ယန်စစ်မင် Vs ကုန်းထျန်းဟောက် (၁)

Vol. 14 Ch. 236

"ကျွန်မ သူ့ကို အကြွေးတင်နေတယ်"လို့ ရှောင်လင်းယွီက ပြောပြီးသည့်နောက် ပတ်ဝန်းကျင်မှာ ပြောင်းလဲသွားလေသည်။

ပို၍ငြိမ်သက်လာလေသည်။

ပို၍တိတ်ဆိတ်လာလေသည်။

အနည်းငယ်ပို၍ပင် ထူးဆန်းလာလေသည်။

ယန်စစ်မင်သည် သူမ၏ ဆုံးဖြတ်ချက်ကို နားမလည်နိုင်သလို လက်လည်းမခံနိုင်ပေ။ သူမသည်အဘယ့်ကြောင့် ထိုကဲ့သို့သောကလေးကို ဆက်မွေးရသနည်း။ သူမ၏ဘဝကို ပျက်စီးစေနိုင်မှန်း မသိ၍လော။

သူမ၏ကိုယ်ဝန်မှာ ၆လဝန်းကျင်ရှိနေပြီဖြစ်လေသည်။ သူသည် သူမကိုစိတ်ဝင်စားသော်လည်း.....

ယန်စစ်မင်သည် သူ၏စွဲမက်ဖွယ် မျက်လုံးများကို မှေးကျဉ်းသွားသည်အထိ ပြုံးလိုက်ပြီး " ရှောင်လင်းယွီ မင်းကိုယ့်ရဲ့ အမျိုးသမီးဖြစ်ပေးနိုင်မလား။ ဒီကလေးကို ကာကွယ်ပေးပါ့မယ်။ အနာဂတ်မှာ သူ့ကိုဘယ်သူမှ အနိုင်မကျင့်စေရပါဘူး။ ဘယ်လိုသဘောရလဲ။"

သူသည် ပြုံးနေသော်လည်း သူ၏မျက်နှာမှာ လေးနက်လေသည်။

ရှောင်လင်းယွီသည် မျက်မှောင်ကြုတ်လိုက်ပြီး သူမ၏အပြုံးမှာလည်း တန့်သွားလေသည်။

ထို့နောက် သူမသည် ပြုံး၍ ပြောလေသည်။ "ကျွန်မကို တစ်ယောက်ယောက်က ပြောဖူးတယ်။ ကျွန်မက ရုပ်ဆိုးပြီးတော့ ကိုယ့်ကိုယ်ကိုယ် ယုံကြည်မှုလွန်ကဲနေတဲ့ မိန်းမဆိုပြီး။ ဘာလို့ထပ်မေးနေရတာလဲ။ ကျွန်မကို လှောင်ဖို့လုပ်နေတာလား"

သူမသည် စနောက်၍ပြောသည်ဖြစ်သော်လည်း တစ်ဖက်တွင် အသေအချာ ငြင်းလိုက်ခြင်း ဖြစ်ပေသည်။

ယန်စစ်မင်သည် အမှန်ပြောနေသည် ဖြစ်နိုင်သော်လည်း သူမ မလိုအပ်ပေ။

သူ၏မျက်လုံးများသည် လေးနက်လာပြီး ပြောလေသည်။ "ရှောင်လင်းယွီ ကိုယ်အတည်ပြောနေတာ။ စဉ်းစားပေးမလား။"

သူမ၏မျက်နှာသည်လည်း တည်တံ့လာပြီး မေးလေသည်။ "ယန်စစ်မင်၊ ရှင်က ကျွန်မကို ရှင့်ရဲ့ အမျိုးသမီးဖြစ်ဖို့ ပြောတယ်နော်။ ဘယ်လို အမျိုးသမီးလဲ ရှင့်ရဲ့ တရားဝင်ဇနီးမယားလား အပျော်မယားလား"

သူ၏မျက်လုံးများသည် ဝင်းလက်သွားပြီး တစ်ခုခုပြောရန် ကြံလိုက်ချိန်တွင် ရှောင်လင်းယွီက တားလေသည်။

သူမသည် ဆက်ပြောလေသည်။ "ကျွန်မရှင့်ရဲ့ အပျော်မယားလုပ်မှာမဟုတ်ဘူး။ ဒါပေမယ့် ရှင့်ရဲ့ဇနီးလည်း မဖြစ်နိုင်ဘူး။ ကျွန်မက အရည်အချင်းမမီပါဘူး။ ပြီးတော့ ရှင်က ကျွန်မကို ဇနီးဖြစ်ပေးဖို့ ပြောနေတယ်လို့လည်း မထင်မိဘူး။ ကျွန်မက ဖခင်မဲ့ကလေးကို လွယ်ထားတဲ့သူပါ။ ရှင့်ကိုလက်ခံလိုက်ရင် နောင်တစ်ချိန်မှာ ကလေးကို ရှင်နဲ့ကျွန်မ ဘယ်လိုဖြေရှင်းချက် ပေးကြမလဲ။ ကျွန်မပြောပြီးသားပဲ ဒီကလေးကို မွေးမှာပါလို့။"

သူမ၏စကားများကိုကြားသောအခါ ယန်စစ်မင်၏ မျက်လုံးသည်ရှုံ့သွားလေသည်။ ထို့နောက်သူသည် ပါးစပ်ဟလိုက်ပြီး ပြောလေသည်။ "ရှောင်လင်းယွီ ကိုယ်..."

သူမပြောသည်မှာမှန်လေသည်။ သူသည် သူမကို သူ၏အမျိုးသမီး ဖြစ်စေချင်သော်လည်း မည်သည့်နေရာတွင်နည်း။

သူသည်ဒီကိုရောက်မလာခင် ထိုကိစ္စများကို တွေးခဲ့ပြီးဖြစ်လေသည်။

သူမကိုစိတ်ဝင်စားသည်မှန်သော်လည်း ပိုင်ဆိုင်မှဖြစ်မည်ဟူသော အဆင့်ထိမရောက်သေးချေ။ ထို့အပြင် စိတ်ဝင်စားရခြင်းမှာ သူမသည် သူ့ကိုငြင်းဖူးသော ပထမဆုံး အမျိုးသမီးဖြစ်သောကြောင့် ဖြစ်ပြီး သူမကို ရသွားပါက စိတ်ဝင်စားမှု ပျောက်သွားနိုင်လေသည်။

ယန်စစ်မင်သည် Zမြို့တွင် နာမည်ကြီး လူပွေတစ်ယောက်ဖြစ်ပြီး ဘယ်လိုကြောင့် သူသည် မိန်းမတစ်ဦးအတွက်နှင့် ခြေငြိမ်သွားမည်နည်း။ ထို့ကြောင့် သူသည် ထောင်ယွမ်ရွာကို မလာခင်ကပင် ကမ်းလှမ်းမှုကို စဉ်းစားခဲ့ပြီးဖြစ်လေသည်။

သူသည် ရှောင်လင်းယွီကို ယခင်က သူပတ်သက်ခဲ့ဖူးသော မိန်းမများကဲ့သို့ သူ၏ချစ်သူအဖြစ်သာ ထားလိုလေသည်။ သို့သော် ကွာခြားချက်မှာ သူသည် သူ၏ပိုင်ဆိုင်မှုများကို သူမကို ပေးသုံးမည်ဖြစ်သည်။

ယန်စစ်မင် တွေဝေနေသည်ကို မြင်သောအခါ ရှောင်လင်းယွီသည် အဖြေကို သိလိုက်ပြီဖြစ်သည်။ သူမ၏မျက်လုံးများသည် ညို့မှိုင်းသွားပြီး စိတ်ပျက်စွာ ကြည့်လိုက်လေသည်။ ထို့နောက်သူမသည် ပြုံး၍ပြောလေသည်။ "ဒါဆိုရင် ကျွန်မက ရှင့်ရဲ့ချစ်သူဖြစ်ဖို့ လက်ခံလိမ့်မယ် ထင်တယ်ပေါ့ ယန်စစ်မင် "

ယန်စစ်မင်သည် ရုတ်တရက် ထိတ်လန့်သွားပြီး "ဒါဆိုဇနီးနေရာဆိုရင်ရော"ဟု ပြောလေသည်။

"အဲ့ဒါကိုလည်း သူလက်ခံမှာ မဟုတ်ဘူး" အမျိုးသားတစ်ယောက်၏ အသံသည် ခြံဝန်းအပြင်ဘက်မှ ထွက်လာလေသည်။

သူတို့နှစ်ယောက်သည် ခြံပြင်ကို ကြည့်လိုက်လေသည်။

"ကုန်းထျန်းဟောက် "

"သခင်လေးကုန်း"

ယန်စစ်မင် အရင်ပြောလိုက်ပြီး နောက် ရှောင်လင်းယွီက လိုက်ပြောလေသည်။ သူရောက်လာသည့်အတွက် နှစ်ယောက်စလုံးမှာ အံ့အားသင့်နေကြလေသည်။

ယန်စစ်မင်သည် သူ့ကို စီးပွားရေးကိစ္စများကြောင့် သိခဲ့ခြင်းဖြစ်လေသည်။

ယန်လုပ်ငန်းစုသည် Zမြို့တွင် အကြီးဆုံးဖြစ်ပြီး စက်မှုလုပ်ငန်း အများအပြားတွင် ပါဝင်သည်ဖြစ်သည်။ Imperial Palace လုပ်ငန်းစုမှာလည်း တစ်နိုင်ငံလုံးတွင် အကြီးဆုံးကုမ္ပဏီဖြစ်ပြီး ကမ္ဘာတစ်ဝှမ်းရှိ အကောင်းဆုံး ကုမ္ပဏီများနှင့်သာ အလုပ်တွဲလုပ်လေသည်။

ကုန်းထျန်းဟောက်သည် ခရီးဆောင်အိတ်ကို လက်တစ်ဖက်တွင် ကိုင်ထားပြီး တစ်ဖက်တွင် ဂျာကင်အင်္ကျီကို ကိုင်ထားလေသည်။ ပူပြင်းသည့်ရာသီဥတုနှင့် ခရီးပြင်းနှင်လာရမှုတို့ကြောင့် သူ၏နဖူးတွင် ချွေးများပြန်နေလေသည်။

သူတို့၏အံ့သြသည့်အကြဘ့်များကို လျစ်လျှူရှုလိုက်ပြီး ခရီးဆောင်အိတ်ကိုဆွဲဆွဲကာ ခြံထဲသို့ ဝင်လေသည်။

ရှောင်လင်းယွီ, "...." 'ဒါက ငါ့အိမ်မလား။ ဘာလို့ ဒီလူတွေက သူတို့ပိုင်တဲ့အတိုင်း လုပ်နေကြတာလဲ။ မဟုတ်သေးပါဘူး၊ ဘာလို့ဒီလူက ထောင်ယွမ်ရွာမှာ ရောက်နေရတာလဲ။ ပြီးတော့ သူ့ပုံကိုကြည့်ရတာ သူ့အဖိုးဆီမသွားခင် ဒီကိုအရင်လာပုံပဲ။ ဘာလို့လဲ။ ပြီးတော့ သူကငါ့အစား ယန်စစ်မင်ကိုတောင် ငြင်းလိုက်သေးတယ်။ သူကဘာမို့လို့လဲ။'

ထိုအဖြေသာ ဖြေမည်ဖြစ်သော်လည်း သူမအစား အခြားတစ်ယောက် ဖြေပေးခြင်းကို သူမ မနှစ်သက်ပေ။

ယန်စစ်မင်သည်လည်း ကုန်းထျန်းဟောက် ရောက်လာခြင်းအပေါ် လွန်စွာအံ့သြလေသည်။ ထို့နောက်သူသည် သံသယဖြင့် မေးလေသည်။ "ဘယ်လိုဖြစ်လို့ ဒီကိုရောက်လာတာလဲ မစ္စတာကုန်း"

ကုန်းထျန်းဟောက်သည် ရှောင်လင်းယွီကို ကြည့်လိုက်ချိန်တွင် သူမမျက်နှာတွင် ထူးဆန်းသောအမူအယာကို တွေ့ရလေသည်။

ဤကိစ္စသည် သူတို့တွေ့ခဲ့သည့် ယခင်အကြိမ်အနည်းငယ်ကို သတိရသွားစေသည်။ တွေ့သည့်အချိန်တိုင်းတွင် သူမ၏မျက်နှာအမူအယာမှာ ထူးဆန်းလေသည်။

သူ၏ရုပ်ရည်နှင့် ကြွယ်ဝမှုအရ မိန်းမအများစုသည် သူ့ကို ချဉ်းကပ်ကြသည်ဖြစ်သည်။ သူသည် ထိုမိန်းမများကို အာရုံမစိုက်ချေ။ သို့သော် ရှောင်လင်းယွီသည် သူ့ကို အမြဲတမ်း ရှောင်လွှဲ ငြင်းဆန်နေခဲ့သည်ဖြစ်သည်။

သူသည် ယခင်က နားမလည်ခဲ့သလို သိရန်လည်း မကြိုးစားခဲ့ချေ။

သို့သော် သူသည် ယခုအကုန်လုံးကို နားလည်သွားပြီဖြစ်သည်။

ပထဆုံးတွေ့ချိန်က သူမသည် သူ့ကို ခုံနောက်မှ စိုက်ကြည့်နေပြီး တစ်ခုခုကို အတည်ပြုသလိုရှိသည်။ သူမသည် ထိုကတည်းက အတည်ပြုခဲ့ပုံရလေသည်။ သို့သော် သူသည် သူမအဘယ်ကြောင့် အတည်ပြုခဲ့သည်ကို နားမလည်ခဲ့ချေ။

နောက်မှ သူမသည် အသံနှင့်ပတ်သက်လျှင် သိနိုင်စွမ်းမြင့်မားကြောင်းနှင့် တစ်ခါကြားဖူးသောအသံကို ဘယ်တော့မှမမေ့ကြောင်း သိခဲ့ရလေသည်။

ယန်စစ်မင်သည် ရှောင်လင်းယွီကို ကုန်းထျန်းဟောက်က လေးနက်စွာ မျက်မှောင်ကြုတ်၍ စိုက်ကြည့်နေသည်ကို မြင်လေသည်။

'ဘာတွေဖြစ်နေတာလဲ ရှောင်လင်းယွီက ကုန်းထျန်းဟောက်နဲ့ ဘယ်လိုသိတာလဲ'

ကုန်းထျန်းဟောက်မှာ Imperial Palace လုပ်ငန်းစု၏ သူဌေးဖြစ်ပြီး တစ်နိုင်ငံလုံးတွင် အချမ်းသာဆုံးဖြစ်သည့်အပြင် တစ်ကမ္ဘာလုံးတွင် ထိပ်တန်းအဖွဲ့များထဲမှ တစ်ခုအပါအဝင်ဖြစ်လေသည်။

ရှောင်လင်းယွီမှာ ယခင်က သာမန်အလုပ်သမားသာဖြစ်ပြီး ယခုအချိန်တွင် လယ်သမား၏ သမီးဖြစ်သူမှာ ကုန်းထျန်းဟောက်ကဲ့သို့သူနှင့် မည်သို့သိကျွမ်းလေသနည်း။

သူသည်ပင် ကုန်းထျန်းဟောက်ကို စီးပွားရေး အစည်းဝေးပွဲတစ်ခုတွင် အချိန်ခဏသာ သိခဲ့ရခြင်းဖြစ်သည်။

သူ၏စိတ်တွင် မူမမှန်သလို ခံစားရလာကာ သူသည် ရှောင်လင်းယွီ ရှေ့တွင်ရပ်၍ အပြုံးဖြင့် "မစ္စတာကုန်းက ဘယ်လိုလုပ် ဒီကိုရောက်နေတာလဲ"ဟု မေးလေသည်။

ကုန်းထျန်းဟောက်သည် သူ့ရှေ့တွင် ရှိနေသော လွန်စွာချောမောသည့် ယောကျ်ားကိုကြည့်ရင်း မျက်ခုံးပင့်လိုက်ပြီး မေးလေသည်။ "ခင်ဗျားက ယန်စစ်မင်မလား"

ယန်စစ်မင်သည် ခေါင်းငြိမ့်၍ ပြန်ဖြေလေသည်။ "ဟုတ်ပါတယ်။ ကျွန်တော့်လို ယင်ကောင်သာသာ လူတစ်ယောက်ကို ကုန်းထျန်းဟောက်က မှတ်မိနေတာ ဂုဏ်ယူစရာပါပဲ"

ယန်စစ်မင်သည် ကုန်းထျန်းဟောက်အတွက် အမှန်ပင် ယင်ကောင်သာဖြစ်လေသည်။

"မစ္စတာယန်ကရော ဘာလို့ရောက်နေတာလဲ" ကုန်းထျန်းဟောက်က ပြန်မေးလိုက်လေသည်။

ယန်စစ်မင် "...." 'မင်းနဲ့ဘာဆိုင်လို့လဲ'

"ရှေ့ကနေဖယ်" ကုန်းထျန်းဟောက်သည် ရုတ်တရက် အေးစက်စွာ ပြောလေသည်။

ယန်စစ်မင်သည် ရှောင်လင်းယွီတို့ကို အကြိမ်များစွာ ကူညီထားပြီး ရှောင်မိသားစုသည် သူ့အပေါ် ကျေးဇူးကြွေးတင်နေသည်ဟု လီယွမ်ဟန်ပြောထားသည်ကို သူအမှတ်ရလေသည်။ ယန်စစ်မင်သည် ရှောင်လင်းယွီကို ဖွင့်ပြောလိုက်ပြီး သူ၏သတို့သမီးဖြစ်ရန် ခွင့်တောင်းသည်ကို ခြံပြင်ကနေ သူကြားခဲ့လေသည်။သူသည် ရှောင်လင်းယွီကို ထောင်ယွမ်ရွာကို ရောက်လျှင်ရောက်ချင်း လာတွေ့သည်မှာ မှန်သွားလေသည်။ မဟုတ်လျှင် သူ့မိန်းမနှင့်ကလေးသည် ခိုးယူခံရတော့မည်ဖြစ်သည်။

ထိုကိစ္စသည် အမှန်ပင်ဖြစ်လေသည်။ ထိုညက မိန်းကလေးမှာ ရှောင်လင်းယွီဖြစ်ပြီး သူမတွင် ကိုယ်ဝန်ရှိနေပြီဆိုစဉ်ကတည်းက သူ့အနေဖြင့် သူမတို့ကို သူ၏ဇနီးနှင့် ကလေးအဖြစ် သတ်မှတ်ပြီးသား ဖြစ်လေသည်။

သူ့ဇနီးကို အခြားယောကျ်ားတစ်ယောက်က ချစ်ခွင့်ပန်သည်ကို မြင်ရသောအခါ သူသည်လွန်စွာစိတ်ဆိုးလေသည်။

ကုန်းထျန်းဟောက်၏ အာဏာသည် ကြောက်ဖို့ကောင်းသည်မှန်သော်လည်း ယန်စစ်မင်သည် မကြောက်ပေ။

သူသည် ဘေးသို့မဖယ်သည့်အပြင် တည်တံ့စွာ မေးလေသည်။ "တစ်ခုခုပြောစရာရှိရင် ပြောလိုက်ပါလား။ လင်းယွီက ကိုယ်ဝန်နဲ့ဆိုတော့ လန့်လို့မဖြစ်ဘူး"

ကုန်းထျန်းဟောက်သည် တိတ်ဆိတ်သွားလေသည်။ ယခင်အကြိမ်များက ရှောင်လင်းယွီသည် သူ့ကို ရှောင်နေသည်ကို ပြန်တွေးမိလေသည်။

သို့သော် မည်သည့်အတွက်ကြောင့် သူ့ကလေးနှင့် သူ့ဇနီးကို တွေ့ခြင်းကို ယောကျ်ားတစ်ယောက် တားတာခံရမည်နည်း။

ကုန်းထျန်းဟောက်၏ မျက်နှာသည် ညိုမဲသွားပြီး အေးစက်စွာ ပြောလေသည်။ "ရှောင်လင်းယွီ ကိုယ်ဝန်ရှိနေမှန်း ကျွန်တော်သိပါတယ်။ ဒီအခြေအနေကို ကျွန်တော်နားလည်ပြီးသားဖြစ်လို့ ခင်ဗျားစိတ်ပူစရာမလိုပါဘူး။ အဲ့တော့ ကျေးဇူးပြုပြီး ထွက်သွားပေးပါ။"

ယန်စစ်မင် "...."

ယန်စစ်မင်သည် ဘေးမဖယ်သလို သူ၏မျက်နှာသည်လည်း တည်တံ့လာလေသည်။

'သူနဲ့ ရှောင်လင်းယွီက ဘယ်လိုပတ်သက်တာလဲ"

သူသည်ပြန်မေးလေသည်။ "မစ္စတာကုန်း ဒီအခြေအနေကို နားလည်တာသေချာလို့လား။ ဒီကိုရောက်ကတည်းက အော်ပြီး ပြောချင်တာတွေပြောနေတာ။ ဘယ်သူကမကြောက်ဘဲနေမှာလဲ။ ကျွန်တော့်ရဲ့ လင်းယွီက ကိုယ်ဝန်နဲ့ပါ သူကြောက်လို့မဖြစ်ဘူး"

"ခင်ဗျားရဲ့လင်းယွီ ဟုတ်လား" ကုန်းထျန်းဟောက်သည် ထပ်မေးလိုက်လေသည်။ ထို့နောက် သူ၏နှုတ်ခမ်းထောင့်စွန်းမှာ ကွေးသွားပြီး လှောင်ရယ်သည့်အသံဖြင့် ပြောလေသည်။ "ရှောင်လင်းယွီက ဘယ်တုန်းက ခင်ဗျားဇနီးဖြစ်ဖို့ လက်ခံလိုက်တာလဲ။

"ပြီးတော့ မစ္စတာယန်က မိန်းကလေးတွေနဲ့ ပတ်သက်ပြီးလည်း နာမည်ကြီးတယ်လို့ ကြားဖူးပါတယ်။ အဝတ်အစားလဲသလိုပဲ မိန်းကလေးတွေ ခဏခဏပြောင်းတယ်ဆိုပဲ။ ခင်ဗျားဆီချဉ်းကပ်လာတဲ့ ဘယ်မိန်းမကိုမဆို မငြင်းဖူးဘူးဆို။ ခင်ဗျားရဲ့ ရည်းစားတွေ အကုန် တန်းစီလိုက်ရင် Zမြို့ကိုတောင် ၃ပတ် ပတ်လို့ရနေပြီ။ ရှောင်လင်းယွီကိုလည်း အဲ့အတန်းထဲ တန်းခိုင်းမလို့လား"

"ခင်ဗျား....ခင်ဗျား ကျွန်တော့်ကို မဟုတ်တာပြောတယ်" ယန်စစ်မင်၏ ချောမောသော မျက်နှာလေးသည် ချက်ချင်းရုပ်ဆိုးသော သွင်ပြင်ကိုဆောင်သွားလေသည်။ သူသည် Imperial Palace၏ သူဌေးသည် ထိုကဲ့သို့ အောက်တန်းကျသည့် အကွက်ကို သုံးမည်ဟု ထင်မထားချေ။

ကုန်းထျန်းဟောက်သည် ရယ်လိုက်ပြီး အေးစက်စွာ ပြောလေသည်။ "ဘယ်လိုလုပ်မဟုတ်တာ ပြောရမှာတုန်း။ ခင်ဗျား ရည်းစားများတာ မဟုတ်လို့လား။ ပြီးတော့ ရက်ပိုင်းအတွင်း ခဏခဏပြောင်းတာရောပဲ"

"ခင်ဗျား.." ယန်စစ်မင်သည် ကုန်းထျန်းဟောက်ကို လက်ညိုးထိုးလိုက်ပြီး အံ့သြနေလေသည်။

ကုန်းထျန်းဟောက်သည် အေးစက်မာကျောပြီး စကားနည်းသည်ဟု ဆိုကြသည်မလား။

ထိုစကားမှာ အလိမ်အညာပင်ဖြစ်လေသည်။ သူသည်ရောက်ကတည်းက စကားတိုက်စစ် ဆင်နေချေလေသည်။

ကုန်းထျန်းဟောက် Vs ယန်စစ်မင်၊ ပထမအချီ ၊ ကုန်းထျန်းဟောက်အနိုင်။

ယန်စစ်မင်၏ နောက်တွင်ရပ်နေသော ရှောင်လင်းယွီသည် စိတ်လှုပ်ရှားပြီး စိုးရိမ်လာသည်။ ဘာကြောင့်များ ကုန်းထျန်းဟောက်သည် သူ့အဖိုးဆီမသွားခင် သူမထံအရင်လာသည်ကို စဉ်းစားမရချေ။

ယန်စစ်မင်၏ ဇနီးဖြစ်ရန်ကိုပင် တားလိုက်သေးသည်။ သူမသည် ထိုကိစ္စနှင့် ပတ်သက်၍ မကောင်းသည့်ခံစားချက် ရနေလေသည်။

သူမ၏ပူပန်မှုနှင့် ကြောက်ရွံ့မှုကို ဖိနှိပ်ကာ ယန်စစ်မင်၏ ပခုံးကို ပုတ်လိုက်ပြီး တည်ငြိမ်စွာပြုံး၍ပြောလေသည်။ "ဥက္ကဌယန် မစ္စတာကုန်းက ထောင်ယွမ်ရွာရဲ့ ကျေးဇူးရှင်ပါ။ သူ့အဖိုးက ဒီရွာမှာနေပြီးတော့ ကျွန်မမိသားစုနဲ့ ဆက်ဆံရေး ရင်းနှီးပါတယ်။" ထို့နောက် သူမသည် ကုန်းထျန်းဟောက်ဘက်သို့ လှည့်လိုက်ပြီး "မစ္စတာကုန်း ဘာလို့ ရှင့်အဖိုးဆီအရင်မသွားဘဲ ကျွန်မအိမ်ကို လာတာလဲ"

ကုန်းထျန်းဟောက်သည် သူမ၏အသံကြားလိုက်ရသောအခါ လွန်စွာစိတ်လှုပ်ရှားသွားလေသည်။

သို့သော်သူသည် ခံစားချက်ကို ထုတ်မပြတတ်သူဖြစ်ရာ သူ့ကိုယ်သူ တည်ငြိမ်အောင်နေလေသည်။

"ဒီကို စတော်ဘယ်ရီ ဝယ်ဖို့လာတာပါ။ သူတို့တွေ ရောင်းအားကောင်းနေတာ တွေ့တာနဲ့ ဝယ်ဖို့လက်လွတ်သွားမှာစိုးလို့ ဒီကိုလာလိုက်တာ"

ရှောင်လင်းယွီ "..."

'ဒါပေါ့ ရှင့်လို တစ်နိုင်ငံလုံးမှာ အချမ်းသာဆုံးသူဌေးက ဒီလိုကိစ္စသေးလေးကို ဂရုစိုက်တယ်ဆိုတာ ကျွန်မယုံမယ်လို့ထင်နေတယ်ပေါ့'

ယန်စစ်မင်၊ "..."

'လူလိမ်၊ အဲ့လိုအကြောင်းပြချက်ကို အရူးတွေပဲ ယုံလိမ့်မယ်။'

တစ်ချိန်တည်းမှာပင် ယန်စစ်မင်၏ စိတ်ထဲတွင် ပူပန်စိုးရိမ်မှုများ လွှမ်းမိုးလာလေသည်။

Imperial Palaceရဲ့ ခေါင်းဆောင်က ဘာလို့ မိန်းမတစ်ယောက်ကို တွေ့ရန်အတွက် လိမ်ညာရတာလဲ။

ဘာကြောင့်လဲ။

ယန်စစ်မင်သည် အဖြေကို သိပြီးသားဖြစွသော်လည်း ရင်မဆိုင်ချင်ပေ။

ကုန်းထျန်းဟောက်တစ်ယောက် မြို့တော်မှ ဒီကိုအပြေးလာရခြင်းသည် ရှောင်လင်းယွီနှင့် သူ့ကလေးကို တွေ့ချင်သောကြောင့်ဖြစ်ပြီး သူ့အနေဖြင့် သူတို့ကို ထွေးပွေ့ထားချင်မိလေသည်။

ထိုအချိန်တွင် ရှောင်လင်းယွီသည် သူ၏ညီအစ်ကိုကောင်းဖြစ်သူ ကျန်းထောင်ကြိုက်သော အမျိုးသမီးဖြစ်သည်ကို မေ့လျော့သွားပြီး သူ့ကိုပေးခဲ့သော ကတိများသည်လည်း ပျောက်ကွယ်သွားလေသည်။

သို့သော် ရောက်လျှင်ရောက်ချင်း သူ့ဇနီးကို ချစ်ခွင့်ပန်နေသည်ကို မြင်လိုက်ရသောအခါ သူ့အား စိုးရိမ်ပူပန်စေလေသည်။

သူသည် ရှောင်လင်းယွီနှင့် ကလေးကို ပိုင်ဆိုင်ကြောင်း ကြေညာချင်နေလေသည်။ သို့သော် သူမ၏မျက်လုံးမှ ပူပန်ထိတ်လန့်မှုများကို မြင်ရသောအခါ သူ၏နှလုံးသားကို ရေခဲရေဖြင့် ပက်လိုက်သကဲ့သို့ အသိစိတ်ဝင်သွားလေသည်။

ဤသည်မှာ သူ့အနေဖြင့် ကြေညာရန် အချိန်ကောင်း မဟုတ်သေးချေ။

အကယ်၍သူသာ အကုန်လုံးကို သိပြီးကြောင်း ပြောလိုက်ပါက ရှောင်လင်းယွီသည် ပို၍သတိထားနေပေလိမ့်မည်။ သူမအနေဖြင့် ကလေးကို သူမထံမှ ခေါ်ယူရန် ချဉ်းကပ်သည်ဟု ထင်သွားပေလိမ့်မည်။

ထိုအချိန်တွင်းမှာပင် ကုန်းထျန်းဟောက်သည် အကြံတစ်ခု တွေးမိလေသည်။ သူသည် ကလေးအမေက သူ့ကို အရင်လက်ခံလာအောင် လုပ်ရပေမည်။ ထိုသို့လုပ်ရန်မှာလည်း သူမသည် အခြားယောကျ်ားတစ်ယောက်နှင့် ရှိမနေသည်ကို သေချာအောင် လုပ်ရပေမည်။

ယန်စစ်မင်သည် ရှောင်လင်းယွီ၏ မိသားစုကို အကြိမ်ကြိမ် ကူညီဖူးသဖြင့် သူ၏အကြီးမားဆုံး ပြိုင်ဘက် ဖြစ်နေလေသည်။

ကုန်းထျန်းဟောက်တွင် ယန်စစ်မင်၏ ပုံရိပ်ကို ဖျက်ဆီးပစ်ပြီး ရှောင်လင်းယွီအပေါ် သူ၏လွှမ်းမိုးမှုကို လျှော့ချရုံအပြင် မရှိတော့ချေ။

ယန်စစ်မင်ကို ထွက်သွားအောင် လုပ်နိုင်မှသာ သူ့အနေဖြင့် အခွင့်အရေးရလာမည်ဖြစ်သည်။

ကုန်းထျန်းဟောက်သည် စက်ဆုပ်ဖွယ်ကောင်းနေခြင်း မဟုတ်ပေ။ သူသည် အမှန်တရားကိုသာ ပြော.....အနည်းငယ်ချဲ့ကားထားသော အမှန်တရားကိုသာ ပြောခြင်းဖြစ်လေသည်။

သူ၏လှည့်ကွက်သည် အလုပ်ဖြစ်မည် မဖြစ်မည်ကို မသိသေးချေ။

သူသိသည်မှာ ရှောင်လင်းယွီ၏ စိတ်ကိုအပိုင်ရလိုလျှင် သူ့အနေဖြင့် အလေးနက်ထား ကြိုးစားရမည်ဖြစ်သည်။

***