ရည်မှန်းချက်မကြီးမားသော မြေခွေးမိန်းမပျိုလေး

ရွှီချင်းက သက်ပြင်းချလိုက်သည်။

အကူအညီမဲ့မှုက သူ၏ နှလုံးသားထဲမှာ ထွက်ပေါ်လာသည်။

ရွှံ့မြေခွေးကို သူစတင်တွေ့ခဲ့သည့်အချိန်မှစ၍ ယခုအချိန်ထိ သူ့လေသံက မပြောင်းလဲသွားချေ။

သူက အမြဲတမ်း ပွင့်လင်းပြီး မမျှော်လင့်ထားအောင် အံ့ဩစရာကောင်းသည်။

သူက တစ်ဖက်လူထက် ပိုအားနည်းနေသည့်အချိန်မှာဖြစ်စေ သို့မဟုတ် တစ်ဖက်လူထက် ပိုပြီးသန်မာလာသည့်အချိန်မှာဖြစ်စေ ရွှံ့မြေခွေးက မပြောင်းလဲသွားချေ။ ဤသည်မှာ မည်သည့်အခြေအနေမှာဖြစ်စေ တစ်ဖက်လူမှာ သူ့ကို စနောက်ရန် အမြဲတမ်း နည်းလမ်းတစ်ခု ရှိနေသည့်အလားပင်။

ရွှီချင်းက ခေါင်းခါလိုက်ပြီး လက်ဝှေ့ယမ်းလိုက်သည်။

ချက်ချင်းဆိုသလို ဝတ်ရုံရှည်တစ်ထည်က ရွှံ့မြေခွေး၏ ခန္ဓာကိုယ်ပေါ်မှာ ထွက်ပေါ်လာပြီး သူ၏ အလှတရားများကို ဖုံးကွယ်ပေးလိုက်သည်။

“ အို… ဒီအဝတ်အစားက နည်းနည်း ကျပ်လိုက်တာ… ဒီတော့ မောင်လေးက ချပ်ချပ်ရပ်ရပ် ဝတ်စားတာကို သဘောကျတာလား ”

ရွှံ့မြေခွေးက ရင်ဘက်ကို ထိတွေ့လိုက်ပြီး နှုတ်ခမ်းဆူကာ ရွှီချင်းကို ပြောသည်။

“ နတ်ဘုရားသွေးစက်ကို အခု စုပ်ယူပြီးတော့ အဆင့်ချိုးဖြတ်ဖို့ ကြိုးစားပါ ”

ရွှီချင်းက သူ့ကို လျစ်လျူရှုလိုက်ပြီး တည်ငြိမ်စွာ ပြောသည်။

ရွှံ့မြေခွေးက လက်ဖြင့် ပါးစပ်အုပ်လိုက်ပြီး ရယ်မောလိုက်သည်။ ယင်းကို သူပိုပြီးစဉ်းစားမိလေ ပိုပြီးသဘောကျလာလေပင်။ ထို့နောက် သူက အရှေ့သို့ တမင် ခြေတစ်လှမ်းတိုးလိုက်ပြီး တိုးညင်းစွာ ပြောသည်။

“ အို ငါ့ရဲ့ သခင်လေး… ငါ့ကို ဘယ်လိုမျိုး အဆင့်ချိုးဖြတ်စေချင်လဲ ပြောပါ ”

သူ၏ အသံက ချိုသာပြီး နူးညံ့သည်။ ယင်းက သူ၏ ဆွဲဆောင်မှုရှိသော ပုံရိပ်နှင့် လိုက်ဖက်သည်။ အထူးသဖြင့် ‘ သခင်လေး ’ဟူသော စကားထဲမှာ ဖော်မပြနိုင်သော ညှို့ဓာတ်များ ပါဝင်နေသည်။ ယင်းက သူ့ကို မိုးသောက်အင်မော်တယ်နန်းတော်ထဲမှ မြေခွေးမိန်းမပျိုလေးအဖြစ် ပြန်ပြောင်းလဲသွားစေဟန် ရသည်။

ရွှီချင်းက တင်ပျဉ်ခွေထိုင်လျက် မျက်လုံးမှိတ်ထားသည်။ သူက ငါးမျှားနေရင်း တည်ငြိမ်စွာ ပြောသည်။

“ အချိန်က အကန့်အသတ်ရှိတယ်… မင်းဘာသာမင်း ဆင်ခြင်ပါ ”

ယင်းကို မြေခွေးမိန်းမပျိုလေး ကြားသောအခါ သူက တခစ်ခစ်ရယ်လိုက်သည်။ သို့သော်လည်း ယခုအချိန်မှာ အရေးကြီးဆုံးက နတ်ဘုရားသွေးစက်ကို စုပ်ယူရန်ဖြစ်ကြောင်း သူသိသည်။ သို့ဖြစ်၍ သူက ခါးမတ်လိုက်ပြီး ခေါင်းမော့လိုက်ကာ သူ့အရှေ့မှ လေထဲတွင် လွင့်မျောနေသော ဆေးပုလင်းကို ကြည့်လိုက်သည်။

သူ၏ ဖီးနစ်မျက်ဝန်းထဲမှ ညှို့ဓာတ်က တဖြည်းဖြည်း ပျောက်ကွယ်သွားပြီး ရွှေရောင်အလင်းတန်းက အစားထိုး ထွက်ပေါ်လာသည်။

သူက ဖမ်းဆုပ်သော လက်ဟန်ကို ပြုလုပ်လိုက်လေရာ ဆေးပုလင်းက ချက်ချင်း အက်ကွဲသွားသည်။ ထို့နောက် ပုလင်းထဲမှ နတ်ဘုရားအရှင်သခင်၏ သွေးစက်က ကမ္ဘာတုန်လှုပ်စေနိုင်သော အရှိန်အဝါကို ထုတ်လွှတ်လိုက်သည်။

မရေမတွက်နိုင်သော နတ်ဘုရားမှော်သင်္ကေတများက သွေးစက်ထဲမှာ လွင့်မျောနေကြပြီး အချင်းချင်း ယှက်ထွေနေကြသည်။

သွေးက အပြင်းအထန် တုန်ယင်လာပြီးနောက် အရွယ်အစားနှင့် အသွင်သဏ္ဍာန် ပြောင်းလဲသွားသည်။ ဤသည်မှာ ယင်းက အသက်ရှိလာသည့်အလား စတင်ရွေ့လျားလာသည်။

တိတ်ဆိတ်သော ဟိန်းသံက ဟင်းလင်းပြင်ထဲမှာ ပဲ့တင်ထပ်သွားဟန် ရ၏။ ဝိညာဉ်လှုပ်ခတ်စေနိုင်သော ဖိအားတစ်ခုက ဟင်းလင်းပြင်ထဲမှာ ထွက်ပေါ်လာသည်။

အကယ်၍ တစ်စုံတစ်ယောက်က အနီးကပ် သေချာကြည့်မည်ဆိုလျှင် ထိုသွေးစက်ထဲမှာ မရေမတွက်နိုင်သော ကြယ်များ စုစည်းရှိနေသည်ကို မြင်ရလိမ့်မည်။ သို့ဖြစ်၍ ယင်းကို အနီရောင်ကြယ်ဂြိုလ်များ စုစည်းရှိနေသော ကြယ်စင်စုတစ်ခုဖြစ်သည်ဟုဆိုလျှင် မမှားပေ။

ယင်းက ဖော်မပြနိုင်အောင် ထွန်းလင်းတောက်ပသည်။

ဤသည်မှာ ထိုကြယ်ဂြိုလ်များက သွေးစက်၏ အနှစ်သာရများ ဖြစ်သည့်အလားပင်။ သွေးစက်က အနီရောင်ဖြစ်နေရခြင်းမှာ ယင်းကို အနီရောင်တောက်ပသော မရေမတွက်နိုင်သည့် ကြယ်ဂြိုလ်များဖြင့် ဖွဲ့စည်းထားသောကြောင့် ဖြစ်သည်။

မြေခွေးမိန်းမပျိုလေးက အသက်ပြင်းပြင်းရှူသွင်းလိုက်သည်။ သူက ထိုသွေးစက်ကို သေချာစူးစိုက်ကြည့်လိုက်သည်။ စိတ်ခံစားချက်များကို သူထိန်းချုပ်လိုက်သည်နှင့် အလွန်အားကောင်းသော နတ်ဘုရားအရှိန်အဝါက သူ၏ ခန္ဓာကိုယ်ထဲမှ ထွက်ပေါ်လာသည်။ ချက်ချင်းဆိုသလို ဘေးပတ်ဝန်းကျင်မှ လေဟာနယ်က ဝေဝါးသွားပြီး အလွန်သိပ်သည်းသော ဒြပ်နှောက စတင်ထွက်ပေါ်လာသည်။

သူ၏ နတ်ဘုရားအရှိန်အဝါနှင့်အတူ အလွန်ကျယ်ပြောသော ပင်လယ်ပြင်တစ်ခုက ဤနေရာမှာ ထွက်ပေါ်လာသည်။ ပင်လယ်ထဲတွင် အရာအားလုံးက ကပြောင်းကပြန် ဖြစ်နေသည်။

ပင်လယ်က ကောင်းကင်ပေါ်မှာရှိပြီး ကြယ်တာရာကောင်းကင်က အောက်ဘက်မှာ ရှိသည်။

သို့ဖြစ်၍ ကောင်းကင်က အဆုံးမဲ့သော ကြယ်အလင်းရောင်ကို ပုံရိပ်ပြန်နေသည်။ ကောင်းကင်နှင့် ပင်လယ်ကြားတွင်တော့ အလွန်ကြီးမားသော နတ်ဘုရားရုပ်တုတစ်ခု ထောင်မတ်နေသည်။

ထို့နောက် ရုပ်တုက ပါးစပ်ဟလိုက်ပြီး နတ်ဘုရားအရှင်သခင်၏ သွေးစက်ကို စုပ်ယူလိုက်သည်။

ချက်ချင်းဆိုသလို သွေးစက်က ရုပ်တုထံသို့ တန်းမတ်စွာ ပျံသန်းသွားပြီး ရုပ်တု၏ ပါးစပ်ထဲသို့ ဝင်ရောက်သွားသည်။

နောက်အခိုက်အတန့်မှာ ရုပ်တုက အပြင်းအထန် တုန်ယင်လာပြီး နာကျင်သော အမူအရာကို ထုတ်ဖော်လိုက်သည်။

သွေးစက်ကို ဝါးမျိုလိုက်သည့်အခါ ယင်း၏ အနီရောင်က မှေးမှိန်သွားပြီး နတ်ဘုရားများသာ ပိုင်ဆိုင်သော ရွှေရောင်က ထွက်ပေါ်လာသည်။

ဤသည်မှာ ယင်းက မီးတောက်ဘောလုံးတစ်လုံးအလား ရွှံ့မြေခွေး၏ ခန္ဓာကိုယ်ကို အတွင်းဘက်မှ လောင်ကျွမ်းပစ်နေသည်။

မီးတောက်က အလွန်အားကောင်းလေရာ ရုပ်တုကိုသာမက အပြင်ဘက်မှ ကြယ်တာရာကောင်းကင်နှင့် ပင်လယ်ကိုပင် ပြာအဖြစ် လောင်ကျွမ်းပစ်ချင်နေဟန် ရသည်။

အံ့ဖွယ်ကောင်းသော အရှိန်အဝါတစ်ခုသည်လည်း ရုပ်တုထံမှ ထွက်ပေါ်နေသည်။

အစတွင် သွေးစက်ထံမှ ဖိအားက ထိန်းသိမ်းခံထားရသည့်အလား အပြင်သို့ အများကြီး မပျံ့လွင့်သွားချေ။ ဤသည်မှာ ယင်းက ချိပ်ပိတ်ခံထားရသော သက်မဲ့ရုပ်ဝတ္ထုပစ္စည်းတစ်ခု ဖြစ်သည့်အလားပင်။

သို့သော်လည်း ယခု ရွှံ့မြေခွေးက သွေးစက်ကို ဝါးမျိုလိုက်သည့်အခါ ထိုချိပ်ပိတ်မှုက ပျက်ပြယ်သွားပုံပေါ်သည်။

သို့ဖြစ်၍ ကြောက်မက်ဖွယ်ကောင်းသော အရှိန်အဝါက ရွှံ့မြေခွေးရုပ်တုထံမှ ထွက်ပေါ်လာပြီး မရပ်တန့်နိုင်သော လှိုင်းလုံးများကို ထုတ်လွှတ်လိုက်သည်။ ယင်းက မုန်တိုင်းတစ်ခုအသွင် ပြောင်းလဲသွားပြီး စကြာဝဠာတစ်ခုလုံးကို ရိုက်ခတ်သွားသည်။

သို့ဖြစ်၍ မင်ယန်စကြာဝဠာထဲမှ မရေမတွက်နိုင်သော ကြယ်စင်စုများ၊ ဂလက်စီများနှင့် ကြယ်ဂြိုလ်များက တုန်လှုပ်သွားကြသည်။

ယင်းတို့ထဲမှ သက်ရှိအားလုံး၏ အမူအရာက ပြောင်းလဲသွားကြသည်။

အမှန်မှာ အရာအားလုံးက လှုပ်ခါသွားကြသည်။

မရေမတွက်နိုင်သော မျိုးနွယ်ခြားများက အံ့ဩထိတ်လန့်သွားကြသည်။

ပညာရှင်ကျင့်ကြံသူများက အမူအရာပျက်ယွင်းသွားကြသည်။

မင်ယန်စကြာဝဠာအတွင်းရှိ ဧရိယာအသီးသီးထံမှ မရေမတွက်နိုင်သော အကြည့်များက ရွှီချင်းရှိနေသော နေရာဆီသို့ ကျရောက်လာကြသည်။

ထိုမြင်ကွင်းက ရွှီချင်းကိုပင် အနည်းငယ် တုန်လှုပ်သွားစေသည်။

ထိုအရှိန်အဝါက အလွန်ကြောက်စရာကောင်းသည်။

ယင်း၏ ဖိနှိပ်မှုအောက်မှာ မင်ယန်စကြာဝဠာ၏ တုန်ယင်မှုက ဖော်မပြနိုင်အောင် ပြင်းထန်လာသည်။

ရွှံ့မြေခွေးသည်တော့ အက်ကွဲရာများက ရုပ်တုပေါ်မှာ ထွက်ပေါ်လာကြပြီး ရွှေရောင်မီးတောက်များက အပြင်သို့ ပျံ့နှံ့သွားကြသည်။ ပင်လယ်နှင့် ကောင်းကင်က ပျောက်ကွယ်သွားပြီး သူ၏ အမှတ်အသားက ဝေဝါးလာသည်။

ဤသည်မှာ သူက သွေးစက်ကို မတောင့်ခံနိုင်သည့်အလားပင်။

ရွှီချင်း၏ အကြည့်က အေးစက်သွားသည်။ အမှတ်ငါးကြယ်တာရာစက်ဝန်းဆီသို့ ခရီးစဉ်တွင် သူ့နောက်သို့ လိုက်လာသည်မှာ ရွှံ့မြေခွေး၏ ကိုယ်ပွားတစ်ခုသာဖြစ်ကြောင်း သူသိသည်။ ကိုယ်ပွားတစ်ခုက နတ်ဘုရားအရှင်သခင်၏ သွေးစက်ကို တောင့်ခံနိုင်ရန် အတော်လေး ခက်ခဲသည်။

သို့ဖြစ်၍ သူက နတ်ဘုရားသွေးစက်အား ဖိနှိပ်ရန်အလို့ငှာ ရွှံ့မြေခွေးကို ကူညီပေးရန် ပြင်လိုက်သည်။ သူက နတ်ဘုရားသွေးစက်၏ စွမ်းအားကို တောင့်ခံပေးပြီး ရွှံ့မြေခွေးစုပ်ယူနိုင်သည်အထိ ယင်း၏ အဆင့်ကို လျော့ချပေးလိမ့်မည်။

သို့သော်လည်း အကယ်၍ ထိုသို့သူလုပ်ဆောင်လိုက်မည်ဆိုလျှင် နတ်ဘုရားသွေးစက်၏ တန်ဖိုးက လျော့ကျသွားလိမ့်မည်။

သို့သော်လည်း ရွှံ့မြေခွေးက ယင်းကို မတောင့်ခံနိုင်တော့ကြောင်း သူမြင်သောအခါ တစ်ဖက်လူ လောင်ကျွမ်းပြာဖြစ်သွားမည်ကို ရွှီချင်း မလိုလားပေ။

ရွှီချင်း လှုပ်ရှားတော့မည့်အချိန် ရွှံ့မြေခွေး၏ အက်ရှရှအသံက ထွက်ပေါ်လာသည်။

“ ငါလုပ်နိုင်တယ် ”

နောက်အခိုက်အတန့်မှာ အက်ကွဲသွားတော့မည့် ရွှံ့မြေခွေးရုပ်တုက ရုတ်တရက် တုန်ယင်လာပြီး ၎င်း၏ ဦးခေါင်းထက်တွင် ကြယ်တာရာကောင်းကင်တစ်ခု ထွက်ပေါ်လာသည်။

ယင်းက အမှတ်ငါးကြယ်တာရာစက်ဝန်း၏ ကြယ်တာရာကောင်းကင် မဟုတ်ပေ။

ယင်းက ဝမ်ကူးကုန်းမြေ၏ ကြယ်တာရာကောင်းကင်ဖြစ်ပြီး အမှတ်ကိုးကြယ်တာရာစက်ဝန်း၏ ကြယ်တာရာကောင်းကင်လည်း ဟုတ်၏။

ကြယ်အလင်းအမျှင်တန်းများက ထိုကြယ်တာရာကောင်းကင်ထံမှ ဥက္ကာမိုးသဖွယ် ကျဆင်းလာကြသည်။ ယင်းတို့က ရွှံ့မြေခွေးရုပ်တုထဲသို့ ပေါင်းစပ်သွားကြပြီး ရွှေရောင်မီးတောက်ကို ဖိနှိပ်လိုက်ကြသည်။

ကြယ်အလင်းအမျှင်တန်းများက ရုပ်တုနှင့် ဆက်လက် ပေါင်းစပ်သွားနေသည်။

သို့သော်လည်း ယင်းက အနည်းငယ် အားနည်းနေဆဲပင်။ သို့ဖြစ်၍ ရွှေရောင်မီးတောက်များက တဖြည်းဖြည်း ထပ်မံ အသာစီးရရှိသွားပြီး အလွန်အားကောင်းစွာ လောင်ကျွမ်းလာသည်။

ထိုသို့အရေးကြီးအခိုက်အတန့်မှာ ဆုံးဖြတ်ချက်ပြတ်သားမှုက ရွှံ့မြေခွေး၏ မျက်လုံးထဲတွင် ထွက်ပေါ်လာသည်။ သူက ပါးစပ်ဟလိုက်ပြီး အသက်ရှူသွင်းလိုက်သည်နှင့် နက်ရှိုင်းသော နတ်ဘုရားအသံက ပဲ့တင်ထပ်သွားသည်။

“ ပထမ… ဒုတိယ… ကပြောင်းကပြန် ”

ထိုအခိုက်အတန့်မှာ အက်ကွဲခါနီးနေသော ရုပ်တုက ခွန်အားအသစ်ကို တဖန်ရရှိသွားဟန် ရသည်။ စွမ်းအင်က အဆက်မပြတ် ပေါ်လျှိုးလာပြီး ရုပ်တုထဲသို့ အဆုံးမဲ့စွာ သွန်းလောင်းပေးလိုက်သည်။

ထို့ကြောင့် ရုပ်တု၏ အလင်းရောင်က ပိုပြီးထွန်းလင်းတောက်ပလာသည်။ ထို့နောက် အလင်းရောင်က မျက်စိကျိန်းစပ်လုနီးပါး အားကောင်းလာသည်။

ဤအခိုက်အတန့်မှာ ကြယ်တာရာကောင်းကင်ထံမှ ကျဆင်းလာနေသော ကြယ်အလင်းရောင်က အဆုံးမဲ့သွားဟန် ရသည်။

ယင်းက မိုးရွာသွန်းခြင်းမဟုတ်တော့ပေ။ ယင်းအစား ကြယ်အလင်းပင်လယ်အဖြစ် ပြောင်းလဲသွားသည်။

ကြယ်အလင်းပင်လယ်က ဒေါသတကြီး ဆင်းသက်လာသည်။

ကြယ်အလင်းပင်လယ်၏ အားဖြည့်ပေးမှုအောက်မှာ ရွှေရောင်မီးတောက်များက ဖြည်းညင်းစွာ ငြိမ်သက်သွားပြီး အပြင်သို့ ဆက်လက် မပျံ့နှံ့တော့ပေ။ မီးတောက်များက ရွှံ့မြေခွေးရုပ်တုနှင့် တဖြည်းဖြည်း ပေါင်းစပ်သွားသည်။

စကြာဝဠာတစ်ခုလုံးအပေါ် သက်ရောက်နေသော ဖိအားက တဖြည်းဖြည်း ပြန်ဆုတ်သွားသည်။

ရုပ်တု၏ ဦးခေါင်းပေါ်မှ ကြယ်တာရာကောင်းကင်သည်လည်း ဝေဝါးသွားပြီး ဖြည်းညင်းစွာ ပျောက်ကွယ်သွားသည်။

နောက်အခိုက်အတန့်မှာ ကြယ်တာရာကောင်းကင်ကို ထောက်ပံ့ပေးနိုင်ဟန်ရသော ဧရာမနတ်စင်တစ်ခုက ရုပ်တု၏ ခြေဖဝါးအောက်မှာ တဖြည်းဖြည်း ထွက်ပေါ်လာပြီး မွန်မြတ်သန့်စင်သော အရှိန်အဝါကို ထုတ်လွှတ်လိုက်သည်။ ထို့နောက် ဧရာမနတ်စင်က ရုပ်တုကို ကောင်းကင်ပေါ်သို့ မြှောက်တင်ပေးလိုက်သည်။

နတ်စင်ထဲမှာ နတ်ဘုရားမှော်သင်္ကေတများဖြင့် ပြည့်နှက်နေပြီး ၎င်းက ရှေးဟောင်းအရှိန်အဝါကို ထုတ်လွှတ်နေသည်။ ဤသည်မှာ နတ်စင်က ကမ္ဘာဦးအစကတည်းက တည်ရှိနေသည့်အလား သို့မဟုတ် အဆင့်မြင့်ကြယ်တာရာစက်ဝန်း၏ တစ်စိတ်တစ်ပိုင်း ဖြစ်သည့်အလားပင်။ ဤအခိုက်အတန့်မှာ နတ်စင်က အလွန်သိပ်သည်းသော နတ်ဘုရားအရှိန်အဝါကို ထုတ်လွှတ်ပေးနေသည်။

ယင်းက နတ်ဘုရားမီးတောက်ထက် သာလွန်သည်။

ယင်းက နတ်ဘုရားယဇ်ပလ္လင်ဖြစ်သည်။

ယခုကဲ့သို့ နတ်ဘုရားယဇ်ပလ္လင် ဖွဲ့စည်းသွားခြင်းမှာ ရွှံ့မြေခွေးက နတ်ဘုရားယဇ်ပလ္လင်အဆင့်သို့ တတ်လှမ်းနေပြီဖြစ်ကြောင်း အဓိပ္ပာယ်ရ၏။

ရွှီချင်းက ထိုမြင်ကွင်းကို ရှင်းလင်းစွာ မြင်တွေ့သွားသည်။

အရေးကြီးအခိုက်အတန့်မှာ ရွှံ့မြေခွေးထုတ်လွှတ်လိုက်သော နတ်ဘုရားအတတ်ပညာက ဝမ်ကူးကုန်းမြေမှ သူ၏ မူလခန္ဓာကိုယ်ကို ကြီးမားသော စတေးမှုတစ်ခု ပြုလုပ်စေခဲ့ကြောင်း ရွှီချင်း အာရုံခံနိုင်သည်။

သို့မှသာလျှင် သူက နတ်ဘုရားသွေးစက်ကို အမှန်တကယ် စုပ်ယူနိုင်လိမ့်မည်။

ဤအခိုက်အတန့်မှာ သူက အဆင့်ချိုးဖြတ်တော့မည်။

တစ်ချိန်တည်းမှာ ရွှီချင်းက နတ်ဘုရားများအပေါ်ထားသော အဆင့်မြင့်ကြယ်တာရာစက်ဝန်းများ၏ ချစ်မေတ္တာကိုလည်း ခံစားမိသွားသည်။

နတ်ဘုရားယဇ်ပလ္လင်သည် ကျင့်ကြံခြင်းလမ်းစဉ်တွင် ခြေလှမ်းဝက်အင်မော်တယ်နှင့် နှိုင်းယှဉ်နိုင်သည်။

သို့သော် ခြားနားမှုတစ်ခု ရှိသည်။

အုပ်ချုပ်သူတစ်ပါး ခြေလှမ်းဝက်အင်မော်တယ်အဆင့်သို့ တတ်လှမ်းခြင်းက မြင့်မြတ်ထည်ဝါသော သဘာဝလွန်အဖြစ်အပျက်များကို ဆွဲဆောင်နိုင်သော်လည်း ယင်းက ဤအခိုက်အတန့်မှာ ရွှံ့မြေခွေး၏ နတ်ဘုရားယဇ်ပလ္လင်အဆင့်သို့ တတ်လှမ်းခြင်းကို မနှိုင်းယှဉ်နိုင်ပေ။

ယင်းက အဆင့်မြင့်ကြယ်တာရာစက်ဝန်းများ၏ စည်းမျဉ်းများထဲတွင် ချွင်းချက်အနေဖြင့် တည်ရှိနေသည့်အလားပင်။

အမှန်မှာ ဤစကြာဝဠာနှင့် ကြယ်တာရာကောင်းကင်က ဤအခိုက်အတန့်မှာ နတ်ဘုရားယဇ်ပလ္လင်တစ်ခု ထွက်ပေါ်လာရန် ဝိုင်းဝန်းကူညီပေးနေကြောင်း ရွှီချင်း အာရုံခံနိုင်သည်။

“ နတ်ဘုရားတွေက အဆင့်မြင့်ကြယ်တာရာစက်ဝန်းတွေရဲ့ အနှစ်သက်ဆုံးအရာပဲ… ”

ရွှီချင်းက စိတ်ထဲမှာ တီးတိုးရေရွတ်လိုက်သည်။

“ အဆင့်တတ်မှုက ဒီလောက် ကြီးကျယ်နေမှတော့ ကမ်းစပ်ကိုးခုအင်မော်တယ်နန်းတော်ရဲ့ ဥပဒေထိန်းသိမ်းသူတွေက အဲ့ဒါကို သေချာပေါက် အာရုံခံမိကြလိမ့်မယ် ”

ထိုအတွေးက ရွှီချင်း၏ စိတ်ထဲမှာ ထွက်ပေါ်လာသည်နှင့်ချက်ချင်း ကြယ်တာရာကောင်းကင်က တုန်ယင်သွားသည်။

မဖော်ပြနိုင်အောင် ကျယ်ပြောသော စွမ်းအားတစ်ခုက တိတ်တဆိတ် ရောက်ရှိလာသည်။ ထိုစွမ်းအား ကျဆင်းလာသည့်အခိုက် မင်ယန်စကြာဝဠာထဲမှ သက်ရှိအားလုံး၏ လှုပ်ရှားမှုများက ချက်ချင်း ရပ်တန့်သွားကြသည်။

နေအလင်းရောင်သော်လည်းကောင်း သို့မဟုတ် ကြယ်ဂြိုလ်များ၏ လည်ပတ်မှုသော်လည်းကောင်း ယင်းတို့က ဤအခိုက်အတန့်မှာ ရပ်တန့်သွားကြသည်။

အချိန်သည်ပင် ရပ်တန့်သွားဟန် ရ၏။

မင်ယန်စကြာဝဠာတစ်ခုလုံးကို ဧရာမပူဖောင်းတစ်လုံးက လွှမ်းခြုံသွားသည်။

ပူဖောင်းအတွင်းမှ အရာအားလုံးက သီးခြားခွဲထုတ်ခံလိုက်ရသည်။

ထိုထဲမှာ ရွှံ့မြေခွေး၏ အဆင့်တတ်မှု၊ ဒြပ်ထည်ဖွဲ့စည်းနေသော နတ်ဘုရားယဇ်ပလ္လင်နှင့် နတ်ဘုရား၏ အဆင့်တတ်လှမ်းခြင်းကို ကူညီပေးနေကြသော အဆင့်မြင့်ကြယ်တာရာစက်ဝန်းများထံမှ အထောက်အပံ့များလည်း ပါဝင်ကြသည်။

အရာအားလုံးက ရပ်တန့်သွားကြသည်။

နောက်အခိုက်အတန့်မှာ ဧရာမမျက်လုံးတစ်စုံက ကြယ်တာရာကောင်းကင်ထဲမှာ ထွက်ပေါ်လာပြီး မင်ယန်စကြာဝဠာထဲမှ အရာအားလုံးကို အစားထိုးသွားသည်။

ဧရာမမျက်လုံးတစ်စုံက ရွှီချင်းရှိနေသော နေရာသို့ စိုက်ကြည့်လိုက်သည်။

ဤသည်မှာ ၎င်းက အတွေးတစ်ချက်ဖြင့် ရွှီချင်းကိုသော်လည်းကောင်း၊ ရွှံ့မြေခွေးကိုသော်လည်းကောင်း သို့မဟုတ် မင်ယန်စကြာဝဠာတစ်ခုလုံးကိုသော်လည်းကောင်း နောက်ထပ် မတည်ရှိတော့အောင် ဖျက်ဆီးပစ်တော့မည့်အလားပင်။

ရွှီချင်းက နှလုံးတုန်ယင်ခြင်းကို အတင်းအကျပ် ဖိနှိပ်လိုက်ပြီး ဦးညွတ်လိုက်သည်။

“ အရှင်… သူက ငါ့ရဲ့ နတ်ဘုရားကျေးကျွန်ပါ ”

ဧရာမမျက်လုံးတစ်စုံက ရွှံ့မြေခွေးကို စိုက်ကြည့်လိုက်သည်။

ချက်ချင်းဆိုသလို ရွှံ့မြေခွေးရုပ်တုက ဝေဝါးလာပြီး ၎င်း၏ တစ်ဘဝစာ အတွေ့အကြုံများက ရုပ်တုပေါ်မှာ ပုံရိပ်ပြန်လာသည်။

ထိုထဲတွင် လူသားဧကရာဇ်တစ်ပါး၏ ပုံရိပ်ဖြင့် အစပျိုးထားသည်။ နတ်ဘုရားများ၏ ကျူးကျော်ဝင်ရောက်ခြင်းဖြင့် တွေ့ကြုံရသည့်အခါ ထိုလူသားဧကရာဇ်က သူ့ကိုယ်သူ ဝိညာဉ်သုံးခုအဖြစ် ခွဲထုတ်လိုက်ပြီး ဝိညာဉ်တစ်ခုစီကို နတ်ဘုရားတစ်ပါးအဖြစ် ပြန်လည်မွေးဖွားလာစေသည်။ ထိုမှတဖန် ဇာတ်လမ်းက ရွှီချင်းနှင့် တွေ့ဆုံခဲ့စဉ်က အဖြစ်အပျက်များထံသို့ ပြောင်းရွှေ့သွားသည်။ နောက်ပိုင်းတွင် သူတို့နှစ်ယောက်က ကံကြမ္မာချင်း ပေါင်းစည်းခဲ့ပြီး အမှတ်ငါးကြယ်တာရာစက်ဝန်းဆီသို့ ခရီးထွက်လာခဲ့ကြသည်။

ထို့နောက် ပန်းပေါင်းတစ်ရာနန်းတော်က ဖျက်သိမ်းခံလိုက်ရပြီး သူက အမှတ်ငါးကြယ်တာရာစက်ဝန်းထဲတွင် ခြေကုပ်တစ်နေရာ ရယူနိုင်ခဲ့သည်။

နောက်ဆုံးမှာတော့ သူက နတ်ဘုရားရွှံ့ဖြင့် ဖန်တီးထားသော မြေခွေးရုပ်တုထဲသို့ ဝင်ရောက်သွားခဲ့ပြီး သူ့ဘဝက ရွှီချင်း၏ ထိန်းချုပ်မှုအောက်သို့ ကျရောက်သွားခဲ့သည်။

ရွှံ့မြေခွေးနှင့်ပတ်သက်သော လျှို့ဝှက်ချက်အားလုံးက ဧရာမမျက်လုံးတစ်စုံ၏ အကြည့်အောက်မှာ အကုန်ထွက်ပေါ်လာသည်။

“ တကယ်လို့ အမှားတစ်ခုခုဖြစ်လာခဲ့ရင် နောက်ဆက်တွဲအကျိုးဆက်ကို မင်းခံယူရလိမ့်မယ် ”

နတ်ဘုရားအသံက ကြယ်တာရာကောင်းကင်ထဲမှာ ပဲ့တင်ထပ်သွားပြီး ရွှီချင်း၏ စိတ်ထဲသို့ ဝင်ရောက်သွားသည်။

ရွှီချင်းက အရိုအသေပေးလိုက်သည်။ တစ်ဖက်လူ၏ သရုပ်နှင့်ပတ်သက်ပြီး အဖြေကို သူရှာတွေ့ပြီးပြီ ဖြစ်သည်။

ကြယ်တာရာကောင်းကင်ထံမှ ဧရာမမျက်လုံးတစ်စုံက ပြန်မှိတ်သွားသည့်အခါ မင်ယန်စကြာဝဠာကို အပြင်မှ ဖုံးလွှမ်းထားသော ပူဖောင်းက ပျောက်ကွယ်သွားသည်။ ထို့နောက် ကြယ်ဂြိုလ်များ၊ သက်ရှိအားလုံး၊ အရာဝတ္ထုအားလုံးနှင့် ရွှံ့မြေခွေး၏ အဆင့်တတ်မှုက ပုံမှန်အတိုင်း ဆက်ပြီး လည်ပတ်သွားကြသည်။

မည်သူမှ မူမမှန်မှုကို အာရုံမခံမိကြချေ။

ရွှံ့မြေခွေးသည်တော့ ဤအခိုက်အတန့်မှာ သူ၏ နတ်ဘုရားယဇ်ပလ္လင်ကို အပြည့်အဝ ဒြပ်ထည်ဖွဲ့စည်းနိုင်သွားသည်။ ရွှံ့မြေခွေးရုပ်တုက ဧရာမနတ်စင်ပေါ်မှာ မားမားမတ်မတ် ရပ်နေစဉ် နတ်ဘုရားယဇ်ပလ္လင်အဆင့်အရှိန်အဝါက သူ့ထံမှ ထွက်ပေါ်လာသည်။

နောက်အခိုက်အတန့်မှာ ရွှံ့မြေခွေး မျက်လုံးဖွင့်လိုက်သည့်အခါ ရွှေရောင်အလင်းက သူ၏ မျက်လုံးထဲမှာ ဖြတ်ပြေးသွားသည်။ သူ၏ အနောက်မှ မရေမတွက်နိုင်သော ကြယ်များက ထွန်းလင်းတောက်ပလာကြသည်။

သူက ရိုးရှင်းစွာ လက်ဝှေ့ယမ်းလိုက်သည့်အခါ အဆင့်တတ်မှုမှ ဖြစ်ပေါ်လာသော သဘာဝလွန်အဖြစ်အပျက်အားလုံးက ပြန်ဆုတ်ခွာသွားကြသည်။ ထို့နောက် သူက တစ်ခစ်ခစ်ရယ်လိုက်ပြီး ရွှီချင်းထံသို့ လျှောက်သွားသည်။

“ မောင်လေးက မလိုအပ်ဘဲ အရမ်းသတိကြီးတာပဲ… နတ်ဘုရားရွှံ့ကိုတောင် သုံးပြီး ငါ့ရဲ့ ခန္ဓာကိုယ်ကို ပုံဖော်ခဲ့တယ်… ဒါပေမဲ့ အခုကြည့်လေ ဘယ်မှာ အံ့ဩစရာရှိလို့လဲ… ဘာမှမဖြစ်လာဘူး ”

ရွှံ့မြေခွေးက သာမန်ကာလျှံကာ ပြောသည်။ သူရရှိခဲ့သော အကျိုးအမြတ်များနှင့်ပတ်သက်ပြီး သူက အလွန်စိတ်ကျေနပ်နေကြောင်း ထင်ရှားသည်။

သူက နတ်ဘုရားယဇ်ပလ္လင်အဆင့်သို့ တတ်လှမ်းနိုင်ခဲ့ရုံသာမက နတ်ဘုရားသွေးစက်ထဲမှ နတ်ဘုရားအခွင့်အာဏာကိုလည်း စုပ်ယူနိုင်ခဲ့သည်။ သို့ဖြစ်၍ အနာဂတ်တွင် အစစ်အမှန်နတ်ဘုရားတစ်ပါး ဖြစ်လာနိုင်မည့် သူ၏ အခွင့်အရေးက ပိုများသွားသည်။ ယခု သူ့မှာ ရှင်းလင်းသော ဦးတည်ရာတစ်ခု ရှိသွားပြီ ဖြစ်သည်။

ရွှီချင်းက ရွှံ့မြေခွေးကို အဓိပ္ပာယ်ရှိစွာ တစ်ချက်ကြည့်လိုက်ပြီး တည်ငြိမ်စွာ ပြောသည်။

“ စောစောက ကမ်းစပ်ကိုးခုအင်မော်တယ်အရှင်သခင် ရောက်လာခဲ့တယ် ”

ရွှီချင်း၏ စကားဆုံးသွားသည်နှင့်ချက်ချင်း ရွှံ့မြေခွေးက မျက်လုံးပြူးကျယ်သွားပြီး သူ၏ သူငယ်အိမ်များက ကျုံ့သွားကြသည်။

ရွှီချင်း၏ အကျင့်စရိုက်ကို သူသိသည်။ သို့ဖြစ်၍ ရွှီချင်းက အမှန်ကို ပြောနေကြောင်း သူနားလည်သည်။ သို့သော်လည်း ယင်းကို လုံးဝ သူသတိမထားမိခဲ့ပေ။

ထို့ကြောင့် သူက သက်ပြင်းချလိုက်ပြီး စိတ်ထဲမှာ တီးတိုးရေရွတ်လိုက်သည်။

‘ ဒီကြယ်တာရာစက်ဝန်းက အရမ်းကြောက်စရာကောင်းတာပဲ… ’

“ ထားပါ... ဘယ်သူက ဂရုစိုက်မှာလဲ… နတ်ဘုရားတွေပဲဖြစ်ဖြစ် အင်မော်တယ်တွေပဲဖြစ်ဖြစ် အဲ့ဒါတွေက ငါနဲ့ ဘာမှမသက်ဆိုင်ဘူး… အဲ့ဒါက ငါ့အလုပ်လည်း မဟုတ်ဘူး… ငါပျော်ရွှင်နေသရွေ့ ကျန်တာတွေက ဘာမှအရေးမပါဘူး ”

ရွှံ့မြေခွေးက ကိစ္စများကို ရှင်းလင်းစွာ မြင်နိုင်သည်။ ဤအခိုက်အတန့်မှာ သူက မျက်တောင်တဖျပ်ဖျပ်ခတ်လိုက်ပြီး ထိုကိစ္စများကို မေ့ထားလိုက်ကာ ရွှီချင်းကို ထပ်မံ စနောက်ရန် ပြင်လိုက်သည်။

ရွှီချင်းက သူ့ကို အခွင့်အရေးမပေးဘဲ အာကာသတွင်းနက်ကို ကြည့်လိုက်သည်။

“ မင်းက နတ်ဘုရားယဇ်ပလ္လင်အဆင့်ကို ရောက်သွားပြီဆိုတော့ ငါနဲ့အတူ အထဲလိုက်ခဲ့ပြီး စူးစမ်းရှာဖွေပါ… မင်ယန်စကြာဝဠာက ဘာထူးခြားတာလဲ သွားကြည့်ရအောင် ”

ထိုသို့ပြောပြီးနောက် သူက အရှေ့သို့ ခြေတစ်လှမ်း လှမ်းလိုက်သည်။

ရွှီချင်း၏ နောက်ကျောကို ကြည့်နေရင်း ရွှံ့မြေခွေးက နှုတ်ခမ်းသပ်လိုက်သည်။

“ မောင်လေး… နင်အခုလိုမျိုး ပိုပြီးအလေးအနက်ထားလေ ငါနင့်ကို ပိုပြီးသဘောကျလေပဲ ”