အင်မော်တယ်စွမ်းအင်က နတ်ဘုရားတွေကို ရှုံ့ချတယ်

အဆင့်မြင့်ကြယ်တာရာစက်ဝန်း(၃၆)ခုသည် အလွန်ကျယ်ပြောပြီး ကြယ်မြေပုံထဲမှာ တသီးတခြား တည်ရှိကြသည်။ အဆင့်မြင့်ကြယ်တာရာစက်ဝန်းတစ်ခုစီသည် အဆုံးမဲ့စွာ ကျယ်ပြောပြီး ကြီးကျယ်ခမ်းနားကြသည်။

သို့သော်လည်း အလုံးစုံခြုံကြည့်သည့်အခါ ထိုအဆင့်မြင့်ကြယ်တာရာစက်ဝန်း(၃၆)ခုက အချင်းချင်း ချိတ်ဆက်နေကြသည်။ ထို့ပြင် ၎င်းတို့၏ ချိတ်ဆက်မှုက အလွန်အံ့ဖွယ်ကောင်းသော ဧရာမစက်ဝိုင်းကြီးတစ်ခုကို ဖြစ်ပေါ်စေသည်။

ထိုဧရာမစက်ဝိုင်းကြီး၏ အလယ်ဗဟိုတွင် အကန့်အသတ်မဲ့သော အနက်ရောင်ပင်လယ် ရှိသည်။ ပင်လယ်ထဲတွင် ဒြပ်နှောများက အလွန်အမင်း သိပ်သည်းစွာ တည်ရှိနေပြီး သက်ရှိသက်မဲ့ အရာအားလုံးကို ဖုံးလွှမ်းထားသည်။

ပင်လယ်၏ နာမည်က မူလပင်လယ် ဖြစ်သည်။

မူလပင်လယ်သည် လျှို့ဝှက်ဆန်းကြယ်ပြီး အံ့ဖွယ်ကောင်းသည်။ ယင်းက စိတ်ကူးယဉ်နိုင်စွမ်းထက် ကျော်လွန်သော တည်ရှိမှုဖြစ်ပြီး လူတိုင်း၏ နားလည်နိုင်စွမ်းထက် သာလွန်သည်။

နတ်ဘုရင်များသည်ပင် မူလပင်လယ်၏ အဓိကဇုန်ထဲသို့ မဆင်မခြင် မသွားဝံ့ကြချေ။

မူလပင်လယ်မှာ မြစ်ရေစီးကြောင်း(၃၆)ခုရှိပြီး မြစ်ရေစီးကြောင်းတစ်ခုစီက အဆင့်မြင့်ကြယ်တာရာစက်ဝန်းတစ်ခုဆီသို့ ဦးတည်စီးဆင်းနေကြသည်။ ကြယ်တာရာစက်ဝန်းထဲတွင် ထိုမြစ်ရေစီးကြောင်းက မရေမတွက်နိုင်သော မြစ်ခွဲများအဖြစ် ခွဲထွက်သွားကြသည်။ ထိုသို့မြစ်ခွဲများကို ကျင့်ကြံသူများနှင့် နတ်ဘုရားများက ‘ အပြင်ပိုင်းပင်လယ်များ ’ဟု ခေါ်ကြသည်။

အမှတ်လေးကြယ်တာရာစက်ဝန်းနှင့် အမှတ်ငါးကြယ်တာရာစက်ဝန်းကြားမှ စစ်ပွဲသည် ကြယ်တာရာစက်ဝန်းနှစ်ခုကြားမှ နယ်စပ်ဒေသတွင် ဖြစ်ပွားနေသည်။

ထိုနယ်စပ်ဒေသ၏ တစ်ခြမ်းကို အမှတ်ငါးကြယ်တာရာစက်ဝန်းက ပိုင်ဆိုင်ပြီး တခြားတစ်ခြမ်းကို အမှတ်လေးကြယ်တာရာစက်ဝန်းက ပိုင်ဆိုင်သည်။

နတ်ဘုရားများနှင့် အင်မော်တယ်များကြားမှ ပဋိပက္ခသည် ရှေးခေတ်ကာလကတည်းက စတင်ခဲ့ခြင်း ဖြစ်သည်။ အချိန်အတော်ကြာသွားသည့်တိုင် ထိုပဋိပက္ခက ဟန်ချက်ညီမှုအခြေအနေမှာသာ ရပ်တန့်နေသည်။ မည်သည့်ဘက်ကမှ အလုံးစုံအင်အားထုတ်သုံးခြင်း မရှိသေးပေ။ ရလဒ်အနေဖြင့် နတ်ဘုရားအရှင်သခင်များနှင့် အင်မော်တယ်အရှင်သခင်များက စစ်ပွဲမှာ ဝင်ရောက်မစွက်ဖက်ကြဘဲ ချုပ်ထိန်းထားကြသည်။

သို့သော်လည်း အမှတ်လေးကြယ်တာရာစက်ဝန်းထဲတွင် နတ်ဘုရားအရှင်သခင်အသစ်တစ်ပါး ပေါ်ထွန်းလာသည့်အခါ ထိုဟန်ချက်ညီမှုက ကျိုးပြတ်သွားသည်။

ထိုနတ်ဘုရားအရှင်သခင်၏ ဦးဆောင်မှုအောက်မှာ စစ်ပွဲ၏ အရှိန်အဟုန်က တစ်စတစ်စ ပိုပြီးပြင်းထန်လာသည်။

သို့ဖြစ်၍ နယ်စပ်ဒေသကို ကာကွယ်စောင့်ကြပ်ပေးနေသော အင်မော်တယ်အရှင်သခင်ကျန်းလူက ထိုနတ်ဘုရားအရှင်သခင်အတွက် အကြီးမားဆုံး ရန်သူဖြစ်လာသည်။

ထိုအဆင့်တိုက်ပွဲကို တာအိုမန္တန်များနှင့် နတ်ဘုရားအတတ်ပညာများဖြင့် မတိုင်းတာနိုင်တော့ပေ။ ယင်းက သာမန်ကျင့်ကြံသူများနှင့် သာမန်နတ်ဘုရားများ မြင်နိုင်သော တိုက်ပွဲမဟုတ်ပေ။

အကယ်၍ တစ်စုံတစ်ယောက်က အစစ်အမှန်နတ်ဘုရား သို့မဟုတ် အဆင့်နိမ့်အင်မော်တယ်အဆင့်သို့ ရောက်ရှိနေလျှင်ပင် နတ်ဘုရားအရှင်သခင်နှင့် အင်မော်တယ်အရှင်သခင်ကြားမှ တိုက်ပွဲကို အပြည့်အဝ နားလည်သဘောပေါက်နိုင်လိမ့်မည် မဟုတ်ချေ။ သူတို့က ယင်းကို ဝေဝေဝါးဝါးသာ မြင်နိုင်ကြလိမ့်မည်။

အဘယ့်ကြောင့်ဆိုသော် အရှင်သခင်အဆင့်သည် ဤတိုက်ပွဲ၏ အဓိကအရှိန်အဟုန် ဖြစ်သည်။

စစ်မြေပြင်မှ ကျင့်ကြံသူများအတွက်တော့ အင်မော်တယ်အရှင်သခင်ကျန်းလူက ကျင့်ကြံသူများ၏ ဦးဆောင်လမ်းပြပုဂ္ဂိုလ် ဖြစ်သည်။ သူ၏ တည်ရှိမှုက ကောင်းကင်ဘုံ၏ ဥပဒေသများထက် အများကြီး သာလွန်ပြီး သူကိုယ်တိုင်က အမှတ်ငါးကြယ်တာရာစက်ဝန်း၏ စိတ်ဆန္ဒတစ်စိတ်တစ်ပိုင်း ဖြစ်သည်။ သူက စစ်မြေပြင်၏ အထွတ်အထိပ်တည်ရှိမှုလည်း ဖြစ်သည်။

သူတည်ရှိသည့်နေရာတိုင်း ကျင့်ကြံသူများအတွက် အထောက်အပံ့ပေးနိုင်မည့် အင်မော်တယ်စွမ်းအင်ကို အလိုအလျောက် ဆင့်ခေါ်လိမ့်မည်။ သူ၏ တည်ရှိမှုက ဒြပ်နှောများကိုလည်း အလိုအလျောက် လွင့်ပြယ်စေလိမ့်မည်။

အကယ်၍ သူသာ စစ်မြေပြင်ပေါ်မှ ဒြပ်နှောအားလုံးကို ဖယ်ရှားနိုင်ပြီး အင်မော်တယ်စွမ်းအင်တစ်မျိုးတည်း ကျန်ရစ်စေနိုင်မည်ဆိုလျှင် ဤစစ်ပွဲ၏ အခြေအနေက လုံးဝ ပြောင်းလဲသွားလိမ့်မည်။

အကယ်၍ တစ်နေ့နေ့မှာ အမှတ်လေးကြယ်တာရာစက်ဝန်းထဲမှ ဒြပ်နှောအားလုံးက အင်မော်တယ်စွမ်းအင်ဖြင့် အစားထိုးခံလိုက်ရမည်ဆိုလျှင်…

ထိုအခါကျလျှင်…

နတ်ဘုရားအရှိန်အဝါနှင့် ဒြပ်နှောမရှိတော့သည့်အခါ နတ်ဘုရားများက သောင်ပြင်ပေါ်မှ ငါးများသဖွယ် အကူအညီမဲ့သွားကြလိမ့်မည်။ အကယ်၍ ၎င်းတို့က ဆက်ပြီး ရုန်းကန်နေဦးမည်ဆိုလျှင်ပင် အမှတ်ငါးကြယ်တာရာစက်ဝန်းထဲမှ မူလနတ်ဘုရားများနှင့် ဘာမှကွာခြားတော့မည် မဟုတ်ချေ။

ယင်းက အမှတ်ငါးကြယ်တာရာစက်ဝန်း နှစ်ပေါင်းများစွာကြာအောင် သုတေသနပြုလုပ်ထားခဲ့သော နတ်ဘုရားများကို ဖိနှိပ်ပစ်နိုင်မည့် နည်းလမ်းတစ်ခု ဖြစ်သည်။

နတ်ဘုရားအရှိန်အဝါနှင့် ဒြပ်နှောများက ကျင့်ကြံသူများအတွက် အဆိပ်ဖြစ်ပြီး ယင်းက သူတို့၏ ဝိညာဉ်ကို ယိုယွင်းတိုက်စားပစ်နိုင်သည်။

တူညီစွာပင် အင်မော်တယ်စွမ်းအင်က နတ်ဘုရားများကို ငြင်းဆန်ပြီး ၎င်းတို့၏ တည်ရှိမှုကို ထိခိုက်ပျက်စီးစေလိမ့်မည်။

ထိုစွမ်းအင်နှစ်ခုက ရေခဲနှင့် မီးသဖွယ် အပြန်အလှန် ဆန့်ကျင်ဖျက်ဆီးနေကြသည်။

နတ်ဘုရားအရှင်သခင်သည်လည်း ထိုသဘောတရားကို ကောင်းမွန်စွာ နားလည်ထားသည်။ သို့ဖြစ်၍ နတ်ဘုရားအရှင်သခင်ကိုယ်တိုင် စစ်မြေပြင်ပေါ်မှာ ထွက်ပေါ်လာသည့်အခါ ၎င်း၏ နတ်ဘုရားအရှိန်အဝါက ဒီရေသဖွယ် တလိပ်လိပ် မြှောက်တတ်လာပြီး ဘေးပတ်ဝန်းကျင်ကို လွှမ်းခြုံသွားသည်။ ယင်းက အလွန်သိပ်သည်းသော ဒြပ်နှောကို ဖွဲ့စည်းသွားစေသည်။

ဒြပ်နှောများက အင်မော်တယ်စွမ်းအင်အပါအဝင် အရာအားလုံးကို ဖုံးလွှမ်းသွားသည်။

သို့ဖြစ်၍ ဤစစ်ပွဲက အမှတ်လေးနှင့် အမှတ်ငါးကြယ်တာရာစက်ဝန်းကြားမှ စစ်ပွဲဖြစ်သလို နတ်ဘုရားအရှင်သခင်နှင့် အင်မော်တယ်အရှင်သခင်ကြားမှ တိုက်ပွဲလည်း ဖြစ်သည်။ ထို့ပြင် ယင်းက ဒြပ်နှောနှင့် အင်မော်တယ်စွမ်းအင်၏ ယှဉ်ပြိုင်မှုလည်း ဖြစ်သည်။

တစ်ချိန်တည်းမှာ ယင်းက သူတို့၏ သက်ဆိုင်ရာအဖွဲ့အစည်းများအပေါ် သက်ရောက်မှုအမျိုးမျိုးကို ဖြစ်ပေါ်စေသည်။

အကယ်၍ နတ်ဘုရားများဘက်က စည်းမျဉ်းများကို ဂရုမစိုက်ဘဲ အတင်းအဓမ္မ ကျူးကျော်တိုက်ခိုက်လာမည်ဆိုလျှင်ပင် ရလဒ်က ပြောင်းလဲသွားလိမ့်မည် မဟုတ်ချေ။ အဘယ့်ကြောင့်ဆိုသော် ၎င်းတို့က တစ်ဖက်အင်အားစုကို အမြစ်ဖြတ်ဖယ်ရှားပစ်ချင်သည်ဆိုလျှင် ဤတိုက်ပွဲက ဒြပ်နှောနှင့် အင်မော်တယ်စွမ်းအင်၏ နောက်ဆုံးယှဉ်ပြိုင်ပွဲ ဖြစ်သွားလိမ့်မည်။

မည်သို့ဖြစ်ပါစေ အမှတ်လေးကြယ်တာရာစက်ဝန်းထဲမှ ဒြပ်နှောသိပ်သည်းမှုနှင့် အမှတ်ငါးကြယ်တာရာစက်ဝန်းထဲမှ အင်မော်တယ်စွမ်းအင်ကြွယ်ဝမှုက အတူတူ ဖြစ်သည်။ အကယ်၍ အင်အားစုတစ်ခုက တခြားကြယ်တာရာစက်ဝန်းဆီသို့ ခြေချလိုက်မည်ဆိုလျှင် ၎င်းတို့က သေချာပေါက် အားနည်းသွားကြလိမ့်မည်။

သို့ဖြစ်၍ တစ်ဆင့်ပြီးတစ်ဆင့် နယ်ချဲ့ပြီး အလုံးစုံအခြေအနေကို လက်ဦးမှုရယူရန် ကြိုးစားခြင်းက ဤစစ်ပွဲ၏ အဓိကသော့ချက် ဖြစ်သည်။

ထို့ကြောင့် အရှင်သခင်အဆင့်အောက်မှ နတ်ဘုရားများနှင့် ကျင့်ကြံသူများသည် စစ်မြေပြင်တွင် အလွန်အရေးကြီးကြသည်။

သူတို့က သူတို့၏ အရှင်သခင်များအတွက် နေရာယူပေးရပြီး တိုက်ခိုက်ပေးကြရသည်။

အဘယ့်ကြောင့်ဆိုသော် နတ်ဘုရားအရှင်သခင်နှင့် အင်မော်တယ်အရှင်သခင်ကြားမှ တိုက်ပွဲကို အဆင့်နိမ့်ကျင့်ကြံသူများက မမြင်နိုင်သလို နားမလည်နိုင်ကြသော်လည်း အင်မော်တယ်စွမ်းအင်နှင့် ဒြပ်နှော၏ စီးဆင်းပုံကို ကြည့်ခြင်းဖြင့် ယင်းကို သူတို့ခန့်မှန်းနိုင်ကြသည်။

ကျင့်ကြံသူများအတွက်တော့ သူတို့၏ တာဝန်က ရှင်းလင်းသည်။ အင်မော်တယ်အရှင်သခင်က တိုက်ပွဲမှာ အသာစီးရရှိသွားပြီး အင်မော်တယ်စွမ်းအင်က တစ်ဟုန်ထိုး စီးဆင်းသွားကာ သတ်မှတ်ထားသော ဧရိယာထဲမှ ဒြပ်နှောများကို ဖယ်ရှားလိုက်မည်ဆိုလျှင် သူတို့က ထိုဧရိယာဆီသို့ ချက်ချင်း ချီတတ်သွားကြလိမ့်မည်။ သူတို့က ထိုဧရိယာကို အမြန်သုတ်သင်ရှင်းလင်းပြီး အမှတ်ငါးကြယ်တာရာစက်ဝန်း၏ တာအိုအလံတိုင်ကို လွှင့်ထူကြလိမ့်မည်။

တာအိုအလံတိုင်၏ ရည်ရွယ်ချက်က ထိုဧရိယာထဲမှ အင်မော်တယ်စွမ်းအင်ကို အမြဲတမ်း တည်ငြိမ်စေပြီး ယင်းကို အမှတ်ငါးကြယ်တာရာစက်ဝန်း၏ ပိုင်နက်တစ်စိတ်တစ်ပိုင်းအဖြစ် ပြောင်းလဲပစ်ရန် ဖြစ်သည်။

နောက်ပိုင်းတွင် သူတို့က အမိန့်များကို လိုက်နာပြီး ထိုဧရိယာထဲမှ နတ်ဘုရားစစ်စခန်းများကို ကျူးကျော်သိမ်းပိုက်ကြလိမ့်မည်။

ထိုသို့လုပ်ငန်းစဉ်ကို နှင်းဘောလုံးလှိမ့်ခြင်းဟု ဆိုနိုင်သည်။ အစတွင် နှင်းဘောလုံးက သေးငယ်သော်လည်း အကွာအဝေး ရှည်လျားသွားသည်နှင့်အမျှ နှင်းဘောလုံးက တဖြည်းဖြည်း အရွယ်အစား ကြီးမားလာလိမ့်မည်။

အင်မော်တယ်အရှင်သခင်က ထိုနည်းဖြင့် နယ်မြေများကို တဖြည်းဖြည်း ချဲ့ထွင်ပြီး အမှတ်ငါးကြယ်တာရာစက်ဝန်း၏ လွှမ်းမိုးနိုင်စွမ်းကို မြှင့်တင်လိမ့်မည်။ အပြန်အလှန်အနေဖြင့် အမှတ်ငါးကြယ်တာရာစက်ဝန်း၏ တိုးပွားလာသော အရှိန်အဟုန်က အင်မော်တယ်အရှင်သခင်ပေါ်သို့ ကျရောက်လာလိမ့်မည်။ ယင်းက သူ့ကို အရှင်သခင်အဆင့် တိုက်ပွဲတွင် အားသာချက်ရှိစေမည်။

အခြားတစ်ဖက်တွင် နတ်ဘုရားများထံမှာလည်း ကိုယ်ပိုင်တန်ပြန်တိုက်ခိုက်မှုများ ရှိသည်။ ၎င်းတို့၏ မူလရည်ရွယ်ချက်က နတ်ဘုရားအရှင်သခင်၏ အားသာချက်များကို ပိုပြီးတောင့်တင်းခိုင်မာစေရန် ဖြစ်ပြီး သတ်မှတ်ထားသော ဧရိယာများထဲမှ ဒြပ်နှောများကို လုံခြုံစေရန် ဖြစ်သည်။ တစ်ချိန်တည်းမှာ ၎င်းတို့က ကျင့်ကြံသူများ၏ တာအိုအလံတိုင် လွှင့်ထူခြင်းကို ကာကွယ်တားဆီးရပြီး သူတို့၏ ကျူးကျော်ဝင်ရောက်လာမှုကို ချေမှုန်းပစ်ရသည်။ ထို့ပြင် ၎င်းတို့က ဒြပ်နှောများကို စစ်မြေပြင်တစ်လျှောက် ပျံ့နှံ့သွားစေရန်လည်း ဆောင်ရွက်ကြရသည်။

အကယ်၍ တစ်စုံတစ်ယောက်ကသာ နယ်စပ်ဒေသကို အပေါ်စီးမှ ငုံ့ကြည့်မည်ဆိုလျှင် စစ်မြေပြင်ပေါ်မှာ အဖြူရောင်အစက်များနှင့် အနက်ရောင်အစက်များဖြင့် ပြည့်နှက်နေကြောင်း မြင်ရလိမ့်မည်။

အနက်ရောင်အစက်များက ဒြပ်နှောများ ဖြစ်သည်။

အဖြူရောင်အစက်များသည်တော့ အင်မော်တယ်စွမ်းအင် ဖြစ်သည်။

ယင်းက အဖြူအနက်ပန်းချီကားတစ်ချပ်နှင့် ဆင်တူသည်။ ပန်းချီကားထဲမှ အစက်များက အချိန်တိုင်း ရွေ့လျားနေကြပြီး နယ်မြေတစ်လက်မစီတိုင်းအတွက် တိုက်ခိုက်နေကြသည်။

ယင်းက နတ်ဘုရားများနှင့် အင်မော်တယ်များကြားမှ တိုက်ပွဲ ဖြစ်သည်။

အရှင်သခင်များကြားမှ တိုက်ပွဲက အရှိန်အဟုန်ကို စုစည်းစေသည်။ သူတို့ထံမှ လှုပ်ရှားမှုတိုင်းက အောက်ဘက်မှ စစ်မြေပြင်အပေါ် လွှမ်းမိုးသက်ရောက်မှုရှိသည်။ မြေပြင်ပေါ်တွင်တော့ စစ်တပ်များက သူတို့၏ သက်ဆိုင်ရာအရှင်သခင်များအတွက် တိုက်ခိုက်ပေးနေကြသည်။

သို့ဖြစ်၍ စစ်ပွဲက အလွန်ပြင်းထန်သည်။

သေကြေပျက်စီးမှုက နေရာတိုင်းမှာ ရှိသည်။

စစ်ပွဲတွင် အားနည်းသူများက အားကြီးသူများဖြင့် မတွေ့ဆုံရန် မည်သို့မှ မဖြစ်နိုင်ပေ။

ဤအခိုက်အတန့်မှာ စကြာဝဠာအမြောက်အများအထိ ဖြန့်ကြားထားသော စစ်မြေပြင်ပေါ်၌ ကျင့်ကြံသူများ၏ ဧရိယာအနောက်ဘက်ခြမ်းတွင် ရိက္ခာထိန်းသိမ်းသူဌာနမှ အဖွဲ့တစ်ရာကျော်က တစ်ဖွဲ့ပြီးတစ်ဖွဲ့ တည်နေရာပြောင်းရွှေ့လာကြသည်။ သူတို့ထဲတွင် ရိက္ခာထိန်းသိမ်းသူကြယ်ဂြိုလ်ပေါ်မှာ ကြယ်တာရာစက်ဝန်း၊ ရွှီချင်းနှင့် ပဋိပက္ခဖြစ်ခဲ့သော အဖွဲ့လည်း ပါဝင်သည်။

သူတို့အဖွဲ့ ထွက်ပေါ်လာသည်နှင့်ချက်ချင်း သူတို့၏ အမူအရာက တည်ကြည်လေးနက်သွားသည်။ ဤတည်နေရာပြောင်းရွှေ့ခြင်းဧရိယာထဲမှ အစောင့်စစ်သည်တော်များ၏ အေးစက်စက် အကြည့်အောက်မှာ သူတို့က အဝေးသို့ မြန်မြန်သွက်သွက် ထွက်ခွာသွားကြသည်။

ရိက္ခာထိန်းသိမ်းသူအဖြစ်မှ ပို့ဆောင်ရေးသံတမန်အဖြစ် တာဝန်လွှဲပြောင်းခံလိုက်ရသော ကျင့်ကြံသူအားလုံးက ဤနေရာသို့ ရောက်လာကြရသည်။ သူတို့အားလုံးဆီမှာ တာဝန်တစ်ခုတည်းသာ ရှိသည်။ ယင်းက အဖွဲ့ငယ်များအဖြစ် ခွဲထွက်ပြီး စစ်မြေပြင်ဆီသို့ အမြန်ဆုံး ရိက္ခာပို့ဆောင်ပေးရန် ဖြစ်သည်။

သူတို့ပို့ဆောင်ပေးရမည့် ဦးတည်ရာက ဘယ်တောင်ပံစစ်ပွဲဇုန် ဖြစ်သည်။

ထိုနေရာက လက်တလောမှာ မူလအနှစ်သာရကို အရေးတကြီး လိုအပ်နေသည်။

တည်နေရာပြောင်းရွှေ့ခြင်းအလင်းက ပျောက်ကွယ်သွားသည့်အခါ ရွှီချင်း၏ အဖွဲ့သည်လည်း ရောက်ရှိလာသည်။

သူတို့က စည်းချအစီအရင်စင်မြင့်ပေါ်မှာ ထွက်ပေါ်လာသည်နှင့်ချက်ချင်း မရင်းနှီးသော ကြယ်တာရာကောင်းကင်ကို မြင်တွေ့သွားကြသည်။ ထို့အတူ အရိုးခိုက်ခိုက်တုန်စေမည့် ဖိအားနှင့် ပါးလွှာသော အင်မော်တယ်စွမ်းအင်ကို သူတို့အာရုံခံမိသွားကြသည်။ ထို့ပြင် ဟင်းလင်းပြင်ထဲမှာ ဒြပ်နှောတချို့က မထင်မရှား လွင့်မျောနေကြောင်း သူတို့သတိထားမိသွားကြသည်။

ယင်းက တတ်လှမ်းသူအများအပြားကို စိတ်မသက်မသာ ခံစားမိစေသည်။

သို့တိုင် စစ်မြေပြင်က သူတို့နှင့် အလွန်ဝေးကွာနေဆဲပင်။

သူတို့၏ ဘဝတွင် တိုက်ပွဲပေါင်းများစွာကို ရင်ဆိုင်ကျော်လွှားခဲ့ဖူးသော်လည်း သူတို့ထဲမှ အများစုက စစ်ပွဲမှာ မပါဝင်ဖူးကြချေ။

အဝေးတွင် မကြာခဏ ထွက်ပေါ်နေသော ပေါက်ကွဲသံများ၊ စကြာဝဠာအများအပြားကို တုန်ယင်သွားစေမည့် အော်သံနက်ကြီးများ၊ အရပ်မျက်နှာတိုင်းတွင် ဖြစ်ပေါ်နေသော လေဟာနယ်ပုံပျက်တွန့်လိမ်ခြင်းနှင့် မရေမတွက်နိုင်သော သေဆုံးမှုများမှ ဖွဲ့စည်းသွားသော အေးစက်စက်အရှိန်အဝါက သူတို့၏ စိတ်အာရုံများထဲမှာ ပုံရိပ်ပြန်နေသည်။

ယင်းတို့က တတ်လှမ်းသူအများစု၏ စိတ်ဝိညာဉ်ကို ကစဉ့်ကလျား ဖြစ်စေသည်။ ထို့နောက် သူတို့က သူတို့၏ ဘေးပတ်ဝန်းကျင်ကို စူးစမ်းလေ့လာလိုက်ကြသည်။

သို့သော်လည်း သူတို့က ပတ်ဝန်းကျင်အသစ်ကို အသေးစိတ် မစူးစမ်းနိုင်ခင် နက်ရှိုင်းသော အော်သံက အဝေး၌ ဤဧရိယာကို စောင့်ကြပ်ပေးနေသော စစ်တပ်ထံမှ ရုတ်တရက် ပျံ့လွင့်လာသည်။

“ မင်းတို့တွေ… မူလအနှစ်သာရကို မြန်မြန် သွားပို့ဆောင်ပေးရမယ် ”

ထိုအော်သံက မိုးခြိမ်းသံထက် သာလွန်ပြီး လူတိုင်း၏ စိတ်ထဲမှာ ပေါက်ကွဲသွားသည်။

ထိုအရှိန်အဝါထဲမှာ လွှမ်းမိုးဖိနှိပ်သော စိတ်ဆန္ဒပါဝင်သည်။ ဤသည်မှာ ထိုအော်သံက အရာအားလုံးကို ဖျက်ဆီးပစ်နိုင်သော မုန်တိုင်းအဖြစ် ပြောင်းလဲသွားသည့်အလားပင်။

ယင်းက လူတိုင်း၏ အမူအရာကို နောက်တစ်ကြိမ် ပြောင်းလဲသွားစေသည်။

အဘယ့်ကြောင့်ဆိုသော် ထိုအော်သံက အဆင့်နိမ့်အင်မော်တယ်တစ်ပါးထံမှ ဖြစ်သည်။

ရွှီချင်းက မျက်မှောင်ကြုတ်လိုက်သည်။ သူက စစ်ပွဲနှင့် မရင်းနှီးသောလူ မဟုတ်ပေ။ သူက ကြယ်တာရာစက်ဝန်းအဆင့် စစ်ပွဲမျိုးမှာ တစ်ခါမှမပါဝင်ဖူးသော်လည်း ဤအခိုက်အတန့်မှာ သူ၏ စိတ်အခြေအနေက တခြားလူများထက် အများကြီး သာလွန်သည်။

သို့ဖြစ်၍ သူက ခန္ဓာကိုယ်ကို တစ်ချက်လှုပ်ရှားလိုက်ပြီး အပြင်သို့ ပျံသန်းသွားသည်။

သူ့အနောက်မှ ကျင့်ကြံသူများသည်လည်း ချက်ချင်း ပျံသန်းလိုက်ကြပြီး ရွှီချင်း၏ အနောက်သို့ လိုက်သွားကြသည်။

သူတို့က စစ်မြေပြင်နှင့် ပိုပြီးနီးကပ်လာပြီး အန္တရာယ်များသော ပတ်ဝန်းကျင်ထဲသို့ ဝင်ရောက်သွားရသည့်အခါ သူတို့အဖွဲ့၏ စည်းလုံးညီညွတ်မှုက ပိုပြီးထင်ရှားလာသည်။

ယင်းက လူသားသဘာဝ၏ ပုံမှန်တုံ့ပြန်မှုသာ ဖြစ်သည်။

မည်သို့ဖြစ်ပါစေ ရွှီချင်း၏ တိုက်ပွဲစွမ်းအားက သူတို့အဖွဲ့ထဲမှာ အသန်မာဆုံးဖြစ်ပြီး သူ၏ သရုပ်အဆင့်အတန်းက ထူးခြားသည်။ သို့ဖြစ်၍ ရွှီချင်းနှင့် နီးကပ်စွာ ရှိနေခြင်းက စစ်မြေပြင်မှာ သူတို့အသက်ရှင်နိုင်မည့် အကြီးမားဆုံး အခွင့်အရေးဖြစ်သည်။

သို့သော်လည်း ရွှီချင်းက စိတ်ပျော်ရွှင်မနေပေ။

သူက မြန်ဆန်စွာ ပျံသန်းနေရင်း သူ၏ ဘေးပတ်ဝန်းကျင်ကို အမြဲမပြတ် အာရုံခံနေသည်။

သူက ဒြပ်နှောများကို တခြားလူများထက် ပိုပြီးနားလည်သည်။ သို့ဖြစ်၍ အရှေ့သို့ သူပျံသန်းသွားနေစဉ် ဤဧရိယာထဲမှ ဒြပ်နှောများက တဖြည်းဖြည်း ပိုပြီးသိပ်သည်းလာနေကြောင်း အာရုံခံမိသွားသည်။

‘ တကယ်လို့ သူတို့က မူလအနှစ်သာရကို အရေးတကြီး လိုအပ်နေတယ်ဆိုရင် တည်နေရာပြောင်းရွှေ့ခြင်းအစီအရင်နဲ့ ပို့ဆောင်တာပဲဖြစ်ဖြစ် ဒါမှမဟုတ် ပညာရှင်ကျင့်ကြံသူတွေကို ပို့ဆောင်ခိုင်းတာပဲဖြစ်ဖြစ် လုပ်လို့ရတယ်… အဲ့ဒါက ပိုပြီးအဆင်ပြေချောမွေ့ပြီး အချိန်ကုန်သက်သာလိမ့်မယ် ’

‘ ဘာလို့ သူတို့က စစ်မြေပြင်ဆီ တစ်ခါမှမရောက်ဖူးတဲ့ လူတွေကို ပို့ဆောင်ခိုင်းရတာလဲ ’

ဤသို့လာရာ လမ်းတစ်လျှောက်တွင် ထိုသံသယက ရွှီချင်း၏ စိတ်ထဲမှာ အမြဲရှိနေသည်။

ယခု သူက စစ်မြေပြင်ပေါ်မှာ ရှိနေပြီး ဤနေရာ၌ လွင့်မျောနေသော ဒြပ်နှောများက ပိုပြီးသိပ်သည်းလာနေသည့်အခါ သူ၏ စိတ်ထဲမှ ထိုသံသယက ပိုပြီးကြီးမားလာသည်။

မကြာမီ ဝေဝါးသော ခန့်မှန်းမှုတစ်ခုက ထွက်ပေါ်လာသည်။

ထိုခန့်မှန်းမှု ထွက်ပေါ်လာသည်နှင့်ချက်ချင်း လေခွင်းသံများက ရွှီချင်း၏ အနောက်မှ ပျံ့လွင့်လာသည်။ ကြယ်တာရာစက်ဝန်း၊ ကျိုးကျန်းလီ၊ ရှဲလင်းဇီ၊ ယွင်ရှန်းစုနှင့် တခြားလူများက ရွှီချင်းဆီသို့ တန်းမတ်စွာ ပျံသန်းလာကြသည်။

ရွှီချင်းက တစ်ခဏ ရပ်လိုက်သည်။ သူတို့ကို သူ့အား လိုက်မီသွားစေပြီးနောက် ရွှီချင်းက မျက်မှောင်ကြုတ်လိုက်ပြီး သူတို့အားလုံးကို တည်ကြည်လေးနက်စွာ ကြည့်လိုက်သည်။

ကြယ်တာရာစက်ဝန်းက မျက်နှာတည်ကြည်သွားပြီး ချက်ချင်း အသံပို့လွှတ်လိုက်သည်။

“ ရွှီချင်း… ဒီနေရာရဲ့ အစီအစဉ်က ပြိုကွဲသွားနေတယ်လို့ ငါ့အာဏာစက်က အာရုံခံမိတယ်… ဖရိုဖရဲခံစားမှုက တဖြည်းဖြည်း ပိုအားကောင်းလာတယ်… တစ်စုံတစ်ခု လွဲမှားနေတယ်လို့ ငါထင်တယ် ”

ရှဲလင်းဇီက နှုတ်ခမ်းသပ်လိုက်ပြီး အသံပို့လွှတ်လိုက်သည်။

“ ငါက မင်းတို့နဲ့ မတူဘူးဆိုတာ မင်းတို့သိပြီးသားဖြစ်မှာပါ… ငါက အာဏာစက်ကို ကိုယ်တိုင်မဆင်ခြင်နိုင်ဘူး… ဒါပေမဲ့ ငါ့မှာ တမူထူးခြားတဲ့ အာဏာစက်ဓမ္မရတနာတစ်ခု ရှိတယ်… ငါ့ရဲ့ ဓားကျိုးက စိတ်လှုပ်ရှားမှုကို ထုတ်လွှတ်နိုင်တယ်… ဒီဓားကျိုးအပေါ် ငါ့ရဲ့ နားလည်မှုအရဆိုရင် သေခြင်းရှင်ခြင်းအခြေအနေမျိုးနဲ့ ငါတွေ့ကြုံရတဲ့အခါတိုင်း ဓားကျိုးက အဲ့လိုလုပ်လိမ့်မယ် ”

“ အခု… ဓားကျိုးက တစ်ခါမှမဖြစ်ဖူးတဲ့ စိတ်လှုပ်ရှားမှုကို ထုတ်လွှတ်လိုက်တယ် ”

ဘေးမှ ကျိုးကျန်းလီသည်လည်း တည်ကြည်လေးနက်သော အမူအရာဖြင့် ရှိနေသည်။ သူက ကြယ်တာရာစက်ဝန်းနှင့် ရှဲလင်းဇီ၏ စကားများကို နားထောင်ပြီးနောက် ရွှီချင်းကို ကြည့်လိုက်ပြီး ရိုသေလေးစားစွာ ပြောသည်။

“ အရှင်… ဒီနေရာကို ငါတို့ရောက်လာတာက ယုတ္တိမရှိပါဘူး… ဒီတော့ ငါတစ်ခုခုကို ခန့်မှန်းမိထားပါတယ်… ”

“ ဖြစ်နိုင်တာက ငါတို့က… ”

ကျိုးကျန်းလီ၏ အကြည့်က လူတိုင်းပေါ်သို့ ဖြတ်သန်းသွားသည်။

“ … ငါးစာတွေပါ ”

“ ငါတို့တစ်ဖွဲ့တည်း ပစ်မှတ်ထားခံရတာ မဟုတ်နိုင်ပါဘူး… ဒီကိုရောက်လာကြတဲ့ ပို့ဆောင်ရေးအဖွဲ့တွေအားလုံး ပစ်မှတ်ထားခံရတာပါ… ငါတို့သယ်ဆောင်ထားတဲ့ မူလအနှစ်သာရက… ငါးစာဖြစ်ပါတယ် ”

ကျိုးကျန်းလီ၏ စကားဆုံးသွားသည်နှင့် လူတိုင်းက အတွေးနက်သွားကြသည်။

အနက်ရောင်အလင်းက ရွှီချင်း၏ မျက်လုံးထဲမှာ ထွက်ပေါ်လာသည်။ အစောနက သူ၏ စိတ်ထဲမှာ ထွက်ပေါ်လာသော ခန့်မှန်းမှုသည်လည်း ထိုအတိုင်းဖြစ်သည်။

“ ကျင့်ကြံသူစစ်တပ်တွေ လက်ရှိပိုင်ဆိုင်ထားတဲ့ ဒီဧရိယာထဲမှာ ငါတို့ကို ငါးစာအဖြစ် စေလွှတ်လိုက်တယ်… ဆိုလိုတာက… ”

ရွှီချင်းက ဖြည်းညင်းစွာ ပြောသည်။

သူ၏ အသံထွက်ပေါ်လာပြီးနောက် ယွင်ရှန်းစုက နူးညံ့စွာ ပြောသည်။

“ ဆိုလိုတာက ဒီဧရိယာက ပြောင်းလဲတော့မယ် ”

“ ဒါကြောင့် သူတို့က ဒီစစ်ပွဲဇုန်ထဲမှာ ပုန်းအောင်းနေတဲ့ နတ်ဘုရားတွေကို ကြိုမျှားခေါ်ထုတ်ဖို့ ငါတို့ကို ငါးစာအဖြစ် ဆောင်ရွက်ခိုင်းတာပဲ… ဒါမှ ဒီဧရိယာပြောင်းလဲသွားတဲ့နောက် ငါတို့ဘက်က အခြေအနေကို ထိန်းချုပ်ဖို့ ပိုပြီးအခွင့်အရေးများလာလိမ့်မယ် ”