ကုန်းထျန်းဟောက်၏ သတိ​ပေးခြင်း

ကုန်းမိသားစုဆီ ပြန်ရောက်သောအခါ တခြားသူများသည် သီးသန့်စကား​ပြောနိုင်​​စေရန် သခင်ကြီးကုန်း နှင့် သခင်ကြီးယန်တို့ကို ထားခဲ့လိုက်လေသည်။ အခြားသူများသည် ကိုယ်လုပ်စရာရှိသည်များကို လုပ်​နေကြ​​လေသည်။

အခန်းထဲတွင် တစ်ယောက်မှမရှိသည့် အချိန်တွင် သခင်ကြီးယန်သည် စိုးရိမ်တကြီးမေးလေသည်။ "​​ခေါင်း​ဆောင် ရှောင်လင်းယွီကို လိုက်ဖို့ ထျန်းဟောက်ကို ဘာလို့ထောက်ခံတာလဲ။ ရှောင်လင်းယွီရဲ့ အခြေအနေအကြောင်း သိရဲ့သားနဲ့။ သူက အမည်မသိလူတစ်ယောက်ရဲ့ ကလေးကို လွယ်ထားရတာ။ ရှောင်လင်းယွီက ကုန်းမိသားစုနဲ့ လက်ထပ်မယ်ဆိုရင် မြို့တော်ကလူတွေအတွက် ဟာသဖြစ်​​နေမှာ"

"ဟာသလား။ ကုန်းမိသားစုကို ဘယ်သူက ရယ်ဝံ့တာလဲဆိုတာ ငါကြည့်ချင်တယ်။ ငါ့မြေးလေးက ရှောင်လင်းယွီကို သဘောကျတဲ့အတွက် ရှောင်လင်းယွီရဲ့ ဗိုက်ထဲကကလေးကို ကုန်းမိသားစုရဲ့ မြစ်အဖြစ် လက်ခံသွားမယ်။" ထိုအချိန်တွင် သခင်ကြီးကုန်းသည် သူ့ကို စိုက်ကြည့်ကာ "ယန်ကျန့်၊ နောက်နောင် ဒါကို ထပ်မပြောပြနဲ့။ ငါမကြားချင်ဘူး"ဟု ပြော​လေသည်။

အမည်မသိသူတစ်ဦး၏ ကလေးဆိုသည်မှာ ကလေးကို မျိုးမစစ်အစား ယဉ်ကျေးစွာ ခေါ်ဝေါ်သည့် နည်းလမ်းဖြစ်သည်။

'ကုန်းမိသားစုရဲ့ ကလေးကို ဘယ်သူက မျိုးမစစ်လို့ ခေါ်မှာလဲ။ ငါ့ကောင်စုတ်လေးက လင်းယွီကို အနာဂတ်မှာ အပိုင်ရရင် မင်းအားလုံး အမှန်တရားကို သိလိမ့်မယ်'

ယန်ကျန့်သည် သခင်ကြီးကုန်း တွေး​နေသည်များကို မသိ​နိုင်​​ပေ။

သို့သော် သခင်ကြီးကုန်း၏ သတိပေးချက်ကို သူ သတိပြုမိလေသည်။

သခင်ကြီးကုန်းသည် သူ့မြေးဖြစ်သူက ကိုယ်ဝန်ရှိနေသည့် အမျိုးသမီးကို လိုက်ရန် အဘယ်ကြောင့် ထောက်ခံသည်ကို သူနားမလည်​ပေ။

သို့သော် သူ၏မြေးအရင်းဖြစ်သူ ရှောင်လင်းယွီကို လိုက်သည့်အချက်ကို သူကန့်ကွက်ခဲ့သည်။

သခင်ကြီးယန်သည် သက်ပြင်းချလိုက်ပြီး "ခေါင်း​ဆောင် ဆုံးဖြတ်ချက်ချပြီးပြီမို့ ဒီကိစ္စကို ဆက်မပြောတော့ပါဘူး"ဟု ပြော​လေသည်။

ထို့နောက် နှစ်ယောက်သားသည် အတိတ်ကို ပြန်လည် သတိရလာကြသည်။ စစ်တပ်ကထွက်ပြီးချိန်ကတည်းက ဘာတွေဖြစ်ခဲ့သနည်း...

အပြင်ဘက်တွင် ကုန်းထျန်းဟောက်သည် ခြံဝင်းအတွင်း သစ်ပင်ကြီးတစ်ပင်အောက်ရှိ ကျောက်စားပွဲတစ်ခု၌ ထိုင်နေ​လေသည်။ လက်ဖက်ရည်တစ်ခွက် သူ့ရှေ့တွင် ချထား​လေသည်။

ကုန်းထျန်းဟောက်သည် တစ်ငုံသောက်လိုက်ပြီး အနည်းငယ် မျက်မှောင်ကြုတ်လိုက်​လေသည်။

ဤလက်ဖက်ရည်သည် အကောင်းဆုံး လက်ဖက်ရွက်နဲ့ ချက်ထားမှန်း သိသာထင်ရှားသော်လည်း ရနံ့သည် ရှောင်မိသားစု၏ လက်ဖက်ရည်ထက် မွှေးခြင်းမရှိ​ပေ။

ယန်စစ်မင်သည် ကုန်းအိမ်သို့ ရောက်ပြီးနောက် ကုန်းထျန်းဟောက်နှင့် အတူမထိုင်မီ ပတ်ပတ်လည်ကို ကြည့်လိုက်သည်။

ယန်ရူယွီသည် ဤလူများ သူမကိုပေး​နေသည့် ဖိနှိပ်ချုပ်ချယ်သည့် အငွေ့အသက်ကို မခံနိုင်သော​ကြောင့် အမြန်ထွက်ပြေးခဲ့လေသည်။

ကုန်းမိသားစုဝင်းထဲရှိ သစ်ပင်ကြီးအောက်မှာ လူငယ်နှစ်ယောက်.ထိုင်​နေ​လေသည်။ တစ်ယောက်သည် ချောမော၊ ရဲရင့်ပြီး နောက်တစ်ယောက်မှာ ပြေပြစ်ပြီး နှစ်လိုဖွယ်ကောင်းပေသည်။ တစ်ဦးမှာ မီးခိုးရောင်ရှပ်အင်္ကျီကို အနက်ရောင် အ​နောက်တိုင်းဝတ်စုံနှင့် မီးခိုးရောင် လည်စည်းကို ဝတ်ဆင်ထား​လေသည်။ နောက်တစ်ယောက်မှာ အင်္ကျီအနီနှင့် လည်စည်းနီကို ၀တ်ထားလေသည်။ သူတို့နှစ်ယောက်မှာ ပန်းချီကားတစ်ချပ်ကဲ့သို့ လှပ​လေသည်။

ယန်စစ်မင်သည် သူ့လက်ထဲရှိ လက်ဖက်ရည်ခွက်ဖြင့် ကစား​နေလေသည်။ သူ့ပါးစပ်ထောင့်သည် ကွေးသွားကာ မဲ့ပြုံး ပြုံးလိုက်ကာ "ကုန်းထျန်းဟောက်၊ ခင်ဗျားက မြို့တော်ရဲ့ သခင်​လေးပဲ။ လိုချင်တဲ့ မိန်းမကို ရနိုင်တယ်။ ဒါ​ပေမယ့် ဘာလို့ ရှောင်လင်းယွီကို စိတ်ဝင်စားရတာလဲ။"ဟု မေး​လေသည်။

ကုန်းထျန်းဟောက်၏ စူးရှသော မျက်လုံးများသည် ဝေ့လိုက်ပြီး "ယန်စစ်မင် ခင်ဗျားက Zမြို့ ရဲ့ သခင်လေးပဲ။ လိုချင်တဲ့ မိန်းမမှန်သမျှ ရနိုင်နေတာကို ဘာလို့ ရှောင်လင်းယွီကို စိတ်ဝင်စားတာလဲ။"ဟု ပြန်​မေး​လေသည်။

ယန်စစ်မင် "..." 'ငါတို့ စကားကောင်းကောင်းပြောလို့မရဘူးလား။'

မေးခွန်းတစ်ခုမေးတိုင်း ကုန်းထျန်းဟောက်သည် တစ်ခု ပြန်​မေး​လေသည်။

ယန်စစ်မင်သည် သက်ပြင်းချလိုက်ပြီး "တကယ်ပဲ ကျွန်တော့်လို အဆင့်ရှိတဲ့ လူတစ်ယောက်က ရှောင်လင်းယွီကို ဘာလို့ကြိုက်တာပါလိမ့်။ ဘယ်လိုထင်လဲ?"ဟု ဖြေ​လေသည်။

ကုန်းထျန်းဟောက်သည် သူ့ကို လျစ်လျူရှုလိုက်​လေသည်။

ယန်စစ်မင်သည် "ကုန်းထျန်းဟောက်အ​နေနဲ့ ရှောင်လင်းယွီကို ဘယ်အချက်​တွေ ကြည့်ပြီး သ​​​ဘောကျတာလဲဆိုတာ ပြောပြပေးနိုင်မလား"ဟု မေး​လေသည်။

'ဒါဆို ဒီအချက်တွေကို ပြောင်းလဲဖို့ လင်းယွီကို ငါပြောလို့ရနိုင်တယ်။' သူသည် ထိုသို့ တွေး​နေသည်ကို ကုန်းထျန်းဟောက်ကို မပြောချေ။

ကုန်းထျန်းဟောက်သည် ထက်မြက်သူဖြစ်သည်။ ထို​ကြောင့် သူသည် ယန်စစ်မင်၏ အစီအစဥ်ကို မမြင်နိုင်စရာ အ​ကြောင်းမရှိ​​​ချေ။

သူက အေးဆေးတည်ငြိမ်စွာပြောလိုက်​လေသည်။ "သူနဲ့ပတ်သက်တဲ့ အရာမှန်သမျှ သ​ဘောကျတယ်"

ယန်စစ်မင် "..."

ယန်စစ်မင်သည် "ကုန်းထျန်းဟောက်၊ ရှောင်လင်းယွီကို တကယ်လိုက်ချင်နေတာလား။ ခင်ဗျားရဲ့အဆင့်အတန်းအရ ရှောင်လင်းယွီရဲ့ဗိုက်ထဲကကလေးကို တကယ်စိတ်မရှိဘူးလား"ဟု မေး​လေသည်။

ကုန်းထျန်းဟောက်သည် မျက်လုံး အနည်းငယ် ပင့်လိုက်ပြီး ယန်စစ်မင်ကို အထင်အမြင်သေးသော အကြည့်ဖြင့် အရိပ်အမြွက်ဖြင့် ကြည့်လိုက်​လေသည်။

"သူ့ကိုလိုက်ဖို့ဆုံးဖြတ်ထားပြီးသားဆိုတော့ က​လေးကိုလည်း စိတ်မရှိပါဘူး" သူ့ကလေးကို လွယ်ထားသည်ဖြစ်ရာ အဘယ်ကြောင့် သူစိတ်ရှိရမည်နည်း။

ကုန်းထျန်းဟောက်သည် "ဘာလို့လဲ။ သခင်ကြီးယန်က အဲဒီလောက်သိသိသာသာ ဝန်ခံထားပြီးသားဆိုတော့ စိတ်ထဲရှိတာဘဲမလား?"ဟု မေး​လေသည်။

ဤမေးခွန်းကို မမေးသင့်သည်ကို သူသိလေသည်။ နောက်ဆုံးတွင် သူ့ဘက်သို့ မြားဦးလှည့်လာ​ပေသည်။

ယန်စစ်မင်သည် ရယ်လိုက်ပြီး "ဟုတ်ပါတယ်၊ ကျွန်တော် စိတ်မရှိပါဘူး"ဟု ပြော​လေသည်။

ကုန်းထျန်းဟောက် သည် ထိုစကားကိုကြားသောအခါ သူ့နှုတ်ခမ်းများသည် ပြုံးယောင် သမ်းသွားလေသည်။ သူ့မျက်လုံးများတွင် လှောင်ပြောင်မှုများနှင့် ပြည့်နေသော်လည်း သူ့စကားများက ဝင့်ကြွားမှုများနှင့် ပြည့်နေ​လေသည်။ "ဟုတ်တယ်။ ခင်ဗျားစိတ်မရှိဘူး။ ဒါပေမယ့် သခင်ကြီးယန်က​ရော။ ကျွန်တော့် အဖိုးကတော့ စိတ်မရှိတဲ့အပြင် အပြည့်အဝ ထောက်ခံတယ်။တကယ်တော့ သူက ကျွန်​တော် ရှောင်လင်းယွီကို လက်မထပ်နိုင်ဘူးဆိုရင် ကျွန်တော့်အဖိုးကိုယ်တိုင်က ကျွန်တော့်ကို ကုန်းမိသားစုထဲက ထုတ်ပစ်လိမ့်မယ်!" သူ့စကားသည် လွန်စွာလေးနက်လေသည်။

ယန်စစ်မင်၏ မျက်နှာပေါ်ရှိ အပြုံးသည် တဖြည်းဖြည်း မှိန်ဖျော့လာသည်။ မျက်ခုံးပင့်လိုက်ပြီး သူ့အမူအရာသည်လည်း လေးနက်လာသည်။

'သခင်ကြီးကုန်းက ရှောင်လင်းယွီကို ဒီလောက်ထိ သ​ဘောကျတာလား။ သူ့မြေးထက် သူ့ကို ပိုသ​ဘောကျလို့လား'

တစ်စုံတစ်ခု မှားနေပြီဟု ခံစားရသော်လည်း မည်သည့်အရာဖြစ်သည်ကို သူမသိနိုင်ပေ။ ထို့​​ကြောင့် သူသည် ဒီကိစ္စကို ခဏထားလိုက်​လေသည်။

သူ၏ လက်ရှိပြဿနာမှာ အင်အားကြီးမားသော အချစ်ပြိုင်ဖက်ကို မည်သို့ရင်ဆိုင်ဖြေရှင်းရမည်ကို စဉ်းစားရန်ဖြစ်သည်။

ကုန်းထျန်းဟောက်သည် သခင်ကြီးကုန်း၏ ပံ့ပိုးမှုဖြင့် ရှောင်လင်းယွီကို လိုက်ခဲ့သည်။ ရှောင်လင်းယွီကို အဆင့်အတန်းနှင့် အာဏာကြောင့် ရွေးချယ်လိမ့်မည်ဟု ယန်စစ်မင် မထင်ထားသော်လည်း ကုန်းမိသားစုသည် ၄င်းတို့၏ သြဇာများကို အသုံးချနိုင်လေသည်။

သို့​သော် သူတို့သည် ရိုးသားသော်လည်း နောက်ဆုံးတွင် ရှောင်လင်းယွီသည် ဤလူ၏ ရင်ခွင်ထဲသို့ ရောက်သွားနိုင်​လေသည်။

တစ်ဖက်တွင် ယန်စစ်မင်သည် ရှောင်လင်းယွီ ကိုလိုက်ရန် လအနည်းငယ်ရခဲ့သော်လည်း သူသည် သူ၏ဆန္ဒကို ဆန့်ကျင်ပြီး ရှောင်လင်းယွီသည် သူ့ချစ်သူဖြစ်လာလိမ့်မည်ဟု မျှော်လင့်ခဲ့သည်။

သို့သော် သူသည် ချစ်သူ မရမီတွင် သူသည် အချစ်ပြိုင်ဘက်ရခဲ့သည်။

သူရဲ့ အချစ်ပြိုင်ဖက်သည် အာဏာရှိလွန်းသူဖြစ်သဖြင့် သူသည် ထိတ်လန့်ပင်လာ​ချေပြီဖြစ်သည်။

ပြိုင်ဆိုင်မှုသည် အမြဲတမ်း ကြီးမားသော တွန်းအားတစ်ခုဖြစ်သည်။

ယခုတွင် ရှောင်လင်းယွီကို သူ့ဇနီးဖြစ်စေချင်မိ​လေသည်။

သို့သော် ကြီးမားသော အတားအဆီးနှစ်ခုရှိ​လေသည်။ တစ်ခုမှာ ကုန်းထျန်းဟောက် ဖြစ်ပြီး ကျန်တစ်ယောက်မှာ သူ့အဖိုးဖြစ်​လေသည်။

ထို့​ကြောင့် လူတော်တော်များများသည် သူ၏ အတားအဆီး ဖြစ်လာလေသည်။ သူ့အဖိုး၏ တိတ်ဆိတ်မှုသည် သ​ဘောမတူဟု ပြောခြင်းဖြစ်​လေသည်။

သူ၏ မကျေနပ်မှုသည် ယန်မိသားစု၏ မကျေနပ်မှုဟုလည်း သတ်မှတ်နိုင်​လေသည်။

သို့သော် ထိုကိစ္စများသည် အရေးမကြီးပေ။

ဤအချစ်ပြိုင်ဖက်ကို အနိုင်ယူနိုင်ပါက အရာအားလုံးသည် အနာဂတ်တွင် ပြေလည်သွားနိုင်လေသည်။

ယန်စစ်မင်သည် ခပ်ဖျော့ဖျော့ပြုံးပြီး " သခင်လေးကုန်း အဲ့အတွက် စိတ်ပူစရာမလိုပါဘူး"ဟု ပြောလိုက်လေသည်။

သို့သော်လည်း ကုန်းထျန်းဟောက်သည် လှောင်ပြောင်ပြီး "စိတ်မပူနဲ့ဟုတ်လား သခင်လေးယန်။ ခင်ဗျားအတွက် စိတ်မပူပါဘူး။ ဒါပေမယ့် ပတ်ဝန်းကျင်က လူတွေအတွက် ငါ စိတ်ပူတယ်!" ထိုအချိန်တွင် သူ၏အမူအရာမှာ အေးစက်သွားပြီး "သခင်လေးယန်၊ မင်းဘာတွေလုပ်နေတယ်ဆိုတာ သိမယ်လို့ မျှော်လင့်ပါတယ်။ ပြီးတော့ ယန်မိသားစုကို ကိုင်တွယ်ဖြေရှင်းနိုင်မှာလား"ဟု သတိပေး​လေသည်။

ကုန်းထျန်းဟောက် ပြောပြီးသည်နှင့် ယန်စစ်မင်၏ တည်ငြိမ်သည့် အမူအရာသည် အေးစက်သွားလေသည်။

ထို့​နောက် သူသည် "ဒီကိစ္စက စိတ်ပူစရာ မလိုပါဘူး သခင်လေးကုန်း!"

ဒီလိုပြောပြီး သူ့ပေါင်ပေါ်တွင် လက်ညှိုးဖြင့် ဆွဲချနေပြီး တွေး​နေ​​လေသည်။ ယန်မိသားစုသည် Zမြို့တွင် ကြီးမားသော မိသားစုတစ်ခုဖြစ်ပြီး အ​ပေါ်ယံတွင် ညီညွှတ်ကြပုံရသော်လည်း...

.....

ကျန်းရှောင်လန်၊ ကျန်းချွမ်းကျောင်းနှင့် လျိုချန်းနျို တို့သည် အတူတကွ စုကြ​လေသည်။

"ချွမ်းကျောင်း၊ စိတ်ဆိုးမနေနဲ့။ အဲ့လူနှစ်ယောက်က ရှောင်လင်းယွီ ပြုစားတာ ခံ​နေရတာ"

ကျန်းရှောင်လန်သည် "ဒီ​ကောင်မက သူမျိုးမစစ်တစ်​ယောက်ကို လွယ်ထားတာ​တောင် အဲ့နှစ်​ယောက်က စိတ်မရှိဘူးဆို​တော့ အစွမ်းထက်တဲ့ ဂါထာသုံးထားတာ နေမှာ"ဟု ပြော​လေသည်။

"မှန်တယ်!" လျိုချန်းနျိုသည်လည်း ဝင်ထောက်ခံ​လေသည်။ "အဲ့မိန်းမက မြေ​ခွေးလို​ကောက်ကျစ်တဲ့ မိန်းမပဲ။ သစ်ကိုင်းသစ်ခက် ရွာသား​တွေက သွားရည်တမြားမြား ကျ​နေတာ"

"ဟမ့်၊ အဲ့ဒါက သူ့မှာ နွားဘုရင်ငယ်လေးရှိလို့ပဲ" ကျန်းရှောင်လန်က "ငါ့မှာ အဲ့လိုရှိရင် စတော်ဘယ်ရီသီးတွေ အများကြီးစိုက်ပြီး ငွေ​တွေအများကြီးရ​အောင်လုပ်မယ်။ အဲ့အချိန်ကျမှ ဘယ်သူက ငါတို့ကို မထီမဲ့မြင်ပြုရဲတာလဲဆိုတာ ကြည့်လိုက်ဦးမယ်။ ယောက်ျားတွေကလည်း ငါတို့ကို ခေါင်းငုံ့​ပေးကြရလိမ့်မယ်"ဟု ပြော​လေသည်။

စတော်ဘယ်ရီသီး အကြောင်းပြောရင်း ကျန်းချွမ်းကျောင်းသည် မျက်လုံးပြူးပြီး "ရှောင်လန်၊ ချန်းနျို၊ ငါတို့က သူ့စတော်ဘယ်ရီသီးတွေကို ဖျက်ဆီးလိုက်ရင်ရော"

"အာ?!" ကျန်နှစ်ယောက်သည် အံ့သြသွားလေသည်။

***