မူလအစစ်အမှန် ထွက်ပေါ်လာခြင်း… အချိန်လေဟာနယ်ကို ဖန်တီးခြင်း…

“ အဲ့ဒါက အန္တိမတာအိုရှစ်ခုပဲ ”

ဟင်းလင်းပြင်ထဲတွင် ရွှီချင်းက မျက်လုံးဖွင့်လိုက်သည်။ သူ၏ ရုပ်ခန္ဓာကိုယ်က မူလနေရာမှာ ရှိနေစဉ် သူ၏ ဝိညာဉ်က ပန်းချီကားထဲမှ မြှောက်တတ်လာသည်။ ဝိညာဉ်က သူ၏ ခန္ဓာကိုယ်ထဲသို့ ပြန်ရောက်သွားသောအခါ နက်နဲစွာ ဆင်ခြင်တွေးတောသော အကြည့်က သူ၏ မျက်လုံးထဲမှာ ထွက်ပေါ်လာသည်။

အတိတ်၌ အန္တိမတာအိုရှစ်ခုကို ဆင်ခြင်နားလည်ခဲ့စဉ်က သူမြင်တွေ့ခဲ့သော မြင်ကွင်းများကို ရွှီချင်း ပြန်အမှတ်ရသွားသည်။ ထိုစဉ်က သူက အချိန်လေဟာနယ်ထဲမှာ ဆံပင်ဖြူဖွေးနေသော ကျင့်ကြံသူတစ်ယောက်ကို မြင်တွေ့ခဲ့သည်။

ထိုလူ၏ အန္တိမတာအိုရှစ်ခုက သူ၏ အန္တိမတာအိုရှစ်ခုနှင့် ကွဲပြားခြားနားသည်။ သို့သော်လည်း အခြေခံအုတ်မြစ်ဖြစ်သော ဒြပ်စင်ငါးမျိုးသည်တော့ တူညီသည်။ ထို့ပြင် တစ်ဖက်လူ၏ အန္တိမတာအိုများက ဓမ္မရုပ်ခန္ဓာကိုယ်များကို ဖွဲ့စည်းနိုင်သည်။

ယခု ပြန်လည်မွေးဖွားလာသော အသွင်သဏ္ဍာန်များက ဒြပ်စင်ငါးမျိုး၏ အခြေခံအုတ်မြစ်ဖြစ်လာသည်။ ထို့နောက် ဒြပ်စင်ငါးမျိုးက နိယာမများအဖြစ် ပြောင်းလဲသွားကြသည်။

သို့ဖြစ်၍ ဒြပ်စင်ငါးမျိုးသည် ပြီးပြည့်စုံသော အဆင့်မှာ ရှိကြသည်။

ထိုအတွေးက ရွှီချင်း၏ စိတ်ထဲမှာ ထွက်ပေါ်လာသည့်အခိုက် ဓမ္မရုပ်ခန္ဓာကိုယ်ငါးခုက သူ့ခန္ဓာကိုယ်၏ အပြင်ဘက်မှာ ထွက်ပေါ်လာကြသည်။

ပထမဆုံး ထွက်ပေါ်လာသည်မှာ အမတ်ဝတ်စုံကို ဝတ်ဆင်ထားသော အဖိုးအိုတစ်ယောက်ဖြစ်ပြီး သူ၏ လက်ထဲတွင် ဓားတစ်လက်ကို ကိုင်ဆောင်ထားသည်။ သူ၏ မျက်နှာက ဂုဏ်ကျက်သရေဖြင့် ပြည့်နှက်နေပြီး သူ၏ အရှိန်အဝါက ကြီးကျယ်မြင့်မြတ်သည်။

စည်းစိမ်ချမ်းသာနှင့် ရာထူးအာဏာက သူ၏ လက်နက်များ ဖြစ်ကြသည်။ ယင်းတို့က သတ္ထုကံကြမ္မာအဖြစ် ဒြပ်ထည်ဖွဲ့စည်းသွားပြီး သတ္ထုဓမ္မရုပ်ခန္ဓာကိုယ်အဖြစ် ပြောင်းလဲသွားသည်။

ထိုအဖိုးအိုက ဝန်ကြီးချုပ်ရွှီကျင်းဖန်မှလွဲ၍ တခြားလူမဟုတ်ပေ။

ဒုတိယမြောက် ထွက်ပေါ်လာသူသည် ကုန်သည်ဝတ်စုံကို ဝတ်ဆင်ထားသော ရွှီဟုန်ဖြစ်သည်။ သူ၏ မျက်နှာက သိမ်မွေ့ညင်သာမှုဖြင့် ပြည့်နှက်နေပြီး သူ၏ ဘေးပတ်ပတ်လည်တွင် အနက်ရောင်မြစ်တစ်စင်းက ရစ်ခွေနေသည်။ မြစ်ထဲတွင် လှိုင်းလုံးများက နိမ့်ချည်မြင့်ချည် ရွေ့လျားနေကြပြီး ကျယ်လောင်သော ဟိန်းသံကို ထုတ်လွှတ်နေကြသည်။

သူက ရေကံကြမ္မာဖြစ်ပြီး ရေဓမ္မရုပ်ခန္ဓာကိုယ်ဖြစ်သည်။

ထို့နောက် တတိယမြောက်အနေဖြင့် တောပုန်းဓားပြရွှီစန်းက ထွက်ပေါ်လာသည်။ သူက ရက်စက်ကြမ်းကြုတ်သော သိုင်းအရှိန်အဝါကို ထုတ်လွှတ်နေသည်။ သူက ဟက်ဟက်ပက်ပက် ရယ်မောနေပြီး ဧရာမသစ်ပင်ပေါ်မှာ မတ်တတ်ရပ်နေသည်။ သူ၏ လက်တစ်ဖက်က သစ်ကိုင်းကို ဖမ်းဆုပ်ထားစဉ် သူ၏ မျက်လုံးထဲမှာ ရက်စက်သော အရိပ်အယောင်ဖြင့် ပြည့်နှက်နေသည်။

သူ့ထံမှ အလွန်သိပ်သည်းသော သစ်သားကံကြမ္မာက ထွက်ပေါ်နေသည်။ သူက သစ်သားဓမ္မရုပ်ခန္ဓာကိုယ် ဖြစ်သည်။

နောက်ဆုံးမှာတော့ စတုတ္ထမြောက်နှင့် ပဉ္စမမြောက် ရုပ်ခန္ဓာကိုယ်များက ရှေ့ဆင့်နောက်ဆင့် ထွက်ပေါ်လာကြသည်။

စတုတ္ထမြောက် ထွက်ပေါ်လာသူမှာ သမားတော်ရွှီယုဖြစ်သည်။ သူက လက်ထဲ၌ ဧရာမမီးတောင်တစ်လုံးကို ကိုင်ဆောင်ထားပြီး ကမ္ဘာလောင်ကျွမ်းပစ်နိုင်သော မီးတောက်များက သူ့ထံမှ ထွက်ပေါ်နေသည်။ မီးတောက်များက သူ၏ တစ်ကိုယ်လုံးကို လွှမ်းခြုံထားသည်။ သူက မီးဓမ္မရုပ်ခန္ဓာကိုယ် ဖြစ်သည်။

ပဉ္စမမြောက် ထွက်ပေါ်လာသူသည် လယ်သမားရွှီခွန်းဖြစ်သည်။ သူ၏ ခန္ဓာကိုယ်ပေါ်မှာ စပါးစေ့များနှင့် ဖုန်မှုန့်များ ကပ်တွယ်နေသည်။ သို့တိုင်အောင် သူက ကြီးမားသော တောင်ကြီးတစ်တောင်ကို ထမ်းပိုးထားသည့်အလား ပြင်းထန်သော အလေးချိန်က သူ့ထံမှ ထွက်ပေါ်နေသည်။ သူထွက်ပေါ်လာသည့်အခိုက် ဟင်းလင်းပြင်က တုန်ယင်သွားသည်။

မြေကြီးဒြပ်စင်က သူ၏ အခြေခံအုတ်မြစ်ဖြစ်ပြီး သူက မြေကြီးဓမ္မရုပ်ခန္ဓာကိုယ်၏ အသွင်သဏ္ဍာန်ဖြစ်သည်။

ဤအခိုက်အတန့်မှာ အန္တိမတာအိုရှစ်ခု၏ အသွင်သဏ္ဍာန်ငါးခုက ဟင်းလင်းပြင်ထဲမှာ မားမားမတ်မတ် ရပ်နေကြပြီး ကြီးမားသော စွမ်းအားကို ထုတ်လွှတ်နေကြသည်။ သူတို့တစ်ယောက်စီမှ ထုတ်လွှတ်နေသော ဖိအားက ရွှီချင်း၏ ဖိအားနှင့်ပင် နှိုင်းယှဉ်နိုင်သည်။

ရွှီချင်းက ခေါင်းလှည့်လိုက်ပြီး တစ်ချက်ကြည့်လိုက်သည်။ ဓမ္မရုပ်ခန္ဓာကိုယ်ငါးခုကလည်း သူ့ကို စိုက်ကြည့်နေကြသည်။

နားလည်သဘောပေါက်သော အကြည့်က သူတို့အားလုံး၏ မျက်လုံးထဲမှာ တစ်ပြိုင်နက် ထွက်ပေါ်လာသည်။

“ ဒြပ်စင်ငါးမျိုးက အပြန်အလှန် အားဖြည့်ပေးနေသလို အပြန်အလှန် ဆန့်ကျင်နေကြတယ်… အဲ့ဒါက ပြန်လည်မွေးဖွားခြင်းသံသရာစက်ဝန်းတစ်ခုကို ဖန်တီးလိုက်တယ်… ”

“ ပြန်လည်မွေးဖွားခြင်းကတော့ အဌမမြောက် အန္တိမတာအို ဖြစ်လာနိုင်တယ်… ”

သို့သော်လည်း ရွှီချင်းက အချိန်တစ်ခဏကြာ စဉ်းစားပြီးနောက် ခေါင်းခါလိုက်သည်။

“ ပြန်လည်မွေးဖွားခြင်းက လျှို့ဝှက်ဆန်းကြယ်တယ်ဆိုပေမဲ့ ပြန်လည်မွေးဖွားခြင်းထက် သာလွန်တဲ့ လမ်းစဉ်တွေက အများကြီးပဲ ရှိတယ်… အဲ့ဒီထဲက တစ်ခုက အစကတည်းက ငါရွေးချယ်ထားခဲ့တဲ့ အဌမမြောက် အန္တိမတာအိုပဲ ”

ဆုံးဖြတ်ချက်ပြတ်သားမှုက ရွှီချင်း၏ မျက်လုံးထဲမှာ ထွက်ပေါ်လာသည်။ သူက ပြန်လည်မွေးဖွားခြင်းကို သူ၏ တာအိုအဖြစ် ရွေးချယ်သတ်မှတ်ရန် လက်လျော့လိုက်သည်။ ထို့နောက် သူ၏ အကြည့်က အက်ကွဲသွားသော သလင်းကျောက်အပိုင်းအစဆယ်ခုထဲမှ ဆဌမမြောက် အပိုင်းအစနှင့် သတ္တမမြောက် အပိုင်းအစပေါ်သို့ ကျရောက်သွားသည်။

ယင်းတို့က အချိန်နှင့် လေဟာနယ် ဖြစ်သည်။

ရွှီချင်း၏ ဝိညာဉ်က ရွေ့လျားသွားပြီး အချိန်နှင့် လေဟာနယ်ကို ကိုယ်စားပြုသော သလင်းကျောက်အပိုင်းအစများထံသို့ ဦးတည်သွားသည်။

၎င်းက ချက်ချင်း ပေါင်းစပ်သွားသည်။

ပြန်လည်မွေးဖွားခြင်းသံသရာစက်ဝန်းက ပြီးပြည့်စုံသွားသည်နှင့် သက်ရှိများ မွေးဖွားလာကြပြီး ကျိုးကြောင်းဆက်နွယ်မှုများ ဖြစ်ပေါ်လာကြသည်။ အချိန်သည်တော့ ဆက်ပြီး စီးဆင်းသွားနေသည်။

…..

‘ ငါရှာဖွေနေတယ်… ဘာကို ငါရှာနေတာလဲ သေချာမသိပေမဲ့ အဲ့ဒါက ငါ့ရဲ့ တာဝန်ဖြစ်ပုံရတယ်… ဘာလို့လဲဆိုတော့ ငါက မပြည့်စုံသေးလို့ပဲ ’

‘ အဲ့ဒါက တည်ရှိနေတာ ဖြစ်နိုင်သလို မတည်ရှိတာလည်း ဖြစ်နိုင်တယ် ’

‘ ငါက ကြယ်တွေထဲမှာ၊ လောကထဲမှာ၊ အရာဝတ္ထုအားလုံးထဲမှာ၊ သက်ရှိအားလုံးဆီမှာ တည်ရှိတယ်… ငါက နေရာတိုင်းမှာ တည်ရှိတယ် ’

‘ အရာဝတ္ထုအားလုံးရဲ့ ထာဝရ ရွေ့လျားမှုနဲ့ ထာဝရ ပြောင်းလဲမှုတွေက ငါ့ရဲ့ တည်ရှိမှုကို သက်သေပြုပေးနေကြတယ်… အဲ့ဒါက သက်ရှိတွေ ငါ့ကို သိနိုင်အောင်လို့ ငါခွင့်ပြုပေးထားတဲ့ နည်းလမ်းပဲ ’

‘ ဒါကြောင့် ငါက မြစ်တစ်စင်းနဲ့ တူတယ်… ငါက နေရာတိုင်းမှာ ဖြတ်သန်းစီးဆင်းနေပေမဲ့ သက်ရှိတွေက ငါ့ကို သတိမထားမိဘူး ’

‘ ငါက အရာဝတ္ထုတွေနဲ့ အဖြစ်အပျက်တွေကြားထဲမှာ စီးဆင်းနေတယ်… သက်ရှိတွေရဲ့ အတိတ်၊ ပစ္စုပ္ပန်နဲ့ အနာဂတ်မှာ ငါရှိတယ်… ကြယ်ဂြိုလ်တွေနဲ့ စကြာဝဠာတွေတောင် ဆက်ပြီး လည်ပတ်နိုင်ဖို့ ငါ့ကို လိုအပ်တယ် ’

‘ နေ့ဖြစ်ဖြစ် ညဖြစ်ဖြစ်၊ ပြန်လည်မွေးဖွားခြင်း ဒါမှမဟုတ် ကမ္မပဲဖြစ်ဖြစ် အဲ့ဒါတွေအားလုံးက ငါပဲ… ဥပဒေသတွေနဲ့ နိယာမတွေကလည်း ငါပဲ ’

‘ ငါတိတ်ဆိတ်နေရင် အရာအားလုံးက ရပ်တန့်သွားတယ် ’

‘ ငါနိုးလာတဲ့အခါ ခေတ်တွေက ပြောင်းလဲသွားတယ် ’

‘ တစ်ချိန်တည်းမှာ ငါက မတည်ရှိနေတာလည်း ဟုတ်တယ် ’

‘ ငါ့ကို ခံစားသိနိုင်တယ်… ဒါပေမဲ့ ငါ့ကို ဘယ်တော့မှ မမြင်နိုင်ဘူး… အခြေအနေအမျိုးမျိုးမှာ ငါက အတွေးတစ်ခုတည်းကနေ မွေးဖွားလာတယ် ’

‘ ငါက အစဆိုလည်း ဟုတ်တယ်… ဒါပေမဲ့ ဘယ်ကနေ စလဲဆိုတာ ငါမသိဘူး… ငါမရှိခင် အစဆိုတာ မရှိခဲ့တာလည်း ဖြစ်နိုင်တယ် ’

‘ ဒါကြောင့် အဲ့ဒီမတိုင်ခင် ငါက မတည်ရှိခဲ့တာ ဖြစ်နိုင်တယ် ’

‘ သက်ရှိအားလုံးရဲ့ မွေးဖွားမှုနဲ့ ဖြစ်တည်မှုက ငါ့ကို အသက်ပေးခဲ့တာ ဖြစ်နိုင်တယ်… သူတို့ကြောင့် ငါက အဓိပ္ပာယ်ရှိလာတယ် ’

‘ ငါက စကြာဝဠာထဲမှာ တကယ် မတည်ရှိဘူးလို့ တချို့က ယုံကြည်ထားကြတယ်… သူတို့အမြင်မှာ ငါက သက်ရှိတွေနဲ့ အရာဝတ္ထုတွေရဲ့ ရွေ့လျားမှုကနေ ဖြစ်တည်လာတဲ့ နိယာမသဘောတရားတစ်ခုပဲ… ငါက အလျင် ဒါမှမဟုတ် ရွေ့လျားမှုကို ဖော်ပြနိုင်တဲ့ နည်းလမ်းတစ်ခုသာသာပဲ ’

‘ တချို့လူတွေကျတော့ ငါက ရှေးခေတ်သက်ရှိတွေ ဖန်တီးခဲ့တဲ့ ပုံရိပ်ယောင်တစ်ခုလို့ ယုံကြည်နေကြတယ် ’

‘ ဒါကြောင့် ငါတကယ်တည်ရှိနေတာ ဟုတ်မဟုတ် အတည်ပြုဖို့ သက်ရှိတွေက အကြိမ်ပေါင်းများစွာ ကြိုးစားခဲ့ကြတယ်… သူတို့က ငါ့ကို အာရုံခံကြတယ်… လေ့လာစူးစမ်းကြတယ် ’

‘ ဘာပဲဖြစ်ဖြစ်ပါ ငါက တကယ်တည်ရှိနေတာ ဟုတ်မဟုတ် အဲ့ဒါကို ဂရုမစိုက်ပါဘူး ’

‘ ဘာကြောင့်လဲဆိုတော့ သူတို့ရဲ့ နောက်ဆုံးရည်ရွယ်ချက်က ငါ့ကို ထိန်းချုပ်ဖို့ပဲ ’

‘ အဲ့ဒီလိုနဲ့ ငါ့မှာ နာမည်တွေ အများကြီး ရှိလာတယ်… အများစုက ငါ့ကို အချိန်လို့ ခေါ်တယ်… တချို့ကတော့ အခိုက်အတန့်လို့ ခေါ်ပြီး တချို့ကတော့ အမှတ်လို့ သတ်မှတ်ကြတယ် ’

‘ ငါ့မှာ နာမည်တွေ အများကြီးပဲ ရှိတယ် ’

‘ ဒါပေမဲ့ အဲ့ဒါတွေအားလုံးက ငါ့ကို သူတို့ပေးထားတဲ့ နာမည်တွေချည်းပဲ ’

‘ အဲ့ဒါတွေထဲမှာ ငါ့ရဲ့ တကယ့်နာမည် မပါဘူး ’

‘ ဒါပေမဲ့ ငါဂရုမစိုက်ပါဘူး ’

‘ ပြီးတော့ ငါက အမည်မသိ တစ်စုံတစ်ခုကို ဆက်ပြီး ရှာဖွေနေခဲ့တယ် ’

‘ အဲ့ဒါနဲ့ပတ်သက်ပြီး ရှာဖွေမှုက အဆုံးမရှိဘူးလို့ ငါတွေးမိလာတယ်… ရှာဖွေတာက ငါ့အတွက် ဘာမှအကျိုးအမြတ်မရှိဘူးလို့ ငါခံစားမိလာတယ် ’

‘ အဲ့ဒါက လူတချို့နဲ့ ငါမတွေ့ဆုံခင်အထိ ကြာမြင့်ခဲ့တယ်… သူတို့က အရမ်းထူးခြားတယ် ’

‘ သူတို့က အရမ်းအစွမ်းထက်ပြီး ငါ့ရဲ့ အစစ်အမှန်ကို မြင်နိုင်ကြတယ်… သူတို့က ငါနဲ့ ဆက်သွယ်မှုတစ်ခုကို တည်ဆောက်နိုင်တဲ့အထိ သန်မာကြတယ်… သူတို့ထဲက တချို့က ငါနဲ့ မိတ်ဆွေဖြစ်လာကြတယ် ’

‘ တစ်ယောက်ဆိုရင် ငါ့ဆီ ရံဖန်ရံခါ အလည်ရောက်လာတတ်တယ်… သူက လက်ထဲမှာ ပန်းတစ်ပွင့်ကို ကိုင်ထားပြီး အဲ့ဒါက လှလားလို့ ငါ့ကို မေးတယ် ’

‘ တစ်ယောက်က ငါ့အရှေ့မှာ ရွက်လွှင့်သွားခဲ့တယ်… သူက အဝေးကို လှမ်းမျှော်ကြည့်ပြီး တိတ်တဆိတ် သက်ပြင်းချလိုက်တယ် ’

‘ တစ်ယောက်က ကံကြမ္မာက ဘာလဲလို့ ငါ့ကို မေးတယ် ’

‘ အခြားတစ်ယောက်က ငါ့ကို အကြွေးစာရင်း ရေးခိုင်းချင်တယ် ’

‘ ဒါပေမဲ့ ငါနဲ့ အချိန်အကြာဆုံး နေခဲ့တဲ့ တစ်ယောက်က အနက်ရောင်ဝတ်စုံကို သဘောကျတဲ့ လူပဲ… သူက ငါ့အရှေ့မှာ မကြာခဏ ထိုင်လေ့ရှိပြီး အဝေးကြီးကို တိတ်တဆိတ် ငေးကြည့်နေလေ့ရှိတယ် ’

‘ ငါတို့က တည်ရှိမှုအားလုံးရဲ့ ဖြစ်စဉ်အားလုံးကို အတူတကွ ကြည့်ရှုခဲ့ကြတယ် ’

‘ တစ်ကြိမ်မှာ သူက လက်မြှောက်လိုက်ပြီး လက်ဟန်တစ်ခုကို ပြုလုပ်လိုက်တယ်… အဲ့ဒီအခါ အရာအားလုံးက ပြောင်းလဲသွားပြီး အချိန်က အသစ်တဖန်စတင်လာတယ်… အရာအားလုံးက အစကနေ ပြန်စတင်လာတယ်’

‘ သူက ထပ်ခါထပ်ခါ အဲ့ဒီလို လုပ်ဆောင်ခဲ့တယ်… အကြိမ်ပေါင်း မရေမတွက်နိုင်အောင်ပဲ ’

‘ ငါဘာမှနားမလည်ဘူး ’

‘ အကြောင်းအရင်းကို ငါမေးကြည့်တော့ သူက သူ့ဇနီးကို အသက်ပြန်ရှင်လာအောင် လုပ်နေတာလို့ ပြောတယ် ’

‘ သူ့ဆန္ဒပြည့်မြောက်ပါစေလို့ ငါဆုတောင်းပေးလိုက်တယ် ’

‘ နောက်ပိုင်းကျတော့ သူတို့အားလုံး ပျောက်သွားကြတယ် ’

‘ ငါတစ်ယောက်တည်းပဲ ဆက်ပြီး စီးဆင်းနေတယ် ’

‘ အဲ့ဒါက အစမရှိသလို အဆုံးမရှိဘူး ’

‘ ငါက ဆက်ပြီး ရှာဖွေနေခဲ့တယ် ’

‘ အဲ့ဒီနောက် ငါက လိပ်ပြာတစ်ကောင်ကို မြင်တွေ့သွားတယ် ’

လိပ်ပြာက သူ့ကိုယ်သူ ဟာမိုနီရက် ပိုးစာဖြူလို့ ပြောတယ်…

‘ တကယ်တော့ အဲ့ဒီလိပ်ပြာက ဒီမတိုင်ခင် အရင်ကတည်းက ငါ့အရှေ့မှာ ထွက်ပေါ်ခဲ့ဖူးတယ်… ဒါပေမဲ့ ငါသတိမထားမိခဲ့ဘူး… ဒီတစ်ကြိမ်မှာတော့ လိပ်ပြာက ငါ့အရှေ့ကို တန်းတန်းမတ်မတ် ပျံသန်းလာတယ် ’

‘ လိပ်ပြာက စကြာဝဠာလို့ခေါ်တဲ့ တည်ရှိမှုတစ်ခုအကြောင်း ငါ့ကို ပြောပြတယ်… စကြာဝဠာက အချိန်ကို အဆုံးမဲ့စွာ လိုက်ရှာဖွေနေတယ်တဲ့ ’

‘ စကြာဝဠာနဲ့ ငါက မရေမတွက်နိုင်တဲ့ အချိန်လမ်းကြောင်းတွေထဲမှာ ဖြတ်သန်းနေတယ်… ငါတို့က မရေမတွက်နိုင်တဲ့ အချိန်တွေထဲမှာ မျက်နှာချင်းဆိုင်စွာ ရပ်နေကြတယ်… ဒါတောင် ငါတို့က မကြာခဏ ဝေးကွာနေတယ်လို့ ခံစားမိပြီး တစ်ယောက်ကိုတစ်ယောက် လွမ်းဆွေးနေကြတယ်… နောက်ဆုံးမှာတော့ စကြာဝဠာက ငါတို့နှစ်ယောက်စလုံးဟာ တစ်ယောက်တည်းပဲဆိုတာ နားလည်သွားတယ် ’

‘ တကယ်လို့ ငါတည်ရှိရင် စကြာဝဠာလည်း တည်ရှိလိမ့်မယ်… တကယ်လို့ ငါသေဆုံးသွားရင် စကြာဝဠာလည်း ပျက်စီးသွားလိမ့်မယ် ’

‘ ဒါပေမဲ့ ငါတို့က ရေနဲ့ မှင်လိုပဲ… အမြဲတမ်း ရောစပ်နေပေမဲ့ ဘယ်တော့မှ မတွေ့ဆုံနိုင်ဘူး ’

‘ တစ်ယောက်က အခြားတစ်ယောက်ကို မရှာဖွေနိုင်ဘူး ’

‘ ဒီလိပ်ပြာလေးတစ်ကောင်ပဲ စကြာဝဠာနဲ့ ငါ့ကို အတူယှဉ်တွဲ မြင်နိုင်တယ်… ပြီးတော့ သူက ငါတို့နှစ်ယောက်ကို ပေါင်းစည်းပေးနိုင်တဲ့ တစ်ခုတည်းသော ဆက်သွယ်မှုဖြစ်တယ် ’

‘ လိပ်ပြာလေးက သူ့အပေါ်ကို ဆင်းသက်လာဖို့ ငါ့ကို ပြောတယ်… စကြာဝဠာက သူ့ထဲမှာ ရှိတယ်တဲ့ ’

‘ သူပြောတဲ့အတိုင်း ငါဆင်းသက်လိုက်တယ် ’

‘ ချက်ချင်းဆိုသလိုပဲ… နောက်ဆုံးမှာတော့ စကြာဝဠာကို ငါမြင်တွေ့သွားတယ် ’

‘ စကြာဝဠာကလည်း ငါ့ကို မြင်သွားတယ် ’

အဲ့ဒါက…

အချိန်က ပေါ်လျှိုးလာပြီး သက်ရှိအားလုံးက မွေးဖွားလာကြတယ်… အဲ့ဒီနောက် ဟာမိုနီရက် ပိုးစာဖြူက ထွက်ပေါ်လာပြီး စကြာဝဠာက ဖြစ်တည်လာတယ်…

အဲ့ဒီအခိုက်အတန့်မှာ အချိန်နဲ့ လေဟာနယ်က အတူတကွ ရောယှက်သွားပြီး တစ်ပေါင်းတစ်စည်းတည်း ဖြစ်သွားတယ်…

အဲ့ဒီလိုနဲ့ အချိန်လေဟာနယ်က ဖြစ်ပေါ်လာတယ်…

အဲ့ဒါက…

စကြာဝဠာ ဖြစ်တည်လာပြီး အချိန်က ပေါ်လျှိုးလာတဲ့အခါ မူလအစစ်အမှန်က ထွက်ပေါ်လာလိမ့်မယ်… ပြီးတော့ အချိန်လေဟာနယ်က ဖန်တီးခံရလိမ့်မယ်…

ရွှီချင်းက ပြန်နိုးလာသည်။

အဌမမြောက် အန္တိမတာအိုက သူ၏ ခန္ဓာကိုယ်ထဲမှ ထွက်ပေါ်လာသည်။

ကျယ်လောင်သော ပေါက်ကွဲသံက သူ၏ ခန္ဓာကိုယ်ထဲမှာ ပဲ့တင်ထပ်သွားသည်။

…..

အချိန်အတော်ကြာပြီးနောက် ရွှီချင်းက မျက်လုံးပြန်ဖွင့်လိုက်သည်။

သူမျက်လုံးဖွင့်လိုက်သည့်အခိုက် သူ၏ မြင်ကွင်းထဲမှ အရာအားလုံးက ပုံပျက်တွန့်လိမ်သွားပြီး ဝေဝါးသွားသည်။

သို့သော်လည်း သူက မျက်လုံးပြန်မှိတ်လိုက်ပြီး သူ၏ စိတ်ထဲမှာ ပုံဖော်လိုက်သည့်အခါ အရာအားလုံးက သလင်းကျောက်ပမာ ကြည်လင်ရှင်းလင်းသွားသည်။

သူ၏ အတွေးများထဲတွင် သူက အရာအားလုံးကို မြင်နိုင်စွမ်း ရှိသည်။ သူက သက်ရှိအားလုံး၏ အတိတ်၊ ပစ္စုပ္ပန်နှင့် အနာဂတ်ကို မြင်နိုင်သည်။ သူက သက်ရှိများ၏ အနှစ်သာရကိုပင် မြင်နိုင်ပေသည်။

အရာအားလုံးက ကြည်လင်ရှင်းလင်းသည်။ သူ၏ မျက်လုံးအောက်တွင် မည်သည့်အရာကိုမှ မဖုံးကွယ်နိုင်ပေ။ မွေးဖွားသည့်အချိန်မှစ၍ သေဆုံးသည်အထိ ဖြစ်စဉ်အားလုံးက သူ၏ မျက်လုံးအရှေ့မှာ ထွက်ပေါ်လာသည်။

ပြန်လည်မွေးဖွားခြင်းသံသရာစက်ဝန်းတစ်ခုစီ၌ သက်ရှိများ နေထိုင်ကြသည်။ ၎င်းတို့ကို မရေမတွက်နိုင်သော ပုံရိပ်များက ထပ်ဆင့်လွှမ်းခြုံထားကြသည်။ ထိုပုံရိပ်များသည် အချိန်နှင့် လေဟာနယ်၏ ပေါင်းစပ်မှုမှ ဖြစ်ပေါ်လာကြခြင်း ဖြစ်သည်။

အရာအားလုံးက ပုံရိပ်ယောင်အခြေအနေမှာ ရှိကြသည်။

သူက သက်ရှိများ၏ အနှစ်သာရများ၊ အရိုးများ၊ ဝိညာဉ်များနှင့် ပြန်လည်မွေးဖွားခြင်းသံသရာစက်ဝန်းကို မြင်နိုင်သည်။

သိုလှောင်အိတ်ထဲမှ ပစ္စည်းများသည်ပင် သူ၏ အမြင်အာရုံကို မဖုံးကွယ်နိုင်ပေ။

ယင်းက အနန္တအသိဉာဏ်နှင့် ဆင်တူသည်။

သူက သက်ရှိအားလုံး၏ အတွေးများကိုပင် ထိန်းချုပ်နိုင်ပြီး ၎င်းတို့အား သူ၏ လိုအပ်ချက်နှင့် ကိုက်ညီသော ရွေးချယ်မှုများကို ပြုလုပ်စေခိုင်းနိုင်သည်။

ယင်းက ကံကြမ္မာနှင့် ဆင်တူသည်။

ထိုခံစားမှုမှာ သူက အချိန်မရွေး ပြုပြင်ပြောင်းလဲပစ်နိုင်သော စာအုပ်တစ်အုပ်ကို ကြည့်နေရသည့်အလားပင်။

ထို့ပြင် သူက အတွေးတစ်ချက်ဖြင့် မည်သည့်နေရာကိုမဆို သွားလာနိုင်သည်ဟုလည်း ခံစားမိသည်။

အတိတ်ဖြစ်စေ သို့မဟုတ် အနာဂတ်ဖြစ်စေ မည်သည့်အချိန်လေဟာနယ်ဖြစ်ပါစေ သူက ချက်ချင်း သွားရောက်နိုင်သည်။

သူမလုပ်နိုင်သောအရာ ဘာမှမရှိသည့်အလားပင်။

ထိုအတွေးက သူ၏ စိတ်ထဲမှာ ထွက်ပေါ်လာသည်နှင့်ချက်ချင်း ရွှီချင်းက ခေါင်းမော့လိုက်ပြီး သူ၏ အတွေးများကို ဖြန့်ကြက်လိုက်သည်။

အစောနက ဝေဝါးခဲ့သော အရာများက ယခု ကြည်လင်ရှင်းလင်းသွားသည်။

ပန်းချီစာလိပ်၏ အပြင်ဘက်ရှိ မီးတောက်များ၊ ဆေးမီးဖိုနှင့် ကမ္ဘာငယ်ကို သူမြင်တွေ့သွားသည်။ အမှန်မှာ သူက ကမ္ဘာငယ်၏ အပြင်ဘက်လောကမှ အမှတ်ငါးကြယ်တာရာစက်ဝန်းကိုပင် မြင်တွေ့သွားသည်။

ထို့နောက် သူက သက်ရှိများကို မြင်တွေ့သွားသည်။

သူက ဤအခိုက်အတန့်မှာ မည်သည့်အရာကိုမဆို ထွင်းဖောက်မြင်နိုင်လာဟန် ရ၏။

ရွှီချင်းက ခေါင်းမော့လိုက်သည့်အခါ အနီရောင်မိုးသောက်အလင်းထဲမှ ပုံရိပ်ဆယ့်နှစ်ခုကို မြင်တွေ့သွားသည်။

သူတို့အားလုံးက အနီရောင်မိုးသောက်အလင်းထဲမှာ တစ်ပြိုင်နက် ထွက်ပေါ်လာကြပြီး အဝေးမှ ရွှီချင်းကို စိုက်ကြည့်နေကြသည်။

ထိုပုံရိပ်ဆယ့်နှစ်ခု၏ အပေါ်တွင် အလွန်ကြီးမားကျယ်ပြောသော အင်မော်တယ်နန်းတော်(၁၁)ခုရှိကြောင်း ရွှီချင်း မြင်တွေ့သွားသည်။ အင်မော်တယ်နန်းတော်များထဲတွင် ပုံရိပ်တစ်ခုစီက ဖော်မပြနိုင်သော ကိုယ်ရောင်ကိုယ်ဝါနှင့်အတူ တည်ရှိနေကြသည်။

အင်မော်တယ်နန်းတော်များ၏ အထက်တွင် အထွတ်အမြတ် တည်ရှိမှုတစ်ပါးက တင်ပျဉ်ခွေလျက် တရားထိုင်နေသည်။ သူ၏ တည်ရှိမှုက အမှတ်ငါးကြယ်တာရာစက်ဝန်းတစ်ခုလုံးကို လွှမ်းခြုံထားသည်။

ချက်ချင်းဆိုသလို အသံတစ်သံက ဗလာနတ္ထိထဲမှ ပျံ့လွင့်လာသည်။

“ အာဏာစက်ဆိုတာ အင်မော်တယ်တွေရဲ့ ရေသောက်မြစ်ဖြစ်သလို နတ်ဘုရားတွေကို အမြစ်ဖြတ်သုတ်သင်ဖို့ အခြေခံအုတ်မြစ်လည်း ဖြစ်တယ်… တကယ်လို့ မင်းက အာဏာစက်ကို ထိန်းချုပ်ချင်တယ်ဆိုရင် အာဏာစက်ကို ကိုယ်တိုင် ခံစားကြည့်ရမယ် ”

နောက်အခိုက်အတန့်မှာ ရွှီချင်း၏ ခန္ဓာကိုယ်က တုန်ယင်သွားသည်။

ဖော်မပြနိုင်သော ကြောက်မက်ဖွယ်ရာ အင်အားတစ်ခုက အရပ်ရှစ်မျက်နှာထံမှ၊ ဗလာနတ္ထိထံမှ၊ အဆင့်မြင့်ကြယ်တာရာစက်ဝန်း(၃၆)ခုစလုံးထံမှ ထွက်ပေါ်လာကြောင်း သူအာရုံခံမိသွားသည်။

ထိုအင်အားက သူ၏ ခန္ဓာကိုယ်ပေါ်သို့ ကျရောက်လာသည်။

ဤအခိုက်အတန့်မှာ အဆင့်နိမ့်ကြယ်တာရာစက်ဝန်းများထဲတွင် ပြိုင်ဘက်ကင်းခဲ့သော အင်မော်တယ်များက အဘယ့်ကြောင့် အဆင့်မြင့်ကြယ်တာရာစက်ဝန်းများထဲတွင် အားနည်းသွားရကြောင်း နောက်ဆုံးမှာတော့ ရွှီချင်း နားလည်သွားသည်။

အဘယ့်ကြောင့်ဆိုသော် အာဏာစက်ကို ထိန်းချုပ်ချင်သည့် လူသည် အာဏာစက်၏ စွမ်းအားကို အရင်ဆုံး ခံစားကြည့်ရလိမ့်မည်။

ရှင်းလင်းစွာပင် ထိုသို့အဖြစ်အပျက်မျိုးက သူ့ဆီမှာ စောစီးစွာ ဖြစ်မလာသင့်ပေ။

ထိုသို့ဖြစ်ရသည့် အကြောင်းအရင်းမှာ သူ၏ အဌမမြောက် အန္တိမတာအို မွေးဖွားလာသည့်အခိုက် သူ၏ အာဏာစက်သည်လည်း ၎င်းနှင့်အတူ တစ်ပါတည်း မွေးဖွားလာခဲ့သည်။

ယင်းက သူ့ကိုယ်ပိုင်အာဏာစက် ဖြစ်သည်။

အချိန်လေဟာနယ်အာဏာစက်…

ရွှီချင်းက နားလည်သွားသည်။ နောက်အခိုက်အတန့်မှာ သူက အကြည့်ပြန်ရုပ်လိုက်သည်။ သူ၏ ခန္ဓာကိုယ်ထဲမှ အဌမမြောက် အန္တိမတာအိုက လွှမ်းမိုးဖိနှိပ်သော အင်အားနှင့်အတူ ပေါ်လျှိုးလာသည်။ ရွှီချင်း၏ ခန္ဓာကိုယ်က တုန်ယင်သွားသည့်အခါ အဌမမြောက် မဟာလောကက ဖွဲ့စည်းသွားသည်။

အချိန်လေဟာနယ် မဟာလောက…

တစ်ချိန်တည်းမှာ အနောက်ပိုင်းကြယ်စင်စု၏ အင်မော်တယ်တာအိုဂိုဏ်းထဲ၌…

အလွန်ကျယ်ပြောသော ယာတောထဲတွင် အဆိပ်ဘုရင်က မတ်တတ်ရပ်နေသည်။ သူ၏ အရှေ့တွင် ယခင်က ညှိုးနွမ်းခြောက်သွေ့နေခဲ့သော ပန်းပင်က ရုတ်တရက် ပွင့်လန်းလာသည်။ ၎င်းက သေခြင်းအခြေအနေမှ ချက်ချင်း ပြန်ရှင်သန်လာသည်။ မျက်စိတစ်မှိတ်အတွင်းမှာ အပင်က အထွတ်အထိပ်အထိ ကြီးထွားလာသည်။

ထို့နောက် အပင်က နေရာမှ ခွဲခွာသွားပြီး အဆိပ်ဘုရင်၏ အရှေ့မှာ မည်သည့်သဲလွန်စမှ မကျန်ဘဲ ပျောက်ကွယ်သွားသည်။

၎င်း၏ ဘေးမှ တခြားအပင်သည်တော့ ဤအခိုက်အတန့်မှာ ညှိုးနွမ်းခြောက်သွေ့သွားသည်။

ထူးဆန်းသော အလင်းက အဆိပ်ဘုရင်၏ မျက်လုံးထဲမှာ ထွက်ပေါ်လာပြီး သူ၏ အသက်ရှူသံက အနည်းငယ် မြန်ဆန်လာသည်။

“ မင်းက ငါစောင့်မျှော်နေတဲ့ ကမ္မပဲ ”