အချိန်လေဟာနယ် အင်မော်တယ်စွမ်းအင်

ရွှီချင်းနှင့် ကြယ်တာရာစက်ဝန်းက တိုက်ခိုက်နေစဉ်…

အင်မော်တယ်နန်းတော်၏ အပြင်ဘက်၊ အမှတ်ငါးကြယ်တာရာစက်ဝန်းမှ အနောက်ပိုင်းကြယ်စင်စု၏ အလွန်၊ အရှေ့ပိုင်းကြယ်စင်စု၏ ဧရာမတောင်ထိပ်တစ်ခုပေါ်တွင်…

ရှည်လျားသော မျှော်စင်တစ်သန်းက ထောင်မတ်နေကြသည်။

အဝေးမှကြည့်လျှင် ၎င်းတို့က ကောင်းကင်ထဲထိ အဆုံးမဲ့စွာ ဆန့်တန်းနေကြောင်း မြင်နိုင်လိမ့်မည်။

မျှော်စင်တစ်ခုစီက ကြယ်အလင်းရောင်ဖြင့် ထွန်းလင်းတောက်ပနေကြသည်။ ဤသည်မှာ ၎င်းတို့က ကောင်းကင်ပေါ်မှ ကြယ်များကို ပုံရိပ်ပြန်နေသည့်အလားပင်။

သံကြိုးများက ထိုမျှော်စင်အဆောက်အဦးများကို တစ်ခုနှင့်တစ်ခု ဆက်သွယ်ပေးထားကြသည်။

ထိုစည်းချအစီအရင်၏ ဗဟိုချက်တွင် တခြားမျှော်စင်များထက် သိသိသာသာ ပိုမြင့်သော မျှော်စင်တစ်ခုက ထောင်မတ်နေသည်။ ၎င်းထံမှ အလင်းရောင်က လွန်စွာ တောက်ပလေရာ ကောင်းကင်တစ်ခုလုံးကို ထိန်ထိန်လင်းစေရန် လုံလောက်သည်။

ထိုမျှော်စင်သည် ကြယ်တာရာစက်ဝန်းမျှော်စင်၏ ပင်မဌာနဖြစ်သည်။

မျှော်စင်ထဲတွင် တာအိုဝတ်စုံကို ဝတ်ဆင်ထားသော အဖိုးအိုတစ်ယောက်က လက်နောက်ပစ်လျက် အနောက်အရပ်သို့ ကြည့်ရှုနေသည်။ ထိုအဖိုးအိုမှာ သူတော်စင်တစ်ယောက်၏ ကိုယ်ဟန်အမူအရာရှိပြီး လေထဲမှာ သူ၏ ဆံပင်ဖြူက လွင့်မျောနေသည်။ သူ၏ တစ်ကိုယ်လုံးမှ မွန်မြတ်သန့်စင်သော ခံစားမှုကို ထုတ်လွှတ်နေသည်။ ထို့ပြင် သူ၏ မျက်လုံးများက ဝင်းလက်နေလေရာ သူက စကြာဝဠာ၏ လည်ပတ်မှုကို မြင်နိုင်သည့်အလားပင်။

သူက ကြယ်တာရာစက်ဝန်းမျှော်စင်၏ မျှော်စင်သခင်ဖြစ်သည်။

သူက အရှေ့ပိုင်းကြယ်စင်စုတစ်ခုလုံး၏ ကောင်းကင်စောင့်ရှောက်သူဖြစ်ပြီး နွေဦးအင်မော်တယ်တစ်ပါး ဖြစ်သည်။

သူက ကြယ်တာရာစက်ဝန်း၏ ဆရာလည်း ဖြစ်သည်။

“ ကြယ်တာရာစက်ဝန်းရဲ့ ကံကြမ္မာမှာ ကြောက်စရာကောင်းတဲ့ ကပ်ဘေးတစ်ခု ထွက်ပေါ်လာပြီ ”

“ အဲ့ဒီကပ်ဘေးက အစက မရှိခဲ့ဘူး… အဲ့ဒါက လွန်ခဲ့တဲ့ နှစ်အနည်းငယ်တုန်းက ရုတ်တရက် ထွက်ပေါ်လာပြီး သူ့ကံကြမ္မာရဲ့ ဇစ်မြစ်ကို စိန်ခေါ်နေတယ် ”

“ ဒီကပ်ဘေးကို သူကျော်လွှားနိုင်မယ်ဆိုရင် သူက နေတစ်စင်းလို တစ်ဟုန်ထိုး မြှောက်တတ်သွားလိမ့်မယ် ”

အဖိုးအိုက နူးညံ့စွာ တီးတိုးရေရွတ်လိုက်သည်။ ထို့နောက် သူက ညာလက်ကို မြှောက်လိုက်ပြီး ချိပ်တံဆိပ်လက်သင်္ကေတများကို ထုတ်ဖော်လိုက်သည်။ တစ်ခဏကြာပြီးနောက် ထူးဆန်းသော အလင်းက သူ၏ မျက်လုံးထဲမှာ ထွက်ပေါ်လာသည်။

“ တကယ်လို့ ကပ်ဘေးကို ပြောင်းလဲလိုက်မယ်ဆိုရင် အစွန်းရောက်ကံကြမ္မာကောင်းက ဘယ်လိုလုပ် သူ့ဘာသာ ထွက်ပေါ်လာတော့မှာလဲ ”

“ ကြယ်တာရာစက်ဝန်းက ဒီကပ်ဘေးကို သူ့ဘာသာ ရင်ဆိုင်ရလိမ့်မယ် ”

…..

အဖိုးအိုတွက်ချက်ခဲ့သည့်အတိုင်း ကပ်ဘေးက ကျရောက်လာသည်။

အင်မော်တယ်နန်းတော်၏ ပဉ္စမအလွှာထဲတွင်…

ကြယ်တာရာစက်ဝန်း၏ ခန္ဓာကိုယ်က တုန်ယင်နေပြီး သူ၏ ကိုယ်တွင်းအင်္ဂါများက ကပြောင်းကပြန် ဖြစ်သွားသည်။ သူက သွေးတစ်ပွက် အန်လိုက်ပြီး နောက်တစ်ခါ အနောက်ဆုတ်သွားသည်။ ဤတစ်ကြိမ်တွင် သူက ခြေခုနစ်လှမ်း အနောက်ဆုတ်သွားရသည်။

သူက ခြေတစ်လှမ်း လှမ်းလိုက်တိုင်း ကြယ်အလင်းရောင်က တောက်ပလာသည်။

ပိုပြီးစိတ်ဓာတ်ပြတ်သားမှုက သူ၏ နှလုံးသားထဲမှာ ထွက်ပေါ်လာသည်။

ကြယ်တာရာစက်ဝန်းသည် အရှေ့ပိုင်းကြယ်စင်စု၏ နာမည်အကျော်ကြားဆုံး ကောင်းကင်အရွေးချယ်ခံဖြစ်ပြီး အမှတ်ငါးကြယ်တာရာစက်ဝန်းတစ်ခုလုံး၌ ဤမျိုးဆက်၏ နံပါတ်တစ်ပါရမီရှင်အဖြစ် လူအများ၏ အသိအမှတ်ပြုခံထားရသူ ဖြစ်သည်။

သူ၏ ဘဝက ခမ်းနားတောက်ပသည်ဟု ဆိုနိုင်သည်။

သူ၏ နောက်ခံသော်လည်းကောင်း သို့မဟုတ် ကျင့်ကြံခြင်းအခြေခံသော်လည်းကောင်း တခြားကြယ်ပွင့်များထက် ပိုပြီးသာလွန်သည်။

အမှန်မှာ သူက ကြယ်တာရာစက်ဝန်းမျှော်စင်၏ ကြယ်တာရာစက်ဝန်းဟူသော နာမည်ကိုပင် အမွေဆက်ခံနိုင်ခဲ့သည်။ ရှဲလင်းဇီနှင့် ကျိုးကျန်းလီသည်ပင် ၎င်းတို့က သူ့ဆရာ သူ့အတွက် စီစဉ်ပေးထားသော ခြေနင်းကျောက်တုံးများသာ ဖြစ်ကြသည်။

ရွှီချင်းနှင့် မတွေ့ဆုံခင်အထိ သူ၏ ဘဝ၊ အရှိန်အဟုန်နှင့် လမ်းကြောင်းက ဖော်မပြနိုင်အောင် အဆင်ပြေချောမွေ့ခဲ့သည်။ သူ့ဆီမှာ မည်သည့်အခက်အခဲမှ သို့မဟုတ် မည်သည့်အတားအဆီးမှ မရှိခဲ့ပေ။ သို့သော်လည်း ရွှီချင်းနှင့် သူတွေ့ဆုံသည့်အချိန်မှစ၍ အရာအားလုံး ပြောင်းလဲသွားသည်။

သူက ဆက်တိုက် ဖိနှိပ်ခံခဲ့ရသည်။

သူက စတုတ္ထအလွှာထဲမှာ သမိုင်းကို အစီအစဉ်အတိုင်း ထိန်းသိမ်းရန် ကြိုးစားခဲ့သော်လည်း ရွှီချင်းကြောင့် ကျရှုံးသွားခဲ့သည်။ ထို့ပြင် သူက ပဉ္စမအလွှာထဲမှာ အဆင့်ချိုးဖြတ်ရန် ဆောင်ရွက်ခဲ့သော်လည်း တစ်ဖက်လူကြောင့် မောင်းထုတ်ခံခဲ့ရသည်။

အမှန်မှာ ကံကြမ္မာက သူ့ကို ကစားနေသည်ဟုပင် သူခံစားနေမိသည်။

သို့သော်လည်း ထိုအတွေး ထွက်ပေါ်လာသည်နှင့်ချက်ချင်း…

အေးစက်စက် အလင်းတန်းက ကြယ်တာရာစက်ဝန်း၏ မျက်လုံးထဲမှာ ထွက်ပေါ်လာသည်။ သူ၏ နှလုံးသားထဲတွင် အတွေးများ၊ ကိုယ်တွင်းမိစ္ဆာများနှင့် ကံကြမ္မာကို ဖြတ်တောက်နိုင်သော ဓားတစ်လက်ရှိသည်။

“ ငါ့ရဲ့ ကံကြမ္မာက ငါ့ရဲ့ လက်ထဲမှာပဲ ရှိတယ် ”

ကြယ်တာရာစက်ဝန်းက ရွှီချင်းကို စိုက်ကြည့်လိုက်သည်။ ခြေလှမ်းဝက်အင်မော်တယ်အရှိန်အဝါက သူ၏ ခန္ဓာကိုယ်ထဲမှ ပေါ်လျှိုးလာသည်။ ထို့နောက် မရေမတွက်နိုင်သော သံကြိုးများက လေထဲမှာ ထွက်ပေါ်လာကြပြီး သူ့ကို ဝန်းရံသွားကြသည်။

အမိန့်စိတ်ဆန္ဒက ဤအခိုက်အတန့်မှာ အလွန်အမင်း အားကောင်းလာသည်။

သူ့မှာ အသုံးမပြုရသေးသော ဝှက်ဖဲတစ်ကတ်ရှိသည်။

ယင်းက ခြေလှမ်းဝက်အင်မော်တယ်အဆင့်သို့ သူတတ်လှမ်းခဲ့စဉ်က သူ့ကိုယ်ပိုင်ကံကြမ္မာထဲမှ ထုတ်ယူခဲ့သော ဥပဒေသဖြစ်သည်။ သူ၏ အမိန့်အာဏာစက်ကို ညီမျှမှုအဆင့်သို့ မြှင့်တင်လိုက်သည့်အတောအတွင်း ထိုဥပဒေသက စပါးစေ့အဖြစ် ဒြပ်ထည်ဖွဲ့စည်းသွားခဲ့သည်။

ထိုဥပဒေသ၏ နာမည်သည်တော့…

“ ကောင်းကင်ဘုံဥပဒေသ ”

ကြယ်တာရာစက်ဝန်းက ညာလက်ကို မြှောက်လိုက်ပြီး ဟင်းလင်းပြင်ကို ဖမ်းဆုပ်လိုက်သည်။

ကောင်းကင်ဘုံအသံက သူ၏ ပါးစပ်ထဲမှ ထွက်ပေါ်လာသည်။

“ ထွက်ပေါ်လာစမ်း ”

ထိုအသံ ထွက်ပေါ်လာသည်နှင့်ချက်ချင်း ပဉ္စမအလွှာက ပရမ်းပတာ တုန်လှုပ်သွားသည်။ ရွှီချင်း၏ ခြေလှမ်းသည်လည်း ရပ်တန့်သွားသည်။

ကြယ်တာရာစက်ဝန်းကို သူကြည့်လိုက်သည်နှင့် သူ၏ မျက်လုံးက ဝင်းလက်သွားသည်။ ဤအခိုက်အတန့်မှာ ကြယ်တာရာစက်ဝန်းက ယခင်ကနှင့် အနည်းငယ် ကွဲပြားသွားပုံပေါ်သည်။

အကယ်၍ အစောနက ကြယ်တာရာစက်ဝန်းကို သူထွင်းဖောက်မြင်နိုင်သည်ဆိုလျှင် ယခု တစ်ဖက်လူက ဝေဝါးသွားကြောင်း ရွှီချင်း ခံစားမိသည်။

ကြယ်တာရာစက်ဝန်း၏ အတိတ်၊ ပစ္စုပ္ပန်၊ အနာဂတ်နှင့် အပြိုင်စကြာဝဠာများထဲမှ တည်ရှိမှုအားလုံးက ဤအခိုက်အတန့်မှာ မထင်မရှား ဖြစ်လာကြသည်။

အန္တရာယ်ခံစားမှုက ရွှီချင်း၏ နှလုံးသားထဲမှာ ချက်ချင်း ထွက်ပေါ်လာသည်။

ထိုခံစားမှု၏ ဇစ်မြစ်က ဟင်းလင်းပြင်ထဲသို့ ဆန့်ထုတ်ထားသော ကြယ်တာရာစက်ဝန်း၏ လက်ထံမှ ထွက်ပေါ်လာခြင်း ဖြစ်သည်။

မြူတစ်မှုန်က သူ၏ လက်ထဲမှာ ထွက်ပေါ်လာသည်။

ထိုမြူမှုန်ကို မြင်လိုက်ရသည့်အခိုက် ရွှီချင်းက နှလုံးတုန်သွားသည်။ ဤသည်မှာ သူက ကြယ်တာရာစက်ဝန်းတစ်ခုလုံးနှင့် ရင်ဆိုင်နေရသည့်အလား ခံစားမိသွားသည်။

ယင်းကို မနာခံဘဲ မနေနိုင်သလို မလုယက်နိုင်ပေ။

ထိုတိုက်ပွဲကို ကြည့်ရှုနေကြသော ဘေးပတ်ဝန်းကျင်မှ ခြေလှမ်းဝက်အင်မော်တယ်များက ဤအခိုက်အတန့်မှာ အမူအရာပြောင်းလဲသွားကြသည်။

“ အဲ့ဒါက… ”

“ ကောင်းကင်ဘုံဥပဒေသ ”

“ ကြယ်တာရာစက်ဝန်းက တကယ်ရှိန်လောက်စရာကောင်းတာပဲ ”

အမိန့်အာဏာစက်၏ ပိုပြီးမြင့်သော အဆင့်က ညီမျှမှုဖြစ်သည်။ ယင်းက ကြယ်တာရာစက်ဝန်းကို သူ၏ ခြေလှမ်းဝက်အင်မော်တယ်လမ်းစဉ်တစ်လျှောက်လုံးမှာ အထောက်အပံ့ပေးနိုင်သည်။

သို့သော်လည်း ခြေလှမ်းဝက်အင်မော်တယ်အဆင့်ကို ချိုးဖြတ်ပြီး အဆင့်နိမ့်အင်မော်တယ်အဆင့်သို့ တတ်လှမ်းချင်သည်ဆိုလျှင် ညီမျှမှုတစ်ခုတည်းက ကြယ်တာရာစက်ဝန်းအတွက် မလုံလောက်ပေ။ ထိုအတွက် သူ၏ အမိန့်အာဏာစက်က အထွတ်အထိပ်သို့ ရောက်ရှိနေရန် လိုအပ်သည်။

ညီမျှမှုပြီးနောက် နောက်တစ်ဆင့်က ကောင်းကင်ဘုံဥပဒေသ ဖြစ်သည်။

သို့သော်လည်း လက်ရှိ ကြယ်တာရာစက်ဝန်းက သူ၏ အာဏာစက်ကို ကောင်းကင်ဘုံဥပဒေသအဆင့်ထိ ဆင်ခြင်နားလည်နိုင်ရန် မလုပ်နိုင်ပေ။

ခြေလှမ်းဝက်အင်မော်တယ်အဆင့်ကို သူစူးစမ်းလေ့လာရန် လိုအပ်နေသေးသည်။ ထိုအတောအတွင်းမှာ သူ၏ အင်မော်တယ်သန္ဓေသားလောင်းက အစစ်အမှန်အင်မော်တယ်အဖြစ် အသွင်ပြောင်းလဲရန်လည်း သူဆင်ခြင်နားလည်ရဦးမည်။

သူက ထိုအသွင်ပြောင်းလဲမှုကို ပြီးမြောက်နိုင်မှသာလျှင် ကောင်းကင်ဘုံဥပဒေသ၏ တစ်စိတ်တစ်ပိုင်း ဖြစ်လာလိမ့်မည်။

ထိုအချိန်ကျလျှင် သူက အဆင့်နိမ့်အင်မော်တယ်တစ်ပါး ဖြစ်လာလိမ့်မည်။

ယင်းက သူ၏ အနာဂတ်လမ်းစဉ် ဖြစ်သည်။

လက်ရှိ သူက ယင်းကို မရရှိနိုင်ပေ။

သို့သော်လည်း နံပါတ်တစ်ကြယ်ပွင့်အနေနှင့် သူက အကြီးအကဲများထံမှ အာဏာစက်လွှဲပြောင်းပေးခြင်းကို ငြင်းဆန်ခဲ့သော တစ်ယောက်တည်းသောလူ ဖြစ်သည်။ သူက ကိုယ်ပိုင်ဉာဏ်အလင်းများကို အသုံးပြု၍ သူ့ကိုယ်ပိုင်အာဏာစက်ကို ဆင်ခြင်နားလည်ခဲ့ပြီး ဤမျိုးဆက်၏ ပြိုင်ဘက်ကင်း ပါရမီရှင်တစ်ဦး ဖြစ်လာခဲ့သူ ဖြစ်သည်။

သို့ဖြစ်၍ ကောင်းကင်ဘုံဥပဒေသက ဖမ်းဆုပ်ရန် အလွန်ခက်ခဲသော်လည်း သူက ထိုသို့လုပ်ဆောင်နိုင်ခဲ့ဆဲပင်။ သူအဆင့်ချိုးဖြတ်သွားသည့်အခိုက် ကောင်းကင်ဘုံဥပဒေသ၏ မြူတစ်မှုန်ကို ရယူနိုင်ခဲ့သည်။

လွင့်မျောနေသော ထိုမြူမှုန်က ရွှီချင်းကို စိတ်မသက်မသာဖြစ်စေသည့် အဓိက အကြောင်းအရင်းဖြစ်သည်။

ကြယ်တာရာစက်ဝန်းက လက်ဝှေ့ယမ်းလိုက်သည်နှင့် မြူမှုန်က ရုတ်တရက် ဆင်းသက်လာသည်။

မြူမှုန်က တုနှိုင်းမဲ့သော စွမ်းအားနှင့်အတူ ရွှီချင်းအပေါ်သို့ ကျဆင်းလာသည်။

ကောင်းကင်ဘုံဥပဒေသ၏ မြူမှုန်က အရာအားလုံးကို မြှုပ်နှံလိမ့်မည်။ အသက်ရှင်ရန် လုံးဝ အခွင့်အရေးမပေးချေ။

ရွှီချင်းက မျက်မှောင်ကြုတ်လိုက်သည်။ ဤအခိုက်အတန့်မှာ သူခံစားမိသော ကပ်ဘေးအန္တရာယ်က အထွတ်အထိပ်သို့ ရောက်ရှိသွားသည်။ သူ၏ ခန္ဓာကိုယ်က မြန်ဆန်စွာ အနောက်ဆုတ်သွားသည်။

သို့သော်လည်း သူက အနည်းငယ် နောက်ကျသွားဆဲပင်။

မြူမှုန်ကျဆင်းလာသည်နှင့် ယင်းက ရွှီချင်း၏ ဦးခေါင်းပေါ်သို့ ရုတ်တရက် ရောက်ရှိသွားသည်။

မြူမှုန်က ကျဆင်းလာသည်။

ယင်းက မြူတစ်မှုန်မျှသာ ဖြစ်သော်လည်း ယင်းထဲမှာ ကိန်းအောင်းနေသော အလေးချိန်က တိုင်းတာမရနိုင်ပေ။ ရွှီချင်းက မည်သို့ခုခံပါစေ အချည်းနှီးသာ ဖြစ်၏။

ချက်ချင်းဆိုသလို အချက်ပေးခေါင်းလောင်းသံက သူ၏ စိတ်ထဲမှာ မြည်ဟိန်းသွားသည်။ ဤသည်မှာ သူ၏ ခန္ဓာကိုယ်က ထိုမြူမှုန်အောက်မှာ အပိုင်းပိုင်းအစစ အက်ကွဲသွားတော့မည့်အလားပင်။ သူ၏ ဝိညာဉ်သည်လည်း ထို့အတူပင်။ မြူမှုန်၏ အတိုင်းအတာမဲ့ အလေးချိန်အောက်မှာ အက်ကွဲရာများက ထွက်ပေါ်လာကြသည်။

ရွှီချင်း၏ အသက်ရှူသံက မြန်ဆန်လာသည်။ သေခြင်းအငွေ့အသက်က ဒီရေသဖွယ် သူ၏ ခန္ဓာကိုယ်ထဲမှ ပေါ်လျှိုးလာပြီး သူနှင့်ပတ်သက်သော အရာအားလုံးကို လွှမ်းခြုံသွားသည်။ သို့သော်လည်း သူ့မှာ နောက်ထပ် စဉ်းစားနေရန် အချိန်မရှိပေ။ သူက အနောက်ဆုတ်သွားနေရင်း ပဉ္စမအလွှာထဲမှ တိုက်ရိုက် ထွက်သွားပြီး အင်မော်တယ်နန်းတော်ထဲမှ ထွက်ခွာသွားသည်။

သူပြန်ပေါ်လာသည့်အခါ အင်မော်တယ်နန်းတော်၏ အပြင်ဘက်မှ အင်မော်တယ်ကျဆုံးလွင်ပြင်ပေါ်သို့ ရောက်ရှိသွားသည်။ သို့သော်လည်း မြူမှုန်က ဆက်လက် ကျဆင်းနေဆဲပင်။

ယင်းက ကံကြမ္မာနောက်ကို လိုက်၍ ဆက်ပြီး ကျဆင်းသွားသည်။

ရွှီချင်း၏ ခန္ဓာကိုယ်က နောက်ဆုံးမှာတော့ ယင်းကို မတောင့်ခံနိုင်တော့ဘဲ ပြိုကွဲပျက်စီးသွားသည်။ သူ၏ ဝိညာဉ်သည်တော့ အဝေးသို့ လွင့်မျောသွားသည်။ သူက အာဏာစက်ကို အသုံးပြု၍ အင်မော်တယ်ကျဆုံးလွင်ပြင်ပေါ်မှာ မြန်ဆန်စွာ ထွက်ပြေးသည်။

သို့သော်လည်း ကောင်းကင်ဘုံဥပဒေသအောက်တွင် မည်သည့်အရာမှ မလွတ်မြောက်နိုင်ပေ။

သို့ဖြစ်၍ နောက်အခိုက်အတန့်မှာ ရွှီချင်း၏ ဝိညာဉ်က ပြိုကွဲပျက်စီးသွားသည်။

သို့သော်လည်း သူမလွင့်ပြယ်သွားခင် ခါးသီးမှုကို ခံစားမိသွားပြီး သူ့အကြောင်းကို ပြန်တွေးတောလိုက်သည်။

အင်မော်တယ်နန်းတော်၏ စတုတ္ထအလွှာထဲတွင် အခြေအနေက အဆင်မချောခဲ့သော်လည်း သူက ကြယ်တာရာစက်ဝန်းနှင့် ပူးပေါင်းခဲ့ပြီး သမိုင်းကို ထိန်းသိမ်းခဲ့သည်။ နောက်ဆုံးမှာတော့ အခက်အခဲများကြားထဲမှာ သူတို့က အောင်မြင်ခဲ့ကြသည်။ ထို့နောက် သူတို့နှစ်ယောက်က ပဉ္စမအလွှာဆီသို့ ဝင်ရောက်ရန် အရည်အချင်းပြည့်မီခဲ့ကြသည်။

သို့သော်လည်း ပဉ္စမအလွှာမှ အခွင့်အလမ်းများနှင့် တွေ့ကြုံရသောအခါ မကြာသေးခင်ကမှ သူနှင့်မိတ်ဆွေဖြစ်ခဲ့သော ကြယ်တာရာစက်ဝန်းနှင့် အဆုံးအဖြတ်တိုက်ပွဲကို သူတိုက်ခိုက်ခဲ့ရသည်။

ယင်းက ကံကြမ္မာဖြစ်သည်။

ရွှီချင်းက နူးညံ့စွာ သက်ပြင်းချလိုက်ပြီး လွင့်ပြယ်သွားသည်။

သူရှိနေသော အချိန်လေဟာနယ်သည်လည်း နောက်ဆုံးမှာတော့ အက်ကွဲသွားပြီး ပြိုကွဲသွားသည်။ ဤသည်မှာ ထိုအချိန်လေဟာနယ်က ဖယ်ရှားခံလိုက်ရသည့်အလားပင်။

ပြိုကွဲပျက်စီးသွားသော ထိုအချိန်လေဟာနယ်၏ အပြင်ဘက်တွင် အင်မော်တယ်နန်းတော်၏ ပဉ္စမအလွှာက ဆက်လက် ရှိနေဆဲပင်။ ထိုနေရာမှာ တခြားရွှီချင်းက မြန်ဆန်စွာ အနောက်ဆုတ်သွားနေသည်။

မြူမှုန်က သူ့အပေါ်သို့ ကျဆင်းလာသည်။

နောက်ဆုံးမှာတော့ သူ၏ ခန္ဓာကိုယ်နှင့် ဝိညာဉ်က ဖျက်ဆီးခံလိုက်ရသည်။

သို့သော်လည်း တိုက်ပွဲက မပြီးဆုံးသေးပေ။ အဘယ့်ကြောင့်ဆိုသော် တတိယမြောက် ရွှီချင်းက အနောက်ဆုတ်သွားနေသောကြောင့် ဖြစ်သည်။

ထိုမြင်ကွင်းက ဘေးပတ်ဝန်းကျင်မှ ခြေလှမ်းဝက်အင်မော်တယ်များ၏ မျက်လုံးထဲသို့ ကျရောက်သွားသည့်အခါ သူတို့၏ အမူအရာက ထူးဆန်းသွားကြသည်။

“ ဒီလူမှာ… အချိန်လေဟာနယ်အာဏာစက်ရှိတယ် ”

“ အဲ့ဒါက အချိန်လေဟာနယ်ရဲ့ ပိုပြီးအဆင့်မြင့်တဲ့ ဥပဒေသပဲ ”

“ သူက တခြားအချိန်လေဟာနယ်တွေထဲက ခန္ဓာကိုယ်တွေကို မူလခန္ဓာကိုယ်နေရာမှာ အစားထိုးနေတာပဲ ”

သူတို့၏ မျက်လုံးထဲတွင် ကြယ်တာရာစက်ဝန်း၏ ကောင်းကင်ဘုံဥပဒေသမြူမှုန် ကျဆင်းလာသည့်အခိုက် အရေအတွက်များပြားသော အချိန်လေဟာနယ်လှိုင်းများက ရွှီချင်း၏ ခန္ဓာကိုယ်အပြင်ဘက်မှာ ထွက်ပေါ်လာကြသည်။ ထို့နောက် မတူညီသော အချိန်လေဟာနယ်များက တစ်ခုပြီးတစ်ခု ထွက်ပေါ်လာကြသည်။

ထိုအချိန်လေဟာနယ်များက ကောင်းကင်ဘုံဥပဒေသမြူမှုန်၏ အလေးချိန်ကို ခုခံရန် အသုံးပြုခြင်းခံလိုက်ရသည်။

မျက်စိတစ်မှိတ်အတွင်းမှာ အချိန်လေဟာနယ်သုံးခုက ပြိုကွဲပျက်စီးသွားသည်။

ထို့နောက် နောက်ထပ် အချိန်လေဟာနယ်ခုနစ်ခု ပြိုကွဲပျက်စီးသွားသည်။

ထို့နောက် နောက်ထပ် အချိန်လေဟာနယ်ဆယ့်နှစ်ခုက ဖျက်ဆီးခံလိုက်ရသည်။

ဖျက်ဆီးခံလိုက်ရသော အချိန်လေဟာနယ်များ၏ အရေအတွက်က များပြားလာသည်နှင့်အမျှ မြူမှုန်၏ အလေးချိန်က လျော့ကျလာပြီး ယင်းက ဝေဝါးလာသည်။ နောက်ဆုံးမှာတော့ (၄၆)ခုမြောက် အချိန်လေဟာနယ်က ဖျက်ဆီးခံလိုက်ရသည့်အခါ မြူမှုန်က လုံးဝပျောက်ကွယ်သွားသည်။

ကျန်ရှိသော အချိန်လေဟာနယ်များက ဤအခိုက်အတန့်မှာ ထွန်းလင်းတောက်ပလာသည်။ ထိုထဲမှ အချိန်လေဟာနယ်တစ်ခုထဲမှ ရွှီချင်းက ခေါင်းမော့လိုက်ပြီး ကြယ်တာရာစက်ဝန်းကို ကြည့်လိုက်လေရာ ထူးဆန်းသော အလင်းရောင်က သူ၏ မျက်လုံးထဲမှာ ထွက်ပေါ်လာသည်။

“ ဘယ်လောက် အစွမ်းထက်လိုက်တဲ့ ကောင်းကင်ဘုံဥပဒေသလဲ… ”

သူက သွေးဆောင်ခံလိုက်ရသည်။

ကြယ်တာရာစက်ဝန်းက ခါးသီးမှုကို ခံစားမိသွားသည်။ သူက ရွှီချင်းကို ကြည့်ပြီးနောက် တစ်ဖက်လူ၏ ဘေးပတ်ဝန်းကျင်ဆီသို့ အကြည့်ရွှေ့ပြောင်းလိုက်သည်။

ထိုနေရာတွင် အချိန်လေဟာနယ်လှိုင်းများက အဆုံးမဲ့စွာ လှုပ်ခတ်နေသည်။ ထိုနေရာမှာ အချိန်လေဟာနယ်က မည်မျှရှိကြောင်း သူမသိပေ။ ထို့အတူ တစ်ဖက်လူ၏ လုပ်နိုင်စွမ်းအကန့်အသတ်ကိုလည်း သူမသိပေ။

အမှန်မှာ ယခု သူ့ကို စကားပြောနေသော လူက တခြားအချိန်လေဟာနယ်မှ ရွှီချင်းလော သို့မဟုတ် ပစ္စုပ္ပန်လောကမှ အစစ်အမှန်ရွှီချင်းလော သူသေချာမပြောနိုင်ပေ။

ယင်းက မျဉ်းပြိုင်အာဏာစက် ဖြစ်သည်။

အပြိုင်စကြာဝဠာများကို ဆင့်ခေါ်ခြင်းနှင့်အတူ တခြားအချိန်လေဟာနယ်များထဲမှ ခန္ဓာကိုယ်များကို သူ့ကိုယ်စား အစားထိုး သေဆုံးခိုင်းနိုင်သည်။

သီအိုရီအရဆိုလျှင် ယင်းက အနန္တဖြစ်သည်။

သို့သော်လည်း လက်ရှိ ရွှီချင်းမှာ သူ့ကိုယ်ပိုင် အကန့်အသတ်ရှိသည်။ သူ၏ အင်မော်တယ်သန္ဓေသားလောင်းနှင့် အာဏာစက်အပေါ် နားလည်သဘောပေါက်မှုအရ လက်ရှိ သူ၏ အကန့်အသတ်က (၅၄)ခု ဖြစ်သည်။

သေဆုံးမှုကို အစားထိုးသော ဤနည်းလမ်းသည် မတူညီသော အချိန်လေဟာနယ်များထဲမှ သူ၏ တခြားမူကွဲများကို ပစ္စုပ္ပန်လောကထဲမှ အစစ်အမှန်ခန္ဓာကိုယ်ဖြင့် ရောထွေးပစ်ခြင်း ဖြစ်သည်။ ယင်းက မူရင်းနှင့် မူကွဲကြားတွင် ကွဲပြားခြားနားမှုတစ်ခုကို ဖြစ်ပေါ်စေသည်။

သို့ဖြစ်၍ မတူညီသော အချိန်လေဟာနယ်များထဲမှ သူ၏ တခြားမူကွဲများ သေဆုံးခြင်းက သူ၏ မူလခန္ဓာကိုယ်အပေါ် သက်ရောက်မှုအနည်းငယ် ရှိသည်။ သို့သော်လည်း ယင်းက သူ၏ အခြေခံအုတ်မြစ်ကို ထိခိုက်စေနိုင်သည်အထိ မကြီးမားပေ။

သို့ဖြစ်၍ တစ်စုံတစ်ယောက်က ရွှီချင်းကို အမှန်တကယ် သတ်ချင်သည်ဆိုလျှင် သူခြယ်လှယ်နိုင်သော အချိန်လေဟာနယ်အားလုံးနှင့် ယင်းတို့ထဲမှ သူ၏ တခြားမူကွဲအားလုံးကို လုံးဝအမြစ်ပြတ် သုတ်သင်ရှင်းလင်းပစ်ရလိမ့်မည်။

သို့မှသာလျှင် မူရင်းနှင့် မူကွဲကြားမှ ဆက်သွယ်မှုကို ဖြတ်တောက်နိုင်လိမ့်မည်။

“ မင်းကို ငါသတ်လိုက်ရင် အဲ့ဒီကောင်းကင်ဘုံဥပဒေသမြူမှုန်က မင်းဆီကနေ ထွက်ခွာသွားမလား ငါသိချင်မိတယ်… ”

ရွှီချင်းက ဖြည်းညင်းစွာ ပြောလိုက်သည်နှင့် သူ၏ အသံက အချိန်လေဟာထဲမှ ပျံ့လွင့်ထွက်လာသည်။

ထို့နောက် သူက ညာလက်ကို မြှောက်လိုက်သည်။ နောက်အခိုက်အတန့်မှာ ကြောက်မက်ဖွယ်ကောင်းသော ဓားစိတ်ဆန္ဒက သူ၏ လက်ထဲမှာ ထွက်ပေါ်လာပြီး ဧကရာဇ်ဓားအဖြစ် ပြောင်းလဲသွားသည်။

ထို့ပြင် ယင်းက အချိန်လေဟာနယ်တစ်ခုတည်းမှာ မဟုတ်ပေ။ ဤအခိုက်အတန့်မှာ ဘေးပတ်ဝန်းကျင်ရှိ တခြားအချိန်လေဟာနယ်များထဲမှ ရွှီချင်းများက တစ်ပြိုင်နက် လက်မြှောက်လိုက်ကြပြီး ဧကရာဇ်ဓားကို ထုတ်ဖော်လိုက်ကြသည်။

ထို့နောက် သူတို့အားလုံးက ဧကရာဇ်ဓားဖြင့် ပိုင်းဖြတ်လိုက်ကြသည်။

ဤအခိုက်အတန့်မှာ သူတို့ထဲမှ မည်သူက အစစ်အမှန်ရွှီချင်းဖြစ်ပြီး အစစ်အမှန်ဓားစွမ်းအင်ကို ထုတ်ဖော်လိုက်ကြောင်းပြောရန် အလွန်ခဲယဉ်းပေသည်။

ဓားစွမ်းအင်အားလုံးက သူတို့၏ သက်ဆိုင်ရာ အချိန်လေဟာနယ်များကို ဖောက်ထွင်းသွားပြီး ဤပဉ္စမအလွှာထဲမှာ စုဝေးသွားကြသည်။ ထို့နောက် ယင်းတို့က တစ်ခုတည်းအဖြစ် ပေါင်းစည်းသွားကြပြီး ကြောက်မက်ဖွယ်ကောင်းသော သတ်ဖြတ်ခြင်းစိတ်ဆန္ဒနှင့်အတူ ကြယ်တာရာစက်ဝန်းထံသို့ တိုက်ရိုက် ပျံသန်းသွားသည်။

စက္ကန့်ပိုင်းအတွင်းမှာ ဓားက သူ၏ ခန္ဓာကိုယ်ကို ပိုင်းဖြတ်သွားသည်။

ဓားက သူ၏ ခန္ဓာကိုယ်ကို ဖြတ်သန်းသွားပြီးနောက် ဓား၏ လက်ကျန်စွမ်းအင်က ဟင်းလင်းပြင်ပေါ်သို့ ကျဆင်းသွားသည်။

ထိုအခါ ထိတ်လန့်ဖွယ်ကောင်းသော အက်ကွဲကြောင်းတစ်ခုက ဟင်းလင်းပြင်ပေါ်မှာ ချက်ချင်း ထွက်ပေါ်လာသည်။

ကြယ်တာရာစက်ဝန်း၏ ခန္ဓာကိုယ်က တုန်ယင်သွားပြီး ပြာဖြစ်သည်အထိ စတင်ပြိုကွဲပျက်စီးသွားသည်။

ထို့နောက် အချိန်လေဟာနယ်များက တစ်ခုပြီးတစ်ခု လွင့်ပြယ်သွားကြသည်။ ထိုထဲမှာ အစောနက စကားပြောလိုက်သော ရွှီချင်းလည်း ပါဝင်သည်။

ရွှီချင်း၏ အစစ်အမှန်ခန္ဓာကိုယ်က ပိုပြီးနက်ရှိုင်းစွာ ပုန်းကွယ်နေသော အချိန်လေဟာနယ်ထဲမှ ထွက်လျှောက်လာပြီး ကြယ်တာရာစက်ဝန်း သေဆုံးသွားသော နေရာကို ကြည့်လိုက်သည်။

သူ၏ အကြည့်က အေးခဲသွားသည်။

သူ၏ အင်မော်တယ်မြို့တော် အရည်အချင်းပြည့်မီတုံကင်၏ အာရုံခံနိုင်သော အကွာအဝေးက တိုးမြှင့်သွားသည်ဟု သူအာရုံမခံမိပေ။

“ သူမသေဘူးလား ”

ရွှီချင်းက မျက်မှောင်ကြုတ်လိုက်သည်။ သို့သော်လည်း သူက လွန်စွာ မအံ့ဩပေ။

မည်သို့ဖြစ်ပါစေ တစ်ဖက်လူက နံပါတ်တစ်ကြယ်ပွင့်ဖြစ်ပြီး မကြာသေးခင်ကမှ ခြေလှမ်းဝက်အင်မော်တယ်အဆင့်ဆီသို့ ခြေချနိုင်ခဲ့သူ ဖြစ်သည်။ ထုံးစံအားဖြင့် သူဆီမှာ အံ့ဖွယ်ကောင်းသော အသက်ကယ်နည်းလမ်းများ ရှိနိုင်ပေသည်။

“ ဒါပေမဲ့ အဲ့ဒီကောင်းကင်ဘုံဥပဒေသမြူမှုန်ကတော့… ”

ရွှီချင်းက ထိုမြူမှုန်ကို အမှန်တကယ် လိုချင်သည်။

သို့ဖြစ်၍ သူက လက်မြှောက်လိုက်ပြီး ဖမ်းဆုပ်လိုက်သည်။ သူ၏ အချိန်လေဟာနယ်အစွမ်းအောက်မှာ ကြယ်တာရာစက်ဝန်း သေဆုံးသွားသော နေရာ၌ လှိုင်းဂယက်များ ထွက်ပေါ်လာကြသည်။ နောက်ဆုံးမှာတော့ အရှိန်အဝါအမျှင်တန်းတစ်ခုက ထိုနေရာမှ ပျံသန်းထွက်လာပြီး ရွှီချင်း၏ လက်ဖဝါးပေါ်သို့ ကျဆင်းသွားသည်။

ယင်းက တစ်ဖက်လူ၏ အမှတ်အသား ဖြစ်သည်။

ယင်းကို အာရုံခံကြည့်လိုက်သည့်အခါ အေးစက်စက်အလင်းက ရွှီချင်း၏ မျက်လုံးထဲမှာ ဖြတ်ပြေးသွားသည်။

“ သိပ်မဝေးဘူးပဲ ”