အင်မော်တယ်အရှင်သခင်ကျန်းလူ… မင်းငါ့ကို မလိမ်ခဲ့ဘူး(က)

ယင်းက ရွှီချင်းအား ချင်းကောင်းကင်ဘုံအလွန်ထဲမှာ သူဖိနှိပ်ထားခဲ့သော အစစ်အမှန်နတ်ဘုရားကို ပြန်အမှတ်ရစေသည်။

ကံတရား...

ကံတရားဟူသည် သေမျိုးများ၏ မျက်လုံးထဲတွင် သူတို့မမြင်နိုင်သောအရာ ဖြစ်ပြီး ယင်းက သူတို့၏ နားလည်နိုင်စွမ်းထက် ကျော်လွန်နေသည်။

ကောင်းကင်ဘုံဆန့်ကျင်သော လမ်းစဉ်ကို လျှောက်လှမ်းကြသော ကျင့်ကြံသူများသည်ပင် သူတို့၏ လမ်းအဆုံးမှာ ကံတရားကို မလွန်ဆန်နိုင်ခဲ့ကြပေ။

သို့ဖြစ်၍ နောက်ဆုံးမှာတော့ သူတို့က လက်လျော့လိုက်ကြပြီး ခါးသီးစွာ ပြုံးလိုက်ကြသည်။

“ ကိုယ့်ကိုယ်ကိုယ် စိတ်ချမ်းသာအောင် နေပါ ”

ယင်းက ဘဝ၏ ပျော်ရွှင်မှုဖြစ်ပြီး မမြဲခြင်းဟူသော အနိစ္စသဘောတရားမှ ဆင်းသက်လာသည့် အဓိပ္ပာယ်ဖြစ်သည်။

…..

ကံတရားကို လွန်ဆန်ရန် မဖြစ်နိုင်မှတော့ ကံတရားနှင့် လိုက်လျောညီထွေစွာ နေနိုင်ရန်သာ ကြိုးစားရတော့မည်။

သို့သော်လည်း တချို့သက်ရှိများ…

တခြားလူများ၏ အထက်မှာ တည်ရှိနေသော နတ်ဘုရားများဖြစ်စေ သို့မဟုတ် အင်မော်တယ်များဖြစ်စေ သူတို့၏ ဘဝအဆင့်အတန်းက သာလွန်မြင့်မြတ်ကြသည်။

သူတို့အတွက်တော့ ကံတရားက လျှို့ဝှက်ဆန်းကြယ်သောအရာ မဟုတ်သလို သူတို့လက်လှမ်းမမီနိုင်သောအရာ မဟုတ်ပေ။

သူတို့က ကံတရား၏ သဲလွန်စများကို မြင်နိုင်ပြီး ဖုံးကွယ်နေသော လျှို့ဝှက်ချက်များကို ရှာဖွေနိုင်ကြသည်။ အမှန်မှာ အဆင့်မြင့်သက်ရှိတချို့ဆိုလျှင် လက်တစ်ဖက် ဝှေ့ယမ်းရုံဖြင့် ကံတရားကို ထိန်းချုပ်နိုင်ကြသည်။ ၎င်းတို့က ကံတရားကို ၎င်းတို့စိတ်ကြိုက် ကြိုးကိုင်ခြယ်လှယ်နိုင်ကြသည်။

ထိုသို့သက်ရှိများထဲမှာ အတိတ်မှ အမှတ်ငါးကြယ်တာရာစက်ဝန်းထဲတွင် နာကျင်မှုနတ်ဘုရားဟူ၍ ဂုဏ်သတင်းကျော်ဇောခဲ့သော ဘီမို့လည်း ပါဝင်သည်။

၎င်းက နတ်ဘုရားအရှင်သခင်မဟုတ်သော်လည်း ၎င်း၏ နာကျင်မှုနတ်ဘုရားအခွင့်အာဏာက အလွန်ထူးခြားဆန်းကြယ်သည်။ ၎င်း၏ အထွတ်အထိပ်ကာလမှာ ၎င်း၏ တည်ရှိမှုက နတ်ဘုရားအရှင်သခင်များဖြင့်ပင် နှိုင်းယှဉ်နိုင်သည်။

အဘယ့်ကြောင့်ဆိုသော် ၎င်းဖန်တီးလိုက်သော ပုံရိပ်ယောင်များထဲမှာ အမှန်တရားတချို့ ပါဝင်နေသောကြောင့် ဖြစ်သည်။

သို့ဖြစ်၍ ထိုနတ်ဘုရား ပြန်ရှင်သန်လာပြီး ရွှီချင်းနှင့် တိုက်ခိုက်ခဲ့စဉ်မှာ ၎င်းထုတ်လွှတ်လိုက်သော နတ်ဘုရားအခွင့်အာဏာအစွမ်းက ကိစ္စအများအပြားကို စတင်ပြောင်းလဲသွားစေသည်။

ဥပမာ အစောနက ရွှီချင်းခံစားမိလိုက်သော ကြိုတင်အာရုံရခြင်းက ကံတရား၏ တောင်ပံလှုပ်ခတ်ခြင်းနှင့် ဆင်တူသည်။

ယင်းကို သူအာရုံခံနိုင်ခြင်းမှာ နာကျင်မှုနတ်ဘုရားနှင့် သူ့ကြားမှ တိုက်ပွဲထဲမှာ အရေးကြီးသော ကမ္မဆက်နွယ်မှုတစ်ခု ကိန်းဝပ်နေသောကြောင့် ဖြစ်သည်။

အတိတ်တွင် ထိုသို့ရန်သူတော်တစ်ယောက်ဖြင့် သူတွေ့ဆုံခဲ့ဖူးသည်။

ထိုသူက သူ၏ အကိုကြီး ကျစ်လီဆဲ့အိမ်ရှေ့စံမင်းသား ဖြစ်သည်။ တစ်ဖက်လူက ကံကြမ္မာစွမ်းအားကို ထိန်းချုပ်နိုင်သော အစွမ်းထက်ပုဂ္ဂိုလ်တစ်ဦး ဖြစ်သည်။

သို့ဖြစ်၍ ရွှီချင်း၏ တန်ပြန်တိုက်ခိုက်မှုက အစောကြီးကတည်းက စတင်ခဲ့သည်။

ယင်းက ဝမ်ကူးကုန်းမြေထဲတွင် ကံကြမ္မာကောင်းတစ်ခုဖြင့် သူတွေ့ဆုံခဲ့ပြီး တူညီသော နတ်ဘုရားအခွင့်အာဏာကို မရလာခင်အထိ ဖြစ်သည်။

ယင်းက ကံကြမ္မာရေးထွင်းခြင်းဓားမြှောင် ဖြစ်သည်။

ဓားမြှောင်က မရှိသေးသော ကံကြမ္မာချည်မျှင်အသစ်များကို ဖန်တီးပေးနိုင်သည်။ ယင်းက ကံကြမ္မာထက် ကျော်လွန်သော ကံကြမ္မာအသစ်များကိုလည်း ကြိုးကိုင်ခြယ်လှယ်နိုင်သည်။

ထိုကံကြမ္မာရေးထွင်းခြင်းဓားမြှောင်က ယခု သူ၏ အင်မော်တယ်ခန္ဓာကိုယ်ထဲမှာ မရှိနေသော်လည်း ဝမ်ကူးကုန်းမြေထဲမှ သူ၏ နတ်ဘုရားခန္ဓာကိုယ်ထဲမှာ ကျန်နေခဲ့သည်။ သို့ဖြစ်၍ ခန္ဓာကိုယ်နှစ်ခုကြား၌ ထိုကမ္မဆက်သွယ်မှုက ဆက်လက် ရှိနေဆဲပင်။

ရွှီချင်းသည် အစစ်အမှန်နတ်ဘုရားကို သူဖိနှိပ်ခဲ့စဉ်က တွေ့ကြုံခဲ့ရသော ပုံရိပ်ယောင်ကို ပြန်စဉ်းစားလိုက်သည်။

ထိုအတွေးက သူ၏ အသိစိတ်ထဲမှာ ထွက်ပေါ်လာသည့်အခါ ရွှီချင်း၏ မျက်လုံးက အေးစက်သွားသည်။

“ စစ်မြေပြင်ဆီ ဝင်ရောက်တယ်… နတ်သမီးနဲ့ တွေ့ဆုံတယ်… နတ်ဘုရားအရှင်သခင်ရဲ့ လိုက်သတ်တာခံရတယ်… ”

“ ဒီတော့… နောက်ထပ် ငါကြုံရမှာက နတ်သမီးလား ”

ရွှီချင်းက မျက်လုံးမှေးကျဉ်းလိုက်သည်။ သူ၏ မျက်လုံးထဲမှ အေးစက်မှုက သူ၏ နှလုံးသားထဲသို့ ကူးပြောင်းသွားသည့်အခါ သူ၏ မျက်လုံးက စူးရှလာသည်။

ထို့နောက် သူက အမှတ်လေးကြယ်တာရာစက်ဝန်းထံမှ အကြည့်ပြန်ရုပ်လိုက်ပြီး စစ်မြေပြင်၌ ဆက်လက် ရိတ်သိမ်းလိုက်သည်။

အချိန်က တရွေ့ရွေ့ စီးဆင်းသွားသည်။

တစ်လကုန်ဆုံးသွားသည်။

ဤတစ်လအတွင်းမှာ ရွှီချင်းက ပုံမှန်အတိုင်း ဖြတ်သန်းခဲ့သည်။ သူက အလောင်းကောက်ခြင်းကို ဆက်လက် လုပ်ဆောင်ခဲ့ပြီး သူ့ကိုယ်ပိုင်ကျင့်ကြံခြင်းအတွက် မူလအနှစ်သာရများကို စုပ်ယူခဲ့သည်။

သူ၏ ကျင့်ကြံခြင်းအခြေခံက တည်ငြိမ်စွာ မြင့်တတ်သွားသည်။ ယခု သူက အစောပိုင်းအဆင့်၏ အထွတ်အထိပ်မှ အလယ်အလတ်အဆင့် ခြေလှမ်းဝက်အင်မော်တယ်သို့ တတ်လှမ်းသွားသည်။

နှလုံးတုန်သော ခံစားမှုက ရံဖန်ရံခါ ဖြစ်ပေါ်လာသော်လည်း ယင်းကို သူဂရုမစိုက်တော့ပေ။ ယင်းအတွက် သူ့မှာ ဖြေရှင်းနည်းတစ်ခု ရှိထားပြီးပြီ ဖြစ်သည်။ ထို့ကြောင့် သူက စောင့်ဆိုင်းနေသည်။

သူက ကံတရား၏ လှိုင်းထမှုနှင့် သူကြိုတင်အာရုံရထားသော ကံတရား ထွက်ပေါ်လာမည့်အချိန်ကို စောင့်ဆိုင်းနေသည်။

…..

ကြယ်တာရာကောင်းကင်က ပင်လယ်သဖွယ် ပြောင်းလဲသွားပြီး တအိအိလှိုင်းထနေသည်။

ယင်းတို့က နတ်ဘုရားအသံများမှ ဖွဲ့စည်းသွားခြင်း ဖြစ်သည်။

အမှတ်လေးကြယ်တာရာစက်ဝန်း၏ ညာတောင်ပံစစ်ပွဲဇုန်ထဲမှ နတ်ဘုရားတပ်စခန်းတွင် လှိုင်းဂယက်များက ဆက်လက် ပျံ့နှံ့နေသည်။

ညာတောင်ပံစစ်ပွဲဇုန်မှ တပ်မှူး၏ အစစ်အမှန်နာမည်ကို အော်ခေါ်သံက ဤတစ်လလုံးမှာ ယဇ်ပလ္လင်ကိုးခု၏ အနီးနားတစ်ဝိုက်၌ အဆုံးမဲ့စွာ ပဲ့တင်ထပ်နေသည်။

ထိုနေရာမှ အစစ်အမှန်နတ်ဘုရားများသာ နာမည်အော်ခေါ်ရင်း ဝတ်ပြုဆုတောင်းနေကြခြင်း မဟုတ်ပေ။ အရိုးများဖြင့် ဆောက်လုပ်ထားသော ယဇ်ပလ္လင်ကိုးခုပေါ်မှ မရေမတွက်နိုင်သော သက်ရှိများသည်လည်း နာမည်အော်ခေါ်နေကြသည်။

၎င်းတို့က တပ်မှူး၏ အစစ်အမှန်နာမည်ကို ရေရွတ်နေကြသည်။

ထိုနတ်ဘုရားအသံအားလုံးက ခေါင်းတလား၏ အပေါ်မှာ လွင့်မျောနေသော နတ်သမီး၏ ဘေးပတ်ဝန်းကျင်မှာ စုဝေးသွားသည်။ ၎င်းက ၎င်း၏ တော်ဝင်မျိုးဆက်သွေးကို ကြားခံနယ်အဖြစ် သဘောထား၍ ဟင်းလင်းပြင်ကို အတိတ်နှင့် ပစ္စုပ္ပန်ကြားမှ တံတားတစ်စင်းအဖြစ် ပြောင်းလဲပစ်လိုက်သည်။

ထိုဆက်သွယ်မှုတံတားက နတ်ဘုရားများအပေါ် အဆင့်မြင့်ကြယ်တာရာစက်ဝန်းများ၏ ချစ်ခင်ကြင်နာမှုကို တုနှိုင်းမဲ့သော ရှေးခေတ်ကတိကဝတ်အဖြစ် ပြောင်းလဲသွားစေသည်။ ထိုရှေးခေတ်ကတိကဝတ်က အစစ်အမှန်နတ်ဘုရား၏ ပြန်လာနေသော လမ်းကြောင်းပေါ်သို့ အလင်းရောင် ထွန်းလင်းပေးလိုက်သည်။

ထိုအခါ ပြန်ရှင်သန်ရန် နှစ်ပေါင်းများစွာ ကြာမြင့်မည့် ဝေဝါးနေသော လမ်းကြောင်းက ရုတ်တရက် ထင်ရှားလာသည်။ လမ်းကြောင်းပေါ်မှ အတားအဆီးများသည်လည်း ရှေးခေတ်ကတိကဝတ်၏ အလင်းရောင်အောက်မှာ ဖယ်ရှားခံလိုက်ရသည်။

တစ်ချိန်တည်းမှာ အစစ်အမှန်နတ်ဘုရားထံမှ နတ်ဘုရားအစွမ်းက တဖြည်းဖြည်း သိပ်သည်းလာသည်။ နောက်ဆုံးမှာတော့ ယင်းက စကြာဝဠာအထိ ဖြန့်ကြက်သွားပြီး အာကာသဟင်းလင်းပြင်ကို ပင်လယ်အဖြစ် ပြောင်းလဲသွားစေသည်။

နတ်ဘုရားစွမ်းအင်ပင်လယ်ထဲတွင် အလွန်သိပ်သည်းသော ဒြပ်နှောများနှင့် နတ်ဘုရားအခွင့်အာဏာက ထွက်ပေါ်လာသည်။

ယင်းက ပြန်ရှင်သန်မှု၏ ပထမခြေလှမ်း ဖြစ်သည်။

ညာတောင်ပံစစ်ပွဲဇုန်မှ တပ်မှူး၏ ပြန်ရှင်သန်မှုက လမ်းကြောင်းပေါ်သို့ ရောက်ရှိသွားသည်။ ထိုအခါ ယင်းကို စောင့်ကြည့်နေကြသော ဘေးပတ်ဝန်းကျင်မှ နတ်ဘုရားများက မျက်လုံးဝင်းလက်သွားကြသည်။

ပြန်ရှင်သန်မှု၏ ဒုတိယခြေလှမ်းက မကြာခင် စတင်တော့မည်။

သို့သော်လည်း ထိုအခိုက်အတန့်မှာ ကြယ်တာရာကောင်းကင်တစ်ခုလုံးက ကျယ်လောင်သော မြည်သံနှင့်အတူ ဝုန်းခနဲ တုန်လှုပ်သွားသည်။ မမျှော်လင့်ထားသော အပြောင်းအလဲတစ်ခု ထွက်ပေါ်လာသည်။

ကမ္ဘာပျက်စီးသံက ရုတ်တရက် ပဲ့တင်ထပ်သွားသည်။ ယင်းက အလွန်ကျယ်လောင်လေရာ ကြယ်တာရာကောင်းကင်သည်ပင် တသိမ့်သိမ့် တုန်ယင်သွားသည်။

ပြင်းထန်သော သက်ရောက်မှုအောက်မှာ ယဇ်ပလ္လင်ကိုးခုက စတင်ပြိုကွဲပျက်စီးသွားကြသည်။ ဘေးပတ်ဝန်းကျင်မှ ကြယ်ဂြိုလ်ရုပ်တုများနှင့် ဘုရားကျောင်းများက အပြင်းအထန် တုန်ယင်သွားကြသည်။ ကြယ်တာရာမြစ်သည်ပင် ပရမ်းပတာ လှုပ်ယမ်းသွားသည်။

တပ်မှူး၏ အစစ်အမှန်နာမည်ကို ရေရွတ်နေကြသော အစစ်အမှန်နတ်ဘုရားများနှင့် ခေါင်းတလားပေါ်မှ နတ်သမီးက ထိတ်လန့်တုန်လှုပ်သွားကြသည်။ ဤသည်မှာ ကျယ်လောင်သော မိုးခြိမ်းသံက ၎င်းတို့၏ အသိစိတ်ထဲမှာ မြည်ဟိန်းသွားသည့်အလားပင်။

မိုးခြိမ်းသံ၏ အနောက်တွင် ပိုပြီးအံ့ဖွယ်ကောင်းသော အပြောင်းအလဲများက ဘေးပတ်ဝန်းကျင်မှာ ထွက်ပေါ်လာသည်။

အမှတ်လေးကြယ်တာရာစက်ဝန်းပိုင်ဆိုင်သော ဤနေရာတွင် အလွန်သိပ်သည်းသော ဒြပ်နှောများဖြင့် ပြည့်နှက်နေသည်။ အစတွင် ဤနေရာက အမှောင်ထုဖြင့် ဖုံးလွှမ်းနေသည်။

သို့သော်လည်း ယခု အဖြူရောင်အလင်းက ဟင်းလင်းပြင်ထဲမှ ရုတ်ချည်း ထွက်ပေါ်လာသည်။

ယင်းက အင်မော်တယ်စွမ်းအင်၏ အရှိန်အဟုန် ဖြစ်သည်။

အင်မော်တယ်စွမ်းအင်က ရုတ်တရက် ရောက်ချလာပြီး ဤနေရာထဲသို့ စိမ့်ဝင်လာသည်။ ယင်းက ကြယ်တာရာကောင်းကင်ထဲမှ အခြေအနေကို သိသာစွာ ပြောင်းလဲသွားစေသည်။

အကယ်၍ တစ်စုံတစ်ယောက်မှာ လျှို့ဝှက်ဆန်းကြယ်မှုအားလုံးကို ထွင်းဖောက်မြင်နိုင်သော မျက်လုံးတစ်စုံရှိမည်ဆိုလျှင် အမှတ်လေးနှင့် အမှတ်ငါးကြယ်တာရာစက်ဝန်း၏ စစ်မြေပြင်တစ်ခုလုံးကို အပေါ်မှ ဖုံးလွှမ်းထားသော အဆုံးမဲ့ဟင်းလင်းပြင်ထဲတွင် အထွတ်အမြတ်နေရာတစ်နေရာ တည်ရှိကြောင်း မြင်နိုင်လိမ့်မည်။

ထိုအထွတ်အမြတ်နေရာတွင် အကန့်အသတ်မဲ့စွာ ကြီးမားကြသော ပုဂ္ဂိုလ်နှစ်ယောက်က ယှဉ်ပြိုင်တိုက်ခိုက်နေကြသည်။

ဤအခိုက်အတန့်မှာ သူတို့နှစ်ယောက်၏ အရှိန်အဟုန်ချင်း အားပြိုင်မှုတွင် ကြီးမားသော အပြောင်းအလဲတစ်ခု ဖြစ်ပေါ်လာသည်။

အင်မော်တယ်အရှင်သခင်ကျန်းလူက စိတ်ဓာတ်ပြတ်သားစွာ လှုပ်ရှားလိုက်သည်။ သူက နတ်ဘုရားများဘက်မှ ညာတောင်ပံစစ်ပွဲဇုန်ကို ပစ်မှတ်ထားလိုက်သည်။

သို့ဖြစ်၍ အင်မော်တယ်စွမ်းအင်လှိုင်းများက တစ်ဟုန်ထိုး တိုးဝင်လာသည့်အခါ ဤပိုင်နက်က ဆေးပန်းချီကားတစ်ချပ်အဖြစ် ချက်ချင်း ပြောင်းလဲသွားသည်။

ပန်းချီကားထဲတွင် အဖြူနှင့်အနက်က ယှက်ထွေသွားပြီး အပြန်အလှန် ဝါးမျိုဖျက်ဆီးရန် ကြိုးစားနေကြသည်။

ဤအခိုက်အတန့်မှာ အဖြူနှင့်အနက်က ရွေ့လျားနေစဉ် တိုက်ပွဲရေစီးကြောင်းက ရုတ်ချည်း ပြောင်းလဲသွားသည်။

ထိုတိုက်ပွဲရေစီးကြောင်းနှင့်အတူ စိတ်ဓာတ်ပြတ်သားစွာ ဆုံးဖြတ်ထားကြသော လူတစ်စုက ရောက်ရှိလာသည်။ အဖြူရောင်အင်မော်တယ်စွမ်းအင်ထဲတွင် ကျင့်ကြံသူစစ်သည်တော်များက အလွန်ပြင်းထန်သော သတ်ဖြတ်ခြင်းစိတ်ဆန္ဒနှင့်အတူ ကြယ်တာရာစက်ဝန်း၏ အကာအကွယ်အလွှာများကို ချိုးဖြတ်၍ စစ်မြေပြင်ဆီသို့ ဝင်ရောက်လာကြသည်။