ပုံရိပ်ယောင်ထဲမှာ အမှန်တရား ရှိတယ်

ရှင်သန်ခြင်း… အစမရှိ…

သေဆုံးခြင်း… လမ်းကြောင်းမရှိ…

ထွက်ခွာရန်… မဖြစ်နိုင်…

ပြန်လာရန်… မစွမ်းဆောင်နိုင်…

ယင်းက ဤအခိုက်အတန့်မှာ နာကျင်မှုနတ်ဘုရားဘီမို့ တွေ့ကြုံနေရသောအရာ ဖြစ်သည်။

၎င်းက ရေခဲခေါင်းတလားထဲမှာ အေးခဲနေပြီး သဲနာရီထဲမှ အပိုအချိန်လေဟာနယ်ထဲမှာ ချိပ်ပိတ်ခံထားရသည်။ ထို့ပြင် အလုံးစုံချိပ်ပိတ်ခံထားရသော ကောင်းကင်ဘုံအလွန်ကြောင့် ၎င်း၏ အကျိုးအကြောင်းဆက်နွယ်မှုအားလုံးက ဖြတ်တောက်ခံလိုက်ရသည်။

တစ်နည်းဆိုရလျှင် ၎င်းက သေဆုံးခြင်းနှင့် ပြန်ရှင်သန်ခြင်းကြားမှာ ထာဝရ ပိတ်မိနေပြီး မူလအနှစ်သာရကို အစဉ်မပြတ် ထုတ်လွှတ်ပေးနေမည့် ထူးခြားသော ဝိညာဉ်ကျောက်တုံးတစ်တုံးသဖွယ် ဖြစ်လာသည်။

တစ်ချိန်တည်းမှာ ၎င်း၏ ခန္ဓာကိုယ်က လောင်ကျွမ်းခံနေရပြီး ၎င်း၏ ဝိညာဉ်က ပြန်လည်မွေးဖွားခြင်းစက်ဝန်းကြောင့် အပိုင်းပိုင်း ဆုတ်ဖြဲခံနေရလိမ့်မည်။ ထိုသို့ညှဉ်းပန်းနှိပ်စက်မှုအောက်မှာ ၎င်း၏ နတ်ဘုရားစွမ်းအားနှင့် မူလအနှစ်သာရသည်လည်း ဖြည်းညင်းစွာ စုပ်ယူခံရလိမ့်မည်။

ကြယ်တာရာကောင်းကင်ထဲတွင် ရွှီချင်းက သူ့အရှေ့မှ ရေခဲခေါင်းတလားကို အေးစက်စက် စိုက်ကြည့်လိုက်သည်။

သူ၏ ဒေါသက တဖြည်းဖြည်း လျော့ပါးသွားသည်။ ထိုအစစ်အမှန်နတ်ဘုရားအတွက် လက်ရှိရလဒ်က အကောင်းဆုံး ညှဉ်းပန်းနှိပ်စက်မှု ဖြစ်သည်။

၎င်းက နာကျင်မှုကို သဘောကျမှတော့ ၎င်းကိုယ်တိုင် ယင်းကို တွေ့ကြုံခံစားကြည့်စေမည်။

“ ငါ့မှာ ယုလျှိုချန်းလိုမျိုး ပုံပြင်ပြောနိုင်တဲ့ နတ်ဘုရားအခွင့်အာဏာမရှိတာ စိတ်မကောင်းစရာပဲ… ”

ရွှီချင်းက သူ့ဘာသာ တီးတိုးရေရွတ်လိုက်သည်။

အကယ်၍ သူ့မှာ ယုလျှိုချန်းကဲ့သို့ နတ်ဘုရားအခွင့်အာဏာရှိမည်ဆိုလျှင် သူက ထိုအစစ်အမှန်နတ်ဘုရားအတွက် နာကျင်စရာကောင်းသော ပုံပြင်များကို တစ်ပုဒ်ပြီးတစ်ပုဒ် ဖန်တီးလိမ့်မည်။ ယင်းက ရေခဲခေါင်းတလားထဲမှ အစစ်အမှန်နတ်ဘုရားကို ပုံပြင်လောကထဲမှာ နစ်မြုပ်သွားစေပြီး အဆုံးမဲ့သော ညှဉ်းပန်းနှိပ်စက်မှုကို တွေ့ကြုံခံစားရစေမည်။

ထိုနည်းဖြင့်ဆိုလျှင် သူက ထိုအစစ်အမှန်နတ်ဘုရားကို ပိုပြီးနာကျင်ခံစားရစေပြီး ပုံပြင်များကို အသုံးပြု၍ ၎င်းထံမှ မူလအနှစ်သာရအများအပြားကို ရိတ်သိမ်းနိုင်လိမ့်မည်။

“ အလျင်လိုဖို့မလိုဘူး ”

ရွှီချင်းက အကြည့်ပြန်ရုပ်လိုက်ပြီး အရှေ့သို့ ခြေတစ်လှမ်း လှမ်းလိုက်သည်။ ထို့နောက် သူက ရေခဲခေါင်းတလားပေါ်မှာ တင်ပျဉ်ခွေထိုင်လိုက်ပြီး ဖြည်းညင်းစွာ မျက်လုံးမှိတ်လိုက်သည်။ သူက ဝင်သက်ထွက်သက် ရှုမှတ်လိုက်တိုင်း သူ၏ ခန္ဓာကိုယ်ပေါ်မှ မွေးညင်းပေါက်အားလုံးက ပွင့်သွားကြသည်။

သူက ရေခဲခေါင်းတလားထဲမှ စိမ့်ထွက်နေသော မူလအနှစ်သာရကို စုပ်ယူလိုက်သည်။

ထိုမူလအနှစ်သာရက အလွန်သိပ်သည်းရုံသာမက လွန်စွာ သန့်စင်သည်။ ရွှီချင်း အသက်ရှူသွင်းလိုက်သည့်အခါတိုင်း မူလအနှစ်သာရက သူ၏ ခန္ဓာကိုယ်တစ်ခုလုံးဆီသို့ ဝင်ရောက်သွားလိမ့်မည်။

ထိုမှတဆင့် မူလအနှစ်သာရက သူ၏ အင်မော်တယ်သန္ဓေသားလောင်းနှင့် ပေါင်းစပ်သွားပြီး ၎င်းကို အာဟာရဖြည့်ပေးလိမ့်မည်။

နောက်အခိုက်အတန့်မှာ ရွှီချင်း၏ အင်မော်တယ်သန္ဓေသားလောင်းက သိမ်မွေ့ညင်သာသော အလင်းကို ထုတ်လွှတ်လိုက်သည်။ ထိုအလင်းရောင်အောက်မှာ မူလက မည်းမှောင်နေသော ကောင်းကင်ဘုံအလွန်က ထွန်းလင်းတောက်ပသွားသည်။ ဤအခိုက်အတန့်မှာ မရေမတွက်နိုင်သော စကြာဝဠာများ၊ ကြယ်အဖွဲ့အစည်းများနှင့် ကြယ်ဂြိုလ်များက အလင်းရောင် ပြန်ရရှိသွားကြသည်။

ရွှီချင်း၏ အင်မော်တယ်သန္ဓေသားလောင်းသည်လည်း ကောင်းကင်ဘုံအလွန်၏ အလင်းလှိုင်းများကြားထဲမှာ တဖြည်းဖြည်း ပိုပြီးအားကောင်းလာသည်။ အင်မော်တယ်သန္ဓေသားလောင်း၏ ခန္ဓာကိုယ်ထဲမှ အင်မော်တယ်နန်းတော်သည်လည်း ထို့အတူပင်။

ထိုသို့ဖြင့် အချိန်က တရွေ့ရွေ့ စီးဆင်းသွားသည်။

မကြာမီ တစ်လကုန်ဆုံးသွားသည်။

ရွှီချင်းက မျက်လုံးဖွင့်လိုက်သည်။

အနက်ရောင်အလင်းက သူ၏ မျက်လုံးထဲမှာ ထွက်ပေါ်လာသည်။ တစ်ခဏကြာပြီးနောက် သူက ခေါင်းငုံ့လိုက်ပြီး သူ၏ အောက်မှ ရေခဲခေါင်းတလားကို ကြည့်လိုက်သည်။

အစတွင် ရေခဲခေါင်းတလားမှ ထုတ်လွှတ်နေသော မူလအနှစ်သာရက အလွန်အမင်း သိပ်သည်းသည်။ သို့သော်လည်း နောက်ပိုင်းမှာ ယင်းက တဖြည်းဖြည်း လျော့နည်းသွားသည်။ အချိန်ကြာလာသည်နှင့်အမျှ မူလအနှစ်သာရစီးဆင်းမှုသည်လည်း ပြတ်တောင်းပြတ်တောင်း ဖြစ်လာသည်။

သို့သော်လည်း ယင်းက ပုံမှန်သာဖြစ်သည်။

ဤသို့မူလအနှစ်သာရဝိညာဉ်ကျောက်တုံးက အဆုံးသတ်မရှိသောအရာ မဟုတ်ပေ။

ယင်းက တစ်ကြိမ်တည်း အကုန်မထုတ်လွှတ်ပေးနိုင်ပေ။

သို့ဖြစ်၍ ယင်းထံမှ မူလအနှစ်သာရကို ဖြည်းဖြည်းချင်း စုပ်ယူခြင်းက ယခုအချိန်မှာ ရွှီချင်းအတွက် အကောင်းဆုံး နည်းလမ်းဖြစ်သည်။

တစ်လကြာစုပ်ယူပြီးနောက် သူရရှိခဲ့သော အကျိုးအမြတ်များက မသေးငယ်ပေ။ သူ၏ အင်မော်တယ်သန္ဓေသားလောင်းက ယခင်ကထက် ပိုပြီးသိပ်သည်းလာသည်။ ၎င်း၏ အရှိန်အဝါသော်လည်းကောင်း သို့မဟုတ် ဖိအားသော်လည်းကောင်း အတိတ်တုန်းကထက် အများကြီး သာလွန်သွားသည်။

အထူးသဖြင့် သူ၏ အင်မော်တယ်အခြေခံအုတ်မြစ်က အင်မော်တယ်နန်းတော် ဖြစ်နေသည့်အခါ ဖြစ်သည်။ ကောင်းကင်ဘုံအလွန်၏ အရှင်သခင်ဟူသော သူ၏ သရုပ်အဆင့်အတန်းကြောင့် ရွှီချင်း၏ အရှိန်အဝါက အင်မော်တယ်တစ်ပါးနှင့် နီးသထက် နီးကပ်လာသည်။

ကျင့်ကြံခြင်းအခြေခံတွင် သူက အစောပိုင်းအဆင့် ခြေလှမ်းဝက်အင်မော်တယ်၏ အထွတ်အထိပ်သို့ ရောက်ရန် သိပ်မကွာဝေးတော့ပေ။

အကယ်၍ သူ၏ ကျင့်ကြံခြင်းအမြန်နှုန်းကို အပြင်လောကမှာ ချပြမည်ဆိုလျှင် ယင်းက လူအများအပြားကို မနာလိုဖြစ်ပြီး သွေးအန်သွားစေနိုင်သည်။ ယင်းက မနှိုင်းယှဉ်သာအောင် အလွန်မြန်ဆန်သည်။

မည်သို့ဖြစ်ပါစေ ခြေလှမ်းဝက်အင်မော်တယ်အဆင့်၏ လုပ်ငန်းစဉ်က အင်မော်တယ်သန္ဓေသားလောင်းကို အင်မော်တယ်ပုံရိပ်အဖြစ် ကြီးထွားလာစေရန် ပျိုးထောင်ပေးရခြင်း ဖြစ်သည်။ ထိုလုပ်ငန်းစဉ်အတွက် လိုအပ်သော မူလအနှစ်သာရပမာဏက အံ့မခန်း ကြောက်စရာကောင်းသည်။

မည်သို့ဖြစ်ပါစေ အင်မော်တယ်ပုံရိပ်က အဆင့်နိမ့်အင်မော်တယ်များ၏ အမှတ်လက္ခဏာတစ်ခု ဖြစ်သည်။

သို့သော်လည်း သူ၏ ကျင့်ကြံခြင်းက အလွန်နှေးကွေးသည်ဟု ရွှီချင်း ခံစားမိနေဆဲပင်။

“ တကယ်လို့ ငါသာ ဒီလိုမျိုး အစစ်အမှန်နတ်ဘုရား မူလအနှစ်သာရဝိညာဉ်ကျောက်တုံးတွေ အများကြီး ရနိုင်မယ်ဆိုရင်… ”

ရွှီချင်းက နှုတ်ခမ်းသပ်လိုက်ပြီး ခေါင်းတလားပေါ်မှာ မတ်တတ်ရပ်လိုက်သည်။ သူ၏ အကြည့်က အဝေးသို့ ကျရောက်သွားသည့်အခါ အစောနက သူနစ်မြုပ်သွားခဲ့သော ပုံရိပ်ယောင်အကြောင်းကို ပြန်စဉ်းစားလိုက်သည်။

“ အဲ့ဒီပုံရိပ်ယောင်က နည်းနည်း ထူးဆန်းတယ်… ”

အနက်ရောင်အလင်းက ရွှီချင်း၏ မျက်လုံးထဲမှာ ထွက်ပေါ်လာသည်။

ထိုပုံရိပ်ယောင်ထဲ၌ သူက ဤနေရာမှာ ဆယ်နှစ်ကြာအောင် တံခါးပိတ်ကျင့်ကြံပြီးနောက် ခြေလှမ်းဝက်အင်မော်တယ်အဆင့်၏ အထွတ်အထိပ်သို့ ရောက်ရှိသွားခဲ့ကြောင်း မှတ်မိသည်။ သူ၏ မှတ်ဉာဏ်များထဲမှာ အသေးစိတ် အချက်အလက်များ မရှိနေသော်လည်း အထွတ်အထိပ်အဆင့် ခြေလှမ်းဝက်အင်မော်တယ်တစ်ပါး၏ ခံစားချက်ကို ရှင်းလင်းစွာ သူမှတ်မိနေဆဲပင်။

အထူးသဖြင့်…

“ တကယ်လို့ ငါသာ ဒီနေရာမှာ ဆယ်နှစ်ကြာအောင် တံခါးပိတ်ကျင့်ကြံဖို့ ရွေးချယ်လိုက်မယ်ဆိုရင် ရေခဲခေါင်းတလားက ထောက်ပံ့ပေးတဲ့ မူလအနှစ်သာရပမာဏအရ အထွတ်အထိပ်အဆင့် ခြေလှမ်းဝက်အင်မော်တယ်အဆင့်ထိ ငါတတ်လှမ်းနိုင်မလားဆိုတာ ပြောရခက်တယ်… ဒါပေမဲ့ အဲ့ဒါက ငါ့ကို နှောင်းပိုင်းအဆင့်ထိ ရောက်စေဖို့တော့ လုံလောက်ပါတယ် ”

“ ဒီတော့ အဲ့ဒီပုံရိပ်ယောင်က ယုတ္တိမရှိတဲ့ဟာ မဟုတ်ဘူး… ”

ထိုသို့တွေးမိသောအခါ ဝေဝါးသော စိတ်ဆန္ဒတစ်ခုက ရွှီချင်း၏ နှလုံးသားထဲမှာ ထွက်ပေါ်လာသည်။

သူ၏ ပင်ကိုယ်ဗီဇက ထိုလမ်းကြောင်းကို မလျှောက်လှမ်းရန် သူ့အား တားမြစ်နေသည်။ ယင်းက သူ့အား ဤနေရာမှာ တံခါးပိတ်မကျင့်ကြံစေချင်ပေ။

ထိုသို့ဖြစ်ရသည့် အကြောင်းအရင်းတစ်ခုမှာ သူက ပုံရိပ်ယောင်ထဲမှအတိုင်း လိုက်လံမဆောင်ရွက်ချင်ပေ။ တခြားအကြောင်းအရင်းတစ်ခုမှာ သူ၏ လက်ရှိ ကျင့်ကြံခြင်းအမြန်နှုန်းက နှေးကွေးနေသောကြောင့် ဖြစ်သည်။

နောက်ထပ် အကြောင်းအရင်းတစ်ခု ရှိသေးသည်။ အကယ်၍ သူက ခြေလှမ်းဝက်အင်မော်တယ်အဆင့်မှ အဆင့်နိမ့်အင်မော်တယ်အဆင့်သို့ ချိုးဖြတ်မည်ဆိုလျှင် သူ၏ အင်မော်တယ်သန္ဓေသားလောင်းက အင်မော်တယ်ပုံရိပ်အဖြစ် ကြီးထွားရုံမျှဖြင့် မလုံလောက်သေးပေ။

သူ၏ အာဏာစက်ကို ပိုပြီးမြင့်သော နောက်တစ်ဆင့်သို့ မြှင့်တင်ရန်လည်း လိုအပ်သေးသည်။

“ တစ်နည်းပြောရမယ်ဆိုရင်… ဒသမမြောက်အန္တိမတာအိုကို ငါလိုအပ်တယ် ”

ရွှီချင်းသည် ယခုအချိန်ထိ ဒသမမြောက်အန္တိမတာအိုနှင့်ပတ်သက်ပြီး မည်သည့်ဦးတည်ရာကိုမှ ရှာမရသေးပေ။ ပုံရိပ်ယောင်ထဲမှာပင် ယင်းကို သူမစူးစမ်းနိုင်ခဲ့ပေ။

ရွှီချင်းက နှုတ်ဆိတ်သွားသည်။ သူက လက်မြှောက်လိုက်ပြီး ရေခဲခေါင်းတလားကို ဖိချလိုက်ကာ ယင်းကို သူ့အောက်မှ အနက်ရောင်အာကာသတွင်းနက်ထဲသို့ ပို့လွှတ်လိုက်သည်။ သူက အနက်ရောင်အာကာသတွင်းနက်ကို အသုံးပြု၍ မူလအနှစ်သာရကို ထိုနေရာမှာ အမြဲတမ်း သိုလှောင်ထားလိမ့်မည်။

သူက တစ်ခဏတွေးတောပြီးနောက် ကောင်းကင်ဘုံအလွန်ထဲမှ ထွက်သွားရန် ပြင်လိုက်သည်။

သို့သော်လည်း ခြေလှမ်း သူလှမ်းတော့မည့်အချိန် ရွှီချင်း၏ ခန္ဓာကိုယ်က ရုတ်တရက် ရပ်တန့်သွားသည်။

ထူးဆန်းသော အလင်းက သူ၏ မျက်လုံးထဲမှာ ထွက်ပေါ်လာသည်။

“ အဲ့ဒါမဟုတ်သေးဘူး ”

“ ပုံရိပ်ယောင်ထဲမှာ ဒသမမြောက်အန္တိမတာအိုကို ငါဖမ်းဆုပ်နိုင်ခဲ့တယ်လို့ ခံစားမိတယ်… ဘာလို့လဲဆိုတော့ ပုံရိပ်ယောင်ထဲမှာ ဝမ်ကူးကုန်းမြေဆီ ငါပြန်သွားတဲ့အခါ ငါထုတ်ဖော်ခဲ့တဲ့ ကျင့်ကြံခြင်းစွမ်းအားက ခြေလှမ်းဝက်အင်မော်တယ်တစ်ပါးထက် သာလွန်တယ် ”

“ အသေးစိတ်ကိုတော့ ငါမသိဘူး ”

ရွှီချင်းက မျက်မှောင်ကြုတ်လိုက်သည်။ အစောနက သူကြုံတွေ့ခဲ့သော ပုံရိပ်ယောင်နှင့်ပတ်သက်ပြီး သံသယက သူ၏ နှလုံးသားထဲမှာ ထွက်ပေါ်လာသည်။

သို့သော်လည်း သူ့ဆီမှာ သတင်းအချက်အလက် အလုံအလောက်မရှိပေ။ သို့ဖြစ်၍ ရွှီချင်းက ထိုသံသယများကို သူ၏ နှလုံးသားထဲမှာ ထပ်မံ ဖိနှိပ်ထားလိုက်သည်။ ထို့နောက် သူက ခြေလှမ်း လှမ်းလိုက်ပြီး ချင်းကောင်းကင်ဘုံအလွန်ထဲမှ ထွက်လျှောက်သွားသည်။

…..

တစ်ချိန်တည်းမှာ ချင်းကောင်းကင်ဘုံအလွန်၏ အပြင်ဘက်တွင် ပုန်းကွယ်နေကြသော အင်မော်တယ်စိတ်အာရုံများက ဤအခိုက်အတန့်မှာ လွင့်ပြယ်သွားကြသည်။ သူတို့တစ်ယောက်ချင်းစီက မထွက်သွားခင် ချင်းကောင်းကင်ဘုံအလွန်ထဲမှ ထွက်လျှောက်လာသော ရွှီချင်းကို မတူညီသော စိတ်ခံစားချက်များဖြင့် လေးနက်စွာ ကြည့်သွားခဲ့ကြသည်။

သူတို့က ရွှီချင်းကို မှတ်ထားလိုက်ကြသည်။

ယင်းက ဖြစ်သင့်ပေသည်။

သူက မိုးသောက်ကောင်းကင်ဘုံအလွန်၏ အရှင်သခင်ဖြစ်ပြီး ခြေလှမ်းဝက်အင်မော်တယ်အဆင့်မှာတင် ပြန်ရှင်သန်လာသော အစစ်အမှန်နတ်ဘုရားတစ်ပါးကို နှိမ်နင်းနိုင်ခဲ့သည်။

ထိုအစစ်အမှန်နတ်ဘုရားက အလွန်အားနည်းနေလျှင်ပင် ၎င်းက အစစ်အမှန်နတ်ဘုရားတစ်ပါး ဖြစ်နေဆဲပင်။

ထိုသို့တိုက်ပွဲမှတ်တမ်းက သူတို့ကို မျက်ခုံးပင့်တင်သွားစေရန် လုံလောက်ပေသည်။

ထို့နောက် သူတို့က တစ်ယောက်ပြီးတစ်ယောက် ထွက်သွားကြသည်။

ကမ်းစပ်ကိုးခုကောင်းကင်ဘုံအလွန်ထဲဝယ်…

ကမ်းစပ်ကိုးခုအင်မော်တယ်နန်းတော်ထဲမှ အထွတ်အမြတ်အင်မော်တယ်မျှော်စင်၏ အမြင့်ဆုံး အထပ်တွင် ကြီးကျယ်မြင့်မြတ်သော ပုံရိပ်က ညင်သာစွာ ခေါင်းညိတ်လိုက်သည်။

“ မင်းက ဒီအခွင့်အရေးကို ဖမ်းဆုပ်နိုင်ခဲ့ပြီး… စုဆောင်းတဲ့ တာဝန်ကိုလည်း ပြီးမြောက်အောင် ဆောင်ရွက်နိုင်ခဲ့တယ်… ဒီလိုဆိုမှတော့… ”

“ …ကြယ်တာရာစက်ဝန်းထဲမှာ ဆက်နေတာက မင်းအတွက် ဘာအဓိပ္ပာယ်မှမရှိတော့ဘူး ”

“ ရိက္ခာထိန်းသိမ်းသူဌာနကို ငါအမိန့်ထုတ်ပြန်လိုက်တယ်… ဒီတစ်ခေါက် တတ်လှမ်းသူအုပ်စုက ပို့ဆောင်ရေးဌာနနဲ့ ပူးပေါင်းဆောင်ရွက်ရမယ်… သူတို့က တခြားအဖွဲ့တွေနဲ့ အတူတူ ပူးပေါင်းပြီး စစ်မြေပြင်ဆီ ရိက္ခာတွေ ကိုယ်တိုင်သွားရောက်ပို့ဆောင်ပေးရမယ် ”

“ ဒီကို ပြန်လာစရာမလိုဘူး… ကြယ်စက်ဝန်းနတ်ဘုရားချိပ်တံဆိပ်အစီအရင်ဆီ ချက်ချင်း သွားရောက်ပါ ”

ကမ်းစပ်ကိုးခုအင်မော်တယ်အရှင်သခင်၏ စကားဆုံးသွားသည်နှင့် အထွတ်အမြတ်အင်မော်တယ်မျှော်စင်က တုန်ယင်သွားသည်။ ထို့နောက် သူ့ထံမှ အမိန့်တော်က ကမ်းစပ်ကိုးခုကောင်းကင်ဘုံအလွန်တစ်ခုလုံးဆီသို့ ချက်ချင်း ပျံ့နှံ့သွားသည်။ ယင်းက ရိက္ခာထိန်းသိမ်းသူဌာနထဲမှာ ကျင့်ကြံနေသော အဆိပ်ဘုရင်ထံသို့လည်း ရောက်ရှိသွားသည်။

ချက်ချင်းဆိုသလို အဆိပ်ဘုရင်က ရုတ်တရက် မျက်လုံးဖွင့်လိုက်ပြီး ကမ်းစပ်ကိုးခုအင်မော်တယ်အရှင်သခင်ထံမှ အမိန့်တော်ကို အာရုံခံလိုက်သည်။

သူ၏ အမူအရာက မသိမသာ ပြောင်းလဲသွားသည်။ ထို့နောက် သူက ခေါင်းမော့လိုက်ပြီး အဝေးသို့ လှမ်းကြည့်လိုက်သည်။ အချိန်တစ်ခဏကြာ တိတ်ဆိတ်သွားပြီးနောက် သူက နူးညံ့စွာ သက်ပြင်းချလိုက်လေသည်။

“ ဒီဟာက အဲ့ဒီကောင်လေးအတွက် ကံကောင်းတာလား ကံဆိုးတာလားဆိုတာ ငါသိချင်မိတယ်… ”

အဆိပ်ဘုရင်က ခေါင်းခါလိုက်သည်။ သူက ဆန္ဒမရှိသော်လည်း ကမ်းစပ်ကိုးခုအင်မော်တယ်အရှင်သခင်ထံမှ အမိန့်တော်ကို မနာခံဘဲ မနေဝံ့ချေ။ သို့ဖြစ်၍ သူက သက်ပြင်းချရုံသာ တတ်စွမ်းပြီး ထိုကိစ္စအတွက် စီစဉ်ဆောင်ရွက်လိုက်သည်။

တစ်ချိန်တည်းမှာ ရွှီချင်း၏ ပုံရိပ်က ချင်းကောင်းကင်ဘုံအလွန်ထဲမှ ထွက်သွားသည်။ သူပြန်ပေါ်လာသည့်အခါ ကောင်းကင်မဲ့ဇုန်သို့ ရောက်ရှိသွားသည်။

ဤနေရာမှ အကျဉ်းထောင်က ပျောက်ကွယ်သွားပြီ ဖြစ်သည်။ သို့သော်လည်း ထောင်စောင့်များ၊ ထောင်မှူးများ၊ ကြယ်တာရာစက်ဝန်းနှင့် တခြားလူများက မထွက်သွားကြချေ။ သူတို့အားလုံးက ရလဒ်ကို စောင့်ဆိုင်းနေကြသည်။

တစ်လကုန်ဆုံးသွားသည့်တိုင် သူတို့အများစု၏ နှလုံးက အေးဆေးတည်ငြိမ်စွာ ရှိနေသည်။ မည်သို့ဖြစ်ပါစေ အစစ်အမှန်နတ်ဘုရား ပြန်ရှင်သန်လာသော ကိစ္စကို သက်ဆိုင်ရာကောင်းကင်ဘုံအလွန်များဆီသို့ အကြောင်းကြားပြီးပြီဖြစ်လေရာ ယင်းကို ဖိနှိပ်ရန် တစ်လကြာမြင့်လိမ့်မည် မဟုတ်ချေ။

သို့သော်လည်း ရွှီချင်းကို သူတို့မြင်လိုက်ရသည့်အခိုက် စိတ်သက်သာရာရသွားကြဆဲပင်။

အထူးသဖြင့် ရွှီချင်း၏ အရှိန်အဝါက ယခင်ကထက် အများကြီး ပိုသန်မာလာကြောင်း သူတို့အာရုံခံမိသွားသည့်အခါ ဖြစ်သည်။

ကျိုးကျန်းလီက ချက်ချင်း အရှေ့ထွက်လာပြီး ဦးညွတ်လိုက်သည်။

“ အစစ်အမှန်နတ်ဘုရားတစ်ပါးကို နှိမ်နင်းနိုင်ခဲ့တဲ့အတွက် ဂုဏ်ပြုပါတယ်အရှင်… အရှင့်ရဲ့ အကျိုးဆောင်မှုက ကြီးမားလှပါတယ် ”

ယင်းကို တခြားလူများ ကြားသောအခါ သူတို့အားလုံးက ဦးညွတ်လိုက်ကြသည်။

သူတို့၏ နှလုံးသားထဲမှာလည်း လှိုင်းတချို့ ထွက်ပေါ်လာသည်။

သူတို့က ရွှီချင်း၏ ခြေလှမ်းဝက်အင်မော်တယ်အဆင့်ဆီသို့ အဆင့်ချိုးဖြတ်ခြင်းကို ကိုယ်တိုင်မျက်မြင်တွေ့ခဲ့ကြပြီး ကောင်းကင်ဘုံအလွန်၏ အရှင်သခင် သူမဖြစ်လာခင်ကတည်းက သူ၏ အလွန်ကြီးမားသော အင်မော်တယ်သန္ဓေသားလောင်းကိုလည်း အာရုံခံမိခဲ့ကြသည်။

ထို့ပြင် သူ၏ တိုက်ပွဲစွမ်းအားက အဆင့်နိမ့်အင်မော်တယ်တစ်ပါးနှင့် အလွန်နီးကပ်နေကြောင်းကိုလည်း သူတို့အာရုံခံနိုင်ကြသည်။

တစ်ချိန်တည်းမှာ ရွှီချင်းက အစစ်အမှန်နတ်ဘုရားတစ်ပါးနှင့်အတူ တည်နေရာပြောင်းရွှေ့သွားခဲ့ပြီး ဘေးကင်းလုံခြုံစွာ ပြန်ရောက်လာကြောင်း သူတို့မြင်တွေ့ခဲ့ကြသည်။

တစ်ဖက်လူ၏ အဆင့်ဆင့် တိုးတတ်သွားမှုက ကောင်းကင်အရွေးချယ်ခံများဟု ကိုယ့်ကိုယ်ကိုယ် သတ်မှတ်ထားကြသော ထိုတတ်လှမ်းသူများ၏ စိတ်ထဲသို့ အတွေးပေါင်းများစွာ ဝင်ရောက်လာစေသည်။

အထူးသဖြင့် ကြယ်တာရာစက်ဝန်းပင်။ သူက ရွှီချင်းကို တိတ်တဆိတ် ကြည့်လိုက်ပြီး စိတ်ထဲမှာ သက်ပြင်းချလိုက်သည်။

သူတို့ကြားမှ ကွာခြားမှုက ပိုပြီးကြီးသထက် ကြီးမားလာသည်။

သို့သော်လည်း ထိုအတွေးက သူ၏ စိတ်ထဲမှာ အချိန်ကြာကြာ ရှိမနေပေ။ နောက်ဆုံးမှာတော့ ယင်းက သူ့အတွက် စိတ်ခွန်အားအဖြစ် ပြောင်းလဲသွားသည်။

ရွှီချင်းက သူ့အရှေ့မှ လူတိုင်းကို ကြည့်လိုက်သည်။ ထောင်စောင့်များနှင့် ထောင်မှူးများကို သူမြင်သွားသောအခါ သူ၏ နှလုံးက အနည်းငယ် ငြိမ်သက်သွားသည်။

မည်သို့ဖြစ်ပါစေ ယင်းက ပုံရိပ်ယောင်ထဲမှ အခြေအနေနှင့် ခြားနားသည်။

ပုံရိပ်ယောင်ထဲတွင် အပြင်သို့ သူထွက်လာသည့်အခါ ထောင်စောင့်များနှင့် ထောင်မှူးများက မရှိကြတော့ပေ။

သို့သော်လည်း ထိုအတွေးက ရွှီချင်း၏ စိတ်ထဲမှာ ထွက်ပေါ်လာသည်နှင့်ချက်ချင်း လူတိုင်း၏ နှုတ်ဆက်မှုကို သူမတုံ့ပြန်နိုင်ခင်…

နောက်အခိုက်အတန့်မှာ ဤနေရာမှ တတ်လှမ်းသူအားလုံး၏ တုံကင်က ရုတ်တရက် တုန်ယင်သွားသည်။ ကမ်းစပ်ကိုးခုကောင်းကင်ဘုံအလွန်မှ ရိက္ခာထိန်းသိမ်းသူဌာန၏ အမိန့်က တတ်လှမ်းသူအားလုံး၏ စိတ်ထဲမှာ ပဲ့တင်ထပ်သွားသည်။

“ ကြယ်တာရာစက်ဝန်းအပြင်ဘက်က စစ်ပွဲရဲ့ အပြောင်းအလဲတွေကြောင့် မူလအနှစ်သာရကို အရေးတကြီး လိုအပ်နေတယ်… ရိက္ခာထိန်းသိမ်းသူဌာနက အဖွဲ့အားလုံး ကိုယ်စုဆောင်းထားတဲ့ မူလအနှစ်သာရတွေကို ရှေ့တန်းစစ်မြေပြင်ဆီ ကိုယ်တိုင်သွားရောက်ပို့ဆောင်ပေးရမယ်… တာဝန်ကို နှောင့်နှေးမှုမစေရှိဘဲ ချက်ချင်း ဆောင်ရွက်ပါ ”

မငြင်းဆန်နိုင်သော အခွင့်အာဏာကို သယ်ဆောင်ထားသည့် ထိုအသံက တတ်လှမ်းသူအားလုံး၏ စိတ်ထဲမှာ ပဲ့တင်ထပ်သွားသည်။ ယင်းက သူတို့၏ အမူအရာကို သိသာစွာ ပြောင်းလဲသွားစေသည်။

“ စစ်မြေပြင်ဆီ… ကိုယ်တိုင်သွားပို့ဆောင်ရမှာလား ”

ချမ်ကျွင်းနှင့် ပိုင်ရီ၏ ခန္ဓာကိုယ်က တုန်ယင်သွားသည်။ မုန်တိုင်းက ထိုညီအကိုနှစ်ယောက်၏ စိတ်ထဲမှာ ထွက်ပေါ်လာသည်။

ယွင်ရှန်းစုက မျက်မှောင်ကြုတ်လိုက်သည်။ လီမုန့်တု၏ အမူအရာက ပြောင်းလဲသွားစဉ် ရှဲလင်းဇီ၏ သူငယ်အိမ်က ကျုံ့သွားသည်။

တခြားတတ်လှမ်းသူများသည်လည်း အမူအရာအမျိုးမျိုး ထုတ်ဖော်လိုက်ကြသည်။

မည်သို့ဖြစ်ပါစေ စစ်မြေပြင်က သူတို့အားလုံးအတွက် အလွန်အလှမ်းဝေးသောအရာ ဖြစ်သည်။

သို့သော်လည်း ဤအခိုက်အတန့်မှာ သူတို့က စစ်မြေပြင်ဆီသို့ သွားရောက်ကြရတော့မည်ဟု မည်သူမှ မမျှော်လင့်ထားကြချေ။

အထူးသဖြင့် သူတို့၏ ကျင့်ကြံခြင်းအခြေခံကို ထည့်သွင်းစဉ်းစားသည့်အခါ ဖြစ်သည်။ စစ်မြေပြင်တွင် သူတို့က ပင်လယ်ထဲမှ ရေတစ်စက်မျှသာ ဖြစ်သည်။ သေခြင်းတရားက သူတို့အပေါ်သို့ အချိန်မရွေး ကျရောက်လာနိုင်သည်။ စစ်မြေပြင်တွင် သူတို့ရင်ဆိုင်ရမည့် ရန်သူများက သူတို့နှင့် အဆင့်တူမှာ ရှိနေလိမ့်မည်ဟု အာမခံချက်မရှိပေ။

၎င်းတို့က နတ်ဘုရားမီးတောက်အဆင့်၊ နတ်ဘုရားယဇ်ပလ္လင်အဆင့်နှင့် အစစ်အမှန်နတ်ဘုရားတစ်ပါးပင် ဖြစ်နိုင်ပေသည်။

ထို့ပြင် လူတိုင်း၏ ယခင်နားလည်ထားမှုအရ ကြယ်တာရာစက်ဝန်းများကြားမှ ဤစစ်ပွဲ၏ အလုံးစုံတိုက်ခိုက်မှုက အင်မော်တယ်အရှင်သခင်များနှင့် နတ်ဘုရားအရှင်သခင်များ၏ အားပြိုင်မှု ဖြစ်သည်။

ထို့ပြင် ယင်းက အင်မော်တယ်များနှင့် နတ်ဘုရားများကြားမှ တိုက်ပွဲဖြစ်ပြီး လမ်းစဉ်မတူညီသော အင်အားစုနှစ်ခု၏ အပြန်အလှန် အမြစ်ဖြတ်သုတ်သင်ပစ်သော စစ်ပွဲဖြစ်သည်။

ကျိုးကျန်းလီက တည်ကြည်လေးနက်သော အမူအရာဖြင့် ရွှီချင်းကို ကြည့်လိုက်သည်။

ကြယ်တာရာစက်ဝန်းသည်လည်း နှလုံးတုန်သွားပြီး ရွှီချင်းကို ကြည့်လိုက်သည်။ တခြားတတ်လှမ်းသူများသည်လည်း ထို့အတူပင်။

လူတိုင်း၏ စိုက်ကြည့်ခံနေရသော ရွှီချင်းသည်တော့ မိန်းမောတွေဝေနေသည်။

သူက ထိုအစစ်အမှန်နတ်ဘုရား ဖန်တီးခဲ့သော ပုံရိပ်ယောင်ကို ပြန်စဉ်းစားလိုက်သည်။

ပုံရိပ်ယောင်ထဲတွင် စစ်မြေပြင်ဆီသို့ သူသွားရောက်ခဲ့သည်။

သို့သော်လည်း ကွာခြားချက်တစ်ခုအနေဖြင့် ပုံရိပ်ယောင်ထဲတွင် သူက စစ်မြေပြင်ဆီသို့ ဆယ်နှစ်ကြာပြီးမှ သွားရောက်လိမ့်မည်။

သို့သော်လည်း အစစ်အမှန်လောကတွင် ယခု သူက စစ်မြေပြင်ဆီသို့ သွားရောက်ရတော့မည်။

ယင်းက ပုံရိပ်ယောင်ထဲမှာထက် ဆယ်နှစ်ပိုစောသည်။

“ ဒါဆိုရင်… အစစ်အမှန်နတ်ဘုရားရဲ့ ပုံရိပ်ယောင်က ဘာကိုအခြေခံတာလဲ ”

“ ဒါမှမဟုတ် ဒီဟာက တိုက်ဆိုင်မှုတစ်ခုပဲလား… ”

ရွှီချင်းက မျက်လုံးမှေးကျဉ်းလိုက်သည်။