အရေခွံခွာခြင်း

အမှတ်ငါးကြယ်တာရာစက်ဝန်း၏ တောင်ပိုင်းကြယ်စင်စုနှင့် အနောက်ပိုင်းကြယ်စင်စုကြားမှ နယ်စပ်ဒေသတွင်…

ကောင်းကင်ပေါ်မှ အနီရောင်မိုးသောက်အလင်းအောက်တွင် စေးကပ်သော မိုးက ရွာသွန်းနေပြီး အရာအားလုံးကို ဖုံးလွှမ်းထားသည်။

ကြမ်းတမ်းသော လေပြင်းက တိုက်ခတ်လာသည့်အခါ စေးကပ်သော မိုးက မြန်ဆန်စွာ ခြောက်သွေ့သွားပြီး ကော်အဖြစ် ပြောင်းလဲသွားသည်။ ထိုအခါ ချိပ်ပိတ်ခြင်းစွမ်းအားက တစ်ဟုန်ထိုး မြင့်တတ်သွားသည်။

အမှန်မှာ အစွန်းနှစ်ဖက်သည် ကော်ဖြင့် အတူတကွ ကပ်သွားကြသည်။

ဟင်းလင်းပြင်သည်ပင် မလွတ်မြောက်နိုင်ခဲ့ပေ။ ဤသည်မှာ လေဟာနယ်က ကော်ကြောင့် တစ်သားတည်းဖြစ်လာသည့်အလားပင်။

ကော်၏ အစွမ်းက အံ့ဖွယ်ကောင်းသည်။ ယင်း၏ တိုက်ခိုက်မှုက ထူးခြားပြီး ကြောက်မက်ဖွယ်ကောင်းသည်။

ရွှီချင်းက ထိုနယ်နိမိတ်အတွင်းမှာ ရှိသည်။

သူ၏ ဘေးပတ်ပတ်လည်မှ မိုးသည် စေးကပ်သော ချည်မျှင်များအဖြစ် ပြောင်းလဲသွားပြီး ကောင်းကင်၊ မြေကြီး၊ ဟင်းလင်းပြင်နှင့် အရပ်မျက်နှာအသီးသီးကို ပူးကပ်ပေးလိုက်သည်။

ယင်းတို့က သူ၏ အရေပြားပေါ်မှာ တင်းကျပ်စွာ ကပ်သွားကြသည်။

ဘေးပတ်ဝန်းကျင်မှ ကော်က တဖြည်းဖြည်း ထူထဲလာပြီး များပြားလာသည်။

အကယ်၍ သူက မြန်ဆန်စွာ မထွက်ပြေးဘူးဆိုလျှင် ဤနေရာက လုံးဝခြောက်သွေ့သွားသည့်အခါ သူက ကော်ထဲမှာ ပိတ်မိသွားလိမ့်မည်။

ထိုအခါကျလျှင် သူ၏ လှုပ်ရှားနိုင်စွမ်းကို ဆုံးရှုံးသွားလိမ့်မည်။

သို့သော်လည်း ရွှီချင်းက စိတ်ပူပန်နေသည့်ပုံမပြချေ။

ဤကော်ထောင်ချောက်ကို ဖျက်ဆီးနိုင်မည့် နည်းလမ်းတစ်ခု သူ့ဆီမှာ ရှိသည်။

သို့ဖြစ်၍ ဤအခိုက်အတန့်မှာ သူက တိုက်ပွဲကို အာရုံမစိုက်ထားပေ။ ယင်းအစား သူက ဤတိုက်ပွဲ၏ ပြင်ပအကြောင်းအရာများနှင့် သူ့အရှေ့မှ လူငယ်၏ အတွေးများကိုသာ အာရုံစိုက်ထားသည်။

ယင်းတို့က ဤတိုက်ပွဲနှင့် ဘာမှမသက်ဆိုင်ဟန် ထင်ရသော်လည်း အမှန်မှာ ယင်းတို့က ဤတိုက်ပွဲ၏ အဓိကအမြူတေဖြစ်သည်။

ပုံမှန်အားဖြင့် တစ်စုံတစ်ယောက်သည် ဒုတိယအဆင့် အမဲလိုက်ပွဲတော်၏ အစောပိုင်းအခြေအနေမှာ မဆင်မခြင် လှုပ်ရှားလိမ့်မည် မဟုတ်ချေ။

မည်သို့ဖြစ်ပါစေ ဤသို့အခြေအနေသည် ကောင်းကျိုးထက် ဆိုးကျိုးပိုများသည်။

အကယ်၍ သူသာ ဒဏ်ရာရသွားမည်ဆိုလျှင် အမဲလိုက်ပွဲတော်မှာ ဆက်ပြီး ပါဝင်ရန် ခက်ခဲသွားလိမ့်မည်။

ဒဏ်ရာများကြောင့် ရှေ့ဆက် သူတွေ့ကြုံရမည့် အရာများက ပိုပြီးစိန်ခေါ်မှုများလာလိမ့်မည်။

ထို့ပြင် ရွှီချင်း၏ တုံကင်က အစောပိုင်းအဆင့်မှာသာ ရှိသေးလေရာ ယင်းက တခြားလူများကို လိုချင်တပ်မက်စိတ် မဖြစ်ပေါ်စေနိုင်ပေ။

လူငယ်၏ တိုက်ပွဲစွမ်းအားအရ သူက တခြားတုံကင်များကို အလွယ်တကူ ရယူနိုင်လိမ့်မည်။

သူက ထိုသို့အစွမ်းကုန် ထုတ်လွှတ်ပြီး တိုက်ခိုက်နေရန် မလိုပေ။

ယင်းက ဉာဏ်ကောင်းသူ၏ လုပ်ရပ်မဟုတ်ပေ။

“ ဒီတော့… တစ်ခုခုက အကြီးကြီး လွဲနေတယ် ”

ထိုအတွေးများက ရွှီချင်း၏ စိတ်ထဲမှာ ချက်ချင်း ထွက်ပေါ်လာကြသည်။ ထို့နောက် သူက အဝေးမှ ကောင်းကင်ကို ကြည့်လိုက်သည်။

သူ၏ စိတ်ထဲမှ ခန့်မှန်းမှုက ပိုပြီး သေချာလာသည်။

တစ်ချိန်တည်းမှာ ဆုံးဖြတ်ချက်ပြတ်သားမှုက သူ၏ အကြည့်ထဲမှာ ထွက်ပေါ်လာသည်။

စေးကပ်သော မိုးက ကြမ်းတမ်းသော လေပြင်းကြောင့် ကော်အဖြစ် ပြောင်းလဲသွားပြီး ရွှီချင်း၏ ဘေးပတ်ဝန်းကျင်ကို ချိပ်ပိတ်လိုက်သည်။

“ အခုအချိန်မှာ အများကြီး တွေးပူနေလို့ မရဘူး… ဒဏ်ရာတချို့ ခံစားရမယ်ဆိုရင်တောင် ဒီတိုက်ပွဲကို မြန်နိုင်သမျှမြန်မြန် ငါအဆုံးသတ်ပစ်ရမယ် ”

အနက်ရောင်အလင်းက ရွှီချင်း၏ မျက်လုံးထဲမှာ ထွက်ပေါ်လာသည်။ အတွေးတစ်ချက်ဖြင့် သူ၏ ခန္ဓာကိုယ်ထဲမှ သွေးများက မြန်ဆန်စွာ စီးဆင်းသွားသည်။

ထို့နောက် သူ၏ ထိန်းချုပ်မှုအောက်မှာ သူ့ကိုယ်ပိုင်သွေးက သူ၏ ခန္ဓာကိုယ်ပေါ်မှ မွေးညင်းပေါက်အားလုံးထံမှ စီးကျလာသည်။

သွေးက မြန်ဆန်စွာ ပျံ့နှံ့သွားပြီး ဘေးပတ်ဝန်းကျင်ကို လွှမ်းခြုံသွားမည့် မြူခိုးကို ဖွဲ့စည်းလိုက်သည်။

သွေးမြူခိုးက ပျံ့နှံ့သွားသည့်အခါ လောကက အစိုဓာတ်များသွားသည်။

ဤနည်းလမ်းသည် သက်လတ်ပိုင်းအရွယ် မြို့အရှင်သခင်ထံမှ ရွှီချင်းသင်ယူခဲ့သောအရာ ဖြစ်သည်။ သူ့ကိုယ်ပိုင်သွေးကို ကြားခံနယ်အဖြစ် အသုံးပြုလိုက်ပြီး ယင်းကို သူ၏ စိတ်ဆန္ဒဖြင့် ပေါင်းစပ်လိုက်သည်။ ထို့နောက် သွေးမြူခိုးက အရပ်မျက်နှာအဘက်ဘက်ဆီသို့ ပျံ့နှံ့သွားပြီး ခြောက်သွေ့နေသော ကပ်စေးနှဲမိုးဖြင့် မြန်ဆန်စွာ ရောယှက်သွားသည်။

ကပ်စေးနှဲမိုး၏ ဆုံးရှုံးသွားသော အစိုဓာတ်က ဤအခိုက်အတန့်မှာ ချက်ချင်း ပြန်ရောက်လာသည်။

ရလဒ်အနေဖြင့် ကပ်စေးနှဲမိုး၏ ဒြပ်ထည်ဖွဲ့စည်းသော အမြန်နှုန်းက သိသိသာသာ နှေးကွေးသွားပြီး မိုးက အနီရောင်ဒြပ်ဝတ္ထုအဖြစ် ပြောင်းလဲသွားသည်။

ကပ်စေးနှဲမိုး၏ ခြောက်သွေ့သော လုပ်ငန်းစဉ်သည် ယခု နှောင့်ယှက်ခံလိုက်ရသည်။

ဤကပ်စေးနှဲမိုးသည် အမှန်တကယ် ထူးဆန်းပြီး အစွမ်းထက်သည်။ သို့သော်လည်း ယင်းမှာ ကြီးမားသော အားနည်းချက်တစ်ခု ရှိသည်။

ယင်းမှာ လေဟာနယ်အစွမ်းရှိသော သတ္ထုပစ္စည်းက ခြောက်သွေ့သွားမှသာလျှင် ၎င်း၏ စေးကပ်သော အာနိသင်က အသက်ဝင်လာလိမ့်မည်။

ထိုအားနည်းချက်ကို လူငယ်က ရှင်းလင်းစွာ သိထားသည်။ သို့ဖြစ်၍ သူက ဤအတတ်ပညာကို သူ့ရန်သူ၏ အရှေ့မှာ ထုတ်ဖော်လေ့မရှိပေ။

များသောအားဖြင့် သူက ယင်းကို လျှို့ဝှက်အတတ်ပညာ သို့မဟုတ် အလစ်တိုက်ခိုက်မှုအဖြစ်သာ အသုံးပြုလေ့ရှိသည်။

ယခု သူက ဤအတတ်ပညာကို ထုတ်သုံးလိုက်ရခြင်းမှာ ရွှီချင်းနှင့် ထိပ်တိုက် မရင်ဆိုင်ဘဲ အချိန်ဆွဲချင်သောကြောင့် ဖြစ်သည်။

ရွှီချင်းက ဤအားနည်းချက်ကို သိသွားပြီး တန်ပြန်တိုက်ခိုက်နိုင်မည့် နည်းလမ်းတစ်ခုကိုပင် ရှာတွေ့သွားကြောင်း မြင်သွားသောအခါ မွေးရာပါအမှတ်နှင့် လူငယ်က မျက်နှာမည်းမှောင်သွားသည်။ သို့သော်လည်း သူက မအံ့ဩပေ။

သူ့အရှေ့မှ ရန်သူသည် တည်ငြိမ်ပြီး ဉာဏ်ကောင်းကြောင်း အစကတည်းက သူနားလည်ထားသည်။ ထိုသို့ရန်သူမျိုးက ရှိန်လောက်စရာကောင်းသည်။

ဤအတတ်ပညာဖြင့် တစ်ဖက်လူကို အလွယ်တကူ ချိပ်ပိတ်နိုင်လိမ့်မည်ဟု အစကတည်းက သူမတွေးထားချေ။

သို့ဖြစ်၍ သူက အနည်းငယ် နောင်တရသွားသော်လည်း တုံ့ဆိုင်းမနေဘဲ အနောက်ဆုတ်လိုက်သည်။ တစ်ချိန်တည်းမှာ သူက လက်နှစ်ဖက်စလုံးဖြင့် ချိပ်တံဆိပ်လက်သင်္ကေတများကို ဖွဲ့စည်းလိုက်သည်။ ကောင်းကင်၏ အရောင်က ချက်ချင်း ပြောင်းလဲသွားပြီး မုန်တိုင်းက အစပျိုးလာသည်။

သူက ကျင့်ကြံခြင်းအခြေခံကို ထုတ်ဖော်လိုက်သည်။ ယင်းက သူ၏ လေအခွင့်အာဏာကို တစ်ဟုန်ထိုး အားကောင်းသွားစေသည်။ သူက ရွှီချင်း၏ ခြိမ်းခြောက်မှုကို တွန်းလှန်လိုက်ပြီး ဟန်ချက်ညီမှုကို ပြန်ရယူလိုက်သည်။

တစ်ယောက်က အရာအားလုံးကို ခြောက်သွေ့သွားရန် ကြိုးစားနေစဉ် အခြားတစ်ယောက်က အစိုဓာတ်ပေးရန် ကြိုးစားနေသည်။

ဟန်ချက်ညီနေသရွေ့ ယင်းက ပြဿနာမရှိပေ။

ထိုအတိုင်းဆိုလျှင် ကပ်စေးနှဲမိုးက ချိပ်တံဆိပ်တစ်ခုကို မဖြစ်ပေါ်စေနိုင်သည့်တိုင်အောင် ဤအခြေအနေက ရန်သူကို ချုပ်နှောင်ပြီး အချိန်တစ်ခု ဆွဲထားနိုင်စေလိမ့်မည်။

အထူးသဖြင့် သူ့ရန်သူ၏ ခန္ဓာကိုယ်ပေါ်မှ ကော်များ ဖြစ်ကြသည်။ ယင်းတို့က သွေးမြူခိုးကြောင့် အစိုဓာတ် ပြန်လည်ရရှိလာသော်လည်း စေးကပ်သော အာနိသင်က ဆက်လက် ရှိနေဆဲပင်။

ချုပ်နှောင်မှုက ဆက်ပြီး တည်ရှိနေသည်။

ထိုနည်းလမ်းက လူငယ်၏ ပါရမီနှင့် အတွေးအခေါ်များက သာလွန်ထူးခြားကြောင်း ဖော်ပြပေးလိုက်သည်။ ပုံမှန်အခြေအနေမျိုးတွင် သူ၏ အစီအစဉ်က အောင်မြင်နိုင်ခြေ မြင့်မားလိမ့်မည်။

သူက ရွှီချင်း၏ ရေတွင်းထဲမှ လကို မျှားခြင်းကိုပင် တန်ပြန်တိုက်ခိုက်ရန် နည်းလမ်းတစ်ခုကို ပြင်ဆင်ထားသည်။ သို့ဖြစ်၍ သူက ရောက်လာသည်နှင့်ချက်ချင်း ငါးရောင်ခြယ်ပန်းချီကားကို အရင်ဆုံး ထုတ်လွှတ်လိုက်ခြင်း ဖြစ်သည်။ ထိုနည်းဖြင့် သူက ရွှီချင်း၏ လေဟာနယ်အတတ်ပညာကို အင်အားကုန်ခမ်းစေရန် ရည်ရွယ်ထားသည်။

သူ၏ နားလည်ထားမှုအရ ထိုသို့လေဟာနယ်အတတ်ပညာကို ထပ်ခါထပ်ခါ အသုံးမပြုနိုင်ပေ။

ထို့ပြင် သူ၏ ကော်က လေဟာနယ်ပေါ်မှာလည်း သက်ရောက်မှုရှိသည်။ ယင်းက လေဟာနယ်အတတ်ပညာများကို အတိုင်းအတာတစ်ခုထိ ခုခံတားဆီးနိုင်သည်။

“ တကယ်လို့ သူက ဒီဟာကိုပါ ချိုးဖြတ်နိုင်သေးတယ်ဆိုရင် အဆိုးဆုံးအနေနဲ့ ဒီတိုက်ပွဲကို ငါဆက်မတိုက်တော့ဘူး… ဘာပဲဖြစ်ဖြစ် ဒီတည်နေရာကို အဲ့ဒီလူကို ငါပြောပြပြီးပြီ… တကယ်လို့ သူက နောက်ကျမှ ရောက်လာမယ်ဆိုရင် အဲ့ဒါက ငါနဲ့မဆိုင်တော့ဘူး ”

ထိုသို့တွေးမိသောအခါ လူငယ်က လေအခွင့်အာဏာကို အားဖြည့်ပေးလိုက်ပြီး မီးအခွင့်အာဏာကို ထုတ်လွှတ်လိုက်သည်။ သူက အနောက်ဆုတ်သွားနေရင်း ပြင်ဆင်မှုအားလုံးကို ပြုလုပ်လိုက်သည်။

သို့သော်လည်း သူ့ကို နှလုံးတုန်သွားစေမည့် မမျှော်လင့်ထားသော မြင်ကွင်းတစ်ခုက ထိုအခိုက်အတန့်မှာ ရုတ်တရက် ထွက်ပေါ်လာသည်။

စေးကပ်သော ချည်မျှင်များဖြင့် ချုပ်နှောင်ခံထားရသော ရွှီချင်းက ကမ္ဘာတုန်ဟီးစေနိုင်သော ဓားစွမ်းအင်ကို ချက်ချင်း ထုတ်လွှတ်လိုက်သည်။

ထိုဓားစွမ်းအင်က ဧကရာဇ်ဓားက ထွက်ပေါ်လာခြင်း ဖြစ်သည်။

ယင်းက ဘေးပတ်ဝန်းကျင်မှ စေးကပ်သော ချည်မျှင်များကို မဖြတ်ပစ်ပေ။ အဘယ့်ကြောင့်ဆိုသော် လူငယ်၏ ဆက်တိုက် အားဖြည့်ပေးမှုအောက်မှာ ဧကရာဇ်ဓားက ယင်းတို့အားလုံးကို တစ်ကြိမ်တည်းဖြင့် မပိုင်းဖြတ်နိုင်ပေ။ ယင်းက သူ့ကို ပိုပြီးအချိန်ကြန့်ကြာစေလိမ့်မည်။

သို့ဖြစ်၍ ဓားစွမ်းအင်က ရွှီချင်း၏ ခန္ဓာကိုယ်ထဲမှ ထွက်ပေါ်လာသည်။

ယင်းက ဖြတ်တောက်လိုက်သည်မှာ ရွှီချင်း၏ အရေပြားဖြစ်သည်။

မျက်စိတစ်မှိတ်အတွင်းမှာ ဧကရာဇ်ဓား၏ ထက်ရှသော ဓားစွမ်းအင်က ရွှီချင်း၏ အရေပြားကို ချက်ချင်း လှီးဖြတ်လိုက်သည်။

အရေပြားက သူ၏ ခန္ဓာကိုယ်ထဲမှ ခွဲထုတ်ခံလိုက်ရသည်။

တစ်ချိန်တည်းမှာ ဓားအလင်းက သူ၏ အရှေ့မှာ စုစည်းသွားပြီး အပြင်ဘက်မှာ ပေါ်ထွက်လာသည်။

ချက်ချင်းဆိုသလို ရွှီချင်း၏ ခန္ဓာကိုယ်က နှစ်ပိုင်းကွဲထွက်သွားသည့်အလား အောက်မေ့ရသည်။

ရှည်လျားသော အမှတ်တစ်ခုက သူ၏ ဦးခေါင်းထိပ်မှ စတင်၍ နဖူး၊ မျက်နှာ၊ ရင်ဘက် ထိုမှတဖန် သူ၏ တစ်ကိုယ်လုံးဆီသို့ ပျံ့နှံ့သွားသည်။

သူ၏ အရေပြားက အဝတ်အစားချွတ်လိုက်သည့်အလား ခန္ဓာကိုယ်ပေါ်မှ တိုက်ရိုက် ခွဲထွက်သွားသည်။

အရေပြားမရှိသော သွေးသားပုံရိပ်တစ်ခုက ဤအခိုက်အတန့်မှာ ထွက်ပေါ်လာသည်။

သူ၏ အလျင်က အလွန်မြန်ဆန်သည်။ သူက ထွက်ပေါ်လာသည်နှင့်ချက်ချင်း ဘေးပတ်ဝန်းကျင်မှ စေးကပ်သော ချည်မျှင်များ သူ့ဆီသို့ မရောက်လာမီ လေဟာနယ်အတတ်ပညာကို ချက်ချင်း အသက်သွင်းလိုက်သည်။

နောက်အခိုက်အတန့်မှာ ရွှီချင်းက တိုက်ရိုက် တည်နေရာပြောင်းရွှေ့သွားသည်။

အသွေးအသားပုံရိပ်က အပြင်မှာ ထွက်ပေါ်လာကြောင်း မြင်လိုက်ရသောအခါ မွေးရာပါအမှတ်နှင့် လူငယ်က မျက်မှောင်ကြုတ်သွားပြီး သူ၏ မျက်နှာက တင်းမာခက်ထန်လာသည်။ ပြင်းထန်သော ချောက်ချားမှုက သူ၏ နှလုံးသားထဲမှာ ထွက်ပေါ်လာစဉ် သူ၏ အသိစိတ်က ဝုန်းခနဲ လှုပ်ခတ်သွားသည်။

သူသည် ရက်စက်ကြမ်းကြုတ်သော လူများကို ယခင်က မြင်တွေ့ဖူးသော်လည်း ထိုမျှရက်စက်ကြမ်းကြုတ်သော လူကို ပထမဆုံးအကြိမ် မြင်တွေ့ဖူးခြင်း ဖြစ်သည်။

ထိုလူက သူ၏ အရေပြားကို ကိုယ်တိုင်လှီးဖြတ်လိုက်သည်။

လူငယ်က ထိတ်လန့်ချောက်ချားသွားပြီး ရူးသွပ်စွာ အနောက်ဆုတ်သွားသည်။ ပြင်းထန်သော သေခြင်းရှင်ခြင်းအန္တရာယ်က သူ၏ နှလုံးသားထဲမှာ ထွက်ပေါ်လာသည်။ ယင်းက သူ၏ အသက်ရှူသံကို မြန်ဆန်စေသည်။ အဘယ့်ကြောင့်ဆိုသော် တစ်ဖက်လူက ထွက်ပြေးလွတ်မြောက်ရန်သာ ရည်ရွယ်ထားခြင်းမဟုတ်ကြောင်း သူနားလည်သွားသောကြောင့် ဖြစ်သည်။

သူက အန္တရာယ်ကို ခံစားမိသွားပြီး အမြန်အနောက်ဆုတ်သွားသော်လည်း ယင်းက အလွန်နောက်ကျသွားဆဲပင်။

ရွှီချင်းက အပြင်သို့ ထွက်ပေါ်လာသည်နှင့်ချက်ချင်း လေဟာနယ်တာအိုက ပေါ်လျှိုးလာသည်။ ယင်းက နယ်မြေလွတ်များနှင့် ထပ်ဆင့်လွှမ်းခြုံမှုကို ဖြစ်ပေါ်စေသည်။ နောက်အခိုက်အတန့်မှာ ယင်းတို့က ချိပ်ပိတ်ခြင်းအစွမ်းအဖြစ် ပြောင်းလဲသွားပြီး လူငယ်ကို ဖိနှိပ်လိုက်သည်။

ရှေးဟောင်းနေနာရီသည်လည်း ရွှီချင်း၏ အနောက်မှာ ထွက်ပေါ်လာသည်။ နေနာရီလက်တံက လှည့်ပတ်သွားသည့်အခါ အချိန်တာအိုက ဆင်းသက်လာသည်။

သူက အချိန်ရပ်တန့်လိုက်သည်။

ရွှီချင်းက လေဟာနယ်ကို အသုံးပြု၍ သူ့ရန်သူ၏ လွတ်လမ်းကို ပိတ်ဆို့လိုက်သည်။ ထို့နောက် သူက အချိန်ကို အသုံးပြု၍ သူ၏ ခန္ဓာကိုယ်ကို လှုပ်ရှားနိုင်စွမ်း ကင်းမဲ့စေသည်။

ထို့ကြောင့် လူငယ်၏ ခန္ဓာကိုယ်က လေထဲမှာ ရပ်တန့်သွားသည်။

သူ၏ ဝိညာဉ်နှင့် ခန္ဓာကိုယ်က လှုပ်ရှားနိုင်စွမ်းကင်းမဲ့သွားသည်။

လေဟာနယ်က ချိပ်ပိတ်ခံလိုက်ရပြီး အချိန်က ရပ်တန့်သွားစဉ်…

ကြောက်မက်ဖွယ်ကောင်းသော ဓားစွမ်းအင်က ထွက်ပေါ်လာသည်။

အဖိုးကိုးပေးခဲ့သော ဓားစွမ်းအင်အမျှင်တန်းသုံးမျှင်ထဲမှ ဒုတိယအမျှင်က ဤအခိုက်အတန့်မှာ ပေါ်လျှိုးလာသည်။

ကောင်းကင်၏ အရောင်က ပြောင်းလဲသွားပြီး လေတဟူးဟူး တိုက်ခတ်လာသည်။

ဓားစွမ်းအင်က ပျံသန်းထွက်လာပြီးနောက် လူငယ်ကို ပိုင်းဖြတ်လိုက်သည်။

သို့သော်လည်း လူငယ်သည် သာမန်မဟုတ်ပေ။ သူ၏ အချိန်က ရပ်တန့်နေပြီး သူ၏ လေဟာနယ်က ချိပ်ပိတ်ခံထားရသည့်တိုင် ထိုသို့အရေးကြီးအခိုက်အတန့်မှာ သူ၏ ခန္ဓာကိုယ်ထဲမှ ကိုယ့်ကိုယ်ကိုယ် ဖောက်ခွဲသော အရှိန်အဝါက ထွက်ပေါ်လာသည်။

သူက ကိုယ့်ကိုယ်ကိုယ် ဖောက်ခွဲပစ်သော စွမ်းအားကို ငှားယူ၍ လေဟာနယ်နှင့် အချိန်ကို လှုပ်ခါပစ်လိုက်သည်။

သို့ဖြစ်၍ နောက်အခိုက်အတန့်မှာ ရွှီချင်း၏ နယ်မြေလွတ်များက တုန်ယင်သွားပြီး အက်ကွဲသွားသည်။ သူ၏ အနောက်မှ နေနာရီသည်လည်း တုန်ယင်သွားပြီး နာရီ၏ မျက်နှာပြင်ပေါ်မှာ အက်ကွဲကြောင်းများ ထွက်ပေါ်လာကြသည်။

ဤသည်မှာ နေနာရီက ပျက်စီးသွားတော့မည့်အလားပင်။

မည်သို့ဖြစ်ပါစေ သူ၏ ရန်သူသည် အလယ်အလတ် အုပ်ချုပ်သူအဆင့်နှင့် အလွန်နီးကပ်နေပြီး အခွင့်အာဏာများကို အန္တိမအခြေအနေအထိ ထုတ်လွှတ်နိုင်သော ကောင်းကင်အရွေးချယ်ခံတစ်ယောက် ဖြစ်သည်။

ဤအခိုက်အတန့်မှာ အေးစက်စက်အလင်းက ရွှီချင်း၏ မျက်လုံးထဲမှာ ထွက်ပေါ်လာသည်။ လေဟာနယ်က တုန်ယင်နေပြီး နေနာရီပေါ်မှာ အက်ကွဲကြောင်းများ ထွက်ပေါ်လာနေသော်လည်း သူက ယင်းတို့ကို လျစ်လျူရှုထားသည်။ ယင်းအစား သူက ဓားစွမ်းအင်ကို ဆက်ပြီး ထုတ်လွှတ်လိုက်သည်။

နောက်အခိုက်အတန့်မှာ ဓားစွမ်းအင်က ပျံသန်းထွက်သွားသည်။

ကောင်းကင်ဘုံလျှပ်စီးက ဖြတ်သန်းသွားသည့်အလား လောကက လင်းထိန်သွားသည်။

ဗုန်းဟူသော မြည်သံနှင့်အတူ ဓားစွမ်းအင်က လူငယ်၏ နဖူးပေါ်သို့ တိုက်ရိုက် ကျရောက်သွားပြီး အရာအားလုံးကို ဖျက်ဆီးပစ်လိုက်သည်။

သူ၏ ခန္ဓာကိုယ်နှင့် ဝိညာဉ်က ဖျက်ဆီးခံလိုက်ရသည်။

ယင်းတို့အားလုံးကို ဖော်ပြရန် အချိန်အတော်ကြာသော်လည်း အမှန်မှာ ယင်းတို့က မျက်စိတစ်မှိတ်အတွင်း ဖြစ်ပျက်သွားခဲ့ခြင်း ဖြစ်သည်။

ချက်ချင်းဆိုသလို ရွှီချင်း၏ အရည်အချင်းပြည့်မီတုံကင်၏ အာရုံခံနိုင်သော အကွာအဝေးက ကီလိုမီတာငါးသန်းအထိ တိုးမြှင့်သွားသည်။

သူက ယင်းကို စစ်ဆေးကြည့်နေရန် အချိန်မရပေ။ သူက ဒယိမ်းဒယိုင် အနောက်ဆုတ်သွားပြီး ပါးစပ်အပြည့် သွေးအန်လိုက်သည်။

သူ၏ တစ်ကိုယ်လုံးက ဆိုးဝါးစွာ ထိခိုက်ဒဏ်ရာရရှိထားသည်။

ဤတိုက်ပွဲကို အမြန်ဆုံး အဆုံးသတ်ခြင်းက သူ့အတွက် လွယ်ကူသောအရာ မဟုတ်ပေ။

သူက လေဟာနယ်နှင့် အချိန်ကို အသုံးပြုခဲ့သည့်တိုင် တစ်ဖက်လူက ရုန်းထွက်နိုင်လုနီးပါး ဖြစ်ခဲ့သည်။ အကယ်၍ လေဟာနယ်နှင့် အချိန်၏ ချုပ်နှောင်မှုသာ မရှိဘဲ အဖိုးကိုး၏ ဓားစွမ်းအင်ကို သူအသုံးပြုခဲ့မည်ဆိုလျှင် ယင်းက သေချာပေါက် ကျရှုံးသွားလိမ့်မည်။

အကယ်၍ သူက ကျရှုံးသွားပြီး တစ်ဖက်လူက လွတ်မြောက်သွားမည်ဆိုလျှင် ဤတိုက်ပွဲကို နောက်တစ်ကြိမ် မြန်ဆန်စွာ အဆုံးသတ်ပစ်နိုင်ရန် လုံးဝမဖြစ်နိုင်တော့ပေ။

ရွှီချင်းက အသက်ပြင်းပြင်းရှူသွင်းလိုက်သည်။ ဤအခိုက်အတန့်မှာ ဒဏ်ရာကုသရန် သူ့မှာ အချိန်မရှိပေ။ သူက တိုက်ပွဲမြေပြင်ကို ရှင်းလင်းပြီးနောက် အရေခွံဆွဲခွာထားသည့် နာကျင်မှုကို တောင့်ခံလိုက်သည်။ ထို့ပြင် သူက အချိန်နှင့် လေဟာနယ်ထံမှ တန်ပြန်ဆိုးကျိုးကိုလည်း ခံစားနေရသည်။

နောက်အခိုက်အတန့်မှာ သူက ခန္ဓာကိုယ်ကို လှုပ်ရှားလိုက်ပြီး အဝေးသို့ တန်းမတ်စွာ ပျံသန်းသွားသည်။

အရှေ့သို့ မြန်ဆန်စွာ ပျံသန်းသွားနေစဉ် ရွှီချင်းက နောင်တရစွာ တွေးတောလိုက်သည်။ သူ့ရန်သူ၏ မူမမှန်သော လုပ်ရပ်ကြောင့်သာမဟုတ်လျှင် သူက ဤတိုက်ပွဲကို အမြန်ဆုံး အဆုံးသတ်ပစ်ရန် အဖိုးကိုး၏ ဓားစွမ်းအင်ကို အသုံးပြုခဲ့လိမ့်မည် မဟုတ်ချေ။

ယခု သူ့ဆီမှာ ဓားစွမ်းအင်အမျှင်တန်းတစ်ခုသာ ကျန်ရှိတော့သည်။

“ ဒါ့အပြင် အဖိုးကိုးရဲ့ ဓားစွမ်းအင်က အကန့်အသတ်ရှိတယ်… အဲ့ဒါက အစောပိုင်းအဆင့် အုပ်ချုပ်သူကို သတ်ဖြတ်နိုင်ပေမဲ့ အလယ်အလတ်အဆင့် အုပ်ချုပ်သူကိုတော့ မသတ်နိုင်လောက်ဘူး… ”

ရွှီချင်းက နှုတ်ဆိတ်သွားသည်။ ထို့နောက် သူက ခရမ်းသလင်းကျောက်ကို အသက်သွင်းလိုက်ပြီး အရေအတွက်များပြားသော ဆေးလုံးများကို သောက်သုံးလိုက်သည်။ သူက မြန်နိုင်သမျှမြန်မြန် ဒဏ်ရာများကို ကုသလိုက်သည်။

သူက ပျံသန်းနေရင်း ဒဏ်ရာကုသလိုက်သည်။ သူက ဘေးပတ်ဝန်းကျင်ကို အာရုံခံနေရင်း အမှတ်ငါးကြယ်တာရာစက်ဝန်းဆီသို့ ရောက်ရှိလာပြီးနောက် သူတွေ့ကြုံခဲ့ရသော အဖြစ်အပျက်များကို ပြန်စဉ်းစားလိုက်သည်။

အမှတ်ငါးကြယ်တာရာစက်ဝန်းသည် စည်းလုံးညီညွတ်သော ကြယ်တာရာစက်ဝန်းဖြစ်သည်။

ယင်းက ဝမ်ကူးကုန်းမြေတည်ရှိသော အမှတ်ကိုးကြယ်တာရာစက်ဝန်းနှင့် လုံးဝ ကွဲပြားခြားနားသည်။

အတိတ်တွင် ရွှီချင်းသည် မိစ္ဆာငှက်မွှေးသူတော်စင်ကုန်းမြေထဲမှ ကြယ်တာရာမြေပုံမှတဆင့် အမှတ်ကိုးကြယ်တာရာစက်ဝန်းကို မြင်တွေ့ခဲ့သည်။ ဝမ်ကူးကုန်းမြေပေါ်မှ နတ်ဘုရားမျက်နှာပျက်ကြီး၏ ဘေးပတ်ပတ်လည်တွင် အင်အားစုအများအပြား တည်ရှိကြသည်။

အမှတ်ငါးကြယ်တာရာစက်ဝန်းသည်တော့ စည်းလုံးညီညွတ်သည်။

နတ်ဘုရားများက ဖမ်းဆီးချုပ်နှောင်ခံထားရပြီး ရွေ့လျားခြင်းမှ တားမြစ်ခံထားရကြသည်။

မျိုးနွယ်စုအားလုံးက ကျင့်ကြံကြသည်။

ထို့ပြင် ကျင့်ကြံသူအားလုံးက ဤနေရာမှာ အထွတ်အမြတ်တည်ရှိမှုများ ဖြစ်ကြသည်။

သို့ဖြစ်၍ ပညာရှင်ကျင့်ကြံသူများက အလွန်များပြားသည်။

ယခု ရွှီချင်းက တောင်ပိုင်းကြယ်စင်စု၏ အစွန်အဖျားမှာသာ ရှိနေသည့်တိုင် အုပ်ချုပ်သူအများအပြားကို မြင်တွေ့ခဲ့ရသည်။ ယင်းကို ကြည့်ခြင်းအားဖြင့် အမှတ်ငါးကြယ်တာရာစက်ဝန်းက မည်မျှကျယ်ပြောပြီး အစွမ်းကြီးမားကြောင်း မြင်နိုင်ပေသည်။

ရွှီချင်းအတွက်တော့ ယင်းက စိန်ခေါ်မှုတစ်ခုဖြစ်သလို အခွင့်အရေးတစ်ခုလည်း ဖြစ်၏။

အမှတ်ငါးကြယ်တာရာစက်ဝန်းသို့ သူရောက်ရှိလာပြီးကတည်းက ပညာရှင်ကျင့်ကြံသူများဖြင့် တိုက်ပွဲများစွာ ဆင်နွှဲခဲ့ရသည်။

တိုက်ပွဲပြီးဆုံးသွားသည့်အခါတိုင်း သူက နားလည်မှုအသစ်တစ်ခုကို ရရှိသွားလိမ့်မည်။ သူက အုပ်ချုပ်သူနယ်ပယ်အကြောင်းကို ပိုပြီးနားလည်သွားလေ သူ့ကိုယ်ပိုင်တာအိုကို ပိုပြီးနားလည်လာလေ ဖြစ်သည်။

ဝိညာဉ်သတ္ထုတွင်းကို စောင့်ရှောက်သော အုပ်ချုပ်သူလင်းဒူနှင့် တိုက်ပွဲတွင် သူ့တာအို၏ အကန့်အသတ်က ကျင့်ကြံခြင်းစွမ်းအားမဟုတ်ဘဲ သူ၏ စိတ်ကူးနိုင်စွမ်းသာဖြစ်ကြောင်း သူ့အား နားလည်စေခဲ့သည်။

ဒြပ်စင်ငါးမျိုးသည် အလွန်ကျယ်ပြောပြီး အဆုံးမဲ့သော ပြောင်းလဲမှုများကို ဖြစ်ပေါ်စေနိုင်သည်။ မြို့အရှင်သခင်နှင့် တိုက်ပွဲတွင် သူ၏ တာအိုက အခွင့်အာဏာများအဖြစ် ပြောင်းလဲနိုင်ကြောင်း ရှာတွေ့သွားခဲ့သည်။

ယနေ့ တိုက်ပွဲတွင် အခွင့်အာဏာက မည်မျှအတိုင်းအတာအထိ အစွမ်းထက်ကြောင်း မွေးရာပါအမှတ်နှင့် လူငယ်က သူ့အား ပြသပေးခဲ့သည်။

တစ်ဖက်လူ၏ လေအခွင့်အာဏာတစ်ခုတည်းက သူ၏ ဒြပ်စင်ငါးမျိုးကို လှုပ်ခါပစ်နိုင်စွမ်း ရှိသည်။

ထို့ပြင် သူက ပြင်ပပစ္စည်းတစ်ခုကို အသုံးပြု၍ တတိယမြောက် အခွင့်အာဏာနှင့် တူညီသော အစွမ်းတစ်မျိုးကိုလည်း ရရှိခဲ့သည်။

ယင်းက ရွှီချင်းကို နှလုံးတုန်သွားစေသည်။

အစက သူသည် သူ၏ ခန့်မှန်းမှုကို အတည်ပြုရန် ဤတိုက်ပွဲကို ဆက်လက် ဆွဲဆန့်ချင်သေးသည်။ သို့မှသာ သူက တစ်ဖက်လူထံမှ အသိပညာတချို့ကို ဆည်းပူးနိုင်လိမ့်မည်။

သို့သော်လည်း တစ်ဖက်လူ၏ မူမမှန်သော လုပ်ရပ်နှင့် ချဉ်းကပ်လာနေသော အန္တရာယ်ကြောင့် တိုက်ပွဲကို မြန်နိုင်သမျှမြန်မြန် အဆုံးသတ်ပစ်ရုံမှလွဲ၍ သူ့မှာ တခြားရွေးချယ်စရာ မရှိခဲ့ပေ။

တစ်နာရီကြာပြီးနောက် ရွှီချင်းက သူ၏ ခန့်မှန်းမှုကို အတည်ပြုနိုင်သွားသည်။

သူ့အရည်အချင်းပြည့်မီတုံကင်၏ အာရုံခံမှုအောက်မှာ ဤနေရာနှင့် ကီလိုမီတာငါးသန်းအဝေးတွင် ထွန်းလင်းတောက်ပသော ကြယ်တစ်လုံးက ထွက်ပေါ်လာကြောင်း သူမြင်တွေ့သွားသည်။

ထိုကြယ်က လွန်စွာ ထွန်းလင်းတောက်ပပြီး အတိတ်မှာ ရွှီချင်း မြင်ခဲ့ဖူးသော အရာအားလုံးထက် သာလွန်သည်။

ထိုကြယ်ကို အာရုံခံမိသွားသည့်အခိုက် ပြင်းထန်သော သေခြင်းရှင်ခြင်းကပ်ဘေးက ရွှီချင်း၏ နှလုံးသားထဲမှာ ထွက်ပေါ်လာသည်။

ထို့ပြင် တစ်ဖက်လူက ဤနေရာကို စောစောကတည်းက ပစ်မှတ်ထားနေသည့်အလား လွှမ်းမိုးဖိနှိပ်သော အရှိန်အဟုန်ဖြင့် တန်းမတ်စွာ ပျံသန်းလာနေသည်။