အခန်း (၁၂၁-၁၂၅)

စာစဉ် ၉။ အခန်း ၁၂၁ သနားစရာ သိုင်းဘုရင်အဆင့် ကျွမ်းကျင်သူ..

လောင်ကျွမ်းကောင်းကင်ဧကရာဇ်၏ အသိစိတ်သည် ပြင်းထန်စွာ တုန်လှုပ်သွားသည်။ သူ့မှာသာ ရုပ်ခန္ဓာရှိမယ်ဆိုလျှင် သွေးတောင်အန်နေလိမ့်မည်။

သို့သော် သူ့မှာသာ ရုပ်ခန္ဓာကိုယ်ရှိမည်ဆိုလျှင် လုရှောင်ယန်က သူ့ကို ဤကဲ့သို့ လုပ်နိုင်မှာလည်း မဟုတ်ပေ။

ဤအခိုက်အတန့်တွင် လောင်ကျွမ်းကောင်းကင်ဧကရာဇ်သည် အလွန်ဒေါသထွက်နေတော့၏။

အမြင့်ကနေပြုတ်ကျရခြင်း၏အဓိပ္ပါယ်ကို သူ နောက်ဆုံးတွင် နားလည်သွားသည်။

လုရှောင်ယန်သည် သူ့ကို ရှင်းယွင်ချီတစ်ထောင်အဂ္ဂိရတ်အိုးထဲသို့ ပစ်ချပြီးနောက် နောက်ဆုံးတွင် သူက အေးအေးဆေးဆေး ပြောလိုက်သည်။

“မင်းသေတာ နှစ်အတော်ကြာနေပြီဆိုတော့ ဟန်ဆောင်နေတာကို ရပ်လိုက်တော့။ ကိုယ်ဟန်အနေအထား လမ်းကြောင်းက မင်းဆုပ်ကိုင်ထားဖို့အတွက် အရမ်းနက်နဲတယ်။"

လောင်ကျွမ်းကောင်းကင်ဧကရာဇ်သည် ဒေါသအမျက်ထွက်ကာ သွေးအန်နေသော်လည်း သူသည် သရော်နေဆဲဖြစ်သည်။ “ခွေးကောင်၊ သိပ်ပျော်မနေနဲ့။ မင်းမှာ သိုင်းဘုရင်အဆင့် လက်နက်အနည်းငယ်ရှိလို့ ငါ မင်းကိုကြောက်မယ်ထင်နေလား။ ငါ့ရဲ့ ရိုးတွင်းခြင်ဆီက သိုင်းဘုရင်အဆင့် ရိုးတွင်းခြင်ဆီ....။ မင်းက ငါ့ရဲ့ ရိုးတွင်းခြင်ဆီကို သိုင်းဘုရင်အဆင့် အဂ္ဂိရတ်အိုးမရှိဘဲ သန့်စင်ချင်တယ်ဆိုတာ အရူးတစ်ယောက်ရဲ့ အိပ်မက်ပဲ။"

လုရှောင်ယန် ခဏမျှ တိတ်ဆိတ်သွားသည်။

"ဒါဆို ကျွန်တော် တကယ်ကို စိတ်မကောင်းပါဘူး။ ကျွန်တော် သန့်စင်ထားတဲ့ ဒီအဂ္ဂိရတ်အိုးက ထိပ်တန်းသိုင်းဘုရင်အဆင့်အဂ္ဂိရတ်အိုးပါ။"

"ဘာ...."

လောင်ကျွမ်းကောင်းကင်ဧကရာဇ်၏ စိတ်ဝိညာဉ်သည် ရုတ်တရက် တုန်လှုပ်သွားတော့သည်။ လုရှောင်ယန်သည် ရှင်းယွင်ချီတစ်ထောင်အဂ္ဂိရတ်အိုးကို အသက်သွင်းလိုက်သောအခါ၊ တဖက်သူသည် ထိပ်တန်းအဆင့် သိုင်းဘုရင်အဆင့် အဂ္ဂိရတ်အိုး၏ အရှိန်အဝါကို စတင်ခံစားလာရလေသည်။

ထိုအချိန်တွင် လောင်ကျွမ်းကောင်းကင်ဧကရာဇ်သည် လုံးဝရှုံးနိမ့်သွားပြီဖြစ်သည်။

သူသည် တစ်နေ့တွင် ရှင်ပြန်ထမြောက်နိုင်စေရန် သူ၏ သိုင်းဘုရင်အဆင့်ခြင်ဆီနှင့် စိတ်ဝိညာဉ်တစ်စိတ်တစ်ပိုင်းကို ချန်ထားခဲ့သည်။

နောက်ဆုံးတွင်၊ လုရှောင်ယန်ကဲ့သို့ ပုံမှန်မဟုတ်သော ကျွမ်းကျင်သူတစ်ဦးနှင့်တွေ့ရန် သူ မမျှော်လင့်ခဲ့ပေ။ ထိုသူတွင် သိုင်းဘုရင်အဆင့် လက်နက်အစုအဝေးကို မဆိုထားနှင့် သိုင်းဘုရင်အဆင့် ဆေးလုံးသန့်စင်သည့် ဓမ္မရတနာတစ်ခုပင် ရှိသည်။ ဤအရာတွေအားလုံးကို သူ့ကို ကိုင်တွယ်ဖို့များ လုရှောင်ယန် တမင်ပြင်ဆင်ခဲ့သည်လား။

သူ၏ သိုင်းဘုရင်အဆင့် ခြင်ဆီ တဖြည်းဖြည်း သန့်စင်သွားသည်ကို ခံစားသိရှိလိုက်ရသဖြင့် လောင်ကျွမ်းကောင်းကင်ဧကရာဇ်သည် နောက်ဆုံးတွင် ကြောက်လန့်သွားသည်။

သူက ကပျာကယာပြောသည်။ "ခဏလေး၊ ငါ့ကိုမသတ်နဲ့။ ငါတို့အတူတူလုပ်လို့ရတယ်။ ငါက သိုင်းဘုရင်အဆင့် ကျွမ်းကျင်သူဖြစ်ပြီး ကျင့်ကြံမှုအမှတ်တရတွေနဲ့ အတွေ့အကြုံတွေရှိတယ်။ ငါ မင်းကို သင်ပေးပြီး မင်းကို သိုင်းဘုရင်အဆင့် ကို ကျင့်ကြံဖို့ ကူညီပေးနိုင်တယ်။"

လုရှောင်ယန် ခေါင်းယမ်းလိုက်သည်။

"မဟုတ်သေးပါဘူး၊ လူကြီးတွေက ပိုအသိဉာဏ်ရှိတယ်လို့ လူတွေက ပြောလေ့ရှိတယ်။ မင်းငါ့ကို အခွင့်ကောင်းယူဖို့ နည်းလမ်းတွေ ရှာတွေ့လိမ့်မယ်။ မင်းရဲ့ သိုင်းဘုရင်အဆင့် ခြင်ဆီကို သန့်စင်လိုက်တာက ငါ့အတွက် ပိုကောင်းမယ်ထင်တယ်။"

"မဟုတ်ဘူး၊ ငါတို့ စာချုပ်ချုပ်လို့ရတယ်။ အဲဒီအခါကျ ငါ မင်းကို ထိခိုက်အောင် လုပ်လို့မရတော့ဘူး။ ငါတို့ .....။"

ရိုက်ချ...

"အတူတူ" ဟူသော စကားထွက်မလာခင် လုရှောင်ယန်သည် ရှင်းယွင်ချီတစ်ထောင်အိုးကို ဖုံးအုပ်လိုက်သည်။

ရိုးရိုးသားသားပြောရလျှင် လုရှောင်ယန်သည် သိုင်းဘုရင်အဆင့် ကျွမ်းကျင်သူတစ်ဦး၏ အတွေ့အကြုံဖြင့် သွေးဆောင်ခံခဲ့ရသည်။

သို့သော် သူသည် သိုင်းဘုရင်အဆင့် ခြင်ဆီဆေးလုံး၏အရသာကို အမှန်တကယ်မြည်းစမ်းချင်သည်။

မည်သို့ပင်ဆိုစေကာမူ ၎င်းသည် ကျင့်ကြံမှုအတွက်လည်း အကျိုးရှိသည်။ နောက်တစ်ခုက သူ၏ လက်ရှိတပ်မက်မှုကို ဖြည့်ဆည်းပေးနိုင်သည့်အတွက် နောက်တစ်ခုကို ရွေးချယ်တာက ပိုကောင်းသည်။

သိုင်းဘုရင်အဆင့် ကျွမ်းကျင်သူတစ်ယောက်၏ လေ့ကျင့်မှုအတွေ့အကြုံက ပိုတန်ဖိုးရှိနေလျှင်တောင်မှပေါ့...

ရှင်းယွင်ချီတစ်ထောင်အဂ္ဂိရတ်အိုးသည် လျှင်မြန်စွာ အသက်ဝင်လာပြီး သိုင်းဘုရင်အဆင့် အဂ္ဂိရတ်အိုး၏ အရှိန်အဝါဘယ်လောက်ကြီးလည်း မှန်းဆကြည့်၍ရသည် ။

လောင်ကျွမ်းကောင်းကင်ဧကရာဇ်၏ရိုးတွင်းခြင်ဆီသည် သိုင်းဘုရင်အဆင့် ဖြစ်သော်လည်း၊ ၎င်းကို သန့်စင်နိုင်ဆဲဖြစ်သည်။

လောင်ကျွမ်းကောင်းကင်ဧကရာဇ်၏ အသိစိတ်သည် နှစ်ပေါင်းတစ်သောင်းကျော်ကြာ လည်ပတ်နေခဲ့ပြီး အလွန်ပင် အားနည်းနေပြီဖြစ်၍ ဤဖြစ်စဉ်သည် မကြာရှည်ခဲ့ပေ။

သူ၏အသိစိတ် လုံးဝပျက်စီးသွားသဖြင့် သိုင်းဘုရင်အဆင့်ခြင်ဆီသည် ၎င်း၏ခံစစ်အစီအရင်ကို ဆုံးရှုံးသွားကာ ဆေးဖက်ဝင်ဆေးလုံးအဖြစ်သာ ပြန်လည်သန့်စင်နိုင်တော့သည်။

တစ်ချိန်တည်းမှာပင်၊ တိမ်တိုက်အများအပြားသည် နန်းမြို့တော်တစ်ခုလုံးတွင် စုရုံးလာသည်။

အုန်း...

မိုးခြိမ်းသံ တဟုန်ထိုးမြည်ဟီးကာ နဂါးများကဲ့သို့ လျှပ်စီးများလင်းလက်လာသည်။

သိုင်းဘုရင်အဆင့် ရိုးတွင်းခြင်ဆီသည် သာမန်ဆေးလုံးမဟုတ်ပေ။ ၎င်းသည် သိုင်းဘုရင်အဆင့် ဆေးဖြစ်သည်။

ထို့အပြင်၊ ၎င်းသည် သိုင်းဘုရင်အဆင့်သွေးဆေးလုံးထက်ပင် အားကောင်းခဲ့သည်။ ၎င်းသည် အလယ်အလတ်တန်းစား သိုင်းဘုရင်အဆင့် ဆေးဖက်ဝင်ဆေးတစ်လုံးဖြစ်ပြီး ၎င်း၏အစွမ်းမှာ ပို၍ပင်အားကောင်းသည်။

ထို့ကြောင့် ကောင်းကင်သည် သဘာဝအတိုင်း ကြီးမားသော လျှပ်စီးကြောင်းများ လွှတ်ချ၍ နတ်ဘုရားပြစ်ဒဏ် ဖန်တီးပေးသည်။

ဤအချိန်သည် လီချန်းရှန်ဓားဝိညာဉ်နှင့် ပေါင်းစပ်ခဲ့သော ယခင်အချိန်ကလောက် မပြင်းထန်သော်လည်း၊ ၎င်းသည် ကြီးကျယ်ခမ်းနားဆဲဖြစ်ပြီး လျစ်လျူမရှုနိုင်ပေ။

နန်းမြို့တော်တစ်ခုလုံး တုန်လှုပ်သွားပြန်သည်။

မရေမတွက်နိုင်သော ပညာရှင်များသည် ကောင်းကင်ယံ၌ နတ်ဘုရား၏ပြစ်ဒဏ်ကို ကြည့်ပြီး၊ သူတို့၏ မျက်လုံးများ မှိတ်တုတ်မှိတ်တုတ်နှင့် သူတို့၏ နှလုံးသားများ အဆက်မပြတ် ခုန်နေသည်။

"ဘာဖြစ်နေတာလဲ၊ မကြာသေးခင်အချိန်ကစပြီး နန်းမြို့တော်မှာ ဘာကြောင့် ပုံမှန်မဟုတ်တဲ့ ဖြစ်စဉ်တွေ ပေါ်လာတာလဲ။"

"ဘယ်သူလဲ၊ ဒီနတ်ဘုရားရဲ့ ပြစ်ဒဏ်တွေကို တယောက်ပြီးတယောက် ဖြစ်စေတာ ဘယ်သူလဲ။"

"မကြာခင် နန်းမြို့တော်မှာ ကြီးမားတဲ့ အပြောင်းအလဲတွေ ရှိလာလိမ့်မယ် ထင်တယ်။"

တစ်ချိန်တည်းမှာပင် ပုံရိပ်ယောင်တစ်ခုသည် ခရမ်းရောင်ငြိမ်းချမ်းရေး ဧကရာဇ်နန်းတော်အထက် ကောင်းကင်ယံ၌ တိတ်တဆိတ် ရောက်ရှိလာသည်။

"နှစ်ပေါင်းတစ်သောင်းကြာခဲ့ပြီ။ ငါ့ရဲ့ပထမဆုံးတိုက်ခိုက်မှုက ကလေးတစ်ယောက်ကို တိုက်ခိုက်ဖို့ ဖြစ်မယ်လို့မမျှော်လင့်ထားဘူး။ ဘယ်လောက်ရယ်စရာကောင်းလဲ။"

ခဏနားပြီးနောက် သူမ ခေါင်းကို ခါလိုက်ပြန်သည်။

"ဒါပေမယ့်၊ အဲဒါနဲ့ ပတ်သက်ပြီး ငါဘာမှ မလုပ်နိုင်သေးဘူး။ ငါ့ဝိညာဉ်ကို ပြုပြင်ပြီး ငါ့ကိုယ်ခန္ဓာကို ပြန်လည်တည်ဆောက်ဖို့ မျှော်လင့်ချက်အတွက် ဖေးအာကို အားကိုးနေရတုန်းပဲ။ ဖေးအာကို သူ့မကောင်းတဲ့စိတ်ဝိညာဉ်တွေ လွှမ်းမိုးပြီး သူ့ရဲ့ ကျင့်ကြံမှုကို ထိခိုက်စေမှာကို ငါခွင့်မပြုနိုင်ဘူး။"

သူမစကားပြောပြီးသည်နှင့် ယွဲ့ယင်းသည် ရှေ့သို့ ခြေတစ်လှမ်းတိုးကာ ကျီဝူရှား၏နေအိမ်အထက် ကောင်းကင်ယံသို့ ချက်ချင်းရောက်ရှိလာသည်။

"ပြီးခဲ့တဲ့ အချိန်မှာ၊ ဖေးအာက ကျီဝူရှားကို ဒီဝင်းထဲကို စိန်ခေါ်ဖို့ လာခဲ့တာ။ ကျီဝူရှားရဲ့ ဆရာလည်း ဒီမှာပဲ နေလောက်မယ် မဟုတ်လား.. သူ့နာမည်က ဘာလဲ လုရှောင်ယန်လား.. သူ့နာမည်က ကောင်းတော့ကောင်းသားပဲ။ ကံမကောင်းစွာနဲ့ မင်းက ရန်မစသင့်တဲ့လူကို ရန်စလိုက်တာပဲ။"

သိုင်းဘုရင်အဆင့်ကျွမ်းကျင်သူ ယွဲ့ယင်းသည် သူမ၏တပည့်ကို အခြားသူများက အလွယ်တကူ အရှက်ခွဲရန် မည်သို့ခွင့်ပြုနိုင်မည်နည်း။

ယခုတစ်ကြိမ်တွင် ၎င်းသည် သူမ၏ ဝိညာဉ်ခန္ဓာ၏ အစိတ်အပိုင်းတစ်ခုမျှသာဖြစ်ပြီး သူမ၏ ပင်မဝိညာဉ်ခန္ဓာကိုယ်မဟုတ်သော်လည်း၊ သူမသည် ဤဝိညာဉ်ခန္ဓာထဲသို့ ဝိညာဉ်စွမ်းအားများစွာကို ထိုးသွင်းခဲ့သည်။

သူမ၏ သိုင်းဘုရင်အဆင့် ကျင့်ကြံခြင်းနည်းလမ်းနှင့် တိုက်ခိုက်ရေးအတွေ့အကြုံတို့နှင့်အတူ အနှစ်သာရခိုင်မြဲခြင်းအဆင့်၏ ဒသမအဆင့်ရှိ ကျွမ်းကျင်သူတစ်ဦးနှင့်ပင် နှိုင်းယှဉ်ရန် လုံလောက်ပါသည်။

ဤသည်မှာ သူမ၏ ယုံကြည်မှုပင် ဖြစ်သည်။

သိုင်းဘုရင်အဆင့်ကျွမ်းကျင်သူ၏ ယုံကြည်မှု။

သိုင်းဘုရင်အဆင့်ကျွမ်းကျင်သူတစ်ဦး ဒေါသထွက်သောအခါ၊ ၎င်းတို့၏ ရန်သူများ၏ အလောင်းများသည် မိုင်ထောင်ပေါင်းများစွာ လွင့်မျောသွားမည်ဖြစ်သည်။

သို့သော်~~

ကျီဝူရှား၏ ခြံဝင်းအထက်ကောင်းကင်ကို သူမ ရောက်သွားသည်နှင့် နန်းမြို့၏ အပေါ်က ကောင်းကင်တစ်ခုလုံး တိမ်မည်းတွေ ဖုံးလွှမ်းသွားသည်။ ကောင်းကင်မှ နတ်ဘုရားပြစ်ဒဏ်ဆိုသည့်စကားလုံးက ရုတ်တရက် သူမ၏ အတွေးထဲကို အဆက်မပြတ် ရိုက်ခတ်လာသည်။

"ဒါ... နတ်ဘုရားရဲ့ ပြစ်ဒဏ်လား ဟင်!"

နတ်ဘုရား၏ ပြစ်ဒဏ်ပေးခြင်းဆိုသည်က သေမျိုးလောကရှိ ပညာရှင်များကို ပစ်မှတ်ထားသည်။

ယွဲ့ယင်းသည် သူမ၏ အထွတ်အထိပ်သို့ ရောက်နေပါက၊ ၎င်းသည် အဆင့်တစ်ခု တိုးတက်ခြင်းကြောင့် ဖြစ်ပေါ်လာသော ပြစ်ဒဏ်မဟုတ်သရွေ့ သူမသည် အခြားသော နတ်ဘုရားပြစ်ဒဏ်များကို အနည်းနှင့်အများ ခုခံနိုင်မည်ဖြစ်ပြီး မည်သည့်အန္တရာယ်မှ ကျရောက်မည်မဟုတ်ပေ။

သို့သော် သူမ အခုဘာဖြစ်နေသည်လဲ။

သူမ၏ ဝိညာဉ်သာ ကျန်ခဲ့ပြီး သူမ၏ ဝိညာဉ်သည် ပြင်းထန်စွာ ဒဏ်ရာရနေသည်။

ဒါတင်မကသေးဘူး။ ယခုအချိန်တွင် သူမ၏ ဝိညာဉ်ခန္ဓာသည် အစိတ်အပိုင်းမျှသာဖြစ်သည်။ ထို့အပြင်၊ သူမသည် သူမ၏ ဝိညာဉ်စွမ်းအား၏ အစိတ်အပိုင်းတစ်ခုကို ဤဝိညာဉ်ခန္ဓာကိုယ်ထဲသို့ ထိုးသွင်းလိုက်ရုံသာဖြစ်သည်။ သူမသည် အနှစ်သာရခိုင်မြဲခြင်းအဆင့်၏ ဒသမအဆင့်တွင်သာ ရှိသေးသည်။

သူမ၏ ကျင့်ကြံဖြင့်၊ သူမသည် နတ်ဘုရားပြစ်ဒဏ်ကို ဆက်လက်ရင်ဆိုင်ပါက သူမသည် သေခြင်းတရားကို လက်ယက်ခေါ်နေသလို ဖြစ်သွားမည်မဟုတ်လား။

"မဖြစ်သေးဘူး မြန်မြန်ဆင်းရမယ်။"

ယွဲ့ယင်းသည် လုံးဝ သတိမလွတ်ဝံ့ဘဲ ချက်ချင်း ဆင်းသွားချင်သည်။

သို့ရာတွင်၊ သူမသည် အခြားနေရာ၌ရှိနေပါက၊ နတ်ဘုရားပြစ်ဒဏ်စီရင်ခြင်း၏အရှိန်သည် အနည်းငယ်နှေးကွေးပေမည်။ သို့သော် သူမသည် လုရှောင်ယန်၏အထက် နေရာတွင်ဖြစ်သည်။

လုရှောင်ယန်သည် လက်ရှိတွင် တောင်တန်းနှင့်မြစ်ပန်းချီကားချပ်တွင် ရှိနေပြီး ထိုပြစ်ဒဏ်က သူ့ကို မထိမခိုက်နိုင်သော်လည်း၊ ထို ပြစ်ဒဏ်၏ အဓိကအပိုင်းသည် သူ၏နေထိုင်ရာပတ်ဝန်းကျင်တွင် စုစည်းနေဆဲဖြစ်သည်။

ထို့ကြောင့် ဘုရား၏ ပြစ်ဒဏ် ဆင်းသက်သည့် အရှိန်သည် အလျင်မြန်ဆုံးဖြစ်သည်။

ယွဲ့ယင်း ဆင်းသက်ခါနီးတွင် သူမဘာမှမလုပ်နိုင်မီ ကောင်းကင်ယံ၌ ကျယ်လောင်သောပေါက်ကွဲသံတစ်ခုထွက်ပေါ်လာသည်။ ရေပုံးကဲ့သို့ ထူထဲသော မိုးကြိုးတစ်ခုသည် ယွဲ့ယင်း၏ စိတ်ပိုင်းဆိုင်ရာ ခွန်အားပေါ်ကို တိုက်ရိုက် သက်ရောက်သည်။

"သွားပြီ!"

ယွဲ့ယင်း၏ ဝိညာဉ်ခန္ဓာကိုယ်သည် ချက်ချင်းပင် ငိုချင်လာသည်။

သူမ၏ အသိစိတ်သည် အမှောင်ထဲသို့ မကျသွားမီတွင် သူမသည် ပဟေဠိဖြစ်နေဆဲပင်။ ဒီခံစားချက်က မမှန်ဘူး။

ဘယ်အချိန်ကတည်းက နတ်ဘုရားပြစ်ဒဏ်တွေက ဒီလောက်မြန်မြန်ဆန်ဆန် လာတတ်တာလဲ။

မည်မျှကြီးကျယ်သော ပြစ်ဒဏ်ပေးခံရပါစေ၊ ယင်းသည် လူတို့ကို ပြင်ဆင်ရန် အခွင့်အရေးပေးဆဲဖြစ်သည်။

သူမသည် အနှစ်တစ်သောင်းကျော် ကမ္ဘာပေါ်တွင် မရှိခဲ့ဘဲ နတ်ဘုရားပြစ်ဒဏ်၏ လက်ရှိစည်းမျဉ်းများကို နားမလည်သောကြောင့်များ ဖြစ်နေမလား….

***

ပြိုင်ဘက်ကင်းအသန်မာဆုံးသခင်ကြီး

စာစဉ် ၉။ အခန်း ၁၂၂ လုရှောင်ယန်က တကယ်တော့ လူရိုးလေးတစ်ယောက်ပါ..

တောင်တန်းနှင့်မြစ် ပန်းချီကားထဲတွင်၊ တစ်နေ့နှင့် တစ်ညအပြီး၌ လုရှောင်ယန်သည် နောက်ဆုံးတွင် သိုင်းဘုရင်အဆင့်ခြင်ဆီ ဆေးလုံးငါးလုံးကို သန့်စင်ခဲ့သည်။

သူ မကူညီနိုင်ဘဲ သက်ပြင်းရှည်ကြီးချရင်း သက်သာရာရသွားသည်။

"သိုင်းဘုရင်အဆင့် ခြင်ဆီဆေးလုံး ငါးခုက ငါ၊ လီကောနဲ့ ကျန်တဲ့သူတွေ အကုန်လုံးရဲ့ ကျင့်ကြံမှုကို တိုးမြှင့်ဖို့အတွက် လုံလောက်သင့်တယ်။ ဒီတခေါက်မှာ ငါတို့ရဲ့ ကျင့်ကြံမှု ဘယ်လောက် တိုးလာမလဲသိချင်မိတယ်။ ဒါပေမယ့် ငါ့အတွက် ဧကရာဇ်နယ်ပယ်ကို ဖြတ်ကျော်ဖို့ ပြဿနာမရှိလောက်ဘူး။”

ဒါက လုရှောင်ယန်ကို အရမ်းပျော်သွားစေသည်။

ပြီးနောက်၊ သူသည် မကြာမီ သိုင်းဘုရင်အဆင့်သို့ ရောက်ရှိနိုင်တော့မည်ဖြစ်သည်။

သူ၏လက်ဝှေ့ယမ်းခြင်းဖြင့်၊ ရှင်းယွင်ချီတစ်ထောင်အိုးသည် ၎င်း၏အဖုံးကို

အလိုအလျောက်ပွင့်သွားစေသည်။ သိုင်းဘုရင်အဆင့် ခြင်ဆီ ဆေးလုံး ငါးလုံးသည် ၎င်း၏ထိန်းချုပ်မှုမှ လွတ်မြောက်ရန် ကြိုးပမ်းရင်း ဖိုအတွင်း လှည့်ပတ်ပျံသန်းသွားသည်။

သိုင်းဘုရင်အဆင့် ခြင်ဆီ ဆေးလုံးသည် အသိဉာဏ်ဖွံ့ဖြိုးနေပြီဖြစ်သည်။

ကံမကောင်းစွာ ရှင်းယွင်ချီတစ်ထောင်အိုးသည် သိုင်းဘုရင်အဆင့် ဓမ္မရတနာတစ်ခုဖြစ်သည်။ ထို့ကြောင့် သိုင်းဘုရင်အဆင့်ခြင်ဆီ ဆေးလုံးကို နှိမ်နှင်းရန် သေချာပေါက် လွယ်ကူနေပြီး ၎င်းတို့ကို လုံးဝ လွတ်မြောက်စေမည်မဟုတ်ပေ။

လုရှောင်ယန်သည် သူ၏လက်ကို ဝှေ့ယမ်းလိုက်ပြီး ဆေးလုံးတွေကို ကြွေပုလင်းသေးသေးလေးထဲ ထည့်လိုက်သည်။ ထို့နောက် သူသည် အစီအရင်ချပြီး ၎င်းကို လုံးဝ ဖိနှိပ်လိုက်သည်။

ဆေးသောက်ရမည့်အချိန်မကျသေးပေ။ ဤအရာအား သန့်စင်ရန် အချိန်အနည်းငယ်ယူရပေမည်။

လုရှောင်ယန်သည် အရင်ထွက်သွားပြီး ဒါကို ယွင်လီကောနှင့် တခြားသူတွေကို အရင်ပေးလိုက်မည်ဖြစ်သည်။

သို့သော်လည်း တောင်တန်းနှင့်မြစ် ပန်းချီကားမှ ထွက်လာစဉ်တွင် သူ၏ ခြံဝင်းငယ်လေးတွင် ပုံရိပ်ယောင်တစ်ခု လဲနေသည်ကို တွေ့လိုက်ရသည်။

အရပ် ၁.၇ မီတာခန့် မြင့်သော ရင်ဘတ်ကြီးသော အမျိုးသမီးတစ်ဦးဖြစ်သည်။

"ဒါက... ဝိညာဉ်စွမ်းအားနဲ့ အသိစိတ်တစ်ခုလား။"

လုရှောင်ယန်သည် ဤအရာကို လုပ်နိုင်သည့်သူသည် ထူးထူးခြားခြား ကျင့်ကြံဆင့်ရှိမည်ဖြစ်သောကြောင့် အတော်လေး အံ့သြသွားသည်။

သို့သော် တဖက်သူက သူ၏ခြံဝင်းထဲ ဘအဘယ်ကြောင့်ပေါ်လာရသည်လဲ။

တစ်ခဏမျှ တိတ်ဆိတ်သွားပြီးနောက် လုရှောင်ယန်သည် ရုတ်တရက် ဖြိုခွင်းလျှပ်စီးလက်သီးကို တိုက်ရိုက်အသုံးပြုပြီး တိုက်ခိုက်သည်။

အုန်း...

ဖြိုခွင်းလျှပ်စီးလက်သီးသည် တစ်ဖက်လူ၏ ရုပ်ပုံကို မီတာများစွာအကွာအထိလွင့်သွားစေကာ ရပ်တန့်သွားသည်။

ဤတိုက်ခိုက်မှုအောက်တွင် ပုံရိပ်သည် တုန်ခါသွားကာ ပျောက်ကွယ်လုနီးပါးဖြစ်နေသည်။

"မင်းက တော်တော်သန်မာတယ်။"

လုရှောင်ယန် အနည်းငယ် အံ့သြသွားပြန်သည်။ တစ်ဖက်သားက သူ၏ လျှပ်စီးလက်သီးချက်တွေကို တွန်းလှန်နိုင်ပြီး လုံးလုံးမပျက်စီးနိုင်ဘူးဟု သူ မမျှော်လင့်ထားပေ။

ဒါက မထိန်းနိုင်ပဲ သိချင်စိတ်ကို နှိုးဆွပေးသည်။

လုရှောင်ယန်သည် စစ်မှန်သောအမြင်အာရုံသုံးပါးကို သုံးလိုက်သောအခါ သူ၏ မျက်လုံးများသည် ရုတ်တရက် ကျဉ်းမြောင်းသွားကြသည်။

"ဒီစိတ်ဝိညာဉ်စွမ်းအားက အဲဒီမိန်းမပိုင်တာပဲ။"

လုရှောင်ယန် စစ်မှန်သောအမြင်အာရုံသုံးပါးကိုအသုံးပြုလိုက်သောအခါ တဖက်သူ၏ ဝိညာဉ်စွမ်းအင်ကို မှတ်မိသွားသည်။

စင်စစ် လင်းဖေး၏ လက်စွပ်ထဲက အဖွားအိုကြီးပဲ။

"နေ့ခင်းတုန်းက သူ့စိတ်ဝိညာဉ်စွမ်းအားက ဒီထက် အများကြီး ပိုသန်မာတယ်။ ဒါက ကိုယ်ပွားနေမယ်၊ တခြားသူဆိုရင်တော့ သူတို့မှာ ဆိုးဝါးတဲ့ ရည်ရွယ်ချက်တွေ ရှိမှာမဟုတ်ဘူး။ ဒီတစ်ယောက်ကတော့ ငါ့ဆီ မကောင်းကြံဖို့ လာတာ ဖြစ်နိုင်တယ်၊ သူမ ရောက်ရောက်ချင်း သိုင်းဘုရင်အဆင့်ခြင်ဆီ ဆေးလုံးကြောင့် ဒဏ်ပေးခံရတဲ့ မိုးကြိုးပစ်ဒဏ်ထိသွားတာဖြစ်နိုင်တယ်။"

လုရှောင်ယန်၏ ဉာဏ်ရည်ဉာဏ်သွေးဖြင့် ဤအရာအားလုံး၏ အကြောင်းတရားနှင့် အကျိုးသက်ရောက်မှုကို သူချက်ချင်း တွေးလိုက်မိသည်။

"ကျစ်..ကျစ်...မင်းကတကယ်သနားစရာပဲ၊ ဒါပေမယ့် မင်းငါ့ကိုသတ်ချင်တယ်ဆိုမှတော့ မင်းကိုလွှတ်ပေးဖို့မလိုဘူး။"

သူပြောသည့်အတိုင်း လုရှောင်ယန်သည် ယွဲ့ယင်းကို တိုက်ခိုက်ဖျက်ဆီးရန် အသင့်ဖြစ်နေပြီဖြစ်သည်။

သို့သော် သူတိုက်ခိုက်သည့်အခိုက်တွင် လုရှောင်ယန် ရုတ်တရက် ရပ်သွားခဲ့သည်။

"နေဦး.. သူမက ဝိညာဉ်အခွဲ တစ်ယောက်ပဲလေ။ ငါ သူ့ကို သတ်လိုက်ရင်တောင် သူ့ရဲ့ ပင်မဝိညာဉ်ခန္ဓာကိုယ်က မသေဘူး။ အဲဒီအစား ရန်သူကို သတိပေးသလိုဖြစ်မယ်။ အဲဒီအချိန်မှာ လင်းဖေးနဲ့ သူမဟာ ငါ့ရဲ့ အစွမ်းအစကို သိပြီး သေချာပေါက် သတိထားတော့မှာ ...။"

"မဟုတ်ဘူး၊ ငါ ဒီကိုယ်ပွားကို ဖျက်ဆီးလို့မရဘူး။ ငါ သူ့ကိုသတ်ချင်ရင် သူ့ပင်မဝိညာဉ်ခန္ဓာကို ငါသတ်ရမယ်။ ငါက သူ့ကို လုံးဝဖျက်ဆီးပြီး သူ့ဝိညာဉ်ကို တစ်ခါတည်း ဖြိုခွဲရမယ်။ ဒါဆို နောက်ဘယ်တော့မှ အသက်ရှင်နိုင်မှာ မဟုတ်တော့ဘူး။"

ထိုသို့တွေးရင်း လုရှောင်ယန်သည် အကြံတစ်ခုရသွားသည်။

ထို့ကြောင့် ချက်ခြင်းငုတ်တုတ်ထိုင်ချလိုက်ပြီး တစ်ဖက်သားကို စိတ်ခွန်အားတစ်ခု ထိုးသွင်းလိုက်သည်။

ဤသည်မှာ ယွဲ့ယင်း၏ အတွေးနှင့် ဝိညာဉ်စွမ်းအားကြောင့် ဖြစ်ပေါ်လာခြင်းဖြစ်သည်။ ထုံးစံအတိုင်း ဝိညာဉ်စွမ်းအင်က သူမကို မကယ်တင်နိုင်ခဲ့ပေ။

မကြာခင်မှာပဲ သတိလစ်နေသည့် ကိုယ်ပွားက သူမ၏ မျက်လုံးတွေကို ဖြည်းညှင်းစွာ ဖွင့်လာခဲ့သည်။

သူတို့ မျက်လုံးချင်း ဆုံလိုက်သည်နှင့် အနှစ်တစ်ထောင်ကြာ ကျောက်ကဲ့သို့ ခိုင်မာသော ယွဲ့ယင်း၏ နှလုံးသားထဲတွင် လှိုင်းလုံးများ အမှန်တကယ် ပေါ်လာသည်။

အနှစ်တစ်ထောင်ကြာ ကျင့်ကြံပြီးနောက် လုရှောင်ယန်ကဲ့သို့သော ချောမောသော အသွင်အပြင်ရှိသော အမျိုးသားတစ်ဦးကို သူမ ပထမဆုံးအကြိမ် တွေ့ဖူးခြင်းဖြစ်သည်။

စင်စစ် လုရှောင်ယန်သည် သူ၏အသွင်အပြင်ကို ဆွဲဆောင်မှုနည်းအောင်လုပ်ဖို့ ဝိညာဉ်စွမ်းအင်ကို အသုံးပြုလေ့ရှိပါသည်။ ထိုမှသာ အလွန်တုန်လှုပ်ဖွယ်ကောင်းပုံမပေါ်မည်ဖြစ်သည်။

သို့သော် သာမာန် ကျင့်ကြံသူများအပေါ်တွင်သာ အလုပ်လုပ်သည်။ ယွဲ့ယင်းကဲ့သို့သော သိုင်းဘုရင်အဆင့်ကျင့်ကြံသူတစ်ယောက်အပေါ်တွင် ၎င်းသည် အလုပ်မဖြစ်ပေ။

"အဆင်ပြေရဲ့လား။"

လုရှောင်ယန်သည် ယွဲ့ယင်း၏ စိတ်နှလုံးကို တုန်လှုပ်သွားစေနိုင်သည့် တောက်ပသော အပြုံးကို ထုတ်ဖော်သည်။

သို့သော် သူမ လျင်မြန်စွာ တုံ့ပြန်ပြီး ထထိုင်လိုက်သည်။

"မင်းကဘယ်သူလဲ၊ ငါဘာလို့ဒီကိုရောက်နေတာလဲ။"

လုရှောင်ယန်သည် အန္တရာယ်ကင်းသည့်အမူအရာနှင့် ပြောသည် "ငါ့နာမည်က လုရှောင်ယန်ပါ၊ ငါက ကျင့်ကြံသူငယ်လေးတစ်ယောက်ပါ။ မင်းရဲ့ဝိညာဉ်ခန္ဓာကိုယ်က ကောင်းကင်ကနေ ပြုတ်ကျတာကို ငါမြင်တယ်။ စိတ်မပူနဲ့၊ မင်းကို ပြန်ကျန်းမာလာအောင် ငါကူညီပေးခဲ့တယ်။"

"မင်းက လုရှောင်ယန် လား။"

ယွဲ့ယင်း ချက်ချင်းပင် အံ့အားသင့်သွားသည်။

လုရှောင်ယန် ခေါင်းညိတ်လိုက်သည်။

"မှန်တယ်။ ငါ့အကြောင်း ကြားဖူးလား။

"မဟုတ်ဘူး။ မဟုတ်ဘူး။"

ယွဲ့ယင်း အမြန်ငြင်းဆန်လိုက်သည်။

လက်ရှိအချိန်တွင် သူမ၏စိတ်သည် နည်းနည်းရှုပ်ထွေးနေသည်။ သူမသည် လုရှောင်ယန် ကိုသတ်ရန်လာခဲ့သည်။ လုရှောင်ယန်၏ ကယ်တင်ခြင်းကို ခံရမည်ဟုသူမမျှော်လင့်ခဲ့ပေ။

ဟုတ်ပါသည်၊ ဒါက သူမ လုရှောင်ယန်ကို မတိုက်ခိုက်ရသည့် တစ်ခုတည်းသော အကြောင်းပြချက် မဟုတ်ပေ။ နောက်ထပ် လေးနက်သည့် အကြောင်းပြချက် ရှိခဲ့ပါသေးသည်။ ဘုရား၏ ပြစ်ဒဏ်ကြောင့် သူမသည် ဒဏ်ရာရခဲ့သည်။ ထို့အပြင်၊ အကြောင်းတစ်ခုခုကြောင့် သူမ၏ဝိညာဉ်သည် နတ်ဘုရားပြစ်ဒဏ်အပြင် အခြားအရာတစ်ခုခုကြောင့် ဒဏ်ရာရသွားပုံရသည်။

ဤဒဏ်ရာတွေ ထပ်တိုးလာသည်နှင့်အမျှ သူမသည် ယခုအချိန်တွင် စိတ်ဝိညာဉ်အဆင့် ကျွမ်းကျင်သူကိုတောင် အနိုင်ယူနိုင်မှာ မဟုတ်ပေ။ ထို့ကြောင့် သူမသည် လုရှောင်ယန်ကို မတိုက်ခိုက်နိုင်ခြင်းသာဖြစ်သည်။

"ကောင်းပြီ၊ ငါတို့ တစ်ယောက်နဲ့တစ်ယောက် သိသလိုပဲ။ ဒါပေမယ့် မင်းရဲ့ဝိညာဉ်က ဒဏ်ရာရသွားတာ ပြင်းထန်လွန်းပြီး ပြုပြင်ရန် ဝိညာဉ်ကုသဆေးတွေ လိုအပ်တယ်။ မင်းရဲ့စိတ်ဝိညာဉ်စွမ်းအားကို ပြုပြင်ဖို့ ဆေးဖက်ဝင်အပင်တွေ ငါ့မှာရှိတယ်။ ငါ မင်းကို ထူးမြတ်သည့် ခုနစ်ပါးသော နှင်းကြာပန်းကို ငါပေးနိုင်တယ်။"

"ထူးမြတ်သည့် ခုနစ်ပါးသော နှင်းကြာပန်း..."

ယွဲ့ယင်း မထိန်းနိုင်ဘဲ အော်ပြောလိုက်သည်။ ချက်ချင်းပင် သူမ၏အမူအရာသည် လေးနက်လာသည်။

"ငါတို့တခါမှမတွေ့ဖူးဘူး။ မင်းငါ့ကိုဘာလို့ အဖိုးတန်ဆေးဖက်ဝင်အပင်တွေပေးတာလဲ။ မင်းရဲ့ရည်ရွယ်ချက်ကဘာလဲ။"

လုရှောင်ယန်သည် သူ၏နှလုံးသားထဲတွင် လှောင်ရယ်နေသည်။

သူမ၏ အိုင်ကျူက မနိမ့်ဘူးဘဲ။ သို့သော် ဤကမ္ဘာသည် ဝတ္ထုတစ်ပုဒ်မဟုတ်ပေ။ ကျဆုံးသွားသည့် သိုင်းဘုရင်အဆင့်ကျွမ်းကျင်သူတစ်ယောက်အနေနဲ့၊ တဖက်သူက အရမ်းမိုက်တယ်ဆိုရင်၊ ဒီကမ္ဘာက တခြားလူတွေကို ပိုပြီးမိုက်သွားအောင် လုပ်ပါလိမ့်မည်။

သူ ခေါင်းခါသည်။

"ဟုတ်ပါတယ် ငါက မင်းကို အလကားမပေးဘူး။ မင်းကိုရောင်းချင်တယ်၊ ဒီဟာကို ငါမလိုဘူး။ မင်းက ဝိညာဉ်ခန္ဓာမို့လို့ မင်းရဲ့စိတ်က ဒဏ်ရာရထားတယ်။ သေချာပေါက် ဒါကို လိုအပ်တယ်။ ငါ့လက်ထဲမှာ နေရာမပုပ်အောင် ရှင်းပစ်တာ ကောင်းပါတယ်"

ယွဲ့ယင်း သူမစိတ်ထဲတွင် လှောင်ရယ်နေသည်။ ဤလူသည် သေချာပေါက် အကျိုးအမြတ်ရှာလိုသူဖြစ်သည်။ သူမသည် ဝိညာဉ်ခန္ဓာတစ်ခုဖြစ်ပြီး ထူးမြတ်သည့် ခုနစ်ပါးသော နှင်းကြာပန်းကို လိုအပ်နေသဖြင့် သူမထံမှ ငွေရှာရန် အခွင့်အရေးယူချင်နေသည်။

သူမကို ကယ်တင်ခဲ့သည်မှာ အံ့သြစရာမဟုတ်ပေ။

စင်စစ် ကျီဝူရှား၏ အကျင့်စရိုက်သည် မကောင်းသည့်အတွက် သူမ၏ဆရာဟာလည်း လူကောင်းတစ်ယောက်ဖြစ်မှာ မဟုတ်ပေ။

သို့သော် ငွေသည် ပြဿနာမဟုတ်ပေ။ သူမသည် နှင်းကြာပန်းခုနစ်ပွင့်ကို ရယူပြီး သူမ၏ဝိညာဉ်ကို ပြုပြင်ပြီးနောက်၊ သူ့ကိုသတ်ပြီး သူ၏ဝိညာဉ်ကျောက်များကို ရယူရန် သူမအတွက် လွယ်ကူသွားမည်ဖြစ်သည်။

"ကောင်းပြီ ငါဝယ်လိုက်မယ်။ မင်းဈေးက ဘယ်လောက်လဲ။"

"ဟမ်... ငါဝယ်တုန်းက အဆင့်မြင့် ဝိညာဥ်ကျောက်တုံး ၁၀၀,၀၀၀ ကုန်သွားတယ်။ မင်းကို ဝိညာဉ်ကျောက် ၁၀၂,၀၀၀ ပဲ တောင်းလိုက်မယ်။ ဘာပဲပြောပြော အလုပ်စရိတ်လည်း ပေးရသေးတယ်၊ ဟုတ်တယ်မလား။"

"ဘာ..."

ယွဲ့ယင်း သူမ၏နားကို မယုံနိုင်ဖြစ်သွားသည်။

လုရှောင်ယန်က သူမကို အခွင့်ကောင်းယူတော့မည်ဟု သူမထင်ခဲ့သည်။ လုရှောင်ယန် သည် သူမအား နောက်ထပ် ဝိညာဉ်ကျောက်တုံး 2,000 မျှသာ ပိုပြောမည်ဟု သူမ မမျှော်လင့်ခဲ့ပေ။ အလုပ်အခကြေးငွေကို ဖယ်လိုက်လျှင်၊ ဒါက မူရင်းပေါက်ဈေးနဲ့ ရောင်းတာနဲ့ ညီမျှသည်။

ဤအခိုက်အတန့်တွင်၊ လုရှောင်ယန်အပေါ် ယွဲ့ယင်း၏ အထင်အမြင်မှာ သိသိသာသာ ပြောင်းလဲသွားသည်။

ဒီကောင်က ရိုးသားတဲ့လူဖြစ်ရမယ်….

***

ပြိုင်ဘက်ကင်းအသန်မာဆုံးသခင်ကြီး

စာစဉ် ၉။ အခန်း ၁၂၃ သူ့ကိုမဟက်အောင် အရင်တားရမယ်

"ဘာမှားလို့လဲ.. အရမ်းဈေးကြီးတယ်လို့တော့ မင်းငါ့ကိုမပြောနဲ့။ ငါ ပိုက်ဆံအဆုံးရှုံးမခံနိုင်ဘူးလေ။ အခုတင် မင်းကို ကယ်လည်းကယ်ထားရသေးတယ်။"

လုရှောင်ယန်၏ ဥပတိရုပ်သည် အလွန်ကောင်းမွန်ပြီးဖြစ်ကာ သရုပ်ဆောင်မှု နည်းနည်းပါးပါးထည့်လိုက်လျှင်ပင် သူသရုပ်ဆောင်နေသည်ဟု မည်သူမှ မပြောနိုင်ပေ။ ယွဲ့ယင်းသည် သိုင်းဘုရင်အဆင့် ကျွမ်းကျင်ပညာရှင်၏ ဝိညာဉ်ကိုယ်ခန္ဓာဖြစ်ခဲ့လျှင်တောင် သူမ မပြောနိုင်သေးပေ။

ဤအခိုက်အတန့်တွင် သူမသည် လုရှောင်ယန်ကို တိုက်ခိုက်ရန် အနည်းငယ် ဆန္ဒမရှိတော့ပေ။

"ကောင်းပြီ ငါဝယ်လိုက်မယ်။ မင်းဘာတွေရလဲ ငါ့ကိုအရင်ပြပါ။"

“အင်..။”

လုရှောင်ယန်သည် ကျန်ရှိသည့် နှင်းကြာပန်းခုနစ်ပွင့်ကို ထုတ်ကာ ယွဲ့ယင်းကို ကြည့်ခွင့်ပေးလိုက်သည်။

“ဒီအရာက ငါ့လက်ထဲမှာ ရှိရင် ငါတကယ် ပိုက်ဆံဆုံးရမှာ။ ကံကောင်းထောက်မစွာ၊ ဒီနေ့ မင်းကို ငါတွေ့ရတယ်။ ငါ့ကံကောင်းတယ်လို့ မှတ်ယူပါတယ်။ တကယ်လို့ မင်း နောက်ထပ်အဆင့်မြင့်

ဝိညာဉ်ကျောက်တုံး ၁,၀၀၀ ကို ပေးဆောင်လိုရင် ဆေးဖော်စပ်ဖို့ ငါ့ရဲ့ ထိပ်တန်းအဆင့်မြင့် ကောင်းကင်ဘုံ အဂ္ဂိရတ်မီးဖိုကို အသုံးပြုခွင့်ပေးလို့ရတယ်။"

"မင်းမှာ ထိပ်တန်းအဆင့် ကောင်းကင်ဘုံ အဂ္ဂိရတ်မီးဖိုတစ်ခုတောင် ရှိတယ်လား။"

လုရှောင်ယန် ခေါင်းညိတ်လိုက်သည်။

"ဟုတ်ပါတယ်။ ငါ့ရဲ့ အဓိက အသက်မွေးဝမ်းကျောင်းက ဆေးဖော်စပ် ပညာရှင်လေ။”

သူစကားပြောပြီးသည်နှင့် တောင်တန်းနှင့်မြစ် ပန်းချီမှ ထိပ်တန်းအဆင့် ကောင်းကင်ဘုံ အဂ္ဂိရတ်မီးဖိုကို ထုတ်ယူလိုက်သည်။

အဂ္ဂိရတ်မီးဖိုကိုမြင်တော့ ယွဲ့ယင်းသည် ပို၍ပင် ကျေနပ်သွားသည်။

သိုင်းဘုရင်အဆင့် ကျွမ်းကျင်သူတစ်ဦးအနေဖြင့် သူမ၏ ဝိညာဉ်ခန္ဓာကိုယ်သာ ကျန်ရှိတော့သော်လည်း၊ သူမသည် ဆေးများကို သန့်စင်နိုင်ဆဲဖြစ်သည်။

နောက်ဆုံးတွင်၊ ဆေးလုံးသန့်စင်ခြင်းနှင့် လက်နက်သန့်စင်ခြင်းတို့သည် အစီအရင်ဖွဲ့စည်းပုံများနှင့် ဆင်တူသည်။ ၎င်းတို့သည် ကျင့်ကြံခြင်းထက် အောင်မြင်မှုကို အမှီပြုသည်။

လုရှောင်ယန်မှာ တခြားရည်ရွယ်ချက်တွေရှိမှာကို သူမ မကြောက်ပါ။

ပထမဦးစွာ လုရှောင်ယန်သည် သူမ၏အမည်ကို လုံးဝမသိပေ။ အကြောင်းပြချက်မရှိဘဲ သူမကို ထိခိုက်စေဖို့ မဖြစ်နိုင်ပေ။

ဒုတိယအနေဖြင့်၊ သူမတွင် သိုင်းဘုရင်အဆင့် ဝိညာဉ်ခန္ဓာကိုယ်ရှိပြီး တိုက်ခိုက်ရန် နည်းလမ်းများစွာရှိသည်။

ယခုသူမ၏အထွတ်အထိပ်ခွန်အားကို မထုတ်နိုင်ခဲ့လျှင်တောင်မှ အမြင့်ဆုံးဘုရင်အဆင့် ကျွမ်းကျင်ပညာရှင်တစ်ဦး၏ ခွန်အားကို ထုတ်လွှတ်နိုင်သည်။

ခွန်အားရှိသူနှင့်ရင်ဆိုင်ရလျှင် မည်သည့်အကြံအစည်မှ အသုံးမဝင်ပေ။

လုရှောင်ယန်သည် သူမ၏ ဝိညာဉ်ကျောက်တုံးများကို လိမ်လည်လှည့်ဖြားပြီး သတ်ပစ်ချင်လျှင်တောင်၊ မဖြစ်နိုင်ပါ။

ထို့ကြောင့် သူမအနေနှင့် လုရှောင်ယန်ကို သံသယရှိနေရန် မလိုအပ်ပေ။

ထို့အပြင် လုရှောင်ယန်သည် အလွန်ရိုးသားပုံရသည်။

ဒီလူက ချောမောပြီး အသက်ဝင်တယ်။ သူဘာတွေ ကြံနေတာလဲ။

"ကောင်းပြီ မင်းရဲ့နှင်းကြာပန်းကို ငါယူမယ်။ မင်းရဲ့ ဆေးမီးဖိုကိုလည်း ငါ ငှားလိုက်မယ်။ ဒါပေမယ့် အခု ငါ့မှာ ဝိညာဉ်ကျောက်တုံး မရှိသေးဘူး။ ပစ္စည်းတွေကို အရင်ပေးပါ။ ငါပြန်သွားပြီးတော့ မင်းအတွက် ဝိညာဉ်ကျောက်တုံးတွေ ပေးမယ်။ အဲဒါ ဘယ်လိုလဲ။"

"ကောင်းပြီ၊ လုပ်ပါ။"

“ကောင်းပြီ။”

ယွဲ့ယင်း ၏ ပုံရိပ်သည် တော်ဝင်နန်းတွင်းမှ အမြန်ထွက်ခွာသွားသောအခါ သူတို့နှစ်ဦး နှုတ်ဆက်ကြသည်။

ယွဲ့ယင်း၏ တိတ်တိတ်ဆိတ်ဆိတ် ထွက်ခွာသွားခြင်းကို သူကြည့်နေစဉ် လုရှောင်ယန်၏ နှုတ်ခမ်းထောင့်မှာ အနည်းငယ် ကွေးနေပြီး အေးစက်စွာ ပြုံးလိုက်သည်။

"ဟမ့်၊ မင်းငါ့ကိုသတ်ဖို့လာပြီး၊ မင်းငါ့ဆီက ဆေးဖက်ဝင်အပင်တွေဝယ်လို့ရမယ်ထင်လား။ မင်းပြန်လာရင် မင်းငါ့လက်ထဲမှာသေရလိမ့်မယ်။"

လုရှောင်ယန်၏ အစီအစဉ်မှာ အလွန်ကောင်းမွန်စွာ တွေးဆထားသည်။

အကယ်၍ ၎င်းသည် ဆေးဖက်ဝင်အပင်များသာဖြစ်ခဲ့လျှင် ယွဲ့ယင်းသည် ဝိညာဉ်ကျောက်တုံးများကို ပေးရန် သူမ၏ ဝိညာဉ်ခန္ဓာကိုယ်အခွဲကိုသာ ပေးပို့မည်။

သို့သော်၊ သူ့တွင် ထိပ်တန်းအဆင့် ကောင်းကင်ဘုံ အဂ္ဂိရတ်မီးဖိုတစ်ခု ရှိသည်ဟု သူပြောထားသည်။ အဂ္ဂိရတ်မီးဖို ပိုကောင်းလေလေ၊ အကျိုးသက်ရောက်မှု ပိုကောင်းလေလေ ဖြစ်သည်။

ယွဲ့ယင်းသည် သူမ၏ ဝိညာဉ်ကို ပြုပြင်ရန် စိတ်အားထက်သန်နေသောကြောင့် သူမသည် သူမ၏ ပင်မဝိညာဉ်ကိုယ်ခန္ဓာဖြင့် လာမည်ဖြစ်သည်။

ယွဲ့ယင်းမှာ တခြားအတွေးတွေရှိမှာကို သူ မကြောက်ပါ။ အကြောင်းမှာ ယွဲ့ယင်းသည် သိုင်းဘုရင်အဆင့် ကျွမ်းကျင်သူဖြစ်သည်။ ရှေးခေတ်ကတည်းက ဘယ်သိုင်းဘုရင်အဆင့် ကျွမ်းကျင်ပညာရှင်က မထူးချွန်မထက်မြက်လို့လဲ။ ဘယ်သူက လွန်လွန်ကဲကဲမာနမကြီးလို့လဲ။

တစ်နည်းအားဖြင့် ယွဲ့ယင်းသည် သူ့ကို လုံးဝ အထင်မကြီးခဲ့ပေ။ သူမကို ခြိမ်းခြောက်နိုင်မည် မဟုတ်ဘူးဟု သူမတွေးနေလိမ့်မည်။

လုရှောင်ယန်၏အကြံအစည်သည် ပြီးပြည့်စုံပြီး ယွဲ့ယင်းကို လုံးလုံးလျားလျား နှိမ်နင်းနိုင်သည်။ ထိုအချိန်တွင် သူသည် ထောင်ချောက်တစ်ခုကို ကြိုတင်ပြင်ဆင်ပြီး သူမကို နောင်ဘဝသို့ တိုက်ရိုက်ပို့ပေးမည်။

သူသည် လင်းဖေးကို ဟက်ကာလုပ်ခြင်းမှ ရပ်တန့်ကာ သူ့ကို ကိုင်တွယ်ဖြေရှင်းရန် ပြီးပြည့်စုံသော နည်းလမ်းတစ်ခုကို စဉ်းစားခဲ့သည်။

“သူမမလာခင် အချိန်နည်းနည်းတော့ လိုနေပါသေးတယ်။ ငါ သိုင်းဘုရင်အဆင့် ခြင်ဆီဆေးလုံးကို အရင် ဝေပေးပြီး သူမလာမယ့်အချိန်ကို စောင့်ပြီး အစီအရင်ချရမယ်။"

မကြာခင် လုရှောင်ယန်သည် သူ၏တပည့်လေးယောက်ကို စုရုံးလိုက်သည်။

"မင်္ဂလာပါ ဆရာ။"

လုရှောင်ယန်သည် သူတို့လေးယောက်၏ ကျင့်ကြံမှုကို ကြည့်ပြီး အလွန်ကျေနပ်သွားသည်။ သူတို့လေးယောက်မှာ ခိုင်မာသည့် ကျင့်ကြံမှုအခြေခံတွေရှိသည်။ သူတို့ထဲက တစ်ယောက်မှ နောက်ကျမကျန်ခဲ့ခြင်းကိုကြည့်လျှင် လုံ့လစိုက်ထုတ်ခဲ့သည် ဆိုတာ ထင်ရှားပါသည်။

အထူးသဖြင့်၊ ယွင်လီကောသည် စိတ်ဝိညာဉ်သန့်စင်ရေးဒုတိယအဆင့်သို့ ရောက်ရှိနေပြီဖြစ်သည်။

သူသည် နောက်ဆုံးမှာသာ ရှိသေးသော်လည်း တိုးတက်မှုမှာ ကောင်းမွန်လှသည်။

“မင်းတို့ မြန်မြန် ကျင့်ကြံဖို့ ငါ မင်းတို့ကို ဒီမှာ စုစည်းခိုင်းတာ...။ အရင်က သိုင်းဘုရင်အဆင့် သွေးဆေး မင်းတို့အားလုံး သောက်သုံးဖူးကြတယ်ဆိုတော့ ဒီတစ်ခါအသုံးပြုဖို့ မသင့်လျော်တော့ဘူး။ ဒါပေမယ့် ဒီတစ်ခါ ငါပေးမယ့် ဆေးက သိုင်းဘုရင်အဆင့် သွေးဆေး ထက်တော့ မနိမ့်ဘူး။”

သူတို့၏မျက်လုံးများသည် အလင်းမပြန်ပဲကို တောက်ပနေသည်။

သူတို့၏ဆရာက မဆိုးဘူးဟု ပြောလျှင် သေချာပေါက် မဆိုးပေ။

ထို့နောက် လုရှောင်ယန်သည် အလင်းဖောက်သည့် ကြွေပုလင်းလေးကို ထုတ်ယူနေတာကို တွေ့လိုက်ရသည်။ အထဲမှာ ဆေးလုံးငါးလုံး ရှိနေသည်။

ဆေးလုံးတိုင်းသည် အဖြူရောင် သန့်သန့်ဟု ထင်ရသော်လည်း ၎င်းတို့အပေါ်တွင် အလှဆင်ထားသည့် ရွှေစင်လိုင်းများပါရှိပြီး အနှိုင်းမဲ့ ဆွဲဆောင်မှုရှိသော ပုံစံကို ရေးထွင်းထားသည်။

တစ်ချက်ကြည့်လိုက်ရုံဖြင့် လူတိုင်း၏စိတ်ဝိညာဉ်များသည် စုပ်ယူခံရပြီး လိုအင်ဆန္ဒများ ပြည့်နှက်နေပုံရသည်။

"ဆရာ၊ ဒီဆေးက ဘာဆေးလဲ။"

ဖုန်းထျန်းယွမ်က မထိန်းနိုင်ဘဲ မေးလိုက်သည်။ ထိုအခါ လုရှောင်ယန် ရယ်မောလိုက်ပြီး

"မှန်းကြည့်ပါလား။"

ဖုန်းထျန်းယွမ်က ရှက်ရွံ့စွာ ပြုံးလိုက်သည်။

"ကျွန်တော်သိဘူး…”

"သိုင်းဘုရင်အဆင့် ခြင်ဆီဆေးလုံးကို ကြားဖူးလား။"

သူတို့လေးယောက် တုန်လှုပ်သွားကာ မျက်စံများ ချက်ချင်းပင် ကျဉ်းမြောင်းသွားကြသည်။

“… သိုင်းဘုရင်အဆင့် ခြင်ဆီဆေးလုံး! ဘုရားသခင်! အဲဒါက အလယ်အလတ်တန်းစား သိုင်းဘုရင်အဆင့် ဆေးဖက်ဝင်ဆေး မဟုတ်ဘူးလား!"

လူတိုင်း၏ အသံများ တုန်ယင်လာသည်။

စင်စစ် သိုင်းဘုရင်အဆင့် ခြင်ဆီဆေးလုံးသည် အလယ်အလတ်တန်းစား သိုင်းဘုရင်အဆင့် ဆေးဖက်ဝင်ဆေးဖြစ်သော်လည်း၊ ၎င်း၏ရှားပါးမှုသည် အချို့သောအဆင့်မြင့် သိုင်းဘုရင်အဆင့် ဆေးဖက်ဝင်ဆေးများထက်ပင် မြင့်မားပါသည်။

သိုင်းဘုရင်အဆင့် ခြင်ဆီဆေးလုံး၏ ကုန်ကြမ်းမှာ သိုင်းဘုရင်အဆင့် ကျွမ်းကျင်သူ၏ ရိုးတွင်းခြင်ဆီဖြစ်သောကြောင့် ဖြစ်သည်။ သိုင်းဘုရင်အဆင့် ကျွမ်းကျင်ပညာရှင်များမှာ အရေအတွက်နည်းလှသည်။ ထို့အပြင်၊ ၎င်းတို့တစ်ဦးစီတွင် ရိုးတွင်းခြင်ဆီ အများကြီးမရှိပေ။

ဂလု..

ယွင်လီကော ခက်ခက်ခဲခဲ တံတွေးမျိုချလိုက်သည်။

"ဆရာ၊ ဒါကို ဘယ်ကရလာတာလဲ။ ဒါက အရမ်း အစွမ်းထက်တယ် မဟုတ်လား။"

လုရှောင်ယန်က ကျီဝူရှားကို ဆိုးသွမ်းစွာ ပြုံးလိုက်သည်။

“မနေ့က လေလံပွဲမှာ ကျောက်စိမ်းတုံးကို မှတ်မိသေးလား။ ဒါက အဲ့ အတွင်းထဲမှာ ဝှက်ထားတဲ့ အရာပဲ..။"

"ဘာ..."

ကျီဝူရှား အံ့သြသွားသည်။ လင်းဖေးသည် ဤပစ္စည်းကိုရရှိရန် အဘယ်ကြောင့် စျေးနှုန်းတိုးမြင့်လာသည်မှာ အံ့သြစရာမဟုတ်ပေ။

အတွင်း၌ သိုင်းဘုရင်အဆင့်ခြင်ဆီ ဝှက်ထားသောကြောင့်ဖြစ်သည်။

ထိုအချိန်တွင် ကျီဝူရှားသည် သူမ၏ဆရာ ဘာကြောင့် ဤမျှယုံကြည်ချက်ရှိသနည်းဟု နောက်ဆုံးတွင် နားလည်သွားသည်။

သူမဆရာက တကယ်ကို အစွမ်းထက်လွန်းသည်။ သူသည် အခြားသူများထက် ခြေတစ်လှမ်းသာလွန်ပြီး အခြေခံအားဖြင့် မည်သည့်အရာကိုမျှ လက်လွတ်မခံပေ။

သူတို့၏ ဆရာသည် ထိုပုံမှန်မဟုတ်သော မြင်းနက်များကို တွန်းလှန်ရန် သူတို့ကို ဦးဆောင်ဝံ့ခဲ့ခြင်းမှာ အံ့သြစရာမဟုတ်တော့ပေ။

ဆရာ့လို ဖြစ်တည်မှု တည်ရှိနေခြင်းကသာ သူတို့ကို တွန်းလှန်နိုင်သည်။

လုရှောင်ယန်သည် သိုင်းဘုရင်အဆင့် ခြင်ဆီဆေးလုံးကို ဝေငှရင်း ပြောလိုက်သည်။

“သက်ဆိုင်ရာဆေးလုံးတွေကိုသောက်ပြီး ချက်ချင်းတံခါးပိတ်ကျင့်ကြံပါ။ မင်းတို့ရဲ့ ကျင့်ကြံမှုကို တိုးမြှင့်ဖို့ ဖြစ်နိုင်သမျှ အတိုဆုံး အချိန်အတွင်းမှာ သိုင်းဘုရင်အဆင့် ခြင်ဆီဆေးလုံးကို ပြုပြင်ရမယ်။"

“ဟုတ်ကဲ့။”

လူတိုင်းက ပြန်ဖြေသည်။

“စကားမစပ်၊ ဆရာ အစ်ကိုဝူရှင်းက ပြောတယ်၊ ရာစုနှစ်တစ်ခုမှာ တစ်ခါပွင့်တဲ့ ရှေးဟောင်း တားမြစ်နယ်မြေ ဖွင့်လှစ်တော့မယ်တဲ့။ အဲဒါ တပည့်သွားရမှာလား။"

"ရှေးဟောင်းတားမြစ်နယ်မြေ"

လုရှောင်ယန်၏မျက်ခုံးတို့ ခပ်သာသာမြင့်တက်သွားသည်။

ထိုနေရာကို သူအရင်က ကြားဖူးသည်။ ၎င်းသည် မဟာကျိုး အင်ပါယာ၏ လေ့ကျင့်ရေးကွင်းဖြစ်ပြီး ရှည်လျားသောသမိုင်းကြောင်းရှိခဲ့သည်။

သို့သော် ဤနေရာသည် မြင်းနက်များအတွက် နေရာမဟုတ်ပါလား။

"ဘာပဲဖြစ်ဖြစ် လင်းဖေးလည်း ရှိမှာမလား။"

"အတိအကျပဲ။ သူက ဧကရာဇ်မင်းမြတ်ရဲ့ သားမက်လေ။ ဧကရာဇ်မိသားစုဝင်တစ်ဦးအနေနဲ့၊ သူက တိုက်ရိုက်ဆင်းသက်လာသူဖြစ်စေ ဆွေမျိုးဖြစ်စေ မခွဲခြားဘဲ သူသွားရမယ်။ နောက်ဆုံးတော့၊ ရှေးဟောင်းတားမြစ်နယ်မြေမှာ အခွင့်အရေးတွေ အများကြီးရှိတယ်လေ.."

***

ပြိုင်ဘက်ကင်းအသန်မာဆုံးသခင်ကြီး

စာစဉ် ၉။ အခန်း ၁၂၄ မျိုးမစစ်အိုကြီးထောင်ချောက်ထဲဝင်ဖို့စောင့်ရမယ်

"တကယ်တော့ ငါသိတယ်။"

ရှေးဟောင်း တားမြစ်နယ်မြေ ဖွင့်သည်မှာ ပြောစရာပင် မလိုပါ။ နှစ်တစ်ရာအတွင်း တစ်ကြိမ်သာ ပွင့်သည်။ သို့သော် လင်းဖေး မွေးဖွားပြီးနောက် ပွင့်ခြင်းဖြစ်သည်။

ဤနေရာသည် အခြေခံအားဖြင့် လင်းဖေးအတွက် ဒီဇိုင်းရေးဆွဲထားခြင်းမဟုတ်ပါလား။

အတွေ့အကြုံ၊ အသုံးအဆောင်ပစ္စည်းများ၊ အခွင့်အလမ်းများ၊ မိန်းကလေးများကို လက်ဆောင်ပေးခြင်း... မည်သို့ပင်ဆိုစေကာမူ ထိုနေရာ၌ ရရှိရန် သူ့အတွက် ရတနာမျိုးစုံ ရှိသည်။

“ဆရာ၊ သွားရမှာလား။”

လုရှောင်ယန် ပြန်မဖြေသည်ကိုမြင်တော့ ကျီဝူရှားက မထိန်းနိုင်ဘဲ ထပ်မေးလိုက်သည်။

“အေး..ဒါပေါ့.."

“ဒါ့အပြင် မင်းတစ်ယောက်တည်း သွားရမှာမဟုတ်ဘူး။ လေးယောက်လုံး သွားကြ။"

ကျီဝူရှား၏နှလုံးတုန်လှုပ်သွားသည်။

“ဆရာ၊ မဟုတ်မှလွဲရော ဆရာ..."

"မှန်တယ်။"

လုရှောင်ယန် ခေါင်းညိတ်လိုက်သည်။

"ဒါပြီးရင် ငါ လင်းဖေးကို ဖျက်ဆီးပစ်မယ်။ ဒီလမှာ အားလုံးက လုံ့လစိုက်ထုတ်ပြီး ကျင့်ကြံမှုတွေ တိုးလာဖို့ အစွမ်းကုန် ကြိုးစားရမယ်။ မင်းတို့ရဲ့ ကျင့်ကြံမှု မလုံလောက်ရင် မင်းတို့တွေ လင်းဖေး သတ်တာခံရလိမ့်မယ်။"

“ဟုတ်ကဲ့ပါ။"

အားလုံး တညီတညွတ်တည်း တုံ့ပြန်ကြသည်။

မြင်းနက်တွေက ဘယ်လောက်ထိ ကြောက်စရာကောင်းလဲဆိုတာ အားလုံး သိထားကြပြီးဖြစ်သည်။ သူတို့မှာ အဆုံးမရှိသည့် ထောက်ပံ့မှုများရှိသကဲ့သို့ သူတို့တွင် ဝှက်ဖဲများလည်း တစ်ခုပြီးတစ်ခု ရှိသည်။

ထို့အပြင်၊ သူတို့ထက် ကျင့်ကြံဆင့်မြင့်မားသော ကျွမ်းကျင်သူများကို အနိုင်ရခြင်းသည် အခြေခံအားဖြင့် သူတို့အတွက် ပုံမှန်ဖြစ်သည်။

လုရှောင်ယန်၏ တပည့်များသည် သန်မာသော လေ့ကျင့်မှု ရှိသူတို့ကို တိုက်ထုတ်နိုင်သော်လည်း ၎င်းတို့သည် မြင်းနက်ကဲ့သို့ မည်သူမျှ အသက်မရှင် နိုင်ကြပေ။

သူတို့၏ တိုက်ခိုက်မှုတွေသည် တူညီနေမည်။ သို့မဟုတ် သူတို့၏ တိုက်ခိုက်မှုတွေက မမျှော်လင့်ထားသည့် သက်ရောက်မှုတွေ ရှိကောင်းရှိနိုင်သည်။

မြင်းနက်တွေကို ကယ်တင် ကူညီမည့် ကျွမ်းကျင်သူတချို့ ပေါ်လာခြင်းတောင် ဖြစ်နိုင်သည်။

ထို့ကြောင့် မည်သူမျှ သတိလက်မလွှတ်ဝံ့ကြပေ။

အဘယ်ကြောင့်ဆိုသော် သူတို့၏ဆရာ၏စကားကို နားထောင်ခြင်းဖြင့်သာ သူတို့ အခြေခိုင်ခိုင်နှင့် သန်မာလာမည်ကို လူတိုင်းသိသောကြောင့်ဖြစ်သည်။

တပည့်များ ကျင့်ကြံရန် ညွှန်ကြားပြီးနောက်၊ လုရှောင်ယန်သည် သူ၏ ခြံကျဉ်းလေးသို့ ပြန်လာပြီး စတင်ပြင်ဆင်တော့သည်။

အချိန်မရှိသောကြောင့် သူကိုယ်တိုင်ကတော့ သိုင်းဘုရင်အဆင့် ခြင်ဆီဆေးလုံးကို မသောက်ခဲ့ပေ။

ခရမ်းရောင်ငြိမ်းချမ်းရေး တော်ဝင်နန်းတော်မှ မင်းသမီးရူယန်၏နေအိမ်သို့ အကွာအဝေးသည် မဝေးလှပေ။ ခန့်မှန်းချက်အရ၊ တဖက်သူသည် မင်းသမီးရူယန်၏နေအိမ်သို့ ပြန်လည်ရောက်ရှိနေပြီဖြစ်သည်။

နောက်ထပ် ဝိညာဉ်ကျောက်တုံးအချို့ကို ပြင်ဆင်ပြီးနောက်၊ တဖက်သူသည် မကြာမီ ရောက်လာသင့်သည်။

ထို့ကြောင့် လုရှောင်ယန်သည် စောစောစီးစီး ပြင်ဆင်ရပေတော့သည်။

ယွဲ့ယင်းသည် ယခုအချိန်တွင် ဝိညာဉ်တစ်ခုသာဖြစ်သော်လည်း သူမသည် သိုင်းဘုရင်အဆင့် ကျွမ်းကျင်သူဖြစ်နေဆဲဖြစ်သည်။ သူမတွင် သိုင်းဘုရင်အဆင့်ကျွမ်းကျင်ပညာရှင်၏ တိုက်ခိုက်ရေးအတွေ့အကြုံရှိရုံသာမက လုရှောင်ယန် တခါမှမမြင်ဖူးသော ကြောက်စရာကောင်းသော သိုင်းဘုရင်အဆင့် ကျင့်ကြံခြင်းနည်းလမ်းများနှင့် လျှို့ဝှက်နည်းပညာများလည်း ရှိဦးမည်။

ယင်းကို တွန်းလှန်ရန်အတွက် လုရှောင်ယန်သည် သူ၏ ကျင့်ကြံမှုနှင့် သိုင်းဘုရင်အဆင့် လက်နက်များကို အားကိုးခြင်းသည် အသုံးမဝင်ပေ။

သူသည် ယွဲ့ယင်း၏ တိုက်ခိုက်ရေးအင်အားကို ပူးတွဲနှိမ်နင်းရန် အစီအရင်ကို အသုံးပြုရမည်။ ဤနည်းဖြင့်သာ တိုက်ပွဲတွင် မိမိလုံခြုံရေးကို အာမခံနိုင်ပေလိမ့်မည်။

ထို့အပြင် အလွန်အရေးကြီးသော ပြဿနာတစ်ခုလည်း ရှိလို့နေသေးသည်။

ဆိုလိုသည်မှာ၊ သူနှင့် ယွဲ့ယင်းကြား တိုက်ပွဲသည် နန်းမြို့တော်၌ မဖြစ်ရပါ။ မဟုတ်ရင် သူနှင့် ယွဲ့ယင်း နှစ်ယောက်စလုံး အန္တရာယ်ရှိလိမ့်မည်။

မဟာကျိုးတော်ဝင်မိသားစုတွင် ဧကရာဇ်အဆင့်မှ ကျွမ်းကျင်သူတစ်ဦးထက်မကသည်မှာ အသေအချာပင်။

သူနှင့် ယွဲ့ယင်းတို့၏ အင်အားကြောင့် ပေါက်ကွဲသွားခဲ့ပါက၊ မဟာကျိုး တော်ဝင်မိသားစုသည် သေချာပေါက် ငြိမ်ငြိမ်လေးထိုင်ကြည့်နေကြမည်မဟုတ်ပေ။

လုရှောင်ယန်ကတော့ တိုက်ပွဲအပြီးတွင် အသတ်မခံချင်ပေ။

ကံကောင်းထောက်မစွာ၊ သူ့တွင် တောင်တန်းနှင့် မြစ် ပန်းချီ ရှိနေသည်။

တောင်တန်းနှင့်မြစ် ပန်းချီသည် သိုင်းဘုရင်အဆင့် လက်နက်တစ်ခုဖြစ်သည်။ အကယ်၍ ၎င်းသည် သိုင်းဘုရင်အဆင့် လက်နက်တစ်ခုဖြစ်ခဲ့ပါက၊ ၎င်းသည် အတွင်း၌ တိုက်ခိုက်နေသော သိုင်းဘုရင်အဆင့် ကျွမ်းကျင်သူနှစ်ဦးကိုပင် သေချာပေါက် ခံနိုင်ရည်ရှိမည်ဖြစ်သည်။

ထို့ကြောင့် လုရှောင်ယန်သည် တောင်တန်းနှင့်မြစ် ပန်းချီတွင် အစီအရင်ကို ချခဲ့သည်။

အစီအရင်၏ ပေါင်းစပ်မှုကိုလည်း လုရှောင်ယန် ထည့်သွင်းစဉ်းစားသည်။

ယခု သူ့တွင် ဝိညာဉ်ကျောက်တုံးများစွာ မကျန်တော့တာကြောင့် အများဆုံး သိုင်းဘုရင်အဆင့် အစီအရင်နှစ်ခုသာ ထူထောင်နိုင်သည်။

ဤအစီအရင်များသည် တင်းကျပ်သောအစီအမံများ၊ ပြီးပြည့်စုံသောအချိန်နှင့် အကြီးမားဆုံးအကျိုးကျေးဇူးများ လိုအပ်မည်ဖြစ်၍ အလဟဿတော့မဖြစ်ပေ။

ခရမ်းရောင်ကောင်းကင် မိုးကြိုးအစီအရင်တစ်ခုတည်းဖြင့်တော့ သေချာပေါက် မလုံလောက်ပေ။

သူ့တွင် သိုင်းဘုရင်အဆင့် လက်နက်တစ်ခုရှိပြီး ယွဲ့ယင်းတွင် မရှိဟု အာမခံရန် ခက်ခဲသည်။

ခရမ်းရောင်ကောင်းကင်ဘုံမိုးကြိုးအစီအရင်သည် သိုင်းဘုရင်အဆင့် လက်နက်များကို ထိရောက်မှုမရှိပေ။

အကယ်၍ အခြားသူသည် ခုခံရန် သိုင်းဘုရင်အဆင့် လက်နက်ရှိပါက၊ ခရမ်းရောင်ကောင်းကင်မိုးကြိုးအစီအရင်က သူမကို ဒဏ်ရာရစေရန် အလွန်ခက်ခဲမည်ဖြစ်သည်။

ထို့အပြင် ခရမ်းရောင်ကောင်းကင် မိုးကြိုးအစီအရင်သည် အစွမ်းထက်လွန်းလှသည်။ ၎င်းသည် သူမကို မထိခိုက်စေနိုင်သော်လည်း တောင်တန်းနှင့် မြစ်ပန်းချီကိုတော့ ထိခိုက်စေနိုင်သည်။

ကြယ်ကြွေအင်ပါယာ အစီအရင်နှင့် ရှေးဟောင်းနဂါး အစီအရင်မှာလည်း မသင့်လျော်ပေ။

ကျွမ်းကျင်သူများ သို့မဟုတ် နဂါးဝိညာဉ်များကို ခေါ်ယူခြင်းဖြစ်ပါစေ၊ သူသည် အလွန်အားနည်းနေပါက၊ ၎င်းသည် လုံလောက်စွာ အားကောင်းမည်မဟုတ်ပေ။ အစီအရင် အားကောင်းလွန်းပါက တောင်တန်းနှင့် မြစ် ပန်းချီကား ပျက်စီးမည်ကို သူကြောက်သည်။

ထိုအချိန်တွင် သူသည် ထိပ်တန်း သိုင်းဘုရင်အဆင့်လက်နက်ကို ဆုံးရှုံးရုံသာမက သူ၏လျှို့ဝှက်ချက်များကိုလည်း ဖော်ထုတ်မိနိုင်သည်။

သူ၏ အရှိန်အဝါ ပေါက်ကြားပြီး တော်ဝင်မိသားစု၏ ကျွမ်းကျင်သူများ ရောက်ရှိလာပါက၊ သူ၏ တပည့်များအားလုံး သူတောင်းစားများဖြစ်ကြရပေလိမ့်မည်။

ဒါပေါ့၊ ဟာသအနေနဲ့ပြောရုံပါ။ အကြောင်းကတော့ သူသာ တော်ဝင်မိသားစု၏ ဖျက်ဆီးခြင်းကို ခံရပါက၊ သူ၏တပည့်များသည် သူနှင့်အတူ မလွဲမသွေ သင်္ဂြိုဟ်ခံရမည်ဖြစ်သောကြောင့် ဖြစ်သည်။ တိုက်တွက်တစ်ခုတည်းနှင့် သုတ်သင်ခံရလျှင် သူ၏တပည့်တွေ သူတောင်းစားအဖြစ် အသက်ရှင်ဖို့ အခွင့်အရေးတောင် ရှိမှာမဟုတ်ပေ။

အချိန်လျှော့ချနိုင်သောနေရာလွတ်အစီအရင်ကတော့ မဆိုးလှပေ‌။ ဤအရာသည် တစ်ဖက်သား၏ အရှိန်ကို လျှော့ချနိုင်သည်။ နှိုင်းပြောရမည်ဆိုရင် ဒါဟာ မဆိုးဘဲ သူ အဆက်မပြတ် တိုက်ခိုက်နိုင်အောင် လုပ်ပေးနိုင်သည်။

အကြောင်းတစ်ခုခုကြောင့် လုရှောင်ယန်သည် သူ၏ယခင်ဘဝက သိပ္ပံစိတ်ကူးယဉ်ရုပ်ရှင်တစ်ကားကို နားမလည်နိုင်စွာ တွေးနေခဲ့သည်။

Time Freeze စီးရီး...။

သို့သော် လုရှောင်ယန် လျင်မြန်စွာ ခေါင်းယမ်းလိုက်သည်။

ကြောက်စရာကောင်းလွန်းသည်။

ယွဲ့ယင်းသည် နှစ်ပေါင်း တစ်သောင်းကျော် နေထိုင်ခဲ့သော အဘွားကြီးဖြစ်သည်။ သိုင်းဘုရင်အဆင့် ကျွမ်းကျင်သူတစ်ဦးအနေဖြင့်၊ သူမသည် သူမ၏နုပျိုသောအသွင်အပြင်ကို ထိန်းသိမ်းထားနိုင်ပြီး အသက်နှစ်ဆယ် သို့မဟုတ် သုံးဆယ်ကျော်ရှိ အိမ်ထောင်ရှင်အမျိုးသမီးငယ်တစ်ဦးကဲ့သို့ပင် ဖြစ်နေနိုင်သည်။ သို့သော် လက်တွေ့တွင်မူ သူမသည် အဘွားအိုတစ်ဦး ဖြစ်နေဆဲပင်။

ထို့အပြင် သူမသည် ယခုအခါ သရဲတစ္ဆေနှင့် မတူတော့ပေ။

Time Freeze ဇာတ်လမ်းတွဲထဲက ဇာတ်ကောင် နဉ်ခိုက်ချန်းနဲ့လည်း လုံးဝမတူပေ။ သူ့တွင် ထိုဆန္ဒများမရှိသလို မသေသောချစ်သူကိုလည်း မလိုချင်ပေ။

စင်စစ် ဤအမျိုးသမီးတွေကို သတ်လိုက်တာက ပိုကောင်းသည်။

နောက်ဆုံးတွင် သူသည် ယောက်ျားဖြစ်နေတုန်းပင်။ ရုပ်ရည်ချောမောလှပသော အမျိုးသမီးတစ်ဦးကို သူမြင်လိုက်သောအခါ ကမောက်ကမ ပြုမူချင်စိတ်ကို ခံစားရဆဲပင်။ အကယ်၍ သူသာ ထိုသို့မဟုတ်ပါက၊ သူ့ကို ယောကျ်ားအဖြစ် မည်သို့သတ်မှတ်နိုင်မည်နည်း။

သို့သော် သူသည် ကျင့်ကြံပြီး သန်မာလာရန်သာ လိုလားသည်။ မည်သူမှသူ့ကိုမယှဉ်ပြိုင်နိုင်သောသောသူဖြစ်လာပြီးနောက်မှ သူနှင့်အတူနေထိုင်ရန် အမျိုးသမီးတစ်ဦးကို ရှာမည်။

ထိုအချိန် မတိုင်ခင် သူ အတိအကျ မသင်းကွပ်နိုင်ဘူး ဟုတ်တယ်မလား။

ဝေဒနာကို ဘေးဖယ်ထားလျှင်တောင် ဘယ်သူက ပဏ္ဍုက်ဖြစ်ချင်မှာလဲ။

ထို့ကြောင့် သူ့တွင်မဖြစ်သင့်သော အတွေးများမဖြစ်အောင် တားဆီးရန်အတွက် အမျိုးသမီးနှင့် ဆက်ဆံရန် အကောင်းဆုံးနည်းလမ်းမှာ ၎င်းတို့ကို နောင်ဘဝသို့ တိုက်ရိုက်ပေးပို့ရန်ဖြစ်သည်။

ဒုတိယအစီအရင်အတွက် လုရှောင်ယန်သည် ကောင်းကင်စည်းတံဆိပ်၈ခုအစီအရင်ကို အသုံးပြုရန် ပြင်ဆင်လိုက်သည်။

ကောင်းကင်စည်းတံဆိပ်၈ခုအစီအရင်သည် ယွဲ့ယင်း၏ တည်နေရာနှင့် တိုက်ခိုက်မှုများကို ချိတ်ပိတ်နိုင်ပြီး သူမအား သတ်မှတ်ထားသော အကွာအဝေးတွင် ပိတ်လှောင်ထားနိုင်သည်။ ၎င်းသည် သူ တိုက်ခိုက်ခြင်းမှ ကာကွယ်နိုင်ပြီး အဝေးမှ တိုက်ခိုက်ရန်လည်း ခွင့်ပြုနိုင်သည်။

“တိုက်ခိုက်ခြင်း” ဟူသော စကားလုံးသည် လုရှောင်ယန်ကို ထူးဆန်းစွာ ခံစားလာစေသည်။

"တိုက်ပွဲ" ဟူသော စကားလုံးကို သုံးရခြင်းက ပိုကောင်းသည်ဟု သူခံစားမိသည်။

“၁း၁၁ သူ့ကို အဝေးက တိုက်.. ဟုတ်တယ်။ 'တိုက်ပွဲ' က ပိုမှန်တယ်။"

ဆုံးဖြတ်ပြီးနောက် လုရှောင်ယန်သည် အစီအရင်နှစ်ခုကို ချက်ချင်းဖန်တီးသည်။

ဤတစ်ကြိမ်တွင် သူသည် အစီအရင်များကို တည်ဆောက်ရန် သူ၏ ခွန်အားကို အပြည့်အဝ အသုံးပြုလိုက်သည်။

ကျီဝူရှား၏ ခြံဝင်းတွင် သူယခင်က ချထားသည့် အစီအရင်နှင့် နှိုင်းယှဉ်ပါက၊ ယခု သူချထားသည့် အစီအရင်မှာ အတော်လေး ပိုမိုအားကောင်းသည်။

ကြီးမားသောအစီအရင်နှစ်ခုကိုတည်ဆောက်ပြီးနောက်တွင်ပင် မဟာကျိုး တော်ဝင်မြို့တော်၏ ကောင်းကင်ယံ၌ လျှပ်စီးကြောင်းများ တစ်ဟုန်ထိုး ထွက်ပေါ်လာပြန်သည်။

ယခုဆိုလျှင် လုရှောင်ယန်သည် သိုင်းဘုရင်အဆင့် အစီအရင်ကို ချရန် အစီအရင်၏ ၈၀% ခွန်အားကို အသုံးပြုနေလိုက်ရုံဖြင့် သူသည် ကမ္ဘာကြီး၏အရောင်ကို ပြောင်းလဲသွားစေနိုင်သည်။ သူသည်လည်း မိုးကြိုးပြစ်ဒဏ်ကို ခံရသည်။

ယခင်က၊ သူသည် ကျီဝူရှား၏ခြံဝင်းတွင် အစီအရင်တည်ဆောက်ခြင်းအတွက် သူ့ခွန်အား၏ ၂၀ မှ ၃၀ရာခိုင်နှုန်းကိုသာ သုံးစွဲခဲ့ပြီးဖြစ်သောကြောင့် နတ်ဘုရားပြစ်ဒဏ်မခံရပေ။

ကံကောင်းထောက်မစွာ၊ ဤသည်မှာ တောင်တန်းနှင့်မြစ် ပန်းချီကားဖြစ်သည်။ နတ်ဘုရားပြစ်ဒဏ်က သူ့ကိုရှာမတွေ့သလို သူ့မှာ တာဝန်ရှိတယ်လို့ ဘယ်သူမှ မပြောနိုင်ပေ။

၎င်းသည် အတော်လေးလုံခြုံပြီး လျှို့ဝှက်သည်။

တောင်တန်းနှင့်မြစ် ပန်းချီသည် အမှန်တကယ် ပို၍ ပို၍ အသုံးဝင်လာသည်ဟု လုရှောင်ယန် ခံစားမိလာသည်……

***

ပြိုင်ဘက်ကင်းအသန်မာဆုံးသခင်ကြီး

စာစဉ် ၉။ အခန်း ၁၂၅ သိုင်းဘုရင်အဆင့် ဝိညာဥ်တစ်ခုကိုသတ်ခြင်း

ပြင်ဆင်စရာရှိသည်များအားလုံးလုပ်ပြီးနောက် လုရှောင်ယန်သည် ခြံကျဉ်းလေးဆီ ပြန်သွားပြီး ယွဲ့ယင်း ရောက်လာသည်ကို စောင့်နေလိုက်သည်။

…

တစ်ဖက်တွင်၊ ယွဲ့ယင်း၏ စိတ်ဝိညာဉ်သည် ကြင်ယာမင်းသားအိမ်တော် သို့ ပြန်ရောက်သွားသည်။ လင်းဖေးသည် သူမကိုမြင်သောအခါ ချက်ချင်းပင် ထိတ်လန့်သွားသည်။

"ဆရာ၊ ဘာလို့ဒီလောက်ဒဏ်ရာရနေတာလဲ၊ ဆရာ့ကိုဘယ်သူကဒဏ်ရာရစေတာလဲ။"

ယွဲ့ယင်း ခေါင်းယမ်းလိုက်ပြီး သူမ၏ ပင်မဝိညာဉ်ခန္ဓာကိုယ်နှင့် ပေါင်းလိုက်သည်။

"ငါ့ကို ဘယ်သူမှ မထိခိုက်စေဘူး။ ငါ သတိလက်လွတ်ဖြစ်ပြီး ကောင်းကင်က မိုးကြိုးထိမှန်ခဲ့တယ်။ နတ်ဘုရားရဲ့ ပြစ်ဒဏ်ကြောင့် ငါ ပြင်းထန်စွာ ဒဏ်ရာရခဲ့တာ။"

"ဟုတ်လား။"

လင်းဖေးသည် ရှက်ရွံ့သောအမူအရာကို ထုတ်ဖော်လိုက်သည်။

"တောင်းပန်ပါတယ် ဆရာ၊ ကျွန်တော့ရဲ့ ခေါင်းမာမှုကြောင့်သာ မဟုတ်ရင် နတ်ဘုရားရဲ့ ဒဏ်ခတ်ခြင်းကို ဆရာ ခံရမှာ မဟုတ်ဘူး။"

ယွဲ့ယင်း ခေါင်းယမ်းလိုက်သည်။

"အဲဒါ မင်းအပြစ်မဟုတ်ဘူး။ ငါကိုယ်တိုင်သွားချင်ခဲ့လို့။"

ခေတ္တနားပြီးနောက် သူမသည် "ငါရက်ပိုင်းလောက် အပြင်ထွက်သွားဖို့ရှိတယ်။ ငါ့အတွက်

အဆင့်မြင့်ဝိဉာဉ်ကျောက်တုံး ၁၀၀,၀၀၀ ကို ပြင်ဆင်ပေး။"

"ဟုတ်ကဲ့။"

လင်းဖေးက ယွဲ့ယင်းကို သိုလှောင်အိတ်တစ်ခု ပေးလိုက်သည်။

"ဒါတွေအားလုံးက ကျွန်တော့်ဝိညာဉ်ကျောက်တွေပဲ၊ စုစုပေါင်း ၁၅၀,၀၀၀ ရှိတယ်။ အရင်က ကျောက်စိမ်းဝယ်ဖို့ ရူယန်ရဲ့ ဝိညာဉ်ကျောက်တုံးတွေကို သုံးစွဲခဲ့တာ။ ကျွန်တော့်ကိုယ်ပိုင်ကို မသုံးရသေးဘူး။"

“အင်း။”

ယွဲ့ယင်းသည် သိုလှောင်အိတ်ကို လက်ခံရရှိပြီး ခေတ္တရပ်ကာ ပြန်ထွက်သွားတော့မည်ဖြစ်သည်။

"ဖေးအာ ငါမင်းကို တစ်ခုခုပြောသင့်တယ်ထင်တယ်။"

"ပြောပါ ဆရာ။"

“မင်းရဲ့အနာဂတ်ရည်မှန်းချက်က သိုင်းဘုရင်အဆင့်ကျွမ်းကျင်သူတစ်ယောက်ဖြစ်ဖို့ပါ။ အရေးမကြီးတဲ့ လူတွေက မင်းကို အမြဲတမ်း ချုပ်နှောင်မထားသင့်ဘူး။ အနာဂတ်မှာ ကျီဝူရှားကို ဂရုမစိုက်တာ အကောင်းဆုံးပါပဲ။"

လင်းဖေးသည် အံ့အားသင့်သွားကာ ခေတ္တကြာသော် သူ၏အမူအရာ အေးစက်သွားသည်။

“ဆရာ ဘာကိုဆိုလိုတာလဲ။ ကျီဝူရှားက စေ့စပ်ပွဲကို ဖျက်သိမ်းလိုက်ပြီး ကျွန်တော့်ကို အကြီးအကျယ် အရှက်ရစေခဲ့တယ်။ ကျွန်တော် သူ့ကို လွယ်လွယ်နဲ့ လွှတ်ပေးသင့်တယ်လို့ ဆရာထင်လို့လား။"

"ဒါပေမယ့် မင်းသူမကို အနိုင်ယူပြီး သူမကို မျက်နှာပျက်စေခဲ့ပြီး သူမကို မဟာကျိုး အင်ပါယာကြီးတစ်ခုလုံးရဲ့ ဟာသဖြစ်စေခဲ့တယ်။ ဒါတင်မကသေးဘူး၊ အဲဒီတုန်းက မင်းရဲ့ လင်းမိသားစုကလည်း အခွင့်ကောင်းယူခဲ့တာပဲ။ ကျီဝူရှားက အကျပ်အတည်းကြောင့် မင်းကို စေ့စပ်ခဲ့တာ ဟုတ်တယ်မလား..."

"အဲ့တာဘာဖြစ်လို့လဲ.. ကျွန်တော်တို့ လင်းမိသားစုကြောင့်သာ မဟုတ်ရင် ကျီဝူရှားက လမ်းပေါ်မှာ အေးခဲပြီးသေတာကြာပြီ။ ဒါက နှစ်ဦးနှစ်ဖက် သဘောတူတဲ့ ကိစ္စပဲ။ သူမ စေ့စပ်ဖို့ ဆန္ဒမရှိရင် သူမ ထွက်သွားနိုင်ပါတယ်။ ကျွန်တော်တို့ လင်းမိသားစုကလည်း ဖိအားမပေးပါဘူး။ ဒါပေမယ့် ခရမ်းရောင်ငြိမ်းချမ်းရေး တော်ဝင်နန်းတော်ရဲ့ မင်းသမီးတစ်ယောက်ဖြစ်လာပြီး စေ့စပ်ပွဲကို အဆုံးသတ်ဖို့ လင်းမိသားစုဆီ ချက်ချင်းလာခဲ့တယ်။ သူမဟာ ကျွန်တော့်ကို အကြီးအကျယ် အရှက်ရစေခဲ့ပါတယ်။ သူမကို ခွင့်မလွှတ်မှာ အသေအချာပဲ။"

ယွဲ့ယင်း အနည်းငယ် မျက်မှောင်ကြုတ်လိုက်သည်။ သူမသည် လင်းဖေးကို ပထမဆုံးအကြိမ် အနည်းငယ် မကျေမနပ်ဖြစ်မိသွားသည်။

တကယ်တော့ သူတို့နှစ်ယောက်လုံးက လူကြီးတွေပါ။ ထို့အပြင်၊ သူမသည်တစ်ချိန်က သိုင်းဘုရင်အဆင့် ကျွမ်းကျင်သူတစ်ဦးဖြစ်သည်။ အရင်က သူမ ဘယ်လိုလူစားမျိုးကိုမမြင်ဖူးလို့လဲ။ လင်းမိသားစုက လူတွေ ဘာတွေတွေးနေမှန်း သူမ ဘယ်လိုမသိပဲနေလိမ့်မည်လဲ။

အစကတည်းက ကျီဝူရှားသည် မဟာကျိုး ၏ ခရမ်းရောင်ငြိမ်းချမ်းရေး တော်ဝင်နန်းတော်၏ သွေးအနွယ်ဖြစ်သည်။ သူမသည် သာမန်ကျင့်ကြံသူများထက် ပိုသန်မာပြီး ထက်မြက်သည်။

ထို့ကြောင့်ပဲ လင်းမိသားစုသည် ကျီဝူရှားကို စိတ်ဝင်စားခဲ့သည်။

ကျီဝူရှားသာ အရည်အချင်းမရှိ ရုပ်ဆိုးသည့်မိန်းကလေးဆိုရင် လင်းမိသားစုက သူမကို တချက်တောင်လှည့်ကြည့်မှာမဟုတ်ဘူး မလား...။

ဤလောက၌ ကောင်းမှု၊ မကောင်းမှုဟူ၍ မရှိပေ။ အချိန်အများစုတွင် လူတိုင်းသည် အကျိုးကျေးဇူးများကြောင့် လုပ်တတ်ကြသည်။

ထိုအချိန်တွင် လင်းဖေးသည် တစ်ခုခုကို တွေးနေပုံရသည်။

"ဆရာ၊ ကျီဝူရှားနဲ့ တခြားသူတွေကို တွေ့ဖူးလို့လား။ ဆရာ့ကို ဒီထူးဆန်းတဲ့ စကားတွေ ပြောအောင် သူတို့ တစ်ခုခုပြောခဲ့သလား။"

ယွဲ့ယင်း ခေါင်းယမ်းလိုက်သည်။

"မဟုတ်ဘူး၊ မင်းအတွေးလွန်းနေပြီ။"

"ကောင်းပါတယ် ဆရာ၊ ဆရာက ကျွန်တော့်ရဲ့ဆရာပါ။ ဘာပဲဖြစ်ဖြစ် ဆရာ ကျွန်တော့်ဘက်မှာ ရပ်တည်နိုင်မယ်လို့ မျှော်လင့်တယ်။ ကျွန်တော် ဘယ်တော့မှ ကျီဝူရှားနဲ့ ပြန်ပတ်သက်မှာ မဟုတ်ဘူး။"

“နားလည်ပြီ။”

ယွဲ့ယင်းသည် သူ့တပည့်၏ ဒေါသကို သိသည်။ သူစိတ် ဆုံးဖြတ်လိုက်ရင် နွားဆယ်ကောင်တောင် သူ့ကို တားနိုင်မှာ မဟုတ်ဘူး။

သူက အရမ်းခေါင်းမာတယ်။

ထို့အပြင် လင်းဖေးသည် သူမ၏ ခန္ဓာကိုယ် ပြန်လည်တည်ဆောက်ရာတွင် ကူညီနိုင်မည်ဟု မျှော်လင့်နေသေးသောကြောင့် ရွေးချယ်စရာမရှိပေ။ သူမသည် ထိုဒဏ္ဍာရီနယ်ပယ်သို့ မတက်လှမ်းမီ သိုင်းဘုရင်အဆင့်၏ အထွတ်အထိပ်သို့ ပြန်သွားရန် စီစဉ်နေသေးသည်။

လင်းဖေး၏ ကံကောင်းမှုသည် သူမမြင်ဖူးသမျှ လူတွေထဲတွင် အပြင်းထန်ဆုံးပင်။ သူမတွင် လင်းဖေးမှလွဲ၍ အခြားမျှော်လင့်ချက်မရှိပေ။

မေ့လိုက်ပါတော့။ မည်သို့ပင်ဆိုစေကာမူ ဤကိစ္စသည် လင်းဖေးနှင့် လုရှောင်ယန်အကြားက ကိစ္စဖြစ်ပြီး သူမ ဝင်ရောက်မစွက်ဖက်သရွေ့ လုရှောင်ယန်ကို စိတ်ပျက်စေမှာ မဟုတ်ပါဘူး။

ထို့အပြင် သူမ ဝင်ရောက်စွက်ဖက်ခဲ့လျှင်လည်း အရေးမကြီးပါ။ နောက်ဆုံးတော့ သူမလက်ထဲတွင် အသက်ဆယ်သန်းကျော် ဆုံးရှုံးခဲ့ပြီးဖြစ်သည်။ လုရှောင်ယန်တစ်ယောက်ကို သူမ ဘယ်လို သနားနိုင်မည်လဲ။

လုရှောင်ယန်ကို လှည့်ဖြားရန် အသုံးပြုမည့် ဝိညာဉ်ကျောက်တုံးများကို ယူပြီးနောက် ယွဲ့ယင်း၏ ဝိညာဉ်ခန္ဓာကိုယ်သည် ခရမ်းရောင် ငြိမ်းချမ်းရေး တော်ဝင်နန်းတော်သို့ အမြန်ပြေးသွားသည်။

သူ၏ဆရာ အမြန်ထွက်သွားသည်ကို သူကြည့်နေရင်း လင်းဖေး၏ မျက်လုံးထဲတွင် အေးစက်သော အလင်းရောင်တစ်ခု လင်းလက်လာသည်။

သူ၏ဆရာ ဘာဖြစ်နေသည်လဲ သူ မသိပေ။

သူမသည် ကျီဝူရှား အကြောင်းကို အကောင်းဘက်ကပြောခဲ့သည်။ ဤသည်မှာ သေချာပေါက် ပုံမှန်မဟုတ်ပေ။

ထို့အပြင်၊ သူသည် တစ်စုံတစ်ခု ဆုံးရှုံးသွားကြောင်း နားမလည်နိုင်စွာ ခံစားရပြန်သည်။ ဒီတစ်ခါ ပိုလို့တောင် လျော့သွားသလိုပင်။

"ကြည့်ရတာ အနာဂတ်မှာ ဆရာ့ကို အားကိုးလို့ မရဘူး။"

ယွဲ့ယင်းသည် သေချာပေါက် ဤအရာကို မမျှော်လင့်ခဲ့ပေ။ ထိုအချိန်တွင် သူမသည် တော်ဝင်မြို့တော်၌ လျင်မြန်စွာ ခရီးထွက်နေသည်။

အကြောင်းမှာ ဤတစ်ကြိမ်တွင် သူမသည် သူမ၏ ဝိညာဉ်ကို မခွဲခြမ်းခဲ့သည့်အတွက် အစွမ်းထက်လွန်းကာ သူမ၏ အရှိန်ကလည်း ပိုမြန်လာသည်။

မကြာမီအချိန်အတွင်းမှာပဲ ခရမ်းရောင်ငြိမ်းချမ်းရေး တော်ဝင်နန်းတော်သို့ သူမရောက်ရှိလာသည်။

ထို့နောက် သူမသည် သူမ၏ ကျင့်ကြံခြင်းနည်းလမ်းကို ဖြန့်ကျက်လိုက်ပြီး သူမ၏ ခန္ဓာကိုယ်ကို လူတိုင်းထံမှ တိတ်တဆိတ် ဝှက်ထားသည်။ သူမသည် ခရမ်းရောင်ငြိမ်းချမ်းရေး တော်ဝင်နန်းတော်သို့ ဝင်ရောက်ကာ လုရှောင်ယန်၏နေအိမ်သို့ ရောက်ရှိလာသည်။

ရောက်ရှိလာပြီးနောက် ယွဲ့ယင်း၏ဝိညာဉ်သည် နားမလည်နိုင်အောင် တုန်လှုပ်သွားသည်။

ဒါက သူမမျက်လုံးတွေကို ကျဉ်းသွားစေသည်။

"ခုနက ဒီအန္တရာယ်အငွေ့အသက်က ဘာလဲ။"

ထိုစကားပြောပြီး သူမသည် လုရှောင်ယန်၏နေအိမ်တစ်ခုလုံးကို ကြည့်ရန် သူမ၏နတ်အာရုံကို ချက်ချင်းအသုံးပြုသည်။

သို့သော် ဆယ်ကြိမ်ထက်ပို၍ စေ့စေ့စပ်စပ်ကြည့်ပြီးနောက် ဤဝင်းငယ်နှင့်ပတ်သက်ပြီး ထူးခြားမှုတစ်စုံတစ်ရာကို သူမတွေ့ရှိရပေ။

စင်စစ် ဤခြံဝင်းနှင့်ပတ်သက်ပြီး အထူးတလည် ဘာမှ မရှိပါ။ လျှို့ဝှက်ချက်များ အားလုံးသည် တောင်တန်းနှင့်မြစ် ပန်းချီတွင် ရှိနေသောကြောင့် ဖြစ်သောကြောင့် သူမသည် ၎င်းတို့ကို အာရုံမခံစားနိုင်သည်မှာ သဘာဝပင်။

အဆုံးတွင် ယွဲ့ယင်းက ခေါင်းခါလိုက်သည်။

"ဖေးအာရဲ့ စကားလုံးတွေက အခု ငါ့ရဲ့ စိတ်ပိုင်းဆိုင်ရာ အခြေအနေကို ထိခိုက်စေဖို့အထိ မမျှော်လင့်ထားဘူး။ ဒါပေမယ့် ငါ့ရဲ့ ဝိညာဉ်ကို ပြုပြင်ပြီး ငါ့ရဲ့ ဝိညာဉ်စွမ်းအားတွေ ပြီးပြည့်စုံတဲ့ အချိန်ဆို ငါ ဖေးအာရဲ့ ဒဏ်ကို ထပ်ပြီး အလွယ်တကူ မခံရသင့်တော့ဘူး။"

အသက်ပြင်းပြင်းရှူရင်း ယွဲ့ယင်းသည် လုရှောင်ယန်၏ သေးငယ်သော ခြံဝင်းထဲသို့ တရားဝင်,ဝင်ရောက်လာသည်။

"ဒီမှာ ခမ်းနားထည်ဝါတဲ့ နှင်းကြာပန်း ခုနစ်ပွင့်ကို ဝယ်ဖို့ ရောက်နေတာ။ မင်း ရှိနေလား။"

"အင်း... ငါဒီမှာ။

လုရှောင်ယန် သည် အတွင်းထဲမှ အမြန်ထွက်လာသည်။ ယွဲ့ယင်း၏ ပင်မဝိညာဉ်ခန္ဓာကိုယ်ကို သူမြင်လိုက်သောအခါ ချက်ချင်းပင် မထိန်းနိုင်ဘဲ မောဟိုက်သွားသည်။

"ဟစ် ဒါ မင်းရဲ့ စိတ်ဝိညာဉ်အစစ်လား။ ဒါ သိပ်ကို ကျက်သရေမရှိလွန်းဘူးလား။ မင်း ဘယ်မိသားစုကလဲ။"

သူစကားပြောနေစဉ် လုရှောင်ယန်သည် အလွန်စက်ဆုပ်သွားပြီး အော့အန်ချင်လာသည်။

ယွဲ့ယင်းသည် အပြင်ဘက်တွင် လှပနေသော်လည်း တကယ်တမ်း သူမသည် အနှစ်တစ်သောင်းကျော်နေထိုင်ခဲ့သည့် အဘွားအိုတစ်ဦးဖြစ်ကြောင်း သူကောင်းကောင်းသိသည်။

သို့သော် ၎င်းနှင့်ပတ်သက်၍ သူဘာမျှမတတ်နိုင်ပေ။ သူမကို တောင်တန်းနှင့်မြစ် ပန်းချီကားထဲသို့ လှည့်စားမခေါ်မီတွင် သူဆက်လက်၍ သရုပ်ဆောင်ရဦးမည်။

ယွဲ့ယင်းက နှုတ်ခမ်းကို ဖွဖွဖိကာ ပြုံးလိုက်သည်။ သူမသည် သိုင်းဘုရင်အဆင့် ကျွမ်းကျင်သူတစ်ဦးဖြစ်သော်လည်း ချီးကျူးခံရခြင်းကို ကျေနပ်နေဆဲပင်။ ဒါသည် မိန်းမတစ်ယောက်၏ ချို့ယွင်းချက်ဖြစ်ပြီး ဘယ်သောအခါမှ မဖယ်ရှားနိုင်ပေ။

"တာအိုမိတ်ဆွေလု၊ မင်းနောက်နေတာလား။ ငါက သာမာန်စိတ်ဝိညာဉ်ကျင့်ကြံသူပဲ၊ အခု မင်းစိတ်မရှိဘူးဆိုရင် ထူးမြတ်သည့် ခုနစ်ပါးသော နှင်းကြာပန်းကို ထုတ်ယူလို့ရမလား။"

"အဲဒါ ငါ့အခန်းထဲမှာ။ ဆေးမီးဖိုလည်း အဲ့မှာပဲ။ မင်းအတွက် အားလုံးကို ငါပြင်ဆင်ပြီးပြီ၊ သွားပြောရအောင်။"

"ကောင်းပြီ….."