နွားသိုးဂိုဏ်း၏ အနှစ်သာရ

အထဲသို့ ဝင်ရောက်သွားသည်နှင့် ပြင်းထန်သော အပူလှိုင်းက သူ့ထံသို့ အကြင်နာမဲ့စွာ ရိုက်ခတ်လာသည်။

ဘေးပတ်ပတ်လည်၌ သူ၏ အကြည့်က တောက်ပသော မီးတောက်မီးလျှံများဖြင့် တွေ့ဆုံသွားသည်။

ကောင်းကင်နှင့် မြေပြင်က နီညိုရောင်ပန်းချီကားတစ်ချပ်သဖွယ် တည်ရှိနေပြီး မျက်စိကျိန်းစပ်လုနီးပါး အရောင်တောက်ပသည်။

မြေပြင်က မီးတောက်ကုန်းမြေအဖြစ် ဖွဲ့စည်းနေပြီး ပရမ်းပတာ လှုပ်ခတ်နေသည်။ ရံဖန်ရံခါ မီးတောက်ချော်ရည်က အပေါ်သို့ တစ်ဟုန်ထိုး မြှောက်တတ်သွားပြီး လေထဲတွင် ပြန့်ကျဲသွားလေ့ရှိသည်။

ပေါက်ကွဲမှုများကြားတွင် မီးတောက်ချော်ရည်က အပိုင်းပိုင်းအစစ ကွဲထွက်သွားပြီး ရှေးဟောင်းမှော်သင်္ကေတများအဖြစ် ပြောင်းလဲသွားသည်။

အဝေးမှကြည့်လျှင် မှော်သင်္ကေတမိုးက ကောင်းကင်ပေါ်မှ ရွာသွန်းလာနေဟန် အောက်မေ့ရ၏။

သို့သော်လည်း မီးတောက်ကုန်းမြေနှင့် ထိတွေ့သွားသည့်အခါ ထိုမှော်သင်္ကေတများက အနီရောင်မျိုးကွဲပင်လယ်ရေမှော်အဖြစ် ပြောင်းလဲသွားပြီး ရှင်သန်ကြီးထွားရန် ရုန်းကန်ကြလိမ့်မည်။

သို့တိုင် ဤမျှပူပြင်းသော ပတ်ဝန်းကျင်တွင် ၎င်းတို့က ပြာအဖြစ် မပြောင်းခင် တစ်ခဏမျှသာ ရှင်သန်နိုင်ကြသည်။ ထို့နောက် ပြာမှုန်များက မီးတောက်ချော်ရည်ထဲမှာ နစ်မြုပ်သွားကြပြီး ချော်ရည်၏ တစ်စိတ်တစ်ပိုင်း ဖြစ်သွားကြသည်။

ရှားပါးဖြစ်စဉ်အခြေအနေမျိုးတွင်သာ ပင်လယ်ရေမှော်တစ်ပင်နှစ်ပင်က ဤမီးတောက်ကုန်းမြေထဲမှာ ဆက်လက် ရှင်သန်နိုင်ကြပြီး သေးငယ်သော တည်ရှိမှုများ ဖြစ်လာကြလိမ့်မည်။

သို့တိုင် ၎င်းတို့၏ ရှင်သန်မှုက မသေချာပေ။

အကြင်နာမဲ့သော မီးတောက်မီးလျှံများက ၎င်းတို့ကို အဆက်မပြတ် လောင်ကျွမ်းပစ်နေလေရာ အမြစ်ဖြတ်သုတ်သင်ခံရရန် သိပ်မလိုတော့ချေ။

ရွှီချင်း၏ အကြည့်က ကျယ်ပြောလှသော မီးတောက်ကုန်းမြေပေါ်သို့ ကျရောက်သွားသည့်အခါ ပြန့်ကျဲနေသော ပင်လယ်ရေမှော်အကြွင်းအကျန်များကို မြင်တွေ့သွားသည်။

တချို့က ခြောက်သွေ့နေပြီး ညှိုးနွမ်းနေသည်။ တချို့သည်တော့ အမြစ်ဖြတ်သုတ်သင်ခံရရန် သိပ်မလိုတော့ချေ။ ၎င်းတို့က အချိန်မရွေး ပြာမှုန်ဖြစ်သွားနိုင်သည်။

“ ဒီနေရာက နေလုံးရဲ့ သေးငယ်တဲ့ တစ်စိတ်တစ်ပိုင်းပဲဆိုပေမဲ့ ဒီနေရာက အချက်အလက်တွေကို အခြေခံပြီး သုံးသပ်ရရင် အဲ့ဒီအသက်ရှင်နေသေးတဲ့ ပင်လယ်ရေမှော်တွေက သေချာပေါက် ထူးခြားရမယ် ”

ရွှီချင်းက အဝေးသို့ ကြည့်လိုက်သည်။ ဤနေရာမှ အပူချိန်နှင့် နေသားကျသွားပြီးနောက် သူက ရုတ်တရက် ပြောသည်။

“ အကျဉ်းထောင်က ဘယ်မှာလဲ ”

သူက အပြင်လောကမှ ပင်လယ်ရေမှော်ကို မေးလိုက်သည်။

တစ်ခဏကြာပြီးနောက် ဝေဝါးနေသော စိတ်ဆန္ဒက သူ၏ စိတ်ထဲမှာ ပဲ့တင်ထပ်သွားသည်။

“ အလယ်မှာ… အင်မော်တယ်ကျမ်းကျိန်မှုကြောင့် အဝေးကြီး ငါမသွားနိုင်ဘူး… ဒီနေရာက ပင်လယ်ရေမှော်တွေက ငါ့ရဲ့ စိတ်ဆန္ဒတွေ… သူတို့က မင်းကို ကူညီပေးလိမ့်မယ်… ”

ထိုစိတ်ဆန္ဒက ပြတ်တောင်းပြတ်တောင်း ဖြစ်နေသည်။

ပင်လယ်ရေမှော်က ဤနေလုံးကို ကြောက်ရွံ့နေကြောင်း ထင်ရှားပေသည်။

ထိုကြောက်ရွံ့မှုက အစောနက ၎င်းပြောခဲ့သော အင်မော်တယ်ကျမ်းကျိန်မှုကြောင့်လော သို့မဟုတ် တခြားတစ်စုံတစ်ခုကြောင့်လော မသေချာပေ။

‘ သူတကယ် ပြောနေတာလား ဒါမှမဟုတ် တမင်ဟန်ဆောင်နေတာလား ’

ရွှီချင်းက နက်နဲစွာ တွေးတောလိုက်သည်။ အစောနက အဖြစ်အပျက်များကို ပြန်စဉ်းစားလိုက်သည့်အခါ ပထမတစ်ချက်က ပိုပြီးဖြစ်နိုင်ခြေရှိသည်ဟု သူခံစားမိသွားသည်။ သို့သော်လည်း သူ၏ သတိထားမှုက မလျော့ကျသွားပေ။

သူက တစ်ခဏ တွေးတောပြီးနောက် ခန္ဓာကိုယ်ကို လှုပ်ရှားလိုက်ပြီး အရှေ့သို့ မျဉ်းဖြောင့်အတိုင်း ပျံသန်းသွားသည်။

သူက ဤနေလုံး၏ အစစ်အမှန်အသွင်သဏ္ဍာန်ကို မြင်ချင်သည်။

ထို့အတူ နတ်ဘုရားများ အကျဉ်းချခံထားရသော အလယ်ဗဟိုကိုလည်း ရှာဖွေချင်သည်။

ထို့နောက်မှသာ သူက ဆုံးဖြတ်ချက်ချလိမ့်မည်။

ထိုသို့ဖြင့် အချိန်က ဖြည်းညင်းစွာ ကုန်ဆုံးသွားသည်။

ရက်အနည်းငယ်ကြာပြီးနောက် ရွှီချင်း၏ အလျင်က တဖြည်းဖြည်း နှေးကွေးသွားသည်။

သူ၏ ကျင့်ကြံခြင်းစွမ်းအားဖြင့်ပင် ဤနေရာမှာ စိတ်မသက်မသာ ခံစားမိလာသည်။ ဤအခိုက်အတန့်မှာ သူက အဝေးသို့ ရွေ့လျားသွားသည့်အခါတိုင်း တစ်ခဏကြာ ရပ်တန့်သွားလိမ့်မည်။ သူက အရှေ့သို့ ဆက်မသွားခင် ဘေးပတ်ဝန်းကျင်မှ ပင်လယ်ရေမှော်၏ အကူအညီဖြင့် အပူချိန်ကို ချိန်ညှိရလိမ့်မည်။

နောက်ဆုံးမှာတော့ လဝက်ကြာပြီးနောက် ရွှီချင်းက သူ၏ အကန့်အသတ်သို့ ရောက်ရှိသွားသည်။

သူက ရွေးချယ်စရာမရှိသည့်အဆုံး ပင်လယ်ရေမှော်တစ်ပင်၏ အရှေ့တွင် ရပ်လိုက်ရသည်။

ကံကောင်းစွာပင် သူက နေလုံး၏ အလယ်ဗဟိုသို့ တကယ်မရောက်ရှိသေးသော်လည်း သူ၏ နတ်ဘုရားစိတ်အာရုံက အလယ်ဗဟိုဆီသို့ သွားရောက်နိုင်သေးပေသည်။

သူ၏ နတ်ဘုရားစိတ်အာရုံကို ဖြန့်ကြက်လိုက်သည်နှင့်ချက်ချင်း ရွှီချင်းက မျက်လုံးမှေးကျဉ်းလိုက်သည်။

သူ၏ စိတ်အာရုံထဲတွင် ထိတ်လန့်ဖွယ်ကောင်းသော ဧရာမဓားတစ်လက်ကို မြင်သွားသည်။

ထိုဧရာမဓားက နေလုံးကို ထိုးဖောက်ထားသည်။

ကုန်းမြေပေါ်တွင် ထွက်ပေါ်နေသည်မှာ ဧရာမတောင်ကုန်းနှင့်ဆင်တူသော ဓားရိုးဖြစ်သည်။

နေလုံး၏ အခြားတစ်ဖက်တွင်တော့ ဓားထိပ်ဖျားက ၎င်း၏ မျက်နှာပြင်ကို ထိုးဖောက်ထားကြောင်း မည်သူမဆို စိတ်ကူးကြည့်နိုင်ပေသည်။

ထိုမြင်ကွင်းကို မြင်သွားသည်နှင့်ချက်ချင်း ရွှီချင်းက ရုတ်တရက် နားလည်သွားသည်။

“ နတ်ဘုရားကို နေလုံးထဲမှာ အကျဉ်းချထားတာ မဟုတ်ဘူး… အဲ့ဒီအစား နတ်ဘုရားက နေလုံးပဲ ”

“ အဲ့ဒါက အဆင့်နိမ့်အင်မော်တယ်တစ်ပါးနဲ့ နှိုင်းယှဉ်နိုင်တဲ့ အစစ်အမှန်နတ်ဘုရားတစ်ပါးပဲ ”

ရွှီချင်းက မျက်မှောင်ကြုတ်လိုက်ပြီး ခေါင်းငုံ့လိုက်သည်။ သူက သူ၏ ခြေဖဝါးအောက်မှ မြေပြင်နှင့် သူ့ဘေးမှ ညှိုးနွမ်းခြောက်သွေ့နေသော ပင်လယ်ရေမှော်ကို ကြည့်လိုက်သည့်အခါ နှလုံးတုန်လှုပ်သွားသည်။

“ အစစ်အမှန်နတ်ဘုရားကို ဖိနှိပ်ထားတာက အဲ့ဒီဧရာမဓားပဲ… ပြီးတော့ အဲ့ဒီဓားက ချိပ်တံဆိပ်အစီအရင်ရဲ့ အဓိကအမြူတေလည်း ဟုတ်တယ် ”

“ ဓားက နတ်ဘုရားကို ထိုးဖောက်ထားတယ်… ဒါကြောင့် အစစ်အမှန်နတ်ဘုရားက သေနေတယ်လို့ ထင်ရပေမဲ့ တကယ်တမ်းတော့ အဲ့လိုမဟုတ်ဘူး… ဒီလိုအခြေအနေမျိုးဆိုရင် သူက အစစ်အမှန်နာမည်ကို သုံးပြီး ပြန်ရောက်လာဖို့ဆိုတာ မဖြစ်နိုင်တဲ့အရာ မဟုတ်ဘူး… ”

“ ပင်လယ်ရေမှော်က အရွက်တွေပေါ်က နတ်ဘုရားတွေအတွက် အကျဉ်းထောင်ဖြစ်တယ် ”

“ ဒါပေမဲ့ အစစ်အမှန်နတ်ဘုရားအတွက်တော့ သူက ထောင်မှူးသာသာပဲ ”

“ သူက အစစ်အမှန်နတ်ဘုရားကို အသုံးပြုပြီး ကျင့်ကြံချင်တယ်… ဒါကြောင့် သူက မျိုးစေ့တွေကို ဖြန့်ကျဲခဲ့ပြီး ဒီနေရာမှာ ပင်လယ်ရေမှော်တွေ ပေါက်ရောက်စေတယ် ”

“ အဲ့ဒါက စွမ်းအင်စုပ်ယူဖို့အတွက်ပဲ… ဒီပြန့်ကျဲနေတဲ့ ပင်လယ်ရေမှော်တွေက အစစ်အမှန်နတ်ဘုရားရဲ့ မူလအနှစ်သာရကို စုပ်ယူဖို့ ကြိုးစားနေကြတယ် ”

“ ဒါပေမဲ့ တမူထူးခြားတဲ့ ပတ်ဝန်းကျင်နဲ့ နတ်ဘုရားရဲ့ အဆင့်ကြောင့် ပင်လယ်ရေမှော်အနည်းငယ်ပဲ ဒီနေရာမှာ အသက်ရှင်နိုင်ကြတယ်… ဒါကြောင့် သူတို့တွေ စုပ်ယူနိုင်တဲ့ မူလအနှစ်သာရက အရမ်းနည်းပါးတယ် ”

ရွှီချင်းက တွေးတောလိုက်သည်။ ထို့နောက် သူက ညာလက်ကို မြှောက်လိုက်ပြီး မူလအနှစ်သာရစုဆောင်းသော သစ်သားတုံကင်ကို ထုတ်လိုက်ကာ သူ့အောက်မှ မြေပြင်ပေါ်သို့ ဖိချလိုက်သည်။

သူ၏ ကျင့်ကြံခြင်းက တစ်ဟုန်ထိုး ပေါ်လျှိုးလာသည်။

သို့သော်လည်း ဤတစ်ကြိမ်က တခြားနတ်ဘုရားများကို သူစုပ်ယူခဲ့စဉ်ကနှင့် ခြားနားသည်။ ဤတစ်ကြိမ်တွင် ရွှီချင်း၏ ရိတ်သိမ်းမှုက မြေပြင်ကို လုံးဝမတုန်ခါသွားစေပေ။ နေလုံးသည်လည်း ပုံမှန်အတိုင်း ဆက်ရှိနေသည်။

မူလအနှစ်သာရမှ ဖွဲ့စည်းသွားသော ရွှေရောင်ချည်မျှင်တချို့က မြေကြီးထဲမှ မြှောက်တတ်လာသော်လည်း ယင်းတို့က အရေအတွက် အလွန်နည်းပါးသည်။

ဤသည်မှာ စွမ်းအင်စုပ်ယူမှုတွင် ကြီးမားသော အတားအဆီးတစ်ခုရှိနေသည့်အလား သူ၏ ရိတ်သိမ်းမှုက အလွန်အမင်း နည်းပါးသည်။

အချိန်တစ်ခဏကြာပြီးနောက် ရွှီချင်းက သူ၏ ရိတ်သိမ်းမှုကို ရပ်တန့်လိုက်သည်။ သူက ခေါင်းမော့လိုက်ပြီး သူ၏ စိတ်အာရုံထဲမှ ဧရာမဓားရိုးကို ကြည့်လိုက်လေရာ ထူးဆန်းသော အလင်းက သူ၏ မျက်လုံးထဲမှာ ဖြတ်ပြေးသွားသည်။

“ ဒီမြေပြင်က အခွံနဲ့ ဆင်တူတယ်… ဒီနေရာမှာ မူလအနှစ်သာရ စုဆောင်းဖို့ အရမ်းခက်ခဲတယ် ”

“ စုဆောင်းဖို့ တကယ်သင့်တော်တဲ့ နေရာက ဓားထိုးစိုက်ခံထားရတဲ့နေရာ ဖြစ်လောက်တယ် ”

“ ဘာပဲပြောပြော အဲ့ဒါက အစစ်အမှန်နတ်ဘုရားရဲ့ ဒဏ်ရာရှိတဲ့ နေရာပဲ ”

ရွှီချင်းက မျက်လုံးမှေးကျဉ်းလိုက်ပြီး ရုတ်တရက် ပြောသည်။

“ ဒီတော့… တကယ်လို့ အဲ့ဒါကို မင်းဝါးမျိုချင်တယ်ဆိုရင် အစွမ်းကုန် ထုတ်လွှတ်ရမယ်… အတိတ်မှာ မင်းပြုလုပ်ခဲ့တဲ့ ပြင်ဆင်မှုအားလုံးကို အလဟဿဖြစ်ခံမလား ဒါမှမဟုတ် စွန့်စားမလား ရွေးချယ်ပါ… ပြီးတော့ ငါလည်းပဲ အစွမ်းကုန် ကြိုးစားမယ်… ဒီအခွင့်အရေးအတွက် အရာအားလုံးကို ငါတို့ပုံအောရလိမ့်မယ် ”

“ မဟုတ်ရင် ပြန့်ကျဲနေတဲ့ မူလအနှစ်သာရတချို့ကိုပဲ ငါတို့စုပ်ယူနိုင်လိမ့်မယ် ”

ရွှီချင်းက စကားဆုံးသည်နှင့် တိတ်ဆိတ်စွာ စောင့်ဆိုင်းသည်။

တစ်ခဏကြာပြီးနောက် သူ့အရှေ့မှ ညှိုးနွမ်းခြောက်သွေ့နေသော ပင်လယ်ရေမှော်က ရုတ်တရက် တုန်ခါသွားသည်။ ဤသည်မှာ ၎င်းက ဆုံးဖြတ်ချက်တစ်ခု ချလိုက်သည့်အလားပင်။ ချက်ချင်းဆိုသလို ပင်လယ်ရေမှော်က ခြောက်သွေ့နေခြင်းမှ ချက်ချင်း ပြန်ရှင်သန်လာပြီး အနီရောင်သို့ ပြောင်းလဲသွားသည်။

ထိုတစ်ပင်တည်း မဟုတ်ပေ။ ဤအခိုက်အတန့်မှာ နေလုံးထဲ၌ အသက်ရှင်နေသေးသော ပင်လယ်ရေမှော်အားလုံးက ညှိုးနွမ်းခြောက်သွေ့နေခြင်းမှ ပြောင်းလဲသွားကြသည်။ ၎င်းတို့က အနီရောင်သို့ ချက်ချင်း ပြောင်းလဲသွားပြီးနောက် လေထဲသို့ မြှောက်တတ်သွားကြသည်။

အဝေးမှကြည့်လျှင် အနီရောင်ခတ္တာပင်များက ရွှီချင်းထံသို့ အရပ်မျက်နှာအဘက်ဘက်မှ ချဉ်းကပ်သွားနေကြောင်း မြင်ရလိမ့်မည်။

ပင်လယ်ရေမှော်အများစုက လမ်းတစ်လျှောက်ရှိ မီးတောက်မီးလျှံများကြောင့် ပြာဖြစ်သွားသော်လည်း ကျန်အပင်များက ဆက်လက် ရွေ့လျားနေကြဆဲပင်။

ချက်ချင်းဆိုသလို ရွှီချင်း၏ ဘေးပတ်ဝန်းကျင်မှ ဟင်းလင်းပြင်က ပုံပျက်တွန့်လိမ်သွားပြီး ပင်လယ်ရေမှော်များက ထွက်ပေါ်လာကြသည်။

ရွှီချင်းက မရှောင်တိမ်းဘဲ ပင်လယ်ရေမှော်များကို သူ့အပေါ်သို့ ကျရောက်လာစေသည်။ နောက်အခိုက်အတန့်မှာ ပင်လယ်ရေမှော်များက သူ၏ ခန္ဓာကိုယ်တစ်ခုလုံးကို အထပ်ထပ် လွှမ်းခြုံသွားကြသည်။ ထိုဖြစ်စဉ်က အသက်ရှူချိန်အနည်းငယ်မျှ ကြာမြင့်ခဲ့သည်။

ထို့နောက် ရွှီချင်း၏ အသွင်သဏ္ဍာန်က ပြောင်းလဲသွားသည်။

နီညိုရောင်မြက်စစ်ချပ်ဝတ်က သူ၏ ခန္ဓာကိုယ်ပေါ်မှာ ထွက်ပေါ်လာသည်။ တစ်ချိန်တည်းမှာ သူ၏ ခန္ဓာကိုယ်က ပေတစ်ထောင်အရွယ်အစားထိ တိုးမြှင့်သွားသည်။

သူက ဘီလူးတစ်ကောင်နှင့် တူညီသွားသည်။

အကန့်အသတ်မဲ့သော အသက်ဓာတ်က ပင်လယ်ရေမှော်စစ်ချပ်ဝတ်ထံမှ ထွက်ပေါ်လာပြီး ရွှီချင်း၏ တစ်ကိုယ်လုံးဆီသို့ ဒလဟော စီးဆင်းသွားသည်။ ယင်းက အံ့ဖွယ်ကောင်းသော အကာအကွယ်အလွှာတစ်ခုကိုလည်း ဖန်တီးပေးလိုက်သည်။

ယင်းက ပင်လယ်ရေမှော်၏ အခြေခံအုတ်မြစ်ဖြစ်ပြီး နေလုံးအတွင်းမှာ နှစ်ပေါင်းများစွာကြာအောင် ၎င်းပြင်ဆင်ထားခဲ့သော အစီအစဉ်ဖြစ်သည်။

စူးရှသော အလင်းက ရွှီချင်း၏ မျက်လုံးထဲမှာ လင်းလက်သွားသည်။

ပင်လယ်ရေမှော်က အစွမ်းကုန် ထုတ်လွှတ်လိုက်ကြောင်း သူအာရုံခံနိုင်သည်။

သို့ဖြစ်၍ သူသည်လည်း တုံ့ဆိုင်းမနေတော့ပေ။ အန္တိမဒြပ်စင်ငါးမျိုးက အရှေ့သို့ တစ်ဟုန်ထိုး ပျံသန်းသွားပြီး အစီအရင်တစ်ခုအဖြစ် ပြောင်းလဲသွားသည်။ သူက ဒြပ်စင်ငါးမျိုး၏ အပြန်အလှန်ခုခံမှုကို အသုံးပြု၍ ဤနေရာမှ အတားအဆီးများကို ချိုးဖြတ်လိုက်သည်။ ထို့နောက် သူ၏ အချိန်လေဟာနယ်အာဏာစက်က ပေါ်လျှိုးလာသည်။ အပြိုင်စကြာဝဠာများသည်လည်း ဘေးပတ်ဝန်းကျင်မှာ ထွက်ပေါ်လာကြသည်။

ယင်းတို့က သူ့အရှေ့မှ လမ်းကြောင်း၏ ဖိအားကို လွင့်ပြယ်စေသည်။

ထို့နောက် အင်မော်တယ်သန္ဓေသားလောင်း ထွန်းလင်းတောက်ပလာသည်နှင့် သူက မိုးကြိုးသွားတစ်စင်းပမာ အရှေ့သို့ မြန်ဆန်စွာ ပျံသန်းသွားသည်။

သူက လျှပ်တစ်ပြက်အတွင်း အလွန်ကျယ်ပြောသော အကွာအဝေးကို ဖြတ်ကျော်သွားသည်။

သူက အစောနက အာရုံခံမိခဲ့သော ဧရာမဓား၏ တည်နေရာဆီသို့ ပျံသန်းသွားသည်။

သူပိုပြီးနီးကပ်သွားလေ သူခံစားရသော ဖိအားက ပိုပြီးပြင်းထန်လာလေ ဖြစ်သည်။ ရလဒ်အနေဖြင့် ဘေးပတ်ဝန်းကျင်မှ မီးတောက်မီးလျှံများက တစ်ဟုန်ထိုး အားကောင်းလာသည်။ ရွှီချင်းမှာ ပင်လယ်ရေမှော်စစ်ချပ်ဝတ်ရှိသော်လည်း ယင်းက သာမန်မျက်စိဖြင့် မြင်နိုင်သော အလျင်နှင့်အတူ လောင်ကျွမ်းနေပြီး ပြာဖြစ်သွားသည်။

အကယ်၍ သူ့ကိုယ်သူသာ အားကိုးမည်ဆိုလျှင် ဤနေရာသို့‌ သူရောက်လာနိုင်လိမ့်မည်မဟုတ်ကြောင်း ရွှီချင်း နားလည်သည်။ ပင်လယ်ရေမှော်စစ်ချပ်ဝတ် ပျောက်ကွယ်သွားသည်နှင့် သူ၏ တစ်ကိုယ်လုံးက ချက်ချင်း ပြာဖြစ်သွားနိုင်လောက်၏။

မည်သို့ဖြစ်ပါစေ ၎င်းက အစစ်အမှန်နတ်ဘုရားတစ်ပါးမဟုတ်ပါလော။

သို့သော်လည်း ထိုအတွေးများက ရွှီချင်း၏ စိတ်ဆုံးဖြတ်ချက်ကို မဟန့်တားနိုင်ပေ။

သူ၏ အလျင်က ပိုပြီးမြန်ဆန်လာသည်။

သူ၏ မျက်လုံးထဲမှ ရူးသွပ်မှုသည်လည်း ပိုပြီးအားကောင်းလာသည်။

အကယ်၍ အားညိုသာ ဤနေရာမှာရှိနေပြီး ထိုမြင်ကွင်းကို မြင်သွားမည်ဆိုလျှင် ချင်းလေးက သူတို့နွားသိုးဂိုဏ်း၏ အနှစ်သာရကို အမှန်တကယ် နားလည်သွားပြီဟု သေချာပေါက် ချီးမွမ်းလိမ့်မည်။

ထိုသို့ဖြင့် အချိန်ကုန်ဆုံးသွားသည်။

နောက်ဆုံးမှာတော့ ရွှီချင်းက ရူးသွပ်မှုနှင့်အတူ သူ၏ အလျင်ကို အစွမ်းကုန် ထုတ်လွှတ်လိုက်လေရာ ပင်လယ်ရေမှော်စစ်ချပ်ဝတ်၏ ကာကွယ်ပေးမှုအောက်မှာ သူက အလွန်ကျယ်ပြောသော အကွာအဝေးကို ဖြတ်ကျော်သွားပြီး နေလုံး၏ အလယ်ဗဟိုမှာ ပြန်ပေါ်လာသည်။

အဝေး၌ ဧရာမဓားပုံရိပ်က ရွှီချင်း၏ မျက်လုံးထဲမှာ ထွက်ပေါ်လာသည်။

ဧရာမဓားကို သူမြင်လိုက်သည်နှင့် ရွှီချင်း၏ အသက်ရှူသံက မြန်ဆန်လာသည်။ သူ၏ တစ်ကိုယ်လုံးက တုန်ယင်လာသည်။ ဤသည်မှာ သူ၏ ခန္ဓာကိုယ်နှင့် ဝိညာဉ်က လောင်ကျွမ်းတော့မည့်အလားပင်။

သို့သော်လည်း ယင်းက သူ၏ မျက်လုံးထဲမှ ရူးသွပ်မှုကိုတော့ မလောင်ကျွမ်းပစ်နိုင်ပေ။ ယင်းအစား ဧရာမဓားကို သူမြင်လိုက်သည်နှင့် သူ၏ ရူးသွပ်မှုက အဆမတန် ပိုအားကောင်းလာသည်။

နောက်အခိုက်အတန့်မှာ ရွှီချင်းက တုံ့ဆိုင်းမနေဘဲ လျှာကိုက်လိုက်ပြီး သွေးတစ်ပွက်ကို ထွေးထုတ်လိုက်သည်။

သူက ထိုနည်းဖြင့် သူ၏ ခန္ဓာကိုယ်ကို လှုံ့ဆော်လိုက်ပြီး အရှေ့သို့ ပျံသန်းသွားရန် သွေးလွတ်မြောက်ခြင်းအတတ်ပညာကို အသုံးပြုလိုက်သည်။

ဝုန်းခနဲ မြည်သံများကြားမှာ သူ၏ ခန္ဓာကိုယ်ပေါ်မှ ပင်လယ်ရေမှော်စစ်ချပ်ဝတ်က အစိတ်အပိုင်းအများကြီး လောင်ကျွမ်းသွားသည်။ နောက်အခိုက်အတန့်မှာ ရွှီချင်း၏ ပုံရိပ်က ပြင်းထန်သော အပူလှိုင်းထဲသို့ တစ်ဟုန်ထိုး ပျံသန်းသွားပြီး ဧရာမဓား၏ အရှေ့သို့ ရောက်ရှိသွားသည်။

သူချဉ်းကပ်သွားသည့်အခိုက် ဤနေရာကို ရှင်းလင်းစွာ မြင်နိုင်သွားသည်။ သို့သော်လည်း တစ်ချိန်တည်းမှာ သူ၏ တစ်ကိုယ်လုံးက စတင်လောင်ကျွမ်းလာသည်။

ယင်းက အလွန်ကျယ်ပြောသော ချောက်နက်ဖြစ်သည်။ အသွေးအသားများက ဓားထိုးစိုက်ခံထားရသော မြေကြီးထဲမှ ထွက်ပေါ်လာရန် ကြိုးစားနေကြသည်။ ဤသည်မှာ အသွေးအသားများက ဒဏ်ရာကို ပြန်ကုသချင်ပြီး ဧရာမဓားကို အပြင်သို့ ဆွဲထုတ်ချင်နေသည့်အလားပင်။ သို့သော်လည်း ဧရာမဓား၏ ထိုးစိုက်မှုက ဖော်မပြနိုင်အောင် အလွန်မြဲမြံလေရာ အလွယ်တကူ မလှုပ်ခါနိုင်ပေ။

ဧရာမဓားက ပြန်ကုသခြင်း၏ အမြန်နှုန်းကိုလည်း တားဆီးထားသည်။

ရွှီချင်းက အနားသို့ ချဉ်းကပ်သွားသည်နှင့် နှလုံးတုန်သွားပြီး သေခြင်းရှင်ခြင်းကို ခံစားမိသွားသည်။

ထိုသို့ဖြစ်ရသည့် အကြောင်းအရင်းကို ရှင်းလင်းစွာ သူနားလည်သည်။ ပင်လယ်ရေမှော်စစ်ချပ်ဝတ်က နောက်ထပ် မတောင့်ခံနိုင်တော့ပေ။ သူ၏ ခုခံမှုအားလုံးက ကျိုးပြတ်သွားတော့မည်။

‘ ဒါပေမဲ့… ’

တစ်ချိန်တည်းမှာ သူက သေခြင်းရှင်ခြင်းကပ်ဘေးထဲမှာ ရှိနေစဉ် ထိုအသွေးအသားထဲမှ အလွန်သိပ်သည်းသော မူလအနှစ်သာရကို အာရုံခံမိသွားသည်။

ထိုမျှသိပ်သည်းသော မူလအနှစ်သာရကို ယခင်က ရွှီချင်း မမြင်ခဲ့ဖူးပေ။

အကယ်၍ ယင်းကို နှိုင်းယှဉ်မည်ဆိုလျှင် သူမဝင်ရောက်နိုင်ခဲ့သော မင်ရည်ကန်၏ အနက်ပိုင်းထဲမှ မူလအနှစ်သာရကသာ ထိုမျှသိပ်သည်းနိုင်လိမ့်မည်။

ဘယ်လောက်ကြီးမားတဲ့ ကံကြမ္မာကောင်းလဲ…

ရွှီချင်း၏ ရူးသွပ်မှုက ပိုပြီးပြင်းထန်လာသည်နှင့် သူ၏ နတ်ဘုရားစိတ်အာရုံကို ချက်ချင်း ပို့လွှတ်လိုက်သည်။

“ ရွှံ့မြေခွေး… ငါ့ကို ကာကွယ်ပေးပါ ”

သူ၏ လက်မောင်းပေါ်မှ မြေခွေးအမှတ်အသားက အအေးဓာတ်ကို ချက်ချင်း ထုတ်လွှတ်လိုက်သည်။ သူ၏ နတ်ဘုရားစွမ်းအားက ဤအခိုက်အတန့်မှာ အပြည့်အဝ ပေါ်လျှိုးလာပြီး ရွှီချင်းကို အားဖြည့်ပေးလိုက်သည်။

ထိုနည်းဖြင့် ရွှီချင်းက အချိန်တချို့ လဲလှယ်နိုင်လိမ့်မည်။ တစ်ချိန်တည်းမှာ သူက ပင်လယ်ရေမှော်၏ မကောင်းကြံမှုကိုလည်း တားဆီးကာကွယ်နိုင်လိမ့်မည်။

ထိုသို့လုပ်ဆောင်ပြီးနောက် ရွှီချင်းက ချက်ချင်း တင်ပျဉ်ခွေထိုင်လိုက်သည်။ သူက ညာလက်ကို မြှောက်လိုက်ပြီး ရိတ်သိမ်းခြင်းတုံကင်ကို မြေပြင်ပေါ်သို့ ဖိချလိုက်သည်။

ချက်ချင်းဆိုသလို မြေပြင်က တုန်ယင်သွားပြီး ရွှေရောင်ချည်မျှင်များက ဒဏ်ရာထဲမှ ပေါ်ထွက်လာကြသည်။

ယင်းက ရေပန်းသဖွယ် ဒလဟော ထွက်ပေါ်လာသည်။

ယင်းက အလွန်အံ့ဖွယ်ကောင်းသည်။

ဤအခိုက်အတန့်မှာ ရွှံ့မြေခွေးက အံ့ဩသွားသည်။

ပင်လယ်ရေမှော်က စိတ်လှုပ်ရှားသွားသည်။

ရွှီချင်းက ပိုပြီးရူးသွပ်သွားသည်။