ကံကြမ္မာကို အသုံးပြုခြင်း

ထိုနတ်ဘုရားအိုကြီးက ဝိညာဉ်ကျောက်တုံးအင်မော်တယ်သခင်ကြောင့် အပြင်းအထန် ဒဏ်ရာရရှိသွားပြီး ကံကောင်းထောက်မ၍သာ အသက်ဘေးမှ လွတ်မြောက်သွားခဲ့သည်။ သို့တိုင် ၎င်းက ၎င်း၏ အစစ်အမှန်နတ်ဘုရားအဆင့်ကို ထိန်းထားနိုင်ရုံမျှသာ တတ်စွမ်းတော့သည်။

၎င်း၏ အခြေအနေက အက်ကွဲရာများဖြင့် ပြည့်နှက်နေသော ဖန်အိုးတစ်လုံးနှင့် ဆင်တူသည်။ ဖန်အိုးက အချိန်မရွေး အက်ကွဲသွားနိုင်သည်။ ၎င်းက ပြန်ကောင်းမွန်ရန် မလွယ်ကူတော့ချေ။

ထို့ပြင် ၎င်းက ရွှီချင်း၏ အဖွဲ့နှင့် တိုက်ခိုက်ခဲ့ပြီး နောက်ထပ် ဒဏ်ရာရရှိသွားခဲ့သည်။

လူသတ်ကွက်ဖြစ်သော သံချောင်းက ဝိညာဉ်ကျောက်တုံးအင်မော်တယ်သခင်ကြောင့် ဒဏ်ဖြစ်နေသော ၎င်း၏ ခန္ဓာကိုယ်အစိတ်အပိုင်းတည့်တည့်ကို တိုက်ရိုက် ထိုးဖောက်သွားခဲ့သည်။ ထိုထိုးနှက်ချက်က ၎င်း၏ နတ်ဘုရားစွမ်းအင်အမြူတေအပေါ်ကိုလည်း သက်ရောက်သွားခဲ့သည်။

ဘုရားကျောင်းက ပြိုကျပျက်စီးသွားသည်။ ၎င်း၏ အစစ်အမှန်နတ်ဘုရား အသွင်သဏ္ဍာန်သည်လည်း ပြန်မကောင်းမွန်နိုင်တော့သည်အထိ ပျက်စီးသွားသည်။ ၎င်း၏ နတ်ဘုရားစွမ်းအင်အမြူတေက မှေးမှိန်သွားပြီး ၎င်းက အစစ်အမှန်နတ်ဘုရားအဆင့်မှ နိမ့်ကျသွားသည်။ ၎င်းက အလုံးစုံပျက်စီးသွားရန် သိပ်မလိုတော့ချေ။

အဝေးမှ ကြယ်တာရာကောင်းကင်တွင် မြန်ဆန်စွာ ချဉ်းကပ်လာနေကြသော ကျင့်ကြံသူများ၏ အရှိန်အဝါက ပိုပြီးထင်ရှားလာနေသည်။ သူတို့ထဲတွင် ကြောက်မက်ဖွယ်ကောင်းသော အဆင့်နိမ့်အင်မော်တယ်တစ်ပါး၏ အရှိန်အဝါလည်း ပါရှိသည်။

…..

ထိုအချက်အားလုံးကို စုပေါင်းလိုက်သည့်အခါ နတ်ဘုရားအိုကြီးသည် ၎င်း၏ တာဝန်ဖြစ်သော နတ်သမီးကို ကာကွယ်ပေးခြင်းက ယခင်ထက် ပိုပြီးအန္တရာယ်များလာကြောင်း နားလည်သွားသည်။ အစက ၎င်းက အနောက်သို့ အမြန်ဆုတ်သွားပြီး နတ်သမီးကို ကာကွယ်ပေးရန် စဉ်းစားထားခဲ့သည်။

သို့သော်လည်း နတ်သမီးထံမှ နတ်ဘုရားအသံက ပဲ့တင်ထပ်လာခဲ့သည်။

နတ်သမီးက ၎င်းအား ကိုယ့်ကိုယ်ကိုယ် သတ်သေစေလိုသည်။

တစ်ခဏ တုံ့ဆိုင်းသွားပြီးနောက် ၎င်းက နတ်သမီးကို ကြည့်လိုက်သည်။ ပထမဆုံးအကြိမ် ၎င်း၏ မျက်လုံးထဲမှာ စိတ်ရှုပ်ထွေးမှု ထွက်ပေါ်လာသည်။

နတ်ဘုရားများမှာ စိတ်ခံစားချက်များ မရှိပေ။

ယင်းကို ၎င်းသိသည်။ သို့သော်လည်း ဖြစ်နိုင်သည်မှာ ၎င်း၏ နတ်ဘုရားအဆင့်က နိမ့်ကျသွားခြင်းကြောင့်လော သို့မဟုတ် ၎င်း၏ ဒဏ်ရာများက အလွန်ဆိုးဝါးနေခြင်းကြောင့်လော ဤအခိုက်အတန့်မှာ ၎င်း၏ နတ်ဘုရားသဘာဝက ယိမ်းယိုင်လာသည်။

ထိုသို့ပရမ်းပတာဖြစ်နေစဉ် ၎င်းက ငယ်ရွယ်သော နတ်သမီး၏ ပုံရိပ်ကို မြင်တွေ့သွားသည်။

၎င်းက နတ်သမီး၏ အရွယ်ရောက်လာမှုနှင့် အထွတ်အထိပ်သို့ တစ်လှမ်းချင်း တတ်လှမ်းသွားပုံကို ကြည့်ရှုခဲ့ရသည်။

“ ဒီဟာက စိတ်ခံစားချက်လား ”

နတ်ဘုရားအိုကြီးက တိတ်ဆိတ်သွားပြီး အနောက်သို့ ဖြည်းညင်းစွာ လှည့်လိုက်သည်။ ထို့နောက် ၎င်းက အနောက်ဆုတ်သွားနေသော ရွှီချင်း၏ အဖွဲ့နှင့် မျက်နှာချင်းဆိုင်လိုက်သည်။

၎င်းက စိတ်ဆုံးဖြတ်လိုက်ပြီး အရှေ့သို့ ခြေတစ်လှမ်း လှမ်းလိုက်သည်။

ချက်ချင်းဆိုသလို ၎င်း၏ မျက်လုံးထဲမှ ရွှေရောင်အလင်းက အလွန်သိပ်သည်းသွားပြီး ရွှေရောင်အလင်းပင်လယ်ကို ဖွဲ့စည်းသွားသည်။ ရွှေရောင်အလင်းပင်လယ်က ကြယ်တာရာကောင်းကင်ဆီသို့ ဦးတည်ပျံ့ပွားသွားသည်။

ထိုရွှေရောင်အလင်းပင်လယ်ထဲတွင် ကြောက်မက်ဖွယ်ကောင်းသော နတ်ဘုရားအစွမ်းက ပရမ်းပတာ လှုပ်ခတ်နေသည်။

ရွှေရောင်အလင်းပင်လယ်ထဲတွင် နတ်ဘုရားအိုကြီး၏ ခန္ဓာကိုယ်က ဆက်တိုက် ကျယ်ပြောလာနေပြီး အဆမတန် ကြီးမားလာနေကြောင်း မည်သူမဆို ဝေဝေဝါးဝါး မြင်နိုင်ပေသည်။ ၎င်း၏ အရှိန်အဝါက တဖြည်းဖြည်း ပိုပြီးကြောက်မက်ဖွယ်ကောင်းလာပြီး အဆုံးစွန်သို့ မြန်ဆန်စွာ ရောက်ရှိသွားသည်။

ဝိညာဉ်ဖျက်ဆီးပစ်နိုင်သော နတ်ဘုရားတီးတိုးရေရွတ်သံများလည်း ပျံ့လွင့်လာသည်။ ယင်းတို့က နားကွဲလုမတတ် အလွန်ကျယ်လောင်သည်။

အသံတစ်သံက ရွှေရောင်အလင်းပင်လယ်ထဲမှ ပေါ်လျှိုးလာပြီး အရပ်မျက်နှာအဘက်ဘက်သို့ ပျံ့လွင့်သွားသည်။

ရွှေရောင်က ကြယ်တာရာကောင်းကင်ကို ထွန်းလင်းသွားစေပြီး စကြာဝဠာထဲ၌ ကြီးမားသော အားလှိုင်းဂယက်များကို ဖန်တီးလိုက်သည်။

အဲ့ဒီနတ်ဘုရားက ကိုယ့်ကိုယ်ကိုယ် ဖောက်ခွဲဖို့ ကြိုးစားနေတာ…

ထိုအစစ်အမှန်နတ်ဘုရား၏ နတ်ဘုရားအဆင့်က နတ်ဘုရားယဇ်ပလ္လင်သို့ နိမ့်ကျသွားပြီး ၎င်း၏ နတ်ဘုရားစွမ်းအင်အမြူတေက အရောင်မှေးမှိန်သွားသော်လည်း ၎င်းက အတိတ်မှာ အစစ်အမှန်နတ်ဘုရားတစ်ပါး ဖြစ်ခဲ့ဆဲပင်။

စကြာဝဠာ၏ ဖွဲ့စည်းတည်ဆောက်ပုံကို ဖျက်ဆီးပစ်နိုင်သော ပေါက်ကွဲသံနှင့်အတူ နတ်ဘုရားအိုကြီးက ကိုယ့်ကိုယ်ကိုယ် ဖောက်ခွဲပစ်လိုက်သည်။

ဤသည်မှာ မရေမတွက်နိုင်သော နေအစင်းပေါင်းမြောက်များစွာက တစ်ပြိုင်နက် ပေါက်ကွဲသွားသည့်အလားပင်။ ယင်းက အလွန်ကြောက်မက်ဖွယ်ကောင်းသော အလင်းနှင့် အပူဓာတ်ကို ချက်ချင်း ထုတ်လွှတ်ပေးလိုက်သည်။

ထိုပေါက်ကွဲမှုမှ ထုတ်လွှတ်လိုက်သော အဖျက်စွမ်းအားက ၎င်း၏ လမ်းကြောင်းတစ်လျှောက်မှာရှိသော အရာမှန်သမျှကို ဖျက်ဆီးပစ်လိုက်သည်။ တစ်ချိန်တည်းမှာ မျက်စိကျိန်းစပ်လုနီးပါး ထွန်းလင်းတောက်ပသော ရွှေရောင်အလင်းက စကြာဝဠာတစ်ခုလုံးကို လင်းထိန်သွားစေသည်။

အလင်းရောင်က အရပ်မျက်နှာအဘက်ဘက်သို့ အဆုံးမဲ့စွာ ပျံ့နှံသွားသည်။

အားလှိုင်းဂယက်များ ဖြတ်သန်းသွားသည့်နေရာတိုင်း တိမ်စိုင်ခဲများက ချက်ချင်း လွင့်ပြယ်သွားပြီး ကြီးမားသော အင်အားကြောင့် အပိုင်းပိုင်းအစစ ဆုတ်ဖြဲခံလိုက်ကြရသည်။ တစ်ချိန်တည်းမှာ ထိုအားလှိုင်းဂယက်များက တည်နေရာပြောင်းရွှေ့နေသော နတ်သမီး၏ သဲလွန်စများနှင့် ၎င်းထံမှ တည်ရှိမှုအငွေ့အသက်အားလုံးကို ဖျက်ဆီးပစ်လိုက်သည်။

အစစ်အမှန်နတ်ဘုရား၏ ကိုယ့်ကိုယ်ကိုယ် ဖောက်ခွဲမှုက နတ်သမီး၏ တည်နေရာကို မည်သူမှ ခြေရာမခံနိုင်စေရန်အလို့ငှာ ဤနေရာမှ အကြွင်းအကျန်အားလုံးကို ဖျက်ဆီးပစ်လိုက်သည်။

သို့သော်လည်း ရွှီချင်းနှင့် သူ၏ အဖွဲ့သားများက ၎င်း၏ လမ်းကြောင်းရှေ့မှာ တိုက်ရိုက် ရှိနေကြသည်။ သူတို့က အစွမ်းကုန်သုံး၍ အနောက်ဆုတ်နေကြသော်လည်း အစစ်အမှန်နတ်ဘုရား၏ ကိုယ့်ကိုယ်ကိုယ် ဖောက်ခွဲမှုမှ ထွက်ပေါ်လာသော အားလှိုင်းဂယက်များ၏ အလျင်နှင့် နှိုင်းယှဉ်လျှင် သူတို့က မတ်တတ်ရပ်နေကြခြင်းနှင့် ဘာမှမခြားပေ။

အလင်းက အရာအားလုံးကို စက္ကန့်ပိုင်းလေးအတွင်း ဝါးမျိုသွားသည်။

ကြယ်ဂြိုလ်များက အက်ကွဲသွားကြသည်။ ကြယ်တာရာကောင်းကင်က ပြိုကွဲပျက်စီးသွားသည်။ ၎င်း၏ လမ်းကြောင်းရှေ့မှ တည်ရှိမှုအားလုံးက ဗလာနတ္ထိအဖြစ် ပြောင်းလဲသွားရန် ကံပါလာဟန် ရ၏။ ဤသည်မှာ စကြာဝဠာကိုယ်၌က ဗလာနတ္ထိအဖြစ် ပြောင်းလဲခံလိုက်ရသည့်အလားပင်။

အဝေးမှ ကြယ်တာရာကောင်းကင်ထဲတွင်…

ဤနေရာသို့ အမြန်ပျံသန်းလာနေကြသော ကျင့်ကြံသူများထဲမှ အဆင့်နိမ့်အင်မော်တယ်တစ်ပါးသည်ပင် ထိုအဖျက်စွမ်းအင်လှိုင်းများကို ခုခံတားဆီးရန် သူ၏ အင်မော်တယ်စွမ်းအင်ကို ချက်ချင်း ထုတ်လွှတ်လိုက်ရသည်။

သို့သော်လည်း ရွှီချင်းနှင့် သူ့အဖွဲ့သားများက ပေါက်ကွဲမှုနှင့် အလွန်အမင်း နီးကပ်နေသောကြောင့် မရှောင်လွှဲနိုင်သော မဟာကပ်ဘေးကို တွေ့ကြုံလိုက်ကြရသည်။

ရွှီချင်း၏ အသိစိတ်က ပရမ်းပတာ လှုပ်ခတ်သွားသည်။ သူ့အရှေ့မှ အရာအားလုံးကို ရွှေရောင်အလင်းက အစားထိုးသွားသည်။

သူက ကျင့်ကြံခြင်းအခြေခံကို အဆုံးစွန်ထိ ထုတ်လွှတ်လိုက်ပြီး ခုခံကာကွယ်ရန် အစွမ်းကုန် ကြိုးစားလိုက်သည်။ သူ၏ အင်မော်တယ်သန္ဓေသားလောင်းက သူ့တစ်ယောက်တည်းကိုမဟုတ်ဘဲ သူ၏ ဘေးမှ တခြားတတ်လှမ်းသူများကိုလည်း လွှမ်းခြုံသွားသည်။

သူတို့အားလုံးက နောက်တစ်ကြိမ် အင်အားပေါင်းစည်းလိုက်ကြသည်။

သူတို့က အတူတကွ ခုခံလိုက်ကြသည်။

သို့သော်လည်း ရွှေရောင်အလင်း ဖြတ်သန်းသွားသည်နှင့်ချက်ချင်း…

သူ၏ အင်မော်တယ်သန္ဓေသားလောင်းက တုန်ယင်သွားပြီး ပုံပျက်တွန့်လိမ်သွားသည်။ နောက်ဆုံးမှာတော့ ၎င်းက အရည်ပျော်သွားသည်။ ရွှီချင်း၏ ခန္ဓာကိုယ်က အပြင်းအထန် တုန်ယင်သွားသည်နှင့် အချိန်လေဟာနယ်များက သူ့ခန္ဓာကိုယ်၏ အပြင်ဘက်မှာ မြန်ဆန်စွာ ဖွဲ့စည်းသွားကြသည်။ ထို့နောက် မူကွဲရွှီချင်းများက အချိန်လေဟာနယ်များထဲမှ တစ်ယောက်ပြီးတစ်ယောက် ထွက်လျှောက်လာကြသည်။

သူတို့အားလုံးက အစွမ်းကုန်သုံး၍ ခုခံတားဆီးလိုက်ကြသည်။

သေခြင်းရှင်ခြင်းကပ်ဘေးဖြင့် ရင်ဆိုင်ရသောအခါ ကြယ်တာရာစက်ဝန်းနှင့် တခြားလူများသည်လည်း အစွမ်းကုန် ထုတ်သုံးလိုက်ကြသည်။

အမည်မသိ အချိန်ကာလတစ်ခု ကြာမြင့်ပြီးနောက် ရွှေရောင်အလင်းက ပျောက်ကွယ်သွားပြီး ဝုန်းခနဲ မြည်သံက အဝေးသို့ ဆက်လက် ပျံ့လွင့်သွားသည်။

နတ်ဘုရားအိုကြီး၏ ကိုယ့်ကိုယ်ကိုယ် ဖောက်ခွဲမှုမှ ဖွဲ့စည်းသွားသော ရွှေရောင်အလင်းပင်လယ်က နောက်ဆုံးမှာတော့ လွင့်ပြယ်သွားသည်။

တစ်ချိန်တည်းမှာ တပ်ကူများက ရောက်ရှိလာကြသည်။

ထိုကျင့်ကြံသူများက အနားသို့ ချဉ်းကပ်လာသည်နှင့်ချက်ချင်း ရွှီချင်း၏ အုပ်စုကို ရိုသေလေးစားစွာ ကြည့်လိုက်ကြသည်။ အစောနက သူတို့တွေ့ကြုံခဲ့ရသော အားလှိုင်းဂယက်များက အတော်လေး ထိတ်လန့်ချောက်ချားဖွယ်ကောင်းသည်။

အရှေ့ဆုံးမှ အင်မော်တယ်သည်တော့ သူက လွင့်ပြယ်သွားသော တိမ်စိုင်ခဲကို ဦးစွာ ကြည့်လိုက်သည်။ ထို့နောက် သူက ရွှီချင်းကို ကြည့်လိုက်ပြီး တည်ငြိမ်စွာ ပြောသည်။

“ နတ်သမီးရဲ့ တည်နေရာကို ရှာတွေ့ခဲ့ပြီး အစစ်အမှန်နတ်ဘုရားတစ်ပါးကို သတ်နိုင်ခဲ့တယ်… ဒီကိစ္စကို တပ်မှူးဆီ ငါတင်ပြပေးမယ်… မင်းတို့တွေ… ဒီတစ်ကြိမ် ကြီးကြီးမားမား အကျိုးဆောင်နိုင်ခဲ့ကြတယ် ”

“ ပြန်ပြီး အနားယူလိုက်ကြဦး ”

ထိုအဆင့်နိမ့်အင်မော်တယ်က အဖိုးအိုတစ်ယောက် ဖြစ်သည်။ သူက ရွှီချင်းနှင့် သူ့ဘေးမှ လူများကို ကြည့်လိုက်ပြီး ညင်သာစွာ သက်ပြင်းချလိုက်သည်။

သူက ကုသရေးဆေးလုံးတချို့ကို ထုတ်လိုက်ပြီး သူတို့အတွက် ချန်ထားပေးလိုက်သည်။ ထို့နောက် သူက အဝေးသို့ ပျံသန်းသွားပြီး နတ်သမီး၏ သဲလွန်စများကို လိုက်ရှာဖွေလိုက်သည်။

တခြားကျင့်ကြံသူများသည်လည်း အင်မော်တယ်အဖိုးအို၏ အနောက်သို့ မလိုက်သွားမီ ကုသရေးဆေးလုံးများကို ချန်ထားခဲ့ကြသည်။

မကြာမီ ဘေးပတ်ဝန်းကျင်က တိတ်ဆိတ်ငြိမ်သက်သွားသည်။

ရွှီချင်းက ကြယ်တာရာကောင်းကင်ထဲမှာ မတ်တတ်ရပ်နေသည်။ သူ၏ အဝတ်အစားက စုတ်ပြဲနေပြီး သူ၏ မျက်နှာက ဖြူဖျော့နေသည်။ ယခု သူက ပါးစပ်အပြည့် သွေးအန်လိုက်ရသည်။

သူ၏ ခန္ဓာကိုယ်နှင့် ဝိညာဉ်မှာ အားနည်းမှုနှင့် ပင်ပန်းနွမ်းနယ်မှုဖြင့် ပြည့်နှက်နေသည်။ သူက ခေါင်းလှည့်လိုက်ပြီး သူ့ဘေးမှ အဖွဲ့သားများကို ကြည့်လိုက်သည်။

ကြယ်တာရာစက်ဝန်း၏ နဖူးပေါ်တွင် အရောင်မှေးမှိန်နေသော အမှတ်သင်္ကေတတစ်ခု ရှိသည်။ ယင်းက သူ့ဆရာပေးထားသော အသက်ကယ်ရတနာ ဖြစ်သည်။

သို့သော်လည်း ဤအခိုက်အတန့်မှာ အမှတ်သင်္ကေတက ပြိုကွဲသွားသည်။

မရေမတွက်နိုင်သော ဒဏ်ရာဒဏ်ချက်များက သူ၏ ခန္ဓာကိုယ်ပေါ်မှာ ရှိနေပြီး သွေးက ထိန်းချုပ်မရအောင် စီးကျနေသည်။ ယင်းက သူ၏ တစ်ကိုယ်လုံးကို သွေးလွှမ်းသွားစေသည်။

သူ၏ ဘေးတွင် ကျိုးကျန်းလီက မတ်တတ်ရပ်နေသည်။ သူ၏ ခန္ဓာကိုယ်က တုန်ယင်နေပြီး အနက်ရောင်သွေးက သူ၏ မျက်လုံးထဲမှ စီးကျနေသည်။ သူ၏ မျက်လုံးများသည်တော့ ဟောင်းလောင်းပေါက် ဖြစ်သွားကြသည်။

သူက မျက်ကန်းဖြစ်သွားသည်။

မျက်လုံးက သူ့အာဏာစက် တည်ရှိသောနေရာ ဖြစ်သည်။

လီမုန့်တုသည် ခန္ဓာကိုယ်တစ်ဝက် ဆုံးရှုံးသွားပြီး သတိလစ်နေသည်။ ယခုအခြေအနေအရ သူအသက်ရှင်နေသေးသလော ပြောရန် ခက်ခဲပေသည်။

ယွင်ရှန်းစု၏ အခြေအနေသည်လည်း သူနှင့်မခြားပေ။

ချမ်ကျွင်းနှင့် ပိုင်ရီသည်လည်း အခြေအနေမကောင်းပေ။ သူတို့၏ အသိစိတ်က အလွန်အားနည်းနေသည်။ အရေးကြီးအခိုက်အတန့်မှာ သူတို့က ခန္ဓာကိုယ်ကို စွန့်လွှတ်၍ အင်မော်တယ်ဓားများအဖြစ် အသွင်ပြောင်းလဲခဲ့ကြသည်။ ယခု သူတို့က သူတို့၏ ဝိညာဉ်ကို ဆက်လက် ထိန်းထားနိုင်ရုံမျှသာ တတ်စွမ်းကြသည်။

ရှဲလင်းဇီသည်လည်း ဒဏ်ရာအပြင်းအထန် ရရှိထားသည်။ သူ၏ လက်တစ်ဖက်က ပြာဖြစ်သွားခဲ့သည်။ သူ့အရှေ့မှ ဓားကျိုးပေါ်မှာလည်း အက်ကွဲရာများဖြင့် ပြည့်နှက်နေသည်။

တခြားတတ်လှမ်းသူများသည်လည်း အလွန်ဆိုးဝါးသော အခြေအနေသို့ ကျရောက်နေကြသည်။ အများစုက ခန္ဓာကိုယ်အစိတ်အပိုင်းများ ဆုံးရှုံးသွားကြပြီး သတိမေ့မျောနေကြသည်။

ထို့ပြင် သေဆုံးသူများလည်း ရှိကြသည်။

သူတို့အဖွဲ့ထဲမှ ခုနစ်ယောက်က သေဆုံးသွားကြသည်။

ထိုလူခုနစ်ယောက်က အစောနက ရွှေရောင်အလင်းတန်း၏ ရိုက်ခတ်မှုအောက်မှာ မည်သည့်အစအနမှမကျန်ဘဲ ဖျက်ဆီးခံလိုက်ကြရသည်။ ယင်းက သူတို့၏ ရုပ်ခန္ဓာကိုယ်နှင့် ဝိညာဉ်ကို အမြစ်ဖြတ်သုတ်သင်ရှင်းလင်းခဲ့သည်။

သူတို့အားလုံးက အတူတကွ အင်အားပူးပေါင်း၍ ခုခံတားဆီးခဲ့ကြသော်လည်း သူတို့တစ်ယောက်ချင်းစီက ကြီးမားသော တန်ဖိုးကို ပေးဆပ်ခဲ့ကြရသည်။

မူလက (၁၉)ယောက်ရှိသော အဖွဲ့သည် ယခု (၁၂)ယောက်သာ ကျန်ရှိကြတော့သည်။

ရွှီချင်းက တိတ်တဆိတ် အကြည့်ပြန်ရုပ်လိုက်ပြီး အဝေးသို့ ကြည့်လိုက်သည်။

သူ၏ နှလုံးသားထဲမှ အေးစက်မှုက ပိုပြီးအားကောင်းလာသည်နှင့် သူက အရိပ်လေးထံသို့ အသံပို့လွှတ်လိုက်ပြီး နတ်သမီး၏ သဲလွန်စများကို စစ်ဆေးရှာဖွေခိုင်းလိုက်သည်။

သူက အနည်းငယ် ဆန္ဒမရှိပေ။

တစ်ချိန်တည်းမှာ မျက်ကန်းဖြစ်သွားသော ကျိုးကျန်းလီက အက်ရှရှအသံဖြင့် ပြောသည်။

“ အရင်က ငါပြောခဲ့တယ်မဟုတ်လား… ဒီတာဝန်က… အရမ်းအန္တရာယ်များတယ်လို့ ”

“ ဘာပဲပြောပြော အဲ့ဒါက အစစ်အမှန်နတ်ဘုရားတစ်ပါးမဟုတ်လား ”

“ သခင်လေးကြောင့်သာမဟုတ်ရင် ငါတို့တစ်ဖွဲ့လုံး ဒီနေ့ အမြစ်ဖြတ်သုတ်သင်ခံရလိမ့်မယ် ”

“ ဒါပေမဲ့ ငါတို့က ကျင့်ကြံသူတွေ ဖြစ်တယ်… ငါတို့ရဲ့ လမ်းကြောင်းမှာ အတားအဆီးတွေက အမြဲတမ်း ရှိတယ်… ကောင်းကင်ဘုံ၊ တခြားလူတွေနဲ့ နတ်ဘုရားတွေက ငါတို့ရဲ့ လမ်းကြောင်းပေါ်က အတားအဆီးတွေပဲ… တကယ်လို့ မင်းက အရှေ့ကို ဆက်လှမ်းချင်တယ်ဆိုရင် သူတို့တွေကို ကျော်ဖြတ်ရလိမ့်မယ်… ဒီတော့ ငါတို့ကျရှုံးသွားတာဟာ ငါတို့ရဲ့ တာအိုမီးတောက် ငြိမ်းသတ်သွားရုံပါပဲ… ရှင်သန်ဖို့အတွက် တိုက်ခိုက်ရတဲ့ တိုက်ပွဲတွေမှာ သေမင်းက အမြဲတမ်း အနားမှာ ရှိတယ် ”

“ အစစ်အမှန်နတ်ဘုရားတစ်ပါးကို ငါတို့နဲ့အတူ ဆွဲချနိုင်ခဲ့တဲ့အတွက်… ဒီဟာက ထိုက်တန်ပါတယ် ”

ကျိုးကျန်းလီက ပြုံးလိုက်သည်။ သို့သော်လည်း ထိုအပြုံးထဲမှာ ဆန္ဒမရှိသော အရိပ်အယောင်တချို့ ကိန်းအောင်းနေသည်။

ရှဲလင်းဇီ၏ မျက်လုံးသည်လည်း နီရဲနေသည်။

“ နတ်သမီးကို အရှင်မဖမ်းဆီးနိုင်ခဲ့တာတော့ စိတ်မကောင်းစရာပဲ ”

သူ၏ လေသံမှာ နောင်တဖြင့် ပြည့်နှက်နေသည်။

သူတို့နှစ်ယောက်၏ စကားများကို နားထောင်ပြီးနောက် ကြယ်တာရာစက်ဝန်းက ရွှီချင်းကို ရုတ်တရက် ကြည့်လိုက်သည်။

“ ရွှီချင်း… မင်း အဲ့ဒီနတ်သမီးကို တစ်ကြိမ်ရှာနိုင်ခဲ့တယ်… ဒီတော့ မင်း သူ့ကို နောက်တစ်ကြိမ် ထပ်ရှာနိုင်လား ”

ရွှီချင်းက ကြယ်တာရာစက်ဝန်းကို ကြည့်လိုက်သည်။

“ ငါတို့ထဲက ခုနစ်ယောက်က သေဆုံးသွားပြီး အများစုက ဒုက္ခိတဖြစ်သွားကြတယ်… သူတို့အတွက်ဖြစ်စေ ဒါမှမဟုတ် ငါ့အတွက်ဖြစ်စေ အဲ့ဒီနတ်သမီးကို ငါဖမ်းချင်တယ် ”

“ မင်းလည်း ငါ့လို ဆန္ဒရှိတယ်မလား ”

ကြယ်တာရာစက်ဝန်း၏ မျက်လုံးထဲမှာ လေးနက်သော အဓိပ္ပာယ် ပါဝင်နေသည်။ နတ်သမီး၏ ထူးဆန်းသော လုပ်ဆောင်မှုများကို ထုံးစံအားဖြင့် သူသတိပြုမိခဲ့သည်။ ထိုနတ်သမီးက ရွှီချင်းကို မြင်လိုက်သည့်အခိုက် သူ့ကို အဓိကပစ်မှတ်ထားခဲ့သည်။

ယင်းကို ရွှီချင်းကြားသောအခါ သူ၏ အကြည့်က လူတိုင်းပေါ်သို့ ဖြတ်သန်းသွားသည်။ ဤအခိုက်အတန့်မှာ ဆက်လက် တိုက်ခိုက်နေသေးသူက သူနှင့် ကြယ်တာရာစက်ဝန်းသာ ရှိသည်။

သူက ကြယ်တာရာစက်ဝန်းကို ကြည့်လိုက်ပြီး ဖြည်းညင်းစွာ ပြောသည်။

“ အစစ်အမှန်နတ်ဘုရားရဲ့ ကိုယ့်ကိုယ်ကိုယ် ဖောက်ခွဲမှုက သဲလွန်စအားလုံးကို ဖျက်ဆီးသွားခဲ့တယ်… အဲ့ဒီနတ်သမီးရဲ့ တည်နေရာပြောင်းရွှေ့မှုကို ဆက်ပြီး အာရုံမခံနိုင်တော့ဘူး… ဒါ့အပြင် သူက ဒီနေရာနဲ့ အရမ်းဝေးကွာတဲ့နေရာကို ရောက်သွားလောက်ပြီ… အဲ့ဒီနေရာက ငါ့ရဲ့ ဝိညာဉ်သားရဲရဲ့ အာရုံခံနိုင်စွမ်းထက် ကျော်လွန်နေတယ် ”

ကြယ်တာရာစက်ဝန်းက နှုတ်ဆိတ်သွားသည်။

ရွှီချင်းက ခေါင်းလှည့်လိုက်ပြီး အဝေးမှ ကြယ်တာရာကောင်းကင်ကို ကြည့်လိုက်သည်။ သူ၏ မျက်လုံးက ဖြည်းညင်းစွာ မှေးကျဉ်းသွားသည်။

“ ဒါပေမဲ့… ငါကြိုးစားကြည့်ချင်တဲ့ နည်းလမ်းတစ်ခု ရှိတယ် ”

ရွှီချင်းက စကားဆုံးသည်နှင့် လက်မြှောက်လိုက်ပြီး တည်နေရာပြောင်းရွှေ့ခြင်း ကျောက်စိမ်းပြားတစ်ခုကို ထုတ်လိုက်သည်။

အစက ထိုကျောက်စိမ်းပြားထဲတွင် တည်နေရာပြောင်းရွှေ့မည့် နေရာကို သတ်မှတ်ထားပြီးသား ဖြစ်သည်။ သို့သော်လည်း ရွှီချင်းက သတ်မှတ်ထားသော တည်နေရာကို ပယ်ဖျက်လိုက်ပြီး ယင်းကို ကြုံရာကျပန်းအဖြစ် ပြောင်းလဲလိုက်သည်။

တစ်နည်းဆိုရလျှင် ဤကျောက်စိမ်းပြားကို သူအသုံးပြုလိုက်သည့်အခါ ကြုံရာကျပန်းနေရာဆီသို့ တည်နေရာပြောင်းရွှေ့သွားလိမ့်မည်။

ယင်းက ကံပေါ်မှာ မူတည်လိမ့်မည်။

ယင်းက ရွှီချင်းစဉ်းစားမိသော ဖြေရှင်းနည်း ဖြစ်သည်။

သူက နတ်သမီး၏ သဲလွန်စများကို မရှာဖွေနိုင်သလို ၎င်းကိုလည်း အာရုံမခံနိုင်ပေ။ သို့သော်လည်း ကံကြမ္မာဒီရေက နတ်သမီးကို သူ့ဆီသို့ ပေးပို့လာလိမ့်မည်။

ထိုသို့ဆိုမှတော့ နတ်သမီး သူ့ဆီသို့ ရောက်လာမည်ကို အချိန်အကြာကြီး စောင့်ဆိုင်းနေမည့်အစား မည်သို့ကြောင့် သူ့ဘက်မှ အရင်သွားမရှာရမည်နည်း။

ရွှီချင်း၏ အကြည့်က နက်မှောင်သွားသည်။

အကယ်၍ အရာအားလုံးကို ကံကြမ္မာက သတ်မှတ်ထားပြီးသားဆိုလျှင် ကြုံရာကျပန်း တည်နေရာပြောင်းရွှေ့ခြင်းက သူလိုချင်သော ရလဒ်ကို ပေးစွမ်းနိုင်လောက်သည်။

သို့ဖြစ်၍ သူက တည်နေရာပြောင်းရွှေ့ခြင်း ကျောက်စိမ်းပြားကို ဆုပ်ကိုင်ထားရင်း ကြယ်တာရာစက်ဝန်းကို ကြည့်လိုက်သည်။

ကြယ်တာရာစက်ဝန်းက ရွှီချင်း၏ လက်ထဲမှ ကျောက်စိမ်းပြားကို ကြည့်လိုက်ပြီး နက်နဲစွာ တွေးတောလိုက်သည်။ သို့သော်လည်း သူက ထိုအကြောင်းကို မမေးပေ။ ယင်းအစား သူက အရှေ့သို့ လျှောက်သွားပြီး ရွှီချင်း၏ ဘေးမှာ ရပ်လိုက်သည်။

ကျိုးကျန်းလီနှင့် ရှဲလင်းဇီက ရွှီချင်းနှင့် ကြယ်တာရာစက်ဝန်းကို အရိုအသေပေးလိုက်ကြသည်။

သူတို့က နောက်လာမည့်တိုက်ပွဲမှာ ပါဝင်ရန် အင်အားမရှိကြတော့ပေ။ ထို့ပြင် သူတို့၏ ဒဏ်ရာများကို ပြန်ကုသရဦးမည်။ အရေးကြီးဆုံးမှာ သတိမေ့မျောနေကြသော သူတို့၏ ရဲဘော်ရဲဘက်များ ဖြစ်ကြသည်။ သူတို့ကို အမြန်ဆုံး ကုသပေးရန် လိုအပ်သည်။

သို့ဖြစ်၍ သူတို့က နန်းလင်တပ်မတော်၏ စခန်းဆီသို့ ချက်ချင်း ပြန်ကြရလိမ့်မည်။

“ သခင်လေး… ကြယ်တာရာစက်ဝန်း… ငါတို့ စခန်းထဲမှာ ရှိနေကြပါမယ်… နတ်သမီးကို မင်းတို့ဖမ်းမိသွားတယ်ဆိုတဲ့ သတင်းကို ငါတို့စောင့်မျှော်နေကြပါမယ် ”

ကျိုးကျန်းလီက အက်ရှရှအသံဖြင့် ပြောသည်။

သူ၏ အသံက ပဲ့တင်ထပ်သွားသည်နှင့် ရွှီချင်းက ခေါင်းညိတ်လိုက်သည်။

နောက်အခိုက်အတန့်မှာ သူက ကျောက်စိမ်းပြားကို ချေမွဖျက်ဆီးလိုက်သည်။

တည်နေရာပြောင်းရွှေ့ခြင်းအလင်းက သူ၏ လက်ထဲမှ ချက်ချင်း ပျံ့နှံ့ထွက်လာသည်။ ယင်းက သူ့ဘေးမှ ကြယ်တာရာစက်ဝန်းကို လွှမ်းခြုံသွားသည်။ ထို့နောက် အလင်းရောင်က အထွတ်အထိပ်သို့ ရောက်ရှိသွားပြီး ကျယ်လောင်သော မြည်သံက ထွက်ပေါ်လာသည်။

သူတို့နှစ်ယောက်က နေရာမှ ချက်ချင်း ပျောက်ကွယ်သွားကြသည်။

…..

ထိုအခိုက်အတန့်မှာ ဘယ်တောင်ပံစစ်ပွဲဇုန်မှ ရှေ့တန်းစစ်မြေပြင်၏ ကြယ်တာရာကောင်းကင်ဧရိယာတစ်ခုတွင် ကြယ်တာရာမျက်လုံးနတ်သမီး၏ ပုံရိပ်က အနက်ရောင်အလင်းတန်းတစ်ခုအဖြစ် ပြောင်းလဲနေသည်။ ဤဧရိယာက နတ်ဘုရားများဘက်မှ နယ်စပ်နှင့် သိပ်မကွာဝေးချေ။

ယခု ၎င်းက ကိုယ့်ကိုယ်ကိုယ် အလွန်လျှို့ဝှက်စွာ ဖုံးကွယ်ထားရင်း အရှေ့သို့ ရွေ့လျားနေသည်။ ၎င်းက ဟင်းလင်းပြင်ကို ဖြတ်သန်းသွားနေသည်။

ဤနေရာက အမှတ်လေးကြယ်တာရာစက်ဝန်းနှင့် အလွန်နီးကပ်သောကြောင့် ဤနေရာမှာ ဒြပ်နှောများ ပေါများသည်။ ယင်းက ကြယ်တာရာမျက်လုံးနတ်သမီး၏ ဖုံးကွယ်မှုကို ပိုပြီးအဆင်ပြေချောမွေ့စေသည်။

၎င်းက ဤနေရာသို့ တိုက်ရိုက် တည်နေရာပြောင်းရွှေ့သွားခဲ့လေရာ ၎င်းက အတော်လေး ကံကောင်းနေဟန် ရ၏။

“ အမှတ်လေးကြယ်တာရာစက်ဝန်းဆီ အများဆုံး ရက်အနည်းငယ်အတွင်းမှာ ငါပြန်ရောက်နိုင်လိမ့်မယ် ”

“ ဒါပေမဲ့ အကြောင်းအရင်းတချို့ကြောင့် ခမည်းတော်ဆီကနေ ဘာတုံ့ပြန်မှုမှ မရသေးဘူး… ”

ကြယ်တာရာမျက်လုံးနတ်သမီးက အရှေ့သို့ ရွေ့လျားနေရင်း နက်နဲစွာ တွေးတောလိုက်သည်။ အစောနက အဖြစ်အပျက်ကို ပြန်စဉ်းစားလိုက်သည့်အခါ အေးစက်မှုက ၎င်း၏ မျက်လုံးထဲမှာ ထွက်ပေါ်လာသည်။

၎င်းက နတ်ဘုရားအိုကြီး၏ ကိုယ့်ကိုယ်ကိုယ် ဖောက်ခွဲမှုကို ဂရုမစိုက်ချေ။ ၎င်း၏ အမြင်တွင် တစ်ဖက်လူ၏ ကိုယ့်ကိုယ်ကိုယ် ဖောက်ခွဲမှုက ထိုအချိန်မှာ အကောင်းဆုံး ရွေးချယ်မှု ဖြစ်သည်။

နတ်ဘုရားအိုကြီး၏ ကိုယ့်ကိုယ်ကိုယ် ဖောက်ခွဲမှုက ၎င်း၏ တည်နေရာပြောင်းရွှေ့မှုနှင့်ပတ်သက်သော သဲလွန်စများကို ဖျက်ဆီးပေးနိုင်ရုံသာမက ၎င်းကို နှလုံးတုန်လှုပ်စေခဲ့သော ထိုလူသားကျင့်ကြံသူကိုလည်း သတ်ပစ်နိုင်လိမ့်မည်။

ထိုလူသားကျင့်ကြံသူကို ၎င်းစဉ်းစားလိုက်သည့်အခါ သတ်ဖြတ်ခြင်းစိတ်ဆန္ဒက ၎င်း၏ နှလုံးသားထဲမှာ ထပ်မံ ပေါ်လျှိုးလာသည်။

“ အဲ့ဒီလူက ဘယ်သူလဲ… ”

ထိုလူက နတ်ဘုရားအိုကြီး၏ ကိုယ့်ကိုယ်ကိုယ်‌ ဖောက်ခွဲမှုကြောင့် သေဆုံးသွားပြီလော သို့မဟုတ် အသက်ရှင်နေသေးသလော ၎င်းဂရုမစိုက်ချေ။ သို့သော်လည်း ဤကိစ္စကို ၎င်း၏ ခမည်းတော်ဆီသို့ အမြန်ဆုံး အကြောင်းကြားရလိမ့်မည်။

၎င်းခမည်းတော်၏ အစွမ်းဖြင့်ဆိုလျှင် ၎င်း၏ နှလုံးသားထဲမှ သံသယများက ရှင်းလင်းသွားလိမ့်မည်ဟု ၎င်းယုံကြည်သည်။

ထိုသို့တွေးမိသောအခါ ၎င်းက ထပ်မံ အရှိန်မြှင့်တင်လိုက်သည်။ သို့သော်လည်း ထိုအခိုက်အတန့်မှာ ၎င်း၏ တစ်ကိုယ်လုံးနှင့် ၎င်း၏ နှလုံးကို အပြင်းအထန် တုန်ယင်သွားစေမည့် မြင်ကွင်းတစ်ခုက ရုတ်တရက် ထွက်ပေါ်လာသည်။

၎င်း၏ အရှေ့မှ ဟင်းလင်းပြင်တွင် လှိုင်းဂယက်များက ရုတ်ချည်း ထွက်ပေါ်လာသည်။

ဖရိုဖရဲဖြစ်နေသော တည်နေရာပြောင်းရွှေ့ခြင်းအားလှိုင်းက ဟင်းလင်းပြင်ထဲမှ ပျံ့နှံ့ထွက်လာပြီး အရပ်ရှစ်မျက်နှာသို့ ဖြန့်ကြက်သွားသည်။ နောက်အခိုက်အတန့်မှာ ပုံရိပ်နှစ်ခုက ဟင်းလင်းပြင်ထဲမှ ထွက်လျှောက်လာကြသည်။

သူတို့ထဲမှ တစ်ယောက်က အစောနက ၎င်းစဉ်းစားနေခဲ့သော လူသားကျင့်ကြံသူ ဖြစ်သည်။

“ နင်… ”

၎င်း၏ အမူအရာက သိသာစွာ ပျက်ယွင်းသွားသည်။

ထိုသို့ရုတ်တရက် ထွက်ပေါ်လာမှုက ၎င်း၏ အသိစိတ်ကို ပရမ်းပတာဖြစ်သွားစေသည်။ ၎င်း၏ နတ်ဘုရားသဘာဝသည်ပင် ယိမ်းယိုင်သွားသည်။

ထိုမြင်ကွင်းက ၎င်း၏ နှလုံးတုန်ယင်မှုကို ချက်ချင်း ပြင်းထန်သွားစေသည်။

၎င်းက ကြုံရာကျပန်း တည်နေရာပြောင်းရွှေ့ခြင်းကို အသုံးပြုခဲ့ပြီး အစစ်အမှန်နတ်ဘုရားတစ်ပါး၏ ကိုယ့်ကိုယ်ကိုယ် ဖောက်ခွဲမှုဖြင့် သဲလွန်စများကို ဖျက်ဆီးပစ်ခဲ့သည်။ သို့ဖြစ်၍ သီအိုရီအရဆိုလျှင် ပညာရှင်ကျင့်ကြံသူများက သဲလွန်စများကို ရှာတွေ့သွားမည်ဆိုလျှင်ပင် ယင်းတို့ကို စုံစမ်းစစ်ဆေးရန် အချိန်တစ်ခု ယူရဦးလိမ့်မည်။ သူတို့က ယခုကဲ့သို့ ၎င်းကို မြန်ဆန်စွာ ရှာတွေ့နိုင်လိမ့်မည် မဟုတ်ချေ။

အထူးသဖြင့် တစ်ဖက်လူ၏ တည်နေရာပြောင်းရွှေ့ခြင်းကလည်း ကြုံရာကျပန်းဖြစ်ကြောင်း အလွန်ထင်ရှားပေသည်။

သူတို့က ကြုံရာကျပန်း တည်နေရာပြောင်းရွှေ့လာခဲ့ကြခြင်း ဖြစ်သည်။

သို့တိုင်အောင် သူတို့က ၎င်း၏ အရှေ့တည့်တည့်မှာ ထွက်ပေါ်လာကြသည်။

ထိုမြင်ကွင်းက ကြယ်တာရာမျက်လုံးနတ်သမီး၏ နတ်ဘုရားသဘာဝကို အပြင်းအထန် လှုပ်ခတ်သွားစေသည်။