မတူညီသော လမ်းစဉ်များ

ကျုံးချီက နှလုံးခုန်မြန်လာသည်။ သူက မျက်လုံးမှေးကျဉ်းလိုက်ပြီး စိုးရိမ်တကြီး အော်ပြောနေသော ကောင်းကင်အရွေးချယ်ခံလီကို စိုက်ကြည့်လိုက်သည်။

တစ်ဖက်လူ၏ လုပ်ဆောင်မှုက သမိုင်းနှင့် မကိုက်ညီပေ။

သမိုင်းထဲတွင် သခင်လေးက ဤတိုက်ပွဲမှာ အမှန်တကယ် အနိုင်ရသွားပြီး မြေခွေးမိန်းမပျိုလေးကို ရရှိခဲ့သည်။ သို့သော်လည်း ကောင်းကင်အရွေးချယ်ခံလီက ဘယ်တုန်းကမှ ခေါင်းမငုံ့ခဲ့ပေ။ ယင်းအစား သူက အကယ်ဒမီသို့ ပြန်သွားပြီး ဤအရှုံးမှ သင်ခန်းစာယူကာ အဆင့်ချိုးဖြတ်ရန် တံခါးပိတ်ကျင့်ကြံခြင်းသို့ ဝင်ရောက်သွားခဲ့သည်။

ကံမကောင်းစွာဖြင့် သူက တစ်လကြာပြီးသည့်တိုင် အဆင့်မချိုးဖြတ်နိုင်ဘဲ မဟာကပ်ဘေးထဲမှာ သေဆုံးသွားခဲ့သည်။

သို့သော်လည်း ယခု ကွဲပြားခြားနားသော အခြေအနေတစ်ရပ်က ဖြစ်ပေါ်လာသည်။

သမိုင်းထဲမှာ ထိုသို့ကိစ္စက တကယ်ရှိခဲ့ခြင်းလော သို့မဟုတ် တစ်စုံတစ်ယောက်က နောက်ပိုင်းမှာ သမိုင်းကို ပြန်ပြင်ရေးခဲ့ခြင်းလော ကျုံးချီ သေချာမသိပေ။

သို့သော်လည်း သူသေချာသော တစ်စုံတစ်ခု ရှိသည်။

သခင်လေး၏ စာသင်ဖက်က သူတစ်ယောက်တည်းသာ ရှိသည်။

သို့ဖြစ်၍ သခင်လေး၏ အဖြေက အလွန်အရေးကြီးသည်။

အကယ်၍ သူက ခေါင်းညိတ်လိုက်မည်ဆိုလျှင် သမိုင်းက ပြောင်းလဲသွားလိမ့်မည်။

အကယ်၍ သူက ငြင်းဆန်လိုက်မည်ဆိုလျှင် အရာအားလုံးက မူလလမ်းကြောင်းအတိုင်း ပြန်ရောက်သွားလိမ့်မည်။

ထိုမြင်ကွင်းက ကျုံးချီ၏ အတွေးများကို ပရမ်းပတာဖြစ်စေသည်။

‘ ဒီကောင်းကင်အရွေးချယ်ခံလီက ငါ့လိုမျိုး အပြင်လူတစ်ယောက် ဖြစ်နိုင်တယ် ’

‘ သူဘယ်သူလဲဆိုတာ အရေးမကြီးဘူး… အရေးကြီးဆုံးက ဒီဟာက တခြားလူတွေ ဒီသမိုင်းအဖြစ်အပျက်ကို ဘယ်လိုအသုံးချလဲဆိုတာ မြင်တွေ့နိုင်စေမယ့် အကောင်းဆုံး အခွင့်အရေးပဲ… တခြားလူတွေရဲ့ လမ်းစဉ်ကို မှီငြမ်းတာက ငါ့လမ်းစဉ်ကို ပိုပြီးလွယ်ကူစေလိမ့်မယ် ’

ကျုံးချီ၏ စိတ်ထဲမှာ အတွေးများစွာ ထွက်ပေါ်လာနေစဉ် သူက ရွှီချင်းကို လှမ်းကြည့်လိုက်သည်။

ဤနေရာတွင် သူတစ်ယောက်တည်းက ရွှီချင်းကို ကြည့်နေခြင်းမဟုတ်ပေ။ သတ်ပုတ်ကွင်းထဲမှ ပရိသတ်အားလုံးနီးပါးက သူ့ကို အာရုံစိုက်နေကြသည်။

အကြောင်းအရင်းတစ်ခုက သူတို့နှစ်ယောက်ကြားမှ ဤတိုက်ပွဲက တကယ်စိတ်လှုပ်ရှားစရာကောင်းသည်။ ယင်းက စစ်မှန်သော အထွတ်အထိပ်တိုက်ပွဲ ဖြစ်သည်။

အခြားအကြောင်းအရင်းမှာ မောက်မာထောင်လွှားသော ကောင်းကင်အရွေးချယ်ခံလီက ထိုသို့ခေါင်းငုံ့ခြင်းသည် အလွန်ရှားပါးသောကိစ္စ ဖြစ်သည်။

သို့ဖြစ်၍ လူတိုင်းက သခင်လေး မည်သို့တုံ့ပြန်မည်ကို စောင့်ဆိုင်းနေကြသည်။

သို့သော်လည်း ရွှီချင်းက ချက်ချင်း စကားမပြောပေ။ ယင်းအစား သူ၏ အကြည့်က ကောင်းကင်အရွေးချယ်ခံလီထံသို့ ကျရောက်သွားပြီး သူက မျက်လုံးမှေးကျဉ်းလိုက်သည်။

သူက စဉ်းစားနေသည်။

‘ သမိုင်းက ပြောင်းလဲဖို့ အရမ်းလွယ်နေမယ်ဆိုရင် ဘာအဓိပ္ပာယ်ရှိတော့မှာလဲ ’

‘ အခု ငါရှိနေတဲ့ အချိန်စီးကြောင်းက တကယ့်သမိုင်းရဲ့ ကြေးမုံပုံရိပ်တစ်ခုသာဖြစ်တယ်လို့ ငါသံသယဝင်ပေမဲ့ ဒီထဲမှာ အင်မော်တယ်အရှင်သခင်ရဲ့ နည်းလမ်းတွေ ပါဝင်ပတ်သက်နေတယ်… သီအိုရီအရဆိုရင် ဒီသမိုင်းကြောင်းကို ပြောင်းလဲပစ်ဖို့ဆိုတာ အရမ်းခက်ခဲတယ် ’

‘ ဒီတော့… အခက်အခဲက ဘယ်မှာလဲ ’

သူက နက်နဲစွာ တွေးတောလိုက်ပြီး ကောင်းကင်အရွေးချယ်ခံလီကို စစ်ဆေးကြည့်လိုက်သည်။ ထိုအမြင့်၊ ထိုတည်ဆောက်ပုံနှင့် ထိုအမူအကျင့်အရ တစ်ဖက်လူသည် အစမ်းသပ်ခံပစ္စည်းဖြစ်ရန် သင့်တော်သည်။ တကယ့်သမိုင်းကို မပြောင်းလဲပစ်ခင် မည်သည့်အင်အား သို့မဟုတ် မည်သည့်အတားအဆီးက ကျရောက်လာနိုင်ကြောင်း ဤအစမ်းသပ်ခံပစ္စည်းဖြင့် သူကြိုးစားကြည့်နိုင်သည်။

ကောင်းကင်အရွေးချယ်ခံလီသည် ရွှီချင်း၏ အကြည့်အောက်တွင် အလိုအလျောက် စိုးရိမ်ကြောင့်ကြလာသည်။

ဤတိုက်ပွဲမှာ ရှုံးနိမ့်သွားလျှင် တစ်ဖက်လူ၏ စာသင်ဖက်အဖြစ် ဆောင်ရွက်မည်ဟု သူပြောခဲ့ခြင်းက အလိမ်အညာ မဟုတ်ပေ။ သူက ယင်းကို ရည်ရွယ်ချက်ရှိစွာ လုပ်ဆောင်ခဲ့ခြင်း ဖြစ်သည်။

ယင်းက သမိုင်းနှင့် မကိုက်ညီကြောင်း ထုံးစံအားဖြင့် သူသိသည်။

သို့သော်လည်း ယင်းက သူ၏ အာဏာစက်နှင့် ဆက်စပ်နေသည်။

သူ၏ အာဏာစက်က မြူခိုးဖြစ်သည်။

ယင်းက သမားရိုးကျမြူခိုး မဟုတ်ပေ။ ယင်းအစား ဟင်းလင်းပြင်၊ ဗလာနတ္ထိနှင့် အချိန်စီးဆင်းမှုမှ ထွက်ပေါ်လာသော မြူခိုးဖြစ်သည်။

အတိအကျဆိုရလျှင် ယင်းက သမိုင်းမှ ထွက်ပေါ်လာသော မြူခိုးဖြစ်သည်။

သမိုင်းထဲမှ မြူခိုးက သူ့အာဏာစက်၏ မူလဇစ်မြစ်ဖြစ်သည်။

သို့ဖြစ်၍ သူ့အာဏာစက်ကို အဆင့်မြှင့်ခြင်းက သမိုင်းကို ဆင်ခြင်နားလည်ခြင်းနှင့် ဆက်စပ်သည်။

သူ၏ ဗဟုသုတက ပိုပြီးကျယ်ပြောလာလေ အတိတ်ကို ဖုံးကွယ်ထားသော မြူခိုးများကို သူပိုပြီး ဖယ်ရှားနိုင်လေ ဖြစ်သည်။

မြူခိုးကို ပိုပြီးဖယ်ရှားနိုင်သည်နှင့်အမျှ မြူခိုးအပေါ် သူ၏ ထိန်းချုပ်နိုင်မှုက ပိုပြီးတိုးမြှင့်လာလိမ့်မည်။ ယင်းက သူ၏ အာဏာစက်ကို နောက်တစ်ဆင့်သို့ မြှင့်တင်ပေးနိုင်လိမ့်မည်။

သူ့လမ်းစဉ်၏ အဆုံးသတ်က အစစ်အမှန်သမိုင်း၏ ပြီးပြည့်စုံသော ဗဟုသုတဖြစ်ကြောင်း ကောင်းမွန်စွာ သူနားလည်သည်။

ထို့ကြောင့် သခင်လေးနှင့် ဤတိုက်ပွဲမှာ သူ၏ ကြိုးစားမှုတစ်ဝက်က စစ်မှန်ပြီး အခြားတစ်ဝက်က တမင်လုပ်ဆောင်ခဲ့ခြင်း ဖြစ်သည်။ သူက ရွှီချင်းကို အရှုံးပေးရန် တွက်ချက်ထားခဲ့သည်။ ယင်းက လက်ရှိကံကြမ္မာဆီသို့ တွန်းပို့လိုက်ခြင်း ဖြစ်သည်။

ထိုသို့သူလုပ်ဆောင်ရခြင်းမှာ သခင်လေးနှင့် နီးစပ်နိုင်မည့် အခွင့်အရေးတစ်ခုကို ရရှိရန် ဖြစ်သည်။

သူက အောင်မြင်နိုင်ခြေ ပိုမြင့်မားစေပြီး သူ၏ လုပ်ဆောင်မှုကို ပိုသဘာဝကျစေရန် ပွဲကြည့်ပရိသတ်အများအပြားကို တမင်ခေါ်ဆောင်လာခဲ့ခြင်း ဖြစ်သည်။

ထိုနည်းဖြင့်ဆိုလျှင် သူရှုံးနိမ့်သွားပြီးနောက် လူတိုင်းရှေ့မှာ ခေါင်းငုံ့ရန် ရွေးချယ်ခြင်းက ယုတ္တိရှိလိမ့်မည်။

မည်သို့ဖြစ်ပါစေ ဤနေရာမှ လူတိုင်းက ယင်းကို မျက်မြင်သက်သေပြုပေးနိုင်သည်။

သူရရှိထားသော ဇာတ်ကောင်နှင့်ပတ်သက်၍ သူက ကတိများကို အထူးအလေးထားသည်။

ယင်းက မူရင်းသမိုင်းအတိုင်း လိုက်လံဆောင်ရွက်ခြင်းဖြင့် သခင်လေးနားသို့ ချဉ်းကပ်နိုင်မည့် တစ်ခုတည်းသော အခွင့်အရေးဖြစ်သည်။

သို့ဖြစ်၍ ယင်းက သူ့အတွက် အလွန်အရေးကြီးသည်။

‘ ဒီသမိုင်းအဖြစ်အပျက်ထဲမှာ ပုံရိပ်နှစ်ခုက အရမ်းအရေးကြီးတယ်… တစ်ယောက်က မိုးသောက်အင်မော်တယ်အရှင်သခင်ဖြစ်ပြီး အခြားတစ်ယောက်က သခင်လေးပဲ… သူတို့အနားမှာ နေမှပဲ သမိုင်းထဲက ပုန်းကွယ်နေတဲ့ အကြောင်းအရာတွေကို ငါဖော်ထုတ်နိုင်လိမ့်မယ် ’

‘ ဒီထဲမှာ အင်မော်တယ်ဘုရင်က ပါဝင်ပတ်သက်နေတယ်ဆိုတော့ လူအများသိထားကြတဲ့ ပုန်ကန်မှုမှာ သေချာပေါက် လျှို့ဝှက်ချက်တွေ ရှိရမယ် ’

‘ မဟုတ်ရင် မိုးသောက်အင်မော်တယ်နန်းတော်က အခုထိ တည်ရှိနေသေးပြီး စတုတ္ထအလွှာက အတိတ်ဆီ ပြန်သွားနိုင်တဲ့ ဂိတ်တံခါးပေါက်အဖြစ် ပြောင်းလဲသွားမှာ မဟုတ်ဘူး ’

‘ အဲ့ဒါက အတိတ်တုန်းက လျှို့ဝှက်ချက်တွေက အခုထိ မဖော်ထုတ်ခံရသေးဘူးလို့ ဖော်ပြလိုက်တာပဲ… အဲ့ဒါကို ရှာဖွေနိုင်မလား မရှာဖွေနိုင်ဘူးလားဆိုတာက မသေချာတဲ့ အရာပဲ ’

‘ ဒါကြောင့် သမိုင်းတစ်ခုလုံးကို နားလည်ဖို့ဆိုရင် လုံလောက်တဲ့ အမြင်ရှိရမယ်… ပြီးတော့ အဲ့လိုမြင်နိုင်ဖို့ အရေးကြီးပုဂ္ဂိုလ်တစ်ယောက်ရဲ့ အနားမှာ ရှိနေရမယ်… ဒါမှပဲ ငါက ပိုပြီးကြီးမားတဲ့ မြင်ကွင်းကို အာရုံစိုက်နိုင်လိမ့်မယ် ’

ကောင်းကင်အရွေးချယ်ခံလီက စိတ်ထဲမှာ တီးတိုးရေရွတ်လိုက်ပြီး ရွှီချင်း၏ အဖြေကို စောင့်ဆိုင်းသည်။

ကံမကောင်းစွာပင် ရွှီချင်းထံမှ အဖြေကို သူမရခင် တောက်ပသော အလင်းတန်းတစ်ခုက အဝေးရှိ ကောင်းကင်ထံမှ ပျံသန်းလာသည်။

ထိုအလင်းတန်းက အလွန်ခမ်းနားထည်ဝါလေရာ လောကပေါ်သို့ ပန်းချီစုတ်ချက်တစ်ချက် ရေးဆွဲလိုက်ဟန် ရသည်။ ယင်းက ကောင်းကင်ကို အလယ်မှ ပိုင်းဖြတ်လိုက်ပြီး မည်သည့်အခါမှ မလွင်ပြယ်သွားမည့် မျဉ်းကြောင်းတစ်ခုအား ဖြစ်ပေါ်စေသည်။

အဆုံးမဲ့သော စွမ်းအားနှင့် ဂုဏ်ကျက်သရေက ထိုအလင်းတန်းထဲမှာ ပြည့်နှက်နေသည်။ ယင်းက ကောင်းကင်ဘုံတာအို၏ ပထမဆုံး ဟိန်းသံအလား သို့မဟုတ် ကမ္ဘာမြေ၏ အနက်ရှိုင်းဆုံးအပိုင်းထဲမှ သက်ပြင်းချသံအလား အောက်မေ့ရသည်။

အလင်းတန်းက မြန်ဆန်စွာ ချဉ်းကပ်လာသည်။

၎င်းဖြတ်သန်းသွားသည့်နေရာတိုင်း အင်မော်တယ်နန်းတော်ထဲမှ တောင်တန်းများနှင့် မြစ်ချောင်းများက တုန်ယင်သွားကြပြီး အရောင်မှေးမှိန်သွားကြသည်။

အလင်းရောင် လွင့်ပြယ်သွားသည့်နောက် ၎င်းက ရှည်လျားဖြောင့်မတ်သော ပုံရိပ်တစ်ခုအဖြစ် ပြောင်းလဲသွားသည်။ ထို့နောက် သူက သတ်ပုတ်ကွင်းဆီသို့ ဖြည်းညင်းစွာ လျှောက်လှမ်းသွားသည်။

သူထွက်ပေါ်လာသည့်အခိုက် သတ်ပုတ်ကွင်း၏ ဘေးပတ်ပတ်လည်မှ ပွဲကြည့်ပရိသတ်အားလုံးက ချက်ချင်း မတ်တတ်ထရပ်လိုက်ကြပြီး ကောင်းကင်ပေါ်မှ ပုဂ္ဂိုလ်ကို ရိုသေလေးစားစွာ အရိုအသေပေးလိုက်ကြသည်။

“ အစစ်အမှန်ဦးသျှောင်ကို နှုတ်ဆက်ပါတယ် ”

ယခု ရောက်ရှိလာသူသည် မိုးသောက်အင်မော်တယ်အရှင်သခင်၏ စတုတ္ထမြောက်တပည့် ဖြစ်သည်။

စတုတ္ထမြောက် အစစ်အမှန်ဦးသျှောင်သည် နာမည်ကျော်ကြားသော ပုဂ္ဂိုလ်ဖြစ်သည်။ သူ၏ အစောပိုင်းနှစ်များတွင် ဒဏ္ဍာရီများဖြင့် ပြည့်နှက်နေသည်။ သူက ငယ်စဉ်ကတည်းက သာလွန်ထူးခြားသော ဉာဏ်ရည်ကို ပိုင်ဆိုင်ထားခဲ့ပြီး စစ်ရေးဗျူဟာနှင့် စစ်တုရင်ကစားခြင်းတွင် အထူးကျွမ်းကျင်သည်။ ထို့ကြောင့် သူက မိုးသောက်အင်မော်တယ်အရှင်သခင်၏ စိတ်အာရုံကို ဖမ်းစားနိုင်ခဲ့သည်။

သူတို့နှစ်ယောက်က စစ်တုရင် ငါးပွဲကစားခဲ့ကြပြီး အင်မော်တယ်အရှင်သခင်က လေးပွဲအနိုင်ရကာ တစ်ပွဲရှုံးနိမ့်ခဲ့သည်။

ထိုကောင်လေး၏ ထူးခြားသော ပါရမီကို သတိထားမိပြီးနောက် အင်မော်တယ်အရှင်သခင်က သူ့ကို တပည့်ရင်းအဖြစ် သတ်မှတ်ခဲ့သည်။

ဤအစစ်အမှန်ဦးသျှောင်သည် အင်မော်တယ်အရှင်သခင်၏ သင်ကြားပြသမှုအတိုင်း လက်ခံကျင့်သုံးခဲ့သည်။ သူက ဉာဏ်ပညာနှင့်ပတ်သက်ပြီး အံ့ဖွယ်အရည်အချင်းကို ပြသခဲ့သလို သူ၏ ကျင့်ကြံခြင်းပါရမီကလည်း အံ့ဖွယ်ကောင်းသည်။

သာလွန်ထူးခြားသော ကျင့်ကြံခြင်းပါရမီက သူ၏ အံ့ဖွယ်ကောင်းသော ဉာဏ်ရည်ဖြင့် ပေါင်းစပ်သွားသည့်အခါ သူက အင်မော်တယ်နန်းတော်၏ အသိအမှတ်ပြုခြင်းကို စောစီးစွာ ရရှိခဲ့သည်။

သူ၏ စိတ်နေသဘောထားက သိမ်မွေ့ညင်သာပြီး သူ၏ အမူအကျင့်က ရင်းနှီးဖော်ရွေသည်။ သို့ဖြစ်၍ လူတိုင်းက သူ၏ တည်ရှိမှုကို ချစ်ခင်နှစ်သက်ကြသည်။

ထို့ကြောင့် သူက နန်းတော်ထဲတွင် လူချစ်လူခင်ပေါများသည်။

သို့ဖြစ်၍ ဤအခိုက်အတန့်မှာ သူတို့က အစစ်အမှန်ဦးသျှောင်ကို ရိုသေလေးစားစွာ နှုတ်ဆက်လိုက်ကြသည်။

ရွှီချင်းက ပြုံးလိုက်သည်။ ဤခန္ဓာကိုယ်ပိုင်ရှင်၏ မှတ်ဉာဏ်များအရ သူ့မှာ တစ်ဖက်လူအပေါ် ကောင်းမွန်သောအမြင် ရှိသည်။ သူတို့နှစ်ယောက်ကြားမှ ဆက်ဆံရေးက အလွန်နီးကပ်သည်။ ထို့ပြင် တစ်ဖက်လူက သူ့အပေါ် ညီလေးတစ်ယောက်ကဲ့သို့ ဆက်ဆံပြီး များစွာအလိုလိုက်သည်။

သို့ဖြစ်၍ တစ်ဖက်လူကို မြင်သောအခါ ရွှီချင်းက ပြုံးလိုက်ပြီး ပြောသည်။

“ စတုတ္ထစီနီယာအကို… ဒီနေ့က မင်းရဲ့ အားလပ်ရက်လား ”

စတုတ္ထမြောက် အစစ်အမှန်ဦးသျှောင်က အရင်ဦးဆုံး လူအုပ်ကြီးထံသို့ နွေးထွေးစွာ ပြုံးပြလိုက်ပြီး ညင်သာစွာ ခေါင်းညိတ်လိုက်သည်။ ထို့နောက် သူက ရွှီချင်းထံသို့ ခေါင်းလှည့်လိုက်ပြီး သိမ်မွေ့နူးညံ့သော အမူအရာဖြင့် ပြောသည်။

“ ဂျူနီယာညီလေး… ဆရာက သတိုးသမီးကို မင်းတင်တောင်းနိုင်အောင် မင်္ဂလာလက်ဖွဲ့ပစ္စည်း သွားရှာတယ်… ဆရာက မထွက်သွားခင် မင်းကို နောက်ထပ် ဘာပြဿနာမှ မရှာနိုင်အောင် ဂရုတစိုက် စောင့်ကြည့်ပေးဖို့ ငါ့ကို မှာသွားခဲ့တယ် ”

စတုတ္ထမြောက် အစစ်အမှန်ဦးသျှောင်က ခေါင်းခါလိုက်လေရာ အကူအညီမဲ့သော အမူအရာက သူ၏ မျက်နှာပေါ်မှာ ထွက်ပေါ်လာသည်။

“ အရိုးသားဆုံး ပြောရရင် မင်းဘယ်လိုပဲ ပြဿနာရှာပါစေ စီနီယာအကိုကြီးက မင်းအတွက် ဖြေရှင်းပေးမှာပါ… ငါအဓိက စိုးရိမ်တာက တစ်ယောက်ယောက်က မကောင်းတဲ့ ရည်ရွယ်ချက်နဲ့ မင်းအနားကို ချဉ်းကပ်လာမှာကိုပဲ ”

“ ဥပမာ… ကောင်းကင်အရွေးချယ်ခံလီပေါ့ ”

စတုတ္ထမြောက် အစစ်အမှန်ဦးသျှောင်က စကားပြောလိုက်သည့်အခါ သူ၏ လေသံက အေးစက်လာပြီး သူ၏ အကြည့်က စူးရှလာသည်။ ယင်းက ဓားသွားတစ်စင်းနှယ် ကောင်းကင်အရွေးချယ်ခံလီပေါ်သို့ ကျရောက်သွားသည်။

ယင်းက အကြည့်တစ်ချက်သာ ဖြစ်၏။

ကောင်းကင်အရွေးချယ်ခံလီက ခန္ဓာကိုယ်တုန်ယင်သွားပြီး အနောက်ဆုတ်သွားသည်။ သူ၏ ခန္ဓာကိုယ်နှင့် ဝိညာဉ်က ဤအခိုက်အတန့်မှာ အပြင်းအထန် တုန်ယင်လာသည်။ သူ၏ အသိစိတ်က ဤခန္ဓာကိုယ်ထဲမှ ထွက်ခွာသွားတော့မည်ဟုပင် သူခံစားရလာသည်။

ထိုမြင်ကွင်းက ကောင်းကင်အရွေးချယ်ခံလီ၏ အမူအရာကို ပြောင်းလဲသွားစေသည်။

ဤစတုတ္ထမြောက် အစစ်အမှန်ဦးသျှောင်ဆီမှာ သူ၏ သရုပ်ကို ဖယ်ရှားပစ်နိုင်သော စွမ်းအင်ရှိကြောင်း သူအာရုံခံနိုင်သည်

“ ဂျူနီယာညီလေး… ဆရာက မင်းရဲ့ စာသင်ဖက်ကို သေချာရွေးပေးထားတာပါ… ဒီတော့ နောက်တစ်ယောက် ထပ်တိုးဖို့ဆိုတာ မကောင်းပါဘူး ”

စတုတ္ထမြောက် အစစ်အမှန်ဦးသျှောင်က အကြည့်ပြန်ရုပ်လိုက်ပြီး ရွှီချင်းကို ကြည့်လိုက်သည့်အခါ သူ၏ အမူအရာက ပြန်သိမ်မွေ့သွားသည်။

“ အထူးသဖြင့် ရည်ရွယ်ချက် မရှင်းလင်းတဲ့ လူတွေကို သတိထားသင့်တယ် ”

“ ဘာပဲပြောပြော နောက်တစ်လကြာရင် ဆရာက ကြယ်တာရာစက်ဝန်းတစ်ခုလုံးရဲ့ အချုပ်အခြာအာဏာကို လွှဲပြောင်းယူတော့မှာ မဟုတ်လား… ဒီအတောအတွင်းမှာ တချို့ကျင့်ကြံသူတွေက မကောင်းတဲ့ ရည်ရွယ်ချက်တွေနဲ့ မင်းဆီ ချဉ်းကပ်လာနိုင်တယ် ”

“ ဒီတော့… ကောင်းကင်အရွေးချယ်ခံလီ… မင်းဘယ်လိုတောင် အတင့်ရဲတာလဲ ”

“ မင်း အခုချက်ချင်း အကယ်ဒမီဆီ ပြန်သွားပါ… တခြားလူတွေကို သတိပေးဖို့အတွက် ငါမင်းကို အနှစ်သုံးဆယ် တံခါးပိတ်ကျင့်ကြံဖို့ အပြစ်ဒဏ်ပေးမယ် ”

စတုတ္ထမြောက် အစစ်အမှန်ဦးသျှောင်က တည်ငြိမ်စွာ ပြောသည်။

သူ၏ အကြည့်နှင့် စကားက ကောင်းကင်အရွေးချယ်ခံလီအတွက် ကြီးမားသော ဖိအားကို ဖြစ်ပေါ်စေသည်။ ဤအခိုက်အတန့်မှာ သူက ထပ်မံ အနောက်ဆုတ်သွားရပြန်သည်။ သူက မွန်းကြပ်မှုကို ခံစားမိသွားလေရာ မည်သည့်စကားမှ မပြောနိုင်တော့ပေ။

ယင်းကို ရွှီချင်းကြားသောအခါ သူက ပြုံးလိုက်ပြီး ခေါင်းညိတ်လိုက်သည်။ သူက စတုတ္ထမြောက် အစစ်အမှန်ဦးသျှောင်ကို မတားဆီးပေ။

အကြောင်းအရင်းတစ်ခုမှာ သမိုင်းထဲမှ ဤလှိုင်းသေးသေးလေးက အချိန်လေဟာနယ်အပေါ် ကြီးကြီးမားမား သက်ရောက်မှုမရှိပေ။

အခြားအကြောင်းအရင်းမှာ ဤတစ်ကြိမ်တွင် ရွှီချင်း၏ ရိတ်သိမ်းမှုက လုံလောက်သွားပြီ ဖြစ်သည်။

စတုတ္ထမြောက် အစစ်အမှန်ဦးသျှောင်၏ ထွက်ပေါ်လာမှုက တိုက်ဆိုင်မှုဟုတ်မဟုတ် သူ့အတွက် အရေးမကြီးပေ။ မည်သို့ဖြစ်ပါစေ ယင်းက သူ၏ ရည်ရွယ်ချက်ကို အတော်လေး ရှင်းလင်းစေသည်။

နောက်ထပ်အကြောင်းအရင်းတစ်ခုမှာ ကောင်းကင်အရွေးချယ်ခံလီက အတော်လေး ကြောက်လန့်နေပြီး တိုက်ခိုက်လိုစိတ်ကို ဆုံးရှုံးသွားခြင်း ဖြစ်သည်။

အကယ်၍ သူက တစ်ဖက်လူကို ဖိအားပေးမည်ဆိုလျှင်ပင် ယင်းက အဓိပ္ပာယ်မရှိပေ။

သို့ဖြစ်၍ ရွှီချင်းက ဝမ်းသာစွာ ခေါင်းညိတ်လိုက်သည်။

“ စတုတ္ထစီနီယာအကိုရဲ့ စကားက အဓိပ္ပာယ်ရှိတယ်… ဒါကြောင့် ငါငြင်းဆန်တယ် ”

ယင်းကို စတုတ္ထမြောက် အစစ်အမှန်ဦးသျှောင်ကြားသောအခါ သူ၏ မျက်နှာပေါ်မှ အပြုံးက ပိုပြီးသိမ်မွေ့လာသည်။ သူက သေရည်တစ်အိုးကို ထုတ်လိုက်ပြီး ရွှီချင်းထံသို့ ကမ်းပေးလိုက်သည်။

“ မနေ့က… တစ်စုံတစ်ယောက်ကို နန်းတော်အပြင်ဘက်က ကောင်းကင်နက်မြို့တော်ဆီ ငါလိုက်ပို့တုန်းက မင်းအကြိုက်ဆုံး သေရည်ဆိုင်ကနေ ကောင်းကင်နှင်းစက်သေရည်ကို ဝယ်လာခဲ့တယ်… အဲ့ဒီသေရည်က တစ်လမှာ တစ်အိုးပဲ ရတယ်… မိုးကြိုးအပြစ်ပေးချောက်ကမ်းပါးမှာ မင်းအပြစ်ဒဏ်ခံနေရတဲ့အချိန် သေရည်ဝယ်ဖို့ အခွင့်အရေး ဆုံးရှုံးသွားမှာကို ငါစိုးရိမ်တာကြောင့် မင်းကိုယ်စား ဝယ်လာပေးခဲ့တာပါ ”

ယင်းကို ရွှီချင်းကြားသောအခါ သူက စိတ်ဓာတ်တတ်ကြွသွားသည်။ သူက သေရည်အိုးကို ယူလိုက်ပြီး ဝမ်းသာအားရ ကျေးဇူးတင်လိုက်သည်။

စတုတ္ထမြောက် အစစ်အမှန်ဦးသျှောင်က ပြုံးလိုက်ပြီး စကားပြောရန် ပြင်လိုက်သည်။

သို့သော်လည်း ထိုအခိုက်အတန့်မှာ ကောင်းကင်အရွေးချယ်ခံလီက ဤအခွင့်အရေးကို ဆုံးရှုံးသွားကြောင်း ကျုံးချီ မြင်သွားသောအခါ ဆန္ဒမရှိမှုက သူ၏ နှလုံးသားထဲမှာ ထွက်ပေါ်လာသည်။

တစ်ဖက်လူက သမိုင်းအား ပြောင်းလဲပစ်ခြင်းကို သူမြင်တွေ့ချင်သည်။ သူက တစ်ဖက်လူ၏ အာဏာစက်ကို မည်သို့ရယူသင့်ကြောင်းပင် စဉ်းစားနေခဲ့သည်။ ယခုကဲ့သို့ အဆုံးသတ်သွားခြင်းက စိတ်မကောင်းစရာပင်။

သို့ဖြစ်၍ သူက စိတ်ထဲမှာ အကျိုးအကြောင်း ချင့်ချိန်စဉ်းစားပြီးနောက် ဆုံးဖြတ်ချက်တစ်ခု ချလိုက်သည်။

‘ တကယ်လို့ ဒီစတုတ္ထမြောက် အစစ်အမှန်ဦးသျှောင်က အပြင်လူမဟုတ်ဘူးဆိုရင် ငါဘာပဲပြောပြော ကိစ္စမရှိဘူး… အဲ့လိုမဟုတ်ဘဲ တစ်ဖက်လူက အပြင်လူဆိုရင် တကယ်လို့ ငါက အခု နှုတ်ဆိတ်နေမယ်ဆိုရင်တောင် အနာဂတ်မှာ သူ့ကို ရင်ဆိုင်ရဦးလိမ့်မယ်… အဲ့ဒီအခါကျရင် ငါ့ရဲ့ သရုပ်က သူ့အတွက် လျှို့ဝှက်ချက်ဟုတ်တော့မှာ မဟုတ်ဘူး ’

ထိုသို့တွေးမိသောအခါ ကျုံးချီက ရုတ်တရက် ရွှီချင်းကို စကားပြောသည်။

“ သခင်လေး… ဒီကောင်းကင်အရွေးချယ်ခံလီက အတော်လေး ရယ်စရာကောင်းပါတယ်… တိုက်ပွဲမစခင်မှာ သူက မောက်မာထောင်လွှားပြီး အရမ်းစိတ်ဓာတ်တတ်ကြွခဲ့ပါတယ်… သူရှုံးနိမ့်သွားရင် သခင်လေးရဲ့ စာသင်ဖက်အဖြစ် နှစ်ပေါင်းတစ်ရာထမ်းဆောင်မယ်လို့ အများရှေ့မှာ ကြေညာခဲ့ပါတယ်… ဒါပေမဲ့ အခုကျတော့ သူက နှုတ်ဆိတ်နေပါတယ်… ဒါဟာ သူ့ရဲ့ ကတိစကားက ဘာတန်ဖိုးမှ မရှိဘူးလို့ လူအများရှေ့မှာ ကြေညာလိုက်တာပါပဲ ”

“ ဒီကိစ္စကို အကယ်ဒမီမှာ ငါလျှောက်ဖွလိုက်ရင် ကောင်းကင်အရွေးချယ်ခံလီက ဘယ်လောက်ရယ်စရာကောင်းလဲ လူတွေအားလုံး သိသွားကြမယ် ထင်ပါတယ် ”

ကျုံးချီက စကားဆုံးသွားသည့်အခါ ရွှီချင်းက အချိန်လေဟာနယ်၏ လှိုင်းအတတ်အကျကို ချက်ချင်း အာရုံခံမိသွားသည်။

စတုတ္ထမြောက် အစစ်အမှန်ဦးသျှောင်က ရုတ်တရက် ခေါင်းလှည့်လိုက်ပြီး ကျုံးချီကို အေးစက်စက် စိုက်ကြည့်လိုက်သည်။

တစ်ချိန်တည်းမှာ ယင်းကို ကောင်းကင်အရွေးချယ်ခံလီ ကြားသောအခါ ရုန်းကန်သော အရိပ်အယောင်က သူ၏ မျက်လုံးထဲမှာ ထွက်ပေါ်လာသည်။ ထို့နောက် သူက အနောက်သို့ ဆုတ်နေခြင်းကို ရပ်တန့်လိုက်ပြီး သတိထားခြင်းကို မြောင်းထဲပို့လိုက်သည်။ သူက ခေါင်းလှည့်လိုက်ပြီး ရွှီချင်းထံသို့ ဒူးထောက်လိုက်သည်။

“ ကျေးဇူးပြုပြီးတော့ သခင်လေး… ငါ့ရဲ့ ဂုဏ်သိက္ခာကို ငဲ့ကွက်ပေးပါ… ငါလီက အရှုံးကို လက်ခံသလို အလောင်းအစားကိုလည်း လက်ခံပါတယ်… တကယ်လို့ ဒီနေ့ ငါက ဒီအတိုင်း ထွက်သွားမယ်ဆိုရင် နောင်တက ငါ့နှလုံးသားထဲမှာ အမြဲတမ်း ကျန်ရှိနေပါလိမ့်မယ် ”

သူ၏ စကားက ပဲ့တင်ထပ်သွားသည့်အခါ ရွှီချင်းသာ အာရုံခံနိုင်သော အချိန်လေဟာနယ်လှိုင်းဂယက်က ပိုပြီးအားကောင်းလာသည်။

စတုတ္ထမြောက် အစစ်အမှန်ဦးသျှောင်၏ မျက်နှာက တည်ကြည်သွားပြီး သူက စကားပြောရန် ပြင်လိုက်သည်။

ထိုစဉ် ရွှီချင်းက ကျယ်လောင်စွာ ရယ်မောလိုက်သည်။ သူက မည်သည့်အရာကိုမှ ဂရုမစိုက်သည့်အလား သာမန်ကာလျှံကာ ပြောသည်။

“ မင်းပြောတာ အဓိပ္ပာယ်ရှိတယ် ”

“ ဒါပေမဲ့ ငါ့ရဲ့ စာသင်ဖက်ဖြစ်ဖို့က မင်းအတွက် မဖြစ်နိုင်ဘူး… တကယ်လို့ မင်းက ကတိကို မဖြစ်မနေ ဖြည့်ဆည်းပေးချင်တယ်ဆိုရင် ငါ့ရဲ့ သားရဲဥယျာဉ်ဆီသွားပြီး ဝိညာဉ်သားရဲတွေကို နှစ်တစ်ရာပြည့်အောင် ထိန်းသိမ်းစောင့်ရှောက်ပေးပါ ”

ထိုသို့ပြောပြီးနောက် ရွှီချင်းက စတုတ္ထမြောက် အစစ်အမှန်ဦးသျှောင်ကို ကြည့်လိုက်သည်။

“ စတုတ္ထစီနီယာအကိုကြီး… ဒါကို မင်းဘယ်လိုသဘောရလဲ ”

စတုတ္ထမြောက် အစစ်အမှန်ဦးသျှောင်က ပါးစပ်အဟောင်းသားဖြစ်သွားသော အမူအရာကို ထုတ်ဖော်လိုက်ပြီး အပြုံးဖြင့် ခေါင်းခါလိုက်သည်။

“ ထားလိုက်ပါတော့… ငါ့မှာ တခြားကိစ္စတွေ ရှိသေးတယ်… ဒီဟာကို မင်းဆီပဲ ငါလွှဲခဲ့တော့မယ် ”

ထိုသို့ပြောပြီးနောက် သူ၏ အကြည့်က ကျုံးချီထံသို့ သာမန်ကာလျှံကာ ကျရောက်သွားသည်။ သူက ခြေတစ်လှမ်းဖြင့် သတ်ပုတ်ကွင်းထဲမှ ထွက်သွားပြီး မြင်ကွင်းမှ ပျောက်ကွယ်သွားသည်။

အစမှအဆုံးထိ ရွှီချင်း၏ အမူအရာက ပြုံးရွှင်နေသည်။ ဤအခိုက်အတန့်မှာ သူက စတုတ္ထမြောက် အစစ်အမှန်ဦးသျှောင် ထွက်သွားသော ဦးတည်ရာဆီသို့ လှမ်းကြည့်လိုက်သည်။ သူ၏ ခန့်မှန်းမှုက အတည်ပြုနိုင်သွားသည်။

‘ ဒီလူက သေချာပေါက် အပြင်လူပဲ ’

‘ ပြီးတော့ သူ့ရဲ့ လုပ်ဆောင်မှုတွေက နည်းနည်း စိတ်ဝင်စားစရာပဲ… သူက သမိုင်းကြောင်းကို ပြောင်းလဲစေမယ့် အဖြစ်အပျက်တွေကို တားဆီးချင်တာလား ’