ကူးတို့လှေသမား

အမှတ်ငါးကြယ်တာရာစက်ဝန်းထဲမှ အချိန်ကို ကောင်းကင်ပေါ်မှာ ဖြတ်သန်းစီးဆင်းနေသော အနီရောင်မိုးသောက်အလင်းထဲမှ ဝဲကတော့ငယ်များဖြင့် တိုင်းတာသည်။

မိုးသောက်ဝဲကတော့များ၏ အရေအတွက်က တစ်ထောင်ပြည့်သွားသည့်အခါ ယင်းက တစ်နှစ်ပြည့်သွားပြီဟု အဓိပ္ပာယ်ရသည်။

ထို့နောက် ဝဲကတော့အားလုံးက ပျောက်ကွယ်သွားပြီး မိုးသောက်အလင်းသာ ကျန်ရှိတော့သည့်ဆိုလျှင် ယင်းက နှစ်တစ်နှစ်၏ အစဟု အဓိပ္ပာယ်ရသည်။

လက်ရှိအချိန်မှာ အနီရောင်မိုးသောက်အလင်းထဲတွင် (၇၃၅)ခုမြောက် ဝဲကတော့က ဖွဲ့စည်းနေသည်။

လေထဲတွင် ရွှီချင်းက ခေါင်းမော့လိုက်ပြီး မိုးကောင်းကင်ကို ကြည့်လိုက်သည်။

အမှတ်ငါးကြယ်တာရာစက်ဝန်းဆီသို့ သူရောက်ရှိလာသည့်အချိန်မှစ၍ ရေတွက်မည်ဆိုလျှင် ဤတစ်ကြိမ် ဝဲကတော့က အကြိမ်သုံးဆယ်မြောက် ဖြစ်သည်။

သူ၏ လက်ရှိအလျင်ဖြင့်ဆိုလျှင် အကယ်၍ သူသာ ဝမ်ကူးကုန်းမြေထဲမှာ ခရီးသွားမည်ဆိုလျှင် ထိုအချိန်ကာလက မဟာနန်းမြို့တော်ဒေသကြီးမှ ဖုန်းဟိုင်ဒေသငယ်ဆီသို့ ပျံသန်းသွားရန် သူ့အတွက် လုံလောက်ပေသည်။

သို့သော်လည်း ဤနေရာတွင် သူက အမှတ်ငါးကြယ်တာရာစက်ဝန်းထဲမှ တောင်ပိုင်းဒေသ၏ နယ်စွန်နယ်ဖျားမှာသာ ရှိနေသေး၏။

မြေပြင်က ရွှံ့မြေဖြစ်နေဆဲပင်။

အမှတ်ငါးကြယ်တာရာစက်ဝန်းက အလွန်ကျယ်ပြောသည်။

သို့သော်လည်း နောက်ဆုံးမှာတော့ သူက ပန်းတိုင်သို့ ရောက်ရှိသွားဆဲပင်။

ရွှီချင်းက ကောင်းကင်ထံမှ အကြည့်ပြန်ရုပ်လိုက်ပြီး မြေပြင်သို့ ကြည့်လိုက်သည်။

ရွှံ့မြေပြင်မှ အဝေးတစ်နေရာတွင် အလွန်ကျယ်ပြောပြီး ခမ်းနားထည်ဝါသော မြို့တစ်မြို့ ရှိသည်။

မြို့တော်က မည်းမှောင်နေသည်။ မိုးသောက်အလင်းအောက်တွင် ၎င်းက အိပ်မောကျနေသော ဧရာမသတ္တဝါတစ်ကောင်နှင့် ဆင်တူသည်။

မြို့တော်က မှောင်ရီနေလေရာ ၎င်းကို သာမန်မျက်စိဖြင့် မမြင်နိုင်ပေ။

မြို့တော်၏ နယ်နိမိတ်က အလွန်ကျယ်ပြောလေရာ ရွှီချင်း၏ စိတ်အာရုံအောက်တွင် ၎င်းက ပြည်နယ်တစ်ခုလုံးနှင့် နှိုင်းယှဉ်နိုင်သည်။

အုပ်ချုပ်သူ၏ အစေခံ၏ မှတ်ဉာဏ်များထဲတွင် ၎င်းက အမှတ်ငါးကြယ်တာရာစက်ဝန်းထဲမှ တောင်ပိုင်းဒေသ၏ သာမန်မြို့ငယ်တစ်မြို့သာ ဖြစ်သည်။

တောင်ပိုင်းဒေသတွင် ထိုသို့မြို့များ အများကြီး ရှိသည်။ ထိုထက် ပိုပြီးခမ်းနားထည်ဝါသော မြို့များလည်း အများကြီး ရှိသည်။

ဥပမာ သူ့ကလန်၏ မြို့တော်သည် ဤမြို့ထက် အဆပေါင်းများစွာ ပိုပြီးကျယ်ပြောသည်။

တခြားမြို့ကြီးများသည်တော့ သူ၏ အဆင့်အတန်းနှင့် ကျင့်ကြံခြင်းကြောင့် အုပ်ချုပ်သူ၏ အစေခံက ၎င်းတို့ကို တစ်ခါမှ မမြင်ဖူးချေ။

သူက တောင်ပိုင်းဒေသ၏ နယ်စွန်နယ်ဖျားမှာသာ တစ်သက်လုံး နေထိုင်သွားရမည့်သဘော ရှိသည်။

အစေခံ၏ မှတ်ဉာဏ်များမှတဆင့် သူ့သခင်ဖြစ်သော အုပ်ချုပ်သူ၏ ကလန်အကြောင်းကိုလည်း ရွှီချင်းက အကြမ်းဖျဉ်း နားလည်သွားသည်။

ထိုကလန်သည် တောင်ပိုင်းဒေသ၏ အပြင်ပိုင်းဒေသကြီးထဲ၌ ထင်ရှားသော နယ်နိမိတ်တစ်ခုကို ထိန်းချုပ်ထားသည်။ ကလန်၏ ဘိုးဘေးက မဟာဧကရာဇ်တစ်ပါးဖြစ်သော်လည်း ယင်းက ဤနေရာမှာ လွှမ်းမိုးနိုင်စွမ်းရှိသော အင်အားစုတစ်ခု မဟုတ်ပေ။

ထိုသို့တူညီသော ကလန်များက တောင်ပိုင်းဒေသ၏ နယ်စွန်နယ်ဖျားမှာ အများကြီး ရှိသည်။

“ ကြည့်ရတာ ငါ့ရဲ့ အရင်ခန့်မှန်းမှုက နည်းနည်း လွဲမှားနေတဲ့ပုံပဲ ”

ရွှီချင်းက သူ၏ အရှေ့မှ မြို့တော်ကို ကြည့်လိုက်ပြီး တွေးတောလိုက်သည်။

အစက သူသည် ဝိညာဉ်သတ္ထုတွင်းများနှင့်ပတ်သက်ပြီး အများကြီး မသိထားသောကြောင့် အစောင့်အရှောက်က အုပ်ချုပ်သူတစ်ပါးဖြစ်ကြောင်း မြင်လိုက်ရသောအခါ ကလန်၏ အသန်မာဆုံးပုဂ္ဂိုလ်က ဒဏ္ဍာရီလာ နွေဦးအင်မော်တယ်တစ်ပါးဖြစ်လိမ့်မည်ဟု တွေးထင်ခဲ့သည်။

ယင်းက သူ့ကို အလွန်သတိထားစေသည်။

သို့သော်လည်း နွေဦးအင်မော်တယ်က လူတိုင်းရောက်ရှိနိုင်သောအဆင့် မဟုတ်ကြောင်း ထင်ရှားပေသည်။

“ ဘာပဲဖြစ်ဖြစ် ငါဂရုစိုက်ရမယ်… အမှတ်ငါးကြယ်တာရာစက်ဝန်းထဲမှာ ပညာရှင်ကျင့်ကြံသူတွေ အများကြီးပဲ ရှိတယ် ”

ရွှီချင်းက အသက်ပြင်းပြင်းရှူသွင်းလိုက်ပြီး သူ့အရှေ့မှ မြို့တော်ဆီသို့ တန်းမတ်စွာ ပျံသန်းသွားသည်။

သူက အုပ်ချုပ်သူ၏ အစေခံအဖြစ် အသွင်ပြောင်းလဲလိုက်ပြီး သူ၏ ကျင့်ကြံခြင်းအခြေခံကို ဖုံးကွယ်လိုက်သည်။ ထို့ပြင် သူက အစေခံ၏ ဝင်ခွင့်တုံကင်ကို အသုံးပြုလိုက်ပြီး မြို့တော်ထဲသို့ ဝင်ရောက်သွားသည်။ သို့ဖြစ်၍ သူက မည်သည့်အနှောင့်အယှက်ကိုမှ မတွေ့ကြုံခဲ့ပေ။

မကြာမီ ရွှီချင်း၏ ပုံရိပ်က ဧရာမမြို့တော်ထဲမှာ ထွက်ပေါ်လာသည်။

မြို့တော်ထဲတွင် မရေမတွက်နိုင်သော လူများ ရှိကြသည်။ သူတို့ထဲမှ အများစုက ကျင့်ကြံသူများ ဖြစ်ကြသည်။

ဈေးဆိုင်များလည်း အများအပြား ရှိကြသည်။

ဆူဆူညံညံအသံများက သူ၏ ဘေးပတ်ဝန်းကျင်မှာ အမြဲမပြတ် ပဲ့တင်ထပ်နေသည်။

ရွှီချင်းက အတွေ့အကြုံများပြားသူဖြစ်သော်လည်း မြို့တော်ထဲသို့ ဝင်ရောက်ပြီးနောက် ထိုမျှများပြားသော ကျင့်ကြံသူများကို မြင်တွေ့သွားသောအခါ သူအံ့ဩသွားသည်။

ဝမ်ကူးကုန်းမြေထဲမှ လူသားမျိုးနွယ်၏ နန်းမြို့တော်ထဲမှာပင် ထိုမျှများပြားသော ကျင့်ကြံသူများကို တစ်ခါမှ သူမမြင်တွေ့ခဲ့ဖူးပေ။

ဤနေရာမှာ ကျင့်ကြံသူများက အလွန်များပြားသည်။

သို့ဖြစ်၍ မရင်းနှီးသော စိတ်ခံစားမှုက ရွှီချင်း၏ နှလုံးသားထဲမှာ ထွက်ပေါ်လာသည်။

လူသားသဘာဝအရ ဟာလာဟင်းလင်းဖြစ်ခြင်းက မရင်းနှီးသော ခံစားမှုကို ပေးစွမ်းသလို လွန်စွာ စည်ကားသိုက်မြိုက်ခြင်းကလည်း မရင်းနှီးသော ခံစားမှုကို ပေးသည်။ သို့သော်လည်း ရွှီချင်းသည် ငယ်ငယ်လေးကတည်းက နေရာအများအပြားကို ရောက်ရှိခဲ့ဖူးသည်။ သို့ဖြစ်၍ တစ်ခဏကြာပြီးနောက် သူ၏ အတွေးများက ပြန်ငြိမ်သက်သွားသည်။ သူက အရှေ့သို့ လျှောက်သွားပြီး လူအုပ်ကြားထဲသို့ ဖြည်းညင်းစွာ တိုးဝင်သွားသည်။

သူက လမ်းလျှောက်နေရင်း သူ၏ ဘေးမှ လမ်းသွားလမ်းလာများကို စစ်ဆေးကြည့်ရှုလိုက်သည်။

သူက ထိုလူများနှင့် သူ့ကြားမှ စကားပြောပုံဆိုပုံနှင့် အမူအကျင့်ကွာခြားမှုများကို ရှာဖွေလိုက်ပြီး သူ့ဘာသာ ချိန်ညှိလိုက်သည်။

သို့ဖြစ်၍ ဝဲကတော့တစ်ဝက် ဖွဲ့စည်းသည့် ကြာချိန် ကုန်ဆုံးသွားပြီးနောက် ရွှီချင်းက ဒေသခံကျင့်ကြံသူများနှင့် ခွဲခြားမရအောင် တူညီသွားသည်။

ရွှီချင်းသည် ဘေးပတ်ဝန်းကျင်မှ ကျင့်ကြံသူများ၏ ဆွေးနွေးမှုများမှတဆင့် အမှတ်ငါးကြယ်တာရာစက်ဝန်းနှင့် ဤမြို့တော်အကြောင်းကို ပိုပြီးကောင်းမွန်စွာ နားလည်သွားသည်။

ထိုသတင်းအချက်အလက်များက တစ်ခုနှင့်တစ်ခု ဆက်စပ်မှုမရှိသော်လည်း အနည်းဆုံးတော့ ယင်းက သူလိုအပ်နေသော ဈေးဆိုင်ကို ရှာဖွေနိုင်စေရန် လုံလောက်သည်။

ယခု သူက ဈေးဆိုင်တစ်ခု၏ အပြင်ဘက်မှာ မတ်တတ်ရပ်နေသည်။

ဈေးဆိုင်က သုံးထပ်အဆောက်အဦးတစ်ခု ဖြစ်သည်။ အဆောက်အဦးက ခမ်းနားထည်ဝါပြီး ကျင့်ကြံသူအများအပြားက ဈေးဆိုင်ထဲမှာ ဝင်ထွက်သွားလာနေကြသည်။

ဈေးဆိုင်ထဲတွင် ဓမ္မရတနာအမျိုးမျိုးကို စင်များပေါ်မှာ စီးတန်းထားသည်။ ဓမ္မရတနာတစ်ခုစီကို ချိပ်ပိတ်ထားသောကြောင့် ၎င်းတို့ကို အလွယ်တကူ မယူဆောင်နိုင်ပေ။ ထို့ပြင် ဓမ္မရတနာများ၏ ဘေးမှာ ၎င်းတို့၏ အသုံးဝင်ပုံကို ဖော်ပြထားသော ကျောက်စိမ်းပြားများလည်း ရှိသည်။

ရွှီချင်းက ပထမအထပ်မှာ လမ်းလျှောက်နေရင်း ထိုဓမ္မရတနာများကို ကြည့်လိုက်သည်။

တစ်ခဏကြာပြီးနောက် သူက စိတ်ခံစားချက်ဖြင့် သက်ပြင်းချလိုက်သည်။

ဝမ်ကူးကုန်းမြေတွင် ဓမ္မရတနာများက အလွန်ရှားပါးသည်။ များသောအားဖြင့် ၎င်းတို့က ဂိုဏ်းတော်များ၏ အထွတ်အမြတ်ရတနာများ ဖြစ်ကြသည်။

ဥပမာ ချီယွဲ့ထုံဂိုဏ်း၏ သွေးနီရောင်မျက်လုံးရတနာ ဖြစ်သည်။

ထိုသို့ဓမ္မရတနာများကို အပြင်ဘက်မှာ မြင်တွေ့ရခြင်းသည် အလွန်ရှားပါးသည်။ ထို့ပြင် ဓမ္မရတနာများ၏ အပိုင်းအစများသည်ပင် အလွန်တန်ဖိုးကြီးမားသည်။ များသောအားဖြင့် တွေ့မြင်ရသည်မှာ ဓမ္မလက်နက်များသာ ဖြစ်ကြသည်။

သို့သော်လည်း ဤနေရာတွင် ဓမ္မရတနာများကို နေရာတိုင်းမှာ မြင်တွေ့နိုင်သည်။

“ ဝမ်ကူးကုန်းမြေမှာ ဓမ္မရတနာတွေ ပျက်စီးသွားရတဲ့ အဓိကအကြောင်းအရင်းက နတ်ဘုရားတွေကြောင့်ပဲ ”

ရွှီချင်းက တွေးတောလိုက်သည်။

“ တကယ်လို့ နတ်ဘုရားမျက်နှာပျက်ကြီးသာ ရောက်မလာဘူးဆိုရင် ဝမ်ကူးကုန်းမြေက ဒီနေရာနဲ့ သိပ်ကွာမယ်မထင်ဘူး… ဝမ်ကူးကုန်းမြေက ဒီနေရာထက် အများကြီး နိမ့်ကျနေရတဲ့ တခြားအကြောင်းအရင်းတစ်ခု ရှိသေးတယ်… အဲ့ဒါက ဝမ်ကူးကုန်းမြေမှာ နွေဦးအင်မော်တယ်ထက် ပိုမြင့်တဲ့ လမ်းစဉ်မရှိတာပဲ… ”

“ အမှတ်ငါးကြယ်တာရာစက်ဝန်းက နွေဦးအင်မော်တယ်ထက် ပိုမြင့်တဲ့ လမ်းစဉ်ကို ဟိုးအရင်ကတည်းက ရှာတွေ့ခဲ့တယ်… အဲ့ဒါကြောင့် ဒီနေရာက အခုလိုမျိုး ကြွယ်ဝပြည့်စုံနေတာပဲ ”

ရွှီချင်း၏ အကြည့်က ဓမ္မရတနာများပေါ်သို့ ကျရောက်သွားသည်။ ဤနေရာမှ ဓမ္မရတနာများက ထူးခြားကောင်းမွန်သော်လည်း သူ၏ လက်ရှိအဆင့်ကြောင့် ၎င်းတို့က သူ့အတွက် အသုံးမဝင်ပေ။

ထို့ကြောင့် မကြာမီ သူက ဒုတိယအထပ်သို့ တတ်သွားသည်။ ထိုနေရာတွင် သူလိုအပ်နေသော အရာကို မြင်တွေ့သွားသည်။

ယင်းက အမှတ်ငါးကြယ်တာရာစက်ဝန်း၏ မြေပုံဖြစ်သည်။

ထိုသို့မြေပုံသည် အမျိုးအစားအမျိုးမျိုး ရှိသည်။ မြေပုံက ပိုပြီးအသေးစိတ်ကျလေ ပိုပြီးတန်ဖိုးကြီးမားလေ ဖြစ်သည်။

ဒုတိယအထပ်တွင် အစေခံတစ်ယောက်ရှိသည်။ ရွှီချင်းက အမှတ်ငါးကြယ်တာရာစက်ဝန်း၏ မြေပုံကို ထည့်သွင်းထားသော ကျောက်စိမ်းပြား၏ အရှေ့မှာ ရပ်တန့်သွားသည့်အခါ ထိုအစေခံမိန်းကလေးက အမြန်လျှောက်လာပြီး ပြုံးလိုက်သည်။

“ စီနီယာ… မင်းရဲ့ အရှေ့က မြေပုံက တောင်ပိုင်းဒေသကို အရမ်းအသေးစိတ်ကျအောင် ဖော်ပြထားပါတယ်… ဒါပေမဲ့ ငါတို့က မြေပုံကို မိတ္တူပဲရောင်းတယ်ဆိုတာ မင်းကို ကြိုသတိပေးပါရစေ… ဒါ့အပြင် အဲ့ဒီမိတ္တူထဲမှာ ထပ်မံ ပုံတူကူးတာကို တားမြစ်ထားတဲ့ အစီအရင်တွေလည်း ပါဝင်ပါတယ် ”

ယင်းကို ရွှီချင်းကြားသောအခါ သူက ကျောက်စိမ်းပြားထံမှ အကြည့်ပြန်ရုပ်လိုက်ပြီး တည်ငြိမ်စွာ ပြောသည်။

“ တောင်ပိုင်းဒေသတစ်ခုတည်းက မလုံလောက်ဘူး ”

ယင်းကို အစေခံမိန်းကလေး ကြားသောအခါ သူက ချက်ချင်း မျက်လုံးဝင်းလက်သွားပြီး အချိုသာဆုံး ပြုံးလိုက်သည်။

“ ဒီထက် ပိုပြီးအသေးစိတ်ကျတဲ့ မြေပုံတွေ ရှိပါသေးတယ်… ငါတို့ရဲ့ အင်မော်တယ်ရတနာခန်းမရဲ့ ဆိုင်ခွဲတွေက အမှတ်ငါးကြယ်တာရာစက်ဝန်းတစ်ခုလုံးမှာ တည်ရှိပါတယ်… ဒါကြောင့် ငါတို့က မြေပုံတွေနဲ့ပတ်သက်ပြီး ပိုပြီးကောင်းမွန်စွာ နားလည်ကြပါတယ် ”

“ စီနီယာက ဘယ်လိုမြေပုံမျိုးကို လိုချင်ပါသလဲ ”

ရွှီချင်းက တစ်ခဏ တွေးတောပြီးနောက် သူ့ဘေးမှ မိန်းကလေးကို ကြည့်လိုက်ပြီး ဖြည်းညင်းစွာ ပြောသည်။

“ မြေပုံထဲမှာ အမှတ်ငါးကြယ်တာရာစက်ဝန်းတစ်ခုလုံး ပါဝင်ရမယ်… ဒါ့အပြင် အင်အားစုအသီးသီးနဲ့ ကောင်းကင်အရွေးချယ်ခံတွေရဲ့ သတင်းအချက်အလက်တွေရောပဲ… ပိုပြီးအသေးစိတ်ကျလေ ပိုပြီးကောင်းလေပဲ ”

ယင်းကို အစေခံမိန်းကလေး ကြားသောအခါ သူက မျက်လုံးမှေးကျဉ်းလိုက်ပြီး ရွှီချင်းကို စုန်ချည်ဆန်ချည် အကဲခတ်လိုက်သည်။ ဤလူက အင်မော်တယ်မြို့တော်၏ အမဲလိုက်ပွဲတော်မှာ ပါဝင်ယှဉ်ပြိုင်တော့မည့်လူ ဖြစ်နိုင်ကြောင်း သူတွေးမိသွားသည်။

ထိုသို့လူသာလျှင် ထိုသို့မြေပုံမျိုးကို လိုအပ်လိမ့်မည်။

အဘယ့်ကြောင့်ဆိုသော် အမဲလိုက်ပွဲတော်မှာ ပါဝင်ယှဉ်ပြိုင်ကြမည့်လူများက တောင်ပိုင်းဒေသသာမက အမှတ်ငါးကြယ်တာရာစက်ဝန်းတစ်ခုလုံးမှ ပညာရှင်ကျင့်ကြံသူများဖြင့်လည်း ရင်ဆိုင်တိုက်ခိုက်ရလိမ့်မည်။

ထိုသို့လူများသည် ရက်စက်ကြမ်းကြုတ်ပြီး သွေးဆာသူများဖြစ်ကြသည်။

ယင်းကို တွေးမိသောအခါ အစေခံမိန်းကလေးက ပိုပြီးရိုသေလေးစားလာသည်။

“ ငါတို့ရဲ့ အင်မော်တယ်ရတနာခန်းမမှာ အဲ့လိုမြေပုံတစ်ခု ရှိပါတယ်… ဒါပေမဲ့ ဈေးနှုန်းကို အင်မော်တယ်ကျောက်စိမ်းနဲ့ပဲ ပေးချေလို့ ရပါတယ်… ဒါ့အပြင် အရေအတွက်က… ”

ရွှီချင်းက လက်ဝှေ့ယမ်းလိုက်သည့်အခါ သေးငယ်သော အင်မော်တယ်ကျောက်စိမ်းအပိုင်းအစများက သူ့အရှေ့မှာ ထွက်ပေါ်လာကြသည်။ ထို့နောက် သူက ယင်းတို့ကို ပြန်သိမ်းဆည်းလိုက်ပြီး အစေခံမိန်းကလေးကို တည်ငြိမ်စွာ ကြည့်လိုက်သည်။

အစေခံမိန်းကလေးက ချက်ချင်း ပြောသည်။

“ စီနီယာ… ကျေးဇူးပြုပြီး တတိယမြောက်အထပ်ကို ကြွပါ ”

ရွှီချင်းက ခေါင်းညိတ်လိုက်ပြီး တတိယအထပ်သို့ လျှောက်သွားသည်။ တတိယအထပ်တွင် ကျင့်ကြံသူအနည်းငယ်သာ ရှိကြသည်။ ထို့ပြင် လူတိုင်းကို အခန်းငယ်များဖြင့် ခွဲခြားထားပြီး သူတို့၏ ကိုယ်ရေးကိုယ်တာကို ကာကွယ်ပေးထားသည်။

ရွှီချင်းက အစေခံမိန်းကလေးနောက်သို့ လိုက်၍ အခန်းတစ်ခုထဲသို့ ဝင်ရောက်သွားသည်။ အခန်းထဲသို့ ရောက်ရှိပြီးနောက် မိန်းကလေးက အရိုအသေပေးလိုက်ပြီး ထွက်သွားသည်။ မကြာမီ သူက ငွေလင်ဗန်းတစ်ချပ်ဖြင့် ပြန်ရောက်လာသည်။

ထိုလင်ဗန်းပေါ်တွင် အဖြူရောင်ကျောက်စိမ်းပြားတစ်ခု ရှိသည်။

ရွှီချင်းက ဖမ်းဆုပ်သော လက်ဟန်ကို ပြုလုပ်လိုက်သည့်အခါ ကျောက်စိမ်းပြားက သူ့ထံသို့ ချက်ချင်း ပျံသန်းလာသည်။ ကျောက်စိမ်းပြားက သူ၏ လက်ထဲသို့ ကျရောက်သွားသည့်အခါ သူက နတ်ဘုရားစိတ်အာရုံဖြင့် ယင်းကို စစ်ဆေးကြည့်လိုက်သည်။

ဧရာမမြေပုံတစ်ခုက သူ၏ စိတ်ထဲမှာ ထွက်ပေါ်လာသည်။

ထိုမြေပုံထဲမှာ မြောက်ပိုင်း၊ တောင်ပိုင်း၊ အရှေ့ပိုင်းနှင့် အနောက်ပိုင်းဒေသတို့ ပါဝင်ကြသည်။ တစ်ချိန်တည်းမှာ ထိုဒေသများထဲမှ ကလန်အသီးသီးနှင့် ဂိုဏ်းအသီးသီးလည်း ပါဝင်ကြသည်။ ထိုဒေသများ၏ ယဉ်ကျေးမှုဓလေ့တချို့ကိုပင် ဖော်ပြထားသည်။

ထို့ပြင် ဤကြယ်တာရာစက်ဝန်းထဲမှ ကောင်းကင်အရွေးချယ်ခံများကိုလည်း ဖော်ပြထားသေးသည်။

ယင်းက အလွန်အသေးစိတ်ကျသည်။

သို့သော်လည်း အရေးကြီးသော သတင်းအချက်အလက်များက ဝေဝါးနေသည်။

ရှင်းလင်းစွာပင် ယင်းကို စည်းချအစီအရင်တစ်ခုဖြင့် ကန့်သတ်ထားသည်။ ဤကျောက်စိမ်းပြားကို ဝယ်ယူပြီးမှသာ ယင်းကို ရှင်းလင်းစွာ မြင်တွေ့နိုင်လိမ့်မည်။

ရွှီချင်းက စိတ်ကျေနပ်သွားသည်။ သူက နတ်ဘုရားစိတ်အာရုံကို ပြန်ရုပ်သိမ်းလိုက်ပြီး နောက်ထပ် အချိန်မဖြုန်းတော့ပေ။ သူက ထိုကျောက်စိမ်းပြားအတွက် အရေအတွက်များပြားသော အင်မော်တယ်ကျောက်စိမ်းများကို ပေးချေလိုက်သည်။

ထို့နောက် သူက အစေခံမိန်းကလေး၏ ရိုသေလေးစားသော အကြည့်အောက်မှာ အဆောက်အဦးထဲမှ ပြန်ထွက်သွားပြီး လူအုပ်ကြားထဲသို့ လျှောက်သွားသည်။

လူအုပ်ကြားထဲမှာ ရွှီချင်းက ထပ်ခါထပ်ခါ ရုပ်ဖျက်ခဲ့ပြီး သူ၏ အရှိန်အဝါကို ပြောင်းလဲခဲ့သည်။ သူ့နောက်ကို မည်သူမှ လိုက်မလာကြောင်း အတည်ပြုပြီးနောက် သူက သာမန်ကျင့်ကြံသူတစ်ယောက်အဖြစ် ရုပ်ဖျက်လိုက်ပြီး မြေပုံထဲမှ သတင်းအချက်အလက်များကို စစ်ဆေးကြည့်လိုက်သည်။

အင်မော်တယ်မြို့တော်က အမှတ်ငါးကြယ်တာရာစက်ဝန်း၏ အလယ်ဗဟိုမှာ တည်ရှိသည်။ ၎င်းက မြင့်မြတ်ထည်ဝါပြီး မည်သူမှ ဆန့်ကျင်နိုင်သောအရာ မဟုတ်ပေ။

အင်မော်တယ်မြို့တော်၏ ဘေးပတ်ဝန်းကျင်မှ ဧရိယာများကို ဒေသကြီးလေးခုအဖြစ် ခွဲခြားထားသည်။ ၎င်းတို့က အရှေ့ပိုင်းဒေသ၊ အနောက်ပိုင်းဒေသ၊ တောင်ပိုင်းဒေသနှင့် မြောက်ပိုင်းဒေသ ဖြစ်ကြသည်။ ထိုဒေသကြီးလေးခုကို အလွန်ကျယ်ပြောသော ကြယ်စင်စုလေးခုအဖြစ် ရှုမြင်နိုင်သည်။ ကြယ်စင်စုတစ်ခုစီကို အရှေ့၊ အနောက်၊ တောင်နှင့် မြောက်ဟု အပိုင်းလေးပိုင်း ထပ်မံခွဲခြားထားသည်။

“ အဲ့ဒီကြယ်စင်စုလေးခုထဲမှာ မရေမတွက်နိုင်တဲ့ ဂိုဏ်းတွေနဲ့ ကလန်တွေ တည်ရှိကြတယ်… အဲ့ဒီထဲမှာ အသန်မာဆုံး အင်အားစုလေးခု ရှိကြတယ်… အဲ့ဒါတွေက တောင်ပိုင်းကြယ်စင်စုရဲ့ မဟာအင်မော်တယ်တောင်၊ မြောက်ပိုင်းကြယ်စင်စုရဲ့ အင်မော်တယ်ဓားဂိုဏ်း၊ အရှေ့ပိုင်းကြယ်စင်စုရဲ့ ကြယ်တာရာစက်ဝန်းမျှော်စင်နဲ့ အနောက်ပိုင်းကြယ်စင်စုရဲ့ အင်မော်တယ်တာအိုဂိုဏ်းတို့ ဖြစ်ကြတယ် ”

ထိုအင်အားစုလေးခုက အသန်မာဆုံး ဖြစ်ရခြင်းမှာ ၎င်းတို့ဆီမှာ အဆင့်နိမ့်အင်မော်တယ်တစ်ပါးက တည်ရှိနေသောကြောင့် ဖြစ်သည်။ ထိုအဆင့်နိမ့်အင်မော်တယ်လေးပါးက အင်မော်တယ်မြို့တော်၏ ကောင်းကင်ကို လှည့်ပတ်စောင့်ကြပ်ရန် တာဝန်ပေးခြင်း ခံထားရကြသည်။

အမှတ်ငါးကြယ်တာရာစက်ဝန်းတစ်ခုလုံးတွင် အင်မော်တယ်မြို့တော်၏ အပြင်ဘက်မှာ ကောင်းကင်ကို လှည့်ပတ်စောင့်ကြပ်နေကြသော အဆင့်နိမ့်အင်မော်တယ်များက စုစုပေါင်း ဆယ့်ခြောက်ပါးရှိကြသည်။

မဟာအင်အားစုလေးခုမှလွဲ၍ ကျန်အဆင့်နိမ့်အင်မော်တယ် ဆယ့်လေးပါးက ကြယ်ဂြိုလ်တစ်ခုစီကို ဖန်တီးထားကြပြီး အနီရောင်မိုးသောက်အလင်းထဲမှာ ရွေ့လျားနေကြသည်။ သူတို့က မိုးသောက်အလင်းထဲမှာ ရွေ့လျားနေကြရင်း ကြယ်တာရာစက်ဝန်းထဲမှ ဒေသကြီးအမျိုးမျိုးကို လှည့်ပတ်စောင့်ကြပ်နေကြသည်။

မြေပုံထဲမှ သတင်းအချက်အလက်များကို စစ်ဆေးကြည့်ပြီးနောက် ရွှီချင်းက အမှတ်ငါးကြယ်တာရာစက်ဝန်းအကြောင်းကို ယေဘုယျအားဖြင့် နားလည်သွားသည်။

တစ်ချိန်တည်းမှာ သူက သူ၏ လက်ရှိတည်နေရာကို ရှင်းလင်းစွာ နားလည်သွားသည်။

“ ငါက တောင်ပိုင်းကြယ်စင်စုရဲ့ အစွန်အဖျားမှာ တည်ရှိနေတာပဲ… ပြီးတော့ ဒီနေရာက အနောက်ပိုင်းကြယ်စင်စုနဲ့ အရမ်းနီးကပ်တယ်… တောင်ပိုင်းကြယ်စင်စုနဲ့ အနောက်ပိုင်းကြယ်စင်စုကို နတ်ဘုရားသွေးမြစ်က အလယ်ကနေ ပိုင်းခြားထားတယ်… ”

“ မြေပုံထဲက သလင်းအချက်အလက်အရဆိုရင် အဲ့ဒီမြစ်က နတ်ဘုရားတွေရဲ့ သွေးကနေ ဖြစ်ပေါ်လာတာပဲ… အဲ့ဒီမြစ်ထဲမှာ ထူးဆန်းတဲ့ သက်ရှိတွေနဲ့ ကြောက်စရာကောင်းတဲ့ အန္တရာယ်တွေ အများကြီး ရှိတယ်… တစ်စုံတစ်ယောက်က မဟာဧကရာဇ်အဆင့်ကို မရောက်ရှိသေးသရွေ့ နတ်ဘုရားသွေးမြစ်ကို မဖြတ်သန်းနိုင်ဘူး… အဲ့ဒါကြောင့် နတ်ဘုရားသွေးမြစ်က အနောက်ပိုင်းကြယ်စင်စုနဲ့ တောင်ပိုင်းကြယ်စင်စုကြားက အံ့ဖွယ်ကောင်းတဲ့ ချောက်နက်တစ်ခုဖြစ်လာတယ် ”

“ သာမန်ကျင့်ကြံသူတွေက ကြယ်စင်စုနှစ်ခုကြားကို ဖြတ်သန်းသွားမယ်ဆိုရင် လှေကို အသုံးပြုနိုင်တယ်… ”

“ ပြီးတော့ အဲ့ဒီမြစ်ပေါ်မှာ ကူးတို့လှေသမားလို့ခေါ်တဲ့ ထူးခြားတဲ့ အလုပ်အကိုင်တစ်ခု ရှိတယ်… ကူးတို့လှေသမားတွေကပဲ သာမန်ကျင့်ကြံသူတွေကို နတ်ဘုရားသွေးမြစ်ထဲမှာ ဘေးကင်းလုံခြုံစွာ လမ်းပြပေးနိုင်ကြတယ် ”

“ ကူးတို့လှေသမားတွေက အင်မော်တယ်မြို့တော်ကနေ ရောက်လာကြတာ ဖြစ်တယ်… သူတို့က အင်မော်တယ်မြို့တော်ကနေ အပြစ်ဒဏ်ပေးခံလိုက်ရတဲ့ ဒုစရိုက်သမားတွေပဲ… သူတို့က သူတို့ရဲ့ အပြစ်ဒဏ်အတွက် နတ်ဘုရားသွေးမြစ်ထဲမှာ ကူးတို့လှေသမားတွေအဖြစ် တာဝန်ထမ်းဆောင်ရကြတယ် ”

“ ပြီးတော့ နတ်ဘုရားသွေးမြစ်ကို ဖြတ်သန်းဖို့အတွက် ကူးတို့ခက ဝိညာဉ်ကျောက်တုံးတွေ မဟုတ်သလို အင်မော်တယ်ကျောက်စိမ်းတွေလည်း မဟုတ်ဘူး… အဲ့ဒီအစား အသက်ဓာတ်ပဲ ”

“ ပထမဆုံးအကြိမ် မြစ်ကို ဖြတ်သန်းမယ်ဆိုရင် ဖြတ်သန်းမယ့်လူက ခြောက်ရက်စာ အသက်ဓာတ်ကို ကူးတို့ခအဖြစ် ပေးရလိမ့်မယ်… ဘာလို့လဲဆိုတော့ မြစ်ကို ဖြတ်သန်းဖို့အတွက် ခြောက်ရက်ကြာမြင့်လို့ပဲ ”

“ ဒုတိယအကြိမ် ဖြတ်သန်းမယ်ဆိုရင် ကူးတို့ခက တစ်ဟုန်ထိုး မြင့်တတ်သွားလိမ့်မယ်… အဲ့ဒါက အနှစ်ခြောက်ဆယ်စာ အသက်ဓာတ်ပဲ ”

“ တတိယအကြိမ်ဆိုတာ မရှိဘူး ”

“ ဘာလို့လဲဆိုတော့ တတိယအကြိမ်ကျရင် တစ်ဘဝလုံးစာ အသက်ဓာတ်ကို ကူးတို့ခအဖြစ် ပေးရလို့ပဲ”

ယင်းကို ရွှီချင်းမြင်သွားသောအခါ သူက နှလုံးတုန်သွားသည်။