သုတေသနအဖွဲ့သစ်၏ ခေါင်းဆောင်

"ဘာ?!" ငါက အဖွဲ့သစ်ရဲ့ ခေါင်းဆောင်ဖြစ်လား? ပုံဆောင်ခဲဆေးဝါးဖန်တီးခြင်းနည်းစနစ် က ကျရှုံးသွားတာ ရှင်းနေတာပဲ!

R&D ဌာနရှိ သုတေသီအားလုံး အံ့အားသင့်သွားကြသည်။ ဤမြင်ကွင်းကို မြင်ရသောအခါ အံသြမှုကြောင့် ပါးစပ်ဟောင်းလောင်းဖြစ်နေခဲ့ကြသည်။

ရက်ပိုင်းအတွင်း ဝင်ရောက်လာသည့် လူသစ်တစ်ယောက် ပထမဆုံး သုတေသနအဖွဲ့ရဲ့ အဓိကအဖွဲ့ဝင်ဖြစ်လာပြီး အခုကျ အဖွဲ့သစ်ရဲ့ ခေါင်းဆောင်အဖြစ်ပါ တိုးမြှင့်ခံရတယ်? ရာထူးတိုးတဲ့ အရှိန်က ဘယ်လိုတောင် မြန်နေတာလဲ? ဤသည်မှာ သူတို့၏စိတ်ကူးထက် ကျော်လွန်နေသည်။

ဖုန့်လင်း၏ ရှော့ရနေသည့် အာမေဍိတ်သံမှာ သူတို့ရင်ထဲရှိ ခံစားချက်များကို အပြည့်အဝ ကိုယ်စားပြုနေသည်။

"ဒါက ကျရှုံးသွားတဲ့ စမ်းသပ်မှုတစ်ခုပဲလေါ သူ့ကို ဒီလောက်ထိ အရေးပေးဖို့ လိုလို့လား?"

"သူ့ကို အဖွဲ့ခေါင်းဆောင်အဖြစ် တိုက်ရိုက် ရာထူးတိုးပေးလိုက်တာပဲါ ဒါက နည်းနည်းတော့ မတရားဘူးလားလို့?"

"အိုက်ကတော့ ဒီဆုံးဖြတ်ချက်ကို လုံးဝလက်မခံနိုင်ဘူးထင်တယ်?"

...

ထိုလူများမှာ တစ်ဦးနှင့်တစ်ဦး တီးတိုးပြောနေကြပြီး ဖရန့်၏ ဆုံးဖြတ်ချက်ကို အလွန်ပဟေဠိဖြစ်​နေကြသည်။

သူတို့သာမက အိုက်၏ အမူအရာသည်လည်း အလွန်ရက်စက်ယတ်မာမည့်ပုံသို့ ပြောင်းလဲသွားပြီး ဖုန့်လင်ကို ကြမ်းတမ်းစွာ စိုက်ကြည့်နေခဲ့သည်။

မူလကတည်းက သူသည် ကြမ်းတမ်းသည့် စိတ်ထားရှိသူဖြစ်ပြီး ဖုန့်လင်း၏ ဦးနှောက်ဆေးမှုကြောင့်သာ သဘောထားပြောင်းလဲခဲ့ခြင်းဖြစ်သည်။

သို့သော် ယခုအခါတွင် ဖုန့်လင်းသည် သူ၏ အဆင့်အတန်းနှင့် အကျိုးအ​မြတ်များကို ခြိမ်းခြောက်နိုင်သည့် အဆင့်သို့ ရောက်ရှိလာသည်ကို မြင်ရသောအခါ မည်သည့် စိတ်ညှို့ပညာနည်းစနစ်မျှ အသုံးမဝင်တော့ပေ။

ဖုန့်လင်းအပေါ်ရှိ သူ၏ ကောင်းမွန်သော စိတ်ဆန္ဒများ လုံးဝပျောက်ကွယ်သွားပြီး စိတ်ထဲတွင် မလိုမုန်းထားခြင်းများ ပြည့်လာခဲ့သည်။

ဖုန့်လင်း၏ မျက်လုံးများ ဝင်းလက်သွားသည်။ သူ၏ ထက်မြက်သော စိတ်အာရုံက သဘာဝအတိုင်း ဤအရာကို သတိပြုမိသော်လည်း သူ ထိုအကြောင်းကို ဂရုမစိုက်ခဲ့ပေ။

ဖရန့်ရဲ့ ကြေညာချက်က သိပ်အံ့သြစရာဖြစ်ပေမယ့် ဒါက သူ လိုချင်တဲ့အရာ အတိအကျ မဟုတ်လား?

သူအနေနှင့် ဖရန့်၏ အသိအမှတ်ပြုမှုကိုရရှိရန် မိမိ၏စွမ်းရည်များကို ပြသခဲ့သည်။ ထို့နောက်တွင် ဧရာမဆေးဝါးကုမ္ပဏီ၏ အမှောင်လျှို့ဝှက်ချက်များကို ဖြည်းဖြည်းချင်း စူးစမ်းနိုင်မည်ဖြစ်သည်။

အကယ်၍ သူသာ အမှန်တကယ် အဖွဲ့သစ်ရဲ့ ခေါင်းဆောင်ဖြစ်လာရင် သူ့ ရည်မှန်းချက်တွေကို အောင်မြင်အောင် အကောင်အထည်ဖော်နိုင်မယ် မဟုတ်လား?

အိုက်၏ ရန်ငြိုးဖွဲ့မှုနှင့်ပတ်သက်၍မူ သူအနေဖြင့် ဂရုမစိုက်တော့ပေ။ အဘယ်ကြောင့်ဆိုသော် နောင်တွင် သူသည် အိုက်၏ ခေါင်းဆောင်မှုအောက်တွင် ရှိနေရမည်မဟုတ်တော့ဘဲ အိုက် အနေဖြင့် သူ့အား ဘာမျှမလုပ်နိုင်တော့ပေ။

ဖုန့်လင်း၏ ရှုပ်ထွေးနေသည့် မျက်နှာအမူအရာကို မြင်ရသောအခါ ဖရန့်မှာ မည်သည့်သံသယမျှ မဖြစ်ဘဲ ဤသည်မှာ ပုံမှန်ဖြစ်သည်ဟု ခံစားရသည်။

လူသစ်တစ်ဦးရ ရုတ်တရက် အဖွဲ့ခေါင်းဆောင်ဆိုတဲ့ အမြင့်ဆုံးရာထူးသို့ တိုးမြှင့်ခံရသည်။ မည်သူမဆို ဤသို့ဖြစ်ပါက အံ့အားသင့်မည်သာပင်။

မန်နေဂျာ ဖရန့်၏ မျက်နှာပေါ်တွင် အပြုံးတစ်ခု ပေါ်လာပြီး သူ ဖုန့်လင်း၏ ပခုံးကို ပုတ်လိုက်သည်။ "ဤပုံဆောင်ခဲ့အမှုန့်တွေ ကျရှုံးသွားပေမယ့် မင်းအနေနဲ့ အောင်မြင်မှုလမ်းကြောင်းပေါ်ကို ရောက်ပြီလို့ ငါ ယုံတယ်။ ဒီစဉ်းစားပုံလမ်းကြောင်းက လုံးဝမှန်တယ်။ ဒါက ပထမဆုံးစမ်းသပ်မှုပဲဆိုပေမယ်် လက်တွေ့စမ်းသပ်မှုရဲ့ ဘေးထွက်ဆိုးကျိုးတွေက အရမ်း နည်းသွားပြီ။ ဒါက မင်းကို ငါ ဘာလို့ အဖွဲ့သစ်တစ်ခုရဲ့ ခေါင်းဆောင်အဖြစ် ခန့်လိုက်ပြီး ပုံဆောင်ခဲဆေးဝါးဖန်တီးခြင်းနည်းစနစ်ကို အပြည့်အဝ အာရုံစိုက်ခိုင်းရသလဲဆိုတဲ့အကြောင်းပဲ"

သူ ဖုန့်လင်းကို ကြည့်ရင်း ဖုန့်လင်းအပေါ် ယုံကြည်မှုအပြည့်ရှိနေသည့်ပုံဖြင့် ပြောလိုက်သည်။

ဖုန့်လင်းလည်း အမှန်တကယ် အံ့သြနေသည့် အကြည့်ကို ဖော်ပြလိုက်သည်။ သူ နှိမ့်ချ ဟန်ဆောင်ကာ "မန်နေဂျာက ကျွန်တော့်ကို အရမ်းယုံနေတာပဲ။ ကျွန်တော် မမျှော်လင့်ဘဲ ကံကောင်းပြီးတော့ အကျိုးသက်ရောက်မှုရခဲ့ရုံပါပဲ"

"ဒီလောက်ထိနှိမ့်ချစရာ မလိုပါဘူး။ နှိမ့်ချလွန်းတာက မောက်မာတာနဲ့ အတူတူပဲ" ဖရန့် ခေါင်းခါကာ ပြန်ပြောလိုက်သည်။

ဖရန့် ဤမျှထိ ပြောပြီးသောအခါ

ဖုန့်လင်းမှာ နောက်ထပ်ငြင်းဆန်ခြင်း

မပြုတော့ပေ။ မဟုတ်ပါက ဖရန့်၏ သံသယကို နှိုးဆွစေနိုင်သည်။

သူ ခေါင်းညိတ်လိုက်ပြီး လက်ခံလိုက်သည်။ သူ့မျက်နှာပေါ်တွင် ရှုပ်ထွေးနေသည့် အကြည့်ဖြင့် ပြောလိုက်သည် "ကျွန်တော် အဖွဲ့ခေါင်းဆောင်ဖြစ်လာပြီဆိုတော့ ဘယ်လိုဗီဇဆေးရည်ကို သုတေသနလုပ်ရမှာလဲ? ဆေးအမျိုးအစားတစ်ခုချင်းစီအတွက် ပုံဆောင်ခဲဖြစ်စေတဲ့ နည်းလမ်းကလည်း ကွဲပြားပါတယ်။ သာမန်လူတွေ သောက်နိုင်တဲ့ ဗီဇဆေးရည်တွေကို သုတေသနလုပ်တာက ခေါင်းဆောင်အိုက် တာဝန်ယူထားတဲ့ သုတေသနခေါင်းစဉ် မဟုတ်လား?"

"မင်း ဒီလိုမေးမှာကို ငါသိတယ်။ စိတ်မပူပါနဲ့၊ မင်းက အခု အဖွဲ့ခေါင်းဆောင်ဖြစ်လာပြီဆိုတော့ ငါတို့ ဧရာမဆေးဝါးကုမ္ပဏီရဲ့ တစ်ချို့ အဓိကလျှို့ဝှက်ချက်တွေကို သိခွင့်ပေးမှာပါ" ဖရန့် ပြုံးရင်းဖြင့် ဖုန့်လင်း၏ အဖြေကို အလွန်ကျေနပ်နေခဲ့သည်။

သုတေသီများ သူတို့အနီးကို ဝိုင်းရံလာသည်ကို မြင်သောအခါ ဖရန့်သည် အေးဆေးစွာပြောလိုက်သည်။ "ခင်ဗျားတို့ အခု လူစုခွဲလို့ရပြီ။"

သုတေသီများသည် ခေါင်းညိတ်ကာ အမိန့်ကို လိုက်နာခဲ့ကြသည်။

ထို့နောက် ဖရန့်သည် ဖုန့်လင်းကို လှမ်းကြည့်ရင်း တည်ငြိမ်စွာပြောလိုက်သည်။ "ငါ့နောက်လိုက်ခဲ့!"

ဖုန့်လင်း သဘောတူလိုက်သည်။

အိုက်မှာ အနောက်တွင် ရပ်နေပြီး အံကြိတ်နေခဲ့သည်။ သို့သော် သူ့မန်နေဂျာ၏ ခွင့်ပြုချက်မရှိဘဲ သူတို့နောက်ကို လိုက်ရန် မဝံ့ရဲပေ။

R&D ဌာနမှ ထွက်လာပြီးနောက် နှစ်ဦးသား ဧရာမဆေးဝါးကုမ္ပဏီ၏ အတွင်းပိုင်းအထိ လျှောက်သွားလိုက်ကြသည်။ လုံခြုံရေးအထူးတင်းကြပ်သော ကြီးမားသည့် သတ္တုတံခါးကြီး သုံးခုကို ဖြတ်သန်းပြီးနောက် အောက်ဘက်သို့ ဆင်းသွားသည့် ဓာတ်လှေကားတစ်ခု ပေါ်လာသည်။

ဖုန့်လင်း၏ အံ့အားသင့်နေသော မျက်နှာအမူအရာကို ဖရန့်မြင်သောအခါ သူ ရယ်မောကာ ပခုံးတွန့်ပြလိုက်သည်။ "ငါတို့ကုမ္ပဏီမှာ လျှို့ဝှက်ချက်တွေ အများကြီးရှိတယ်။ ဒါကြောင့် ဒါတွေကို ကာကွယ်ဖို့ အထူးနည်းလမ်းတချို့သုံးတာက ပုံမှန်ပဲလေ ဟုတ်တယ်မလား?"

ဖုန့်လင်း ဆိတ်ဆိတ်သာ နေလိုက်သည်။

ဤအချိန်တွင် ဖရန့်၏ မျက်နှာအမူအရာမှာ ရုတ်တရက် အလွန်တရာ တည်ကြည်လေးနက်လာခဲ့သည်။

"ဖုန့်လင်း၊ မင်းက အခု အဖွဲ့ခေါင်းဆောင်အဖြစ် ခန့်အပ်ခံရပြီဖြစ်တာကြောင့် ဧရာမဆေးဝါးကုမ္ပဏီရဲ့ အဓိကအဖွဲ့ဝင်တစ်ဦးအဖြစ် သတ်မှတ်လို့ရပြီ။ ဒါပေမယ် ကြီးမားတဲ့သစ်ပင်က အမြဲတမ်းလေကို ဆွဲဆောင်တယ်။ ငါတို့ကုမ္ပဏီရဲ့ လျှို့ဝှက်ချက်တွေကို ခိုးယူချင်တဲ့ ဆန့်ကျင်သူတွေနဲ့ ဥပဒေချိုးဖောက်သူတွေ ရှိနေတယ်။ မင်းက အဓိကအဖွဲ့ဝင်ဖြစ်လာပြီဖြစ်လို့ ဘယ်အရာကိုမှ ဖော်ထုတ်လို့ မရဘူး။ နောက်ဆက်တွဲအကျိုးဆက်တွေကို မင်း သိလိမ့်မယ်လို့ ငါထင်ပါတယ်" ဖရန့် အဓိပ္ပာယ်ရှိစွာ ပြောလိုက်သည်။ သူ့လေသံထဲတွင် လေးနက်သော သတိပေးချက်များ ပါဝင်နေပြီး

ဖုန့်လင်း၏ တုံ့ပြန်မှုများကို လေ့လာနေခဲ့သည်။

ဖုန့်လင်း၏ နှလုံးသား တုန်လှုပ်သွားခဲ့သည်။ ဤသည်မှာ စမ်းသပ်မှုတစ်ခုဖြစ်ကြောင်း သူ သိနေသည်။

သူ့အား မကြာမီ ဖော်ပြမည့် လျှို့ဝှက်ချက်များသည် သာမန်ထက်ထူးကဲ့သညိ့တစ်စုံတစ်ရာ ဖြစ်လိမ့်မည်ဟု ထင်ရပြီး ဤသည်မှာ ဖရန့်က သူ့ကို စမ်းသပ်နေရခြင်း၏ အကြောင်းရင်းဖြစ်သည်။

အကယ်၍ သူ ဤမေးခွန်းကို မဖြေဘဲ ဖရန့်အနေနှင့် သူနှင့်ပတ်သက်၍ စိုးရိမ်လာပါက သူ ဒုက္ခရောက်လိမ့်မည်ဖြစ်သည်။

သူ ပြောနေသော ဆန့်ကျင်သူများနှင့် ဥပဒေချိုးဖောက်သူများသည် မားစ်ဂြိုဟ်တော်လှန်ရေးတပ် မှလွဲ၍ အခြားမည်သူမျှ မဟုတ်ပေ။

ဤအတွေးသည် သူ၏ စိတ်ထဲတွင် လျှပ်တစ်ပြက် ဖြတ်သွားသော်လည်း

ဖုန့်လင်း၏ မျက်နှာအမူအရာမှာ အစဉ်အတိုင်း တည်ငြိမ်နေခဲ့ပြီး "ဒါက သဘာဝကျပါတယ်။ ကျွန်တော်က ကုမ္ပဏီနဲ့ စာချုပ်ချုပ်ပြီးသားဖြစ်တဲ့အတွက် ကုမ္ပဏီရဲ့ အကျိုးစီးပွားကို သဘာဝအတိုင်း ကာကွယ်မှာပါ" ဟု ပြန်ဖြေလိုက်သည်။

ဖရန့်မှာ ထိုစကားကို ကြားပြီးနောက် ခေါင်းညိတ်လိုက်သည်။

ဓာတ်လှေကားသည် မြေအောက်သို့ အလျင်အမြန်ဆင်းသွားခဲ့သည်။ အချိန်ကာလသည် သူ မျှော်လင့်ထားသည်ထက် ပိုမိုကြာမြင့်ပြီး စုစုပေါင်း တစ်နာရီကြာမြင့်ခဲ့သည်။

ဖုန့်လင်း ဤကြာမြင့်သည့်အချိန်ကို ထောက်ကာ ၎င်းတို့သည် အင်္ဂါဂြိုဟ်၏ ဗဟိုချက်အထိ နက်ရှိုင်းစွာ ဆင်းသွားပြီဖြစ်ကြောင်း စိတ်ထဲတွင် တွက်ဆလိုက်သည်။

အမှန်တရားသည် သူမျှော်လင့်ထားသည့်အတိုင်းပင်။

ဤဓာတ်လှေကားသည် အလွန်ခိုင်ခံ့သော အကာအရံရှိသော်လည်း သူ့အနေဖြင့် ပတ်ဝန်းကျင်၏ အပူချိန်မြင့်တက်လာမှုကို ရှင်းရှင်းလင်းလင်း ခံစားမိသည်။

တုန်ခါသံတစ်ခုနှင့်အတူ ဓာတ်လှေကားမှာ နောက်ဆုံးတွင် ရပ်တန့်သွားခဲ့သည်။

"အခုပြမယ့်အရာက မယှဉ်သာအောင် ကြီးကျယ်တဲ့ လုပ်ငန်းတစ်ခုဖြစ်ပြီး ဒါက ငါတို့ ဧရာမဆေးဝါးကုမ္ပဏီရဲ့ အစစ်အမှန် လျှို့ဝှက်ချက်ပဲ။ မျက်လုံးကို ကျယ်ကျယ်ဖွင့်ထား" ဖရန့်၏အမူအရာမှာ ပိုမိုတည်ငြိမ်လာပြီး သူ့လေသံမှာ အနည်းငယ်စိတ်လှုပ်ရှားမှုဖြင့် ပြည့်နေခဲ့သည်။

ဖုန့်လင်း တိတ်တဆိတ် ခေါင်းညိတ်လိုက်ပြီး စူးစမ်းလိုစိတ်များ သူ၏နှလုံးသားထဲတွင် လှုပ်ရှားလာခဲ့သည်။

ဓာတ်လှေကားတံခါးများ ပွင့်သွားသောအခါ သူ ဖရန့်၏ နောက်ကို လိုက်သွားခဲ့သည်။ သူတို့ရှေ့တွင် အလွန်ကြီးမားသော နေရာလွတ်တစ်ခု ရှိနေပြီး ကြမ်းပြင်ကို ဖောက်ထွင်းမြင်ရသော သတ္တုစပ်များဖြင့် ပြုလုပ်ထားသည်။ သူအောက်သို့ ငုံ့ကြည့်လိုက်သောအခါ မီးလျှံဘောလုံးကြီးတစ်ခု လွင့်မျောနေသည်ကို မြင်နိုင်ခဲ့သည်။ ဒါက အင်္ဂါဂြိုဟ်ရဲ့ ဗဟိုချက်မဟုတ်လား?

ချော်ရည်များ လှိုင်းထနေပြီး အပူလှိုင်းများ လေထုထဲတွင် ပြည့်နှက်နေခဲ့သည်။ ထွက်ပေါ်လာသော ရေနွေးငွေ့များတွင် ကန့်နှင့် အခြားသတ္တုဒြပ်စင်များ ပါဝင်ကာ အလွန်အမင်းအဆိပ်သင့်စေနိုင်သည်။

ကံကောင်းစွာဖြင့် သူတို့ရှိနေသော နေရာလွတ်သည် အပြည့်အဝ ပိတ်ထားပြီး ရေနွေးငွေ့များထဲမှ အဆိပ်သင့်ဒြပ်စင်များကို အပြည့်အဝ ပိတ်ဆို့ထားသည်။

အသိဉာဏ်ရှိသော စက်ရုပ်များမှာ ဖောက်ထွင်းမြင်ရသော ကြမ်းပြင်ပေါ်တွင် အတန်းလိုက် လျှောက်နေကြပြီး အမျိုးမျိုးသော အဆင့်မြင့်နည်းပညာပစ္စည်းကိရိယာများနှင့် ဝန်းရံထားသည်။ ဤသည်မှာ အင်္ဂါဂြိုဟ်၏ နက်ရှိုင်းသည့် ဗဟိုချက်တွင် တည်ဆောက်ထားသော လျှို့ဝှက်စခန်းတစ်ခုဖြစ်ကြောင်း ထင်ရှားနေသည်။

ဖုန့်လင်း အောက်သို့ကြည့်လိုက်သည်နှင့် အူတိုင်ထဲသို့ နစ်မြုပ်နေသော ထူထဲသည့် တိုင်လုံးကြီးများနှင့်တူသည့် ကိရိယာများကို မြင်တွေ့လိုက်ရသည်။ ထိုကိရိယာများသည် အပူစွမ်းအင်ကို စုပ်ယူကာ အသုံးပြုနိုင်သော စွမ်းအင်အဖြစ်သို့ ပြောင်းလဲပေးနေသည်။ ဤသည်မှာ စိတ်ကူးယဉ်၍ မရနိုင်သော နည်းပညာတစ်ရပ်ပင်ဖြစ်သည်။

မန်နေဂျာ ဖရန့်မှာမူ ဤမြင်ကွင်းကို အချိန်ကြာမြင့်စွာ မြင်ဖူးနေပြီဖြစ်ရာ ရှေ့သို့ ဆက်လျှောက်သွားခဲ့သည်။

ထို့နောက် ကြီးမားသော တံခါးတစ်ခု ပွင့်လာသည်။

ဖုန့်လင်းမှာ ဖရန့်၏ နောက်သို့လိုက်ကာ အသစ်စက်စက် နေရာတစ်ခုထဲသို့ ဝင်ရောက်သွားသည်။

သူ အလွန်အံ့သြခဲ့ပြီး မရေမတွက်နိုင်သော ဖန်လုံခန်းများကို ဤနေရာတွင် တွေ့လိုက်ရသည်။ ၎င်းတို့သည် စုပြုံနေပြီး သစ်တောထဲက အပင်များကဲ့သို့ ဖြစ်နေကာ အရေအတွက်မှာ သောင်းနှင့်ချီရှိပြီး များလွန်းလှသောကြောင့် သူ့မျက်လုံးဖြင့် အကုန်မမြင်နိုင်ခဲ့ပေ။

ဖန်လုံခန်းများအတွင်း၌ အနီရောင် အရည်များ ပြည့်နှက်နေသည်။ ဖန်လုံခန်းတစ်ခုချင်းစီတွင် အဝတ်ဗလာနှင့် အမျိုးသားတစ်ဦးစီ ရှိနေသည်။ ထိုအမျိုးသားများမှာ အရပ်ရှည်ပြီး ကြွက်သားတောင့်တင်းကာ အလှတရားနှင့် ခွန်အား၏ ပေါင်းစပ်မှုကဲ့သို့ ဖြစ်နေသည်။ အားလုံးမှာ ယခင်က ခန္ဓာကိုယ်လေ့ကျင့်သူများဖြစ်ဖူးသကဲ့သို့ ပုံပေါ်နေခဲ့သည်။

ဒါတွေအားလုံးက လူသားစမ်းသပ်ခံတွေ ဖြစ်နိုင်မလား?

ဤနေရာရှိ ခန္ဓာကိုယ်အရေအတွက်မှာ အလွန်အမင်း ထိတ်လန့်ဖွယ်ကောင်းပြီး ဖုန့်လင်း၏ သွေးများ အေးခဲသွားသည်ဟု ခံစားခဲ့ရသည်။

...

သို့သော် ပိုမိုနီးကပ်စွာ ကြည့်ပြီးနောက် ဖုန့်လင်းမှာ ဤအရာများသည် စမ်းသပ်ခံများနှင့် မတူဟု ခံစားလိုက်ရသည်။ ဤလူများသည် သန်မာသော အရိုးများနှင့် အခြေအနေအလွန်ကောင်းပုံပေါ်သည်။ ၎င်းတို့၏ အသက်စွမ်းအင်များမှာလည်း အလွန်ပြင်းထန်ပြီး ဓာတ်ခွဲခန်းကြွက်များနှင့်လုံးဝကွာခြားပြီး အသိစိတ်ဆုံးရှုံးနေသော လူသားစမ်းသပ်ခံများနှင့် လုံးဝကွဲပြားနေသည်။

ဖုန့်လင်း ဤအရာမှာ အလွန်ထူးဆန်းနေသည်ဟု ခံစားခဲ့ရသည်။

ဒီလောက်များတဲ့ လူသားခန္ဓာကိုယ်တွေကို ဧရာမဆေးဝါးကုမ္ပဏီ ဘယ်နေရာက ရတာလဲ?

ဤကုမ္ပဏီသည် အမှန်ပင် လျှို့ဝှက်ချက်များဖြင့် ပြည့်နှက်နေသည်။

ဖုန့်လင်း၏ နှလုံးသားထဲတွင် တုန်လှုပ်မှုနှင့် သတိထားမှုတို့ ပိုမိုပြင်းထန်လာခဲ့သည်။

သို့သော် အံ့အားသင့်သည့် မျက်နှာအမူအရာမှလွဲ၍ အခြားမည်သည့်စိတ်ခံစားချက်နှင့် အတွေးများကိုမျှ ဖော်ပြခြင်း မရှိခဲ့ပေ။

ဖရန့်မှာ ဖုန့်လင်း၏ မျက်နှာအမူအရာကို လျှို့ဝှက်စွာ စောင့်ကြည့်နေခဲ့သည်။ သူ၏ တုံ့ပြန်မှုများသည် မျှော်လင့်ထားသည့်အတိုင်း ဖြစ်နေသည်ကို တွေ့ရသောအခါ ဖရန့်၏ မျက်နှာပေါ်တွင် အပြုံးတစ်ခု ပေါ်လာခဲ့သည်။

ဖုန့်လင်းမှာ အလွန်စိတ်အားထက်သန်သော သုတေသီတစ်ဦးကဲ့သို့ ပြုမူကာ ၎င်းတို့အနီးသို့ အလျင်အမြန် ချဉ်းကပ်သွားသည်။ သူ့အကြည့်များတွင် စိတ်လှုပ်ရှားမှု၏ အပူရှိန်များ ပြည့်နှက်နေသော်လည်း နှလုံးသားထဲတွင် ရေခဲကဲ့သို့ အေးစက်နေခဲ့သည်။

အဘယ်ကြောင့်ဆိုသော် သူတွေ့ရှိခဲ့သည်မှာ ဤလူသားခန္ဓာကိုယ်များသည် အခြေခံအားဖြင့် တစ်ပုံစံတည်းဖြစ်နေခြင်းပင်ဖြစ်သည်။ အားလုံး၏ အရပ်မှာ ၁.၉၈ မီတာ ရှိပြီး တစ်စင်တီမီတာထက် ပိုမကွာခြားပေ။ အားလုံးသည် တစ်ထပ်တည်းနီးပါး ဖြစ်နေသည်။

ဤအချက်ကို သဘောပေါက်သောအခါ ဖုန့်လင်း၏ နှလုံးသားထဲတွင် လှုပ်ရှားသွားခဲ့သည်။ ပိုမိုနီးကပ်စွာ ကြည့်လိုက်သောအခါ ဤ 'လူသားစမ်းသပ်ခံများ' ၏ ခြေလက်အလျားများသည် အတိအကျတူညီနေသည်ကို တွေ့ရသည်။ အားလုံးမှာ အသားဖြူပြီး နေရောင်ကဲ့သို့ မျက်စိကျိန်းလောက်သော ရွှေရောင်ဆံပင်များ ရှိသည်။

သူတို့၏ ဖိုသီဖတ်သီဖြစ်နေသော ဆံပင်များကြားမှ မျက်နှာများပေါ်နေခဲ့သည်။ အားလုံးမှာ ရွှေရောင်ဆံပင်နှင့် အပြာရောင်မျက်လုံးများရှိပြီး ကြွက်သားတောင့်တင်းကာ ခန္ဓာကိုယ်တည်ဆောက်ပုံကောင်းကြသည်။ ရှေးဂရိလက်ရာ ကျောက်ရုပ်တုများကဲ့သို့ ဖြစ်နေပြီး အတိတ်ခေတ်က သူရဲကောင်းများ ပြန်လည်ရှင်သန်လာသည့်အလား တူနေခဲ့သည်။

ဒါတွေအားလုံး ကိုယ်ပွားတွေပဲ!

ဖုန့်လင်း၏ မှန်းဆချက်များ နောက်ဆုံးတွင် အတည်ပြုပြီးသွားသည်။ သူ၏ ရှေ့တွင် မြူများဆိုင်းနေသကဲ့သို့ ခံစားရပြီး နှလုံးသားထဲတွင် အဆုံးမရှိသော သတိထားမှုများ မြင့်တက်လာခဲ့သည်။

ဒီမြေအောက်ဓာတ်ခွဲခန်းရဲ့ရည်ရွယ်ချက်က ဘာလဲ?

ကိုယ်ပွားတွေကို အစုလိုက်အပြုံလိုက် ထုတ်လုပ်ဖို့လား?

ဒါဆို သူတို့ရဲ့ ထုတ်လုပ်နေတဲ့ ရည်မှန်းချက်က...

ကိုယ်ပွားစစ်တပ်တစ်ခု?!