ရေခဲက ဒီမှာ ရှိတယ်

ပင်လယ်ရေမှော်ပေါ်တွင် မတ်တတ်ရပ်နေသော ရွှီချင်းက ထိုစကားများကို တည်ငြိမ်စွာ ပြောသည်။ ထိုစကားများက သဘာဝအလျောက် ဖြစ်ပေါ်နေသည့်အလား သို့မဟုတ် ယင်းတို့က မလှုပ်ခါနိုင်သော အမှန်တရားဖြစ်သည့်အလားပင်။ ယင်းတို့ထဲမှာ မည်သည့်အပိုခမ်းနားကြီးကျယ်ခြင်းမှ မရှိသလို ဟန်ဆောင်ခြင်းလည်း မရှိပေ။

ဤနေရာမှာ ကြယ်တာရာစက်ဝန်းမှလွဲ၍ လူတိုင်းက ဖရိုဖရဲကောင်းကင်အဖွဲ့သားများ ဖြစ်ကြသော်လည်း ရွှီချင်းက ယင်းကို ဂရုမစိုက်ပေ။

သူက ပိုပြီးတည်ငြိမ်နေလေ ဖရိုဖရဲကောင်းကင်အဖွဲ့သားများက ပိုပြီးကြီးမားသော ဖိအားကို ခံစားမိလာလေ ဖြစ်သည်။

အဘယ့်ကြောင့်ဆိုသော် ဤနေရာက အမှတ်ငါးကြယ်တာရာစက်ဝန်း ဖြစ်သည်။

ဤနေရာမှာ လူသားမျိုးနွယ်က အထွတ်အမြတ်တည်ရှိမှု ဖြစ်သည်။

နန်းတော်အပြင်ဘက်တွင် ဖရိုဖရဲကောင်းကင်တော်ဝင်မိသားစုမှ အဖွဲ့သားအများကြီးက မျက်နှာတည်ကြည်သွားကြသည်။

၎င်းတို့က မဟာရန်သူတော်တစ်ပါးနှင့် ရင်ဆိုင်နေရသည့်အလား နှလုံးမွန်းကြပ်သွားကြသည်။

ကြယ်တာရာစက်ဝန်းက အလွန်အစွမ်းထက်သည်။ ယခု ကြယ်တာရာစက်ဝန်းထက် ပိုပြီးအစွမ်းထက်သော နောက်ထပ်တစ်ယောက်က ထွက်ပေါ်လာသည်။ ယင်းက ၎င်းတို့အားလုံးကို ပိုပြီးထိတ်လန့်သွားစေသည်။

အထူးသဖြင့် ပင်လယ်ရေမှော်ဖြစ်သည်။

ပင်လယ်ရေမှော်၏ မူလခန္ဓာကိုယ်က အကျဉ်းထောင်(က၂၉)ဖြစ်ကြောင်း ၎င်းတို့သိသည်။

ထိုစကြာဝဠာသက်ရှိကို ထိန်းချုပ်ပြီး ဤနေရာသို့ ခေါ်ဆောင်လာနိုင်ခြင်းက အဓိပ္ပာယ်များစွာ ရှိသည်။

၎င်း၏ ဖြစ်တည်မှုမှ ထုတ်လွှတ်နေသော အားလှိုင်းအတတ်အကျများက တင်းမာသော လေထုကို ဖြစ်ပေါ်စေသည်။

အထူးသဖြင့် ဖရိုဖရဲကောင်းကင်အဖွဲ့သားများအတွက် ဖြစ်သည်။ ၎င်းတို့မှာ အတိတ်တုန်းကကဲ့သို့ ဂုဏ်ကျက်သရေ မရှိတော့ပေ။ ၎င်းတို့ထဲမှ အများစုက ၎င်းတို့မျိုးနွယ်စု၏ အတိတ်မှ ဂုဏ်ကျက်သရေများကို မျက်မြင်မတွေ့ခဲ့ကြရပေ။

၎င်းတို့မွေးဖွားလာသည့်အခိုက် လူသားမျိုးနွယ်က ကောင်းကင်ပေါ်မှာ ရှိနေပြီးပြီ ဖြစ်သည်။

မိုးသောက်ကောင်းကင်ဘုံအလွန်က ၎င်း၏ အရှင်သခင်ကို ဆုံးရှုံးသွားခဲ့သော်လည်း လူသားမျိုးနွယ်အပေါ် ကြောက်ရွံ့ရိုသေမှုက မပျောက်ကွယ်သွားခဲ့ပေ။

ဖရိုဖရဲကောင်းကင်ဧကရာဇ်၏ မြင့်မြတ်သာလွန်သော အခွင့်အာဏာက ထိုကြောက်ရွံ့ရိုသေမှုကို ယာယီသာ ဖိနှိပ်နိုင်သည်။ သို့သော်လည်း စစ်မှန်သော လူသားပညာရှင်ကျင့်ကြံသူတစ်ယောက်၏ ရှေ့မှောက်တွင် ထိုဖိနှိပ်မှုက ကြေမွပျက်စီးသွားလိမ့်မည်။

ဤအခိုက်အတန့်မှာ ရွှီချင်း၏ တည်ငြိမ်သော ကိုယ်ဟန်အမူအရာ၊ သူ၏ လွှမ်းမိုးဖိနှိပ်စွာ ရောက်ရှိလာမှုနှင့် သူ၏ မောက်မာထောင်လွှားသော စကားများက ထိုဖရိုဖရဲကောင်းကင်အဖွဲ့သားများကို လူသားမျိုးနွယ်၏ အထွတ်အမြတ်ဖြစ်တည်မှုအား ပြန်အမှတ်ရသွားစေသည်။

သို့ဖြစ်၍ ၎င်းတို့ထဲမှ တချို့က အလိုအလျောက် ခေါင်းငုံ့လိုက်ကြသည်။

ယင်းက ၎င်းတို့၏ သွေးမျိုးဆက်ထဲမှာ တံဆိပ်ရိုက်ခတ်ထားသော ကြောက်ရွံ့ရိုသေမှု ဖြစ်သည်။

ယင်းက အမှတ်ငါးကြယ်တာရာစက်ဝန်းထဲမှ လူသားများ မရေမတွက်နိုင်သော မျိုးနွယ်ခြားများကို ထိန်းချုပ်နိုင်သည့် အရေးကြီးနည်းလမ်းတစ်ခု ဖြစ်သည်။

ယင်းတို့အားလုံးကို ဖရိုဖရဲကောင်းကင်ဧကရာဇ် ဖန်တီးထားသော ဧရာမမျက်နှာက ရှင်းလင်းစွာ မြင်တွေ့သွားသည်။

သို့ဖြစ်၍ ၎င်းက နှုတ်ဆိတ်သွားသည်။

တစ်ခဏကြာပြီးနောက် ၎င်းက ရွှီချင်းကို စိုက်ကြည့်လိုက်သည်။ ၎င်း၏ အကြည့်နှင့်အတူ သိမ်မွေ့ညင်သာသော အလင်းတန်းတစ်ခုက ၎င်း၏ မျက်ခုံးနှစ်ခုကြားထဲမှ ထွက်ပေါ်လာသည်။ ထို့နောက် ထိုအလင်းတန်းက လေထဲမှာ တုံကင်တစ်ခုအဖြစ် ပြောင်းလဲသွားသည်။

တုံကင်က သိမ်မွေ့ညင်သာသော အလင်းရောင်ကို ထုတ်လွှတ်နေသည်။ တုံကင်၏ အရှေ့ဘက်မျက်နှာပြင်၌ ‘ လွတ်ငြိမ်းခြင်း ’ဟူသော စကားလုံးကို ရေးထွင်းထားစဉ် အနောက်ဘက်ခြမ်း၌ ဝိညာဉ်အလင်းအသံက မသဲမကွဲ ပျံ့လွင့်နေသည်။

" ငါတို့မိသားစုက လွန်ခဲ့တဲ့နှစ်ပေါင်းများစွာတုန်းက ဝိညာဉ်အလင်းကောင်းကင်ဘုံအလွန်ရဲ့ မျက်နှာသာပေးမှုကို ရရှိခဲ့တယ်… ဝိညာဉ်အလင်းကောင်းကင်ဘုံအလွန်ထဲက ကြီးမြတ်တဲ့ ပုဂ္ဂိုလ်တစ်ဦးနဲ့ ငါတို့မိသားစုက မဟာမိတ်ဖွဲ့ခဲ့တယ်… အဲ့ဒီပုဂ္ဂိုလ်က ငါတို့ကို ဒီတုံကင်ပေးအပ်ခဲ့တယ်… ဒီတုံကင်နဲ့ဆိုရင် ငါတို့မိသားစုက ဘယ်စုဆောင်းမှုကိုမဆို လွတ်ငြိမ်းခွင့်ရလိမ့်မယ် "

ဖရိုဖရဲကောင်းကင်ဧကရာဇ်က ဖြည်းညင်းစွာ ပြောသည်။

၎င်း၏ အသံ ပဲ့တင်ထပ်သွားသည့်အခိုက် လွတ်ငြိမ်းခွင့်တုံကင်ထံမှ ထုတ်လွှတ်နေသော အဖြူရောင်အလင်းက ရုတ်တရက် အပြင်ဘက်သို့ ဖြန့်ကြက်သွားပြီး နန်းတော်ကို လွှမ်းခြုံသွားသည်။ အလင်းရောင်က နန်းတော်ကို ပြင်ပလောကမှ သီးခြားခွဲထုတ်လိုက်သည်။

ကြယ်တာရာကောင်းကင်ထဲတွင် လွင့်မျောနေသော ဖရိုဖရဲကောင်းကင်အင်ပါယာနန်းတော်သည် ဖရိုဖရဲကောင်းကင်မိသားစု၏ ကုန်းမြေဆီသို့ ဝင်ရောက်နိုင်သော ဝင်ပေါက်သာ ဖြစ်သည်။

ရွှီချင်းသည် ထိုလွတ်ငြိမ်းခွင့်တုံကင်အကြောင်းကို ကြယ်တာရာစက်ဝန်းထံမှ ကြားသိပြီးပြီ ဖြစ်သည်။ သူက ထိုတုံကင်အကြောင်းကို အသေးစိတ် မသိထားသော်လည်း ဖရိုဖရဲကောင်းကင်ဧကရာဇ်၏ အသုံးပြုပုံကို ကြည့်ခြင်းအားဖြင့် ယင်းက သာမန်တုံကင်မဟုတ်ကြောင်း ထင်ရှားပေသည်။

ထို့ပြင် ဤသို့လာရာလမ်းတစ်လျှောက်တွင် သူက ကျိုးကျန်းလီထံသို့ အသံပို့လွှတ်ပြီး မေးခွန်းတချို့ မေးမြန်းခဲ့သည်။

ကျိုးကျန်းလီက သတင်းအချက်အလက်စုံလင်ပြီး ရွှီချင်းကို သူသိထားသမျှအားလုံး ပြောပြခဲ့သည်။ အမှတ်ငါးကြယ်တာရာစက်ဝန်းထဲတွင် မျိုးနွယ်စုတချို့သည် ကောင်းကင်ဘုံအလွန်များထံမှ မတူညီသော လွတ်ငြိမ်းခွင့်တုံကင်အမျိုးမျိုးကို အကြောင်းအရင်းအမျိုးမျိုးဖြင့် ရရှိနိုင်ကြသည်။ ယေဘုယျအားဖြင့်ဆိုရလျှင် ရိက္ခာထိန်းသိမ်းသူများက ထိုသို့တုံကင်ဖြင့် ရင်ဆိုင်ရသည့်အခါ အနောက်ဆုတ်ရန်သာ ရွေးချယ်ကြလိမ့်မည်။

သို့သော်လည်း အနက်ရောင်အလင်းက ရွှီချင်း၏ မျက်လုံးထဲမှာ ဖြတ်ပြေးသွားသည်။ လွတ်ငြိမ်းခွင့်တုံကင်ဖြင့် ရင်ဆိုင်ရသောအခါ သူက ညာလက်ကို မြှောက်လိုက်ပြီး အဆိပ်ဘုရင် သူ့အား ပေးအပ်ထားသော အထူးတာဝန်ကျောက်စိမ်းပြားကို ထုတ်လိုက်သည်။

" ကမ်းစပ်ကိုးခုအင်မော်တယ်အရှင်သခင်ရဲ့ အမိန့်တော်… ”

“ နတ်ဘုရားအရှင်သခင်ရဲ့ နတ်ဘုရားမီးတောက်ကို ငြိမ်းသတ်နိုင်တဲ့ ကိုးရောင်ခြယ်ရွှမ်ရေခဲကို ရှာဖွေပါ… ”

ထိုနေရာသို့ ရောက်သည့်အခါ ရွှီချင်းက ဖရိုဖရဲကောင်းကင်ဧကရာဇ်ကို အေးစက်စက်စိုက်ကြည့်လိုက်ပြီး တည်ငြိမ်စွာ ပြောသည်။

" ဒီတာဝန်က ကြီးမားတဲ့ ကိစ္စနဲ့ သက်ဆိုင်နေတယ်… မင်းရဲ့ မိသားစုထဲမှာ အဲ့ဒီရေခဲရှိတယ်လို့ ငါသံသယဝင်တယ်… ဒါကြောင့် ဒီနေရာကို အခုပဲ ငါစစ်ဆေးရှာဖွေမယ် ”

ရွှီချင်း၏ စကားဆုံးသွားသည်နှင့်ချက်ချင်း သူ၏ လက်ထဲမှ အထူးတာဝန်ကျောက်စိမ်းပြားက မှိတ်တုတ်မှိတ်တုတ် လင်းလက်သွားပြီး အလင်းလှိုင်းများကို ထုတ်လွှတ်လိုက်သည်။ လွတ်ငြိမ်းခွင့်တုံကင်ထံမှ အဖြူရောင်အလင်းက ထိုအလင်းလှိုင်းများဖြင့် တွေ့ဆုံသွားသည့်အခါ ချက်ချင်း လွင့်ပြယ်သွားသည်။

နောက်အခိုက်အတန့်မှာ အင်ပါယာနန်းတော်ကို ဖုံးလွှမ်းထားသော အဖြူရောင်အလင်းက အမှန်တကယ် ပျောက်ကွယ်သွားသည်။

ဘေးပတ်ဝန်းကျင်မှ ဖရိုဖရဲကောင်းကင်အဖွဲ့သားများက ချက်ချင်း မတုံ့ပြန်နိုင်ခဲ့သော်လည်း ဖရိုဖရဲကောင်းကင်ဧကရာဇ်၏ အမူအရာက အကြီးအကျယ် ပျက်ယွင်းသွားသည်။

ထိုမြင်ကွင်းက ၎င်း၏ သုံးသပ်နိုင်မှုထက် ကျော်လွန်နေသည်။

ယေဘုယျအားဖြင့်ဆိုရလျှင် ၎င်းတို့မျိုးနွယ်စု၏ လွတ်ငြိမ်းခွင့်တုံကင်က ရိက္ခာထိန်းသိမ်းသူများကို အနောက်ဆုတ်သွားစေရန် လုံလောက်ပေသည်။ ထို့ကြောင့် ၎င်း၏ အရှေ့မှ လူသားဆီမှာ ထိုသို့တာဝန်ရှိနေလိမ့်မည်ဟု ၎င်းမမျှော်လင့်ထားခဲ့ပေ။

ထို့ပြင် ယင်းက အနည်းငယ် ရယ်စရာကောင်းသည်။

ကမ်းစပ်ကိုးခုအင်မော်တယ်အရှင်သခင်မှာ မည်သည့်တည်ရှိမှုဖြစ်သနည်း။ ၎င်းက နတ်ဘုရားအရှင်သခင်၏ နတ်ဘုရားမီးတောက်အား ငြိမ်းသတ်ပစ်နိုင်သည့် ရေခဲကို ခြေလှမ်းဝက်အင်မော်တယ်တစ်ပါးအား ရှာဖွေခိုင်းသည်လား။

ယင်းကို ၎င်းမယုံကြည်ပေ။

သို့သော်လည်း ထိုတာဝန်ကျောက်စိမ်းပြားက အစစ်အမှန်ဖြစ်ပြီး ယင်းထဲမှာ ထူးခြားသော အမှတ်အသားတစ်ခုပါဝင်သည်။

ထို့ပြင် လွတ်ငြိမ်းခွင့်တုံကင်၏ တုံ့ပြန်မှုကလည်း ယင်းကို သက်သေပြုပေးနေသည်။ ထို့ကြောင့် ဖရိုဖရဲကောင်းကင်ဧကရာဇ်၏ အသိစိတ်က ဝုန်းခနဲ မြည်ဟိန်းသွားသည်။

အဘယ့်ကြောင့်ဆိုသော် ၎င်းတို့မျိုးနွယ်စုမှာ လွတ်ငြိမ်းခွင့်တုံကင်ရှိသော်လည်း ယင်းက ကမ်းစပ်ကိုးခုအင်မော်တယ်အရှင်သခင်၏ အမိန့်တာဝန်နှင့် ရင်ဆိုင်ရသည့်အခါ အချည်းနှီးဖြစ်သွားသည်။

ဖရိုဖရဲကောင်းကင်အဖွဲ့သားများသည်သာ အမူအရာပြောင်းလဲသွားခြင်း မဟုတ်ပေ။ ကြယ်တာရာစက်ဝန်းသည်ပင် ရွှီချင်း၏ လက်ထဲမှ အထူးတာဝန်ကျောက်စိမ်းပြားကို ကြည့်လိုက်သည့်အခါ မျက်မှောင်ကြုတ်သွားသည်။

ရှင်းလင်းစွာပင် သူသည်လည်း အံ့ဩသွားခဲ့သည်။

နောက်အခိုက်အတန့်မှာ ရွှီချင်းက ပင်လယ်ရေမှော်ပေါ်မှ ခုန်ဆင်းလိုက်ပြီး ဖရိုဖရဲကောင်းကင်အင်ပါယာနန်းတော်ဆီသို့ လျှောက်သွားသည်။

သူခြေတစ်လှမ်း လှမ်းလိုက်တိုင်း ကြယ်တာရာကောင်းကင်က လှိုင်းထသွားသည်။

သူက အနားချဉ်းကပ်လာသည့်အခါ အင်ပါယာနန်းတော်ထဲမှ ဖရိုဖရဲကောင်းကင်ဧကရာဇ်၏ အမူအရာက ပိုပြီးအရုပ်ဆိုးသွားသည်။

ရွှီချင်းက ခုနစ်လှမ်းမြောက် ခြေလှမ်း လှမ်းလိုက်သည့်အခါ ဖရိုဖရဲကောင်းကင်ဧကရာဇ်၏ ဧရာမမျက်နှာက ပျောက်ကွယ်သွားသည်။ နောက်အခိုက်အတန့်မှာ ၎င်း၏ မူလခန္ဓာကိုယ်က နန်းတော်အပြင်သို့ ထွက်လျှောက်လာပြီး ကြယ်တာရာကောင်းကင်ပေါ်မှာ ရပ်လိုက်သည်။

၎င်းမှာ ဦးခေါင်းနှစ်လုံးရှိပြီး ၎င်း၏ နီညိုရောင်ခန္ဓာကိုယ်က ပေတစ်ထောင်ရှည်လျားသည်။ ၎င်းထွက်ပေါ်လာသည့်အခိုက် ၎င်း၏ အံ့ဖွယ်ကောင်းသော ကျင့်ကြံခြင်းစွမ်းအားက ရုတ်တရက် ပျံ့လွင့်သွားပြီး ရွှီချင်း၏ အရှေ့တွင် အတားအဆီးတစ်ခုအဖြစ် ဖွဲ့စည်းသွားသည်။

ရွှီချင်းက သူ၏ ခြေလှမ်းကို ရပ်လိုက်ပြီး ဖရိုဖရဲကောင်းကင်ဧကရာဇ်ကို တည်ငြိမ်စွာ ကြည့်လိုက်သည်။

“ ငါ့ရဲ့ စစ်ဆေးမှုကို မင်းက နှောင့်ယှက်ချင်တာလား ”

ဖရိုဖရဲကောင်းကင်ဧကရာဇ်က ရွှီချင်းကို စိုက်ကြည့်လိုက်ပြီး နှိမ့်ချသော လေသံဖြင့် ပြောသည်။

“ ငါ့ရဲ့ မျိုးနွယ်ထဲမှာ ကိုးရောင်ခြယ်ရေခဲမရှိဘူး ”

“ အဲ့ဒါကို ငါတို့စစ်ဆေးပြီးတဲ့အခါ သိရလိမ့်မယ် ”

ဤတစ်ကြိမ်တွင် စကားပြောလိုက်သူက ရွှီချင်းမဟုတ်ဘဲ ကြယ်တာရာစက်ဝန်း ဖြစ်သည်။

ဖရိုဖရဲကောင်းကင်ဧကရာဇ်က သက်ပြင်းမချခင် တစ်ခဏကြာ နှုတ်ဆိတ်သွားခဲ့သည်။ ဤတစ်ကြိ်မတွင် ၎င်းက အတွက်အချက်မှားသွားခဲ့ကြောင်း ဝန်ခံရလိမ့်မည်။ သို့ဖြစ်၍ ၎င်းက လက်မြှောက်လိုက်ပြီး ဖမ်းဆုပ်လိုက်သည်။

ချက်ချင်းဆိုသလို စတုတ္ထမြောက် အစစ်အမှန်ဦးသျှောင်၏ အမွေအနှစ်က နန်းတော်ထဲမှ ပျံသန်းထွက်လာပြီး ၎င်း၏ လက်ဖဝါးပေါ်သို့ ကျရောက်လာသည်။

၎င်းက ငြိမ်းချမ်းစွာ ဖြေရှင်းရန် စိတ်ဆုံးဖြတ်လိုက်သည်။ တစ်ဖက်လူက ဤပစ္စည်းကို လိုချင်နေမှတော့ ယင်းကို ၎င်းပေးလိုက်မည်။

ဤပစ္စည်းက အလွန်တန်ဖိုးကြီးမားသော်လည်း ၎င်းတို့မျိုးနွယ်စု လုပ်ဆောင်နေသောအရာနှင့် နှိုင်းယှဉ်လျှင် ယင်းက အသေးအမွှား ဖြစ်သည်။

ထို့ကြောင့် ဤပစ္စည်းကို ၎င်းစွန့်လွှတ်နိုင်ပေသည်။

၎င်းက စကားပြောရန် ပြင်လိုက်သည်။

သို့သော်လည်း ထိုအခိုက်အတန့်မှာ ၎င်း၏ အမူအရာက ရုတ်တရက် ပြောင်းလဲသွားသည်။

ရွှီချင်းက နန်းတော်ကို စိုက်ကြည့်လိုက်သည်နှင့် မျက်မှောင်ကြုတ်သွားသည်။

ပင်လယ်ရေမှော်သည်လည်း ရွှီချင်းနည်းတူ တစ်စုံတစ်ခုကို အာရုံခံမိသွားဟန် ရသည်။ ၎င်း၏ အရွက်များက ချက်ချင်း လှုပ်ခါသွားပြီး ၎င်း၏ အရှိန်အဝါက စူးရှလာသည်။

အင်ပါယာနန်းတော်ထဲတွင် တည်နေရာပြောင်းရွှေ့ခြင်းအားလှိုင်းများက ပျံ့နှံ့ထွက်လာသည်။

တစ်စုံတစ်ယောက်က တည်နေရာပြောင်းရွှေ့လာနေခြင်း ဖြစ်သည်။

ဖရိုဖရဲကောင်းကင်ဧကရာဇ်က မျက်လုံးမှေးကျဉ်းလိုက်သည်။ ထို့နောက် ၎င်းက ညာလက်ကို ဆုပ်လိုက်ပြီး အစောနက ၎င်းစွန့်လွှတ်ရန် ရည်ရွယ်ထားသော ကောင်းကင်ဘုံဥပဒေသရွှံ့တုံးကို ပြန်သိမ်းဆည်းလိုက်သည်။ တစ်ချိန်တည်းမှာ အစောနက ၎င်းပြောရန် စိတ်ကူးထားခဲ့သော စကားများက ပြောင်းလဲသွားသည်။

" ဒီနေရာက ကိစ္စတွေနဲ့ပတ်သက်ပြီး ငါ့ရဲ့ ဖရိုဖရဲကောင်းကင်မိသားစုက အရှင့်ရဲ့ စီစဉ်မှုတွေကို နားထောင်ပါမယ် ”

ဖရိုဖရဲကောင်းကင်ဧကရာဇ်က အနောက်သို့ ခေါင်းလှည့်လိုက်ပြီး နန်းတော်ကို အရိုအသေပေးလိုက်သည်။

ဘေးပတ်ဝန်းကျင်မှ ဖရိုဖရဲကောင်းကင်အဖွဲ့သားများသည်လည်း ခေါင်းငုံ့လိုက်ကြပြီး အရိုအသေပေးလိုက်ကြသည်။ တစ်ချိန်တည်းမှာ တည်နေရာပြောင်းရွှေ့ခြင်း အားလှိုင်းအတတ်အကျများက ပိုပြီးအားကောင်းသထက် အားကောင်းလာသည်။

ထို့နောက် ဝုန်းခနဲ မြည်သံများကြားတွင် ဧရာမအလင်းတိုင်လုံးတစ်ခုက နန်းတော်အပေါ်မှ ဟင်းလင်းပြင်ထဲမှ ဆင်းသက်လာပြီး စက်ဝိုင်းသဏ္ဍာန် အလင်းလှိုင်းများကို အပြင်သို့ ထုတ်လွှတ်လိုက်သည်။

ရွှီချင်းက ထိုမြင်ကွင်းကို မရင်းနှီးခြင်း မဟုတ်ပေ။ ယင်းက သူ့ကိုယ်ပိုင်စကြာဝဠာဆီသို့ ပြန်ရန် သူအသုံးပြုခဲ့သော တည်နေရာပြောင်းရွှေ့ခြင်းနှင့် တစ်ထပ်တည်း တူညီသည်။

နောက်အခိုက်အတန့်မှာ အလင်းတိုင်လုံး ဆင်းသက်လာသည်နှင့်ချက်ချင်း အဆင့်နိမ့်အင်မော်တယ်နှင့် အလွန်အမင်း နီးကပ်သော အရှိန်အဝါတစ်ခုက နန်းတော်ထဲမှ ချက်ချင်း ပျံ့လွင့်လာသည်။

ထိုအရှိန်အဝါက အလွန်ကြောက်စရာကောင်းလေရာ ကြယ်တာရာကောင်းကင်သည်ပင် လှိုင်းအတွန့်တွန့်ထသွားသည်။ ဘေးပတ်ဝန်းကျင်မှ အရာအားလုံးက အလွန်သိပ်သည်းသော အင်မော်တယ်စွမ်းအင်ဖြင့် ဖုံးလွှမ်းခံလိုက်ရသည်။

ထိုအင်မော်တယ်စွမ်းအင်အောက်မှာ နတ်ဘုရားများနှင့်သက်ဆိုင်သော အရာမှန်သမျှက ဖယ်ရှားခံလိုက်ရသည်။

ယင်းက အင်မော်တယ်သန္ဓေသားလောင်း၏ အစွမ်းထုတ်လွှတ်မှု ဖြစ်သည်။

ထိုပုဂ္ဂိုလ်က အင်မော်တယ်တစ်ပါးဖြစ်လာရန် ခြေတစ်လှမ်းမျှသာ ဝေးကွာတော့သူ ဖြစ်သည်။

ကြယ်တာရာစက်ဝန်း၏ အမူအရာက တည်ကြည်သွားပြီး ရွှီချင်းက မျက်မှောင်ကြုတ်လိုက်သည်။

ထို့နောက် လူတိုင်း၏ အကြည့် ကျရောက်နေသော နန်းတော်ဂိတ်တံခါးက ရုတ်တရက် ပွင့်သွားသည်။

ကမ္ဘာမြေတုန်ဟီးစေနိုင်သော အင်အားက နန်းတော်ထဲမှ ပေါက်ကွဲထွက်လာသည်။

ဤသည်မှာ ချော်ရည်က မီးတောင်ထဲမှ ဒလဟော ထွက်ကျလာသည့်အလားပင်။

ပေါက်ကွဲသံများကြားတွင် ဝတ်စုံနီနှင့် သက်လတ်ပိုင်းကျင့်ကြံသူတစ်ယောက်က အေးစက်စက် မျက်နှာထားနှင့်အတူ နန်းတော်အပြင်သို့ ထွက်လျှောက်လာသည်။

သူခြေတစ်လှမ်း လှမ်းလိုက်သည့်အခါတိုင်း ကြယ်တာရာကောင်းကင်က တုန်ယင်သွားသည်။

သူထွက်ပေါ်လာသည့်အခိုက် ဖရိုဖရဲကောင်းကင်ဧကရာဇ်က တည်ကြည်လေးနက်စွာ အရိုအသေပေးလိုက်သည်။ ဘေးပတ်ဝန်းကျင်မှ ဖရိုဖရဲကောင်းကင်အဖွဲ့သားများသည်လည်း ဖော်မပြနိုင်အောင် ရိုသေလေးစားသွားကြသည်။

“ သံတမန်ကို နှုတ်ဆက်ပါတယ် ”

ထိုပုဂ္ဂိုလ်၏ အရှိန်အဝါက အလွန်ကြောက်မက်ဖွယ်ကောင်းပြီး သူက ဖရိုဖရဲကောင်းကင်မိသားစုတစ်ခုလုံး၏ ကြည်ညိုလေးစားမှုကို ရရှိထားသည်။

တစ်ချိန်တည်းမှာ ပင်လယ်ရေမှော်က တုန်ယင်သွားပြီး ၎င်း၏ နတ်ဘုရားစိတ်အာရုံက ရွှီချင်း၏ အသိစိတ်ထဲသို့ မြန်ဆန်စွာ ဝင်ရောက်သွားသည်။

" သူ့ဆီမှာ… အစစ်အမှန်နတ်ဘုရားရဲ့ ဒဏ်ရာပေါ်မှာ ချိပ်တံဆိပ်ထားရစ်ခဲ့တဲ့ နောက်ဆုံးထောင်မှူးရဲ့ အရှိန်အဝါရှိတယ် ”

ယင်းကို ရွှီချင်းကြားသောအခါ သူက မျက်မှောင်ကြုတ်လိုက်သည်။

ဝတ်စုံနီနှင့် သက်လတ်ပိုင်းအမျိုးသားသည်တော့ နန်းတော်ထဲမှ ထွက်လျှောက်လာပြီးနောက် သူ၏ ဘေးပတ်ဝန်းကျင်ကို ဖော်မပြနိုင်သော ဂုဏ်ကျက်သရေနှင့်အတူ စစ်ဆေးကြည့်လိုက်သည်။ သူ၏ အကြည့်က ပင်လယ်ရေမှော်ပေါ်သို့ ကျရောက်သွားသည့်အခါ ထူးဆန်းသော အလင်းက သူ၏ မျက်လုံးထဲမှာ ထွက်ပေါ်လာသည်။

ထို့နောက် သူက ပင်လယ်ရေမှော်၏ အရှေ့မှ ရွှီချင်းကို ကြည့်လိုက်ပြီး ပြောသည်။

“ ဒီသောက်ရူးအပင်နဲ့ ပေါင်းပြီး ငါ့ဆရာရဲ့ နတ်ဘုရားအစာကို ခိုးယူခဲ့တဲ့လူက မင်းမလား ”

သူက ထိုသို့ပြောလိုက်သည်နှင့်ချက်ချင်း ခေါင်းငုံ့ထားသော ဖရိုဖရဲကောင်းကင်ဧကရာဇ်က မျက်တောင်တဖျပ်ဖျပ်ခတ်လိုက်ပြီး နက်နဲစွာ တွေးတောလိုက်သည်။

ကြယ်တာရာစက်ဝန်းက သက်လတ်ပိုင်းကျင့်ကြံသူကို စိုက်ကြည့်လိုက်သည်နှင့် သူ၏ အမူအရာက တည်ကြည်လေးနက်သွားသည်။ တစ်ချိန်တည်းမှာ သူက သူ၏ ခန္ဓာကိုယ်ထဲမှ အမိန့်အာဏာစက်ကို စတင်လှည့်ပတ်လိုက်သည်။