ဘာမှမရှိဘဲ အလောင်းကောက်နိုင်တယ်(ခ)

“ အလုံးစုံအခြေအနေကို ခြုံကြည့်ရင် ဘယ်တောင်ပံစစ်ပွဲဇုန်က ရှေ့တန်းစစ်မြေပြင်ရဲ့ ကြန့်ကြာမှုက နှစ်ဖက်စလုံးရဲ့ အကြံအစည်ဆိုတာ ထင်ရှားတယ် ”

“ နှစ်ဖက်စလုံးမှာ ရည်ရွယ်ချက်ကိုယ်စီ ရှိကြတယ် ”

“ ကံဆိုးစွာပဲ ငါ့မှာ သတင်းအချက်အလက် အလုံအလောက်မရှိတာကြောင့် အလယ်ပိုင်းဒေသကြီးရဲ့ တကယ့်ရည်ရွယ်ချက်ကို ငါမသုံးသပ်နိုင်ဘူး ”

“ ဒါပေမဲ့ တစ်ခုတော့ သေချာတယ်… စစ်ပွဲရဲ့ အတိုင်းအတာက အရမ်းကြီးမားပြီး သေကြေပျက်စီးမှုတွေက အရမ်းများပြားတယ်ဆိုတော့ အဲ့ဒီရည်ရွယ်ချက်က စစ်ပွဲဗျူဟာအတွက် အရမ်းအရေးကြီးရမယ် ”

ရွှီချင်းက လေးနက်စွာ တွေးတောလိုက်သည်။

စစ်ပွဲအကြောင်း ပိုပြီးကောင်းမွန်စွာ နားလည်မှသာလျှင် စစ်ပွဲအတွင်း၌ သူလိုချင်သောအရာကို ပိုပြီးကောင်းမွန်စွာ ရယူနိုင်လိမ့်မည်။

“ လက်ရှိ ငါက အစောပိုင်း ခြေလှမ်းဝက်အင်မော်တယ်အဆင့်မှာပဲ… ပြီးပြည့်စုံတဲ့အဆင့်ထိ ရောက်ဖို့ဆိုရင် မူလအနှစ်သာရအများကြီးကို ငါလိုအပ်တယ်… ”

“ အချိန်က အမြဲတမ်း သွားနေတယ် ”

“ ဘာပဲဖြစ်ဖြစ် ဖြစ်လာသမျှကို မီးစင်ကြည့်ကရမှာပဲ ”

ရွှီချင်းက သူ့ဘာသာ တီးတိုးရေရွတ်လိုက်သည်။ ထို့နောက် သူက လက်မြှောက်လိုက်ပြီး ဤအတောအတွင်း သူစုဆောင်းထားခဲ့သော မူလအနှစ်သာရကို ထုတ်လိုက်ကာ စတင်စုပ်ယူလိုက်သည်။

အချိန်က ထိုသို့ဖြင့် နှေးကွေးစွာ စီးဆင်းသွားသည်။

မျက်စိတစ်မှိတ်အတွင်းမှာ သုံးလကုန်ဆုံးသွားသည်။

ဤသုံးလအတွင်းမှာ နန်းလင်တပ်မတော်၏ စစ်ပွဲဇုန်အတွင်း၌ မီးခိုးရောင်တောင်ရိုးကြယ်ဂြိုလ်ထံမှ မတော်တဆမှုကဲ့သို့ အလားတူအဖြစ်အပျက်များက မကြာခဏ ဖြစ်ပေါ်လာခဲ့သည်။

အကြိမ်တိုင်းမှာ ကင်းလှည့်စစ်တပ်မရောက်လာမီ ပုန်းကွယ်နေကြသော နတ်ဘုရားများက အမြစ်ဖြတ်သုတ်သင်ခံလိုက်ရပြီး မူလအနှစ်သာရက ရိတ်သိမ်းခံထားရသည်။

ထို့ပြင် အကြိမ်တိုင်းမှာ တိုက်ပွဲပြီးဆုံးသော ကြာချိန်က ပိုပြီးမြန်ဆန်လာသလို ရိတ်သိမ်းသည့် အမြန်နှုန်းသည်လည်း တိုးမြှင့်လာသည်။ တိုက်ပွဲမြေပြင်သည်လည်း ယခင်အကြိမ်များထက် ပိုပြီးရှင်းလင်းလာသည်။

တဖြည်းဖြည်း ကောလဟာလများက ကင်းစောင့်စစ်တပ်များထဲမှာ စတင်ပျံ့နှံ့သွားသည်။

ကောလဟာလများအရ တခြားတပ်မတော်မှ စစ်တပ်တစ်တပ်က နန်းလင်တပ်မတော်၏ ပိုင်နက်ထဲသို့ ဝင်ရောက်လာသည်ဟု ဆိုကြသည်။ ထိုစစ်တပ်က ရက်စက်ကြမ်းကြုတ်သည်။ သူတို့က အလောင်းကောက်အဖွဲ့ကိုလည်း ခေါ်ဆောင်လာသည်။ သူတို့လှုပ်ရှားသည့် အကြိမ်တိုင်း မြန်ဆန်သေသပ်ပြီး မည်သည့်သဲလွန်စမှ မကျန်ခဲ့ပေ။

ယင်းက ထိုဧရိယာအတွင်းမှာ ရှိကြသော ဒေသခံအလောင်းကောက်အဖွဲ့များကို မကျေမနပ်ဖြစ်စေသည်။

တစ်ချိန်တည်းမှာ ယင်းက အထက်အရာရှိများ၏ စိတ်အာရုံကို ဆွဲဆောင်သွားသည်။ သို့သော်လည်း သူတို့က ထိုလျှို့ဝှက်ဆန်းကြယ်သော အဖွဲ့ကို စုံစမ်းစစ်ဆေးရန် ပြင်လိုက်စဉ် ထိုအဖွဲ့က ရုတ်တရက် ပျောက်ကွယ်သွားသည်။

အလားတူ အဖြစ်အပျက်များက တခြားစစ်ပွဲဇုန်များထဲမှာလည်း ရံဖန်ရံခါ ဖြစ်ပေါ်လာသောကြောင့် နန်းလင်တပ်မတော်က ထိုအဖွဲ့ကို သိပ်အာရုံမထားတော့ချေ။

ထို့ပြင် ရှေ့တန်းစစ်မြေပြင်မှာ တိုက်ပွဲငယ်များက တဖြည်းဖြည်း ပိုများပြားလာလေရာ သူတို့က တခြားကိစ္စများအတွက် အချိန်မပေးနိုင်ကြချေ။

ဤအခိုက်အတန့်မှာ အဖြူရောင်ဧရာမကြယ်ဂြိုလ်တစ်ခုပေါ်တွင် စစ်သည်တော်တစ်ထောင်ကျော်ပါဝင်သော နတ်ဘုရားစစ်တပ်နှင့် ကျင့်ကြံသူစစ်တပ်က တိုက်ပွဲငယ်တစ်ခုကို ဆင်နွှဲနေကြသည်။

ပေါက်ကွဲသံများနှင့် ဟိန်းသံများက အဝေးသို့ ပျံ့လွင့်သွားသည်။

နတ်ဘုရားအတတ်ပညာများနှင့် အင်မော်တယ်အတတ်ပညာများထံမှ ရောင်စုံအလင်းများက အရပ်ရှစ်မျက်နှာတွင် ထွန်းလင်းတောက်ပနေသည်။

အင်အားစုနှစ်ခုကြားမှ တိုက်ပွဲက အတော်လေး ပြင်းထန်သည်။

တိုက်ပွဲမြေပြင်၏ အစွန်းနားရှိ အဖြူရောင်တောင်တစ်လုံးပေါ်တွင် အလောင်းကောက်အဖွဲ့တချို့က စောင့်ဆိုင်းနေကြသည်။

သူတို့ထဲတွင် လွန်ခဲ့သော လအနည်းငယ်က ရွှီချင်းနှင့် သူ့အဖွဲ့သားများကို ညွှန်ကြားပေးခဲ့ဖူးသော အလောင်းကောက်အဖိုးအိုလည်း ပါဝင်သည်။

ရွှီချင်းနှင့် သူ့အဖွဲ့သားများသည်လည်း ဤနေရာမှာ စုဝေးရှိနေကြသည်။ ဤအခိုက်အတန့်မှာ သူတို့အားလုံးက တင်ပျဉ်ခွေလျက် တရားထိုင်နေကြသည်။ သို့သော်လည်း သူတို့က စိတ်အာရုံကို ဖြန့်ကြက်ထားပြီး စစ်မြေပြင်ကို အာရုံစူးစိုက်ထားကြသည်။

တခြားအလောင်းကောက်အဖွဲ့များက အပြန်အလှန် စကားပြောနေရင်း စောင့်ဆိုင်းနေကြစဉ် ရွှီချင်းနှင့် သူ့အဖွဲ့သားများက စိတ်မရှည်မှုကို ခံစားမိသွားကြသည်။

ဤအတောအတွင်းမှာ သူတို့သည် ဆက်တိုက် အမဲလိုက်ခြင်းမှတဆင့် အကျိုးအမြတ်များစွာကို ရရှိခဲ့ကြသည်။ ထို့ပြင် သူတို့၏ ရိတ်သိမ်းသော အမြန်နှုန်းက သိသိသာသာ မြင့်တတ်သွားသည်။

သူတို့၏ ကျင့်ကြံခြင်းအခြေခံသည်လည်း တိုးမြှင့်သွားသည်။

သို့သော်လည်း တိုက်ပွဲငယ်များက ရှေ့တန်းစစ်မြေပြင်မှာ မကြာခဏ ဖြစ်ပွားနေသောကြောင့် သူတို့မှာ အမဲလိုက်ရန် အချိန်မရှိတော့ပေ။ သူတို့က အလောင်းကောက်တာဝန်ကို မကြာခဏ ထမ်းဆောင်ရန်သာ တတ်စွမ်းကြသည်။

သူတို့က ဤနေရာတွင် စောင့်ဆိုင်းနေသည်မှာ အချိန်အတော်ကြာနေပြီ ဖြစ်သည်။ သို့သော်လည်း နှစ်ဖက်စလုံးထံမှ တိုက်ပွဲအင်အားက မျှခြေညီနေလေရာ အချိန်တိုလေးအတွင်း အနိုင်ရလဒ် ထွက်ပေါ်လာမည့်ပုံမပေါ်ချေ။

သို့ဖြစ်၍ တတ်လှမ်းသူများက မျက်မှောင်ကြုတ်လိုက်ပြီး ရွှီချင်းကို ကြည့်လိုက်ကြသည်။

ရွှီချင်းသည်လည်း မျက်မှောင်ကြုတ်လိုက်သည်။ လွန်ခဲ့သော သုံးလအတွင်းမှာ သူရိတ်သိမ်းခဲ့သော မူလအနှစ်သာရများကြောင့် သူ၏ ကျင့်ကြံခြင်းက ယခင်ကထက် ပိုပြီးတိုးမြှင့်သွားခဲ့သည်။ သူက နောက်ထပ် စစ်မြေပြင်ဆီသို့ ဦးတည်သွားရန် အလျင်လိုနေသည်။

သို့သော်လည်း ဤနေရာမှ တိုက်ပွဲက အချိန်တိုလေးအတွင်း ပြီးဆုံးသွားမည့်ပုံမပေါ်ချေ။

တစ်ခဏ တွေးတောပြီးနောက် ရွှီချင်းက ရုတ်တရက် မတ်တတ်ရပ်လိုက်ပြီး အရှေ့သို့ ခြေတစ်လှမ်း လှမ်းလိုက်သည်။

သူခြေလှမ်း လှမ်းလိုက်သည့်အခိုက် ဘေးပတ်ဝန်းကျင်မှ တတ်လှမ်းသူများက စိတ်လှုပ်ရှားလာပြီး တစ်ယောက်ပြီးတစ်ယောက် မတ်တတ်ရပ်လိုက်ကြသည်။

မနီးမဝေးမှ တခြားအလောင်းကောက်အဖွဲ့များသည်တော့ သူတို့က အတော်လေး အံ့ဩသွားကြသည်။

အထူးသဖြင့် အတိတ်မှာ ရွှီချင်းကို အကြံဉာဏ်ပေးခဲ့ဖူးသော အဖိုးအိုဖြစ်သည်။ သူက လှမ်းကြည့်လိုက်ပြီး စကားပြောရန် ပြင်လိုက်သည်။

သို့သော်လည်း နောက်အခိုက်အတန့်မှာ ရွှီချင်း၏ အလျင်က ရုတ်တရက် ပေါက်ကွဲထွက်လာသည်။ ဝုန်းခနဲ မြည်သံများကြားမှာ သူ၏ ပုံရိပ်က သက်တံ့တစ်ခုအဖြစ် ပြောင်းလဲသွားပြီး စစ်မြေပြင်ဆီသို့ တန်းမတ်စွာ ပျံသန်းသွားသည်။

သူ့အနောက်တွင် ကျိုးကျန်းလီနှင့် တခြားလူများက လုံးဝတုံ့ဆိုင်းမနေဘဲ အရှိန်မြှင့်တင်လိုက်ကြသည်။

ထိုတတ်လှမ်းသူဒါဇင်ခန့်က လင်းတများ သို့မဟုတ် ဆာလောင်နေသော ဝံပုလွေများသဖွယ် စစ်မြေပြင်ဆီသို့ ဦးတည်သွားကြသည်။ ယင်းက တောင်ပေါ်မှ တခြားအလောင်းကောက်အဖွဲ့များကို နှလုံးတုန်သွားစေသည်။

အဖိုးအိုက မျက်လုံးပြူးကျယ်သွားသည်။

“ အစောကြီး ဝင်သွားတာလား… ဒါက… ”

အဖိုးအိုက အာမေဋိတ်သံဖြင့် ပြောသည်။

သို့သော်လည်း သူ့စကားမဆုံးခင်မှာ ရွှီချင်းနှင့် တခြားလူများက စစ်မြေပြင်ဆီသို့ တစ်ဟုန်ထိုး ဝင်ရောက်သွားကြသည်။

ချက်ချင်းဆိုသလို အလွန်ကျယ်လောင်သော ပေါက်ကွဲသံက သူတို့၏ နားထဲသို့ ဝင်ရောက်လာသည်။ မန္တန်အားလှိုင်းများ၏ သက်ရောက်မှုဒဏ်သည်လည်း သူတို့၏ ခန္ဓာကိုယ်ပေါ်သို့ ရိုက်ခတ်လာသည်။

ရွှီချင်းက စစ်မြေပြင်၏ ရိုက်ခတ်မှုဒဏ်ကို အရင်ဦးဆုံး တွေ့ကြုံလိုက်ရသည်။ ထို့နောက် သူ၏ အလျင်က ပေါက်ကွဲထွက်လာပြီး သူက လျှပ်တစ်ပြက်ပုံရိပ်အဖြစ် ပြောင်းလဲသွားသည်။ စက္ကန့်ပိုင်းလေးအတွင်းမှာ သူက စစ်မြေပြင်တစ်လျှောက် ဖြတ်ကျော်သွားပြီး အထွတ်အထိပ် နတ်ဘုရားမီးတောက်အဆင့် နတ်ဘုရားအလောင်း၏ ဘေးမှာ ပြန်ပေါ်လာသည်။

သူက ညာလက်ကို မြှောက်လိုက်ပြီး နတ်ဘုရားအလောင်း၏ ရင်ဘက်ပေါ်သို့ ဖိချလိုက်သည်။ ဘေးပတ်ဝန်းကျင်၌ တိုက်ခိုက်မှုများက အကြမ်းပတမ်း ဖြစ်ပွားနေစဉ် သူက မူလအနှစ်သာရကို စတင်စုဆောင်းလိုက်သည်။

ပမာဏများပြားသော မူလအနှစ်သာရက ရိတ်သိမ်းခံလိုက်ရသည်နှင့် နတ်ဘုရားအလောင်းက မြန်ဆန်စွာ ညှိုးနွမ်းခြောက်သွေ့သွားသည်။

အင်အားစုနှစ်ခုက အပြင်းအထန် တိုက်ခိုက်နေကြရင်း သူတို့၏ စိတ်အာရုံမှတဆင့် ထိုမြင်ကွင်းကို စစ်ဆေးလိုက်ကြသည်။ ထိုအခါ ကျင့်ကြံသူများသော်လည်းကောင်း သို့မဟုတ် နတ်ဘုရားများသော်လည်း သူတို့အားလုံးက ဆွံ့အသွားကြသည်။

ထိုသို့အဖြစ်အပျက်မျိုးကို ယခင်က တစ်ခါမှ သူတို့မမြင်ခဲ့ဖူးကြချေ။

မကြာမီ ရွှီချင်းတစ်ယောက်တည်းက သူတို့ကို အံ့ဩသွားစေခြင်း မဟုတ်တော့ပေ။ ကျိုးကျန်းလီနှင့် တခြားလူများက မြန်ဆန်စွာ ရောက်ရှိလာကြပြီး စစ်မြေပြင်မှာ ပြန့်ကျဲနေကြသော နတ်ဘုရားအလောင်းများထံသို့ ဦးတည်သွားကြသည်။

သူတို့အားလုံးက ရူးသွပ်စွာ ရိတ်သိမ်းလိုက်ကြသည်။

သူတို့၏ လှုပ်ရှားမှုများက လွန်စွာ စည်းစနစ်ကျပြီး သူတို့၏ အလျင်က အလွန်မြန်ဆန်သည်။ သူတို့က အလောင်းတစ်လောင်းကို ရိတ်သိမ်းပြီးသည်နှင့် တခြားအလောင်းဆီသို့ မြန်ဆန်စွာ ပြေးသွားကြလိမ့်မည်။

သို့ဖြစ်၍ စစ်မြေပြင်ပေါ်မှ စစ်သည်တော်အများစုက ထူးဆန်းသော ထိုမြင်ကွင်းကို ချက်ချင်း အာရုံစိုက်မိသွားကြသည်။

အင်အားစုနှစ်ခုက အသေအကြေ တိုက်ခိုက်နေကြကြောင်း ရှင်းလင်းထင်ရှား၏။ သို့သော်လည်း ထိုအုပ်စုက ရုတ်တရက် ဝင်ရောက်လာပြီး သူတို့အရှေ့မှာတင် အလောင်းများကို ရိတ်သိမ်းနေကြသည်။

ကျင့်ကြံသူစစ်သည်တော်များက ယင်းကို ထူးဆန်းရုံမျှသာ ခံစားမိကြသည်။ မည်သို့ဖြစ်ပါစေ သူတို့အားလုံးက လူသားများ ဖြစ်ကြပေသည်။ သို့သော်လည်း နတ်ဘုရားများသည်တော့ လုံးဝ ဒေါသထွက်သွားကြသည်။ သို့ဖြစ်၍ ထိုအလောင်းကောက်သူများနှင့် အနီးနားမှာ ရှိကြသော နတ်ဘုရားများက စတင်တိုက်ခိုက်လိုက်ကြသည်။

သို့သော်လည်း စစ်မြေပြင်ဆီသို့ ဝင်ရောက်လာကြသော ထိုအလောင်းကောက်သူများထံမှာ ရှင်းလင်းသော ပစ်မှတ်များ ရှိကြ၏။ သို့ဖြစ်၍ သူတို့က အတားအဆီးများနှင့် ရင်ဆိုင်တွေ့ကြုံရသောအခါ ချက်ချင်း လက်လျော့လိုက်ကြပြီး အမြန်ထွက်သွားကြသည်။ သူတို့က တန်ပြန်တိုက်ခိုက်မည့်အစား တခြားနတ်ဘုရားအလောင်းများကိုသာ ပစ်မှတ်ထားလိုက်ကြသည်။

စစ်မြေပြင်တွင် အင်အားစုနှစ်ခုစလုံးက မျှခြေညီနေသည်။ အကယ်၍ နတ်ဘုရားများသာ ထိုအလောင်းကောက်အဖွဲ့သားများကြောင့် စိတ်ပျံ့လွင့်သွားပြီး သူတို့အနောက်သို့ လိုက်ဖမ်းမည်ဆိုလျှင် ၎င်းတို့နှင့် တိုက်ခိုက်နေသော နန်းလင်စစ်တပ်က ထိုအခွင့်အရေးကို အမိအရ ဖမ်းဆုပ်သွားလိမ့်မည်။

သို့ဖြစ်၍ နတ်ဘုရားများသည် ထိုအလောင်းကောက်အဖွဲ့သားများကို မတားဆီးနိုင်ကြချေ။ ထို့ပြင် ထိုအလောင်းကောက်အဖွဲ့သားများ၏ ကျင့်ကြံခြင်းအခြေခံက သာမန်မဟုတ်ပေ။ သူတို့က စစ်မြေပြင်ထဲ၌ ပင်လယ်ထဲမှ ငါးများသဖွယ် အတားအဆီးမဲ့ကြသည်။

သူတို့က နတ်ဘုရားအလောင်းများကို တစ်လောင်းပြီးတစ်လောင်း ရူးသွပ်စွာ ရိတ်သိမ်းလိုက်ကြသည်။

သို့သော်လည်း အကယ်၍ ထိုမျှသာဆိုလျှင် ကိစ္စမရှိပေ။ မည်သို့ဖြစ်ပါစေ အလောင်းကောက်သူများက ဒါဇင်ခန့်သာ ရှိကြသည်။ သို့ဖြစ်၍ သူတို့၏ ဝင်ရောက်လာမှုက စစ်မြေပြင်အပေါ် ကြီးမားသော သက်ရောက်မှု မဖြစ်စေပေ။

သို့သော်လည်း မကြာမီ ကွဲပြားခြားနားသော မြင်ကွင်းတစ်ခု ထွက်ပေါ်လာသည်။

ရွှီချင်းက နတ်ဘုရားအလောင်းတစ်လောင်းဆီသို့ ပျံသန်းသွားနေစဉ် သူ၏ လမ်းကြောင်းရှေ့၌ အထွတ်အထိပ် နတ်ဘုရားမီးတောက်အဆင့် နတ်ဘုရားတစ်ပါးက နန်းလင်စစ်တပ်မှ ကျင့်ကြံသူတစ်ယောက်နှင့် အသေအကြေ တိုက်ခိုက်နေသည်။

နတ်ဘုရား၏ မျက်လုံးက အေးစက်သွားစဉ် ၎င်း၏ နတ်ဘုရားအတတ်ပညာက ပေါ်လျှိုးလာသည်။ ၎င်း၏ ခန္ဓာကိုယ်ထဲမှ မူလအနှစ်သာရက မြှောက်တတ်သွားစဉ် ၎င်းက ဆွဲငင်အားတစ်မျိုးကို ထုတ်လွှတ်လိုက်သည်။

နန်းလင်စစ်တပ်မှ ကျင့်ကြံသူသည်တော့ သူ၏ မျက်လုံးက နီရဲသွားပြီး သူက အသက်စတေးရန် ပြင်လိုက်သည်။

သို့သော်လည်း နောက်အခိုက်အတန့်မှာ ကျင့်ကြံသူနှင့် နတ်ဘုရား၏ အမြင်အာရုံက ဝေဝါးသွားသည်။

ရွှီချင်း၏ ပုံရိပ်က သူတို့၏ မြင်ကွင်းထဲမှာ ရုတ်တရက် ထွက်ပေါ်လာသည်။

သူတို့နှစ်ယောက် ဘာမှမတုံ့ပြန်နိုင်ခင် ရွှီချင်းက မြေပြင်ပေါ်သို့ ဆင်းသက်လိုက်ပြီး နတ်ဘုရား၏ လည်ပင်းကို ဖမ်းဆုပ်လိုက်သည်။ သူ၏ ခန္ဓာကိုယ်ထဲမှ အင်မော်တယ်သန္ဓေသားလောင်း၏ စွမ်းအားက မြစ်တစ်စင်းသဖွယ် ထွက်ပေါ်လာပြီး နတ်ဘုရား၏ ခန္ဓာကိုယ်ထဲသို့ တိုးဝင်သွားသည်။

အော်ဟစ်ညည်းညူသံက နတ်ဘုရား၏ ပါးစပ်ထဲမှ ချက်ချင်း ထွက်ပေါ်လာသည်။ ၎င်း၏ အသက်ဓာတ်က ချက်ချင်း ငြိမ်းသတ်သွားပြီး ၎င်း၏ လည်ပင်းက ဝုန်းခနဲ မြည်သံနှင့်အတူ တိုက်ရိုက် ပေါက်ကွဲသွားသည်။

၎င်းက အလောင်းဖြစ်လာသည်။

ရွှီချင်းက ဆောင့်ကြောင့်ထိုင်လိုက်ပြီး ပူပူနွေးနွေး သေဆုံးထားသော နတ်ဘုရားထံမှ မူလအနှစ်သာရကို ရိတ်သိမ်းလိုက်သည်။

အသက်စတေးရန် ပြင်ထားသော နန်းလင်စစ်တပ်မှ ကျင့်ကြံသူက တဒင်္ဂ ဆွံ့အသွားသည်။ ထို့နောက် သူ၏ မျက်လုံးထဲ၌ ကျေးဇူးတင်မှု ထွက်ပေါ်လာသည်။

ထိုမြင်ကွင်းကို ရှဲလင်းဇီက သတိထားမိသွားသည်။ ထိုအခါ သူက နှုတ်ခမ်းသပ်လိုက်ပြီး ကျင့်ကြံသူစစ်သည်တော်တစ်ယောက်နှင့် တိုက်ခိုက်နေသော နတ်ဘုရားထံသို့ ပျံသန်းသွားသည်။

အလောင်းများကို အတင်းအဓမ္မ ရိတ်သိမ်းခြင်း…

မကြာမီ တခြားတတ်လှမ်းသူများသည်လည်း တူညီသောအရာကို လုပ်ဆောင်လိုက်ကြသည်။ သူတို့က ဆာလောင်နေသော ဝံပုလွေများသဖွယ် နတ်ဘုရားများကို စတင်တိုက်ခိုက်လိုက်ကြသည်။

အကယ်၍ သူတို့၏ ဘေးမှာ နတ်ဘုရားအလောင်းများရှိလျှင် ၎င်းတို့ကို သူတို့ရိတ်သိမ်းကြလိမ့်မည်။ အကယ်၍ လမ်းတစ်လျှောက်မှာ သူတို့က ဆွဲမက်ဖွယ်ကောင်းသော တစ်စုံတစ်ရာဖြင့် တွေ့ဆုံသွားမည်ဆိုလျှင်လည်း ၎င်းတို့ကို အတင်းအဓမ္မ ရိတ်သိမ်းကြလိမ့်မည်။

အကယ်၍ သူတို့တိုက်ခိုက်နိုင်သည်ဆိုလျှင် ဝင်ရောက်တိုက်ခိုက်လိမ့်မည်။ အကယ်၍ သူတို့က အလစ်လုပ်ကြံနိုင်သည်ဆိုလျှင် ဝင်ရောက်လုပ်ကြံကြလိမ့်မည်။ အကယ်၍ သူတို့အနိုင်မယူနိုင်လျှင် သူတို့၏ အသက်ကယ်နည်းလမ်းများကို ချက်ချင်း အသုံးပြု၍ အနောက်ဆုတ်သွားကြလိမ့်မည်။

ထိုသို့လုပ်ရပ်က စစ်မြေပြင်အပေါ် ကြီးမားသော သက်ရောက်မှုကို ဖြစ်ပေါ်စေသည်။

အစတွင် သက်ရောက်မှုက သိပ်မကြီးမားသော်လည်း အချိန်ကြာလာသည်နှင့်အမျှ ရွှီချင်းတို့အဖွဲ့၏ ရူးသွပ်မှုက လူအများအပြား၏ အာရုံစူးစိုက်မှုကို တဖြည်းဖြည်း ရရှိလာသည်။

နှစ်ဖက်စလုံးမှ စစ်ခေါင်းဆောင်များသည်လည်း ယင်းကို အာရုံခံမိသွားကြသည်။

နတ်ဘုရားများက မျက်မှောင်ကြုတ်လိုက်စဉ် ကျင့်ကြံသူစစ်တပ်ဘက်မှ စစ်ခေါင်းဆောင်ဖြစ်သော အထွတ်အထိပ် ခြေလှမ်းဝက်အင်မော်တယ်အဆင့် ကျင့်ကြံသူက မျက်လုံးဝင်းလက်သွားသည်။

အဝေးမှ တောင်ထွတ်ပေါ်တွင် အဖိုးအိုအပါအဝင် တခြားအလောင်းကောက်အဖွဲ့များက ယင်းကို မြင်တွေ့သွားသောအခါ နှလုံးခုန်မြန်လာကြပြီး ပါးစပ်အဟောင်းသား ဖြစ်သွားကြသည်။

“ အဲ့ဒါ အလောင်းကောက်တာလား ”

အဖိုးအို၏ အဖွဲ့ထဲမှ အလောင်းကောက်အဖွဲ့သားတစ်ယောက်က တီးတိုးရေရွတ်လိုက်သည်။

“ အင်း… အဲ့ဒါ အလောင်းကောက်တာပဲ… အဲ့ဒါကို ရှင်းရှင်းလင်းလင်း ငါမြင်နေရတယ်… သူတို့က နတ်ဘုရားတွေကို သတ်ပစ်ပြီး ခန္ဓာကိုယ်ကို ချက်ချင်း ရိတ်သိမ်းပစ်တာပဲ… ”