အုပ်ချုပ်သူကို သတ်ဖြတ်ခြင်း(ခ)

ထို့ကြောင့် ရွှီချင်းက ချက်ချင်း ဆုံးဖြတ်ချက်ချလိုက်သည်။

သို့ဖြစ်၍ ဧကရာဇ်ဓား၏ တိုက်ခိုက်မှုက သက်လတ်ပိုင်းအုပ်ချုပ်သူထံသို့ ဦးတည်မသွားပေ။ ယင်းအစား သူက တိုတောင်းသော ဤအခွင့်အရေးကို အသုံးပြု၍ အောက်ဘက်မှ မြေကြီးထံသို့ တိုက်ခိုက်လိုက်သည်။

အတိအကျဆိုရလျှင် ဓားက မြေကြီးပေါ်မှ ပူဖောင်းများပေါ်သို့ ကျရောက်သွားသည်။

တစ်ဖက်လူ၏ အားသာချက်က တည်ငြိမ်မှုဖြစ်မှတော့ သူက တစ်ဖက်လူ၏ အသိစိတ်ကို ဖရိုဖရဲဖြစ်အောင် အရင်လုပ်ဆောင်ရမည်။

သို့မှသာလျှင် တစ်ဖက်လူ၏ တည်ငြိမ်မှုက ပျက်စီးသွားပြီး သေစေနိုင်သော ဟာကွက်တစ်ခု ထွက်ပေါ်လာလိမ့်မည်။

အစောင့်အရှောက်တစ်ယောက်အနေဖြင့် သူ၏ အဓိကဦးစားပေးတာဝန်မှာ ဝိညာဉ်သတ္ထုတွင်းကို ကာကွယ်စောင့်ရှောက်ရန် ဖြစ်သည်။ ထို့ကြောင့် အကယ်၍ သူကာကွယ်စောင့်ရှောက်နေသော အရာများသာ ပျက်စီးဆုံးရှုံးသွားမည်ဆိုလျှင် သူ၏ အသိစိတ်က အကြီးအကျယ် ဖရိုဖရဲဖြစ်သွားလိမ့်မည်။

သို့ဖြစ်၍ ရွှီချင်း၏ ဓားချက်က အုပ်ချုပ်သူထံသို့ ပစ်မှတ်ထားနေဟန် ထင်ရသော်လည်း အမှန်မှာ သူ၏ တကယ့်ရည်ရွယ်ချက်က ပူဖောင်းများသာ ဖြစ်သည်။

ဤအခိုက်အတန့်မှာ ဓားစွမ်းအင်က ကျဆင်းသွားသည့်အခါ မြေပြင်က တုန်လှုပ်သွားသည်။ အရေအတွက်များပြားသော ပူဖောင်းများက ဓားစွမ်းအင်ဖြင့် ပိုင်းဖြတ်ခံလိုက်ရဟန် ရ၏။

ပူဖောင်းများက တစ်ခုပြီးတစ်ခု ပေါက်ကွဲသွားကြသည်။

ကမ္ဘာငယ်များ၏ ကောင်းကင်များက ပြိုကွဲပျက်စီးသွားကြသည်။ ကမ္ဘာငယ်များထဲမှ သန့်စင်သူများသည် အချိန်မီပြန်မရှင်သန်နိုင်သောကြောင့် အိပ်မောကျနေလျက်ဖြင့် သေဆုံးသွားကြသည်။

လောကနယ်နိမိတ်မရှိတော့သည့်အခါ ကမ္ဘာငယ်များထဲမှ သက်ရှိများက အိမ်မက်ထဲမှ ပြန်နိုးလာကြဟန် ရ၏။ သူတို့အားလုံးက ပါးစပ်အဟောင်းသားဖြစ်သွားပြီး အံ့ဩထိတ်လန့်သွားကြသည်။ ယင်းက ဤနတ်ဘုရားအကျဉ်းထောင်ကို ပရမ်းပတာဖြစ်သွားစေသည်။

ရလဒ်အနေဖြင့် ဆွဲထုတ်ခံနေရသော ဝိညာဉ်စွမ်းအင်ပမာဏက သိသိသာသာ လျော့နည်းသွားသည်။

ဤအခိုက်အတန့်မှာ ကောင်းကင်ပေါ်၌ ဝိညာဉ်စွမ်းအင်ကို စုပ်ယူနေသော ဝဲကတော့က မည်သည့်အရာကိုမှ မစုပ်ယူနိုင်တော့ပေ။

“ မင်းဘာလုပ်လိုက်တာလဲ ”

ထိုမြင်ကွင်းက နောက်ဆုံးမှာတော့ သက်လတ်ပိုင်းအုပ်ချုပ်သူ၏ အသိစိတ်ကို ဝုန်းခနဲ လှုပ်ခါသွားစေသည်။ သူ၏ အမူအရာက သိသိသာသာ ပျက်ယွင်းသွားပြီး သူက ကောင်းကင်ပေါ်မှ ဝဲကတော့ကို ကြောက်လန့်တကြား ကြည့်လိုက်သည်။

သူက ရွှီချင်းကို တားဆီးချင်သော်လည်း အလွန်နောက်ကျသွားချေ၏။

အစက ထိုသို့အခြေအနေသည် သူ၏ ထိန်းချုပ်မှုအောက်မှာ မဖြစ်ပေါ်လာနိုင်ပေ။ သို့သော်လည်း အသိအမြင်ပြောင်းလဲခံရခြင်းက ဤသို့အခြေအနေဖြစ်လာရန် အခွင့်အရေးတစ်ခုကို ဖန်တီးခဲ့သည်။

ယခုအချိန်မှာ ဝိညာဉ်သတ္ထုတွင်းက ပျက်စီးသွားပြီး ဝဲကတော့မှ စုပ်ယူလိုက်သော ဝိညာဉ်စွမ်းအင်က သိသိသာသာ လျော့နည်းသွားသည်။ ထိုမြင်ကွင်းကို မြင်လိုက်ရသောအခါ သူ၏ နှလုံးက အပြင်းအထန် တုန်ယင်သွားသည်။

သူစောင့်ကြပ်နေသော ဝိညာဉ်သတ္ထုတွင်းထဲမှာ ထိုမျှကြီးမားသော အပြောင်းအလဲက ထွက်ပေါ်လာသည်။ သူ၏ မျက်လုံးထဲမှ သတ်ဖြတ်ခြင်းစိတ်ဆန္ဒက ချက်ချင်း အားကောင်းလာသည်။ သူက ကျယ်လောင်စွာ အော်ပြောလိုက်ပြီး သူ၏ မျက်လုံးထဲမှ တာအိုအမှတ်အသားများကို ထပ်မံ လှည့်ပတ်လိုက်သည်။

သူ၏ တာအိုအမှတ်အသားများက ထူးခြားပြီး ကြောက်မက်ဖွယ်ကောင်းသော စွမ်းအားကို ပိုင်ဆိုင်ထားသည်။ သို့သော်လည်း သူ၏ ကျင့်ကြံခြင်းအဆင့်ကြောင့် ယင်းကို အသုံးပြုသည့်အခါတိုင်း သူက အားအင်အများကြီး ကုန်ဆုံးသွားလိမ့်မည်။

သို့ဖြစ်၍ အကယ်၍ အခြေအနေက တကယ်အရေးမကြီးလျှင် သူက ယင်းကို ထပ်ခါထပ်ခါ အသုံးမပြုချင်ပေ။

သို့သော်လည်း ယခု သူ့မှာ တခြားရွေးချယ်စရာမရှိပေ။ သူက ညာလက်ကို မြှောက်လိုက်ပြီး အောက်ဘက်မှ မြေကြီးပေါ်သို့ ဖိချလိုက်သည်။

ချက်ချင်းဆိုသလို သူ၏ အခွင့်အာဏာစွမ်းအားက ဆင်းသက်လာပြီး အတားအဆီးတစ်ခုကို ဖွဲ့စည်းလိုက်သည်။ လျှပ်တစ်ပြက်အတွင်းမှာ ထိုအတားအဆီးက အကာအကွယ်ဒိုင်းကာတစ်ခုအဖြစ် သိပ်သည်းသွားပြီး ပြင်းထန်သော ဖိအားကို ထုတ်လွှတ်လိုက်သည်။

အကာအကွယ်ဒိုင်းကာက ပြိုကွဲပျက်စီးသွားသော ဝိညာဉ်သတ္ထုတွင်းများကို လွှမ်းခြုံသွားပြီး ယင်းတို့၏ ပျက်စီးမှုကို နှေးကွေးသွားစေသည်။ တစ်ချိန်တည်းမှာ ယင်းက ကိုယ့်ဘာသာ ပြန်လည်ကောင်းမွန်နိုင်သော အခွင့်အရေးတစ်ခုကို ဖန်တီးလိုက်သည်။ ထိုသို့လုပ်ဆောင်လိုက်သည်နှင့် သူ၏ ခန္ဓာကိုယ်က ပိုပြီးပိန်ချုံးလာသည်။ သို့သော်လည်း သူ၏ မျက်လုံးထဲမှာ အေးစက်စက်အလင်း ထွက်ပေါ်လာသည်။

ဤအခိုက်အတန့်မှာ သူက ဆက်ပြီး သတိမထားနိုင်တော့ပေ။ အဘယ့်ကြောင့်ဆိုသော် သူ၏ အခွင့်အာဏာစွမ်းအားက ဝိညာဉ်သတ္ထုတွင်းများကို အချိန်အကြာကြီး မဖိနှိပ်ထားနိုင်ပေ။ သူက ဤတိုက်ပွဲကို မြန်ဆန်စွာ အဆုံးသတ်ပြီး ကမ္ဘာငယ်များကို ပြန်လည်ပြုပြင်ရမည်။ သို့မဟုတ်ဘဲ ကောင်းကင်ပေါ်မှ ဝဲကတော့က ဝိညာဉ်စွမ်းအင်ကို အချိန်အတော်ကြာသည်အထိ မစုပ်ယူနိုင်လျှင် သူက မတွေးဝံ့သော နောက်ဆက်တွဲအကျိုးဆက်ကို ခံစားရလိမ့်မည်။

သို့ဖြစ်၍ သူက အံကြိတ်လိုက်ပြီး ရွှီချင်းထံသို့ လက်ညှိုးညွှန်လိုက်သည်။ သူက မည်သည့်အရာကိုမှ ဂရုမစိုက်တော့ဘဲ အခွင့်အာဏာကို အသုံးပြုလိုက်သည်။

သူ၏ အခွင့်အာဏာက နောက်တစ်ကြိမ် အသက်ဝင်လာသည်။

ရွှီချင်း၏ ခန္ဓာကိုယ်က တုန်ယင်သွားပြီး သူက အသက်ရှူမွန်းကြပ်လာသည်။

သူ၏ ဘေးပတ်ပတ်လည်မှ လေနှင့် ဝိညာဉ်စွမ်းအင်အားလုံးက အဝေးသို့ ဆွဲထုတ်ခံလိုက်ရသည်။ ယင်းက ဤနေရာမှ ဖိအားကို တစ်ဟုန်ထိုး မြင့်တတ်သွားစေသည်။ သူ၏ ခန္ဓာကိုယ်ထဲမှာပင် ဖိအားက ထွက်ပေါ်လာသည်။

အနီရောင်အသားပိုများက သူ၏ အရေပြားပေါ်မှာ ထွက်ပေါ်လာကြပြီး ယင်းက သူ့ကို အရုပ်ဆိုးအကျည်းတန်စေသည်။

ဤသည်မှာ ယင်းတို့က အချိန်မရွေး ပေါက်ကွဲသွားတော့မည့်အလားပင်။

သို့သော်လည်း ရွှီချင်းက မထိတ်လန့်သွားပေ။

“ ငါစောင့်နေတဲ့ အခွင့်အရေးက ရောက်လာတော့မယ် ’

ရွှီချင်းက သက်လတ်ပိုင်းအုပ်ချုပ်သူကို ကြည့်လိုက်ပြီး ရုတ်တရက် ညာလက်ကို မြှောက်လိုက်သည်။ အန္တိမလေဟာနယ်တာအိုက သူ၏ ခန္ဓာကိုယ်အတွင်းမှာ အရှိန်အဟုန်ပြင်းစွာ လှည့်ပတ်သွားသည်။

ကမ္ဘာငယ်ထဲမှာ ရှိနေခဲ့သည့်အတောအတွင်း ရွှီချင်းက ရှေးဦးပင်လယ်ကို ဖြတ်သန်းခဲ့သော အတွေ့အကြုံများကို ပြန်ဆင်ခြင်သုံးသပ်ခဲ့သည်။ တခြားလူများဆိုလျှင် ထိုမြင်ကွင်းများထံမှ မည်သည့်အရာကိုမှ နားလည်နိုင်လိမ့်မည် မဟုတ်ချေ။

သို့သော်လည်း အန္တိမလေဟာနယ်တာအိုကို နားလည်ထားသော သူ့အတွက်တော့ ဝဲကတော့ထဲမှ မြင်ကွင်းများက လေဟာနယ်တာအိုနှင့်ပတ်သက်သော လျှို့ဝှက်ချက်များ ဖြစ်သည်။

ယင်းတို့က သူ့အား လေဟာနယ်ကို မည်သို့အသုံးပြုသင့်ကြောင်း လမ်းညွှန်ပေးသည်။

သို့ဖြစ်၍ နောက်အခိုက်အတန့်မှာ ရွှီချင်း၏ ခန္ဓာကိုယ်ထဲမှ အန္တိမလေဟာနယ်တာအိုက အပြင်သို့ ပျံ့နှံ့ထွက်လာသည့်အခါ သူ၏ ဘေးပတ်ဝန်းကျင်မှ ဧရိယာက ချက်ချင်း ပုံပျက်တွန့်လိမ်သွားသည်။ ထို့နောက် ဧရိယာက အဆုံးမဲ့စွာ ကျယ်ပြောသွားသည်။

နောက်အခိုက်အတန့်မှာ ဧရိယာက ဖြတ်တောက်ခံလိုက်ရပြီး သီးခြားခွဲထုတ်ခံလိုက်ရသည်။

ထိုဧရိယာအတွင်းမှ လေဟာနယ်သည်လည်း ဖြတ်တောက်ခံလိုက်သည်။ လေအခွင့်အာဏာက သီးခြားခွဲထုတ်ခံလိုက်ရသည့်အခါ ရွှီချင်း၏ ပေတစ်ရာပတ်လည်အတွင်းမှာ နယ်နိမိတ်တစ်ခု ထွက်ပေါ်လာသည်။

ယင်းက နယ်မြေကို အကျဉ်းချလိုက်ခြင်းနှင့် ဆင်တူသည်။

အကျဉ်းချခံလိုက်ရသော နယ်မြေက ရွှီချင်း၏ အန္တိမလေဟာနယ်တာအိုဖြင့် ထိန်းချုပ်ခံလိုက်ရသည်။

ထို့နောက် နယ်မြေလွတ်များက မြန်ဆန်စွာ များပြားလာပြီး စက္ကန့်ပိုင်းအတွင်းမှာ အရေအတွက်တစ်ရာအထိ တိုးမြှင့်သွားကြသည်။ ထိုနယ်မြေလွတ်များက ရွှီချင်းကို ဗဟိုပြု၍ ဝန်းရံသွားကြသည်။

လေသည်ပင် ဆွဲဆန့်ခံလိုက်ရပြီး နယ်မြေလွတ်တစ်ခုစီက ကမ္ဘာငယ်တစ်ခုနှင့် ဆင်တူကြသည်။

နောက်ဆုံးမှာတော့ အရာအားလုံးက ပြောင်းပြန်လှည့်ပတ်သွားသည်။

ရွှီချင်းက သက်လတ်ပိုင်းအုပ်ချုပ်သူကို စိုက်ကြည့်လိုက်သည်။ နောက်အခိုက်အတန့်မှာ အသံက အက်ကွဲသွားသော ကြေးမုံပမာ အပိုင်းပိုင်းအစစ ပြန့်ကျဲသွားသည်။

“ မင်းရဲ့ လေအခွင့်အာဏာက သန်မာပါတယ်… ဒါပေမဲ့ လေပေါက်ကွဲမှုက ဘယ်လောက်ပဲ အားကောင်းပါစေ လေဟာနယ်ပြိုကွဲမှုထက် နိမ့်ကျနေတုန်းပဲ ”

ရွှီချင်းက တည်ငြိမ်စွာ ပြောသည်။

ချက်ချင်းဆိုသလို နယ်မြေလွတ်တစ်ရာက ပြိုကွဲသွားကြသည်။ ကျယ်လောင်သော မြည်သံနှင့်အတူ ကြောက်မက်ဖွယ်ကောင်းသော လေဟာနယ်မုန်တိုင်းတစ်ခုက ရွှီချင်း၏ ဘေးပတ်ဝန်းကျင်မှာ ထွက်ပေါ်လာသည်။

လေဟာနယ်မုန်တိုင်း၏ တစ်စိတ်တစ်ပိုင်းက အရပ်ရှစ်မျက်နှာဆီသို့ ပျံ့နှံ့သွားသည့်အခါ ဝိညာဉ်သတ္ထုတွင်းများကို ကာကွယ်ပေးထားသော အုပ်ချုပ်သူ၏ လေအခွင့်အာဏာက အားနည်းသွားသည်။ ယင်းက သက်လတ်ပိုင်းအုပ်ချုပ်သူကို စိတ်လောသွားစေပြီး ချောက်ချားသွားစေသည်။ သူက ပိုပြီးဒေါသထွက်သွားသည်။

လေဟာနယ်မုန်တိုင်း၏ အခြားတစ်စိတ်တစ်ပိုင်းက အုပ်ချုပ်သူထံသို့ တန်းမတ်စွာ ဦးတည်သွားသည်။

ထိုမြင်ကွင်းက သက်လတ်ပိုင်းအုပ်ချုပ်သူ၏ မျက်လုံးထဲမှ တာအိုအမှတ်အသားများကို မှိတ်တုတ်မှိတ်တုတ် လင်းလက်သွားစေသည်။

“ အဲ့ဒါက လေဟာနယ်တာအိုပဲ ”

သူ၏ အသိစိတ်က လှုပ်ခါသွားသည့်အခါ သူက ကောင်းကင်ထံသို့ ချက်ချင်း လက်ညှိုးညွှန်လိုက်သည်။

လောကက အေးစက်မှုနှင့် နွေးထွေးမှုကို တစ်ပြိုင်နက် တွေ့ကြုံသွားသည်။

ယင်းက လေကြောင့် ဖြစ်ပေါ်လာသော အပူချိန်ပြောင်းလဲမှုဖြစ်သည်။

လေက တဟူးဟူး တိုက်ခတ်လာသည့်အခါ မိုးခြိမ်းသံသဖွယ် မြည်သံများ ထွက်ပေါ်လာသည်။ ထို့နောက် ကောင်းကင်ဘုံအမျက်ဒေါသနှင့် ဆင်တူသော လေဆင်နှာမောင်းက ထွက်ပေါ်လာပြီး လေဟာနယ်မုန်တိုင်းဖြင့် ထိပ်တိုက် တွေ့ဆုံသွားသည်။

ထိုအခါ ကျယ်လောင်သော မြည်သံက ပေါက်ကွဲထွက်သွားသည်။

လောကက ဖရိုဖရဲဖြစ်သွားသည်။ လေဟာနယ်အက်ကွဲမှုနှင့် လေမုန်တိုင်းက အပြန်အလှန် ဆန့်ကျင်သွားသည့်အခါ ဘေးပတ်ဝန်းကျင်က ဝေဝါးသွားပြီး ပုံပျက်တွန့်လိမ်သွားသည်။

ထို့နောက် လေက တအင့်အင့်ငိုကြွေးသံကို ထုတ်လွှတ်လိုက်သည်။

သွေးက သက်လတ်ပိုင်းအုပ်ချုပ်သူ၏ ပါးစပ်ထောင့်မှ စီးကျလာသည်။ လေအခွင့်အာဏာကို ထိုမျှအတိုင်းအတာအထိ ထုတ်သုံးပြီးနောက် ကြီးမားသော တန်ကြေးက နောက်ဆုံးမှာတော့ ရောက်ရှိလာသည်။ သို့သော်လည်း သူ၏ မျက်လုံးထဲမှ သတ်ဖြတ်ခြင်းစိတ်ဆန္ဒက လုံးဝအားမနည်းသွားပေ။

လေကြမ်းက တိုက်ခတ်လာသည့်အခါ ရွှီချင်း၏ အခြေအနေသည်လည်း မကောင်းမွန်ပေ။ သူ၏ အသွေးအသားများနှင့် အရေပြားက အစိမ်းလိုက် ဆွဲခွာခံနေရသည့်အလား ရွှီချင်း ခံစားမိသွားသည်။

သို့သော်လည်း သူ၏ မျက်လုံးက စူးရှတောက်ပနေဆဲပင်။

ထိုသို့အရေးကြီးအခိုက်အတန့်မှာ သူ၏ ခန္ဓာကိုယ်ထဲမှ အန္တိမအချိန်တာအိုက ရုတ်တရက် ထွက်ပေါ်လာသည်။

အချိန်စွမ်းအားက သူ၏ ခန္ဓာကိုယ်ထဲမှ မြှောက်တတ်လာသည်။ ဧရာမနေနာရီတစ်ခုက လေထဲမှာ ထွက်ပေါ်လာပြီး သက်လတ်ပိုင်းအုပ်ချုပ်သူကို ပစ်မှတ်ထားလိုက်သည်။ အချိန်ရပ်တန့်ခြင်းစွမ်းအားက ပေါ်လျှိုးလာသည့်အခါ အုပ်ချုပ်သူက ရုတ်တရက် လှုပ်ရှားနိုင်စွမ်းကင်းမဲ့သွားသည်။

ထို့နောက် သတ်ဖြတ်ခြင်းစိတ်ဆန္ဒက ရွှီချင်း၏ မျက်လုံးထဲမှာ ထွက်ပေါ်လာသည်။ သူက တစ်ချက်တည်းဖြင့် သတ်ဖြတ်နိုင်စေရန် သူ၏ ညာလက်ကို မြှောက်လိုက်သည်။ ရေတွင်းထဲမှ လကို မျှားခြင်းက ထိုအခိုက်အတန့်မှာ အသက်ဝင်လာသည်။

ကောင်းကင်က ရေတွင်းအဖြစ် ပြောင်းလဲသွားပြီး လောကက ရေမျက်နှာပြင်သဖွယ် တအိအိလှိုင်းထသွားသည်။

သက်လတ်ပိုင်းအုပ်ချုပ်သူက ရေမျက်နှာပြင်ပေါ်မှာ မတ်တတ်ရပ်နေသည်။ သူပိုင်ဆိုင်သော မန္တန်အားလုံးက ရေပြင်ပေါ်မှာ ပုံရိပ်ပြန်လာကြသည်။

နေနာရီက အုပ်ချုပ်သူ၏ ခန္ဓာကိုယ်ကို ပစ်မှတ်ထားလိုက်ပြီး ရေတွင်းက သူ၏ ဝိညာဉ်ကို ပစ်မှတ်ထားလိုက်သည်။

အစောနက ရွှီချင်း၏ တိုက်ခိုက်မှုများမှ ဖြစ်ပေါ်လာခဲ့သော ဖရိုဖရဲအခြေအနေကြောင့်…

ဤအခိုက်အတန့်မှာ သူစောင့်မျှော်နေသော အခွင့်အရေးက နောက်ဆုံးမှာတော့ ရောက်ရှိလာသည်။

နောက်အခိုက်အတန့်မှာ ကမ္ဘာတုန်ဟီးစေနိုင်သော ဓားစွမ်းအင်က မလှုပ်ရှားနိုင်သော အုပ်ချုပ်သူထံသို့ ပျံသန်းထွက်သွားသည်။

ယင်းက အုပ်ချုပ်သူများကို သတ်ဖြတ်နိုင်သော အဖိုးကိုး၏ ဓားစွမ်းအင်ဖြစ်သည်။

ဓားစွမ်းအင်ထွက်ပေါ်လာသည့်အခိုက် ကောင်းကင်၏ အရောင်က ပြောင်းလဲသွားပြီး မြေပြင်က တုန်လှုပ်သွားသည်။ ဤနတ်ဘုရားအကျဉ်းထောင်၏ ကမ္ဘာငယ်များထဲမှ မရေမတွက်နိုင်သော ဓားများက တုန်ယင်သွားကြပြီး ထိုဓားစွမ်းအင်ကို တုံ့ပြန်လိုက်ကြသည်။

ထို့နောက် ဓားများက ပြိုကွဲသွားသော လောကနယ်နိမိတ်များထဲမှ တစ်ပြိုင်နက် ပျံသန်းထွက်လာကြသည်။ ယင်းတို့က အပြင်ဘက်မှာ စုဝေးသွားကြပြီး ဤနေရာမှ ဟင်းလင်းပြင်ထဲမှာ ပြည့်နှက်သွားကြသည်။

လျှပ်တစ်ပြက်အတွင်းမှာ ဤနေရာတစ်ခုလုံး၌ မရေမတွက်နိုင်သော ဓားများဖြင့် ပြည့်နှက်သွားသည်။ နောက်ဆုံးမှာတော့ ယင်းတို့က အဖိုးကိုး၏ ဓားစွမ်းအင်ဖြင့် ပေါင်းစပ်သွားပြီး ထွန်းလင်းတောက်ပလာသည်။ ယင်းတို့က အဖိုးကိုး၏ ဓားစွမ်းအင်ကို အထွတ်အထိပ်သို့ မြှင့်တင်ပေးလိုက်သည်။

ဓားစွမ်းအင်က တဖြည်းဖြည်း မြင့်တတ်လာနေစဉ် သတ်ဖြတ်ခြင်းစိတ်ဆန္ဒက ပေါက်ကွဲထွက်လာသည်။

အသက်ရှူချိန်အနည်းငယ်ကြာ စွမ်းအင်စုဆောင်းပြီးနောက် လောကတုန်ဟီးစေနိုင်သော သတ်ဖြတ်ခြင်းစိတ်ဆန္ဒက ရုတ်တရက် ပေါက်ကွဲထွက်လာသည်။ ဤအခိုက်အတန့်မှာ လောကတစ်ခုလုံး လင်းထိန်သွားပြီး အဖိုးကိုး၏ ဓားသည်သာ အထွတ်အမြတ်တည်ရှိမှု ဖြစ်လာသည်။

ကောင်းကင်က နိမ့်ကျလာပြီး ဓားက ဆင်းသက်လာသည်။ ပြိုင်ဘက်ကင်းသော သတ်ဖြတ်ခြင်းစိတ်ဆန္ဒက သက်လတ်ပိုင်းအုပ်ချုပ်သူပေါ်သို့ ဦးတည်သွားသည်။

ဓားက လွှမ်းမိုးဖိနှိပ်သော အင်အားနှင့်အတူ သက်လတ်ပိုင်းအုပ်ချုပ်သူ၏ အမြင်နှင့် စိတ်အာရုံအားလုံးကို အစားထိုးသွားသည်။

ယင်းကို ရှောင်တိမ်းရန် မဖြစ်နိုင်သလို ခုခံတားဆီးရန်လည်း မဖြစ်နိုင်ပေ။

ဓားစွမ်းအင်က ဆင်းသက်လာသည့်အခါ အုပ်ချုပ်သူ၏ ခန္ဓာကိုယ်နှင့် ဝိညာဉ်က တိုက်ရိုက် ဖျက်ဆီးခံလိုက်ရသည်။

ယင်းက ဓားတစ်ချက်တည်းဖြင့် သတ်ဖြတ်ခြင်း ဖြစ်သည်။