အဆင့်သတ်မှတ်ချက်တိုက်ပွဲ

အချိန်ကြာလာသည်နှင့်အမျှ ကမ္ဘာမြေအဆင့်သတ်မှတ်ချက် ကျောက်စာတိုင်ပေါ်မှာ နာမည်များက တိုးလာခဲ့၏။

ဆူဇီမိုကတော့ သူသည် ဤနေရာကို စောင့်ကြပ်နေ၏။ မဟာကျင်းအင်မော်တယ်နိုင်ငံနှင့် အင်မော်တယ်ပျံဂိုဏ်းမှ ကျန်ရှိနေသော ကမ္ဘာမြေအင်မော်တယ် ၃ဦးသည်လည်း ထွက်ပြေးလွတ်မြောက်နိုင်ခြင်းမရှိဘဲ မိုးကောင်းကင်ကိုးလွှာမှာ သူ၏ သတ်ဖြတ်ခြင်း ခံလိုက်ကြရ၏။

မင်းသားယွမ်ကျောနှင့် ကောင်းကင်အင်မော်တယ် အဖြူရောင်ပင်လယ်က ဘာမှ မတတ်နိုင်ဘဲ စောင့်ကြည့်နေရ၏။

ထိုအခိုက်အတန့်မှာ မဟာကျင်းအင်မော်တယ်နိုင်ငံနှင့် အင်မော်တယ်ပျံဂိုဏ်းမှ ထိပ်သီး ကမ္ဘာမြေအင်မော်တယ် ၂၂ဦးစလုံးက ခြွင်းချက်မရှိ ဖယ်ရှားရှင်းလင်းခံလိုက်ရလေပြီ။

အသန်မာဆုံး ကမ္ဘာမြေအင်မော်တယ်များဆိုလျှင်ပင် ကမ္ဘာမြေအင်မော်တယ်များသည် ဤအဖွဲ့အစည်းနှစ်ခုအတွက် ဘာမှ မဟုတ်ပေ။

အင်မော်တယ်ပျံဂိုဏ်းမှာ ကမ္ဘာမြေအင်မော်တယ်များက အပြင်ဂိုဏ်းတပည့်များသာ ဖြစ်၏။

မဟာကျင်းအင်မော်တယ်နိုင်ငံမှာ သူတို့သည် ကမ္ဘာမြေ အာဏာပါးကွက်သား အစောင့်တပ်သားများသာလျှင် ဖြစ်၏။

လူ ၂၀ကျော်ကို ဆုံးရှုံးရခြင်းက အဖွဲ့အစည်းတစ်ခုအတွက် ဘာမှ ပြောပလောက်စရာ မဟုတ်ပေ။ အဲဒါက ဆံတစ်ခြည်မျှင်စာ၏ ပမာဏလောက်ပင် မရှိချေ။

သို့သော်လည်း အဖွဲ့အစည်းနှစ်ခု၏ နာမည်ဂုဏ်သတင်းအပေါ် သက်ရောက်မှုက စဉ်းစားကြည့်၍ မရနိုင်အောင်ပင်။

အဖွဲ့အစည်းနှစ်ခုသည် ပြန်ဝင်စား အင်မော်တယ်တစ်ယောက်နှင့်အတူ အတူပူးပေါင်းခဲ့ကြသော်လည်း သူတို့သည် လူတစ်ယောက်တည်း၏ သတ်ဖြတ်ခြင်းခံရပြီး ကမ္ဘာမြေအဆင့်သတ်မှတ်ချက်ကနေ ဖယ်ရှားရှင်းလင်းခံခဲ့ရ၏။ သိပ်မကြာခင် ဤသတင်းက ဂမ္ဘီရမိုးကောင်းကင် ကုန်းမြေတိုက်တစ်ခုလုံးသို့ ပျံ့နှံ့ပြီး ကြီးမားစွာ ဂယက်ရိုက်သွားစေပေလိမ့်မည်။

တကယ်ဆို အတန်ကြာသည်အထိ အဲဒါသည် ဂမ္ဘီရမိုးကောင်းကင် ကုန်းမြေတိုက်မှ ကျင့်ကြံသူများစွာ၏ ဆွေးနွေးပြောဆိုစရာ ခေါင်းစဉ်တစ်ခု ဖြစ်လာပေလိမ့်မည်။

မင်းသားယွမ်ကျောနှင့် ကောင်းကင်အင်မော်တယ် အဖြူရောင်ပင်လယ်ကို အရှုံးသမားများအဖြစ် သတ်မှတ်ရပေလိမ့်မည်။

မဟာကျင်းအင်မော်တယ်နိုင်ငံနှင့် အင်မော်တယ်ပျံဂိုဏ်းကလည်း ရောပါငြိစွန်း သက်ရောက်ခံရပေလိမ့်မည်။

ရှုံးထွက်အဆင့်က မပြီးဆုံးသေးသော်လည်း ရင်ပြင်ပေါ်မှာရှိသော ကျင့်ကြံသူများစွာက အဲဒါကို ဆက်လက်၍ စိတ်မဝင်စားကြတော့ပေ။

လူတိုင်းသည် ကျောက်စာတိုင်ပေါ်မှာ ထပ်တိုးလာသည့် နာမည်များကိုသာ ရံဖန်ရံခါ မော့ကြည့်တတ်ကြ၏။

သူတို့အများစုသည် စောစောက ဖြစ်ပွားခဲ့သည့် တုန်လှုပ်စရာကောင်းသော ကမ္ဘာမြေအင်မော်တယ်တိုက်ပွဲမှာ နစ်မျောနေပြီး စိတ်လှုပ်ရှားနေကြဆဲဖြစ်၏။

“တက္ကသိုလ်က ဆူဇီမိုက တိုက်ပွဲတစ်ပွဲတည်းနဲ့ တကယ့်ကို နာမည်ကြီးသွားတော့မှာပဲ”

“အမှန်ပဲ.. သူက လာမယ့် အဆင့်သတ်မှတ်ချက်တိုက်ပွဲမှာ ဝင်မပါတော့ဘူးဆိုရင်တောင်မှ ကိစ္စမရှိဘူး.. ဒီတစ်ခေါက် ကမ္ဘာမြေအဆင့်သတ်မှတ်ချက်ရဲ့ ထိပ်ဆုံးလူကတောင် သူ့ရဲ့ နာမည်ဂုဏ်သတင်းကို ဖုံးအုပ်နိုင်မှာ မဟုတ်လောက်တော့ဘူး”

ကျင့်ကြံသူများစွာအတွက် ကမ္ဘာမြေအဆင့်သတ်မှတ်ချက်အတွက် တိုက်ပွဲက နာမည်ဂုဏ်သတင်းသက်သက်သာလျှင် ဖြစ်၏။

ဆူဇီမိုသည် ဤတစ်ခေါက် မိုးကောင်းကင်ကိုးလွှာမှာ လုံလောက်သည့် ရတနာများကို ရရှိသွားခဲ့ပြီဖြစ်၏။

ယခု သူသည် တုန်လှုပ်စရာကောင်းသော တိုက်ပွဲတစ်ခုကနေတစ်ဆင့် နာမည်ကြီးကျော်ကြားနေလေပြီ။

လူတိုင်းအတွက်တော့ ဆူဇီမိုက အဆင့်သတ်မှတ်ချက်တိုက်ပွဲမှာ ဆက်လက်၍ ဝင်မပါလျှင်လည်း ကိစ္စမရှိတော့ပေ။

နောက်ထပ် နှစ်နာရီ ကုန်ဆုံးသွားခဲ့၏။

သေဆုံးသွားသော အင်မော်တယ်ထိုက်ဟွာနှင့် အခြားသူများအပြင် ကမ္ဘာမြေအဆင့်သတ်မှတ်ချက် ကျောက်စာတိုင်ပေါ်မှာ ကမ္ဘာမြေအင်မော်တယ် ၁၀၀ ရောက်ရှိလာခဲ့ပြီဖြစ်၏။

ကမ္ဘာမြေအဆင့်သတ်မှတ်ချက်၏ ရှုံးထွက်အဆင့်က တရားဝင် ပြီးဆုံးသွားပြီဟု အဓိပ္ပာယ်ရလေသည်။

ပကတိအင်မော်တယ် ရှဲ့လင်က ဖြည်းဖြည်းချင်း မတ်တတ်ထရပ်ပြီး သူ၏ နှာရောင်က တောက်ပသွား၏။

သူ၏ လက်နှစ်ဖက်ကို လေထဲမှာ အဆက်မပြတ် လှုပ်ရှားပြီး အစစ်အမှန်အမြုတေ ဂမ္ဘီရအလင်းများကို ထုတ်ဖော်ကာ မိုးကောင်းကင်ထက်ရှိ ကြေးမုံထဲသို့ ဝင်ရောက်သွားစေ၏။

မိုးကောင်းကင်ထက်မှာ ရောင်ပြန်ဟပ်နေသော မြင်ကွင်းများက တဖြည်းဖြည်း ပျက်ပြယ်သွား၏။

ထို့နောက် ဧရာမ အက်ကွဲကြောင်းတစ်ခုက လေဟာနယ်ထဲမှာ ပေါ်ထွက်လာ​ပြီး ပုံရိပ်များစွာက တရိပ်ရိပ် ကျဆင်းလာခဲ့၏။

ကျင့်ကြံသူများစွာက သူတို့၏ ခန္ဓာကိုယ်များကို ထိန်းချုပ်ပြီး ဘဝတစ်ခုကို တွေ့ကြုံဖြတ်သန်းလာသည့်အလား ခံစားရကာ ယန်ယန်းနန်းတော် ရှိရာသို့ ပြန်လည်ရောက်ရှိလာကြ၏။

ဤတစ်ခေါက် ရှုံးထွက်အဆင့်မှာ ကမ္ဘာမြေအင်မော်တယ် တစ်သိန်းကျော် သေဆုံးခဲ့ရ၏။

အခြားသော ကျင့်ကြံသူများကလည်း တစ်ယောက်ပြီးတစ်ယောက် ဆင်းသက်လာပြီး သူတို့၏ ဂိုဏ်းသားများရှိရာသို့ ပြန်လည်ရောက်ရှိသွားကြ၏။ ရှဲ့လင်၏ စိတ်ဝိညာဉ်အသိစိတ်ဖြင့် ထိန်းချုပ်မှုအောက်မှာ ကမ္ဘာမြေအဆင့်သတ်မှတ်ချက်ပေါ်မှ ကျင့်ကြံသူ ၁၀၀က ရင်ပြင်ထက် လေထဲမှာ ရစ်ဝဲနေပြီး လူတိုင်း၏ စောင့်ကြည့်ခြင်း ခံနေရ၏။

ကျင့်ကြံသူ ၁၀၀ကို ရှုံးထွက်အဆင့်၏ အဆင့်သတ်မှတ်ချက်အရ ဒေါင်လိုက် တန်းစီထား၏။

သူတို့၏ ခေါင်းဆောင်က ရှုံးထွက်အဆင့်၏ နံပါတ်တစ် ဖုန်းယင်​ ဖြစ်၏။

“ကြိုတင်ခန့်မှန်းထားတဲ့အတိုင်း နံပါတ်တစ်က ဖုန်းယင်ပဲ”

“ထူးဆန်းတယ်.. ဒုတိယက တောင်တန်းပင်လယ် အင်မော်တယ်ဂိုဏ်းက ယွဲ့ဖုန်လား… တတိယက မင်းသမီး သက်တံနီပဲ.. အင်မော်တယ်ထိုက်ဟွာက ဘယ်ရောက်သွားတာလဲ”

ရှုံးထွက်အဆင့်မှာ ပါဝင်ခဲ့ကြသော ကမ္ဘာမြေအင်မော်တယ် အများစုသည် ယခုတင် မိုးကောင်းကင်ကိုးလွှာကနေ ထွက်ခွာလာခဲ့ကြပြီး သူတို့က အဆင့် ၅ မှာ ဖြစ်ပျက်ခဲ့သည့်အရာများကို မသိရှိကြသေးပေ။

“ထျဲဟန်နဲ့ ချင်ချန်ဇီကလည်း ဘာလို့ ထိပ်ဆုံး ၁၀ယောက်ထဲမှာ မပါတာလဲ”

“ဘာ​တွေဖြစ်ကုန်တာလဲ”

“ဟာ.. အဲဒါ ဘယ်သူလဲ.. သူက ဘာလို့ ခေါင်းတွေ အများကြီးကို သယ်ထားတာလဲ”

ကမ္ဘာမြေအင်မော်တယ်တစ်ယောက်က အဆင့် ၆၈မှာ ရပ်တည်နေသော ဆူဇီမိုကို တွေ့မြင်သောအခါ အံ့အားတသင့် ရေရွတ်လိုက်၏။

အဲဒီမှာ သွေးများ စွန်းထင်းနေသော ဦးခေါင်း ၂၂လုံး ရှိပြီး ကြော့ရှင်းသန့်ပြန့်သော အစိမ်းရောင်ဝတ် ကျင့်ကြံသူတစ်ယောက်က သူတို့၏ ဆံပင်ရှည်များကို သူ၏ လက်ထဲမှာ စုကိုင်ထားလေသည်။

အဲဒါက အရမ်းကို တုန်လှုပ်စရာကောင်းလွန်းနေ၏။

ကမ္ဘာမြေအင်မော်တယ်တချို့က အာရုံစိုက်ကြည့်လိုက်ပြီး အင်မော်တယ်ထိုက်ဟွာ၊ ထျဲဟန်နှင့် စောစောက သူတို့ပြောနေခဲ့သည့် အခြားသူများ၏ ဦးခေါင်းများကို တွေ့မြင်လိုက်ရ၏။

ဘာလဲဟ..

ဘာတွေဖြစ်ကုန်တာလဲ..

ကမ္ဘာမြေအင်မော်တယ်များက တုန်လှုပ်သွားကြ၏။ သူတို့ဘေးမှာ ရှိသော တစ်ဂိုဏ်းတည်းသား ကျင့်ကြံသူတစ်ယောက်က အဆင့် ၅မှာ ဖြစ်ပွားခဲ့သည့် တိုက်ပွဲကို အသံနှိမ့်၍ ပြန်ပြောပြလိုက်၏။

ချက်ချင်းပင် ရင်ပြင်ထဲမှာ ဆူညံသံများ ထွက်ပေါ်လာ၏။

ဖြောင်း.. ဖြောင်း.. ဖြောင်း..

စားပွဲဝိုင်းတစ်ဝိုင်းကနေ လက်ခုပ်ဩဘာသံက ထွက်ပေါ်လာပြီး ယွင်ထင်က ဖြည်းဖြည်းချင်း ထရပ်ကာ ကြေညာပြောဆိုလိုက်၏။

“ဆူဇီမို.. မင်း ငါ့ကို တကယ်ပဲ စိတ်မပျက်စေခဲ့ဘူး.. ငါ ဒီတစ်ခေါက် ရောက်လာခဲ့တာ အလကားမဖြစ်တော့ဘူးပဲ.. ကောင်းလိုက်တဲ့ သတ်ဖြတ်ကွက်တွေ.. တကယ့်ကို မျက်စိပသာဒရှိတဲ့ တိုက်ပွဲတစ်ခုပဲ”

“ငါတို့နှစ်ယောက်ကြားက စိန်ခေါ်မှုကို မမေ့လိုက်နဲ့.. ကောင်းကင်အဆင့်သတ်မှတ်ချက်မှာ ငါ မင်းကို စောင့်နေမယ်”

ယွင်ထင်က အော်ဟစ်ရယ်မောပြီး ထွက်ခွာဖို့ ပြင်လိုက်၏။

သူသည် ဤခရီးစဉ်မှာ သူလိုရာကို ရရှိသွားခဲ့ပြီဖြစ်ပြီး သူက ဤနေရာမှာ ဆက်လက်၍ မနေလိုတော့ပေ။

“အဆင့်သတ်မှတ်ချက်တိုက်ပွဲက စတင်တော့မှာပဲ.. မင်းသားယွင်ထင်.. ခင်ဗျား ဆက်ပြီး စောင့်မကြည့်တော့ဘူးလား”

ရှဲ့လင်က ပြုံး၍ မေးလိုက်၏။

“ကြည့်စရာ ဘာမှ မရှိတော့ဘူး”

ယွင်ထင်က လက်ကာပြလိုက်၏။

“အဆင့်သတ်မှတ်ချက်တိုက်ပွဲ မရှိရင်​တောင် ဒီတစ်ခေါက် ကမ္ဘာမြေအဆင့်သတ်မှတ်ချက်ရဲ့ ထိပ်ဆုံးနေရာနဲ့ ထိုက်တန်တဲ့လူက တစ်ယောက်ပဲ ရှိတယ်”

ယွင်ထင်က အဲဒါကို ရှင်းရှင်းလင်းလင်း မပြောဆိုသော်လည်း သူ ရည်ညွှန်းပြောဆိုနေသည့်လူကို လူတိုင်းက သိကြလေသည်။ လူတိုင်း၏ ရင်ထဲမှာ သူတို့မှာလည်း သူတို့ ကိုယ်ပိုင်အကဲဖြတ်မှုများ ရှိနေပြီဖြစ်၏။

ထိုတိုက်ပွဲမှာ ဆူဇီမိုသည် ထိပ်သီး ကမ္ဘာမြေအင်မော်တယ် ၁၈ ဦးကို တစ်ယောက်တည်း သတ်ဖြတ်ပြီး အလွန်တရာ နာမည်ကြီးခဲ့သော အင်မော်တယ်ထိုက်ဟွာ၊ ထျဲဟန်နှင့် ချင်ချန်ဇီတို့လို ထိပ်သီးပညာရှင်များပင်လျှင် ပါဝင်ခဲ့၏။ သူသည် ကမ္ဘာမြေအဆင့်သတ်မှတ်ချက်၏ ထိပ်ဆုံးနေရာနှင့် တကယ်ပင် ထိုက်တန်လေသည်။

ရှဲ့လင်က ညင်သာစွာ ပြုံးလိုက်၏။

“ဘာပဲဖြစ်ဖြစ်.. စည်းမျဉ်းစည်းကမ်းတွေအရ အဆင့်သတ်မှတ်ချက်တိုက်ပွဲကို ဆက်ပြီး ကျင်းပရဦးမှာပဲ.. အဆင့်သတ်မှတ်ချက်တိုက်ပွဲရဲ့ နံပါတ်တစ်ကသာ ကမ္ဘာမြေအဆင့်သတ်မှတ်ချက်ရဲ့ တရားဝင် ထိပ်ဆုံးလူပဲ”

ကောင်းကင်အင်မော်တယ် တောင်ထွတ်စိမ်းက ထပ်ပြောလိုက်၏။

“တိုက်ပွဲတစ်ပွဲမှာ ကမ္ဘာမြေအင်မော်တယ်တွေ ထုတ်ဖော်နိုင်တဲ့ နည်းလမ်းတွေ အများကြီး ရှိတယ်.. မိုးကောင်းကင်ကိုးလွှာမှာ သူတို့ရဲ့ တိုက်ခိုက်ရည်ခွန်အားက ကန့်သတ်ခံထားရတယ်.. သူတို့က သူတို့ရဲ့ ခွန်အားအပြည့်အဝကို မထုတ်ဖော်နိုင်ဘူး.. အဲဒီတိုက်ပွဲက တစ်ခုခုကို တကယ်တမ်း သက်သေပြမပေးနိုင်ဘူး”

ဖုန်းယင်သည် အင်ပါယာလေဘုရားကျောင်းမှ ဖြစ်၏။

ကမ္ဘာမြေအဆင့်သတ်မှတ်ချက်၏ ထိပ်ဆုံးနေရာ၏ နာမည်ဂုဏ်သတင်းနှင့် ဂုဏ်ကျက်သရေကို ဆူဇီမိုက လုယူသွားတော့မည်ကို တွေ့မြင်သောအခါ သူက အဲဒါကို လက်မလျှော့လိုပေ။

ဒါ့အပြင် ကမ္ဘာမြေအဆင့်သတ်မှတ်ချက် ကျောက်စာတိုင် ဘေးမှာ ဆူဇီမိုသည် ကလေးငယ်တစ်ယောက်ကို ဆိုဆုံးမနေသည့်အလား မိုချန်၏ ပခုံးကို ပုတ်ကာ အထက်စီးဆန်ဆန်ပြောခဲ့လေသည်။ အဲဒါက ကောင်းကင်အင်မော်တယ် တောင်ထွတ်စိမ်းကို အလွန်တရာ မခံချိမခံသာ ဖြစ်စေပြီး သူက ဆူဇီမိုကို သိပ်ပြီး အူမြူးအားရခွင့် ပေးလိမ့်မည် မဟုတ်ပေ။

ယွင်ထင်က နှုတ်ခမ်းစူပြီး ကောင်းကင်အင်မော်တယ် တောင်ထွတ်စိမ်းကို လျစ်လျူရှုလိုက်၏။

လူတိုင်းမှာ သူတို့ကိုယ်ပိုင် စံနှုန်းစံထားများ ရှိပြီး သူက သူတို့နှင့် ငြင်းခုံနေဖို့ အရေးမလုပ်နိုင်ပေ။

ယွင်ထင်က မတ်တတ်ထရပ်ပြီး ထွက်ခွာတော့မည်ပြုစဉ်မှာပင် သူ၏ အကြည့်က မဟာကျင်းအင်မော်တယ်နိုင်ငံနှင့် အင်မော်တယ်ပျံဂိုဏ်း ရှိရာဘက်သို့ ရောက်ရှိသွား၏။ သူက လှောင်ပြောင်လိုက်၏။

“ယွမ်ကျော.. အဖြူရောင်ပင်လယ်.. မင်းတို့နှစ်ယောက်က ဒီမှာ ဘာလုပ်နေကြသေးတာလဲ”

“အဲဒါ မင်းကိစ္စ မဟုတ်ပါဘူး”

မင်းသား ယွမ်ကျောက အေးစက်စွာ ပြန်ဖြေလိုက်၏။

သူတို့နှစ်ယောက်မှာ ရုပ်ဆိုးအကျည်းတန်သော အမူအရာများ ရှိနေကြ၏။ သူတို့က ယွင်ထင်ကို တိုက်ခိုက်နိုင်မည်ဆိုလျှင် သူတို့သည် သူ့ကို အပိုင်းပိုင်း ဆုတ်ဖြဲပစ်လိုက်သည်မှာ ကြာနေလောက်လေပြီ။

ယွင်ထင်က နှုတ်ခမ်းစူပြီး သူ၏ ခေါင်းကို ခါယမ်းလိုက်၏။

“မဟာကျင်းအင်မော်တယ်နိုင်ငံနဲ့ အင်မော်တယ်ပျံဂိုဏ်းက ကမ္ဘာမြေအင်မော်တယ်တွေက ကမ္ဘာမြေအဆင့်သတ်မှတ်ချက်ပေါ်ကနေ ဖယ်ရှားခံရပြီးပြီ.. မင်းတို့တွေ အရှက်ရတာ မလုံလောက်သေးဘူးလား.. မင်းတို့တွေက တချိုးတည်း လှည့်ပြန်ရမယ့်အစား ဒီမှာ ဘာဆက်လုပ်နေကြသေးတာလဲ”

“ငါတို့လူတွေက သေသွားပြီဆိုတာ တကယ်ပဲ.. ဒါပေမဲ့ တခြားဂိုဏ်းတွေနဲ့ အဖွဲ့အစည်းတွေက ကျင့်ကြံသူတွေက ကမ္ဘာမြေအဆင့်သတ်မှတ်ချက်ပေါ်မှာ ရှိနေသေးတယ်”

ကောင်းကင်အင်မော်တယ် အဖြူရောင်ပင်လယ်က အေးစက်စွာ နှာတစ်ချက်မှုတ်လိုက်၏။

“ဆူဇီမိုက ကမ္ဘာမြေအဆင့်သတ်မှတ်ချက်ရဲ့ ထိပ်ဆုံးနေရာမှာ ရပ်တည်နေတယ်လို့ မင်းပြောမှတော့ သူက ဘာလုပ်နိုင်မလဲ ကြည့်ရသေးတာပေါ့”

ဆူဇီမိုသည် မိုးကောင်းကင်ကိုးလွှာမှ တိုက်ပွဲမှာ သူ၏ ဝှက်ဖဲများ အားလုံးကို အသုံးပြုပြီး စွမ်းအင်မြောက်များစွာ သုံးစွဲခဲ့ရသည်ကို လူတိုင်း သိထား၏။ သူက ထိခိုက်ဒဏ်ရာ ရရှိထားခြင်းနှင့်အတူ သူသည် ကမ္ဘာမြေအဆင့်သတ်မှတ်ချက်ပေါ်မှ နေရာတစ်နေရာအတွက် ဆက်လက်တိုက်ခိုက်နိုင်တော့မည် မဟုတ်ပေ။

အနည်းဆုံးတော့ ဆူဇီမိုသည် ဖုန်းယင်ကို ကျော်တက်နိုင်တော့မည် မဟုတ်ပေ။

ဖုန်းယင်သည် ကမ္ဘာမြေအဆင့်သတ်မှတ်ချက် ကျောက်စာတိုင်သို့ အချိန်အတန်ကြာကတည်းက ရောက်ရှိနေခဲ့ပြီး သူ၏ စွမ်းအင်ကို စုဆောင်းနေခဲ့၏။ သူက သူ၏ အထွတ်အထိပ် အခြေအနေသို့ ပြန်လည်ရောက်ရှိနေခဲ့သည်မှာ ကြာခဲ့လေပြီ။

ဆူဇီမိုကတော့ သူသည် တိုက်ပွဲများကို အဆက်မပြတ် တိုက်ခိုက်ပြီးနောက် ခြေကုန်လက်ပန်းကျနေလေပြီ။

အနည်းဆုံး လက်ရှိအခြေအနေမှာ သူတို့နှစ်ယောက်ကြား ကွာဟချက်က အရမ်းကို ကြီးမားနေ၏။