ငါဆန္ဒပြုတယ်

ထိုအရိုးဆေးမီးဖိုကို အားညို၏ ဒုတိယဘဝမှ အရိုးများဖြင့် ဖန်တီးသန့်စင်ထားခြင်း ဖြစ်သည်။ ထို့ပြင် ယင်းကို သန့်စင်ခဲ့သူက အင်မော်တယ်အတတ်ပညာမဟာဧကရာဇ် ဖြစ်သည်။ ဆေးမီးဖို၏ အစွမ်းက အလွန်ကြောက်စရာကောင်းပြီး ၎င်း၏ အဆုံးမဲ့သော လောဘကို အသုံးပြု၍ အရာအားလုံးကို သန့်စင်နိုင်သည်။

ဤအခိုက်အတန့်မှာ မရေမတွက်နိုင်သော အပြာရောင်ပိုးကောင်များဖြင့် ဖွဲ့စည်းထားသော ဧရာမလက်က ပင်လယ်မျက်နှာပြင်ကို ချိုးဖောက်သွားသည်။ လှိုင်းလုံးများက ပရမ်းပတာဖြစ်သွားကြသည့်အခါ ဧရာမလက်က ငရဲမီးတောက်ရှိနေသော အသားပိုပေါ်သို့ တိုက်ရိုက် ကျဆင်းလာသည်။

ငရဲမီးတောက်က အသားပိုထဲမှာ တင်ပျဉ်ခွေထိုင်နေသည်။ သူ၏ ပုံစံက တည်ငြိမ်နေပုံပေါ်သည်။ သို့သော်လည်း အမှန်မှာ ဤခန္ဓာကိုယ်က မည်မျှအစွမ်းကြီးမားကြောင်း ၎င်းကို ထိန်းချုပ်ရန် မည်မျှခက်ခဲကြောင်း သူသာလျှင် နားလည်သည်။

ထိုသို့ဖြစ်ရသည့် အကြောင်းအရင်းတစ်ခုမှာ ဤခန္ဓာကိုယ်ပေါ်မှ မဟာကမ္မဖြစ်သည်။ တခြားအကြောင်းအရင်းမှာ သတ္တမသခင်ကြီး ချန်ထားခဲ့သော အချုပ်အနှောင်ကြောင့် ဖြစ်သည်။

ယခု သူက ထိုအချုပ်အနှောင်ကို ဖိနှိပ်ထားသော်လည်း အမှန်မှာ သူက ဟန်ချက်ညီမှုကို ရရှိထားနိုင်ရုံမျှသာ ဖြစ်သည်။

ဤအခိုက်အတန့်မှာ သူက ဤခန္ဓာကိုယ်ကို အပြည့်အဝ မထိန်းချုပ်နိုင်သေးပေ။

သူ၏ မျက်လုံးထဲမှာ အေးစက်စက် အလင်းက ဖြတ်သန်းသွားသည်နှင့် သူ့ဆီသို့ ချဉ်းကပ်လာနေသော ဧရာမအရိုးဆေးမီးဖို၏ အဖုံးက ရုတ်တရက် ပွင့်သွားပြီး အသားပို လွှမ်းခြုံသွားကာ ယင်းကို အကြမ်းပတမ်း ဖိနှိပ်လိုက်သည်။

“ သန့်စင်စမ်း ”

နက်ရှိုင်းသော ဟိန်းသံများက မရေမတွက်နိုင်သော အပြာရောင်ပိုးကောင်များ၏ ပါးစပ်ထဲမှ တစ်ပြိုင်နက် ထွက်ပေါ်လာသည်။

ထိတ်လန့်ဖွယ်အသံက မြည်ဟိန်းထွက်သွားသည့်အခါ ဧရာမလက်ကို ဖွဲ့စည်းထားသော အပြာရောင်ပိုးကောင်များသည်လည်း ဤအခိုက်အတန့်မှာ ပြိုကွဲသွားကြသည်။ နောက်အခိုက်အတန့်မှာ ၎င်းတို့က ပိုးကောင်ပင်လယ်အဖြစ် ပြောင်းလဲသွားပြီး အရိုးဆေးမီးဖိုကို ဝိုင်းရံလိုက်သည်။ ထို့နောက် ၎င်းတို့က မြန်ဆန်စွာ လှည့်ပတ်သွားကြသည်။

၎င်း၏ အရှိန်အဝါက ကြီးကျယ်ခမ်းနားပြီး ထိတ်လန့်ဖွယ်ကောင်းသည်။ ယင်းက ကောင်းကင်ပေါ်တွင် အပြာရောင်ဝဲကတော့တစ်ခုကို ဖြစ်ပေါ်စေသည်။

ထို့ပြင် ပိုးကောင်များက ရူးသွပ်စွာ လှည့်ပတ်နေရင်း အေးစက်သော လေကို မှုတ်ထုတ်လိုက်ကြသည်။

လေအေးက အရိုးဆေးမီးဖိုထဲသို့ တစ်ဟုန်ထိုး ဝင်ရောက်သွားသော်လည်း ဆေးမီးဖိုကို မအေးခဲစေပေ။ ယင်းအစား လေအေးက ရေခဲမီးတောက်များအဖြစ် ပြောင်းလဲသွားပြီး အရိုးဆေးမီးဖိုထဲသို့ ဝင်ရောက်သွားကာ အသားပိုကို စတင်သန့်စင်လိုက်သည်။

ပေါက်ကွဲသံများက ကောင်းကင်တစ်ခွင် ချက်ချင်း ပြည့်နှက်သွားသည်။

အားညိုသည် လုံးဝသတိမပေါ့ဆဝံ့ပေ။ သူ၏ စွမ်းအင်အားလုံးကို ဆေးမီးဖိုအား ထိန်းချုပ်ရန်နှင့် အားဖြည့်ပေးရန် အသုံးပြုထားသည်။ သူက စိတ်မပျံ့လွင့်ဝံ့ပေ။ သို့သော်လည်း ဤသန့်စင်မှုက အောင်မြင်နိုင်ခြေ အလွန်နည်းပါးကြောင်း သူသိသည်။

မည်သို့ဖြစ်ပါစေ တစ်ဖက်လူက မဟာဧကရာဇ်ငရဲမီးတောက်ဖြစ်သည်။ သို့သော်လည်း ယခုကဲ့သို့ အရေးကြီးအခိုက်အတန့်မှာ အချိန်ဆွဲခြင်းက အကောင်းဆုံး ရွေးချယ်မှုဖြစ်သည်။

သူက ဧကရီနှင့် ရွှီချင်းအတွက် အချိန်ဆွဲပေးချင်သည်။

သို့မှသာ ဧကရီက မြန်နိုင်သမျှမြန်မြန် ပြန်ရောက်လာပြီး ရွှီချင်းက သူ၏ ကျန်ရှိသော ဝှက်ဖဲကတ်များကို ထုတ်လွှတ်ရန် အခွင့်အရေးရရှိလိမ့်မည်။

ထို့ကြောင့် သူက အစွမ်းကုန်ထုတ်သုံးလိုက်သည်။

ဝုန်းခနဲ မြည်သံများကြား၌ အပြာရောင်ပိုးကောင်များမှ ဖွဲ့စည်းသွားသော ဝဲကတော့ပင်လယ်က ပိုပြီးမြန်ဆန်စွာ လှည့်ပတ်သွားသည်။ ယင်းက အရိုးဆေးမီးဖို၏ သန့်စင်မှုကို ပိုပြီးအားကောင်းသွားစေသည်။

ဧကရီသည်လည်း ထိုမြင်ကွင်းကို မြင်တွေ့သွားသည်။ သူ၏ အမူအရာက တည်ကြည်သွားပြီး ရွှေရောင်အလင်းက သူ၏ ခန္ဓာကိုယ်ပေါ်မှာ မှိတ်တုတ်မှိတ်တုတ် လင်းလက်သွားသည်။ ထိုအခါ ဘေးပတ်ဝန်းကျင်က ပုံပျက်တွန့်လိမ်သွားပြီး ဟင်းလင်းပြင်က ဝေဝါးသွားသည်။ ဤသည်မှာ သူက အရာအားလုံးကို အတင်းအဓမ္မ ချိုးဖြတ်တော့မည့်အလားပင်။

မဟာဧကရာဇ်မိစ္ဆာငှက်မွှေး၏ အမူအရာက ပြောင်းလဲသွားသည်။ ဧကရီ၏ နတ်ဘုရားအစွမ်းကို မြင်လိုက်ရသောအခါ သူက အနောက်ဆုတ်ရန် အတွေးဝင်လာသည်။ သို့သော်လည်း သူ့ဘေးမှ ငရဲမီးတောက်ကိုယ်ပွား၏ မျက်လုံးထဲတွင် စိတ်ဓာတ်ပြတ်သားမှုက ထွက်ပေါ်လာသည်။ ၎င်းက ခန္ဓာကိုယ်ကို တစ်ချက်လှုပ်ရှားလိုက်ပြီး အနက်ရောင်ကြာပန်းတစ်ခုအဖြစ် အသွင်ပြောင်းလဲသွားသည်။

အနက်ရောင်မီးတောက်များက ပေါ်လျှိုးလာပြီး အရာအားလုံးကို လွှမ်းခြုံသွားသည်။ တစ်ချိန်တည်းမှာ ထိုမီးတောက်များက ဤလောကအပိုင်းအစကို ချိပ်ပိတ်လိုက်သည်။

ချက်ချင်းဆိုသလို သူတို့ရှိနေသော နေရာက လုံးဝ ဝေဝါးသွားပြီး မည်သည့်အရာကိုမှ ရှင်းလင်းစွာ မမြင်နိုင်တော့ပေ။ ဆေးမီးဖိုထဲမှ ပေါက်ကွဲသံများသည်သာ တရစပ် ပဲ့တင်ထပ်နေသည်။

ရွှီချင်းသည်လည်း ဤအခွင့်အရေးကို အသုံးပြု၍ မဟာဧကရာဇ်၏ ခန္ဓာကိုယ်ပေါ် သူ၏ နောက်ဆုံးသိမ်းပိုက်ခြင်းကို ပြီးမြောက်အောင် လုပ်ဆောင်လိုက်သည်။

အပြင်လောကက ပရမ်းပတာဖြစ်နေသည်။ အရိုးဆေးမီးဖိုထဲတွင်တော့ မီးတောက်များက အကြမ်းပတမ်း တောက်လောင်နေသည်။

အသားပိုက လောင်ကျွမ်းခံနေရပြီး အုပ်ချုပ်သူအသီးသီးထံမှ အသက်ဓာတ်အနှစ်သာရက စတင်ဆူပွက်လာသည်။

တင်ပျဉ်ခွင်ထိုင်နေသော ငရဲမီးတောက်က မျက်လုံးဖွင့်လိုက်လေရာ အနက်ရောင်အလင်းက သူ၏ မျက်လုံးထဲမှာ ထွက်ပေါ်လာသည်။

ဤသည်မှာ ပထမဆုံးအကြိမ် သူ၏ တွက်ချက်မှုက မှားယွင်းသွားခဲ့သည်။

ပုရွက်ဆိတ်ဟု သူသတ်မှတ်ထားခဲ့သော ကျင့်ကြံသူက အရေးကြီးအချိန်မှာ သူ့ကို ကြားဝင်နှောင့်ယှက်လာသည်။

“ ငါ့ကို အံ့ဩစေမိတာက ဒီလူနဲ့ပတ်သက်ပြီး ငါဘာမှအာရုံမခံမိတာပဲ… သူ့ရဲ့ ကျင့်ကြံခြင်းအုတ်မြစ်နဲ့ အရိုးဆေးမီးဖိုရဲ့ တည်ရှိမှုကို ငါအာရုံမခံနိုင်ခဲ့ဘူး… ”

“ တစ်ယောက်ယောက်က ငါ့ရဲ့ စိတ်အာရုံကို နှောင့်ယှက်ထားတာလား ဒါမှမဟုတ် ဒီလူမှာ ကြီးမားတဲ့ ပြဿနာတစ်ခု ရှိနေတာလား ”

“ စိတ်ဝင်စားစရာပဲ… ဒီတပည့်နှစ်ယောက်က ထူးခြားဆန်းကြယ်တယ် ”

“ ဒါဆိုရင် သူတို့ရဲ့ ဆရာက… ”

မဟာဧကရာဇ်ငရဲမီးတောက်က မျက်လုံးမှေးကျဉ်းလိုက်ပြီး နှာခေါင်းရှုံ့လိုက်သည်။

အကယ်၍ မျှော်လင့်မထားသော မတော်တဆမှုများ ထွက်ပေါ်လာမည်ဆိုလျှင်ပင် အရာအားလုံးကို သူဖိနှိပ်နိုင်လိမ့်မည်ဟု သူ့ကိုယ်သူ ယုံကြည်မှုရှိသည်။

“ ငါက ဒီဘဝအသစ်အတွက် အချိန်အကြာကြီး ပြင်ဆင်ထားခဲ့တာ… ပြီးတော့ ဒီကျင့်ကြံခြင်းနယ်မြေက ဝမ်ကူးကုန်းမြေက မဟုတ်ဘူး ”

“ ဒီကျင့်ကြံခြင်းနယ်မြေနဲ့ဆိုရင် အပြင်လောကက ငါ့ကို မနှောင့်ယှက်နိုင်ဘူး ”

“ ဒီခန္ဓာကိုယ်ကို မြင်လိုက်တာကြောင့် နောက်ဆုံးမိနစ်မှာ ငါ့ရဲ့ အစီအစဉ်ကို ပြောင်းလဲခဲ့တယ်ဆိုပေမဲ့… အရာအားလုံးက ငါ့ရဲ့ ထိန်းချုပ်မှုအောက်မှာ ရှိနေတုန်းပဲ ”

မဟာဧကရာဇ်ငရဲမီးတောက်က တည်ငြိမ်သည်။ ဤအခိုက်အတန့်မှာ ဆေးမီးဖို၏ သန့်စင်ခြင်းစွမ်းအားဖြင့် ရင်ဆိုင်လိုက်ရသည့်အခါ သူက အသက်ပြင်းပြင်း ရှူသွင်းလိုက်သည်။ ချက်ချင်းဆိုသလို သူ့ခန္ဓာကိုယ်၏ ဘေးပတ်ပတ်လည်မှ အရည်က သုံးဆယ်ရာခိုင်နှုန်းခန့် လျော့နည်းသွားသည်။ ထို့နောက် သူက ညင်သာစွာ အသက်ရှူထုတ်လိုက်သည်။

ချက်ချင်းဆိုသလို ဒုတိယအနက်ရောင်ကြာပန်းက ငရဲမီးတောက်၏ ဦးခေါင်းထက်မှာ ထွက်ပေါ်လာပြီး ကြောက်မက်ဖွယ်ကောင်းသော အနက်ရောင်မီးတောက်များကို ထုတ်လွှတ်လိုက်သည်။ အရေအတွက်များပြားသော သံကြိုးများက ပျံ့နှံ့ထွက်လာကြပြီး သူ၏ ခြေဖဝါးအောက်မှ ကြာပန်း၏ ဘေးပတ်ပတ်လည်မှာ ရစ်ခွေသွားကြသည်။

ကြာပန်းနှစ်ခုက အတူတကွ လှည့်ပတ်သွားသည့်အခါ သံကြိုးများက အသားပိုကို ဖောက်ထွင်းသွားပြီး အရိုးဆေးမီးဖိုကို အထဲမှ တိုက်ခိုက်လိုက်သည်။

အဆုံးမဲ့သော အနက်ရောင်မီးတောက်များက သံကြိုးများနောက်မှ လိုက်ပါလာပြီး ရေခဲမီးတောက်များကို ဖိနှိပ်လိုက်သည်။

အနက်ရောင်ကြာပန်းနှစ်ခု၏ ထွက်ပေါ်လာမှုက ငရဲမီးတောက်၏ အရှိန်အဝါကို နောက်တစ်ကြိမ် တစ်ဟုန်ထိုး မြင့်တတ်သွားစေသည်။ သူက သူ့အား သန့်စင်နေသော ရေခဲမီးတောက်များကို ဖိနှိပ်လိုက်ပြီး သတ္တမသခင်ကြီး ချန်ထားခဲ့‌သော အချုပ်အနှောင်များကို ခုခံတားဆီးလိုက်သည်။ တစ်ချိန်တည်းမှာ သူက သူ၏ နောက်ကျောပေါ်မှ ဖယောင်းတိုင်တိုတမ်ကို မီးငြိမ်းသတ်နေသည်။

ယင်းက ကျိုးပျက်သွားသော ဟန်ချက်ညီမှုကို သူ့အား ပြန်လည်ရရှိသွားစေသည်။

“ ဒီဆေးမီးဖိုမှာ ငါ့အတွက် အကျိုးအာနိသင်တစ်ခု ရှိတယ်… အဲ့ဒါက ပြင်ပနှောင့်ယှက်မှုတွေကနေ ငါ့ကို အတိုင်းအတာတစ်ခုထိ ကာကွယ်ပေးလိမ့်မယ်… အဲ့ဒါဆိုရင် ဒီခန္ဓာကိုယ်ကို ထိန်းချုပ်ဖို့ ငါ့မှာ အချိန်ပိုရှိလာလိမ့်မယ်”

“ ငါ့ရဲ့ အထွတ်အထိပ် ခွန်အားကို ပြန်ရဖို့ အများဆုံး တစ်နာရီပဲ လိုအပ်လိမ့်မယ်… အဲ့ဒီအချိန်ကျရင်တော့… ”

ငရဲမီးတောက်က မျက်လုံးဖွင့်လိုက်သည်။ သူ့မျက်လုံး၏ အနက်ပိုင်းထဲတွင် ခရမ်းရောင်အလင်း ထွက်ပေါ်လာသည်။

နောက်အခိုက်အတန့်မှာ သူက ရုတ်တရက် မျက်မှောင်ကြုတ်လိုက်သည်။

“ ဘာလို့ ငါ့ရဲ့ မျက်လုံးထဲမှာ ခရမ်းရောင်အလင်း ရှိနေတာလဲ ”

ငရဲမီးတောက်က နှလုံးတုန်သွားသည်။ သူ့ကဲ့သို့ အစွမ်းထက် ပညာရှင်တစ်ဦးအတွက် အမည်မသိအရာက မတော်တဆမှုများနှင့် ပြောင်းလဲနိုင်သော ဖြစ်နိုင်ခြေအမျိုးမျိုးကို ကိုယ်စားပြုသည်။ ဤသည်မှာ ဒုတိယအကြိမ် သူအံ့ဩသွားခြင်း ဖြစ်သည်။

ငရဲမီးတောက်၏ စိတ်က တုန်လှုပ်သွားစဉ် ပိုမိုများပြားသော ခရမ်းရောင်အလင်းက သူ၏ ခန္ဓာကိုယ်ထဲမှ ထိန်းချုပ်မရအောင် ထွက်ပေါ်လာသည်။ ခရမ်းရောင်အလင်းက သူ၏ တစ်ကိုယ်လုံးသို့ ပျံ့နှံ့သွားသည်နှင့်ချက်ချင်း အရင်းအမြစ်က ထွက်ပေါ်လာသည်။

ခရမ်းရောင်အလင်း၏ ဇစ်မြစ်က သူ၏ ရင်ဘက်ထံမှ ဖြစ်သည်။

ယင်းက မဟာဧကရာဇ်ငရဲမီးတောက် အစောနက အာရုံမခံမိခဲ့သော အရာဖြစ်သည်။

ယင်းက ခရမ်းသလင်းကျောက်ဖြစ်သည်။

ထိုသလင်းကျောက်ကို သူအာရုံခံမိသွားသည့်အခါ မဟာဧကရာဇ်ငရဲမီးတောက်၏ အမူအရာက သိသာစွာ ပျက်ယွင်းသွားသည်။

သူ၏ စိတ်ခံစားချက်များကို ပရမ်းပတာဖြစ်သွားစေသည်မှာ ထိုသလင်းကျောက်က သူ၏ နားလည်နိုင်စွမ်းထက် ကျော်လွန်နေခြင်း ဖြစ်သည်။

အစောနက သူက ရွှီချင်း၏ ခန္ဓာကိုယ်ကို စူးစမ်းလေ့လာခဲ့သော်လည်း ခရမ်းသလင်းကျောက်ကို အာရုံမခံနိုင်ခဲ့ပေ။ အမှန်မှာ ဤခန္ဓာကိုယ်ကို သူသိမ်းပိုက်ပြီးသည့်တိုင် ထိုသလင်းကျောက်၏ တည်ရှိမှုကို အာရုံမခံနိုင်ခဲ့ပေ။ သလင်းကျောက်က ခရမ်းရောင်အလင်းကို ထုတ်လွှတ်လိုက်မှသာ ၎င်း၏ တည်ရှိမှုကို သူအာရုံခံမိသွားခြင်း ဖြစ်သည်။

ဤသည်မှာ ခရမ်းသလင်းကျောက်၏ အဆင့်က သူ၏ စိတ်ကူးနိုင်စွမ်းထက် ကျော်လွန်နေသည့်အလားပင်။

အကယ်၍ ခရမ်းသလင်းကျောက်သာ သူ့ကို မမြင်တွေ့စေချင်ဘူးဆိုလျှင် ၎င်းကို ဘယ်သောအခါမှ သူအာရုံခံနိုင်လိမ့်မည် မဟုတ်ချေ။

ထိုမတော်တဆမှုက သူ၏ နှလုံးကို အပြင်းအထန် တုန်ယင်သွားစေသည်။ အစောနက အားညို၏ ထွက်ပေါ်လာမှုထက်ပင် သူက ပိုပြီးအံ့ဩသွားသည်။

ထို့ပြင် ခရမ်းသလင်းကျောက်ထဲမှာ မျက်နှာမရှိသော အနက်ရောင်အရိပ်တစ်ခုက တင်ပျဉ်ခွေထိုင်နေဟန် ရသည်။ ဤသည်မှာ ၎င်းက အရိပ်တစ်ခုမျှသာ ဖြစ်သည့်အလားပင်။

သူက ခရမ်းသလင်းကျောက်ကို ကြည့်လိုက်သည်နှင့်တစ်ပြိုင်နက် အရိပ်က မျက်လုံးဖွင့်လိုက်သည်။

နောက်အခိုက်အတန့်မှာ ခရမ်းသလင်းကျောက်က အသက်ဝင်လာပြီး ကြောက်စရာကောင်းသော အလင်းကို ထုတ်လွှတ်လိုက်သည်။ အရေအတွက်များပြားသော ခရမ်းရောင်အလင်းတန်းများက ပင်လယ်ကြီးတစ်စင်းနှယ် စုဝေးသွားကြပြီး သူ၏ ခန္ဓာကိုယ်မှ နေရာအားလုံးကို မြန်ဆန်စွာ ဖုံးလွှမ်းသွားသည်။ သူ၏ ဝိညာဉ်သည်ပင် ချွင်းချက်မဟုတ်ပေ။

ဤသည်မှာ တံခါးပိတ်ကျင့်ကြံခြင်းဝင်ပြီးနောက် လွန်ခဲ့သော နှစ်တစ်ထောင်အတွင်းမှာ ငရဲမီးတောက်က ထိန်းချုပ်မှုဆုံးရှုံးသွားသော အတွေ့အကြုံကို ပထမဆုံးအကြိမ် ခံစားမိသွားသည်။ ပြင်းထန်သော သေခြင်းရှင်ခြင်းကပ်ဘေးသည်ပင် ဤအခိုက်အတန့်မှာ ထွက်ပေါ်လာသည်။

သူက အသက်ရှူမြန်လာသည်။

“ ဒီဟာက ငါ့ရဲ့ ထိန်းချုပ်မှုအတွင်းမှာ မရှိဘူး ”

“ အဲ့ဒါက ဘာလဲ ”

စိတ်မသက်မသာဖြစ်သော ခံစားမှုက ငရဲမီးတောက်၏ နှလုံးထဲမှာ ထွက်ပေါ်လာသည်။ ထို့ကြောင့် သူက လုံးဝတုံ့ဆိုင်းမနေဘဲ အစွမ်းကုန် ထုတ်လွှတ်လိုက်ပြီး ခရမ်းသလင်းကျောက်ကို ချိပ်ပိတ်ရန် ကြိုးစားလိုက်သည်။

သို့သော်လည်း ခရမ်းရောင်အလင်း၏ ပျံ့နှံ့သွားမှုမှ ဖြစ်ပေါ်လာသော အကျိုးသက်ရောက်မှုက ထိုမျှသာ မဟုတ်ပေ။ ယင်းက သတ္တမသခင်ကြီး၏ အချုပ်အနှောင်များကိုလည်း အသက်သွင်းလိုက်သည်။

အချုပ်အနှောင်က ပြေလျော့သွားသည်နှင့်ချက်ချင်း ငရဲမီးတောက်၏ မျက်နှာက ရှုံ့မဲ့သွားသည်။

သူ၏ နောက်ကျောပေါ်မှ ဖယောင်းတိုင်တိုတမ်က တဖန် လောင်ကျွမ်းလာသည်။

အားညို၏ အရိုးဆေးမီးဖိုသည်ပင် ခရမ်းရောင်အလင်းအောက်မှာ ပိုပြီးအားကောင်းသော သန့်စင်မှုကို ထုတ်လွှတ်လိုက်သည်။ ငရဲမီးတောက်က ချောက်ချားသွားသည်။ သူက ရုတ်တရက် ပါးစပ်ဟလိုက်ပြီး အစွမ်းကုန် စုပ်ယူလိုက်သည်။

ထိုအခါ အသားပိုထဲမှ အသက်ဓာတ်အနှစ်သာရ(၇၀)ရာခိုင်နှုန်းက တစ်ခါတည်း ကုန်ဆုံးသွားသည်။ သူက ကြီးမြတ်သော ထိုစွမ်းအားကို အသုံးပြု၍ ခရမ်းသလင်းကျောက်ကို ခုခံတားဆီးလိုက်သည်။

သူက အံတင်းတင်းကြိတ်လိုက်သည့်အခါ သူ၏ ခန္ဓာကိုယ်ထဲမှ ဝိညာဉ်က ပရမ်းပတာ တုန်ယင်သွားသည်။ သူက သူ၏ ဝိညာဉ်ထဲမှာ ဖွက်ထားသော ရတနာတစ်ခုကို ထုတ်လိုက်သည်။ ထိုရတနာက သူ၏ အသက်တမျှ အရေးကြီးသည်။

ထိုရတနာက သူ၏ အကြီးမားဆုံး လျှို့ဝှက်ချက်လည်း ဖြစ်သည်။

သူ၏ ဝိညာဉ်က ပရမ်းပတာ တုန်ယင်သွားသည်နှင့် ရွှေရောင်အလင်းတန်းက ထွက်ပေါ်လာသည်။

ယင်းက ရေတစ်စက် ဖြစ်သည်။

ယင်းက ရွှေရောင်ရေတစ်စက် ဖြစ်သည်။

အတိအကျပြောရလျှင် ယင်းက ရွှေရောင်မြစ်ထဲမှ ရေတစ်စက် ဖြစ်သည်။

ထိုရေစက် ထွက်ပေါ်လာသည်နှင့်ချက်ချင်း အလွန်ကျယ်ပြောသော ရွှေရောင်မြစ်က ငရဲမီးတောက်၏ ဝိညာဉ်ထဲမှာ ဒြပ်ထည်ဖြစ်ပေါ်လာသည်။

“ မိခင်မြစ်… ”

ငရဲမီးတောက်က အော်ခေါ်လိုက်သည်။

သူ၏ အသံက ပဲ့တင်ထပ်သွားစဉ် မိစ္ဆာငှက်မွှေးသူတော်စင်ကုန်းမြေ၏ အပြင်ဘက်၊ ဝမ်ကူးကုန်းမြေ၏ အပြင်ဘက်၊ အဆုံးမဲ့သော ကြယ်တာရာကောင်းကင်ထဲ၌ အမှတ်ကိုးကြယ်တာရာစက်ဝန်း၏ မြောက်ဘက်တွင်…

အဆုံးမဲ့သော ရွှေရောင်မြစ်တစ်စင်း ရှိသည်။

မရေမတွက်နိုင်သော ကြယ်ဂြိုလ်များက ထိုရွှေရောင်မြစ်ထဲမှာ တည်ရှိနေကြသည်။ တစ်စုံတစ်ယောက်သည် မြစ်ထဲမှ သက်ရှိများနှင့် ကြာပန်းများကို မြင်နိုင်လိမ့်မည်။

မရေမတွက်နိုင်သော ပုံရိပ်များက ထိုကြာပန်းများပေါ်မှာ ထိုင်နေကြသည်။ သူတို့က မျိုးနွယ်ခြားများ၊ လူသားများ၊ ကျင့်ကြံသူများနှင့် နတ်ဘုရားများ ဖြစ်ကြသည်။

ဤအခိုက်အတန့်မှာ လူသားပုံသဏ္ဍာန်ရှိသော ကျင့်ကြံသူတစ်ဦးက ရုတ်တရက် မျက်လုံးဖွင့်လိုက်သည်။ သူက ကြယ်တာရာကောင်းကင်ဆီသို့ လှမ်းကြည့်လိုက်သည့်အခါ စူးရှသော အလင်းက သူ၏ မျက်လုံးထဲမှာ ထွက်ပေါ်လာသည်။

ထို့နောက် သူက မတ်တတ်ရပ်လိုက်ပြီး ရွှေရောင်မြစ်ကို အရိုအသေပေးလိုက်သည်။

“ မိခင်မြစ်ခင်ဗျာ… ရှေးဦးအပျက်အစီးရဲ့ ကုန်းမြေဆီ စေလွှတ်ထားတဲ့ နယ်ရုပ်တစ်ခုက ဒုက္ခရောက်နေတဲ့ လက္ခဏာကို ဖော်ပြလာပါတယ် ”

ရွှေရောင်မြစ်က တုန်ယင်သွားသည်။ အချိန်အတော်ကြာပြီးနောက် ဖော်မပြနိုင်အောင် အလွန်ကျယ်ပြောသော စိတ်ဆန္ဒအမျှင်တန်းတစ်ခုက မြစ်ထဲမှာ ထွက်ပေါ်လာသည်။

ယင်းက အမျှင်တန်းတစ်ခုမျှသာဖြစ်သော်လည်း မြစ်ထဲမှ ဘီလီယံနှင့်ချီသော ကြယ်ဂြိုလ်များက သက်ရောက်ခံလိုက်ရသည်။ ယင်းက မြစ်ထဲမှ သက်ရှိအားလုံးကို နှလုံးတုန်ယင်သွားစေသည်။

“ အချိန်မကျသေးဘူး… ”

ယင်းကို ထိုကျင့်ကြံသူကြားသောအခါ သူက ခေါင်းငုံ့လိုက်ပြီး ကြာပန်းပေါ်မှာ ပြန်ထိုင်လိုက်သည်။ ထို့နောက် သူက တီးတိုးရေရွတ်လိုက်သည်။

“ ဒါဆိုရင် မိခင်မြစ်ရဲ့ ရေစက်နဲ့ သူ့ကိုယ်သူ ခုခံကာကွယ်ပါစေ ”

ငရဲမီးတောက် တံခါးပိတ်ကျင့်ကြံသော နေရာတွင် ဆေးမီးဖိုထဲမှ အဖြစ်အပျက်ကို မည်သူမှ အာရုံမခံနိုင်ကြပေ။

ရွှီချင်းတစ်ယောက်တည်းသာ ခရမ်းသလင်းကျောက်နှင့် သူ့ကြားမှ ဆက်သွယ်မှုကြောင့် ယင်းကို အာရုံခံနိုင်သည်။

ယင်းက ရွှီချင်း၏ အစီအစဉ်ဖြစ်သည်။

သူက ခန္ဓာကိုယ်ထဲမှ မထွက်သွားခင် သတ္တမသခင်ကြီး၏ ပထမချိပ်တံဆိပ်ကို အသက်သွင်းလိုက်ပြီး အနီရောင်ဖယောင်းတိုင်ပေါ်မှ သူ၏ ချိပ်တံဆိပ်ကိုလည်း ဖယ်ရှားလိုက်သည်။ ထို့ကြောင့် အချုပ်အနှောင်များက အသက်ဝင်လာပြီး ဖယောင်းတိုင်တိုတမ်က တဖန် မီးတောက်လာခြင်း ဖြစ်သည်။

ယင်းက ငရဲမီးတောက်အပေါ် သက်ရောက်မှုတစ်ခုကို ဖြစ်ပေါ်စေသည်။

တစ်ချိန်တည်းမှာ သူက ခရမ်းသလင်းကျောက်ကို မယူသွားခဲ့ပေ။

ယင်းအစား သူက ခရမ်းသလင်းကျောက်ကို သူ၏ ခန္ဓာကိုယ်ထဲမှာ ထားရစ်ခဲ့ပြီး အရိပ်လေးကို သလင်းကျောက်ထဲမှာ ထည့်သွင်းခဲ့သည်။ ထို့ကြောင့် အရေးကြီးအခိုက်အတန့်မှာ အရိပ်လေးက ခရမ်းသလင်းကျောက်၏ အစွမ်းကို ထုတ်လွှတ်ပေးလိမ့်မည်။

ရလဒ်ကိုတော့ သူမခန့်မှန်းနိုင်ပေ။

သို့သော်လည်း ယခုအချိန်ထိ ရွှီချင်း၏ ကျင့်ကြံခြင်းခရီးတစ်လျှောက်တွင် သူက တစ်စုံတစ်ခုကို သတိထားမိသွားသည်။ ယင်းမှာ ခရမ်းသလင်းကျောက်ကို သူမှလွဲ၍ တခြားမည်သူမှ အာရုံမခံနိုင်ခြင်း ဖြစ်သည်။

သတ္တမသခင်ကြီး၊ ဧကရီနှင့် အမှတ်ငါးကြယ်တာရာစက်ဝန်းမှ အဖိုးအိုသည်ပင် ၎င်းကို အာရုံမခံနိုင်ကြပေ။

သို့ဖြစ်၍ ဤသို့သေခြင်းရှင်ခြင်းကပ်ဘေးမှာ ရွှီချင်းက ပိုပြီးရူးမိုက်သော လမ်းကြောင်းကို ရွေးချယ်လိုက်သည်။

သူက ရလဒ်ကို ဂရုမစိုက်ပေ။

သူ၏ အစီအစဉ်အရ ခရမ်းသလင်းကျောက် ထွက်ပေါ်လာသည့်အချိန်က သူ့အစီအစဉ်၏ နောက်ဆုံးအပိုင်းကို စတင်ရမည့်အချိန် ဖြစ်သည်။

ထိုအပိုင်းကို စတင်လိုက်သည့်အခါ အကယ်၍ ငရဲမီးတောက်က ယင်းကို အာရုံခံမိသွားမည်ဆိုလျှင် သူက သေချာပေါက် ရွှီချင်းကို တားဆီးလိမ့်မည်။ တစ်ဖက်လူက သူ့ကို ထိုသို့လုပ်ဆောင်ရန် ခွင့်ပြုလိမ့်မည် မဟုတ်ချေ။

ထို့ပြင် သူက နှောင့်ယှက်ခံရရန် လုံးဝမရပေ။

ထို့ကြောင့် သူက ခရမ်းသလင်းကျောက်ကို အသက်သွင်းခဲ့ခြင်း ဖြစ်သည်။

၎င်းက ငရဲမီးတောက်ကို အချိန်တစ်ခဏကြာ ကြန့်ကြာစေလိမ့်မည်။

ထိုသို့တွေးမိသောအခါ ရွှီချင်းက သူ၏ လက်ရှိခန္ဓာကိုယ်ကို အာရုံခံလိုက်သည်။

သူ၏ ခန္ဓာကိုယ်ထဲမှာ ဖော်မပြနိုင်အောင် အလွန်သိပ်သည်းသော မူလစွမ်းအားရှိကြောင်း အာရုံခံမိသည်။ သို့သော်လည်း သူက တစ်ထောင်ကီလိုဂရမ်လေးလံသော စစ်ချပ်ဝတ်ကို ဝတ်ဆင်ထားသည့် ကလေးတစ်ယောက်ပမာ ခံစားမိသည်။

ယင်းကို သူမထိန်းချုပ်နိုင်ပေ။

ထို့ပြင် ဤခန္ဓာကိုယ်မှာ ကြီးမားသော ပြဿနာတစ်ခုရှိသည်။ အတိတ်မှာ ဤခန္ဓာကိုယ်ကို အတင်းအဓမ္မ ဟန်ချက်ညီစေခဲ့ဟန် ရ၏။ ယခု ထိုဟန်ချက်ညီမှုက စတင်ကျိုးပျက်နေသည်။

ဤခန္ဓာကိုယ်၏ အထောက်အပံ့က မရှိတော့ပေ။

သို့ဖြစ်၍ ၎င်းက စတင်ယိုယွင်းပျက်စီးလာပြီး ခြောက်သွေ့သွားသည်။

“ ဒါပေမဲ့ အဲ့ဒါက လုံလောက်ပါတယ်… ”

ရွှီချင်းက တီးတိုးရေရွတ်လိုက်သည့်အခါ ဆုံးဖြတ်ချက်ပြတ်သားမှုက သူ၏ မျက်လုံးထဲမှာ ထွက်ပေါ်လာသည်။ သူက နတ်ဘုရားစိတ်အာရုံကို ထုတ်လွှတ်လိုက်သည်နှင့် သူ၏ အက်ရှရှအသံက ပဲ့တင်ထပ်သွားသည်။

“ ငါဆန္ဒပြုတယ်… ”

နောက်အခိုက်အတန့်မှာ ထူးခြားသော မျက်နှာဖုံးက အတားအဆီးများ၊ ဟင်းလင်းပြင်၊ အချိန်နှင့်လေဟာနယ်ကို တိုက်ရိုက် ဖြတ်ကျော်သွားပြီး ရွှီချင်း၏ အရှေ့မှာ ထွက်ပေါ်လာသည်။

ဤသည်မှာ မျက်နှာဖုံးက ရွှီချင်း၏ ဆန္ဒပြုမှုကို စောင့်ဆိုင်းနေသည့်အလားပင်။

၎င်းက ရွှီချင်းကို စိုက်ကြည့်လိုက်သည်။

ရွှီချင်းသည်လည်း မျက်နှာဖုံးကို ကြည့်လိုက်သည်။

“ ငါ့ရဲ့ ခန္ဓာကိုယ်ကို ပြန်တည်ဆောက်ဖို့ ဒီခန္ဓာကိုယ်ကို အာဟာရဓာတ်အဖြစ် အသုံးပြုချင်တယ် ”