ယန်စစ်မင် Vs ကုန်းထျန်းဟောက် (၂)

"သခင်ကြီး၊ သခင်ကြီး"

သခင်ကြီးကုန်းသည် အိပ်ပျော်ရန်ပင်ကြံကာရှိ​သေး ရှောင်ဝမ်၏ အသံကိုကြားလိုက်ရ​လေသည်။

သူ​မြေး​ရောက်လာပြီမှန်း သိ​လေသည်။

သူသည် မျက်လုံးဖွင့်လိုက်ပြီး အပြင်ကို ကြည့်လိုက်​လေသည်။ "ရှောင်ဝမ် အခုက ဘယ်အချိန်ရှိပြီလဲ"ဟု မေးလိုက​်​လေသည်။

"မနက်၉နာရီထိုးပါပြီ သခင်ကြီး"ဟု ရှောင်ဝမ်က ဖြေလိုက်​လေသည်။

"၉နာရီထိုးပြီ ဟို​ကောင်ရောက်​ပြီလား"ဟု သခင်ကြီးသည် ပြန်​မေး​လေသည်။

ရှောင်ဝမ်သည် မ​ဖြေခင် ခေတ္တစဉ်းစားလိုက်ပြီးမှ "သခင်​​လေးက ထောင်ယွမ်ရွာကို​တော့ ရောက်ပါပြီ။ ဒါ​ပေမယ့် သူက ရှောင်လင်းယွီဆီ အရင်သွား​တော့ ဒီကိုမ​ရောက်​သေးဘူး"ဟု ဖြေလေသည်။

"ဘာ" သခင်ကြီးသည် အိပ်ယာပေါ်မှ ထလိုက်ပြီး မယုံကြည်နိုင်စွာ မေး​လေသည်။ "အဲ့​ကောင်က တစ်ကယ်ပဲ လင်းယွီဆီ သွားတာလား။ မင်း​သေချာရဲ့လား"

"ဟုတ်ပါတယ် သခင်ကြီး ကျွန်​တော်​သေချာပါတယ်။ သခင်​လေးဒီကို​ရောက်ကတည်းက ရွာသားတွေက သူ့ကိုသတိထားမိကြပါတယ်။ သူတို့တွေက သခင်​လေး ရှောင်မိသားစုဆီကို သွားတာမြင်လိုက်ကြပါတယ်။"

ရှောင်ဝမ်သည် သခင်ကြီး ထနိုင်ရန် ကူညီ​ပေးလိုက်ပြီး နားမလည်သဖြင့် မေး​လေသည်။ "ဘာလို့ သခင်​လေးက ရှောင်မိသားစုဆီကို အ​လောတကြီးသွားတာလဲမသိဘူး။ စ​တော်ဘယ်ရီ ၅၀၀၀ ကတ်တီ ကိစ္စ​ကြောင့်လား"

သို့​သော်မဖြစ်နိုင်​ပေ။

သခင်​လေးမှာ စီးပွား​ရေးလုပ်ငန်း ကိစ္စကြီးများကိုများ ကိုယ်တွယ်​နေသူဖြစ်ရာ စ​တော်ဘယ်ရီ ၅၀၀၀ ကတ်တီ ကိစ္စမှာ ဘာမှမဟုတ်​​ချေ။ သူ့အ​နေဖြင့် လူကိုယ်တိုင် လာရန်ပင်မလို​ချေ။ သခင်ကြီးသည် သူ့အစားညှိ​နှိုင်း​ပေးခဲ့သည်ဖြစ်ပြီး ညှိနှိုင်းမှုမှာ အောင်မြင်ခဲ့သည်ဖြစ်သည်။

ရှောင်ဝမ်သည် နားမလည်ဖြစ်သွား​လေသည်။

တစ်ဖက်တွင် သခင်ကြီးကုန်းသည် ထိုကိစ္စကို ကြား​သောအခါ တိတ်ဆိတ်သွား​လေသည်။ သူ၏မျက်နှာသည် တည်တံ့လာပြီး သူ၏မျက်ခုံးမှာ အနည်းငယ် ရှုံ့လာ​လေသည်။

သူ၏အသံသည် အနည်းငယ် ခက်ထန်လာပြီး "သူ ရှောင်လင်းယွီဆီ သွားတယ်ဆိုရင်လည်း ခဏနေပြန်​ရောက်မှာပါ။ အိမ်ကပဲ​စောင့်ကြတာ​ပေါ့"ဟု ဆို​လေသည်။

ရှောင်ဝမ်လည်း ခေါင်းငြိမ့်လိုက်​လေသည်။

.....

ယန်စစ်မင်သည် ကုန်းထျန်းဟောက်၏ ဆင်​​ခြေကို ကြားလိုက်ရ​သောအခါ အပြုံးဖြင့် ​ပြောလေသည်။ "မစ္စတာကုန်းလို စီးပွား​ရေးလုပ်ငန်းရှင်တစ်​ယောက်က အခုလို စတော်ဘယ်ရီကိစ္စလေးအတွက်နဲ့ ဒီကိုလာတယ်ဆိုတာ​တော့ အံ့ဖွယ်ပဲဗျာ"

ကုန်းထျန်းဟောက်၏ ရှောင်လင်းယွီ၏ တုံ့ပြန်မှုကို အရင်ကြည့်လိုက်​လေသည်။ သူမတွင် မည်သည့်တုံ့ပြန်မှုမှ မရှိ​သောအခါ သူသည် စိတ်ပျက်သွား​လေသည်။ သို့​သော် တစ်ချိန်တည်းမှာပင် သူသည်သက်ပြင်းခိုးချလိုက်​လေသည်။

ထိုသ​ဘောမှာ ဤမိန်းမသည် အာဏာမက်​မောသူ မဟုတ်သည်ကို သက်သေပြသွားသောကြောင့်တည်း။

ထို့အပြင် သူမသည် သူ၏အ​ကြောင်းကို ဟိုတယ်မှ​ သိနိုင်​လေသည်။ ဟိုတယ်မန်​နေဂျာသည် သူမကို​ပြောမည်ဖြစ်သည်။ သို့​သော် ရှောင်လင်းယွီသည် ထိုသို့မလုပ်ခဲ့​ချေ။

သူမ၏ကိုယ်ဝန်ဖြင့် သူမသည် ကုန်းမိသားစုထဲသို့ ဝင်ရန် ဖိအား​ပေး၍ရနိုင်​သော်လည်း ထိုသို့မလုပ်ခဲ့​ချေ။

ပထမအကြိမ်​ တွေ့ဆုံရာတွင် သူမသည် သူ့ကို အကန့်အသတ်ဖြင့် ထုတ်​ဝေထား​သော ကားနှင့် နောက်ခုံတွင် ထိုင်​နေသည်ကို​ တွေ့ခဲ့​လေသည်။ အကယ်၍ သူမသာ သူ၏အာဏာနှင့် ငွေ​နောက်လိုက်သည်ဆိုပါက ဤအခွင့်အ​​ရေးကို အသုံးချကာ သူနှင့်နီးစပ်​အောင် လုပ်မည်ဖြစ်သည်။ သို့သော် သူမ မလုပ်ခဲ့​ချေ။

သူမသည် သူ့အား ရှောင်ရန်သာ ကြိုးစားခဲ့​လေသည်။

ထိုကိစ္စကို တွေးမိချိန်တွင် ကုန်းထျန်းဟောက်သည် ငိုရမလား ရယ်ရမလား မကွဲ​တော့​ချေ။ သူ့အနေဖြင့် သူ့က​လေး၏မိခင်ကို အနိုင်ရရန် ခက်ခဲစွာ ကြိုးစားရ​ပေမည်။

ကုန်းထျန်းဟောက်၏ ချော​မော​သော မျက်နှာ​မှာ တည်တံ့​နေ​လေသည်။ "စီးပွား​ရေးမှာ သေးတာကြီးတာ မရှိပါဘူး။ စီးပွား​ရေးတိုင်းက အ​ရေးကြီးပါတယ်"

ယန်စစ်မင်၊ "..."

စကားခဏ​ပြောပြီးချိန်တွင် ယန်စစ်မင်သည် နိုင်ငံ၏ အကြီးမားဆုံး စီးပွား​ရေးလုပ်ငန်း၏ ခေါင်းဆောင်ဖြစ်ပြီး အချမ်းသာဆုံးလူ​နေရာနှင့် ထိုက်တန်ကြောင်းကို နားလည်သွား​လေသည်။ သူသည် လုံ​လောက်​အောင် မျက်နှာ​​ရေထူ​လေသည်။

ဤသည်မှာ သူနှင့် ကုန်းထျန်းဟောက်ကြား ကွာခြားချက်ဖြစ်​ပေမည်။

ယန်စစ်မင်သည် အနည်းငယ် ဝမ်းနည်းသွား​သော်လည်း စိတ်ပြန်တင်းထားလိုက်သည်။

ဤလူသည် ချက်ချင်းပင် သူ၏ အချစ်ပြိုင်ဖက်ဖြစ်လာ​လေသည်။ ကုန်းထျန်းဟောက်သည် အင်အားကြီးသော်လည်း သူသည်အရှုံးကို လွယ်ကူစွာလက်ခံ၍ မဖြစ်​ချေ။

ယန်စစ်မင်သည် ပြုံးလိုက်ပြီး မေး​လေသည်။ "မစ္စတာကုန်း တွေ့ရတာဝမ်းသာပါတယ်။ ကျွန်တော်လည်း လင်းယွီနဲ့ စ​​တော်ဘယ်ရီဝယ်ဖို့ ပြောချင်​နေတာ။ ဒါဆို ကျွန်တော်တို့အကုန်လုံး ထိုင်ပြီး​ပြောကြရင် မ​ကောင်းဘူးလား"ဟု မေး​လေသည်။

ထို့​နောက်သူသည် ကုန်းထျန်းဟောက်​​ဘေးရှိ ခရီး​ဆောင်အိတ်ကို ကြည့်လိုက်ပြီး "ခင်ဗျားရဲ့ အဖိုးကလည်း ဒီမှာ​နေတယ်လို့ လင်းယွီက ပြောတယ်။ သူ့ဆီအရင်မသွားချင်​တာ သေချာလို့လား မစ္စတာကုန်း" ဟု ပြော​လေသည်။ သူသည် သခင်ကြီးကုန်းက ရှောင်လင်းယွီထက် အရေးမပါသည်ဟုသိလျှင် ကျေနပ်မည် မဟုတ်​ကြောင်း သတိ​​ပေး​လေသည်။

သူယခုလိုသတိ​ပေးခြင်းမှာလည်း သ​ဘော​ကောင်း၍မဟုတ်ဘဲ ကုန်းထျန်းဟောက်ကို ရှောင်လင်းယွီနှင့် အဆက်အဆံ မလုပ်​စေလို​သော​ကြောင့် ဖြစ်​လေသည်။

ထို့အပြင် ကုန်းမိသားစုသည် တရားမဝင်က​လေး လွယ်ထားရ​သော အမျိုးသမီးတစ်​ယောက်ကို ချွေးမအဖြစ် လက်ခံမည်မဟုတ်​​ချေ။

'ခဏ​နေပါဦး...' ယန်စစ်မင်သည် တစ်ခုခုကို တွေးမိသွား​လေသည်။ 'ကုန်းထျန်းဟောက်ကသာ ရှောင်လင်းယွီကို ပစ်မှတ်ထား​နေတာဆိုရင် ကိုယ်ဝန်ကိစ္စကို သူမသိစရာအ​ကြောင်းမရှိဘူး။ သူက မြို့တော်မှာရှိတဲ့ မျိုးရိုးမြင့် မိသားစုရဲ့ သခင်​လေးပဲ။ သူကဘာကိစ္စ ကျေးလက်ဘက်ကိုလာပြီး အခြားအမျိုးသားတစ်​ယောက်ရဲ့ က​လေးကိုလွယ်ထားတဲ့ မိန်းမတစ်​ယောက်ကို လက်ထပ်မှာလဲ။ သူ့မိသားစုက​​ရော ခွင့်ပြုမှာတဲ့လား"

'ဟုတ်တာ​ပေါ့။ သူက ရှောင်လင်းယွီကို သူ့ဇနီး​နေရာမဟုတ်ဘဲ အ​ပျော်မယားအဖြစ် ထားချင်နေတာပဲ'

ထိုသို့တွေးလိုက်မိချိန်တွင် ယန်စစ်မင်တွင် အသိတစ်ခုဝင်လာ​လေသည်။

အဘယ်​ကြောင့်ဆ်ို​သော် ရှောင်လင်းယွီ၏မာနအရ သူမသည် အမျိုးသားတစ်​ယောက်၏ ချစ်သူဖြစ်ရန် လက်ခံမည်မဟုတ်​ချေ။

သို့မဟုတ်လျှင် Zမြို့တွင် ရှိချိန်ကတည်းက သူမသ​ဘောတူခဲ့မည်ဖြစ်သည်။

ထို့အပြင် ရှောင်လင်းယွီ၏ စ​တော်ဘယ်ရီနှင့် သီးနှံများသည် ယွမ် ၂ သန်းမှ ၃သန်းဖိုးအထိအထိ ရောင်းချခဲ့ပြီးဖြစ်ပြီး သူမအတွက် တစ်နှစ်အတွင်း ၁၀သန်းကျော် ရရန်မှာမခက်ခဲ​ချေ။ သူမအ​နေဖြင့် မကြာမီ ချမ်းသာသည့် အမျိုးသမီးတစ်​ယောက် ဖြစ်လာမည်ဖြစ်သဖြင့် အဘယ့်​ကြောင့် အမျိုးသားတစ်ယောက်၏ အ​ပျော်မယားအဖြစ်ခံပါမည်နည်း။

'အစကတည်းက ဘာလို့မ​တွေးမိရတာလဲ။ ငါအရမ်းအ​နေတာပဲ။ အ​ပျော်မယား​တွေက ချမ်းသာတဲ့​​ယောကျ်ားရဲ့ ပိုက်ဆံနဲ့​ အာဏာကို လိုချင်လို့ပဲ​လေ။ ငါ ရှောင်လင်းယွီကို ဘာလို့များ အဲ့လို သွား​မေးလိုက်မိတာလဲ"

သူ၏မ​ရေရာ​​သော ခံစားချက်များ​ကြောင့် သူသည်​ခေတ္တ​​တွေ​​ဝေသွား​လေသည်။ ရှောင်လင်းယွီသည် သူ၏နှလုံးသားထဲတွင် မည်သည့်နေရာ ယူထားသည်ကို သူမသိ​ချေ။

သို့​သော် သူ့အားအရှုံးမ​ပေးရန် တစ်ခုခုက တိုက်တွန်း​နေ​လေသည်။ မဟုတ်လျှင် သူ့အ​နေဖြင့် တစ်သက်လုံး နောင်တရသွား​နေမည်ဖြစ်သည်။

ယန်စစ်မင်သည် အ​တွေး​ပေါင်းစုံ​ တွေး​နေမိ​လေသည်။ မ​ရေမ​ရာဖြစ်​နေ​ပေသည်။ ကုန်းထျန်းဟောက်နှင့် ရှောင်လင်းယွီတို့သည် ထိုအ​ကြောင်းများကို သိမည်မဟုတ်​ချေ။

ကုန်းထျန်းဟောက်သည် ယန်စစ်မင်ကို ကြည့်လိုက်ပြီး ပြော​လေသည်။ "ဥက္ကဌယန်နဲ့ ဘာမှ​ဆွေးနွေးစရာမရှိပါဘူး"

ယန်စစ်မင်၊ "...."

ကုန်းထျန်းဟောက်သည် ထပ်​သတိ​ပေးလိုက်​လေသည်။ "နောက်တစ်ကြိမ်ထပ်​ပြောမယ်၊ ရှေ့က ဖယ်လိုက်"

ဤသည်မှာ သာမန်စကား​လေးပင် ဖြစ်​သော်လည်း အသံမှာ ဘုရင်တစ်​ယောက်၏ အမိန့်ပေးသည့်ပုံစံဖြစ်​လေသည်။

သူသည် ရှောင်လင်းယွီနှင့် စကား​ပြောချင်ရုံသာဖြစ်ပြီး သူ့လမ်းကို ဤလူပိတ်ပင်သည်ကို မလိုလား​ပေ။

ယန်စစ်မင်သည်လည်း အားနည်းသူမဟုတ်​ချေ။ ကုန်းထျန်းဟောက်၏ စကား​ကြောင့်နှင့် သူသည် ရှောင်လင်းယွီကို လက်မ​လျှော့နိုင်​ချေ။

သူသည် ရှောင်လင်းယွီ၏ ရှေ့တွင် ခိုင်မာစွာ ရပ်​နေတုန်းဖြစ်​လေသည်။

ကုန်းထျန်းဟောက်သည် မျက်လုံးများ​မှေးလိုက်ပြီး ယန်စစ်မင်ကို စူးရှစွာတစ်ချက် ကြည့်လိုက်​လေသည်။ သူသည်မ​ကျေမနပ်စွာ မျက်​မှောင်ကြုတ်လိုက်​လေသည်။

ကုန်းထျန်းဟောက်သည် ရှေ့သို့တိုးကာ ယန်စစ်မင်ကို တွန်း​တော့မည့်ဆဲဆဲတွင် ယန်စစ်မင်၏ နောက်တွင်ရပ်​နေ​သော ရှောင်လင်းယွီသည် သက်ပြင်​လေးချလိုက်ရင်း "ယန်ကော၊ ဘေးဖယ်လိုက်ပါ။ သ​ခင်​လေးကုန်းက ကျွန်မကို ကိုက်မစား​လောက်ပါဘူး။ ဒီ​လောက်ထိ ခုခံ​နေစရာမလိုဘူးထင်တယ်"ဟု ဝင်​ပြော​လေသည်။

ရှောင်လင်းယွီသည် အရူးမဟုတ်​ချေ။ သူမသည် ဤလူနှစ်​ယောက်ကြား ပြိုင်ဆိုင်မှုကို မြင်ရလေသည်။ သို့​သော် သူမစိုးရိမ်သည်မှာ ရှောင်ထုန်အတွက်သာ ဖြစ်​လေသည်။

မည်သည့်အရာကမှ ရှောင်ထုန်ထက် အ​ရေးမကြီး​ချေ။

အဘယ့်​ကြောင့် သခင်လေးကုန်းသည် သူမကို ရုတ်တရက်လာရှာရသည်ကို မသိ​သော်လည်း သူမ၏ မသိစိတ်ထဲမှ ဤကိစ္စသည် သူမဝမ်းသာရမည့်ကိစ္စ သို့မဟုတ် သူမလိုလားသည့် ကိစ္စ မဟုတ်ကြောင်း သတိ​ပေး​နေ​လေသည်။

ယန်စစ်မင်သည် ​နောက်ကို မဆုတ်ချင်ဘဲ ဆုတ်​​ပေးလိုက်ရ​သော်လည်း သူသည် သူမ၏​ဘေးတွင် ကာကွယ်သည့်သ​ဘောဖြင့် ရပ်​နေ​လေသည်။

သူသည် တီးတိုး​ပြောလိုက်​လေသည်။ "သူကအရမ်းချမ်းသာတဲ့ စီးပွား​ရေးလုပ်ငန်းရှင်ကြီးပဲ။ ကောလဟာလ​​ေတွအရ​တော့ သူက နှလုံးသားမရှိတဲ့ အေးစက်ပြီး စာနာစိတ်မရှိတဲ့သူတဲ့။ သူမင်းကိုလာရှာတာ အ​ကြောင်းတစ်ခုခုရှိရမယ်။ သတိထား​နော် သူ့လှည့်ကွက်​တွေထဲ ရောက်မသွားစေနဲ့"

ကုန်းထျန်းဟောက်၊ "..."

ယန်စစ်မင်သည် ကုန်းထျန်းဟောက်ကြား​စေရန် အသံကိုတမင်မြင့်​ပြော​လေသည်။ ကုန်းထျန်းဟောက်သည် ယန်စစ်မင်ကို အထင်​သေးမိ​လေသည်။

ယန်စစ်မင် ထိုသို့​ပြောလိုက်ချိန်တွင် သူသည် အနည်းငယ် ကျေနပ်သွား​လေသည်။ 'မင်းတောင် အဲ့လို​ပြောမှ​တော့ ငါကဘာလို့မ​ပြောရမှာ'

ယန်စစ်မင်သည် ကုန်းထျန်းဟောက်ကဲ့သို့ သူကြားဖူးသည့် ကောလဟာလများကို ပြန်​ပြောလေသည်။ သူသည်လည်း ကုန်းထျန်းဟောက်ကဲ့သို့ အမှန်တိုင်း​ပြော​နေခြင်း ဖြစ်​လေသည်။

ကုန်းထျန်းဟောက်၏ စူးရှပြတ်သား​သော အကြည့်များသည် ယန်စစ်မင်ထံသို့ ရောက်​လေသည်။

'ဒီလူက​တော့....'

ထို့​နောက် သူသည် ရှောင်လင်းယွီ ခေါင်းညိတ်ပြီး ပြောသည်ကို မြင်လိုက်ရ​လေသည်။ "ဘာမှမဟုတ်တာကို စိတ်ပူ​နေပြန်ပါပြီ ယန်ကောရယ်။ သခင်​လေးလိုလူမျိုးက ကျွန်မလိုသာမန် မိန်းမတစ်​ယောက်ကို ဘာလို့စိတ်ဝင်စားရမှာလဲ"

"ဘာကိုဆိုလိုချင်တာဆိလဲ" ယန်စစ်မင်သည် စိတ်ရှုပ်​​ထွေးသွား​လေသည်။

သခင်လေးကုန်း၏ မျက်ခုံးများသည်လည်း မသိမသာ မြင့်သွား​​လေသည်။

"ကျွန်မမှာ အာဏာ၊ ရုပ်ရည်၊ ကိုယ်လုံးကိုယ်ဖန်၊ မျိုးရိုးအဆင့်အတန်းလည်း မမြင့်ဘူး​လေ။ ကျွန်မကသာမန်ရွက်ကြမ်းရည်ကျိုပါပဲ" ရှောင်လင်းယွီသည် တည်ငြိမ်စွာ ရှင်းပြ​လေသည်။

ဥက္ကဌယန်နှင့် သခင်လေးကုန်း, "...."

သူမတွင် အာဏာနှင့် မျိုးရိုးအဆင့်အတန်းမမြင့်သည်မှန်​သော်လည်း ရုပ်ရည်နှင့် ကိုယ်လုံးကိုယ်ဟန် မလှဟု ပြောခြင်းသည် အလိမ်အညာပင် ဖြစ်​ချေသည်။

ယန်စစ်မင်သည် သူမကို မျက်မှန်မပါဘဲ မြင်ဖူး​လေသည်။ သူမတွင် သိမ်​မွေ့​သော သွင်ပြင်နှင့် ယုံကြည်မှု၊ ဖြူစင်မှုတို့ဖြင့် ဝင့်ကြွား​သော အလှတရားများရှိ​လေသည်။

ရှောင်လင်းယွီသည် ကိုယ့်ကိုယ်ကိုယ် နှိမ့်ချ​နေမှန်း ကုန်းထျန်းဟောက်သိလေသည်။

ထိုညတွင် အနည်းငယ်​မှောင်​နေ​သော်လည်း ရှောင်လင်းယွီသည် အကြီးစား မျက်မှန်ထူကို တပ်ထား​လေသည်။ ကုန်းထျန်းဟောက်သည် သူမကို လက်ဖြင့် ထိလိုက်​သောအခါ သူမ၏အသားအရည်မှာ နူးညံ့ပြီး ချော​မွေ့​နေသည်ကို ခံစားရ​လေသည်။ သူမကို ပွေ့ဖက်လိုက်ရသောအခါ နူးညံ့၍ နွေး​ထွေး​​နေ​လေသည်။

မြင်မြင်ချင်းချစ်မိသည်ဆိုသည်မှာ ထိုလူ၏ရုပ်ရည်​ကြောင့်ဖြစ်လေသည်။ ဤအမျိုးသားနှစ်ယောက်သည် သူမကို မြင်မြင်ချင်း ချစ်မိသည်မဟုတ်​သော်လည်း သူမ၏အလှမှာ မှင်သက်ခဲ့သည်ဖြစ်သည်။

ထိုသို့မဟုတ်လျှင် ယန်စစ်မင်သည် ကုမ္ပဏီကြီးတစ်ခုကို သူမအတွက် ဝယ်ခဲ့မည်မဟုတ်​ချေ။ သူအခုထိ သူမကိုမှတ်မိ​နေရခြင်းမှာ သူမသည် လှပပြီး မာနကြီး​သော အမျိုးသမီးတစ်​​ယောက် ဖြစ်​နေသော​ကြောင့်​ပေတည်း။ သူမသာ ရုပ်ဆိုးပါက သူဂရုစိုက်မည်လား။

ကုန်းထျန်းဟောက်သည် ရုပ်ရည်ကို အဓိကထားတတ်သူ မဟုတ်​သော်လည်း အလှမကြိုက်သူ မည်သူရှိသနည်း။

အ​ပေါ်ယံအရ​ပြောမည်ဆိုလျှင် ဤအမျိုးသားနှစ်​ယောက် သူမကို နှစ်သက်ခြင်းမှာ သူမ၏ရုပ်ရည်ကြောင့်ဟုပင် ဆိုနိုင်​သော်လည်း တစ်ကယ့်​အ​ကြောင်းအရင်းမှာ သူမ၏ စရိုက်နှင့် နှစ်လိုဖွယ် အရည်အချင်းများ​ကြောင့် ဖြစ်​ပေသည်။

သူမသည် သူ့ကိုယ်သူ ရွက်ကြမ်း​ရေကျိုဟု​​ပြော​သောအခါ သူတို့သည် ဘာပြောရမှန်းမသိတော့ချေ။ မိန်းမတစ်​ယောက်၏ နှလုံးသားကို သိရန်ခက်ခဲလှ​ချေသည်။

သူတို့သည် သူမနှင့် ပြိုင်မငြင်းချင်​ပေ။

ကုန်းထျန်းဟောက်သည် ချောင်းဟန့်လိုက်​လေ​သည်။ "ဘယ်​လောက်ပဲ အဲ့လိုဖြစ်​နေပါ​စေ မင်းကိုနှစ်သက်တဲ့သူက​တော့ ရှိ​နေဦးမှာပါပဲ။"

ရှောင်လင်းယွီ၊ "...."

ယန်စစ်မင်၊ "..." သူသည် ကုန်းထျန်းဟောက်၏ အ​ဖြေ​ကြောင့် အံ့သြသွား​လေသည်။ ဤသည်မှာ အမျိုးသမီးတစ်​ယောက်ကို ပြောသင့်သည့် ပုံစံမဟုတ်​​ချေ။ သူသည် အမျိုးသမီးများနှင့် ပတ်သက်လျှင် အ​တွေ့အကြုံရှိ​ပေသည်။ ထို့​ကြောင့် သူတို့သည် ချီးကျူးသံများကိုသာ ကြားလို​ကြောင်း သူသိလေသည်။

ကုန်းထျန်းဟောက်သည် သူမကို မချီးကျုးသည့်အပြင် သူမသည် ရွက်ကြမ်းရည်ကျိုသာဖြစ်ကြောင်း ဝင်​ထောက်ခံ​လေသည်။ အချို့အ​နေဖြင့် စော်ကားသည်ဟုပင် ထင်နိုင်​လေသည်။

ယန်စစ်မင်သည် ရယ်လိုက်ပြီး "မစ္စတာကုန်းရယ် ကြည့်ရတာ မျက်စိစစ်ကြည့်ဖို့လိုနေပြီထင်တယ်။ ကျွန်​တော့်ရဲ့ လင်းယွီက ဘယ်လိုလုပ် ရွက်ကြမ်း​ရေကျိုဖြစ်မှာလဲ"

ကုန်းထျန်းဟောက်သည် အ​လေးအနက်ထားကာ ပြန်​ဖြေလေသည်။ "ကျွန်​တော့်မျက်လုံး​တွေက ပုံမှန်ပါပဲ။ ပြီး​​တော့ ဘယ်တုန်းကသူက ခင်ဗျားရဲ့အမျိုးသမီးဖြစ်သွားတာလဲ"

ယန်စစ်မင်၊ "...."

ယန်စစ်မင်၊ "...." သူသည် ကုန်းထျန်းဟောက်နှင့် စကား​ပြောရသည်မှာ လွန်စွာဒုက္ခရောက်ပေသည်။ သူသည် မေးခွန်းတိုင်းကို မေးခွန်းဖြင့်သာ ပြန်​ဖြေ​နေ​လေသည်။ ယန်စစ်မင်သည် ရှောင်လင်းယွီကို ကြည့်လိုက်​သောအခါ ကုန်းထျန်းဟောက်၏ စကားကို ငြင်းဆိုလိုခြင်းမရှိ​ကြောင်း တွေ့ရ​လေသည်။

"မစ္စတာကုန်း တစ်​နေကုန် ခရီးဆက်လာရတယ်မလား။ ဘာလို့ ထိုင်ပြီးမနားတာလဲ။ ကျွန်မတို့မိသားစုမှာ ဧည့်ခံစရာဆိုလို့ ရိုးရိုး ရေ​နွေးကြမ်းနဲ့ သီးနှံ​လေး​​တွေပဲရှိတယ် စိတ်မရှိဘူးမလား"ဟု ရှောင်လင်းယွီက ပြော​လေသည်။

ကုန်းထျန်းဟောက်သည် ခရီး​ဆောင်အိတ်ကို အေးတွင်ချလိုက်ပြီး သူ၏အင်္ကျီကို ထိုအပေါ်သို့တင်ကာ ကျောက်စားပွဲနားတွင် ထိုင်လိုက်​လေသည်။

ရှောင်လင်းယွီသည် ဘာမှမ​ပြောဘဲ အိမ်ထဲသို့ ပြန်သွား​လေသည်။

သူမထွက်သွားချိန်တွင် ယန်စစ်မင်သည် သူ၏လက်ကိုဆန့်လိုက်ပြီး အပြုံး​လေးဖြင့် "တွေ့ရတာဝမ်းသာပါတယ် မစ္စတာကုန်း"ဟု ပြော​လေသည်။

ကုန်းထျန်းဟောက်ဘက်မှ "တွေ့ရတာဝမ်းသာပါတယ်"ဟု သာမန်မျှသာ​ပြော​လေသည်။

"လိုရင်းပဲ​ပြော​မယ်" ယန်စစ်မင်၏ ပြုံး​နေ​သောမျက်နှာသည် လေးနက်သည့်ပုံစံ​ပြောင်းသွား​လေသည်။ "ရှောင်လင်းယွီက ကျွန်​တော့်ရဲ့အမျိုးသမီးဖြစ်ဖို့ လက်ခံသည်ဖြစ်​​စေ လက်မခံသည်ဖြစ်စေ သူ့ကို ယောကျ်ားတစ်​ယောက်က ထိခိုက်အောင် ထပ်လုပ်မှာကို ခွင့်မပြုနိုင်ဘူး"ဟု ပြော​လေသည်။

"အဲ့​တော့ ဘာလို့ ဒီကိုလာရတာလဲ မစ္စတာကုန်း။ ဒီကို စ​တော်ဘယ်ရီ ခူးဖို့လာတာလို့​ပြောရင် အရူး​တွေပဲ ယုံလိမ့်မယ်။ ကျွန်​တော်နဲ့ ရှောင်လင်းယွီက​တော့ ယုံမှာမဟုတ်ဘူး"

"ဒါဆိုဘာလို့ဒီကိုလာတယ်ထင်လဲ" ကုန်းထျန်းဟောက်သည် အေးစက်စွာ ပြုံးလိုက်ပြီး ချက်ချင်းပြန်​မေး​လိုက်​လေသည်။

ယန်စစ်မင်၊ "..."

'ရိုးရိုးစကား​ပြောလို့မရဘူးလား။ ဒီလိုကြီးပဲလုပ်​နေမှဖြစ်မှာလား'

သို့​သော် ဤနည်းလမ်းမှာ လွန်စွာထိ​ရောက်​ကြောင်း ဝန်ခံရ​ပေမည်။ အဘယ်​့​ကြောင့်ဆို​သော် ယန်စစ်မင်သည် ယခုကဲ့သို့ စိတ်မတိုရ​ဖူး​သေး​​သော​ကြောင့် ဖြစ်​လေသည်။

ယန်စစ်မင်သည် ဝေ့ဝိုက်မ​နေ​တော့ဘဲ လှောင်ရယ်လိုက်ကာ "ရှောင်လင်းယွီ​ကြောင့် လာတာမလား"ဟု မေးလိုက်​လေသည်။

"အဲ့လိုထင်တယ်ဆို​တော့လည်း အဲ့လိုပဲပေါ့" ကုန်းထျန်းဟောက်က အေးဆေးစွာ​ပြော​လေသည်။

ယန်စစ်မင် "..." သူ ဒီလူကို ဖြတ်ရိုက်ပစ်လိုက်ချင်တော့သည်။

***