အခန်း (၁၃၆-၁၄၀)

စာစဉ် ၁၀။ အခန်း ၁၃၆ ထာဝရစည်းကမ်း

ခဏအကြာတွင် တစ်ယောက်ယောက်က မကူညီနိုင်ဘဲ ထပ်ပြီးအော်သဘ်။

"မကောင်းဘူး ဒီမီး… ဒီမီးကို မငြိမ်းနိုင်ဘူး။”

"ဘာ..."

တခြားသူတွေရဲ့ အမူအရာတွေ ရုတ်တရက် ပြောင်းလဲသွားပြီး လေးနက်စပြုလာသည်။

မကြာမီတွင် ဤပြဿနာကို လူတွေပိုပြီးသတိထားမိလာသည်။

“ဒီမီးတောက်က တကယ်ငြှိမ်းမရဘူး။ အကြီးအကဲမင်ကျဲ့ ၊ ကျွန်တော်တို့ ဘာလုပ်သင့်လဲ။”

“အကြီးအကဲ မင်ကျဲ့၊ ကျွန်တော်ကိုကယ်ပါဦး မသေချင်ဘူး။"

မီးတောက်များ စတင်လောင်ကျွမ်းနေပြီဖြစ်သောကြောင့် နတ်ဆိုးကျင့်ကြံသူများသည် ထိတ်လန့်စပြုလာသည်။ သူတို့၏ ခန္ဓာကိုယ်နှင့် သူတို့၏ ဝိညာဉ်များပင် ပူလောင်လာသည်။ “အား… ငါ့ကိုကယ်ပါ။"

မီးတောက်များ ပိုမိုပြင်းထန်လာကာ ကျင့်ကြံသူများကို အသက်ရှင်ရန် အခွင့်အလမ်းမပေးဘဲ ဝါးမျိုတော့သည်။ မီးတောက်များ ပိုမိုပြင်းထန်လာသည်နှင့်အမျှ အော်သံများ ပိုမိုမြင့်တက်လာခဲ့သည်။

ကျင့်ကြံသူ ထက်ဝက်နီးပါးသည် မီးလောင်ကျွမ်းမှုဒဏ်ကို ခံစားနေကြရသည်။ ထို့နောက်မှာတော့ အားလုံးဟာ မီးတောက်မီးလျှံတွေထဲတွင် အရှင်လတ်လတ် မီးရှို့ခံခဲ့ကြရသည်။

ကြောက်လန့်တုန်လှုပ်ကာ စိတ်ပျက်အားငယ်နေသော နှလုံးသားဖြင့် မျှော်လင့်ချက်သဲလွန်စကိုပင် မြင်နိုင်စွမ်းမရှိပေ။

“အကြီးအကဲ… အကြီးအကဲမင်ကျဲ့၊ ကျွန်တော်တို့ ဘာလုပ်သင့်လဲ။”

"ဘာတွေထိတ်လန့်နေတာလဲ။"

အကြီးအကဲမင်ကျဲ့၏အမူအရာမှာ မှုန်ကုပ်နေသည်။ သူ၏လက်အောက်ငယ်သားတွေကို ကြည့်ပြီး ဒေါသအရမ်းထွက်ကာ သွေးအန်လုနီးပါးဖြစ်နေသည်။ နောက်ဆုံးတွင် သူ၏လက်အောက်ငယ်သားအရေအတွက် ထက်ဝက်လောက် လျော့ကျသွားခဲ့သည်။

သူ့ကို ပိုလို့တောင် ဒေါသဖြစ်စေခဲ့တာကတော့ သူ၏ဘောင်းဘီမှာလည်း ထူးဆန်းသည့် မီးတောက်တွေ ရှိနေခြင်းဖြစ်သည်။

“အသက် ၈၀ အရွယ်ကတည်းက နတ်ဆိုးအရှင်နောက်ကို လိုက်ခဲ့တာ ငါ အရင်က မမြင်ဖူးတာ ဘာရှိလို့လဲ။ မီးတောက်တစ်ခုက ငါ့ကို ကြောက်လန့်စေနိုင်ပါ့မလား။ ဘယ်လောက်ရယ်စရာကောင်းလဲ။ ငါ့ရဲ့ ကောင်းကင်နတ်ဆိုးဝါးမြိုခြင်းအနုပညာကို ငါသုံးပြမယ်။ ဟား..."

ကောင်းကင်နတ်ဆိုးဝါးမြိုခြင်းအနုပညာသည် နတ်ဆိုးဂိုဏ်း၏ ထိပ်တန်း သူတော်စင်အဆင့် ကျင့်ကြံခြင်းနည်းလမ်းဖြစ်ပြီး နတ်ဆိုးအရှင် ကိုယ်တိုင်ကိုယ်ကျ သင်ပေးခဲ့သော ကျင့်ကြံခြင်းနည်းလမ်းတစ်ခုဖြစ်သည်။

အကြီးအကဲမင်ကျဲ့သည် ဤကျင့်ကြံခြင်းနည်းလမ်း၏ စွမ်းအားကြောင့် နတ်ဆိုးဂိုဏ်း၏ ထိပ်တန်းကျွမ်းကျင်သူများထဲမှ တစ်ဦးဖြစ်လာခဲ့ပြီး မဟာကျိုးအင်ပါယာတွင် ကျော်ကြားလာခဲ့သည်။

အကြီးအကဲမင်ကျဲ့သည် သူ၏ခန္ဓာကိုယ်ထဲရှိ ဝိညာဉ်စွမ်းအင်ကို ဖြန့်ကျက်ပြီး ကောင်းကင်နတ်ဆိုးဝါးမြိုခြင်းအနုပညာကို အသက်သွင်းခဲ့သည်။ သူသည် ထူးဆန်းသောမီးတောက်ကို ကျွမ်းကျင်ပညာရှင်ကဲ့သို့ ဖိနှိပ်ပြီး သူ့ကို ဒဏ်ရာ မပေးနိုင်အောင်လုပ်ချင်ခဲ့သည်။

သို့သော်လည်း မီးတောက်များသည် ဆက်လက် တည်ရှိနေပြီး အားပျော့မသွားရုံသာမက ပိုမိုပြန့်နှံ့သွားသည့် အရိပ်အယောင်များလည်း ထွက်ပေါ်လာသည်။

“အကြီးအကဲ မင်ကျဲ့၊ အဲဒါ… ပိုကြီးလာတယ်။”

"ပါးစပ်ပိတ်ထား။"

အကြီးအကဲမင်ကျဲ့သည် ဒေါသတကြီးဖြင့် အော်ဟစ်လိုက်ပြီး ကောင်းကင်နတ်ဆိုးဝါးမြိုခြင်းအနုပညာ၏ အစွမ်းသတ္တိကို အစွမ်းကုန် တိုးမြှင့်လိုက်သည်။

“ကောင်းကင်နတ်ဆိုးဝါးမြိုခြင်းအနုပညာ ဖိနှိပ်လော့။ ရား…."

ကြွေးကြော်သံနှင့်အတူ၊ ပတ်ဝန်းကျင်ရှိ ဝိညာဉ်စွမ်းအင်များကို တွင်းနက်ကြီးတစ်ခုက စုပ်ယူလိုက်သလိုပင်၊ ၎င်းအရာအားလုံးသည် အကြီးအကဲမင်ကျဲ့၏ ခန္ဓာကိုယ်ဆီသို့ အရူးအမူးခုန်ဝင်သွားပုံရသည်။

၎င်းမှာမည်မျှပြင်းထန်သည်ဆိုလျှင် အကြီးအကဲမင်ကျဲ့ အနီးတစ်ဝိုက်တွင် ရပ်နေသော နတ်ဆိုးကျင့်ကြံသူများ၏ ခန္ဓာကိုယ်တွင်းရှိ သွေးအနှစ်သာရသည် အဆက်မပြတ် တဟုန်ထိုး ကြီးထွားလာကာ ၎င်းတို့၏ ခန္ဓာကိုယ်ကို စွန့်ခွာကာ အကြီးအကဲမင်ကျဲ့၏ အာဟာရဖြစ်လိုသည့် အတိုင်းအတာအထိပင် ဖြစ်သည်။

သို့သော်~~

ရွှေရောင်မီးတောက်များက မလှုပ်မယှက်ဖြစ်နေဆဲပင်။ ယင်းအစား၊ ၎င်းတို့သည် ဆက်လက်ကြီးထွားလာပြီး အကြီးအကဲ မင်ကျဲ့၏ပေါင်ဆီသို့ ပျံ့နှံ့လာသည်။

၎င်းသည် ဝိညာဉ်စွမ်းအားစသည့်တစ်စုံတစ်ရာကြောင့် ပျက်ပြယ်သွားခြင်းမရှိဘဲ သက်ရှိသတ္တဝါမှန်သမျှကို ပြာအဖြစ် လောင်ကျွမ်းဖို့ကိုသာ အားသာနေပုံရသည်။

နတ်ဆိုးကျင့်ကြံသူများ တုန်လှုပ်သွားကြသည်။ ထိုသို့သော ထိပ်တိုက်ရင်ဆိုင်မှုသည် သူတို့ တစ်ခါမျှ စိတ်ကူးနှင့်ပင် တွေးမကြည့်ဖူးပေ။

အကြီးအကဲမင်ကျဲ့၏အမူအရာသည် ပို၍ရုပ်ဆိုးလာသည်ကိုမြင်လျှင် လူတိုင်းသည် ၎င်းတို့၏စိတ်နှလုံးထဲတွင် ကြောက်ရွံ့မှုကို ခံနိုင်ရည်မရှိတော့ပဲ “ အကြီးအကဲမင်ကျဲ့… ဘာလို့ မဖြတ်လိုက်တာလဲ… အဲ့တာက မီးကျွမ်းနေပြီ။"

အကြီးအကဲမင်ကျဲ့၏ အိုမင်းနေသောမျက်နှာသည် မကူညီနိုင်ဘဲ ပြင်းထန်စွာ တုန်လှုပ်သွားသည်။

ရိုးရိုးသားသား ပြောရလျှင် သူမဖြတ်ချင်တာမဟုတ်ဘဲ ဖြတ်မရခြင်းသာဖြစ်သည်။

ဤမီးတောက်သည် အလွန်ထူးဆန်းသည်။ ၎င်းသည် ခန္ဓာကိုယ်သာမက စိတ်ဝိညာဉ်ကိုပါ လောင်ကျွမ်းစေသည်။

တစ်နည်းဆိုရသော် ဖြတ်ရမည်ဆိုလျှင် သူ၏စိတ်ဝိညာဉ်၏ အစိတ်အပိုင်းတစ်ခုကိုပင် ဖြတ်တောက်ပစ်ရမည်ဖြစ်သည်။

သူ့မှာ အသားမရှိရင် သဘာဝရတနာတွေ၏အကူအညီနှင့် ပြန်ပေါက်အောင်စွမ်းနိုင်မည်ပင်။

သို့သော် ဝိညာဉ်အစိတ်အပိုင်း ပျောက်ဆုံးပါက အသားပြန်ပေါက်ရန် ကြိုးစားလျှင်တောင် အသုံးမဝင်တော့ပေ။ ၎င်းအစိတ်အပိုင်းသည် အမှန် တကယ်ကို ပျောက်ကွယ်သွားမည်ပင်။

သိုင်းဘုရင်အဆင့် ကျင့်ကြံဆင့်ရှိသူသာလျှင် ၎င်းတို့၏စိတ်ဝိညာဉ်များကို ပြုပြင်ရန် လျှို့ဝှက်နည်းပညာကို ရှာဖွေနိုင်မည်ဖြစ်သည်။

သို့သော် သိုင်းဘုရင်အဆင့် ကျွမ်းကျင်သူသည် မည်မျှရှားပါးသနည်း။ မဖြစ်နိုင်ဘူးဆိုသည့်စကားနှင့် ဘာမျှကွဲပြားမှုမရှိပေ။

နတ်ဆိုးဂိုဏ်း၏ မြင့်မြတ်သော နတ်ဆိုးဂိုဏ်းလက်အောက်မှ ထိပ်တန်းကျွမ်းကျင်သူ သုံးဦးအနက်မှ တစ်ဦးအနေဖြင့် ဤသတင်းထွက်လာပါက ကမ္ဘာပေါ်ရှိလူတိုင်းက သူ့ကို ဝိုင်းရယ်ကုန်လိမ့်မည်မဟုတ်လား။

ဤအခိုက်အတန့်တွင် တစ်စုံတစ်ယောက်သည် “အကြီးအကဲမင်ကျဲ့၊ မီးပျံ့နှံ့တာ ပိုမြန်လာတယ်။”

အကြီးအကဲမင်ကျဲ့၏အမူအရာသည် သိသိသာသာပြောင်းလဲသွားသည်။ သူ အောက်ကိုငုံ့ကြည့်လိုက်တော့ မီးတောက်တွေက သူ့ခန္ဓာကိုယ်ပေါ်ကို ပျံ့လာသည်။ ထို့အပြင် ထိတွေ့မှုဧရိယာ တိုးလာသည်နှင့်အမျှ ၎င်း၏ ပြန့်နှံ့မှုအရှိန်သည် ပိုမိုမြန်ဆန်လာသည်။

ဒီအတိုင်းဆက်သွားရင် သူ၏ဝိညာဉ်တောင် ကုန်သွားလိမ့်မည်။

"မဖြစ်ဘူး၊ ငါ့ကိုဓားပေး။ ငါ့ကိုဓားတစ်လက်ပေး။"

သူ၏လက်အောက်ငယ်သားတစ်ယောက်က ကောင်းကင်ဘုံအဆင့်လက်နက်ကို ကမန်းကတန်း လွှဲပေးလိုက်သည်။ အကြီးအကဲမင်ကျဲ့သည် အံကြိတ်ကာ သူ၏ခန္ဓာကိုယ်နှင့် သူ၏ဝိညာဉ်အစိတ်အပိုင်းကို တိုက်ရိုက်ဖြတ်တောက်ရန် ကောင်းကင်နတ်ဆိုးဝါးမြိုခြင်းအနုပညာကို လှည့်ပတ်လိုက်သည်။

ရွှေရောင်မီးတောက်က မြေပြင်ပေါ်ကျသွားသည့် သူ၏အသားပြီး လောင်ကျွမ်းသွားစေသည်။ အကြီးအကဲမင်ကျဲ့သည် ခြေလှမ်းနှစ်လှမ်းကို နောက်ပြန်ဆုတ်ရင်း နှလုံးနာခြင်းလော ခန္ဓာကိုယ်နာကျင်ခြင်းခံစားရခြင်းလော မသိရပေ။

“အကြီးအကဲမင်ကျဲ့ အဆင်ပြေရဲ့လား။"

သူ၏လက်အောက်ငယ်သားနှစ်ယောက်က သူ့ကို ထူပေးဖို့ အလျင်စလို လျှောက်သွားကြသည်။

အကြီးအကဲမင်ကျဲ့က အံကြိတ်ပြီး အေးစက်စွာပြောသည် "ရပါတယ် ငါအဆင်ပြေပါတယ်။ အသေးအမွှားကိစ္စပဲ ယောက်ျားတစ်ယောက်အနေနဲ့၊ ငါ့ပန်းတိုင်က ကမ္ဘာကြီးကို သိမ်းပိုက်ဖို့ပါ။ ဒီလောက် အသားနည်းနည်း ဆုံးရှုံးရတာ အဆင်ပြေပါတယ်။”

ဟစ်..

လူတိုင်းသည် ရိုသေလေးစားသောအမူအရာများကို ချက်ချင်းထုတ်ဖော်ကြသည်။

"အကြီးအကဲမင်ကျဲ့၊ ခင်ဗျားက တကယ်ကို လက်ရှိခေတ်ရဲ့ သူရဲကောင်းတစ်ယောက်ပါ။"

" အကြီးအကဲမင်ကျဲ့လို သူရဲကောင်းနောက်ကို လိုက်ခွင့်ရရင် ဒီဘဝမှာ နောင်တရစရာ သေသွားရင်တောင် နောင်တရစရာမရှိလောက်ဖူး.."

“အကြီးအကဲမင်ကျဲ့၊ ကျုပ်တို့ အခုပဲ နတ်ဆိုးဂိုဏ်းဆီ အမြန်ပြန်သင့်လား။”

အကြီးအကဲမင်ကျဲ့က ဟစ်အော်လိုက်သည်။

"ပြန်ရမယ်လား။ ငါသာ ဒီအတိုင်းပြန်ရင် ငါ့ကို နတ်ဆိုးဂိုဏ်းတစ်ခုလုံးက မထီမဲ့မြင်ပြုမှာမဟုတ်ဘူးလား။ မဟာကျိုး တော်ဝင်မိသားစုက ငါ့ကို ဆန့်ကျင်ဖို့ ကြံစည်ဝံ့တယ်။ ငါသူတို့ကို ငါ့ရဲ့ခွန်အားအရသာကို ခံစားခွင့်မပေးဘူးဆိုရင် ငါ့ကိုယ်ငါ နတ်ဆိုးဂိုဏ်းရဲ့ အထွတ်အထိပ်ဆုံး ပညာရှင်သုံးယောက်ထဲက တစ်ယောက်လို့ ဘယ်လိုခေါ်နိုင်မလဲ။”

“ အကြီးအကဲမင်ကျဲ့က ပြန်သွားချင်နေတာလား။”

"ဘယ်ဟုတ်မလဲ ငါအဲလောက်မတုံးဘူး။ နန်းမြို့တော်မှာ ကျွမ်းကျင်သူများစွာရှိတယ်။ ငါပြန်သွားရင် သေလမ်းရှာတာ မဖြစ်သွားဘူးလား။"

"အကြီးအကဲ မင်ကျဲ့၊ ခင်ဗျား..."

"ဟမ့် မဟာကျိုးက ငါ့ကိုသတ်ဖို့ ကျွမ်းကျင်သူတွေ စေလွှတ်မှာ သေချာတယ်။ သူတို့ကို သင်ခန်းစာပေးဖို့ စောင့်နေဖို့ပဲ လိုတာပါ။”

"ဒါပေမယ့်၊ ကျုပ်တို့တပ်တွေက မဟာကျိုးတပ်တွေကို ခုခံဖို့ မလုံလောက်သေးဘူးလေ။"

"ဘာကိုကြောက်ရမှာလဲ။"

အကြီးအကဲမင်ကျဲ့က အေးစက်စွာ ပြုံးလိုက်သည်။

“ဒီတောင်ကြီးတစ်ခုလုံးဟာ သတ်ပစ်ခံရတဲ့ နတ်ဆိုးကျင့်ကြံသူတွေနဲ့ ပြည့်နေတယ်။ သူတို့ရဲ့ နာကြည်းမှု၊ ညစ်ညမ်းမှု၊ မုန်းတီးမှု၊ သတ်ဖြတ်ရန် ရည်ရွယ်ချက်နှင့် သွေးရောင်ဝါ… အားလုံး လေထဲတွင် ကျန်ရစ်ခဲ့တယ်။ အချိန်တိုလေးအတွင်းမှာ ခွန်အားတွေ အပြည့်အဝတိုးလာဖို့အတွက် ကြီးမားတဲ့ အစီအရင် တစ်ခုကို တည်ဆောက်ပြီး ဒီစွမ်းအားတွေကို ငါတို့ရဲ့ ခန္ဓာကိုယ်ထဲကို ပေါင်းစပ်ဖို့ပဲ လိုတယ်။

အရေးကြီးဆုံးက အရည်အသွေးပဲ။ အရေအတွက် မဟုတ်ဘူး။ မဟာကျိုးက ငါတို့ပြိုင်ဘက်ဖြစ်လာမှာမဟုတ်ဘူး။”

ခဏနားပြီးနောက် သူ၏အကြည့်တွေက တောင်တစ်ခုလုံးကို လွှမ်းခြုံထားသည့် ရွှေရောင်မီးတောက်တွေပေါ် ရောက်သွားခဲ့သည်။

“ဒါ့အပြင်၊ မဟာကျိုးက မိုက်မဲတဲ့ လူယုတ်မာတွေက ဒီလောက် အစွမ်းထက်တဲ နတ်မီးတောက်ကိုတောင် ငါတို့ထံ ပေးပို့ခဲ့သေးတယ်။ အဲဒါကို စုဆောင်းပြီး သူတို့ကို ဒုက္ခပေးလို့ရတယ်။”

“ငါ သတိပြုမိပြီးသားပါ။ ဒီနတ်မီးလျှံက သက်ရှိသတ္တဝါတွေကိုသာ လောင်ကျွမ်းစေပြီး အရာဝတ္ထုတွေကို မလောင်ကျွမ်းစေဘူး။ မီးကို ထိန်းထားဖို့နဲ့ မီးကို သက်တမ်းတိုးဖို့အတွက် သက်ရှိသတ္တဝါတွေကို အစာကျွေးဖို့ လျှို့ဝှက်ဘဏ္ဍာကို ငါသုံးမယ်။ မီးမပျက်စီးသရွေ့ သဘာဝအတိုင်း အကန့်အသတ်မရှိ သုံးစွဲနိုင်လိမ့်မယ်။”

လူတိုင်း၏ မျက်လုံးအရောင်များ တောက်ပလာသည်။

“ အကြီးအကဲမင်ကျဲ့ ပီသလိုက်တာ အရမ်းကြီးမြတ်လှပါပေတယ်။ ခဏလောက်တွေးရုံနဲ့ကို မဟာကျိုး အင်ပါယာကို တွန်းလှန်ဖို့ အကြံအစည်တစ်ခု စဉ်စားနိုင်ခဲ့တယ်။”

"ကျုပ်တို့ စိတ်ချလို့ရသွားပြီ……."

***

ပြိုင်ဘက်ကင်းအသန်မာဆုံးသခင်ကြီး

စာစဉ် ၁၀။ အခန်း ၁၃၇ ရုပ်သေးအစီအစဉ်ရဲ့ ဒုတိယခြေလှမ်း..

သုံးရက်အကြာ မိုးလင်းသောအခါ လုရှောင်ယန် တရားထိုင်နေသေးချိန်တွင် လူတစ်ဦးသည် သူ၏ခြံဝင်းအတွင်းသို့ တိတ်တဆိတ် ဝင်ရောက်လာသည်။

ထိုရင်းနှီးသော အရိပ်အယောင်ကို ခံစားလိုက်ရသဖြင့် လုရှောင်ယန်၏ မျက်လုံးများသည် အနည်းငယ် လှုပ်ရှားသွားသည်။ တံခါးကို တိတ်တဆိတ်ဖွင့်လိုက်သည်နှင့် ပတ်ဝန်းကျင်ရှိ ဝိညာဉ်စွမ်းအင်များက တစ်ဖက်လူကို အခန်းထဲသို့ တိုက်ရိုက်ဆွဲခေါ်သည့် ကြီးမားသောလက်အဖြစ် ပြောင်းလဲသွားသည်။

"မင်္ဂလာပါ အကြီးအကဲလု။"

လုရှောင်ယန်က တစ်ဖက်ကို တစ်ချက်ကြည့်လိုက်သည်။

"စိတ်ဝိညာဉ်သန့်စင်ခြင်း စတုတ္ထအဆင့်။ မဆိုးပါဘူး၊ မင်းရဲ့တိုးတက်မှုက တော်တော်မြန်တယ်။"

"ဒါဟာ သိုင်းဘုရင်အဆင့် ကျင့်ကြံခြင်းနည်းလမ်းနဲ့ ကျွန်တော့်ကို အချိန်တိုအတွင်းမှာ တိုးတက်နိုင်စေခဲ့တဲ့ သိုင်းဘုရင်အဆင့် သွေးဆေးလုံးကြောင့်ပါ၊ အကြီးအကဲကို ကျေးဇူးတင်ပါတယ်။"

လုရှောင်ယန် ခေါင်းညိတ်လိုက်သည်။

“မင်းနားလည်တာ ကောင်းပါတယ်။ ဘာကိစ္စရှိလို့လဲ?"

“အကြီးအကဲ၊ တော်ဝင်မိသားစုက ဘုရင်တွေကိုစုပြီး အကြီးအကဲမင်ကျဲ့ နောက်ကိုလိုက်ဖို့ အမိန့်ပေးထားတယ်။”

လုရှောင်ယန်သည် မထိန်းနိုင်ပဲ မျက်ခုံးကို အနည်းငယ်ပင့်တင်မိသည်။

“ဒီအကြီးအကဲမင်ကျဲ့က တကယ်ကို ကြောက်စရာကောင်းတာလား။ သူက သူ့နောက်ကိုလိုက်ဖို့ မဟာကျိုးတော်ဝင်မိသားစုက ဘုရင်တွေကို စုစည်းစေချင်တာလား။"

"ဒါတင်မကဘူး၊ ဧကရာဇ်အဆင့်က ကျွမ်းကျင်သူနှစ်ယောက်က အဖွဲ့ကို ဦးဆောင်နေတာလို့ ကျွန်တော်ကြားတယ်။"

ဟစ်...

လုရှောင်ယန် မထိန်းနိုင်ဘဲ မောဟိုက်သွားသည်။ ဤ အကြီးအကဲမင်ကျဲ့သည် အနည်းငယ် ကြောက်စရာကောင်းသည် မဟုတ်ပါလား။ သူဟာ မဟာကျိုး တော်ဝင်မိသားစုက ဧကရာဇ်အဆင့် ကျွမ်းကျင်သူကိုတောင် လွှတ်ပြီး လိုက်ဖမ်းစေဖို့အထိစွမ်းသာခဲ့သည်။

ဧကရာဇ်အဆင့် ကျွမ်းကျင်သူသည် ကောင်းကင်နတ်ဆိုးဂိုဏ်း၏ ဘိုးဘေးအကြီးအကဲနှင့် ညီမျှသောတည်ရှိမှုတစ်ခုဖြစ်သည်။ ထိုကဲ့သို့သော သူသည် တော်ဝင်မိသားစုတွင် ထိပ်တန်းတည်ရှိမှုတစ်ခုဖြစ်သည်ဟု ဆိုနိုင်လောက်သည်။

ကံကောင်းထောက်မစွာ၊ သူသည် လွန်ခဲ့သော နှစ်ရက်က သူ၏အခန်းတွင် ကျင့်ကြံခဲ့ပြီး အပြင်မထွက်ခဲ့ပေ။ မဟုတ်လျှင် သူဒုက္ခရောက်လိမ့်မည်။

စင်စစ်၊ သူသည် ဧကရာဇ်အဆင့်၏ ပထမအဆင့်တွင်သာ ရှိသေးပြီး အကြီးအကဲမင်ကျဲ့၏ ကျင့်ကြံဆင့်သည် ဧကရာဇ်အဆင့်ထက် အဆင့်များစွာမြင့်သည်မှာ သေချာပါသည်။

အကယ်၍ အကြီးအကဲမင်ကျဲ့ကို သူတွေ့ခဲ့ရပါက၊ ၎င်းသည် နောက်ထပ် ပြင်းထန်သော တိုက်ပွဲတစ်ခု ဖြစ်ပွားသွားစေနိုင်သည်။ သတိလက်လွတ်ဖြစ်လျှင် တစ်ဖက်သား၏သတ်ခြင်းကိုပါ ခံရနိုင်သည်။

ဧကန်စင်စစ်၊ နန်းမြို့တော်သည် ဝပ်တွားနေသောကျားများ၊ ပုန်းကွယ်နေသောနဂါးများ ကျက်စားရာနေရာဖြစ်သည်။ သူ နှိမ့်ချနေထိုင်ဖို့လိုအပ်နေသည်မှာအမှန်ပင်။

"အကြီးအကဲ၊ ကျွန်တော်ခဏနေရင် စုဝေးပွဲကိုသွားမှာမို့လို့ လာအကြောင်းကြားတာပါ။"

လုရှောင်ယန်က ခေါင်းညိတ်လိုက်ပြီး တစ်ခုခုကို တွေးနေသလိုပင်၊ သူသည် ကျီဝူရှန်ကို ထိပ်တန်း ကောင်းကင်ဘုံအဆင့် ချပ်ဝတ်တန်ဆာကို ပေးကာ ခံစစ်အစီအရင် အနည်းငယ်ကို ချလိုက်သည်။ သူသည် ကျီဝူရှန်ကို အမှတ်အသားပြုထားပြီး ကျီဝူရှန်၏ အခြေအနေကို အချိန်မရွေး စစ်ဆေးနိုင်စေလိမ့်မည်။

ကျီဝူရှန်သည် မဟာကျိုး၏ဧကရာဇ်ဖြစ်လာစေရန် သူ ပြုစုပျိုးထောင်ပေးရမည့်သူဖြစ်သည်။

တစ်စုံတစ်ခုဖြစ်ခဲ့လျှင် လုရှောင်ယန်၏ ကြိုးစားအားထုတ်မှု အားလုံးသည် အချည်းနှီးဖြစ်သွားလိမ့်မည်။

ဒါတွေအားလုံးလုပ်ပြီးတော့ လုရှောင်ယန်က “သွားလိုက်ပါ။ ရှေ့တန်းမှာ မတိုက်ဖို့ သတိရပါ။ ခေါင်းဆောင်လုပ်တာက တခြားသူတွေကိုပေးလုပ်လိုက်ပါ။ မင်း အသက်ရှင်ရင်တော်ပြီ။ ခြေတို့လက်တို့ မဆုံးရှုံးပါစေနဲ့။"

“ဟုတ်ကဲ့ပါ။ ဒါဆို ကျွန်တော်သွားတော့မယ်။"

"ခဏနေဦး ငါမင်းကို ဒါအရင်မေးပါရစေ။ လင်းဖေး သွားမှာလား။"

"အကြီးအကဲ၊ လင်းဖေး မသွားဘူး။ ကျွန်တော် သူ့ကို သိပ်ဂရုမစိုက်မိဘူး။ ဒါပေမယ့်၊ သူက လုံ့လစိုက်ထုတ်ပြီး ဖွင့်တော့မယ့် ရှေးဟောင်းတားမြစ်နယ်မြေအတွက် ပြင်ဆင်နေမယ်လို့ ကျွန်တော်ထင်တယ်။ ဘာပဲပြောပြော၊ ရှေးဟောင်းတားမြစ်နယ်မြေဟာ လတ်တလောမှာ အရေးကြီးဆုံးပါပဲ။”

"ဟုတ်လား။ သတိထားပြီးသွားပါ။"

လုရှောင်ယန်သည် သူ၏လက်ကို ဝှေ့ယမ်းလိုက်သည်။ ကျီဝူရှန် ထွက်သွားပြီးနောက် သူပြန်စဉ်းစားမိတော့သည်။

" လင်းဖေးကိုသတ်ဖို့ အခွင့်အရေးရှာချင်ပေမယ့် ကြည့်ရတာ ရှာမတွေ့ဘူးပဲ။"

“လင်းဖေးအတွက် ဒီလိုအန္တရာယ်များပြီး အသုံးမဝင်တဲ့ ကိစ္စတစ်ခုကို မသွားဖြစ်တာက ပုံမှန်ပါပဲ။ ဒါပေမယ့် သူက ရှေးဟောင်းတားမြစ်နယ်မြေက တိုက်ပွဲအတွက် ပြင်ဆင်တဲ့နေရာမှာ အလွန်အလေးအနက်ထားတယ်ဆိုတော့၊ သူက တားမြစ်နယ်မြေကနေ ကြီးမားတဲ့အကျိုးကျေးဇူး အနည်းဆုံးတစ်ခု သို့မဟုတ် အနည်းငယ်တော့ ရမှာသေချာတယ်။ ဘာပဲပြောပြော၊ ဒါက ပုံမှန်ဇာတ်ကြောင်းမျိုးပဲ။”

မြင်းနက်တွေ၏ စိတ်ဝင်စားမှုကို ဖမ်းစားနိုင်သည့် အရာတိုင်းသည် မဆိုးပေ။ အလားတူပင်၊ မြင်းနက်များ အထူးသတိထားရသည့် မည်သည့်အရာမဆို အရည်အသွေး ဆိုးရွားမည်မဟုတ်ပေ။

ဤအကြိမ်တွင် လင်းဖေးသည် ရှေးဟောင်းတားမြစ်နယ်မြေတွင် တောက်ပနေရန် အလားအလာ အလွန်ကောင်းသည်။

သူ၏ကျင့်ကြံခြင်းကိုလည်း အများကြီး တိုးလာ စေလိမ့် မည်။

ထို့အပြင် လုရှောင်ယန်သည် လင်းဖေး ရောက်လာသည်နှင့် သတ်ပစ်ရန် မဖြစ်နိုင်ပေ။ အဲ့ဒီလိုက လက်တွေ့မကျပေ။

ရူယန်က သူမ၏ခင်ပွန်းကို ကာကွယ်ရမည်မှန်း သိနေသည်ဆိုတာ ပြောရန်မလိုပေ။ ထို့အပြင် လင်းဖေးကိုယ်တိုင်ကလည်း သူ့ကို အကာအကွယ်ပေးသည့် လူအနည်းငယ်ရှိနေသည်။

လုရှောင်ယန်သည် ယခင်က မြင်တွေ့ခဲ့ရသော အချက်အလက်များတွင် လင်းယုန်နန်းတော်သည် ရူယန်ကို ကျောထောက်နောက်ခံပြုထားကြောင်း ဖော်ပြခဲ့သည်။ ထို့အပြင် လင်းဖေး နှစ်သက်ခဲ့သော တော်ဝင်နန်းတော်ဖြစ်သည့် ဟွာအင်ပါယာနန်းတော်သည်လည်း လင်းဖေးနှင့် ဆက်ဆံရေးကောင်းမွန်ခဲ့သည်။

ပြောစရာတောင် မလိုပါ၊ ဒီအဖွဲ့တွေ၏ အဖွဲ့ဝင်တွေဟာ ဇာတ်လမ်းထဲက ဇာတ်လိုက်တွေကို ပံ့ပိုးပေးသည့် ဇာတ်ကောင်များဖြစ်သည်မှာ သေချာသည်။ သူတို့သည် ဇာတ်ဆောင်ကို အရွယ်မရောက်မီ အသက်ရှင်ရန် ကူညီပေးမည့် လူအမျိုးအစားများဖြစ်သည်။

သူတို့၏ ကျင့်ကြံဆင့်များသည် အလွန် အစွမ်းထက်သည်။ သဘောတရားကိုပြောရလျှင် သူတို့သည် လင်းဖေး နှင့် ထိတွေ့ဆက်ဆံမှု မရှိသင့်ပေ။

သို့သော်လည်း လင်းဖေးသည် ဇာတ်လိုက်တစ်ဦးဖြစ်သောကြောင့် တစ်ဖက်လူများ၏ ဉာဏ်ရည်ဉာဏ်သွေးသည် သိသိသာသာ ကျဆင်းသွားမည်ဖြစ်သည်။ မည်သို့ပင်ဆိုစေကာမူ လင်းဖေးကို တစ်ယောက်ယောက်က တိုက်ခိုက်သရွေ့ သူတို့သည် သူ့ကို အသက်နှင့်ရင်းပြီး သေချာပေါက် ကာကွယ်ကြလိမ့်မည်။

ဤအရာများနှင့် ရင်းနှီးသော လုရှောင်ယန်သည် ထိုအကြောင်းကို သေချာသိနေသည်။

ဒါက သူပြောင်းလဲနိုင်တဲ့ အရာမဟုတ်ပါ။

တကယ်တော့ လုရှောင်ယန်က သိပ်ဂရုမစိုက်ပေ။

တစ်ဖက်တွင်မူ ခရမ်းရောင်ငြိမ်းချမ်းရေး တော်ဝင်နန်းတော်သည် ကိုင်တွယ်ဖြေရှင်းရန် မလွယ်ကူပေ။ အကယ်၍ တဖက်သူက တိုက်ခိုက်ပါက ခရမ်းရောင်ငြိမ်းချမ်းရေး ဧကရာဇ်နန်းဆောင်ဘက်မှ ငြိမ်ငြိမ် ထိုင်နေမည်မဟုတ်ပေ။

တစ်ဖက်တွင်၊ သူသည် လကုန်အထိ အချိန်ဆွဲနိုင်သရွေ့ သူ၏ အဖိုးတန်တပည့်များ၏ ကျင့်ကြံဆင့်တိုးလာသောအခါတွင် သူ၏ ကျင့်ကြံဆင့်သည် ကြီးမားသော တိုးတက်မှုကြီးကို ကြိုဆိုရမည်ဖြစ်သည်။

ထိုအချိန်တွင် သူသည် လင်းဖေးကို တစ်ဦးချင်း တိုက်ခိုက်နိုင်လိမ့်မည်။ ထိုအချိန်တွင်၊ သူသည် ပဉ္စမအဆင့် သို့မဟုတ် ဆဋ္ဌမအဆင့်အထိ အလယ်အလတ်ဧကရာဇ်အဆင့်သို့ ဖြတ်ကျော်သွားမည်ဖြစ်သည်။

တော်ဝင်နန်းတော်များနှင့်ပတ်သက်၍ ကြောက်စရာအကောင်းဆုံးမှာ ထီးနန်းဆက်ခံသောဘုရင်များမဟုတ်ဘဲ အငြိမ်းစားယူထားပြီးဖြစ်သော နန်းတော်အသီးသီး၏ ဘုရင်ဟောင်းများဖြစ်သည်။

သူတို့အထဲမှ အညံ့ဆုံးက ဧကရာဇ်အဆင့်မှာ ဖြစ်သည်လို့ ဆိုသည်။

ထိုသို့မဟုတ်ပဲ သူတို့အားလုံးသာ ဘုရင်အဆင့်မှာဆိုရင် လုရှောင်ယန်က လုံးဝ ဂရုမစိုက်ပါ။ သူသည် ယခုခွန်အားဖြင့် သူတို့အုပ်စုကို တစ်ယောက်တည်း တိုက်နိုင်သည် ။

သို့သော် အခြားပြဿနာတစ်ခုရှိသည်။ သူ လင်းဖေးကို မသတ်ခင် ကြိုတင်စီစဉ်ထားဖို့ လိုသည်။

လင်းဖေးကို သတ်ပြီးနောက် ကျန်အရေးကြီးသည့်ကိစ္စမှာ ကျီဝူရှန်ကို ထောက်ပံ့ရန်ဖြစ်သည်။

ထိုအချိန်တွင် လင်းဖေးသည် အသုံးမဝင်တော့ပေ။

"နောက်ကွယ်က မဟာကျိုးဧကရာဇ်ကို ထိန်းချုပ်နိုင်စေဖို့ နောက်ထပ် အစီအစဉ်တစ်ခုကို ငါ စဉ်းစားရမယ့်ပုံပဲ။"

လုရှောင်ယန်သည် သူ၏ မေးစေ့ကို ကိုင်ပြီး ခဏလောက် စဉ်းစားသည်။ ခဏကြာတော့ သူ၏နှုတ်ခမ်းထောင့်က ကော့တက်သွားသည်။

"လင်းဖေးကို သတ်ဖို့ အဆင်သင့်ဖြစ်နေပြီဆိုတော့ လင်းဖေးကို အခွင့်ကောင်းယူပြီး ဘာလို့ ငါတို့အတွက် အထောင်အကူဖြစ်အောင်မလုပ်ရမှာလဲ။"

လုရှောင်ယန်သည် လင်းဖေး၏ သိုင်းဘုရင်အဆင့် ဆရာယွဲ့ယင်းကို သတ်ဖြတ်ပြီး သူ့ကို သိုင်းဘုရင်အဆင့် ဝိညာဉ် ဆေးလုံးအဖြစ် ပြုပြင်ထားသကဲ့သို့ လင်းဖေးကိုလည်း ရည်မှန်းချက်အချို့အောင်မြင်စေရန် အသုံးပြုဖို့ အသင့်ဖြစ်နေပြီဖြစ်သည်။

မြင်းနက်တစ်ယောက်အနေနှင့် လင်းဖေးသည် လူများစွာကို စော်ကားခဲ့သည်။

သူပေါ်လာသည်နှင့် သူ့ကို လှောင်ပြောင်ပြီး တိတ်တဆိတ် တိုက်ခိုက်သူတွေ ရှိမှာ သေချာသည်။

ဤလူများတည်ရှိရခြင်း၏ ရည်ရွယ်ချက်မှာ လင်းဖေးကို အရှက်ရစေရန် တစ်ခုတည်းသာဖြစ်သည်။

သူတို့သည် လင်းဖေး၏ အသတ်ခံရခြင်းတောင် ဖြစ်နိုင်သည်။ စင်စစ် လင်းဖေး၏ အကျင့်စရိုက်ကြောင့် သူတို့ အရှုံးပေးပြီး သူ၏ ညီအကို လက်ပါးစေတွေ ဖြစ်လာနိုင်သည့် တချို့ကိစ္စတွေတောင် ရှိပေဦးမည်။

လုရှောင်ယန်ကတော့ ထိုဘောမများကို စိတ်မ၀င်စားနိုင်ပေ။

သို့သော်လည်း လုရှောင်ယန်သည် လင်းဖေးကြောင့် သန်မာသွားသော သို့မဟုတ် ဒဏ်ရာရသွားသူများကို စုစည်းပြီး အသုံးချနိုင်သည်။

မည်သို့ပင်ဆိုစေကာမူ စစ်မှန်သောအမြင်အာရုံသုံးပါးဖြင့် တစ်ဖက်သား ပုန်ကန်လာမည်ကို မကြောက်ပေ။ သူသည် ထိုသူ၏မှတ်ညဏ်များကို တိုက်ရိုက်မွမ်းမံနိုင်ပြီး ထိုသူကို အပြီးတိုင် ထိန်းချုပ်နိုင်သည်။

ကျီဝူရှန်ကို ထိန်းချုပ်ခြင်းသည် မဟာကျိုး၏ အုပ်စိုးသူ ဖြစ်လာမည်ဟု အာမမခံနိုင်ပေ။

မသေချာမရေရာသောအချက်များစွာ ရှိသည်။

လုရှောင်ယန်သည် အမြဲသတိထားတတ်သူဖြစ်သည်။ သူ၏အကြံအစည်ကို ဘယ်တော့မှ မှားခွင့်မပေးပေ။

သူသည် မဟာကျိုး တော်ဝင်မိသားစုကို မထိန်းချုပ်နိုင်သည့်အတွက် အုပ်ချုပ်မည့်သူကို ကိုယ်တိုင် မရွေးချယ်နိုင်ပေ။

သို့သော် ဧကရာဇ်မင်းမြတ်နေရာအတွက် ယှဉ်ပြိုင်သူအားလုံးကို ထိန်းချုပ်နိုင်လျှင် မဟာကျိုး တော်ဝင်မိသားစုက ဘယ်သူကို ရွေးမလဲဆိုတာ အရေးမကြီးတော့ပါ…..

***

ပြိုင်ဘက်ကင်းအသန်မာဆုံးသခင်ကြီး

စာစဉ် ၁၀။ အခန်း ၁၃၈ အကြီးအကဲမင်ကျဲ့ရဲ့ ဘုန်းတန်ခိုး

ခရမ်းရောင်တိမ်တိုက်စံအိမ်သည် မဟာကျိုးနန်းမြို့တော်ရှိ အကျော်ကြားဆုံး စားသောက်ဆိုင်များထဲမှ တစ်ခုဖြစ်သည်။

ထိပ်တန်းအစားအစာကြောင့် ကျော်ကြားခြင်းမဟုတ်ပဲ ၎င်း၏သင်္ကေတကြောင့်ဖြစ်သည်။

မဟာကျိုး နန်းမြို့တော်တွင် မရေမတွက်နိုင်သော စားသောက်ဆိုင်များရှိသည်။ သို့သော်လည်း ခရမ်းရောင်တိမ်တိုက်စံအိမ်သည် မည်သည့်ပြဿနာမှ ဖြစ်ခွင့်မပြုသော တစ်ခုတည်းသော စားသောက်ဆိုင်ဖြစ်သည်။

တစ်ချိန်က မဟာကျိုး ဧကရာဇ်မင်းမြတ်၏ အကြိုက်ဆုံးစားသောက်ဆိုင်ဖြစ်ခဲ့သည်။

ဤနေရာတွင်တည်ရှိသော သဘာဝနဂါးသွေးကြောနှင့် ကြွယ်ဝသောဝိညာဉ်စွမ်းအင်များမှလွဲ၍ မဟာကျိုး နန်းမြို့တော်ကို ဤနေရာတွင်တည်ထောင်ရန် ဆုံးဖြတ်ရခြင်း၏အကြောင်းရင်းတစ်ခုမှာ ခရမ်းရောင်တိမ်တိုက်စံအိမ်ကြောင့်ဖြစ်သည်။

မင်းသားလေးပဲဖြစ်ဖြစ် မင်းသမီးပဲဖြစ်ဖြစ် အရေးမကြီးပါ။ ဤနေရာ၌ ပြသနာရှာခဲ့လျှင် သင်သည် ပြင်းထန်စွာ ဒဏ်ရာရမည် သို့မဟုတ် သေပေလိမ့်မည်။

တော်ဝင်နန်းတော်၏ ခန်းမဆောင်တွင် ပြဿနာဖြစ်စေခဲ့လျှင်တောင် အသက်ရှင်ရန် အခွင့်အလမ်းရှိပါသေးသည်။ သို့သော် ဤနေရာ၌ သက်ညှာမှုမရှိပေ။ စည်းမျဉ်းစည်းကမ်းတွေပဲရှိသည့်အတွက် မည်သူမဆို လိုက်နာရမည်။

ထိုနေ့တွင် အထူးဧည့်သည်တစ်စုသည် ခရမ်းရောင်တိမ်တိုက်စံအိမ်၏ ထောင့်ရှိ သီးသန့်ခန်းသို့ ရောက်ရှိလာသည်။

သူတို့သည် အလွန်ဆုံးမှ အသက် ၅၀ ခန့်ရှိမည်ဖြစ်သော်လည်း အသက်မကြီးသေးပါ။ သူတို့အားလုံး ကျင့်ကြံထားသောကြောင့် လူတိုင်းသည် အလွန်ငယ်ကြပုံရသည်။ အခြေခံအားဖြင့်တော့ အပြင်ပိုင်းအသွင်အရ သူတို့ဟာ အသက်နှစ်ဆယ်ကျော်လောက်ပဲ ရှိပုံရသည်။

သူတို့နှင့် အဆင့်တူ သို့မဟုတ် သန်မာမှုမရှိသူများသည် ၎င်းတို့၏ အရိုးအသက်ကို မပြောနိုင်ပေ။

"မတွေ့တာကြာပြီ ကျီလော့ယွင်။ မင်းဒီမှာရှိမယ်လို့ ငါမမျှော်လင့်ထားဘူး။ အရင်က မင်း ဧကရာဇ်သားမက်တော်လင်းကို စော်ကားပြီး မင်းလက်ပြတ်သွားတယ်လို့ ငါကြားတယ်။ တိမ်တိုက်ကောင်းကင်တော်ဝင်နန်းတော်က မင်းရဲ့ကျိုးနေတဲ့လက်ကို မြန်မြန်ပြုပြင်ပြီးပြီလို့ ငါမမျှော်လင့်ထားဘူး။"

ကျီလော့ယွင်ဟုခေါ်သောလူက အော်ဟစ်ပြီး ရုပ်ဆိုးသောအမူအရာကို ထုတ်ပြလိုက်သည်။

"ကျီထျန်းရှို့၊ မင်းငါ့ကို ဘာလို့ ဒီမှာလှောင်ပြောင်တာလဲ။ ငါသေချာ မှတ်မိရင် မင်းက နန်းမြို့တော်မှာ ဧကရာဇ်သားမက်တော်လင်းကို စော်ကားတဲ့ ပထမဆုံးလူပဲ မဟုတ်လား။ အဲဒီတုန်းက လင်းဖေးရဲ့ လက်သီးချက်ကြောင့် မင်းရဲ့ ဒန်ထျန်ကွဲသွားခဲ့ပြီး မင်းအရမ်းထိတ်လန့်သွားခဲ့တယ်မလား။ ဘာလို့လဲ အခု မင်းရဲ့ဒန်ထျန်က ပြန်ကောင်းလာပြီဆိုတော့ မင်းပြန်ပြီး ညစ်ပတ်နေပြီလား။"

သူပြောပြီးသည်နှင့် လေထုထဲတွင် ယမ်းမှုန့်နံ့များ ပြည့်နေသည်။

သူတို့ နှစ်ယောက် ရန်ဖြစ်တော့မည်ကို သိလိုက်ရသဖြင့် အမျိုးသမီးတစ်ဦးက သူတို့နှစ်ယောက်ကို တစ်ချက်ကြည့်လိုက်ပြီး “မင်းတို့ နှစ်ယောက်မှာ သတ္တိရှိရင် လင်းဖေးကိုသွားပြီး ဓားနဲ့ ထိုးလိုက်။ ဘာလို့ဒီလောက်ဆူနေတာလဲ။"

သူဤသို့ပြောပြီးသည်နှင့်၊ သူတို့နှစ်ဦး မထိန်းနိုင်ဘဲ "ကျီဖန်းဟွာ၊ မင်းမှာ ငါတို့ကို နှောက်ယှက်နိုင်တဲ့အနေအထားမှာရှိလို့လား။"

"မှန်တယ်။ အရင်က လင်းဖေးကို ငါတို့ နှိမ့်ချခဲ့ပေမယ့် နောက်ဆုံးမှာ လင်းဖေးရဲ့ ပါးရိုက်တာခံခဲ့ရတယ်။ လင်းဖေးကို ရှုံးပြီး ဒဏ်ရာအပြင်းအထန်ရရုံသာမကဘဲ အရှက်လည်းရပြီး တော်ဝင်နန်းတော်နဲ့ နန်းမြို့တော်တစ်ခုလုံးမှာတောင် ဟာသဖြစ်လာခဲ့တယ်။ ဒါပေမယ့် မင်းနဲ့ နှိုင်းစာရင် မင်းက ငါတို့ နှစ်ယောက်ထက် အများကြီး ပိုရှက်စရာကောင်းနေသေးတယ်။"

“အနာဂါတ်မှာ ငါတို့ဟာ အရင်အတိုင်းပဲ ဘဝကို ဆက်လက်ရှင်သန်နေမှာပါ။ ဒါပေမယ့် မင်းနဲ့ အတူနေချင်တဲ့သူတွေကို မင်းဘယ်တော့မှ ရှာတွေ့မယ်လို့ ငါ မထင်ဘူး။"

ကျီဖန်းဟွာက ဒေါသ မထွက်ဘဲ ခေါင်းခါလိုက်သည်။

“ကလေးဆန်လိုက်တာ။ ဘယ်သူ ငါနဲ့ အတူနေချင်တယ် မနေချင်ဘူးက ငါ့ပြဿနာပါ။ တစ်ဖက်မှာ၊ မင်းတို့က ဒီနေရာမှာ ပြိုင်ဘက်ကင်းဖို့ကိုသာ ဂရုစိုက်နေကြတယ်။ ဒီနေ့ အဖြစ်အပျက်က နည်းနည်းတော့ ထူးဆန်းတယ်လို့ မထင်ဘူးလား။”

"အဲဒါက ဘာထူးဆန်းလို့လဲ။ မင်းတို့က ငါ့ကို ထမင်းအတူစားဖို့ တောင်းဆိုတာလေးပဲ။ ငါ မင်းတို့ကို အရှက်မကွဲစေချင်လို့လာခဲ့တာ။"

ကျီဖန်းဟွာက သူ့ကို တစ်ချက်ကြည့်လိုက်ပြီး "မင်း အတွေးလွန်နေတာပဲ။ မင်းကိုဘယ်သူမှမဖိတ်ဘူး။ ချင်ရှန်းနဲ့ အခုပဲ သီးသန့်စကားပြောပြီးပြီ။ ငါ့ရဲ့ လက်အောက်ငယ်သားတွေက ငါ့ကို ဖိတ်ခေါ်တဲ့သူက ချင်ရှန်းဖြစ်တယ်လို့ သတင်းပို့တယ်။ ဒါပေမယ့် ငါတို့နှစ်ယောက် တစ်ယောက်ကိုတစ်ယောက် လုံးဝမဖိတ်ခေါ်ခဲ့ဘူး။ မင်းတို့ကတော့ ရန်မဖြစ်ရင်တောင်ကောင်းနေပြီ။ ဘာလို့ တစ်ယောက်ကိုတစ်ယောက် ဖိတ်ခေါ်နိုင်မှာလဲ။

တစ်စုံတစ်ယောက်က ငါတို့ကို ဒီနေရာမှာ ဖိတ်ကြားဖို့ ငါတို့ရဲ့ သက်ဆိုင်ရာအမည်တွေကို အသုံးပြုခဲ့တာ အသိအသာကြီး။"

ထိုသို့ပြောပြီးသည်နှင့် လူတိုင်း၏အမူအရာတွေက ရုတ်တရက် လေးနက်လာသည်။

"ဘယ်သူက ဒီလောက် ရဲရင့်တာလဲ။ ငါတို့လို မင်းသားတွေ မင်းသမီးတွေကို ဘယ်လို လိမ်ညာပြောရဲကြတာလဲ။”

ကျီချင်ရှန်းက ထိုင်ခုံလက်ကိုင်ကို ပုတ်ပြီး အေးအေးဆေးဆေး တွက်ချက်နေသည်။

"ဒီနေ့ဒီလူအနည်းငယ်ထဲမှာ၊ လော့ယွင် ၊ ထျန်းရှို့ ၊ ဖုန်းဟွာ ၊ ချင်ရှန်းနဲ့ ငါဟာ မဟာကျိုး တော်ဝင်မိသားစုရဲ့ မင်းသားမင်းသမီးတွေပါ။ ဒါ့အပြင်၊ ငါတို့က မင်းသမီးကြင်ယာတော်လင်းကို တိုက်ရိုက်စော်ကားတာ သို့မဟုတ် သွယ်ဝိုက်စော်ကားခဲ့ပြီး သူ့ကို အပြစ်ပေးခဲ့တယ်။ ဒီအရာက ငါတို့အားလုံးမှာ တူညီတဲ့အရာပဲ။

တဖက်လူက... လင်းဖေးကို အာဃာတ ရှိနေတယ်။ ဒါ့အပြင်၊ သူက လင်းဖေးရဲ့ ရန်သူတွေကို စုစည်းလိုလို့ပဲဖြစ်မယ်။”

ပြောပြီးသည်နှင့် ချီးမွမ်းသံများက လေထဲတွင် ထွက်ပေါ်လာသည်။

"အမှန်ပဲ။ ဘုရင်မိသားစုတွေရဲ့ အမွေဆက်ခံသူပီသတယ် မင်းတို့တွေက တကယ်ကို ဉာဏ်ကောင်းတယ်။”

"ဘယ်သူလဲ?"

သူတို့ခန္ဓာကိုယ်တွင်းရှိ ဝိညာဉ်စွမ်းအင်များ ချက်ချင်းပေါက်ထွက်လာသည်နှင့်အမျှ လူတိုင်း၏အမူအရာများ ပြောင်းလဲသွားသည်။

သို့သော်လည်း နောက်တစက္ကန့်တွင်၊ ၎င်းတို့သည် ပိုမိုပြင်းထန်သော စွမ်းအားတစ်ခုဖြင့် ဖိနှိပ်ခံခဲ့ရပြီး ၎င်းတို့၏ ခန္ဓာကိုယ်တွင်းရှိ ဝိညာဉ်စွမ်းအင်မှာ မလှုပ်ရှားနိုင်တော့ပေ။

လူတိုင်း၏ အမူအရာများသည် ချက်ချင်းပင် လေးနက်လာသည်။

"မင်း ဘယ်သူလဲ? ဘာလို့ဒီလောက်လျှို့ဝှက်နေတာလဲ။ ထွက်လာခဲ့။"

ကျီထျန်းရှို့ တိုးတိုးလေးအော်လိုက်သည်။ နောက်တစ်စက္ကန့်တွင် လေထုသည် ပုံပျက်သွားသည်။ အနက်ရောင်ဝတ်ရုံ၊ ဝါးဦးထုပ်နှင့် မျက်နှာဖုံးဝတ်ဆင်ထားသည့် လုရှောင်ယန်သည် လူတိုင်းရှေ့တွင် ဖြည်းညှင်းစွာပေါ်လာသည်။

သူသည် လူတိုင်းကို သနားသော အမူအရာဖြင့် ကြည့်သည်။

ကျင့်ကြံခြင်း သို့မဟုတ် ဉာဏ်ရည်ဉာဏ်သွေးအရသော်လည်းကောင်း၊ ဤသူများသည် အမှန်အားဖြင့် မဆိုးပေ။ ထို့အပြင်၊ ၎င်းတို့သည် မဟာကျိုး အင်ပါယာရှိ အမျိုးမျိုးသော အင်ပါယာ ဘုံဗိမာန်များ၏ တိုက်ရိုက်ဆက်ခံသူများဖြစ်သည်။

ကံမကောင်းစွာဖြင့်၊ သူတို့သည် လင်းဖေးနှင့်သာ ရင်ဆိုင်ခဲ့ရသည်။ ထို့ကြောင့်၊ သူတို့၏ ဉာဏ်ရည်သည် လျော့ပါးလာပြီး သာမာန်လုပ်လေ့မရှိသော မိုက်မဲသော အရာတစ်ခုကို ပြုလုပ်ခဲ့သည်။ နောက်ဆုံးတွင်၊ လင်းဖေးအား အပြစ်ပေးမည်ဆိုကာ လင်းဖေးအား ရန်စခဲ့ကြသည်။

"မင်းက နတ်ဆိုးဂိုဏ်းကလား။"

ကျီချင်ရှန်းသည် တည်ငြိမ်ဟန်ဆောင်ရင်း သူမမျက်လုံးတွေကို ကျဉ်းမြောင်းလိုက်ပြီး စကားပြောသည်။

“ဒါပေမယ့် မင်းအပေါ်မှာ နတ်ဆိုး အငွေ့အသက် မရှိဘူး။ မင်းက နတ်ဆိုးဂိုဏ်းကမဟုတ်ရင်၊ မြန်မြန်ထွက်သွားပါ၊ ငါတို့က ဒီကိစ္စကို ဗွေယူမှာမဟုတ်ဘူး။ မဟုတ်ရင် တော်ဝင်နန်းတော်အမျိုးမျိုးရဲ့ တိုက်ရိုက်ဆက်ခံသူတွေကို ပြန်ပေးဆွဲခြင်းရဲ့ အကျိုးဆက်ကို မင်း မခံနိုင်ဘူး။”

လုရှောင်ယန်သည် သူ၏ဝါးဦးထုပ်ကို ဖြည်းညှင်းစွာ မြှောက်လိုက်ပြီး သူ၏ရွှေရောင်မျက်လုံးများသည် လူတိုင်း၏အမြင်အာရုံထဲသို့ ချက်ချင်းဝင်ရောက်သွားသည်။

၎င်းတို့သည် မထိန်းနိုင်ဘဲ၊ ရပ်တန့်ကာ သူတို့၏ စိတ်များ ကွက်လပ်ထဲသို့ ကျသွားသည်နှင့်အမျှ သူတို့၏ မျက်စံများသည် ကျယ်ပြောလာသည်။

"မင်းငါ့ကို မကြာခင် သိရလိမ့်မယ်။"

အပြုံးဖြင့် လုရှောင်ယန်သည် သူတို့၏စိတ်ထဲတွင် မှတ်ညဏ်အသစ်များကို ထည့်သွင်းခဲ့သည်။

ထို့နောက် သိုင်းဘုရင်အဆင့်သွေးဆေးတစ်လုံးစီ ပေးခဲ့သည်။

ရုပ်သေးများကို အသုံးဝင်စေရန် ပြုစုပျိုးထောင်ပေးရမည်။ မဟုတ်လျှင် သူတို့သည် ရုပ်သေးရုပ်တွေသက်သက်ဖြစ်မည်။

တစ်ချိန်တည်းမှာပင် နန်းမြို့တော်မှ ကီလိုမီတာထောင်ပေါင်းများစွာ ဝေးကွာသောနေရာတွင် တော်ဝင်အဝတ်အစားဝတ်ဆင်ထားသည့် ကျွမ်းကျင်သူ ခြောက်ဦးသည် အော်ဟစ်ကာ ရွှေရောင်ဖျော့ဖျော့ မီးတောက်များကြောင့် မီးလောင်ပြာကျသွားသည်။ သူတို့၏ ဝိညာဉ်များပင် ပြာအဖြစ်သို့ ပြောင်းလဲသွားကြသည်။

မဝေးသောတစ်နေရာမှ ဝတ်ရုံရှည်ဝတ် အကြီးအကဲမင်ကျဲ့သည် ထိပ်တန်း ကောင်းကင်ဘုံအဆင့် အဖြူရောင်ကျောက်စိမ်းကြွေပုလင်းကို ထုတ်ပြီး ရွှေရောင်ဖျော့ဖျော့ မီးတောက်များကို စုပ်ယူလိုက်သည်။

သူ၏မျက်နှာတွင်တော့ မှိုရသော အမူအရာ ပေါ်လာသည်။

“အနှစ်သာရခိုင်မြဲခြင်းအဆင့် ပညာရှင်ခြောက်ယောက်ထဲမှာ အနိမ့်ဆုံး ကျင့်ကြံဆင့်က အနှစ်သာရခိုင်မြဲခြင်းအဆင့်ရဲ့ ပဉ္စမအဆင့်မှာ ရှိတယ်။ ဒါပေမယ့် ဒီရွှေရောင် မီးတောက်ကိုတောင် သူတို့ မခုခံနိုင်ဘူး။ အသက် ဆယ်ခါလောက် ရှိုက်ပြီးနောက်မှာတင် သူတို့ သေသွားပြီ။ ဒီရွှေမီးတောက်က တကယ်ကို အစွမ်းထက်တယ်။”

သူ၏ဘေးက ကျင့်ကြံသူက မနာလိုသည့်အရိပ်အမြွက်နှင့်ပြောသည် “ဂုဏ်ယူပါတယ် အကြီးအကဲမင်ကျဲ့ ၊ နတ်မီးလျှံကိုရတဲ့အတွက် ဂုဏ်ယူပါတယ်။ ဒီနတ်မီးရဲ့ စွမ်းအားက သူတော်စင်လက်နက်ထက် မနိမ့်ကျနိုင်ဘူး။"

" သူတော်စင်လက်နက် ဟီးဟီး…”

အကြီးအကဲမင်ကျဲ့သည် သူ့ကို အထင်အမြင်သေးစွာဖြင့် စိုက်ကြည့်နေသည်။

“မျှော်လင့်ထားသလိုပဲ၊ ဒီလက်နက်ရဲ့ စွမ်းအားအစစ်အမှန်ကို မင်း မပြောနိုင်ဘူး။ ဒီမီးတောက်ဟာ သေချာပေါက် သူတော်စင်အဆင့်မဟုတ်ဘူး။ ဒီစွမ်းအားက သိုင်းဘုရင်အဆင့် လက်နက်ထက် လုံးဝ မနိမ့်ကျဘူး။”

***

ပြိုင်ဘက်ကင်းအသန်မာဆုံးသခင်ကြီး

စာစဉ် ၁၀။ အခန်း ၁၃၉ အသက်ကြီးတဲ့သူတွေက ရည်မှန်းချက်မရှိရဘူးလို့ဘယ်သူပြောလဲ

"ဟစ်စ်~ သိုင်းဘုရင်အဆင့် လက်နက်..."

အအေးဓာတ်သည် ခြေဖဝါးမှ ခေါင်းထိ ပြေးလာသဖြင့် လူတိုင်း မျက်လုံးများ ကျယ်သွားကြသည်။ သူတို့၏ ဦးရေပြားများပင် ထုံကျင်လာသည်။

"အကြီးအကဲမင်ကျဲ့၊ အဲဒါက တကယ်ကို ချဲ့ကားနေတာလား။ အဲဒါ မီးတောက်တစ်ခုပဲကို။"

အကြီးအကဲမင်ကျဲ့သည် ထိုလူစုကို တစ်ချက်ကြည့်လိုက်သည်။

"အနှစ်သာရခိုင်မြဲခြင်းအဆင့် ကျွမ်းကျင်သူကို ချက်ချင်းသတ်နိုင်တဲ့ မီးတောက်ကို မင်းမြင်ဖူးလား။ ဒီမီးလျှံက သူ့အသိစိတ်ရှိပြီးသားပါ။ သက်ရှိသတ္တဝါတွေနဲ့ ကပ်နေတဲ့ နာမ်ခန္ဓာတွေကို အကုန် မလောင်ကျွမ်းရသေးသရွေ့ ငြိမ်းမသွားဘူး။"

ခေတ္တနားပြီးနောက် သူက ဆက်ပြောသည် - "သိုင်းဘုရင်အဆင့် လက်နက်ရဲ့ စွမ်းအားကို ငါ တစ်ခါမှ မမြင်ဖူးပေမယ့် ဒီမီးတောက်တွေက တကယ့်ကို ကမ္ဘာမြေကြီးကို တုန်လှုပ်စေနိုင်တယ်။ ဒီမီးတောက်တွေရဲ့ စွမ်းအားက ဒဏ္ဍာရီဆန်တဲ့ သိုင်းဘုရင်အဆင့်လက်နက်ရဲ့ စွမ်းအားနဲ့ လုံးဝ ယှဉ်နိုင်မယ်လို့ ယူဆရတယ်။ ဒါ့ကြောင့်၊ သိုင်းဘုရင်အဆင့် လက်နက်နဲ့ ယှဉ်နိုင်တယ်လို့ ငါပြောရဲတယ်။”

အကြီးအကဲမင်ကျဲ့၏ အတည်ပြုချက်ကို ရရှိပြီးနောက် လူတိုင်း တုန်လှုပ်ချောက်ချားသွားကြသည်။

ကြောက်စရာကောင်းလွန်းသည်။

ဤမီးတောက်များသည် သိုင်းဘုရင်အဆင့် လက်နက်များနှင့် နှိုင်းယှဉ်နိုင်သောကြောင့် ဤမီးတောက်များကို ဖန်တီးသူသည် မည်မျှ အစွမ်းထက်သနည်း။

သူ၏ ခွန်အားသည် ဒဏ္ဍာရီလာ သိုင်းဘုရင်အဆင့်ကို ကျော်လွန်နေပြီ ဖြစ်ကောင်းဖြစ်နိုင်သည်။

ဒီမီးတောက်ကို ဖန်တီးတဲ့သူဟာ နတ်ဘုရားဖြစ်နိုင်မလား။

စင်စစ် အကြီးအကဲ မင်ကျဲ့ ပြောတာ မှားပါသည်။

ဤမီးတောက်သည် လုရှောင်ယန်၏ ကျင့်ကြံဆင့်တွင်သာ ကန့်သတ်ထားသည်။

လုရှောင်ယန်သည် ဧကရာဇ်အဆင့်တွင် ကျွမ်းကျင်သူတစ်ဦးဖြစ်ပြီး သူ၏ ကျင့်ကြံဆင့်ထက်နိမ့်ကျသော လူများကို လျင်မြန်စွာ ဒဏ်ရာရစေနိုင်သည်။

၎င်းသည် တူညီသောအဆင့်မှလူများကို ထိခိုက်စေနိုင်သော်လည်း အရှိန်သည် ထိုမျှမြန်မည်မဟုတ်ပေ။

ဥပမာအားဖြင့်၊ ယခင်က အကြီးအကဲမင်ကျဲ့တွင် မီးတောက်သည် အလွန်လျင်မြန်စွာ မလောင်ကျွမ်းခဲ့ပေ။ ရလဒ်အနေနဲ့ သူ၏အသားကို ဖြတ်ဖို့ အချိန်အလုံအလောက်ရပြီး မသေခဲ့ခြင်းဖြစ်သည်။။

မြင့်မားသော ကျင့်ကြံဆင့်ဖြင့် တည်ရှိနေပါက၊ ၎င်းတို့သည် သဘာဝအတိုင်း ခုခံရန် နည်းလမ်းအချို့ ရှိပေလိမ့်မည်။

သို့သော် လုရှောင်ယန်၏ ကျင့်ကြံဆင့်လည်း တိုးလာပါက တဖက်သူသည် အကူအညီမဲ့နေဆဲ အခြေအနေသာဖြစ်သွားပေလိမ့်မည်။

အကြီးအကဲမင်ကျဲ့က သူ့လက်ထဲက ကြွေပုလင်းကို ကြည့်လိုက်ပြီး သူ့မျက်လုံးတွေမှာလည်း စိတ်ခံစားမှုနဲ့ ရိုသေမှုတွေ ပြည့်နှက်နေသည်။

ဤမီးတောက်သည် စင်စစ် နတ်မီးတောက်ဖြစ်သည်။

ဖန်ဆင်းခဲ့သူက သေချာပေါက် နတ်တစ်ပါးပဲ။

သူ၏ ကျင့်ကြံဆင့်သည် မူလကဧကရာဇ်အဆင့်၏ ပဉ္စမအဆင့်တွင်ဖြစ်သည်။

သူသည် ကောင်းကင်အကျဉ်းထောင်၏အောက်ခြေတွင် အချိန်အတော်ကြာနေခဲ့ရပြီး အစီအရင်များကြောင့် ပျက်စီးသွားသောကြောင့် ယခုအခါ ဧကရာဇ်အဆင့်၏ ပထမအဆင့်၏ ခွန်အားကိုသာ ထုတ်လွှတ်နိုင်တော့သည်။

အတိတ်ကလိုဆိုရင် သူသည် တစ်နေရာရာမှာ ရှည်ကြာစွာ ပုန်းကွယ်နေပြီး သူ၏အထွတ်အထိပ်ခွန်အားကို ပြန်လည်ရရှိဖို့အတွက် သူ၏ဒဏ်ရာတွေကို အမြန်ပြုပြင်ပါလိမ့်မည်။

သို့သော်၊ ဤမီးလျှံကို ရရှိပြီးနောက်၊ အကြီးအကဲမင်ကျဲ့သည် အနည်းငယ် ပို၍ယုံကြည်မှုရှိကြောင်း ခံစားခဲ့ရသည်။

သူ ထွက်ပြေးဖို့ မလိုတော့ဘူး။

သူသည် ဧကရာဇ်မြို့တော်မှ လိုက်ရှာသူအားလုံးကို သတ်ပစ်ပြီး သူ၏ ကျင့်ကြံဆင့် တိုးမြှင့်ရန်အတွက် ဤလူများ၏ သွေးစွမ်းအင်ကို အသုံးပြုရမည်။

ဟုတ်ပါသည်၊ သူသည် သူ၏ခွန်အားကို အားကိုးဖို့ အစီအစဉ်မရှိပါ။ ယင်းအစား သူသည် ဤလျှို့ဝှက်ဆန်းကြယ်ပြီး လွှမ်းမိုးနိုင်သော မီးတောက်ကို အားကိုးချင်ခဲ့သည်။

သူ၏ အထွတ်အထိပ်ခွန်အားကို ပြန်လည်ရရှိရန် လုံလောက်သော သွေးအနှစ်သာရကို သန့်စင်ပြီးနောက်၊ သူသည် နတ်ဆိုးဂိုဏ်းသို့ ပြန်သွားမည်။

ထိုအချိန်တွင်၊ သူလိုချင်သည့်အရာသည် နတ်ဆိုးအရှင်အောက် နံပါတ်တစ်ပုဂ္ဂိုလ်မဟုတ်တော့ပေ။

ဖြစ်နိုင်တာက ... သူသည် နတ်ဆိုးအရှင်နှင့် တန်းတူရည်တူ ဖြစ်ရန် ကြိုးစားသင့်သည်။

သို့တည်းမဟုတ်...သူသည် နတ်ဆိုးအရှင်နှင့် လက်ထပ်ပြီး နတ်ဆိုးဂိုဏ်းကို အတူတကွ အုပ်ချုပ်နိုင်သည်။

အရင်တုန်းကတော့ ဒီလိုအဖြစ်မျိုး တစ်ခါမှ မတွေးဝံ့ပါ။

အဘယ်ကြောင့်ဆိုသော် သူသည် နတ်ဆိုးအရှင်နှင့် အလှမ်းဝေးကွာသောကြောင့် ဖြစ်၏။

သူသည် နတ်ဆိုးအရှင်ကို လေးစားပြီး သူမကို ကြောက်သည်။

နတ်ဆိုးအရှင်ထံ တာဝန်ထမ်းဆောင်ရခြင်းအတွက် ဂုဏ်ယူမိသည်။

သို့သော်လည်း ယခု ဤရွှေမီးတောက်များက သူ့ကို ရဲရင့်မှုနှင့် ယုံကြည်မှုကို ပေးစွမ်းခဲ့သည်။ ၎င်းသည် သူ့အား အလုံးစုံသော တန်ခိုးရှင်ဖြစ်ကြောင်း ခံစားရစေသည်။

ဖြူဖွေးသော ကျောက်စိမ်းကြွေပုလင်းကို ပွတ်သပ်ရင်း နူးညံ့ တောက်ပသော အငွေ့အသက်များ ပြည့်နှက်နေသော သူ၏မျက်လုံးများက ချစ်သူတစ်ယောက်ကိုကြည့်သကဲ့သို့ ဖြစ်နေသည်။

ဤတစ်ကြိမ်တွင် သူသည် လက်အောက်ငယ်သားများစွာကို ဆုံးရှုံးခဲ့ရပြီး သူ့တပည့်များ၏ သစ္စာဖောက်ခြင်းကိုပင် ခံခဲ့ရသည်။ ဤဘေးအန္တရာယ်မှ အကျိုးကျေးဇူးရမည်ဟု သူ မမျှော်လင့်ခဲ့ပေ။

အကြီးအကဲမင်ကျဲ့က သူသည် ကမ္ဘာပေါ်တွင် အပျော်ရွှင်ဆုံးလူဟု ခံစားခဲ့ရသည်။

"အကြီးအကဲ မင်ကျဲ့၊ ဒီမီးလျှံက အရမ်းအစွမ်းထက်တယ်။ ဘာလို့ နာမည်မပေးတာလဲ။"

ဒါကို သူပြောပြီးတာနဲ့ပဲ အကြီးအကဲမင်ကျဲ့က ချက်ချင်းတုံ့ပြန်ခဲ့သည်။

"မှန်တယ်၊ မှန်တယ်။ ငါတို့က ဒီနတ်မီးလျှံကို နာမည်ကောင်းမပေးရင်၊ တန်ခိုးတော်အတွက် တကယ်ကို စော်ကားရာရောက်လိမ့်မယ်။ ဒါပေမယ့် ငါတို့က အဲဒါကို ဘာခေါ်ရမှာလဲ။"

" အကြီးအကဲမင်ကျဲ့ ၊ မင်းရဲ့ ဓမ္မနာမည်က မင်ကျဲ့ပါ၊ ဘာလို့ မင်ကျဲ့ မြင့်မြတ်မီးလျှံလို့ မခေါ်တာလဲ။”

အကြီးအကဲမင်ကျဲ့က ခေါင်းညိတ်သည်။

"အဲဒါကို ကြိုက်တယ်... မင်ကျဲ့ မြင့်မြတ်တဲ့ မီးလျှံ။ အဲဒါဆို ဒီနေ့ကစပြီး ဒါကို မြင့်မြတ်တဲ့ မီးလျှံလို့ ခေါ်မယ်။"

"ဂုဏ်ယူပါတယ် အကြီးအကဲ မင်ကျဲ့၊ မြင့်မြတ်တဲ့မီးလျှံကို ရရှိပြီး မဟာကျိုးကို ထာဝရပေါင်းစည်းခွင့်ရတဲ့အတွက် ဂုဏ်ယူပါတယ်။"

သူ၏လက်အောက်ငယ်သားများသည် ဤအခွင့်အရေးကို အခွင့်ကောင်းယူ၍ မြှောက်ပင့်ကြသည်။

အကြီးအကဲမင်ကျဲ့က သူ၏မုတ်ဆိတ်မွေးကို ကျေနပ်စွာ ပွတ်သပ်လိုက်သည်။

"ငါ့ရဲ့အမိန့်ကို ပြန်ပြီး လေနက်နတ်ဆိုးအစီအရင်ကို ထူထောင်လိုက်ပါ။ ငါတို့ ဖမ်းမိထားတဲ့ ဝိညာဉ်ကျောက်တုံးတွေအားလုံးကို ဖယ်ထုတ်လိုက်။ မဟာကျိုးဆီက လိုက်ဖမ်းသူတွေအားလုံးကို ဒီနေရာကနေ ဖမ်းလိုက်မယ်။ သူတို့ရဲ့ သွေးအနှစ်သာရကို အသုံးပြုပြီးရင် ငါ လုံးဝပြန်ကောင်းလာမှာပါ။ တစ်ချက်တည်းနဲ့ ငါ့ရဲ့ ဒဏ်ရာတွေနဲ့ အထွတ်အထိပ် ခွန်အားတွေ ပြန်ကောင်းလာမှာပဲ။"

"ဟုတ်တယ်။"

…

နန်းမြို့တော်ဘက်တွင် လုရှောင်ယန် တော်ဝင်နန်းတော်သို့ ပြန်ရောက်သောအခါ မိုးလင်းနေပေပြီ။

ကျီထျန်းရှို့၊ ကျီချင်ရှန်းနှင့် အခြားသူများ အတွက် မှတ်ညဏ် ပြောင်းရန် တစ်ညလုံးကို အသုံးပြုခဲ့ပြီး ၎င်းတို့ကို နာခံစေခဲ့သည်။

ထို့နောက် သူသည် ၎င်းတို့၏ ကျင့်ကြံဆင့်တိုးလာစေရန်အတွက် သိုင်းဘုရင်အဆင့်သွေးဆေးကို အသုံးပြုခဲ့သည်။

ဤနည်းအားဖြင့် တော်ဝင်နန်းတော်ခြောက်ခု၏ တိုက်ရိုက်ဆက်ခံသူများ ရှိခြင်းနှင့် ညီမျှသည်။

မဟာကျိုး ဧကရာဇ်မိသားစုအောက်တွင် တော်ဝင်နန်းတော် စုစုပေါင်း ဆယ့်နှစ်ခုရှိသည်။ ၎င်းတို့အနက် နှစ်ဦးမှာ လင်းဖေးဘက်ကဖြစ်သည်။ ကျန်လေးဦးမှာ ဧကရာဇ်မိသားစုအပေါ် သစ္စာစောင့်သိကြသည်။

မဟာကျိုး ဧကရာဇ်မိသားစု၏ စည်းမျဉ်းများအရ တော်ဝင်နန်းတော်ဆယ့်နှစ်ခုတွင် ရှစ်ခုက သဘောတူသရွေ့ ဧကရာဇ်မိသားစု၏ လက်ရှိအိမ်ရှေ့မင်းသားကို စိန်ခေါ်ရန် အရည်အချင်းပြည့်မီမည်ဖြစ်သည်။

အကယ်၍ စိန်ခေါ်မှု အောင်မြင်ပါက၊ သူသည် မဟာကျိုး၏ အိမ်ရှေ့စံမင်းသား ဖြစ်လာပြီး နောင်တွင် ထီးနန်းကို သိမ်းပိုက်မည်ဖြစ်သည်။

ဤသည်ကို မဟာကျိုး၏ဘိုးဘေး၏ အမြင်ရှိမှုဟုလည်း ယူဆနိုင်သည်။

သူ၏ဆက်ခံသူသည် မိသားစုတစ်စုတည်းသာ ကန့်သတ်ထားလျှင် မဟာကျိုး တစ်ခုလုံး ပြီးသွားလိမ့်မည်ကို သူသိသည်။

ထို့ကြောင့် သူသည် ဧကရာဇ်မိသားစုအား အခြားသူများက ပိုသာလွန်ခြင်းမှ ရှောင်ကြဉ်ရန် အလို့ငှာ ဤစည်းမျဉ်းကို ချမှတ်ခဲ့သည်။

တစ်ချိန်တည်းမှာပင်၊ ၎င်းသည် ၎င်း၏အခြားအားနည်းသော သွေးသားများအတွက် အိပ်မက်နှင့် အခွင့်အလမ်းကို ပေးဆောင်ခြင်းဟု ယူဆနိုင်သည်။

မည်သို့ပင်ဆိုစေကာမူ ၎င်းတို့အားလုံးသည် သူ၏အသွေးအသားမှ ဆင်းသက်လာကြသည်။ ဘယ်သူက ဧကရာဇ်ဖြစ်လာပါစေ သူ့အတွက် အတူတူပဲ မဟုတ်လား။

မဟာကျိုး အင်ပါယာတွင် အဆုံးမရှိသောသွေးများ ထောက်ပံ့ပေးနိုင်သရွေ့ မဟာကျိုး အင်ပါယာသည် ကျိန်းသေ ကြီးပွားလိမ့်မည် ။

ကျန်တော်ဝင်နန်းတော်နှစ်ခုသည် ပြဿနာကြီးကြီးမားမားမဟုတ်ကြောင်း လုရှောင်ယန်က ခံစားရသည်။ အဲဒါကို နောက်မှစဉ်းစားဖို့ သိပ်နောက်ကျမှာမဟုတ်ပါ။

ရှေးဟောင်း တားမြစ်နယ်မြေကို ဖွင့်လှစ်ပြီးနောက်ပိုင်းအတွက် နည်းလမ်းတစ်ခုကို တွေးတောနေခဲ့သည်။ လင်းဖေးကိုသတ်ပြီးနောက်၊ ရူယန်သည် ကျီဝူရှားနှင့် ပြဿနာရှာချင်သော်လည်း စိတ်ပူစရာမလိုပေ။

အနည်းဆုံးတော့ သူ၏လက်ရှိ ကွန်ရက်က နိမ့်ကျနေတာတော့ မဟုတ်ပေ။

အကယ်၍ ရူယန်သည် အထောက်အပံ့ရရန် ခေါ်နိုင်ခဲ့ပါက မည်သို့ဖြစ်မည်နည်း။

ဟုတ်ပါသည်၊ ဒါက အရေးကြီးဆုံး အရာတော့ မဟုတ်ပါ။ အရေးကြီးတာက လုရှောင်ယန်ဟာ မဟာကျိုး အင်ပါယာကို ဆက်ခံမယ့် ရွေးချယ်မှုအသစ်ရဲ့ ရလဒ်ကို ထိန်းချုပ်နိုင်ခဲ့ခြင်းပင်။

မဟာကျိုးသည် သူ၏ရုပ်သေးလက်ထဲသို့ ကျပြီးနောက် သူ လုံးဝ အနားယူနိုင်ပြီ။

ထိုအချိန်တွင် သူသည် အလိုရှိသရွေ့ နေထိုင်နိုင်သည်။

သူလုပ်ချင်တာကို လုပ်နိုင်သည်။

မိနစ်အနည်းငယ်လောက် စိတ်သက်သာရာရသွားသလို ကျီဝူရှင်းက သစ်သီးအဆာပြေတချို့နဲ့ ရောက်လာသညိ။

" အကြီးအကဲလု ရှိလား။"

"ငါဒီမှာ။ တံခါးက သော့ခတ်မထားဘူး။ ဝင်လာခဲ့။"

"ဟုတ်ကဲ့။"

နောက်အခိုက်အတန့်တွင် ကျီဝူရှင်းသည် တံခါးကိုတွန်းဖွင့်လိုက်တော့ သူ၏ပုံစံက လုရှောင်ယန်၏အကြည့်ထဲကို ရောက်သွားခဲ့သည်။

"မင်းသားကျီ၊ မင်းဒီကိုအစောကြီးရောက်နေတာ၊ ဘာကိစ္စရှိလို့လဲ။"

ကျီဝူရှင်းက တခစ်ခစ်ရယ်ပြီး "အကြီးအကဲလု၊ ဒါတွေက အပြင်ကနေ ပို့ပေးပြီးတဲ့ အသီးအနှံတွေပါ။ ငါ မင်းအတွက် ယူလာပေးခဲ့တယ်"

"ငါသိပြီ။ မင်းက ကြင်နာလွန်းတာပဲ။"

"ဒါက သဘာဝပဲလေ။ ခင်ဗျား ဝူရှားကို ကျင့်ကြံခြင်းနည်းလမ်းတွေကို သင်ပေးပြီး သူ့ကို ပြုစုပျိုးထောင်ပေးခဲ့တယ်။ အဲဒါက ငါတို့ရဲ့ ဧကရာဇ်နန်းတော်အတွက် ကြီးမားတဲ့ ကျေးဇူးပါ။ ခင်ဗျားရဲ့ အစားအစာတွေကို တော်ဝင်နန်းတော်က ကောင်းကောင်းဂရုစိုက်တာ သဘာဝကျပါတယ်။ ဒီအသီးလေးတွေက မပြောပလောက်ပါဘူး။"

လုရှောင်ယန်က သူ၏လက်ကို ဝှေ့ယမ်းလိုက်သည်။

"ကောင်းပြီ စည်းတွေခဏထားလိုက်ပါဦး။ မင်း မနက်စောစော အသီးအနှံတွေ လာပို့ဖို့တင် လာတာလား?"

ကျီဝူရှင်းက ကူကယ်ရာမဲ့ ပြုံးပြီး "အကြီးအကဲလု ပီသပါတယ်။ ကျုပ်ရည်ရွယ်ချက်ကို မြင်သားပဲ။"

"အမှန်အတိုင်းပြောရရင် ရှေ့တန်းမှာ တစ်ခုခုဖြစ်နေလို့ပါ…."

***

ပြိုင်ဘက်ကင်းအသန်မာဆုံးသခင်ကြီး

စာစဉ် ၁၀။ အခန်း ၁၄၀ မင်းငါ့ကိုအရင်လာပြောင်တာ..

"ဟုတ်လား။"

လုရှောင်ယန်သည် မျက်ခုံးပင့်တင်လိုက်သည်။

အကြီးအကဲမင်ကျဲ့က အဲဒီလောက် အစွမ်းထက်ခဲ့တာလား။

နန်းမြို့တော်ဘက်တွင် ဧကရာဇ်အဆင့် ကျွမ်းကျင်သူ နှစ်ဦးနှင့် ဘုရင်အဆင့် ကျွမ်းကျင်သူ အနည်းငယ်ရှိသည်။ ဒါတောင် တဖက်လူက အားသာချက်ရှိတာလား။

နှစ်ဖက်စလုံးတွင် ဧကရာဇ်အဆင့် ကျွမ်းကျင်သူများရှိသည်။ တဖက်လူ ဒီလို အင်အားကြီးနိုင်ပါ့မလား။

သို့သော်… သေသေချာချာ စဉ်းစားကြည့်ပြီးနောက်တွင်တော့ မဖြစ်နိုင်ဟု ထင်ရသည်။

အကြီးအကဲ မင်ကျဲ့ သည် အသက်ကြီးနေပြီဖြစ်သည်။ သူ့မှာ ခွန်အားတွေ အများကြီး မရှိနိုင်ပါ။ ကံကြမ္မာကလည်း သူ့ကို ဂရုစိုက်ဖို့ မဖြစ်နိုင်ပြန်ပေ။

တကယ်တမ်းအကြောင်းကတော့ အကြီးအကဲမင်ကျဲ့သည် သူ၏ ကျင့်ကြံဆင့်ကို တမင်တကာ ဖိနှိပ်ခဲ့ခြင်းကြောင့် ဖြစ်သည်။ သူ၏ လက်တွေ့ ကျင့်ကြံဆင့်မှာ အနည်းငယ် မြင့်မားသည်။ ထို့ကြောင့် တိုက်ပွဲတွင် အခြေအနေကို ပြောင်းပြန်လှန်နိုင်ခဲ့သည်။

ဒီကမ္ဘာကြီးက တကယ်ကို အန္တရာယ်များလွန်းသည်။

ထိုလူသည် လုရှောင်ယန်ထက် သူ၏ ကျင့်ကြံဆင့်ကို ဖုံးကွယ်ထားရာတွင် ပိုကောင်းသည်။

"အကြီးအကဲ။ ခမည်းတော်ကို အရမ်းစိတ်ပူတယ်။ ရှေ့တန်းကို သွားချင်တယ်။"

ကျီဝူရှင်းက စိုးရိမ်သောကဖြင့် ပြောလိုက်သည်။

လုရှောင်ယန်က ခေါင်းညိတ်ပြပြီး အံ့အားသင့်သွားသည်။

ဒီကလေးက မဆိုးပါဘူး။ သူသည် ဉာဏ်မမီသော်လည်း အနည်းဆုံးတော့ သိတတ်သည်။

"မင်းသွားတာကို ငါသဘောမတူဘူး။ ဘာပဲပြောပြော မင်းရဲ့ ကျင့်ကြံဆင့်အားနည်းလွန်းတယ်။ မင်းသွားရတာ အရမ်းအန္တရာယ်များလိမ့်မယ်။"

ကျီဝူရှင်းက ခပ်ဖျော့ဖျော့ ပြုံးလိုက်ပြီး "အကြီးအကဲပြောတာကို ကျွန်တော်သိတယ်။ ဒါကြောင့် အကြီးအကဲကို လိုက်စေချင်တယ်။ ကျွန်တော်တို့နှစ်ယောက်တင်မကဘူး။ တော်ဝင်နန်းတော်က ကျွမ်းကျင်သူတချို့ကိုလည်း ကျွန်တော်တွေ့ခဲ့တယ်၊ ဒါ့ထက် ကျွန်တော်က အကြီးစား လျော်ကြေးငွေ ပေးမှာ ဖြစ်ပြီး ခင်ဗျားကို ဖိနှိပ် ဆက်ဆံမှာ မဟုတ်ဘူး။”

လုရှောင်ယန် က စကားမပြောနိုင်ခင် ခဏလောက် နှုတ်ဆိတ်နေသည်။

"မင်းငါ့ကိုဘယ်လောက်ပေးမှာလဲ။"

"အမ်... အဆင့်နိမ့် ဝိညာဉ်ကျောက်တုံး ၁၀၀,၀၀၀ လောက်ရလား။ ကွန်တော်က လူတော်တော်များများအတွက် ပေးချေဖို့တာဝန်ယူထားရတာဆိုတော့ ဝိညာဉ်ကျောက်တုံးတွေ အများကြီး ပေးလို့ရတယ်။"

လုရှောင်ယန် တိတ်ဆိတ်သွားပြန်သည်။

ဒီအချိန်မှာ ကျီဝူရှင်းဟာ သူ၏အသိဉာဏ်ကို ဖုံးကွယ်နေတယ်လို့ ရုတ်တရက် ခံစားလိုက်ရသည်။

အဆင့်နိမ့် ဝိညာဉ်ကျောက်တစ်သိန်းသည် ဘာပဲပြောပြော အဆင့်မြင့်ဝိညာဉ်ကျောက်တစ်ထောင်သာ ဖြစ်သည်။ အဆင့်မြင့်သော ဝိညာဉ်ကျောက်တုံးတစ်ထောင်အကြောင်း ပြောမည့်အစား ကိန်းဂဏာန်းများကို ပုံကြီးချဲ့ရန်အတွက် အဆင့်နိမ့် ဝိညာဉ်ကျောက်တစ်သိန်းဟု အမှန်တကယ်ဆိုခဲ့သည်။

ဂရုမစိုက်မိရင် အရူးဖြစ်လိမ့်မည်။

"ဝူရှင်း၊ ဒါက ပိုက်ဆံကိစ္စမဟုတ်ဘူး။ အဓိကပြဿနာက ငါ့ရဲ့ ကျင့်ကြံဆင့်က အရမ်းနိမ့်နေတာ။ ငါသွားရင် ငါသေလိမ့်မယ်။"

"အကြီးအကဲ ခင်ဗျားက နောက်ပြောင်တတ်တာပဲ။"

ထိုစကားကြောင့် ကျီဝူရှင်းသည် ပတ်ပတ်လည်ကို လှည့်ကြည့်ကာ အနီးနားတွင် တစ်ယောက်မျှမရှိသည်ကို တွေ့လိုက်ရသဖြင့် "အကြီးအကဲ၊ ခင်ဗျားက ကိုယ့် ကျင့်ကြံဆင့်ကို ဖုံးကွယ်နေတာ ငါသိတယ်။ ကျုပ်ညီမရဲ့ ကျင့်ကြံဆင့်အဆင့်က တောင်ပင်လယ်အဆင့်မှာ ရှိတယ်။ ခင်ဗျား ဘယ်လောက်ပဲ အားနည်းနေပါစေ၊ ခင်ဗျားက စိတ်ဝိညာဉ်သန့်စင်ခြင်းအဆင့်လောက်မှာတော့ ရှိနေသင့်တယ်။ ဘယ်လိုပဲဖြစ်ဖြစ် ခင်ဗျားက ကျုပ်ထက် အများကြီး ပိုသန်မာတယ်။"

လုရှောင်ယန်က သူ့ကို စိုက်ကြည့်နေသည်။

"မင်းပြောတာမှန်တယ်။ မင်းငါ့အပေါ်အရမ်းကောင်းတာမြင်တော့ မင်းပိုက်ဆံတောင်မယူသင့်ဘူး။ ငါမင်းကိုအဲဒီကိုအလကားလိုက်ခဲ့သင့်တယ်။ တစ်ချိန်တည်းမှာပဲ ငါ့တပည့်တွေကိုလည်းခေါ်ခဲ့သင့်တယ်။ မင်းအဖေဆီ ခေါ်သွားဖို့ မင်းရဲ့ နန်းမြို့တော် ပညာရှင်အဖွဲ့ကြီးကို ငှားပြီး ကူညီပေးနိုင်တယ်။"

ကျီဝူရှင်း၏ မျက်လုံးများ ပြူးကျယ်သွားသည်။

"အကြီးအကဲ ခင်ဗျား လာနောက်နေတာလား။"

"မင်းက ငါ့ကို အရင်နောက်ပြောင်ခဲ့တာပဲ။"

ဝိညာဉ်ကျောက်တုံးတစ်ထောင်တည်းနှင့် မင်းနဲ့အတူ တစ်ယောက်ယောက်ကို သေစေချင်သလား။ မင်း အရှက်မရှိတာ သေချာတယ်။

ကျီဝူရှင်းက မျက်မှောင်ကြုတ်ကာ ပြောသည် " အကြီးအကဲ၊ ကျွန်တော် အဖေ့ကို တကယ် ကယ်ချင်နေတာ။ ငါ့မှာ ပိုက်ဆံအများကြီး မရှိဘူး၊ ငါ့မှာ ဒီထက်ပိုများရင် မင်းကို ငါ သေချာပေါက် ပေးမယ်။"

လုရှောင်ယန် သူ၏လက်ကို ဝှေ့ယမ်းလိုက်သည်။

"ဒါက ငွေနဲ့မဆိုင်ပါဘူး။ မင်းရဲ့ ကျင့်ကြံဆင့်က အားနည်းလွန်းတယ်။ မင်းသွားရင်တော့ သေချာပေါက် သေလမ်းရှာတာပဲ။ မင်း တခြားသူတွေ ဖမ်းမိသွားရင် မင်းအဖေလည်း အာရုံလွဲသွားမှာ။ ဒါကြောင့် မင်းဧကရာဇ်နန်းတော်မှာ စောင့်နေတာ အကောင်းဆုံးပဲ။ "

"ဒါဆို...ကောင်းပြီ"

ကျီဝူရှင်းက လက်မခံချင်ပေ။ သို့သော် လုရှောင်ယန်က မသွားချင်သောကြောင့် သူဘာမှ မတတ်နိုင်ပေ။

သူထွက်သွားပြီးနောက် လုရှောင်ယန် မကူညီနိုင်ဘဲ မျက်မှောင်ကြုတ်ပြန်သည်။

"ဒီ အကြီးအကဲမင်ကျဲ့က အတော်လေးကို ထူးထူးခြားခြား ဖြစ်နေပုံရပြီး ကိုင်တွယ်ရ အတော်လေး ခက်ခဲပုံရတယ်။ ဒီလိုဆိုရင်တော့ ကျီဝူရှန် အန္တရာယ် ကျရောက်နိုင်တယ်။ သူ့ကို စိတ်ဝိညာဉ်သန့်ရင်ခြင်း စတုတ္ထအဆင့်ကို ရောက်အောင် လုပ်ပေးခဲ့ရတာ မလွယ်ဘူး ဒါ့အပြင် သူ့ကို သိုင်းဘုရင်အဆင့်သွေးဆေးလုံးတောင် ပေးခဲ့သေးတယ်။ သူသာ အသတ်ခံလိုက်ရရင် အရမ်းဆိုးမှာ မဟုတ်ဘူးလား။"

ဒါပေမယ့် ဟို အကြီးအကဲမင်ကျဲ့က အမှန်တကယ် အစွမ်းထက်လွန်းတယ်။ အကယ်၍ သူသာ အလျင်စလို သွားပါက၊ သူက အကြီးအကဲမင်ကျဲ့အတွက် အတွေ့အကြုံကို စုဆောင်းရန် ကူညီပေးသလိုမျိုးဖြစ်သွားမယ်။

“မေ့လိုက်ပါ၊ ငါ နှစ်ရက်လောက် စောင့်ပြီး ကြည့်မယ်။ ဘာပဲဖြစ်ဖြစ် ကျီဝူရှန် ခန္ဓာကိုယ်မှာ ငါချထားတဲ့ အမှတ်အသားက အပြောင်းအလဲမရှိသေးဘူး။ မနက်ဖြန်လောက် ကျီဝူရှန် ပြန်လာရင် လာနိုင်တာပဲ။”

ထိုသို့တွေးပြီး လုရှောင်ယန်သည် တရားထိုင်ပြန်ပြီး သူကျင့်ကြံခြင်းနည်းလမ်းကို စတင် ကျင့်ကြံခဲ့သည်။

ထို့နောက်…

တစ်ရက်ကုန်သွားသော်လည်း ကျီဝူရှန် ပြန်မလာသေးပေ။

…

နှစ်ရက်ကြာသွားသော်လည်း ကျီဝူရှန် ပြန်မလာသေးပေ။

…

သုံးရက်မြောက်သောနေ့တွင် ကျီဝူရှန် ပြန်မလာသေးပေ။

ယင်းကြောင့် လုရှောင်ယန် အနည်းငယ် ငြိမ်ငြိမ်မထိုင်နိုင်ဖြစ်သွားသည်။

အဘယ်ကြောင့်ဆိုသော် ကျီဝူရှန်၏ ခန္ဓာကိုယ်ရှိ အမှတ်အသားသည် ပြောင်းလဲသွားသည်ကို သူခံစားလိုက်ရသောကြောင့်ဖြစ်သည်။

အစပိုင်းမှာတော့ ဒါဟာ ဖြည်းဖြည်းချင်း ရွေ့လျားနေတဲ့ ကားတစ်စီးလို သေးငယ်တဲ့ တုံ့ပြန်မှုတစ်ခုပါ။ ထို့နောက် ကားအရှိန်မြှင့်လိုက်သကဲ့သို့ အမှတ်အသား၏ အတက်အကျသည် လျင်မြန်စွာ မြင့်တက်လာသည်။ အခုတော့ ကားက အရူးလို အရှိန်မြှင့်နေတဲ့ နေရာကို ရောက်နေပါပြီ။

"မဟုတ်သေးဘူး၊ ဒီအတက်အကျက ပိုကြီးလာတယ်။ ကျီဝူရှန်အတွက် ပြီးသွားလား။ ငါ မြန်မြန် သွားကြည့်ရမယ်။"

လုရှောင်ယန်အနေနှင့် ရုပ်သေးကို ပြုစုပျိုးထောင်ရန် မလွယ်ကူပေ။ တစ်ဖက်သားမှာ လွယ်လွယ်နဲ့ အသတ်ခံရရင် သူ့မှာ အကြီးအကျယ် နစ်နာသွားလိမ့်မည်။

ထို့ကြောင့် လုရှောင်ယန်သည် စစ်မှန်သောအမြင်အာရုံသုံးပါးကို ချက်ချင်းအသုံးပြုခဲ့သည်။

စစ်မှန်သောအမြင်အာရုံသုံးပါး ဖြင့် ကြီးမြတ်သောအာကာပြင်ပြိုကွဲခြင်းခြေလှမ်းကို စုပ်ယူပြီးနောက် လုရှောင်ယန်သည် အရှိန်ပြင်းပြင်းဖြင့် ရွေ့လျားနိုင်စွမ်းရှိနေပြီဖြစ်သည်။

…

တစ်ဖက်တွင် နန်းမြို့တော်မှ ကီလိုမီတာ ထောင်ချီဝေးသည်။

ကျီဝူရှန်နှင့် အခြားသော တော်ဝင်နန်းတော် တပည့်များအားလုံး နတ်ဆိုးကျင့်ကြံသူများ၏ နေရာများတွင် ပိတ်မိနေခဲ့သည်။ သူတို့သည် အံကြိတ်ကာ သည်းမခံနိုင်တော့ပေ။

ဤနတ်ဆိုးအစီအရင်တွင်၊ ၎င်းတို့၏ကျင့်ကြံဆင့်အား ဖိနှိပ်ခံခဲ့ရပြီး ၎င်းတို့၏ပုံမှန်ခွန်အားကို မထုတ်နိုင်ခဲ့ပါ။

အကြီးအကဲမင်ကျဲ့၏လက်အောက်ငယ်သားများအတွက် လုရှောင်ယန်၏ တိုက်ခိုက်မှုကိုကြုံတွေ့ပြီးနောက် ကျန်သူများသည် ကျွမ်းကျင်သူများဖြစ်သည်။

ထို့အပြင်၊ အကြီးအကဲမင်ကျဲ့သည် လုရှောင်ယန် သတ်ပစ်ခဲ့သော နတ်ဆိုးကျင့်ကြံသူများ၏ အာဟာရများကိုလည်း ဝါးမျိုခဲ့သည်။ သူသည် သူတို့၏သွေးအနှစ်သာရ၊ နာကြည်းမှုရောင်ဝါ၊ ညစ်ညမ်းသောရောင်ဝါ၊ သွေးအနှစ်သာရကို စုပ်ယူခဲ့သည်...

ထို့ကြောင့် နှစ်ဖက်အကြား ခွန်အား ကွာခြားချက်မှာ ကောင်းကင်နှင့်မြေကြီးသဖွယ် ခြားနေပါသည်။

ဧကရာဇ်အဆင့် ကျွမ်းကျင်သူနှစ်ယောက်နှင့် ဘုရင်အဆင့် ကျွမ်းကျင်ပညာရှင် အနည်းငယ်အတွက်ကတော့ တိမ်တွေထက်မှာ အပြင်းအထန် တိုက်ပွဲဝင်နေကြပါပြီ။ ကျီဝူရှန်နှင့် တခြားသူတွေကို ကယ်တင်ဖို့ သူတို့မှာ အချိန်မရှိနေပေ။

ကျီဝူရှန် က အံကို တင်းတင်းကြိတ်လိုက်ပြီး ကောင်းကင်ကို စိုက်ကြည့်ရင်း သူ၏မျက်လုံးထဲတွင် စိတ်ပျက်မှုများ ပြည့်နေသည် ။

ဤအခိုက်အတန့်တွင် သူ၏အကြီးအကဲ ပြပေးခဲ့သော သိုင်းဘုရင်အဆင့်ကျင့်ကြံခြင်းနည်းလမ်းရှိလျှင်ပင် ကူကယ်ရာမဲ့ဖြစ်နေဆဲဖြစ်သည်။

နောက်ဆုံးတွင်၊ တိုက်ပွဲနတ်ဘုရားအနုပညာသည် အရန်ကျင့်ကြံခြင်းနည်းလမ်းတစ်ခုဖြစ်သည်။ ကျင့်ကြံဆင့်တိုးဖို့အတွက် ကောင်းပါသည်။ သို့သော်လည်း တိုက်ပွဲတစ်ခုတွင် ၎င်း၏ စွမ်းအားကို မြှင့်တင်ရန်အတွက်က အဆက်မပြတ် တိုက်ပွဲဝင်ရမည်ဖြစ်သည်။ တစ်ဖက်တွင်မူ ခုခံခြင်းသည် အသုံးမဝင်ပေ။

" အကြီးအကဲလု ၊ ငါက အသုံးမကျဘူး။ ငါအသတ်ခံရတော့မယ်။"

ကျီဝူရှန်က သူ၏နှလုံးသားထဲမှာ ဝမ်းနည်းပူဆွေးမှုတွေနှင့် ဒေါသတကြီး အော်ဟစ်သည်။ သူ့ဝိညာဉ်သည် ပို၍ပင် နတ်ဆိုး အငွေ့အသက်များ ကူးစက်ခံနေရပြီး ပြိုလဲတော့မည်ကို သူခံစားမိသည်။

တိမ်တွေထက်မှာ မီးလုံးပေါင်းများစွာ ကွဲထွက်ပြီး တိုက်မိနေခဲ့သည်။ တိုက်မိတိုင်း တိမ်တွေက ပေါက်ကွဲပြီး ကောင်းကင်မှာ အပြာရောင် စက်ဝိုင်းကြီး ပေါ်လာသည်။

ခဏအကြာတွင် အလင်းရောင်သည် တဖြည်းဖြည်း ရပ်တန့်သွားသည်။ ထိုမှသာ လူတိုင်း၏ ရုပ်ပုံများသည် တိမ်တိုက်များမှ တဖြည်းဖြည်း ပေါ်လာသည်။

"ကျစ်..ကျစ်...မဟာကျိုး ဧကရာဇ်မိသားစုက ဒီအဆင့်ပဲရှိတော့ ဘယ်လောက်စိတ်ပျက်စရာကောင်းလဲ။"

စကားပြောသူသည် အကြီးအကဲမင်ကျဲ့မှလွဲ၍ အခြားသူမဟုတ်ပေ။

လက်တစ်ဖက်တွင် အဖြူရောင်ကျောက်စိမ်းကြွေပုလင်းကို ကိုင်ထားပြီး ကျန်လက်တစ်ဖက်ကို ကျောနောက်တွင်ပစ်ကာ လေထဲတွင် ဂုဏ်ယူစွာ ရပ်နေလေသည်။ သူသည် ပတ်ဝန်းကျင်ကို လမ်းကြုံအလည်လာသော ထူးထူးခြားခြား ဉာဏ်ရည်ထက်မြက်သော ပညာရှင်တစ်ယောက်ကဲ့သို့ပင်…..