အချိန်နဲ့နေရာဗိမာန်

ရှယန်ယွိသည် သူ ခဲရောင်နဂါးအစွမ်းအား လှုပ်နှိုးနိုင်ခဲ့စဥ်က မောက်မာခဲ့ပုံများကို ပြန်တွေးမိကာ အလွန် အရှက်ရသွားသလို အလွန်လည်း ဒေါသထွက်သွား၏။

သို့သော် သူ ချက်ချင်း အံကြိတ်ပြီး သူ့ကိုယ်သူ စိတ်ထဲမှ ပြန်နှစ်သိမ့်လိုက်သည်။

" ဒီကောင်လေးမှာ လျှို့ဝှက်နဂါးကျောက်ပြား ကို ကြိုပြီး လှုပ်နှိုးနိုင်တဲ့ ထူးခြားတဲ့ နည်းလမ်း ရှိထားလို့ပဲ ဖြစ်ရမယ် ။ သူက နောက်ဆုံးအထိ ခဲရောင်နဂါးအစွမ်းကိုပဲ လှုပ်နှိုးနိုင်တာ ဖြစ်နေနိုင်တာပဲလေ "

ထိုဖြစ်နိုင်ချေမှာ အလွန်နည်းကြောင်းကို သိသော်လည်း သူ့ကိုယ်သူ ထိုသို့သာ ​တွေးလိုက်၏။

ထိုစဥ် လောထျန်းက ရှေ့သို့ ခြေလှမ်း အနည်းငယ် ဆက်တိုးလိုက်သည်။

လျှို့ဝှက်နဂါးကျောက်ပြား မှာ အဆက်မပြတ်ပင် တုန်ခါနေ၏။

ထို့နောက်တွင်မူ .. အစိမ်းရောင် နဂါးစွမ်းအင်တန်းတစ်ခု ကောင်းကင်ယံသို့ ထိုးတက်သွားပြန်သည်။

" ဒါ .. အစိမ်းရောင် နဂါးစွမ်းအင်ပဲ "

" သူက ရှေ့ကို ခြေနှစ်လှမ်းပဲ တိုးရသေးတယ် ၊ အစိမ်းရောင် နဂါးစွမ်းအင်ကိုတောင် လှုပ်နှိုးလိုက်နိုင်ပြီလား "

" ဒီ ကောင်လေးက ဘယ်သူလဲ "

အာလုံး အံ့သြတုန်လှုပ်နေကြတော့၏။

သို့သော် ၎င်းမှာ အစသာ ရှိသေးကြောင်းကိုလည်း အားလုံး သိကြပါသည်။

လောထျန်းက ရှေ့သို့  ခြေလှမ်းအနည်းငယ် ထပ်တိုးပြီးနောက် ..

ဝီ ..

လျှို့ဝှက်နဂါးကျောက်ပြား မှ အပြာရောင် နဂါးအစွမ်း ရုတ်တရက် ထွက်လာပြန်သည်။

ထိုမြင်ကွင်းကို ကြည့်ကာ အားလုံး စကားမဆိုနိုင်ဘဲ ဆွံ့အနေကြ၏။

ထို့ထက် ပို​အံ့သြတုန်လှုပ်စရာ ကောင်းသည့် အရာများ ထပ်လာဦးမည်ကိုလည်း သူတို့ သိနေသယောင် ။

ထို့နောက်  ..

ဝီ ..

လျှို့ဝှက်နဂါးကျောက်ပြား မှ ခရမ်းရောင် နဂါးအစွမ်းများ ကောင်းကင်ယံသို့ ထပ်တက်သွားပြန်သည်။ လောထျန်းမှာ ထိုအချိန်အထိ ကျောက်ပြားနှင့် ခြေလှမ်း ၅ လှမ်းစာ အကွာတွင်သာ ရှိနေပါသေး၏။

" ခရမ်းရောင် နဂါးအစွမ်းပါလား "

ရှယန်ယွိ၏ မျက်နှာတပြင်လုံး ဖြူဖျော့သွားပြီး သူ့ရင်တစ်ခုလုံးလည်း လေးလံသွားတော့သည်။

အစောက မောက်မာမှုများကလည်း သူ့မျက်နှာထက်မှ လုံးဝ ပျောက်ကွယ်သွားခဲ့ကြလေပြီ ။

သူသည်သာ မက ၊ ချူကျန့်မှာလည်း  ရှေ့မှ မြင်ကွင်းကို ကြည့်ကာ အလွန်အံ့သြတုန်လှုပ်နေ၏။

သူသည် လျှို့ဝှက်နဂါးကျောက်ပြား  ရှေ့တွင် ကိုယ်တိုင် စမ်းသပ်ခဲ့သည်ဖြစ်ရာ သူတို့ကြားမှ ကွာခြားချက်ကို သိပါသည်။

သူ ခရမ်းရောင် နဂါးအစွမ်းအား လှုပ်နှိုးနိုင်ခဲ့ချိန်၌ သူ့အစွမ်းများ အားလုံးနီးပါးပင် ကုန်ဆုံးသလို ဖြစ်နေခဲ့ပါ၏။

သို့သော် .. လောထျန်းကမူ ထိုသို့ လုံးဝ ဟုတ်မနေပါ ..

" ငါ သူ့လောက်တောင် မကောင်းမှန်း သိသာနေပြီလား "

သူ့ရင်ထဲ တွေးမိလိုက်သည်။

ထိုအချိန်မှာပင် လောထျန်းက ကျောက်ပြားရှေ့သို့ ရောက်သွား၏။

ဝုန်း ..

လျှို့ဝှက်နဂါးကျောက်ပြား မှ ရွှေရောင် နဂါးစွမ်းအင်တန်းတစ်ခု ကောင်းကင်ယံသို့ ရုတ်တရက် ထိုးတက်သွားသည်။

" ရွှေရောင် နဂါးအစွမ်းပါလား ..  တကယ်ကြီး ရွှေရောင်နဂါးအစွမ်းပဲဟေ့ "

" ရွှေရောင်နဂါးအစွမ်း နောက်တစ်ခု လာပြန်ပြီ ၊ ဒီနှစ်လူငယ်တွေက ဘယ်လိုတွေလဲဲကွာ "

" ဒီတစ်ယောက်ကလဲ ကမ္ဘာပေါ်က မသေမျိုး ဖြစ်လာမယ့် သူပဲလား "

" ဒါတင် မကသေးဘူးကွ ၊ သေချာကြည့်လိုက်ဦး ။ လောထျန်းက ခုထိ ပုံမှန် စမ်းသပ်မှုမျိုး လုံးဝ မလုပ်ရသေးဘူး ။ သူ ကျောက်ပြားပေါ်ကိုသာ လက်တင်လိုက်ရင် ဘာဖြစ်သွားမလဲ ဘယ်သူမှ မသိနိုင်ဘူး "

အားလုံး အံ့သြတုန်လှုပ်စွာ ဆိုလိုက်ကြသည်။

ထိုအချိန်တွင် ချူကျန့်တစ်ယောက်မှာ အီးမှန်ထားသည့် မျက်နှာကြီး ဖြစ်နေခဲ့လေပြီ ။

သူ ရှုံးနိမ့်သွားခဲ့ရပြီ ဆိုသည်ကိုလည်း သိလိုက်ရပြီ ဖြစ်၏။

သူသည်လည်း ရွှေရောင်နဂါးအစွမ်းကို လှုပ်နှိုးနိုင်ခဲ့သည့်တိုင် ..

လောထျန်း လှုပ်နှိုးနိုင်သည့် အစွမ်းပမာဏနှင့် အကွာကြီး ဖြစ်ပါသည်။

ထို့ထက်ပို ဆိုးသည်မှာ လောထျန်းက ယခုထိ စမ်းသပ်မှုကို တရားဝင် မစရသေးခြင်းပင် ။

" ဟင် .. ရွှေရောင်နဂါးအစွမ်းတောင် ဖြစ်သွားပြီလား "

ထိုအချိန်တွင် လောထျန်းမှာလည်း လျှို့ဝှက်နဂါးကျောက်ပြား၏ ပုံမှန်မဟုတ်သော တုန့်ပြန်မှုကို သတိထားမိသွား၏။

" ချီး .. ခုနက ကောင်က ချီးတစ်နေသလိုကို အော်သွားတော့ ငါက ရွှေရောင်နဂါးအစွမ်းကို လှုပ်နှိုးဖို့ တော်တော်လေး ခက်မယ် ထင်နေတာ "

သူ ခေါင်းယမ်း၍ တစ်ကိုယ်တည်း ရေရွတ်လိုက်သည်။

လောထျန်းသည် ထိုစကားကို ကျယ်ကျယ်ပြောလိုက်ခြင်း မဟုတ်သော်ငြား ချူကျန့်တစ်ယောက် သေချာ ရှင်းရှင်းလင်းလင်း ပင် ကြားသွားပါ၏။

ထိုအချိန်တွင် ချူကျန့်၏ မျက်နှာကြီးက အလွန်ရုပ်ဆိုးနေကာ  တစ်ခုခု ပြန်ပြောချင်နေဟန် ရှိသည် ။ သို့သော် ချေပစရာ စကားလုံးကိုလည်း သူ ရှာမတွေ့ပါချေ ။

" သခင်လေး လောထျန်း ၊ အစွမ်းကို ထိန်းမထားဘဲ ရှိသမျှသာထုတ်သုံးလိုက်ပါ "

ခပ်လှမ်းလှမ်းမှ ရှောက်လုံက အော်ပြောလာ၏။

လောထျန်းက ခေါင်းညိတ်ပြလိုက်သည်။

" ကောင်းပြီ ၊ ဒါဆို စလိုက်တော့မယ် "

သူ ထိုသို့ပြောပြီးသည်နှင့် ကျောက်ပြားပေါ် လက်တင်လိုက်၏။

ဝုန်း ..

ချက်ချင်း ဆိုသလိုပင် .. လျှို့ဝှက်နဂါးကျောက်ပြား မှ စိတ်စွမ်းအင် အလင်းတန်းပေါင်း မြောက်များစွာ ဝုန်းခနဲ ထွက်လာကြပြီး ..

နဂါးအစွမ်းကလည်း အဆပေါင်းများစွာ ရုတ်ချည်း တိုးလာသည်။

" ဟင် ...နဂါးအစွမ်းက ပိုအစွမ်းထက်လာပါလား "

" ဒီ နဂါးအစွမ်းက ချူကျန့် တုန်းကထက် အများကြီး ပိုအစွမ်းထက်တယ် "

အလုံး အံ့သြတုန်လှုပ်ကုန်ကြသည်။

ထိုစဥ် ကျောက်ပြားပေါ် လက်တစ်ဖက် တင်ထားသည့် လောထျန်းကမူ စိတ်ထဲမှ ကြိတ်ရွတ်နေ၏။

" သတိထားရမယ် ၊ လေထုကြီး ပြိုကွဲသွားလို့ မဖြစ်ဘူး ။ အစွမ်းနည်းနည်းလေး ထပ်ထည့်မယ် "

ထို့နောက် သူ လက်ထဲသို့ အစွမ်းအနည်းငယ် ထပ်မံ ပို့လွှတ်လိုက်သည်။

ဝုန်း ..

ရွှေရောင်နဂါးအစွမ်များ ရုတ်ချည်း တိုးလာပြန်သည်။

ထို ရွှေရောင်နဂါးအစွမ်းနှင့်အတူ အမဲရောင် အစွမ်းများလည်း တဖြည်းဖြည်း ထွက်လာကြ၏။

" ဟင် .. ရွှေရောင်နဂါးအစွမ်း ပြီးသွားရင် အမည်းရောင် နဂါးအစွမ်းဆိုပြီး ထပ်ရှိသေးတာလား "

လောထျန်း အတအံ့တသြ ပြောလိုက်သည်။

" မဟုတ်ဘူး .. အဲ့ဒါ .. လျှို့ဝှက်နဂါးကျောက်ပြား က မင်းရဲ့ အစွမ်းကို မခံနိုင်လို့ မီးခိုးတွေ စထွက်နေတာ .. "

လောထျန်း နားထဲတွင် အသံတစ်သံကို ရုတ်တရက် ကြားလိုက်ရ၏။

" ဘယ်လို .. "

လောထျန်း လန့်သွားပြီး ချက်ချင်း လက်ပြန်ရုတ်လိုက်သည်။

ထို့နောက်တွင်မူ သူ့ အသိစိတ်ကို ထူးဆန်းသော နေရာတစ်ခုဆီသို့ ဆွဲခေါ်သွားခြင်း ခံလိုက်ရ၏။

လောထျန်း အံ့အားသင့်သွားပြီး ချက်ချင်း ပြန်ထွက်ရန် ကြိုးစားလိုက်သည်။

ဝုန်း ...

သို့သော် လေထုက ချက်ချင်း ပြင်းထန်စွာ တုန်ခါလာကာ ပြိုကျသွားတော့မည့် အရိပ်အယောင်များ ပြလာ၏။

" ခဏ .. ခဏ နေပါဦးကွာ ။ ငါ့မှာ မကောင်းတဲ့ အကြံ မရှိပါဘူး ။ လေထုကို ဆက်ပြီး မတိုက်ခိုက်ပါနဲ့တော့ "

ရုတ်တရက် စိုးရိမ်နေသည့် အသံတစ်သံ ထွက်ပေါ်လာသည်။

၎င်းကို ကြားမှသာ လောထျန်း ဆက်မခုခံတော့ဘဲ ရပ်လိုက်၏။

ထို့နောက် လောထုကြီး တစ်ခုလုံးလည်း ပြန်တည်ငြိမ်သွားသည်။

ထိုအချိန်မှသာ အစောက အသံပိုင်ရှင် သက်ပြင်းရှည်ကြီး ချနိုင်သွား၏။

သူ အလွန်လည်း အံ့သြတုန်လှုပ်နေရပါသည်။

ထိုလူငယ်လေးက အစွမ်းထက်လွန်း၍ လေထုတစ်ခုလုံးကိုပင် ဖျက်ဆီးပစ်တော့မလို ဖြစ်သွားခဲ့ရပေသည် ။

" ခင်ဗျားက ဘယ်သူလဲ ၊ ပြောစရာရှိရင် မြန်မြန်ပြော ။ မရှိဘူးဆို ကျုပ် သွားတော့မယ် "

လောထျန်းက စိတ်မရှည်ဟန်ဖြင့် မျက်မှောင်ကြုံ့ပြီး ပြော၏

" အမ် .. ကျုပ်က လျှို့ဝှက်နဂါးကျောက်ပြားပေါ်မှာ နဂါးအစောင့်အကြပ်ကြီး ချန်ထားခဲ့တဲ့ နတ်ဘုရား အသိဉာဏ်ပါ "

အသံက ​ပြန်ပြောသည်။

" နတ်ဘုရား အသိဉာဏ် ... နဂါးအစောင့်အကြပ် ..  ကျုပ်ကို ဘာလို့ ဒီနေရာကို ခေါ်လာရတာလဲ "

လောထျန်း မေးလိုက်သည်။

" ကျုပ်က နဂါးသခင်ကြီးရဲ့ အမိန့်အတိုင်း ၊ ကျုပ်တို့ နဂါးမျိုးနွယ်စုကို ကူညီပြီး နဂါးမျိုးနွယ် ပြန်လည်နိုးထလာအောင် လုပ်ပေးနိုင်မယ့် သူကို ရှာနေရတာပါ။ အဲ့ဒါမှ ကျုပ်တို့ နဂါးမျိုးနွယ်က ထျန်းယွမ်ကမ္ဘာကြီးကို ကာကွယ်ပေးနိုင်မှာ ။ အဲ့လို ကူညီပေးတဲ့သူကိုလဲ ကျုပ်တို့ နဂါးမျိုးနွယ်ရဲ့ ရတနာတစ်ခု ပေးမှာပါ "

" ဒါပေမယ့် ဒီလောက် နှစ်တွေအများကြီး ကြာခဲ့တာတောင် ဒီအလုပ်ကို လုပ်နိုင်မယ့် နဂါးတစ်ကောင်မှ ပေါ်မလာခဲ့ဘူး ။ အဲ့နောက်မှာတော့ ကျုပ်တို့ နဂါးတွေ တဖြည်းဖြည်း မျိုးတုန်းပြီး လူသားမျိုးနွယ်က ထျန်းယွမ်ကမ္ဘာရဲ့ အရှင်သခင်တွေ ဖြစ်လာခဲ့ကြတာပဲ ။ ဒါပေမယ့် ပြီးခဲ့တဲ့ နှစ်တွေမှာ ဒီရတနာကို ထိန်းချုပ်နိုင်တဲ့ လူသားလဲ တစ်ယောက်မှ ပေါ်မလာခဲ့ကြဘူး "

" အစကတော့ ကျုပ် တစ်သက် နေလို့တောင် ကျုပ်တို့ ရှာတဲ့ လူမျိုးနဲ့ တွေ့ရမှာ မဟုတ်ဘူးလို့ပဲ တွေးထားခဲ့တာ ။ အခု မမျှော်လင့်ဘဲ သခင်လေးနဲ့ တွေ့လိုက်ရတာပဲ။ သခင်လေးရဲ့ အစွမ်းနဲ့သာဆိုရင် ဒီ ရတနာကို သေချာပေါက် ထိန်းချုပ်နိုင်တယ် "

နဂါးအစောင့်အကြပ် အသိဉာဏ်၏ အသံမှာ အနည်းငယ်ပင် တုန်ယင်နေသည်။

လောထျန်း အံ့အားသင့်သွားပြီး ချက်ချင်း ပြန်မေး၏။

" နဂါးမျိုးနွယ်ရဲ့ ရတနာ ..ဟုတ်လား ၊ ဘယ်လို ရတနာမျိုးလဲ "

နဂါးအစောင့်အကြပ်ကြီးက အနည်းငယ်တည်ငြိမ်အောင် ပြန်လုပ်ပြီးမှ ပြောလာသည်။

" အချိန်နဲ့နေရာဗိမာန် ပါ "

" အချိန်နဲ့နေရာဗိမာန် ... ဟုတ်လား "

လောထျန်း အံ့အားသင့်သွား၏။

" ဟုတ်တယ်ဗျ ၊  အဲ့ဒီ ရတနာကို ကျုပ်တို့ နဂါးမျိုးနွယ်ရဲ့ သခင်ကြီး ထျန်းလုံက ခက်ခက်ခဲခဲ ရထားခဲ့တာ။ ဒီထဲမှာ အချိန်နဲ့ နေရာရဲ့ အစွမ်းတွေ ပါနေတယ်။ သခင်ကြီး ထျန်းလုံ  သေဆုံးသွားခဲ့ရတဲ့ အကြောင်းကလဲ ဒီအရာနဲ့ပဲ ပတ်သက်နေတာ ။ သခင်ကြီး ထျန်းလုံ  သေဆုံးသွားပြီးကတည်းက ကျုပ်တို့ နဂါးမျိုးနွယ်ထဲမှာ ဒီရတနာကို ထိန်းချုပ်နိုင်တဲ့သူ ပေါ်မလာတော့တာပဲ "

" သခင်ကြီး ထျန်းလုံ တစ်ခါ ပြောဖူးတာတော့ ဒီ ရတနာကို သေချာ ကျွမ်းကျွမ်းကျင်ကျင် ထိန်းချုပ်နိုင်သွားမှသာ ကျုပ်တို့ ထျန်းယွမ်ကမ္ဘာ ကြုံနေရတဲ့ အကြီးဆုံး ဒုက္ခကပ်ဘေးကြီးကို အပြီးသတ် ဖြေရှင်းနိုင်မယ်တဲ့ "

လောထျန်း မျက်မှောင်ကြုံ့သွားပြီး ပြန်ပြောသည်။

" အကြီးဆုံး ဒုက္ခကပ်ဘေးကြီး .. ဟုတ်လား ၊ ခင်ဗျားက .. ကောင်းကင်ဘုံ ပျက်စီးခြင်း ၉ ခုကို  ဆိုလိုတာလား "

တဖက်အသံပိုင်ရှင်က ပြော၏။

" မဟုတ်ဘူး ၊ သခင်ကြီး ထျန်းလုံ သေဆုံးသွားတဲ့အချိန်က ကောင်းကင်ဘုံ ပျက်စီးခြင်း ၉ ခု သေချာတောင် မစသေးဘူး ။ သူဆိုလိုတာ အဲ့ဒါ မဟုတ်ဘူး ၊ ကောင်းကင်ဘုံ ပျက်စီးခြင်း ၉ ခုထက်တောင် ပိုဆိုးတဲ့ ကပ်ဘေးကြီးကို ပြောတာ "

အသံပိုင်ရှင်က ခေတ္တမျှ ရပ်နေပြီးမှ ဆက်ပြောသည်။

" သခင်လေးရဲ့အစွမ်းကို ကျုပ်ကရော လျှို့ဝှက်နဂါးကျောက်ပြားကရော အသိအမှတ် ပြုပါတယ် ။ ဒါပေမယ့် ကျုပ် မေးချင်တာ တစ်ခုတော့ ရှိတယ် ။ သခင်လေး အနေနဲ့ ထျန်းယွမ်ကမ္ဘာက လူတွေအတွက် ကာကွယ်တိုက်ခိုက်ပေးဖို့ ဆန္ဒရှိရဲ့လား "

လောထျန်းက ချက်ချင်း ခေါင်းညိတ်ကာ ပြန်ပြော၏။

" ဒါပေါ့ဗျ "

ဤလက်ရှိဘဝတွင် သူ ချစ်ခင် ဂရုစိုက်ရသည့် လူများအားလုံးက ထျန်းယွမ်ကမ္ဘာ၌ ရှိနေကြသည်ဖြစ်ရာ .. ထျန်းယွမ်ကမ္ဘာ ဖျက်ဆီးခံရမည့်အဖြစ်ကို သူ မည်သို့ ကြည့်နေနိုင်ပါမည်နည်း ။

အသံပိုင်ရှင်သည် ခေတ္တမျှ တိတ်နေပြီး နောက်မှသာ လောထျန်းက လိမ်နေခြင်းမဟုတ်ကြောင်း သေချာသွားဟန်ဖြင့် သက်ပြင်းချသည်။

ထို့နောက်တွင်မူ .. လောထျန်းရှေ့၌ ရှေးဟောင်းဓားတစ်လက် ရုတ်တရက် မျောလွင့်လာ၏။