ဒုံမင်းအင်မော်တယ်၏ စွမ်းပကား

မင်းသားယွမ်ကျောက လိမ္မာပါးနပ်လေသည်။

မုန့်ယောင်သည် သူ့အတွက်ကြောင့် ဆူဇီမိုကို ကိုင်တွယ်ပေးမည် မဟုတ်သည်ကို သူက ကောင်းကောင်းသိရှိထား၏။

ဒါ့အပြင် ထိုသို့ပြုလုပ်ခြင်းက အင်မော်တယ်ဂိုဏ်း လေးဂိုဏ်းနှင့်အတူ ရန်ငြိုးရန်စတစ်ခုကို ဖြစ်ကောင်းဖြစ်စေနိုင်၏။

သို့သော်လည်း သူက ဆူဇီမိုကို သူတို့နှစ်ယောက်နှင့် ချိတ်ဆက်ပေးလိုက်မည်ဆိုလျှင် အဲဒါသည် ဖြစ်နိုင်ခြေတစ်ခုသာဆိုလျှင်တောင် အဲဒါသည် မုန့်ယောင်၏ စိတ်အာရုံကို ဆွဲဆောင်ဖို့အတွက် လုံလောက်လေသည်။

မင်းသားယွမ်ကျောသည် အင်မော်တယ်ဂိုဏ်း လေးဂိုဏ်းနှင့် ဆူဇီမိုကို ကိုင်တွယ်ဖို့အတွက် မုန့်ယောင်ကို အသုံးချချင်၏။

တကယ်တမ်းမှာလည်း သူထင်မှတ်ထားသည့်အတိုင်းပင်.. မုန့်ယောင်က ထိုစကားကို ကြားချိန်မှာ ဆူဇီမိုကို တကယ်ပင် အာရုံစိုက်လာခဲ့၏။

မင်းသားယွမ်ကျောက ထိုသည်ကို တွေ့မြင်သောအခါ သူက မီးထဲကို လောင်စာထပ်ထည့်ဖို့အတွက် အခွင့်အလမ်းကို ချိန်ဆလိုက်၏။

“ကျုပ်က အဲဒီလူကို ဖိနှိမ်ပြီး မဟာကျင်းအင်မော်တယ်နိုင်ငံကို ပြန်ခေါ်လာဖို့အတွက် အာဏာပါးကွက်သား အစောင့်တပ်သား တစ်ရာကျော်ကို ခေါ်လာခဲ့တယ်.. ဒါပေမဲ့ အဲဒီလူက အရမ်းကို မောက်မာခက်ထန်ပြီးတော့ အင်မော်တယ်ဂိုဏ်း ရွေးချယ်ပွဲအတွင်းမှာ အာဏာပါးကွက်သား အစောင့်တပ်သားတွေ အားလုံးကို သတ်ဖြတ်ပြီး လူတိုင်းရဲ့ ရှေ့မှာ မဟာကျင်းအင်မော်တယ်နိုင်ငံကို ပေါ်ပေါ်ထင်ထင် စစ်ကြေညာခဲ့တယ်”

“အခုဆိုရင် အင်မော်တယ်ဂိုဏ်း လေးဂိုဏ်းက အဲဒီလူတွေက သူ့ကို ခေါ်ယူစုဆောင်းဖို့အတွက် အတတ်နိုင်ဆုံး ကြိုးစားနေကြပြီ.. သူတို့က ကျင်းယွဲ့ ရောက်လာတာတောင်မှ သူတို့ရဲ့ လုပ်ရပ်တွေကို မရပ်တန့်ကြဘူး… ကျုပ်တို့ရဲ့ မဟာကျင်းအင်မော်တယ်နိုင်ငံက အားနည်းပြီးတော့ ကျုပ်တို့ကို ဒီလိုမျိုး အရှက်ခွဲလို့ရတယ်လို့ သူတို့က တကယ်ပဲ ထင်နေတာ ဖြစ်ရမယ်”

မင်းသားယွမ်ကျော၏ လေသံက ကြီးမားစွာ စိတ်ထိခိုက်ခံစားနေရသည့်အလား ဝမ်းနည်း၍ စိတ်လှုပ်ရှားနေသည့်ပုံပေါ်လေသည်။

အစကတည်းက မုန့်ယောင်သည် သူစိမ်းများ သူမထံသို့ ချဉ်းကပ်မလာစေနိုင်သည့် မောက်မာခက်ထန်သော အော်ရာတစ်ခုကို ထုတ်ဖော်ထား၏။

ထိုစကားကို ကြားသောအခါ သူမ၏ အေးစက်နေသော အမူအရာနှင့် လှပသော မျက်လုံးများက အေးစက်နေသော စိတ်ဆန္ဒတစ်ခုဖြင့် ပို၍ပင် ပြည့်နှက်လာခဲ့၏။

ကောင်းကင်အင်မော်တယ် အဖြူရောင်ပင်လယ်က ထိုစကားကို ကြားသောအခါ ချွေးပြန်လာခဲ့၏။ သူက ရှေ့သို့ ခပ်မြန်မြန်ထွက်ပြီး ပြောလိုက်လေသည်။

“အရှင်မင်းသား.. ခင်ဗျား ကိစ္စတွေကို ရှင်းလင်းအောင် ပြောရလိမ့်မယ်.. ကျုပ်က အင်မော်တယ်ပျံဂိုဏ်းကို ကိုယ်စားပြုပြီး နောက်ဆုတ်ပေးခဲ့တာ ကြာခဲ့ပြီ.. ဒီနေရာမှာ ရောက်ရှိလာတဲ့ စီနီယာအစ်မကို ထောက်ထားပြီး ကျုပ်က ခင်ဗျားနဲ့ ဒါမှမဟုတ် မဟာကျင်းအင်မော်တယ်နိုင်ငံနဲ့ ရန်သူတွေဖြစ်အောင်လုပ်စရာ အကြောင်းမရှိဘူး”

“ဟုတ်တယ်”

မင်းသားယွမ်ကျောက ပြောလိုက်၏။

“တာအိုရောင်းရင်း အဖြူရောင်ပင်လယ်က တကယ်ပဲ နှုတ်ထွက်ပေးခဲ့တယ်.. ဒါပေမဲ့ တခြားသုံးယောက်ကတော့ ခေါင်းမာနေကြတုန်းပဲ.. သူတို့က အဲဒီအပြစ်သားကို ကာကွယ်ဖို့အတွက် ကျုပ်နဲ့တောင်မှ တိုက်ခိုက်ချင်နေကြတယ်”

မင်းသားယွမ်ကျောက ဆက်လက်၍ လောင်စာထည့်ပေးလိုက်၏။

ကောင်းကင်အင်မော်တယ် တောင်ထွတ်စိမ်းက စိတ်ထဲကနေ ကျိန်ဆဲလိုက်သော်လည်း သူက ကြိုးစား၍ ပြုံးပြလိုက်၏။

“နတ်မိမယ် မုန့်ယောင်.. ကျေးဇူးပြုပြီး စိတ်ကိုလျှော့ပါ.. ကျုပ်က အင်ပါယာလေဘုရားကျောင်းကိုယ်စား နှုတ်ထွက်ပေးမယ်.. ကျုပ်က အဲဒီလူကို​ ဆက်ပြီး ခေါ်မှာ မဟုတ်တော့ဘူး”

ဒုံမင်းအင်မော်တယ် မုန့်ယောင်က ဤနေရာမှာ ရုတ်တရက် ပေါ်ထွက်လာလိမ့်မည်ဟု သူက ထင်မှတ်မထားခဲ့ပေ။

သူတို့နှစ်ယောက်စလုံးသည် ပကတိအင်မော်တယ်များဖြစ်သော်လည်း ဒုံမင်းအင်မော်တယ် မုန့်ယောင်၏ နာမည်ဂုဏ်သတင်းနှင့် တိုက်ခိုက်ရည်ခွန်အားသည် ပကတိအင်မော်တယ် ကျင်းယွဲ့ထက် များစွာပိုမိုကြီးမားလေသည်။

အင်မော်တယ်ဘုရင်အချို့ပင်လျှင် ဒုံမင်းအင်မော်တယ်ကို တွေ့မြင်သောအခါ သူမကို ရိုသေလေးစားမှုဖြင့် ဆက်ဆံရလေသည်။

ယခု ဒုံမင်းအင်မော်တယ်က ဤနေရာသို့ ရောက်ရှိလာပြီး ဆူဇီမိုက ယွင်ထင်ကဲ့သို့ တစ်စုံတစ်ယောက်ဖြစ်သည်ဆိုလျှင်တောင် အင်ပါယာလေဘုရားကျောင်းက သူ့ကို လက်ခံရဲတော့မည် မဟုတ်ပေ။

သူက အဆင့်-၆ ကမ္ဘာမြေအင်မော်တယ်တစ်ယောက်ကြောင့် ဒုံမင်းအင်မော်တယ် မုန့်ယောင်ကို အတိုက်အခံပြုလုပ်ခဲ့သည်ကို အင်ပါယာလေဘုရားကျောင်းမှ အမွေခံတပည့်များ သိရှိသွားမည်ဆိုလျှင် သူတို့က သူ့ကို အရှင်လတ်လတ် အရေခွံစုတ်ကြပေလိမ့်မည်။

မုန့်ယောင်၏ အကြည့်က ကောင်းကင်ချောက်နက်နှင့် ယန်လောရှုထံ ရွေ့လျားသွားပြီး မှင်သေသေဖြင့် မေးလိုက်၏။

“ဘာလို့လဲ.. နင်တို့တွေက အဲဒီလူကို ကာကွယ်ပေးချင်သေးတာလား”

မုန့်ယောင်၏ လေသံက တည်ငြိမ်၍ အမူအရာကင်းမဲ့နေ၏။ သို့သော်လည်း အဲဒီမှာ ကြီးမားသည့် ဖိအားတစ်ရပ် ပါဝင်နေ၏။

သူမသည် ဒုံမင်းအင်မော်တယ်ဖြစ်၏။

သူမသည် ပကတိအင်မော်တယ်တစ်ယောက်သာလျှင် မဟုတ်ပေ။ သူမမှာ ကြီးမားသော အဖွဲ့အစည်းများ၊ ထိပ်သီးပညာရှင်များစွာနှင့် နက်ရှိုင်းစွာ ချိတ်ဆက်ထားသော ကွန်ယက်တစ်ခု ရှိလေသည်။

အင်မော်တယ်ဘုရင်တစ်ပါးက ဒုံမင်းအင်မော်တယ်ကို ဆန့်ကျင်မိသည်ဆိုလျှင် သူသည် အခြားသော အင်မော်တယ်ဘုရင်များ၏ သတ်ဖြတ်ခြင်းခံရနိုင်သည်ဟုဆိုလျှင် ချဲ့ကားရာကျလိမ့်မည် မဟုတ်ပေ။

ရွှစ်.. ရွှစ်.. ရွှစ်..

ချက်ချင်းပင် မရေတွက်နိုင်သော အကြည့်များက ကောင်းကင်ချောက်နက်နှင့် ယန်လောရှုအပေါ်သို့ ဆင်းသက်လာခဲ့၏။

ထိုအခိုက်အတန့်မှာ သူတို့နှစ်ယောက်စလုံးက ကြီးမားသော ဖိအားအောက်မှာ ရောက်ရှိနေကြ၏။

ထိုဖိအားက ကောင်းကင်အင်မော်တယ်များ တောင့်ခံနိုင်သည့် တစ်စုံတစ်ရာ မဟုတ်ပေ။

တစ်နည်းအားဖြင့်ဆိုလျှင် တောင်တန်းပင်လယ်အင်မော်တယ်ဂိုဏ်းနှင့် ကောင်းကင်နှင့်မြေကြီး တက္ကသိုလ်မှ ပကတိအင်မော်တယ်အများစု ဤနေရာသို့ ရောက်ရှိလာမည်ဆိုလျှင်တောင် သူတို့သည် တူညီသော ဖိအားကို ခံနိုင်ရည်ရှိလိမ့်မည် မဟုတ်ပေ။

အချိန်က တဖြည်းဖြည်းကုန်ဆုံးသွားပြီး အသက်ရှူချိန် အနည်းငယ်ကပင်လျှင် နှစ်တစ်ရာကဲ့သို့ ကြာမြင့်နေသည်ဟု ထင်ရ၏။

“နတ်မိမယ် မုန့်ယောင်က ဒီကိုရောက်လာပြီဆိုမှတော့…”

ကောင်းကင်ချောက်နက်က နောက်ဆုံးမှာ ဖြည်းဖြည်းချင်း ပြောဆိုလိုက်၏။

“တောင်တန်းပင်လယ်အင်မော်တယ်ဂိုဏ်းကို ကိုယ်စားပြုပြီး ကျုပ်က ယှဉ်ပြိုင်မှုကနေပြီးတော့ နောက်ဆုတ်ပေးမယ်.. ဒီလူ့ကို ဆက်ပြီးတော့ ခေါ်ယူစုဆောင်းမှာ မဟုတ်တော့ဘူး”

ထိုစကားကို ကြားသောအခါ ဆူဇီမို၏ မျက်လုံးထဲတွင် စိတ်ပျက်လက်ပျက်ဖြစ်သွားသည့် အကြည့်တစ်ခု ပေါ်ထွက်လာခဲ့၏။

တကယ်တော့ သူ၏ ရင်ထဲမှာ မည်သည့် မကျေမချမ်းမှုမှ မရှိပေ။

သူသည် ကောင်းကင်ချောက်နက်၏ ကူကယ်ရာမဲ့မှုကို ခံစားမိနိုင်လေသည်။

သူက စိတ်ပျက်လက်ပျက်ဖြစ်သွားရုံမျှသာ ဖြစ်၏။

ထိုသည်ကို တွေ့မြင်သောအခါ ကျင့်ကြံသူများစွာသည် စိတ်ခံစားချက်များဖြင့်​ ပြည့်နှက်လာကြ၏။

အဲဒါသည် ဒုံမင်းအင်မော်တယ်၏ စွမ်းပကားဖြစ်၏။

ဤနေရာသို့ ဆင်းသက်လာပြီးနောက် သူမသည် စကားများစွာပြောဆိုခြင်း သို့မဟုတ် ခြိမ်းခြောက်မှု တစ်စုံတစ်ရာ ပြုလုပ်ခြင်း မရှိခဲ့ပေ။

ထိုသို့ဆိုလျှင်တောင် ကောင်းကင်အင်မော်တယ် သုံးဦးသည် သူမ၏ ထက်ရှမှုကို ရှောင်လွှဲဖို့အတွက် သူတို့၏ ခေါင်းများကို ငုံ့ကာ နောက်ဆုတ်ပေးရလေသည်။

အမှားအယွင်း တစ်စုံတစ်ရာ မရှိဘူးဆိုလျှင် ယန်လောရှုကလည်း လက်လျှော့ရပေတော့မည်။

ယခု ကောင်းကင်အင်မော်တယ် လေးဦးကြားမှာ သူတစ်ယောက်တည်းသာလျှင် ကျန်ရစ်ခဲ့ပြီး သူ့အပေါ်မှာ ရှိသော ဖိအားက အဆတစ်ရာပိုတိုးလာ၏။ သူ၏ နာမည်ဂုဏ်သတင်းနှင့် တိုက်ခိုက်ရည်ခွန်အားသည် ကောင်းကင်ချောက်နက်နှင့် အခြားသူများထက်ပင် ပိုမိုနိမ့်ကျလေသည်။ သူ့အနေဖြင့် အဲဒါကို တောင့်ခံနိုင်ဖို့က မဖြစ်နိုင်ပေ။

ယန်လောရှုက နေရာမှာပင် မတ်တတ်ရပ်နေပြီး သူ၏ ခေါင်းကို အနည်းငယ်ငုံ့ထား၏။ သူ၏ ​ကြေးညိုရောင် မျက်နှာပေါ်မှာ မည်သည့် စိတ်ခံစားချက်မှ မရှိဘဲ အသံတိတ်နေ၏။

“ဒုံမင်းအင်မော်တယ်တဲ့လား.. ဟီးဟီး.. တော်တော်အထင်ကြီးဖို့ ကောင်းသားပဲ”

ရုတ်တရက် လှောင်ပြောင်ထေ့ငေါ့မှု အရိပ်အယောင်တစ်ခုနှင့်အတူ လေထဲကနေ အမျိုးသမီးတစ်ယောက် ရယ်သံက ထွက်ပေါ်လာ၏။

လူအုပ်ကြီးက အရမ်းကို တုန်လှုပ်သွားကြ၏။

တစ်စုံတစ်ယောက်သည် ဒုံမင်းအင်မော်တယ်ကို ဤကဲ့သို့သော လေသံဖြင့် ပြောဆိုရဲနေ၏။

ပကတိအင်မော်တယ် ကျင်းယွဲ့၏ အမူအရာက ပြောင်းလဲသွားပြီး ခပ်မြန်မြန်ပြောလိုက်၏။

“မင်းသမီး.. ကျုပ်က စောစောက ဆူဇီမိုကို ဖိနှိမ်ဖို့ ကြိုးစားခဲ့တယ်.. ဒါပေမဲ့ အဲဒီလူက တိတ်တဆိတ် ဝင်ရောက်တိုက်ခိုက်ပြီး သူ့ကို ကယ်တင်သွားခဲ့တာပဲ”

“ကျုပ် ပြောရတာ ရှက်ပေမဲ့ ကျုပ်က သူ့ရဲ့ တည်နေရာကို မထောက်လှမ်းနိုင်ဘူး.. ကျေးဇူးပြုပြီး မင်းသမီး..”

မုန့်ယောင်က ထိုအသံကို ကြားသောအခါ ဒေါသထွက်မသွားပေ။

ခဏမျှ စဉ်းစားတွေးတောပြီးနောက် သူမက ရစ်ခွေနဂါးတောင်ကြောရိုး၏ လူအုပ်ကြားထဲရှိ ရထားလုံးတစ်စင်းကို စိုက်ကြည့်ပြီး မျက်မှောင်ကြုတ်ကာ မေးလိုက်၏။

“အဲဒါ နင်လား”

သူမသည် ထိုလူကို မှတ်မိသိရှိသွားသောအခါ အရမ်းကို အံ့အားသင့်သွား၏။

ဤလူသည် ဤနေရာမှာ တကယ်ပင် ပေါ်ထွက်မလာသင့်ပေ။

“ဟုတ်တာပေါ့”

ရိုးရှင်းသော ဝတ်စုံဝတ် အမျိုးသမီး၏ အသံက ရထားလုံးအတွင်းကနေ ထွက်ပေါ်လာခဲ့၏။

ရထားလုံး၏ ဘေးပတ်လည်မှာ ရှိသော ကျင့်ကြံသူများပင် လိပ်ပြာလွင့်မတတ် ကြောက်လန့်သွားပြီး သူတို့ပါ ရောပါငြိစွန်းသက်ရောက်ခံရမည်ကို စိုးရိမ်၍ တစ်ယောက်ပြီးတစ်ယောက် ရထားလုံးဘေးကနေ ရှောင်ကွင်းသွားကြ၏။

ရထားလုံးက အရမ်းကို သာမန်သာ ဖြစ်၏။

အဲဒါက အရမ်းကို သာမန်ဆန်ပြီး လူအုပ်ကြားထဲမှာ မည်သည့် စိတ်အာရုံကိုမှ ဆွဲဆောင်မိလိမ့်မည် မဟုတ်ပေ။

သို့သော်လည်း ရထားလုံးကို ခန်းစီးများဖြင့် ဖုံးအုပ်ထားပြီး အပြင်လူများသည် အထဲမှာ ရှိနေသည့်အရာကို မတွေ့မြင်နိုင်ပေ။ သူတို့၏ စိတ်ဝိညာဉ်အသိစိတ်ကပင်လျှင် အထဲမှာ ရှိသောအရာကို မထောက်လှမ်းနိုင်ပေ။

မလှမ်းမကမ်းမှာ ရှိသော မင်းသားယွင်လေကသာလျှင် တွေဝေရှုပ်ထွေးသော အမူအရာတစ်ခုနှင့်အတူ မျက်မှောင်ကြုတ်လိုက်၏။

ထိုအသံက ရင်းနှီးနေပုံရသော်လည်း အဲဒါက မဖြစ်နိုင်ဘူးဟု သူက ခံစားနေရ၏။

သူ၏ အစ်မသည် ဤနှစ်များ အားလုံးအတွင်း စာကြည့်တိုက်ထဲမှာသာ တိတ်တဆိတ် ကျင့်ကြံနေခဲ့ပြီး သူ့ကို တွေ့မြင်ရခဲလေသည်။ သူပင်လျှင် သူမနှင့် တွေ့ဆုံဖို့အတွက် တောင်းဆိုမှုတစ်ခု မပြုလုပ်နိုင်ပေ။ သူမက ဤနေရာမှာ ဘာကြောင့် ရုတ်တရက် ပေါ်ထွက်လာတာလဲ။

“လက်စသတ်တော့ ခင်ဗျားက အဲဒီနေရာမှာ ပုန်းနေတာပဲ”

ပကတိအင်မော်တယ်ကျင်းယွဲ့၏ အကြည့်က သိပ်သည်းစုဖွဲ့လာပြီး သူက ရထားလုံးကို စိုက်ကြည့်ကာ အေးစက်စွာ ပြောလိုက်၏။

“ခင်ဗျား ဘယ်လိုတောင် ပုန်းနေရဲတာလဲ.. ခင်ဗျား ဘယ်သူလဲ ကြည့်ရအောင်”

ထိုသို့ ပြောရင်း ပကတိအင်မော်တယ်ကျင်းယွဲ့က ရှေ့သို့ တက်လှမ်းကာ တိုက်ခိုက်ဖို့ ပြင်လိုက်၏။

သို့သော်လည်း မင်းသမီး မုန့်ယောင်က သူမ၏ အင်္ကျီလက်စကို ဝေ့ယမ်းပြီး သိပ်သည်းပြင်းထန်သော စွမ်းအားတစ်ခုကို ထုတ်ဖော်ကာ ပကတိအင်မော်တယ်ကျင်းယွဲ့ကို ပြန်ဆွဲယူလိုက်၏။

ပကတိအင်မော်တယ်ကျင်းယွဲ့က ခဏမျှ မှင်တက်သွားပြီး မေးဖို့ ဟန်ပြင်လိုက်၏။

မင်းသမီး မုန့်ယောင်က မှင်သေသေဖြင့် ပြောလိုက်၏။

“နင်က သူ့ပြိုင်ဘက် မဟုတ်ဘူး.. နင့်ကိုယ်နင် အရှက်မခွဲစမ်းနဲ့”

ပကတိအင်မော်တယ်ကျင်းယွဲ့၏ မျက်နှာက ချက်ချင်းပင် နီမြန်းသွား၏။ သူက ထပ်တလဲလဲ အသက်ပြင်းပြင်းရှိုက်ပြီး သူ၏ စိတ်ကို တည်ငြိမ်စေကာ ခါးသက်စွာ ပြုံးလိုက်၏။

“ဟုတ်ပါတယ်.. ကျုပ် မဆင်မခြင် ပြုမိသွားတယ်”

သို့သော်လည်း အခြားသော ကျင့်ကြံသူများက တုန်လှုပ်သွားပြီး ရထားလုံးထဲရှိ အမျိုးသမီးနှင့် ပတ်သက်၍ ပို၍ပင် သိချင်စိတ် ပြင်းပြလာကြ၏။

“ဘာလို့လဲ.. နင်က ဒီ အဆင့်-၆ ကမ္ဘာမြေအင်မော်တယ်နဲ့ သိလို့လား”

မုန့်ယောင်က ရထားလုံးကို စိုက်ကြည့်ကာ မေးလိုက်၏။

“မသိဘူး”

ရထားလုံးအတွင်းမှ ရိုးရှင်းသော ဝတ်စုံဝတ် အမျိုးသမီးက ပြန်ဖြေလိုက်၏။

ဘေးမှာရှိသော မိန်းကလေးက ပူပန်ကြောင့်ကြသော အမူအရာတစ်ခုနှင့်အတူ သူမ၏ ခေါင်းကို ထပ်တလဲလဲ ခါပြီး ရိုးရှင်းသော ဝတ်စုံဝတ် အမျိုးသမီးကို မဆင်မခြင် မပြုဖို့ သတိပေးနေ၏။

မုန့်ယောင်က ပြုံး၍ တစ်ဖန်ထပ်ကာမေးလိုက်၏။

“နင်က သူ့ကို မသိဘဲနဲ့တောင် ဒီကိစ္စမှာ ကြားဝင်ပါချင်တာလား”

“မဟာကျင်းအင်မော်တယ်နိုင်ငံက တခြားသူတွေကို အနိုင်ကျင့်နေတာ ငါက ဒီတိုင်းရပ်ကြည့်မနေနိုင်လို့ ဝင်ပါလာရတာပဲ”

ရိုးရှင်းသော ဝတ်စုံဝတ် အမျိုးသမီး၏ လေသံက ဂရုမစိုက်သည့်ဟန်ဖြင့် သူမက လုံးဝ အလျှော့မပေးပေ။

“ဟင်းဟင်း.. စိတ်ဝင်စားစရာပဲ”

မုန့်ယောင်က သူမ၏ လှပမှုထဲမှာ အေးစက်စက် အရိပ်အယောင်တစ်ခုနှင့်အတူ ဖူးပွင့်လာသော နှင်းပန်းတစ်ခုကဲ့သို့ ပြုံးလိုက်လေသည်။

သူမက ဖြည်းဖြည်းချင်း ပြောလိုက်၏။

“ဒီလူက မဟာကျင်းအင်မော်တယ်နိုင်ငံက အာဏာပါးကွက်သား အစောင့်တပ်သား တစ်ရာကျော်ကို သတ်ဖြတ်ခဲ့တယ်.. သူ့ရဲ့ ပြစ်မှုတွေက ခွင့်လွှတ်လို့ မရဘူး.. သူက သေသင့်သေထိုက်တယ်.. နင်က သူ့ကို မသိဘဲနဲ့တောင်မှ သူ့အတွက် ထွက်ပြီး ရပ်တည်ပေးချင်သေးတာလား”

“နင်က ပတ်သက်ဆက်နွယ်မှု မရှိတဲ့ လူတစ်ယောက်ကြောင့် မဟာကျင်းအင်မော်တယ်နိုင်ငံနဲ့ အင်မော်တယ်ပျံဂိုဏ်းကို တစ်ချိန်တည်းမှာ ဆန့်ကျင်ချင်နေတာလား”

မုန့်ယောင်က လေသံက သိပ်သည်းစုဖွဲ့လာပြီး သူမ၏ အော်ရာက ပို၍ပင် ကြမ်းကြုတ်ခက်ထန်လာခဲ့၏။

သူမသည် အချိန်မရွေး တိုက်ခိုက်ဖို့ ပြင်ဆင်ထားသည်ဟူသော အရိပ်လက္ခဏာ ဖြစ်လေသည်။