ကောင်းကင်လိုဏ်ဂူတစ်ပိုင်းအဆင့်

မလှမ်းမကမ်းမှာ အနက်ရောင်ချပ်ဝတ်တန်ဆာကို ဝတ်ဆင်ထားသည့် အေးစက်စက် အမျိုးသားတစ်ယောက်က သူ၏ နောက်ဘက်မှ ကျင့်ကြံသူများစွာနှင့်အတူ လေထဲကနေ ပျံသန်းလာ၏။ အဲဒီမှာ ပကတိမိစ္ဆာပညာရှင် သုံးဦးပါပြီး ကျန်သူများက ကောင်းကင်အင်မော်တယ်များ ဖြစ်ကြသည်။

ငရဲဖိနှိမ်မီးဖိုအောက်မှာ ကူထုံယိုက ဤလူများ၏ နောက်ခံကို မှတ်မိသိရှိသွားပြီး သိုင်းတာအိုပင်မခန္ဓာကို သတိပေးရန် သူ၏ စိတ်ဝိညာဉ်အသိစိတ်ဖြင့် အသံတစ်ခုကို အလောတကြီး ပို့လွှတ်လိုက်၏။

“ဂိုဏ်းချုပ် အထီးကျန်သိုင်းသခင်.. သတိထားပါ… အဲဒီလူတွေက မဟူရာမိစ္ဆာဂိုဏ်းက ကျင့်ကြံသူတွေ ဖြစ်လောက်တယ်”

“မဟူရာမိစ္ဆာဂိုဏ်းက မိစ္ဆာမဟာနယ်မြေရဲ့ ဗဟိုချက်ဒေသမှာ ကောင်းကင်အဖွဲ့အစည်းတစ်ခုပဲ… ဂိုဏ်းချုပ် မိစ္ဆာနတ်ဆိုးမဟူရာကောင်းကင်က ကောင်းကင်လိုဏ်ဂူနယ်ပယ်ရဲ့ အထွတ်အထိပ်အထိ ကျင့်ကြံထားပြီလို့ ပြောကြတယ်… သူက အရမ်းကို သန်မာတယ်… သူက ဗဟိုချက်ဒေသမှာ အရှင်သခင်တစ်ပါးပဲ”

“မဟူရာမိစ္ဆာဂိုဏ်း”

မျှော်လင့်ချက် ကုန်ဆုံးသလောက်ဖြစ်နေသော ယန်ကျစ်က သူတို့အုပ်စုကို ချက်ချင်းပင် မှတ်မိသိရှိသွား၏။ သူ၏ မျက်လုံးထဲတွင် မျှော်လင့်ချက်ရောင်ခြည်က ပြန်သန်းလာ၏။

“မဟူရာမိစ္ဆာဂိုဏ်းက တာအိုရောင်းရင်းတို့… ကျုပ်ကို ကယ်ပါဦး… ကျေးဇူးပြုပြီး ကျုပ်ကို ကယ်ပါ”

ယန်ကျစ်က အလောတကြီး လှမ်းအော်ပြောလိုက်၏။

သိုင်းတာအိုပင်မခန္ဓာက သူ၏ ခေါင်းကို မော့ပြီး လျှောက်လှမ်းလာနေသော လူအုပ်စုကို တစ်ချက်ကြည့်လိုက်၏။ သူက သူတို့ကို လျစ်လျူရှုပြီး မှင်သေသေဖြင့် ပြောလိုက်၏။

“ဒီနေ့ ဘယ်သူကမှ မင်းကို ကယ်နိုင်မှာ မဟုတ်ဘူး”

သူ၏ စကား မဆုံးသေးခင်မှာပင် သိုင်းတာအိုပင်မခန္ဓာက သူ၏ လက်ကို ညင်သာစွာ မြှောက်ပြီး သူ၏လက်ချောင်းထိပ်ဖျားမှ နီရဲနေသော မီးတောက်တစ်ခုကို ထုတ်လွှတ်ကာ ထက်ရှသော ဓားတစ်လက်ကဲ့သို့ ယန်ကျစ်၏ နှာရောင်ကို ထိုးဖောက်လိုက်၏။

“ရပ်လိုက်”

မဟူရာဂိုဏ်း၏ ခေါင်းဆောင်က သိုင်းတာအိုပင်မခန္ဓာ လက်မြှောက်လိုက်သည်ကို တွေ့မြင်သောအခါ သူက ထိုသူကို တားဆီးရန် အလောတကြီး အော်ပြောလိုက်၏။ သို့သော်လည်း အဲဒါက နောက်ကျသွားခဲ့ပြီဖြစ်၏။

ဖောက်…

ယန်ကျစ်၏ နှာရောင်က ထိုးဖောက်ခံလိုက်ရပြီး သူ၏ အသိစိတ်က လောင်ကျွမ်းသွား၏။ သူ၏ အမြုတေစိတ်ဝိညာဉ်က ဖျက်ဆီးခံလိုက်ရပြီး နေရာမှာပင် သေဆုံးသွားလေသည်။

“မင်း ဘယ်လိုတောင် လုပ်ရဲတာလဲ”

မဟူရာမိစ္ဆာဂိုဏ်းမှ ပကတိမိစ္ဆာတစ်ဦးက ရှေ့သို့ ထွက်လာပြီး သိုင်းတာအိုပင်မခန္ဓာကို လက်ညှိုးထိုးကာ အော်ပြောလိုက်၏။

“မင်းကို ရပ်လိုက်ဖို့ ကာကွယ်သူ ကျုံးယန်က ပြောပြီးပြီပဲ… မင်း သူပြောတာ မကြားဘူးလား”

“မင်းကတော့ သေချင်နေတာပဲ”

နောက်ထပ် ပကတိမိစ္ဆာတစ်ဦးက သူ၏ မျက်လုံးကို မှေးကျဉ်းပြီး ရန်လိုခက်ထန်သော အမူအရာဖြင့် ရှေ့သို့ တက်လှမ်းလာ၏။

မဟူရာမိစ္ဆာဂိုဏ်း၏ ခေါင်းဆောင် ကျုံးယန်ဟု အမည်ရသော အမျိုးသားက သူ၏ လက်ကို ညင်သာစွာ မြှောက်ပြီး သူ၏ နောက်ဘက်မှ ပကတိမိစ္ဆာနှစ်ဦးကို ရှေ့သို့ မတက်ရန် တားဆီးလိုက်၏။

ယန်ကျစ်၏ အလောင်းကို ကြည့်ရင်း ကျုံးယန်၏ မျက်လုံးထဲမှာ နှမျောသည့် အကြည့်တစ်ခု ပေါ်ထွက်လာ၏။

မည်သို့ပင်ဆိုစေ ယန်ကျစ်သည် အန္တိမ ပကတိမိစ္ဆာဖြစ်ခဲ့ဖူးပြီး ကောင်းကင်လိုဏ်ဂူနယ်ပယ်သို့ ဝင်ရောက်ဖို့ အခွင့်အရေး အများဆုံးဖြစ်၏။

သူက ယန်ကျစ်ကို ကယ်တင်ပြီး ထိုသူကို မဟူရာမိစ္ဆာဂိုဏ်းထံ အညံ့ခံစေနိုင်မည်ဆိုလျှင် ထိုသူသည် ဂိုဏ်းချုပ်အတွက် ကြီးမားသော အထောက်အကူတစ်ခု သေချာပေါက် ဖြစ်လာပေလိမ့်မည်။

ယခု သူက သေဆုံးသွားပြီး အဲဒါက နှမျောစရာကောင်းလေသည်။

သို့သော်လည်း ငွေရောင်မျက်နှာဖုံးနှင့် ခရမ်းရောင်ဝတ်လူက ယန်ကျစ်ကို သတ်ဖြတ်နိုင်သည်ဆိုမှတော့ သူက ယန်ကျစ်ထက် ပိုမိုသန်မာသည်ဟု အဓိပ္ပာယ်ရနေသည်။

သူက ဤလူကို ချိုးနှိမ်နိုင်မည်ဆိုလျှင် အဲဒါသည် ယန်ကျစ်၏ သေဆုံးမှုကို ဖာထေးနိုင်ပေလိမ့်မည်။

တစ်ခုတည်းသောအရာမှာ ကျုံးယန်၏ စိတ်ဝိညာဉ်အသိစိတ်က သိုင်းတာအိုပင်မခန္ဓာကို ထပ်တလဲလဲ စစ်ဆေးကြည့်လိုက်သော်လည်း သူက ထိုသူ၏ နောက်ခံကို ထွင်းဖောက်မမြင်နိုင်ပေ။

သို့သော်လည်း သိုင်းတာအိုပင်မခန္ဓာသည် စောစောက တိုက်ခိုက်လိုက်ပြီး တိုက်ပွဲနယ်မြေမှာ ကျန်ရစ်ခဲ့သော အကြွင်းအကျန်အော်ရာအရ ခရမ်းရောင်ဝတ် အမျိုးသားသည် ပကတိဧကနယ်ပယ် ကျင့်ကြံသူတစ်ယောက်သာ ဖြစ်လောက်သည်ဟု သူက အကြမ်းဖျင်း ကောက်ချက်ချလိုက်နိုင်၏။

ကျုံးယန်က ငရဲဖိနှိမ်မီးဖိုအောက်မှာ အဆင့်ချိုးဖျက်တက်လှမ်းနေသည့် ဖုန်စန်းထျန်ကို တစ်ချက်ကြည့်ပြီး သူ့ဘာသာသူ တွေးလိုက်၏။

“ငါတို့ ဂိုဏ်းချုပ်က တကယ့်ကို အထင်ကြီးစရာပဲ… ဖုန်စန်းထျန်က အောင်အောင်မြင်မြင် အဆင့်မတက်နိုင်ခင်မှာပင် သူက အဲဒီကနေ လာတဲ့ ထူးခြားတဲ့ စွမ်းအင်အတက်အကျကို အာရုံခံမိနိုင်တယ်”

ဖုန်စန်းထျန်သည် အဆင့်ချိုးဖျက်တက်လှမ်းခြင်းမှာ အရေးကြီးသော အမှတ်တစ်ခုသို့ ရောက်ရှိနေပြီး ကျုံးယန်က သူ့ကို နှောင့်ယှက်မနေတော့ပေ။

ဖုန်စန်းထျန်က သူ၏ အဆင့်ချိုးဖျက်တက်လှမ်းခြင်းမှာ အောင်မြင်သွားမည်ဆိုလျှင် သူသည် မိစ္ဆာနတ်ဆိုးမဟူရာကောင်းကင်၏ ဂိုဏ်းချုပ်တံဆိပ်ပြားကို ပစ်ထုတ်ပေးကာ ဖုန်စန်းထျန်ကို ပြန်ခေါ်သွားမည်ဖြစ်၏။

“ငါက ကျုံးယန်ပဲ… မဟူရာမိစ္ဆာဂိုဏ်းရဲ့ ကာကွယ်သူတစ်ယောက်”

ကျုံးယန်က သိုင်းတာအိုပင်မခန္ဓာကို ကြည့်ပြီး လေးနက်သော အသံဖြင့် မေးလိုက်၏။

“မင်းရဲ့နာမည်က ဘယ်သူလဲ”

“အထီးကျန်သိုင်းသခင်”

သိုင်းတာအိုပင်မခန္ဓာက သာမန်ကာလျှံကာ ပြန်ဖြေပြီး မည်သည့်စကားမှ ထပ်မပြောတော့ပေ။ သူက တစ်ဖက်သို့ လှည့်ပြီး တိုက်ပွဲနယ်မြေကို ရှင်းလင်းကာ ယန်ကျစ်၊ နတ်မိမယ် ခရမ်းရောင်မြစ်နှင့် အခြားသူများ၏ တာအိုသစ်သီးများကို သိမ်းဆည်းလိုက်၏။

တာအိုသစ်သီးများမှာ သူတို့၏ သက်ဆိုင်ရာ ဓမ္မတာအိုများနှင့် သူတို့၏ ကျင့်ကြံမှု အဆီအနှစ်များ ပါဝင်နေ၏။

တာအိုသစ်သီးများသည် ပကတိဧကနယ်ပယ်မှာ ရှိသော မည်သည့် ကျင့်ကြံသူအတွက်မဆို မဟာအားဆေးများဖြစ်၏။ သူတို့က ရှားရှားပါးပါး ကျင့်ကြံရေးအရင်းအမြစ်များဖြစ်ပြီး အဖိုးအတန်ဆုံး ဖြစ်လေသည်။

သိုင်းတာအိုပင်မခန္ဓာက ဓမ္မပညာရပ်များ အားလုံးကို အရည်ဖျော်ချနိုင်ပြီး တာအိုသစ်သီးများက သူ့အတွက်လည်း ကြီးမားသည့် အထောက်အပံ့ ဖြစ်လေသည်။

ဒါ့အပြင် ထိုတာအိုသစ်သီးများကို သန့်စင်ခြင်းသည် အစစ်အမှန်သိုင်းတာအိုခန္ဓာကို မွမ်းမံသန့်စင်နိုင်ခြင်းလည်း ဖြစ်၏။

ကောင်းကင်လိုဏ်ဂူတစ်ပိုင်းပညာရှင်တစ်ဦးအနေဖြင့် ကျုံးယန်သည် တာအိုသစ်သီးများကို ဝါးမျိုသန့်စင်မည်ဆိုပါက သူ့အတွက် အကျိုးရှိတော့မည် မဟုတ်ပေ။

သို့သော်လည်း သူ၏ နောက်ဘက်မှာ ရှိသော ပကတိမိစ္ဆာသုံးဦး၏ မျက်လုံးများက လောကရမ္မက်ဖြင့် အရောင်လက်လာ၏။

“ကာကွယ်သူ… ကြည့်ပါဦး”

ပကတိမိစ္ဆာတစ်ဦးက ညင်သာစွာ ပြောလိုက်၏။

ကျုံးယန်၏ အမူအရာက မှင်သေသေဖြင့် ရှိနေပြီး သူက အလောတကြီး မရှိပေ။

သိုင်းတာအိုပင်မခန္ဓာက တာအိုသစ်သီးများ အားလုံးကို သိမ်းဆည်းပြီးနောက် ကျုံးယန်က ပြောလိုက်၏။

“အထီးကျန်သိုင်းသခင်… တာအိုသစ်သီးတွေနဲ့ သန့်စင်ယန်စိတ်ဝိညာဉ်ရတနာတွေကို ငါ့ကို ထုတ်ပေး… ကျန်တဲ့ ရတနာတွေကို မင်းယူထားလို့ ရတယ်”

“အို…”

သိုင်းတာအိုပင်မခန္ဓာက မျက်ခုံးအနည်းငယ်ပင့်လိုက်၏။

“မင်း ငါပြောတာကို နားမလည်ဘူးလား”

ကျုံးယန်၏ နှုတ်ခမ်းက ကွေးညွှတ်သွားပြီး အေးစက်စွာ လှောင်ရယ်ကာ သူက ကျယ်လောင်စွာ ပြောလိုက်၏။

“လောကတစ်ခုလုံးကို ဘုရင်က ပိုင်တယ်… မင်းတို့ရဲ့ တည်နေရာက မဟူရာမိစ္ဆာဂိုဏ်းရဲ့ ပိုင်နက်နယ်မြေထဲမှာ ရှိနေတယ်… ဒီပိုင်နက်နယ်မြေထဲမှာ ရှိတဲ့ ရတနာတွေ အားလုံးကို မဟူရာမိစ္ဆာဂိုဏ်းက ပိုင်တယ်… အဲဒါကို ရရှိထားတဲ့ ဘယ်သူမဆို ထုတ်ပေးရလိမ့်မယ်”

“ငါက မင်းရထားတဲ့ ကျန်တဲ့ ရတနာတွေကို ထုတ်မပေးခိုင်းဘူးဆိုတာ မင်းအတွက် ထူးခြားတဲ့ လက်ဆောင်တစ်ခု ဖြစ်နေပြီ”

သိုင်းတာအိုပင်မခန္ဓာက အမူအရာ ကင်းမဲ့စွာဖြင့် မေးလိုက်၏။

“ငါက လိုက်လျောမပေးဘူးဆိုရင်ရော”

ကျုံးယန်က ရယ်မောလိုက်၏။

ပကတိမိစ္ဆာသုံးဦးနှင့် သူ၏ နောက်ဘက်မှာ ရှိသော ကောင်းကင်အင်မော်တယ်များကလည်း ကျယ်လောင်စွာ ရယ်မောလိုက်ကြ၏။

သူတို့ရှေ့မှ ဤပကတိမိစ္ဆာသည် မဟူရာမိစ္ဆာဂိုဏ်းကဲ့သို့ အလွန်ကြီးမားသည့် အင်အားတစ်ရပ်ကို ဆန့်ကျင်လိုနေတာလား။

အဲဒါသည် ကျောက်နံရံကို ကြက်ဥနှင့် ပေါက်ခြင်း၊ နှံကောင်က ရထားလုံးကို တားဆီးဖို့ ကြိုးစားနေခြင်းနှင့် တူနေ၏။

“မင်းက ယန်ကျစ်နဲ့ တခြားသူတွေကို သတ်ဖြတ်နိုင်တာနဲ့ပဲ မင်းကိုယ်မင်း ပြိုင်ဘက်ကင်းနေပြီလို့ တကယ်ထင်နေတာလား”

ကျုံးယန်က သိုင်းတာအိုပင်မခန္ဓာထံသို့ လျှောက်လှမ်းသွား​ပြီး သူ၏ ခေါင်းကို ခါယမ်းလိုက်၏။

“ကြည့်ရတာ မင်းရဲ့ ထက်သန်နေတဲ့ စိတ်ဝိညာဉ်ကို ချိုးနှိမ်ပြီး ဒီပိုက်နက်နယ်မြေရဲ့ အစစ်အမှန်သခင်က ဘယ်သူလဲဆိုတာ ပြပေးရတော့မယ့်ပုံပဲ”

ကျုံးယန်က ရှေ့သို့ တက်လှမ်းလာပြီး အရင်ဆုံး တိုက်ခိုက်လိုက်၏။ ရုတ်တရက် သူ၏ လက်ဖဝါးထဲမှာ နက်မှောင်နေသော သံလက်ရိုက်တုတ်တစ်ချောင်းက ပေါ်ထွက်လာပြီး သိုင်းတာအိုပင်မခန္ဓာ၏ ဦးခေါင်းကို ပစ်ရိုက်ချလိုက်၏။

လက်ရိုက်တုတ်က အလွန်တရာ စွမ်းအားကြီးမားပြီး ကြမ်းကြုတ်ခက်ထန်နေ၏။

သိုင်းတာအိုပင်မခန္ဓာက ရှောင်တိမ်းခြင်း မရှိဘဲ ရှေ့ကို ပစ်ထိုးလိုက်၏။

ဘန်း…

သံလက်ရိုက်တုတ်က သိုင်းတာအိုပင်မခန္ဓာ၏ လက်သီးနှင့် ထိခတ်မိပြီး ကျယ်လောင်သော မြည်သံက ထွက်ပေါ်လာ၏။

သိုင်းတာအိုပင်မခန္ဓာက မျက်မှောင်အနည်းငယ်ကြုတ်ပြီး ခြေလှမ်းဝက် နောက်ဆုတ်လိုက်၏။

ကျုံးယန်၏ နောက်မှာ ရှိသော လေဟာနယ်က အနည်းငယ် ချိုင့်ဝင်သွား၏။

သို့သော်လည်း မည်သည့် ကောင်းကင်လိုဏ်ဂူကမှ ပေါ်ထွက်မလာပေ။ အဲဒီမှာ ဝေဝါးနေသော ကောင်းကင်လိုဏ်ဂူ ပုံရိပ်ယောင်တစ်ခုသာ ရှိနေ၏။

ကောင်းကင်လိုဏ်ဂူတစ်ပိုင်းအဆင့်…။

ဤနှစ်များမှာ သိုင်းတာအိုပင်မခန္ဓာသည် ရှေးဟောင်းစာအုပ်များနှင့် လျှို့ဝှက်အတတ်များစွာကို လေ့လာဖတ်ရှုထားခဲ့၏။ အဲဒီမှာ ကောင်းကင်လိုဏ်ဂူတစ်ပိုင်းအဆင့်နှင့် ပတ်သက်၍ အသေးစိတ်မှတ်တမ်းများ ရှိလေသည်။

အတိအကျဆိုရလျှင် ကောင်းကင်လိုဏ်ဂူတစ်ပိုင်းအဆင့်ကို သူ့ကိုယ်ပိုင်နယ်ပယ်တစ်ခုအဖြစ် မသတ်မှတ်နိုင်ပေ။

တာအိုသစ်သီးတစ်လုံး ကြေမွသွားသောအခါ ထွက်ပေါ်လာသည့် သိပ်သည်းပြင်းထန်သည့် စွမ်းအားကို.. ခန္ဓာကိုယ်၏ အပြင်ဘက် လေဟာနယ်ကို ချိုးဖျက်ကာ ကောင်းကင်ကို ချိတ်ဆက်နိုင်သည့် အခန်းတစ်ခန်း ဖွင့်လှစ်ရန် အသုံးချနိုင်သည်။

သို့သော်လည်း ထိုဖြစ်စဉ်က အန္တရာယ်များ၊ မသေချာမရေရာမှုများနှင့် ပြည့်နှက်နေ၏။

တာအိုသစ်သီးက လုံလောက်အောင် သန်မာမှု မရှိဘဲ ဓမ္မတာအိုက လုံလောက်အောင် သိပ်သည်းကျစ်လျစ်မှု မရှိလျှင် တာအိုသစ်သီးက ကြေမွသွားပြီး ကောင်းကင်လိုဏ်ဂူကို ဖွင့်လှစ်ခြင်းက ကျရှုံးသွားဖို့ အခွင့်များ၏။

တာအိုသစ်သီးက မည်သည့် ကောင်းကင်လိုဏ်ဂူကိုမှ မဖြစ်ပေါ်စေဘဲ ကြေမွသွားမည်ဆိုလျှင် အဲဒါသည် ထိုသူ၏ ကျင့်ကြံမှုတစ်ခုလုံးက နေ့ချင်းညချင်း ဖျက်ဆီးခံလိုက်ရသည်နှင့် တူညီလေသည်။

ထို့ကြောင့် အဆင့်ချိုးဖျက်တက်လှမ်းစဉ် အတောအတွင်း ကျင့်ကြံသူတစ်ယောက်၏ ခွန်အားက ယိုယွင်းလာပြီး သူတို့က တစ်စုံတစ်ရာ လွဲမှားနေသည်ကို အာရုံခံမိကာ ကောင်းကင်လိုဏ်ဂူတစ်ခုခု ဖွင့်လှစ်ဖို့ အခွင့်အရေးပါးပါးသာ ရှိတော့မည်ဆိုလျှင် သူတို့သည် ဒုတိယမြောက် အကောင်းဆုံး ရွေးချယ်မှုကို ပြုလုပ်နိုင်၏။

သူတို့သည် ကြေမွသွားသော တာအိုသစ်သီးကနေ ထွက်ပေါ်လာသည့် စွမ်းအားကို အသုံးချကာ ကောင်းကင်လိုဏ်ဂူပုံရိပ်ယောင်တစ်ခုကို စုဖွဲ့နိုင်မည်ဖြစ်သည်။

အဲဒါကို ကောင်းကင်လိုဏ်ဂူနယ်ပယ်သို့ ခြေလှမ်းဝက် ဝင်ရောက်ခြင်းဟု ဆိုနိုင်ပြီး ထိုကျင့်ကြံသူသည် ကောင်းကင်လိုဏ်ဂူ၏ စွမ်းအားနှင့်လည်း ထိတွေ့ခွင့်ရပေလိမ့်မည်။ အဲဒါက ကောင်းကင်လိုဏ်ဂူတစ်ပိုင်းအဆင့် ဖြစ်သည်။

ကောင်းကင်လိုဏ်ဂူတစ်ပိုင်းအဆင့်သို့ ဝင်ရောက်ခြင်းမှာ အကျိုးကျေးဇူးနှစ်ခု ရှိနေ၏။

ပထမအချက်… လူတစ်ယောက်သည် ကောင်းကင်လိုဏ်ဂူနယ်ပယ်နှင့် ထိတွေ့ခွင့်ရနိုင်မည်ဖြစ်သောကြောင့် သူတို့၏ ဘဝသက်တမ်းက နှစ်တစ်သန်းကျော်သို့ တိုးလာပေလိမ့်မည်။

ဒုတိယအချက်… ကောင်းကင်လိုဏ်ဂူတစ်ပိုင်းအဆင့်မှာ ကောင်းကင်လိုဏ်ဂူ၏ စွမ်းအား တစ်စွန်းတစ်စကို ထုတ်ဖော်နိုင်၏။

အဲဒါက တစ်စွန်းတစ်စသာ ဖြစ်သော်လည်း ခွန်အားအရ အဲဒါသည် အစစ်အမှန်အမြုတေကို ဖိနှိမ်နိုင်ပြီး ပကတိဧကနယ်ပယ် ပညာရှင်များကို ချိုးနှိမ်နိုင်မည်ဖြစ်၏။

သို့သော်လည်း ကျင့်ကြံသူများစွာက ကောင်းကင်လိုဏ်ဂူတစ်ပိုင်းအဆင့်ကို မရွေးချယ်လိုသည့် အကြောင်းရင်းတစ်ခုလည်း ရှိနေ၏။

သူတို့က ထိုရွေးချယ်မှုကို ပြုလုပ်ပြီး ကောင်းကင်လိုဏ်ဂူတစ်ပိုင်းအဆင့်မှာ အထိုင်ချမည်ဆိုလျှင် သူတို့သည် အစစ်အမှန် ကောင်းကင်လိုဏ်ဂူနယ်ပယ်သို့ ဘယ်တော့မှ တက်လှမ်းနိုင်တော့မည် မဟုတ်ပေ။

အကြောင်းမှာ တာအိုသစ်သီးက ကြေမွသွားပြီး ကောင်းကင်လိုဏ်ဂူ ပုံရိပ်ယောင်အဖြစ် ပြောင်းလဲသွားပြီ ဖြစ်သောကြောင့်ပင်။

ထိုအခါ ထို​ကျင့်ကြံသူများမှာ ကောင်းကင်ကို ချိတ်ဆက်နိုင်မည့် နောက်ထပ် အခန်းတစ်ခန်းကို ဖွင့်လှစ်ရန် သူတို့ကို ထောက်ပံ့ပေးမည့် လုံလောက်သည့် ခွန်အား ရှိတော့မည် မဟုတ်ပေ။

ထို့ကြောင့် ကောင်းကင်လိုဏ်ဂူနယ်ပယ်သို့ အဆင့်ချိုးဖျက်တက်လှမ်းဖို့ ကြိုးစားရာမှာ ကျင့်ကြံသူများသည် မည်သည့် ကောင်းကင်ဘုံကပ်ဘေးနှင့်မှ ကြုံတွေ့ရမည် မဟုတ်သော်လည်း အဲဒါက အရမ်းကို အန္တရာယ်များနေဆဲဖြစ်၏။

သူတို့က ကောင်းကင်လိုဏ်ဂူတစ်ပိုင်းအဆင့်ကို ရွေးချယ်နိုင်သလို သူတို့၏ လက်ကျန်ဘဝတစ်လျှောက်လုံးမှာ ဘုရင်ဘွဲ့ကို ခံယူဖို့ မျှော်လင့်ချက်လည်း ရှိတော့မည် မဟုတ်ပေ။

သို့မဟုတ် သူတို့သည် နောက်ဆုတ်ခြင်း မရှိဘဲ ကောင်းကင်လိုဏ်ဂူနယ်ပယ်၏ အဟန့်အတားကို ချိုးဖျက်ဖို့ အတင်းအကျပ် ကြိုးစားကာ အာရုံစိုက်နိုင်၏။ သူတို့ ကျရှုံးသွားမည်ဆိုလျှင် သူတို့၏ ကျင့်ကြံမှုက ပျက်စီးသွားပြီး သူတို့၏ ဂုဏ်ကျက်သရေကနေ လျှောကျသွားပေလိမ့်မည်။