မင်းတကယ် ထွက်ပေါ်လာတယ်

ဤအခိုက်အတန့်မှာ စိတ်အာရုံအားလုံးက တည်နေရာပြောင်းရွှေ့ခြင်းအစီအရင်၏ တည်နေရာပေါ်သို့ ကျရောက်နေကြသည်။

အပြင်ဘက်တွင် အရာအားလုံးက ပုံမှန်ဖြစ်နေပုံပေါ်ပြီး စည်းချအစီအရင်က အကောင်းတိုင်း ရှိနေဆဲပင်။ သက်လတ်ပိုင်းအရွယ် လူဆိုးထိန်းအရာရှိကိုဖြစ်စေ စတုတ္ထမြောက်အစစ်အမှန် ဦးသျှောင်ကိုဖြစ်စေ မမြင်တွေ့နိုင်ပေ။

ဤနေရာက အချိန်လေဟာနယ်၏ လှိုင်းများနှင့် စတုတ္ထမြောက် အစစ်အမှန်ဦးသျှောင်၏ ပြိုင်ဘက်ကင်း အစီအရင်ကြောင့် ဤနေရာမှ သီးခြားခွဲထုတ်ခံလိုက်ရသည်။

အကယ်၍ တစ်စုံတစ်ယောက်က ဤနေရာမှ မူမမှန်မှုကို ထွင်းဖောက်မြင်နိုင်လျှင်ပင် စတုတ္ထမြောက် အစစ်အမှန်ဦးသျှောင်က ဤနေရာသို့ ရောက်မလာမီ ထိုလူများကို ကြိုအသိပေးထားခဲ့သည်။ ထိုနည်းဖြင့် သူက သူ့တာဝန်ကို ပိုပြီးလုံခြုံစိတ်ချစေသည်။

ထို့ကြောင့် အပြင်လူများ မြင်နေသည့် တည်ငြိမ်မှုက ပုံရိပ်ယောင်တစ်ခုမျှသာ ဖြစ်သည်။ အကယ်၍ တစ်ယောက်ယောက်က ဤအခိုက်အတန့်မှာ ဤနေရာဆီသို့ ဝင်ရောက်လာမည်ဆိုလျှင် အမိန့်ပေးသံက မိုးခြိမ်းသံပမာ ပဲ့တင်ထပ်နေကြောင်း ကြားရလိမ့်မည်။

စည်းချအစီအရင်၏ အပေါ်တွင် စတုတ္ထမြောက် အစစ်အမှန်ဦးသျှောင်က ဂုဏ်သိက္ခာကြီးမြတ်သော အရှိန်အဝါနှင့် လွှမ်းမိုးဖိနှိပ်သော ဖိအားကို ထုတ်လွှတ်နေသည်။ သူ၏ အကြည့် ကျရောက်လာသည့်အခါ မူလလမ်းကြောင်းနှင့် သွေဖယ်နေသော အရာအားလုံးက လမ်းကြောင်းမှန်ပေါ်သို့ ပြန်တည့်မတ်သွားသည်။

သူထုတ်လွှတ်လိုက်သော အသံက သဏ္ဍာန်မဲ့အင်အားအဖြစ် ပြောင်းလဲသွားပြီး ငွေရောင်မှော်သင်္ကေတများသဖွယ် ဒြပ်ထည်ဖွဲ့စည်းသွားသည်။ ထို့နောက် မှော်သင်္ကေတများက သူ၏ ဘေးပတ်ပတ်လည်၌ အစီအစဉ်တကျ နေရာယူလိုက်ကြပြီး အလွန်ကျယ်ပြောသော စည်းချအစီအရင်တစ်ခုကို ချက်ချင်း ဖွဲ့စည်းလိုက်သည်။

ငွေရောင်အလင်းက ဤဧရိယာကို ချက်ချင်း လင်းထိန်သွားစေသည်။

ယင်းက အသံတာအိုက အမိန့်အဖြစ် ဒြပ်ထည်ပြောင်းလဲသွားခြင်း ဖြစ်သည်။

စည်းချအစီအရင်က လှည့်ပတ်သွားပြီး ငွေရောင်တောက်ပလာသည့်အခါ စတုတ္ထမြောက် အစစ်အမှန်ဦးသျှောင်၏ စိတ်ဆန္ဒနှင့် အခွင့်အာဏာက ထွက်ပေါ်လာသည်။

ယင်းက ကမ္ဘာမြေကို ဖုံးလွှမ်းသွားမည့် ကောင်းကင်ဘုံပင်လယ်ပမာ ဆင်းသက်လာသည်။

ယင်းက သက်လတ်ပိုင်းအရွယ် လူဆိုးထိန်းအရာရှိထံသို့ တန်းတန်းမတ်မတ် ဦးတည်သွားသည်။

လွှမ်းမိုးဖိနှိပ်သော ဖိအားနှင့် ဒီရေသဖွယ် ပေါ်လျှိုးလာသော အင်အားကြောင့် သက်လတ်ပိုင်းအရွယ် လူဆိုးထိန်းအရာရှိသည် ဒေါသူပုန်ထနေသော ပင်လယ်ထဲ၌ အထီးကျန်နေသည့် လှေငယ်လေးတစ်စင်းပမာ ခံစားမိသွားသည်။ ဤသည်မှာ သူက မုန်တိုင်းကြောင့် အချိန်မရွေး ပျက်စီးသွားတော့မည့်အလားပင်။

သို့တိုင် သူ၏ မျက်လုံးထဲမှာ အနောက်ဆုတ်လိုသော အရိပ်အယောင် လုံးဝမရှိပေ။ ပြင်းပြသော တိုက်ပွဲစိတ်ဆန္ဒက သူ၏ ခန္ဓာကိုယ်ထဲမှ ပေါ်လျှိုးလာသည်။ သူ့အနောက်မှာ ဒြပ်ထည်ဖွဲ့စည်းထားသော ဧရာမဓားကျိုးက ပိုပြီးရက်စက်ကြမ်းကြုတ်သော အရှိန်အဝါကို ထုတ်လွှတ်လိုက်သည်။

အလွန်ကျယ်ပြောသော ငွေရောင်စည်းချအစီအရင် ဆင်းသက်လာသည့်အခိုက် သူ၏ နဖူးပေါ်မှ သွေးကြောများက ဖောင်းကြွလာသည်။ သူ၏ မျက်နှာက ချောက်ချားဖွယ်ကောင်းပြီး ကြောက်စရာကောင်းသော မျက်နှာအဖြစ် ပြောင်းလဲသွားသည်။

သူက လက်မြှောက်လိုက်ပြီး ကောင်းကင်ပေါ်မှ ဆင်းသက်လာနေသော စည်းချအစီအရင်ကို ဟန့်တားလိုက်သည်။

မျက်စိတစ်မှိတ်အတွင်းမှာ ပြိုင်ဘက်ကင်းသော ဓားကျိုးက မိုးခြိမ်းသံသဖွယ် ဓားဟိန်းသံကို ထုတ်လွှတ်လိုက်သည်။ ဓား၏ ကျိုးနေသောအပိုင်းက ထွန်းလင်းတောက်ပလာလေရာ ဓားက ၎င်းဘာသာ ပြန်ကောင်းမွန်ရန် ကြိုးစားနေပုံပေါ်သည်။

ဓားက အကောင်းပကတိ ပြန်ဖြစ်သွားသည့်နှင့်တစ်ပြိုင်နက် လူဆိုးထိန်းအရာရှိ၏ လက်ထဲသို့ ကျရောက်သွားသည်။ တစ်ဆက်တည်းမှာ လူဆိုးထိန်းအရာရှိက အမိန့်ကို ကိုယ်စားပြုသော ကောင်းကင်ဘုံစည်းချအစီအရင်ထံသို့ ဓားဖြင့် ခုတ်ပိုင်းလိုက်သည်။

စည်းချအစီအရင်နှင့် ဓားကျိုးက ချက်ချင်း ထိပ်တိုက်တွေ့ဆုံသွားသည်။

အလွန်ကျယ်လောင်သော မိုးခြိမ်းသံက ပဲ့တင်ထပ်လာသည်။

အမိန့်စည်းချအစီအရင်က သန်မာသော်လည်း ဓားကျိုးက ပိုပြီးရက်စက်ကြမ်းကြုတ်သည်။ ထို့ပြင် ယင်းက ဝရမ်းပြေးနှင့် ဆင်တူသည်။ အမိန့်က ၎င်းအပေါ်သို့ မည်သို့ကျရောက်လာပါစေ ဓားကျိုးက ချိုးဖြတ်နိုင်သည်။

စည်းချအစီအရင်က အက်ကွဲသွားပြီး မရေမတွက်နိုင်သော အပိုင်းအစများအဖြစ် ပြောင်းလဲသွားကာ အဝေးသို့ လွင့်စင်သွားကြသည်။

လူဆိုးထိန်းအရာရှိက တုန်ယင်သွားပြီး သွေးတစ်ပွက် အန်လိုက်ရသည်။ သူက အတော်လေး အားနည်းသွားသည်။ ဤသည်မှာ သူ၏ အသက်နှင့် ဝိညာဉ်က ဓားကျိုး၏ စုပ်ယူခံလိုက်ရသည့်အလားပင်။

ယင်းက ဓားကျိုးကို အသက်သွင်းရသည့် အဖိုးအခဖြစ်သည်။

သို့သော်လည်း ဤအခိုက်အတန့်မှာ သူက နည်းနည်းမှ သတိမပေါ့ဆဝံ့ချေ။ ဓားကျိုးက စည်းချအစီအရင်အား ပိုင်းဖြတ်လိုက်သည်ကို သူက အခွင့်ကောင်းယူ၍ တည်နေရာပြောင်းရွှေ့ခြင်းအစီအရင်ထံသို့ ချက်ချင်း ချဉ်းကပ်သွားသည်။

သူက စည်းချအစီအရင်ထံသို့ ခြေချရန် ခြေတစ်လှမ်းမျှသာ ကွာဝေးတော့သည်။

သို့သော်လည်း စတုတ္ထမြောက် အစစ်အမှန်ဦးသျှောင်မှာ မည်သူနည်း။ သူ့မှာ မည်သို့ကြောင့် ထိုနည်းလမ်းများသာ ရှိမည်နည်း။

အစောနက စည်းချအစီအရင်သည် သာမန်ကာလျှံကာ သူပြောလိုက်သော စကားများမှ ဖြစ်ပေါ်လာခြင်း ဖြစ်သည်။

လေထဲမှ စတုတ္ထမြောက် အစစ်အမှန်ဦးသျှောင်က တည်ငြိမ်သော အမူအရာဖြင့် ညာလက်ကို ဝှေ့ယမ်းလိုက်သည်။

သူက လက်ဝှေ့ယမ်းလိုက်သည့်အခါ အရပ်မျက်နှာအဘက်ဘက်မှ သံကြိုးများက ငွေရောင်မြွေများအလား ရွေ့လျားသွားကြသည်။ ထို့နောက် ၎င်းတို့က လေထဲမှာ အတူတကွ ယှက်ထွေသွားကြပြီး ပိုပြီးကျယ်ပြောသော စည်းချအစီအရင်ကို ဖွဲ့စည်းလိုက်သည်။

ဤစည်းချအစီအရင်၏ ဖိအားဖြစ်စေ၊ အရှိန်အဝါဖြစ်စေ၊ ရှုပ်ထွေးမှုဖြစ်စေ၊ ထွန်းလင်းတောက်ပမှုဖြစ်စေ ပထမတစ်ခုထက် အများကြီး သာလွန်သည်။

ယင်းတို့က အမိန့်သံကြိုးများမှ ဖြစ်ပေါ်လာကြခြင်း ဖြစ်သည်။

စည်းချအစီအရင်သည် ထွက်ပေါ်လာသည်နှင့်ချက်ချင်း လူဆိုးထိန်းအရာရှိထံသို့ တန်းမတ်စွာ ဦးတည်သွားသည်။

လူဆိုးထိန်းအရာရှိ၏ အမူအရာက သိသိသာသာ ပျက်ယွင်းသွားသည်။

သူက ကြယ်တာရာစက်ဝန်းနှင့် တစ်ခါမှ မတိုက်ခိုက်ဖူးသော်လည်း ကြယ်တာရာစက်ဝန်း၏ စွမ်းအားကို ကောင်းကောင်း သိသည်။ မည်သို့ဖြစ်ပါစေ ကြယ်တာရာစက်ဝန်းသည် အရှေ့ပိုင်းကြယ်စင်စု၏ ဤမျိုးဆက်မှ နံပါတ်တစ်ကောင်းကင်အရွေးချယ်ခံ ဖြစ်သည်။

သို့သော်လည်း ယခုကဲ့သို့ လွှမ်းမိုးဖိနှိပ်သော အင်အားကို ကိုယ်တိုင်တွေ့ကြုံလိုက်ရသည့်အခါ ဖော်မပြနိုင်သော တုန်လှုပ်မှုက သူ၏ ခန္ဓာကိုယ်ထဲမှ ထွက်ပေါ်လာသည်။

သို့တိုင်အောင် သူ့မှာ တခြားရွေးချယ်စရာမရှိပေ။

အလွန်သိပ်သည်းသော အလင်းတန်းက လူဆိုးထိန်းအရာရှိ၏ မျက်လုံးထဲမှာ ဖြတ်ပြေးသွားသည်။ သူ၏ မျက်နှာက ရှုံ့မဲ့သွားပြီး သူ၏ မျက်နှာပေါ်မှ သွေးကြောများက ပိုပြီးဖောင်းကားလာသည်။ ထို့နောက် တစ္ဆေနှင့်ဆင်တူသော မျက်နှာက သူ၏ မူလမျက်နှာကို လုံးဝ အစားထိုးသွားသည်။ ဤသည်မှာ သူက တခြားတစ်ယောက်အဖြစ် လုံးဝ ပြောင်းလဲသွားသည့်အလားပင်။ ကြောက်မက်ဖွယ်ကောင်းသော အရှိန်အဝါက သူ၏ ခန္ဓာကိုယ်ထဲမှ မြှောက်တတ်လာသည်။

စည်းချအစီအရင်က သူ့အပေါ်သို့ ပိကျလာသည့်အခါ လူဆိုးထိန်းအရာရှိက လူမဆန်သော ဟိန်းသံကို ထုတ်ဖော်လိုက်ပြီး ဓားကျိုးကို သူ၏ လက်နှစ်ဖက်ဖြင့် တင်းတင်းကျပ်ကျပ် ဖမ်းဆုပ်လိုက်သည်။ သူက ခွန်အားအကုန် အသုံးပြုလိုက်ပြီး ဓားကျိုးကို သူ၏ အသက်ဓာတ်အား စုပ်ယူစေရန် ခွင့်ပြုပေးလိုက်သည်။ ထို့နောက် သူက ကောင်းကင်ပေါ်မှ ဆင်းသက်လာနေသော စည်းချအစီအရင်ကို ဓားဖြင့် ပိုင်းဖြတ်လိုက်သည်။

ကောင်းကင်က မည်းမှောင်သွားသည်။

ဓားကျိုးမှ ထုတ်လွှတ်လိုက်သော စွမ်းအားက အထွတ်အထိပ်သို့ မြင့်တတ်သွားသည်။ ယင်းက စည်းချအစီအရင်နှင့် ထိပ်တိုက်တွေ့ဆုံသွားသောအခါ အင်အားနှစ်ခုက အပြန်အလှန် ဆန့်ကျင်လိုက်ကြသည်။

ကျယ်လောင်သော ပေါက်ကွဲသံက မထွက်ပေါ်လာသော်လည်း တွေ့ဆုံမှုက အလွန်ပြင်းထန်သည်။

မကြာမီ ဓားထိပ်ဖျားက ထွန်းလင်းတောက်ပလာပြီး စည်းချအစီအရင်ကို ထိုးဖောက်သွားသည်။

သို့သော်လည်း ယင်းက ဓားထိပ်ဖျားမျှသာ ဖြစ်သည်။

ဤသည်မှာ ဓားကျိုးက အလုံအလောက် အစွမ်းမထက်ခြင်းမဟုတ်ပေ။ ယင်းအစား ဓားကိုင်ဆောင်သူက ဓား၏ စွမ်းအားကို မတောင့်ခံနိုင်ခြင်း ဖြစ်သည်။ လူဆိုးထိန်းအရာရှိက သွေးတစ်ပွက် အန်လိုက်ရပြီး သူ၏ ခန္ဓာကိုယ်က မြန်ဆန်စွာ ညှိုးနွမ်းခြောက်သွေ့သွားသည်။

စတုတ္ထမြောက် အစစ်အမှန်ဦးသျှောင်က တည်ငြိမ်နေဆဲပင်။

သူက လူဆိုးထိန်းအရာရှိကို အေးစက်စွာ ကြည့်လိုက်ပြီး လက်ဝှေ့ယမ်းလိုက်သည်။

ကြီးမြတ်သော အင်အားက စည်းချအစီအရင်ထံမှ ပေါက်ကွဲထွက်လာသည်။

လူဆိုးထိန်းအရာရှိ၏ ခန္ဓာကိုယ်က တုန်ယင်သွားပြီး သူက အနောက်သို့ လွင့်စင်သွားသည်။ သူက မြေပြင်ပေါ်သို့ ပြုတ်ကျသွားပြီး သူ၏ ဒွရာခုနစ်ပေါက်မှ သွေးစီးကျလာသည်။

သူ၏ လက်ထဲမှ ဓားကျိုးက ထိန်းချုပ်မရအောင် ပျံသန်းထွက်လာပြီး မြေပြင်ပေါ်မှာ ထိုးစိုက်သွားသည်။ တစ်ဆက်တည်းမှာ နောင်တပါဝင်နေဟန်ရသော ဓားဟိန်းသံက ထွက်ပေါ်လာသည်။

အရာအားလုံးက ပြီးဆုံးသွားသည်။

“ ဒီလိုတိုက်ပွဲစွမ်းအား… သူက နှစ်ပေါင်းများစွာကြာအောင် ကျိုးကျန်းလီနဲ့ တန်းတူယှဉ်နိုင်ခဲ့တာ မထူးဆန်းတော့ပါဘူး… ကြည့်ရတာ ကျိုးကျန်းလီရဲ့ စွမ်းအားဖုံးကွယ်မှုက အကြွင်းမဲ့ ကျွင်းကျင်မှုအဆင့်ကို ရောက်နေပြီ ထင်တယ် ”

စတုတ္ထမြောက် အစစ်အမှန်ဦးသျှောင်က တည်ငြိမ်စွာ ပြောသည်။ သူ၏ အကြည့်က မြေပြင်ပေါ်မှ လူဆိုးထိန်းအရာရှိပေါ်သို့ ကျရောက်သွားပြီးနောက် သူက လက်ဝှေ့ယမ်းလိုက်သည်။

လူဆိုးထိန်းအရာရှိက မည်မျှရုန်းကန်ပါစေ အသုံးမဝင်ချေ။ သူ၏ ခန္ဓာကိုယ်က အင်အားဖြင့် ဖမ်းဆုပ်ခံလိုက်ရပြီး လေထဲမှာ မျောလွင့်သွားသည်။

တစ်ချိန်တည်းမှာ အမိန့်သံကြိုးများက အရပ်မျက်နှာအဘက်ဘက်မှ ရောက်လာကြပြီး သူ့ကို အပြည့်အဝ ရစ်ပတ်ချုပ်နှောင်လိုက်ကြသည်။

သံကြိုးများ၏ တချွင်ချွင်မြည်သံမှ ထွက်ပေါ်လာသော အာဏာစက်စာလုံးများလည်း ရှိသေးသည်။ ယင်းတို့က လူဆိုးထိန်းအရာရှိ၏ ခန္ဓာကိုယ်တစ်လျှောက် ဖုံးလွှမ်းသွားပြီး မှော်သင်္ကေတများအဖြစ် ပြောင်းလဲသွားကြသည်။

“ မင်းက အမိန့်မနာခံဘူးဆိုမှတော့ ဒီလောကအပေါ် ဆင်းသက်လာတဲ့ မင်းရဲ့ အသိစိတ်ကို ငါဖယ်ရှားပစ်ပြီး နေရာမှန်ဆီ ပြန်ပို့ပစ်မယ် ”

စတုတ္ထမြောက် အစစ်အမှန်ဦးသျှောင်က တည်ငြိမ်စွာ စကားပြောလိုက်သည့်အခါ အမိန့်အာဏာစက်က ထွက်ပေါ်လာသည်။

သူ၏ အာဏာစက်က တမူထူးခြားသည်။ စတုတ္ထအလွှာဆီသို့ ရောက်လာပြီးနောက် သူက ဆုလာဘ်တစ်ခုကို ရရှိခဲ့သည်။ ဆုလာဘ်ကို မူလသမိုင်းကြောင်းအတိုင်း နေထိုင်ချင်သော သူ၏ ရည်ရွယ်ချက်ကြောင့် ရရှိလာခြင်းလော သို့မဟုတ် သူက ဤခန္ဓာကိုယ်ပိုင်ရှင်နှင့်တူညီသော အာဏာစက်ကို ပိုင်ဆိုင်ထားခြင်းကြောင့်လော သေချာမသိပေ။

ထိုဆုလာဘ်က အမြစ်ဖြတ်သုတ်သင်ခြင်း ဖြစ်သည်။

သူက အမိန့်အာဏာစက်ဖြင့် သူ့ရန်သူများ၏ အသိစိတ်ကို ဖျက်ဆီးပစ်နိုင်သည်။

ဤအခိုက်အတန့်မှာ သူက စွမ်းအားကို ထုတ်လွှတ်လိုက်သည်။ ယင်းက အပနှင်ခြင်းနှင့် ဆင်တူသည်။

ချက်ချင်းဆိုသလို လေထဲ၌ တန်းလန်းချိတ်ဆွဲခံထားရသော သက်လတ်ပိုင်းအရွယ် လူဆိုးထိန်းအရာရှိက အပြင်းအထန် တုန်ယင်လာပြီး နှလုံးနာကျင်စွာ အော်ဟစ်ညည်းညူလိုက်သည်။

အမိန့်အာဏာစက်က သူ၏ ခန္ဓာကိုယ်ထဲမှာ လှည့်ပတ်သွားပြီး ရှဲလင်းဇီ၏ သဲလွန်စအားလုံးကို ဖျက်ဆီးပစ်လိုက်သည်။

ထိုလုပ်ငန်းစဉ်က သိပ်မကြာပေ။

စက္ကန့်ပိုင်းလေးအတွင်းမှာ အပနှင်ခြင်းက ပြီးမြောက်သွားပြီး သူ၏ အသိစိတ်က ဖျက်ဆီးခံလိုက်ရသည်။

သက်လတ်ပိုင်းအရွယ် လူဆိုးထိန်းအရာရှိက သေဆုံးသွားပြီး သူ၏ ခန္ဓာကိုယ်က မြေပြင်ပေါ်သို့ ပြုတ်ကျသွားသည်။

မြေပြင်ပေါ်မှ သံမဏိဓားသည်လည်း ဤအခိုက်အတန့်မှာ လွင့်ပြယ်သွားသည်။

ထိုမြင်ကွင်းက အမြဲတမ်း တည်ငြိမ်နေခဲ့သော ကြယ်တာရာစက်ဝန်း၏ အမူအရာကို ရုတ်တရက် ပြောင်းလဲသွားစေသည်။

“ ငါ့ရဲ့ အမိန့်အာဏာစက်ထဲမှာ သတ်ဖြတ်ခြင်းစိတ်ဆန္ဒ မပါဝင်ပါဘူး… ရှဲလင်းဇီရဲ့ အသိစိတ်ကို ဖယ်ရှားပြီးရင် ဒီလူက ပုံမှန်ပြန်ဖြစ်သွားရမှာ မဟုတ်ဘူးလား… ဒါပေမဲ့ ဒီလူက… တကယ်ကြီး သေဆုံးသွားတယ် ”

ကြယ်တာရာစက်ဝန်းက တဒင်္ဂနှုတ်ဆိတ်သွားသည်။ ထို့နောက် သူက ခေါင်းမော့လိုက်ပြီး အဝေးသို့ ကြည့်လိုက်သည့်အခါ အေးစက်စက် အလင်းက သူ၏ မျက်လုံးထဲမှာ ထွက်ပေါ်လာသည်။

“ အဲ့ဒီအတွက် ရှင်းပြချက်တစ်ခုပဲ ရှိတယ် ”

“ ဒီလူက ရှဲလင်းဇီဟုတ်သလို… ရှဲလင်းဇီမဟုတ်ပြန်ဘူး ”

“ အတိအကျပြောရရင် ဒီလူက သူ့ကိုယ်သူ ရှဲလင်းဇီလို့ နက်နက်ရှိုင်းရှိုင်း ယုံကြည်နေတဲ့လူပဲ… ပြီးတော့ သူ့ဘေးက သံမဏိဓားက တကယ့်အစစ်ပဲ… အဲ့ဒါက ငါ့ကို စိတ်ရှုပ်ထွေးအောင် လုပ်လိုက်တာပဲ ”

“ သူက သေခါနီးအချိန်မှာတောင် သူ့ကိုယ်သူ ရှဲလင်းဇီလို့ ယုံကြည်နေတုန်းပဲ… ဒါကြောင့် ရှဲလင်းဇီကို ငါဖယ်ရှားလိုက်တာက ရှဲလင်းဇီ သေသွားပြီလို့ သူ့ကို ထင်မြင်သွားစေတယ်… အဲ့ဒါကြောင့် သူက သေဆုံးသွားတာပဲ ”

“ တကယ့်ရှဲလင်းဇီက ဒီနေရာမှာ ရှိနေတုန်းပဲ ”

စတုတ္ထမြောက် အစစ်အမှန်ဦးသျှောင်၏ အမူအရာက ချက်ချင်း မည်းမှောင်သွားသည်။

လူအများအပြားက ဤကစားပွဲမှာ ပါဝင်ကြသည်။

ရေကန်ထဲတွင် မည်သို့ကြောင့် လူတစ်ယောက်တည်းသာ ငါးမျှားလိမ့်မည်နည်း။

ဤအရွယ်အစားကြီးမားသော စစ်တုရင်ကစားပွဲထဲတွင် ရွှီချင်းနှင့် စတုတ္ထမြောက် အစစ်အမှန်ဦးသျှောင်က ကစားနေကြသလို တခြားလူများကလည်း တူညီစွာ ကစားနေကြသည်။

သူတို့၏ ကျင့်ကြံခြင်းအဆင့်ကြောင့် သူတို့ထဲတွင် ရိုးရှင်းသောလူ တစ်ယောက်မှ မရှိပေ။ အကယ်၍ ထိုသို့လူရှိမည်ဆိုလျှင်ပင် သူတို့က စွမ်းရည်များကို ဖုံးကွယ်ရန် တုံးအချင်ယောင် ဆောင်နေသူများသာ ဖြစ်လိမ့်မည်။

အကယ်၍ တစ်ယောက်ယောက်က ထိုအလိမ်အညာအပေါ် ယုံကြည်မည်ဆိုလျှင် သေချာပေါက် ဒုက္ခရောက်သွားလိမ့်မည်။

…..

သို့သော်လည်း လျှို့ဝှက်ကြံစည်မှုဖြစ်စေ သို့မဟုတ် တိုက်ရိုက်အစီအစဉ်ဖြစ်စေ ယင်းတို့ကို ဖြေရှင်းနိုင်သော နည်းလမ်းက အများကြီး ရှိသည်။ ယင်းက ငါးမျှားခြင်းတွင်သော်လည်းကောင်း သို့မဟုတ် စစ်တုရင်ကစားခြင်းတွင်သော်လည်းကောင်း အတူတူဖြစ်သည်။

အနက်ရောင်အလင်းက ကြယ်တာရာစက်ဝန်း၏ မျက်လုံးထဲမှာ ဖြတ်ပြေးသွားသည်။

လူတိုင်းက မရိုးရှင်းသော်လည်း သူ့မှာ ထိုလူများကို ဖိနှိပ်နိုင်သော စွမ်းရည်ရှိသည်။

အကယ်၍ သူ၏ အစီအစဉ်မှာ အမှားတစ်ခု ရှိလာမည်ဆိုလျှင်ပင် ယင်းကို ပြန်မှန်ကန်စေမည်။ ထို့ကြောင့် သူက လက်မြှောက်လိုက်ပြီး အစောနက သံမဏိဓားပျောက်ကွယ်သွားခဲ့သော နေရာကို ဖမ်းဆုပ်လိုက်သည်။

ချက်ချင်းဆိုသလို အမိန့်အာဏာစက်နှင့် ကွဲပြားသော အရှိန်အဝါအမျှင်တန်းတစ်ခုက မြန်ဆန်စွာ ရောက်ရှိလာသည်။

ယင်းက ဓားကျိုး၏ အရှိန်အဝါဖြစ်သည်။ ထိုအရှိန်အဝါမှတဆင့် သူက ဓားကျိုးပိုင်ရှင်၏ တည်နေရာကို ချက်ချင်း ပစ်မှတ်ထားပြီး တကယ့်ရှဲလင်းဇီကို ရှာဖွေနိုင်လိမ့်မည်။

သို့သော်လည်း ထိုအရှိန်အဝါက မြန်ဆန်စွာ လွင့်ပြယ်သွားနေလေရာ အချိန်ကြာကြာ မတည်ရှိနိုင်ပေ။

“ အချိန်လုံလောက်ပါတယ်… ငါသူ့ကို နောက်တစ်ကြိမ် ထပ်သတ်ပစ်မယ် ”

သတ်ဖြတ်ခြင်းစိတ်ဆန္ဒက စတုတ္ထမြောက် အစစ်အမှန်ဦးသျှောင်၏ မျက်လုံးထဲမှာ ပေါ်လျှိုးလာပြီး သူက ဦးတည်ရာတစ်နေရာသို့ ပျံသန်းသွားရန် ပြင်လိုက်သည်။ သို့သော်လည်း ထိုအခိုက်အတန့်မှာ အပြောင်းအလဲတစ်ခု ဖြစ်ပေါ်လာသည်။

ကောင်းကင်၏ အရောင်က ပြောင်းလဲသွားသည်။

တည်နေရာပြောင်းရွှေ့ခြင်းအစီအရင်၏ ဘေးပတ်ဝန်းကျင်မှ လေဟာနယ်ထဲတွင် မုန်တိုင်းတစ်ခု ထွက်ပေါ်လာသည်။ သဲမှုန်နှင့် ဖုန်မှုန့်က မြေကြီးထဲမှ မြှောက်တတ်လာသည်။ ယင်းတို့က လေမုန်တိုင်းထဲမှာ အတူတကွ ယှက်ထွေသွားကြပြီး သဲမုန်တိုင်းအဖြစ် ပြောင်းလဲသွားသည်။

မုန်တိုင်းက ထွက်ပေါ်လာသည်နှင့်ချက်ချင်း ဤနေရာမှ ထွက်သွားတော့မည့် စတုတ္ထမြောက် အစစ်အမှန်ဦးသျှောင်ကို တားဆီးလိုက်သည်။

ဝုန်းခနဲ မြည်သံက ကောင်းကင်တစ်လျှောက် ပျံ့လွင့်သွားသည့်အခါ စတုတ္ထမြောက် အစစ်အမှန်ဦးသျှောင်၏ ခြေလှမ်းက လေထဲမှာ ရပ်တန့်သွားသည်။ ကြမ်းတမ်းသော လေပြင်းတိုက်ခတ်မှုကြောင့် သူ၏ ဆံပင်ရှည်နှင့် အဝတ်အစားက တဖျပ်ဖျပ်လှုပ်ခတ်သွားသည်။ စူးရှသော အလင်းတန်းက သူ၏ မျက်လုံးထဲမှာ ထွက်ပေါ်လာသည်။

သူမြင်လိုက်ရသည်မှာ လေဟာနယ်တစ်ခုလုံးကို အပြည့်ဖုံးလွှမ်းထားသော ထိုသဲမုန်တိုင်းထဲမှ ပုံရိပ်တစ်ခု ဖြစ်သည်။ ထိုပုံရိပ်က တစ်လှမ်းချင်း လျှောက်လာနေသည်။

ထိုလူက ဝတ်စုံနက်ကို ဝတ်ဆင်ထားပြီး သူ၏ မျက်နှာက ဝေဝါးနေသည်။ တစ်စုံတစ်ယောက်သည် ထိုလူက အမျိုးသားတစ်ယောက်ဖြစ်ကြောင်းသာ မြင်နိုင်ပေသည်။

သို့သော်လည်း အရာအားလုံးက အတုအယောင်ဖြစ်နိုင်သည်။ သူ၏ အသွင်သဏ္ဍာန်ကို တိတိကျကျ ပြောရန် အလွန်ခက်ခဲသည်။

“ မင်း တကယ်ထွက်ပေါ်လာတယ် ”

ထိုပုံရိပ်ကို ကြည့်ပြီးနောက် မရင်းနှီးသော အရှိန်အဝါကို အာရုံခံမိသောအခါ စတုတ္ထမြောက် အစစ်အမှန်ဦးသျှောင်၏ မျက်လုံးထဲတွင် အေးစက်စက်အလင်း ထွက်ပေါ်လာသည်။ သူက ဖြည်းညင်းစွာ ပြောသည်။

ယနေ့ သူပြုလုပ်ခဲ့သော အစီအစဉ်တွင် အစက ရည်ရွယ်ချက်နှစ်ခုရှိခဲ့သည်။ ပထမရည်ရွယ်ချက်က ရှဲလင်းဇီကို ဖိနှိပ်ပြီး သမိုင်းကို မူလလမ်းကြောင်းအပေါ် ပြန်တည့်မတ်ရန် ဖြစ်သည်။ ဒုတိယရည်ရွယ်ချက်က ကောလဟာလများ၏ နောက်ကွယ်မှလူကို မျှားခေါ်ထုတ်ရန် ဖြစ်သည်။

တစ်ဖက်လူက သူ့ကို ပစ်မှတ်ထားနေမှတော့ သူတို့နှစ်ယောက်၏ လမ်းစဉ်က မတူညီကြောင်း ထင်ရှားသည်။ သို့ဖြစ်၍ အကယ်၍ တစ်ဖက်လူသာ ယနေ့ည ထွက်ပေါ်မလာလျှင် ယနေ့ပွဲမှာ သူအနိုင်ရသည်ဟု သတ်မှတ်နိုင်လိမ့်မည်။

အကယ်၍ တစ်ဖက်လူက ထွက်ပေါ်လာပြီး သဲလွန်စကျန်နေခဲ့မည်ဆိုလျှင် သူက ယင်းကို ပစ်မှတ်ထားပြီး တစ်ဖက်လူ၏ သရုပ်ကို အတည်ပြုနိုင်လိမ့်မည်။

ယင်းက သူ့ပြိုင်ဘက်အတွက် ရှေ့မတိုးသာ နောက်မဆုတ်သာ အခြေအနေဖြစ်သည်။

သို့သော် တစ်ဖက်လူက ထွက်ပေါ်လာခဲ့သော်လည်း အချိန်က လွဲမှားနေသည်။ ယခုအချိန်မှာ စတုတ္ထမြောက် အစစ်အမှန်ဦးသျှောင်အတွက် အရေးကြီးဆုံးက ရှဲလင်းဇီကို အမြန်ရှာဖွေပြီး သူ့ကို ဖိနှိပ်ရန် ဖြစ်သည်။

စူးရှသော အလင်းက သူ၏ မျက်လုံးထဲမှာ ထွက်ပေါ်လာသည်။ သူက ထွက်သွားရန် ပြင်လိုက်သည်။ ရှဲလင်းဇီကို သူအရင်ဖြေရှင်းရမည်။

မည်သို့ဖြစ်ပါစေ ဓားကျိုး၏ အရှိန်အဝါက မြန်ဆန်စွာ လွင့်ပြယ်နေသည်။ ထို့ပြင် ရှဲလင်းဇီက ငါးမျှားနေကြောင်း ထင်ရှားသည်။ တစ်ဖက်လူက လူဆိုးထိန်းအရာရှိကို တည်ကြက်ထား၍ သူ့အား မျှားခေါ်ထုတ်ခဲ့ကြောင်း သူနားလည်သည်။

သူ၏ ရည်ရွယ်ချက်က နန်းတော်ကို သစ္စာဖောက်နိုင်မည့် အခွင့်အရေးကို စတုတ္ထမြောက် အစစ်အမှန်ဦးသျှောင်၏ တားဆီးမခံရဘဲ အမိဖမ်းဆုပ်ရန် ဖြစ်သည်။

ထို့ကြောင့် စတုတ္ထမြောက် အစစ်အမှန်ဦးသျှောင်သည် အချိန်ကို ဤနေရာမှာ အလဟဿမသုံးချင်ပေ။

သူက ဤနေရာမှာ တိုက်ခိုက်ရန် ဆန္ဒမရှိသော်လည်း လေထဲမှ ဝတ်စုံနက်ပုံရိပ်က သူ့ကို အလွယ်တကူ ထွက်သွားခွင့်မပေးချင်ကြောင်း ထင်ရှားသည်။

သို့ဖြစ်၍ စတုတ္ထမြောက် အစစ်အမှန်ဦးသျှောင် စတင်လှုပ်ရှားလိုက်သည်နှင့်ချက်ချင်း ဝတ်စုံနက်အမျိုးသားက လက်မြှောက်လိုက်သည်။ ချက်ချင်းဆိုသလို အလွန်ကျယ်လောင်သော မြည်သံက ကောင်းကင်ပေါ်ရှိ သဲမုန်တိုင်းထဲမှ ပဲ့တင်ထပ်လာသည်။ မကြာမီ ဧရာမမျက်လုံးတစ်စုံက မုန်တိုင်းထဲမှာ ထွက်ပေါ်လာသည်။

ထိုမျက်လုံးများက မီးခိုးရောင်ဖြစ်သည်။

မျက်လုံးများက ထွက်ပေါ်လာသည်နှင့်ချက်ချင်း အေးစက်မှုနှင့် အကြင်နာမဲ့မှုကို ထုတ်ဖော်လိုက်ပြီး စတုတ္ထမြောက် အစစ်အမှန်ဦးသျှောင်ကို စိုက်ကြည့်လိုက်သည်။

စတုတ္ထမြောက် အစစ်အမှန်ဦးသျှောင်၏ ခန္ဓာကိုယ်က တောင့်တင်းသွားသည်။

သူက ထိုမျက်လုံးတစ်စုံဖြင့် စိုက်ကြည့်ခံလိုက်ရသည့်အခါ သူ၏ ခန္ဓာကိုယ်က ဘာမှမထိခိုက်သွားသော်လည်း သူ၏ ကိုယ်ပိုင်အသိစိတ်က အပိုင်းပိုင်းအစစ ပြိုကွဲသွားသည်။ ဤသည်မှာ သူ၏ အသိစိတ်က မရေမတွက်နိုင်သော သဲမှုန်များအဖြစ် ပြောင်းလဲသွားသည့်အလားပင်။

သဲတစ်မှုန်စီမှာ သီးခြားလွတ်လပ်သော စိတ်ဆန္ဒရှိသည်။

“ စိတ်ဝင်စားစရာပဲ… ”

စတုတ္ထမြောက် အစစ်အမှန်ဦးသျှောင်က မျက်လုံးဝင်းလက်သွားပြီး ညာလက်ကို မြှောက်လိုက်သည်။ ချက်ချင်းဆိုသလို သံကြိုးများက လေထဲမှာ ထွက်ပေါ်လာကြပြီး သူ၏ အရှေ့တွင် ဝဲကတော့တစ်ခုအဖြစ် လှည့်ပတ်သွားကြသည်။ အရွယ်အစားမတူညီသော ငွေရောင်ခေါင်းတလားဆယ့်သုံးလုံးက ထိုဝဲကတော့ထဲမှ ပေါ်ထွက်လာကြသည်။

၎င်းတို့ထွက်ပေါ်လာသည်နှင့် အလွန်သိပ်သည်းသော အမိန့်စွမ်းအားက ခေါင်းတလားများထဲမှ ထွက်ပေါ်လာသည်။

သို့သော်လည်း ခေါင်းတလားများက ချိပ်ပိတ်ခံထားရပြီး မလှုပ်မယှက်ရှိနေဆဲပင်။

ကြည့်ရသည်မှာ သူက စတုတ္ထမြောက် အစစ်အမှန်ဦးသျှောင်၏ ခန္ဓာကိုယ်ကို ရယူထားသော်လည်း သူ၏ အသိစိတ်တစ်ခုတည်းဖြင့် ၎င်းတို့ကို ထိန်းချုပ်ရန် မဖြစ်နိုင်သည့်အလားပင်။

ယင်းက တကယ့် စတုတ္ထမြောက် အစစ်အမှန်ဦးသျှောင်၏ ဖန်တီးမှုလက်ရာတစ်ခု ဖြစ်သည်။