ဗိမာန်သို့ ဝင်ရောက်ပြီး ပြင်ပနတ်ဆိုးဖြစ်လာခြင်း

အသွေးအသားကောင်းကင်က မရေမတွက်နိုင်သော အက်ကွဲရာများနှင့်အတူ ပြိုကွဲသွားသည်။

အပိုင်းအစတစ်ခုစီက သီးခြားလွတ်လပ်သော လောကတစ်ခု ဖြစ်လာသည်။

အပိုင်းအစတစ်ခုထဲတွင် ဧကရီ၊ မဟာဧကရာဇ်မိစ္ဆာငှက်မွှေးနှင့် အရှေ့မိစ္ဆာငှက်မွှေးမှ ကြီးမြတ်သော အင်မော်တယ်သခင်က တိုက်ခိုက်နေကြသည်။

အုပ်ချုပ်သူအသီးသီးသည်တော့ အရိုးခြောက်များအဖြစ် စုပ်ယူခံလိုက်ရသည်။ ယခု သူတို့အားလုံးက သေအံ့ဆဲဆဲအခြေအနေမှာ ရှိနေကြသည်။ သူတို့တစ်ယောက်စီက မတူညီသော အပိုင်းအစထဲမှာ တည်ရှိနေကြသည်။

မဟာဧကရာဇ်ငရဲမီးတောက်၏ မူလခန္ဓာကိုယ်နှင့် ရွှီချင်းရှိသော အပိုင်းအစသည်တော့ အလယ်ဗဟိုမှာ တည်ရှိသည်။

ရွှီချင်းက တင်ပျဉ်ခွေထိုင်လျက် မျက်လုံးမှိတ်ထားသည်။ ဤသည်မှာ သူက အပြင်လောကမှ စိတ်အာရုံအားလုံးကို ဆုံးရှုံးသွားပြီး မလှုပ်ရှားနိုင်တော့သည့်အလားပင်။

သူ၏ အရှေ့တွင် မပြည့်စုံသေးသော ငရဲမီးတောက်က ရပ်နေသည်။ သူ၏ ရုပ်ခန္ဓာကိုယ်တွင် တစ်ဝက်က လူသားခန္ဓာကိုယ်ဖြစ်ပြီး အခြားတစ်ဝက်ကို အသွေးအသားချည်မျှင်များဖြင့် ဖွဲ့စည်းထားသည်။

ဤအခိုက်အတန့်မှာ ငရဲမီးတောက်၏ ချောက်ချားဖွယ်ကောင်းသော မျက်နှာပေါ်တွင် လောဘနှင့် မျှော်လင့်မှုက ထွက်ပေါ်လာသည်။

သူ၏ ညာလက်က အသားပိုကို ဖောက်ထွင်းသွားပြီး ရွှီချင်း၏ နဖူးပေါ်သို့ ဖိချလိုက်သည်။ ကြောက်မက်ဖွယ်ကောင်းသော အရှိန်အဝါက ရွှီချင်း၏ ခန္ဓာကိုယ်ထဲသို့ ရုတ်တရက် တိုးဝင်သွားသည်။

အက်ရှရှအသံက လောကထဲမှာ ပဲ့တင်ထပ်သွားသည်။

“ ငါ့မှာ ကိုယ်ပွားနှစ်ခုရှိတယ်… ကိုယ်ပွားတစ်ခုက အရှေ့မိစ္ဆာငှက်မွှေးက ကြီးမြတ်တဲ့ အင်မော်တယ်သခင်ဖြစ်တယ်… တခြားကိုယ်ပွားကတော့ အနောက်မိစ္ဆာငှက်မွှေးက ကြီးမြတ်တဲ့ အင်မော်တယ်သခင်ပဲ ”

“ မင်းမှာ အင်မော်တယ်အတတ်ပညာရှိတယ်… ဒါပေမဲ့ မိစ္ဆာငှက်မွှေးသူတော်စင်ကုန်းမြေရဲ့ အင်မော်တယ်အတတ်ပညာတွေက ငါ့ဆီကနေ လက်ဆင့်ကမ်းခဲ့တာကို မင်းမသိသေးဘူး ”

“ ဒီတော့ ကောင်လေး… မင်းဆီမှာ မဟာကမ္မရှိတာကို ငါသိတယ်… ဒါ့အပြင် မင်းရဲ့ ခန္ဓာကိုယ်ပေါ်မှာ အရမ်းအားကောင်းတဲ့ အချုပ်အနှောင်တစ်ခုလည်း ရှိတယ်… ဒါပေမဲ့ ငါ့ရဲ့ ခန္ဓာကိုယ်သိမ်းပိုက်ခြင်းနည်းလမ်းက ရိုးရှင်းတဲ့ ကျူးကျော်ဝင်ရောက်ခြင်းမဟုတ်သလို ဝါးမျိုခြင်းလည်း မဟုတ်ဘူး… ”

“ အင်မော်တယ်အတတ်ပညာ… သူခိုးခြောက်ယောက် လှည့်စားခြင်း ”

မဟာဧကရာဇ်ငရဲမီးတောက်၏ အက်ရှရှအသံက ပဲ့တင်ထပ်သွားသည်။ သူ၏ အရှိန်အဝါနှင့်အတူ စိတ်ခံစားချက်ခုနစ်မျိုးနှင့် လိုအင်ဆန္ဒခြောက်မျိုးမှ မရေမတွက်နိုင်သော ချည်မျှင်များက ရွှီချင်း၏ ဦးခေါင်းဆီသို့ ဦးတည်သွားကြသည်။ ထို့နောက် ချည်မျှင်များက ပျံ့နှံ့သွားပြီး ရွှီချင်း၏ တစ်ကိုယ်လုံးကို ဖုံးလွှမ်းသွားသည်။ နောက်အခိုက်အတန့်မှာ ယင်းတို့က ရွှီချင်း၏ ဓမ္မသွေးကြောများထဲသို့ စီးဝင်သွားကြသည်။

ယင်းက ရွှီချင်း၏ စိတ်ခံစားချက်ခုနစ်မျိုးနှင့် လိုအင်ဆန္ဒခြောက်မျိုးမှ ချည်မျှင်များကိုလည်း လှုံ့ဆော်လိုက်ပြီး သူ၏ ခန္ဓာကိုယ်ကို ဗိမာန်တစ်ခုအဖြစ် ပြောင်းလဲသွားစေသည်။

ထို့နောက်…

“ အင်မော်တယ်အတတ်ပညာ… ခွေးငါးကောင် အင်မော်တယ်ကာကွယ်ခြင်း ”

ကပ်စေးနှဲခြင်းခွေးက ဝင်လာသည့်အခါ တစ်စုံတစ်ယောက်က ရတနာများကို ဆုံးရှုံးပြီး လောဘခွေးက ဝင်‌လာသည့်အခါ ချည်နှောင်ခံရလိမ့်မည်။ အလိမ်အညာခွေးက ဝင်လာသည့်အခါ သေခြင်းရှင်ခြင်း သံသရာစက်ဝန်းထဲသို့ ကျရောက်ပြီး နတ်ဆိုးခွေးက ဝင်လာသည့်အခါ ငရဲကျသွားလိမ့်မည်။ မဆင်မခြင်ခွေးက ဝင်ရောက်လာသည့်အခါ လူသားအသွင်ကို ထာဝရဆုံးရှုံးသွားလိမ့်မည်။

ဤအင်မော်တယ်အတတ်ပညာက သတ်ဖြတ်ခြင်းမန္တန်များနှင့် ဆင်တူသော ထူးဆန်းသည့် မန္တန်တစ်ခုဖြစ်သော်လည်း အမှန်မှာ အတိတ်တွင် ယင်းကို ဖန်တီးခဲ့သည့် အဓိကရည်ရွယ်ချက်မှာ…

တခြားတစ်ယောက်၏ ခန္ဓာကိုယ်ကို သိမ်းပိုက်ရန် ဖြစ်သည်။

သို့ဖြစ်၍ နောက်အခိုက်အတန့်မှာ ငရဲမီးတောက်များ၏ မှတ်ဉာဏ်များက ခွေးများအဖြစ် ပြောင်းလဲသွားကြပြီး ရွှီချင်း၏ ဗိမာန်ထဲသို့ ဝင်ရောက်ရန် ပြင်ဆင်လိုက်ကြသည်။ ၎င်းတို့က ရွှီချင်း၏ မှတ်ဉာဏ်များကို လွှမ်းမိုးဖိနှိပ်စွာ ဖုံးလွှမ်းလိုက်သည်နှင့်ချက်ချင်း မရေမတွက်နိုင်သော အဖြူရောင်ဆံချည်မျှင်များက တံခါးပေါက်တစ်ခုအဖြစ် စုဝေးသွားကြသည်။

ယင်းက ဗိမာန်ထဲသို့ ဝင်ရောက်နိုင်သော တံခါးပေါက်ဖြစ်သည်။

ရွှီချင်း၏ ခန္ဓာကိုယ်ထဲမှ တံခါးက ပွင့်သွားသည်နှင့် ငရဲမီးတောက်၏ ခန္ဓာကိုယ်ထဲမှာလည်း တံခါးတစ်ခု ထွက်ပေါ်လာသည်။

ယင်းတို့နှစ်ခုက တစ်ချိန်တည်းမှာ ဆက်သွယ်သွားကြသည်။

ငရဲမီးတောက်၏ ဝိညာဉ်က ထူးဆန်းသော အဖြူရောင်မျက်လုံးတစ်လုံးအဖြစ် ပြောင်းလဲသွားသည်။ ၎င်းက ၎င်း၏ ခန္ဓာကိုယ်ထဲမှ တံခါးနောက်သို့ ဝင်ရောက်သွားပြီး အပြင်သို့ ထွက်သွားသည်။ ၎င်းက ရွှီချင်း၏ ခန္ဓာကိုယ်ထဲမှ ပွင့်နေသော တံခါးထဲသို့ ဝင်ရောက်သွားသည်။

ပြင်ပနတ်ဆိုးက ကျူးကျော်ဝင်ရောက်လာသည့်အခါ ဝဲကတော့တစ်ခုက ထွက်ပေါ်လာပြီး လှည့်ပတ်သွားသည်။

“ အတောမသတ်နိုင်တဲ့ လိုချင်စိတ်ကို လောဘလို့ ခေါ်တယ်… လောဘခွေးက ဝင်လာတဲ့အခါ တစ်စုံတစ်ယောက်က ချုပ်နှောင်ခံရလိမ့်မယ် ”

“ အမှန်တရားကို လှည့်စားတာက လိမ်ညာခြင်း… လိမ်ညာတဲ့ ခွေးက ဝင်လာတဲ့အခါ တစ်စုံတစ်ယောက်က သေခြင်းရှင်ခြင်း သံသရာစက်ဝန်းထဲ ကျရောက်သွားလိမ့်မယ် ”

ထိုအခါ သီးခြားခွဲထုတ်သော စွမ်းအားက ထွက်ပေါ်လာသည်။

မဟာဧကရာဇ်ငရဲမီးတောက်၏ ကြောက်မက်ဖွယ်ကောင်းသော ဝိညာဉ်က ရွှီချင်း၏ ဝိညာဉ်ကို အဝေးသို့ ဖယ်ရှားပစ်လိုက်သည်။ ရွှီချင်း၏ ဝိညာဉ်က အစကတည်းက ရုပ်ခန္ဓာကိုယ်၏ ငြင်းဆန်ခံထားရသောကြောင့် ယင်းက မခက်ခဲပေ။

သို့ဖြစ်၍ ရွှီချင်း၏ ခန္ဓာကိုယ်က ခန္ဓာကိုယ်သက်သက်ဖြစ်လာပြီး သူ၏ ဝိညာဉ်က ဝိညာဉ်သက်သက် ဖြစ်လာသည်။ ယင်းတို့က မဆက်နွယ်တော့ပေ။

ထို့နောက် အဖြူရောင်ဧရာမပါးစပ်တစ်ခုက ဝဲကတော့ထဲမှာ ထွက်ပေါ်လာသည်။

“ မတရားနည်းနဲ့ အနိုင်လိုချင်တာက နတ်ဆိုးဖြစ်တယ်… နတ်ဆိုးခွေးက ဝင်လာတဲ့အခါ ငရဲကျသွားလိမ့်မယ် ”

၎င်းက ရက်စက်ကြမ်းကြုတ်စွာ ဝါးမျိုလိုက်သည်။

၎င်းက ဝိညာဉ်ကို ဝါးမျိုလိုက်ခြင်း ဖြစ်သည်။

ထိုသို့အရေးကြီးအခိုက်အတန့်မှာ ရွှီချင်း၏ ဝိညာဉ်က မှိတ်ထားသော မျက်လုံးကို ရုတ်တရက် ပြန်ဖွင့်လိုက်သည်။ သူ၏ မျက်လုံးထဲမှာ ရူးသွပ်မှုနှင့် စိတ်ဓာတ်ပြတ်သားမှုက ထွက်ပေါ်လာသည်။

အစကတည်းက သူသည် သေခြင်းရှင်ခြင်းအခြေအနေဖြင့် ရင်ဆိုင်နေရသောအခါ ငရဲမီးတောက်၏ လွှမ်းမိုးဖိနှိပ်သော လုပ်ဆောင်ပုံကို ကောင်းမွန်စွာ နားလည်သွားသည်။ သို့ဖြစ်၍ တစ်ဖက်လူ၏ ခန္ဓာကိုယ်သိမ်းပိုက်ခြင်းကို ခုခံတားဆီးရန် သူ့မှာ အခွင့်အရေးမရှိကြောင်း သိသည်။

မည်သို့ဖြစ်ပါစေ တိုက်ရိုက် ပြန်တိုက်ခိုက်ခြင်းက အချည်းနှီးသာ ဖြစ်လိမ့်မည်။

သို့ဖြစ်၍ သူက ခုခံတားဆီးရန် မရွေးချယ်ခဲ့ပေ။ ထို့ကြောင့် သူက အသားပိုထဲမှ အရည်ကို ကိုယ်တိုင်စုပ်ယူခဲ့ပြီး သူ၏ ခန္ဓာကိုယ်ကို အာဟာရဖြည့်သွင်းခဲ့သည်။ ယင်းက သူ၏ ရုပ်ခန္ဓာကိုယ်ကို ပိုပြီးပြည့်စုံလာစေသည်။

တစ်ချိန်တည်းမှာ သူ့ဝိညာဉ်အပေါ် ရုပ်ခန္ဓာကိုယ်၏ ငြင်းဆန်မှုက အထွတ်အထိပ်သို့ ရောက်ရှိသွားသည်။

ယင်းက သူ၏ ရည်ရွယ်ချက်ဖြစ်သည်။ သို့သော်လည်း ဤအတောအတွင်းမှာ သူက အပိုင်းပိုင်းဆုတ်ဖြဲခံနေရသော ဝိညာဉ်၏ နာကျင်မှုကို တောင့်ခံရလိမ့်မည်။

ထိုသို့တောင့်ခံရာတွင် ကံကြမ္မာဖန်တီးခြင်းဓားမြှောင်၏ ကာကွယ်ပေးမှုက အဓိကအရေးပါခဲ့သည်။

ယခု ငရဲမီးတောက်၏ ခွေးငါးကောင် အင်မော်တယ်ကာကွယ်ခြင်းက သူ့ဝိညာဉ်အပေါ် ရုပ်ခန္ဓာကိုယ်၏ ငြင်းဆန်မှုကို အကန့်အသတ်ထက် ကျော်လွန်သွားစေပြီး တစ်ခါမှမဖြစ်ဖူးသော အဆင့်အထိ ရောက်ရှိသွားစေသည်။

ဤသည်မှာ သူ၏ ဝိညာဉ်က မောင်းထုတ်ခံနေရသည့်အလားပင်။

ရွှီချင်းအတွက်တော့ ယင်းက သူ့အတွက် အသက်ရှင်ရန် ကြီးမားသော အခွင့်အရေး ဖြစ်သည်။

သို့ဖြစ်၍…

“ ခွေးငါးကောင် အင်မော်တယ်ကာကွယ်ခြင်း ”

အင်မော်တယ်အတတ်ပညာက ရွှီချင်း၏ အသိစိတ်ပင်လယ်ထဲမှာ ထွက်ပေါ်လာသည်။

သူက ငရဲမီးတောက်၏ ခန္ဓာကိုယ်သိမ်းပိုက်ခြင်းကို လုံးဝမတားဆီးသလို မခုခံပေ။

ဤသည်မှာ ဤရုပ်ခန္ဓာကိုယ်က သူ့အပိုင်မဟုတ်သည့်အလားပင်။ သူက ဤရုပ်ခန္ဓာကိုယ်ကို တုံ့ဆိုင်းခြင်းမရှိဘဲ လက်လျော့လိုက်သည်။

ထို့နောက် သူက ခွေးငါးကောင် အင်မော်တယ်ကာကွယ်ခြင်းကို အသုံးပြု၍ သူ့ဝိညာဉ်အပေါ် ရုပ်ခန္ဓာကိုယ်၏ ငြင်းဆန်မှုကို ပိုပြီးအားကောင်းသွားစေသည်။

ပထမတစ်ခုက ဆွဲငင်အားကို ထုတ်လွှတ်နေစဉ် နောက်တစ်ခုက တွန်းကန်အားကို ထုတ်လွှတ်နေသည်။

အင်အားစုနှစ်ခုက ပေါင်းစပ်သွားပြီးနောက် အချင်းချင်း အပြန်အလှန် အားဖြည့်ပေးလိုက်ကြသည်။ ယင်းက ရွှီချင်း၏ ဝိညာဉ်ကို အဖြူရောင်ဧရာမပါးစပ်၏ ဝါးမျိုမခံရခင် အပြင်သို့ တွန်းထုတ်လိုက်သည်။

ထို့နောက် သူ၏ ဝိညာဉ်က ငရဲမီးတောက် ဖွင့်လှစ်ထားသော တံခါးပေါက်ထဲသို့ ဝင်ရောက်သွားသည်။

သူက ရုပ်ခန္ဓာကိုယ်ကို လက်လျော့လိုက်သည်။

ငရဲမီးတောက်၏ ဝိညာဉ်က သူ၏ ရုပ်ခန္ဓာကိုယ်ကို သိမ်းပိုက်သွားသည်နှင့်ချက်ချင်း ရွှီချင်းက လုံးဝတုံ့ဆိုင်းမနေဘဲ သူ၏ ဝိညာဉ်ကို လောင်ကျွမ်းပစ်လိုက်ပြီး ကံကြမ္မာတိုတမ်ကို ရေးဆွဲလိုက်သည်။ သူ့ဆရာချန်ထားခဲ့သော အတားအဆီးများကိုပင် သူက အသက်သွင်းလိုက်သည်။

သူက အဆုံးမဲ့သော တန်ကြေးကို ပေးဆပ်ပြီးနောက် ငရဲမီးတောက် ဖွင့်လှစ်ခဲ့သော တံခါးထဲသို့ ဝင်ရောက်သွားသည်။ ကံကောင်းထောက်မစွာဖြင့် သူ၏ ဝိညာဉ်က မပြိုကွဲခင် သူ၏ ရုပ်ခန္ဓာကိုယ်ထဲမှ ထွက်ခွာနိုင်သွားသည်။

သူက တံခါးပေါက်ထဲသို့ ဆက်လျှောက်သွားပြီး ငရဲမီးတောက် စွန့်လွှတ်ခဲ့သော မူလခန္ဓာကိုယ်ထဲသို့ ဝင်ရောက်သွားသည်။

သူက ငရဲမီးတောက်၏ ခန္ဓာကိုယ်ထဲမှ ပွင့်နေသော တံခါးပေါက်ထဲသို့ ခြေချလိုက်သည်။

သူက ခွေးငါးကောင် အင်မော်တယ်ကာကွယ်ခြင်းမှ လောဘခွေး ဖြစ်လာသည်။

သူက ဗိမာန်ထဲသို့ ဝင်ရောက်သွားပြီးနောက် ပြင်ပနတ်ဆိုးဖြစ်လာသည်။

သူက ငရဲမီးတောက်၏ ခန္ဓာကိုယ်ထဲမှ တံခါးကို ကျော်လွန်သွားပြီးနောက် အဖြူရောင်မျက်လုံးသို့ ပြောင်းလဲသွားသည်။

သူက ငရဲမီးတောက်နှင့် ခန္ဓာကိုယ်ချင်း လဲလှယ်လိုက်သည်။

အကယ်၍ တခြားအချိန်မှာသာဆိုလျှင် ရွှီချင်းက ထိုသို့လုပ်နိုင်လိမ့်မည် မဟုတ်ချေ။

သို့သော်လည်း ယခု တစ်ဖက်လူ၏ ထူးဆန်းသော ခန္ဓာကိုယ်သိမ်းပိုက်ခြင်းနည်းလမ်းက လမ်းကြောင်းတစ်ခုကို ဖွင့်လှစ်ပေးခဲ့သည်။

တစ်ဖက်လူ၏ ခန္ဓာကိုယ်စွန့်လွှတ်မှုက အကြောင်းအရင်း ဖြစ်လာသည်။

ရွှီချင်း၏ ခွေးငါးကောင်သည်တော့ ဆွဲငင်အားဖြစ်လာသည်။

သူ့ရုပ်ခန္ဓာကိုယ်၏ ငြင်းဆန်မှုက တွန်းကန်အားဖြစ်လာသည်။

သို့ဖြစ်၍ ဤသို့အဖြစ်အပျက်က အလွန်ရှားပါးသည်။

မှန်ပေသည်။ အရေးကြီးဆုံးအရာမှာ ရွှီချင်း၏ ကြိုတင်ပြင်ဆင်ထားမှုများ ဖြစ်သည်။

ရွှီချင်း၏ လုပ်ရပ်များက ငရဲမီးတောက်ကို အံ့ဩသွားစေသည်။ ထို့ပြင် ယင်းက သူ၏ အစီအစဉ်ကို အတားအဆီးဖြစ်စေသည်။

သို့သော်လည်း ရွှီချင်း၏ ရုပ်ခန္ဓာကိုယ်ထဲမှ အချုပ်အနှောင်များက ရုတ်တရက် ပေါက်ကွဲသွားပြီး ရက်စက်ကြမ်းကြုတ်သော စိတ်ဆန္ဒက ထွက်ပေါ်လာသည့်အခါ သူ၏ ခန္ဓာကိုယ်သိမ်းပိုက်မှုက မတည်မငြိမ်ဖြစ်လာသည်။

ရွှီချင်းကို သတ်ဖြတ်ခြင်းက အဓိက မဟုတ်ပေ။

ခွေးငါးကောင် အင်မော်တယ်ကာကွယ်ခြင်း၏ နောက်ဆုံးအဆင့်ကို ပြီးမြောက်စေပြီး ဤခန္ဓာကိုယ်ကို ထိန်းချုပ်ခြင်းက ယခုအချိန်မှာ သူ့အတွက် အရေးကြီးဆုံး ဖြစ်သည်။ ဤကိစ္စနှင့် နှိုင်းယှဉ်လျှင် တခြားအရာများက ဒုတိယဖြစ်သည်။

သူစွန့်ပစ်ခဲ့သော ရုပ်ခန္ဓာကိုယ်သည်တော့…

“ အဲ့ဒီရုပ်ခန္ဓာကိုယ်က မပြည့်စုံသေးဘဲ မိစ္ဆာငှက်မွှေးရဲ့ အပိုင်းကို လိုအပ်နေတယ်… အဲ့ဒါကို ဟန်ချက်ညီစေဖို့နဲ့ ထောက်ပံ့ဖို့ ငါ့ရဲ့ ဝိညာဉ်အပေါ်မှာ မှီခိုအားထားခဲ့ရတယ်… အခု ငါ့ရဲ့ ဝိညာဉ်က ထွက်သွားပြီဆိုတော့ အဲ့ဒါက ကြိုးအဆုံးကို ရောက်သွားပြီ… အဲ့ဒါက ယိုယွင်းပျက်စီးသွားဖို့ သိပ်မလိုတော့ဘူး ”

ငရဲမီးတောက်က အေးစက်စွာ နှာခေါင်းရှုံ့လိုက်ပြီး သူ၏ ရုပ်ခန္ဓာကိုယ်ကို လျစ်လျူရှုလိုက်သည်။ ဤအခိုက်အတန့်မှာ သူ၏ ဝိညာဉ်က အပြည့်အဝ ပေါ်လျှိုးထွက်လာပြီး ခွေးငါးကောင် အင်မော်တယ်ကာကွယ်ခြင်း၏ ပဉ္စမစိတ်ဆန္ဒကို ဖွဲ့စည်းလိုက်သည်။

ယင်းက အဖြူရောင်မျက်နှာအရေပြားဖြစ်သည်။

အဖြူရောင်မျက်နှာအရေပြား ထွက်ပေါ်လာသည်နှင့်ချက်ချင်း ခွေးငါးကောင် အင်မော်တယ်ကာကွယ်ခြင်း အင်မော်တယ်အတတ်ပညာက ပြီးမြောက်သွားပြီး မျက်နှာတစ်ခုကို ဖွဲ့စည်းသွားသည်။

၎င်း၏ အဖြူရောင်ဆံပင်က လေထဲမှာ တဖျပ်ဖျပ်လွင့်မျောနေစဉ် အလွန်အကြူး ရယ်ခြင်းမဟုတ်သော အလွန်အကြူး ငိုခြင်းမဟုတ်သော အမူအရာက ထွက်ပေါ်လာသည်။

၎င်း၏ စွမ်းအားက ဤခန္ဓာကိုယ်၏ အချုပ်အနှောင်များကို ဖိနှိပ်လိုက်သည်။

ထိုသို့ဖြင့် သူက ဟန်ချက်ညီမှုကို ရရှိသွားသည်။

“ စဉ်းစားဆင်ခြင်ဉာဏ်မရှိဘဲ တဇွတ်ထိုးလုပ်တာက မဆင်မခြင်လုပ်ဆောင်တာပဲ… မဆင်မခြင်ခွေးက ဝင်လာတဲ့အခါ လူသားအသွင်ကို ထာဝရ ဆုံးရှုံးသွားလိမ့်မယ် ”

အသားပိုထဲတွင် တင်ပျဉ်ခွေထိုင်နေသော ရွှီချင်းက ရုတ်တရက် တီးတိုးရေရွတ်လိုက်သည်။

သူက ထိုသို့ပြောလိုက်သည်နှင့် သူ၏ နှုတ်ခမ်းထောင့်က အပေါ်သို့ ပင့်တတ်သွားသည်။ သူက ဖြည်းညင်းစွာ မျက်လုံးပြန်ဖွင့်လိုက်သည်။

သူက ရွှီချင်းနှင့် ဆင်တူသော်လည်း သူ၏ မျက်လုံးထဲမှ လောကဓံ၏ အငွေ့အသက်နှင့် ကြောက်မက်ဖွယ်ကောင်းသော အရှိန်အဝါက သိသာသော အပြောင်းအလဲကို ဖြစ်ပေါ်စေသည်။

သူ၏ ရုပ်ခွန်အားသည်လည်း တစ်ဟုန်ထိုး မြင့်တတ်သွားသည်။

သူက အစတွင် အုပ်ချုပ်သူတစ်ပါး၏ စွမ်းအားကို ထုတ်လွှတ်လိုက်သည်။ ထို့နောက် မဟာဧကရာဇ်တစ်ပါး၏ စွမ်းအားက မြန်ဆန်စွာ ထွက်ပေါ်လာသည်။

ပြီးပြည့်စုံမှုကို ခံစားမိသွားသောအခါ ငရဲမီးတောက်၏ မျက်လုံးထဲတွင် ချီးကျူးသော အရိပ်အယောင်က ထွက်ပေါ်လာသည်။

“ ကောင်လေး… ဒီခန္ဓာကိုယ်က မင်းရဲ့ လက်ထဲမှာဆိုရင် အလဟဿဖြစ်နေလိမ့်မယ်… မင်းရဲ့ ဝိညာဉ်က ဒီခန္ဓာကိုယ်ရဲ့ အစစ်အမှန်စွမ်းအားကို မထောက်ပံ့ပေးနိုင်ဘူး ”

တစ်ချိန်တည်းမှာ အသားပို၏ အပြင်ဘက်တွင် သူစွန့်လွှတ်ခဲ့သော ခန္ဓာကိုယ်က ရုတ်တရက် တုန်ယင်သွားပြီး အနောက်သို့ ဒယိမ်းဒယိုင် ဆုတ်သွားသည်။ ထို့ပြင် သူ၏ ခန္ဓာကိုယ်က ခြောက်သွေ့သွားပြီး ယိုယွင်းပျက်စီးသွားသည်။

ဤသည်မှာ ၎င်း၏ အတွင်းအားက ဤခန္ဓာကိုယ်၏ ဟန်ချက်ညီမှုကို ဆက်ပြီး မထောက်ပံ့နိုင်တော့သည့်အလားပင်။

ဤအခိုက်အတန့်မှာ ၎င်းက ခက်ခက်ခဲခဲ မျက်လုံးဖွင့်လိုက်ပြီး ရွှီချင်း၏ အကြည့်ကို ထုတ်ဖော်လိုက်သည်။

ငရဲမီးတောက်က ခေါင်းခါလိုက်သည်။ ဤသည်မှာ သူက ပုရွက်ဆိတ်တစ်ကောင်ကို ကြည့်နေရသည့်အလားပင်။ ထို့နောက် သူက ညာလက်ကို မြှောက်လိုက်သည်။

သို့သော်လည်း ထိုအခိုက်အတန့်မှာ…

ဤခန္ဓာကိုယ်ထဲတွင် အစောနက ခွေးငါးကောင် အင်မော်တယ်ကာကွယ်ခြင်း၏ အစွမ်းဖြင့် သူဖိနှိပ်ထားခဲ့သော အချုပ်အနှောင်များက သူ့ဝိညာဉ်၏ အစွမ်းမြှင့်တင်ပေးမှုအောက်မှာ အရေးကြီးအမှတ်သို့ ရောက်ရှိသွားသည်။

ဟန်ချက်ညီမှုက နောက်တစ်ကြိမ် ကျိုးပျက်သွားသည်။

ယင်းက ထပ်မံ ပေါက်ကွဲသွားသည်။

အတိတ်တွင် သတ္တမသခင်ကြီးက ရွှီချင်း၏ ခန္ဓာကိုယ်ထဲမှာ အချုပ်အနှောင်နှစ်ခုကို ချန်ထားခဲ့သည်။

အချုပ်အနှောင်တစ်ခုက အုပ်ချုပ်သူအဆင့်အတွက်ဖြစ်ပြီး နောက်တစ်ခုက မဟာဧကရာဇ်အဆင့်အတွက် ဖြစ်သည်။

ပထမအချုပ်အနှောင်သည် ငရဲမီးတောက်၏ ခွေးငါးကောင် အင်မော်တယ်ကာကွယ်ခြင်းကြောင့် ဟန်ချက်ညီသွားသော်လည်း ယခုအချိန်မှာ ဒုတိယအချုပ်အနှောင်က အသက်ဝင်လာသည်။

ချက်ချင်းဆိုသလို မရေမတွက်နိုင်သော ငွေရောင်ချည်မျှင်များက ခန္ဓာကိုယ်ပေါ်မှာ ထွက်ပေါ်လာကြပြီး ရှုပ်ထွေးနက်နဲသော မှော်သင်္ကေတများကို ဖွဲ့စည်းသွားကြသည်။ ထိုအမှတ်အသားများက စမ်းရေကဲ့သို့ စီးဆင်းသွားပြီး တစ်ခုနှင့်တစ်ခု ယှက်ထွေသွားကြသည်။

စက္ကန့်ပိုင်းအတွင်းမှာ ငွေရောင်ချည်မျှင်များက ဧရာမကွန်ချာတစ်ခုကို ဖွဲ့စည်းသွားပြီး သူ၏ ခန္ဓာကိုယ်တစ်ခုလုံးကို ဖုံးလွှမ်းသွားသည်။ ကွန်ချာပေါ်မှ ချည်မျှင်များက ဥပဒေသများနှင့် နိယာမများထက် သာလွန်သွားပြီး ငွေရောင်ထွန်းလင်းတောက်ပသွားသည်။

အစွမ်းကုန်ထုတ်လွှတ်မှုအောက်မှာ အချုပ်အနှောင်က ဤခန္ဓာကိုယ်၏ မြင့်တတ်လာသော စွမ်းအားကို ဖိနှိပ်လိုက်သည်။

ယင်းက အတိတ်တွင် သတ္တမသခင်ကြီးက ရွှီချင်း၏ ခန္ဓာကိုယ်ထဲမှာ ထည့်သွင်းခဲ့သော အစီအရင်ဖြစ်သည်။

ယင်းကို မြင်သောအခါ ငရဲမီးတောက်၏ မျက်လုံးထဲတွင် အနက်ရောင်အလင်း ထွက်ပေါ်လာသည်။ သူက ဖြည်းညင်းစွာ မျက်မှောင်ကြုတ်လိုက်သည်။ သို့သော်လည်း သူက အလွန်အံ့ဩခြင်း မရှိပေ။

မည်သို့ဖြစ်ပါစေ ဂျူနီယာတစ်ယောက်က ထိုသို့ခန္ဓာကိုယ်ကို မည်သို့ကြောင့် သူ့ဘာသာ ရရှိနိုင်မည်နည်း။ သူက အစွမ်းထက် ပညာရှင်တစ်ဦး၏ အကူအညီကို ရရှိခဲ့ကြောင်း ထင်ရှားသည်။ ထိုသို့ဆိုမှတော့ ထိုပညာရှင်က ဤခန္ဓာကိုယ်၏ ချို့ယွင်းချက်များကို ဖယ်ရှားရန် အရံအစီအစဉ်များ ချန်ထားခဲ့သည်မှာ ပုံမှန်သာ ဖြစ်သည်။

“ ဒီအချုပ်အနှောင် ချိပ်တံဆိပ်ကို ချန်ထားခဲ့တဲ့လူက သာမန်မဟုတ်ဘူး ”

ငရဲမီးတောက်က မျက်မှောင်ကြုတ်လိုက်ပြီး သူ၏ ညာလက်ကို နဖူးပေါ်သို့ ဖိချလိုက်သည်။ နောက်အခိုက်အတန့်မှာ အနက်ရောင်ကြာပန်းတစ်ခုက သူ၏ အောက်မှာ ထွက်ပေါ်လာသည်။ ကြာပန်းက မြန်ဆန်စွာ လှည့်ပတ်သွားသည်နှင့် အသားပိုထဲမှ အသက်ဓာတ်အနှစ်သာရက မြန်ဆန်စွာ လျော့နည်းသွားပြီး သူ၏ စုပ်ယူခံလိုက်ရသည်။

တစ်ချိန်တည်းမှာ အနက်ရောင်ကြာပန်းက ပွင့်လန်းသွားသည့်အခါ သံကြိုးများနှင့်ဆင်တူသော ဝတ်ဆံဖိုများက ကြာပန်းထဲမှာ ကခုန်ရွေ့လျားသွားကြသည်။ သူ၏ ထိန်းချုပ်မှုအောက်မှာ ထိုသံကြိုးများက သူ၏ ခန္ဓာကိုယ်ကို အထပ်ထပ် ရစ်ပတ်သွားကြသည်။

ထိုသံကြိုးများက ဖိနှိပ်မှုတစ်ခုကို ဖွဲ့စည်းသွားသည်။

“ ဒီအချုပ်အနှောင်ကို ချက်ချင်း ငါမဖယ်ရှားနိုင်ပေမဲ့ အဲ့ဒါကို ဟန်ချက်ညီအောင် ငါလုပ်နိုင်တယ် ”

“ အနာဂတ်မှာ အဲ့ဒါကို ဖယ်ရှားဖို့အတွက် အချိန်တချို့ပဲ ငါလိုအပ်လိမ့်မယ် ”

“ ဒီတော့ ကောင်လေး… ဒီခန္ဓာကိုယ်ပေါ်မှာ ဘာကို မင်းထားခဲ့တာလဲ… ကျောပေါ်က အနီရောင်ဖယောင်းတိုင်လား ”

ငရဲမီးတောက်က တည်ငြိမ်စွာ ပြောသည်။

ကျယ်လောင်သော မြည်သံက သူ့အနောက်မှ ပဲ့တင်ထပ်လာသည်။ ဖယောင်းတိုင်တိုတမ်က ချက်ချင်း လောင်ကျွမ်းသွားပြီး ငရဲမီးတောက်၏ နောက်ကျောကို ထွန်းလင်းသွားစေသည်။

“ ဒီဖယောင်းတိုင်ကို မင်းထက် အချိန်ပိုကြာအောင် ငါလေ့လာခဲ့တာပါ ”

ငရဲမီးတောက် သူ၏ လက်ကို ဝှေ့ယမ်းလိုက်ပြီး သူ့ဝိညာဉ်၏ တစ်စိတ်တစ်ပိုင်းကို တိုက်ရိုက် ဖြတ်တောက်လိုက်သည်။ ဖယ်ရှားခံလိုက်ရသော ဝိညာဉ်က မီးအိမ်တစ်ခုအဖြစ် ပြောင်းလဲသွားပြီး သူ၏ နောက်ကျောပေါ်မှ ဖယောင်းတိုင်တိုတမ်ကို ဖုံးလွှမ်းသွားသည်။

“ ဒီနည်းနဲ့ဆိုရင် အဲ့ဒါကို ငါကန့်သတ်နိုင်ရုံတင်မကဘူး အဲ့ဒါရဲ့ အစွမ်းကိုလည်း အတိုင်းအတာတစ်ခုထိ ငှားယူနိုင်လိမ့်မယ် ”

“ ဒီတော့ ကောင်လေး… မင်းမှာ တခြားအစီအစဉ်တွေ ရှိသေးလား ”

ငရဲမီးတောက်က ခပ်ရေးရေး ပြုံးလိုက်သည်။

သို့သော်လည်း သူက ထိုသို့ပြောလိုက်သည်နှင့်ချက်ချင်း ရွှီချင်းက ဘာမှပြန်မပြောနိုင်မီ ကမ္ဘာတုန်ဟီးစေနိုင်သော ဟိန်းသံက ကြည်လင်သော ပင်လယ်အောက်ထဲမှ ပဲ့တင်ထပ်လာသည်။

“ သောက်အဖိုးကြီး… ငါ့ရဲ့ ဂျူနီယာညီလေးကို မင်းဒုက္ခပေးချင်တယ်ဆိုရင် ငါ့ကို အရင်ဆုံး ကျော်ဖြတ်ရလိမ့်မယ် ”

ဟိန်းသံက ပဲ့တင်ထပ်သွားသည့်အခိုက် ကြည်လင်သော ပင်လယ်က တိုက်ရိုက် ဆူပွက်သွားသည်။ ကြီးမားသော လှိုင်းလုံးများက နိမ့်ချည်မြင့်ချည် လှုပ်ရှားသွားကြပြီး ဧရာမဆူနာမီလှိုင်းလုံးတစ်ခုကို ဖွဲ့စည်းသွားသည်။ ကျယ်လောင်သော မြည်သံများက အရပ်မျက်နှာအဘက်ဘက်ဆီသို့ ပျံ့လွင့်သွားသည်။

ဤအခိုက်အတန့်မှာ ကြည်လင်သော ပင်လယ်တစ်ခုလုံးက အပြာရောင်ဖြင့် စွန်းထင်ခံလိုက်ရဟန် ရ၏။

မရေမတွက်နိုင်သော အပြာရောင်ပိုးကောင်များက ပင်လယ်ပြင်ပေါ်ရှိ ဆူနာမီလှိုင်းလုံးထဲမှ ပျံသန်းထွက်လာကြသည်။

၎င်းတို့၏ အရေအတွက်က ကမ္ဘာတုန်ဟီးစေနိုင်သည်အထိ အလွန်များပြားသည်။

၎င်းတို့က အတူတကွ စုဝေးသွားကြပြီး ဧရာမလက်တစ်ဖက်ကို ဖွဲ့စည်းသွားသည်။ ထိုလက်က အလွန်ကြီးမားလေရာ ကောင်းကင်ကို မမြှောက်နိုင်ဟန် ရ၏။ ထိုဧရာမလက်က ရှေးဟောင်းအရိုးဆေးမီးဖိုကို ဆုပ်ကိုင်ထားလျက် ငရဲမီးတောက်ဆီသို့ တန်းမတ်စွာ ဦးတည်သွားသည်။