ်တာရာကောင်းကင်ထဲတွင် မုန်တိုင်းတစ်ခုက တိုက်ခတ်နေသည်။

မုန်တိုင်းက အရပ်မျက်နှာအဘက်ဘက်ဆီသို့ ပျံ့နှံ့သွားနေသည်။ မုန်တိုင်းဖြတ်သန်းသွားသည့်နေရာတိုင်း ကြယ်ဂြိုလ်များက ဖျက်ဆီးခံလိုက်ရပြီး အနက်ရောင်တွင်းပေါက်များ ထွက်ပေါ်လာလိမ့်မည်။

ဤသည်မှာ ဧရာမပါးစပ်ပေါက်တစ်ခုက အရာအားလုံးကို ဝါးမျိုနေသည့်အလားပင်။

ရွှီချင်းရှိနေသော နေရာက ထိုမုန်တိုင်း၏ အစွန်အဖျားမှာ ဖြစ်သည်။

ထိုသို့အရေးကြီးအခိုက်အတန့်မှာ ရွှီချင်းက တုံ့ဆိုင်းမနေဘဲ လက်ဝှေ့ယမ်းလိုက်သည်။ ချက်ချင်းဆိုသလို ကောင်းကင်ဘုံသူတော်စင်စေတီက ရွှီချင်း၏ အရှေ့မှာ ထွက်ပေါ်လာသည်။

သူက စေတီထဲသို့ ဝင်ရောက်သွားပြီး စေတီကို ထိန်းချုပ်လိုက်ကာ မုန်တိုင်းနှင့် ဝေးရာဆီသို့ ပျံသန်းသွားသည်။

ကြယ်တာရာကောင်းကင်ထဲ၌ ရွေ့လျားနိုင်သည့် ပစ္စည်းဟူ၍ ရွှီချင်းစဉ်းစားမိသည်မှာ ကောင်းကင်ဘုံသူတော်စင်စေတီသာ ဖြစ်သည်။ မည်သို့ဖြစ်ပါစေ ဤစေတီ၏ ဇစ်မြစ်က လျှို့ဝှက်ဆန်းကြယ်သည်။

၎င်းပေါ်မှ ကောင်းကင်ဘုံသူတော်စင်နွယ်ပင်သည်လည်း ကြယ်တာရာကောင်းကင်ထဲမှာ အသက်ရှင်နိုင်သော အပင်တစ်မျိုး ဖြစ်သည်။

ထိုသို့ဖြင့် တစ်နာရီကြာပြီးနောက် စေတီက အရှေ့သို့ မြန်ဆန်စွာ ရွေ့လျားသွားနေစဉ် နောက်ဆုံးမှာတော့ ၎င်းက ကြယ်မုန်တိုင်း၏ နယ်နိမိတ်ထဲမှ ထွက်ခွာနိုင်သွားသည်။

ယင်းကို မြင်သောအခါ ရွှီချင်းက စိတ်သက်သာရာရသွားပြီး သက်ပြင်းချလိုက်သည်။ တစ်ချိန်တည်းမှာ သူက ကောင်းကင်ဘုံသူတော်စင်နွယ်ပင်ထံမှ ထုတ်လွှတ်နေသော လိုအင်ဆန္ဒကို ခံစားမိသွားသည်။

၎င်း၏ လိုအင်ဆန္ဒက ကြယ်တာရာကောင်းကင် ဖြစ်သည်။ ဤသည်မှာ ၎င်းက စေတီထဲမှ ထွက်သွားပြီး ကြယ်တာရာကောင်းကင်ထဲမှာ ပျံသန်းရန် ရွှီချင်းထံမှ ခွင့်တောင်းနေသည့်အလားပင်။

ရွှီချင်းက တစ်ခဏကြာ တွေးတောပြီးနောက် သူ၏ ဘေးပတ်ဝန်းကျင်ကို အာရုံခံလိုက်သည်။ ထိုအခါ သူက ကြယ်မုန်တိုင်းနှင့် ဝေးရာသို့ ရောက်ရှိနေကြောင်း ရှာတွေ့သွားသည်။

သို့ဖြစ်၍ သူက နတ်ဘုရားစိတ်အာရုံကို ထုတ်လွှတ်လိုက်သည်။

ကောင်းကင်ဘုံသူတော်စင်နွယ်ပင်က ဝမ်းသာပျော်ရွှင်သော အသံကို ထုတ်ဖော်လိုက်ပြီး စေတီထဲမှ မြန်ဆန်စွာ ထွက်သွားသည်။ ၎င်းက ကြယ်တာရာကောင်းကင်ထဲမှာ အရွယ်အစား ကြီးမားလာပြီး ပေတစ်သိန်းထိ ရှည်လျားသွားသည်။ နွယ်ပင်၏ အစွန်းတစ်ဖက်က စေတီကို ရစ်ပတ်လိုက်ပြီး အခြားအစွန်းတစ်ဖက်က အရှေ့မှ ဦးဆောင်လိုက်သည်။

ယင်းကို ရွှီချင်းမြင်သောအခါ သူသည်လည်း စေတီထဲမှ ထွက်လျှောက်လာသည်။ သူက အပြင်သို့ ထွက်လာသည့်အခိုက် ကောင်းကင်ဘုံသူတော်စင်နွယ်ပင်က သူ၏ ဘေးပတ်ပတ်လည်မှာ လှုပ်ယမ်းလိုက်ပြီး ဝမ်းသာပျော်ရွှင်သော စိတ်ဆန္ဒကို ထုတ်ဖော်လိုက်သည်။

နောက်ဆုံးမှာတော့ အရှေ့ဆုံးမှ နွယ်ပင်က ရွှီချင်း၏ ခြေဖဝါးအောက်သို့ ရောက်လာပြီး သူ့ကို သယ်ဆောင်လိုက်သည်။ ၎င်းက ကမ္ဘာတုန်ဟီးစေနိုင်သော အစွမ်းနှင့်အတူ ကြယ်တာရာကောင်းကင်ထဲမှာ မြန်ဆန်စွာ ရွေ့လျားနေသည်။ ဤသည်မှာ ငါးတစ်ကောင်က ပင်လယ်ထဲမှာ လွတ်လပ်စွာ ကူးခတ်နေသည့်အလားပင်။

အကယ်၍ ကျင့်ကြံသူများသည်သာ ထိုမြင်ကွင်းကို မြင်တွေ့သွားမည်ဆိုလျှင် သူတို့က သေချာပေါက် အံ့ဩထိတ်လန့်သွားလိမ့်မည်။

ထိုမြင်ကွင်းထဲတွင် ရွှီချင်းက ကောင်းကင်ဘုံသူတော်စင်နွယ်ပင်ပေါ်မှာ ထိုင်နေပြီး သူ၏ ဝတ်စုံက တဖျပ်ဖျပ်လှုပ်ခတ်နေသည်။ ပေတစ်သိန်းရှည်လျားသော ကောင်းကင်ဘုံသူတော်စင်နွယ်ပင်သည်တော့ ခမ်းနားထည်ဝါသော အရှိန်အဝါကို ထုတ်လွှတ်နေသည်။ ၎င်း၏ ခန္ဓာကိုယ်က ကြယ်ရောင်လင်းလက်နေပြီး ၎င်း၏ သစ်ရွက်များက ယိမ်းနွဲ့လှုပ်ရှားနေကြသည်။ ၎င်းက ကြယ်တာရာကောင်းကင်ထဲမှာ နဂါးတစ်ကောင်ပမာ ရွေ့လျားနေသည်။

ထူးဆန်းသော အလင်းက ရွှီချင်း၏ မျက်လုံးထဲမှာ ထွက်ပေါ်လာသည်။ ကောင်းကင်ဘုံသူတော်စင်နွယ်ပင်၏ ပျော်ရွှင်မှုနှင့် ၎င်း၏ အလျင်ကို သူအာရုံခံမိသွားသောအခါ ကြယ်တာရာကောင်းကင်က ကောင်းကင်ဘုံသူတော်စင်နွယ်ပင်၏ လောကဖြစ်ကြောင်း သူနားလည်သွားသည်။

ရွှီချင်းက ကြယ်တာရာကောင်းကင်ထဲမှာ ရွေ့လျားနေစဉ် အရွယ်အစားစုံလင်သော အပိုင်းအစများက ကြယ်တာရာကောင်းကင်ထဲမှာ ကြယ်ဂြိုလ်များသဖွယ် ထွန်းလင်းတောက်ပနေကြောင်း မြင်တွေ့သွားသည်။

ထိုအပိုင်းအစများပေါ်တွင် ပုံရိပ်အမျိုးမျိုးက ရွေ့လျားနေကြသည်။

ယင်းတို့က မှတ်ဉာဏ်အပိုင်းအစများမှ ဖြစ်ပေါ်လာသော လောကများ ဖြစ်ကြသည်။

သို့သော်လည်း အစောနက ပျော်ရွှင်ခြင်းပန်းပွင့်ဖြင့် တွေ့ကြုံပြီးသည့်နောက် ထိုမှတ်ဉာဏ်လောကများက မည်မျှအန္တရာယ်များကြောင်း ရွှီချင်း နားလည်သွားသည်။ သို့ဖြစ်၍ သူက ယင်းတို့ထဲသို့ မဆင်မခြင် ဝင်ရောက်လိမ့်မည် မဟုတ်ချေ။

ထို့ကြောင့် သူက ကောင်းကင်ဘုံသူတော်စင်နွယ်ပင်အား ယင်းတို့ကို ရှောင်တိမ်းသွားရန် အမိန့်ပေးလိုက်သည်။

တစ်ချိန်တည်းမှာ သူ၏ အကြည့်က စီနီယာအကိုကြီးနှင့် ဧကရီရှိနိုင်သော မှတ်ဉာဏ်လောကများကို ရှာဖွေလိုက်သည်။

“ ဘာပဲပြောပြော ဒီနေရာက မဟာဧကရာဇ်တစ်ပါး တံခါးပိတ်ကျင့်ကြံတဲ့ နေရာပဲ… ဒီနေရာမှာ အန္တရာယ်တွေက အများကြီးပဲ… ဒါကြောင့် အခုချိန်မှာ ဧကရီကို မြန်နိုင်သမျှမြန်မြန် ရှာဖွေတာက အမှန်ကန်ဆုံးပဲ ”

ရွှီချင်းက မျက်လုံးမှေးကျဉ်းလိုက်ပြီး အရှိန်မြှင့်တင်လိုက်သည်။

တစ်ချိန်တည်းမှာ ရွှီချင်းက မှတ်ဉာဏ်လောကများကို အပြင်ဘက်မှ ရှာဖွေနေစဉ် သွေးနီရောင်လောကထဲ၌ ကြည်လင်သော ပင်လယ်ပြင်ပေါ်ရှိ ဧရာမအသားပိုပေါ်တွင် တင်ပျဉ်ခွေထိုင်နေသော သက်လတ်ပိုင်းအရွယ် ကျင့်ကြံသူက နောက်တစ်ကြိမ် ခေါင်းမော့လိုက်သည်။

သူ၏ အကြည့်က အသွေးအသားကောင်းကင်ထဲမှ အမွှေးများပေါ်သို့ ကျရောက်သွားသည်။ နောက်အခိုက်အတန့်မှာ သူ၏ သူငယ်အိမ်က ရုတ်တရက် ကျုံ့သွားသည်။ ဤသည်မှာ သူက မယုံကြည်နိုင်စရာကောင်းသော တစ်စုံတစ်ခုကို မြင်တွေ့သွားသည့်အလားပင်။

အချိန်အတော်ကြာပြီးနောက် သူက မျက်လုံးမှိတ်ပြီး စဉ်းစားလိုက်သည့်အခါ သူ၏ အသက်ရှူသံက အနည်းငယ် မြန်ဆန်လာသည်။

အချိန်တစ်ခဏကြာပြီးနောက် သူက နောက်တစ်ကြိမ် မျက်လုံးဖွင့်လိုက်သည်။ အနက်ရောင်အလင်းက သူ၏ မျက်လုံးထဲမှာ ထွက်ပေါ်လာသည်။ သူက ညာလက်ကို ဖြည်းညင်းစွာ မြှောက်လိုက်ပြီး ကောင်းကင်ပေါ်သို့ လက်ညှိုးညွှန်လိုက်သည်။

အသွေးအသားကောင်းကင်ထဲမှ အမွှေးများက တစ်ပြိုင်နက် ရပ်တန့်သွားကြသည်။ ထို့နောက် ၎င်းတို့က လှုပ်ယမ်းသွားကြပြီး ယှက်ထွေသွားကြသည်။ ဤသည်မှာ အမွှေးများက ၎င်းတို့ဘာသာ ပြန်စီစဉ်လိုက်သည့်အလားပင်။

တစ်ချိန်တည်းမှာ ရွှီချင်းရှိနေသော လေဟာနယ်ထဲ၌ သူအာရုံမခံနိုင်လောက်အောင် အလွန်ဝေးကွာလှသော နေရာတစ်နေရာတွင် မူလက မှတ်ဉာဏ်လောကခုနစ်ခု ရှစ်ခု တည်ရှိကြသည်။

သို့သော်လည်း ဤအခိုက်အတန့်မှာ ထိုမှတ်ဉာဏ်လောကများက ရုတ်တရက် ဝေဝါးသွားကြပြီး တိတ်တဆိတ် ပျောက်ကွယ်သွားကြသည်။ ထို့နောက် ဧရာမမှတ်ဉာဏ်လောကတစ်ခုက ထိုနေရာမှာ ထွက်ပေါ်လာပြီး အရာအားလုံးကို အစားထိုးသွားသည်။

ထို့ပြင် ထိုမှတ်ဉာဏ်လောကက အရှေ့သို့ ဖြည်းညင်းစွာ ရွေ့လျားသွားနေသည်။ ၎င်းက ထူးခြားဆန်းကြယ်သော နည်းလမ်းနှင့်အတူ ရွှီချင်းရောက်ရှိလာမည့် လမ်းကြောင်းပေါ်မှာ ထွက်ပေါ်လာသည်။

ကောင်းကင်ဘုံသူတော်စင်နွယ်ပင်က ရွှီချင်းကို သယ်ဆောင်ပြီး အရှေ့သို့ ပျံသန်းသွားနေစဉ် ရွှီချင်းက သူ့အရှေ့မှ မှတ်ဉာဏ်လောကတစ်ခုကို ရုတ်တရက် သတိထားမိသွားသည်။

သူ့အရှေ့မှ မှတ်ဉာဏ်လောကသည် မြေအောက်လောကတစ်နေရာ ဖြစ်သည်။

ထို့ပြင် ဤမှတ်ဉာဏ်လောက၏ အရွယ်အစားက လမ်းတစ်လျှောက်မှာ သူမြင်တွေ့ခဲ့သော အရာအားလုံးထက် သိသိသာသာ ပိုကြီးမားသည်။

သူက တုံ့ဆိုင်းမနေဘဲ ကောင်းကင်ဘုံသူတော်စင်နွယ်ပင်ကို ထိန်းချုပ်လိုက်ပြီး ဤမှတ်ဉာဏ်လောကနှင့် ဝေးရာသို့ ရွေ့လျားခိုင်းလိုက်သည်။ သို့သော်လည်း ထိုအခိုက်အတန့်မှာ သူ၏ သိုလှောင်အိတ်ထဲတွင် ရွှေရောင်အလင်း ဝင်းလက်သွားသည်။ ရွှေကြွက်လေးသည် ပြင်းထန်သော လိုအင်ဆန္ဒကို ထုတ်ဖော်လိုက်ပြီး အပြင်သို့ ချက်ချင်း ပြေးထွက်လာသည်။

၎င်းက ရွှေရောင်အလင်းတန်းတစ်ခုသို့ ပြောင်းလဲသွားပြီး မှတ်ဉာဏ်လောကဆီသို့ လျှင်မြန်စွာ ပျံသန်းသွားသည်။

ရွှီချင်း၏ အမူအရာက မည်းမှောင်သွားသည်။ သို့သော်လည်း ရွှေကြွက်လေးကို တားဆီးရန် အလွန်နောက်ကျသွားချေ၏။ သို့ဖြစ်၍ သူက မျက်မှောင်ကြုတ်လိုက်ပြီး ကောင်းကင်ဘုံသူတော်စင်နွယ်ပင်ကို ထိန်းချုပ်လိုက်ကာ မှတ်ဉာဏ်လောကဆီသို့ ဦးတည်သွားသည်။

သူက မှတ်ဉာဏ်အပိုင်းအစထဲသို့ ဝင်ရောက်သွားသည်။

ထို့နောက် သူ၏ စိတ်အာရုံက မူးနောက်သွားပြီး သူ၏ အမြင်အာရုံက ဝေဝါးသွားသည်။ ဤသည်မှာ သူက အချိန်နှင့်လေဟာနယ်ကို ဖြတ်ကျော်သွားသည့်အလားပင်။ ပျော်ရွှင်ခြင်းပန်းပွင့်ရှိသော မှတ်ဉာဏ်လောကထဲသို့ ဝင်ရောက်ခဲ့စဉ်က အတွေ့အကြုံကို ရွှီချင်းက ပြန်ခံစားမိသွားသည်။

နောက်အခိုက်အတန့်မှာ သူ့အရှေ့မှ အရာအားလုံးက ကြည်လင်လာသည်။ ထိုအခါ အလွန်ကျယ်ပြောသော မြေအောက်နန်းတော်တစ်ခုက ရွှီချင်း၏ အရှေ့မှာ ထွက်ပေါ်လာသည်။

သူ၏ အရှေ့တွင် သိမ်မွေ့နူးညံ့သော အမွှေးနံ့ကို ထုတ်လွှတ်နေသည့် အပြာရောင်ရေကန်တစ်ကန် ရှိသည်။ ရေကန်က မြေအောက်နန်းတော်တစ်လျှောက် ပျံ့ပွားနေသည်။

ရွှေကြွက်လေးသည်တော့ ၎င်းက လောလောဆယ် စိတ်လှုပ်ရှားစွာ အသက်ရှူနေပြီး ရေကန်ထဲမှာ ပျော်ရွှင်စွာ ကူးခတ်နေသည်။ ၎င်းက အသက်ရှူသွင်းရှူထုတ်လိုက်သည့်အခါတိုင်း ၎င်း၏ ခန္ဓာကိုယ်ပေါ်မှ အရှိန်အဝါက သိသာစွာ အားကောင်းလာသည်။

အပြာရောင်ရေကန်မှလွဲ၍ မြေအောက်နန်းတော်ထဲတွင် တခြားဘာမှမရှိပေ။

ရွှီချင်းက သူ၏ ခန္ဓာကိုယ်ကို အာရုံခံလိုက်သည့်အခါ သူက ငရဲမီးတောက်၏ အသွင်သဏ္ဍာန်ဖြင့် ရှိနေဆဲဖြစ်ကြောင်း ရှာတွေ့သွားသည်။ သို့သော်လည်း သူ၏ ခန္ဓာကိုယ်ပေါ်တွင် ပိုမိုများပြားသော ဒဏ်ရာများက ထွက်ပေါ်လာကြောင်း သတိထားမိသွားသည်။ အားနည်းသော ခံစားမှုသည်ပင် ရွှီချင်း၏ အသိစိတ်ထဲမှ ထွက်ပေါ်လာသည်။

ဤသည်မှာ သူက ပြင်းထန်သော တိုက်ပွဲတစ်ခုဖြင့် ရင်ဆိုင်ခဲ့ရသည့်အလားပင်။

ရွှီချင်းက ယင်းကို သတိထားမိသွားသည်နှင့်တစ်ပြိုင်နက် မည်သည့်စိတ်ခံစားချက်မှ မပါဝင်သော နတ်ဘုရားစိတ်အာရုံတစ်ခုက မြေအောက်နန်းတော်ထဲမှ ဖြည်းညင်းစွာ ပဲ့တင်ထပ်လာသည်။

“ ငရဲမီးတောက်… မင်းက လွန်ခဲ့တဲ့ နှစ်ပေါင်းသုံးသောင်းအတွင်းမှာ ငါ့ရဲ့ ဖန်တီးရှင်ကောင်းကင်ဘုံမျိုးနွယ်ရဲ့ စမ်းသပ်မှု(၉၃၁)ခုကို ဖြတ်ကျော်နိုင်ခဲ့တဲ့ ပထမဆုံး ကျင့်ကြံသူပဲ ”

“ အရင်က သဘောတူညီမှုအတိုင်း မင်းရဲ့ ခန္ဓာကိုယ်ကို သန့်စင်ဖို့ အခွင့်အရေးတစ်ခု ရရှိလိမ့်မယ်… အချိန်က ဆယ့်ငါးမိနစ်ပဲ ”

ရွှီချင်းက ရေကန်ကို ကြည့်လိုက်သည့်အခါ နှလုံးတုန်ယင်သွားသည်။

တစ်ခဏကြာပြီးနောက် သူက အရှေ့သို့ ခြေတစ်လှမ်း လှမ်းလိုက်ပြီး ရေကန်၏ အစွန်းသို့ ရောက်ရှိသွားသည်။ သူက ရေကန်ထဲမှာ အသက်ရှူသွင်းရှူထုတ်နေသော ရွှေကြွက်လေးကို ကြည့်လိုက်သည်။ အတွေးများစွာက သူ၏ စိတ်ထဲမှာ ထွက်ပေါ်လာသည်။

“ ဒီမှတ်ဉာဏ်လောကက နည်းနည်း ထူးဆန်းတယ် ”

“ ဒီကို ငါဝင်လာပြီးတဲ့နောက် ဘယ်လိုအခက်အခဲ အတားအဆီးကိုမှ မတွေ့ကြုံခဲ့ဘူး… အဲ့ဒီအစား ငါက စမ်းသပ်မှုကို တိုက်ရိုက် ကျော်လွှားသွားပြီး အခွင့်အရေးကို ရရှိသွားတယ် ”

ရွှီချင်းက မျက်မှောင်ကြုတ်လိုက်ပြီး ဤရေကန်ကို စစ်ဆေးရန် သူ၏ နတ်ဘုရားစိတ်အာရုံကို ဖြန့်ကြက်လိုက်သည်။

သို့သော်လည်း သူ၏ နတ်ဘုရားစိတ်အာရုံက ရေကန်နှင့် ထိတွေ့သွားသည်နှင့်ချက်ချင်း ရွှီချင်း၏ အမူအရာက ချက်ချင်း ပြောင်းလဲသွားသည်။ ထူးဆန်းသော အလင်းက သူ၏ မျက်လုံးထဲမှာ ထွက်ပေါ်လာသည်။

ရေကန်ထဲမှ အရည်က မည်သည့်အရာဖြစ်ကြောင်း သူမသိပေ။ သို့သော်လည်း အစောနက သူစစ်ဆေးလိုက်သည့်အခါ ထိုရေကန်က သူနားမလည်သော နည်းလမ်းဖြင့် သူ၏ ခန္ဓာကိုယ်နှင့် ဝိညာဉ်ကို အားဖြည့်ပေးလိုက်ကြောင်း သတိထားမိသွားသည်။

အနောက်မိစ္ဆာကလေးနှင့် တိုက်ပွဲတွင် သူရရှိခဲ့သော ဝိညာဉ်ဒဏ်ရာများက ဤအခိုက်အတန့်မှာ ပြန်သက်သာလာသည်။

အရေးကြီးဆုံးမှာ သူ၏ ခန္ဓာကိုယ်ဖြစ်သည်။

သူ၏ ခန္ဓာကိုယ်က အားဖြည့်ခံနေရကြောင်း ရွှီချင်းက ရှင်းလင်းစွာ အာရုံခံမိသွားသည်။

အတိအကျဆိုရလျှင် အသက်ဓာတ်က သူ၏ ခန္ဓာကိုယ်ထဲသို့ ထည့်သွင်းခံနေရသည်။ ထိုစွမ်းအင်က သူ၏ အပိုင်းအစခန္ဓာကိုယ်ကို တစ်သားတည်းဖြစ်စေပြီး ပိုပြီးသက်ဝင်လှုပ်ရှားစေသည်။

“ ဒီရေကန်ရဲ့ အရည်က ရှေးဦးအပျက်အစီးရဲ့ အသွေးအသားတွေကနေ ဖြစ်ပေါ်လာတဲ့ ရုပ်ခန္ဓာကိုယ်ကိုတောင် အားဖြည့်ပေးနိုင်တယ်လား… ဒီအရည်က ဘာလဲ ”

ရွှီချင်းက အသက်ပြင်းပြင်းရှူသွင်းလိုက်ပြီး စဉ်းစားလိုက်သည်။ သူက ရေကန်ကို အရင်ဆုံး စစ်ဆေးကြည့်လိုက်သည်။ ထို့နောက် သူက ရွှေကြွက်လေးကို စိုက်ကြည့်လိုက်သည်။ ၎င်းက ပုံမှန်အတိုင်း ပြုမူနေကြောင်း သတိထားမိပြီးနောက် ဆုံးဖြတ်ချက်ပြတ်သားမှုက ရွှီချင်း၏ မျက်လုံးထဲမှာ ထွက်ပေါ်လာသည်။ သူက ဆောင့်ကြောင့်ထိုင်လိုက်ပြီး ရေကန်ကို သူ၏ ညာလက်ဖြင့် ထိတွေ့လိုက်သည်။

သူ၏ လက်က ရေကန်ဖြင့် ထိတွေ့သွားသည်နှင့်ချက်ချင်း အလွန်သိပ်သည်းသော အသက်ဓာတ်က ရေကန်ထဲမှ တိုးထွက်လာသည်။

ရွှီချင်း၏ စိတ်က ဝုန်းခနဲ လှုပ်ခတ်သွားသည်။ သူ၏ ကျင့်ကြံခြင်းနှင့် အရှိန်အဝါက တစ်ဟုန်ထိုး မြင့်တတ်သွားသည်။ သူ၏ ခန္ဓာကိုယ်ထဲမှ အသက်ဓာတ်သည်လည်း တစ်ဟုန်ထိုး အားကောင်းလာသည်။

ယင်းက တဖြည်းဖြည်း ပြီးပြည့်စုံလာသည်။

တစ်ချိန်တည်းမှာ မဟာဧကရာဇ်ငရဲမီးတောက်၏ မှတ်ဉာဏ်လောကတစ်ခုထဲတွင် သူ၏ မူလခန္ဓာကိုယ်နှင့် ကိုယ်ပွားက အပြင်းအထန် တိုက်ခိုက်နေကြသည်။

အပျက်အစီးများ၏ အပေါ်တွင် ခရမ်းရောင်ဝတ်စုံကို ဝတ်ဆင်ထားသော ငရဲမီးတောက်က လက်မြှောက်လိုက်ပြီး တစ်ဖက်လူထံသို့ ဖမ်းဆုပ်လိုက်သည်။

အဖြူရောင်အရှိန်အဝါသည် တစ်ဖက်လူ၏ ဒွါရခုနစ်ပေါက်ထဲမှ ထွက်ပေါ်လာပြီး ခရမ်းရောင်ဝတ်စုံနှင့် ငရဲမီးတောက်၏ စုပ်ယူခြင်းခံလိုက်ရသည်။

သူက အသက်ရှူသွင်းလိုက်သည့်အခါ တစ်ဖက်လူ၏ ခန္ဓာကိုယ်က တုန်ယင်သွားပြီး နှလုံးကွဲကြေသော အော်ဟစ်ညည်းညူသံကို ထုတ်ဖော်လိုက်သည်။ သူ၏ ခန္ဓာကိုယ်က ဖြည်းညင်းစွာ အရည်ပျော်သွားပြီး ငရဲမီးတောက်၏ အသွင်သဏ္ဍာန်ကို ဆုံးရှုံးသွားသည်။ ထို့နောက် အမျိုးသမီးတစ်ယောက်၏ အသွင်သဏ္ဍာန်က ထွက်ပေါ်လာသည်။

ထိုအမျိုးသမီးသည် အနောက်မိစ္ဆာငှက်မွှေးမှ ဤနေရာဆီသို့ ဝင်ရောက်လာသော အမျိုးသမီးနှစ်ယောက်ထဲမှ တစ်ယောက်ဖြစ်သည်။

စုပ်ယူမှုက ဆက်လက် ဖြစ်ပွားနေသည်။ အချိန်တစ်ခဏကြာပြီးနောက် အမျိုးသမီး၏ အသွင်သဏ္ဍာန်က ပျောက်ကွယ်သွားပြီး အဖွားအိုတစ်ယောက်၏ အသွင်သဏ္ဍာန်က ထွက်ပေါ်လာသည်။

အကယ်၍ ရွှီချင်းသာ ဤနေရာမှာ ရှိမည်ဆိုလျှင် ထိုအဖွားအိုက အနောက်မိစ္ဆာငှက်မွှေး၏ အမှတ်ခုနစ် အုပ်ချုပ်သူဖြစ်ကြောင်း ချက်ချင်း မှတ်မိသွားလိမ့်မည်။

ဤအခိုက်အတန့်မှာ အမှတ်ခုနစ် အုပ်ချုပ်သူ၏ မျက်လုံးထဲတွင် စိတ်ပျက်အားငယ်မှုနှင့် မကျေမချမ်းစိတ်က ထွက်ပေါ်လာသည်။

“ နင်… နင်ဘယ်သူလဲ… ”

ခရမ်းရောင်ဝတ်စုံနှင့် ငရဲမီးတောက်က အမူအရာကင်းမဲ့နေပြီး မည်သည့်စကားမှ မပြောပေ။ အချိန်တစ်ခဏကြာပြီးနောက် အမှတ်ခုနစ် အုပ်ချုပ်သူက ခြောက်သွေ့သွားပြီး ပြာမှုန်အဖြစ် ပြောင်းလဲသွားသည်။ ထိုအခါ ခရမ်းရောင်ဝတ်စုံနှင့် ငရဲမီးတောက်က နှုတ်ခမ်းသပ်လိုက်ပြီး အဝေးသို့ ဦးတည်လျှောက်သွားသည်။

သူက အရှေ့သို့ ရွေ့လျားသွားနေစဉ် ငရဲမီးတောက်၏ အသွင်သဏ္ဍာန်က တဖြည်းဖြည်း လွင့်ပြယ်သွားပြီး လူငယ်တစ်ယောက်၏ အသွင်သဏ္ဍာန်က ထွက်ပေါ်လာသည်။

သူက အရပ်ရှည်ပြီး တည်ကြည်ဖြောင့်မတ်သည်။ သူ၏ အနက်ရောင်ဆံပင်ရှည်က လေထဲမှာ ဘယ်ညာယိမ်းနွဲ့နေသည်။

ထိုလူငယ်သည် ယွဲ့တုန်ကို အရူးအမူး ချစ်မြတ်နိုးသော ယွင်သခင်လေးသာ ဖြစ်သည်။

သို့သော်လည်း သူ၏ မျက်လုံးထဲတွင် လူငယ်တစ်ယောက်ဟု မထင်မှတ်နိုင်သော လောကဓံ၏ အနိမ့်အမြင့်အတတ်အကျနှင့် အချိန်စီးဆင်းမှုက ထွက်ပေါ်နေသည်။

သူက ဤမှတ်ဉာဏ်လောက၏ ထိပ်ဆုံးနေရာဆီသို့ လျှောက်သွားပြီး ကောင်းကင်ပေါ်မှာ ဒူးထောက်လိုက်သည်။ ထို့နောက် သူက နက်ရှိုင်းသော အသံဖြင့် ပြောသည်။

“ အတိတ်တုန်းက မဟာဧကရာဇ်ရဲ့ အမိန့်တော်အရ ကျွန်တော် မင်းကို ဒီမှာ လာတွေ့တာပါ ”

“ ဒီနှစ်တစ်ထောင်အတွင်းမှာ အရာအားလုံးက မဟာဧကရာဇ် မျှော်လင့်ထားသလို ဖြစ်လာခဲ့ပါတယ်… ကလေးတွေက ပုန်ကန်လာပြီး လန်မိသားစုက မကောင်းတဲ့အကြံတွေကို မွေးမြူခဲ့ပါတယ်… နောက်ဆုံးမှာတော့ အင်အားစုနှစ်ခုရဲ့ အားပြိုင်မှုအောက်မှာ သူတို့က ကောင်းကင်ဘုံလှိုင်ဂူကို ဖွင့်လှစ်ဖို့ တွန်းအားပေးခဲ့ကြပါတယ် ”

ထိုစဉ် ဝဲကတော့တစ်ခုက ကောင်းကင်ပေါ်မှာ ထွက်ပေါ်လာပြီး ဤနေရာ၏ ရာသီဥတုကို ပြောင်းလဲသွားစေသည်။ ဝဲကတော့ထဲတွင် ဤနေရာကို စိုက်ကြည့်နေသော အေးစက်စက် မျက်လုံးတစ်စုံ ရှိသည်။

တစ်ခဏကြာပြီးနောက် ယွင်သခင်လေးက ခေါင်းငုံ့လိုက်ပြီး အရိုအသေပေးလိုက်သည်။

“ အမိန့်တော်အတိုင်း နာခံပါမယ် ”