အင်မော်တယ်ကျဆုံးလွင်ပြင်

သူ၏ နဖူးပေါ်မှ အမွေအနှစ်အမှတ်အသားကို ဖယ်ရှားလိုက်သည့်အခိုက် သက်တောင့်သက်သာဖြစ်သော ခံစားမှုက သူ၏ အသိစိတ်ထဲမှ ထွက်ပေါ်လာပြီး သဏ္ဍာန်မဲ့ လှိုင်းဂယက်များအဖြစ် ပြောင်းလဲသွားကာ ရွှီချင်း၏ နှလုံးသားထဲသို့ ပျံ့နှံ့သွားသည်။

ထိုခံစားမှုက သူ၏ ခန္ဓာကိုယ်တစ်ခုလုံးကို လွှမ်းခြုံသွားပြီး သူ၏ ခြေဖဝါးအောက်ဆီသို့ ဆန့်တန်းသွားသည်။ ထို့နောက် ယင်းက ဟင်းလင်းပြင်ထဲမှာ လွင့်ပြယ်သွားသည်။

တာအိုက အဝေးကြီးမှာ မရှိပေ။ သူ၏ ကိုယ်တွင်းထဲမှာသာ ရှိသည်။

အမွေအနှစ်ပန်းပွင့်နှင့် ကမ္မဆက်နွယ်မှုကို ဖြတ်တောက်လိုက်သည့်အခါ ရွှီချင်း၏ တာအိုက အပြင်သို့ ဆက်ပြီး မပျံ့နှံ့သွားတော့ပေ။

သူ၏ လုပ်ဆောင်မှုများမှတဆင့် မည်သူက သူ၏ တာအိုကို ချေးငှားချင်နေကြောင်း ရွှီချင်း သုံးသပ်နိုင်သည်။

‘ ငါ့တာအိုကို ချေးငှားဖို့ ငါငြင်းဆန်တယ် ’

ထို့နောက် သူက ကောင်းကင်ပေါ်သို့ ပျံတတ်သွားပြီး ကောင်းကင်ဘုံများကို ဖြတ်လျှောက်သွားသည်။ သူ၏ ရှည်လျားသော အနက်ရောင်ဆံပင်က လေထဲမှာ ပျံ့လွင့်နေပြီး သူ၏ ဝတ်စုံပြာက တဖျပ်ဖျပ်လှုပ်ခတ်နေသည်။ သူက ခြေတစ်လှမ်း လှမ်းလိုက်သည့်အခါတိုင်း ပိုပြီးဝေးကွာသော နေရာဆီသို့ ရောက်ရှိသွားသည်။

“ အာဏာစက်တွေရဲ့ အရေအတွက်က တစ်စုံတစ်ယောက်ရဲ့ တိုက်ပွဲစွမ်းအားအပေါ် သက်ရောက်မှုမရှိဘူးဆိုပေမဲ့ အဲ့ဒီမှာ အကန့်အသတ်ရှိရမယ်… မဟုတ်ရင် ဘာလို့ အဆင့်နိမ့်အင်မော်တယ်တွေက သူတို့ရဲ့ အပိုအာဏာစက်တွေကို ဖြတ်တောက်ပြီး အမွေအနှစ်အဖြစ် တခြားလူတွေကို ပေးအပ်မှာလဲ ”

“ အဆင့်နိမ့်အင်မော်တယ်တွေက သူတို့ရဲ့ အဆင့်မှာ အာဏာစက်ရဲ့ ပြီးပြည့်စုံမှုက အာဏာစက်ရဲ့ အရေအတွက်ထက် ပိုပြီးအရေးကြီးကြောင်း သိထားကြတယ် ”

“ ဒီတော့ ငါလည်းပဲ အဲ့ဒီအပိုအာဏာစက်တွေကို မလိုအပ်ဘူး ”

“ ငါလုပ်ရမှာက ငါ့ကိုယ်ပိုင်တာအိုကို ဆက်လျှောက်ပြီး ငါ့ရဲ့ အချိန်လေဟာနယ်အာဏာစက်ကို ပြီးပြည့်စုံအောင် လုပ်ဖို့ပဲ ”

ရွှီချင်းက ခေါင်းမော့လိုက်ပြီး အဆုံးမဲ့သော အနီရောင်မိုးသောက်အလင်းကို ကြည့်လိုက်သည်။

“ ငါ့ရဲ့ အချိန်လေဟာနယ်အာဏာစက်က အန္တိမတာအိုခုနစ်ခုရဲ့ ပေါင်းစည်းမှုကနေ ဖြစ်တည်လာတာပဲ… ပထမ ဒြပ်စင်ငါးခုက အခြေခံအုတ်မြစ်ဖြစ်ပြီး အချိန်နဲ့ လေဟာနယ်က စင်မြင့်ဖြစ်တယ်… အဲ့ဒါက နက်နဲသိမ်မွေ့တဲ့ လမ်းစဉ်တစ်ခုပဲ ”

“ သမိုင်းတစ်လျှောက်မှာ အချိန်လေဟာနယ်အာဏာစက်ကို ဆင်ခြင်နားလည်ခဲ့တဲ့ လူတွေက ငါတစ်ယောက်တည်း မဟုတ်တာ သေချာတယ်… တကယ်တော့ ဒီအာဏာစက်ကို ငါနားလည်သွားတဲ့အချိန်မှာ ဉာဏ်အလင်းတချို့ကို ရရှိခဲ့တယ် ”

“ ငါ့အရှေ့မှာ ဒီလမ်းစဉ်ကို စူးစမ်းရှာဖွေခဲ့ကြတဲ့ လူတွေ ရှိခဲ့ဖူးတယ်… ဒါပေမဲ့ သူတို့ရဲ့ အရေအတွက်က အရမ်းနည်းပါးတယ်… ပြီးတော့ ဘယ်သူမှ လမ်းအဆုံးကို မရောက်ခဲ့ကြဘူး ”

“ တချို့က လမ်းတစ်ဝက်မှာ ရပ်တန့်သွားကြတယ်… တချို့ကတော့ လမ်းကြောင်းပြောင်းလဲခဲ့ကြတယ် ”

“ ဒီလမ်းစဉ်မှာ ဇစ်မြစ်မရှိသေးဘူး ”

ရွှီချင်းက တွေးတောစဉ်းစားနေရင်း အရှေ့သို့ ရွေ့လျားသွားသည်။

အချိန်လေဟာနယ်အာဏာစက်အပေါ် ပိုပြီးနက်ရှိုင်းစွာ နားလည်သွားမည်ဆိုလျှင် နဝမမြောက် အန္တိမတာအိုကို ဖွဲ့စည်းနိုင်လိမ့်မည်ဟု ရွှီချင်း အာရုံခံစားမိသည်။ ထိုအချိန်ကျလျှင် သူ၏ ကျင့်ကြံခြင်းအခြေခံက အာဏာစက်၏ လွှမ်းမိုးမှုအောက်မှာ သေချာပေါက် မြင့်တတ်သွားလိမ့်မည်။

နဝမမြောက်မဟာလောကကို ဖွဲ့စည်းနိုင်သည့်အခါကျလျှင် သူက အုပ်ချုပ်သူအဆင့်သို့ တတ်လှမ်းသွားလိမ့်မည်။

“ ဒီတော့ အချိန်လေဟာနယ်ရဲ့ ပိုပြီးနက်ရှိုင်းတဲ့ အဆင့်က ဘာလဲ… ”

ရွှီချင်းက နှုတ်ဆိတ်သွားသည်။

သူက ကောင်းကင်နှင့် မြေပြင်ကြားမှာ လမ်းလျှောက်နေသည်။ တစ်ခါတစ်ရံ သူ၏ ဝိညာဉ်က ကုန်းမြေပေါ်သို့ ဆင်းသက်လာပြီး သဲလွန်စများကို ရှာဖွေလိမ့်မည်။ တစ်ခါတစ်ရံ သူ၏ ဝိညာဉ်က အဖြေကို ရှာဖွေရန် အနာဂတ်ဆီသို့ ခရီးထွက်သွားလိမ့်မည်။

ရက်ပေါင်းများစွာကြာပြီးနောက် သူ၏ ခြေလှမ်းက ရပ်တန့်သွားပြီး အချိန်လေဟာနယ်က လှိုင်းဂယက်များအဖြစ် ပြောင်းလဲသွားသည်။

သူက ခေါင်းမော့လိုက်ပြီး အရှေ့သို့ ကြည့်လိုက်သည်။

သူ၏ အရှေ့တွင် တောင်ဆယ့်ခုနစ်တောင် စီတန်းနေသော တောင်တန်းဒေသတစ်ခု ရှိသည်။ တောင်တစ်လုံးစီမှာ ရေကန်တစ်ကန် ရှိသည်။

ထိုရေကန်များထဲမှ ရေက ကြည်လင်ရှင်းလင်းပြီး ရေကန်က လပြည့်ဝန်းပမာ ဝိုင်းစက်သည်။ ရေကန်၏ ဘေးတွင် ကျောက်တုံးဖြင့် ဆောက်လုပ်ထားသော နန်းဆောင်တစ်ခု ရှိသည်။

ထိုနန်းဆောင်မှာ ထောင့်ရှစ်ထောင့်ရှိပြီး နန်းဆောင်အတွင်း၌ ကျောက်တုံးစင်မြင့်တစ်ခု ရှိသည်။ ထိုစင်မြင့်ပေါ်တွင် မြေပုံတိုတမ်များကို ရေးထွင်းထားသည်။

ဤနေရာကို မြေကြီးနိယာမ၏ ရေကန်ဆယ့်ခုနစ်ကန်ဟု လူသိကြသည်။ ဤနေရာတွင် မြေကြီး၏ နိယာမများ ကိန်းဝပ်နေသည်။

ရေကန်၏ နံဘေးတွင် ရှားပါးသော ပန်းပွင့်များနှင့် သစ်ပင်များက ရှင်သန်ပေါက်ရောက်နေကြပြီး အင်မော်တယ်စွမ်းအင်ကို စုပ်ယူထုတ်လွှတ်နေကြသည်။ သို့ဖြစ်၍ နှစ်ပေါင်းများစွာကြာပြီးနောက် ဤနေရာ၏ ဝိညာဉ်အရှိန်အဝါက အလွန်သိပ်သည်းလာသည်။

ရံဖန်ရံခါ ဝိညာဉ်စွမ်းအင်က သက်ရှိအမျိုးမျိုး၏ အသွင်သဏ္ဍာန်များအဖြစ် ပြောင်းလဲသွားပြီး လေထဲမှာ ထွက်ပေါ်လာလေ့ ရှိသည်။

ယင်းက ရင်သပ်ရှုမောဖွယ်ကောင်းသော မြင်ကွင်းကို ဖန်တီးပေးသည်။

နှစ်ပေါင်းမရေမတွက်နိုင်အောင် ကြာပြီးနောက် အကယ်၍ သာမန်ကျင့်ကြံသူတစ်ယောက်က ဤနေရာကို မတော်တဆ ရောက်လာမည်ဆိုလျှင် သူတို့က တဒင်္ဂအိမ်မက်ထဲသို့ ကျရောက်သွားသည့်အလား ခံစားရလိမ့်မည်။ သူတို့က အိမ်မက်ထဲမှ ပြန်နိုးလာမည်ဆိုလျှင်ပင် စိတ်ကယောင်ချောက်ချား ဖြစ်သွားလိမ့်မည်။

သို့သော်လည်း ဤနေရာသည် မည်သူ့ကိုမှ အန္တရာယ်မပေးပေ။

သို့ဖြစ်၍ ကျင့်ကြံသူများသည် တာအိုကို ရှာဖွေရန် ဤနေရာသို့ မကြာခဏ ရောက်လာကြသည်။

ရွှီချင်းက ထိုတောင်တန်းဒေသကို စိုက်ကြည့်နေစဉ် ယွင်မန် ချင်းဖန် သူ့ကို ပေးခဲ့သော ဝါးပေလွှာထဲမှ ဤနေရာနှင့်ပတ်သက်သော သတင်းအချက်အလက်များက သူ၏ စိတ်ထဲမှာ ထွက်ပေါ်လာသည်။

ထိုအချက်အလက်များအပြင် ကျောက်တုံးစင်မြင့်ပေါ်မှ တိုတမ်များနှင့်ပတ်သက်ပြီး ဒဏ္ဍာရီတစ်ပုဒ်လည်း ရှိသည်။

ထိုဒဏ္ဍာရီထဲတွင် ရှေးခေတ်တုန်းက အဆင့်မြင့်ကျင့်ကြံသူတစ်ယောက်သည် အမှတ်ငါးကြယ်တာရာစက်ဝန်း၏ နေရာအနှံ့ဆီသို့ လှည့်ပတ်ခရီးသွားခဲ့သည်။ သူ၏ တာအိုက ပထဝီကို တိုင်းတာခြင်း ဖြစ်သည်။ သူက အမှတ်ငါးကြယ်တာရာစက်ဝန်းတစ်ခုလုံး၏ ပထဝီမြေပုံကို ရေးဆွဲခဲ့သည်။

ဤနေရာက ထိုကျင့်ကြံသူ၏ အမွေအနှစ်နယ်မြေ ဖြစ်သည်။

ထို့ကြောင့် ဤနေရာကို မြေကြီးနိယာမဟု ခေါ်ဆိုခြင်း ဖြစ်သည်။

သို့သော်လည်း အချိန်ကုန်ဆုံးသွားသည်နှင့်အမျှ နောက်ပိုင်းမျိုးဆက်မှ ကျင့်ကြံသူများသည် တိုတမ်ကို ရှင်းလင်းစွာ မမြင်နိုင်ကြတော့ပေ။ သူတို့က ဝေဝါးနေသော တိုတမ်များကိုသာ မြင်နိုင်ကြသည်။ သို့ဖြစ်၍ သူတို့က တိုတမ်များ၏ စစ်မှန်သော အဓိပ္ပာယ်ကို နားမလည်နိုင်ကြချေ။

ထိုသို့ဝေဝါးနေရသည့် အကြောင်းအရင်းမှာ တိုတမ်များ၏ စစ်မှန်သော အနှစ်သာရကို ရေကန်က တစ်နှစ်ပတ်လုံး စုပ်ယူနေသောကြောင့် ဖြစ်သည်။

သို့သော်လည်း ကောင်းကင်ပေါ်မှာ မိုးသောက်ဝဲကတော့နှစ်ခု အလှည့်ကျ ထွက်ပေါ်လာသည့်အခိုက် အကယ်၍ တစ်စုံတစ်ယောက်က ရေကန်ထဲမှ ရေကို စိုက်ကြည့်လိုက်မည်ဆိုလျှင် သူတို့၏ နှလုံးသားထဲမှ လိုအင်ဆန္ဒနှင့် တောင့်တမှုက ပုံရိပ်ပြန်လာလိမ့်မည်။ ထိုနည်းဖြင့် သူတို့က သူတို့၏ အတွင်းစိတ်လောကကို ထွင်းဖောက်မြင်နိုင်လိမ့်မည်။

ထိုအကြောင်းအရင်းကြောင့် ကျင့်ကြံသူအများအပြားက ဤနေရာမှာ လာရောက်ကျင့်ကြံကြသည်။

သူတို့က ရေကန်ထဲမှ ရေ၏ အကူအညီဖြင့် စိတ်ကို ရှင်းလင်းချင်ကြသည်။

ထိုအတွေးက ရွှီချင်း၏ စိတ်ထဲမှာ ထွက်ပေါ်လာသည်နှင့် သူက အရှေ့သို့ ခြေတစ်လှမ်း လှမ်းလိုက်သည်။

သူက တောင်ထွတ်တစ်ခုဆီသို့ ဦးတည်သွားပြီး တောင်ပေါ်မှ ရေကန်၏ ဘေးမှ သက်ရှိများကြားထဲသို့ လျှောက်သွားသည်။

ဤနေရာက ကမ္ဘာငယ်တစ်ခုနှင့် ဆင်တူသည်။ ဘဝ၊ အရွယ်အိုမင်းခြင်း၊ ဖျားနာခြင်း၊ သေဆုံးခြင်း၊ ခွဲခွာခြင်းနှင့် ပြန်ပေါင်းစည်းခြင်းက ဤနေရာမှာ ရှိသည်။

သူထွက်ပေါ်လာသည့်အခိုက် အပင်များထံမှ အသွင်ပြောင်းလဲထားသော သက်ရှိအားလုံးက ချက်ချင်း ရပ်တန့်သွားကြသည်။ ထို့နောက် ၎င်းတို့က တစ်ပြိုင်နက် ခေါင်းငုံ့လိုက်ကြပြီး ရွှီချင်း၏ အရှေ့မှာ ဒူးထောက်လိုက်ကြသည်။

“ ဒီက သစ်သီးတွေက ဝိညာဉ်စွမ်းအင် အတော်ကြွယ်ဝတာပဲ ”

ရွှီချင်းက ခေါင်းညိတ်လိုက်ပြီး ကျောက်တုံးစင်မြင့်ဆီသို့ လျှောက်သွားကာ စင်မြင့်ပေါ်မှ တိုတမ်များကို ကြည့်လိုက်သည်။

အချိန်တစ်ခဏကြာပြီးနောက် သူက ညင်သာစွာ ခေါင်းယမ်းလိုက်သည်။

“ ဒီဟာက ငါ့တာအို မဟုတ်ဘူး ”

ထို့နောက် သူက ရေကန်ထဲမှ တာအိုအရိပ်ကို တစ်ချက်ကြည့်လိုက်သည်။

ပထမအကြည့်တွင် အရိပ်က ဝေဝါးနေသည်။

ဒုတိယအကြိမ် အကြည့်တွင် ရွှီချင်း၏ ခန္ဓာကိုယ်က ရေကန်ပေါ်မှာ ပုံရိပ်ပြန်လာသည်။

၎င်းက ဖော်မပြနိုင်အောင် ကြည်လင်ရှင်းလင်းသည်။

ရွှီချင်းက နှုတ်ဆိတ်သွားသည်။ အချိန်အတော်ကြာပြီးနောက် သူက ထပ်မံ ခေါင်းယမ်းလိုက်သည်။ သူက တတိယအကြိမ် ထပ်မကြည့်တော့ပေ။

ဤနေရာမှာ အမှန်တကယ်ပင် တာအိုကိန်းအောင်းနေသည်။ သို့သော်လည်း ကံမကောင်းစွာပင် ယင်းက သူရှာဖွေနေသော တာအိုမဟုတ်ပေ။

သို့ဖြစ်၍ ရွှီချင်းက ခြေတစ်လှမ်းနှင့်အတူ အပြင်သို့ ထွက်သွားပြီး ဒုတိယတောင်ထွတ်ဆီသို့ ဦးတည်သွားသည်။ သူက တောင်ထွတ်ဆယ့်ခုနစ်ခုစလုံးကို ကြည့်ခဲ့သော်လည်း အချည်းနှီးသာ ဖြစ်၏။ ထို့နောက် သူက ဤနေရာမှ ထွက်သွားပြီး တောင်ပိုင်းအရပ်ဆီသို့ ဦးတည်သွားသည်။

တစ်လကြာပြီးနောက် သူက တိမ်ကျွန်းစုဆီသို့ ရောက်ရှိသွားသည်။

တိမ်ကျွန်းစုက မြေကြီးနိယာမ၏ တောင်ပိုင်းအရပ်မှာ တည်ရှိပြီး ယင်းကို တောင်ပတ်ပတ်လည်က ဝန်းရံကာဆီးထားသည်။

ထိုနေရာတွင် တိမ်များနှင့် မြူခိုးများက အစဉ်အမြဲ လွင့်မျောနေကြသည်။

ဤနေရာမှ မြေကြီးက အာဟာရဓာတ်ကြွယ်ဝပြီး အပင်များ ပေါက်ရောက်ရှင်သန်ရန် အထူးသင့်တော်သည်။

ထို့ပြင် ဤနေရာမှာ တိမ်မြေကြီးကြာပန်းဟုခေါ်သော ထူးဆန်းသည့် အပင်တစ်ပင် ရှိသည်။

ထိုပန်း၏ ပွင့်ချပ်များက တိမ်တိုက်များနှင့် ဆင်တူပြီး အဆုံးမဲ့သော အမွှေးရနံ့တစ်မျိုးကို ထုတ်လွှတ်ပေးသည်။

ယွင်မန် ချင်းဖန်၏ ဝါးပေလွှာထဲ၌ ဖော်ပြထားသည်မှာ ဤကြာပန်းသည် တစ်စုံတစ်ယောက်၏ ဝိညာဉ်ကို သန့်စင်ပေးနိုင်ပြီး စိတ်ကို ကြည်လင်ရှင်းလင်းစေနိုင်သည်။ ယင်းက တာအိုကို ဆင်ခြင်နားလည်ရာတွင် ကြီးမားသော အထောက်အပံ့ကို ပေးနိုင်သည်။

သို့ဖြစ်၍ ဤနေရာတွင် သရဖူနီကြိုးကြာများက အစောင့်အကြပ်များအနေဖြင့် တည်ရှိကြသည်။ ၎င်းတို့က ရံဖန်ရံခါ လေထဲတွင် ကခုန်လေ့ရှိပြီး ရာပေါင်းများစွာသော ကျေးငှက်များ၏ စိတ်အာရုံကို ဆွဲဆောင်လေ့ရှိသည်။

ယင်းက ဤနေရာကို နတ်သမီးကုန်းမြေအလား အောက်မေ့ရစေသည်။

ရွှီချင်းက ဤနေရာသို့ ရောက်လာပြီးနောက် တိမ်ရွှံ့မြေထဲမှာ လမ်းလျှောက်လိုက်သည်။ သူက ကျေးငှက်သံများကို နားဆင်လျက် အင်မော်တယ်ကြိုးကြာတစ်ကောင်ကို သိမ်မွေ့ညင်သာစွာ ပွတ်သပ်လိုက်ပြီး တိမ်မြေကြီးကြာပန်း၏ ပွင့်ချပ်တစ်ခုကို ခူးဆွတ်လိုက်သည်။

ပွင့်ချပ်က သူ၏ လက်ဖဝါးပေါ်သို့ ကျရောက်သွားသည့်အခါ ဝေဝါးလာပြီး တိမ်တိုက်တစ်ခုအဖြစ် ပြောင်းလဲသွားသည်။

ယင်းထဲမှာ အမှန်တကယ်ပင် တစ်စုံတစ်ယောက်၏ စိတ်ကို ရှင်းလင်းပေးနိုင်သော အာနိသင်ရှိသည်။ သို့သော်လည်း ရွှီချင်း၏ တာအိုနှလုံးသားက အလွန်ခိုင်မြဲလေရာ ယင်းကို သန့်စင်ပေးရန် မလိုအပ်ပေ။

အကယ်၍ သူ၏ နှလုံးသားထဲမှာ လိုချင်တပ်မက်မှုတစ်ခု ရှိမည်ဆိုလျှင်ပင် ဤပန်းက ယင်းကို သန့်စင်ပေးနိုင်လိမ့်မည် မဟုတ်ချေ။

သို့ဖြစ်၍ သူက ဤနေရာမှာ သုံးရက်ထက် ပိုမနေဘဲ ကောင်းကင်ပေါ်သို့ လျှောက်သွားသည်။

ဤနေရာမှ ပိုပြီးဝေးကွာသော တောင်ပိုင်းအရပ်တွင် သေမျိုးများ ဘဝပေါင်းတစ်ရာကြိုးစားလျှင်ပင် ဘယ်သောအခါမှ ရောက်နိုင်မှာမဟုတ်သည့် နေရာတစ်နေရာ ရှိသည်။ အုပ်ချုပ်သူများသည်ပင် ထိုနေရာကို သွားရောက်ရန် တစ်လကြာ အချိန်ကြာမြင့်လိမ့်မည်။

ထိုနေရာက အင်မော်တယ်ကျဆုံးလွင်ပြင် ဖြစ်သည်။

လွင်ပြင်သည် အလွန်ကျယ်ပြောပြီး မြက်ခင်းစိမ်းများဖြင့် ပြည့်နှက်နေသည်။

ဤနေရာတွင် သက်တံ့တစ်စင်းက ကောင်းကင်ကို ဖြတ်သန်းနေသည်။ ရောင်စုံအလင်းတန်းများက ပုံရိပ်ယောင်အလား သို့မဟုတ် အိပ်မက်အလား ဤလွင်ပြင်ပေါ်မှာ ပြန့်ကျဲနေကြသည်။

ယင်းက ရွှီချင်း၏ စိတ်အာရုံကို ဆွဲဆောင်သွားသည်။

ထိုသို့မြင်ကွင်းကို အမှတ်ငါးကြယ်တာရာစက်ဝန်း၏ တခြားနေရာများတွင် မြင်တွေ့နိုင်ရန် အလွန်ခဲယဉ်းသည်။ အဘယ့်ကြောင့်ဆိုသော် အမှတ်ငါးကြယ်တာရာစက်ဝန်းတစ်ခုလုံးကို အနီရောင်မိုးသောက်အလင်းက ဖုံးလွှမ်းထားသောကြောင့် ဖြစ်သည်။ သို့ဖြစ်၍ နေရာတိုင်းက အနီရောင်ဖြစ်သည်။

ဤတစ်နေရာတည်းမှာသာ အရောင်ခုနစ်ရောင်ကို မြင်တွေ့နိုင်ပေသည်။

သို့ဖြစ်၍ ရွှီချင်းက ယွင်မန် ချင်းဖန်၏ ဝါးပေလွှာထဲမှ ဤနေရာနှင့်ပတ်သက်သော ဒဏ္ဍာရီကို ပြန်စဉ်းစားလိုက်သည်။

ဒဏ္ဍာရီအရ ဤနေရာသည် မိုးသောက်အလင်း၏ ဇစ်မြစ်ဖြစ်သည်။

ရွှီချင်းက လွင်ပြင်နှင့် သက်တံ့ကို ကြည့်နေရင်း နက်နဲစွာ တွေးတောလိုက်သည်။

သူက လီမုန့်တုပြောခဲ့သော မိုးသောက်အင်မော်တယ်အရှင်သခင်ကို ပြန်အမှတ်ရသွားသည်။

မိုးသောက်အင်မော်တယ်အရှင်သခင်သည် အင်မော်တယ်အရှင်သခင်များ၏ ခေါင်းဆောင်ဖြစ်ခဲ့သည်။ သူက ပုန်ကန်ခဲ့သောကြောင့် အင်မော်တယ်ဘုရင်၏ အသတ်ခံခဲ့ရသည်။ ထို့နောက် အင်မော်တယ်ဘုရင်က သူ၏ အာဏာစက်ကို အနီရောင်မိုးသောက်အလင်းအဖြစ် ပြောင်းလဲလိုက်သည်။ သူ၏ ဝိညာဉ်သည်တော့ ဤနေရာသို့ ကျဆင်းသွားခဲ့သည်။

ထို့ကြောင့် ဤနေရာကို အင်မော်တယ်ကျဆုံးလွင်ပြင်ဟု ခေါ်ဆိုခြင်း ဖြစ်သည်။

ဤလွင်ပြင်ပေါ်တွင် မြက်ခင်းစိမ်းများသာမက မရေမတွက်နိုင်သော ဥက္ကာခဲများလည်း ရှိသည်။

အကြီးမားဆုံး ဥက္ကာခဲများက တောင်နှင့် နှိုင်းယှဉ်နိုင်ပြီး အသေးဆုံး ဥက္ကာခဲများက ပဲစေ့ခန့် ရှိကြသည်။ ယင်းတို့အားလုံးက ထွန်းလင်းတောက်ပကြသည်။ ထို့ပြင် ကောင်းချီးအရှိန်အဝါကို ထုတ်လွှတ်နေသော ဥက္ကာခဲများလည်း ရှိကြသည်။

ထိုအရှိန်အဝါက အလွန်ရှေးကျသည်။

ယင်းတို့က အပြင်ဘက်လေဟာနယ်မှ ဆင်းသက်လာခြင်း မဟုတ်ပေ။ ထိုဥက္ကာခဲများနှင့်ပတ်သက်ပြီး ဒဏ္ဍာရီများ ရှိသည်။

ဒဏ္ဍာရီအရ ထိုဥက္ကာခဲများသည် ယခင်က အမှတ်ငါးကြယ်တာရာစက်ဝန်း၏ ပြိုကွဲပျက်စီးသွားခဲ့သော ကြယ်တာရာကောင်းကင်ထံမှ အကြွင်းအကျန်များ ဖြစ်ကြသည်။

ယင်းတို့ထဲမှာ ထူးဆန်းသော စွမ်းအင်တစ်မျိုး ကိန်းအောင်းနေသည်။

ယင်းတို့ကို ကြည့်နေရင်း အနက်ရောင်အလင်းက ရွှီချင်း၏ မျက်လုံးထဲမှာ ဖြည်းညင်းစွာ ထွက်ပေါ်လာသည်။

သူ၏ ခန္ဓာကိုယ်က ဤနေရာနှင့်ပတ်သက်ပြီး အများကြီး အာရုံမခံနိုင်ပေ။ သို့သော်လည်း သူ၏ အတွေးများကို ဖြန့်ကြက်လိုက်သည့်အခါ သူက ကွဲပြားခြားနားသော တစ်စုံတစ်ခုကို အာရုံခံမိသွားသည်။

“ ဒီနေရာမှာ မကျေမချမ်းစိတ်ဆန္ဒတွေ ရှိတယ်… ”

“ အဲ့ဒီစိတ်ဆန္ဒက ဝိညာဉ်ချီကို လှိုင်းထသွားစေပြီး သဏ္ဍာန်မဲ့ပင်လယ်အဖြစ် ပြောင်းလဲသွားတယ်… ”

ရွှီချင်းက တီးတိုးရေရွတ်လိုက်သည်။

သူက အရှေ့သို့ ရွေ့လျားသွားပြီး ဥက္ကာခဲများ၏ ဘေးမှ ဖြတ်လျှောက်သွားသည်။

သူက လက်မြှောက်လိုက်ပြီး ဥက္ကာခဲတစ်ခုကို ထိတွေ့လိုက်သည်။ တစ်ချိန်တည်းမှာ သူက နတ်ဘုရားစိတ်အာရုံကို ဖြန့်ကြက်လိုက်ပြီး ဥက္ကာခဲ၏ အချိန်လေဟာနယ်ကို ကြည့်လိုက်သည်။

သို့သော်လည်း သူထိတွေ့လိုက်သည်မှာ ဗလာလေထု ဖြစ်သည်။

သူ၏ အတွေးများက ဗလာဖြစ်သည်။

သူက အချိန်လေဟာနယ်ကို ကြည့်လိုက်သည့်တိုင် ယင်းက ဗလာဖြစ်နေဆဲပင်။

ထိုမြင်ကွင်းက ရွှီချင်း၏ ခြေလှမ်းကို ရုတ်တရက် ရပ်တန့်သွားစေသည်။

“ ငါထင်ထားသလိုပဲ… ဒီနေရာက တကယ်ပဲ အင်မော်တယ်အရှင်သခင်တစ်ပါး သေဆုံးသွားတဲ့နေရာပဲ… ”

“ ဒီနေရာမှာ ငါရှာဖွေနေတဲ့ တာအို ရှိလောက်တယ် ”

ရွှီချင်းက မျက်လုံးမှေးကျဉ်းလိုက်သည်။ ထို့နောက် သူက အရှေ့သို့ ဆက်လျှောက်သွားသည်။

သူက လမ်းလျှောက်နေရင်း ဘေးပတ်ဝန်းကျင်နှင့် ဤနေရာမှာ တိုက်ခတ်နေသော လေကို အာရုံခံလိုက်သည်။

သူ၏ နှလုံးသားက တာအိုကို တွေးတောခြင်းမှာ နစ်မြှုပ်သွားပြီး နူးညံ့သိမ်မွေ့လာသည်။

အချိန်အတော်ကြာပြီးနောက် သူက အင်မော်တယ်ကျဆုံးလွင်ပြင်၏ အလယ်ဗဟိုဆီသို့ ရောက်ရှိတော့မည့်အချိန် အတားအဆီးတစ်ခုက သူ့အရှေ့မှာ ထွက်ပေါ်လာသည်။ ယင်းက ရွှီချင်း၏ ခန္ဓာကိုယ်ပေါ်သို့ ကျရောက်လာပြီး သူ့ကို အရှေ့မဆက်နိုင်ရန် တားဆီးလိုက်သည်။

ထို့ပြင် အတားအဆီးက သူ၏ ဝိညာဉ်ထဲသို့ ကျရောက်လာသည်။ ယင်းက ခေါင်းလောင်းမြည်သံပမာ သူ၏ စိတ်ထဲမှာ ပဲ့တင်ထပ်သွားသည်။

ယင်းက ရွှီချင်းကို တာအိုအား တွေးတောခြင်းမှ ပြန်နိုးလာစေသည်။

ရွှီချင်းက ခေါင်းမော့လိုက်သည့်အခါ အဝေးမှ ဧရာမကျောက်ပြားတစ်ချပ်ကို မြင်တွေ့သွားသည်။

ကျောက်ပြားပေါ်တွင် ရှေးဟောင်းမှော်သင်္ကေတများကို ရေးထွင်းထားသည်။

ယင်း၏ ဇစ်မြစ်ကို ရွှီချင်းမသိပေ။

သို့သော်လည်း ကျောက်ပြားကို တစ်ချက်ကြည့်လိုက်ရုံဖြင့် ယင်းက မည်မျှကျယ်ပြောကြောင်း သူအာရုံခံနိုင်သည်။

အချိန်အတော်ကြာပြီးနောက် ရွှီချင်းက အကြည့်ပြန်ရုပ်လိုက်သည်။

“ ဒီနေရာက အချိန်လေဟာနယ်ထဲမှာ မတည်ရှိဘူး ”

ရွှီချင်းက အတားအဆီး၏ အပြင်ဘက်တွင် တင်ပျဉ်ခွေထိုင်လိုက်ပြီး မျက်လုံးမှိတ်လိုက်သည်။

သူက ဤနေရာကို စူးစမ်းလေ့လာရန် ကြိုးစားလိုက်သည်။

ထိုသို့ဖြင့် လေတဟူးဟူး တိုက်ခတ်လာပြီး မိုးသောက်အလင်းက ဆက်လက် စီးဆင်းသွားသည်။

လအနည်းငယ်ကြာပြီးနောက် လူတချို့က အင်မော်တယ်ကျဆုံးလွင်ပြင်‌ဆီသို့ ရောက်ရှိလာကြသည်။

သူတို့က မတူညီသော အရပ်ဒေသများမှ ရောက်ရှိလာကြသော်လည်း သူတို့အားလုံး၏ ဦးတည်ရာက လွင်ပြင်၏ အလယ်ဗဟိုမှ ရှေးဟောင်းကျောက်ပြားဖြစ်သည်။

ထို့ပြင် ရွှီချင်းနှင့် မတူညီသည်မှာ သူတို့က အတားအဆီးကို စောစီးစွာ တွေ့ကြုံလိုက်ရသည်။

သို့ဖြစ်၍ သူတို့က ကျောက်ပြားကို ဝန်းရံလျက် မတူညီသော အကွာအဝေးများထံတွင် တင်ပျဉ်ခွေထိုင်လိုက်ကြသည်။

ထိုအတောအတွင်းမှာ သူတို့က ရွှီချင်းကို သတိထားမိသွားကြသည်။

အကြည့်တစ်ချက်ဖြင့်ပင် ထိုလူများ၏ အမူအရာက သိသာစွာ ပျက်ယွင်းသွားကြပြီး သူတို့က အပြင်းအထန် နှလုံးတုန်ယင်သွားကြသည်။

ထိုသို့ဖြစ်ရသည့် အကြောင်းအရင်းတစ်ခုမှာ ရွှီချင်းထိုင်နေသော တည်နေရာကြောင့် ဖြစ်သည်။ အခြားအကြောင်းအရင်းတစ်ခုမှာ ရွှီချင်းထံမှ ပျံ့လွင့်နေသော ကြောက်မက်ဖွယ်ရာ အင်အားတစ်ခုကို သူတို့အာရုံခံမိသောကြောင့် ဖြစ်သည်။

ထိုလူများထဲတွင် တစ်ယောက်က ပိုပြီးပြင်းထန်စွာ နှလုံးတုန်ယင်သွားသည်။ အမှန်မှာ သူ၏ မျက်နှာက ဖြူဖျော့သွားပြီး သူက ဤနေရာမှ ထွက်သွားရန်ပင် ရွေးချယ်လိုက်သည်။

သို့သော်လည်း ထွက်သွားရန် သူမဆုံးဖြတ်နိုင်ခင် ရွှီချင်းက မျက်လုံးဖွင့်လှစ်လိုက်ပြီး တည်ငြိမ်စွာ ပြောသည်။

“ လာခဲ့ ”

ရွှီချင်း၏ အကြည့်က ထိုလူ၏ စိတ်ကို ဝုန်းခနဲ မြည်ဟိန်းသွားစေပြီး သူ၏ အသက်ရှူသံကို မြန်ဆန်သွားစေသည်။ ဤသည်မှာ သူနေထိုင်သော လောကက ပြိုကွဲပျက်စီးသွားသည့်အလားပင်။

တစ်ချိန်တည်းမှာ အတားအဆီးကင်းမဲ့သော လျှောက်လမ်းတစ်ခုက ရွှီချင်းနှင့် ထိုလူကြားထဲတွင် တိုက်ရိုက် ထွက်ပေါ်လာသည်။

ထို့ပြင် ရွှီချင်း၏ နှုတ်မှ ထွက်ပေါ်လာသော စကားလုံးက ကောင်းကင်ဘုံ၏ စိတ်ဆန္ဒဖြစ်သည့်အလားပင်။

ထို့ကြောင့် ထိုလူက အနောက်မဆုတ်ဝံ့တော့ချေ။

သူက လျှောက်လမ်းမှတဆင့် ရွှီချင်းဆီသို့ တစ်လှမ်းချင်း တုံ့ဆိုင်းတုံ့ဆိုင်း လျှောက်သွားသည်။ သူက အနားသို့ ရောက်သွားသည့်အခါ ကြောက်ရွံ့ရိုသေစွာ ဦးညွတ်လိုက်သည်။

“ မတွေ့တာကြာပြီနော် မြေဝိညာဉ်ဘိုးဘေး ”

ရွှီချင်းက ဖြည်းညင်းစွာ ပြောသည်။

ယခု လျှောက်လာသူသည် အချိန်ကန္တာရထဲတွင် ထွက်ပေါ်လာခဲ့သော မြေဝိညာဉ်ဘိုးဘေးမှလွဲ၍ တခြားလူမဟုတ်ပေ။ အတိတ်တွင် တစ်ဖက်လူက လျှို့ဝှက်သော့ကို အတူတကွ မျှဝေသုံးရန် သဘောတူခဲ့သည်။

မြေဝိညာဉ်ဘိုးဘေးက ခါးသီးစွာ ပြုံးလိုက်သည်။

နောက်ဆုံးအကြိမ် သူတို့တွေ့ဆုံခဲ့သည်မှာ အမှန်တကယ်ပင် အချိန်အတော်ကြာမြင့်သွားခဲ့သည်။ သို့သော်လည်း မည်သို့ဖြစ်ပါစေ နောက်တစ်ကြိမ် သူတို့ပြန်တွေ့ဆုံသည့်အခါ တစ်ဖက်လူက အခွင့်အာဏာကို ပိုင်ဆိုင်ထားလိမ့်မည်ဟု လုံးဝ သူမျှော်လင့်မထားခဲ့ပေ။

ထိုအကြည့်တစ်ချက်က သူ့အား သေခြင်းရှင်ခြင်းဓားသွားပေါ်သို့ ကျရောက်သွားစေသည်။ ဤသည်မှာ သူ့ကိုယ်ပိုင် သေခြင်းရှင်ခြင်းက တစ်ဖက်လူ၏ အတွေးပေါ်မှာ မူတည်နေသည့်အလားပင်။

ဤအခိုက်အတန့်မှာ သူက အချိန်ကန္တာရထဲ၌ တစ်ဖက်လူ၏ လုပ်ဆောင်မှုများကို ပြန်အမှတ်ရသွားသောအခါ သဲလွန်စတချို့ကို ရှာတွေ့သွားသည်။

မည်သို့ဖြစ်ပါစေ အချိန်မုန်တိုင်းကို ထိန်းချုပ်နိုင်သည့်လူက သာမန်မဟုတ်နိုင်ပေ။

မြေဝိညာဉ်ကလန်၏ အထူးချွန်ဆုံး ကောင်းကင်အရွေးချယ်ခံက အချိန်ကန္တာရ၏ အပြင်ဘက်မှာ ယခုအချိန်ထိ ကျောက်ရုပ်ဖြစ်နေဆဲပင်။

ယင်းက မမျှတသောအရာ မဟုတ်ပေ။

“ တကယ်လို့ တာအိုရောင်းရင်းက သဘောမကျဘူးဆိုရင် လျှို့ဝှက်သော့အပေါ် ငါလက်လျော့လိုက်ပါမယ် ”

မြေဝိညာဉ်ဘိုးဘေးက အသက်ပြင်းပြင်းရှူသွင်းလိုက်ပြီး တည်ငြိမ်စွာ ပြောသည်။ ထို့နောက် သူက လက်မြှောက်လိုက်ပြီး ကျောက်စိမ်းပုလင်းတစ်လုံးကို ထုတ်လိုက်သည်။

ထိုပုလင်းထဲမှာ သွေးတစ်စက် ပါဝင်သည်။

ယင်းက တိမ်တံခါးကလန်ဘိုးဘေး၏ သွေးဖြစ်ပြီး ယင်းထဲမှာ လျှို့ဝှက်သော့ ရှိသည်။

ကျောက်စိမ်းပုလင်းကို ရွှီချင်း၏ အရှေ့မှာ ချလိုက်ပြီးနောက် မြေဝိညာဉ်ဘိုးဘေးက ခေါင်းငုံ့လိုက်ပြီး အဖြေကို စောင့်ဆိုင်းသည်။

အချိန်အတော်ကြာပြီးနောက် ရွှီချင်းက တည်ငြိမ်စွာ ပြောသည်။

“ အဲ့ဒီကျောက်ပြားရဲ့ ဇစ်မြစ်က ဘာလဲ ”

ယင်းကို မြေဝိညာဉ်ဘိုးဘေးကြားသောအခါ သူက ခေါင်းမော့လိုက်ပြီး အဝေးမှ အလွန်ကျယ်ပြောသော ရှေးဟောင်းကျောက်ပြားကို ကြည့်လိုက်သည်။ သူက ရွှီချင်း၏ အရှေ့တွင် ဘာမှမဖုံးကွယ်ထားဝံ့ပေ။ ထို့ကြောင့် သူက ရိုသေစွာ ပြောသည်။

“ ဒီနေရာက မိုးသောက်အင်မော်တယ်အရှင်သခင်ရဲ့ ဝိညာဉ် ကျဆုံးသွားတဲ့ နေရာပါ… ပြီးတော့ သူ့ရဲ့ အင်မော်တယ်နန်းတော်ကလည်း ဒီနေရာမှာ ပြိုကျပျက်စီးသွားခဲ့ပါတယ် ”

“ အဲ့ဒီကျောက်ပြားက… မိုးသောက်အင်မော်တယ်နန်းတော်ကို စောင့်ကြပ်ပေးတဲ့ အစောင့်ကျောက်ပြားပါ… ”