နတ်ဘုရားကို သုတ်သင်ခြင်း

နောက်အခိုက်အတန့်မှာ အထွတ်အထိပ် နတ်ဘုရားယဇ်ပလ္လင်အဆင့် နတ်ဘုရားနှစ်ပါး၏ အနန္တအသိဉာဏ်က ၎င်းတို့၏ နတ်ဘုရားအစွမ်းနှင့် ပေါင်းစပ်သွားပြီး ပေါ်လျှိုးလာသည်။ ယင်းက လွှမ်းမိုးဖိနှိပ်သော အင်အားနှင့်အတူ အထွတ်အထိပ်ဖိအားကို သယ်ဆောင်လျက် သဏ္ဍာန်မဲ့အလင်းတစ်ခုအဖြစ် ပြောင်းလဲသွားသည်။

ထို့နောက် သဏ္ဍာန်မဲ့အလင်းက ရွှီချင်းကို တိုက်ရိုက် လွှမ်းခြုံသွားသည်။

နတ်ဘုရားအစွမ်းက ထွက်ပေါ်လာသည်။

အနန္တအသိဉာဏ်က အသက်ဝင်လာသည်။

ရွှီချင်း၏ တစ်ကိုယ်လုံးက တုန်ယင်သွားသည်။ သူ့ခန္ဓာကိုယ်၏ အတွင်းနှင့်အပြင်က ဗလာကျင်းသွားကြောင်း သူခံစားမိသွားသည်။ သူ၏ ရုပ်ခန္ဓာကိုယ်သည်သာ ဖော်ထုတ်ခံလိုက်ရခြင်း မဟုတ်ပေ။ သူ၏ အင်မော်တယ်သန္ဓေသားလောင်းသည်ပင် ထွင်းဖောက်မြင်နိုင်သည်အထိ ကြည်လင်လာသည်။ သူ၏ ဝိညာဉ်သည်လည်း နတ်ဘုရားနှစ်ပါး၏ အကြည့်အောက်မှာ ကိုယ့်ကိုယ်ကိုယ် မဖုံးကွယ်နိုင်တော့ပေ။

သူ၏ အတိတ်သည်ပင် ၎င်းတို့၏ အကြည့်ရှေ့မှာ ထွက်ပေါ်လာသည်။

သို့ဖြစ်၍ ၎င်းတို့၏ ဘေးပတ်ပတ်လည်၌ ဖရိုဖရဲတိုက်ပွဲက ဆက်လက်ဖြစ်ပွားနေစဉ် ဤနေရာက နယ်နိမိတ်မျဉ်းတစ်ခု ရေးဆွဲခံလိုက်ရသည့်အလား အပြင်လောကမှ သီးခြားခွဲထုတ်ခံလိုက်ရသည်။ ထို့ကြောင့် လူတိုင်း၏ လှုပ်ရှားမှုများက နှေးကွေးသွားဟန် ရသည်။ ထိုမျှသာ မဟုတ်ပေ။ လောက၏ လည်ပတ်မှုနှင့် ကြယ်ဂြိုလ်များ၏ ရွေ့လျားမှုသည်ပင် ဤအခိုက်အတန့်မှာ နှေးကွေးသွားသည်။

အထွတ်အထိပ် နတ်ဘုရားယဇ်ပလ္လင်အဆင့် နတ်ဘုရားနှစ်ပါး၏ အနန္တအသိဉာဏ်က ရွှီချင်း၏ အမြူတေကို တစ်လွှာပြီးတစ်လွှာ ဆွဲခွာလိုက်သည်။

၎င်းတို့က ရွှီချင်း၏ ပစ္စုပ္ပန်အခွံကို ဖယ်ခွာလိုက်ပြီး သူ၏ အတိတ်မှ အတွေးများနှင့် မှတ်ဉာဏ်များကို ဖော်ထုတ်လိုက်သည်။

၎င်းတို့က ရွှီချင်း၏ ဇစ်မြစ်ကို ရှင်းလင်းစွာ မြင်ချင်ကြသည်။ ထိုသို့လုပ်ဆောင်နိုင်သည်နှင့် ၎င်းတို့က ရွှီချင်းနှင့်ပတ်သက်သော အရာမှန်သမျှကို သိရှိသွားကြလိမ့်မည်။ ထိုအခါကျလျှင် ရွှီချင်းက ၎င်းတို့၏ အရှေ့မှာ ခုခံနိုင်စွမ်းကင်းမဲ့သွားလိမ့်မည်။

ယင်းက နတ်ဘုရားများ၏ အနန္တအသိဉာဏ် ဖြစ်သည်။

ထို့ပြင် ယင်းက အထွတ်အထိပ် နတ်ဘုရားယဇ်ပလ္လင်အဆင့် နတ်ဘုရားနှစ်ပါးထံမှ တစ်ပြိုင်နက် ထွက်ပေါ်လာခြင်း ဖြစ်သည်။ သို့ဖြစ်၍ ယင်းက ရွှီချင်းအတွက် ခုခံရန် အလွန်ခက်ခဲသည်။

ထို့ကြောင့် နောက်ဆုံးမှာတော့ အထွတ်အထိပ် နတ်ဘုရားယဇ်ပလ္လင်အဆင့် နတ်ဘုရားနှစ်ပါးက ရွှီချင်း၏ ဇစ်မြစ်ကို အောင်မြင်စွာ မြင်တွေ့နိုင်သွားကြသည်။

၎င်းတို့က ရွှီချင်း၏ မှန်သားသဖွယ် ကြည်လင်သော ခန္ဓာကိုယ်နှင့် ဝိညာဉ်မှတဆင့် ဝမ်ကူးကုန်းမြေကို မြင်တွေ့သွားကြသည်။

ထိုလောကက ၎င်းတို့မရင်းနှီးသောအရာ ဖြစ်သည်။ ၎င်းတို့က ကျင့်ကြံသူများနှင့် နတ်ဘုရားများကို မြင်တွေ့သွားကြသည်။ တစ်ချိန်တည်းမှာ ၎င်းတို့က ဖုန်းဟိုင်ဒေသငယ်နှင့် မြေအောက်လှိုင်ဂူကို မြင်တွေ့သွားကြသည်။

မြေအောက်လှိုင်ဂူထဲတွင် ဖီးနစ်နန်းဆောင်တစ်ခု ရှိသည်။ ဖီးနစ်နန်းဆောင်၏ အရှေ့တွင် ပုဂ္ဂိုလ်တစ်ဦးက တင်ပျဉ်ခွေထိုင်နေပြီး မွန်မြတ်သန့်စင်သော နတ်ဘုရားအရှိန်အဝါကို ထုတ်လွှတ်နေသည်။

၎င်းက ရွှီချင်းနှင့် ဇစ်မြစ်တူညီသော နတ်ဘုရားတစ်ပါး ဖြစ်သည်။

“ ဇစ်မြစ်က အဲ့ဒီမှာလား ”

ကြယ်တာရာကောင်းကင်မှ စစ်မြေပြင်ပေါ်တွင် အထွတ်အထိပ် နတ်ဘုရားယဇ်ပလ္လင်အဆင့် နတ်ဘုရားနှစ်ပါးက နက်နဲစွာ တွေးတောလိုက်ကြသည်။ တစ်ချိန်တည်းမှာ ဖော်မပြနိုင်သော အန္တရာယ်ခံစားမှုက ၎င်းတို့၏ အသိစိတ်ထဲမှာ ထွက်ပေါ်လာသည်။

“ ဒီနတ်ဘုရားက… တစ်ခုခု လွဲမှားနေတယ် ”

အထွတ်အထိပ် နတ်ဘုရားယဇ်ပလ္လင်အဆင့် နတ်ဘုရားနှစ်ပါး၏ စိတ်ဝိညာဉ်က ပရမ်းပတာ တုန်ယင်သွားသည်။ မရင်းနှီးသော ကြယ်တာရာစက်ဝန်း၊ မရင်းနှီးသော လောကနှင့် တင်ပျဉ်ခွေထိုင်နေသော ထိုနတ်ဘုရားက ၎င်းတို့ကို တုန်လှုပ်ချောက်ချားစေပြီး အန္တရာယ်ကို ခံစားမိစေသည်။

အထူးသဖြင့် ထိုနတ်ဘုရား၏ အနောက်မှ အမှောင်ထုကို ၎င်းတို့ မြင်လိုက်ရသည့်အခါ ဖြစ်သည်။

ယင်းက အဆုံးမဲ့သော အမှောင်ထုဖြစ်သည်။

ထိုအမှောင်ထုက အန္တရာယ်ခံစားမှုကို ပိုပြီးအားကောင်းလာစေသည်။

အဘယ့်ကြောင့်ဆိုသော် အမှောင်ထုထဲတွင် ၎င်းတို့၏ အနန္တအသိဉာဏ်က တားမြစ်ခံလိုက်ရသည်။

သို့ဖြစ်၍ နတ်ဘုရားနှစ်ပါးက ထိတ်လန့်ချောက်ချားသွားကြပြီး ၎င်းတို့၏ အနန္တအသိဉာဏ်ကို ချက်ချင်း ပြန်ရုပ်သိမ်းလိုက်ကြသည်။

သို့သော်လည်း ထိုအခိုက်အတန့်မှာ တင်ပျဉ်ခွေထိုင်နေသော နတ်ဘုရားက ရုတ်တရက် မျက်လုံးဖွင့်လိုက်သည်။

ရွှေရောင်အလင်းက ၎င်း၏ မျက်လုံးထဲမှာ ထွန်းလင်းသွားသည်။

ထို့နောက် နတ်ဘုရားအသံက ကံကြမ္မာနတ်ဘုရားအခွင့်အာဏာ၏ ထူးဆန်းသော နည်းလမ်းဖြင့် နတ်ဘုရားယဇ်ပလ္လင်အဆင့် ထိုနတ်ဘုရားနှစ်ပါး၏ ဝိညာဉ်ထဲမှာ ပဲ့တင်ထပ်သွားသည်။

“ မင်းတို့က ငါ့ရဲ့ ဇစ်မြစ်ကို မြင်ချင်နေမှတော့… နီးနီးကပ်ကပ် ကြည့်သွားကြပါ ”

…..

နတ်ဘုရားများက အနန္တတန်ခိုးရှင်များ ဖြစ်ကြသည်။

သို့သော်လည်း အနန္တဟူသော စကားလုံးမှာ ကန့်သတ်ချက်များ ရှိသည်။ အတိုင်းအတာတစ်ခုထိဆိုရသော် ယင်းက နတ်ဘုရားများအပေါ် အဆင့်မြင့်ကြယ်တာရာစက်ဝန်းများက ချီးမြှောက်ပေးထားသော အကာအကွယ်တစ်ခု ဖြစ်သည်။

ယင်းက ၎င်းတို့အား ပိုပြီးအဆင့်မြင့်သော သက်ရှိများထံမှ သက်ရောက်မှုကို ကာကွယ်ပေးလိမ့်မည်။

မည်သို့ဖြစ်ပါစေ အဆင့်ပိုမြင့်သော သက်ရှိများအပေါ် ၎င်းတို့၏ အနန္တအသိဉာဏ်က သက်ရောက်မှုမရှိပေ။ ၎င်းတို့က ထိုသက်ရှိများအကြောင်း မမြင်နိုင်သလို အာရုံမခံနိုင်ကြပေ။ ထို့အတူ ၎င်းတို့က ထိုသက်ရှိများကို နားမလည်နိုင်ကြပေ။

သေမျိုးများက နတ်ဘုရားများကို ကြည့်သည့်အခါ အမှောင်ထုချည်းကိုသာ မြင်ရလိမ့်မည်။

ထိုကဲ့သို့ပင် နတ်ဘုရားများက ၎င်းတို့ထက် အဆင့်ပိုမြင့်သော သက်ရှိများကို ကြည့်သည့်အခါ အဆုံးမဲ့သော အမှောင်ထုချည်းကိုသာ မြင်ရလိမ့်မည်။

သို့ဖြစ်လေရာ ၎င်းတို့က မည်သို့ကြောင့် အဆင့်ပိုမြင့်သော သက်ရှိများအကြောင်း နားလည်နိုင်မည်နည်း။

အမှောင်ထုထဲမှာ တစ်ချိန်လုံး ရှင်သန်နေထိုင်သူများသာလျှင် အမှောင်ထု၏ တစ်စိတ်တစ်ပိုင်း ဖြစ်လာပြီးနောက် အမှောင်ထု၏ ဇစ်မြစ်ကို မြင်နိုင်ကြလိမ့်မည်။ သို့ဖြစ်၍ ဝမ်ကူးကုန်းမြေထဲမှ လူတိုင်းသည် သူတို့ခေါင်းမော့လိုက်သည့်အခါ အမှောင်ထု၏ ဇစ်မြစ်ကို မြင်နိုင်ကြသည်။

ထိုသို့မဟုတ်ဘဲ အပြင်ဘက်မှ သက်ရှိများဆိုလျှင်တော့ ၎င်းတို့က ယင်းကို မြင်နိုင်ကြလိမ့်မည် မဟုတ်သလို မည်သည့်ကမ္မမှ ဖြစ်ပေါ်လာလိမ့်မည် မဟုတ်ချေ။

သို့ဖြစ်၍ သီအိုရီအရဆိုလျှင် အထွတ်အထိပ် နတ်ဘုရားယဇ်ပလ္လင်အဆင့် နတ်ဘုရားနှစ်ပါးက ၎င်းတို့၏ အနန္တအသိဉာဏ်ဖြင့် ရွှီချင်းကို ဖုံးလွှမ်းလိုက်ပြီး သူ၏ အတိတ်နှင့် ဇစ်မြစ်ကို ရှာဖွေမည်ဆိုလျှင်ပင် ၎င်းတို့က နတ်ဘုရားခန္ဓာကိုယ်၏ အပေါ်ယံကိုသာ မြင်တွေ့နိုင်ကြလိမ့်မည်။

နတ်ဘုရားခန္ဓာကိုယ်၏ ဇစ်မြစ်သည်တော့ အနန္တအသိဉာဏ်များအား တားမြစ်ပိတ်ဆို့ထားသော အဆုံးမဲ့အမှောင်ထုထဲမှာ ဆက်လက် ဖုံးကွယ်နေလိမ့်မည်။

သို့သော်လည်း…

အကယ်၍ တစ်စုံတစ်ယောက်က အမှောင်ထုထဲမှာ မီးထွန်းလိုက်မည်ဆိုလျှင်…

ဤအခိုက်အတန့်မှာ ရွှီချင်း၏ နတ်ဘုရားခန္ဓာကိုယ်က စကားပြောလိုက်ပြီး ကံကြမ္မာနတ်ဘုရားအခွင့်အာဏာက ပရမ်းပတာ လှိုင်းထသွားသည်နှင့်ချက်ချင်း ၎င်း၏ ကျောပေါ်မှ တိုတမ်ပုံရိပ်တစ်ခုက ရုတ်တရက် မီးထတောက်သွားသည်။

ထိုတိုတမ်က ဖယောင်းတိုင်တစ်တိုင် ဖြစ်သည်။

ဤအခိုက်အတန့်မှာ ဖယောင်းတိုင်က ရုတ်တရက် လောင်ကျွမ်းသွားသည်။

ဖယောင်းတိုင်၏ မီးအလင်းရောင်က လျှပ်တစ်ပြက်အတွင်းမှာ ရွှီချင်း၏ နတ်ဘုရားခန္ဓာကိုယ်ပေါ်မှ ပေါ်လျှိုးလာပြီး အပြင်ဘက်သို့ ပျံ့ပွားသွားသည်။ ယင်းက မြေအောက်လှိုင်ဂူတစ်ခုလုံးကို အလင်းပင်လယ်အဖြစ် ပြောင်းလဲသွားသည်။ ထို့နောက် မီးအလင်းရောင်က ဟင်းလင်းပြင်ကို ဖြတ်သန်းသွားပြီး ဝမ်ကူးကုန်းမြေကို ထွန်းလင်းသွားစေသည်။ ထိုအလင်းရောင်အောက်မှာ ၎င်း၏ အနောက်မှ အဆုံးမဲ့အမှောင်ထုက လင်းထိန်သွားသည်။

ထိုမျှသာ မဟုတ်ပေ။ ယင်းက အထွတ်အထိပ် နတ်ဘုရားယဇ်ပလ္လင်အဆင့် နတ်ဘုရားနှစ်ပါး၏ အနန္တအသိဉာဏ်ကို အတင်းအဓမ္မ ပြန်ဆွဲခေါ်လိုက်ပြီး ၎င်းအပေါ်သို့ နောက်တစ်ကြိမ် ကျရောက်လာစေသည်။

ယင်းက နတ်ဘုရားနှစ်ပါး၏ အနန္တအသိဉာဏ်ကို ၎င်း၏ ဇစ်မြစ်အား အတင်းအဓမ္မ ကြည့်ရှုစေသည်။

ယင်းက အစောနက ရွှီချင်းပြောခဲ့သည့်အတိုင်းပင်။

‘ မင်းတို့က ငါ့ရဲ့ ဇစ်မြစ်ကို မြင်ချင်နေမှတော့… နီးနီးကပ်ကပ် ကြည့်သွားကြပါ ’

အထွတ်အထိပ် နတ်ဘုရားယဇ်ပလ္လင်အဆင့် နတ်ဘုရားနှစ်ပါးက နှလုံးတုန်ယင်သွားကြသည်။ ၎င်းတို့၏ စိတ်ဝိညာဉ်က အဆုံးမဲ့သော အတိဒုက္ခကပ်ဘေးဖြင့် တွေ့ကြုံလိုက်ရသည့်အလား ဖရိုဖရဲသွားသည်။ ၎င်းတို့က ထိတ်လန့်ချောက်ချားနေစဉ် ပြိုင်ဘက်ကင်းသော အထွတ်အမြတ်တည်ရှိမှုဖြစ်သည့် နတ်ဘုရားမျက်နှာပျက်ကြီးက ၎င်းတို့၏ အနန္တအသိဉာဏ်ထဲမှာ ထွက်ပေါ်လာသည်။

ထိုထွက်ပေါ်မှုက ၎င်းတို့၏ အနန္တအသိဉာဏ်မှ အကာအကွယ်အလွှာများကို ချိုးဖြတ်သွားပြီး ကမ္မဆက်သွယ်မှုတစ်ခုကို ချက်ချင်း ဖန်တီးလိုက်သည်။

၎င်းတို့က အနန္တအသိဉာဏ်မှတဆင့် ပိုပြီးအဆင့်မြင့်သော တည်ရှိမှုတစ်ခုဖြင့် ချိတ်ဆက်သွားကြသည်။

ထိုတည်ရှိမှုက မျက်လုံးမှိတ်ထားသော်လည်း ၎င်းထံမှ ထုတ်လွှတ်နေသော နတ်ဘုရားအစွမ်းက ၎င်းတို့၏ ဘဝတစ်လျှောက်လုံးမှာ မြင်တွေ့ခဲ့ဖူးသော နတ်ဘုရားအားလုံးထက် သာလွန်သည်။

နားကွဲလုမတတ် အလွန်စူးရှသော အော်ဟစ်ညည်းညူသံက ၎င်းတို့၏ နတ်ဘုရားဝိညာဉ်ထဲမှ ထွက်ပေါ်လာသည်။

“ အဲ့ဒါ… အဲ့ဒါက… ”

၎င်းတို့၏ နတ်ဘုရားအသွင်သဏ္ဍာန်က ပုံပျက်တွန့်လိမ်သွားစဉ် ၎င်းတို့၏ နတ်ဘုရားဝိညာဉ်က အပိုင်းပိုင်းအစစ အက်ကွဲသွားသည်။ ၎င်းတို့၏ နတ်ဘုရားအခွင့်အာဏာများသည်လည်း စတင်အရည်ပျော်သွားပြီး ဗလာနတ္ထိအဖြစ် ပြောင်းလဲသွားသည်။

၎င်းတို့၏ စိတ်ခံစားချက်ကင်းမဲ့မှုက ရူးသွပ်မှုအဖြစ် ပြောင်းလဲသွားသည်။

ထိုအခိုက်အတန့်မှာ ၎င်းတို့၏ ပင်ကိုယ်ဗီဇတုံ့ပြန်မှုက ထွက်ပေါ်လာသည်။ ၎င်းတို့က အကြောင်းအကျိုးအားလုံးကို စွန့်လွှတ်လိုက်ပြီး ကြောက်စရာကောင်းသော ဤနေရာမှ အမြန်ဆုံး ထွက်ပြေးရန် မည်သည့်တန်ကြေးကိုမဆို ပေးဆပ်လိုက်ကြသည်။

၎င်းတို့က ၎င်းတို့၏ နတ်ဘုရားအနှစ်သာရကိုပင် လောင်ကျွမ်းလိုက်ကြပြီး ဤနေရာနှင့် ချိတ်ဆက်နေသော ၎င်းတို့၏ ကမ္မချည်မျှင်ကို အကြမ်းပတမ်း ဖြတ်တောက်လိုက်ကြသည်။

အဘယ့်ကြောင့်ဆိုသော် ဤနေရာမှာ ဆက်နေလျှင် ဖြစ်လာမည့်အကျိုးဆက်ကို ၎င်းတို့ ရှင်းလင်းစွာ သိထားကြသည်။ ၎င်းတို့က နတ်ဘုရားမျက်နှာပျက်ကြီး မျက်လုံးဖွင့်လှစ်မည်ကို ခွင့်မပြုနိုင်ပေ။

ဤအခိုက်အတန့်မှာ နတ်ဘုရားမျက်နှာပျက်ကြီး၏ မျက်တောင်က လှုပ်ခါသွားသည်။ ဤသည်မှာ ၎င်းက မျက်လုံးဖွင့်လှစ်တော့မည့်အလားပင်။

ရလဒ်အနေဖြင့် အမှတ်လေးကြယ်တာရာစက်ဝန်းမှ အထွတ်အထိပ် နတ်ဘုရားယဇ်ပလ္လင်အဆင့် နတ်ဘုရားနှစ်ပါးက ပိုပြီးရူးသွပ်သွားကြသည်။

၎င်းတို့က ၎င်းတို့၏ နတ်ဘုရားအခွင့်အာဏာများကို ဖျက်ဆီးလိုက်ပြီး ဝိညာဉ်ကို ဖြတ်တောက်လိုက်မှသာ ဤနေရာသို့ ဆင်းသက်လာသော ၎င်းတို့၏ နတ်ဘုရားစိတ်အာရုံက စတင်အက်ကွဲသွားသည်။

သို့သော်လည်း ၎င်းတို့၏ စိတ်အာရုံက ပြတ်တောက်သွားတော့မည့်အချိန်…

ရွှေရောင်အလင်းတန်းက ရွှီချင်း၏ နတ်ဘုရားခန္ဓာကိုယ်၏ နဖူးထဲမှ ထွန်းလင်းတောက်ပလာသည်။ ထို့နောက် ရွှေရောင်ဓားမြှောင်တစ်လက်က အပြင်သို့ ပျံသန်းထွက်သွားသည်။

ထိုဓားမြှောင်ထဲမှာ ကံကြမ္မာနတ်ဘုရားအခွင့်အာဏာ ပါဝင်သည်။

ဓားမြှောင်က ပျံသန်းထွက်လာသည်နှင့်ချက်ချင်း အမြန်အက်ကွဲနေသော နတ်ဘုရားစိတ်အာရုံတစ်ခုဆီသို့ ဦးတည်သွားပြီး ပိုင်းဖြတ်လိုက်သည်။

ယင်းက ရိုးရှင်းသော ပိုင်းဖြတ်မှုတစ်ခုမျှသာ ဖြစ်သော်လည်း ဓားမြှောင်၏ အစွမ်းက အပြည့်အဝ ထွက်ပေါ်လာသည်။

ကံကြမ္မာနတ်ဘုရားအခွင့်အာဏာ၏ အစွမ်းအောက်မှာ မရှောင်လွှဲနိုင်သော သေခြင်းတရားက စာမျက်နှာအသစ်တစ်ရွက်အဖြစ် ပြောင်းလဲသွားပြီး ၎င်း၏ မရေမတွက်နိုင်သော အနာဂတ်ဖြစ်နိုင်ခြေများထဲမှာ ထွက်ပေါ်လာသည်။ ထို့နောက် ဓားမြှောင်၏ လမ်းညွှန်မှုအောက်မှာ နတ်ဘုရားစိတ်အာရုံက စာမျက်နှာအသစ်ဖြင့် ပေါင်းစည်းသွားသည်။

လျှပ်တစ်ပြက်အတွင်းမှာ ထိုနတ်ဘုရားစိတ်အာရုံက ရုတ်တရက် ဖောင်းကြွလာပြီး ပျက်စီးနေခြင်းမှ ရပ်တန့်သွားသည်။ ရလဒ်အနေဖြင့် ၎င်းက ဤနေရာမှ မလွတ်မြောက်နိုင်တော့ပေ။

“ မင်း… ”

ဖော်မပြနိုင်သော အကြောက်တရားနှင့် ဒေါသစိတ် ကိန်းအောင်းနေသော အသံက ဟင်းလင်းပြင်ထဲမှာ ပဲ့တင်ထပ်သွားသည်။ နတ်ဘုရားစိတ်အာရုံတစ်ခုက အပြည့်အဝ ပျက်စီးသွားပြီး မည်သည့်သဲလွန်စမှ မကျန်ရစ်ဘဲ ဤနေရာမှ ပျောက်ကွယ်သွားစဉ် အခြားနတ်ဘုရားစိတ်အာရုံက ကျန်နေခဲ့သည်။

တစ်ချိန်တည်းမှာ ဝမ်းကူးကုန်းမြေ၏ ကောင်းကင်ပေါ်၌ မြင့်မြတ်ထည်ဝါစွာ တည်ရှိနေသော နတ်ဘုရားမျက်နှာပျက်ကြီးက ဖြည်းညင်းစွာ မျက်လုံးဖွင့်လှစ်လိုက်သည်။

ဖီးနစ်နန်းဆောင်၏ အပြင်ဘက်တွင် ရွှီချင်းက ခေါင်းငုံ့လိုက်ပြီး နူးညံ့စွာ ပြောသည်။

“ ဒီနတ်ဘုရားကို ရှေးဦးအပျက်အစီးဆီ ယဇ်ပူဇော်ပါတယ် ”

ထိုအခါ ကျန်နေခဲ့သော နတ်ဘုရားစိတ်အာရုံက နှလုံးကြေကွဲဖွယ်ကောင်းသော အော်ဟစ်ညည်းညူသံနှင့်အတူ ညှိုးနွမ်းခြောက်သွေ့သွားသည်။ အဆုံးမဲ့သော စိတ်ပျက်အားလျော့မှုသာ ကျန်ရှိတော့သည့်အခါ အငြိုးအတေးများနှင့် အမုန်တရားက ၎င်းကို အပြည့်အဝ ဖုံးလွှမ်းသွားသည်။

သို့ဖြစ်၍ ၎င်းက နောက်ဆုံးကြိုးစားမှုအနေဖြင့် ရွှီချင်းထံသို့ ရက်စက်ကြမ်းကြုတ်စွာ ခုန်အုပ်လိုက်သည်။

သို့သော်လည်း ၎င်းက အနားမရောက်ခင်မှာပင် ရွှေရောင်အလင်းတန်းအဖြစ် ပြောင်းလဲသွားပြီး မခုခံနိုင်သော ဆွဲငင်အားအောက်မှာ အပေါ်သို့ ပျံတတ်သွားသည်။ လျှပ်တစ်ပြက်အတွင်းမှာ ၎င်းက နတ်ဘုရားမျက်နှာပျက်ကြီး၏ ပါးစပ်ထဲသို့ ဝင်ရောက်သွားသည်။

ထို့နောက် နတ်ဘုရားမျက်နှာပျက်ကြီက မျက်လုံးမှိတ်လိုက်သည်။

ရွှီချင်းက ခေါင်းမော့လိုက်သည်။

“ စိတ်မကောင်းစရာပဲ… ငါ့ရဲ့ လက်ရှိစွမ်းအားက တစ်ယောက်ကိုပဲ ကျန်နေခဲ့အောင် လုပ်နိုင်တယ် ”

…..

အမှတ်ငါးကြယ်တာရာစက်ဝန်း၏ နယ်စပ်တွင်…

ဘယ်တောင်ပံစစ်ပွဲဇုန်၏ ရှေ့တန်းစစ်မြေပြင်နှင့် နီးကပ်နေသော အလယ်ပိုင်းဒေသကြီး၏ အစွန်အဖျားတွင်…

အော်ဟစ်ညည်းညူသံများက ကြယ်တာရာကောင်းကင်ထဲမှာ ပဲ့တင်ထပ်သွားသည်။

ဤအခိုက်အတန့်မှာ နတ်ဘုရားအားလုံးက ဝိညာဉ်တုန်လှုပ်စေမည့် မြင်ကွင်းတစ်ခုကို မြင်တွေ့သွားကြသည်။

အထွတ်အထိပ် နတ်ဘုရားယဇ်ပလ္လင်အဆင့် နတ်ဘုရားနှစ်ပါးထဲတွင် တစ်ပါး၏ ရွှေရောင်အလင်းက ချက်ချင်း ပျောက်ကွယ်သွားသည်။ တစ်ချိန်တည်းမှာ ၎င်း၏ ခန္ဓာကိုယ်က ဖယ်ရှားခံလိုက်ရသည့်အလား ပျောက်ကွယ်သွားသည်။

ပျောက်ကွယ်သွားသည်မှာ ၎င်း၏ နတ်ဘုရားခန္ဓာကိုယ်ချည်းသာ မဟုတ်ပေ။ ၎င်း၏ ဝိညာဉ်သည်လည်း ပျောက်ကွယ်သွားသည်။ ထို့ပြင် ၎င်း၏ စိတ်အာရုံနှင့် ၎င်းကို မြင်တွေ့ခဲ့ဖူးသော လူတိုင်း၏ မှတ်ဉာဏ်များထဲမှာပင် ၎င်း၏ တည်ရှိမှုက ပျောက်ကွယ်သွားသည်။

အတိတ်၊ ပစ္စုပ္ပန်နှင့် အနာဂတ်မှ ၎င်း၏ တည်ရှိမှုသဲလွန်စအားလုံးက ဤအခိုက်အတန့်မှာ အငွေ့ပျံသွားကြသည်။

အမှတ်လေးကြယ်တာရာစက်ဝန်းနှင့် အမှတ်ငါးကြယ်တာရာစက်ဝန်းထဲတွင် ၎င်းကို မြင်တွေ့ခဲ့ဖူးသော သက်ရှိအားလုံးက ၎င်းကို နောက်ထပ် မမှတ်မိကြတော့ပေ။

ဤသည်မှာ ၎င်းက မည်သည့်အခါကမှ တကယ် မတည်ရှိခဲ့သည့်အလားပင်။

ယင်းက အမှန်တကယ် သေဆုံးခြင်း ဖြစ်သည်။

၎င်းကို ကိုယ်တိုင်မြင်တွေ့ခဲ့ဖူးသော နတ်ဘုရားများနှင့် ဤနေရာမှာ ရှိနေကြသော တတ်လှမ်းသူများသည်ပင် ဤအခိုက်အတန့်မှာ ၎င်းနှင့်ပတ်သက်သော အရာအားလုံးကို မေ့သွားကြသည်။

အထွတ်အထိပ် နတ်ဘုရားယဇ်ပလ္လင်အဆင့် တခြားနတ်ဘုရားသည်တော့ ၎င်း၏ ခန္ဓာကိုယ်ပေါ်မှ နတ်ဘုရားအလင်းက ဖရိုဖရဲဖြစ်နေသည်။ အလင်းက မှိတ်တုတ်မှိတ်တုတ် လင်းလက်နေစဉ် ၎င်း၏ မျက်လုံးထဲ၌ အကြောက်တရားက ရှင်းလင်းစွာ ထွက်ပေါ်နေသည်။ ၎င်းက အမြန်အနောက်ဆုတ်သွားသည်။ ၎င်းက ဤနေရာမှ ထွက်သွားရန် ဟင်းလင်းပြင်ကို ဆုတ်ဖြဲလိုက်သည်။

အစောနက ၎င်း၏ ဘေးမှာ အဖော်တစ်ယောက်ရှိနေခဲ့ကြောင်းကို ၎င်းမမှတ်မိပေ။ ထို့အတူ ၎င်း၏ အနန္တအသိဉာဏ်ထဲမှာ မည်သည့်အရာကို မြင်တွေ့ခဲ့ကြောင်းကိုလည်း ၎င်းမမှတ်မိပေ။

သို့သော်လည်း ၎င်း၏ ပင်ကိုယ်ဗီဇတုံ့ပြန်မှုမှ ထုတ်လွှတ်နေသော သတိပေးမှုကြောင့် ၎င်းက တုံ့ဆိုင်းမနေဘဲ အမြန်ထွက်ပြေးသည်။

သို့သော်လည်း ရွှီချင်းက မှတ်မိသည်။

သူက အက်ကွဲကြောင်း၏ အပြင်ဘက်မှာ မတ်တတ်ရပ်နေလျက် ထွက်ပြေးရန် ကြိုးစားနေသော ထိုနတ်ဘုရားကို အေးစက်စက် စိုက်ကြည့်လိုက်သည်။

“ အားလုံးကို သတ်ပစ် ”

သူက စကားပြောလိုက်သည်နှင့်ချက်ချင်း သူတို့အဖွဲ့ ကြိုတင်စီစဉ်ထားသည့်အတိုင်း ဤနေရာမှ တတ်လှမ်းသူအားလုံးက သူတို့၏ အံ့ဖွယ်ကောင်းသော သတ်ဖြတ်ခြင်းစိတ်ဆန္ဒကို ချက်ချင်း ထုတ်လွှတ်လိုက်ကြသည်။

သူတို့ထဲမှ အများစုက နတ်ဘုရားများကို အကြင်နာမဲ့စွာ သုတ်သင်လိုက်ကြသည်။

ပင်လယ်ရေမှော်၏ ခန္ဓာကိုယ်က အရပ်ရှစ်မျက်နှာသို့ ရှည်ထွက်သွားကြသည်။ ၎င်း၏ ဧရာမအရွက်များက မဟာတံတိုင်းများသဖွယ် အချုပ်အနှောင်အလွှာများကို ဆက်တိုက် ဖွဲ့စည်းလိုက်ပြီး တိုက်ပွဲမြေပြင်၏ ဧရိယာကို ပိတ်လှောင်လိုက်သည်။ ယင်းကို တိုက်ပွဲမြေပြင်ကို အတွင်းနှင့်အပြင်ဟူ၍ နှစ်ပိုင်းကွဲသွားစေသည်။

အတွင်းပိုင်းထဲတွင် အထွတ်အထိပ် နတ်ဘုရားယဇ်ပလ္လင်အဆင့် နတ်ဘုရားက ပိတ်လှောင်ခံထားရစဉ် ကျန်နတ်ဘုရားများက အပြင်မှာ ရှိနေကြသည်။

ထို့နောက် ပင်လယ်ရေမှော်က အပြင်ဘက်မှာ ရှိနေကြသော တတ်လှမ်းသူများဖြင့် အတူတူပူးပေါင်းလိုက်ပြီး နတ်ဘုရားများကို တိုက်ခိုက်လိုက်သည်။

အချုပ်အနှောင်အလွှာများ၏ အတွင်းပိုင်းထဲတွင်တော့…

ယွင်ရှန်းစု၏ မျက်လုံးထဲတွင် အေးစက်စက်အလင်း ဖြတ်ပြေးသွားသည်။ အဆုံးမဲ့သော တောင်ထွတ်များက ကြီးမားသော အလေးချိန်ကို သယ်ဆောင်လျက် ထွက်ပြေးရန် ကြိုးစားနေသော အထွတ်အထိပ် နတ်ဘုရားယဇ်ပလ္လင်အဆင့် နတ်ဘုရားပေါ်သို့ အကြမ်းပတမ်း ဖိချလိုက်ပြီး ၎င်း၏ လမ်းကြောင်းကို ပိတ်ဆို့လိုက်သည်။

ကျိုးကျန်းလီက သူ့အနောက်မှ ဆောင်ရွက်လိုက်သည်။ သွေးနီရောင်ခြည်မျှင်များက သူ၏ အာဏာစက်မျက်လုံးထဲမှာ ထွက်ပေါ်လာသည်နှင့် ယင်းက တုနှိုင်းမဲ့သော ဝိညာဉ်ဖိနှိပ်ခြင်းအစွမ်းကို ထုတ်လွှတ်လိုက်သည်။ ထိုမျက်လုံး၏ အကြည့်အောက်မှာ ဝိညာဉ်၏ ထွက်ပြေးနိုင်သော လမ်းကြောင်းအားလုံးက ဖြတ်တောက်ခံလိုက်ရသည်။

ယခု အထွတ်အထိပ် နတ်ဘုရားယဇ်ပလ္လင်အဆင့် နတ်ဘုရားသည် ရုပ်ခန္ဓာကိုယ်သာမက ၎င်း၏ နတ်ဘုရားဝိညာဉ်သည်လည်း ဖိနှိပ်ခံလိုက်ရသည်။

နောက်တစ်ယောက်က ကြယ်တာရာစက်ဝန်း ဖြစ်သည်။ ကောင်းကင်ဘုံဥပဒေသကို သယ်ဆောင်ထားသော အမိန့်သံကြိုးများက နတ်ဘုရား၏ ယဇ်ပလ္လင်ကို ဖျက်ဆီးပစ်လိုက်သည်။

ရှဲလင်းဇီ၏ မျက်လုံးက သွေးရောင်လွှမ်းသွားစဉ် အလွန်ပြင်းထန်သော သတ်ဖြတ်ခြင်းစိတ်ဆန္ဒက သူ့ထံမှ ပေါက်ကွဲထွက်လာသည်။ သူက ဓားကျိုး၏ ထိန်းချုပ်မှုအောက်သို့ ကျရောက်သွားစဉ် အလွန်အားကောင်းသော ရူးသွပ်မှုနှင့် လောဘကို ထုတ်လွှတ်လိုက်ပြီး နတ်ဘုရားထံသို့ အနီရောင်အလင်းတန်းတစ်ခုပမာ ပျံသန်းသွားသည်။

ရွှီချင်းသည်တော့ ရွှံ့မြေခွေး၏ ရုပ်ခန္ဓာကိုယ်နှင့်အတူ နတ်ဘုရားအခွင့်အာဏာအမျိုးမျိုးကို ထုတ်လွှတ်လိုက်သည်။

တားမြစ်အဆိပ်က နတ်ဘုရားကျိန်စာအဖြစ် ပြောင်းလဲသွားသည်။

ဤနေရာမှ အသံအားလုံးက အစွမ်းထက် လက်နက်များ ဖြစ်လာကြသည်။

သွေးအခွင့်အာဏာက ထွက်ပေါ်လာသည်။

…

နတ်ဘုရားအခွင့်အာဏာများက လူတိုင်းနှင့် ပူးပေါင်းဆောင်ရွက်လိုက်ပြီး နတ်ဘုရားပေါ်သို့ ကျရောက်သွားကြသည်။

ထိုသို့အရေးကြီးအခိုက်အတန့်မှာ အထွတ်အထိပ် နတ်ဘုရားယဇ်ပလ္လင်အဆင့် နတ်ဘုရားက ထွက်ပြေးရန် နတ်ဘုရားအတတ်ပညာတစ်ခုကို အတင်းအဓမ္မ ထုတ်သုံးလိုက်သည်။ သို့သော်လည်း အစောနက ၎င်းက အနန္တအသိဉာဏ်ကို ပြန်ရုပ်သိမ်းရန် ကြီးမားသော တန်ကြေးတစ်ခုကို ပေးဆပ်ခဲ့ရသည်။ ထို့ပြင် ယခု ၎င်းရရှိထားသော ဒဏ်ရာများက အလွန်ဆိုးဝါးပြင်းထန်သည်။

သို့ဖြစ်၍ ၎င်းက ထိုနတ်ဘုရားအတတ်ပညာကို ချက်ချင်း အသက်မသွင်းနိုင်ခဲ့ဘဲ တဒင်္ဂ ရပ်တန့်သွားသည်။

သို့သော်လည်း တဒင်္ဂ ရပ်တန့်သွားသော ထိုအခိုက်အတန့်လေးမှာ…

သတ်ဖြတ်ခြင်းစိတ်ဆန္ဒက တစ်ဟုန်ထိုး မြှောက်တတ်လာသည်။

ခေါင်းလောင်းသံက ရွှီချင်းထံမှ ထွက်ပေါ်လာပြီး အရပ်ရှစ်မျက်နှာဆီသို့ ပဲ့တင်ထပ်သွားသည်။

အရာအားလုံး တိတ်ဆိတ်ငြိမ်သက်သွားသည့်အခိုက် အနက်ရောင်သံတုတ်က ဟင်းလင်းပြင်ထဲမှာ ရုတ်တရက် ထွက်ပေါ်လာသည်။

ခေါင်းလောင်းသံ၏ ကန့်သတ်မှုအောက်မှာ သံတုတ်က ရွှီချင်း၏ အင်မော်တယ်သန္ဓေသားလောင်းနှင့် အင်မော်တယ်နန်းတော်ထံမှ အစွမ်းကို သယ်ဆောင်လျက် အထွတ်အထိပ်စွမ်းအားကို ထုတ်လွှတ်လိုက်သည်။

သံတုတ်က ချက်ချင်း ပျံသန်းထွက်သွားသည်။

ယင်းက နတ်ဘုရားများကို သုတ်သင်ပစ်နိုင်သည်။

သံတုတ်က ဟင်းလင်းပြင်၊ အချိန်လေဟာနယ်နှင့် အရာအားလုံးကို ဖောက်ထွင်းသွားသည်။

ယင်းက အထွတ်အထိပ် နတ်ဘုရားယဇ်ပလ္လင်အဆင့် နတ်ဘုရား၏ အရှေ့သို့ တိုက်ရိုက် ရောက်ရှိသွားပြီး ၎င်း၏ နဖူးကို ဖောက်ထွင်းသွားသည်။