အမည်မသိလောက(က)

လောကက ချာချာလည်သွားသည်။ ဤသည်မှာ ကောင်းကင်နှင့် မြေပြင်က တစ်ခုတည်းဖြစ်သွားသည့်အလားပင်။

လေဟာနယ်က အဆုံးမဲ့ဟန် ရ၏။ သို့သော်လည်း နောက်အခိုက်အတန့်မှာ လေဟာနယ်က အလွန်သေးငယ်သွားသည်။

အချိန်က ရှည်လျားသော်လည်း နောက်အခိုက်အတန့်မှာ မျက်တောင်တစ်ခတ်မျှသာ ဖြစ်လာသည်။

ဖရိုဖရဲဖြစ်နေသော အချိန်နှင့် လေဟာနယ်က အတူတကွ ပေါင်းစပ်သွားပြီး ဧရာမဝဲကတော့တစ်ခုကို ဖွဲ့စည်းသွားကာ ကောင်းကင်ဘုံသူတော်စင်စေတီကို ဝါးမျိုလိုက်သည်။

ကြောက်မက်ဖွယ်စွမ်းအားက ထိုထဲမှ ပေါ်လျှိုးထွက်လာသည်။ ယင်းက အဆုံးမဲ့မုန်တိုင်းထက် သာလွန်သော ဆွဲအားတစ်ခုကို ဖန်တီးလိုက်ပြီး အရာအားလုံးကို ဖျက်ဆီးလိုက်သည်။

ထိုဆွဲအားက ကောင်းကင်ဘုံသူတော်စင်စေတီပေါ်သို့ ကျရောက်လာသည့်အခါ စေတီက အရှေ့သို့ ဆက်သွားရန် အခက်တွေ့လာသည်။

ဆွဲအားနှင့် နှိုင်းယှဉ်လျှင် ကောင်းကင်ဘုံသူတော်စင်စေတီက ဆူနာမီလှိုင်းများကြားထဲမှ အထီးကျန်လှေငယ်လေးတစ်စင်းပမာ သေးနုတ်သည်။ ၎င်းက ပြိုကွဲတော့မည့် အခြေအနေမှာ ရှိသည်။

မျက်စိတစ်မှိတ်အတွင်းမှာ ကျန်းစန်ထည့်သွင်းခဲ့သော ကောင်းကင်ဘုံသူတော်စင်စေတီ၏ အပြင်ဘက်မှ အကာအကွယ်အလွှာများက ပြိုကွဲအက်ကွဲသွားကြသည်။ ယင်းတို့က အပိုင်းပိုင်းအစစ ပေါက်ကွဲသွားပြီးနောက် အရပ်မျက်နှာအဘက်ဘက်တွင် ပြန့်ကျဲသွားကြသည်။

ထိုအပိုင်းအစများက ဆွဲငင်ခံလိုက်ရပြီး နောက်တစ်ကြိမ် အက်ကွဲသွားကြသည်။ နောက်ဆုံးမှာတော့ ယင်းတို့က ဖုန်မှုန့်အဖြစ် ပြောင်းလဲသွားပြီး အချိန်နှင့်လေဟာနယ်၏ ဝဲကတော့ထဲမှာ လွင့်ပြယ်သွားသည်။

အသစ်ပြုပြင်မွမ်းမံထားသော အရာအားလုံးကို ဆုံးရှုံးသွားပြီးနောက် ကောင်းကင်ဘုံသူတော်စင်စေတီသည် မူလစေတီအပျက်အဖြစ် ပြန်ပြောင်းလဲသွားသည်။ သို့သော်လည်း စေတီက ဤဝဲကတော့ထဲမှာ ဖျက်ဆီးမခံရပေ။ ၎င်းက ဝဲကတော့၏ စွမ်းအားကြောင့် မြန်ဆန်စွာ လှည့်ပတ်နေသည်။

စေတီအပျက်က ၎င်းဘာသာ ချာချာလည်နေသည်။ တစ်ချိန်တည်းမှာ ၎င်းက ဝဲကတော့၏ လမ်းညွှန်မှုအတိုင်း လှည့်ပတ်နေပြီး ပရမ်းပတာဖြစ်နေသည်။

အမှန်မှာ အကယ်၍ တစ်စုံတစ်ယောက်က အနီးကပ်သေချာကြည့်မည်ဆိုလျှင် စေတီအပျက်၏ လှည့်ပတ်မှုနှုန်းက ဝဲကတော့၏ လှည့်ပတ်မှုနှုန်းထက် အများကြီး ပိုမြန်ဆန်နေကြောင်း မြင်ရလိမ့်မည်။

ယင်းက ထိုနှစ်ခု၏ အနှစ်သာရကွဲပြားမှုကြောင့် ဖြစ်သည်။

မတူညီသော လှည့်ပတ်မှုအမြန်နှုန်းနှင့် ကြောက်မက်ဖွယ်ဆွဲငင်အားကြောင့် ကောင်းကင်ဘုံသူတော်စင်စေတီထဲမှ ရွှီချင်းက ပြင်းထန်သော သက်ရောက်မှုကို ခံစားမိသွားသည်။

သူက စေတီထဲမှာ တင်ပျဉ်ခွေထိုင်နေသော်လည်း လေထဲမှာ လွင့်မျောနေပြီး ချာချာလည်နေသည်။

သူက ကိုယ့်ကိုယ်ကိုယ် မထိန်းချုပ်နိုင်ပေ။

ထို့ပြင် သူ၏ လှည့်ပတ်မှုက စေတီထက် အများကြီး ပိုမြန်ဆန်သည်။

အကြောင်းအရင်းသည်တော့ သူတို့ထံမှ အနှစ်သာရများက ကွဲပြားခြားနားသောကြောင့် ဖြစ်သည်။

သို့ဖြစ်၍ ဤအခိုက်အတန့်မှာ အတိအကျဆိုရလျှင် ဝဲကတော့၊ စေတီအပျက်နှင့် ရွှီချင်းသည် မတူညီသော အမြန်နှုန်းဖြင့် လှည့်ပတ်နေကြသည်။

ရလဒ်အနေဖြင့် ဆွဲငင်အားက ပိုပြီးအားကောင်းလာသည်။

ရွှီချင်း၏ ခန္ဓာကိုယ်က တုန်ယင်သွားသည်။ ဤသည်မှာ သူက ဆုတ်ဖြဲခံရတော့မည့်အလားပင်။

သူ့ကို ပိုပြီးနာကျင်စေသည်မှာ သူ၏ ဝိညာဉ်ဖြစ်သည်။

သူ၏ လက်ရှိအခြေအနေကို စကားလုံးဖြင့် ဖော်ပြရန် ခက်ခဲသည်။ သူက အရာအားလုံးကို ရှင်းလင်းစွာ အာရုံခံမိသော်လည်း နောက်အခိုက်အတန့်မှာ ယင်းတို့က ဝေဝါးသွားသည်။ သူ၏ ဘေးပတ်ဝန်းကျင်မှ အရောင်များသည်ပင် သူ၏ အသိအမြင်အောက်မှာ မရှင်းမလင်း ဖြစ်လာကြသည်။

တစ်ခါတစ်ရံ အရောင်များက ယှက်ထွေသွားကြပြီး ကိုးရောင်ခြယ်အလင်းအဖြစ် ထွက်ပေါ်လာသည်။ တစ်ခါတစ်ရံ အရောင်အားလုံး ပျောက်ကွယ်သွားကြပြီး ဗလာနတ္ထိသာ ကျန်ရှိတော့သည်။

ယင်းတို့က ရွှီချင်း၏ စိတ်ထဲမှာ ထွက်ပေါ်လာသော မြင်ကွင်းများ ဖြစ်သည်။

ဤတစ်ချိန်လုံးမှာ သူက မျက်လုံးမှိတ်ထားခဲ့သည်။

ယင်းက သူ့အား နွေဦးအင်မော်တယ်နန်းတော်သခင် သတိပေးခဲ့သောအရာ ဖြစ်သည်။ ရှေးဦးပင်လယ်ကို ဖြတ်သန်းသွားသည့်အခါ မျက်လုံးမှိတ်ထားရန် နန်းတော်သခင်က သူ့ကို ညွှန်ကြားခဲ့သည်။

အဘယ့်ကြောင့်ဆိုသော် ရွှီချင်း၏ ကျင့်ကြံခြင်းက နွေဦးအင်မော်တယ်အဆင့်သို့ မရောက်ရှိသေးသောကြောင့် ဖြစ်သည်။ ထို့ကြောင့် သူ့ကို မျက်လုံးမှိတ်ထားခိုင်းခဲ့ခြင်း ဖြစ်သည်။

သို့ဖြစ်၍ ဤတစ်ချိန်လုံးမှာ ရွှီချင်းက မျက်လုံးမှိတ်ထားခဲ့သည်။

ဤလမ်းကြောင်းက ထာဝရနီးပါး ရှည်လျားဟန် ရ၏။ ဤသည်မှာ လမ်းကြောင်းက အဆုံးမဲ့ချောက်နက်တစ်ခုဖြစ်သည့်အလားပင်။

အမည်မသိ အချိန်ကာလတစ်ခုကြာမြင့်ပြီးနောက် ရွှီချင်းခံစားနေရသော နာကျင်မှုက ပိုပြီးတိုးမြှင့်လာသည်။ သူ၏ ခန္ဓာကိုယ်က ထိုနာကျင်မှုကို မခံစားနိုင်တော့လုနီးပါး အလွန်ဆိုးဝါးလာသည်။ ဤသည်မှာ ခန္ဓာကိုယ်က သူ့အပိုင်မဟုတ်တော့သည့်အလားပင်။

သူ၏ ဝိညာဉ်သည်လည်း ထို့အတူပင်။ သူ၏ နားလည်မှုအောက်မှာ ဝိညာဉ်က ဖရိုဖရဲဖြစ်သွားသည်။

ထိုသို့ညှဉ်းပန်းနှိပ်စက်မှုဒဏ်ကြောင့် ရွှီချင်းက ပြင်းထန်သော သေခြင်းရှင်ခြင်းကပ်ဘေးကို ခံစားမိသွားသည်။

“ ဒီအတိုင်းဆက်သွားနေတာက အဆင်မပြေဘူး… ဝဲကတော့ရယ် စေတီအပျက်ရယ် ငါရယ်က မတူညီတဲ့ အမြန်နှုန်းနဲ့ လှည့်ပတ်နေကြတယ်… အဲ့ဒါက ဆိုးဝါးတဲ့ ရလဒ်နှစ်ခုကို ဖြစ်ပေါ်စေနိုင်တယ်… တစ်ခုက စေတီပြိုကွဲပျက်စီးသွားတာပဲ… နောက်တစ်ခုက ငါ့ရဲ့ ခန္ဓာကိုယ်နဲ့ ဝိညာဉ်က ပြိုကွဲပျက်စီးသွားတာပဲ… ဒုတိယတစ်ခုက ပိုပြီးဖြစ်နိုင်ခြေများတယ် ”

“ ပြီးတော့ ဒီလိုအတွေ့အကြုံကို အတိတ်မှာ ငါခံစားခဲ့ဖူးတယ် ”

သူ၏ ခန္ဓာကိုယ်က အပိုင်းပိုင်းအစစ ဆုတ်ပြဲသွားပြီး သူ၏ ဝိညာဉ်က ရူးသွပ်သွားတော့မည့်အချိန် ရွှီချင်းက လျှာကိုက်လိုက်သည်။ သူက နာကျင်မှုကို အသုံးပြု၍ သူ၏ အသိစိတ်ကို ပြန်တည်ငြိမ်သွားစေသည်။

သက်ရောက်မှုက မကြီးမားဘဲ တဒင်္ဂမျှသာ အသုံးဝင်သည်။

သို့သော်လည်း ထိုတဒင်္ဂအချိန်မှာ ရွှီချင်းက အတိတ်တုန်းက ထိုသို့တူညီသော အတွေအကြုံ၏ ဇစ်မြစ်ကို ရှာဖွေလိုက်သည်။

ယင်းက လပူဇော်ဒေသကြီးထဲတွင် သူ၏ လူသားသဘာဝ၊ နတ်ဘုရားသဘာဝနှင့် သားရဲသဘာဝက ပေါ်လျှိုးထွက်လာသည့်အချိန် ဖြစ်သည်။

ထိုအချိန်တွင် သူက ဤသို့ဖရိုဖရဲအခြေအနေသို့ ကျရောက်သွားခဲ့ပြီး သူ၏ ဝိညာဉ်က မျှခြေမညီမှုကြောင့် ပြိုကွဲလုနီးပါး ဖြစ်ခဲ့သည်။

ထိုစဉ်အခါက သူ၏ ဖြေရှင်းနည်းသည် ကျောက်ဆူးကို ရှာဖွေရန် ဖြစ်သည်။

ကျောက်ဆူးက မျှခြေညီမှုကို ပြန်ရရှိစေပြီး သူ၏ စိတ်ကို တည်ငြိမ်စေသည်။

“ ကျောက်ဆူး… မျှခြေညီမှု… ”

အတိတ်တွင် လူသားသဘာဝ၊ နတ်ဘုရားသဘာဝနှင့် သားရဲသဘာဝက ပရမ်းပတာဖြစ်သွားခဲ့စဉ် ရွှီချင်း၏ ကျောက်ဆူးက ကောင်းကင်ကံကြမ္မာပန်းပွင့် ဖြစ်ခဲ့သည်။ အတိအကျဆိုရလျှင် ကောင်းကင်ကံကြမ္မာပန်းပွင့်အပေါ် သူ၏ စွဲလန်းစိတ်နှင့် နောင်တရမှုက ရွှီချင်း၏ ကျောက်ဆူးဖြစ်လာခဲ့သည်။

“ ဒီတော့ အခု… ”

အသက်ရှူချိန်အနည်းငယ် ကြာပြီးနောက် ရွှီချင်းက စိတ်ဆုံးဖြတ်လိုက်ပြီး နွေဦးအင်မော်တယ်နန်းတော်သခင်၏ သတိပေးမှုအား နားထောင်ခြင်းကို လက်လျော့လိုက်သည်။ အဘယ့်ကြောင့်ဆိုသော် အကယ်၍ သူက ထိုအတိုင်းဆက်သွားနေမည်ဆိုလျှင် သူ၏ သေခြင်းရှင်ခြင်းအခြေအနေက ပိုပြီးဆိုးဝါးလာလိမ့်မည်။

ထိုသို့ဆိုမှတော့ အရင်ဆုံး သူ့ကိုယ်သူ ထိန်းချုပ်ရမည်။

သို့ဖြစ်၍ သူက မျက်လုံးဖွင့်လိုက်သည်။

သူက မျက်လုံးဖွင့်လိုက်သည့်အခိုက် ကောင်းကင်ဘုံသူတော်စင်စေတီကို မြင်သွားပြီး ပိုပြီးမူးဝေသွားသည်။

စေတီက သူ၏ မျက်လုံးထဲမှာ မြန်ဆန်စွာ လှည့်ပတ်နေသည်။ အထူးသဖြင့် သူကိုယ်၌ကလည်း လှည့်ပတ်နေသည်။ သို့ဖြစ်၍ ဖရိုဖရဲဖြစ်သော ခံစားမှုက အလွန်ပြင်းထန်သည်။

ရွှီချင်း၏ မျက်လုံးက သွေးရောင်လွှမ်းသွားပြီး သူ၏ ခန္ဓာကိုယ်ထဲမှ ကျင့်ကြံခြင်းအခြေခံက ပေါ်လျှိုးထွက်လာသည်။ သူက လက်နှစ်ဖက်စလုံးဖြင့် ချိပ်တံဆိပ်လက်ဟန်များကို ဖွဲ့စည်းလိုက်ပြီး ယင်းတို့ကို အရပ်ရှစ်မျက်နှာဆီသို့ ဝှေ့ယမ်းလိုက်သည်။ သူက ကျင့်ကြံခြင်းစွမ်းအားကို အသုံးပြု၍ သူ့ခန္ဓာကိုယ်၏ လှည့်ပတ်မှုအမြန်နှုန်းကို ချိန်ညှိလိုက်သည်။

နောက်ဆုံးမှာတော့ အကြိမ်ပေါင်းဒါဇင်ခန့် ကြိုးစားပြီးနောက် သူက ခန္ဓာကိုယ်၏ လှည့်ပတ်မှုကို နှေးကွေးနိုင်သွားသည်။ သူ၏ လှည့်ပတ်မှုအမြန်နှုန်းက တဖြည်းဖြည်း စေတီနှင့် ထပ်တူညီလာသည်။

စေတီနှင့် သူက တူညီသော အမြန်နှုန်းဖြင့် လှည့်ပတ်သွားသည့်အခါ သူ၏ ခန္ဓာကိုယ်နှင့် ဝိညာဉ်ထံမှ ဆုတ်ဖြဲသော ခံစားမှုက ပျောက်ကွယ်သွားသည်။

သူက စေတီနှင့်အတူ ဟန်ချက်ညီမှုကို ရရှိသွားသည်။ သူတို့၏ ဦးတည်ရာနှင့် လှည့်ပတ်မှုအမြန်နှုန်းက တူညီသွားပြီး တစ်သားတည်း ဖြစ်သွားသည်။

သို့ဖြစ်၍ ထုံးစံအားဖြင့် ဆွဲငင်အားက လျော့နည်းသွားသည်။

ယင်းက ရွှီချင်းစဉ်းစားမိသော ကျောက်ဆူးဖြစ်သည်။

ရွှီချင်းက သက်ပြင်းရှည်ကြီးချလိုက်သည်။

“ ငါ့ရဲ့ ခန္ဓာကိုယ်၊ စေတီနဲ့ အပြင်ဘက်က ဝဲကတော့က တူညီတဲ့ ဦးတည်ရာနဲ့ အမြန်နှုန်းအတိုင်း လှည့်ပတ်မယ်ဆိုရင် ပြီးပြည့်စုံတဲ့ ဟန်ချက်ညီမှုကို ဖြစ်ပေါ်စေလိမ့်မယ်… အဲ့ဒါက ကျောက်ဆူးပဲ ”

“ အခု ငါလုပ်ရမှာက ငါနဲ့ စေတီကို အပြင်ဘက်က ဝဲကတော့နဲ့ တူညီတဲ့ အမြန်နှုန်းအတိုင်း လှည့်ပတ်စေဖို့ပဲ ”

ရွှီချင်းက တုံ့ဆိုင်းမနေပေ။ သူက ဆင်ခြင်သုံးသပ်ပြီးနောက် ကောင်းကင်ဘုံသူတော်စင်နွယ်ပင်ကို ထုတ်လွှတ်လိုက်ပြီး စေတီအပျက်ကို ထိန်းချုပ်လိုက်သည်။ တဖြည်းဖြည်း သူက စေတီအပျက်ကို ဝဲကတော့၏ အမြန်နှုန်းအတိုင်း လိုက်ချိန်ညှိလိုက်သည်။