အခန်း (၇၇၇-၇၈၀)

အခန်း ၇၇၇ ဦးနှောက်ကြီး ဖွံဖြိုးတိုးတက်လာခြင်း

မရေမတွက်နိုင်သော ပင်လယ်ရေသည် ၎င်း၏လမ်းကြောင်းမှ ရွေ့လျားသွားသည်။ ဧရာမ သတ္တဝါကြီး၏ ခြေလှမ်းတိုင်းသည် ပင်လယ်ပြင်ပေါ်တွင် ဧရာမလှိုင်းလုံးများကို ဖန်တီးပေးနေသည်။

ခြေလျင်လျှောက်သွားသည့် နေရာတိုင်း တိတ်ဆိတ်သွားကာ လှိုင်းလုံးများသာ ဆက်လက်ပြန့်နှံ့သွားသည်။

“အစီရင်ခံပါတယ်... အစီရင်ခံပါတယ်... ဧရာမသတ္တဝါကြီးတစ်ကောင်က အရှေ့ပင်လယ်ကမ်းရိုးတန်းကို ချဉ်းကပ်လာနေတယ်”

ကမ်းရိုးတန်းစောင့်တပ်သားများသည် အချက်ပေးသံနဲ့ အော်ဟစ်ပြီး အခြေအနေကို ရေဒီယိုမှ တဆင့်အမြန်သတင်းပို့လိုက်ကြသည်။

“ရပ်တန့်ဖို့ ကြိုးစားနိုင်မလား”

ဤကင်းသမားသည် မီတာတစ်သောင်းမြင့်သော ဧရာမကြီးသတ္တဝါကြီးကို တိတ်ဆိတ်စွာ ကြည့်မိလိုက်သည်။

မီတာတစ်သောင်းဆိုတာ ဘာကို ဆိုလိုတာလဲ... ဧဝရတ်တောင်သည် ၈၈၄၈ မီတာမြင့်သော်လည်း ၎င်းသည် ပင်လယ်ရေမျက်နှာပြင်အထက် အမြင့်ပေသာဖြစ်သည်။ ဧဝရတ်တောင်ခြေမှာ ရပ်ပြီး တောင်ထိပ်ကိုကြည့်ဖို့ ခေါင်းကို မော့လိုက်တဲ့အခါ သင်မြင်ရသည့် တောင်ထိပ်က မီတာ ၈၀၀၀ လောက်မြင့်သာမြင့်သည်။

ဤပင်လယ်သတ္တဝါကြီး၏ အမြင့်ကတော့ တစ်ခုနှင့်တစ်ခု ထပ်ထားသည့် ဧဝရတ်တောင် နှစ်ခုနှင့် ညီမျှသည်။

ပြောစရာမလိုအောင်ပင် ဤနေရာတွင် ရပ်နေသော ၎င်း၏ ခန္ဓာကိုယ်အရွယ်အစားက ကြီးမားသော ဖိနှိပ်ချုပ်ချယ်မှုကို ခံစားရစေသည်။

ကြီးမားသော အရိပ်ကြီးသည် အမှောင်ထုကိုဖြစ်စေပြီး ကမ်းရိုးတန်းတစ်ဝိုက်ရှိ ဒေသတစ်ခုလုံးကို အရိပ်ဖြင့် ဖုံးအုပ်ထားသည်။

“သတင်းပို့ပါတယ်... ရပ်တန့်လို့ မရနိုင်ပါဘူး”

ပင်လယ်ရေမျက်နှာပြင်ပေါ်တွင် ပြေးလွှားလှုပ်ရှားနေသည့် ထိပ်တန်းသားရဲကြီသည် ကမ်းရိုးတန်းရှိ ကာကွယ်ရေးလမ်းကြောင်းကို လျစ်လျူရှုလိုက်သည်

ရှေ့သို့ ခြေတစ်လှမ်းတိုးလိုက်လျှင်ပင် မီတာထောင်ပေါင်းများစွာ တိုးလာသည်။

သူသည် အရှေ့ပင်လယ်မှ ယွိကျိုးသို့ ခြေလှမ်းပေါင်း သောင်းနှင့်ချီသာ သွားရသည်။

ဧရာမပင်လယ်ကြီးသည် ရှေ့သို့ တိုးလာသည်။

ခြေလှမ်းတိုင်းသည် မြစ်မျက်နှာပြင်ပေါ်၌ လှိုင်းလုံးကြီးများကို ပေါက်ကွဲသွားစေသည်။

မိုးခြိမ်းတိမ်တိုက်များက ပင်လယ်ကြီးကို ဝိုင်းရံထားပြီး မိုးရွာချလိုက်သည်။

အနီရောင်သတိပေးချက်များသည် ယွိကျိုးသို့ ရောက်ရှိလာသည်။

တောက်ပသော သတိပေးမီးများနှင့် ဥသြသံများက ညကောင်းကင်ကို ထိုးဖောက်ဝင်ရောက်ကာ ယန်ဇီမြစ်ကမ်းနားရှိ အနီရောင်မျဉ်းသည် နိုးထလာသော နဂါးတစ်ကောင်နှင့်တူနေသည်။

“သတိပေးချက် - ခွန်အားကို အကဲဖြတ်ခြင်း၊ အနည်းဆုံး အရှင်သခင်၏ အထွတ်အထိပ်... သူတော်စင်၏ ကနဦးအဆင့်... သူတော်စင်အဆင့်၏နှောင်းပိုင်းအဆင့်သည် ယွိကျိုးအနီးသို့ ရောက်ရှိနေပြီဖြစ်သည်။ ယွိကျိုး ပြည်သူများ ကျေးဇူးပြု၍ ဗုံးခိုကျင်းများထဲသို့ဝင်ပါ”

ကောင်းဖန်သည် မျက်မှောင်ကြုတ်ကာ အရှေ့ကို လှမ်းကြည့်လိုကိသည်။ အရှေ့တွင် တောင်တွေ ရှိနေပြီး နေရောင်က တောက်ပနေသည်။

သွေးစာချုပ်မှတစ်ဆင့် ကောင်းဖန်သည် ဦးနှောက်ကြီး၏ရောင်ဝါနှင့် အလွန်နီးစပ်သည့် ရင်းနှီးသော ရောင်ဝါကို ခံစားလိုက်ရသည်။

ခဏငြိမ်သက်ပြီးနောက် ကောင်းဖန်သည် ရုတ်တရက် မျက်တောင် တစ်ချက်ခတ်လိုက်သည်။ သူ စိတ်ရှုပ်သွားသည်။

လောလောဆယ် ယွိကျိုး အခြေစိုက်စခန်း၌ လုံခြုံရေးနှင့် ကာကွယ်ရေးဌာန ရှိသည်။

ထိုဌာနက ကမ္ဘာပျက်ကပ်ပြီးနောက် အာရှနိုင်ငံများစွာနှင့် ဘဏ္ဍာရေးအုပ်စုများက ဖန်တီးထားသော ဌာနတစ်ခုဖြစ်သည်။

ဘေးကင်းရေးနှင့် ကာကွယ်ရေးဌာနသည် သားရဲများကျူးကျော်ဝင်ရောက်မှုကို ကာကွယ်ရန် တာဝန်ရှိသည်။ ယန်စီမြစ်ကမ်းနားရှိ သတိပေးစနစ်ကို ၎င်းတို့က ထူထောင်ထားခဲ့ခြင်းဖြစ်သည်။

ဟွာရှားမျိုးနွယ်စု တည်ရှိမှုကြောင့် ယွိကျိုးအခြေစိုက်စခန်း၏ အာဏာပိုင်ဌာနများကို ဟွာရှားလူမျိုးများက ထိန်းချုပ်ထားသည်။ သို့သော် လူမျိုးကြီးများအား လေးစားမှုကို ပြသရန်နှင့် ၎င်းတို့ကို နှုတ်ဆိတ်စေရန် ဟွာရှားမျိုးနွယ်စုသည် ဤသည်ကို အမည်ခံဌာနမျှသာဆောင်ရွက်ပြီး လုပ်ဆောင်မှုအနည်းငယ်သာရှိသည်။

ပြင်ပလူများ၏အမြင်တွင်တော့ ဤဌာနသည် ကြီးမားသောလုပ်ဆောင်ချက်ရှိသည်။ ၎င်းသည် သားရဲ၏ကျူးကျော်မှုကို ကာကွယ်နိုင်သည်။ လက်တွေ့တွင် ပိုမိုရှင်းလင်းပြတ်သားသည့် လုပ်အားခွဲဝေမှုဖြင့် လုပ်ငန်းဆောင်တာများနှင့် ထပ်တူကျသော ဌာနများစွာရှိသည်။

ထို့ကြောင့် ဘေးကင်းရေးနှင့် ကာကွယ်ရေးဌာနသည် ကြီးမားသော ပရောဂျက်မျိုးစုံကို အေးအေးဆေးဆေးပင် စတင်ခဲ့သည်။ နောက်တစ်ခုက ဌာနဆိုင်ရာ ဝန်ထမ်းတွေအားလုံးသည် အာရှတိုက်မှာရှိတဲ့ ငွေကြေးအဖွဲ့တွေနဲ့ နိုင်ငံပေါင်းစုံရဲ့ အမှုဆောင်အရာရှိတွေ ဖြစ်ကြပြီး ငွေကြေးလုပ်အားများအရ မချို့တဲ့ကြပေ။

၎င်းတို့စတင်ခဲ့သည့် ပထမဆုံးသော ပရောဂျက်ကြီးများကလည်း ကြီးမားသည်။ ယန်ဇီမြစ်နှင့် မြစ်ဝါမြစ်တစ်လျှောက် အချက်ပေးစနစ်၊ အာရှကမ်းရိုးတန်းကာကွယ်ရေးလိုင်းများ၊ ဝူလုံတောင်တန်းဒေသ မိုးကောင်းကင် အလင်းစနစ်များ စသည်တို့ဖြစ်သည်။

အထူးခြားဆုံးမှာ ဝူလုံတောင်တန်းဒေသ ကောင်းကင်အလင်းစနစ်ဖြစ်သည်။

သားရဲများကို လှပသော ညကောင်းကင်တစ်ခု ပေးသည့် အနေဖြင့် ပြုလုပ်ခဲ့ခြင်းဖြစ်သည်။ ညတိုင်း ကောင်းကင်မှာ အလင်းရောင်များစွာ လွင့်ပျံနေပြီး ကြယ်တွေလို မှိတ်တုတ်မှိတ်တုတ်နှင့် ဖြစ်အောင် လုပ်ထားခြင်း ဖြစ်သည်။

လက်ရှိတွင် လုံခြုံရေးနှင့် ကာကွယ်ရေးဌာနအတွင်း အရာရှိအများအပြားသည် အစည်းဝေးခန်းတစ်ခု၌ အစည်းအဝေး ကျင်းပနေကြသည်။

သူတို့ရှေ့က ဖန်သားပြင်ပေါ်မှာ ဒရုန်းတစ်စင်းရဲ့ ဗီဒီယိုဖိုင်ကို ဖွင့်ထားသည်။

ဒါပေမယ့် အမြင့်ကြောင့် ကောင်းကင်မှာ မီတာတစ်သောင်း ပျံသန်းနေသည့်ဒရုန်းသည် ပင်လယ်သားရဲကြီး၏ ဦးခေါင်းကိုသာ ရိုက်ကူးထားနိုင်သည်။ တိမ်များသည် ဧရာမသားရဲကြီး၏ ခန္ဓာကိုယ်ကို ဖုံးအုပ်ထားသည်။

“ဒီကောင်က တကယ်ကြီးပဲ”

“ဒီသားရဲကို ကြားဖြတ်ကိုင်တွယ်ဖို့ တပ်တစ်ဖွဲ့ လွှတ်လိုက်ရအောင်... ယွိကျိုးမြို့ထဲကိုဝင်ရင် အသေအပျောက် အများကြီးရှိလိမ့်မယ်”

“ဒီကောင်က အရမ်းသန်မာတယ်.. အဲဒါက ဒဏ္ဍာရီဆန် သူတော်စင်အဆင့် သားရဲပဲ..ဟွာရှားက လူတွေဆီမှာ ငါတို့ စိတ်ကူးထားတာထက် ပိုကောင်းတဲ့ဖြေရှင်းနည်းတွေရှိတယ်... သူတို့ ဂရုစိုက်ကြပါစေ”

“ဒါပေမယ့် ငါတို့မြို့မှာ နိုင်ငံသားတွေ ရှိတယ်လေ”

“အား.. ခွေး**... အဲဒါ တော်တော်ဒုက္ခပေးတာပဲ”

“ဒါပေမယ့် ကျွန်တော်တို့အဲဒီလိုမလုပ်သင့်ဘူးလား”

အငြင်းအခုံတွေ ခန်းမထဲမှာ ဖြစ်နေကြသည်။

ဒါပေမယ့် တူညီတာတစ်ခုကတော့ ဟွာရှားတွေ အရှက်ရသွားတာကို မြင်ချင်ကြသည်။ ကမ္ဘာကြီးသည် လက်ရှိအခြေအနေဖြစ်လာပြီးနောက် လူအချို့သည် အခြားသူများကို မကောင်းသော အကြံအစည်များ ရှိလျှင်ပင် ဤကဲ့သို့ လူသိရှင်ကြား ထုတ်ဖော်ပြောဆိုခြင်းမျိုးတော့ မပြုဝံ့ကြပေ။

လူသားများသည် အလွန်ထူးဆန်းသော သက်ရှိများဖြစ်ကြသည်။ သူတို့သည် အကန့်အသတ်ရှိတဲ့ အရင်းအမြစ်တွေအတွက် တစ်ယောက်ကို တစ်ယောက် အသေသတ်နိုင်ပေမယ့် ဘုံရန်သူနဲ့ ရင်ဆိုင်ရတဲ့အခါမှာတော့ တစ်ယောက်ကိုတစ်ယောက် မကြိုက်ကြရင်တောင် ဒါမှမဟုတ် အတိတ်က တစ်ယောက်ကိုတစ်ယောက် သတ်ဖို့ကြိုးစားနေခဲ့ရင်တောင် မဆိုင်းမတွ စုစည်းနိုင်ကြသည်။

“သွားကြစို့..ငါတို့ရဲ ဦးနှောက်ကြီးကို လက်ခံရတော့မယ်..” ကောင်းဖန်က ခြင်္သေ့ဖြူကိုခေါ်ပြီးပြောလိုက်သည်။

မြစ်ကမ်းတစ်လျှောက် ကျယ်လောင်သော အချက်ပေးသံအားလုံးကို မြင်လိုက်ရတော့ ဦးနှောက်ကြီးသည် တုန်လှုပ်ချောက်ချားစရာကြီး ဖြစ်မည်ကို သူသိလိုက်ရသည်။

ခြင်္သေ့ဖြူ၏ ခန္ဓာကိုယ်သည် ၃ မီတာရှည်သော အရွယ်အစား ဖြစ်လာသည်။ ဤအရွယ်အစားသည် ကောင်းဖန်ထိုင်ရန်အတွက် အသင့်တော်ဆုံးဖြစ်သည်။ ကောင်းဖန်၏ခြေထောက်ကို ဘေးနှစ်ဖက်အပေါ်တွင် ကောင်းစွာဆွဲထားနိုင်ပြီး ပြုတ်ကျမည်ကို စိုးရိမ်စရာမလိုပေ။

ခြင်္သေ့ဖြူသည် ၎င်း၏ ခြေထောက်ကို ဆောင့်လိုက်သောအခါ ၎င်း၏ခြေရင်းအောက်ရှိ မြစ်ရေသည် ချက်ချင်းပင် ကျွန်းငယ်လေးတစ်ခုသို့ အေးခဲသွားသည်။ ခြင်္သေ့ဖြူသည် ရေခဲပြင်ပေါ်မှ ပြေးသွားသည်။

မကြာမီတွင် မြစ်ပေါ်တွင် မျောပါနေသော ရေခဲများကို ဧရာမလှိုင်းလုံးကြီးများကရိုက်ချသွားသည်။

“ဒီကောင်ကြီး ရပ်သွားပြီထင်တယ်”

“တစ်ခုခု ကြံစည်နေတာလား”

“အင်း... ကြည့်ရတာ ကျုံ့သွားသလိုပဲ”

အဝေးထိန်းစနစ်အောက်မှ ဒရုန်းသည် လျင်မြန်စွာ ဆင်းသက်လာပြီး တိမ်တိုက်များက ၎င်းကို ကျော်ဖြတ်သွားသည်။

ယန်စီမြစ်လယ်တွင် ရေခဲပြာကျွန်းတစ်ခု ပေါ်လာသည်။

ဧရာမပင်လယ်ကြီးသည် အလွှာလိုက် အလွှာလိုက် ကွဲသွားသည် ။ ပြိုကျနေသော ပင်လယ်ရေသည် ယန်ဇီမြစ်ထဲသို့ အရှိန်ဖြင့်တက်လာပြီး ၎င်း၏ ရေမျက်နှာပြင်ကို မြှင့်တင်လိုက်သည်။

ကျွန်းရဲ့အလယ်မှာ အဖြူရောင် သားရဲတစ်ကောင်ရှိနေပြီး သူ့ဘေးမှာ လူတစ်ယောက် ရပ်နေသည်။ ထိုသားရဲ ခေါင်းမော့လိုက်သောအခါ ဗီဒီယိုဖိုင်မှာ မည်းမှောင်သွားသည်။

“မင်း မငြိမ်မသက်ဖြစ်နေပြီ.. နောက်တစ်ကြိမ် သတိထားပါ” ဟု ကောင်းဖန်က ဦးနှောက်ကြီးကို သတိပေးလိုက်သည်။

ကောင်းဖန်ရှေ့မှာ ရပ်နေတဲ့ နှစ်မီတာမြင့်တဲ့ ရေလူသားက ခေါင်းညိတ်ပြသည်။

“သွားရအောင်... မင်းကို တိုးတက်အောင်လုပ်ပေးနိုင်တဲ့အရာတစ်ခုကို ငါယူလာပေးထားတယ်” ကောင်းဖန်က ခုန်ပြီး ခြင်္သေ့ဖြူ၏ ကျောပေါ် တက်လိုက်သည်။ သားရဲနှစ်ကောင်နဲ့ လူသားတစ်ယောက်သည် အဖြူရောင်မျဉ်းနှစ်ကြောင်းချန်ခဲ့ပြီး မြစ်တစ်ဖက်တွင်ရှိသည့် တောင်တန်းများ၏အလယ်တွင်ရှိသည့် တောင်လယ်ချောင်းတစ်ခုပေါ်၌ ဆင်းသက်လိုက်သည်။

ကောင်းဖန်သည် ဆီလီ၏ သိုလှောင်ခန်းမှ ခရမ်းရင့်ရောင် မှိုနှင့်တူသော အရာကို ထုတ်ယူရန် ဆီလီကို ဆင့်ခေါ်လိုက်သည်။

အောက်ခြေအပိုင်းသည် သားရဲ၏ကျောရိုးမှ အရွတ်တစ်ခုဖြစ်ပြီး၊ ထိပ်ပိုင်းသည် ထီးပုံစံဦးနှောက်ဖြစ်သည်။

ခရမ်းရင့်ရောင်အရွတ်၏ မျက်နှာပြင်တွင် အစိမ်းရင့်ရောင် သွေးပြန်ကြောများရှိသည်။ လေထဲတွင် ထိတွေ့နေသော သွေးပြန်ကြောများ၏ အစိတ်အပိုင်းများသည် အစိမ်းရင်ရောင် ဖြစ်သော်လည်း ၎င်းတို့ အစိတ်အပိုင်းများကို အရွတ်ထဲတွင် မြှုပ်နှံထားသည်။

အရွတ်ထဲတွင် မြှုပ်ထားသော သွေးကြောများသည် နီလာရောင်ဖြစ်သည်။

အံ့သြစရာအကောင်းဆုံးကတော့ အရွတ်ထိပ်က ဦးနှောက်သည် အသက်ရှင်နေသေးတာ ဖြစ်သည်။

ထိုအရာသည် နှလုံးတစ်ခုလို ကျုံ့ပြီး အသက်ရှူသွင်းနေသည်။

ပြီးတော့ ဒီဦးနှောက်က အောက်မှာရှိတဲ့ အရွတ်တွေနဲ့ ယှဉ်ရင် သိပ်မကြီးပေ။ သူတို့ရဲ့ အရွယ်အစား ကွာခြားချက်က အပ်မှိုနှင့်တူသည်။

ဦးနှောက်၏မျက်နှာပြင်ကို စိမ်းညိုညိုရောင်သွေးပြန်ကြောများဖြင့် ဖုံးအုပ်ထားသော်လည်း ဤဦးနှောက်သည် လေနှင့်ထိတွေ့ပြီးနောက် လေထဲမှဓာတ်ငွေ့များကို ဆက်လက်စုပ်ယူကာ ၎င်း၏မျက်နှာပြင်ပေါ်တွင် မြေပဲအရွယ် သွေးစက်များအဖြစ်သို့ ခဲသွားသည်။

ဆီလီသည် ဤအရာအား ထုတ်ယူပြီးနောက် အနည်းငယ် နောက်ပြန်ဆုတ်သွားကာ တိတ်တဆိတ် သက်ပြင်းချလိုက်သည်။

နောက်ဆုံးတော့ ကောင်းဖန်က ဒီအဆိုးကြီးကို ငါ့သိုလှောင်ခန်းထဲကနေ ထုတ်ယူသွားပြီ...

ကောင်းဖန်က ဆီလီကို ပြန်လာဖို့ အချက်ပြလိုက်သည်။

သူသည် ဆီလီ၏ သိုလှောင်ခန်းထဲမှ ရောစပ်ထားသော စားပွဲတစ်ခုနှင့် ပစ္စည်းအချို့ကို ထုတ်ယူလိုက်သည်။

ထို့နောက် တောထဲမှာရောစပ်လိုက်သည်။

ခြင်္သေ့ဖြူသည် ၎င်း၏ခြေသည်းကို လှုပ်ခါလိုက်သောအခါ ရေခဲနံရံလေးခုသည် မြေပြင်မှ တက်လာပြီး လေထုထဲတွင် အေးခဲနေသော မြူမှုန်များ လွင့်ပျံလာသည်။ အင်းဆက်ပိုးမွှားများ၊ တိရစ္ဆာန်ငယ်လေးများနှင့် မြေပြင်နှင့် အညစ်အကြေးများမှ ပိုးမွှားများသည် ရေခဲတုံးများအဖြစ် ချက်ချင်း အေးခဲသွားကြသည်။ ထို့နောက် လေပြင်းတိုက်ခတ်ပြီး ရေခဲနံရံပေါ်မှ အပေါက်တစ်ပေါက် ရုတ်တရက်ပွင့်သွားသည်။ ရေခဲတုံးတွေအားလုံးကို အပေါက်ထဲကနေ ဖယ်ထုတ်ပစ်လိုက်သည်။

ရေခဲနံရံလေးခုပေါ်ရှိ လေအေးသည် စုစည်းကာ အပြင်ဘက်သို့ ပျံ့နှံ့မသွားဘဲ ပတ်ဝန်းကျင်လေထုမှ အပူများကို စုပ်ယူခြင်းမရှိသောကြောင့် ကောင်းဖန်ဧရိယာအတွင်းရှိ အပူချိန်သည် ပြောင်းလဲခြင်းမရှိပေ။

ဆယ်မိနစ်အကြာတွင် ကောင်းဖန်သည် အနက်ရောင် ဓာတ်ပစ္စည်းပုလင်းတစ်ဝက်ကို ရောစပ်လိုက်သည်။

ကောင်းဖန်သည် အနက်ရောင်ရည်နှစ်စက်ကို မြေပြင်ပေါ်သို့ ယိုစိမ့်စေရန် ပိုက်ကို အသုံးပြုလိုက်သည်။

မီးခိုးအနည်းငယ်မျှပင်မရှိဘဲ မြေပြင်တွင် ဘေစင်အရွယ် ကျင်းနှစ်ပေါက်ဖြစ်သွားသည်။

ကောင်းဖန်က ကျေနပ်စွာ ခေါင်းညိတ်လိုက်ပြီး ကျန်ဓာတုပစ္စည်းများကို အရွတ်ပေါ်သို့ လောင်းချလိုက်သည်။

အရွတ်က ချက်ချင်း အကြောဆွဲသွားသည်။

ထိခိုက်ထားသော တီကောင်တစ်ကောင်ကဲ့သို့ ၎င်း၏ခန္ဓာကိုယ်က အဝိုင်းအနေအထားသို့ ကွေးသွားသည်။ ခရမ်းရောင် အသားအရည်က အက်ကွဲသွားပြီး အတွင်းထဲမှာ သွေးများထွက်လာသည်။

ငိုကြွေးသံတွေက လေထဲသို့ ထွက်လာသည်။

ကောင်းဖန်၏အမူအရာမှာ မပြောင်းလဲဘဲ ဦးနှောက်ကြီးဘက်သို့လှည့်ကာ အသံကျယ်ကျယ်ဖြင့် “ပုံစံအမှန်” ဟုပြောလိုက်သည်။

တောင်လယ်ချောင်းမှထွက်သော ရေထွက်ပေါက်နှစ်ခုသည် ကောင်းဖန်ထံသို့ မရောက်မီတွင် ရေလူသားထဲသို့ ပေါင်းဝင်သွားသည်။

ရေတွေကျသွားသည်။

မြူခိုးတွေ ရှင်းသွားသောအခါ အချင်း နှစ်မီတာရှိတဲ့ ဧရာမဦးနှောက်ကြီး ပေါ်လာသည်။

ကောင်းဖန်သည် သူ၏ ဘယ်ဘက်လက်မှ ခရမ်းရောင် အရွတ်ကို ဖမ်းကိုင်လိုက်ပြီး ဦးနှောက်ကြီးထိပ်သို့ ထိုးထည့်လိုက်သည်။

ဦးနှောက်ကြီးသည် တုန်လှုပ်သွားသည်။

ဦးနှောက်တွင် မှိုပေါက်သွားသည်။ မှိုသည် နောက်ထပ်သေးငယ်သော ဦးနှောက်ဖြစ်သည်။ ဤမြင်ကွင်းသည် အထူးအဆန်းဖြစ်သည်။

ကောင်းဖန်သည် ခြေနှစ်လှမ်းနောက်ပြန်ဆုတ်ပြီး စိတ်လှုပ်ရှားစွာ သက်ပြင်းချလိုက်သည်။ ဒီဦးနှောက်က သူ့သားရဲတွေထဲမှာ ရုပ်အဆိုးဆုံးဖြစ်ရမည်ဟု တွေးလိုက်သည်။

ခရမ်းရင့်ရောင်အရေခွံ အရွတ်သည် ပြင်းထန်စွာ တုန်ခါသွားကာ သွေးများ ထွက်လာသည်။

သွေးတွေက ဦးနှောက်ကြီးကို အနီရောင်ဆိုးထားသည်။

ခဏအကြာတွင် ထူထပ်သော ခရမ်းရောင်အလင်းတန်းတစ်ခု ဖုံးလွှမ်းသွားသည်။

ခရမ်းရောင်အလင်းတန်းကြီးသည် ကောင်းကင်ပေါ်သို့ ပစ်လွှတ်လိုက်ကာ တိမ်ဖြူဖြူများကို ဖြိုခွဲလိုက် လေထုထဲတွင် လှိုင်းလုံးများကို ဖန်တီးလိုက်သည်။

ဤဖြစ်ရပ်သည် အနီးနားရှိ သားရဲများစွာ၏ အာရုံကို ဆွဲဆောင်သွားသည်။

မြစ်ရေမျက်နှာပြင်ပေါ်တွင် လှိုင်းလုံးများ ဖြစ်ပေါ်လာသည်။ ကြီးမားသော မီးခိုးရောင်ငါးကြီးတစ်ကောင်၏ ဦးခေါင်းသည် ပြတ်ထွက်သွားပြီး ၎င်း၏ကျယ်ဝန်းသော နောက်ကျောသည် ကျွန်းအသေးလေးကဲ့သို့ ဖြစ်နေသည်။

သူတို့နောက်က တောင်တန်းတွေဆီကနေ ရက်စက်တဲ့ အော်ဟစ်သံတွေ ထွက်လာသည်။

ခဏအကြာတွင် ရွှေမျောက်ဝံတစ်ကောင်သည် တောင်ပေါ်ရှိ ဧရာမကျောက်ဆောင်တစ်ခုပေါ်သို့ တက်လာကာ ကောင်းဖန်၏ သားရဲများကို တိတ်တဆိတ် စောင့်ကြည့်နေသည်။

ဒီအကောင်ကြီးနှစ်ကောင်အပြင် မရေမတွက်နိုင်လောက်သည့် သူလျှိုမျက်လုံးအစုံသည် သစ်တော၊ ကောင်းကင်နဲ့ ရေထဲက ထွက်လာကြသည်။

“သခင်” ခြင်္သေ့ဖြူက အသံတိုးတိုးဖြင့် ပြောသည်။

သခင်ကသာ အမိန့်ပေးရင် အချင်းဝက်ဆယ်ကီလိုမီတာအတွင်း ပုန်းအောင်းနေသည့် အရာအားလုံးကို သူ သုံးစက္ကန့်အတွင်း သတ်ပစ်နိုင်သည်။

ကောင်းဖန်သည် သစ်ပင်တစ်ပင်ကို မှီ၍ ဘာမှ မပြောသေးပေ။

အချိန်အတော်ကြာပြီးနောက် ကောင်းဖန်က ပေါ့ပေါ့ပါးပါးနှင့် ပြောလိုက်သည်။ “ဆီလီ... သူတို့ကို ကိုင်တွယ်လိုက်”

ဖျော်ရည်သောက်နေသည့် ရေခူသည် ၎င်းကြားလိုက်သည့်အရာကို သံသယဝင်သွားသည်။

ကောင်းဖန်က သက်ပြင်းချလိုက်သည်။ မင်းက အခု နတ်ဘုရားတစ်ပိုင်းဖြစ်နေပြီ.. မင်းနဲ့ ဂုဏ်ပုဒ်နဲ့ နည်းနည်းထပ်တူအောင် လုပ်ပေးနိုင်မလား..

“လွန်ခဲ့တဲ့ ရက်အနည်းငယ်က ငါ ဈေးဝယ်ထွက်ပြီး ဖျော်ရည်အရသာအသစ် ၁၇ မျိုးကို တွေ့ခဲ့တယ်...”

ချက်ချင်းပင် ကောင်းဖန်၏ နှုတ်ခမ်းပေါ်တွင် နူးညံ့သော လက်တံတစ်ခု ဖိကပ်လိုက်ပြီး ဆီလီ၏ မျက်လုံးများ တောက်ပလာသည်။

ကောင်းဖန်..မပြောနဲ့တော့... ငါနားလည်ပြီ....

***

သားရဲလေ့ကျင့်သူ

အခန်း ၇၇၈ မှော်ဦးနှောက်

ဆီလီက သူ့ကိုယ်သူ လက်တံနှစ်ချောင်းနှင့် ပွေ့ဖက်လိုက်ပြီး အသံတိုးတိုးဖြင့် သူ့ကိုယ်သူ တိုးတိုးလေးပြောလိုက်သည်။

ကောင်းဖန်က သူဘာတွေဖြစ်နေတာလဲ နားထောင်ဖို့ နားစွင့်လိုက်သည်။

“ငါက ကလေးကောင်းလေးပါ...ငါဘယ်တော့မှ မသတ်ဖြတ်ဘူး... ကောင်းဖန်က ငါ့ကို ဆိုးသွမ်းအောင် သွေးဆောင်နေတာဖြစ်လို့ ကျေးဇူးပြုပြီး ငါ့ကို အပြစ်မတင်ပါနဲ့...

ပြီးနောက်-

“နေရာရွှေ့ပြောင်းခြင်း”

ကမ္ဘာကြီးကို ပန်းချီကားတစ်ချပ်ဟု သတ်မှတ်လိုက်လျှင် သူတို့ရှေ့မှာ ဖြစ်ပျက်သွားတာက ချွန်ထက်တဲ့ဓားနဲ့ ဒီပန်းချီကားပေါ်မှာ စက်ဝိုင်းငယ်နှစ်ခုကို ဖောက်လိုက်ခြင်းဖြစ်သည်။

ထို့နောက် တူညီသောအရွယ်အစားရှိသော ဤစက်ဝိုင်းငယ်နှစ်ခုသည် တည်နေရာကို ပြောင်းလိုက်ခြင်းဖြစ်သည်။

၎င်းသည် နတ်ဘုရားတစ်ပိုင်း၏ နေရာလွတ်စွမ်းအင်ကို အသုံးချခြင်းဖြစ်သည်။

နေရာလွတ်လဲလှယ်ခြင်း... လုံးဝဆန့်ကျင်ဘက် နေရာနှစ်ခုကို လဲလှယ်လိုက်ခြင်းဖြစ်သည်။

မြစ်လယ်တွင် လိပ်ခွံနှင့် အမြီးတစ်ဝက်မျှသာ ရေပေါ်တွင်ပေါ်နေပြီး အနီရောင်သွေးများ ချင်းချင်းနီနေသည်။ တစ်ဖက်ကမ်းတွင် လက်နှစ်ချောင်းပျောက်သွားသော မျောက်ဝံတစ်ကောင်သည် ထိတ်လန့်တကြားဖြင့် ဆီလီကို ကြည့်လိုက်ပြီးနောက် လှည့်ထွက်ပြေးသွားသည်။

ကောင်းဖန်သည် မြစ်ထဲမှ ဧရာမလိပ်ကြီး၏ အလောင်းကို ကြည့်ရင်း အတွေးများသွားသည်။

“မဆိုးပါဘူး ဆီလီ.... မင်းကောင်းကောင်းလုပ်လိုက်တယ်... အသန်မာဆုံးသားရဲကို မင်းသတ်လိုက်တာပဲ” ဟု ကောင်းဖန်က ချီးကျူးလိုက်သည်။

“ငါနဲ့ဘာမှမဆိုင်ပါဘူး” ဆီလီ ကမန်းကတန်းပြောလိုက်သည်။

လေပြင်းတစ်ချက်က မြေပြင်ကို ဖြတ်သွားသည်။

ပေါက်ကွဲမှုကြောင့် ပတ်ဝန်းကျင်ရှိ သစ်ပင်များအားလုံး လဲကျသွားသည်။

အလင်းရောင် မှိန်ဖျော့သွားပြီးနောက် ခရမ်းရင်ရောင် ဦးနှောက်သည် လေထဲတွင် လွင့်ပျံလာသည်။

ဦးနှောက်၏မျက်နှာပြင်ကို အပြာရောင်သွေးပြန်ကြောများဖြင့် ဖုံးအုပ်ထားပြီး စွဲမက်ဖွယ်ကောင်းသည်။

[သားရဲ အမည်] - မှော်ဦးနှောက်

[သားရဲ အဆင့်] - အဆင့် ၈၉ (သူတော်စင်အဆင့်)

[သားရဲ စွမ်းရည်ဆင့်] - ဒဏ္ဍာရီစွမ်းရည်ဆင့်/ ဒဏ္ဍာရီ

[သားရဲ အမျိုးအစား] - စိတ်ဝိညာဉ်နှင့်ဆိုင်သော

[သားရဲ စွမ်းအင်] - စိတ်ဝိညာဉ်စွမ်းအား အဆင့် ၇၊ ထူးကဲသော ဦးနှောက် အဆင့်၇၊ စိတ်ဝိညာဉ်နေရာလွတ် အဆင့် ၆ စိတ်ဝိညာဉ်ထိန်းချုပ်မှု အဆင့်၆ မှော်စွမ်းအား အဆင့်၆

[သားရဲ အခြေအနေ] - ကျန်းမာ (ပျော်ရွှင်)

[အထူးသွင်ပြင်လက္ခဏာ] –

နယ်ပယ်သုံးခုလေးကြိုးမျဉ် (စိတ်ဝိဥာဉ်စွမ်းရည်၏ အဆုံးစွန်သောကန့်သတ်ချက်သည် ဉာဏ်စွမ်းအားဖြင့် ကမ္ဘာကြီးကို ပြောင်းလဲစေသည်။ ဦးနှောက်တစ်ခုသာရှိသော ဤသတ္တဝါသည် ဖြစ်နိုင်ခြေပိုများသည်။)

အကျိုးသက်ရောက်မှု ၁ - တွေးခေါ်မှုကို သိမ်းပိုက်ခြင်း (၎င်း၏ ပြင်းထန်သော စိတ်ဓာတ်သည် သက်မဲ့အရာဝတ္ထုများ၏ ခန္ဓာကိုယ်ကို သိမ်းပိုက်နိုင်စေကာ ရွေ့လျားနိုင်စွမ်းကို ရရှိစေသည်။ အရှိန်အဟုန်လည်း တိုးမြင့်လာသည်။)

အကျိုးသက်ရောက်မှု ၂ - ၎င်းသိမ်းယူထားသော သက်ရှိမဟုတ်သောအရာသည် လျင်မြန်စွာ ပြောင်းလဲသွားမည်ဖြစ်ပြီး ထူးကဲသော အမျိုးအစားအားလုံးကို မွေးဖွားပေးသည်။

လက်ရှိအရွယ်အစား- ယန်ဇီမြစ် + အရှေ့ပင်လယ်၊ သိမ်းယူမှု တိုးတက်မှု ၉၉.၆ ရာခိုင်နှုန်း

ထူးကဲသော အသွင်ပြောင်းခြင်း (မှော်ဦးနှောက်သည် သာမန်လူများ၏ အတားအဆီးများမှ လွတ်မြောက်နိုင်သည်။ မှော်သွေးများသည် ၎င်း၏ သွေးကြောများအတွင်း စီးဆင်းသွားပြီးနောက် ၎င်း၏ အထူးစွမ်းအားများကို အသုံးပြု၍ အခြားသက်ရှိများကို အသွင်ပြောင်းပေးနိုင်သည်။)

အကျိုးသက်ရောက်မှု ၁ - မှော်ဦးနှောက်သည် အခြားသတ္တဝါများကို ယာယီအသွင်ပြောင်းရန် ၎င်း၏ကိုယ်ပိုင်စွမ်းအားကို အသုံးပြုထားနိုင်သော်လည်း ပစ်မှတ်သည် အဆင့်နိမ့်ရမည်ဖြစ်ပြီး ပစ်မှတ်၏ အစွမ်းသည် မှော်ဦးနှောက်ထက် အလွန်အကျွံ မကျော်လွန်ရပေ။ သို့မဟုတ်ပါက သက်ရောက်မှုသည် အလွန်တည်ငြိမ်မှုမရှိနိုင်ပေ။

အကျိုးသက်ရောက်မှု ၂ - မှော်ဦးနှောက်မှလုပ်ဆောင်သော အသွင်ကူးပြောင်းမှုအကျိုးသက်ရောက်မှုသည် အချိန်အတိုင်းအတာ တစ်ခုအထိ ကြာရှည်လိမ့်မည်။ သို့သော် မှော်ဦးနှောက်သည် ဤအကျိုးသက်ရောက်မှုက အဆက်မပြတ်အားကောင်းနေပါက အချိန်ကြာလာသည်နှင့်အမျှ အသွင်ပြောင်းမှုများသည် ပစ်မှတ်ပေါ်တွင် အပြီးတိုင်တည်သွားမည်ဖြစ်သည်။

အရိပ်အမြွက် - မှော်ဦးနှောက်၏ အသွင်ကူးပြောင်းမှုအကျိုးသက်ရောက်မှုများတွင် အကြောင်းအရာ၏ အသွင်အပြင်ကိုပြောင်းလဲခြင်း၊ ဘာသာရပ်၏အရေအတွက်နှင့် ကိုယ်တွင်းအင်္ဂါပုံစံကိုပြောင်းလဲခြင်းတို့ အကန့်အသတ်မရှိပါ၀င်သည်။

[သားရဲ ဖော်ပြချက်] - နယ်ပယ်သုံးခုကမ္ဘာကြီးတွင်နေထိုင်သော မှော်ဦးနှောက်ဖြစ်သည်။ ထူးဆန်းသောဘဝဖြစ်ပြီး ၎င်းသည် အခြားသက်ရှိသတ္တဝါများကို အသွင်ပြောင်းခြင်းမှ ပျော်ရွှင်မှုရရှိသည်။ အခြားသူများက ၎င်းဆန္ဒကို ဆန့်ကျင်တဲ့အခါ မကြိုက်ပေ။

ဦးနှောက်ကြီးသည် မှော်ဦးနှောက်အဖြစ် ပြောင်းလဲသွားခဲ့ပြီ ဖြစ်သည်။

၎င်း၏ထူးခြားသော လက္ခဏာများလည်းပြောင်းလဲသွားခဲ့သည်။

၎င်းသည် ကောင်းဖန်၏သီအိုရီများထဲမှတစ်ခုဖြစ်ပြီး အထူးသွင်ပြင်လက္ခဏာများကိုလည်း အဆင့်သတ်မှတ်ထားသည်။ လက်ရှိ နယ်ပယ်သုံးခုလေးကြိုးမျဉ်းသည် ယခင် အတွေးလေးကြိုးမျဉ်ထက် သိသိသာသာ ပိုမိုအားကောင်းလာသည်။

ဝိသေသလက္ခဏာများ၏ စွမ်းအင်များသည် တူညီသော်လည်း နယ်ပယ်သုံးခုလေးကြိုးမျဉ်သည် အတွေးလေးကြိုးမျဉ်ထက် ပိုမိုအကျိုးသက်ရောက်မှုရှိသည်။ ပြီးတော့ သိမ်းပိုက်မှုအရှိန်ကလည်း တိုးလာသည်။

ဒါက ဦးနှောက်ရဲ့ တိုက်ခိုက်ရေးစွမ်းရည်ကိုလည်း ပိုမြန်စေသည်။

ကောင်းဖန်သည် အသစ်ပေါ်လာသော ထူးကဲသည့် အသွင်ကူးပြောင်းမှုစွမ်းရည်ကြောင့် အံ့အားသင့်သွားသည်။

အများအားဖြင့် သားရဲဝိသေသလက္ခဏာများသည် ဖလိန်မီ၏ မီးတောင်ပံကဲ့သို့သော သားရဲ၏ တိုက်ခိုက်နိုင်စွမ်းကို တိုက်ရိုက် ထည့်သွင်းထားသည်။

ဒါပေမယ့် ထူးခြားသည့် သွင်ပြင်လက္ခဏာတွေလည်း ရှိသည်။ ဤအထူးသွင်ပြင်လက္ခဏာများသည် သားရဲ၏တိုက်ခိုက်ရေးစွမ်းအင်ထဲသို့ တိုက်ရိုက်မထည့်သော်လည်း မှန်ကန်စွာအသုံးပြုသောအခါတွင် ကြီးမားသော အကျိုးသက်ရောက်မှုရှိနိုင်သည်။ ဥပမာအားဖြင့် ခြင်္သေ့ဖြူ ဒဏ္ဍာရီလာအဆင့်ကို ကျော်ဖြတ်သောအခါ ၎င်းသည် နတ်ဘုရားအသံကို နိုးကြားစေခြင်းမျိုး ဖြစ်သည်။

မှော်ဦးနှောက်၏ အသစ်နိုးထလာသော ထူးကဲသည့် အသွင်ပြောင်းမှုသည် တိုက်ရိုက်တိုက်ခိုက်နိုင်စွမ်းကို တိုးမြှင့်ခြင်းထက် သွယ်ဝိုက်သော နည်းအားဖြင့် ခွန်အားတိုးစေသည့် ထူးခြားသောဝိသေသတစ်ခုဖြစ်သည်။

ပြီးတော့ အရမ်းစိတ်ဝင်စားဖို့ကောင်းသည်။

အသွင်ပြောင်းခြင်းတွင် အဆင့်နိမ့်ရမည်ဖြစ်ပြီး ၎င်း၏ ခွန်အားကလည်း လွန်ကဲစွာ မကျော်လွန်ရပေ။ တစ်နည်းဆိုရသော် မော်ကွန်တင်စွမ်းရည်ဆင့် သို့မဟုတ် နတ်ဘုရားတစ်ပိုင်း အဆင့် အောက်တွင်ရှိသော မည်သည့်သတ္တဝါမဆို မှော်ဦးနှောက်ဖြင့် ပြောင်းလဲနိုင်သည်။

မှော်ဦးနှောက်သည် အရူးသိပ္ပံပညာရှင်၏ အချစ်ဆုံး သားရဲဖြစ်လာနိုင်သည်။

“အရင်ဆုံး ငါနဲ့ပြန်လိုက်ခဲ့.. အရှေ့ပင်လယ်ကို ဒီကနေ ဆက်သိမ်းနိုင်မလား” ကောင်းဖန်က မှော်ဦးနှောက်ကိုကြည့်ရင်း ပြောလိုက်သည်။

မှော်ဦးနှောက်က ခေါင်းညိတ်ပြလိုက်သည်။ “ကျွန်တော် လုပ်နိုင်ပါတယ်.. သခင် ဒီနေရာကနေ သိမ်းယူတဲ့ အရှိန်က အနည်းငယ် နှေးကွေးနေပေမယ့်… ကျွန်တော် အရှေ့ပင်လယ်မှာ ရှိတုန်းကထက်တောင် ဒီနေရာကနေ ပိုမြန်အောင် သိမ်းယူနိုင်တာ တွေ့ရပါတယ်”

ကောင်းဖန်က “မင်းဆင့်ကဲပြောင်းလဲလာတာနဲ့အမျှ မင်းရဲ့စွမ်းအင်က တိုးတက်လာတယ်” ဟု ပြောလိုက်သည်။

ယန်ဇီမြစ်သည် အရှေ့ပင်လယ်ထဲသို့ စီးဝင်သည်။ ရုပ်ပိုင်းဆိုင်ရာရှုထောင့်မှကြည့်လျှင် ၎င်းတို့နှစ်ခုသည် အမှန်တကယ် ချိတ်ဆက်နေသောကြောင့် မှော်ဦးနှောက်သည် အရှေ့ပင်လယ်ကို ယန်ဇီမြစ်မှ ဆက်လက်သိမ်းပိုက်နိုင်မည်ဖြစ်သည်။

ယွိကျိုးသို့ပြန်ရောက်သောအခါ ကောင်းဖန်သည် မြစ်ကမ်းဘေးရှိ အဖြူရောင် အဆောက်အအုံတစ်ခုဆီသို့ တိုက်ရိုက်သွားလိုက်သည်။ နံရံတွင် သင်္ကေတတစ်ခုရှိပြီး အပြင်ဘက်တွင် အပြာရောင်ကွင်းဖြစ်ပြီး အလယ်တွင် မျက်လုံးတစ်လုံးရှိသည်။ ဤသည်မှာ တောင်ပိုင်းကောင်းကင်အဖွဲ့အစည်း၏လက်အောက်ရှိ ဓာတ်ခွဲခန်း၏ တံဆိပ်ဖြစ်သည်။

အဖြူရောင် အဆောက်အဦးကို ယန်ဇီမြစ်ဘေးတွင် ဆောက်လုပ်ထားပြီး ဦးနှောက်ကြီး၏ ရောင်ဝါရှိသည်။

ယန်ဇီမြစ်ရှိ ရေလွှမ်းမိုးနေသော ရေသတ္တဝါအားလုံးနီးပါးသည် ဦးနှောက်ကြီး၏ မွေးစားသားများဖြစ်ကြသောကြောင့် ဦးနှောက်ကြီး၏ ရောင်ဝါလွှမ်းမိုးမှုရှိသော ဤအဆောက်အအုံကို မည်သည့် ရေသားရဲမှ မကျူးကျော်ဝံ့ပေ။

ဒီအဆောက်အဦးအပြင် မြစ်ကမ်းဘေးမှာ ဆောက်ချင်သည့် လူတွေလည်း ရှိပေမယ့် တစ်ရက်ထဲ၌ ရေထဲမှ သားရဲများ၏ ဖျက်ဆီးခြင်းကို ခံရတတ်ကြသည်။ ထိုသို့ဖြင့် ခဏအကြာတွင် ယန်ဇီမြစ်ကမ်းပါးများသည် တောင်ပိုင်းကောင်းကင်၏ ကိုယ်ပိုင်ပိုင်ဆိုင်မှုအဖြစ် သတ်မှတ်ခံလိုက်ရသည်။

“မင်းက တော်တော်တော်တာပဲ... မင်းရဲ့ မွေးစားသား အားလုံးကို အရှေ့ပင်လယ်ထဲကို ခေါ်ခဲ့တာလား” ကောင်းဖန်က မှော်ဦးနှောက်ကို ပြောလိုက်သည်။ ချီးမွမ်းခြင်းလား ကဲ့ရဲ့ခြင်းလားဆိုတာတော့ ပြောဖို့ခက်သည်။

မှော်ဦးနှောက်သည် လျင်မြန်စွာ တွေးတောလိုက်သည်။ ဦးနှောက်ရှိ အပြာရောင်သွေးပြန်ကြောများသည် စက်ကဲ့သို့ အရှိန်ပြင်းပြင်းနှင့် အပြာရောင်တောက်တောက် တောက်ပြောင်နေသည်။

သခင်က ငါ့ကို ချီးကျူးတယ်ထင်တယ်...

မှော်ဦးနှောက်က ပြောလိုက်သည်။ “ချစ်လှစွာသော သခင်... ကျွန်တော့်ရဲ့ မွေးစားသားတွေက အရှေ့ပင်လယ်တင်မကဘဲ ပင်လယ်ဝါ၊ ဘိုပင်လယ်နဲ့ ပစိဖိတ်သမုဒ္ဒရာတွေမှာလည်း မွေးစားသားတွေရှိပါတယ်”

“မင်းဘာလို့ မွေးစားသားတွေ အများကြီး မွေးစားထားတာလဲ.. မင်းကို အဖေလို့ ခေါ်ခံရတာကို ကြိုက်တာလား”

“အဲဒါက သူတို့ကို တော်တော့်ကို ထူးချွန်တာလို့ ကျွန်တော် မြင်လို့.. သူတို့ရဲ့ အရည်အချင်းတွေကို တန်ဖိုးထားလို့ပါ”

“ကောင်းပြီ….” ကောင်းဖန် ဆွံ့အသွားသည်။

ဓာတ်ခွဲခန်းထဲကို ဝင်သွားတော့ ကောင်းဖန်က သူ့ရဲ့ မှတ်ပုံတင်ကတ်ကို ထုတ်ပြီး အဆောက်အဦးထဲက ဓာတ်ခွဲခန်းကို သိမ်းပိုက်လိုက်သည်။

ဤဓာတ်ခွဲခန်းသည် တောင်ပိုင်းကောင်းကင် လက်အောက်ရှိ သုတေသနစင်တာ ၃၆ ခုအနက်မှ တစ်ခုဖြစ်သည်။ ရေအမျိုးအစား သားရဲအသစ်များကို တီထွင်ရန်နှင့် ရေအမျိုးအစား မျိုးစိတ်အသစ်များ၏ စွမ်းအင်များကို စမ်းသပ်ရန်အတွက် တာဝန်ရှိသည်။

ဓာတ်ခွဲခန်း အဆောက်အဦရှိ အထပ် - ၁ မှ - ၅ သည် ယန်ဇီမြစ်အတွင်း တဝက်နစ်မြုပ်နေသည်။

“သခင်လေး... နောက်ဆုံးတော့ လူနေမှုပုံစံနဲ့ တွေ့ခွင့်ရပြီ” မျက်မှန်အထူကြီးနှင့် အဖြူရောင်ဓာတ်ခွဲခန်းအင်္ကျီကို ၀တ်ဆင်ထားသည့် သုတေသီတစ်ဦးသည် သူ၏ သခင်ကို မြင်လိုက်ရသလိုပင် လက်ထဲတွင် ဖိုင်အမြောက်အများနှင့် ကောင်းဖန်ထံသို့ပြေးသွားသည်။

“ကြည့်ပါဦး... သခင်လေး.. နောက်ဆုံးတော့ သခင်လေးထားခဲ့တဲ့ ဖော်မြူလာကိုသုံးပြီး ဒီရေငန်းတော်ကြားမြွေကို လွန်ခဲ့တဲ့ သုံးလက မွေးမြူထားခဲ့ကြတာ... ဒါကပြီးသွားတဲ့ ရေငန်းတော်ကြားမြွေရဲ့ ပုံပါ... ဒါပေမဲ့သူက အရမ်းရှက်တက်တာကို ကျွန်တော်တို့ တွေ့လိုက်ရတယ်... သေစေလောက်တဲ့ တိုက်ခိုက်မှု မခံရရင် ဒါမှမဟုတ် တခြားသားရဲတွေကို မြင်ရင် သူက ထွက်ပြေးတယ်...ဒါပေမယ့် သူ့ရဲ့ ပင်ကိုယ်စရိုက်ကို ပြုစုပျိုးထောင်ဖို့ ကျွန်တော်တို့ လုပ်ဆောင်နေပါတယ်....”

ကောင်းဖန်က ဓာတ်ပုံကို ကြည့်လိုက်သည်။ ဓာတ်ပုံထဲတွင် သုံးမီတာရှည်သော အဖြူရောင်ငန်းတော်ကြားမြွေသည် ဓာတ်ခွဲခန်းကန်ထဲတွင် ရေကူးနေသည်။

“ဟုတ်တယ်... ဒါက ရေငန်းတော်ကြားမြွေပဲ.. မင်းအဲဒါကို ကောင်းကောင်းမွေးမြူပြီးထားပါပြီ... ဒါပေမယ့် ကိုယ်ရည်ကိုယ်သွေးက မွေးရာပါဖြစ်ပြီး.. ဒါက သားရဲလေ့ကျင့်သူရဲ့တာဝန်ပဲ... မင်းအလုပ်ကောင်းကောင်းလုပ်ပြီးသွားပါပြီ”

“ခဏ ရေငန်းတော်ကြားမြွေတွေ ယူလာပေး ငါစမ်းသပ်ကြည့်မယ်”

သခင်လေးက ကိုယ်တိုင်ကိုယ်ကျ စမ်းသပ်မှုတစ်ခု ပြုလုပ်တော့မည်ကို ကြားလိုက်ရာ သုတေသီ၏ မျက်လုံးများသည် သူ၏ မျက်မှန်ထူထူနောက်တွင် စိတ်လှုပ်ရှားမှုများ ပြည့်နှက်နေသည်။

ဤသုတေသီများအတွက် ကောင်းဖန်သည် ပညာရှင်တစ်ဦးနှင့်တူသည်။

ဓာတ်ခွဲခန်း ၃၆ ခန်းမှ သုတေသနပြုထားသည့် သို့မဟုတ် အောင်မြင်စွာ ဖန်တီးထားသည့် သားရဲအသစ်များအားလုံးထဲမှ ၁၀ ကောင်တွင် ၉ ကောင်မှာ သခင်လေးနှင့် သက်ဆိုင်သည်။ ၎င်းတို့အားလုံးကို သခင်လေး၏လမ်းညွှန်ချက်ဖြင့် လုပ်ဆောင်ခဲ့ခြင်းဖြစ်ပြီး သုတေသီများအားလုံးသည် ဤလမ်းကြောင်းပေါ်တွင် ဆက်လက်သုတေသနပြုရန် လိုအပ်သည်။

တခါတရံတွင် သူတို့သည် သခင်လေး၏ ဦးနှောက်ကို ခွဲခြမ်းဖွင့်ပြီး အတွင်း၌ ရှိနေသည်ကိုပင် မြင်ချင်မိကြသည်။

“ဘာလို့ ငါ့ကိုဒီလိုကြည့်နေတာလဲ... ငါ့မျက်နှာမှာ ပန်းတွေရှိလို့လား” ကောင်းဖန်က ပြုံးပြုံးလေး ပြောလိုက်သည်။

သုတေသီသည် ကောင်းဖန်၏မျက်နှာပေါ်မှ သူ့အကြည့်များကို အမြန်ဖယ်ရှားလိုက်သည်။

ငါးမိနစ်လောက်ကြာတော့ မှန်တံခါးပွင့်လာသည်။ အဖြူရောင် လှည်းတစ်စီးပေါ်မှာ ဖန်လှောင်အိမ်ကန်တစ်ခုတင်ထားသည်။

ကန်ထဲတွင် ရေငန်းတော်ကြားမြွေသုံးကောင် ထည့်ထားသည်။ ရေငန်းတော်ကြားမြွေသုံးကောင်လုံးသည် ကန်၏ တောင့်သုံးဘက်စီကို နေရယူားကာ ဘောလုံးများအဖြစ်ခွေနေသည်။

[သားရဲ အမည်] - ရေငန်းတော်ကြားမြွေ

[သားရဲ စွမ်းရည်ဆင့်] - ပုံမှန်အဆင့်/ ပုံမှန်အဆင့်

[သားရဲ အဆင့်] - အဆင့် ၃၂

[သားရဲ အမျိုးအစား] - ရေ/ အဆိပ်

[သားရဲ အခြေအနေ] - ကျန်းမာ (ကြောက်လန့်)

[သားရဲ ဖော်ပြချက်] - အဆိပ်ရှိသောမြွေအမျိုးအစားဖြစ်ပြီး ရေထဲတွင်နေထိုင်သော သားရဲဖြစ်သည်။ သူတို့တွင် အလွန်သေးငယ်သော သည်းခြေအိတ်ရှိသောကြောင့် ၎င်းတို့၏ကိုယ်ရည်ကိုယ်သွေးသည် အလွန်ကြောက်တက်သည်။ မိကျောင်းပေါင်းပင်တွေကို စားရတာ ကြိုက်နှစ်ပြီး ၎င်းတို့ထက် ပိုကြီးသည့် သားရဲများကိုကြောက်သည်။

သူတို့မျက်လုံးနဲ့ သည်းခြေအိတ်ကြောင့်... သည်းခြေအိတ်သေးတာက ကြောက်တက်တဲ့ ကိုယ်ရည်ကိုယ်သွေးကို ဖြစ်စေတာလား...

“မှော်ဦးနှောက်...မင်းရဲ့စွမ်းအင် အသစ်ကို စမ်းသပ်လိုက်.. ဒီမြွေငယ်ရဲ့သည်းခြေအိတ်ကို ပိုကြီးအောင်လုပ်လိုက်”

မှော်ဦးနှောက် လှည့်ကြည့်လိုက်တော့ ခရမ်းရောင်အလင်းက ရေငန်းတော်ကြားမြွေကို ဖုံးအုပ်ထားသည်။

ကောင်းဖန်သည် သူရပ်နေသည့်နေရာ ကွာခြားချက်ကို မပြောနိုင်သဖြင့် မှော်ဦးနှောက် နှင့် ပေါင်းစည်းလိုက်သည်။

ပေါင်းစည်းပြီးနောက် ကောင်းဖန်သည် မှော်ဦးနှောက် ၏ အမြင်အာရုံနှင့် အာရုံများကို တွေ့ရှိလိုက်ရသည်။

ဒါက အလွန်ထူးဆန်းသည့် ခံစားမှုတစ်ခုပင်ဖြစ်သည်။ ကောင်းဖန်သည် ရေငန်းတော်ကြားမြွေကို ဖုံးအုပ်ထားသော ခရမ်းရောင် လှိုင်းလုံးများစွာကို တွေ့လိုက်ရသည်။ ရေငန်းတော်ကြားမြွေ၏ ကြွက်သားများ၊ အရိုးများနှင့် အင်္ဂါများ အားလုံးသည် ခရမ်းရောင်လှိုင်းများအောက်တွင် ဦးနှောက်ထဲတွင် ထင်ရှားစွာ ပေါ်လာသည်။

ထို့နောက် ဦးနှောက်ကြီးသည် အရှိန်အဟုန်မြင့်စွာ လည်ပတ်ကာ တိကျသော စက်တစ်ခုနှင့်တူလာသည်။

ခရမ်းရောင်လှိုင်းများ၏ လှုံ့ဆော်မှုအောက်တွင် ရေငန်းတော်ကြားမြွေ၏သည်းခြေအိတ်သည် မိုးပျံပူဖောင်းတစ်ခုကဲ့သို့ ၎င်း၏ခန္ဓာကိုယ်အတွင်း၌ တဖြည်းဖြည်း ကျယ်ပြန့်လာသည်။

“ခဏနေဦး... သည်းခြေအိတ်က ကြီးနေလောက်ပြီ” ကောင်းဖန်၏ အမူအရာ ပြောင်းသွားသည်။

ခရမ်းရောင်လှိုင်းလုံးများ ပျောက်ကွယ်သွားသည်။

ရေငန်းတော်ကြားမြွေ၏ ခန္ဓာကိုယ်အောက်ပိုင်းသည် ငန်းဥကဲ့သို့ ရောင်ရမ်းနေပြီး မျိုချလိုက်သော ကျောက်တုံးသည် ၎င်း၏ခန္ဓာကိုယ်ထဲတွင် ပိတ်မိနေသကဲ့သို့ဖြစ်နေသည်။

ရေငန်းတော်ကြားမြွေ၏ ယခင်က ကြောက်တက်အမူအရာသည် ပြောင်းလဲသွားပြီး အလွန်စူးရှသောအကြည့်ဖြစ်လာသည်။

ဤ ရေငန်းတော်ကြားမြွေသည် ကန်ထဲမှ ခုန်ဆင်းကာ မြေပြင်ပေါ်တွင် ရစ်ခွေနေသည်။ ၎င်း၏ သွားများကိုလှစ်ပြနေကာ အထက်စီး ဆန်ပြီး သောင်းကျန်းလာသည်။

ရေငန်းတော်ကြားမြွေသည် ၎င်း၏ ဦးခေါင်းကို လှည့်ပတ်လိုက်သည်။

၎င်း၏မျက်လုံးများသည် ကြမ်းတမ်းမှုများနှင့် ပြည့်နှက်နေပြီး ၎င်း၏ပါးစပ်ကို ဘယ်သောအခါမှ မပိတ်တော့ပဲ အစွယ်လေးချောင်းနှင့်အတူ အေးစက်သော အကြည့် ရှိလာသည်။

သို့သော် ကောင်းဖန်ဆင်းသွားတော့ ရေငန်းတော်ကြားမြွေသည် မြေသားဘောလုံးလို ပြန်ဖြစ်သွားသည်။

“သူက ငတုံးပဲ..ထပ်စမ်းကြည့်ရအောင်”

***

သားရဲလေ့ကျင့်သူ

အခန်း ၇၇၉ ချင်းထျန်နဂါး

ကျန်သည့် ရေငန်းတော်ကြားမြွေနှစ်ကောင်သည် ဒါကိုမြင်လိုက်ရသောအခါ ပိုကြောက်သွားကြပြီး နှစ်ကောင်က ကန်ထောင့်မှာတောင် ပုန်းသွားကြသည်။

ရေငန်းတော်ကြားမြွေ၏ မျက်လုံးအိမ်များသည် ကျယ်လာပြီး ၎င်း၏အမြီးက လှုပ်ယမ်းကာ တည့်တည့် ပြုတ်ကျသွားသည်။

၎င်းသည်အကြောက်တရားတော့ ကင်းမဲ့နေသည်။

ကောင်းဖန်၏လက်သည် ကန်ထဲသို့ရောက်သွားပြီး နောက်ထက်မြွေတစ်ကောင်ကို စားပွဲပေါ်တင်ရန် ဆွဲယူလိုက်သည်။

“ထပ်စမ်းကြည့်... ဒါပေမယ့် ဒီတစ်ကြိမ်တော့ သည်းခြေအိတ်ကို အရမ်းကြီးအောင် မလုပ်နဲ့” ဟု ကောင်းဖန်က ဆိုလိုက်သည်။

“ကောင်းပါပြီ”

ပထမအတွေ့အကြုံကိုရပြီးနောက် မှော်ဦးနှောက်သည် ချိန်ဆပြီး သည်းခြေအိတ်ကို ချဲ့ထွင်လိုက်သည်။ သည်းခြေအိတ်သည် ရေငန်းတော်ကြားမြွေ၏ခန္ဓာကိုယ်အထဲတွင် တဖြည်းဖြည်းကြီးထွားလာသည်။ ၎င်းသည် ပထမအကြိမ်ကဲ့သို့ ပုံကြီးချဲ့ခြင်းမဟုတ်ပေ။

ရေငန်းတော်ကြားမြွေသည် ၎င်း၏ မျက်လုံးများကို ဖွင့်လိုက်ပြီး ကောင်းဖန်ဆီသို့ ဖြည်းညှင်းစွာ လျှောတိုက်သွားလိုက်သည်။ ၎င်းသည် လျှာထုတ်လိုက်ပြီး ကောင်းဖန်၏ ဖိနပ်များနှင့် တြိဂံပုံသဏ္ဍာန်ခေါင်းကို ပွတ်သပ်လိုက်သည်။

ထိုအခါ သူငယ်ချင်းဖြစ်သူများက အဖြစ်အပျက်ကို မြင်ပြီးနောက် ဘာလုပ်ရမယ်ဆိုတာ သိသွားကြသည်။

ဤ ရေငန်းတော်ကြားမြွေ၏အခြေအနေသည်လည်း ကနဦး “ကြောက်ရွံ” မှ “စူးစမ်းလေ့လာ” သို့ ပြောင်းလဲသွားသည်။

“ဒီစွမ်းအင်က အရမ်းကောင်းတယ်” ကောင်းဖန်က ပြုံးပြလိုက်သည်။ ဤ ရေငန်းတော်ကြားမြွေသည် သေးငယ်သော စမ်းသပ်မှုတစ်ခုမျှသာ ဖြစ်သည်။

ကောင်းဖန်တွင် အခြားသော အကြံဥာဏ်များစွာ ရှိသေးသည်။

နောက်ရက်များတွင် ကောင်းဖန်သည် ဓာတ်ခွဲခန်းတွင် ကျန်ခဲ့သည်။ အခြားသုတေသီများက ကောင်းဖန်သည် မည်သည့်စမ်းသပ်မှုများ လုပ်ဆောင်နေသည်ကို မသိကြသော်လည်း ၎င်းတို့သည် သားရဲများကို မကြာခဏဆိုသလို စေလွှတ်ကြရသည်။

“အင်း...နောက်ဆုံးတော့ အောင်မြင်သွားပြီ”

ကောင်းဖန်က သူ့နဖူးပေါ်က ချွေးတွေကို သုတ်လိုက်သည်။

မှော်ဦးနှောက်၏မျက်နှာပြင်သွေးပြန်ကြောများပေါ်ရှိ အပြာရောင်အလင်းတန်းများ မှိန်ဖျော့သွားသည်။

သူတို့ရှေ့က မြေပြင်မှာ ထူးဆန်းတဲ့အသွင်အပြင်နဲ့ ကိုယ်ပိုင်သားရဲ တစ်ကောင်ရပ်နေသည်။

သူ့ခြေထောက်ပေါ် မတ်တပ်ရပ်နေတဲ့ ပုဇွန်သားရဲတစ်ကောင်ဖြစ်သည်။

၎င်း၏ ခြေနှစ်ချောင်းသည် ထူပြီး သန်မာလာသည်။ ခြေဖဝါးသည် ဘဲတစ်ကောင်ကဲ့သို့ ဖြစ်နေသည်။ ခြေချောင်းများကြားတွင် ချည်မျှင်များပင် ရှိနေသည်။

ချပ်ဝတ်တန်ဆာထူထူသည် နောက်ကျောမျက်နှာပြင်ကို ဖုံးအုပ်ထားသည်။ ခန္ဓာကိုယ်တစ်ခုလုံးကို ထူထဲသော အရိုးစုချပ်ဝတ်ဖြင့် ဖုံးအုပ်ထားသည်။ ရှေ့ခြေနှစ်ချောင်းသည် လှံနှင့်တူပြီး လက်မောင်းအပေါ်ပိုင်းသည် အတွင်းပိုင်းဗလာဖြစ်ပြီး အောက်ခြေပိုင်းများတွင် အအေးဓာတ်ကို ပေးစွမ်းနိုင်သော ဆူးချွန်အပိုင်းတစ်ခုရှိသည်။

၎င်း၏ ဆူးချွန်ဖြင့် အချိန် ၀.၁ စက္ကန့်အတွင်းပစ်လိုက်လျှင် ငါးစင်တီမီတာ အထူရှိသော သတ္ထုစပ်စတီးဘုတ်ပြားကိုပင် ပေါက်သွားစေနိုင်သည်။

၎င်းတွင် ကုန်းနေရေနေ သတ္တဝါများအတွက် သင့်လျော်သော အသက်ရှူစနစ်တစ်ခု ပါရှိသည်။ အထူးဆန်းဆုံးမှာ ဤသားရဲသည် ကောင်းဖန်၏ ခြယ်လှယ်မှုအောက်တွင် ငိုခြင်း သို့မဟုတ် ရယ်မောနေသည့် ပုံသဏ္ဍာန်ရှိသော ထူးဆန်းသည့်လူ့မျက်နှာရှိခြင်းပင်ဖြစ်သည်။

ကောင်းဖန်က ဒီသားရဲကို “နူးညံသောပုဇွန်”ဟု အမည်ပေးလိုက်သည်။

ထိုအခါ ကောင်းဖန်သည် သူမြင်ရသော စာရင်းဇယားတွင် လူရွှင်တော်ပုဇွန်၏အမည်ကို “နုညံသောပုဇွန်” ဖြစ်သွားသည်ကို တွေ့လိုက်ရသည်။

“ဒါ….” ကောင်းဖန်က တစ်ခုခုကို တွေ့ရှိသွားသလို ခံစားလိုက်ရသည်။

သူလှည့်ပြီး မှော်ဦးနှောက်၏အမည်ကိုပြောင်းရန် ကြိုးစားလိုက်သော်လည်း ယခုတစ်ကြိမ်တွင်တော့ နာမည်အသစ်သည် စာရင်းဇယားပေါ်တွင် ပေါ်မလားပေ။

ငါက ဒီသားရဲရဲ့ အသွင်အပြင်ကို အရင်ကနဲ့ ယှဉ်ရင် လုံးဝကွဲပြားတဲ့ မျိုးစိတ်အထိ လွန်လွန်ကဲကဲ ပြောင်းလဲပြစ်လိုက်လို့.. အဲဒါကို ငါ နာမည်ပေးလိုက်လို့ရတာများလား...

ကောင်းဖန်၏ မျက်လုံးများ တောက်ပလာသည်။

ဘယ်လောက်စိတ်ဝင်စားစရာကောင်းလိုက်သလဲ...

သူတို့ရဲ့ ပထမဆုံးအောင်မြင်မှုအပြီးမှာတော့ ကောင်းဖန်နဲ့ မှော်ဦးနှောက်တို့၏ သားရဲဖန်တီးမှုအရှိန်က ပိုမြန်လာသည်။

ဒီတစ်ကြိမ်မှာတော့ သူတို့က ဒုတိယသားရဲကို ဖန်တီးဖို့ တစ်ရက်ခွဲပဲ ကုန်ဆုံးတော့သည်။

ဓာတ်ခွဲခန်း၏ အလယ်တွင် နူးညံသောပုဇွန်ထက် ၃၀ စင်တီမီတာ မြင့်သော သားရဲတစ်ကောင်သည် လူကဲ့သို့ မတ်တတ်ရပ်နေသည်။ ဗိုက်နှင့် နောက်ကျောအားလုံးကို အနက်ရောင် ချပ်ဝတ်တန်ဆာဖြင့် ဖုံးအုပ်ထားသည်။ ၎င်း၏ဦးခေါင်းထိပ်တွင် အနက်ရောင် လူသားမျက်နှာတစ်ခု ပါရှိပြီး လူ့မျက်နှာ၏ ကောက်ကြောင်းများကို မြင်တွေ့နိုင်သည်။

ချွန်ထက်သော ခြေသည်းသုံးချောင်းသည် ၎င်း၏ပခုံးများမှ ပေါက်ထွက်နေသည်။

ချွန်ထက်သော ခြေသည်းသုံးချောင်း၏ အထက်တွင် နက်မှောင်ပြီး သန်မာသော ခြေသည်းတစ်စုံရှိသည်။ ခြေသည်းများကို ထူထပ်သော ဆူးပင်များဖြင့် ဖုံးအုပ်ထားသည်။

ကောင်းဖန်က ဒီကောင်လေးကို “ကဏန်းသားသတ်သမား” ဟု အမည်ပေးလိုက်သည်။

ကောင်းဖန်သည် နူးညံ့သောပုဇွန် ၁၀ ကောင်နှင့် ကဏန်းသားသတ်သမား ၁၀ ကောင်ကို ဖန်တီးလိုက်သည်။ သူသည် အထီးငါးကောင်နှင့် အမငါးကောင်တို့ကို မွေးမြူလိုက်သည်။ အဲဒီကနေ သားဖောက်ဖို့ ပိုလွယ်လိမ့်မည်။

ဤသည်မှာ ကောင်းဖန်၏ အကြံဖြစ်သည်။ ဤသားရဲနှစ်ကောင်သည် လေ့ကျင့်ရန်သာဖြစ်ပြီး သူသည် တောင်ပိုင်းကောင်းကင်မုဒ်ဦးတွင် ပိုမိုစိတ်ဝင်စားဖွယ်ကောင်းသော သားရဲများကို ဖန်တီးမည်ဖြစ်သည်။

…

ယွိကျိုးမြို့…

ကမ္ဘာပျက်ကပ်ကတည်းက ဤမြို့ကြီးတစ်ခုလုံးသည် ကမ္ဘာပေါ်ရှိ အလုံခြုံဆုံးမြို့များထဲမှ တစ်ခုဖြစ်လာသည်။

သားရဲတိုက်ပွဲ ကွင်းများ၊ သားရဲကလပ်များ၊ မွေးမြူရေးစခန်းများ၊ သားရဲ သုတေသနစင်တာများ၊ သားရဲအပန်းဖြေဥယျာဉ်များ၊ သားရဲဘားများ....

လွန်ခဲ့သည့် နှစ်နှစ်အတွင်းတွင် မရေမတွက်နိုင်သော ဖျော်ဖြေရေးလုပ်ငန်းများ ပေါ်ပေါက်လာသည်။

နေရောင်ရှိလျှင် အရိပ်ရှိသကဲ့သို့ပင် ကျယ်ဝန်းတဲ့ မြေအောက် မိလ္လာကန်များသည် အိုးမဲ့အိမ်မဲ့တွေ နေထိုင်ရာ ဖြစ်လာသည်။

အချို့က ဆိုးရွားသော အခြေအနေများကြောင့် ထိုနေရာတွင် ရှိနေကြပြီး အချို့မှာ ဤနေရာ၏ အမှောင်ထုနှင့် အထီးကျန်မှုကို ခံစားနေကြရသည်။

“မိန်းမ…သမီးရယ်..လွမ်းတယ်….” မိလ္လာကန်ထောင့်တစ်နေရာမှာ အရက်သမားတစ်ယောက်က အေးစက်နေသည့်နံရံကို မှီပြီး ငိုနေသည်။ သူ့ဝတ်စုံသည်ကြေမွနေပြီး တစ်ဖက်ကို လှဲချလိုက်သည်။ သူ့ဘေးက ကြမ်းပြင်မှာ ပုလင်းအလွတ်ပုံတွေ ရှိနေသည်။သူ့ဆံပင်တွေက ရှုပ်ပွနေသည်။

ညက တိတ်ဆိတ်သွားတဲ့အခါ အထီးကျန်မှုက လှိုင်းလုံးတွေလိုပဲ သူ့အပေါ်ကို လွှမ်းမိုးလာသည်။

မရေမတွက်နိုင်သော ပိုးကောင်များက သူ့နှလုံးသားကို စားနေသကဲ့သို့ပင် ဖြစ်သည်။

အရက်၏လွှမ်းမိုးမှုအောက်တွင် ထိုယောက်ျား၏မျက်နှာသည် နီရဲနေပြီး အကြည့်များက မှုန်ဝါးနေသည်။

ဘဝရဲ့ဖိအား၊ သူ့ဇနီးနဲ့သမီးကို တောင့်တမှု၊ အနာဂတ်အတွက် ကြောက်ရွံ့မှုတွေ၊ ဒီခံစားချက်တွေ အားလုံးဟာ သူ့နှလုံးသားထဲမှာ ပေါ်ပေါက်လာသည်။

နောက်ဆုံးတော့ ဗုံးတစ်လုံးလို ပေါက်ကွဲသွားသည်။

သူသည် အိတ်ကပ်ထဲမှ ပြင်ဆင်ထားသော အဆိပ်ကို ထုတ်ကာ အရက်အနည်းငယ်ဖြင့် မျိုချလိုက်သည်။

တစ်မိနစ်အကြာတွင် ထိုအမျိုးသားသည် ဗိုက်ကို ဆုပ်ကိုင်လိုက်ပြီး နောက်ကြောင်းပြန်မလှည့်နိုင်တော့ပေ။ အရက်၊ အစာအိမ်အက်ဆစ်နှင့် သွေးရေတို့ရောစပ်သွားသည်။

သုံးမိနစ်လောက်ကြာတော့ ထိုလူ၏မျက်လုံးအိမ်များ ကျယ်လာပြီး သူ့ရဲ့ ရုန်းကန်မှုတွေ အားနည်းလာသည်။

မူးနောက်နေပြီး မြေအောက်ဥမင်လိုဏ်ခေါင်း၏အဆုံးတွင် အဆုံးမရှိသောအလင်းရောင်ကို သူတွေ့လိုက်ရသည်။ အလင်းထဲတွင် အမျိုးသမီးတစ်ဦးသည် မိန်းကလေးငယ်တစ်ဦးနှင့်အတူ သူ့ဆီသို့ လျှောက်လာနေသည်။ သူအိပ်မက်မက်နေသည့် လူနှစ်ယောက်ဖြစ်သည်။

ထိုလူက တစ်ခုခုပြောချင်သော်လည်း အသံမထွက်နိုင်ပေ။ သူ၏ နောက်ဆုံးခွန်အားကို အသုံးပြု၍ လက်မောင်းကို ဆန့်ထုတ်လိုက်ကာ တောင့်တင်းဖျော့တော့သော လက်ဆစ်များ တုန်ယင်သွားသည်။

စောင့်ပါနော်... ခဏစောင့်နော် မကြာခင် လက်တွဲကြမယ်...

လူသည် နောက်ဆုံးထွက်သက်ကို မှုတ်ထုတ်လိုက်ရာ ဘဝ၏အငွေ့အသက်သည် လှိုင်းလုံးများကဲ့သို့ သူ့ခန္ဓာကိုယ်မှ ထွက်သွားလေသည်။

မြေပြင်ပေါ်တွင် လဲလျောင်းနေသော လူသည် မီးလောင်ပြာကျသော အသီးနှင့်တူသည်။

အနက်ရောင်အင်္ကျီဝတ်ထားသည့် မုတ်ဆိတ်မွှေးထူထူနှင့် အမျိုးသားတစ်ဦးသည် မြေအောက်ဥမင်လိုဏ်ခေါင်းထောင့်မှ ထွက်လာသည်။ ဒီအခြေအနေကို အရင်က အကြိမ်ပေါင်းများစွာ မြင်ဖူးပေမယ့် ခံစားနေရတုန်းပင်။

အတောင်နှစ်ခုပါသည့် အဖြူရောင်အသားလုံးတစ်လုံး သူ့ဘေးတွင် ပျံဝဲနေသည်။

၎င်းသည် သူ့သားရဲဖြစ်သည့် အိပ်မက်ဘောလုံးသားရဲဖြစ်သည်။ လူတစ်ဦး၏ အတွင်းစိတ်ခံစားချက်များကို အသုံးပြု၍ ပတ်ဝန်းကျင်ကို ဖန်တီးနိုင်သည်။ စိတ်ခံစားမှုတွေ ပိုအားကောင်းလေ ဖန်တီးထားသည့် ပတ်ဝန်းကျင်က ပိုလက်တွေ့ကျလေဖြစ်သည်။ ပတ်ဝန်းကျင်အားလုံးသည် လူတစ်ဦး၏ နှလုံးသားထဲတွင် လိုချင်သောအရာကို ထင်ဟပ်စေသည်။

ဤ သားရဲအမျိုးအစားကို ဖျော်ဖြေရေးကလပ်များတွင် တွင်ကျယ်စွာ အသုံးပြုကြသည်။

“ဒါဆို လူတွေက အထီးကျန်မှုကြောင့် သေသွားနိုင်တာ‌ပေါ့” ဟု မြေအောက်ဥမင်လိုဏ်ခေါင်းထဲတွင် စူးရှသော အသံဖြင့် ပြောလိုက်သည်။

အနက်ရောင် အကျီနှင့် အမျိုးသားက သူ့ခြေလှမ်းများကို ရပ်လိုက်ပြီး သူ့နောက်ကျောမှ ဆံပင်များက ဖြောင့်ဆင်းနေသည်။ ထိုလူ၏အလောင်းဘေးနားမှ အရိုးစုတစ်ခု ပေါ်လာသည်။ အရိုးစုသည် မြေပြင်ပေါ်တွင် ဝပ်လျက် ဘေးသို့ မျက်နှာမူကာ ၎င်း၏လက်ငါးချောင်းက အမျိုးသား၏ ပါးပြင်ကို ပွတ်သပ်နေသည်။

အနက်ရောင် ဂျာကင်အင်္ကျီနှင့် အမျိုးသားသည် ဤဧရာမအရိုးစုကြီးပေါ်တွင် သေဆုံးခြင်း ရောင်ဝါကို တွေ့လိုက်ရသည်...

ကြောက်မက်ဖွယ်ကောင်းသော အနက်ရောင် ရောင်ဝါသည် ၎င်းကို ဝိုင်းရံထားသည်။

“ငါ...သူ့ကိုမသတ်ဘူး... သူ့ကိုယ်သူ သတ်သေတာကို မြင်လိုက်တာ” ဟု အနက်ရောင် ဂျာကင်အင်္ကျီ အမျိုးသားက လျင်မြန်စွာပြောလိုက်သည်။

ဒန်ဘီက မတုံ့ပြန်ဘဲ ပိုနက်သော ဥမင်လိုဏ်ခေါင်းထဲသို့ လမ်းလျှောက်ရန် ထရပ်လိုက်သည်။

“ငါသိတယ်”

ဒန်ဘီသည် သူ့အား ဂရုစိုက်ရန် အချိန်မရှိပေ။ အဘယ်ကြောင့်ဆိုသော် မိမိကိုယ်မိမိ သတ်သေသူထံမှ ခံစားခဲ့ရသော သေဆုံးမှုကြောင့် ၎င်း၏ မရဏပညတ်သည် နောက်ဆုံးတွင် ၁ ရာခိုင်နှုန်းသို့ ရောက်ရှိသွားသောကြောင့် ဖြစ်သည်။

……

ယွိကျိုးမြို့အပြင်ဘက် ကီလိုမီတာတစ်ရာအကွာဝေးရှိ တောင်ထွတ်..

ညကောင်းကင်ယံတွင် ကြယ်လေးတွေက အစက်အပြောက်တွေဖြစ်နေပြီး လမင်းကြီးက အပေါ်တွင် ချိတ်ဆွဲထားသည်။

ရွှေအိုရောင် အရိုးစုတစ်ခုသည် ၎င်း၏ခြေထောက်များကို ချိတ်ကာ တောင်ထိပ်ပေါ်တွင် ထိုင်နေသည်။

အရိုးစုအပြင်ဘက်မှ အနီရောင်မီးတောက်တစ်ခု လောင်ကျွမ်းသွားသည်။ ဒန်ဘီသည် သူ့ခန္ဓာကိုယ်မှ မီးတောက်များကို ဖြည်းဖြည်းချင်း ဖယ်ထုတ်လိုက်သည်။

နတ်ဘုရားအဖြစ်အဆင့်တက်သွားသောအခါ ခန္ဓာကိုယ်တစ်ခုလုံးသည် ပညတ်များနှင့် ပြည့်နေသည်။

ဒန်ဘီ၏ ခန္ဓာကိုယ်ရှိ အရိုးတစ်ခုစီမှ နီညိုရောင်မီးတောက်များထွက်လာသည်။

ရုတ်တရက် အမှောင်မီးတောက်များမှ အနက်ရောင် အတောင်ပံ အရိပ်တစ်ခု ထွက်လာသည်။

ဒန်ဘီ၏ မျက်လုံးအိမ်သည် မီးတောက်များဖြင့်လောင်ကျွမ်းနေသည်။ အေးစက်သော အရိပ်အယောင်နှင့်အတူ ပိတုန်းရောင် နတ်ဘုရားဖြစ်မှုအလင်းရောင်သည် စီးဆင်းသွားသည်။ အနက်ရောင်ချည်မျှင်သည် ဒန်ဘီ၏လက်ချောင်းထိပ်မှ ပျံထွက်သွားပြီး ၎င်းရှေ့တွင် သတ္တဝါထဲသို့ နစ်မြုပ်သွားသည်။

ဧရာမသတ္တဝါကြီးက အော်ဟစ်ပြီး ပူပေါင်းများကဲ့သို့ပေါက်သံမြည်လာသည်။

“အဲဒါဘာလဲ” ကောင်းဖန်က မေးလိုက်သည်။

ပင်လယ်ဝတုတ်က ရယ်မောလိုက်သည်။ “နတ်ဘုရားရဲ့ နည်းဗျူဟာပါပဲ.. ခန္ဓာကိုယ်ကို ကျော်လွန်ပြီး လူပြန်ဝင်စားချင်ပေမယ့် လုံလောက်မှုတော့ မရှိဘူး”

ကောင်းဖန်နားမလည်သေးတာကိုမြင်တော့ ပင်လယ်ဝတုတ်က ဆက်ရှင်းပြလိုက်သည်။ “ငါမမှားဘူးဆိုရင် ဒီအမှောင်မီးတောက်က နတ်ဘုရားရဲ့ နည်းဗျူဟာပဲ.. အဲဒီမှာ နတ်ဘုရားရဲ့ဆန္ဒပါတယ်.. ဒီအမှောင်မီးတောက်သာ ပညတ်တရားရဲ့ ၁ ရာခိုင်နှုန်းကို စုဆောင်းနိုင်ရင် နတ်ဘုရားအဆင့် မြှင့်တင်တဲ့အခါ နောက်ထပ်နတ်ဘုရားဖြစ်မှုကို ရလိမ့်မယ်”

“နတ်ဘုရားဖြစ်မှုကို စုစည်းဖို့ အလွယ်ဆုံးအခွင့်အရေးက နတ်ဘုရားတစ်ပိုင်းကို နတ်ဘုရားအဆင့် မြှင့်တင်တဲ့အခါ ဟုတ်တယ်မလား...ဒါဆို အချို့နတ်ဘုရားတစ်ပိုင်းတွေက အမှောင်မီးတောက် စွမ်းအားကို နတ်ဘုရားဖြစ်မှု ပမာဏအထိ စုဆောင်းဖို့ ကြိုးစားကြလိမ့်မယ်” ကောင်းဖန်က အတွေးဖြင့် ပြောလိုက်သည်။

ကောင်းဖန်က သူ့မေးစေ့ကို ပွတ်ရင်း “ဒါဆို မင်းပြောချင်တာက ကံကောင်းလို့သာ ဒီလိုဖြစ်လာတယ်လို့လား”

ကောင်းဖန်က ပြောပြီး ထွက်သွားသည်။

ပင်လယ်ဝတုတ်ကိုနောက်မှာချန်ခဲ့လိုက်သည်။

ဒန်ဘီက နတ်ဘုရားဖြစ်မှု လေးခုကို ၎င်း၏ကိုယ်ခန္ဓာထဲသို့ ခေါ်ဆောင်သွားပြီး ၎င်း၏ဝိညာဉ်ထဲသို့ ပေါင်းစပ်သွားလိုက်သည်။

ဒန်ဘီသည် ညည်းတွားရင်း နတ်ဘုရားဖြစ်မှုလေးခုသည် သံပူကဲ့သို့ ၎င်း၏ နက်နဲရာသို့ လောင်ကျွမ်းသွားစေသည်။

ပြင်းထန်သော နာကျင်မှုသည် လှိုင်းလုံးများကဲ့သို့ သူ့ဝိညာဉ်ကို တိုက်စားသွားသည်။

ဤအခိုက်အတန့်တွင် ဒန်ဘီ၏ဝိညာဉ်သည် ပြောင်းလဲလာသည်။

ကြီးမားသော ဝိညာဉ်စွမ်းအားသည် ကမ္ဘာတစ်ခုလုံးကို လွှမ်းမိုးသွားသည်။

ကီလိုမီတာတစ်ရာဝေးသော ယွိကျိုးမြို့သည်ပင်လျှင် ဝိညာဉ်စွမ်းအားထက်ဝက်ကျော်ကို လွှမ်းခြုံထားခြင်းခံလိုက်ရသည်။

လမ်းပေါ်ရှိ သားရဲများ၊ အိမ်၊ အခန်းများတွင် ၎င်းတို့၏ ခွန်အားပေါ်မူတည်၍ အမျိုးမျိုးသော အော်ဟစ်သံများ ထွက်လာကြသည်။

အနောက်ဘက်အစွန်ဆုံး ချင်းထျန်ကုန်းပြင်မြင့် မြေအောက်၌ အိပ်ပျော်နေသော ဧရာမနဂါးကြီးသည် မျက်လုံးများပွင့်လာသည်။

ချင်းထျန်ကုန်းပြင်မြင့်သည် တုန်ခါသွားပြီး မြေပြင်အလယ်တွင် ဧရာမအက်ကွဲကြောင်းကြီး ပွင့်သွားသည်။ အက်ကွဲကြောင်းသည် ချင်းထျန်ကုန်းပြင်မြင့်၏ တစ်ဝက်နီးပါးကို ဖြတ်သွားသည်။

မှုန်ဝါးဝါး ပြာမှုန်သော အလင်းတန်းများသည် မြေကြီး၏အနက်ထဲမှ ကောင်းကင်ယံသို့ တက်လာပြီး ညကောင်းကင်ကို စိမ်းရင့်ရောင်ဖြင့် ခြယ်သထားသည်။

ခဏအကြာတွင် လပြည့်ည ကောင်းကင်ယံတွင် ဖြူစင်သော လနှစ်စင်း ပေါ်လာပြီး လများအလယ်တွင် အနက်ရောင် အကွက်များ ထွက်ပေါ်လာသည်။

***

သားရဲလေ့ကျင့်သူ

အခန်း ၇၈၀ နတ်ဘုရားဖြစ်လာခြင်း

“ကောင်းဖန်...ဆရာကြီးတစ်ယောက်က ငါတို့ကိုကြည့်နေတယ်” ပင်လယ်ဝတုတ်သည် ကောင်းဖန်၏ ပခုံးကို ခေါင်းဖြင့် ထိလိုက်သည်။

ကောင်းဖန်က ဖြည်းညင်းစွာ ခေါင်းညိတ်လိုက်ပြီး “ငါမြင်တယ်” ဟု ပြောလိုက်သည်။

သူ ဘယ်လိုလုပ် မမြင်ဘဲနေနိုင်မည်နည်း။ အနောက်ကောင်းကင်မှာ လနှစ်စင်း တက်လာသည်။ လနှစ်စင်း၏ အလယ်တွင် ဒေါင်လိုက် အပေါက်တစ်ခုရှိသည်။

ကောင်းဖန်က သူတို့ကို မျက်လုံးတစ်စုံအဖြစ် ချက်ချင်းမှတ်မိလိုက်သည်။

ဤမျက်လုံးနှစ်လုံးသည် လထက်သေးငယ်သော်လည်း ၎င်းတို့သည် အခြားကြယ်များထက် များစွာကြီးမားသည်။

ထိုမျက်လုံးနှစ်လုံးက သူရှိရာဆီသို့ စိုက်ကြည့်နေသည်။ ၎င်းတို့ကို ဒန်ဘီက ဆွဲဆောင်နေကြောင်း သိရန် တွေးတောစရာ မလိုပေ။

ကောင်းဖန်သည် ဇယာများ မပေါ်မီ အချိန်အတော်ကြာအောင် ကြည့်လိုက်ရသည်။

[သားရဲ အမည်] - ချင်းထျန်နဂါး

[ထိန်းချုပ်ထားသော စည်းမျဉ်းများ] - သစ်သားစည်းမျဉ်း ၃၁.၂ ရာခိုင်နှုန်း၊ ကြီးထွားမှုစည်းမျဉ် ၄၅ ရာခိုင်နှုန်း၊ ဆူပူမှု စည်းမျဉ်း ၃၉ ရာခိုင်နှုန်း

[သားရဲ စွမ်းရည်ဆင့်] - ဒဏ္ဍာရီဆန်စွမ်းရည်ဆင့်

[သားရဲ အဆင့်] - အဆင့်မြင့်နတ်ဘုရား

[သားရဲ အခြေအနေ] - ကျန်းမာ (စိတ်ငြိမ်)

[ထူးခြားသော လက္ခဏာများ] - မိုးပြာရောင်ကောင်းကင်

[အကျိုးသက်ရောက်မှု ၁] - ချင်းထျန်နဂါးသည် တစ်နေရာတွင် အချိန်ကြာမြင့်စွာ တည်ရှိနေသောအခါ ထိုဒေသသည် တောက်ပလာသည်။

[အကျိုးသက်ရောက်မှု ၂] - တောက်ပသောပတ်ဝန်းကျင်တွင် ချင်းထျန်နဂါး၏သစ်သားအမျိုးအစားစည်းမျဉ်းသည် စွမ်းအားတိုးလာသည်။ ပြောင်းပြန်လှန်ခြင်း (ချင်းထျန်နဂါးသည် အသက်၏စွမ်းအားကို ပြောင်းပြန်လှန်နိုင်သည်။ ၎င်းသည် ၎င်း၏ကြီးထွားမှုစည်းမျဉ်းကို ညှိုးနွမ်းစေသောစည်းမျဉ်းအဖြစ်သို့ ပြောင်းပြန်ဖြစ်စေပြီး အုပ်ချုပ်မှုအပေါ် ညီမျှစွာထိန်းချုပ်နိုင်သည်။)

[အကျိုးသက်ရောက်မှု ၁] - ပြောင်းပြန်အကျိုးသက်ရောက်မှုကို အသက်သွင်းပြီးနောက် ချင်းထျန်နဂါး၏ကြီးထွားမှုစည်းမျဉ်းသည် တစ်နေ့အတွင်း ညှိုးနွမ်းစေသောစည်းမျဉ်း အဖြစ်သို့ ပြောင်းလဲသွားမည်ဖြစ်သည်။

အရိပ်အမြွက် - ဤစွမ်းအင်သည် တစ်နေ့တာအတွင်းသာ အသုံးပြုနိုင်သည်။

ကြီးထွားမှု (ချင်းထျန်နဂါးမှအသုံးပြုသော ကြီးထွားမှုစည်းမျဉ်းသည် ကြီးမားသောဒေသ၏ပတ်ဝန်းကျင်ကို ပြောင်းလဲနိုင်ပြီး ထိုဒေသကို သစ်တောအဖြစ်သို့ ပြောင်းလဲနိုင်သည်။)

[အကျိုးသက်ရောက်မှု ၁] - ကြီးထွားမှုသည် ဒေသ၏ ပထဝီဝင်ကို လျစ်လျူရှုသည်။ မတူညီသော ပထဝီဝင်အနေအထားအရ မတူညီသော သစ်တောများကို ဖန်တီးနိုင်သည်။

[အကျိုးသက်ရောက်မှု ၂] - အသွင်ပြောင်းသစ်တောတွင် သစ်သားသားရဲများ ကြီးထွားရန် ဖြစ်နိုင်ခြေရှိသည်။ သစ်သားသားရဲသည် ချင်းထျန်နဂါး၏အမိန့်ကို လုံးဝနာခံသည်။

[သားရဲ ဖော်ပြချက်] - နတ်ဘုရားတိုင်းသည် ထူးခြားသည်။ သူတို့သည် မျိုးနွယ်စု၏ သဘောတရားကို ကျော်လွှားပြီးဖြစ်သည်။ ၎င်းသည် အသက်စည်းမျဉ်း၏ ၄၅ ရာခိုင်နှုန်းကို ထိန်းချုပ်ထားသည့် နတ်ဘုရားဖြစ်သည်။ ထို့ကြောင့် သတ်ရန် အလွန်ခဲယဉ်းသည်။ ၎င်း၏ သစ်သားစည်းမျဉ်းနှင့် ဆူပူခြင်းစည်းမျဉ်းတို့က ၎င်းအား ကြီးမားသော အဖျက်စွမ်းအားကို ပေးသည်။

ဒန်ဘီက အော်ဟစ်ပြီး ဂြိုလ်တွေ ပေါက်ကွဲသည့်အခါ ပေါ်လာသော တွင်းနက်တစ်ခုလို အတွင်းပိုင်းကို ပြိုကျသွားသည်။

တွင်းနက်ကြီးသည် အဆက်မပြတ် စိမ့်ဝင်နေပြီး ကြီးမားသော စိတ်စွမ်းအား ပမာဏသည် ၎င်းထဲသို့ ပြေးဝင်လာသည်။

နောက်ဆုံးတွင် ကောင်းဖန်သည် သားရဲစိတ်ဝိညာဉ်စွမ်းအား အဘယ်ကြောင့် လိုအပ်ကြောင်း နားလည်လာသည်။

စိတ်ဝိညာဉ်စွမ်းအားသည် စံနှုန်းနှင့်မညီပါက နတ်ဘုရားဖြစ်မှုကို ဖွဲ့စည်းရန်နည်းလမ်းမရှိပေ။ အကယ်၍ နတ်ဘုရားဖြစ်မှုသည် မအောင်မြင်ပါက ဒါမှမဟုတ် စိတ်ဝိညာဉ်စွမ်းအား အများစု ကုန်ဆုံးသွားပါက ရလဒ်ကို ခန့်မှန်းနိုင်မည် ဖြစ်သည်။

သို့သော် ဒန်ဘီအတွက်တော့ စိုးရိမ်စရာနည်းနည်းမှ မရှိပေ။

ဒန်ဘီ၏ အမျိုးအစားမှာ စိတ်ဝိညာဉ်ရှိနှင့်ပြီးဖြစ်သည်။ ဒဏ္ဍာရီလာအဆင့် ဝိညာဉ်တစ်ခုသည် တူညီမှုမရှိပါက နတ်ဘုရားအဆင့်ကို ဖြတ်ကျော်နိုင်သော မည်သူမျှ ရှိမည်မဟုတ်ပေ။

အဝေးမှ ချင်းထျန်နဂါးသည် ဘာမှ မပြောပေ။ ကောင်းကင်ကနေသာ ဒီနေရာကို တိတ်တဆိတ် ကြည့်နေသည်။

အနည်းဆုံး လောလောဆယ်တော့ ဒါက အန္တရာယ်ဖြစ်မည့်ပုံမပေါ်ပေ။

အချိန်တွေကုန်သွားသည်။

နောက်ဆုံးတော့ ကန့်သတ်ချက်တစ်ခုကို ရောက်သွားသည်။

ဒန်ဘီ၏ရင်ဘတ်အထက်တွင် အနက်ရောင်ပလ္လင်တစ်ခုသည် ၎င်း၏ကိုယ်ပေါ်တွင် ရစ်ဝဲနေသည်။

နတ်ဘုရားဖြစ်မှု လေးခုသည် ယဇ်ပလ္လင်ပေါ်သို့ သွန်းလောင်းနေသည်။

အပေါ်မှအောက်ခြေအထိတန်းစီထားသည်။

နတ်ဘုရားပညတ်တစ်ခုစီသည် ထက်မြက်ပြီး ပြိုးပြိုးပြက်ပြက်တောက်ပနေသည်။

မရဏနတ်ဘုရားဖြစ်မှု၊ စိတ်ဝိညာဉ်နတ်ဘုရားဖြစ်မှု၊ တစ္ဆေနတ်ဘုရားဖြစ်မှု၊ အရိုးဖြူနတ်ဘုရားဖြစ်မှု…

“နတ်ဘုရားဖြစ်မှု လေးခု.. သူ့မှာ မရဏနတ်ဘုရားဖြစ်မှု၊ စိတ်ဝိညာဉ်နတ်ဘုရားဖြစ်မှု၊ တစ္ဆေနတ်ဘုရားဖြစ်မှုရှိတယ်” ဟု ချင်းထျန်နဂါးက အော်ပြောပြီး ဒန်ဘီကိုကြည့်ရင်း သူ့ရဲ့မျက်လုံးတွေက တောက်ပနေသည်။

ဒန်ဘီသည် ယဇ်ပလ္လင်ကို သွန်းလောင်းပြီးသွားသောအခါ ၎င်း၏ခန္ဓာကိုယ်မှ ကြီးမားသော ရောင်ဝါတစ်ခု ထွက်လာသည်။

ဒန်ဘီသည် လေထုထဲတွင် လွင့်ပျံနေပြီး မျက်လုံးထဲတွင် ဖုတ်ကောင်မီးတောက် တောက်လောင်နေသည်။

ဒန်ဘီ၏အရိုးများသည် ရွှေရောင်အလင်းတန်းတစ်ခုဖြင့် ဖုံးအုပ်ထားပြီး ၎င်း၏ခန္ဓာကိုယ်တစ်လျှောက် ရွှေအရိုးများ ထိုးဖောက်ဝင်ရောက်လာသည်။

ဒန်ဘီ၏နောက်တွင် အလွန်ကြီးမားသော အရိုးဖြူနတ်ဆိုးနတ်ဘုရားရုပ်လွှာသည် ကမ္ဘာပေါ်သို့ ကျရောက်လာသည်။ ယခင် အရိုးဖြူနတ်ဆိုးနတ်ဘုရားရုပ်လွှာနှင့် မတူဘဲ ယခု အရိုးဖြူနတ်ဆိုးနတ်ဘုရားရုပ်လွှာ၏လက်တွင် နီညိုရောင်ကောက်ရိတ်ဓားရှည် တစ်ခုရှိသည်။

ရုပ်ပုံလွှာသည် ဒန်ဘီ၏ အနောက်မှ ထွက်လာပြီး ဒန်ဘီနှင့် တစ်သားတည်း ပေါင်းစပ်သွားသည်။

ဒန်ဘီ၏ ခန္ဓာကိုယ် တုန်ခါသွားပြီး ယဇ်ပလ္လင်ပေါ်ရှိ နတ်ဘုရားဖြစ်မှုလေးခုသည် ရူးသွပ်စွာ တိုးလာသည်။

ပညတ်အကြောင်းအရာများလည်း အဆက်မပြတ် မြင့်တက်လာသည်။

နတ်ဘုရားဖြစ်မှု တစ်ခုစီသည် ၎င်းတို့၏မူလအရွယ်အစားထက် သုံးဆအထိ တိုးလာကာ နတ်ဘုရားဖြစ်မှု လေးခု၏ ပညတ် အကြောင်းအရာသည် ၃ ရာခိုင်နှုန်းအထိ တိုးလာသည်။

လေပြင်များတိုက်ခတ်လာသည်။ လေငြိမ်သွားသောအခါ အစိမ်းရောင်တစ္ဆေပေါ်လာသည်။

တစ္ဆေသည် အလွန်မှုန်ဝါးနေသည်။

ထူထပ်သော လေဆာရောင်ခြည်ပြပွဲ စိတ္တဇပန်းချီကားတစ်ချပ်ကဲ့သို့ပင်။

“မင်းက အရမ်းတော်တယ်... နတ်ဘုရားအဆင့်ကို ဖြတ်ကျော်ဖို့ အနည်းဆုံး အနှစ် ၅၀ ကြာမယ်လို့ ငါထင်ထားတာ... ဒါပေမယ့် မင်းက အနှစ်၂၀ တောင် မပြည့်သေးဘူး” ချင်းထျန်နဂါးသည် စိတ်ခံစားမှုများဖြင့် ပြောလိုက်သည်။

ကောင်းဖန်၏ အမူအရာမှာ ငြိမ်သက်နေသည်။ ငယ်ငယ်ကတည်းက ဒီလို ချီးမွမ်းသံတွေ အများကြီး ကြားခဲ့ရသောကြောင့် ဖြစ်နိုင်သည်။

“မင်းကြည့်ရတာ ဘဝင်မမြင့်သလို ဒေါသလည်း မထွက်တတ်ဘူး.. ကောင်းတယ်” ချင်းထျန်နဂါးက သဘောကျစွာ ခေါင်းညိတ်လိုက်သည်။

“အဲဒီတုန်းက မင်းရဲ့မျိုးနွယ်စုကို ခေတ်အဆက်ဆက် ကာကွယ်ဖို့ မင်းတို့လူသားမျိုးနွယ်ဘိုးဘေးတွေက ငါ့ကို အပ်နှံခဲ့ကြတယ်”

“ကောင်းပြီ... ငါတို့ အချင်းချင်းတွေ့ပြီးပြီဆိုတော့ ငါသွားသင့်ပြီ”

ချင်းထျန်နဂါးသည် ပြောပြီးသွားသောအခါထွက်သွားသည်။

ကောင်းဖန်ဆွံ့အသွားသည်။ အဲဒါကို လာပြောတာလား...

“မင်းမှာ တခြား အကြံဉာဏ်တွေ ရှိသေးလား” ကောင်းဖန်က အစမ်းသဘောမေးလိုက်သည်။

“ငါက အိုလှပြီ.. ငါ့မှာ ဘာ အကြံဉာဏ်မှ မရှိဘူး.. ခေတ်တွေက ပြောင်းနေတာ.. တစ်ခါတလေမှာ မပြောင်းလဲတဲ့ ရှုထောင့်နဲ့ပဲ ဒီကမ္ဘာကြီးကို မကြည့်သင့်ဘူး” ဟု ချင်းထျန်နဂါးက အဓိပ္ပါယ်ရှိစွာ ပြောပြီးနောက်အစိမ်းရောင် မိုးရေများအဖြစ် ပြောင်းလဲကာ လေထဲသို့ ပျောက်ကွယ်သွားသည်။

“သခင်... ငါတို့ကိုကြည့်နေတဲ့ သားရဲတစ်ကောင်ရှိသေးတယ်” ဟု အနောက်တောင်ဘက်သို့ လှမ်းကြည့်ရင်း ဒန်ဘီက ပြောလိုက်သည်။

ကောင်းဖန်က ခေတ္တရပ်လိုက်ပြီး “ဘယ်သူလဲ” ဟု မေးလိုက်သည်။

“သူ့အကြည့်တွေ ပျောက်သွားပြီ... သူက နတ်ဘုရားပဲ” ဟု ဒန်ဘီက အသံတိုးတိုးနဲ့ ပြောလိုက်သည်။

ကောင်းဖန်က သူ့ခေါင်းကို ကုတ်လိုက်သည်။ နတ်ဘုရားတွေအများကြီး ဘာလို့ ရုတ်တရက်ပေါ်လာတာလဲ...

ကောင်းဖန်သည် ဤနတ်ဘုရားများ ယခုမှ ဤနေရာတွင် ပေါ်လာခြင်းဟု မထင်ပေ။ ၎င်းတို့သည် အချိန်အတော်ကြာအောင် တည်ရှိနေခဲ့ကြရမည်ဖြစ်သည်။

ဒါပေမယ့် အရင်တုန်းကတော့ သူတို့က တူညီတဲ့အဆင့်မှာ မရှိပေ။

သူတို့သည် ဤကမ္ဘာကြီး၏ အပြောင်းအလဲကို အေးစက်သော မျက်လုံးများဖြင့် တချိန်လုံး စောင့်ကြည့်နေခဲ့ကြပေမည်။

“ပြန်ကြရအောင်” ကောင်းဖန်က ဒန်ဘီကို ပြောလိုက်သည်။ “မင်း ဖြတ်ကျော်သွားပြီးပြီ... မင်းရဲ့စွမ်းအင်တွေကို လေ့ကျင့်ဖို့ အချိန်တစ်ခုလိုတယ်”

…

ချွမ်းရှု၊ ဟွမ်းတောင်

တောင်ထိပ်တစ်ဝက်လောက် ပြိုကျပြီး တောင်ရဲ့အလယ်မှာ ဧရာမအက်ကွဲကြောင်းကြီး ရှိနေသည်။

လေးလံသော အရာတစ်ခုကို ပြင်းပြင်းထန်ထန် တွန်းထုတ်လိုက်သကဲ့သို့ပင်။

ပင့်ကူအိမ်ကဲ့သို့ အက်ကွဲကြောင်းများ အပြင်သို့ ပျံ့နှံ့သွားသည်။

ဂူအလယ်တွင် ဧရာမရွှေဝါရောင် ဗုဒ္ဓ ထိုင်နေသည်။

သူ့မျက်နှာက အေးချမ်းသည် နူးညံ့သည်။ သူ့လက်ချောင်းများတွင် ပန်းများကို ကိုင်ထားသည်။

တစ်ဝက်ကျိုးသွားသည် တောင်ကြီးက ပျော့ပျောင်းသည့် ကုလားထိုင်လိုပင်။

ဟွမ်တောင်တန်းကို ဗဟိုပြု၍ ကီလိုမီတာ ဒါဇင်နှင့်ချီသော အချင်းဝက်အတွင်း စခန်းငယ်များစွာကို စုဝေးထားသည်။

ဟွမ်တောင်တန်းသို့ ထူးခြားသော ဧည့်သည်များ ရောက်လာသည်။

ကောင်းဖန်သည် မျက်လုံးများကို မှိတ်ထားကာ နေရောင်ကိုကာရန် ဘယ်လက်ကို သူ့မျက်ခုံးပေါ်တင်ပြီး ဤဗုဒ္ဓကို ကြည့်လိုက်သည်။

ဗုဒ္ဓရုပ်ထုသည် မီတာ ၁၀၀ မြင့်သည်။ ဤခန္ဓာကိုယ်အရွယ်အစားသည် သားရဲများအတွက်တော့ ကြီးမားသည် မဟုတ်ပေ။

ဒါပေမယ့် တော်တော်မြင့်သည်။

ပို၍အရေးကြီးသည်က ဤသည်မှာ နတ်ဘုရားဖြစ်သည်။