အဲ့ဒီလူကို သတ်ပစ်

ကြယ်ဂြိုလ်များက မူလလမ်းကြောင်းနေရာမှာ မတုန်မလှုပ် ဆက်လက် ရှိနေကြသည်။

သေဆုံးသွားသော ကြယ်ဂြိုလ်တစ်ခုမှ နောက်ဆုံး ထုတ်လွှတ်လိုက်သော အသက်ငွေ့မှတဆင့် ဖွဲ့စည်းသွားသော တိမ်စိုင်ခဲတစ်ခုသည် စကြာဝဠာထဲမှာ တိတ်တဆိတ် လွင့်မျောနေသည်။

အနီးနားတွင် ရွှီချင်းနှင့် သူ့အဖွဲ့က ဆင်းသက်လာပြီး ထိုတိမ်စိုင်ခဲကို စိုက်ကြည့်လိုက်ကြသည်။

အပေါ်ယံအမြင်မှာတော့ ယင်းက စွမ်းအင်အစိုင်အခဲတစ်ခု ဖြစ်သည်။ မြူခိုးက အစိုင်အခဲကို အပေါ်မှ ဖုံးလွှမ်းထားစဉ် လျှပ်စီးအလင်းတန်းများက နေရာအနှံ့သို့ ဖြတ်ကူးနေကြသည်။

တိမ်စိုင်ခဲ၏ အတွင်းထဲတွင် နတ်ဘုရားအိုကြီးက တည်ငြိမ်သော အမူအရာဖြင့် ထိုင်နေသည်။

၎င်း၏ နတ်ဘုရားအခြေခံက မတည်မငြိမ်ဖြစ်နေသော်လည်း အစစ်အမှန်နတ်ဘုရားဟူသော ၎င်း၏ သရုပ်အဆင့်အတန်းက ဆက်လက်ရှိနေဆဲပင်။

…..

၎င်းက ၎င်း၏ ဖုံးကွယ်မှုအပေါ်မှာ ယုံကြည်ချက်ရှိသည်။ ထိုခြေလှမ်းဝက်အင်မော်တယ်များက ၎င်းတို့ကို အာရုံခံနိုင်လိမ့်မည်ဟု ၎င်းမထင်ပေ။

သို့ဖြစ်၍ ၎င်း၏ အမြင်မှာ ထိုကျင့်ကြံသူများက ဤနေရာတစ်ဝိုက်၌ ကြုံရာကျပန်း လိုက်ရှာဖွေနေခြင်းသာ ဖြစ်သည်။

အကယ်၍ တခြားအချိန်မှာသာဆိုလျှင် ၎င်းက သူတို့ကို ချက်ချင်း သတ်ပစ်လိမ့်မည်။ သို့သော်လည်း ယခုတော့ ၎င်းက သူတို့ကို လျစ်လျူရှုထားလိုက်သည်။

“ လူအန်… အဲ့ဒီလူသားတွေ ငါတို့ကို မရှာနိုင်ပါဘူး ”

နတ်ဘုရားအိုကြီးက တိုးညင်းစွာ ပြောသည်။

သို့သော်လည်း ၎င်းက စကားပြောလိုက်သည်နှင့်ချက်ချင်း တင်ပျဉ်ခွေ၍ တရားထိုင်နေသော ကြယ်တာရာမျက်လုံးနတ်သမီးက မျက်တောင်တဖျပ်ဖျပ်ခတ်လိုက်သည်။ ၎င်း၏ မျက်လုံးထဲမှ ရွှေရောင်အလင်းက သိပ်သည်းလာသည်။ ၎င်း၏ မထူးမခြားနား အမူအရာက ချက်ချင်း တည်ကြည်လေးနက်သွားသည်။

စိတ်ရှုပ်ထွေးသော အရိပ်အယောင်က ၎င်း၏ မျက်နှာပေါ်မှာ ဖျတ်ခနဲ ထွက်ပေါ်လာသည်။ သို့သော်လည်း နောက်အခိုက်အတန့်မှာ ၎င်းက ရုတ်တရက် ပြောသည်။

“ သူတို့ကို သတ်ပစ် ”

နတ်ဘုရားအိုကြီးက အနည်းငယ် မျက်မှောင်ကြုတ်လိုက်ပြီး နတ်သမီးကို လှည့်ကြည့်လိုက်သည်။

၎င်း၏ အမြင်တွင် ယခုအချိန်မှာ ၎င်းတို့က ကိုယ့်ဘာသာ ထုတ်ဖော်ပြီး အန္တရာယ်ကို ဖိတ်ခေါ်ရန် မလိုချေ။

နတ်ဘုရားအိုကြီး၏ အကြည့်ဖြင့် ရင်ဆိုင်ရသောအခါ နတ်သမီးက ပိုပြီးတည်ကြည်လေးနက်သွားသည်။

ဖုံးကွယ်ခြင်းက အကောင်းဆုံး ရွေးချယ်မှုဖြစ်ကြောင်း ထုံးစံအားဖြင့် ၎င်းသိသည်။ သို့သော်လည်း အမည်မသိအကြောင်းအရင်းတချို့ကြောင့် တိမ်စိုင်ခဲအပြင်ဘက်မှ ကျင့်ကြံသူများကို ၎င်းမြင်သွားသည့်အခါ ကံကြမ္မာစိတ်အာရုံကို အမှန်တကယ် ခံစားမိသွားသည်။

ဤသည်မှာ ထိုကျင့်ကြံသူများကို ၎င်းမသတ်နိုင်လျှင် မဟာကပ်ဘေးတစ်ခုက ၎င်းအပေါ်သို့ ဆင်းသက်လာတော့မည့်အလားပင်။

ထိုခံစားမှုက ထူးဆန်းသော်လည်း အလွန်ပြင်းထန်သည်။

သို့ဖြစ်၍ ၎င်း၏ ဘေးမှ နတ်ဘုရားအိုကြီးက ၎င်းကို ကြောင်ကြည့်နေကြောင်း မြင်သွားသောအခါ ကြယ်တာရာမျက်လုံးနတ်သမီးက နတ်ဘုရားအိုကြီးကို အေးစက်စက် စိုက်ကြည့်လိုက်သည်။

“ အခုပဲ ”

နတ်ဘုရားအိုကြီးက တစ်စုံတစ်ခု လွဲမှားနေကြောင်း အာရုံခံမိသွားသည်။ သို့ဖြစ်၍ ၎င်းက ညာလက်ကို မြှောက်လိုက်ပြီး ဖမ်းဆုပ်လိုက်သည်။

ထိုဖမ်းဆုပ်မှုကြောင့် ၎င်းတို့ပုန်းအောင်းနေသော ဧရာမတိမ်စိုင်ခဲက ရုတ်တရက် ဝုန်းခနဲ မြည်သွားပြီး အပြင်းအထန် တုန်ယင်သွားသည်။

တိမ်စိုင်ခဲက ဤအခိုက်အတန့်မှာ တစ်စုံတစ်ယောက်၏ ထိန်းချုပ်ခံလိုက်ရဟန် ရ၏။ ယင်းက မြူခိုးပင်လယ်အဖြစ် ပြောင်းလဲသွားသည်။

ထို့နောက် မြူခိုးပင်လယ်က ရုတ်တရက် ပေါက်ကွဲသွားသည်။

ပေါက်ကွဲမှုမှ ထွက်ပေါ်လာသော လေကြမ်းများက မာန်ဖီဟိန်းသံများနှင့်တကွ ရွှီချင်း၏ အဖွဲ့ဆီသို့ ဦးတည်သွားသည်။ လေကြမ်းများက သူတို့ကို ဝါးမျိုဖျက်ဆီးချင်နေသည်။

ထိုသို့စွမ်းအားက ကမ္ဘာဖျက်ဆီးနိုင်သည်အထိ ကြောက်စရာကောင်းသည်။ စကြာဝဠာထဲမှ ဥပဒေသများနှင့် နိယာမများသည်ပင် ယင်းကို မလှုပ်ခါနိုင်ကြပေ။

လှိုင်းဂယက်များက ဟင်းလင်းပြင်ထဲမှာ ပျံ့နှံ့သွားပြီး ကြယ်တာရာကောင်းကင်က ပုံပျက်တွန့်လိမ်သွားသည်။

တိမ်စိုင်ခဲ ပေါက်ကွဲသွားသည်နှင့်တစ်ပြိုင်နက် ရွှီချင်းနှင့် တခြားလူများက လှုပ်ရှားလိုက်ကြသည်။

ကြယ်တာရာစက်ဝန်း၏ ခန္ဓာကိုယ်ပေါ်တွင် ကောင်းကင်ဘုံဥပဒေသက ထွန်းလင်းတောက်ပလာသည်။ အမိန့်သံကြိုးရာထောင်ချီက သူ့ကို ဝန်းရံသွားသည်နှင့် ညီမျှခြင်းအာဏာစက်က သူ၏ ခန္ဓာကိုယ်ထဲမှ ထွက်ပေါ်လာပြီး ဤနေရာမှ လူတိုင်းကို လွှမ်းခြုံသွားသည်။

သူက လူတိုင်းကို အစွမ်းမြှင့်တင်ပေးလိုက်သည်။

ကျိုးကျန်းလီ၏ ဦးခေါင်းထက်တွင် ထူးခြားဆန်းကြယ်သော မျက်လုံးတစ်လုံး ထွက်ပေါ်လာပြီး ၎င်းက လူတိုင်း၏ ဝိညာဉ်များကို ဆက်သွယ်ပေးလိုက်သည်။ သို့ဖြစ်၍ ဤအခိုက်အတန့်မှာ သူတို့က တစ်စိတ်တစ်ဝမ်းတည်း ဖြစ်သွားကြဟန် ရ၏။

ရှဲလင်းဇီက လက်မြှောက်လိုက်သည်။ သွေးဆာလောင်မှုနှင့် မိစ္ဆာအငွေ့အသက်ကို ထုတ်လွှတ်နေသော နတ်ဆိုးဓားက သွေးနီရောင်အလင်းတန်းနှင့်အတူ သူ၏ ခန္ဓာကိုယ်ထဲမှ ပျံသန်းထွက်လာပြီး သူ့အရှေ့မှာ ကာကွယ်ပေးလိုက်သည်။

လီမုန့်တု၏ အဆိပ်က မြူခိုးအဖြစ် ပြောင်းလဲသွားစဉ် ယွင်ရှန်းစု၏ တောင်တန်းများက ကြယ်တာရာကောင်းကင်ပေါ်မှ ဆင်းသက်လာကြသည်။

တခြားတတ်လှမ်းသူများသည်လည်း လေကြမ်းများ၏ တိုက်ခတ်မှုကို ခုခံတားဆီးရန် သူတို့၏ ဝှက်ဖဲကတ်များကို အသီးသီးထုတ်သုံးလိုက်ကြသည်။

တစ်ချိန်တည်းမှာ သူတို့၏ စွမ်းအားများက ကျိုးကျန်းလီ၏ လျှို့ဝှက်ဆန်းကြယ်သော မျက်လုံးကြောင့် အတူတကွ ပေါင်းစည်းသွားကြသည်။

သူတို့အားလုံး၏ ကျင့်ကြံခြင်းအခြေခံသည် လေ့ကျင့်မှုအမျိုးမျိုးကို ဖြတ်ကျော်ပြီး မူလအနှစ်သာရအများအပြားကို စုပ်ယူပြီးသည့်နောက် ခြေလှမ်းဝက်အင်မော်တယ်အဆင့်သို့ အစောကြီးကတည်းက ချိုးဖြတ်သွားခဲ့ကြသည်။ ဤအခိုက်အတန့်မှာ သူတို့အားလုံးက အတူပူးပေါင်းလိုက်ကြသည်။

ယခု သူတို့က အင်အားပူးပေါင်းလိုက်သည့်အခါ မလှုပ်ခါနိုင်သော ဧရာမတောင်ကြီးတစ်တောင်အဖြစ် ဖွဲ့စည်းသွားသည်။

ထိုဧရာမတောင်၏ အပြင်ဘက်တွင် ရွှီချင်း၏ အကန့်အသတ်မဲ့စွာ ကြီးမားသော အင်မော်တယ်သန္ဓေသားလောင်းက ရပ်နေသည်။

အချိန်လေဟာနယ်အာဏာစက်က ထွက်ပေါ်လာပြီး ဘေးပတ်ဝန်းကျင်ကို လွှမ်းခြုံသွားကာ အလွှာအထပ်ထပ်ကို ဖွဲ့စည်းလိုက်သည်။

ထို့နောက် လေကြမ်းများက အဖျက်စွမ်းအားနှင့်အတူ ချဉ်းကပ်လာပြီး လူတိုင်း၏ စုပေါင်းမှုမှ ဖွဲ့စည်းသွားသော ဧရာမတောင်ပေါ်သို့ ကျရောက်သွားသည်။

ဗုန်း…

နားကွဲလုမတတ် ကျယ်လောင်သော ပေါက်ကွဲသံက မြည်ဟိန်းထွက်လာသည်။

အစစ်အမှန်နတ်ဘုရားတစ်ပါး၏ စွမ်းအားသည် အလွန်ကြောက်စရာကောင်းသည်။ ယခု ၎င်းက အားနည်းနေသည့်တိုင် တိမ်စိုင်ခဲကို ထိန်းချုပ်ထားသော ထိုတိုက်ခိုက်မှုက လူတိုင်းအပေါ် ကြီးမားသော ဖိအားကို ပေးစွမ်းနိုင်ဆဲပင်။

ဧရာမတောင်သည် အသက်ရှူချိန်အနည်းငယ် ကြာပြီးနောက် ပြိုကွဲပျက်စီးသွားသည်။

လူတိုင်း၏ ခန္ဓာကိုယ်က တုန်ယင်သွားပြီး ဒဏ်ရာအမျိုးမျိုး ရရှိသွားကြသည်။ တချို့ဆိုလျှင် သွေးအန်လိုက်ရပြီး အနောက်ဆုတ်သွားကြရသည်။

သို့သော်လည်း နောက်ဆုံးမှာတော့ သူတို့က အားနည်းနေသော ထိုအစစ်အမှန်နတ်ဘုရား၏ တိုက်ခိုက်မှုကို အောင်မြင်စွာ ခုခံနိုင်ခဲ့ကြဆဲပင်။

သူတို့က အနောက်ဆုတ်သွားကြသည်။ သူတို့က ဆိုးဝါးသော အခြေအနေမှာရှိနေပြီး သူတို့၏ ကျင့်ကြံခြင်းအခြေခံက ဖရိုဖရဲဖြစ်နေသော်လည်း သူတို့က အမျိုးမျိုးသော အသက်ကယ်နည်းလမ်းများကို ကျွမ်းကျင်စွာ ထုတ်သုံးလိုက်ကြသည်။

သို့သော်လည်း ကြီးမားသော အံ့ဩထိတ်လန့်မှုက သူတို့၏ စိတ်ထဲမှာ မုန်တိုင်းသဖွယ် ထွက်ပေါ်လာသည်။

သူတို့ကို အံ့ဩထိတ်လန့်သွားစေသည်မှာ ထိုအစစ်အမှန်နတ်ဘုရား၏ ရုတ်တရက် တိုက်ခိုက်မှုမဟုတ်ပေ။ ယင်းအစား သူတို့က နတ်သမီးနှင့် အမှန်တကယ် တွေ့ဆုံသွားသောကြောင့် အံ့ဩထိတ်လန့်သွားကြခြင်း ဖြစ်သည်။

ရွှီချင်းက နတ်သမီးကို သူရှာဖွေနိုင်လောက်သည်ဟု ပြောခဲ့သော်လည်း အမှန်မှာ ကျိုးကျန်းလီအပါအဝင် လူတိုင်းက ယင်းကို မယုံကြည်ကြချေ။

သူတို့က ရွှီချင်းကို မယုံကြည်ခြင်း မဟုတ်ပေ။

သို့သော်လည်း ထိုသို့ကိစ္စက အပြည့်အဝ ယုံကြည်ပေးရန် အလွန်ခက်ခဲသောအရာ ဖြစ်၏။

အကယ်၍ ရွှီချင်းမဟုတ်ဘဲ တခြားတစ်ယောက်ကသာ ထိုသို့ပြောခဲ့မည်ဆိုလျှင် သူတို့က ထိုလူကို လုံးဝယုံကြည်ကြလိမ့်မည် မဟုတ်ချေ။

မည်သို့ဖြစ်ပါစေ ဘယ်တောင်ပံစစ်ပွဲဇုန်၏ ရှေ့တန်းစစ်မြေပြင်က ဖော်မပြနိုင်အောင် အလွန်ကျယ်ပြောသည်။ ယေဘုယျအားဖြင့်ဆိုရလျှင် နတ်သမီးနှင့် သူတို့တွေ့ဆုံနိုင်သော ဖြစ်နိုင်ခြေက အလွန်နည်းပါးသည်။

သို့သော်လည်း ယခုတော့…

သူတို့က နှလုံးတုန်သွားကြပြီး သူတို့၏ အရှေ့မှ တိမ်စိုင်ခဲကို ကြည့်လိုက်ကြသည်။

တိမ်စိုင်ခဲက ပြန့်ကျဲသွားသည့်အခါ သူတို့၏ အမြင်က ရှင်းလင်းသွားသည်။

မြူခိုးများကြားတွင် ပုံရိပ်နှစ်ခုက ထွက်ပေါ်လာကြသည်။

တစ်ယောက်က အရှေ့မှာဖြစ်ပြီး အခြားတစ်ယောက်က အနောက်မှာ ဖြစ်သည်။

အရှေ့မှ တစ်ယောက်က ဇရာအိုမင်းနေပြီး ၎င်း၏ မျက်နှာက လူသားမျက်နှာနှင့် ဆင်တူပေသည်။ ၎င်းက ရွှေရောင်ဝတ်စုံကို ဝတ်ဆင်ထားပြီး ၎င်း၏ တစ်ကိုယ်လုံးမှ ကြောက်မက်ဖွယ်ကောင်းသော အခွင့်အာဏာအရှိန်အဝါကို ထုတ်လွှတ်နေသည်။ ၎င်း၏ မျက်နှာပေါ်မှာ မထူးမခြားနား အမူအရာရှိပြီး ၎င်း၏ မျက်လုံးက အေးစက်နေသည်။

၎င်းက အရှေ့သို့ ခြေတစ်လှမ်း လှမ်းလိုက်သည့်အခါ တအင့်အင့်ညည်းသံကို ထုတ်လွှတ်နေသော လေကြမ်းများက ၎င်း၏ ဘေးပတ်ဝန်းကျင်မှာ တိုက်ခတ်လာသည်။ ဤသည်မှာ ၎င်း၏ ဘေး၌ မရေမတွက်နိုင်သော ဝိညာဉ်များက မချိတင်ကဲဝေဒနာကို ခံစားနေရသည့်အလား အော်ဟစ်ငိုကြွေးနေကြဟန် ရ၏။

၎င်းထံမှ ထုတ်လွှတ်နေသော ဖိအားက ဒြပ်ထည်တည်ရှိလုနီးပါးပင်။ ယင်းက ၎င်း၏ ဘေးပတ်ဝန်းကျင်၌ တင်းကြပ်သော လေထုကို ဖြစ်ပေါ်စေသည်။ ထိုဖိအားအောက်မှာ ကြယ်တာရာကောင်းကင်က ပုံပျက်တွန့်လိမ်သွားပြီး အမင်္ဂလာအငွေ့အသက်က ဘေးပတ်ဝန်းကျင်ကို လွှမ်းခြုံသွားသည်။

၎င်း၏ အနောက်တွင် ဘုရားကျောင်းပုံရိပ်တစ်ခု ထွက်ပေါ်နေသည်။ ထိုဘုရားကျောင်းက ယိုယွင်းပျက်စီးနေပြီး ပြိုကျလုနီးပါးပင်။ နံရံများက အက်ကွဲနေပြီး ထောင့်တိုင်များက ဆွေးမြေ့နေကြသည်။ ဘုရားကျောင်းပုံရိပ်ထဲဝယ် မထင်မရှား သတ္တဝါများက ထွက်ပေါ်လာကြသည်။ ၎င်းတို့က တိတ်ဆိတ်စွာ အိမ်မောကျနေကြသော သားရဲကြီးများ သို့မဟုတ် အမှောင်ထုထဲမှ တွားသွားထွက်လာနေကြသော အရုပ်ဆိုးသက်ရှိများနှင့် ဆင်တူကြသည်။

ယိုယွင်းပျက်စီးနေသော ဘုရားကျောင်း၏ အလယ်ဗဟိုတွင် နတ်ဘုရားတစ်ပါးက ကိုးကွယ်ပူဇော်ခံထားရသည်။

ထိုနတ်ဘုရားက လေထဲမှာ ကျောချမ်းဖွယ်ကောင်းစွာ မျောလွင့်နေသည်။ ၎င်း၏ အသွင်သဏ္ဍာန်က မထင်ရှားသော်လည်း သေးငယ်သော လက်မောင်းအများအပြားက သစ်ပင်၏ အကိုင်းအခတ်များသဖွယ် အရှေ့သို့ ဆန့်တန်းနေကြသည်။ ထိုလက်များက အရပ်မျက်နှာအဘက်ဘက်တွင် ရွေ့လျားနေကြသည်။ ယင်းတို့ထံမှ လက်ချောင်းတစ်ချောင်းစီက ညှိုးခြောက်နေသော ပိုးကောင်တစ်ကောင်နှင့် ဆင်တူပြီး စက်ဆုပ်ရွံရှာဖွယ်ကောင်းသည်။ ထို့ပြင် ၎င်းထံမှ လက်သည်းရှည်များကလည်း ဓားသွားများသဖွယ် အလွန်ချွန်ထက်ပြီး အမှောင်ထုထဲ၌ အေးစက်စက်အလင်းကို ထုတ်လွှတ်နေသည်။

၎င်း၏ ခန္ဓာကိုယ်က ပြင်းထန်သော အင်အားတစ်ခုကြောင့် ထိခိုက်ပျက်စီးထားဟန် ရသည်။ ၎င်း၏ အပေါ်ပိုင်းခန္ဓာကိုယ်က ပုံပျက်တွန့်လိမ်နေပြီး မဖြစ်နိုင်သော ထောင့်ဆီသို့ ကွေးညွတ်နေသည်။ ယင်းက ၎င်း၏ အပေါ်ပိုင်းခန္ဓာကိုယ်နှင့် အောက်ပိုင်းခန္ဓာကိုယ်ကြားတွင် ပုံမှန်မဟုတ်သော ဆုံပိုင်းတစ်ခုကို ဖွဲ့စည်းထားစေသည်။

ဤသည်မှာ အားအနည်းငယ်က ၎င်းပေါ်သို့ သက်ရောက်သွားသည်နှင့် ၎င်းက အချိန်မရွေး ပြိုကျပျက်စီးသွားတော့မည့်အလားပင်။

၎င်း၏ မျက်နှာက မှိန်ဖျော့ဖျော့ တောက်ပသော အနက်ရောင်အကြေးခွံများဖြင့် ပြည့်နှက်နေပြီး အကြေးခွံတစ်ခုစီက အေးစက်မှုကို ထုတ်လွှတ်နေသည်။

၎င်း၏ ပါးစပ်ပေါက်က အရုပ်ဆိုးစွာ အလွန်ကျယ်ပြောပြီး ၎င်း၏ ပါးစပ်ထောင့်နှစ်ခုက နားရွက်နားထိ ရောက်ရှိနေကြသည်။ ထိုပါးစပ်ပေါက်ထဲတွင် ထက်ရှသော အစွယ်များက နှုတ်ခမ်းအစွန်းတစ်လျှောက် စီတန်းနေကြလေရာ လွှသွားသဖွယ် အောက်မေ့ရသည်။

၎င်း၏ အပေါ်သွားနှင့် အောက်သွားကြားတွင် အနီရောင်ရဲရဲတောက်သော လျှာက အရှေ့မှအနောက်သို့ လူးလွန့်နေသည်။ လျှာက စပါးအုံးမြွေနှင့် ဆင်တူပြီး အရုပ်ဆိုးအကျည်းတန်သည်။ ဤသည်မှာ ရှည်လျားသော သက်ရှိတစ်ကောင်က အသက်ဓာတ်အနှစ်သာရကို အရသာခံရန် အပြင်သို့ ခေါင်းတိုးထွက်လာနေသည့်အလားပင်။

၎င်း၏ ဦးခေါင်းပေါ်တွင်တော့ အရွယ်အစားကြီးမားသော သလင်းကျောက်တစ်ခုက ထွန်းလင်းနေသည်။ သလင်းကျောက်၏ ပုံသဏ္ဍာန်က မညီညာပေ။ သို့သော်လည်း မရေမတွက်နိုင်သော အလင်းစီးကြောင်းများက သလင်းကျောက်ထဲမှာ ယှက်ထွေးစီးဆင်းနေပြီး လျှို့ဝှက်ဆန်းကြယ်မှုကို ထုတ်လွှတ်နေသည်။

၎င်း၏ ဘေးပတ်ဝန်းကျင်တွင် မှိန်ဖျော့သော ခရမ်းရောင် ရောင်ခြည်စက်ဝန်းတစ်ခု ရှိသည်။ ထိုရောင်ခြည်စက်ဝန်းထဲတွင် မျက်နှာရှုံ့မဲ့နေကြသော လူသားမျက်နှာများက မရေမတွက်နိုင်အောင် များပြားသည်။ သူတို့က စိတ်ပျက်အားလျော့ခြင်းနှင့် ပြင်းထန်သော ဝေဒနာခံစားရခြင်းကို ထုတ်ဖော်ပြနေကြသည်။

၎င်းက အစစ်အမှန်နတ်ဘုရား၏ နတ်ဘုရားစွမ်းအင်အမြူတေ ဖြစ်သည်။

အမြူတေထဲမှာ ဥပဒေသအားလုံးထက် သာလွန်သော နတ်ဘုရားစိတ်ဆန္ဒတစ်ခု ပါဝင်သည်။

နတ်ဘုရားအိုကြီး၏ အနောက်မှ ပုံရိပ်သည်တော့ တခြားလောကမှ ဆင်းသက်လာဟန်ရသော လွန်စွာ ချောမောလှပသည့် မိန်းမပျိုလေးတစ်ဦး ဖြစ်သည်။

၎င်းက မြူခိုးထဲမှာ ဖြည်းညင်းစွာ ထွက်ပေါ်လာသည်။

၎င်းက လူသားအသွင်သဏ္ဍာန်ဖြင့် ရှိသည်။ ၎င်း၏ ခန္ဓာကိုယ်က အရပ်ရှည်ပြီး ပိန်ပါးသေးသွယ်သည်။

၎င်းက အဆုံးမဲ့အမှောင်ထု၏ အနက်ရောင်ချည်မျှင်များဖြင့် ရက်လုပ်ထားဟန်ရသော ဂါဝန်ကို ဝတ်ဆင်ထားသည်။ ၎င်း၏ ဝတ်စုံပေါ်တွင် မှိန်ဖျော့သော အပြာရောင်အလင်းက ထွန်းလင်းနေပြီး ချောက်ချားဖွယ်ကောင်းသော အငွေ့အသက်ကို ပေးသည်။ ၎င်း၏ ဝတ်စုံပေါ်မှ ချုပ်ရိုးကြောင်းများပေါ်တွင် ရှုပ်ထွေးနက်နဲသော မှော်မျဉ်းကြောင်းများ ရှိသည်။ ပိုပြီးအံ့ဖွယ်ကောင်းသည်မှာ မရေမတွက်နိုင်သော ဝိညာဉ်များက ထိုမှော်မျဉ်းကြောင်းများထဲမှာ ပိတ်လှောင်ခံထားကြရပြီး အော်ဟစ်ညည်းညူနေကြသည်။

၎င်းက ခြေတစ်လှမ်း လှမ်းလိုက်တိုင်း တစ္ဆေမီးတောက်များက ၎င်း၏ ဘေးပတ်ဝန်းကျင်မှာ မှိတ်တုတ်မှိတ်တုတ် ထွက်ပေါ်လာလေ့ ရှိသည်။

၎င်း၏ အသားအရေက နှင်းထက်ပင် ပိုပြီးဖြူဖွေးသည်။ သို့တိုင် ယင်းက အေးစက်မှုကို ပေးစွမ်းသည်။ ဤသည်မှာ ၎င်း၏ အသားအရေက မည်သည့်အခါမှ အရည်မပျော်နိုင်မည့် ရေခဲမြစ်ဖြစ်သည့်အလားပင်။ ယင်းက အဆုံးမဲ့သော အအေးဓာတ်ကို ထုတ်လွှတ်နေသည်။

ယင်းက ၎င်းအား မြင်လိုက်ရသူတိုင်းကို အဆုံးမဲ့သော ရေခဲချောက်နက်ထဲသို့ ပြုတ်ကျသွားသည့်အလား ခံစားရမိစေလိမ့်မည်။

၎င်း၏ မျက်နှာက ပြစ်ချက်မဲ့စွာ ပြီးပြည့်စုံသည်။ ၎င်း၏ ခန္ဓာကိုယ်က သိမ်မွေ့နူးညံ့ပြီး ၎င်း၏ ကိုယ်ဟန်လှုပ်ရှားမှုများဖြင့် လိုက်ဖက်သင့်တယ်သည်။ သို့တိုင် ၎င်း၏ ရှည်လျားနက်မှောင်သော မျက်ခုံးများက ဝမ်းနည်းမှုတစ်စွန်းတစ်စနှင့် မကျေနပ်မှုအရိပ်အယောင်ကို သယ်ဆောင်ထားဟန် ရ၏။ ယင်းက ဆန့်ကျင်ဘက်ဆွဲဆောင်မှုကို ဖြစ်ပေါ်စေသည်။

ဤသည်မှာ ၎င်း၏ အနည်းငယ် မျက်မှောင်ကြုတ်မှုက တစ်စုံတစ်ယောက်၏ နှလုံးသားထဲမှ မွေးရာပါအကြောက်တရားကို ဆွဲထုတ်ပေးနိုင်သည့်အလားပင်။

သို့သော်လည်း ၎င်း၏ အနက်ရောင်မျက်လုံးများက အံ့ဖွယ်အကောင်းဆုံးဖြစ်ပြီး အောက်ခြေမဲ့သော အနက်ရောင်အာကာသတွင်းနက်များနှင့် ဆင်တူကြသည်။ ဤသည်မှာ ထိုမျက်လုံးများထဲ၌ အံ့ဖွယ်ကောင်းသော လျှို့ဝှက်ဆန်းကြယ်မှုများက ကိန်းအောင်းနေသည့်အလားပင်။

သို့သော်လည်း ထိုအမှောင်ထုထဲမှာ သာမန်မဟုတ်သော သွေးနီရောင်အလင်းက ထွန်းလင်းတောက်ပနေလေရာ ယင်းက တမူထူးခြားသော မိစ္ဆာအလှတရားကို ပေးသည်။

၎င်း၏ နှုတ်ခမ်းက အနီရောင် ရဲရဲတောက်လေရာ နှင်းပေါ်တွင် သွေးများ စီးကျနေသည့်အလားပင်။ ဤသည်မှာ ထိုနှုတ်ဖျားက စိတ်သက်သာရာရစေမည့် သိမ်မွေ့ညင်သာသော စကားလုံးများကို ပြောမည့်အစား ဝိညာဉ်များကို အဆုံးမဲ့စွာ ညှဉ်းပန်းနှိပ်စက်မည့် ကျိန်စာများကိုသာ ထုတ်ပြောမည့်ဟန် ရသည်။

ငွေရောင်ဆံပင်ရှည်က ၎င်း၏ ကျောနောက်တွင် ရေတံခွန်ပမာ ကျဆင်းနေပြီး အေးစက်မှု၊ အသက်ဓာတ်ကင်းမဲ့မှုနှင့် သိမ်မွေ့ညင်သာမှုကို ထုတ်လွှတ်နေသည်။ ဤအခိုက်အတန့်မှာ မြူခိုးက ၎င်း၏ ဘေးပတ်ဝန်းကျင်၌ လွင့်မျောနေလေရာ ယင်းက အိမ်မက်ဆန်သော အရှိန်အဝါကို ဖြစ်ပေါ်စေသည်။

မြူခိုးထဲတွင် တစ္ဆေမျက်နှာများက ရံဖန်ရံခါ ထွက်ပေါ်လာလေ့ ရှိသည်။ ၎င်းတို့က မြူခိုးထဲမှာ ထွက်ပေါ်လာသည့်အခါတိုင်း ပါးစပ်ကျယ်ကျယ်ဟ၍ အသက်မထွက်ဘဲ အော်ဟစ်ကြလိမ့်မည်။ ထိုတစ္ဆေမျက်နှာများက နတ်သမီး၏ ဘေးမှာ လှည့်ပတ်နေကြသော်လည်း ၎င်းတို့က နတ်သမီး၏ အနားသို့ မချဉ်းကပ်ဝံ့ကြချေ။ ယင်းအစား ၎င်းတို့က နတ်သမီးကို စိုးရိမ်ကြောက်လန့်နေကြသည်။ တစ္ဆေမျက်နှာများ၏ တည်ရှိမှုက နတ်သမီး၏ အလှတရားကို ပိုပြီးချောက်ချားဖွယ်ကောင်းစေသည်။

တစ်နည်းဆိုရသော် ဤနတ်သမီးက အလှတရားနှင့် အကြောက်တရားကို ပေါင်းစည်းထားသော ပြယုဂ်တစ်ခု ဖြစ်သည်။ ၎င်းက နတ်သမီးပုံပြင်များထဲမှ နတ်မိမယ်သဖွယ် လှပသော်လည်း အိမ်မက်ဆိုးများထဲမှ အကြောက်တရားကိုလည်း ပေးစွမ်းနိုင်ပေသည်။

ထိုသို့ထူးခြားဆန်းကြယ်သော မြင်ကွင်းက ရွှီချင်းနှင့် တခြားလူများ၏ မျက်လုံးထဲမှာ ပုံရိပ်ပြန်လာသည့်အခါ သူတို့၏ ဝိညာဉ်က ပရမ်းပတာ တုန်လှုပ်သွားသည်။

သို့သော်လည်း တစ်ချိန်တည်းမှာ အလွန်အားကောင်းသော တိုက်ပွဲစိတ်ဆန္ဒက သူတို့၏ နှလုံးသားထဲမှာ ပေါ်လျှိုးလာသည်။

ကြယ်တာရာစက်ဝန်းက မျက်လုံးဝင်းလက်သွားပြီး ကျိုးကျန်းလီက မျက်လုံးမှေးကျဉ်းလိုက်သည်။ ရှဲလင်းဇီ၏ သတ်ဖြတ်ခြင်းစိတ်ဆန္ဒက အလွန်သိပ်သည်းလာပြီး တခြားလူများသည်လည်း ထို့အတူပင်။

ချွင်းချက်အနေဖြင့် ချမ်ကျွင်းနှင့် ပိုင်ရီ၏ အတွေးများထဲမှာသာ ချောက်ချားမှုဖြင့် ပြည့်နှက်သွားသည်။ သူတို့၏ အသိစိတ်က ပရမ်းပတာ လှုပ်ခတ်သွားသည်။

“ ငါတို့ တကယ်ကြီး နတ်သမီးကို ရှာတွေ့သွားတာလား ”

ညီအကိုနှစ်ယောက်၏ ဝိညာဉ်များက တုန်ယင်သွားကြသည်။

ရွှီချင်းသည်တော့ သူ၏ အမူအရာက အစမှအဆုံးထိ အေးဆေးတည်ငြိမ်သည်။ သူက တိမ်စိုင်ခဲထဲမှ ထွက်လျှောက်လာနေသော ပုံရိပ်ကို ကြည့်လိုက်သည်။ ထို့နောက် သူ၏ အကြည့်က အလှတရားနှင့် အကြောက်တရားကို ဖော်ဆောင်ထားသော နတ်သမီးထံသို့ ကျရောက်သွားသည်။

ကြယ်တာရာမျက်လုံးနတ်သမီးထံမှ အကြည့်သည်လည်း ရွှီချင်းပေါ်သို့ ကျရောက်သွားသည်။

ဤအခိုက်အတန့်မှာ သူတို့နှစ်ယောက်၏ အကြည့်ကို တိမ်စိုင်ခဲက မတားဆီးထားပေ။ သို့ဖြစ်၍ သူတို့၏ အကြည့်ချင်း တွေ့ဆုံသွားသည့်အခိုက် နတ်သမီးက အပြင်းအထန် နှလုံးတုန်ယင်သွားသည်။

အနီရောင်အလင်းက ၎င်း၏ မျက်လုံးထဲမှာ ထွက်ပေါ်လာသည်နှင့် ၎င်းက လက်မြှောက်လိုက်ပြီး ရွှီချင်းထံသို့ ညွှန်ပြလိုက်သည်။

“ အဲ့ဒီလူကို သတ်ပစ် ”

“ ဘာတွေပဲ စတေးရ စတေးရ သူ့ကို သတ်ပစ် ”

ကြယ်တာရာမျက်လုံးနတ်သမီး၏ နတ်ဘုရားအသံက ပဲ့တင်ထပ်သွားသည်။ ထိုအသံထဲမှာ အလွန်ရှားပါးသော စိတ်အားထက်သန်မှုက ကိန်းအောင်းနေသည်။ ထိုမြင်ကွင်းက နတ်ဘုရားအိုကြီးကို အနည်းငယ် အံ့ဩသွားစေသည်။ သို့ဖြစ်၍ ၎င်းက နတ်သမီးကို လှည့်ကြည့်လိုက်သည်။

၎င်းက လူအန်ကို ကာကွယ်စောင့်ရှောက်ပေးခဲ့သည်မှာ နှစ်ပေါင်းအတော်ကြာပြီ ဖြစ်၏။ သို့သော်လည်း တစ်ဖက်လူ၏ ထိုသို့စိတ်အားထက်သန်မှုကို တစ်ခါမှ ၎င်းမမြင်ဖူးချေ။

ယခင်က လူအန်က စစ်မြေပြင်မှာ ရှုံးနိမ့်သွားခဲ့ပြီး ထွက်ပြေးခဲ့ရသော်လည်း တစ်ခဏမျှသာ စိတ်ရှုပ်ထွေးသွားခဲ့သည်။

သို့သော်လည်း နတ်ဘုရားအိုကြီးက နောက်ထပ် မမေးချေ။ ၎င်းတို့က တိုက်ခိုက်ရန် ရွေးချယ်လိုက်မှတော့ သဲလွန်စအားလုံးကို ဖျက်ဆီးပစ်ရန်အလို့ငှာ…

ဤနေရာမှ လူတိုင်းကို ၎င်းသတ်ပစ်ရလိမ့်မည်။

ထို့ပြင် ၎င်းက ယင်းကို မြန်နိုင်သမျှမြန်မြန် ဆောင်ရွက်ရလိမ့်မည်။

ချက်ချင်းဆိုသလို နတ်ဘုရားအိုကြီးက မျက်လုံးမှိတ်လိုက်သည်။

၎င်းမျက်လုံးမှိတ်လိုက်သည့်အခိုက် ၎င်း၏ အနောက်မှ ဘုရားကျောင်းက ဝုန်းခနဲ တုန်လှုပ်သွားသည်။ ဘုရားကျောင်းထဲမှာ မျောလွင့်နေသော နတ်ဘုရားက ၎င်း၏ အစွမ်းကို ထုတ်လွှတ်လိုက်သည်။

ယင်းက ကြယ်တာရာကောင်းကင်ကို ဖရိုဖရဲဖြစ်သွားစေပြီး ဟင်းလင်းပြင်ကို အပိုင်းပိုင်း ဆုတ်ပြဲသွားစေသည်။ ဘုရားကျောင်းသည်လည်း ရွေ့လျားသွားပြီး ကြယ်တာရာကောင်းကင်ထဲမှာ တိုက်ရိုက် ထွက်ပေါ်လာသည်။

ယင်းက ပုံရိပ်ယောင်အခြေအနေမှ ဒြပ်ထည်ဖွဲ့စည်းသွားပြီး အလွန်သိပ်သည်းသော ဒြပ်နှောကို ထုတ်လွှတ်လိုက်သည်။

တစ်ချိန်တည်းမှာ ဘုရားကျောင်းက သီးခြားဖြစ်တည်စေမည့် စွမ်းအားကို ထုတ်လွှတ်လိုက်ပြီး ဤနေရာမှ အရာအားလုံးကို ဖုံးလွှမ်းလိုက်သည်။

ထို့နောက် ဘုရားကျောင်းဂိတ်တံခါးက ပွင့်သွားပြီး အထဲမှ နတ်ဘုရားက အပြင်သို့ ထွက်လျှောက်လာသည်။

ကြယ်တာရာကောင်းကင်က ထိတ်လန့်ဖွယ်ကောင်းစွာ ပြောင်းလဲသွားသည်။