အလွဲသုံးစားလုပ်ခြင်း

သူတို့၏ ရပ်တည်မှုက မတူညီသည့်အခါ ထုံးစံအားဖြင့် သူတို့၏ စိတ်သဘောထားနှင့် လုပ်ရပ်များသည်လည်း ကွာခြားသွားလိမ့်မည်။

၎င်းကို လူကောင်းနှင့် လူဆိုးဟူ၍ ရိုးရှင်းစွာ မခွဲခြားနိုင်ပေ။

အဘယ့်ကြောင့်ဆိုသော် လူကောင်းနှင့် လူဆိုးက များသောအားဖြင့် မျိုးနွယ်တစ်ခုတည်းမှ လူများကြားထဲမှာသာ ဖြစ်ပေါ်လေ့ရှိသည်။

သို့ဖြစ်၍ မျိုးနွယ်ခြားများသည် မုန်းတီးခြင်း၊ ဒေါသနှင့် အကူအညီမဲ့ခြင်းကို ခံစားမိသွားကြသည်။ မည်သို့ဖြစ်ပါစေ ၎င်းတို့၏ ယခင်ဘိုးဘေးများက နတ်ဘုရားများ ဖြစ်ခဲ့ကြသည်။ အကယ်၍ အမှတ်ငါးကြယ်တာရာစက်ဝန်းသည်သာ အင်မော်တယ်နယ်မြေအဖြစ် မပြောင်းလဲသွားလျှင် ယခုအချိန်မှာ ၎င်းတို့သည်လည်း နတ်ဘုရားများ ဖြစ်နေကြလိမ့်မည်။

လူသားမျိုးနွယ်သည် ၎င်းတို့ကျွန်ပြုထားသော အဆင့်နိမ့်မျိုးနွယ်စုတစ်ခုသာ ဖြစ်သည်။

သို့သော်လည်း ယခု နတ်ဘုရားများက အကျဉ်းချခံထားရပြီး သတ်ဖြတ်ခံနေရသည်။ ထိုမျိုးနွယ်ခြားများသည်လည်း သစ်သားပြားပေါ်မှ အသားတုံးများနှင့် မခြားပေ။ ၎င်းတို့က အချိန်မရွေး အပိုင်းပိုင်း ခုတ်ထစ်ခံရနိုင်သည်။

အတိုင်းအတာတစ်ခုထိဆိုရလျှင် ယင်းက သံသရာစက်ဝန်းတစ်ခုနှင့် ဆင်တူသည်။

မည်သူက မှားသည် မှန်သည် မရှိပေ။ ယင်းက အင်မော်တယ်များနှင့် နတ်ဘုရားများကြားမှ ရပ်တည်မှုမတူညီသော ကိစ္စတစ်ခုမျှသာ ဖြစ်သည်။

သို့ဖြစ်၍ အားနည်းသူများက အားကြီးသူများ၏ စားသုံးခံရရန် ကံပါလာသည်။

အနောက်မှာ ကျန်နေခဲ့သူများက သာတူညီစွာ ရပ်နိုင်ရန် အခွင့်အရေး ဆုံးရှုံးသွားကြလိမ့်မည်။

သို့ဖြစ်၍ ကျင့်ကြံသူများက နတ်ဘုရားဖြစ်လာရန် ရွေးချယ်ကြလိမ့်မည် မဟုတ်ချေ။ ယင်းက အဆင့်မြင့်ကြယ်တာရာစက်ဝန်းများနှင့် ဖန်တီးမှုအတွင်းရှိ သက်ရှိအားလုံးအတွက် အလွန်အရေးကြီးသော ဥပဒေတစ်ခု ဖြစ်သည်။

အနိုင်ကျင့်ခံရသူက အမြဲတမ်း အနိုင်ကျင့်ခံရလိမ့်မည် မဟုတ်သလို လွှမ်းမိုးဖိနှိပ်သူကလည်း အမြဲတမ်း အနိုင်ကျင့်နိုင်လိမ့်မည် မဟုတ်ပေ။

ယင်းက သံသရာစက်ဝန်း ဖြစ်သည်။

ရွှီချင်းက ထိုသဘောတရားကို ဝမ်ကူးကုန်းမြေမှာ သူရှိနေခဲ့စဉ်ကတည်းက နားလည်ထားခဲ့သည်။

အမှတ်ငါးကြယ်တာရာစက်ဝန်းဆီသို့ သူရောက်လာပြီး ဤနေရာမှ နတ်ဘုရားများ၏ အခြေအနေကို မျက်မြင်တွေ့ပြီးနောက် ထိုဥပဒေကို ပိုပြီးကောင်းမွန်စွာ နားလည်သွားခဲ့သည်။

ဥပမာ အင်မော်တယ်သူရဲကောင်းသုသာန်ထဲမှ အကြွင်းအကျန်များ၏ အတွေးများနှင့် မကျေမချမ်းစိတ် ဖြစ်သည်။

ယင်းက နတ်ဘုရားများနှင့် မျိုးနွယ်ခြားများအပေါ် အမှတ်ငါးကြယ်တာရာစက်ဝန်းတစ်ခုလုံး၏ သဘောထားဖြစ်သည်။

ရွှီချင်းက ယင်းကို သဘောတူသည်။

သို့သော်လည်း သူ့မှာ သူ့ကိုယ်ပိုင်သုံးသပ်မှု ရှိသည်။ မကောင်းသော နတ်ဘုရားများစွာထဲတွင် လူသားများထက် ပိုပြီးလူသားဆန်သော နတ်ဘုရားတချို့လည်း ရှိသေးသည်။

သို့သော်လည်း ထိုလူသားဆန်သော နတ်ဘုရားများက ဤအကျဉ်းထောင်ထဲမှာ မရှိကြောင်း ထင်ရှားပေသည်။

သို့ဖြစ်၍ ရွှီချင်းက ၎င်းတို့ကို ရွေးချယ်ရာတွင် ၎င်းတို့တစ်ဦးချင်းစီ၏ အမူအကျင့်နှင့် အတိတ်လုပ်ရပ်များအပေါ် အခြေမခံပေ။

သို့ဖြစ်လေရာ ငါးအတွက်ကြောင့် ရေကန်တစ်ခုလုံး ညစ်ညမ်းသွားမည်ဆိုလျှင်ပင် သူ၏ နှလုံးက အေးဆေးတည်ငြိမ်နေလိမ့်မည်။

ဤအခိုက်အတန့်မှာ သူက အရွက်ပေါ်မှ နောက်ဆုံးကမ္ဘာဆီသို့ ရောက်ရှိသွားသည်။

ဤနေရာမှ ပတ်ဝန်းကျင်သည် အလွန်ကျယ်ပြောပြီး စေးကပ်သော အနက်ရောင်ပင်လယ် ဖြစ်သည်။

ပင်လယ်မျက်နှာပြင်က တည်ငြိမ်နေသော်လည်း ငြိမ်းချမ်းသော အရိပ်အယောင်မရှိပေ။ အပုပ်နံ့က ပင်လယ်ရေထဲမှာ တထောင်းထောင်း ထွက်ပေါ်နေစဉ် အလွန်အားကောင်းသော ဒြပ်နှောများက ဘေးပတ်ဝန်းကျင်မှာ စိမ့်ဝင်ပျံ့နှံ့နေသည်။

ပင်လယ်အောက်မှ ကြမ်းပြင်ပေါ်တွင်တော့ ဧရာမဦးခေါင်းတစ်ခုက လဲလျောင်းနေသည်။

ထိုဦးခေါင်းက ငှက်တစ်ကောင်၏ ဦးခေါင်းနှင့် ဆင်တူပြီး ရှည်လျားသော လက်တံအများအပြားဖြင့် ဖုံးလွှမ်းခံထားရသည်။ ထို့ပြင် လက်တံများက စေးကပ်သော အရည်ကိုလည်း အဆက်မပြတ် ထုတ်လွှတ်ပေးနေသည်။

နှစ်ပေါင်းမရေမတွက်နိုင်အောင် ကြာပြီးနောက် ထိုအရည်များက အနက်ရောင်ပင်လယ်တစ်စင်းအဖြစ် စုပုံသွားသည်။

ရွှီချင်းဆင်းသက်လာသည့်အခိုက် ဒြပ်နှောများက ကောင်းကင်နှင့် ပင်လယ်ကြားမှာ တစ်ဟုန်ထိုး ထွက်ပေါ်လာသည်။ တည်ငြိမ်နေသော ပင်လယ်မျက်နှာပြင်သည်ပင် လှိုင်းတဝုန်းဝုန်းထသွားသည်။ တစ်ချိန်တည်းမှာ ပင်လယ်ကြမ်းပြင်ပေါ်မှ ဧရာမဦးခေါင်းက အပြင်းအထန် တုန်ယင်သွားပြီး ရုတ်တရက် မျက်လုံးဖွင့်လိုက်သည်။

ရွှေရောင်အလင်းက ပင်လယ်ကို ထိုးဖောက်သွားပြီး ကောင်းကင်ပေါ်ထိ ပျံတတ်သွားသည်။

ဝိညာဉ်လှုပ်ခတ်စေနိုင်သော ထူးထူးဆန်းဆန်း အသံသည်လည်း လေထဲမှာ ပဲ့တင်ထပ်သွားပြီး ရွှီချင်း၏ နားထဲသို့ တိုက်ရိုက် ဝင်ရောက်သွားသည်။

ချက်ချင်းဆိုသလို မရေမတွက်နိုင်သော အတွေးများက သူ၏ စိတ်ထဲမှာ ထိန်းမနိုင်သိမ်းမရ ဒလဟော ထွက်ပေါ်လာသည်။

နောက်အခိုက်အတန့်မှာ အခြေအမြစ်မရှိသော ထိုအတွေးများက ဒြပ်ထည်ရှိလာကြပြီး စေးကပ်သော အနက်ရောင်ချည်မျှင်များအဖြစ် ပြောင်းလဲသွားကြသည်။ တစ်ဆက်တည်းမှာ ယင်းတို့က ရွှီချင်း၏ ဦးနှောက်ကို ရစ်ပတ်ချည်နှောင်လိုက်ကြသည်။

ထို့နောက် ဘေးပတ်ဝန်းကျင်မှ ဒြပ်နှောများက လေပြင်းမုန်တိုင်းအဖြစ် စုဝေးသွားပြီး ရွှီချင်းထံသို့ ဦးတည်သွားသည်။

ပင်လယ်ပြင်ပေါ်မှ လှိုင်းလုံးများက တဖြည်းဖြည်း ပိုကြီးမားလာသည်နှင့် လောကတစ်ခုလုံး ကပြောင်းကပြန်ဖြစ်သွားဟန် ရ၏။

ပင်လယ်က ကောင်းကင်ဖြစ်လာပြီး ကောင်းကင်က မြေပြင်အဖြစ် အစားထိုးခံလိုက်ရသည်။

လောကက ကပြောင်းကပြန်ဖြစ်သွားသည့်အခါ အပေါ်မှ အနက်ရောင်ပင်လယ်က အောက်ဘက်သို့ အရှိန်အဟုန်ပြင်းစွာ ကျဆင်းလာသည်။

ကျဆင်းလာနေသည့်ထဲမှာ ဦးခေါင်းလည်း ပါဝင်သည်။ ၎င်းက ကပြောင်းကပြန်စွမ်းအားကို ချေးငှား၍ ပင်လယ်ထဲမှ ရုန်းထွက်လာသည်။

နောက်အခိုက်အတန့်မှာ လောကတစ်ခုလုံး ဝေဝါးသွားပြီး ဝုန်းခနဲ မြည်သွားသည်။ အနက်ရောင်ပင်လယ်နှင့် ဦးခေါင်းက အရာအားလုံးကို ဖုံးလွှမ်းသွားသည်။

အသက်ရှူချိန်အနည်းငယ်ကြာပြီးနောက် အလွန်သိပ်သည်းသော အင်မော်တယ်စွမ်းအင်က ဝေဝါးနေသော လောကထဲမှ ထွက်ပေါ်လာပြီး ကျယ်လောင်သော မိုးခြိမ်းသံကို ထုတ်လွှတ်လိုက်သည်။ ယင်းက ကမ္ဘာတုန်ဟီးသွားစေမည့် အဖျက်စွမ်းအားကိုလည်း ထုတ်လွှတ်လိုက်သည်။

အဖျက်စွမ်းအားက အလွှာအထပ်ထပ် ပျံ့ပွားသွားသည်နှင့် ဘေးပတ်ဝန်းကျင်မှ အရာအားလုံးက ဖယ်ရှားခံလိုက်ရသည်။

ဝေဝါးနေသော လောကက ပြန်ကြည်လင်သွားသည်။

ဒြပ်နှောများက အင်မော်တယ်စွမ်းအင်ကြောင့် အရည်ပျော်သွားပြီး စေးကပ်သော အနက်ရောင်ပင်လယ်က အငွေ့ပျံသွားသည်။

ထို့နောက် ရွှီချင်း၏ ပုံရိပ်က ပြန်ပေါ်လာသည်။ သူက ညာလက်ကို မြှောက်လိုက်ပြီး သူ့ထက် အဆပေါင်းများစွာ ပိုပြီးကြီးမားသော ဧရာမဦးခေါင်းကို ဖမ်းဆုပ်လိုက်သည်။

သူက အနည်းငယ် အားစိုက်ထည့်လိုက်လေရာ သူ၏ လက်ငါးချောင်းက ဦးခေါင်း၏ အသွေးအသားထဲထိ ထိုးဖောက်သွားသည်။

အရွယ်အစားချင်း နှိုင်းယှဉ်မည်ဆိုလျှင် ရွှီချင်းက ဧရာမဦးခေါင်းအတွက် ပုရွက်ဆိတ်နှင့် မခြားပေ။ သို့သော်လည်း ဤအခိုက်အတန့်မှာ ကြောက်လန့်တုန်လှုပ်နေသူက ဧရာမဦးခေါင်း ဖြစ်သည်။

၎င်းက အပြင်းအထန် တုန်ယင်နေသည်။

မူလအနှစ်သာရဖြစ်သော ရွှေရောင်ချည်မျှင်များက ဦးခေါင်းထံမှ ဆွဲထုတ်ခံနေရပြီး ရွှီချင်း၏ လက်ထဲမှ ကျောက်စိမ်းပြားထဲသို့ စီးဝင်သွားသည်။

အချိန်အတော်ကြာပြီးနောက် နှလုံးနာကျင်သော အော်သံက ပဲ့တင်ထပ်လာသည်။

နတ်ဘုရားဦးခေါင်းက တုန်ယင်သွားပြီး မီးခိုးရောင်အဖြစ် ပြောင်းလဲသွားသည်။ ထို့နောက် ၎င်းက ပြာမှုန်အဖြစ် ပြောင်းလဲသွားပြီး ဤလောကထဲမှာ ပြန့်ကျဲသွားသည်။

လေထဲတွင် ရွှီချင်းက နေရာမှာ မတ်တတ်ရပ်နေသည်။ သူ၏ အေးစက်စက်အကြည့်က အရပ်မျက်နှာအဘက်ဘက်ဆီသို့ ဖြတ်သန်းသွားသည်။

“ ဒီနေရာရဲ့ ချိပ်တံဆိပ်အစီအရင်က ပျက်စီးခါနီးနေပြီ… အဲ့ဒါကြောင့် ဒီနတ်ဘုရားက ငါ့ကို အရင်လာတိုက်ခိုက်နိုင်တာပဲ ”

“ ဒါပေမဲ့ ဒီချိပ်တံဆိပ်အစီအရင်က နှစ်တွေကြာမြင့်လာလို့ သူ့ဘာသာ ပျက်စီးသွားတာ မဖြစ်နိုင်ဘူး… တခြားတည်ရှိမှုတွေက ဒီချိပ်တံဆိပ်အစီအရင်ရဲ့ အစိတ်အပိုင်းအများစုကို ဖျက်ဆီးပစ်ခဲ့တာ ဖြစ်ရမယ်… အဲ့ဒါကြောင့် နှစ်အနည်းငယ်ကြာပြီးရင် ချိပ်တံဆိပ်အစီအရင်က သူ့ဘာသာ ဆက်ပြီး ပျက်စီးသွားလိမ့်မယ်… အဲ့ဒီတခြားတည်ရှိမှုတွေက အကျဉ်းထောင်ဖောက်ခံရမှာကို စောင့်ဆိုင်းနေကြတာ ဖြစ်မယ် ”

“ ဒါဆိုရင် ဒီဟာက အပြင်ဘက်က မျိုးနွယ်ခြားတွေရဲ့ လုပ်ရပ်လား ဒါမှမဟုတ် ဒီအကျဉ်းထောင်ကိုယ်တိုင်က အလွဲသုံးစားလုပ်နေတာလား ”

ရွှီချင်းက နက်နဲစွာ တွေးတောလိုက်သည်။

သူက အတိတ်မှာ ထောင်မှူးအဖြစ် ဆောင်ရွက်ခဲ့ဖူးသည်။ သို့ဖြစ်၍ အကျဉ်းထောင်ကဲ့သို့သော နေရာမျိုးတွင် ပုန်းကွယ်နေသော အကြံအစည်များနှင့် အာဏာအလွဲသုံးစားလုပ်ခြင်းက များသောအားဖြင့် ဖြစ်ပေါ်လေ့ရှိကြောင်း သူနားလည်သည်။

တစ်ခဏကြာပြီးနောက် ရွှီချင်းက မျက်မှောင်ကြုတ်လိုက်သည်။ သူက ခန္ဓာကိုယ်ကို ရွေ့လျားလိုက်ပြီး ဤကမ္ဘာမှ ထွက်သွားကာ ကြယ်တာရာကောင်းကင်တွင် ပြန်ပေါ်လာသည်။

သူက အနီရောင်ပင်လယ်ရေမှော်ကို စိုက်ကြည့်လိုက်သည်။ ထို့နောက် သူက တခြားအရွက်များကို ဂရုတစိုက် စစ်ဆေးကြည့်လိုက်သည်။

ပင်လယ်ရေမှော်က လှုပ်ခါသွားသည်။

တစ်ခဏကြာပြီးနောက် ရွှီချင်းက ရုတ်တရက် ပြောသည်။

“ တခြားအရွက်တွေပေါ်မှာ အကျဉ်းချခံထားရတဲ့ နတ်ဘုရားထက်ဝက်ကျော်က သေဆုံးသွားလောက်ပြီ… သူတို့တွေကို… မင်းဝါးမျိုခဲ့တာ မဟုတ်လား ”

ထိုစကားသံ ထွက်ပေါ်လာသည်နှင့်ချက်ချင်း ပင်လယ်ရေမှော်၏ တုန်ခါမှုက ပိုပြီးပြင်းထန်လာသည်။ တစ်ချိန်တည်းမှာ အရွက်အားလုံးက ရွေ့လျားသွားကြပြီး ရွှီချင်းထံသို့ အရပ်မျက်နှာအဘက်ဘက်မှ ဖြည်းညင်းစွာ ချဉ်းကပ်သွားကြသည်။

ရွှီချင်းက မလှုပ်ရှားဘဲ ဆက်လက် ပြောသည်။

“ အစောနက မင်းငါ့ကို ပေးခဲ့တဲ့ အရွက်က မင်းတမင်ဖယ်ထားတဲ့ဟာ မဟုတ်လား… အဲ့ဒါက တစ်ယောက်ယောက် မင်းဆီကို အရင်းအမြစ်လာစုဆောင်းတဲ့အခါ မင်းရဲ့ အာဏာအလွဲသုံးစားလုပ်တာကို ဖုံးကွယ်ဖို့ ဖန်တီးထားတဲ့ အရာပဲ… ငါခန့်မှန်းတာ မှန်လား ”

ဤအခိုက်အတန့်မှာ ကြောက်မက်ဖွယ်ကောင်းသော စိတ်ဆန္ဒက ပိုပြီးစူးရှလာပြီး အံ့ဖွယ်ကောင်းသော ဖိအားက ပိုပြီးပြင်းထန်လာသည်။

အက်ကွဲသံသည်ပင် ဘေးပတ်ဝန်းကျင်မှ ကြယ်တာရာကောင်းကင်ထံမှ ပဲ့တင်ထပ်လာသည်။ ထို့နောက် ထူးဆန်းသော မှော်သင်္ကေတများက အရပ်ရှစ်မျက်နှာမှာ ထွက်ပေါ်လာကြပြီး ဤနေရာကို ချိပ်ပိတ်လိုက်သည်။

ရွှီချင်းက မျက်လုံးမှေးကျဉ်းလိုက်ပြီး ထပ်မံ ပြောသည်။

“ မိုးသောက်သခင်လေးက ငါနဲ့ ကောင်းမွန်တဲ့ ဆက်ဆံရေးရှိတယ်… အဲ့ဒါကို ငါ့ရဲ့ အရှိန်အဝါနဲ့ မိုးသောက်အင်မော်တယ်နန်းတော်အပေါ် ငါ့ရဲ့ အခွင့်အာဏာကနေတဆင့် မင်းအာရုံခံနိုင်တယ် ”

“ ကမ်းစပ်ကိုးခုအင်မော်တယ်အရှင်သခင်က ငါ့ကို အထူးအာရုံစိုက်ထားတယ်… အဲ့ဒါကို ဒီပစ္စည်းရဲ့ အရှိန်အဝါကနေတဆင့် မင်းအာရုံခံနိုင်လောက်တယ် ”

“ ငါက ဒီတစ်ခေါက် တတ်လှမ်းသူတွေထဲမှာ အဆင့်တစ်ပဲ… တကယ်လို့ ဒီနေရာမှာ ငါသေဆုံးသွားမယ်ဆိုရင် မင်းလွတ်မြောက်နိုင်မယ်လို့ ထင်လား ”

ရွှီချင်းက စကားဆုံးသည်နှင့် သစ်သားတုံကင်တစ်ခုကို ထုတ်လိုက်သည်။ ယင်းက နတ်ဘုရားသွေးမြစ်ပေါ်၌ ကူးတို့လှေကို ဆင့်ခေါ်နိုင်သော လမ်းညွှန်တုံကင်ဖြစ်သည်။

ပင်လယ်ရေမှော်က ရပ်တန့်သွားသည်။ နောက်အခိုက်အတန့်မှာ ကြောက်မက်ဖွယ်ကောင်းသော စိတ်ဆန္ဒက မြန်ဆန်စွာ ရောက်ရှိလာပြီး ရွှီချင်း၏ လက်ထဲမှ သစ်သားတုံကင်ကို လွှမ်းခြုံသွားသည်။ ထို့နောက် ၎င်း၏ စိတ်ဆန္ဒက အပြင်းအထန် တုန်ယင်သွားသည်။

ချက်ချင်းဆိုသလို ထိုစိတ်ဆန္ဒက သစ်သားတုံကင်ထံမှ အမြန်ရှောင်ဖယ်သွားပြီး ရွှီချင်းကို လွှမ်းခြုံသွားသည်။

ဤသည်မှာ ၎င်းက ပိုပြီးနက်ရှိုင်းစွာ စူးစမ်းလေ့လာနေသည့်အလားပင်။

ရွှီချင်း၏ အမူအရာက အေးဆေးတည်ငြိမ်သည်။

မိုးသောက်အင်မော်တယ်နန်းတော်ထဲမှ ကြေးမုံသမိုင်းပုံရိပ် အဆုံးသတ်သွားပြီးနောက် စတုတ္ထအလွှာအထိ တတ်လှမ်းနိုင်ခဲ့ကြသော လူတိုင်းက ပစ္စုပ္ပန်လောကထဲမှာလည်း အကျိုးအမြတ်ကိုယ်စီ ရရှိခဲ့ကြောင်း သူသေချာသည်။ သို့ဖြစ်၍ စတုတ္ထအလွှာထဲမှာ အကြီးမားဆုံး အကျိုးအမြတ်ကို ရရှိခဲ့သောလူအနေဖြင့် သူက ပစ္စုပ္ပန်လောကထဲမှာ မည်သို့ကြောင့် ဘာမှမရဘဲနေမည်နည်း။

ဤကောင်းကင်ဘုံအလွန်ထဲတွင် ရွှီချင်းက ယင်းကို အာရုံမခံနိုင်ခဲ့သော်လည်း ထိုသို့ဖြစ်ရခြင်းက အစစ်အမှန် မိုးသောက်အင်မော်တယ်နန်းတော်က ဖုံးကွယ်ခံထားရခြင်းကြောင့် ဖြစ်နိုင်သည်ဟု သူမှန်းဆခဲ့သည်။

မိုးသောက်အင်မော်တယ်နန်းတော်ကို သူအာရုံမခံနိုင်သော်လည်း ယင်းက ဤပင်လယ်ရေမှော်သည်လည်း အာရုံမခံနိုင်ဘူးဟု မဆိုလိုပေ။ မည်သို့ဖြစ်ပါစေ ပင်လယ်ရေမှော်က ဤကောင်းကင်ဘုံအလွန်ထဲမှာ အစကတည်းက တည်ရှိနေခဲ့ခြင်း မဟုတ်ပါလော။

သို့ဖြစ်၍ ရွှီချင်းက သွယ်ဝိုက်သော နည်းလမ်းဖြင့် သူ၏ သရုပ်ကို အတည်ပြုရန် ကြိုးစားနေခြင်း ဖြစ်သည်။

အကယ်၍ ယင်းက ကျရှုံးသွားမည်ဆိုလျှင်ပင် ကိစ္စမရှိပေ။ ကမ်းစပ်ကိုးခုအင်မော်တယ်အရှင်သခင်၏ အာရုံစိုက်မှုနှင့် အဆင့်တစ်တတ်လှမ်းသူဟူသော သူ၏ သရုပ်က သူ့အသက်ကို ကယ်တင်ပေးရန် လုံလောက်ပေသည်။

သို့ဖြစ်၍ သူက တစ်ဖက်လူ၏ စစ်ဆေးမှုကို မတားဆီးပေ။

အချိန်အတော်ကြာပြီးနောက် ပင်လယ်ရေမှော်၏ စိတ်ဆန္ဒက ပိုပြီးပြင်းထန်စွာ တုန်ယင်သွားကြောင်း သူအာရုံခံမိသွားသည်။ အမှန်မှာ ပင်လယ်ရေမှော်ကိုယ်တိုင်ပင် အပြင်းအထန် တုန်ယင်သွားသည်။ ယင်းက ရွှီချင်းကို မျက်လုံးဝင်းလက်သွားစေသည်။

သူ၏ ခန့်မှန်းမှုက မှန်ကန်ကြောင်း သူသိလိုက်သည်။

ထို့နောက် ပင်လယ်ရေမှော်၏ အရှိန်အဝါက ဖရိုဖရဲဖြစ်လာသည်။ ဤသည်မှာ ၎င်းက ဆုံးဖြတ်ချက်ချရန် အခက်တွေ့နေသည့်အလားပင်။

၎င်း၏ နက်ရှိုင်းသော စစ်ဆေးမှုအောက်တွင် ထိုလူသား၏ ခန္ဓာကိုယ်ထဲမှာ မိုးသောက်အင်မော်တယ်နန်းတော်၏ အခွင့်အာဏာက တကယ်ရှိနေကြောင်း ရှာတွေ့ခဲ့သည်။ ထို့ပြင် ယင်းက အလွန်ကြီးမားသော ကမ္မဆက်နွယ်မှုဖြစ်သည်။

ထိုအခွင့်အာဏာက ၎င်းကို အလွန်စိုးရိမ်ကြောင့်ကြစေသည်။

မည်သို့ဖြစ်ပါစေ ယင်းက မိုးသောက်အင်မော်တယ်နန်းတော်ဖြစ်သည်။

မိုးသောက်ကောင်းကင်ဘုံအလွန်က ၎င်း၏ အရှင်သခင်ကို ဆုံးရှုံးသွားခဲ့သော်လည်း ၎င်း၏ သရုပ်က ဆက်လက် ရှိနေဆဲပင်။

သို့သော်လည်း ၎င်းက ကြီးမားသော ပြစ်မှုကို ကျူးလွန်ခဲ့သည်။ သို့ဖြစ်၍ ယခု ၎င်းက ဆုံးဖြတ်ချက်ချရန် အခက်တွေ့နေသည်။

ထိုအခိုက်အတန့်မှာ ရွှီချင်း၏ အသံက ထပ်မံ ပဲ့တင်ထပ်လာသည်။

“ မင်းက ဒီနတ်ဘုရားအကျဉ်းထောင်တွေကို နှစ်ပေါင်းမရေမတွက်နိုင်အောင် ဖိနှိပ်ထားခဲ့တယ်… ဒါကြောင့် ရံဖန်ရံခါ မင်းဗိုက်ဆာလာတဲ့အခါ တချို့တလေ ယူစားတာက ပုံမှန်ကိစ္စပါပဲ ”

ပင်လယ်ရေမှော်၏ တုန်ခါမှုက ရပ်တန့်သွားသည်။

“ မင်းက အရွက်အားလုံး စားလို့ရတာတောင် တစ်ရွက်ချန်ထားသေးတယ်… အဲ့ဒါက မင်းရဲ့ သစ္စာရှိမှုကို ဖော်ပြလိုက်တာပဲ ”

ပင်လယ်ရေမှော်၏ စိတ်ဆန္ဒက ပရမ်းပတာလှုပ်ခတ်သွားသည်။

“ ဘာပဲပြောပြော… ငါက အရမ်းနောက်ကျမှ ရောက်လာခဲ့တာ မဟုတ်လား… အဲ့ဒါက မင်းရဲ့ အမှားမဟုတ်ပါဘူး ”

ပင်လယ်ရေမှော်၏ အရွက်အားလုံးက မြန်ဆန်စွာ အနောက်ဆုတ်သွားကြသည်။ တစ်ချိန်တည်းမှာ ဘေးပတ်ဝန်းကျင်မှ ဖိအားက လွင့်ပြယ်သွားသည်။

ဤသည်မှာ ၎င်းအရှေ့မှ လူသားက လိမ်ပြောနေခြင်းမဟုတ်ဘဲ ထိုသို့အမှန်တကယ် တွေးနေကြောင်း ၎င်းအာရုံခံနိုင်သည့်အလားပင်။

“ ဒီတော့ အတိတ်မှာ ပြီးခဲ့တာတွေကို အတိတ်မှာပဲ ထားလိုက်မယ်… အခုလက်ရှိမှာတော့ မင်းကို ငါတစ်ခုမေးချင်တယ်… အဲ့ဒါကို မင်းစားချင်လား ”

ရွှီချင်းက ပင်လယ်ရေမှော်၏ အမြစ်များဖြင့် လွှမ်းခြုံခံထားရသော နေလုံးကို လက်ညှိုးညွှန်လိုက်သည်။

ပင်လယ်ရေမှော်၏ အရွက်အားလုံးက ချက်ချင်း တုန်ခါသွားကြသည်။ ထို့နောက် နတ်ဘုရားစိတ်အာရုံတစ်ခုက ရွှီချင်း၏ ဘေးပတ်ဝန်းကျင်မှာ ပဲ့တင်ထပ်သွားသည်။

“ စားချင်တယ် ”

ရွှီချင်းက ခေါင်းညိတ်လိုက်သည်။

“ ကောင်းပြီ… ဒါဆို ငါ့ကို အထဲဝင်ခွင့်ပေးပြီး စောင့်ရှောက်ပေးပါ… တချို့တလေကို ငါအပြင်ထုတ်နိုင်မလား ကြည့်ကြည့်မယ်… တကယ်လို့ အဆင်ပြေတယ်ဆိုရင် ငါတို့ ခွဲဝေကြမယ် ”

ပင်လယ်ရေမှော်က အနည်းငယ် တုံ့ဆိုင်းသွားသည်။ ရွှီချင်း၏ အရှိန်အဝါကို နောက်တစ်ကြိမ် စစ်ဆေးကြည့်ပြီးနောက် ၎င်း၏ အမြစ်များက ရုတ်တရက် လှုပ်ခါသွားကြပြီး အနည်းစုက အပြင်ဘက်သို့ ပြန့်ကားသွားကြသည်။

ဤသည်မှာ ၎င်းက လမ်းကြောင်းတစ်ခု ဖွင့်လှစ်ပေးနေသည့်အလားပင်။

သို့သော်လည်း လမ်းကြောင်းက အပြည့်အဝ မပွင့်သွားခင် ပင်လယ်ရေမှော်၏ နတ်ဘုရားစိတ်အာရုံက ရုတ်တရက် အပြင်ဘက်သို့ ပျံ့နှံ့သွားသည်။

“ ဘာမှစိုးရိမ်စရာမလိုပါဘူး… အဲ့ဒါက ငါ့လူပါ… လမ်းဖွင့်ပေးပြီး သူ့ကို အထဲဝင်လာခိုင်းလိုက်ပါ ”

ရွှီချင်းက တည်ငြိမ်စွာ ပြောသည်။

ပင်လယ်ရေမှော်က နှုတ်ဆိတ်သွားသည်။ တစ်ခဏကြာပြီးနောက် ဤနေရာ၏ ချိပ်ပိတ်မှုက ဖွင့်လှစ်သွားပြီး အဟရာတစ်ခု ထွက်ပေါ်လာသည်။

နောက်အခိုက်အတန့်မှာ ကျိုးကျန်းလီ၏ ပုံရိပ်က အပြင်ဘက်မှ ပျံသန်းလာသည်။

သူက ထွက်ပေါ်လာပြီးနောက် ဘေးပတ်ဝန်းကျင်ကို မြန်ဆန်စွာ စစ်ဆေးကြည့်လိုက်သည်။ ထို့နောက် သူက မည်သည့်အရာကိုမှ မမြင်မိသည့်အလား ရွှီချင်းကို အရိုအသေပေးလိုက်သည်။

“ ဘာကိစ္စလဲ ”

ရွှီချင်းက မေးသည်။

“ သခင်လေး… တချို့က ဒီအတောအတွင်း ရိတ်သိမ်းတာ အဆင်ပြေချောမွေ့ပေမဲ့ တချို့ကတော့ အခက်အခဲတွေနဲ့ ရင်ဆိုင်ခဲ့ရပါတယ်… ဒါပေမဲ့ အလုံးစုံခြုံပြောရရင် အခြေအနေက ဖြေရှင်းလို့ရတဲ့ အတိုင်းအတာထဲမှာပဲ ရှိပါတယ် ”

“ ဒါပေမဲ့ ဖရိုဖရဲကောင်းကင်တော်ဝင်မိသားစုနဲ့ ပဋိပက္ခတစ်ခု ဖြစ်ခဲ့ပါတယ်… ဒါကြောင့် သခင်လေးရဲ့ တည်ရှိမှုကို ကျွန်တော် လာရောက်တောင်းဆိုတာပါ… ဒီမိုးသောက်ကောင်းကင်ဘုံအလွန်ထဲမှာ သခင်လေးရဲ့ အဆင့်အတန်းနဲ့ဆိုရင် သူတို့ကိုယ်သူတို့ အရှင်သခင်တွေလို့ ယုံကြည်နေကြတဲ့ အဲ့ဒီလူတွေကို ဖိနှိပ်နိုင်ပါလိမ့်မယ် ”

“ ဟုတ်ပါတယ်… တကယ်လို့ သခင်လေးက သရုပ်အဆင့်အတန်းကို သုံးပြီး ကြားဝင်ဖြေရှင်းဖို့ ဆန္ဒမရှိဘူးဆိုရင် ကျွန်တော် ကြယ်တာရာစက်ဝန်းကို သခင်လေးကိုယ်စား တာဝန်ယူခိုင်းလိုက်ပါ့မယ် ”

ကျိုးကျန်းလီက ရိုသေလေးစားစွာ ပြောသည်။

ရွှီချင်းက ကျိုးကျန်းလီကို ကြည့်လိုက်သည်။

ဤကျိုးက အလွန်ဉာဏ်ကောင်းသည်ဟု သေချာပေါက် သူဝန်ခံရလိမ့်မည်။ အကယ်၍ တစ်ဖက်လူမှာ သူ့အပေါ် မကောင်းကြံစည်လိုစိတ် တကယ်မရှိလျှင် သူ့ကို အသုံးချခြင်းက အလွန်အကျိုးရှိလိမ့်မည်။

“ ကြယ်တာရာစက်ဝန်းကို ဖြေရှင်းခိုင်းလိုက်ပါ ”

ရွှီချင်းက ဖြည်းညင်းစွာ ပြောသည်။

“ မိုးသောက်ရဲ့ အမိန့်တော်ကို နာခံပါတယ် ”

ကျိုးကျန်းလီက ရိုသေလေးစားစွာ အနောက်ဆုတ်သွားပြီး အဟရာမှတဆင့် ပြန်ထွက်သွားသည်။

သူ၏ ပုံရိပ်ပျောက်ကွယ်သွားသည်နှင့် အဟရာက ပြန်ပိတ်သွားပြီး ချိပ်ပိတ်မှုက နောက်တစ်ကြိမ် ပြန်ထွက်ပေါ်လာသည်။

ပင်လယ်ရေမှော်၏ စိတ်ဆန္ဒက ဘေးပတ်ဝန်းကျင်ကို ထပ်မံ လွှမ်းခြုံသွားသည်။

ရွှီချင်းက ယင်းကို ဂရုမစိုက်ပေ။ သူက ခေါင်းလှည့်လိုက်ပြီး အမြစ်များကို ကြည့်လိုက်သည်။

“ ဟုတ်ပြီ… အဲ့ဒါကို အခု မင်းဖွင့်လှစ်နိုင်ပြီ… ငါဗိုက်ဆာနေပြီ… မင်းလည်း ဗိုက်ဆာနေပြီလို့ ငါထင်တယ် ”

ယင်းကို ပင်လယ်ရေမှော်ကြားသောအခါ ၎င်းက နောက်ထပ် တုံ့ဆိုင်းမနေတော့ပေ။ ချက်ချင်းဆိုသလို ၎င်း၏ အမြစ်များက အပြင်ဘက်သို့ ပြန့်ကားသွားပြီး ဧရာမနေလုံးဆီသို့ ဝင်ပေါက်ကို ဖွင့်လှစ်ပေးလိုက်သည်။

ရွှီချင်းက မျက်လုံးဝင်းလက်သွားသည်နှင့် အရှေ့သို့ ခြေလှမ်း လှမ်းလိုက်သည်။